THROUGH THICK AND THIN-9

THROUGH THICK AND THIN-9

DIDIKI

An lam suau suau a, an rui hlawm bawk a a ţhen an bu nghawng nghawng. Inhre ngai miah lo te pawh reitak inhre tawh ang maia inpawhin an inkawm a, ruih lai na na na chuan a nuam a ni. Mahse engtia rei nge a daih ang? 

"Thutak run zel bik lo la, i duh duh kawm la, mipa an nih phei chuan an lo be ţha thei hlawm ngawt ang che" ka beng bulah Lapuii a au lang lang a, ka kal tawh miah lo ang ka ti na a in a awm a mahni khum a ngaihtuahna kawm melh melh aia a nawm zawk ka ring tlat a ni. 

"Mipa ka be chak hran lo. Zu tlem in hnu a an chevel lo thlir hi a nuam ber" ka ti a, thawm dang a tam a, ka au ve lung lung lo bawk nen a hre pha kher lovang. A rui em a ka chhan letna a ngaihven vak lo hrim hrim. 

Kan piah lawk a mipa rual ţhukhawm chu an ţhianpa ni awm takin eng emaw a rawn hrilh hnu chuan an tlan chhuak dial a, "Eng nge niang le?" ngaihţha vak lo chung a ka tih laiin Lapuii chuan "An thil a bo aniang" a ti liam satliah mai. 

Ka thil inlai dahin ka chhuak ve chhin a, midang an chhuah leh pheuh pheuh hnuah chiah a ni. An lo awmkhawm luih a, thawm pawh a ţha hle. Ka hnaih ber a hmeichhe ding hnenah chuan "Eng nge thleng a?" ka ti ta tawp a. 

"An insual luih luih a, an ţhelh tawh" ti a min hrilh hnuah biak bik pawh nei lo hian "Lalbuatsaiha hi chu buaina siam turin a lokal ve ziah. Tu nge maw sawm ve ziah ni" a ti bawrh bawrh a, an la bawr khawm luih naah chuan ka hnar chin hnuailam ka kut a hup chungin ka kal phei ve a, mipa rual ţhah an ni. Hmeichhia an awm pheuh pheuh na a tumah an awm hnai hran lo. 

"Saw pa saw" tiin zawitein ka phun sep a, an zingah chuan beisei loh lutukin Dinpuia a tel ve. Mak ka tih lutuk vangin tih hmasak ber tur ka hre lo va, Kimkimi hnen aţangin zan chhuah a chin vak tawh loh thu ka hre bawk nen, buainaa a tel ve phei chu ka ring lo hrim hrim. Rei tak ka lo hre ve tawh a, insual buai naa a tel ka la hre lo. Tih mai tur hre lo va ka din reng laiin Dinpuia zawk chuan a kawng dal tu te nam kiangin a inthiarfihlim a, rang zetin a kalna lamah ka kal ve nghal. A rui hle tih a hriat a, mu leh mal a nei pawn ka hre lo. 

Ţhutna remchang a hmuh veleh a ţhu hnawk a, a ţhutna hmun hi engin a la chhun pha vek. Amah chiah a a awm tur ka ngaihtuah deuh vangin inthlahrung tak chungin a piah deuhah muangchangin ka ţhu thla ve. Min lo en chungin a hmui aţanga thisen chhuak ser ser chu a kutphah hnunglamin dim vak lo hian a hru a, min hmuchiang thei chiah lo aniang min enchian tumin a rawn hnai a, a mit ti zimin min melh khai mai. Kan inhnaih tak viauah chuan tlemin ka tawlh hnung leh deuh a, hlauh vang nge zam lutuk vang pawh hriat loh hian ka thin a phu dup dup a, thawm dang awm miah lo se la chuan ka thinphu ri chu a hrethei hial maithei. 

"Min umzui lehpek em ni?" ti supin ngeiawm zetin a nui zui a, mahse ka thil tih zawng zawng ka ngaihtuahin ka haw ngam lo. Keimah vang a hetianga awm hi a lo ni maithei asin. 

