THROUGH THICK AND THIN-4

THROUGH THICK AND THIN-4

DIDIKI

"Kan inhmuh khat nen haw hma i tum e, karkhat vel tal cham ve rih la" ka nu kuah run chungin ka ti a, nula ve uaih tawh mah ila ka nu bul a ka mut hi chuan ka thla a muang ţhin hle. 

"I pa a buai lutuk ang. I naute an la rintlak tak tak si lo a, zirlai an la ni bawk nen. Ka haw vat ang a lo zin leh vat ka tum zawk ang" 

"A chang chuan lehkhazir tawh loh mai ka duh ţhin. Ka awmna hmun a hrehawm chu thuhran ka ţhiante an awm thei hlawm si a, fel viau mahse kan dinhmun a inthlau em a, nuam ka ti tak tak ngai lo" ka tih chuan a saisir a, duat takin min kuah ve. 

"Tuar hram hram rawh. Pathian bel tlat la, ţawngţai tam la, Pathian nen chuan tawrh theih loh a awm lo" a tih ziah dan a ni. Min fuih a min hnem chang apiang hian Pathian hming a lam ziah a, ka huat ber te zing a mi a ni. 

"Ka ţawngţai ngai tawh lo. Ka bansan vek tawh. Ka dilna ho te pawh min chhang duh lo tu chu engvangin nge ka biak a ka koh reng bik ang? Ka hun ka khawhral peih tawh lo. Malsawmna ka dil ţhin a, kan chhungkaw chunga malsawmna thlen tir a harsat ngawng ngawng emai nangni paw'n be duh tawh suh u" ka ti hmarh hmarh a, ka la sawi lo maithei, Pathian hi ka demin ka haw takzet. Kei aia sual ni a ka hriat ten malsawmna an dawng thur thur a, an thil tih naah lah hlawhtlinna in a umzui zel a, diktak chuan Pathian rorel dan hi fair lo ka ti ţhin a, thlei bik neiah ka ngai nghet hmiah tawh a, ka be peih tawh lo. 

"I tan chauh i dil aniang. Pathian tan eng nge itih ve? I thinlung a khakna awm te paih bo la, thinlung leh tih tak zetin ţawngţai ţhin la, Pathian lawmzawng tiin sawi ţhin la, i thil dil te vawi leh khat a rawn thleng nghal vek turin beisei lo bawk la, rim takin malsawm tlakin thawk la malsawmna i dawng mai ang" a ti lehzel a, ka nu thu lak dan hi ka ei loh zawng tak a ni ţhin. 

"Ka naupanlai aţangin ka dil ngai ka dil char char tawh. Awmzia a awm lo anih hi a lo thleng thei hleinem" tih pahin ka ţhuchhuak a, ka nu ka melh run tho. A mut ngaiin saisirin a la mu reng a, en mai pawhin hna a thawk nasa tih a hriat. 

"Thinchhiat lutuk te hi a ţha ngai lo. Aizawl i awm tirh a i ţhian pakhat a chanchin min hrilh fo te kha, i sawi hmang paw'n a fel hmel em kha. Khang te kha entawn la, midang nun a a ţha lai entawn hi chu a hlawk thlak a nia, lo mu leh rawh" tih pahin mutna awl lai a chul a, ka mu veleh mai. Zangthal a mu in ka nu ka kuah ve tawh lo. Kimkimi bawk, ka ţhian a ni a, sawiselna lai tur ka hre lo. Mahse engkim a a hmasa zawk vek ţhin hian ka awm a ti nuam lo zeuh zeuh. 

"Ka entawn peih teuh lo. Rilru nem diai leh chak lo lutuk ka ni ve peih lo. Midangte thu thuin ka awm ve peih lo bawk" ka ti hlak hlak a, hmeichhia ka nih angin nemna lai leh chak loh chang ka nei ve tho ka tih tawh kha mahse ka chakna leh chhelna lai chiah ka ti lang ţhin. Kei aia an dinhmun a ţha vek chung hian tuman min hnuaichhiah ngam lo reng bawk. 

