THROUGH THICK AND THIN-6

THROUGH THICK AND THIN-6

KIMKIMI

Didiki inluah tur Timothy nen a kan en dun chu chau hnawpin in ka thleng. Tukinah min hrilh ve chauh a, chawlh a lo ni kher bawk nen kalpuiah ka sawm chung chung a, peih lo deuh chungin min kalpui leh tho. 

Kan veng chhung a ni na a veng mawng lamah daih a ni. A awmna hmun a remin a reh duk a, in luah tu dang leh a nei tute a chung lamah an awm tho bawk a, Didiki chuan nuam a ti khawp ang. In luah man tur lah ka ţhianpa berin "A pe ve thei mai ang" a ti liam puat a, Didiki a sawipui tawh anih ka ring a ka zawt thui duh lem lo. Step a tam tih lohah chuan sawiselna tur lai ka hre lo, veng mawng a awm anih vangin luah man a tlawm zek lehnghal. A lian lo na a Didiki lek awmna tur chuan a tawk chauh. Veng mawng lutuk lai daih daih a inruak a hre thei chu mak ka ti ru angreng, a zawnpui nasa viauah ka ngai. Kawngpui anah awm se chu luah man a to deuh ang a, nitin step thui tawk a zawh ve tawh mai ang chu. 

Dinpuia nen a kan chungchang kha tumah ka la hrilh lo va, ţhen tur a min tih vek dawn vangin ka hrilh duh lo. Didiki takngial pawh hrilh lovin ka zep tlat a, ka rilru a buai ru hle thung. Ka nu leh pa te an chhuak daih bawk a pindanah ka tawm daih a, thil thleng mek leh thleng thei hrang hrang ngaihtuahin khumah ka let ka let ringawt. 

Ka patea fapa anih tak tak chuan min dodal hmasaber tur chu ka patea leh ka chhungte an ni. A hria apiangin min sawiselin awm lo an ti ang a, kei ngei pawhin a dik loh zia ka hria. Tu emaw tal sawipui tur ka duh a, he mi chungchangah kher hi chuan tumah ka ring tawk si lo. Ka ngaihtuah chian pauh leh hahthlak ka ti tual tual. Ţhen hmak ila buaina awm thei zawng zawng ka ti tawp vek thei mahse a thil tih tum zawng zawng min hrilh vek hnu a ţhen chu dik theiin ka hre lo va, a tum a hlen theihna tur a puitu ka nih ngei a ngaiin ka hre bawk si. Naupangte ni chung a vei ka ngah lutuk hi ka hne ve ţhin. Mi khawngaihna ka ngahin puih ka duh zel a, harsatna an tawhin ka lo hrehawm ve a, a hahthlak takzet. 

Ka ngaihtuahna ka kawm melh melh laiin lukham a ka phone dah chu a nghawr det det reng a, Didiki a lo ni. Ka rilru hah lai tak a min lo bia anih vangin ka nui sak. 

"Timothy nen inruak in endik em ni?" tiin min rawn zawt a, kan kal thu hrilhin ka hmuh dan chipchiar takin ka hrilh nghal vek. 

"A te a a mawng bawk a mahse a tlawm tho alawm. Ka nu ka hrilh ang a, min tumsak theih chin anih ka ring" a tih chuan ka awm a nuam huai. 

"Gas leh bung bel vel engtia tih nge i tum?" ka ti leh a, a to ve tho si a, a neih theih loh chuan midang hrilh a pawisa thawhkhawm mai ţha ka tiin chu chu ka rilruah a awm hman tawh. 

"Ka patea ka sawipui tawh a, min tihsak thei mai ang. An hnen a ka awm loh an duh zawk ang a, ka nutei paw'n min buaipui phur khawp ang" a ti a, Pathian ruat sa ni awm takin engkim a kal tluang purh dawn niin a lang. 

