THROUGH THICK AND THIN-2

THROUGH THICK AND THIN-2

DIDIKI

Ka tawt up up a, ka thinrim em vangin a hma a ka lungawi lohna ţhin zawng zawngte kha ka hriat naah a inlar zut zut. Rethei mah ila tuman min hmusit thei ngawt lo. Ka ţhiante mah ni se ka chak loh lai ber leh mahni inveng thei lo ang mai a ka awm min hmu hman kher kher hian ka thinrim a ti zualin ka zak hle bawk. Midang angin ka inhawng ve lo a, Kimkimi leh mi pakhat dang lo chuan a zawng zawngin thil an hre lo. 

"Kha kha ngati nge?" ti tu chu Timothy a ni. La hawichhuak lo mah ila a aw aţang chuan tu nge a nih ka hria. Min ngaihven hmasa ber tu a ni ziah a, ka tih retheih ţhin tehlul nen. 

"Zingah a chhungte nen an inhau a" ti chiahin Kimkimi chuan a chhang. Ka hnen aţangin phalna a la lo va, sawi ka remtih dawn loh zia a hre bawk a, tawk ka tih dan te in chhang mahse min hrechiang tu vek an ni a, tuman an awih lo vang. Chhungkaw inhauh vang mai maiin hetiang tehnuaih hian ka awm dawn lo tih an hre vek. Kimkimi hnenah pawh thudik tak ka sawi chuang lo. 

An reh ta ţhap a, min en ngawt ngawt vek a nih ka ring. Ka zak leh tlawmngai lutuk chuan kut hum ruhin ka hmui hnuai lam ka pet ngawr ngawr a, kan awmna a thlang deuh nge a reh em vangin kun reng mah ila pen ri ka hre thei a, ka hmazawnah a tawp chat. Ka dar a min dawm tu an awm avang chuan ka dak chhuak a, ka hmaah Timothy a lo ţhu reng tawh. Ka ţap nasa bawk a ka mit a thip ram a, chuti chung chuan a mitmeng uk kharhah chuan lainatna bak ka hmu lo. Keimah vang anih ka ring mai a, chu chu ka duh lo lehpek. 

"Eng thil nge thleng?" a ti bung nghut a, thil thleng tur awm ang hre lawkin a thin a rim ve a nih ka ring. Mumal lo zetin min hmu bawk nen, min lainat a ka chhungte a haw thung. A tihziah dan a ni. 

"Ka thinchhe lutukin ka thinrimna ka ţah chhuah pui a nih hi. A zo vek tawh, ka thinrim a reh vek tawh a, buaina dang engmah a awm lo" Timothy en reng chungin midang hriat phak tur siin ka ţawng a, Kimkimi thusawi chu sawi loh tun a ka thusawi zawh tak chiah te pawh kha an awih kher lo vang a, thudik sawi ni ah min ngai mahse zep ţhen ka nei a ni tih an hre dawn chiang. 

"Lo han kal rawh u, ka rawn hruai ang" ti a Timothy-an midang a hrilh chuan an bu tliar tliar a, ka mitin ngen ngawl takin kallo turin hrilh mah ila an hmu thiam tawh lo. Natna tuar zo lo va tluk pui hnawk ah min ngai a, ka tawrhna bak thil dang hmuh an nei lo. Muangchangin min kalsan a, an rawn hawi let zing. Timothy chu awm lo se tuman min kalsan lo vang. Min phatsan ngai lo tu tur ţhian ka nei tih hre reng chung hian khawngaih nih a enbik nih ka duh loh vangin ka tawrhna hi ka zep tlat ţhin. Kimkimi leh Timothy hnenah chauh lo chuan. 

"An kal vek tawh. I duh chuan ţap leh rawh" dam thlap hian a ti a, ka kut pahnih a ka hmai tuaiin ka thaw hawk a. Heng vang te hian a nia hre tam lo se ka tih ţhin. Mahni pawh in enkawl thei lo, midang buaipui ngai a awm hi ka duh lo bur. Kan unauah ka upa ber a, ka nu leh pa te nitin hnathawkin an chhuak a, ka naute ka buaipui vek a, keipawh keimahin ka in enkawl vek. Midang ngaihsakna ka dawn hian ka awm thiam lo a, zah zawk chang ka ngah. Keimah chiah a hmachhawn a, natna tihnep theih dan ni a ka ngaih ang apiang tih mai ka duh zawk ţhin. 

