THROUGH THICK AND THIN-11

THROUGH THICK AND THIN-11

KIMKIMI

"I va rei ve Lalrinkim..thim thleng rakin an zirtir che tihna em ni?" ka pindan lam pan mai ka tum laia ka nu in  vin zet a zawhna min lo zawh chuan ka ding chawt. Ka pa a awm ve reng vangin ka hlau lehzual a, sawi mai tur ka hre lo. 

"Eng nge itih chen chen? Dinpuia i hmu leh tawh em ni?" a ti leh a, an ţhutna lam chu ţi dak a hawiin "Didiki te inah ka leng kawi" ka ti zawp sep. 

"A ni maw? In awmdun laiin U Didiki chuan phone a khawih em? Nilengin in awm dun em?" ka nauin phur fein a lo ti ve thung. 

Ka nu chuan thinrim zetin "Chutiang thu ho te te lo zawt ve sek suh. Tetea pui rawh ka ti che a ni lawm ni? Mawl het huat lutuk mai nangpawh hi" a ti hmuar hmuar a, keimah bawk chu min en lehin "Timothy-a rawn haw ka hmuhna a rei tawh. Eng nge Didiki te inah chuan i tih?" a ti leh a, dawt sawi tur ka ngaihtuah kual a, min melh ran reng bawk vangin ka zam lutuk chuan chil ka lem khawlh. 

"Naktukah a insawn tawh dawn a, chumi chungchang vel sawi dun pah chuan a thawmhnaw ka tihfel pui a" 

"A insawn dawn maw? Khawiah? Ka lokal ve duh" 

"Lalrintluang" ka nu in a tih tuarh takah chuan hmui a chip hmak. 

"I nu leh pa kan nih chhung chu min fin khalh lo vang. Tlai a i lenkawina kan hre vek tawh. Phone a awm tawh a, nangni ang bawkin thil kan inhrilh kual ve zung zung thei tih hre rawh. Kan khirh lehzual tawh ang ti a kan hrilh tawh che kha, i thlah tih ka chian hma chu ka khung bet hreh reng reng lo che" a ti hmarh hmarh a, a thawk ran danah a thinrim zia a hriat chian theih viau. 

"Ka hmu tawh lo vang" ka ti a, dawt ka hrilh. Nidangah pawh kan inhmu ru fo a, a ruk a ka hmuh reng theih tho ka ring a ni. 

"Kan duh lo kan tih fo chuan thu awih mai rawh. Dinpuia hian engmah a tih sak thei lo che. A chawm thei lo che a, i lehkhazirna phei chu a tum thei lo lehzual. A chanchin ţha lam aiin chhe lam hriat tur a tam zawk a, a pa diktak ka hriat hnu ngat phei chuan ka duhpui lo lehzual che. Nei mah la reilote ah a ning thuai che ang a, a ţhen vat ang che. Engpawh tiam che se Dinpuia ang mipa hi chu ring reng reng suh" a ti leh bawrh bawrh a, Fredy chuan a rukin zaizirin inchung lam a chho turin min hrilh a, ka che ngam chuang lo. 

"Nitin deuh thaw a ţhat loh thu ka hrilh ziah che a, a felna lai sawi tur ka hre thlawt lo a ni. Chhungte ring a nung ve satliah, hmasawn tumna nei bawk si lo. Anu pawisa in engkim a lei a, anu pawisa in a rui a, hetiang mi hi makpa atan ka awt hlawl lo" a tih zawm leh a, ţawngkam a duhtui lovin a duhthaw ka ti ru kher mai. 

"Tetea leh keipawh tuma'n makpa atan min awt dawn bik lo anih chu. In pawisa in engkim kan lei ve tho sia" ka nau chuan a lo ti veleh zeuh a, nidang a ka thlavang hauh ngai mang si lo ka lam a ţang thut chu lehlam zawng chuan a mak. 