"A ţhat hlauh chu. Nangmahin i duh duh danin i awm thei tawh ang a, mitmei ven tur a awm lo ang a, hau reng tu che a awm tawh lo bawk ang a, i nuam sa tawh dawn khawp alawm" phur zet hian ka ti a, a hrehawm ţhinna ata a zalen tawh tur chu ka lawmpui takzet. 

"Nia a hautak dawn a ka hriat ţhin vangin awm hran ka tum ngai lo hrim hrim a, Timothy khan min sawi hmuh a, ka nu in a tam loh chuan luah man an tum theih tur thu a sawi bawk a, diktak chuan Timothy khan min tum sak a tum zawk a" a ti a, mak ka ti lutuk chu sawi tur ka hre lawk lo. An inhlat ru riau hian ka hre ţhin a, school naupang kan nih lai kha chuan an inkawm ve bawrh bawrh mahse college kan kal hnu kha chuan a dan a dang. Ka chik ru reng a, an in ngaithei lo tawn ve ve ni te in ka hre ţhin. A duh phawt chuan a tum sak thei dawn tih hre tho mah ila tum sak duhna rilru a nei hrim hrim kha mak ka ti. In luah tur a zawnsak pawh mak tih ruk tawh nak laiin. 

"A va ngaihsak che ve, in inngeih vak lo maw ka tia" ka ti ta nge nge. 

"Keipawn a ngaihsak ber che maw ka lo ti char char a, ka tan thui tak thleng a inhuam tih ka hre lo hrim hrim. Mahse min zuam ang tih ka hlau a, ka chhungten an tum theih tho chuan ka chhungte tum ka duh zawk" 

"Zuam lo vang chutiang mi a ni hleinem. Ţhian kan nih angin i nawmsakna tur a ngaihtuah ve anih chu" tiin Timothy thlavang ka lo hauh vat. 

"Mipa chu an inang vek. Thil min tihsak chuan phut let an nei zel. In pian hma aţanga inţhenawm tawh in nia, in inkawmna a rei tawh tih pawh ka hria mahse i hrechiang bik kher lo maithei sin. Thil tam tak tihsak che se la chuan i lakah pawh phut let a nei tho ang" a ti duah a, ka ngaihdan a ni lo kher mai. 

"A thil min tihsak a tam tawh lutuk. Pawisa a lei theih loh tur thlengin min tihsak vek. Phut let a nei ngai miah lo. Puih che a tum laiin ngati nge khatiang rilru kha i put daih" ka ti a, kan dawh hram hram ţhin. Kan vaiin kan ni vek, kan huat thu a sawi pawhin hriatthiamna nen kan dawm hram hram a, mahse ţhiante a ngai mak lutuk chu mak ka tiin tun a ka buaina ber pawh hi hrilh loh ţha dawn zawkin ka hria. Timothy thlavang ka hauh lutuk vang te pawh ania nge. 

"Rui der la, a bulah khan chatthla angin awm vel teh. Kan hre mai dawn alawm" nui ar ar chung hian a ti leh a, eng nge a hriat leh tak le?

"Engtinmah min ti lo ang bakah ka rui ngai lo" ka ti hmak. Ka lawm loh zia hre ve reng reng rawh se. 

"Hman aţang tawhin a thlawn tawpin thil ka dawng duh ngai lo. Kan rul let thei dawn lo tih an hre sa reng a, thil dang an phut phah ţhin. Ka sual vang hrim hrimah ngai lo la, thil thleng thei ni a ka ngaih tlang deuhin ka hrilh che anih chu" a ti a, ngaihdan ka nei thar thut a, ka ngaihdan a dik leh dik loh fiah nan "Timothy emaw mipa dangin i lakah phut an nei tawh em ni?" tiin ka zawt. 

A ngawi vang vang a, min chhang tawh dawn lo emaw ka tih hnuah ban charh hian "Nei tawh e hmanah" a ti a, "Mahse Timothy chu a ni lo" a tih zawm leh. A rinna tichhe thei thil a tawng hnem tawh a, tumah a ring tawh lo ah ka ngai. Ka sawi tawh ang khan a thil tawn tawh te kan hriat meuh hi chuan hriatthiam leh mai a awl tlat zel. 