"Lapuii nen kan kal ve a, an tlanchhuak sup sup sia diklo a awm anih ringin ka lo chhuak ve a, hmuh che ka beisei lo hrim hrim" ka ti a, ka insawithiam nghal zat zat. A mitko aţanga thisen tlem luangthla ka hmuh chuan ka hlauhthawn lutuk na lamah ka inrin hma hauhin ka ţhut hnaih a, "Thisen a luang ania, a kal thuk aniang hei thisen a lo luang" ti chul chungin ka jacket hak hmawr lamin ka hup bet. Thisen tam tham tak hi ka hmu thei lo va, thisuk ka neih vang hian thisen hi chu hmuh loh hram ka duh ţhin. Min lo nam kiangin puih a ngaih loh thu sawi mah sela ka hlauthawng a, thisen chhuak tam lo mahse eng emaw pawi palh a awm ka hlau a ni. A jacket banin amahin a hru a, a kak lai a hruk chuan a na a ni tih hriat zetin a ner suk, mu leh mal pawh nei lo va Dinpuia ka hmu chu ka lainat veleh chhawng. 

"In inţhen em ni?" tiin ngaih ţha lo deuh chungin ka zawt a, chhanna ka beisei lem lo. Thisen luan thlakna hnu ni a a rin a hruk mawlh mawlh lai chuan hmeichhe pakhatin a rawn ko a, a jacket phelh pahin a hawi let zawk a, a ngaihven zui lem lo. Chu nu chu kan ţhutna lam panin a rawnkal hmawk hmawk a, a hmelţhain a sang ţha zeih zawih hle. A kal chak bawk a a rawn thleng thuai a, kalsawn nachang hre lo mah ila ka tawlh hla sawk sawk. 

"Ka zawng nasa lutuk che. Helai daih daihah eng nge i tih a? Buatsaiha awmna hi chu a buai vek zel a, kan haw daih dawn sia" Dinpuia hmai hruksak pah hian a phun hlak hlak a, nam sawn ve em lo mahse a banrek a vuanin a kut a dahthlaksak ve ta tho.

"Damdawi kan hnawih vat loh chuan a pun ang a, a na tial tial mai ang" a ti leh a, min hmu lo nge min hmu lo der ka hre lo va, awm ve lo ang mai ka ni thung. 

A ngaihtuah em vanga a mitko vel a endik sak leh lai chuan lo thle sawnin "A dam mai ang" a ti hluk a, hmuchiang thei tawh lo mah ila a ninzia ka hre chiang viau. 

"Ngati nge Buatsaiha tih thinrim theih a i awm thut reng reng? Zan dangah lem engahmah ngai lovin i ngawihsan mai mai thei a, ţawng thei si, chapo bawk si a nia, a zia kan hrechiang vek a, a tih thinrim zawh loh turin awm leh zawk rawh" a ti leh bawrh bawrh a, an bul a awm reng nuam ka tih loh vangin fimkhur deuhin ka tho ţham ţham a, Lapuii zawng turin ka kal ta zawk a. An thla ka la lo va, chhaih buai tumna ka nei tawh lo. An inkarah eng emaw thleng a awm ringin ka ngaihtuah em em zawk. 

Thawm bengchheng tak hnuai a rilru nuam lo ţeuh a awm chu a ninawm hma bik. Haw na tur dang ka neih loh vangin Lapuii duh lo chung ka hruai haw lui a, kan thlen hma zawng a phun tluan zak. A ruih loh hunah a thinrim a reh leh vek dawn tho a ka ngai thutak vak duh lo. 

Midang tih harh hlau zetin ka lut a, Lalawma nen kan intawh palh emaw ka thawm a lo hriat palh hlauin ka inbual nghal ngam lo va, ka inthlak zawh veleh khumah ţhuin Kimkimi ka call. A mut a hun daih tawh tih hre mah ila ngaihţhat lohna ka nei tlat a, a ţhat leh ţhat loh hriatchian tum a bia ka ni. 

"Hello" zuai raih a a rawn tih chuan "Ehe..ila muhil na nge? Ka rawn kaitho zawk che mi?" tiin ka zawt nghal vat. 

"Ka la muhil lo rawn biak che ka tum a mahse i mutthilh tawh ka lo ring zawk a" a rawn tih takah chuan ka inthlahrunna a nep deuh. 

