THROUGH THICK AND THIN-7

THROUGH THICK AND THIN-7

DIDIKI

"Ka awih lo lutuk a ka nuih a za zawk tawp" Kimkimi'n a tih chuan tawi te hian ka nui suk a, Lapuii nen a ţhiante birthday lawm naa kan kal kha a nau Fredy-an min lo hmu ni tur a ni kan inhmuh rualin min hrilh a, kei aiin a nau a ring lo zawk. Kan kalna te ber nen lah an lo inhre ţha nasa a, khawvel hi chu a zim ngawt mai. Mahse ngati nge ka thlalak thawn chungchang sawi miah lo va a nau thusawi min hrilh daih le? Ka ngaih a ţha lo ve lek lek a, a awmdanah danglamna ka hmuh loh vangin ngaih ka ti ţha lui. Ka zawt hmasa ngam lo va, vawiin a min hrilh kher lo anih pawhin nidangah min hrilh maithei asin ka ti rilru a, hrehawm ti hmel pu lovin hlim takin a nui thei a, nghawng a la nei lo ah ka ngai. Dinpuia a la na lo anih hmel.

"Kan ţhenawm nula ang mai. Ani pawh min hmuh rualin birthday lawm naah ka hmu che min tia ka hriatthiam loh zia chu. Mahse min hrilhna a rei veleh tawh a, tun hnai a mi a ni lo" ka ti kual vel a, hetiang lam lawm lo lutukah hian min ngai a, a ngaihdan hi thlak danglam lo se ka duh. Min ring lo vek ang a, chumai bakah natna ka thlen sak palh ang. 

"Nubawihi birthday kha tun hnai a ni hleinem. Nangmah ang deuh a kal ve anih dawn chu midang pawn chutianga an tih ve tho che chuan. Kan buaina hi a ho sia tiraw?" nui uar uar chung hian a ti leh hnuhnawh a, Fredy hmuh dan tur ringawt ka lo ngaihtuah thung. 

In luah hran ka tum chungchang ka ţhiante hnenah ka sawichhuak ta nge nge a, min lawmpui hlawm kher mai. Chutih rualin in luahman vel engtia tih nge ka tum min zawt ţheuh a, ţhian zing a rethei bik nih hrehawm ka tih nachhan pakhat a ni. 

"Ka pe thei dawn lawm, a to loh mai bakah bungrua ka mamawh zualpui ho ka patea'n min leisak vek dawn a"  inringtawk zetin ka ti a, eng helh nei miah lo angin min hmu ve se ka duh. 

"A ţhat nasat chu. I insawn dawn hnaihah min hrilh la ka pa motor kenchhuah ka lo dil ang. A hranpa hman chuan pawisa sen ţawk angai a, ka pa in a phal hlauh leh pawisa kan hum thei a ni mai" Sawmtea'n a lo ti var a, hepa lah hi a chang leh min khak fek fek a, a chang leh min duhsak ber angin a awm leh a, khami ni aţang khan ka be duh miah lo va, whatsapp group a min fiam zuk zuk chang pawhin ka hmu lo der ţhin. Mahse ani hi chu mipa a ni bawk a, thil thleng zawng zawng te kha hre lo ang hmakin a awm. 

"Inrinniah ti la kan pui vek thei ang che. Chawhmeh kan lei ang a inchhung remfel pahin chaw kan lo ei nghal bawk ang a, inthar lawmna a ni mai alawm" phur sarhin Siami'n a ti veleh a, tih lungawi loh chang ka ngah ţhin nen min puih an inhuam em em vek. 

Chhuanlam siamin ka ţhiante aiin college ka chhuahsan hma a, ka fimkhur loh luatah ka ţhiannu berin min manchhuak ţhelh a, kha thil kha sawichhuah a nih tawh loh nan eng emaw tih ka duh a ni. 

Fredy te school gate bulah amah nghakin ka ding ngat ngat a, hmuh hman loh ka hlauh lutuk na lamah ka kal hma mah mah anih hmel. A changin ka ţhu a, a changin bang nghengin ka ding a, a chang leh ka vei kual a, ka ning takzet tawh. An bang har hrep lehnghal a. Dinpuia kha chuan engmah a sawichhuak dawn hauh lo tih ka chiang a, Fredy erawh chu a la naupan bakah min hmu ve kha mak a ti dawn a, an inah ka kal ve fo bawk nen, a lo sawichhuak hman pek a nih hmel. 

