THROUGH THICK AND THIN-5

THROUGH THICK AND THIN-5

"Tu nge Muankima an rawn tih ve sek hi?" chang khel khawl hian a ti a, thip zet hian min melh run bawk. Zingkar hma tawk aţangin ka thlah ang che a rawn tia min tur sek a, kan inpiahah ka lo nghak ve ran. Kan inhmuh rualin a thinrim leh tho si. 

"Kan college a mi a nia, ka sawi vek tawh kha mawle" ka ti a, ka lungawi zan bik lo. Bike bulah ka ding a, helmet pawh a phelh chuang lo. Kan inhmuh rual rualin Muankima chanchin min zawt leh ringawt.

"A bulah i awm ziah mi? An hmuh dun reng cheu a" a ti leh khur khur a, a ngaihna ka hre lo takzet. 

"Muankima nen kan awm dun ngai lo hrim hrim aw. Class khatah awm mah ila kan awmdun reng kher lo. Siami leh Rina te bulah ka awm ziah" inringtawk fe hian ka ţawng ve tan tan. 

"En rawh" tih pahin duhdah zet hian a phone a theh a, ka lo dawng hman hlauh.

"I va han mawl tak, tla se chuan a keh mai dawn asin" ka ti hluai a, ka thusawi a ngaihven ţha duh der lo lehnghal. 

A message dawn chu ka en a, ka nuih a za zawk. Dinpuia nen a min hrechiang deuh tu an awm ngei tih chu ka hria a, tu nge anih ngaihdan ka siam thiam lo. Vawiin thawhţan chauh a la ni a, inrinni leh chawlhniah pawh Muankima nen a awmdun angin min lo sawi lehpek. An hmudun reng cheu a tih khan mak ka ti reng a, chawlh chhung pawh a min hmu dun ang a a lo sawi vang a ni pek ang. Zanrei lamah kher a be ţhin lehnghal.

"Dawt vek anih hi. Kan block daih teh ang" ka tih takah chuan phone min chhuhsak leh sia. 

"Ngai lo a la ţangkai ang" a la ti ta deuh deuh. 

"Mi dawtsawi mai mai vangin thinrim khur khur tawh suh. I thikthu a chhe emai" ka tih chuan "Ka thikthu a chhe lo mahse thik tur chin ka hre ve" a ti ţalh. A thikthuchhiat zia a ti lang mawlh mawlh reng chung pawhin a pawm duh chuang lo. 

"Nih leh khawi phone kha lo la leh teh, a number kha ka la dawn" ka ti a, min pek hun nghak lovin a ken lai ka pawhthlak sak. Dawt thu hrilh sek tu number chu ka la chhuak a, ka call zui zat. A la duh miah lo lehnghal. 

"Ka call char char tho ang" ka ti sep a, ka phone kenlai pahnih chu akin Dinpuia hnungah ka lawnkai tharh. Thil dang a sawi leh ang tih ka hlau. Kan inbul lawkah kan awm bawk nen muanchan vak ka duh ngai lo. 

"Kal phawt teh..nakinah kan sawi leh dawn nia" ka tih chuan ngawi rengin bike a ti nung a, ka thu angin a awm ve mai. 

A kawngah kuahin a darah ka khabe ka nghat a, min biak a tum lo niin ka hria. 

"A rawn be tu che khan engtin nge i number a neih a?" ka tih chuan "Hre bik nang" ti ringawtin min chhang. 

"I hriat ngai loh thusawi i lo awih ve ringawt zel a, min zawt hmasa ve phawt ta che?"

"Ka zawh che kha" a ti hmuk a, a beisei ang chhanna a hmu lo nge biak a har rih khawp mai. 

"Chuan kei aiin i hriat loh thusawi kha i ring zawk tihna mi?" ka ti leh khauh. 