"A tawp vek tawh ka tih mawlh mawlh kha. Ţap leh thei tur hmuhin min lo hmu leh hman tawh a mi? Ka thinrim tawh loh ber te chuan engvangin nge ka la ţah ngawt a nga?" ka ti a, dawt ka sawi leh tawh. Ka thinrimna a la reh lo va, ka ipikin ka la tawt up up. Timothy ka hmuh ngat phei hi chuan ka thinrimna a zual, a chhan ka hre lo. Ka duh lo chung min ngaihsak luih tlat ţhin vang te a nih ka ring. 

"A ţhat hlauh chu. I ţap ri ka hre chak bik hran lo va" ngaihsam zet a a tih tak et ah chuan thip zet hian ka melh a, a nui a, hmun dang a hawi daih. 

Timothy lak a hetianga ka awm chhan hi sawichhuah mai dan ka la hre rih lo. A landan erawh sawi kher lo pawhin a lem thlengin ka ziak thei ang. Sa pan lam niin tunlai mipa tam tak angin a sam a buk ve hle a, a dum hlap a, a mitmeng a fiahin a uk deuh kharh a, a hnar ngul a dik hle bawk. A mithmul a buk lutuk hran lo na a hmeichhiain pu ve ta se chei mawi chawp vak a ngai kher lo vang. A nelawmin kawm a nuam a, inchhung ka nin tawp khawk a Kimkimi te in a ka riah chang te hian ti ti lovin a zai kan ngaithla ran zel. A hma ang khan kan inpawh ta lo mai zawk a. 

Kei hi kan ţhian ho ah ka danglam ber a, engkimah anni aiin ka danglam vek. Chhungkaw khawsak pangngai tak tak an nih laiin chhungkaw rethei tak aţanga seilian ka ni a, induhtawkna ka ngah ber a, ka chapo ber. Midang hmusit zawng a chapo ni lovin midangin min rah beh a, hniam te ang a lan ka duh lo bur. Hrehawmna hrang hrang tuar vek tawh ka ni bawk a, chhel ka inti ve hle. Mahse a chang chuan ka ţhiante hi awtin ka thik ve fo. Hmeichhe nawi leh rilru no hni hne nih ka duh lo va, tun a ka tawrh ai nasa natna leh hrehawmna ka duh belh loh bawk vang hian ka inkharkhip tlat. Nasa tak a kik in chum bur bur mahse tumah kawngkhar ka hawn leh tawh lo vang. Ka mi tawn te reng reng tumah an ţha tluan tling ngai lo, ka ţhian te chauh lo chu.  

"Eng nge i ngaihtuah vung vung?" ti a min zawh pah a ka hmai zawn a a kut phah a vai hnu chuan ka ngaihtuahna ata harhchhuakin mit ka khap sawk sawk a, ka mit a kham mai bakah ka lu a na tel tawh. Ka ngaihtuahna hi ka lo kawm leh melh melh ţhin. 

"Duh duh ka ngaihtuah ve ang chu. Hetah eng nge ila tih ve reng zawk?" ka lo ti a, ka sawi duh ang ang Kimkimi hnenah sawiin ka inbunruak tawh a, ka ţap hial a nih kha. Tunah chuan midang tumah ka mamawh leh tawh lo. Min hnem a min ngaihsakna an lantir hian ka thil tawrh tawh te ka hrechhuak thar leh mai mai zawk. 

"Kal ang, kan bo reng chuan an ngaih a ţha lo ang" tih leh din a rual a, ka vawn turin a kut min pe a, vuan duh lovin keimahin ka tho. Ka kekawr mawng bengfai nawk nawkin lei a ka bag let bal chu ka chhar a, ka kalsawn hmawk hmawk a, ka hnungah min zui a ni tih ka hre ru kar. 

