THROUGH THICK AND THIN-3

THROUGH THICK AND THIN-3

KIMKIMI

"Vawiinah ka nu a lokal dawn a" Didiki hlim hmel ka hmu leh thei chu ka lawm kher mai. Sawi ngai miah lo mahse a nu a ngaih zia ka hria a, an inhmu thei tur chu ka lawmpui takzet.

"Ava lawmawm ve. Lian ve tawh viau mahla a lo kal ve chhunah chuan i bulah muttir la, kuah ber tlat rawh. Thlah miah suh" ka ti fiamthu a, a nui har har reng a, nidang ang lo takin a nui ve tak tak niin ka hria.

"Aw ka pindan ka tifai a, bedsheet ka thlak vek. A cham chhung na na na chu nuam deuhin a mu tur a ni ringawt" zangkhai vah hian a ti a, a hlim em a ka lo hlim ve tawp. 

"A lawmawm e. Inu a awm phawt chuan Lalawma paw'n a tibuai miah lovang che. Tui deuhin i mu thei dawn a ni mai" ka ti a, kei aia a tet deuh hlek vangin awlsam te a a darah kuahin kan ţhiante min lo nghahna hmun ka panpui a, kan awm dun tamin ka mi rin ber zing a mi a ni bawk a, unaunu ang maiah ka ngai.

"Dinpuia nen in ţha em?" tiin min zawt a, Dinpuia nen a kan chanchin a ngaihven peih hi chuan a zangkhai deuh tih naah ka ngai ţhin. 

"Aw ţha a ni mai ang chu. Ani hi chu ţhen hi a har khawp a, a duh hun teah lo chuan kan inţhen dawn lo aniang, kei lahin ka lo duh ve tho sia" nui chung hian ka ti a, tukin ah pawh min thlah a, thawh hma a ninzia sawiin a phun a, let leh tur a ka tih leh a duh tlat tawh lo va, ţha deuhin min thlah veleh mai. 

"Sual si fel tho si ang hi chu ţhen an har alawm" a lo ti ve. 

"Dikchiah bakah ka khawngaih zel. A pa diktak hre lo tawpin tun thlengin a la awm a, a sawi ngai lo na a a hrechak ve thei ngawt ang" muangchanga kal pah hian ka ti a, Didiki pawhin ka kawngah min lo kuah ve a, ka ngainat ang chiahin min ngaina ve. 

"I chhungten an duh lo ve ropui sia, chhungte duh loh hi chu an ţha lo tlangpui zel an tih kha. Insiamţhat a tum der si lo va, nau te i lo pai ang e aw nang hi" a ti a, a ding det a, chik zet a min en phei chuan ka nuih a za hle. 

"Iti ang lo emai. Ka la naupan em hi bakah naupai ila chu ka pain min hnawtchhuak duh hial ang" fiamthu titak deuh a tiin ka nui zui hak hak a. 

"Tlem tlemin thlah tum daih rawh. I chhelo a, i fel bawk a, Dinpuia ai ţha ila hmu hnem dawn lutuk" a ti zat zat a, sawi zui dan tur ka hre chiah lo va, kan ţhiante kan hnaih tawh bawk nen, ka chhang lo tawp. 

Darthlalang te a lek va a, uluk tak a in en in a hmai leh sam a tuai leh ţhin. Chutianga Afela awm chu an en ţhap a, a landan ngaipawimawh ngai reng reng lovin a ngaipawimawh thar ta thut chu a mak em reng bawk a. 

"Thlalak ho inti deuh em ni?" ti a ka zawh chuan "Teuh nang, star a nei a" tiin min lo chhang a, a rukin kan nui put put hlawm a, tumah kan inen duh lo. Nuih rin palh kan hlau vek. Afela meuhin star a nei ve chu amah hrechiang tu te tan chuan a nuihzatthlak duh hle. 

"Ka sam hi a buk mah mah em le? Ka thau sia a buk viau chuan a nalh dawn miah lo a"  a ti bul bul a, a la inthlek uluk hle. 

