THROUGH THICK AND THIN-8

THROUGH THICK AND THIN-8

KIMKIMI

"Ka hruai hman tawh lo ang che i ti ni lawm ni?" gate bul chiah langsar lai a ka hmu thut chu mak ka ti kher mai. Min hrilh lawk lovin a rawnkal thut ringawt. 

"Helai hnaiah hian ka kal remchang a ka lo nghak mai che" 

"Ţhat hlauh chu ka nu te hmun dangah chaw an ei dawn a, lo lut kawi rawh aw" ti a ka hrilh hnuah a hnungah ka lawn a, buaina neuh neuh kan neih reng vang hi nge ka ngai reuh riau. 

"Tu nen nge in awm dawn? I ute an awm dawn em?" ti a a tlan chhuah hnu a min zawh chuan a darah ka khabe ka nghat te te a, "Dawn lo Fredy nen chiah kan awm ang" ka ti a, a thlamuang ve sawt ang. 

"In chhungte inah mi an ei dawn?"

"Aw kan vaiin min sawm zawk a, mahse ka nau nen chuan kan peih ve lo va, inah kan inbawl chawp mai ang kan tia, lo ei daih ta che" tiin ka sawm leh hnuhnawh. 

"Nidangah ka lo ei zawk ang. Ka nu puih ka ngai a, ka thil tih tum atan ka inbuatsaih ve zel bawk a" a tih chuan ka sawm lui duh ta bik lo. Awm hran a amah a bul ţan ve a la duh reng a, eng eng emaw neuh neuh a la zir ve reng. 

Min hau tu tur an awm lo bawk a gate chhungah ka tlan luh tir a, tim miah lovin inchhungah min zui lut ve mai. A lo ruak huai a, tumah an awm lo ti dawn ila kawngkhar a inhawng vek tawh tho si. Sofa kawh pahin "Lo ţhu rawh thingpui te kan in dawn nia, Fredy hi a inbual aniang kan en hmasa lawk ang e" ka ti zung zung a, inchung a kan unau bathroom inţawm bikah ka chho zui zat. 

Rin ang ngeiin a lo inkalh a, kawngkhar ka chum bur bur hnuah vin zetin "Eng nge? Ka inbual inhnuai a mi hmang mai rawh" a rawn ti tuarh a, a zai zui al al. 

"In school bul thingpui dawr a mi rawn lei haw rawh ka tih kha i lo hawn em?" ka ti a, niminah pawh ka chah a, a rawn hawn tawh lo.

"Hawn nang Miss in leitur a sawi leh thut a ka lei daih, a to sia nimin a pawisa min thawn nen khan ka hmang vek" 

"Pawisa an pe ve reng che a hmang mai ta che nih loh pawn zirlai kaih hnawih anih chuan ka nu dil mai la, thil chah tlak loh lutuk mai" vin zet hian ka ti a, ka thinrim hlur tawh.

"An thawk hah sia an khawngaihthlak" a ti leh mai a, vawikhatmah hetiang hi a la sawi ngai lo. Eng emaw dik lo a awm anih ringin ngawi rengin a pindanah ka kal a, diklo a awm anih loh pawhin zep a nei tal ang. A lo rui ve ţhin em maw ni ka ti rilru hman hial a, Dinpuia'n min nghak reng tih hre mah sela a inbual zawh hmaa endik hmasak ka tum tho. 

A school bag ka hawng a, lehkhabu phawrh chuang lovin ngun zetin ka endik. Peng pakhatah bawm cheimawi kutphah aia lian hret a awm a, a chhungah keychain leh bengbeh te, eng eng emaw te tak te te hmeichhe inbel chi hlir a awm. Ka pawisa leh a pawisa belh bawm a a lei tih hriat reng. Ka thinrim ţun a, hmeichhe thil lei ro ro ah a lei ho in naupang lawm ni awm tak tak a lei lehnghal. A ngai ang chiah a dahin inhnuaiah ka chhuk a, Dinpuia haw hunah ka hau khawp ang. 

"I han hmu em?" ti a min zawh chuan a bul a ţhut pahin "A inbual ka ngei a nia khipa khi" ka ti hlak hlak a, lungawi lohna ka ngah sa nen hmeichhe thil lei nan a ka pawisa a lo hmang tel chu ka haw hlur. 

"Nga ti nge?" tiin ngaihţhat loh hmel zet hian min zawt a.