"Lalrintluang ngawi mai mai rawh. Thu pangai ka sawi a, i thusawi mawl mang tak tak kha ka ngaithla peih lo" ka nu chuan a ti chang fak a, ka nau hi Fredy Lalrintluanga a ni. Kan naupangber a ni a, ka pa phei chuan a hau phal mang lo. Ka thlavang a hauh hian ţhatna lai a nei ve tho a, ka pa a inrawlh loh phah. 

"Makpa atan min awt bik dawn lo ka tih a nih kha. Eng nge i huat viau a pi Eminem? Office ban rual hian i rap zaih zaih zel mai a, tunlai phei chu i tui tharin ka hria, album lam te hi?" ti a ka Fredy-an ka nu a fiam chuan hlau viau mah ila ka nui tet tet a, ka nu thinrim hmel lutuk leh ka pa nuih insum ka hmuh phei chuan ka nuih chhuah hlauin hmui ka pet tlat. 

"Mipa ve si ţawngthei zep zuap lutuk, naktuk aţang chuan pawisa mi dil tawh hlek suh, hrereng rawh" ka in a ti khur khur a, Fredy nen chuan thip zetin min melh tawn zak zak. Ka nui tawp chiang hle. Tihsual a nei ve lem lo bawk a, ka nau chuan ngaihsam fe hian "Apa a awm tho" a ti liam satliah a, keimah zawk chu pawisa min pek duh loh ve mai ka hlau khawp mai. Khawl nual tho mah ila min pe zel se, Dinpuia pawh tlem tlem a puih ve theih ka inbeisei a ni. 

"Han inthlak la chaw ei turin rawn chhuk rawh. Class kal tur a i chhuah bak chu khawiah mah kal tawh suh ang che" ka pa in a tih ve takah chuan hlau viau mah ila "Naktukah ţhianho in Didiki insawn pui kan tum a, kal i phal em?" ka ti a, ka dil pah a ni ber. 

"Khawiah nge insawn a tum?" 

"Kan vengah tho hian. Veng mawng lamah a nia, bungrua chu mipa ho in an thiar thei ang a, hmeichhe ho chuan a intharah lo nghakin kan lo ti fel thung ang. Veng dangah ka kal chhuak ve dawn lo" ka pa hneh tumin zaidam ve hmel fe hian a ţawng a, a ngaihtuah vung vung hnuah a bu nghat nghat a, mipa hi a chang chuan hmeichhia aiin an awlsam ţhin reng a ni. 

"Bawiha hi hruai ve la vengchhung a nih tho chuan. Inu pawhin a ngaihtuah lo deuh hlek ang che. Kan thusawi i ngaithla ngun tawh a, kan duh loh zawng i hre vek tawh. I zawm lo lui zel anih chuan hrehawm i tihna tur thil tih hreh ka nei ve lo a nia" tiin pangai takin min hrilh a, ka nu thinrim au vak vak a ngaithla hne ve deuh a ni maithei thu tawp a siam nghal danah hian. 

"Awle" ti sepin muangchangin inchung lamah ka chho a, thawm dang ka ngaichang lo bawk a ka pindan chhung a ka nau ka hmuh veleh min zui tih ka hre chiah. 

"Pa min ti em Kim, ka nu khan min chhan ngaihna a hre miah lo. Naktukah chuan dar engzatah nge kan kal ang" tha tho zet a min zawh pahin khumah a bawk thlawrh a, a nui vur vur reng bawk. 

"Ngati nge lokal i chak ve tlat a? Nidang a min zui tum ngai der si lo" ka ti a, hruai chak lo viau mah ila amah vangin min hau nasa lo ve bawk sia, hnar ngawt thei ka ni lo. 

"Sir in mahni ai upa bul a tal tam chuan puitlin a awl a tia,i kalna apiangah ka lokal ve tawh dawn. Mahse in ţhianho in kim vek dawn chauhin" a ti a, ka lo ner nang. 

"Nang aiin an naupangchhia vek. Kan ţhianho bul a i awm chuan i mawl tulh tulh ang" 

"Mawl mah ila ka ngaih a ţha dawn tho a" a ti ţalh a, hriatchhuah leh tih tum thar ka nei thut. 