Kan ţhianho hian innghahkhawmna hmun bik kan nei ve a, tumah an lo awm tawh lo. Class an nei a nih ka ring mai a, Timothy a awm tho a min ngaihtuah lo tlang a ni maithei. Keichu class a awm ka tum loh vang hrim hrimin ţhutthlengah ka ţhu hnawk a, ka malchungah bag dahin hma lam ka melh run a, ka bul chiah a Timothy lo ţhu ve chu "Class i nei dawn lo em ni?" tiin no lo zet hian ka lo zawt. 

"A tlai laklawh tawh" a ti a, a ni pawhin min ngaihsak zui lem lo. Ngaihsak ka duh loh zia hrechiang ber pawl a ni miau a. In be miah lovin kan ţhu dun char char a, zahzelah phone ka khawih leh ţhin. Ka duh ang ngeiin ka awm ve tih hre lo ang maiin a awm a, chutianga a awm vel chu ka ngei tawk a tling tho si. Hman ang kha chu nise kan infiam leh bawrh bawrh awm sia, ka awm a tawt leh up up a, engkim hian min ti thinur vek a ni ber. 

"Zan a i chhuah ţhin hi Kimkimi'n a hria em?" ti a min zawh leh tak thutah chuan a lam hawiin ka inher vat. Min lo en ve in "I chhuah ruk ţhin ka tihna" a ti leh kher a, min ţawng el vel a ni ber ang chu. 

"Inchhung ipik lutuk ka ningin thawvenna zawngin ka chhuak ru ve a ni mai a, a hriat kher a ngai em ni? A hriat a tan a i duh viau leh hre tu awmchhun hian hrilh la" ka ti tan tan a, a lo nui hak. 

"Ti tawh suh. Nizanah ka ţhianten an hmu che a, Kimkimi i hrilh em?" a ti lehzel a, ka hlauthawng ve ţan. Ka chhuak harh ve ţhin ngei, mahse kan ţhenawm nula Lapuii nen kan kal ţhin a, midang ka kalpui ngai lo. Inţhenawm reng chungin Lapuii hian min hrechiang lo hle bawk. Tu bulah mah ka inhawng ngai lo. Timothy hian hmelhriat a ngah a, party tih velah a kal tamin khawi hmunah pawh hre tu a nei vek. Chung ho chuan min hmu fuhin an lo hrilh hmanhmawh anih hmel. Eng thil ţha mah an chungah a thlen phah awm tawp si lo. 

"Nizan Lalawma ruiin min beisei leh. Chuzawng chu ka hrilh. Lo buai ve vak duh suh, hlawkna ineih phah dawn lo" ka ti hmak hmak a, a inrawlh thuk ka tiin ka lungawi lo takzet. Ka chhungte zia a hria a, min tihnat chuan a haw hle ţhin. Zan lam a a ţhianten min hmuh vang mai a meinei deuh a min ti fek fek te chu ka ngaithei ţhak lo. 

"Nih chu..zia lo hle mai" ngaihsam hmel fe hian a ti liam puat a, awm ve lo ang hmakah min ngai leh niin a lang. Hei vang hi ania kan pahnih chiah a awm ka peih loh. Mahse a tawpkhawk a thlen meuh chuan min ngaihsak leh ber tho ang. Nichin lawk paw'n a buai hman em kha. 

"Lalawma chetdan hi i haw thei hle sia" zawi sepin ka ti a, ka enduh lo lui na a ka lam a lo hawi tih erawh ka hria. 

"Hua e..chhuah ruk i chin hma kha chuan. I thil chin hi a hre ru kar ang a, a zuam sawt maithei che" a tih chuan ţhutthleng tlang ka hmer a, ka thinrimna belhchhah loh hram ka tum. Ka thlavang a la hauh tho ka rin laia min dem zawk ang mai a a awm vel chu ka ngaihthlak chak zawng a ni lo. 

"In tello a ka party vel vangin i lo la na fal a ni maw?" elhsen zet a tiin ka nui hul hak. 

"La na hran lo e, ka ţhian bak i ni lo va, i duh duh ti turin zalenna i nei. Ka ngaihdan ka hrilh mai mai che" a ti dek dek a, "Hnial hrat viau suh" ka lo ti hlar. Pawr viau mah ila engahmah min ngai lo ni awm takin a nui hawk a, min chhang lem lo thung. 