"Muankima a tih kha awm lo se chuan ka awih lo ang" a ti a, a hrilh tu kha tupawh nise call a lak duh loh pawhin message talin ka hau ngei ang. Kan inrem ve chauh a amah vangin kan inhauh leh phah. 

"Engpawh sawi se lo awih tawh miah suh. Nangmah bak duh ka nei lo" ka tih chuan a nui hawk a, ka zak em em thung. 

"A thusawi a zir aniang chu" a ti ve sup. 

Gate bul a a din rualin ka chhuk a, "Anih aw" ti a kal mai ka tum chu min lo vuan a, zirlai tei suau suau chu en pahin "Muankima chu a awm ve em?" tiin min zawt. Ka enkual vek hnuah lu ka thing a, min vawnna a thlah ve hram. 

"Hmu ta ila engtin nge itih chuan ang? I zawtfiah dawn tihna mi?" ka hrechak deuh tlat a, ka zawt ta tawp. 

"Ka hnek hrep ang" a ti fiamthu a, a ti dawn tak tak lo tih kan hre ve ve. Mipa hi an puitling har a, Dinpuia pawh kei aiin a upa chung hian kei aia naupanchhiat chang a ngah mahse a mipa thik apiang hnek rual a ni tawh lo. 

"Tlaiah min lo hruai dawn em?" 

"Vawiin chiah ka lo hruai hman tawh ang che" ti a min chhan chuan hrilhhai takin "Ngati nge?" ka lo ti ha. 

"Tlaiah ka hrilh ang che" a ti nghut a, a lung a la awi chiah lo niin ka hre bawk a ka zawt lui duh lem lo mahse a pa chungchang anih ka ring. 

Didiki'n min lo nghak reng tawh a, midang an la awm lo. A phone a bih run a, ka thawm a hre miah lo niin a lang. A hnung lam aţanga thawm dim tak a kal den denin a darah ka vuan thut a, a phu dawrh a, a ţe ţhat bawk. Phawk hra a min en laiin ka nui uarh uarh a, a bul a ţhuin ka ngheng zui ar ar. 

"I mawl em ni? Ka phu nasa lutuk alawm" vin zet a tih pah hian ka darah a nam dawrh a, ţhutthleng nghenchhanah invuanin ka la ngheng tho. 

"I phone i en uluk em a, ka ti phu chak thut che anih kha" ka tih hnuah nichin lawk a thil thleng kha ka hrechhuak leh.

"E...enteh maw" tih pahin ka ţhu ţha sawk sawk a, a lam ka hawi a, ka sawi tur ngaichangin min lo en ran. 

"Dinpuia kha a hmaa mi bawk khan dawt a lo hrilh leh tawh nih chu. Chawlh chhung zawng pawh khan zanrei lamah hlir a lo bia a, Muankima nen a min hmuh dun thu a lo sawi char char. Dawt hlir a ni sia, ka thinrim ve reuh tawp" ka ti bawrh bawrh a, sawichhuah a thawl hawk chu khawi lam ka ţhiannu bul a sawi ka ni bawk a ka thinrim tial tial niin ka hria. 

"Dinpuia chu a thinrim em?"

"Aw kan inhmuh hma kha chuan a sawi duh miah lo a, ka thlah ang che a ti sek ringawt a, tukin khan min zawt alawm. Phone a inhauh hi chuan thil ho te hriatsual palh te a awl a, a punlun duh a, chu chu a hreve kar aniang, min hmuh rualin hmaichhanah min zawt nghal" ka ti a, kimchang deuhin ka hrilh nghal. 

"Dawt mai mai pawh a rin zel te chuan nangmah ber a ring tak tak lo che ni mai lawm" a ti a, nidang angin min ngaihsak lo. A nu in a hawsan na ala rei lo va, a la ngai anih ka ring ve tawp. 

"Nia mahse min rin thu te chu a hrilh ve tho a, chiang deuh a kan awmdun lai a hmu a, ka sawi ngei a hria anih loh chuan thu tawp a siam ka ring chuang miah lo" ka ti ta tho. 