"Ngati nge ka lo pian ve kher kher? Piang ve pawh ni ila chhungkaw hausa takah tal piang ve ila ţha tur. Hrehawm tuar tur hrim hrimin ka piang a, a hming i lam ve ziah Pathian lah hian min hre lo der hmak a, ka hrehawm tawrh lai hi hmuh a chak aniang. Ka ţhianten scooty emaw bike an nei vek a, kei ve chu bus emaw taxi emaw a ka kal a ngai a, tlaiah nise tu emaw berin min thlah ziah a, chhunah thil ei ho ila min leisak anih loh chuan a tui tui ei lovin a man tlawm tlawm ka ei angai a, ka ning hluah hluah tawh" ka la ti bawrh bawrh. Ka insawi thinrim leh tawh a, ka tawt leh up up tawh. Ka awmah hian hnawh tu a awm leh tawh a, boruak a rit luk bawk. 

"An thlah ziah peih che a, i eitur an lei ţhin bawk che a, Pathian malsawmna i dawn reng chu. Ţhianţha tam tak a pe che lawm" a ti dam diai a, muangchangin lu ka thing. 

"Ka pa hlawh lak hunah an tih loh leh ka nu hlawh lak hunah an ti reng a, an duh duh an lei thei vek. Chu chu ka duh an tih chuan an nei thei nghal. Awt ru ve mah ila lawmpui ang a ka awm a ngai a, lo a thlai hralhna bak in nei lo tih ka hriat vangin neih ve tumna ka nei ngai lo mahse ka awt ve ţhin. Ka nei ve thei lo tih hrereng chungin an thil thar neih an sawi reng a, min hrethiamah an inngai a min hrethiam tak tak lo. Ka pa nen hian lo fing hma ula, hna inneih hnuah tal lo innei ve mai ula ţha tur, ka ţhiante nu leh pate ang chiah hian" tiin anmahni dem zawngin ka ţawng ta hial.  

"Ni ngawt mai. Nupui pasal neih hmanhmawh lutuk hi tihsual palh te a awl a, mahse ipa in zu a in ngai lo va, nitin chhungkuain Pathian kan be ho thei a, i awm loh hnu pawhin kan la chhunzawm reng. Eitur ni se a chuang liam nei lo mah ila eikhawp kan nei reng a, Pathianin hriselna ţha min pein insawiselna kan nei ngai mang lo. Chu bak bak a hausakna a awm em ni?" a tih chuan ka thinrim telh telh. 

"Engmah ka dil tawh dawn chuang lo. Pathian a awm lo ka ti ngam lo mahse amahah beisei ka nei tawh lo. Beisei nei lo law law ila ka na lo zawk ang" ka ti a, ka inkhawm loh chin ka hre tawh lo va, ka ţawngţai lohna lah a rei tawh. 

"Kan lo ţawngţaipui reng ţhin dawn che nia" tih ringawtin min chhang. Ka melh zawk a, a mit a chhing tlat a, a thlamuan hmel hle. 

Ka nu rawnkal hi ka patea a lawm thiam viau rualin ka nutei erawh chuan mei nei deuh deuhin a ţawngkhum fek fek reng a, ka nu in engahmah a ngaih loh laiin hrehawm ka lo ti hle. 

Ka mu meng kar reng a, mutthilh tum mah ila ka thei lo. Ka harh tulh tulh ni maiin ka hria. Thil hriatchhuah thut ka nei a, ka nu phone la in whatsapp a dp a lo dah ve vang chu ka paih sak hmak. Ka phone aţanga Dinpuia number la chhuakin ka nu phone ah ka chhinchhiah a, keimahin ka nui ver ver. 

[Dinpuia tiraw? I muhil tawh em?] tih te mai hi ka thawn a, Kimkimi'n a len loh thu leh an inbiak reng thu a sawi zeuh tawh a, a la men ka ring. 