Kan ţhiante an rawn lan tak sap sapah chuan ka thawveng huai. Lawmkima leh Sawmtea te an rawn hmasa ber a, anni hi char beh ang mai a inzui reng mai an ni. Tuina an neihin an ti tluk tluk a, an peih lo leh hma viau zel. Thla hmasa khan gym an kal tluk tluk a, tunah an peih leh tawh lo. Chak zet zet a bike khalh a han in um kual vel hi an peih rei ber a ni. Lawmkima hi Dinpuia cousin a ni nghe nghe. A zep char char a, unaupa leh ţhiante kar a inlaichinna awm chu a tan a nuam vak lo aniang Kimkimi'n a hriatchhuah hma kha chuan tuman kan hre lo. 

Afela a ni leh a, Timothy nen an inzui nasa viau. Lawmkima leh Sawmtea te an pianphung a inan viau laiin anni erawh an danglam takzet. Afela hi a thau duh chi a ni a, kan inhriat hnuah ringawt pawh a len belh nasa. A thil ei apiang a ngeih mai bakah a eitui em em vek a, a vanneihthlak. A landan a zahpui loh mai bakah hrehawm a ti ngai lo va, chu tluk a hlu chu a awm lo. A nihna engkim a pawm thiam vek kei ang lo takin fa mal leh duat rawn a ni. A la len belh zel ka ring. Siami leh Rina te an ni leh a, inhau reng chung a inzui det det reng tho an ni. Siami hi pa thung chi anih laiin Rina erawh tlem a no deuh chi a ni a, mipa va ngaizawngin star vel ţhin lo mahse hmeichhia a la ngaihsak hran lo. Duh chu a nei ve tawh a, 'tuai' tiin a lo duh lo a ni awm e. Khata ţang khan hmeichhe lamah inrintawkna a nei tawh lo va, a la in uluk em em reng tho. Kimkimi hi hmeichhe nunnem tak kan tih ang kha a ni a, Dinpuia a ngaihdam ngun danah a hriat mai. Ka hau ve fo a, ţhen hlen daih turin ka hrilh ziah mahse beiseina a la nei ve tlat. Chhungkaw buai mangang inchhunga hlimna nei lo pawn lam a hlimna zawng angah a ngai a, Dinpuia nen hian kan dinhmun inang tih chang ka ngah. Kei aiin a la vannei fe zawk tih a ni mai. Hmangaihtu a nei a, a mi ten berin it tlatin a zar ve reng lo va, an hausa bawk. 

Ka awmdan avanga an ngaihţha zan lo chu class a awm tawh loh mai an ti thlu a, college erawh kan la chhuahsan lo. Kan ţhukhawm ţhap a, Siami leh Rina te inhnial kan ngaithla a ni deuh ber. 

"Tukin Didiki awmdan khan zep loh chuan min ti hlau. Khatiang khan ka la hmu ngai miah lo va, a inringtawk ve thei sia, engpawh tawk se a hawi larh zel tho a, tukin kha chuan pawngsual hrep ang mai khan a pawr a, a ni deuh nuaih a ni mai" Rina chuan a ti zat zat a, na zet zet a infiamin kan inhau bawng bawng a, kan haw ngai lem lo. Mahse tun a a thil sawi ai chuan Siami nen a an inhau ri ngaihthlak ka duh zawk. 

"Engahmah ngai duh suh Didik. Keiphei chu tun thleng hian ka nu in a thil ken lai ang ang a ka taksa remchang lai lai a min vuak dawm dawm chang a la ngah a nia. Engkim chawi zo vek se la chuan ka thihna a rei tawh ang. Tukin a i awm dan kha chu a la nep lutuk a nia" min hnem tum takin Siami chuan a lo ti ve bawk. Thu puitling leh ngaihthlak nuam an sawi thiam ka ring lo hrim hrim. Min phatsan dawn hauh lo mahse an ngaihtuah a tlem ve a, an awm ang ang hian en ila vuina ka ngah lo a ni mai. An fel ve phian tho. 