"I mut a chhuak lo mi? I mut hma theih tehreng nen" ka tih leh lai chuan a nui ri ka hre pha a, ka lo khi ve suk.

"Ka rilru hah lutuk a ka muhil thei lo, Dinpuia ka be tlang thei bawk si lo va, tihian keimah chiahin ka meng char char" a rawn ti a, Dinpuia tih buai tum a ka hmanhlel lai te khan heti hian hrehawm a lo tuar ţhin tho angem le? 

"Intih thiam lohna in nei em ni?" 

"Kan pahnih chuan nei lo ve, ka nu leh pa te an khirh zual a, Dinpuia hian tlawmah a la ve deuh tawh a ni maithei, min be duh tawh lo va" a ti chuai raih a, rilru ţha apiang hi an rilru a na ngun bik emaw tih mai tur a ni. Nu leh pa ţhenkhat lah hi an neih tur ni miah si lo ah hian an inrawlh peih zek a. 

"Naktuk class banah Dinpuia chu ka hmuhpui ang che aw. A be duh lo che anih pawhin an inah kan kal tawp dawn nia" ka ti a, ka thil tih kha ka zakin an hriat chhuah ka hlau ngawih ngawih a, keimah vangin vawi tam tak a lo na tawh bawk nen, tun ţum an buaina hi keimah vang ni kher lo mah sela siamţhat pui tu tal nih ka duh. Ţhian chu phiar ru tu ni lovin englai pawh a ţanpuitu a ni zawk tur a ni. 

"Min biak duh loh miau chuan an inah pawh kal ila min be ţha chuang lovang. Dinpuia zia chu i hrevek a, a luhlul em hi" beidawng zet hian a rawn ti leh a, phone aţang ngat phei chuan inhnem a har ţhin si. Rilru nat lai phei chuan hnem kan tum a, an na zual tulh tulh emaw tih mai tur a ni ţhin. 

"Tihdan ka lo ngaihtuah ang. Naktukah kal hmasa zawk zawk innghak ila tihdan tur kan rel dun dawn nia" ka ti ta ringawt. 

"Min biak duh loh lai tak hi ka tan chuan ţhenna hun ţha a nia, mahse kan inbiak loh hi chuan ka ngai tlat zel. Ka thaw a pik ngawih ngawih" a ti a, ţhen lo tur a hrilhin rei tak kan inbia a, theih tawp a ka puih tur thu ka hrilh ve mawlh mawlh.

Kan inbiak zawh hnuah Timothy ka call ve thung a, min rawn biak a tum ngun lutuk tawh. 

"Kimkimi nen kan inbia a" ka ti dek dek a, "Thil dik lo iti leh em?" tiin min zawt nghal. Ka dem hran lo ka thil tih ţhin zawng zawng a hre vek zel a, min ngai chhe deuh mahse a awm ve tho. 

"Ti tawh bik nang. Ngati nge min rawn biak itum ve tehmial a?" ka ti a, a hranpa a kan inbiak lohna a rei lutuk tawh. 

"Ka ngai deuh mai mai che" a ti a, min ngaih khat tawh tehreng nen. 

"Ka thil tih vang khan min huat viau ka lo ring a, min la ngai tho maw?" 

"I thil tih kha a dik lo a, eng rilru pu a ti nge inih ka hre lo. Itih zawm tawh lo va i ngaihawm leh tawh" a ti a, ka lo nui hak. 

"I over vel emai. Min ngai leh tawh a, over viau mah la min huat lai ai khan a nuam daih zawk" ka ti veleh a, tlemin ka la rui deuh bawk a ţawng a kal par par khawp mai. 

"Hrehawm ti awm ang a i awm lai ka va hre lo ve" 

"Aww..keichu ka chapo em hi. Hrehawm ka ti lutuk a, pawi ti lo awm ang takin awm mah ila pawi ka ti ve takzet. Min hua kha engahmah ngai lo angin ka awm a mahse a ruk chuan hrehawm ka ti, delh tu rit deuh ka nei chung khan ka ruak huai zel tho" ka ti a, midang hnen a ka sawi ngam miah loh tur pawh Timothy hnenah chuan ka sawi ngam vek. Thil ho te te sawi mah ila uluk deuhin min ngaihthla tho ţhin. 