"Buk mah mah loh kha. Helamah hian a lokal dawn tih i chiang maw?" tiin Timothy chuan a lo zawt let ve thung. 

"Dawn e, ka hrilh vek tawh a, Kimkim a lokal chuan ţha deuhin lo bia ang cheu aw" min en pah a tiin a phur khawp mai. 

"Tehreng mai lo tel ve ziah turin ka lo sawm ang" ka tih laiin Didiki'n "Tel tir ve kher a ngai lo. Chhungkaw chanchin te kan sawi bawng bawng zel a, miin ka chanchin an hriat tam ka duh lo" a lo ti vat. 

"A fel reuh lutuk. Ţawngtlem deuh mai a nia, a rukin ka thli thlai reng alawm. Sawiselna tur ka hmu lo reng reng" a ke phut hliau hliau pah hian a ti a, a ngaih a ţhat hmel lutuk tlat. 

"Pawnlam landan ringawt en chuan mifel an tam ang chu. Tupawh an ţha hawrh vek alawm. Chhunglam a pawimawh. A rilru lo chhe si se, anih loh pawn a duh dawn kher che mi? Lo duh che pawh nise engtik thleng nge a daih ang? In inkawp loh rualin a hrang nghal ang a, engkim a sawichhuak vek hreh tawh lovang. Kan duhzawng apiang lak luh zel kher a ngai lo" Didiki chuan a la ti ve tlat a, inrawlh ve na chi ah kan ngai lo tlang bawk a, ngawi rengin kan lo ngaithla. 

"I chanchin hrilh lo la a ni mai. Keini pawh min hrilh vek chuang lo a, ka bialnu a nih duh phawt te chuan a lo tel ve zeuh zeuh ang chu. Ka hnungah a bet vung reng dawn hleinem, lungngai vak duh suh" dam thluam a Afela'n a tih chuan kan thaw huai hlawmin a rinawm. 

"A duh phawt hunah che kan sawi leh dawn nia. Ţhian leh ţhian inngaihzawn te hi ka duh lo bur. Inţhianna a chhe vek thei. Chuvang chuan ţhian hmasa lovin ngaizawng pawp la, mipa inih te chuan a falin i hmu ve zawk ang chu. Ţhiante hnen a hruai chhen lovin" Didiki chu a rukin ka kheuh a, ka kut a lo beng let zawk a. Inhnial inpeih ranin cho arin Afela a melh ran. 

"Ţhian mah ni ila i thuhnuai a min dah tum bik kher lo la, khatiang mizia kha chuan bialpa i hmu lovang" Afela chuan a ti fiamthu a, boruak a rih hlauin kan lo nui lui hak hak hlawm. 

"Khatiang pian leh taksa nei hner hnur chung kha chuan i hmu bik lovang" Didiki chuan a ti veleh a, ka ngaihdan a ni ta lo khawp mai. Afela'n chhang let tawh lo mahse "Didik khatiang zawng kha chuan ti suh. Eng pian pawh nei ila, kan hmelţha emaw chhia emaw, kan thau emaw cher emaw, kan ngo emaw kan hang emaw, tupawh hian ţhatna kan nei vek a, kan kawppui tur Pathianin a ruat sa vek. Kan ţawngkam tawi te leh ho te a kan ngaih hian midang rilru thuk takin kan hliam thei a nia" ka lo ti vat. A nur nang a, keimah ka nih vang nge min chhang let lem lo. 

Kan class neihna ţheuhah kan kal darh a, Siami leh Rina te nen kan inzui. Class khatah kan awm miau a. 

"Didiki hi lungawi lohna a nei em maw ni? Nichin kha chuan a ti lutuk mah mah a ni" Siami chuan a ti nang nang. 

"A chhungte lak a a lungawi lohna hi ţhiante ah a ti lang ţhin a, a chang chuan a bula awm a hahthlak lek lek zel. Min hrilh mai zel se, tihdan kan ngaihtuahpui mai tur a nia" Rina chuan a lo ti ve bawk a, a nu a hmuh dawn vanga a hlim lai tak a ni ve bawk sia, mak ka ti ve tho. 