"Enteh Bawiha" tih pahin a bulah ka ţhu a, a hnungzang a kut dahin "Zanah chhang siam ang hmiang. Youtube ah tih dan ka en ang a, Au Rintei khan a tui thar thut lai khan hman rua a lei ţeuh tho a, kha kha kan hmang ang a, a tui leh tui loh i ei chhin zel ang a, kan siam tui viau leh naktukah ka ţhiante ei atan i kensak ang a" ka ti a, ka thlem ti tih. 

"Engtikah nge kan siam ang? Tui deuh deuh i siam thiam ang maw?" min ring vak lo a ni tih hriat zet hian min zawt ve khauh. 

"Thiam tehreng e. Tih dan en chuan kan thiam vek ang chu. Chaw eikhamah kan ţan ang a, an mu hma ţhin tho a, thawm an hre dawn chuang lo va, zanrei deuh thleng kan ti dawn nia, chhang i kensak chuan an lo lawm em em ang che. I lokal ve thei reng mai ang" ka tih leh meuh chuan a phur tawh takzet. 

"Awle kan siam dawn nia, rin aiin i fing daih" tiin min fak a, Dinpuia vang a ti ka ni reng sia, ka ţangkai ve theih zia hriattir ka duh a ni. Ka nu bulah ka hmu tawh lovang ti mah ila ţhen tumna ka nei lo bur. 

Chaw ei laiin kan upa ber U Rintei leh ka nu chuan min zilh leh melh melh a, ka ningin chaw ei an ti tui lo kher mai. Dinpuia chhiatna lai hlir hrechiang ber awm ang zia zangin an sawi reng a, mipa ho an ngawi ţhap thung. Chhan a tum ni a ka rin apiangin Fredy-a ke ka tlawh ru leh zeuh ţhin a, a chhaih kawlh mai mai ka hlau a ni. 

Chaw eikham veleh naktuk a mi tur chhang siam ve kan duh thu kan sawi a, U Rintei'n phal takin a hmanraw lei sa ho min hman tir bawk. Awlsam deuh hlek ka zawn kual laia Dinpuia'n min rawn biak a tum chuan bathroom ah ka tlan lut. 

"Eng nge i tih?" ti a min zawh chuan ka chhan hmain ka ţhu rem hmasa te te. 

"Chaw kan eikhamna a la rei lo va, thleng ka sil zo deuh chiah. Naktuk hi Didiki insawn luh hun a ni tawh a,hunawl insiam la, lokal ve la" ka ti nghal zat zat a, ţawng ve na hun ka siam meuh lo. 

"Khawiah?" 

"Kan vengah lokal tawp la, midangin bungrua an thiar ang a, inah kan lo nghak dawn nia, i lokalna hmun tur ka hrilh che ang a, ka lo nghak ang che" phur zet hian ka ti leh mawlh mawlh. 

"Ka hmuh theihna che anih chuan ka lokal ang. Chhang siam ho bul a awm bak tih tur a awm chuang lo. Ka pui a, ka ţangkaipui viau tho a" ti a min hrilh lai chuan ka patea thusawi kha ka hrechhuak ruai ruai a, mahse engmah ka sawi chhuak duh lo. Hrehawm a tihna tur siam sak ka tum lo bur. 

"Aw inhmuhna remchang anih vang a nia ka sawm che. Min ngai chiang mai" nui har har chung hian ka ti a, diktak chuan keimah zawkin ka ngai. 

"Ngai e, ka ngaih vang chein anih hi ka lo biak che" 

"Zu i in lo tiraw?" tih pah a thoin darthlalang ah ka inen a, mit hmul ka ti chuar vel thul. 

"Kum khat vel ka nghei tawh" a tih sup lai chuan ei lo zetin hmui hnuai lam ka ti pawrh a, duhthusam zan a nasa a ti pawrh ka ni bawk a ka hnar awmdan a mak lutuk. Dinpuia hmuh laia ka hmui ti pawrh tawh miah lo turin rilru ka siam nghal. 