"Mahni chiah kan inngaihtuah a, kan natna leh tawrhna kan hriat hlur reng hian midangte tan hrehawmna kan siam sak thei a, ninawm kan ni thei bawk a" a ti charh charh a, min zilh leh tawh dawn e ti rilru in keimahin ka nui vur vur. 

"Kimkimi pindan a la eng em han enchhin teh" ka ti ta daih a, a en nghal ni ngei tur a ni a ri rak rak mai. 

"A thim ve tawh a muhil tawh a ni maithei" a tih laiin "Zanin chu a muhil kher lo vang" ka lo ti thung. A ngaihtuah dawn tih hre mah ila ka thup duh ta lo. An inhrechiangin an in ngaihtuah tawn a, Kimkimi hnen a Timothy ka sawichhiat der lai pawh khan a thlavang a hauh na in a thinrim lek lek anih kha. Timothy nen a kan chungchang erawh tun thlengin kan la hrilh lo. Engkim a tawp vek tawh a, hrilh ngaiah ka ruat tawh lo. 

"Nang angin a rilru a lian ve lo va, i rilru ang kha pu ve se la chuan hma lam a pan ve daih tawh tur" a rawn tih leh lai chuan hmui hnuai lam ka lo ti pawrh a, reilote hnuah ka nui leh tho. 

"Rilru na nih ka zak alawm, mipa vang a ka rilru natna lanchhuah tir ka zak tlat a, nep zawk ang a lan ka duh lo va, na lo angin ka awm tlat zel anih kha. Hma lam ka pan tawh niin i ngai em ni?"

"Ka ngai mai ni lovin ka hria" a ti a, ho mai mai sawi zuiin kan nui dun leh rih ţhin. Kan inkawm ţan tirh lai vel ka hrechhuak rum rum mai. Lalawma ka hlauh zual zan te hian ka mutthilh hma chu phone a dah ngai lo va, hla deuhah a awm tih hre mah ila ka thlamuan phah ve ţhin. 

"Naktuk tuk leh mai hi ka insawn luh ni a ni tawh a, in luahman min tumsak i tum laia phut let nei ang a ka ngai che kha ka ţawng sual palh anih kha" ka ti a, Kimkimi takngial pawh ka tih thinrim ţhelh kha. 

"Tihpalh ti ve mai la" 

"Ka tihpalh miau lo va, ka ţawng sual palh hlauh zawk a. Chaw lo ei ziah ang che aw" 

"Ka ti hek ang che, chaw nghei a ngai palh ang" a ti a, ka nuih a za hle. Diktak chuan ka patea a inhuam bawk a ka thlamuang ve tawh takzet. Bakah nghei palh ta ila a buai ber tur chu Kimkimi leh Timothy te an ni. Duh lo mah ila min puih an tum lui tlat tho ang. 

"I thil chin kha sim tawh rawh, pawisa a hekin khatiang ruih kha mahni intih chhiatna mai mai a ni" thutak deuh zawk hian ka ti a, ka thinrim lai chuan rui mahse ka ngai pawimawh lo lui ţhin. Mahse a chang chuan a rui ka hmuh hian a rukin ka na leh tho zel. Ka phal lo a ni ber. 

"Kan sim rual dawn nia, zan chhuah i sim hun hunah ka sim ve ang" ti a min hrilh chuan awih lo viau mah ila "Tehreng mai keichu vawikhatmah zanah ka chhuak tawh dawn lo va, i sim ve nghal tihna mi?" ka ti a, a ruih nuam a tih vang hrim hrim a zu a nia, awlsam te a a sim ka ring lo. 

"Sim tawh ang ka ni. Ka ti khat tawh a, pawisa ka khawl ve theih tawh vang alawm inluahman tum ka inhuam" a ti a, duat rawn a ni bawk a, ruihna tur lei nan a hmang zel lo anih chuan min pek sak thei khawp ang. Mahse ka chhungten min peksak theih chhung chu midang pur buai lo va awm ka tum. Ka ţhiante pawh ni se in luah man em tum tir chu ka zah zawng tak. 