"A khawngaihthlak ve e Didiki hi chu. Engtin pawn awm se ka hrethiam leh nge nge ţhin" Siami bawk chuan a ti leh a, a rilru ang hi kan pu vek. A mood fuh loh chang a ţawngkam na tak tak a hman pawhin a hrethiam tu zawkah kan ţang leh nge nge ţhin. 

"Tak a ka hrilh theihnghilh daih che a" tih hluai pahin Rina chuan ka darah min kuah a, Siami nen kan lo ngaichang ran. 

"Hman zanah ka u ţhiannu leh Dinpuia kan inah an rawn lut hlawl mawle. Hrilh nghal mai che ka tum a mahse phone aţang chuan i lo dawnsawn thiam loh ka hlau a, inrinni leh chawlhniin a zui leh a, ka lo theihnghilh daih" inthiam loh hmel zet hian a ti a, classroom kan lut nghal mai bawk sia, kan ţhutna ţhinah kan ţhu leh te te phawt. 

"Eng hmel pu nge? Engti turin nge an rawn kal?"

"A chhelo reuh lutuk. Ka u ţhiannu a ni chungin ka vawikhat hmuhna a nia, sang deuh pian nalh deuh mai. Hmeichhia kha a rawn kalpui niin ka hria. An hnaiah ka awm lo a, an rawnkal chhan ka hre lo" a ti a, a laiah ka ţhu a, ka sir ve veah dawhkan a kiu nghat chung a an kutphah a biang dawmin an ţhu a, pawi ti hmel an pu ve ve. 

"Dinpuia hi chu a chang chuan sawisak hrep ka chak ţhin. I fel a, i ngaidam zel zawk a, bialpa neihsan ve chhin rawh. I nat ţhin zia a hrethiam ve mai ang i hmangaih ang a a hmangaih ve che chuan. Dawh zel tawh bik lo la, a awm ang apiang hian awm ve tawh rawh" tiin Siami a ang hmarh hmarh a, hmeichhe dang nen sawizawm theih tur a a awm ziah hi a chang chuan ka zak ţhin. 

"Rin nakinah i hmu dun leh anih chuan a rukin thla lo la tawh rawh aw. Ka hmuh tir chuan a pha ngam lo vang. Thla lo la ngei ngei rawh" ti a ka hrilh mawlh mawlh takah chuan hriatthiam loh hmel viau mahse a bu nghat nghat tho. 

[Lo leng la]

Dinpuia message min rawn thawn. Ţhian ho in thil kan ei a, midang ka hrilh lem lo. 

[College ah ka la awm. Hriat ka nei leh tawh lehnghal] tih ka thawn let a, a hahthlak ţhin a nia hepa hi chu. Kan inchhuahchhal reng mai. A rawn call a, keimah a ka awm loh vangin ka chhang duh lo. Kan buai ngun thei sia, midang hian min nin ka hlau ţhin a, a zawng zawng ka sawi vek ngai lo. 

Dar2 velah min rawn hruai a, a chhungte an awm reng tho bawk a tiin an in lamah kan kal. 

"Eng nge i hriat chu?" a ti deuh reng a, "Nakinah" tih chiahin min zawh apiangin ka chhang. 

"Ka nu cake siam ka pui a, a nuam phian sia, ka nu in min pui veleh chhawng a, pakhat ka ti ve chhin. Ei chhin turin ka duh che a" zangkhai vah hian a ti a, lehlawi si hian. 

"Hmeichhe engzat nge i eitir tawh?" ka ti lang lang a, motor tlemna a ni tawh a, thli a thaw vuk vuk bawk nen, ţawngrin ngai tho mahse duh aiin ka lo ţawng ring mah mah zel. 

"Vawikhat chiah ka la siam ti mawlh mawlh a. A kual zawngin ka sawi a, college naupang lek chuan ila hrethiam lo nih kha" uangthuang zet hian a la ti zui.