"Hmeichhe thil ho deuh deuh lei nan eitur lei nan a ka pawisa thawn a hmang vek" ka tih chuan a nui hawk a, ho a ti viau a ni ngei ang. 

"Nui ringawt suh" ka ti hlak a, nghet zetin min kuah bet vak ringawt. Ka hauh hmain min thlah leh vat tho. 

"Nizan i mengrei a ni maw vawiin chu i phak chuap" a ti a, ka inchei peih hlawl lo a ni. 

"Ka tlaivar ţhak. I thlalak dawn min rawn thawn chhawn leh a thil awmdan ka hrilhfiah vek hnu che khan a lo tlai duai tawh a, mutthilh ka tum a ka muhil thei tawh si lo va ka meng tlang. Ngaihtuah tur dang a tam sa nen buaina belh chhah ngat ngat tu hi ka hre chak ngawt mai" ka ti bawrh bawrh a, kei min biak loh leh Dinpuia a bia a, ngaihţha lo deuhin min siam ziah. 

"Min biak dan leh thlalak min thawn ho te vawiinah chik zawkin ka en a, min be tu ni awm a rin ka nei" a ti ta mai a, hrechak zet hian "Tu nge i rin? Tu nge amah chu?" ka lo ti thuai thuai. 

"I ţhiannu" zawi sup hian a ti a, min kuahna aţanga inla hrangin tlemin ka ţhut hlat a, a fiamthu leh fiamthu loh hriat tumin ka endik hmasa te te. 

"Han sawi leh teh" a fiamthu lo ni a ka hriat hnuah ka ti nawn leh ngat.

"I ţhiannu Didiki" a tih chuan dak meuhin ring zetin ka nui a, Fredy lahin zu a in a tia, Dinpuia lahin min tihbuai tumah a puh bawk a, an hmuh duh dan a mak riau.

"Didiki hian i ngaina vak lo niin a hre ţhin a, i ngaina lo takzet tih ka hre chiang chiah. Eng berin nge Didiki a nih rin tir che?" 

"Ka ring ve mai mai. Muankima nen a in chungchang a hre em a"

"Thil dang a awm tel em?"

"Awm lo Muankima vang chauhin" a ti a, keichuan ka ring chhin eih lo. Ka ţhianţhaber a nia, khatiang tih duhna kha a nei lo tawp ang. 

Ţhut hnaih lehin ka darah a ban ka dah kual a, "Didiki a ni lo vang. Muankima nen hian a rukin lo inkawp reng mah ila Didiki chuan min zep pui tlat zawk ang" ka ti a, ka ring chhe phal lo a ni ber e. 

"Nih chuan ka hre lo ni mai rawh se" a ti ve ta ringawt a. 

"Engtik nge insawn chhuah i tum tak?" tiin ka zawt ta daih a, ţhiante chungchang awm ang lo pui pui sawi chu a nuam miah lo. 

"Ka la hre lo. Hman a ka nu in a pual a in a sak mi kan luah tir tak kha i la hria em?" a tih chuan ka lo bu zeuh a, kha thil a ti ringawt kha kan hrethiam lo viau a, Dinpuia pahrawn nen pawh an boruak a ţhat loh phah nghe nghe. A neih ang angin a sa chho ve bek bek a, luah tlak a tih hnuah midang luah tirin thla tin luah man la mah sela inhmun a leina leh a sak nan a a pawisa sen zawng zawng kha a la hmu let kher lo vang. 

"Khatah khan awm ka tum deuh a, mi in luah ringawt chuan ka thil tih tum hi duh angin ka ti thei dawn lo va, fal deuh hlek mahse kha hmun kha a ţha ber ang" a ti a, bakery din ve a la tum tlat. 

"I hlau lo em ni? Mahni chiah a i awm phei chuan misualin rawk ta che se la engtin nge itih ang?" ti a ka zawh chuan a nuih a za kher mai. 

"Ka thlanah nitin i lokal ziah tawh mai ang chu" a ti a, a sawi zo hman ţawk tihin a awmah ka beng thlawp a, na a tih hmel em em mai lehnghal. 

"Khatiang thil kha vawikhatmah sawi tawh suh. BA tal hi zo ve tawh ila chuan ka pui char char thei tur a nia" ka ti nang nang a, ka birthday a a ţhi min pek ngei mai chu ka khal pah niap niap. Amah chiah a bul a ţan ve bek bek tur ka ngaihtuah chang hian ka khawngaih ţhin. 