Min rawn chhan let hun ka nghah chhungin ka phone a message awm ho leh status te ka enkual a, beisei loh takin Dinpuia chuan status a lo nei ve mial. Rang lutukin ka en vat a, Kimkimi nen a an thlalak a lo ni. An inkuah chial a, an hlim hmel hle. Kimkimi hian neih loh pawh a nei lo. Pawisa an nei a, in ţha tak leh chhungkaw zahpuiawm loh tak a nei. A nu leh pain sawrkar hna an thawk a, a u doctor a ni bawk. A bialpa lah hmun tinah an chhang siam hmuh tur a awm a, an semchhuak hnem hle. Lehkha a thiamin fakna thu a dawng nasa thei hle a, hun rei tak a lo hriat tawh ţhianţha tak tak a nei bawk. 

Dinpuia status chu ka en zel a, a dahna a la rei lo bawk a a la muhil miah lo vang. Nidanga status nei ngai mang si lo zanin chu a dah ve tuarh a, an inhau anih ka ring. Kimkimi inring lo lai leh maksak tak tak a an lakna te ka hmuh chuan ka nui leh hak ţhin. Ka en zawh hnuah ka nu phone bawk ka en leh a, message a seen vek tawh na a min reply miah lo. 

[Thil pawimawh deuh hrilh duh che ka nei a, i bialnu chungchang a nia] tih hi ka thawn leh a, min chhan tawh ngei ka ring. Ti hian fiam kual ila zan a rei lo deuh hlek ang ka ti rilru a mahse seen vek siin min la reply duh chuang lo. A induh ve khanglang niin a lang. 

[I hrechak vak na nge? Hria la chuan mak iti ve ngawt ang a fel sia] ka ti leh a, hlauthawng deuh a awm tir ka chak ve hrim hrim. Min chhang let ve ngei se ka ti bawk. Ka phone ken lai chu a nghawr det det a, ka va phu chiang tak. Rang zetin ka en a, Dinpuia ngei a ni. 

[Amah ka lo zawt ang] Dinpuia min rawn chhan letna. A la hlauthawng chiah lo anih hmel. Nge a bialnu hi a ring lutuk zawk? Hmeichhe khawlo leh lepchiah, zan a chhuah ruk hrat deuh angin min hmu a, a bialnu hruai ve lo turin min ti bawk. Chutih rual chuan Kimkimi erawh mi thianghlim ang maiah a ngai a, a ţhatna chiah a hmuh sak thung. Min hmuh dan a danglam lutuk vang te hian chhaih buai zel ka chak phah. 

[Nihchuan Muankima chungchang pawh a hrilh tawh dawn che anih chu] tiin ka thawn leh a, Muankima hian Kimkimi hi a star nasa ţhin a, tunah pawh a la danglam lo vang. Kimkimi'n mitmei a hmuh duh miah loh vangin a huangtau lo mai mai zawk. Ka thil thawn chu a chhiar leh vek a min reply leh chuang lo. Thil dang ka hrilh belh tawh rih lo a, ka va biakna te pawh ka delete leh vek Dinpuia number thlengin. Ka nu dp ngai ka dah leh a, a number neih ho chiahin an hmuh theih turin ka thlak sak. 

"Inu chu a haw hmain chaw lo eipui ve la" kan inhmuh rualin Kimkimi'n chaw eiah min sawm. Class kal dawn hi chuan ka hmu hmasaber zel. 

"Ka nutei ngaihdan a ni lo leh ang a a buaithlak. Naktukah a haw lehnghal dawn bawk sia, a cham rei theih deuh hunah ka lo la eipui ang" tiin ka lo hnar. 

"Nih chu mawle..a pawi lo mai. Nia a rawnkal leh hunah chuan lo ei tawh ngei ngei rawh u. Ka chhungte hnenah ka sawi a, ka nuin sawm la a tia ka sawm ve tawp cheu" a ti zat zat a, engkim neih vek na na na chuan mi chung a ţhat chhuah a awlsam deuh ania nge. 