"Sawi nuam itih loh chuan sawi duh kher suh. Hmeichhia zawng zawng kan inang lo kan tih ţhin ang chiah hian mipa pawh an inang vek chuang lo va, sual hi a langsar a, mi dik lo tlem vang hian a zawng zawng an hmu dik lo vek kher ngai lo. Timothy pawh i sawi ang kha a ni miah lo. Nikhua ka hriat tirh aţanga ka ţhian a nia a tih theih ang, sawiselna lai ka hre lo. Hmeichhe lamah ngat phei chuan sawiselna tur a awm lo" ka ti deuh duah a, ţhiante thlavang hauh ka pe na ve a, a bikin Timothy. 

"Kan la hria ang chu. Dinpuia nen in ţha maw? Muankima chungchang a zawt leh che em?" tiin min zawt ta daih. 

"Aw ţha e..kan ţha rih lutuk. Min rinhlelhna a nei tawh lo" ka ti a, tlang takin ka hrilh. Mak tak mai a ka patea fapa a lo nih daih dan erawh ka hrilh lo.

"Ava ţha ve Muankima chu thik chi a ni lo reng a, ka nutei puih ka ngai a, a ang leh tun tun hmain kan pui vat vat ang e, ka lo be leh ang che" tiin kan inbiakna a ti tawp a, min ngaihven thar riau nge Dinpuia nen a kan inkar ţhat leh ţhat loh min zawt ngun. Muankima vanga kan buai vang te pawh a ni maithei. Thil thleng reng reng hi thui tawk ka lo ngaihtuah hman ziah a, ka ngaih ka ti ţha lo leh ringawt zel, insiamţhat ka ngai a ni. 

"Kimkim thingpui lum teh" tih ringawt sawi turin ka nau, kan te ber Fredy a rawn lut a, a rilţam viau tawhah ngaiin ka tho vat vat. 

"Lo lum ve mai ţhin la, thingpui lum ringawt te chu i thiam ve tawh em em lo mi?" ka ti a, pindan aţanga chhuak tho siin ka phun hram. 

"Aww..u te lum ngei hi a tui bik a" ka dar a min kuah chung hian a ti a, a banrekah na tawk a hmerin a kut ka paihthlak sak. Pawl-12 a ni ve tawh a, ka nau mah nise kei aiin a sang daih zawk. Kan unau hi kan lian ve hrim hrim a, keipawh ka te chuang lo ka cher lo lehzel hian min ti lang lehzual.

"U Dinpuia thingpui lum sak i phur ţhin nen" a ti zeuh. 

"A lo len lohna a rei lutuk tawh. Dinpuia ai chuan i thingpui in tur ka lum ngun fe"

"I thawmhnaw ka su a, thingpui min lum ve thung thei tihna a ni mai" a ti leh a, a insu turh turh a, a remchang bawk a tiin ka thawmhnaw ka suk tir ve a, kar khat vel chu nitin a rilţam apiangin a sawi leh mai ang. 

Phun tawh lovin thingpui chu ka lum a, dawhkan hmaah ţhuin min lo nghak ran reng. Chhang bawm a inchhawp a, thingpui so hma aţangin a ei mual mual tawh. A ril a ţam tawh ngang aniang. 

"A lo leng dawn lo mi?" ti a min zawh chuan hrereng mah ila inher pahin "Tumaw?" ka ti ve ngat.

"U Dinpuia, ka nu te an awm chuang lo a, Au Rintei leh U Tetea te pawh" a ti duah.

"An lo haw thut ang" ka ti sep a, inţhen turin min nawr fo mahse kan inkawp lui tlat a, luhlul kan chhuah ve tlat zel, Tetea leh Fredy hi chuan ngaiah an nei tawh a, ka nu leh pa leh ka uten min la nawr fo mahse mipa pahnih hi chuan engmah an sawi tawh ngai lo. Ka awm ang ang hian min en tawp tawh a, Fredy phei hi chuan lantir lem lo mahse min khawngaih deuh tawh niin ka hria. A rui ve ţhin tih lohah chuan ka nute ngei ngei pawh hian sawiselna tur an hre lo tawp ang. A lerh ti a hrilh tu an awm veleh zeuh ţhin a, hei vang te hian an duh vak lo bawk. 