"Hun pumhlum min pe thei rih lo mahla min pui zeuh zeuh thei reng tho a" min thlamuan tumin ti ve mah sela a huphurh ve tho tih ka hre ru reng. 

"Kimkim thingpui in ang, ehe..U Dinpui ilo leng ve khiah ni maw?" Fredy aw ka hriat chuan rang zet a inherin ka melh rawm rawm a, ka thil hmuh chhuah a la hre lo bawk a pawisawi loh hmel zet a min en ve reng chungin muangchangin min rawn hnaih a, kan piah chiah ţhutna inhungah a ţhu a, "Ngati nge min en reng?" a la ti zawk mah. 

"Thingpui lum rawh tih chiah i tiam a, vawikhatmah pawisa ka thawn tawh lovang che" ka ti ţha leh a, Dinpuia chuan min khap nan langsar vak lovin min lo kuai zeuh. 

"Pawimawhah ka hmang lawk a ka rul leh em em ang che" a ti a, a hmel leh thil dang engkim ka ngei vek rih. 

"U Dinpui lo leng ziah ta che i rawn leng khat lutuk a kha Kimkimi a thinchhe lehzual vek" a tih chuan an pahnihin an la nui tak deuh deuh a, nau te lo ninawm theih zia hi aw. 

"Thingpui chu va lum la i nau a rilţam aniang, keipawh in zawh chuan ka phei deuh nghal mai ang" ti a min hrilh pahin a sana bunlai a en a, ka la ngai a sin le. Kan ţawng miah loh pawhin a bul a ka awm chuan nuam ka ti ve hrim hrim. A ruih loh phei chuan a fel bawk si. 

Choka ah lutin thingpui ka chhuang a, a tlem tham bawk a a so hun ka nghak law law. Gas bulah dingin phone ka en pah a, Didiki message pawh a lo awm leh vang tawh. 

[Vawiin ang khan rawnkal tawh miah suh aw] tih te mai hi a rawn thawn a, tawi viau mahse min ti nui ver ver tho. Ţhianten min ngaihsak hian a nuam bik. 

[Kal tawh lovang, vawiin kha chu ka inchei peih hlawl lo a, nalh deuhin ka lokal tawh dawn nia] ka ti a, hrehawm a tuar lo ţep tawh a, ka lawmpui takzet. 

Thingpui leh a hmeh tur kengin ka let leh a, Fredy chuan Dinpuia a lo ţhut hnaih em em mai lehnghal. Min hmuh veleh a hmaa a ţhutnaah khan a insawn thuai a, a khi vur vur reng bawk. Eng nge an lo tih ni? Fredy ang vek hian ka chhungte hi awm se la chuan kan tan pawh a nuam ve deuh ang. Rawn leng ngam lovin an siam a, kan inhmu ru reng tho si. Hmun him lai ber inchhung a inkawm phal ve mai se la ţha tur. 

"Choka ah ka va in daih teh ang. I chhang rawn lak hi ka eipeih zawng a ni lo eitur dang ka zawng dawn" a tih zawt zawt hnuah a no tur chawiin choka ah a phei nalh a, ka enzui vung vung. 

"Vawiin hi eng nge a hriat le? Eng nge in lo sawi a?" ti a Dinpuia ka zawh lahin "A game neih thar min entir a" a ti mai a, awih lo viau mah ila ka zawt zui ta bik lo.

"Ipa nen in inbe tawh em?" ka ti ta zawk a, ka patea ka ti duh lo. Ka pa nen unau diktak ni lo mah sela ka bialpa pa ka patea ti a sawi chu nuam ka ti lo.

"Inbe tho a, kan inbe tam lo. Ka pawisa mamawh zat min zawt a chuzawng chu a ni mai" 

"Kan chungchang hi sawi a nei hrim hrim em?" ti a ka zawh leh chuan ka malchung a ka kut dah khawih pahin lu a thing a, ţawngka a min chhan theih loh chuan zep a nei ţhin tlangpui. Anu hnen aţangin hriat a nei nual tawh ang a, zawh chin a nei dawn hrim hrim. Min hrilh loh chin a nei a ni tih hre tho mah ila "Sawi a neih chuan min hrilh rawh aw" ka ti ta tho. 