"Ka ţhian inia, ka thusawi tur hi i haw lo turah ka ngai" tih pah a min ngaichang ni awm tak a min en takah chuan ka lo nghat nghat. 

"Dinpuia nen hian buaina innei reng a, a chang leh hmeichhe dang a kawp an tia, hmeichhe dang nen an hmu dun reng bawk a, party a ngaina in a rui ve thei reng a, rilru nuam lo deuhin i awm ziah. In inhau reng a, in inchhuahchhal tawn reng a, a chang leh a thiam lohna ngeiah pawh nang aiin a thinrim a, i ning ve tawh em em lo mi?" ti a min zawh chuan ka thaw halh a, a sawi dik vek. Nin chang nei mah ila ţhen harsa ka ti tlat hi ka buaina ber zawk a ni. 

"Ning ve ţhin tho mahse ţhen tawp hi a harsa ve ţhin a, ka khawngaih leh ţhin a, bakah min mamawh lo deuh ang a a awm chang te hian min mamawh zia ka hre tho amak lutuk ka hre ve tawp" ka tih chuan za lo deuh hian a nui hak. 

"I ngaihdan mai mai nih chu. Chutiang hre tur chuan ila naupang lutuk. I duh em vangin ţhen loh dan tur chhuanlam i inzawn chawp mai mai anih kha. Hahdam lo leh inhau buai reng tur a bialpa neih ka peih teuh lo. Ţhen rawh ka ti miah lo mahse keichu ni ila ka ţhen ang" thutak zet hian a ti a, Dinpuia nen kan inkar thil thleng ka hrilh chang te leh ka vui chang te hian Dinpuia hi a hrethiam thei hle si a, tunah chuan a lam a ţang peih tawh lo aniang, kan inhau ngun ve bawk em a ni. 

"A chanchin ţha lo deuh hriat i nei mi?" ka ti ta tawp. A hma zawng kha chuan min vuipui tho siin a tawp thlen dawn tak tak chuan ti lo turin min hrilh ţhin. 

"Chanchinţha a nei mi?" tiin nui chungin min zawt let daih.

"I huat hmel em a" ka ti sep a, neuh neuh kan ngah lutuk hi midang hnenah phei chuan a zawng zawng ka sawi duh lo ka tih tawh kha. Didiki hi chu ka hmeichhiatpui anih bakah ka ring em a, hrilh loh ka nei lo thung. 

"Ka haw lo mahse ka khawngaih che. Hahdam deuh a i awm lai hi a tlem lutuk a, Dinpuia hian a duh duhin a chhaih kawi che a ni ber tawh. Kan hahdam theihna hi a ţha ber. Nei phei la chuan tun ai hian a nasa ang a, i tar bawih bawih mai ang" a ti lehzel a, ţhianten min tuipui loh hi chuan a nuam lo ţhin. 

"I sawi dik vek mahse tun ţum hi chu ka thinrim rualin hriatthiamna chin ka nei a, keipawh hmeichhe dang nen an hmuh ringawt pawhin thinrimin ka chhal ziah a, khatiang chiah kha a ni ve. A hrilh tu lah khan hrechiang a inti ropui sia" inthlahrung ru tak chung hian ka ti a, beidawn hmel zet hian a thaw hak. 

"Midang nei chhin rawh. Mipa dang i ngaihven ngai lo va, Dinpuia chiah hi i tan a mipa awm emaw iti anih kha. Midang nei chhin la a hahdamthlak zia leh Dinpuia kawp chawt aia a nawm zia i hre mai ang" ti a thurawn min pek chuan ka ngawi reng. Ka dawhthei lutuk hi ka ngeiawm maithei mahse Dinpuia theihnghilh duh vang a midang ka ngaizawng a nih chuan an rilru ka ti na mai mai ang. Runluih nan tiin duhthu han sam ve ţhin mah ila a tak tak a thlen dawn chuan ka ngam lo leh ţhin. An rilru ti na tu chiah ka ni dawn. Dinpuia hi engtikahmah ka theihnghilh thei dawn si lo va. 