"Vawikhatna a nih ka rin loh lutuk vang zawk a nih kha"

"Ni e le. Rilruah i awm thut a, cake siam chhan tlak khawpin i chhe lo tihna nih chu" a ti a, ka sawi tur awm ang a hrethiam ang a, ka sawi hma hauhin ka thinrim loh dan tur a ngaihtuah tihna. A cake siam ni lovin min chhaih dan vel zawk hi. Kan inman tawh lutuk tlat. 

"Tupawn cake te chu an dawng deuh vek tawh ang. Tunlai a an theh lar ber pawl alawm"

"An bialpa ten an siam sak ve tlat lo a"

"I ţawngthei si ka ning" ka ti hlak a, a nuih ka ti za lehpek. 

An inchhungah chuan ka lut phur tehchiam lo. A nu chu a fel bakah amah vanga Dinpuia a hrehawm lutuk leh a pa diktak a hrilh duh lo hi a inthiam lo ve a, Dinpuia hi a duat phah. Midangin a awm ve lo ang mai a an ngai leh an biak ve chhun pawh a ţawngkam ţha an hmang ngai miah lo hi hmuh leh hriat a hrehawm ţhin. 

Kawtah a pi leh pu te hahdam zetin an lo ţhu diai a, a mawiah an lam hawiin nui ve mah ila an hmelah engmah an lantir ve lo. A pi zawk chuan "Inu i pui emaw tia khawiah nge i chhuah leh hman? Khawlai hi i ngaina leh lutuk a, awm hlenna atan a duh chai si lo" a lo ti hlak hlak a, ka inthlahrung lutuk chu ka lo ip chawih chawih. 

"Pitar hriat ve chi loh" a ti liam puat a, ka darah kuahin min luhpui daih. A pi ang zui bawrh bawrh ri pawh rei vak lo chhung chu kan hre pha tho. A nu nen a cake an siamna hmunah min kalpui a, tumah an lo awm lo. 

"Khaw nge i nu chu?" 

"A tih tur ber a zo tawh a a awmna hmun lehzel ka hre kilh kelh lo. Ka thil siam chu i en duh em?" ti a min zawh chuan lu ka thing a, ţhutnaah ka bag theh thla in keipawh ka ţhu hnawk. 

"Rina te in a i hmeichhe hruai kha tu nge?" ka ti chang fak a, ka melh kal a, a danglamna engmah hmuh hmaih ka tum lo. 

"Teresa, ba ka dilpui anih kha. Chu chu mi thil ka hria i rawn tih ve sek kha?" ti a min zawtin ka bulah a rawn ţhu ve. 

"Aw..vawiinah Rina hnen aţangin ka hria a, ngati nge nangmah daih daihin ba i dil pui?" ka ti lehzel. Ka ngaidam ngun ang bawk hian ka thikthu a chhia mahse ka lerh miah lo. A awmdan hian thikthu ti chhe lo thei lovin min siam ti tawh mai teh ang. 

"Ka ţhiannu a nia, kalpui tur dang a hre lo a,ka Bible chhiar min rawn sawm chhuak lui a" a tih chuan ka nui ţep mahse ka insum leh vat. 

"Khati zawng khan fiamthu thawh suh. Ka hriat ve loh ţhiannu i ngah ropui si. Ka awih zo zai tawh lo" thutak lui tlat chungin ka la chhal ta tho. 

"Awm nawm loh phah nan hmang suh. Ka ţhiannu te ho chu ţhianpa ah vek ka ngai" 

"I ruih laiin ţhianpa angah i ngai awm lo chiang e" tih vang vang pahin a lam hawiin ka ţhu rem a,ka hnaih tawh tehreng nen a lamah min la pawt hnai deuh deuh. 

"Ka ruih lai chuan pavalai angin ka en" nui ruh ruh chunga a tih chuan hmui hnuailam ka ti pawrh a, chutia ka tih lai tak chuan min la fawp zui, a va han nasa ve tak. 

"Ti tawh suh ka tih kha" ka ti vin hlar. A ţhiannu a nih tak tak leh tak tak loh ka la hrechiang lo va, lungawi zan na tham a la ni lo. 