"Vel che hian..i inluih zel chuan hma tawkah i thi dawn tihna ni mai. Ka nau nen chhang siam ve kan tum a, ka siam fuh viau chuan naktukah ka eitir ve ang che" ka ti a, ka nui zui ver ver. 

"Eng chhang nge i siam dawn?" 

"Cake te...a rem rem a ni mai" ti a ka hrilh chuan a nuih a za kher mai. 

"Ngati nge i nuih? Min va ring awm lo ve" lungawi lo deuh chungin ka zawt. Min phur pui ka ring ve em em a.

"Ka ril a ţam nghal a, chuvang zawk chu. A siam tuin a zir bawk a, a tui dawn em a" ka awki diklo a hriat hnuah a rawn insawi thiam leh vel. 

"Tui deuh deuhin ka lo siam ang. Lo nghak rawh aw, thlalak ka lo thawn zel ang che" ka ti a, reilote kan inbiak zui hnuah kan ti tawp a, min hmu dawn miah lo mahse darthlalangah inen in insiamţhat nan ka intuai nasa mai. 

"Kha eichhin rawh se" duh aiin kan lo ur rei a, a chung a ut ruam. A daih hun kan nghak a, ei ngam anih veleh ka nau hmaah a eichhin turin ka dah. 

"Hei hi plain cake maw Kim?" ti a min zawh chuan nui ver ver chungin ka lo bu nghat nghat. Theihtawp chhuah a ka siam ve a nia, a tui ngeiin ka ring. Chil a lem khawlh hnuah a ei tur chin a zai thla a, a kaih hmawk a, a ţhial ri zui ruap ruap. 

"A va sak ve, a chung dum lai hi a sak lutuk" ti ve bawk mahse a zai sa chu a ei zo vek tho. 

"Ti leh ila, hniam deuh hlekin kan ur tawh ang a, a chung a sak tawh lo mai ang" phur zet a tih pahin a ngai chiah siam tumin ka buatsaih leh sawk sawk. Vawihnih naa ka siam pawh ka en lai mek a an siam nen chuan enkawpin ka nau chu a thaw hawlh a, a lokal ve duh miau vangin ka thu a zawm a ngai a, a eichhin leh. Min fak sak hnu pawhin ka duhthusam a ni lo zel a, ka siam nawn ngun. Cookies thlengin ka siam a, hmanrua a awm bawk a, awlsam deuh deuh, tupawhin an tih ve theih tur chi chu ka siam ve thei zel. Dinpuia ka hmuh tir tur anih vangin ka uluk a, chuzawng chu. 

"Ka puar tawh e..ka lu hai vek tawh.. eichhin ve tawh rawh" dar12 a rik meuh chuan meng khup lap chungin a puar tawh thu min hrilh. 

"Tun chiah eichhin leh lawk rawh a tawpna ber tur a ni tawh. Naktuk a ken theih chin kan dah nual tawh a, hei bak a ngai tawh hleinem" ka ti a, dawhkan a bawk zawi ngiai chungin a ang tawp. Ka hnawh lut rawk rawk a, muangchangin a lo ţhial a, a bu zeuh zeuh a, ka eichhin veleh chauh. 

Ken tlak ka nei nual a, rilru hlim tak chungin bawm phuiah ka khung ruih. A hmel mawi lo deuh, ka ken duh loh tur ho chu chhungte ei turin ka dah chhuak a, ka chetna hnawk zawng zawng ka tihfel vek hnuah Fredy-a dawhkan bawh a muhil bam chu ka kaitho a, rin ai daihin a lo tlai tawh bawk nen ka khawngaih reuh hle. 

Chhang siam sa ka khung ţhat ho zawng zawng chu ka pindanah ka la lut tel vek a, ka phur tawh takzet. Ka ţhiante ho in ka siamtui ring vak lo chung a an ei tur te leh an rin aia a lo tui tur si lai te ka mitthla nghal vek a, Dinpuia hlim hmel thlengin ka hmu vek thei. Zan dang a mutchhuak ngai mang si lo kha mutchhuakin min zem chiai chiai a, thlamuang deuhin ka mu ve. 