"Dinpuia nen in inbe ţha maw?" ti a ka zawh chuan "Nizan khan mu hmasa zawkah ka ţang a, ţha deuhin ka mut dawn thlengin kan inbia. Min zawt lo mahla hrilh ka tum tho che a, ih maw.. Muankima hi a lo hria a, zingah message ka hmu ţeuh a, min rawn call a tum ţiah ţiah bawk a, mahse phone ka lo silent daih sia, Muankima chungchang min zawt char char" a tih chuan a hmuh lohin ka khi sak. Kimkimi buai vanga lawm ka ni lo. Dinpuia vang zawk. Engahmah ngai lo angin a awm a, a rilru buaiin Kimkimi a zawt chung tho sia. 

"Tunge lo hrilh ang a?" tiin hre lo ni awm takin ka zawt vel a, Kimkimi hi chuan ka hrilh a ring dawn lo hrim hrim. 

"Ka hre bik lo. Mi hi an ţawngthei e tiraw? Muankima ka duh ve miah si lo va, an tan a ţangkai lo tur an sawi peih e" a ti nang nang a, ka tan a ţangkai thung alawm. Thawveng deuh a awmreng lo va buaina a neih ve khan a nuam. Kimkimi a tel ve zel a ngai erawh pawi ka ti. Dinpuia tihbuai theih dan awmchhun a ni miau bawk sia. 

"Tukinah a thlah lo che mi?"

"Teuh lo mai. Min thlah dawn em ka tia Muankima sawm mai rawh a tia, a naupangchhia thei bawk sia maw, ka hrilhfiah lahin a awih ţha duh bawk si lo" a ti a, hrehawm a tih hmel takzet. 

"Muankima chu i sawm ta mi?"

"Sawm nang aw..scooty ka keng tawp" a tih hnuah a nui hak a, a la nuih theih chuan an inţhen em lo ah ka ngai a, ka thaw huai. Tunah rih chuan inţhen turin ka duh lo. Kimkimi hian a hmangaih tih ka hria a, an inţhen chuan a na lutuk ang.

"Nakinah hmaichhanah hrilhfiah leh la, a ţhen thei chuang hleinem che, i sawifiah chuan a hrethiam mai ang" ka ti luam. 

"Ka sawi peih tawh bik lo. Min biak loh chuan ka be bik lo ang a, a awm thei lo zawk a ni leh tho ang" inringtawk zet hian a ti a, nia, Dinpuia hian a ţhen thei tak tak chuang lovang. Engkim a nei vek ka tih tawh kha. Vannei tur bik hi an awm ve hrim hrim anih ka ring nghet hmiah. 

Kan ţhiante ţhut khawm ţhapna hmun kan thlen chuan ka nur nang. Afela chuan a hmeichhe sawi kha a lo hruai ve tak tak. Hlim hmel an pu vek a, mi hrang lo tel ve chu pawi an ti ve vak lo. An zing a ka tel ve tirh paw'n min lawm thiam hle hlawm anih kha. 

"Hei Kimkimi leh Didiki aw. An hming chu i hriat tawh kha. Chuan hei hi Zualtei anih hi" Afela chuan a lo ti nghal zawt zawt a, a der takngial pawn ka nui thei lo. College kal ţan chiah a ni bawk a, ka la hmu ngai lo. A hmelţha hran lo va, nui reng chi a nih ve hmel Kimkimi ang chiahin. 

"Ka lo va kal ang. Tikhan lo inkawm ru" tih leh kal ka rual a, ka rilru put hmang an hre hlawm bawk a tuman min dang lo. Ka chanchin hrevek lo mahse a tam zawk chu an hre vek. Ka inhawn ve na awmchhun an ni. Midangin an hriat ka duh ngai lo. Ţhianţha tak tak an nih loh chuan nakin a min nuihzat leh tu tur bawk an ni. 