"I ngam chiah na nge?" Didiki bawk chuan a ti leh a, tlem chuan ka zak ve. Nep min tih viau ka ring a ni. 

"Ţhen kher kha ţul ka ti chiah lo va, a laktlak loh zia ka hrereng te anih loh chuan. A lerh a, hmeichhe dang a kawp kual reng a, min ngaihsak ngai miah lo te anih ngawt loh chuan mi thusawi vang mai mai a ka ţhen chuan ka tihsual ka hlau" ka ti a, mi thusawi vang mai mai a ţhen tur chu ni ila kan inţhenna a rei tawh ang. 

"I tih dan dan le. I tan a ka duhloh chhan dang leh chu i ţhiante a ngaithei lo hi. Inhmuh chang te hian min biak hmasak a tum loh chu thuhran min ning emaw tih mai tur hian a awm a, nangmah chiah a duh che a i ţhiante a duh tello anih chuan a ţha miah lo"

"Ka lo hrilh ang. Kawm ve bawrh bawrh tur che in ka lo hrilh dawn nia" ka ti sawk sawk. A duhloh chhan pakhat tal hi chinfel sak ka duh. 

"Lalnunsiami vang vek hi alawm. Kawng kualah fimkhur ve tur ania, a fimkhur loh leh a inrintawk uchuak lutuk vangin luikawrah ka tlak phah anih kha" Rina ţawng lawng lawng kan hriatna lam chu kan en a, midang an rawn thlen takah chuan ka thawveng huai. 

Kan ţhutna hmun an rawn thlen veleh Siami chuan "Ka fimkhur loh vang anih loh kha. Khuarel thil tuman kan dang thei lo. Thli thaw in min chhem tlu anih kha" inveng tum fe in a ti ve. 

"Awi..pha lo mai teh. I rihna leh ka rihna leh scooty belh khawm vekin khatiang thli thaw satliahin min chhem tlu thei lo hrim hrim. Ka ban te hi a na lutuk a tliak hial lo maw?" Rina chuan a ti veleh a, thil thleng tur chu a rin hriat theih uarh rualin "Eng nge thleng?" tiin ka zawt ta tho. 

"Kan tlu..henu rual hian vawikhatmah ka kal tawh lovang. Ka inphurh tir tawh lo ang ka tihna. Luikawr ah ka tla lut a ka zak lutuk. Duh dan te in a tlak theih si loh, kak huangin nalh lo lutukin ka tlak kha. Ka lu pawh a la hai chhawlh alawm" tih pahin Rina chuan a lu a thing nawk nawk a, a ban na lai a la dawm reng bawk.

"Min puh vek suh aw Lalrin..ka awn na lam apiangah i awn ve anih kha. Ka khalh thiam loh leh fimkhur loh vang a tlu ka ni lo. I chuan thiam loh vang anih kha" Siami chuan pawr zet hian a ti veleh. 

"Timothy leh Lawmkima leh Sawmtea te pawn min phur fo. Khatiang heng huang khan min la tluk pui lo. Vawikhatmah min la tluk pui lo zawk"

"Nidanga ka phurh chein ka tlukpui ngai bik lo che"

"Ţawngthei si ka ning" Rina chuan a ti hlak a, a kiu thi sar sar chu a hru zui mawlh mawlh. 

"A tliak ngei ngei ang, a mam pul tawh lo reng reng" tih pahin Sawmtea chuan Rina ban a kawk zeuh zeuh a, Siami huat tawk a tling khawp mai. 

"Lo fuihpawrh ve sek suh Malsawmzual. A over sa nak laiin in fuih reng chuan a thi thei mai ang" tiin Siami chuan a lo ţawng el a.

