NANG CHAUH-1

NANG CHAUH-1

"U Msa'n nupui a nei dawn an tia tak tak em ni? In la inbe ngai em? Kan veng a a awm lohna a rei tawh sia a chanchin i hria em?" zingkar a ka nau thu min hrilh chu ngaihthlak a nuam tehchiam lo. Msa chanchin ngaihven loh ka tum tlat ţhin a, kum tam tak chhung chu a chanchin ka hre tawh lo reng a ni. 

"Ka hre nang kei aiin i hre daih zawk ang chu. Inrinni a ni bawk a ka mu rei ve thei ang chu tih nak laiin thu mak deuh deuh sawi tur ringawtin min rawn kaitho a" ka ti nang nang a, ka puan sin lai a inlukhupin Kimpuii ţhutna lo lam ka hawi a, ka harh chiang tawh hle. 

"Fa an neihna a rei tawh sia an innei har ka ti reng a" a la ti ta tho a, thawh lawk a khum aţanga tlawh thlak tawp mai ka duh hman rum rum. Malsawmkima chanchin a sawi fo a, ka dawn sawn dan tur a ngaihven tehchiam lo. 

"A phatsan ve chiang ngawt mai che. School in kal tawp lam in inţhen hnu a i message ka chhiar ruk kha chuan ka lo nghak reng ang che a ti ve sia. Dawheh zep zuap lutuk mai, nangchu ni ila a fapa hi ka nghak lian ang a ka kherh ngang ngang ang a ka nei daih ang. Chuan an inah ka mo ang a, mo sual rapthlak lutuk nih ka tum tlat bawk ang a" a ti bawrh bawrh a, lehkha a zir peih hlawl loh vangin school a kal rei lo va, cake te siamin a intodelh ţan tho. Thurawn atthlak zet zet min pe cham chi ţhin. 

"Chhuak vat la a ni mai ka muhil leh duh" la inkhuh hlun chungin ka ti vin hlar a, kum30 ka tling ve tawh a, thu ho deuh deuh ngaihthlak hi ka kham riau. Msa nen a inkaihhnawih ngat phei chu. 

"An inneih niah i bialpa Tommy-a helmet full face hawh la, ţap hliam hliam mah la tuman an hre tawp nang. Nih loh pawn an inneihni a cake zai tur siam ka chuh tlat ang a, bomb neih dan ngaihtuah la kan phum dawn nia, thihna tham em nilo an ung phekna tur chauh" a tih mawlh mawlh lai chuan rang zet a inlet thawkin ka tlawh ta ngei a, a tla em lo ve. Ngaihzawng ţhenna lam hla a sa chhuak al al lehnghal a, a kum a naupang lutuk tawh lo asin le. 

Tommy nen hian kum2 lai kan inzui ve tawh. Fiamthu a duhin a bul a awm a nuam a, ka bialpa hlui Msa avanga ka hriat niin kan pathum hian school kan kal ho ţhin. (An school kal lai hi tawi tein ka ziak tel a, Eighteen tih kha a ni e) Rei tak chhung kan inkawm a, kan inngaizawng ve tawp. Msa nen hian pawl12 ka nih laiin kan ni ve ngei a, a fa neihna nu Fiona vang hian kan inţhen. Kum laklawh a a nu in thingtlang a awm tur a a hruai vang kha a ni ber. Pawl12 ka zawh hnuah ka patea te hnenah Shillong ah ka awm daih a, fa annei lo bawk a min duat thei hle. Lehkha ka zir nasa in a ti ţha pawl ka ni zel a, college ka zawh hnuah ka patea bawkin hmun dangah min dah leh a, "I zir ţha duh emai" tiin a inhuam thui hle a, Pathian leh ka patea te nupa zarah tunah hian Associate Professor ni ve tawhin Aizawl a college hriat hlawh tak pakhatah ka thawk mek. Ka nu a hahdam ve tawh a, hnathawk miah lovin kan dah ve thei tawh. Ka nau chiah Kimpuii buaipui vak a ngai tawh lo va, kan te ber Lucy-in a la zir mek. Kan dinhmun a ţha ve tawhin kan duh kan nei ve zel thei tawh a, lehkha kan zir theih nan a theihtawp chhuah ţhin ka pa kha la dam ve se ka ti ţhin. Ka hnathawh te hi hre ve se a lawm thiam leh dawn emai. 