Dawhkan a no pahnih ka dah hnuah chair pawt tawlhin ka ţhu ve a, inchak vak lo mah ila a remchang em a inpui tur ka neih lai a ni bawk a, ka insiam kep chawp leh. 

"I ţhiannu lo riak ve zeuh zeuh ţhin kha hmanzanah U Nubawihi birthday lawm zanah ka hmu. U Dinpuia nen ka hmu ve ve. Mawitea nen inchungah kan awm a, eitur zawng a kan chhuk laiin ka hmu" ti a thutak zet a min hrilh chuan ka awih lo kher mai. Mawitea a tih hi Nubawihi nau a ni a, Nubawihi hi chu Dinpuia nen college an kal dun ţhin a, an inkawm nasa a kei ngei pawn ka hre ve. Nubawihi birthday an lawm zan pawh hian Fredy hi Mawitea'n a rawn sawm a, kan in aţang ngei a an chhuak dun lai ka hmu. 

"Didiki maw itih?" nui chung hian ka ti a.

"Ni e lokal ve ziah kha" a ti leh tawp a, dawt sawi pawh a ang lo, pawi sawi loh hmel zet hian min en zawk. Mahse Didiki leh Nubawihi an inhre ve lo hrim hrim. 

"Dinpuia chuan a kal thu min hrilh a, Didiki chu i hmu awm lo emai. Birthday tih vel te chu a ngaina lo rapthlak. Bakah Nubawihi a hre ve hleinem" ka ti a, ngaihven zui vak lovin a chhang chhawp sa chu ka eipui.

"Ka hmu ka tih kha. Zu a in bawk, no a a keng lai ka hmu chiang khawp mai. I awih loh leh Mawitea zawt rawh" uar fe hian a ti a, a inringtawk em em lehnghal.

"Mawitea leh Didiki an inhre ngai hleinem. Dik lo deuh a mi i puh hian an hek let daih thei che nia aw, thubuai i nei mai ang" ka ti fiamthu a, a ngaihdan ni chiah lo hmel te chuan ka nuih a ti za.

"Min hek ngam lo ang. Ka hmu chiang emai, a zah ka hlau a ka be duh lo anih kha. Nang hi zu i lo in ru ve ţhin lo maw?" min ti ta hial a, a nui miah lo lehnghal.

"In lo in lo. Didiki chu ka zawt ang a, dawt i sawi vaih chuan ka pa ka hrilh dawn a nia" ka ti khar khar a, a hlauh loh hmel khawp mai. 

"I zawt dawn nia, a pha ngam miah lo ang. Hnehsawh deuhin dawt a sawi ţhin te anih loh chuan. U Dinpuia paw'n a hmu maithei mahse U Dinpuia chu kan thlen hlim chiah khan ka hmu a, eitur kan zawn lai chuan ka hmu tawh lo" a la ti lehzel a, Didiki thlavang hauhin "Mipa ve si i ţawngthei lutuk" ka lo ti hlak. 

"Min hau let daih a" nui vur vur chung hian a ti a, Didiki lam a sawi zawm tawh lo. Min lo biak leh veleh ka zawt fiah ang ka ti rilru a, Dinpuia chuan a hmu lo anih ka ring, hmu se chuan min hrilh daih tawh ang. Didiki a kal ve ka la ring chuang lo a, zu phei chu a in ka ring lo lehzual. Ka ring lo bur a ni tawp mai. 

Ka ngawi mai mai thei lehpek lo a, Fredy hnenah chuan keimah zawkin "I rui zawk a ni lo maw?" chiang zet a melh ram ram chung hian ka ti a, a nuih a za em em lehnghal, a thingpui inlai a phuh ţep nghe nghe. 