"Engmaw?" a lo ti sup a, hriatthiam loh hmel tawkin a awm leh vel. Inţhen ka sawi thleng lo va a thinrim lo mai mai. 

"Ka sawi nawn peih lo. Khawmaw i cake siam chu?" ka ti ta daih a, phur zetin rawn la ve bawk mahse a nalh lem lo. En tawp pawh a ei chakawm deuh ang kha a ni lo hrim hrim. A ngaiah bawk rawn ţhu lehin intithei deuhin ka hmaah a keng a, ka beisei sang lo chung pawhin ka beisei a pha chuang lo. An siam lai chu a hmu tawh maithei mahse vawikhatmah a la siam chhin lovang tih ka chiang. 

"Vawikhat naah chuan i thiam khawp alawm" ka lo ti a, a lawm hmel takzet. 

Kan eichhin a rin aiin a tui phian. An nula pakhatin thingpui min siam hlauh bawk a, ka ei ve ţeuh. Kan eizawh awm velah Didiki'n min rawn call a, ka ngaihthlak veleh "Ngati nge i haw hma daih? Ka nghak char char che a, engmah i sawi bawk si lo" a rawn ti zat zat a, a awki aţangin a lungawi chiah lo a nih hmel. 

"Nia Dinpuia cake siam ka eichhin duh sia, class ila nei bawk sia, hrilh lo che in ka haw tawp mai" inthiam lo zet chung hian ka ti a, a thaw hawk ri pawh ka hre pha. 

"I bialpa ai chuan i zirlai dah pawimawh rawh. Cake eina hun chu a tam alawm bakah message type a har viau a mi?" a la ti lehzel a, Afela nen an inhauh aţang khan a dik tawh lo hrim hrim. 

"Aw ka thiam loh anih kha. Nidangah ka hre tawh ang. I haw tawh em? Inu chu dar engzatah nge a lo thlen dawn?" ka ti ta zawk a. 

"Thim dawnah aniang. La haw lo ka nghak char char che a, Siami ka hmuh hnuah ka hre chauh. Dinpuia lah hi a hman lutuk a, a duh duh hunah a ko tawp che a, koh kal mai mai theih te khan awm suh. Induhtawkna te nei ve ta che" 

"Vawiin chu a buai ve lutuk. A thil siam eichhin tur a min duh vang ania, bakah i sawi ang chuan ka awm lo hrim hrim" ka ti a, ka awm lo tak tak a, amah Dinpuia bawk hian a hrechiang ang. Didiki ka chhan dan a hriat theih vek vangin ka fimkhur a, a nih dan rawt rawtin ka sawi ngam lo. 

"Nih chu. Tui deuhin lo ei rawh u" 

"Lo ei ve la, heta ţangin inu nghak la, ka nghahpui ang che. Dinpuia ka rawnkal tir dawn mi?" ka ti leh hnuhnawh. 

"Ngai lo mai rawh se. Ka ei chak vak hran lo, ka la puar deuh a, kinah i haw hunah min rawn be rawh aw" ţha deuh a a tih leh takah chuan rilru a nuam ve huai thei.

"Tehreng mai ka thlen rualin ka lo bia ang che" ka ti a, thinrim ţun lova min thlah theih takah chuan ka thawveng hawk. 

"Ka haw dawn ka hrilh lo va, a lungawi lo deuh a" bah nawk hian ka ti a, a ţawng kha a hre pha em lovang chu. Kan awmna a reh angreng si a, a hriat phak ka hlau mai mai. 

"Khanu kha i hrechiang em?" a ti nghut a, a thutak run lehnghal. Kan inkawmna rei tawh zia a hre ve vek sia, tun a tak a min zawt hi ka hrilhhai lek lek.

"Hrechiang e. Nangmah nen pawh in in ngam tlak em hi. Ngati nge min zawh thut?" ka ti ha a, an inhmu ngun ve tawh a, kan inngaihzawn tirh phei chuan ka la naupan lehzual vang khan kan inhmuh dawnah Didiki hi ka hruai ve deuh ziah a, a ni pawh hian a hrechiang turah ka ngai.