"Ka thih chhanah over uchuak kan tia nga" Rina chuan a lo ti ve bawk a, a nui uar ber berah a ţang lehnghal. 

"Kum10 mi lek em ni in la nih a?" Didiki chuan a ti ta fak a, inhnial an awm hlek chuan ţawngka anih loh pawhin mitmeiin a khap vat zel. 

"Kum10 mi awm lekin mi min hmuh a? Kum10 mi kan nih chuan nangpawh ini ve tihna?" Siami chuan nui ţhaw chung hian a lo ti a, chhang let lo se ka tih ruk nen. Ka ti lungawi lo sa tawh a, a nu in a haw san bawk a, a nutein a hau leh ngei bawk ang a, kan hriat si loh hian a ipik leh tawh viau ang. 

"Naupang ang maiin inhau reng suh u. Ho te te a inhnial rual inni tawh lo. Ngawi reng a in awm theih loh leh thu pangngai sawiin ti ti ve mai ula, in rawn thlen tawh hi chuan bazar lun lai ang velin a ri nuaih nuaih zel. Nangmahni chiah in awm lo va, kan mitmei ven nachang te hre ve ula" a ti salh salh a, Didiki chu iti dik lo ti a khap chak viau mah ila ngawih ka chuh ta zawk. 

"Nangmah chiah in ngaihtuah lo la, bazar lun lai a awm duh lo chu nangmah chiah i nia, inthiarfihlim mai rawh" rin loh takin Didiki khap tu chu Sawmtea a ni. Didiki ngei pawn mak a tih hmel viau. 

"Naupangchhia lutuk lo turin ka hrilh anih kha. An inhnial duh pawn awki san kher lo se la, au lawng lawng kher a ngai hleinem. Kan thil tawn kan inhriatpui vek lo va, midang ngaihchan thiam a ţha ka tihna anih kha" a la ti ţang ţang. 

"Tukinah an accident a, a thinrimna a anchhuahpui anih kha. Rina leh Siami hi kan ţhian ho an nia, an thusawi mawl mang te te thlengin kan ngaithla vek ang. Hmun reh deuh iduh chuan a tam a, midang khak fek fek kher lovin i duhna lai chu pan nalh mai rawh. Thinrim a inhau an ni lo va, anni pahnih hi awm lo se chuan kan khua a har viau ang. Kan tan a midang hlutna hi hmuh thiam a ţha, ţhiante ngat phei chu" tiin Sawmtea chuan a hrilhfiah a, kan ţhianho zing a sawitur hre lo ber leh mi pawisawi ngai lo ber a ni ţhin a, Sawmtea meuhin a zilh takah chuan kan lo ngawi ţhap. 

"Ka thusawi chu i lo va ngai haw awm ve"

"Ngai hua e. Nidangah pawh i khak fo a, Afela ţhiannu i ngaithei lo va, a hnual rawihna tur thil i sawi vak a, Rina leh Siami inhnial fiam i khak ziah a, ka khap ang che ka ti ţhin a mahse i dinhmun ka hrereng a ngawih ka chuh leh zel. Ţhianho kan nia, mi pakhat duh dan chiahin kan awm thei lo" a ti fak fak a, kan inmelh hrek hrek tawh. 

"Ka dinhmun thleng thlengin lo ngaihtuah ve tawh suh" ti hmakin Didiki chu a kalsawn ta daih a, tuman kan umzui lo. A duh angin hmun reh lai a mahni chiah a awm a mamawh niin kan ngai vek. 

"A lungawi leh mai ang. Rilru hah lai hi chuan engkim kan ning vek a, ka nau sawi ka hriat dan anih chu" kan ngaihţhalo hmel a hmuhin Lawmkima chuan min ţawng thlamuan ve ngei. A ni tak tak reng a, rilru hahna kan neih hi chuan thil zawng zawng engkim mai hi a ninawm em em vek. Tun a Didiki awm ang deuh hian ka awm tawh a, ka hrethiam lehzual bik maithei. Kan duh ang a thil a kal loh chang te hian a ninawm hma bik a, ani pawh a zia veleh vat mai ang. A hma in hetiang hian a awm ngai bik lo va, a sual vang hrim hrim niin a lang lo. 