Class ka la nei dawn lo bawk a hmun fal deuh laiah keimahin ka ţhu a, ka bag aţangin phone leh sim card ka lak thar ka phawrh a, ka nu pawisa min pekin ka kal lamah ka lei hmak. Vuah ka tum mek laiin thawm ka hria a, ka phu teuh hle. Bag chhungah hnawh lut hmawk hmawkin ka hawichhuak a, Timothy bawk a lo ni. 

"Eng nge ilo tih?" ka ti ram hmak a, min ngaihtuah ang a a awm vel hian nuam ka ti lo ka tih tawh kha. 

"Ka ning ve tho a" zawi te a a tih hnuah ka bulah a rawn ţhu thla ve a, a chhuanlam siam chu ka awih lo takzet. He pa hian tumah a ning ngai lo. A bula an awm duh phawt chuan tupawh a lo lawm vek. 

"I ţhianpa bialnu a nia, kawm ve bawrh bawrh zawk ta che" ka ti leh khar khar. 

"Kan vengah inruak lian vak lo luah tur a awm a, i awm duh em?" tiin min zawt ta daih. 

"Engzatin?"

"Ka la hre lo, siam ngai tlem a awm a, an siam zawhah luah man min hrilh thei chauh ang" a ti a, luah theih ka duh viau rualin thawhchhuah ka la nei lo va, in luahman bakah ei leh in nen, ka thei lo sa. 

"Hna ka neih thleng a ruak anih te chuan hna ka neih hunah ka luah ve thei mai ang" fiamthu titak deuh hian ka ti a, a ruak rei dawn hauh lo, chu chu kan hre ve ve. 

"Luah man ka tumsak ang che" a ti sup a, ţawng zawi viau mahse ka bengah a ri ring hle thung. Mak ka tiin phawk hra hian ka en vang vang phawt a, a tih theih ka ring lo lutuk chu ka nui chhuak ta nge nge. 

"Khawi a pawisa nge min pek sak ang a? Inu leh pa te hnenah ţanpui ngai tiin min sawi dawn a mi?" tham lo zet hian ka ti a, a ruihna man a to bawk nen, khawi a pawisa mah a nei lul lovang. 

"I thu thu nimai, in luah man ngawr ngawr chu ka tum sak thei che" a ti nawn leh a, a uang miah lo lehnghal. 

"Ka nu awm lai a nia, ka lo sawipui dawn nia" ka ti ve ta nge nge. Mahse a thlawn ngawt a ţanpui nih ka duh loh vangin "Ka awmna aţanga ka insawn chhuak anih pawhin hrehawm ka tih tawp khawk vang a ni dawn a, Lalawma ka nin vang a ni tel bawk ang. A thlawnin engmah ka dawng duh lo va, ka nu in awm hran a phal a, in ruakah ka insawn lut anih pawhin i pek zat ka chhinchhiah zel ang a, hlawh ka neih veleh ka rul leh ang che. Class kal pah a inhlawhna tur ka hmu hlauh anih chuan pek sak kher ka ngai lo bawk ang" ka ti tel hram. Hrehawm viau lo se chu midang ţanpui ngai a awm turin ka chhuak miah lo vang. 

"Inhlawhna ka lo zawnpui ang che" a ti lehzel a, tlemin ka phur ta deuh. Keimah ngei in a pek theih ka duh ve tlat. 

"Phut let inei em lo vang chu" ka ti fak a, a ngaihna a hriat loh hmel. 

"Keimah aţangin phut let inei em?" ti a ka zawh leh chuan ka thusawi awmzia hrethiamin a nui hawk a, thil ţha ka la tihsak miah lo chung a min ngaihven tlat reng hi a mak ve em alawm. 

"Ka phut let i hre duh maw?" 

"Tehreng mai" 

"Hlim reng rawh" a tih chuan mitko ka san ak a, "Eng nge awmzia?" ka ti zui zat.