"I rilru a nem ve a nang hi chu, i rilru a ţha bawk a, hriatchian loh i kawm chuan nakin a i nat ka hlau mai mai mawle" a ti awlsam leh et a, vawiin chu hlauthawng deuh deuhin min awm tir hlawm a. 

"Nang bak min ti na tur an awm lo. Hmelhriat leh ţhianten chunu nen chuan ka hmu a an ti thei deuh reng a, anih loh leh a rui a an ti ve ziah bawk a" ka ti let ta zek a. 

"Tupawh kalpui ila nangmah bak ka duh hleinem. Ruih lampang kha chu ka ruih pauh leh ka duh che" nui chung hian a ti a, ka nuih ve duh miah loh vangin "Tak tak a an sawi zawng zawng awih vek bik lo la, ka rui ve zeuh zeuh a, i hre vek tho a, ka tih ni ngeiah ka pha ngai hleinem. Dawt ka hrilh che i hre tawh mi?" ti a min zawh takah chuan ka ngaihtuah vang vang hnuah lu ka thing. 

"Ka tih reng kha. Midang ka duh anih chuan ka ţhen mai ang che. A rualin hmeichhe pahnih ka buaipui tuk dawn lo" thutak zet hian a ti a, ka â lutuk nge ka hre lo, dawt a sawi lo tlat a hriatna ka nei lehpek. 

"Midang iduh hunah ka na tho dawn anih chu" ti uangin ka nui zui a, hmeichhe dang chungchangah chuan min hmin leh thlap tawh. 

"I ţha ber a, nangmah chiah ka duh reng ang che" a ti a, a thusawi nemnghehna ni awm takin min kuah a, keipawhin ka lo kuah let ve vat. Mahse tupawh rawn lut thut thei reng an nih vangin kan inthlah leh vat thung. 

"Min duh reng mahla i ruih tel reng chuan engtikahmah kan awmdun thei dawn chuang lo" ka ti ta nge nge a, sim tir ka duh a, ani lahin a sim duh si lo.

"Kan la sim ve mai ang. I haw duh tawh em? I tlai chuan i chhungten an lo hau ang che" a ti a, ka chhungte min venpui nachang hi a hre ve ţhin a, a chang chuan kei ai aiin a hlauthawng. A ruih chang paw'n a hunah chuan min thlah tho zel. Kan inhau te anih ngawt loh chuan. 

Kan awmna hmun aţangin kan chhuak a, an in hi a lun ve hrim hrim bawk a mi an lo awm nual. 

"Kimkim" ti a min ko tu chu ka hre lutuk. Pawl12 ka zirpui ţhin. 

"Ehe...I dam maw? Rs" ka ti hluai a, college khatah kan kal tawh lo va, pawl12 kan zawh hnua kan vawikhat inhmuh lehna a ni. 

"Aw dam e. Ila ngai reng anih kha, ral aţang pawhin hmu che ila ka hai miah lo ang che. Naupangte angin i la lang reng" a ti ve luam. Ani hi chu ţawng duh leh ţawngkam nei ţha thei si ang kha a ni. 

"Ka van lawm em em. Nangpawh i la ngai reng. Hetah eng nge itih a?"

"Chhang hi a hlawmin kan la a, an pack chhung kan lo nghak anih hi. Eng nge itih zawk?" ti a min zawh lai mekin ka lu a rit nulh a, Dinpuia chuan a helmet full face lehnghal rit nulh mai chu min lo khum tir a, lak thlak ka tum laiin ka dar lehlam lehlamah a dawm a, min nawr chhuak dawr dawr. 

Pawn kan thlen veleh amah zawkin min phelh sak a, ka sam hui ţhat mawlh mawlh pahin "Iva mawl ve" ka ti vin tak a, a pi leh pu te an la awm takin tiin ka hawikual a, an awm tawh lo hlauh. 