Ka phone ah lai nghawr det chu Didiki anih ringin ka la chhuak a, Muankima message a lo awm vang. Kei aiin Dinpuia a che rang zawk a, ka en hma hmain phone min chhuh sak. Muankima message lo awm chu amah zawkin a hawng a, [A ngaiah ka lo nghak leh ang che, i xerox sa kha keimah lo hmuh tir vak vak suh aw] tih hi a rawn thawn a, hi deuh deuh a kan inbiakna a lo awm ve nual nen a nuam lo duh angreng. A delete nghal daih a, engmah a sawi zui lo. A ruih lai ni hlauh se la chu thinrimna a zawng ngei ang a, tunah pawh lungawi vak hmel loh kan thlalak a dawnna a la rei lo bawk nen. Kan piah lawk choka a ka nau a awm ve reng vang a sawi zui lo mai mai te pawh a ni zawk maithei. Ka hmuh loh tur a kengin ka phone bawk chu a la khawih a, ka sawisel duh bik lo. A en ve fo a, a pawi tur chin chu a ti ngai bik lo. 

A haw tur ka thlah a pawn a kan awm hnuah chauh min pe let a, tunlai chu a thinrim khat na a thil mak deuh deuh hria in a tawng reng a, amah hrim hrim hi a nguai. Kawngkharpui pawh tur hian step tawi te a awm a, chutah chuan kan inzui thla a, step tawp a thlen tawh hnuah pawh keichu a sangah la dingin ka kut pahnihin a nghawngah ka kuah a.

"Zanah lokal leh la, chhuah ka lo dil ang a duh leh Didiki te inah te kan leng ang a" ka ti a, a ngainat lohzia hrereng mah ila sawi tur a vang em alawm. 

"Ka hman chuan aw, ka lo hrilh leh ang che" a ti ve mai a, ka ban pakhat a dawm chungin a a rawn hawi let a, a nui hmel ka hmuh takah chuan ka thawveng hawk.

"Muankima te inah kan leng zawk dawn mi?" a ti ta ngei reng a, thinrim áwmin a awm chuang lo. 

"I ninawm ka hrilhfiah vek tawh che kha, i awih loh leh i thu thu ni mai" zam duh bik miah lovin ka lo ti ve a, ka ban ka lak thlak hnuah ka kawngah min kuah a, min ngai ve tho tih ka hre thei. 

"Keimah lo i neih ka phal miah lo ania" a ti leh a, he thu hi a sawi ve ziah. A pa diktak a hriat hnuah pawh min thlah a tum lo bur. 

"Ka nei peih teuh lo. Zan a i hman dawn chuan min lo hrilh hma la, chhuanlam tur ka zawng ang a ka lo dil lawk sa ang" ka ti nawn leh a, chhuah an phal theih dan tur a ka rin hrang hrang ka hrilh hnuah ka haw tir thei ve hram. 

Kan kal theih hlauh takin tiin Didiki ka be lawk a, ani pawh a insawn chhuak ţep tawh a, a nutei a hlau vak tawh lo ania nge leng ngei ngei turin min hrilh a, tu mitmei mah veng lo tur a min hrilh tel kher chuan nuih a ti za angreng. Chhuah theih dan tur ngawt ngaihtuah a buai ka ni bawk a Fredy ka hauh theihnghilh daih lehnghal. 

Chutia hlim leh phur tak a ka awm lai chuan ka nu leh pa te an rawn haw a, an hmel a tak run a, nidang angin an rawn inbe lut bawrh bawrh lo. Ka ute pahnihin an pindan lam an pan nghal laiin ka nute chu an ţhu khaw muang a, "Thingpui induh em?" tiin ka lo zawt vat. 

"I patea a lokal dawn a lum kep rawh" ka pa chuan no tehchiam lo hian a ti a, chawp leh chilhin hlauhthawnna ka nei nghal. 

"Eng nge a lo tih dawn?" ka ti hmasa leh te te a, ding uaih tawh mah ila ka la tawi det.

"Va lum tawp la a ni mai. Nakinah kan sawi ho dawn nia" ka nu in a tih leh takah chuan phur lo deuhin ka kal hnu hnu. 

Sawi tawh ang khan ka patea pa leh ka pa pa hi unau an nia, kan inpawh lutuk lo. A hmingin ka patea a ni tih ka hria a chuzawng chu. Ani meuh rawn len a tum chuan Dinpuia nen a kan chungchang bawk a nih ka ring a, engtin pawn min ti se min ţhen a nih loh chuan ţhen ka tum lo bur. A hma hun a eng ve dawn chiah a lungngaihna dangin a zui zel a, a dinhmunah hian ka indah chhin ţhin a, tawrh dam a tum ţhin dan te hi dem loh chang ka ngah. 