Haw daih mai ka duh rum rum laiin an rawn chhuak ta pheuh pheuh a, uluk deuhin ka lo en vek a, rawn chhuak an tam tial tial a, thawm a ring tual tual. Ka hmu tawh dawn lo emaw ka tih hnuah a ţhiante nen an rawn lang ve hlawl a, thil ţullo lutuk a lo sawi chu ben nghal nawk nawk ka chak ber. 

"Hey Fredy" ring leng lawng a ka tih chuan a ţhiante an au dual a, tleirawl lai, ngaihzawng hriat ţan hunlai a ni bawk a, hmeichhia ka ni lehzel nen, a ţhianten an chhaih sup sup chu awm lo ka ti hran lo. Amah tak phei chuan mak tih hmel zet hian min en a, a zam a ni tih a hmuh mai theih bawk. 

"Nangmah khan lokal lawk teh" ka kut a hui chung hian ka ti a, min en leh vung vung phawt a, "Lokal vat" ka tih leh takah chuan hreh hmel zetin a lokal. 

Kei aiin naupang daih mahse kei aiin a sang daih tho a, ţhanglai ala nih vang te pawh a niang a cher ve hle. A banah kaiin a ţhianten kan ţawng an hriat phak lohna tur ni a ka rin thleng ka kal pui a, kalsawn tum miah lovin ţha deuhin min zui ve zel. 

"Kimkimi hnenah 'birthday lawm naah ka hmu a, zu a in' ilo ti ni maw?" ka ti tawng a, ka thusawi ropui lo lutuk chuan ka nuih a ti za. 

"Aahh...aahh" a tih char char takah phei chuan ka nuichhuak ţhelh a ni. A zam em a, sawi tur a hre lawk lo. Thinrim awm tak a lan tum chung hian "Eng nge aahh ahh chu? I u bulah chuan sawi tur i hriat viau kha ka bulah pawh hian sawi ve vek la" ka ti a, a sam a tuai a, za lo zetin a nui bawk a, a awmdan apiang chu zam map lo hian ka lo en ran. Kei aia a naupan vang hian ka zuam hrim hrim.

"Ka hmu che lawm U Didik..englo..i hawikual a, chuan ih..zu no i keng bawk a" a tih bah nak. A mitmeng ringawt chuan pawi a sawi lo takzet. A mak ti hmel a la reh hleithei lo a, min hmuh a inbeisei lo takzet a ni tih a hriat. 

"Zu no zawng zawngah hian zu kher kan dah ngai hleinem mawla" tih pahin a banah ka beng a, ka beng na deuh nge a ri ring angreng. 

"Eng nge i dah a?" tiin a ban tuai vut vut chungin min zawt hram. 

"Thei tui ka dah a, tui ka dah bawk a, ka induh zawng apiang ka dah zu tello in" vin zet a ka tih chuan "Khawi a thei tui nge i hmuh bik? Mawitea nen eitur kan zawnin kan hmu miah si lo a" a ti hu a, ka nuih loh nan ka hmui ka hup ta ringawt. Ka insum thei a ka hriat hnuah ka hawichhuak a, thinrim angin ka awm lui leh. 

"In school a hmeichhe ho hian 'A hmelţhat nen a mawl e' an ti ţhin che em?" ner nang chung hian ka ti a, muangchangin lu a thing. 

"Ka ţhiannuin min pe a, ka lo la ve a ni mai. An dahna thlengin ka hre bik lo va, Kimkimi hnenah khami zan kha lo sawichhuak tawh miah suh" ka ti khar khar a, hetiang lek sawi tur hian rei tawk ka nghak lehnghal. 

"Sawi tawh lo ang mahse ngati nge Kimkimi hriat i hlauh a?" a ti leh khauh a, 'ka lawm e' ti a kalsawn nal nal ka chak ber. 

"Kan ţhenawm nulain min hruai lui a, ka hnial nasa lutuk mahse ngen takte in min ngen a, ka patea a rawn dil lehzel nen, peih lo deuh chungin ka kal pui a darkar chanve vel chiah ka awm, ka ning lutuk a ka haw ru daih. Ka kalpuinu paw'n zingah min hau hrep alawm" tiin dawt ka phuah kual a, a awih vekin ka hria. 