"Rui ila ka hmelţhat dan ngai reng a zing ka thawh chhuah i ring em ni? Khami zan la la khan inchhung bungraw che thei tawh phawt chuan min deng dawm dawm ang chu" fiamthu hian a ti a, a nui ţiah ţiah bawk. Ka nu leh pate zin hlanin vawikhat chu a rawn rui ve ngei tawh a, a luak ka buaipui rei hle. A bun hnem bawk a, a chauhpui der a, ka ute pahnih pawhin an hre lo der ta ringawt anih kha. 

"Min hrilh chauh sia, i hmuh te chuan a hlimchhawnah khan sawi tur alawm" 

"In pawimawh vak lo ve ve aniang ka lo theihnghilh daih" a ti liam puat a, min thawhsan zui daih. Ka la awih chuang lo fo a, mak tihna pawh ka nei lem lo. 

No ka sil zo chu tih tur dang a awm lem lo bawk a pindanah ka let leh. Khum ah ka bawk thlawp a, rilru hahna tur bawk ka ngaihtuah leh hlauin phone ka en nghal daih a, Dinpuia message lo awm vang chu ka chhang let vat a, a dang ka en zawm leh. Dinpuia be ţhin tu a number ka chhinchhiah ngei khan min rawn be ve hlawl. A message ka en hma hauhin ka thin a phu nghal ringawt. Thu lawmawm tak min hrilh ka ring tlat lo a. 

[Dinpuia hi ring lutuk suh] a rawn thawn tawi khawp mai. Tu nge kan inţhen duh ngawih ngawih tu hi ni ang tiin ka ngaihtuah a, rindan pawh ka thiam lo. 

[Engvangin?"] tih zawng ka thawn let a, a chhan ka hre chak bawk a thil dang ka enkual tawh lo. Min rawn chhan hun ka ngaichang char char. 

[I hriat loh hian hmuh ţhin a nei. A ţhiante ni a a sawi ţhin hi a ţhian an ni tak tak tih i chiang em? Ngaihţha deuh khan awm ringawt duh suh. Nakinah i na hlauh ang e] a rawn ti a, a thui ve ta deuh e. 

[Dinpuia hnenah Muankima ka hmuh ţhin thu i sawi ziah a, tun a i thusawi hi ka awih beisei lo la, lo inrawlh ve tawh suh. Hetianga i thil tih kual vel dan hi a ţhing lutuk] ka ti a, ka type lai te chuan ka nui vel. Tupawh chu lo ni se a rilru chhiat thlak emai. Lehlam lehlamah min hek kual a, ţhing ka tih zawng tak a ni. 

[Ka hrilh ngei a, hmeichhe dang biak a ngah a engahmah a ngai lo. I awih loh chuan nakinah fiahna ka lo thawn ang che]

[Fiahna ineih phawt chuan lo thawn la kan sawi ţha leh dawn nia] ka ti a, tu emaw hian Dinpuia nen hian min fiam kual mai mai niin ka hre tawh. Fiamthu pawh ni se a sual thlak tho tho. Kan inhauh phah ve ziah lehnghal. 

"Zanah lokal ziah suh ka tih kha" vin deuh hlek hian ka ti a, kan inbul a a awm hnuah min rawn hrilh chauh a, Timothy te in a kal tur ang a insawiin chhuah ka dil. Fredy a nui ru tet tet a midang chuan ka thusawi an awih ve mai bawk a, phal takin min chhuah tir ve ngei. Ţhenawm chiah a nia, an ngaih a sam ve deuh aniang. 

"Ka ngai che a" a tih chuan ka thaw hawk. Ka chhungten min hauh a hlauh vangin lo len chak ve ţhin mahse a lo leng lui duh ngai lo va, hau vak vak ţhin mah ila khawngaih chang pawh ka ngah. 