"Nang hi chu thihna hian a ngam dawn lo hrim hrim che a" Rina chuan a lo ti leh zeuh. Ka ning deuh tawh chu ka thaw hawk a, Siami zawk chuan ka awmdan chu a hrethiam aniang "Tim zanin chu lo leng la, kan ţhenawm nula in kan zai ri a hre chak leh tawhin ka ring" a ti ta zawk a, Timothy ka melh vat a, hre awmin a awm duh miah lo. 

"A rawn haw tawh mi?" ti a Siami a zawh lai chuan a phur bawk a a mitmeng te chu nung sarin ka hmu.

"Haw e. Thil a lo hawn maithei che, i lokal phawt loh chuan a hriat theih dawn si loh a" Siami chuan a han ti kual vel a, midangin lo chhaih zawmin an nui hak hak hlawm. Ka chungchang an sawi tawh lo chu ka lawm kher mai. 

"Hetiang chhe zawr lutuk tu nge lo thlahlel ve a Siam? Ka lokal ve dawn" Lawmkima'n a lo ti ve vat a, Sawmtea a bu nghat nghat bawk. Thisen inzawmna nei miah lo mahse an pianphung a inan em vang hian phir kan tifiam ţhin. 

Kan haw dawnah Kimkimi chu a bialpa in a rawn lam a, midangin an lirthei dahna an pan tliar tliar bawk. Tu emaw ber hian min thlah ve mai ţhin a, ţhiante thlah reng ngai lo va mahni pual a neih ve ka chak ţhin. Heng avang te hian ania ka ţhiante ka awh ţhin ni. A chang chuan khawsak pangngai tak tak te zing a ka intat lut ve mai hi mak ka inti ţhin a, Kimkimi ka kawm aţanga inţan a ni. A ţhiante chu ka ţhiante an ni ve mai a, min kawm ve bawrh bawrh hlawm a, ka tlangnel har lo. Keimah chauh chuan ţhian siam ka thiam lo va, midang mamawh loah ka inngai tlat zel bawk. Ka mamawh ruk zia tuman an hmu thei lo bawk a, inchhuang vah angin ka la lang reng thei.

"Lokal rawh ka thlah ang che" Timothy bawk. Ka bag hai rak rakin phone ka phawrh a, ka hmeh mawlh mawlh hnuah ka bengah ka chuktuah. 

"Hruai tu tur ka nei" ka ti a, a nui suk a, tu nge a nih min zawt lo vin min tlan pel ve mai. A tlan liam chiah chu muangchangin phone ka la thla a, Kimkimi'n haw rual pui a min sawm laia ka lo duh ve mai lo kha ka inchhir lek lek tawh. Mahse ka ţhiante an haw rem hma loh chuan hawna tur ka nei reng. Phone hmang a koh tur ka nei lo zawk.

"Thlah i ngai a mi?" ka bul chiah a Lawmkima rawn ding chu a hawi kual a, midang hmuh a inbeisei a ni. 

"An kal vek tawh. Min rawn lam turin mi ka bia a, an hman leh lo thut a" ka ti nuah nuah a, kan haw dawn hian lirthei nei ve lo awmchhun ka nih vangin keimah a min haw tir an hreh ţheuh a, min thlah hi chu an tih turah an ngai. Nuam lo tih chang ka ngah. 

"Ka hman tho alawm ka thlah ang che" a ti ta ngei reng bawk. In ka thlen tlai chuan ka nutei a lo ang leh tun tun ang a, chumi a thlen hlau chuan Lawmkima ka inthlah tir a, Sawmtea'n min zui bawk. In kan thlen chuan lut tawp bik lovin lawmthu ka hrilh ve a, an ngai ho viau. Lengah ka sawm ngam si lo va, inhmu leh vat turin kan inthlah. 

"Iva rawn haw har ve. Ţhian i kawm a i tawi khawmuang ziah ringawt mai. Ţhian hi kawm tam lo la a ţha. I unaute pawh an lo haw vek tawh" ka rin lawk dan chiahin ka nutei a lo vin leh hlar tawh. 

"Kan bang chiah a ka lo haw nghal" ka ti a, pindan lam a kal mai ka tum chu "Naktukah i nu rawn zin a tum a, i pindan kha i kian thei lo anih pawhin lo tifai lawk rawh" a ti a, ka leh hawi rang kher mai. Phur fe hian "Ka nu a lokal dawn maw?" ka ti nawn leh kher a, min melh no lo nasa. 