"Kal duh tawh suh aw. A sawm leh hunah che pawh hnar zel rawh. Khami zan khan mi hrang hrang ka hmu a, hmeichhe tan chuan a him kher lo ang. Ka hmuh leh che chuan ka hrilh leh tho ang" a ti leh sia, a ţhat lohna lam a hmuh ve thiam ka ring lo hrim hrim a, bakah min vau ngam ka ring lo bawk. 

"I â pumhlum bik lo anih dawn hi. Ka kal ngai lo va, ka kal tawh dawn lo bawk a, nangpawn engmah lo sawi tawh suh. I lo sawi leh vaih chuan ka lokal leh dawn ania" ka ti ve thung a, a bu ve nghat nghat tho. 

An school lamah kan chhuk leh a, a ţhiante an lo awm tawh lo. Fredy a mangang a, ka zawnkual pui leh a, hah hnawp a kan zawn hnuah pawh hmuh tur an awm lo. 

"Haw san mai rawh" ka ti ta ringawt a, a tlankual nasa lehzual a a hah bawk aniang a necktie pawh a pawt thawl tawh khawp mai. A enkual leh thuak thuak a, a hmuh tak ngang loh hnuah haw a rem ti ve ta nge nge. 

"U Didik thlah i ngai em?" tiin min zawt ve mial a, a u bike hlui kha a keng ve zeuh zeuh tak e. Ka banrek a ka sana bunlai ka bih a, rin aiin a tlai tawh. Pawisa seng a haw ai chuan a remchang zawk tiin "Duh e nangmah vangin ka hah a, ka tlai phah a, min thlah i ba ve hrim hrim" ka ti a, ka awki ka la ti nem duh chuang lo. 

"Lo nghak lawk rawh a rei lo ang" a ti zo chiah a a pum a la ri zui a. Van lam a hawi a, chumi hnuah min rawn en lehin "Khawpui ri kha i hria em? Ruah a sur dawn niang haw vat vat ang" tih leh tlan a rual a, a rawn let leh hma zawng paw'n a awm dan leh a pumri thup a tum dan te ngaihtuahin keimahin ka nui tet tet reng. Pum ri leh khawpui ri te chu a inan loh tehlul nen. 

Ka bul a a rawn din chuan lawn nghal mai ka tum deuh a, ka rilru thlak leh thutin "Thil kan ei hmasa dawn mi?" ka ti leh ta zawk. Pawisa pai lo mahse ka neih ang angin ka leisak tho ang ka ti rilru a, ka ti hlau vak a, a ţhianten an haw san a, thlah ka ngaih leh ngaih loh min zawt leh thlap a, tlem chuan ka khawngaih veleh deuh. 

"Khilai lawkah khian ei siam thiam deuh a awm a, kan ei ziah asin keini chu" ti a phur zet a min hrilh chuan chhaih buai tawh lovin ka kalpui ta nge nge. A duh ber a sawi a, a lam zui zat. Ka duhzawng min zawt ve a, a ei tum ang chiah ka lo sawi ve chuan a nui mai a, ka fiamthu lo tih a hriat takah chuan min chah sak veleh ta tho. 

"Iduh chuan thil dang i ei tel thei. Ka pek kep ang che ka pawisa pai ka la hmang lo a, zu in ang a ka puh manah che a ni mai" a tih takah chuan rilţam miah lo chungin thil dang ka chah belh a, eichakna ka nei ţhak lo lehnghal. 

"Dinpuia a lo leng ngai em?" 

"Lo leng tawh ngai lo. Kimkimi an hauh phah ziah a, a khawngaih ve aniang" tiin awlsam zetin min chhang a, a thusawi chu a theng thawngah a thawk zui lo. 

"An la duh lo viau elaw?" ka ti leh a, a hma ang ngawt chu a ni ta bik lo ve. 

"Ngati nge min zawh?" a ti ve khauh reng a, ka lo nui hawk.

"Kimkimi hian a sawi ţhin a, Dinpuia induh loh vang a hrehawm a tih ţhin zia te, duh pui ve mai ula in va sual ve. Kan hmangaih te chu engang mi pawh nise kan hmu ţha vek a, miin a chhe lai ber an sawi ţhin te thlengin kan hmu ţha tel vek. Unaute bialpa lo duh loh ngawt tur a ni hleinem" ka ti ta duah. A duh lo tu ngei hian an duh loh chhan a sawichiang thei deuh ang chu. 