"Naktukah kan inhmu thei reng alawm. Chhuanlam siamin ka lo chhuak a, ka rei hman miah lo a nia" ka ti zung zung a, a bike dahna bul remchang laiah a ţhuin a malah a kiu a nghat a, a kut suihzawmin a ţhu kun ngul. Ka ngaih a ţha lo leh sia, ţhutna dang remchang a awm mai tawh si lo, a bul teah ka ţhu tung ve ta ringawt. A hnaiah ka awm tih a hriat veleh min lo en a, a chauh hmelin a mitmeng a dul raih. 

"Eng nge thleng?" ka ti sep a, ka hmelah ka ngaihtuahzia hmu thiam se ka ti khawp mai. 

"Engmah...ka chau deuh a" a ti a, a nui suk a mahse ka awih lo nasa. Amah chiah a tawrh hrehawm tih a neih chuan a thil tawn sawi duh lo mahse a remchan phawt chuan ka bulah a lokal ţhin. 

"Awihawm loh e, chau pangngai mai maiah i lokal lo ang" ka ti ve tlat. 

"Ka ngai che ka tih kha" a ti leh mai a, sawi turin ka phut lui ta bik lo. Thil thleng eng emaw a awm chu ka ring tho a, a bul a ka awm chuan a tawk mai. Kan awmna bawr bik hi zanah a reh hma hlauh a, mi chanchin sawi peih chi an tam lo bawk a a vanneihthlak. 

"Engtikah nge insawn chhuah i tum?"

"Ka hre lo. Ka insawn chhuak mai lo ang. Zir ngai a tam a, mamawh leh ţul ngaihtuah ngai a tam bawk a" 

"Didiki pawh kan vengah in a rawn luah ve dawn a" ka ti a, an chhungkaw chungchang sawi pui loh hram hram ka tum. 

"Ţhat chu" a ti nghut a, mi fak leh lawmpui chiam hi a thiam lo ve hrim hrim a, fak ngai leh lawmpui ngai a ka awm chuan theihtawp a chhuah ţhin thung. 

"Keimah chiah min duh a ka ţhiante duh tel lo ah a ngai che a, ka lo hrilh ang ka tia" nui hak hak chung hian ka ti a, a khi ve suk na a nuih luih takngial pawh harsa a tih hmel ka la ti tho. 

"Timothy te inah kan leng dawn mi?" ti a ka zawh chuan lu a thing a, hun dang a kan inhmuh chuan min fiam bawrh bawrh zel a, min chhaih thinrim fo zawk. Zanin chu a zia a zawi khawp mai. 

"Ţhenawm a kal tur angin ka lo chhuak a--" ka tih lai mekin "I lut duh tawh em?" a lo ti a, ka thusawi a lo pawt chat.

"Duh rih lo a rei lo mah mah ang a min ringhlel zawk ang" ka ti kual leh vel a, darkar chanve chiah pawh awmdun ila rilru a nuam ve huai ang. 

"An hau lo ang che maw?" 

"Min rawn hmu te anih loh chuan hau lo ang" ka ti a, chhungte duh loh zawng kawp luih tlat hi chuan a rukin engkim tih a ngai. A hahthlak zia min hriatthiampui an tam viau ang. 

"Ka rualin lo haw ve daih mai la" 

"Iti ang lo e. Engmah kan la ni lo ve ve a, midang thawhchhuah ring tur a pasal neih ka duh lo" ka ti a, ka chhan dan ţhin a ni. Min ngai ve ţhin sia, a lo leng thei si lo mangang hian inneih puiah min sawm fo a, tun thlengin ka la hnar thei. 