"A lokal dawn ka tih kha. Thlenna tur dang a nei si lo va, kan in a len bik loh nen, a cham rei dawn chuang lo va i patea hnenah phalsak mai rawh ka ti a nih kha" ti fek fek mahse ka haw tawh lem lo. Ka nu lokal tur chuan rilru a ti hlim a, ka hmuh dawn a ruaiah ka nu ka ngai thar ta vel a. 

Ka inthlak zawh veleh ka nutei ka pui a, ka thil tih sawisel loh a nei lo. Ning viau mah ila a sawi ang chiah khan Aizawlah hian chhung leh khat kan nei vak lo va, anni lo chu belh tur ka nei lo. Hlawh neih vat a chhuahsan vat ka chak ber tawh. Lapuii nen kan inbe pah reng a, ka nutei hmuh loh laiin phone ka khawih ru zeuh zeuh. A cousin birthday lawm naa kal turin min sawm a ni. 

Khum a mu ran chungin khum mawng lam bang a sana hlui ve tawh tak intar chu ka melh kar reng a, ka chhungte thawm a zawi tial tial. Lalawma thawm ka la hre lo va, a rawn haw hma a chhuah ruh daih hi ka duh dan a ni ţhin. A mutthilh hnuah haw leh ila, chumi chhung chuan Lapuii zuiin rilru tih zangkhai nan party naah te ka kal ve ţhin. Thlen hun tur bi tuk a awm ve lo bawk a, duh duh hunah kan kal ve tawp zel. 

An mu hma thei bawk a an thawm hriat tur a awm loh veleh ka tho tharh a, an fanu te pahnih chu an pindanah phone khawihin an awm leh daih tawh ang a, ka awm leh awm loh an ngaihven tawh lo vang. Kawngkapui aţanga chhuak lovin inhnuaiah ka chhuk a, a hma chuan pindan atan kan hmang ţhin a, in an sak ţhat hnu hian bungraw hlui te leh thildang eng eng emaw dahkhawm nan kan hmang a, inhnuai pindanah hian pawn chhuah theihna kawngkhar a awm a, ka hmang ţangkai hle. A rukin ka chhuak a, pawnlam aţangin ka hawlh kalh mai ţhin.  

Lapuii min hruai naah chuan ka kal veleh tawp a, mi an tam lo na a an inhriat ţhat hmel viau hlawm. Rilru tih zangkhai duh a kal ka ni ţhin bawk a zu ka in veleh a, ka intam ngai lo thung. Ka tihziah danin keimaha awmna tur hmun fal ka melh kual a, inchhungah chuan ka hmu mai lo. Intur kengin pawnah ka chhuak a, an kawtlai a zawl zau nuam bawk a, a thawventhlak reuh hle. 

Mi chuan an fate intihhlimna hun te siamsakin an ţhiante thlengin  ţha deuhin an lo dawng sawng ţhin a, kei ve chuan zing thawh phat aţangin ka nutei ang ri ka ngaihthlak a ngai a, in a ka awm nilen leh a ang nileng a ni mai. A duh duh hunah min hau hrep a, ka nu leh pa te thleng a sawichhiat chang lah a ngah. Ka nute hnen a ka vui lahin tuar hram hram turin min ti zel a, ka nutei chauh chu nise thuhran Lalawma lo tel ve zel hian ka nun a ti chep lehzual. 

Boruak a nuam bawk nen ţhu ngawr ngawr reng lovin kawtlaiah chuan ka kal kual vel a, kil khat a mipa pakhat lo ţhu reng ka hmuh chuan ka ding chawt. Kawtlaia an eng chhit chu a dul ruih a, chuti chung chuan tu nge a nih ka hrechiang lutuk tlat. A bul hnaiah tumah an awm ve lo va, a inngaihtuah muk hmelin vei nei a ang. Kan dinhmun inang ka tih chang a tam ka tih tawh kha. 