"Ka lei hnem tehreng nen i hmang zo vek maw?" U Rintei meng phar nasa lutuk chu mak ka ti lem lo. Butter ka hmang nasa a, mahse butter chu kan kawl hnem ţhin hrim hrim kan duh tlang em a, thil dang kha chu ka hman zawh a ring vak lo a ni ngei ang ka hmang zo ka tihin mak a ti emai. 

"Aw hmang zo vek. Inzir nan te chuan hmanrua kan heh ve bawk ang chu" ka lo ti awlsam et a, a lei leh thei dawn tho a, ka ren duh lem lo anih kha. 

"Bawiha chuan a eichhin ve zel maw?" nui vur vur chungin Tetea'n min lo zawt ve thung. 

"Ei chhin zel a, ka siam zawng zawng a eichhin vek. Ka siam ţha ngun a, a ei hnem viau ang. Ka siam fuh hmasaber kha tui a tia, a ei hnem bawk sia" ti a ka hrilh chuan a nui hawk hawk a, a hmaah thingpui leh ka chhang siam inpawlh nuaihin a inchhawp ruih bawk. 

"U Rintei aiin i thiam a ni maw? U Rintei siam a eiţha duh der si lo"

"Vawiin a a zui duh vang mai mai aniang chu. A puar bawk a niang a la muttui khawp mai" U Rintei chuan mahni inveng ranin Bawiha chanchin a sawi zui a, zan lam a min hauhna kha theihnghilhin kan unau chuan kan nui leh dar dar ţhin. Thisen zawm hi chu a inhuat tak tak theih loh ka tih tawh kha. 

"A ţhen hi chu a chang mah mah a, damţha deuhin ka tho a, ka in ei lu na zo" tiin Tetea chuan min la fiam zawm zel a, tui ti hle tho si. Ka nu leh pate paw'n min sawisel sak bik lo va, Dinpuia chanchin an sawi tawh lo chu ka lawm takzet. 

Ka kal hma aţangin ka tur a, Fredy lah a phur ve em em mai bawk a, a chhan ka hre der mai bawk si lo. Zirtirtu te thuawih hreh tak ţhinin a awih ta thut chu a mak lehzualna a ni. 

Didiki in luah tur chhuk thlakna tur pengah dingin ro kan rel khawm a, step thui lutuk chu an huphurh tlang tih a hriat. Mahse a helna a awm a, bungraw dah tur chuan an hel thei ang a, tlemin a kual deuh thung. Fredy chu be bawrh bawrh hlawm mahse ka hnungah a ding zum zut reng a, inchhung a ţawng duh pang pang hle si biak ţawng chawp a ngai a, a rul tawk lek lekin a chhang bawk. Mipa ho chu Didiki ho in bungraw la turin an kal a, Siami leh Fredy chu inchhung aţanga bungrua lo dawng sawng turin step ah an chhuk a, keiin Dinpuia ka lo nghak thung. 

Ka tur nasa bawk a nghah rei a ngai vak bik lo. Ka hmaah bike a rawn ding dat a, ka bialpa a ni tih ka hre mai. Bike aţanga chhuk chuang lovin Didiki in awmna min zawt a, phur zetin kan piah lawk a step ka kawk va. Midang ang bawkin a kal chak hmel tehchiam lo. 

"Khaw nge i cake siam chu?" huphurh hmel viau mahse step chu ţawngka a sawisel chuang lovin ka cake siam min dil ta daih. 

"Ka nauin a keng vek a, Siami nen an chhuk tawh. Duh chuan step hi a hel theih a, a in bul lawkah bike i dah thei tho a" ti a ka sawihmuh takah chuan "Hel mai ang, helai daih a bike dah chu a ngaihtuahawm" a lo ti vat. A peih loh vang a ni reng sia. 

A hnung a lawn nghal mai tum a amah ka kal pel dawn lai chuan ka kawngah lo dawmin a taksa si chetin min kuah a, kan awmna hmun a reh hlauh chu ka lawm kher mai. 