"Hlimna chiah ka phut. Midangin an hmu ve lo maithei a, mahse i hlim lohna a rei tawh. In luah tur ka zawnpui hma che hian ka inngaihtuah fe tawh a, awm hrang la i hlim zawk ka ring. Inveng reng lovin thlamuang deuhin i mu ve thei tawh bawk ang a" a tih chuan mak ka ti ngei mai. Kimkimi takngial paw'n min hmu tlang thei lo ania. 

"Min hrechiang angin awm suh ka tih che kha. Tuman min hrechiang lo a, miin min hriatchian ka rem ti lo, ka ţhiante pawh in tel vek"

"Hriat chin ka nei tlem a, hriat belh ka tum hran lo. Inu chu lo rawn la zanah chanchin min rawn hrilh dawn nia" a ti a, chhanlet tumin ka ang zuau na a kal tum a a din tak vangin ka sawi tum ka sawi ta lo mai. 

Ka hmuh phak loh a a awm chiah chuan ka thaw huai a, ka zang hawk. Phone leh sim card bawk ka phawrh leh a, ka hman tam loh zawk ka dah ţha a, a thar zawk ka thun na a tumah hriattir ka tum lo. Ka ţhiante chuan ka hman ţhan ber hi hria se ka duh tawk. A thar hi chu Dinpuia chhaih buai nan chauh hman ka tum. 

Class ka nei zo ka haw tur chu Dinpuia ka hmu hlawl. Kimkimi a lo la lang lo va, kan inţhen hran aţangin ka la hmu lo hrim hrim. Tlai deuh a rawnkal ţhin si nidang aiin a hma ve daih. 

Min hmuh ruali  "Khaw nge Kimkimi?" tiin min lo zawt nghal a, chhan loh mai ka duh rum rum. 

"Ka hre lo zing a kan inhmuh bak ka la hmu leh lo" ka ti a, a bu nghat a, min biak zui a tum loh hmel. 

"Phone i ken chuan be mai la, class a nei tawh bik lovang. Rina leh Siami te nen thil tih kawi an nei aniang" keimah bawk chuan ka ti leh a, a tawp a tawpah chuan min enchiang ve ta nge nge. Nidangah lem min hmu thei ngai tawp si lo. 

"Ka call tlang thei lo. A awmpuite chu min biak sak thei angem?" tiin ţha deuhin min zawt ve mial a, tun ţum chu thu min pe tawh miah lo. 

"Puih che chak vak lo mah ila kan biak sak hram ang che" tih pahin nui ver ver chungin Siami ka bia a, an lo awm ho reng bawk. 

"A rawnkal dawn Rina an nghak lawk" 

"Awle" tih chauhin min chhang. Ngati nge ka bulah hian sawi tur a neih tlem em em bik ţhin le? Muankima chungchang min zawh ka rin tehlul nen min zawt miah bawk si lo. 

"Scooty a keng a, i thlah haw thei kher lo maithei" 

"Thlah i beisei deuh tihna mi?" ti a min zawh hnuah a nui suk a, ka makti lutuk chuan a nuih a ti za anih ka ring. 

"Beisei lo lutuk zawk. Min thlah tum mahla ka duh kher lovang" ka ti ve hmak.

"Zanin khawi lamah nge?" min ngaihnep hmel fe a a tih chuan ka sa phat. 

"Birthday lawm naa min hmuh fuh vang mai khan zantin chhuak turah min ngai suh. Hrechiang lovin thil an sawi mai mai ngai lo" thinrim zet a ka ang hmarh hmarh chu nui ruh ruh chungin a lo ngaithla. 

"Pawn lam ka ngainat vang hrim hrim a kal ka ni lo va, zu leh mipa ka mamawh vang a kal ka ni lo bawk. Thil thleng engkim hian chhan a nei vek a, khawi hmunah pawh min hmu leh la ngaihdan lo siam tawh suh" ka tih zawm leh a, ka thinrim lutuk chu ka thaw a rang vek thei hial. Chuti chung chuan eng vanga thinrim em em ringawt nge ka nih ka hre chuang der lo. 