"Ka tel ve vak lo, ka ute leh ka nuten an hria ang" a tih chuan beidawng zetin ka thaw halh. Vei em em a nei lo reng a ni hepa hi chuan. 

"Nih leh bialnu inei em?" ka ti leh ta zawk a, lu a thing a, a nui ţha duh vak lo. A hmelah natna hmuh tur a awm lo va, a zah hmel viau thung. A la ngaihven lo ah ka ngaih sak mai a, ka zawh zawm tawh lo. 

"Taka hmanah khan U Timothy-a nen in ni ţhin tiraw?" tiin min zawt ve thung a, ka chhan hma hauhin "Kimkimi pindan aţangin a pindan a lang thei a, vawikhat chu ka hmu tawh che" a ti leh a, kan chawlhna hmun a zimin min si lek lek a ţhu an awm ve bawk nen ka hawichhuak ţha ngam tawh lo. 

"Ţhian kan nia Kimkimi pindanah pawh ka lut fo alawm" zawi te hian ka ti a, rawn kun ve in ka bengbulah "Ka hmuh dan cheu kha ţhian in ang lo" zawi te tho hian a ti ve a, ka en veleh ngeiawm zetin a la nui zui. 

"Hmuh theih loh inei lo va, thil hria i inti ve bawk si, vawiin bak ka hmuh tawh loh che ka beisei" thinrim zet a ka tih chuan a ţhen sak a, ka huat tawk a tling leh pek. Mi mit lak ka duh loh vangin ngawih ka chuh thung. Ka insawifiah peih tawh lo va, sawi tur ngah mah ila naupang hnen a insawifiah chiam ka tum lo. A ngaih ngaihin ngai teh se. 

"Vawiin a ka rawn hmuh che hi kan pahnih a kan thuruk ni leh rawh se" ka ti nghat a, kan in bulah ka awm tawh.

"Tehreng mai ka lo zep ang. Anih aw U Didik" 

"Kimkimi pawh i u lo a ngati nge min u bik?" ti a ka zawh chuan "Kei aiin i upa a" a ti awlsam et a, "Nih leh Kimkimi?" ka lo ti vat. 

"Nau angin ka en a" a ti leh mai a, hun ka khawhral peih tawh lo. Lawmthu sawi lovin ka kal daih. Fredy thusawi mawl mang tak tak ai chuan ka nutei ang pawh ngaihthlak a nuam zawk. 

Chaw eina ka tihfel zawh veleh ka pindanah ka inkalh khum a, Kimkimi hnen a ka thlalak thawn tak kha ka en nawn leh. Inhmeh atih vanga Lapuiin a lo lak ruk a ni a, Nubawihi birthday lawm zan a mi tho kha a ni. A lak hun chiah a sawithei tawh lo na a chu chuan min ti buai lo. Hmeichhe dang nen a an thlalak a tam thei ang ber ka duh a, chu zawng chu a ni mai. 

Kimkimi hnen aţangin chhan letna ka la dawng lo va, vawiin a Kimkimi leh Muankima te inbe lai ka lak ruk Dinpuia ka thawn ve thung. A chet dan hi a mawi lo tih ka hria mahse hetiang a ka tih vang a Dinpuia buai kual vel ka hmuh hian nuam ka ru tlat zel. Nuam tih ka nei tlem a, ka duh ang leh ka hlimna tur ka tih ve hi a pawina ka hre tehchiam lo. Tual em ka that hleinem. 

[Naa..hepa ringawt hi chu a ninawm tawh e. Hmeichhia khi a chhe lo sia mipa dang a hmu lo em ni?] Dinpuia message a ni. Kimkimi leh Muankima thlalak ka thawn na beisei loh lutuk a min rawn chhang let chu ka thin a rim nghal ţun a, fiamthu ah lek min ngaiin ka tibuai pha tawh lo niin ka inhria a, ka message pakhat lek a rilru an pek a ka thil sawi leh tur te an lo ngaihchan ran khan nuam ka tih tehreng nen. Keimah vanga an buai khan a nuam ka ti bawk a, hei hi an inkar a buaina ka tihna a ni lo. Ka message ho te an lo buaipui ve chiam te khan nuam ka ti. 

[U Didik ka ţhiante khan chhe lo an ti che a, chuan keipawn i chhe lo ka ti] a hming a sawi lo na a tu nge a nih ka hria. 