"Min lo van ngai awm em em" ka ti fiamthu a, a nui ringawt. Pawn a awm kan ni bawk a fimkhur nachang hreve in ka chalah a fawp a, duhtawk zuiin min thlah leh mai. 

Step a chhuk ve lovin kan hel a, kawng lah chu a chhe em em mai lehnghal.

"Ilo insawh chhuak nawlh ang e aw" a tih chuan a uang tih hrereng mah ila tlak hlauin ka kuah nghet sauh a, a tshirt ah nghet zetin ka ţham bawk. 

"Midangin lirthei an keng em? Khaw nge an dah?" 

"Timothy chiahin a keng. Midang chu Sawmtea pa motor in an lokal a, kan unau chuan ke in kan chhuk. Timothy chu Didiki phurin bungraw la tur ho zingah a let veleh a" tiin ka hrilhfiah a, rawnkal ho a haw ho leh kha an tum dan a ni. 

Didiki in luah tur awmna bulah kan ding a, bike a dah rem hnuah ka darah min kuahin inhnuai ber panna stepah kan chhuk a, Dinpuia a hmu chu ka nau a lawm kher mai. Kan ţhianho zing a tel ţhang ve lo amah chiah a ni tawh bik lo a.

"U Dinpui i lokal ve dawn tih ka hriat vang a nia ka kal ve. Hmanni a ka hrilh che kha i la hria em?" ring leng lawng a a tih hnuah min rawn melh zawkin Dinpuia banah a kai a, pawnah a hruai chhuak leh rih. Eng thil nge maw a hriat ni? Ka pawisa a hman ni aţang khan zep eng emaw nei ang hian a awm tlat. A pawisa hmanna leh a leisak kha Dinpuia hi a hrilh bik tihna a ni thei angem? Mahse chutiang tur em chuan a nel chiam ka ring si lo va. 

"In rawn hel em ni?" ti a Siami'n min zawh chuan ka lo bu nghat. 

"Nih chuan Fredy-an kawng a chhiat thu min lo hrilh zo chiah a, a sawi uar thiam dan ang a chhia anih chuan Dinpuia chu nau nei ang char char a ni dawn ni maw?" a ti a, a nuih zui ţiah ţiah laiin a thusawi chu hrethiam ve lem lovin ka hawi ha ringawt. 

Rei pawh awm lovin an rawn inzui lut leh a, Fredy chuan intithei tak a bike chahbi lek va chung chian Siami chu dawr kalpuiah a sawm a, eitur an lei lawk nual tawh a, chawhmeh vel pawh a awm vek tawh. Chuti chung chuan a ei chak ho te te sawiin a kuah chhuak dawr dawr.

"Eng nge i va sawi dun a" kuangkuahin bang ka ngheng a, a ngaihna hre lo deuh chungin Dinpuia chu ka thlek ha. 

"I nau khan bialnu neih ve a chak tawh a nih kha" ti chung hian min pan hnai a, ka sam sei ve tak hma lama uaithla niaih chu hnunglamah huiliamin ka banah a vuan a, thinrimna lantir nan a kuangkuah ka ni lo bawk a ka ban chu ka thlak thla ve mai. 

"Amah ang rual ka nih te chuan keipaw'n ka nei daih tawh lawm" nui sang chungin awmze nei zetin ka lo chhang. Ka star ţhin lai vel te ka ngaihtuah a, khang hunlai kha a lo nuam ve thei ngawt mai. Bialnu a neih leh neih loh hriat chian kan tum rualin kan inrin siak laih laih zel a, min hre ve miah lo chung khan hmeichhe dang nen kan hmuh dun chang chuan kan hnual raih a, hmelţha tak pawh kalpui se 'a hmelchhe si' kan ti tho tho. Kan pawisawi ngai miah lo hmeichhia te kha kan va rel nasa ţhin tak. 