Ka haw dawnah Dinpuia bawkin min rawn hruai leh a, ka ban hun pangngai thlapah haw mah ila an in lamah kan kal tho. An inah mi an awm reng bakah min sawipui tur a nei bawk a ngaihţha deuhin ka awm ve mai. 

An dan ngai tein tuman an lo be lo va, a pa pawh kan kalpel a, kan pahnihin min hmu lo ang hmiahin a awm. A nu erawh chuan min lo be luam a, a nu bik hi chu a ngainatawm reuh. A nau hmeichhia pakhat fel deuh a awm bawk. Midang chu han fakna lai tur vak ka hre rih lo. 

A pindanah min kalpui a, vawihnih ka kal tawh a, a pindan hi ka pindan ai mahin a fai emaw tih tur a ni ziah. 

"Eng nge min hrilh tur chu? Min hruai theih tawh dawn loh chhan tak kha" tiin bul ka ţan a, Dinpuia erawh chuan min thlahlel tih hriat tak a min kuahin min fawp phawt a, min hrilh tur kha ka hriatchak zawk bakah a pindanah kan pahnih chauhin kan awm a, kan kal thui leh hret ka hlauh vangin ka dang ţang ţang a, a awmah ka nem tlat. A tawpah nui hawk chungin min thlah ve hram. 

"Zei lo nu" min ti hram. Ka dan char char chuan ka khawngin ka ţang ţeuh reng ang a, a awm ve tho mai. 

"Ngati nge i pindanah kher min hruai?" ti a ka zawh leh lai chuan khumah thlalak a theh thla a, ţhu thla ve vatin thlalak chu ka chhar a, a nu leh mipa pakhat thlalak a lo ni. Mipa lah chu ka hrechiang em em mai lehnghal.

"Ka pa anih kha" a tih ngat phei chuan vuak chawrh ang mai ka ni. Ka thlalak ken lai chu a che der der a, ka tha a khur nghal der. Mi zawng zawng aia hlauthawng leh chiai hma chi ka lo ni nen, a ngaihna ka hre lo takzet. 

"Ka patea hi maw?" aw khur der der hian ka ti a, lu a lo bu nghut. 

"Ka awih lo. Kan pian hma daihin tun a a nupui nen hian an innei tawh lawm. Fa an nei thei lo mai mai a, mahse i pian hma daihin nupui a nei tawh" ka ti mawlh mawlh a, ka patea kher chu a pa ni lo hram se ka ti. 

"Ka nu diary leh thlalak hlui ho aţangin" a tih hnuah ka hmaah a ţhingţhi a, ka nak tawn tawnah vuanin min en ran a, a mitmengah chuan engmah ka chhiar thei lo. 

"Ka chhui mek ti a ka hrilh che kha ila hria em?" tiin aw dam dapin min zawt a, ka bu zeuh ringawt. 

"Khatia ka hrilh hma che khan ka hre daih tawh. Kan inkar a chhiat phah hlauin ka zep tlat a, mahse hmalam pan a puitlin ve a hun tawh a--" a tih lai mek chuan lo pawt chatin "Kan inţhen dawn tihna mi?" ka lo ti hmanhmawh. Rin dan chiahin ka zawhna atthlak tak avang chuan min nuih na a ka zak tawh lo. Kan inţhen ka hlau miau alawm. 

"Aih..min ţhen loh chuan ka ţhen dawn lo che. In ka chhuahsan dawn" a tih phei chuan min ţhawng lehzual. 