"Lawmthu min hrilh zawk rawh i tlai loh nan ka chhan che anih kha" nin hmel fe a tiin a tihziah danin min kuah a, bike dahna lamah min kalpui a, kan thlen hnuah "Tu lakah maw min chhan a?" tiin ka zawt leh ta tho. 

"Ka nu in biak che a tum a, a rei leh dawn sia" a ti bul bul a, ka awih lo lutuk chu ka nui hak. 

"Inu chu an thil pack enfelin a buai em kha, Rsa nen kan inbiak lai khan ka hmu pha vek. Min ngaihven hman lo hrim hrim" 

"Kal ang. Hmeichhe ho lah hi awlsam deuh a mipa thusawi kaih leh inthiam reuh a, ka tih dik loh ni leh mai rawh se" a tih zawh a helmet a khum hnu pawh chuan "I thusawi engmah ka kai let lo" ka ti hram a, hriatchhuah thut ka nei. Nui ver ver chung hian "Rsa kha i thik a ni maw?" ka ti ta nge nge. Ka van hrechhuak har tak. Min chhan hun nghakin ka melh chho ran a, a tlawmngai leh ang chu aw.

"Thik mai mai lo. Min delete phal loh zia ka hria a, kuah bawrh bawrh che mahse kuangkuahin ka lo thlir reng thei ang" inringtawk tak hian a ti a, Rsa kha rawn chhuak leh se ka ti ru angreng. Thikthu nei ve miah lo ang mai a sawi chang a neih vang hian mipa dang hmang a runluih te hi ka chak vak lo. 

"Kan inhmu lo rei tawh sia Rsa kha a phone number ka va dil leh lawk. Group siam ka duh, kan la biak ţhin ang ang add ila midang an lo hre veleh zel ang a, kan kim thei mai ang" ti a ka hrilh zawh a an in lam a ka inher chu ka ban puam laiah min dawm hman hram. 

"A rei zel ka lo dil ang che a rawnkal ziah. Ka nu a buai em kha, puih ka ngai a, i tawi khawmuan chuan nangmah a i haw a ngai ang" a ti a, a awki a dam vak tawh lo. Ka inher hmain ka nui sak a, min hmuh theih tur a ka inher meuh chuan ka nui hmel ka dah bo tawh. 

"Nih leh kal ang. I thinrim hma emai" ti ve hlak mah ila ka nuih a za ru tho. Rilru ti hrehawm zawng a a awm vaih chuan tih hrehawm let dan ka hre ve tawh tal alawm. Hmeichhia chuan min duh der tu kan nei ve reng bawk a, a hre ve tawh ngawt ang. 

Kan in thlen hma deuhah ka chhuk leh a, kan la inzui reng tih hi ka chhungte hriat ka la duh chuang lo. Min hau leh hrep ang a, an ţangrual leh ţhap ang a, thinrim ţunin khumah ka let ka let leh mai ang. 

"I sawi ang khan inu chu pui la, zanah lengchhuak suh aw. I tum phawt chuan i nundan thlakin i insiamţha thei lutuk a nia" ti a ka hrilh chuan a aw liam puat a, a ning leh tawh anih hmel. 

"Kal tawh rawh min be hman lo lek a i tal leh vel chuan ka be tawh lo hmak ang che" ka ti a, ka vau ve pang pang zel. 

"Ka pa diktak ni tur awm ang rin ka nei a" thutak zet a a tih chuan ka ngaihven khawp mai. 

"Tu nge? Khawi a mi? Aizawlah a awm em?" tiin zawhna ka zawt nghal mawlh mawlh. Engamah hmain ka lo lawm ve em em ringawt. 

"Ka chhui dawn mek. Ka chhui na lam a be hman lo lek che a ka awm anih pawn ka lo biak hun che i ngaihchan reng a ngai tihna a nih chu. Min be lo hmak leh lo mai rawh" a tih chuan "Iva han over tak" tih pahin a a banah na vak lovin ka beng a, a nui ruh ruh ringawt. 

"Ka kal aw ilo len ziah dawn chuan nitin cake ka siam peih" 

"Ka thau vek ang. Tui ti tho mah ila ei lutuk ka duh chuang lo" ka ti nang nang a, tunah pawh ka cher lutuk lo hrim hrim. In diet hi a lo har ve bawk sia. 