"Naupang nghal lutuk" tiin ka phun sep a, ka block em lo na a ka delete rang hle. Hmelţha reuh viau mahse mahni ai naupang chhaih buai theih a awm ka tum lo nasa. Timothy nen a kan chungchang inti hre zet a a awm aţang khan ka ngaina lo lehzual. Min enthla reng emaw tih tur khawpin min hmu fuh thei em em lehnghal. Inhmuh mai a awlsam a, a duh vang reng a min enthla a ni bik lo va, min enthla chiah pawh a ni lo tum loh deuhin min hmu a ni ber. Chuti chung chuan ngaihdan a siam nghal ringawt khan ka lung a ti awi lo tho tho. 

[Mipa dang nen a i hmuh dun duh phawt chuan ka lo pe leh dawn che nia] tiin Dinpuia chu ka chhang let ve ngat a, hrehawm a tih vawng vawngna tur thawn tur ka la nei dawn khawp. 

Tu emaw hian ka pindan kawngkhar a rawn kik det det a, hlauhthawnna a khat nghalin ka thinphu a rang hle. 

"Tu nge?" a hriat phak tawk turin ka ti a, ka awki ah ka hlauhna tih lan loh hram hram ka tum. Lalawma anih ka hlau a, ka hawn duh loh chuan min tibuai leh char char ang a, midangin an hre lo der leh hmak ang. Ka hawnsak vaih chuan min khawih a tum leh ngat ngat ang a, a ruih laiin hlau viau mah ila a ruih loh laiin ka hlau lehzual. 

"Rindik rawn hawng rawh ti ti lawk teh ang" Lalawma anih ka rin viau laia ka patea aw ka hriat tak zawk avanga ka thlamuan zia chu. Awm dawmin thawk ka la te te a, ka tha khur te a reh fel hnuah ka hawng ve chauh. 

Khumah kan ţhu dun a, eng ber nge sawi a tum ka ngaihruat thiam lo va, ka nute in min hek leh tawhah ka ngai. 

"Pawl12 lek inih lai aţangin hrehawm i tuar tawh a, tuman an ngaihven ve tak tak ngai lo che a, i nutei hnen aţang lahin thil thar engmah i la dawng ve lo va, i hriat loh laiin ka khak ve fo, mahse i nutei mizia i hrechiang a, ka khak apiangin a pawr zawkah a ţang a, inţhen thlengin a sawi nghal tun tun ţhin. Mualpho loh nan ngawih ka chuh leh mai ţhin a, inu leh pate nen kan inbia a, i chungchang kan sawi ho a, i awm hran hi a ţha ber dawnin kan hre vek a, hrehawm i tuar tawh lo tur hian min ti zangkhai ve huai mai" tiin bul a ţan a, chik zetin ka lo en a, ka patea a ni bawk a min lainat tak tak niin a lang. Lem chang chu ni se ka hre em em ang. Lem chang thiam tak tak min ngaihsak ang a lang min ngaihsak tak tak si lo ka tawng hnem tawh emai. 

"I mamawh tur bungbel leh gas te ka ngaihtuah fel vek tawh a, buaina leh sawi neuh neuh a awm loh nan ka ţhianpa te inah ka dah a, i ţhiante i sawm ang a i insawn chhuah niah in thiar mai dawn a nia. Hei hi inven nan kawl phawt la, i inluah man tur pawh i nute tihbuai a ngai lo, keiman thla tin ka pe ang" tih charh charh pahin lehkha ip min pe a, pawisa anih ka ring nghal ngawt. 

Ka chhan ve hmain ka patea bawk chuan "Lehkha ţha deuhin zir la, hna thawh tur la zawng rih suh aw. I zirlaiah chiah i rilru pe la, inu leh paten lehkha i thiam an duh vangin helamah an awmtir che tih hrereng la, mamawh ineihin min dil la, ka phone number inei vek a, eitur leh in luahman kha chu ka tum vek ang. Thla tin ka hlawh aţangin i chanpual ka siamsak tawh dawn che nia" a ti leh a, ka beisei miah loh thu lawmawm tak ka hria chu ţah a chhuak rum rum. 

"Inhuam thui hle si a hma daih khan min awm hran tir tawh tur che alawm" ka ti a, thinrimin ka sawi lo va, chu chu ka patea pawh hian a hrethiam ang. 