"Ngati nge thin ti ţhawng deuh deuh thei hlir min hrilh a?" ka ti ta tawp. A nui hawk a, ka nak a vawnna kut chu muangchangin ka kawngah a tawlh thla a, ka kawng a thlen rualin min vuan nghet sauh. 

"Min pawt chat lovin uluk deuhin lo ngaithla rawh. Inţhen emaw awm hran chungchang ka sawi dawn lo" a ti hmasa te te. Ka hlauh hma ţhin zia hrechiang ber pawl a ni ve a. 

"Nizanah ka nu nen kan ti ti a, a thil zep zawng zawng ka hriat vek tawh thu ka sawi hnuah ka hriat loh thlengin min hrilh. I patea leh ka nu hi tun thlengin a rukin an inbe reng a, ka nu in min pai khan mualpho an hlau ve ve a, min enkawl duh ve ve tho sia, i patea te nupa phei chuan fa an neih loh vangin min lak daih an duh lehzual mahse ka sawi tawh ang khan mualpho an hlau a, an mualpho loh dan tur leh miin an hriat loh dan ber chu ka nu hnen a ka awm hian a ni. Mipuiin i patea te nupa hian fa annei thei lo tih an hrevek a, kan veng a inhnaih bawk nen, ka nu leh pate lah bakery vang hian mi hriat an hlawh ve ting tang a, sawi neuh neuh a awm loh nan ka nu hian ka pa tak hi min hrilh duh lo a, rei deuh chhung ka hriat loh phah. Mahse ka chhui zel a, thudik chu a lo lang mai. Ka nu chuan ka pa tak nen hian a ruk a pawisa an khawl ve thu a sawi tel a, tun a ka pa mizia an hriatchian vang a khawl an ni. Nakin zelah ka mamawh takin tiin an khawl a, an kawppui te ve ve hian an hre lo. Ka pa tak chu ka hmu ka hmu tawh a, ka pa a ni tih ka lo hre lo mai mai zawk. Ka unaunu ilo ni reng tihna anih chu" a ti a, a nui hul hak. 

"Tun a ka patea ka hmuh hi chu ka pa pa leh ka patea pa hi unau an nia, a inhlat tawh em chu" ka lo ti vat. Hriatsual palh awm se, ka patea fa ni lo se ka ti takzet. 

"Ka thil hriat ho vang hian hmalam pan ka tum. Nangmah vang a ni mah" a tih chuan ka bang bo leh hle. Ka inrawlh ve der si lo. 

"I hrethiam leh lo pek a ni maw?" 

"Aw sawichiang deuh la" ka ti a, diktak chuan ka patea leh a nu te hian ka rilru zawng zawng an luah rih a, thil dang ngaihtuah har ka ti rih. 

"Mi zawng zawngin min dodal anih pawhin ka enkawl thei dawn che a, enkawlna tur che ka neih phawt chuan remti lo vek mahse ka hnaihah ka awmtir tho ang che. Awmna tur in ka nei ang a, i duhzawng leina tur ka nei ang a, chutih hunah chuan kan inkawp phallo tu te chiahin ţangkaina an nei lo vang. Min dodal vek anih pawhin neih dan che ka zawng tho ang" a ti a, sawi mai tur ka hre ve lo. Ka ngawi reng a, ka thil hriat hian min ţhawng lutuk a ka buai zo vek a ni ber. 

"Ka nu pawisa lo khawl sa chu ka dil vek a" amah bawk chuan a ti leh a, ka patea nen a ruk a an lo khawl char char tawh anih chuan a tam tham turah ka ngai ringawt. 

"Engatan nge itih?"

"Nakin a kan awmna tur leh eizawnna bulţan nan te" a ti a, a nu tihluihna in MA a zo ve hram a, tihpuitu ţha a neih loh chuan thawh tur a van ve khawp ang. 