"I chung a ka thil tih tawh zawng zawng te kha i theihnghilh vek thei tihna em ni? Ka ţhatna tur ngaihtuah a min puih ila inhuam te hi chhut chian chuan mak ka ti ţhin" ka ti a, ka taksa a ruihhlo hnathawh a la reh lo ka tih tawh kha, zan dang zawng aiin ţawng a nuam a, sawi hreh ka nei lo. 

"Theihnghilh thei bik lo e mahse ka ngaidam che a, i tih chhan leh i dinhmun ka hrethiam a, inhuat reng khan awmzia a nei lo bawk a" a ti a, a dan ngaiin a ţawng zawi khawp mai. Thil thleng tawh zawng zawng te kha hre lo ang hmiahin ţhat a chhuah leh thei a, he mihring hi chuan min hmangaih takzet a ni.

"Ţhianţha kan ni leh thei ringawt pawh a lawmawm. Hmanah kha chuan engkim a tawp nghal vek turah ka ngai ţhin a, inhaw reng tawh turah ka indah a, ka sual thiam ve ţhin bawk nen, tisual tu zawk ni siin i rilru natna tur a ţawng fek fek ka ching a, khang ka thil tih zawng zawng te kha ka rilru na thupna atan a ka tih mai mai anih kha. Diktak chuan khatianga ka awm kha hrehawm ka ti takzet a, tun thleng hian ka la inthiam thei lo" ka ti duah a, ka tih ang chiah khan ti ve se la chuan ka ngaidam ve thei kher lo vang. 

"Hun kal tawh anih kha rilru tih hrehawm nan hmang tawh suh. Naktuk class kal a ngai leh dawn sia mutthilh tum tawh rawh. Ka bike a i chuan ve duh tawh dawn chuan ka rawn lam ang che" a ti fiamthu a, nui hak hak chungin min lam ngei ngei turin ka hrilh. 

Kan inbiak zawh meuh chuan a lo tlai tawh hle a, Lalawma takngial pawh a muttui tawh ngawt ang ti rilru chungin towel leh inthlakna ka la a, thlamuang deuhin ka inbual a, thawm ka dim viau thung. Ka inbual zawh hnuah ka sam ka ti ro leh te te a ka mu ve thei chauh. Mu tlai viau mah ila rawngbawl turin hma takah ka tho leh tho a, ka thawh phat aţangin ka nutein min lo ankhum leh hliam hliam tawh. 

"Vawiinah rawn haw hma la pack tur ang ang pack vek rawh. Tuman kan pui hman dawn lo che a naktukah i che buai lutuk ang. Lak hmaih leh theihnghilh te kha i nei ang e i rawnkal reng a ngai dawn a, chawhmeh a hautak si, in luahman nen phei chuan engtia tih nge intum ni, inu vawikhat a rawnkal dek dek a, sual ber ang mai a min chhuahin a la chhuak nghal rum rum che a, kum kha leh chen kan lo awmpui tawh naah che khan lawmna pakhatmah a nei lo" a ti hlawk hlawk a, ka nu a sawi tel kher kher chu ngaithei bik lovin "Lawmthu a hrilh mawlh mawlh che kha. Keichu engtin pawn min ti la pawi ka ti lo. Min hauin min ankhum bawrh bawrh mahla ka ngawi liam mai mai thei. Ka nu hian vawikhatmah a sawichhe ngai lo zawk che a, ka nu berkher chu a chhe zawngin sawi reng reng suh" ka ti ve a, min zah lo ti zawngin a ţawng leh chiam a, ka nu leh pa te a sawi tel ta lo bawk a ngawi zawkah ka ţang. 

Chaw ei khamah ka insiam sawk sawk a, Timothy-an kan inbul lawk a a awm tawh thu a rawn sawi chuan darthlalang hmaah ding leh zawkin ka sam ka siam ţha a, hmanhmawh deuhin ka tlanchhuak zui nghal. 

"Guitar i keng lo ve teh tlat a, hunawl ah Afela nen in zai rat rat thei dawn lo ni maw?" ka ti a, Afela hi zai nuam ti a nia, hla maksak pui pui phuah a ching hle. 

"Afela phun kan ngaithla tawh mai aniang chu. Iva nalh ve" a ti ve ngei. 