"Ka fiamthu nih kha. I duh ang tak han ni phawt teh" a tih hnuah "Ka la nei dawn tho che a" inringtawk zet hian a ti a, ka dar a a dawm lai chuan nui ver ver chung hian ka lo en kar a, a mitmeng rum tak phenah chuan lungngaihna a inphum ru tih ka hmu a, mahse a harsatna min hrilh turin a la inpeih lo va, mipa anihna angin a chung a thleng apiang min hrilh lovin a zep a, kan inkawp rei ve viau tawh chung hian harsatna a tawh ţhin hi min hrilh khat khawp mai. Sawi tur a ka tih ngawng ngawng chang a min hrilh zeuh chu a nei ve, kan inbiak nasat chang a a sawitur hrelo in ho te te min hrilh chang a nei bawk, chuti tih lohah chuan thil a sawi khat. A chang chuan ka ngei lek lek ţhin. Amaha a tawrh a tam ţhin lutuk hi ţangkai lo leh harsatna hrilh tlak loh a in ngaih chang te ka nei. 

"Engkim a ţha vek em?" ka ti ta ngawt a, a danglamna hmu chat thei tur khawpin ka hrechiang ve tawk tawh.

"Ţha vek e, ka hmuh che chuan a ţha vek zel" 

"Tuman an hau lo che maw?" ti a mangang ru tak a ka zawh chuan a nui chhuak ta hawk a, a nui ve tak tak ta ni a ka ngaihna chuan min ti lawm a ni. 

"Min hau ta se engtin nge itih ang?" 

"Ka hre mai lo mahse a hauh chhan che a zirin i thlavang ka hauh ngam ve hrim hrim" naupangchhia zet hian ka ti a, a lawm phian lehnghal. 

"Tak a Nubawihi birthday lawm zan khan Didiki i hmu mial em? Vawiinah ka nauin a sawi a, a hmuh tel thu che a sawi bawk a, Didiki berkher a sawi tel chu ka awih lo lutuk a" ka ti a, boruak a zangkhai deuh tawhah ka ngai a, bakah a rilru kal ding tur lakpen nan ho te te ka zawt lui ve. 

"Aih hmu miah lo" muangchang a lu thin pah hian a ti a, a chhan tak sawi thei si lovin ka lawm ru veng veng. 

"A kal ka ring lo reng a, mi a sawm tam vak dawn lo a, kal se chuan i hmu ang. Fredy khan a hmu sual aniang" ka tih laiin "Amah zawt rawh" a lo ti thung. Hrethiam chiah lo deuh chung a ka en ha lai chuan "Amah zawt a a kal leh kal loh a sawi thei ang chu" a ti leh a, ka tum rilruk a ni sa hrim hrim. 

"Nia ka la zawt ang. Nih leh ka patea hnenah i hriat zawng zawng hi i hrilh tawh em?" ti a ka zawh lai chuan harsa tih hmel zet hian a thaw hrawk a, a buaina ber ka zawt palh niin a lang.

"Hrilh rih lo, ka nu nen an inbe maithei"

"Maithei nge an inbe tawh?"

"Maithei" a tih tlat laiin an inbiak tawh ngei ka ring thung. 

"I tum ang chiah khan i awm thei dawn em?"

"Min pui tur a ka hnaih a i awm tlat dawn te chuan" a ti a, miin amahah ngaihdan ţha lo nei vek mahse keichuan a tih theih ka ring tlat a ni. 

"Awm dawn e. Puih i ngaihna apiangah ka pui ang che ka tih tawh kha. Nangmah ang chiah ka ni, keipawn min ţhen hma chu ka ţhen lovang che" ka ti a, a hma a ka hnen a a thusawi ka sawi nawn veleh. 

A haw dawn thlengin a hlim loh ruk zia ka hmu thei a, ka ngaihtuahin rilru a ti nuam lo hle. Ka thlir liam thlap chung khan a haw thleng dawn lo a hriatna te ka nei a, ngaihtuahna mawl mang tak tak neiin thleng mai thei tur a ka rin mak deuh deuh ka duang chhin leh nasa tawh. Mahse hetianga ka thil ngaihtuah kual vak vak ţhin ang hi a thleng tak tak ngai chuang lo. 

Zanrei deuh tawhah mi maksak deuh hnen aţang khan message ka dawng leh a, [Fiahna dang ala ngai em] tih hi a thlalak min thawn hnuaiah a ziak a, Dinpuia leh hmeichhia keimah ni lo thlalak a ni. 

CONT...