A nghawng a kuah pahin a sam ka khawih niap niap a, ngai viau mah ila amah ka hmuh chiah hian thil thleng thei zawng zawng ka ngaihtuah lo thei lo va, ka thaw a ipik hle ţhin. 

 "Inu in sawi a nei em? Ka lokal kha a hauh phah che em?" ti a ka zawh chuan lu a thing a, eng emaw a awm tho ka la ring fan. 

"Min be lo ringawt tawh dawn lo tiraw?" ka ti leh a, kha thil a thlen hnu kha chuan hlauhna ka nei lian tawh hle. 

"I nin khawpin ka be tawh ang che" a tih chuan ka lo nui sak. Hrehawm pawh tuar dawn ila ka kianga a awm chhung chuan pawi ka ti lo. 

"Ka ning lo hrim hrim ang. Min lo be reng la ka duh zawk. Inbiak zawh hun leh zirkar ah te lehkha chu ka zir leh thei tho a, zantin min lo be ziah la, i awm hran hunah phei chuan pui tur chein keimah zawk ka lo leng reng ţhin ang a a nuam ngawt ang" ka ti a, a nawmna lai leh nawm lohna lai tur ka ngaihtuah thleng pha vek a, a nawmna lai tur chiah ka sawichhuak thung. 

"Tun a ka nu in luah mek tu te hian in luah tur dang an zawng mek a, an hmuh veleh ka insawn lut thei ang" 

"Chuan nangmahin bul i ţan thei tawh tihna a ni mai em?" 

"Ni tawh mai" a tih chuan phur zet hian "A ţha dawn lutuk. Mahni a eizawnna kalpui tum ro ro chuan pengkawi reng lo a tih vat a ţha, ka chak tawh e" ka ti hluai a, ka awmdan chu enin a nui ve vur vur.

"I phurna te hi a la ho sia" ti sup chungin ka chalah bawk a fawp leh a, hun harsa ka ngaihtuah thlen phak a ring lehpek tawh lo aniang. Ka rilru hah a hlauh vangin thil tam tak min hrilh loh a neih ngei ka ring a, a buai ru ve viau ţhin ang. Dingdihlip ar arin keimah zawkin a hmuiah a fawp a, ka kawng a dawm a min chhanlet hnu chuan a nghawngah ka kuah nghet zual sauh. 

"Mami....awi leh" ka petek nawlh ni maiin ka hria, ka phu nasa in Dinpuia ka nem dawrh a, ka inbengdaih hnuah chuan zahna vangin ka biang a a lum pup pup a, ka beng sa hat hatin inchhung chu lum ka ti zual. 

Nu valai tak hi kawngkharah a lo ding a, in neitu a nih ka ring nghal ngawt. 

"Ka slipper hi ţhelret a nia, duh angin thawm a chhuah thei lo va, ka thawm in hriat loh phah anih kha. Zak duh reng reng suh u" ti ve bawk mahse ka zah loh phah chuang lo. Ka zak zual sauh emaw tih tur a ni zawk. 

"Bungrua chu a rawn la thleng lo em ni?" 

"Aw..aah...an la tur an kal a, mipa ho leh a luah tu tur ber an let leh phawt a" ka ti nawi niaih a, ka buai zawh vek vangin min chhan beiseiin Dinpuia ka melh chho ha a, en pawh min en lo, ka chhanna teh nuaih vang chuan in neitu nu en chungin a nui ruh ruh a, ka en tih a hria aniang min rawn melh a, ka hrilhhai hmel a hmuh phei chuan nuih a insum nasa hle, hmui a chip tlat chung pawhin a insum nasat zia ka hrethei tho. 

"Bungrua a ngah loh chuan mahni awmna atan chuan a nuam tawk khawp ang. Fapa hlir ka nei a, ka fanu neihchhun lahin a ute tihdan zirin an bialnu a chuhpui lo chauh a, nula a rawn awm tur chu ka lawm khawp mai. Ka fanu in a hel duk duk lo ang chu maw" a tia,a thusawiah chu ama'n a nuihpui nasa ber bawk. Nu ţawng duh leh fiamthu duh tak a ni tih ka hriat phah a ni. 