"I ngaihdan a nih loh ka hlau ţhin a tin ni. In luah hrang rawh ka tih chuan ka in a i awm ka phal loh vang a i ngaih ka hlau ţhin a, ka lantir ngai lo na a ka chik che a, ka ngaihsak ru reng che a, ka fanu i ni a, i awmdan ka thli thlai ru reng ţhin. Nangmah a i awm hunah chuan thunun tu che an awm tawh dawn lo va, i pawimawh ber dawn. Zan a chhuah ching tawh lo la, fimkhur lo tak a chein i hma hun ti chhe thei thil ti tawh ngai suh" a ti khauh khauh a, ka zak ru chem chem. A rukin min lo zir reng a ni tih lo hria ila chuan khatiang hmunah khan ka kal reng lo tawp tur. 

Ka patea chhuah veleh pindan ka kalh leh a, khumah mu in phone ka khal neuh neuh. Thu lawmawm tak ka hria a ka hlim takzet chutih rual chuan ka ruak takzet tho. Ka awm dan hi ka sawithiam ţhin lo. Ka hlimna thlenna tur mi rintlak tak te ka duh ve ţhin a, ka biak hun nghakhlel tak a lo ngaichang reng ţhin tu tur te, ţhian nei nual mah ila ţhian chauh ni lo, ka hahdam ve theihna tur, hlimna leh lungngaihna ka ţawmpui theih tur mipa rinawm leh rintlak ka duh ve ţhin. Chutih rual chuan midang rinna ka tlachham tho si. Mipa an ni emaw hmeichhia an ni emaw tumah ka ring tak tak thei lo. Hei vang tak hian ka inhawng lovin ka inkharkhip tlat ţhin a, naupang te ni chung si a ka thil tawn tawh zawng zawng hi sawi vek ila chuan midang ka ring tak tak thei lo hi tuman mak an ti lovang. 

[Good morning] ka thawh veleh Fredy message ka hmu hmasa ber a, "Eng nge a hriat le?" tiin keimah leh keimah ka inzawt. An inah ka kal fo a, biak pawh min be ngai der si lo a ţhianten chhelo min tih vang mai a min rawn be ve mai mai a nih ka ring ta ber. 

[Karkhat chhung atan ni hman nuam aw Fredy. Nitin inhrilh ngai lovin kar khat chhung awh tur lawih ka rawn thawn nghal] nui tet tet chungin ka thawn a, min chhang let ngam tawh kher lovang. Ţhiante fuih phur rual lek te kan la awm a, la upa vak bik lo mah ila naupang ka ti veleh chhawng. 

[School banah ka lo be leh ang che] tih hi a rawn thawn leh hram a, a luhlul zek lehnghal a, naupang a kar a ţhiante nau lehnghal. Ka lo hmu kher kher kha ka inchhir lek lek tawh. 

"Keichu Dinpuia nen a message min thawn reng tu hi ka ning tawh e. Hre ngat ila chu hmu turin ka kal nal nal ang" ka banah kuahin a phun ve pang pang a, Kimkimi'n hetianga a sawi tawh chuan ka thil tih khan Dinpuia a nghawng tihna. Nidanga nuam ka tih theih nen vawiin chu nuam ka ti miah lo, nidang zawng aia ka ţhiannu a hlim loh vang a ni maithei. Makeup a inhnawih lo va, a hmui takngial pawh a hnawih lo. Hil bulin a lokal a, a sam a ţawn tawm tawp a, tshirt leh jeans ha in chapal a bun leh tawp. A inchei vul chuk ngai lo na a hetiang em em chuan ka hmu ngai lo. 

"In inhau em ni?" ka ti a, kan ţhut rualin a hmai a tuai thuak a, a thaw zui halh. 

"A chhan ka sawi kher lo ang a, ka la inpeih lo bawk nen sawi turin min ti lui miah suh aw. Ka rin loh vang che ni lovin ka sawichhuak duh rih lo, ka hah zual tulh tulh ang" 

"Tehreng mai, i inpeih hunah min hrilh leh mai dawn lawm" ka lo ti a, a tih ziah dan a nia, sawi mai theih loh a neih chuan a inrintawk hnuah min hrilh mai zel.