"Ka fiamthu anih kha" a ti nghut a, ngaihdam min dil lo va inthiam lo ang pawhin a awm lo. 

"Fiamthu na chi leh chi loh te hi a awm ve. Kimkimi chu lo nghak rawh, ka haw dawn" ti a ka hrilh hnuah ka kal nal nal. Ka kal chak bawk a ka hma a kal te ka lehpel hmawk hmawk a, engvang tehchai nge ka hre lo ka hnuk te a ulh. A va han ţullo tak. Mipa vang a ţah ka tum lo bur a, ka ţhiannu bialpa vang a ţah phei chu ka tum lo lehzual. Ka engmah a ni lo ang bawkin amah hrim hrim hi engahmah ka ngai lo. Timothy ang chiah a min umzui ve mai ka ring a, kal chak viau e ti lo chuan hnunglam ka hawi zeuh zeuh mahse Dinpuia hmuh tur a awm lo. A induh lutuk te hi ka ngei a, midangte rilru tur ngaihtuah miah lova a duh duh a sawi ţhin leh inthiam lohna a nei ngai miah lo te hi ka haw ngawih ngawih. A thil sawi kha midang tan ho viau mahse keichuan ka haw bik. Dinpuia sawi anih vang te pawh a ni mahna. 

Chau viau mah ila chawl muang lovin a ţul ţulah ka nutei ka pui leh a, ka nu a awm ve bawk a nidang ang emin a ang nasa lo. Ka haw tlai thu bawk sawi lehin min hau hram tho. 

Ka nu hnenah Timothy thu min hrilh kha ka sawichhawng a, ka patea te inchhung hrehawm zia a hre ve tawh bawk a ka pa pawh rawn lovin a remti nghal thlap. In luahman pawh sangthum hnuai lam anih chuan thla tin min lo thawn theih a ring a, chawhmeh min lo thawn bak chu keimah a ka intum a ngai thung ang. Timothy tibuai lo va ka awm thei tur chu ka lawm hle a, ka patea te in chhuahsan hlan mawlh ka nghakhlel tel bawk. Inhlawhna tur ka zawng ang a, hman chawp tur chu ka neih ve mai theih ka ring. 

Ka lawm em vangin Timothy ka be nghal a "Ka nu in a remti vek tawh. A luah man tur kha lo hrechiang la, ka nuten min lo thawn theih ka ring. Thil a kal tluang purh hi a mak zawk. Ka duh dan vek a la ni zui" phur fe hian ka hrilh nghal bawrh bawrh. 

"I hlim deuh tawh em?" ti a min rawn zawh chuan a lem mai mai ni lovin lawm avangin ka nui ve ta nge nge. 

"Tehreng mai..min ngaihtuah ţhin a ka lawm lutuk. Inhlawhna tur min zawnpui dawn bawk a, ka duh dan danin ka nung ve thei tawh ang" ka ti a, ka zalen hun tur ngaihtuahin ka phur tawh takzet. 

"I luah theih chuan nuam deuhin i awm tawh dawn nia. Dam chuan naktukah ka lo ngaihven leh ang. Kimkimi nen veng khatah in awm thei tawh ang a, nuam inti dun leh lutuk si ang" a ti uang a, ani pawhin Kimkimi hming bawk a lam leh tawh. Kan ngaina ţheuh a, a hming lam lo hian kan awm thei lo tlang mahse nin chang ka nei tlat ţhin thung. Ka huat vang a ni hauh lo, ka ţhianţha ber a nia, a fel a min ngaihtuah bawk. Huat nachhan tur ka nei miah lo chung hian engkim a a tel ve zel hi ka hne a ni ber. 

"Kimkimi lo la hrilh suh" ka ti chang ta fak a, min hrechiang tu a ni bawk a, ka rilru put hmang a hrethiam nghal ngei ang. Hrilh lo turin a intiam thlap a, kan pahnih hian thuruk kan ngah tawh. Ka thuruk kawl tu hi mipa a ni miau a, tuman an la hre ve lo. 