"Didiki chuan nuam a ti ngawt ang" ka lo ti ve a, a neitunu ber a fel hmel bawk a a thlamuang tawh khawp ang.

"Ti ang nuam tih lohna chhan tur a awm lo. Khawmaw kalsawn teh i lian eu uau si" tih pahin Dinpuia ding mai mai lai chu a nemsawn rawk rawk a, ka lo nui hak. Kan dinna bul lawk tukverhah chuan dakin thlang lam a thlir a, a bulah ka lo ding ve vat a, ka bul chiahah Dinpuia a ding bawk. 

"Thlai chin vel te hi nuam ka tia, mahni thar ngei ei te hi a tui bik a, a hma chuan chanmari ah mi in luahin kan awm ţhin a, ka pasal hlawh kan khawl ţauh ţauh a, ram lei tur ka zawng ru ran reng bawk a, helai hmun awl hi ka hmuh veleh thlai chin leh ranvulh nan a remchang dawn riauin ka hria a, ka pasal hnenah hmun rem deuh ang a sawiin lei ka dil a, min ring a, a hna vanga thingtlanga amaha a awmlai a ni bawk nen, ka kutah a dah ta hmak a. Helai hmun hi ka lei a, a hmuh tirh chuan min vaw lo chauh mawle" a ti a, a nui har har reng. 

"Didiki pawh chu min puih peih phawt chuan thlai lei a ngai lovang. Sawtah a piah lamah sawn vawk ka vulh bawk a, kan pa pawh a pension hnu hi chuan keiai mah mahin nuam a ti zawk a, pension hlawh chiah ring tawh mah ila taimak chuan tam lo mahse eikhawp chu kan hmu ve zel" a ti a, ka lo chhinchhiah kiau. 

Fredy leh Siami te pawh an rawn let leh tawh a, eng eng emaw an rawn lei ţeuh.

"A na lutuk Lallawmkim ka darah ka pu ve tho a min nawr vak vak mah ta che, ka nghawng i nawr bung mai ang a sin" Rina au tuar tuar ri kan hriat takah chuan an rawn thleng tawh tih hriain pui turin Fredy leh Dinpuia an tlanchhuak vat a, an thil put lai chu lak chhawkin an rawn zawn lut a, a nghawng tuai vut vut pahin Rina chuan "Didiki khum tur rih zia kha. Afela pawh awm reng a keimah min puttir tlat. Lawmkima lah hian hmasa zawkah min kal tir a, min nawr nawk nawk reng a, awii ka inherh lo chauh" la ti bui bui chungin ţhutna awmchhunah chuan a ţhu hnawk a, a thaw lui halh halh reng. Tirh leh ngam chi a ni tawh lo bawk a Rina tello in midang zawngin an thiar bang kan thiar a, motor ah a len vek loh vangin Sawmtea leh Timothy leh Afela te chu an lak bang la turin inah pawh rawn lut lovin an let leh nghal. 

Didiki chuan min kuah chawt a, a nui hmel hmuh a nuamin a mitmeng a nung sar bawk. 

"Ka zalen ve tak tak tawh a ka lawm takzet. Puitu ţhian ţha tak tak ka nei bawk si cheu a, ka thlamuang lutuk a nia" a ti a, a awki pawh a zangkhai vah tawh mai. Kan inhriat tirh school kan kal dun lai vel a mi ang kha a ni leh tawh a ang. 

"Ka lawmpui lutuk che. Pathian hnenah lawmthu sawi mawlh mawlh a, kan ţhiante thleng hian Pathian min pek vek a nia, Pathian malsawmna i dawng nasa lutuk ringawt" ka tih chuan a nui hmel a ral riai riai a, "Pathian ka biak lohna a rei tawh. Ka rin lohna a tih theih bawk ang" nghet charh a a tih hnuah inchhungah a lut a, ka ţhiannu berin Pathian rin ngaihna a lo hre miah lo chu mak ka tiin ka rilru a na takzet. 

CONT...