Rilru tih thawven nan Didiki biak ka tum a, a number a lo awm tawh miah lo. Kan inbiakna zawng zawng nen lam a bo vek takah chuan Dinpuia khan a delete anih ka ring hmiah a, Muankima phei chu a lo block hmak. Rilru hah ru viau e ti lo chuan ka han nui leh rih a, a che naupangchhia ve thei ngawt mai. 

Thingpui no3 chawiin ţhutkhawmna pindanah ka lut leh a, ka hmuh hreh ber ka patea a lo awm vang tawh. A hmel a rum sa bawk nen lungawi lohna a nei tih a hriat a, hmuh a nuam lovin a hlauhawm lek lek. Thingpui ka pek hnu a kalsawn mai ka tum chu ka pain "Ţhu rawh" a ti bul hmuk a, kal luih ngamna chi a ni lo. Muangchangin hreh tak chungin ka ţhu thla ta riai riai a.

"Hman aţang tawhin Dinpuia thlah tur hian ka ti ngun lutuk che. I nin khawpin hun remchang a awm apiangin ka sawi a, luhlul i chhuah lui tlat a, i patea fapa a lo ni lehzel a, miin hre ta se engtia tih nge i tum? I zak dawn miah lo em ni?" tiin ka nu in bul a ţan a, ka thinphu a rang kher mai. Ka patea chuan a lo hrilh ta ngei anih dawn hi. 

"Nu leh paten 'kan duh lo' kan tih reng tawh chuan mi ţha an ni lo a ni mai. I patea fapa mah ni se a nundan kan hai lo ţheuh. I nu in a sawi hlekin i hnial pung pung a, i thinrim zawk mah a, naupang te ila ni chung a i ngaihzawng chungchang chhungkua a sawi ho a ngai te hi zahna chang hriat a ţha" ka pa in a lo tih zawm zat. Ka kutţang sehin ka ngawi reng a, hrehawm ka ti lutuk chu ka ţah a chhuak rum rum.

"Hauh che tum a rawnkal ka ni miah lo a nia Kimkim, Dinpuia nu in i chhungte hnen a hrilh turin min ti a, ka fapa a ni tih i hriat khan i thlah zawm mai a ring a in la inthlah si lo, a mangangin hetianga ti tur hian min nawr a, inu leh pa te ka be ta a ni" ka nu leh pa te ai mah a awki nemin ka patea chuan a rawnkal chhan min hrilhfiah a, Dinpuia nu a inrawlh ve ka lo ring lo hrim hrim. 

"I hria maw chu Dinpuia nu pawhin in inthlah hmak a duh ber anih chu. Thlah tawp la kan hau reng lo che ang a, tun ai hian kan khirh lo zawk bawk ang. I la naupang a Dinpuia ai ţha tawn lehna hun ila ngah lutuk. Ani chauh hi mipa a awm lova, amah aia ţha tak tak an tam. Hmaichhana hrilh kher a ngai lo, phone a awm tawh a, phone in hrilh la hmu leh tawh suh" ka nu bawk a ni. Hmeichhia anihna ang a min hriatthiamna pakhatmah a nei lo. Min hrethiam lo ber tu a ni ţhin zawk hial ang. A sawi peih lutuk vang hian a nia ka pa te pawn misual hmuh a an hmuh vek. 

"Amah a awm hran eizawnna bul ţan ve a duh a, ka fapa a nihna angin ka ngaihtuah lo thei lo a, a tan a ka pawisa lo khawl ve rauh rauh ţhin te kha pek chhuah nual ka tum. Mahse ka hnen a lokal lo turin ka hrilh a, a naupanlaiin a nu in kan hnen a awm a phal si lo va kan nu a hel ve tlat tawh. Dinpuia lak luh mai ka duhthu ka sawi hlekin a ţeu hlar zel a, hmanni lawkah khan Dinpuia hnenah tlang takin ka hrilh a" a tih takah chuan ngui zet a a lokal zan kha ka ngaihtuah chhuak a, engmah min hrilh lo mahse nat rukna a nei tih ka hriat ruk zan kha, a pahrawnin a enhran tawh tehlul nen a pa diktakin a hnar bawk a, tupawh ni ila kan rilru a na vek ang. 