"Laldinpui" chang fak hian ka ti a, ka ţawngkam hi a nem vak lo hrim hrim. Min hmu chu mak a tih hmel em em mai lehnghal. Hetiang hmun leh thil tihna velah ka kal ve zeuh zeuh ţhin tih hi tu hriat mah ka duh lo va, Dinpuia pawh hi tlanchhiatsan a bik bosan thei reng ka ni. Mahse keimah ang bawk a natna nei ve a ang em a, chuvang a pawh mai chauh chu ka ni. 

"Eng nge itih ve?" a lo ti hmuk a, kan inhmu hi a lawm vak loh hmel. 

"Ka cousin rualin ka kal a, ka rawn hmu thut che a" tiin dawt ka sawi a, min zawt thui dawn lo tih ka hriat vang a ni. 

"Kimkimi hrilh suh aw" ka ti zeuh a, a lo nui hawk a, min en danah min hmuh a beisei hauh lo tih ka hre mai. 

Tlangnel zetin a bulah ka ţhu ve a, ka ţhut fel hnuah ka intur ken kha ka in leh a, tui ka ti lo kher mai. 

"Zu pawh maw?" a ti hluai a, mak tih hmel zet a min en chungin ka no dawm lai a kawk a, ka nuih a za angreng. A inlak pa ve nen zu ka in meuh chuan naupang ang maiin lawm a awm le. 

"Ka inchhan hre miah lo vin ngaihdan i siam ve nghal mai dawn em? A khawloh vangin a in a emaw nawm chen a chak vangin tih tein" ti a zawh pahin thle deuh hlekin ka en ha a, min lo la en uluk viau ni tur a ni ka enreng takah chuan aw a thian kharh a, tlemin a tawlh hla hret bawk. 

"A ni miau sia" a ti sup a, min zirchian a tum ve khanglang niin ka hria. 

"Engmaw ni chu?"

"I zu in chhan ni thei tur ang a i sawi khi. Duh vang bakin zu kan in lo" a ti a, ve tehmial chuan. Thil danglam deuh hlek a sawi ka ring a nia, heng lai hmun aţang hian ka awm nawmna tur eng emaw tal hriat ka chak ţhin. 

"Chhan dang vang a nih i ring miah lo maw?" ka tih chuan lu a thing a, a jacket ipte aţanga cigarette phawrhin a ţan kai a, vawikhat vel a fawp hman ang tihin ka lo laksak. Zu in ţhang ka ni lo va, ka in ve chhunah ka in tam ngai lo bawk nen, no hnih ka in chuan ka rui viau tawh ţhin a, rui chhia ka ni ngai lo thung. 

"Ka la zu ngai miah lo na a a tui hmel emai ka lo zu ve chhin" ka ti a, a khu ka hip lut chiah chu ka khuh bawrh bawrh. 

"Zu zel rawh a tui a nia" min tihel tih hriat zet hian a lo ti a, ka haw kher mai. Ka luhlul chhuahin ka ti lui zel a, a khu ka hip tawh lo va, ka khuh rei bik lo. 

Nui ruh ruh chung a min enreng lai chu hmu fuhin "Eng nge?" ka ti chhum hmuk a, sawitur ber hre lovin ka siam a nih hmel. 

"Engtia rei nge i lo inthup tawh?" min tih chuan nui chung hian "Kum hnih chuang daih" ka ti fiamthu a, uluk zet a min enin a chek tlak tlak. 

"Em em che hian, birthday lawm na a ka kal ve chu a pawi viau em ni?" ka ti a, a hma aiin ka awki a sang hret. 

"Pawi lo e..i duh duh naah i kal thei. Kimkimi hruai ve lo la a tawk mai" thupe aw zet a min tih chuan ka lo nui hak. 

"Mipa dangin an lo kuah ve vel te i hlau a ni maw?" uangthuang deuhin la nui hak hak reng chung hian ka ti a, a nui ve duh hauh lo. 

"Nangpawh i kal ziah tho a, Kimkimi kal ve theih loh nachhan tur a awm em ni?" ka ti lehzel a, Kimkimi ka huat vang a ni hauh lo a nia. A bialpa rilru put hmang hriat ka tum mai a ni zawk. A lerh tiin a buai phi chung reng a, a hriat mai ang chu. 