Ka nu nen mut pahin eng eng emaw kan sawi dun a, ka pa hnen a chanchin a hrilh tawh thu leh ani pawhin a remtih ve thu te min hrilh a, ka hlim ve kher mai. Ka suangtuah na a ka lo duan lawk ang hian tluang deuhin ka duh dan takin thleng thei se ka ti. Ka nu mutthilh hnuah phone ka la chhuak a, whatsapp pahnih lai ka nei vang tawh. 

[Zan hmasa lam a Muankima leh Kimkimi te chanchin hrilh tu tho che kha ka nia, ka nu leh sim card kan inhman thleng a, vawiinah an pahnihin ka hmu dun. Engmah iti dawn lo mi?] tih hi ka thawn a, ka rilruin Kimkimi hnenah ngaihdam ka dil mawlh mawlh. Dinpuia tih hrehawm dawn chuan a hrehawm ve zel a ngai a, pawi ti viau mah ila Dinpuia rilru hah leh buai vel ka hmuh chak lutuk na hian Kimkimi hrehawm tawrh ve tur min haider tir hial thei. 

[Ka hmuh ve phawt loh chuan ka awih ngai lo] tih zawngin min rawn chhang na a ka khi sak. Hmuh dun tir te mai mai a har lo nasa. 

[Hlauhna inei miah lo mi?]

[Ka bialnu hi ka ring tawk] tih te mai hi a rawn thawn leh a, ka nuih a za tulh tulh. Amah ka ngaihzawn vang a chhaih buaiah min ngai a ni ngei ang. 

[I rinsual loh ka beisei. Mifel tak te hi an chhungril kan hmu tlang thei si lo va, pawnlam ang bawk a thianghlim anih ka beisei] tiin ka type duah a, ka thawn leh vat. A seen a, min reply lo. Min reply ka ring lo sa hrim hrim bawk. Keipawhin engmah ka be lui ta bik lo va, ka la dam zel anih chuan tharum tello a sawisak theihna hun ka la ngah lutuk. Ka hmanhmawh duh rih lo. 

Ka nu a haw dawn vangin hma takah kan tho a, kawtah a hawna tur sumo ka chanpui. Thu ţha min hrilh mawlh mawlh a, a ţawng ka hre ruai ruai. Ka mumang chiah ka ngaihtuah a, ka hmuh berkher kha mak ka ti lutuk. Tihbuai ka tum lutuk na lamah khan ka lo ngaihtuah nasa deuh nge ka mumangah Dinpuia nen kan lo ni daih. A vaiin hre tawh lo mah ila hriat chin ka nei rei ruai. Kan lo hlim hle a, min duhin a hmangaih ber ka nih thu min lo hrilh cham chi a, thil thleng dang erawh ka theihnghilh deuh vek tawh. Ka mumang a kal thui zel hmain ka nu in min kaitho hlauh a, ka mumanga ka hlimna ang kha ka la nei ngai lo. Ka harh chian hnu pawh hian Dinpuia hlir ka rilruah a awm a, paih chhuah duh mah ila ka thei rih lo. Nakinah ka hriatna aţang hian a in nawt reh mai ang ka ti ta ringawt a, a in nawt reh thei lawk lo anih chuan keiman thai bo dan ka zawng tawh mai ang. Ka ţhiannu bialpa a ni miau a, a chungah eng rilru pawh pu ila hun ţha ka nei ve tawh lo. 

CONT (Pahnih ka dah ang ka tia mahse hei pakhat ka zo thei ţawk. Tunlai chu ka buai ve em a, khawngaihin min lo hrethiam hram dawn nia. Tunkar bak hi buai lutuk ni ka nei tawh lo maithei. Chhungten tih tur min tuk ve ţhin si a, tunkar ka buai deuh a, ka regu loh pawn min lo hrethiamin min ngaichang hram hram zel dawn nia😘😘)