"A naupanlaiin Hlimi'n awmpui a duh maw?" tiin ka nuin a lo zawt thuai a, (Hlimi a tih hi ka patea nupui a ni)

"Duh e 'kan lo awmpui ang e' kan tia, a nu in a phal tlat lo va, tunah lah Hlimi a hel ve tlat tawh si. A nu hnen a a awm thei tawh lo anih chuan awmna tur a dap chawp mai a ngai dawn a, mipa a ni bawk a a inngaihtuah thei mai ang" a ti a, a naupanlai aţangin a awmpui lo bawk a a enliam thei khawp mai. A chang chuan keimah chiah hi hmangaih tak tak tu a nei ni ten ka hre ţhin. 

"Anu paw'n a ngaihtuahsak thei ang chu. Nitin an chhang siam tam tham tak tak an hralh chhuak chur chur reng a, a fapa awmna tur mai maite chu ngaihtuah theih awm tak. A pasal berin a ngaithei lo anih te chuan hman hmanah khan awm hran tir daih tawh tur alawm. Puitling tur chi anih chuan a puitlin phah ang a, a nih lem loh chuan tun ang hian a ho reng ang a" ka nu in a lo ti veleh a, an hmudik lo laklawh tawh a, engtinpawn awm se sawiselna tur an hre reng zel ang. 

"Kha lam kha chu an kutah dah ila, Kimkim a theih hram chuan thlah vang vang i tum dawn nia. Kan hnenah awm lo mahse ka fapa a nihna a bo chuang lo a" ka Patea'n a tih chuan ka lo ngei ru khawp mai. Ka fapa a ti reng a, a inchhungah ngei pawh a la lut thei tawp si lo. Fa dang an nei lo va, Dinpuia tan pawh a nawm ve dawn teh lul nen. 

"Theih chuan tih a ngai lo a thei tur a ni ringawt. Tih theih loh tak tak a awm lo, ngaihzawng te chu an nei a an ţhen a an nei leh a, khatiang mai mai kha lawm. Mahni tan a ţha tur ti duh lo khawp a mawl a ni bik nang. A ţhen loh chuan tun ai hian ka khirh lehzual zawk ang. Kan nem lutuk a luhlul a la chhuah mai mai anih hi" ka nu bawk chuan a ti leh hlawih hlawih a, ka awm loh lai a ka chungchang sawi ang mai a ni. 

"Lehkha han zir zel phawt mai la, nakinah mi ţha tak ila tawng mai ang. Lehkhazir chhung hi chuan ngaihven loh rih a pawi miah lo" ka patea chuan a lo ti veleh a, Dinpuia nen a kan chungchang hlir an sawi zawm a, ka pa in ngawih a chuh tawh hnuah pawh ka nu chuan a duh loh zia ngawt a la sawi. Ka ipik zui mup mup a, zan chhuah dil ka tum rilruk te kha ka ţhulh leh ta vek. Dinpuia ka thlah a ni tih chiang tak a an hriat phawt loh chuan chhuah an phal dawn lo chiang sa. 

Ka pindan chhungah ka vei tawn sek a, Dinpuia min lo biak hun ka ngaichang reng. Ka phone ka en sek a, dar 10 lai a rik hnu pawhin min la rawn be lo. Ka patea thil min hrilh zawng zawng leh min lo biak loh thut dan te ka ngaihtuah kual a, ka ngaih a ţha thei thlawt lo. Tihbuai hlau viau mah ila keimah zawkin ka call ta ringawt. Rei lo te a ring chauh tihin min rawn chhang a "Min rawn be miah lo va" ka ti a, a rilru tur awm ang hriatthiam sakin nidang angin ka vin pung pung lo. 

"Ka lo muhil daih a ka harh chiah" ti a min chhan chuan ka awih lo kher mai. Dawt min la hrilh ngai miah lo na a tunhnaiah tak hi chuan ho te a kan ngaih dawt ni tho si min hrilh fo niin ka hria. 

"Kan leng chhuak dawn maw ka tia" ka ti hram a, a theih loh zia ka hrechiang takzet tho. 

"Lehkha i zir duh zawk lo mi?" ti a min zawh chuan ka patea thusawi kha hrechhuak thar lehin "Ipa in a lo bia che em?" tiin ka zawt let a, a reh vang vang hnuah "Be lo e" tih zawngin min chhang.