"Dinpuia nen hian thil dangah buaina kan nei sa a, kan pahnih chuan kan ţha reng mahse buaina dang a awm. Chu chuan eng nge a thlen zel dawn kan hre lo ve ve a, hlauthawng reng rengin kan awm ve. Kan rilru a hah ve ve a, thil ţha lo a thlen kan hlau bawk si. Chuta karah thlalak leh thil dang eng eng emaw kan dawng ve reng a, Muankima nen inhnaih lutuk a kan awmlai berkher an lo thawn lehnghal. Min fiam anih ringin engahmah ngaih loh kan tum na a thikna a awm lo thei si lo va, kan pahnih tal chu inhau lo ang ti mah ila kan inchhal leh nge nge ţhin. Min tihbuai reng hian nuam a ti em maw ni?" a ti hlak hlak a, "tunah chuan nuam ka ti lo" ka ti rilru a, rilru hah lutuk vanga phelh phung a ţhiante hmuh hi a nuam miah lo. Midang ngaihsakna ka lo phut lutuk nge mal ka intih em vang hian ka lo kal thui lutuk zawk? 

"Nuam a ti lo ang. Inngaihtuah chiang hmasa se, hetiang teh nuaih hian i awm dawn a ni tih hria se la chuan a chhaih buai reng kher lo ang che u. Dinpuia chu thuhran a nia, a tihnat ţhin zia che ngaihtuah chuan a phu ka ti ve tho. Na ve zeuh zeuh mah sela pawi tihna pakhatmah ka nei lo. Mahse Dinpuia aiin i na zawk daih dawn tih hre lawk se chuan a tibuai miah lo ang. Ka lo hrilhfiah ve dawn nia, bialnu dang tam tak nei leh mah sela nang aia hmangaihtu leh nang ang a rinawm a hmu tawh lovang" ka ti a, inthiam lohna ka nei ve te chu ka duh lo kher mai. 

Siami leh Rina te rualin a kal hrang a, ka hmuh phak a a awm loh hnuah pawh ka ni nghulh reng a, buaina dang an nei tih ka hre lawk miah lo va, hre lawk ila chuan ka insum ve maithei asin. 

"Kimkimi mangangin Dinpuia nen a an thil tawn mek min hrilh khan nangmah inih ka ring sa reng a" ka phu nasa lutuk chu ka ţhutna aţangin ka tla lo chauh. Ka bag tla ka chhar sawk sawk a, thip fe hian Timothy chu ka melh zui ram ram. 

"Hrechhuak ta se engtin nge itih ang? A ţhiannu, a mi rin ber hi a bialpa nen a pawh ţhen tum a tibuai char char tu a ni tih hre ta sela engtin nge a awm i rin?" vin zet a a tih takah chuan a thusawi hre phak an awm hlauin ka hawi kual a, tumah an awm hnai lo hlauh. 

"I â vek tawh, ngaihsak hlawh i duhna hian thil ţha lo a tih tir tawh che anih hi. Chapo ar reng mah ta che, ngaihsak i duh chuan lantir la, i khawhar chang a ţhiante i mamawh chuan sawi la, ngaihsak duh si duh lo ang a awm kher kha eng nge a ţul na? I ţhiannu i hliam der anih kha. Khawi i phone kha rawn la rawh, Kimkimi kher chu i ti na tawh dawn lo" tih pah a ka bag a lak rualin ka ding ve nghal a, kan inchuh zui a, mipa na na na chu ka hneh lo kher mai. Ka beidawng chuan "Ka pe ang che" ka ti ta nge nge a, ka mangan zia a hmu bawk a, min chhuh lui ţalh bik lo. 

Phone ka phawrh zal zal lai chuan "Sim card phawi rawh" a lo ti hmuk a, man chhuah ka ni thut a, ka hlauthawng bawk nen ka tha a khur a, hun ka hmang rei kher mai. Min lo nghak ran a, ka phawi theih veleh Kimkimi te ka biak ţhinna zawk chu ka pe a, a mitmeng vawt raihah chuan rei ka en ngam lo.

"Kimkimi hnenah ka sawi lo ang. Ka ringhlel che a min hnial buai miah lovin min pe nghal a, iti duh tawh bik lo niah ngai ang" awki dam deuh zawk hian a ti a, khatianga min rawn ti thut kha hnial ngaihna ka hre lo va, lo phat ve nachang ka hre lo. Nuam lo tihna ka nei sa bawk nen engkim kha a thleng zung zung a, mahni chauh inngaihtuahna hian midangte tan natna a thlen thei a ni tih chiang takin ka hriat phah.

CONT..