"Kimkimi min leisak anih hi, ka hriat miah lohin a lo lei a, min pe deuh thut" ti zat zat chungin ka lawn kai a, min phurh lohna chin pawh ka hre tawh lo. Min rawn lam a tumin ka duh ngai lo va, min thlah a tumin ka hnial ziah bawk. Kan inkar a thil thleng khan nasa takin min inhuat tir a, Timothy a fel hlauh a ţhian kan ni zui leh thei mai. Mahse ka luhlulna bawkin kan inpawh leh theihna tur a dal tlat a, kan inhuat hma lawk kha kan inphurh tawpna ber a ni.

"I insawn hun tur hi a fuh khawp mai. Kimkimi rilru i pawt peng thei dawn chiah chiah a, tukinah a nu nen kan inhmu a, a sawi loh chuan Dinpuia chanchin sawipui suh aw" tiin min hrilh lawk a, ka ngaihven lai tak a lo ni bawk nen "A nu chuan eng nge a hrilh che?" ka lo ti thuai. 

"A sawi tam lo inţhen thei se an duh a" a ti na a zep ţhen a nei tih ka hre ru ran. Dinpuia hmuh pui ka tum lai tak a lo ni ve kher bawk nen, Kimkimi nen a kan thil tih tum ka lo ruahman lawk sa diam chu ka hrilh ta bik lo. 

Sawmtea leh Lawmkima te kan hmu hmasa ber a, inhau reng ţhin kan ni bawk a ti ila keiman ka hau ţhin a ni mah zawk. Timothy nen ti ti bawrh bawrh chung a kan kal dun min hmuh chuan sawichhuak lo mahse an hmelah mak tihna a langchhuak a, Timothy kuah pahin Lawmkima'n "Khawnge i guitar?" tiin a lo zawt nghal chat.

"Ka hralh daih" a ti awlsam et a, an awih loh hmel kher mai. Sawmtea zawk chuan "Vawiin chu Afela'n a pawm nileng dawn che ni maw?" nui hak hak chung hian a ti a, Lawmkima inrawlh ve vatin "In sa inţhat hleih sia duh ngat se la chu a kokichhuan ni leng thei ang che" a lo ti ve zat. Midang an rawn thlen belh zel a, a tawp berah pawr fapin Kimkimi a rawn thleng ve thei hram. 

A dam leh dam loh an lo zawt sap sap a, a ţhat thuin chhang mah se la Dinpuia thiam lohah ngaiin a thla an hau nasa mai. Dinpuia zirloh vanga an intih thiam loh chang pawhin thinrim ve viau mahse kan sawichhiat sak chuan a khawngaih leh zel a, a lungawi lohna a sawichhuah vek tawh te kha 'ka ti der anih kha' tih leh daih te a ching. 

"I mit rem rawm te chu i ţap nge mitna hri i kai zawk? Nge balm ah an hnim phum che? Tun nihnih nithum chhung vel chu i dik lo reng reng. Eng thil chiah nge thleng?" Kimkimi khabe a dawm a a sam mam sa vek tuai sak leh thuak thuak pahin Rina chuan zawhna a zawt mawlh mawlh a, a chhan kan hre chak ţheuh a, a chhan hrechiang ber tu a ngawi tlat thung. 

"I sawi loh chuan Dinpuia ka zawt dawn ania, a thiam lo zawk anih leh pawhin zep pui tawh suh. A khawvel nun leh zan a hmeichhia te nen a zu inchhuah te, picnic leh eng eng emaw a hmeichhe dang nen a hmuh dun tur a a awm reng chuan thlah tum mai rawh" Siami chuan a ti ta chiah reng a, zan lam a ka hmuh dan ka hrechhuak zawk a, ka kal ve ţhin a ni tih an hriat miau loh vangin ka sawichhuak duh bik lo. 

"Tun ţum chu a thiam loh a awm lo tak tak. Ka chhungte zir loh zawk alawm, an duh lohna an lantir nasa lutuk a a ning tawh aniang. Biak ka tumin min chhang duh si lo va, keichu min hmuh ang hian ka ţha vek a, Dinpuia ţhat leh ţhat loh ka hre lo, ka ngaihtuah takzet" a ti a, a mitmeng a dul raih a, a mu tlem a ni tih hriat takin a mit hnuai a val kalh bawk. A hmui a ro rep a, en mai pawhin a chauh zia a hmuh theih. 