"Eng nge i thawh ang a? Hei vang hi nia ho deuh a nung lovin lehkhazir ţha rawh ka tih ţhin" ka ti a, ka lo khak leh hmanhmawh ţhin. Tunlai angah hna ţha hmu tur chuan zir san a lo ngai ve bawk nen, ka duham vang mai mai. 

"Bakery ka din ve ang" a ti awlsam et a, a ngaihtuah ber hre lo mah ila nizan lam a a thuhriatin a ţhawn ve tur zia erawh ka hria. Ka nep ve si a, ka bulah intih pachan hram hram a ngai ţhin a, ka khawngaih letling zawk. 

"Thawh tur chu a awm mai ang. I zir pah reng thei a, hniam te a bulţan, hlawhtling ta an tam em hi" ka ti sawk sawk. Ka lo nawr na lutuk ang tih te ka hlau a, a tih tum ve ngai miah loh bakery neih ve thleng a a tum takah phei chuan tihsual ka nei niin ka inhria. 

"Phuba lak dan ţha ber chu ţawngka leh tharum thawh lam a ni lo tih ka hrechhuak a, an chungchang a chhe zawng a sawi miah si lova anni ai sang a invawrh hi phuba lak dan ţha ber niin ka nu in nizan khan a sawi a, bakery lian tawk neitu nih ve ka duh phah" ti a min hrilhfiah hnu chuan a sawi tum ka hrethiam mai. Tun a a pa leh pi leh pute, a unaute pawh an tel ang. Anni aia sang a awm a duh. Ruihhlo leh thil ţha lo dang dang hmang a nawrlui lova a ţha lam zawng a an thil lo tih tawh rulhlet duhna rilru a pu tawh chu ka lawm hle. 

"A ţha lawm..ho mai maiah pawisa hmang lo la, hlawhtlin dawn chuan beih nasat a ngai a, hun harsa tak tak i tawk fo ang mahse chutiang hunah chuan pui tur chein ka awm reng ang" ka ti ve ta nge nge. Puih ka duh a, a chanchin min hrilh vek hnu aţang phei kha chuan puih ka chak lehzual. Mahse amah berin puihna mamawh a inti lo va, a duh duh dan a awmin ka thusawi a ngaithla khat. Min runluih nuam tih tlat chang te a nei a, kan buai ve rap rap reng. Inţhen si lo va inbiak duh loh chang lah kan ngah. Ka block ve fo a, min biak theih loh chang chuan ka chhungten an lawm lo tih hrerengin a lokal tawp zel tho. A ţhatna sawitur a awm vak lo chung pawhin ka ţhen hleithei lo va, ka ţhianţha ber nen a chungchangah kan ngaihdan a inang thei tawh lo bawk a, chutiang a nih lai kar a insiamţhat duhna a nei leh puitling rilru a pu ve tawh chu ka lawm dan tur inhrethiam mai ang. Thil pakhat lek pawh ni se mihring thinlung dek zar thei thil anih chuan nghawng nasa tak a nei thei a, a inthlak danglam dawrh thei. Chutiang thil chu a thleng ni maiin ka hria. 

"Min pui turin i awm tlat tak tak ang maw?" ti a min zawh leh chuan phur fe hian "Tehreng mai..hun harsa ber i tawh hunah pawh ka phatsan miah lovang che. I rilru a danglam thut hi mak ka ti, ka lawm tho bawk sia" ka ti a, ka mitah chiang tak a a en anih chuan dawt ka sawi loh zia a hmu thei ngei ang. 

"Neih loh che ka hlauh vangah i ngai thei ang. Chuan Muankima ve thung kha" a tih lai mek chuan ka lo nui hak. A vaiin a danglam vek lo. Ka tan a lawmawm tel tho. Min duhna a danglam lo va, naupanchhiatna tlem ala awm, mihringah chuan a awm deuh vek ang mahse mi zawng zawng ka ti ngam lo. Hmanni lawk a ka hmuhchhuah a thikthu chhiatna pawh a la awm reng. 

CONT...