"I hnenah kan chungchang an sawi a, min thlah tur a an tih che chuan min hrilh ve ţhin la, thu dengkhawng tak tak pawh lo sawi se ngaihthlak ka inhuam vek. Nangmah chiahin tuar reng bik lo la, min hrilh zel chuan kan pahnihin tih dan kan zawng ang a, pumpelh dan te kan hre maithei asin" ka ti ta ringawt a, ka nu leh pa te thusawi erawh kha chu hrilh ka tum lo. Kei takngial chuan natna leh rilru hahna pe ve lo ila ka duh. Mipa anih vang hian na thei lo a ni bik lo va, hmeichhia ang thoin a thil tawn zawng zawng hian thuk deuhah a hliam ve thei tlat a ni. 

"Bul ka ţan ve phawt ang a, hma ka sawn phawt chuan pumpelh dan ka hre thei ang. Tunah rih chuan inhmuh tam loh a pawi lo" a thusawi ngaithla reng chungin chair pawt hnaiin tukverh bulah ka ţhu a, guitar nen a Timothy ţhu ve reng ka hmu a, min lo nuih laiin kei chuan lu ka thing. Timothy leh Dinpuia ka chhan letna ve ve a ni. 

"Inu in min hmu tam lo turin a hrilh che em ni?" ka ti a, ka patea sawihmangah khan a nu in a rukin kan inhmuh tam loh a lo duh ru reng a nih hmel. 

"Hrilh lo e..ka buai dawn ka tih kha i la hria em? Hmanah ka hrilh lawk tawh che kha. Tikhan lehkha ţha deuhin lo zir la, mipa dang lo ngaihven lo la, in thar a ka insuan luh hnuah leh eizawnna bul ka ţan theih hunah keimah zawkin ka rawn hmu ang che" a ti a, hetiang zawng hian thil a la sawi ngai lo. Inhmuh loh a inţhen ka sawiin a thinrim ziah a, a ruih ngat phei chuan a chhia zawng zawng ka chan vek a ni ţhin. Thinrim miah lo a inhmuh loh vang vang tih vel a sawi chuan thil thleng a awm a nih ka ring hmiah. Ho viau se chuan a nawr liam leh mai ang a, a buaina tawh hi a lian tham anih ka ring.

"Min hmu zing zawk la ka pui ve thei che ang a, kan ti dun vek ang a, kan tuar dun ang a, mahni tawp a tawrh ai chuan a zia zawk daih ang chu" ka ti lehzel a, mahse engmah a sawi ve tawh lo. A reh vung vung ringawt.

"Ka ţawng i hre thei em?" ka tih vak vak hnuah "Ka sawi ang khan awm rih rawh" a rawn ti leh tawp a, eng chiah nge thleng hriat chian ka chak lehzual. 

"Tlaiah pawh khan ţha deuhin kan inthlah liam a, ka buai dawn itih hnuah lah hun insiamin ka class bang min rawn lam thei bawk a, zan a lenchhuah dun thlengin kan remti vek a, ngati nge inhmuh loh i duh deuh thut?" ti a ka zawh mawlh mawlh hnu chuan phone a ti tawp a, ka call nawn leh ngat. A pick duh tawh lo va, a switch off zui nghe nghe. Ka beidawng duh chuang hauh lo, thil thleng a awm tih chiang takin ka hria a, hriat ve dan ka zawng khawp ang ka ti rilru a, ka patea te vang a nih ngat phei chuan ka patea hmu turin ka kal hreh miah lo. Kan inkarah hian sawi theih an nei lo va, kan duh hunah kan inthlah ang a, kan inthlah theih loh leh kan inkawp zui zel ang a, Dinpuia nen a kan thu thu a ni. Duhthlanna siam thiam rual kan ni tawh a, an duh duh a an kaih kawih mai mai tur kan ni lo. 

[A ţha vek em] Timothy-a message a ni. Chhang let kher lovin a tukverh lam hawiin lu ka thing leh tawp a, bang nghengin mit ka chhing a, rei vak lo hnuah Timothy-a zai ri ka hria. Pathian hla a sak ve tehmial vangin meng chuang lovin ka nui sak a, ka hun hman zel dan tur ngaihtuah pah rauh rauh chungin a zai chu ka ngaithla a, Dinpuia a beidawng anih pawhin keichu ka beidawng ve miah lovang. 

CONT...