"I taksa danglam mahse i hming leh chhunglam a danglam loh chuan ka duh tawk" a ti a, inla zei deuh hian a ţawng a, ka lai ve ngai lo. Ka nui vak vak zel tun a ka nui ang chiah hian. 

"Haw mai mai teh, i hman veleh min rawn be rawh aw" ka tih chuan "Ok" a lo ti vat a, ka kal hmasak tir a, a liam thlengin ka thlir. Ka ngei tur hian awm fo mahse a hunah min duhsak veleh ţhin tho bawk sia, diktak chuan ţhen mai a ţha ti chung hian ţhen harsa ka ti tho. A bula ka awm hian ka hlim a, kan inhmuh loh rei te hian amah ai mahin ka khua a har zawk ţhin ang ka ring. 

In ka thlen veleh ka pindanah lut tlangin Didiki ka bia a, "Hei kawtah ka nu ka nghak mek" a tih chuan "Iva phur tawh awm ve" tiin ka lo fiam. 

"Nia kan inhmu lo rei tawh sia ka hmuchak tawh. I haw chiah mi?"

"Aw in ka thleng chiah a ka lo be nghal che. Ka la inthlak lo" tih mawlh mawlh pahin pheikhawk ka phelh a, khum a zangthal diai a ka mut chuan ka hahdam sawng sawng. 

"Dinpuia nen in awmdun hi chuan i tlei ve thei chiang alawm. Rei ti viau che mah ila ka rawn be buai duh lo che anih kha" nui hak hak chung hian a rawn ti ve a, engkim min hriatpuitu a ni miau a. 

"Rsa kha ila hria em? Tupawh a fak vek zel kan tih ţhin kha" 

"Hria e. In inhmu mi? Ka hmu ve chak reuh e" zangkhai vah hian a ti a, a aw aţang ringawt pawhin Rsa hming a hria chu a phur tih a hriat. 

"Hmu e. Dinpuia te inah chhang vel buaipuiin a lo awm ve a, kan inbe luam mahse Dinpuia khan a thikin ka hria" ka ti a, ka nui zui har har. 

"Hepa lah hi a. Tumah a thik ngai lo iti ve sia" 

"Mipa dangin min neih chu a phal dawn lo hrim hrim a, mahse ka thikthu a chhia a ti duh ngai miah lo. Rsa ka hmuh chiah khan a thikthu a chhia tih ka hria. Ka hre har iti em?"

"Ti e keichuan ka hre daih tawh. Nih leh maw mahni chiah a mi nghah ngawt ngawt chu a ninawm sia, zawhna ho te te ka zawt ang che aw" a tih chuan ka lu ka ti che a, aw tih nan a buk zeuh zeuh hi ka ching hrim hrim a, ngaiah ka nei tawh. Mi nghah hi a thei lo ve a, a tihziah dan a ni ve hrim hrim. 

"Min zawt la"

"Entirnan, a thleng dawn ka tihna a ni chuang lo va, entirna ringawt anih hi aw. Bialpa leh ţhian hi duhthlan ngai se tu nge i thlan zawk ang?" ti a min zawh chuan ka bawk khup thawk a, ka ngaihtuah vang vang hnuah "Ţhian ka thlan zawk ka ring. In vai hian ka tan chuan in pawimawh vek a, ngaihzawng te chuan min phatsan hun te an la nei maithei a, min hmangaih loh hun te mahse ţhianţha te chuan engtikahmah min phatsan dawn lo va, min hmangaihna in tawp chin a nei ve dawn bawk si lo va" tiin ka lo chhang a, mahse a chhan a zir anih ka ring tel tho. Chu erawh ka sawi ri lem lo. Engpawh chu lo ni se vawiin a awmdan hi mak ka la ti tho tho. Engemaw mawlh tu a nei anih ka ring a, min hrilh loh chuan ka hrethei bik si lo va, engkim a ţhat zel beisei phawt ang.

CONT...