"In hahthlak e khawi khawi emaw aţang hian buaina neuh neuh in nei ve reng mai. Hmeichhe dang anih loh leh zu in tia, a chang leh chhungte in ti thul, naupangtein rilru hah vangin i thi mai tur a sin" ti a Siami a an hlak hlak hnu lawkah nem deuh zawk hian "I thlah thei mai lo em ni?" a ti leh a, kan manganpui ţhin takzet a ni. 

"Dinpuia hi kan huat viau chang pawh hian an chhang siam ka lei tho zel. Chhang dang aiin tui ka ti tlat a" rawn ti tu Afela chu kan melh ţhap a, an inti tau ngun lutuk tawh a ngaiah a nei ve tawh te pawh aniang sawi sual inti ang pawn a awm chuang lo. 

"Ka thlah theih loh vang ni miah lovin tun ţum chu chhungte vang a ni tak tak. Dinpuia chuan an in aţanga insawn chhuah a eizawnna bul ţan te a tum ve a, kan inpui tawn zel ang a kan tia kan sawi dun nasa mahse rin loh deuhin thil a thleng thut a, Dinpuia hi inrin ai daihin a khawngaihthlak" a ti a, a ţap lek lek tawh. Tihngaihna hre ve vak lo mipa ho an hawi an hawi a, Siami nen a kan mangang chu a rukin kan inmelh leh ringawt ţhin. 

"Chutianga chhungte an hal tlat dawn anih chuan i rai ve mai dawn mi?" Rina chuan a ti a, ka lo chek tlak. 

"Dinpuia berin a biak duh loh te chuan engtin nge rai se i tih? Tui hna ber a tawp tlat chu" Siami chuan vin zet hian a lo ti a,  an uang miah lo lehnghal. Sawmtea leh Lawmkima te nui put put lai chu ka melh hrawk a, hnunglam an hawi rang hle. 

"Buaithlak e ka ning, sawr chhuah a thlawr luh mai theih te ni se ţha tur. Miin 'insiamţhat a hmasawn zel ka tum e' an tih hnu pawh a enchhin tum miah lo va an duh lo lui tlat anih chuan chhungte zawk runluih nan hian rai pawp mai tur a nia, tih tlak tir an tum phet leh mahni leh mahni kohhranah in report thak mai tur. Tu nu leh pa mahin an tih tlak luih tir theih loh. Engtin nge kan tih ang aw Dinpuia chu a hnual leh mai ang tih te pawh a hlauhawm" Rina bawk chuan a ti leh a, nuihza insum tih hriat tak hian sin te in a rawn ri leh ret ţhin. Sawmtea leh Lawmkima te bawk ka en leh a, min hnungchhawn zawngin an awm na a an taksa chet dan hmangah an nuih a za hle tih a hriat. Nuihchhuah hawk hawk chak siin an ngam chiah bik lo va, sin deuhin a rawn ri leh ţhin. An thurawn pek dan a mawl mang thei bawk em a ni. Ka nuih a za ve hauh lo na a mipa ho nuihza chu awm lo ka ti lem lo. 

"Nakinah ka la hrilh vek ang che u. Engkim a buaithlak vek rih a, tunah chuan Dinpuia biak ka duh ber" Kimkimi'n a tih chuan a rukin ka mitmei a, zunchhuak chhuanlamin ka hruai hrang a, "Rina leh Siami hi chu an ti tun tun tawh ţhin a, a awlsam thei ang ber tur ni a an rin ngaihtuahin a harsa lai an zuan kan ţhin a, ban hunah haw dun tur angin kan insawi ang a, Dinpuia te inah kan kal dawn nia" ka ti a, hun hrehawm ber ka tawh lai pawh a min kalsan ngai miah lo tu a ni a, engthil pawh lo ti tawh mah ila ka kalsan bik lo ang. Ka thil tih tenawm tak, ka sawichhuah ngam si loh kha, kha ka thil tih rulh let nan tal khan tun a an buaina chinfel pui tur hian theihtawp ka chhuah ngei ngei ang. 

CONT..