"I kal ţhinna hmun i hrechiang ang a, thil thleng ţhin te thlengin. Kimkimi kal ve na chi a ni lo" thutak fe hian a ti a, ka ruih deuh vangin ka hmuthiam tawh lo nge a ruih ve awm ka hre lo. 

"Chuan keichu ka duh duh naah ka kal thei thung a maw?" ka ti ha a, hmeichhia ţheuh ţheuh kan dinhmun leh theih chin a lo inang lo thei khawp mai.

"I cousin a awm tho a, ka hawsan ang che" tih leh din a rual a, rang zetin ka ding zui ve zat.

"Bialnu chiah duh a a ţhiante ngaithei miah lo ang chi kha i ni maw?" cho zet a ka tih chuan a kal lui ta em lo va, a nin tawh zia erawh ka hmuh hmaih lo.

"Khawiah nge i cousin chu a awm? A hming sawi la ka va koh sak ang che" a ti hluk a, ka lo khawngaih ve na ţhin te leh ka ţhiannu in a chanchin min hrilh chang a hriatthiam ka tum ţhinna zawng zawngte kha ka dah bo vek tawh ang. Rilru nem lutuk neih ţhat lohna ka hriat belh ţhin. Khawngaihin ţhat chhuah ţhin mah ila an theihnghilh leh zel tho.

"A ngai lo. A ţul chuan ka ko mai ang. Kimkimi hi a fel em a, hetiang hmun nen hian a inhmeh ve lo. Zu ngat phei chu a la tem ve chhin miah lovang, lo veng zel ang che. Rinhlelhna che a neih leh chuan i ngaihtuahzia ka lo hrilh tawh dawn nia, hmeichhe dang i ven tel loh beisei ang" tiin thu inzawm lo nuaih leh awmze nei lo zet zet ka sawi duah a, a landan en ringawt chuan fiam kual zel chi niin ka hre tawh lo. 

"Hmeichhe pahnih ka veng hman lo. Nang pawh tiamin" a ti a, tun ţum chu a kal tur min hrilh lawk tawh lovin a kalsawn a, inchhungah a lut leh tawh lo. 

Pawnah Lapuii ka lo nghak a, Kimkimi vanneih bik zia ka ngaihtuah rauh rauh. Ngaihsak tak tu bialpa neiin chhungkaw ţha tak a nei a, inchhungah a duh dan danin a awm ngam a, a thil awh zawng apiang a nei thei a, chutiang a ni chung chuan ka la kawm tlat. Sawiselna tur ka hre lo va, ka tan a awm reng ţhin. Thik loh a a chunga rilru chhia put miah loh ka tum tlat ţhin. A ruk a inngaih hniamna ka neih hi ka duhloh ber te zing a mi a ni bawk a, anni angin pawisa ngah ve lo mah ila anni aia ţhatna tam tak ka nei tih ka hria a, chuti chung chuan awh ruk ngawih ngawih chang ka nei tho a, ka thunun thei lo, mihring ve mai ka nih chhung chuan ka thunun thei ngai lo vang a, midangte ang bawkin rilru no chang leh chak loh rukna ka nei reng bawk ang. Mahse lanchhuah tir ka tum tawh lo thung. Ţhianţha tak tak tam tak ka nei tih hre reng chung hian ka nun a ruakin ka khaw a har ngawih ngawih ţhin bawk. Ka induhtawkna leh luhlulna vang hrim hrim hian ka chungah thil ţha lo ka la thlen tir lo mai mai zawk a, diktak chuan ka nun hi ka ningin ka hne hle ţhin. 

Keimah ang hi mi tam tak an awm ve ka ring. Ngaihsak ngai leh ngaihsak tu mamawh reng chung a mamawh ang a lang hreh tlat, midangte tan a hnawksak nih hlauh vang leh mite rah beh nih hlauh vang a chak leh chhel tak ang a lan duh tlat. Nun ning ngawih ngawih chung a a ruka damchhan tur zawng reng tho si. Hetiang mi hi keimah chiah ka ni bik lo tawp ang. 

CONT (Pahnih ka lo dah ang ka ti na a, ka hman leh lo haha a thui ve deuh tho a, a pawi lo ang chu ka ti mai🤗)