Msa chungchang bawkah lut leh ta ila, naupangte kan nih lai aţanga school khat a lut dun char char ţhin kan ni. Miin min hauhin min chhan a, a chang leh min vel a, a chang leh a thil ei ai te min pe leh ang lawi a. Pawl12 kan nih lai a kan luhna school kha anmahni ta a ni. Min pui nasa ţhin a, ka hriat laia min puih aiin ka hriat loh hlan a ka tan a a thil tih kha a tam zawk ang. A ţhen chu a hnuah ka hre leh a, tun thleng a ka la hriat loh pawh a tam ka ring. Ka kal ve chakna em em, pawisa kan neih loh vang a ka kal ve theih ka rin loh naah te khan Msa vang chauhin ka kal ve thei a, a ruk a pawisa min lo thawh kepin ka hnenah chuan pakhatna ka nih ţhin vanga a thlawn a kal thei angin an sawi. Rei deuh hnuah ka hrechhuak leh chauh. Naupangte anih laiin a nu leh pate an inţhen a, pawl12 kan nih kum khan kum laklawhah a nu in a hnen a awm turin a hruai daih a, khami khuaah khan an Pastor fanu Fiona nen an intawng a, ţhian chauh kan ni tiin min hrilh reng mahse kan inţhen phah tho. Kan inţhen hnuah pawh kan la inbe zui zel a, ka patea te hnen a ka awm hnu thlengin kan inbia. Kan inkar siamţhat kan tum ve viau ţhin na a a dik thei tak tak tawh lo. Fiona a tel ve zel tawh a, mi pahnih chauh lenna bawmah pathum hnawh luih phet a tum a, keiin bawm tawt a awm chu hrehawm ka tiin kan inhnawh len theih tak tak ka ring si lo. Inţhen tawh mah ila kan la inthik tawn reng a, kan inhauin kan inchhal tawn reng a, school naupang kan nih laia ţha deuh a inţhen si kha college kan zawh meuh chuan chhe deuhin kan inchhuah. A reh zui vang vang a, kei lah "Min biak loh chuan ka be dawn bik lo" ti chi ka lo ni ve bawk si, bawm chhungah keimahin thawl deuhin ka awm a, ka zangkhai huai rualin a ruak lai a awm tel. Mahse inlaichinna hrisel lo tak aţanga chhuah zalen kha ka duh ber a, Msa nen a kan awmna ţhin bawm kha chhuahsan velehin Msa tello in bul ka ţan ţha leh ta a ni. 

Zirlaiah insawrbing lehzualin hlawhtlin ngei tumin ka bei a, ţhahnem ka ngai bawk a Pathian malsawmna dawngin ka thawh rah ka seng ve zel. Tommy nen hian hmun khata ka awm loh lai pawhin kan inbe reng a, hunawl ka neih apianga biain thil tam tak kan sawi dun ţhin. Kan inngaizawng ta reng a, a felin min ngaihtuah a, a bul a awm nuam ka tiin ka duh ve viau mahse ka hmangaih leh hmangaih loh ka hre lo. Kum18 mi ka nih lai ang mai kha ka la ni. Tun thleng hian hmangaihna awmzia hi ka la hrethiam lo va, ka hrilhfiah thiam lo. Msa chanchin min sawipui ngai lo va, kei pawhin ka sawi ngai bik lo. Ţhian an ni ţhin a, Msa vang chauh a Tommy nen a inhre ţha kan ni. Kan pahnih tan sawi a nuam lo ve ve. Aizawl a ka awm hnuah a chanchin ka hre ta tho tho a, Fiona nen khan fa neiin an innei tawh an ti a, a ţhenin an cheng dun naa an la innei lo an ti bawk a, fa anneih hnuah pawh Msa hian a zir zawm zel tih te an sawi a, sawi neuh neuh a tamin Kimpuii hnen aţangin ka hre veleh zel. Tunah chuan an school kha a enkawl tawh a, chu chiah chu thu chiang hriat ka nei. 

"I va tho har ve ţhiante nen kan inhmukhawm dawn itia i sawi lawk zuah zuah a ni lawm ni?" choka a ka luh veleh ka nu in zan lam a ka thil sawi a lo sawi nawn leh nghal zat. 

"Nula kum30 pel ţep tawh mut duh hunlai a nia hrethiam ta che nu, a la naupan em hi. Mu tam se la a ţhang vak vak mai ang" Kimpuii'n a lo ti leh pek a, chhang a pack pah mawlh mawlh a, chet nachang hre miah lo ţhin kha a nia a fel ta phian. 

"I ţawng thei sia kei aia i naupanna a tam lo emai" 

"Chuvang tak chuan a nia a la naupang ka tih che" pawisawi loh hmel zet a nui ver ver chung hian a ti leh a, ka chhang peih tawh lo. 

"Nu, tukinah Lucy i be tawh em?" tiin ka zawt ta zawk a, Kimpuii thusawi ngaihthlak ai chuan a hlawk hrim hrim.

"Bia e i pawisa thawn khan mamawh zual tlem ka lei a atia, ani hi chu a kawm sia, i ei duh zawngte lei ve rawh ka ti anih kha. Pawisa hman vak a inthlahrung ţhin a, a ţul zual tak tak lei nan chauh hian a hmang ţhin a" a ti a, Lucy hi chu keimah ang chiah a ni. Lehkha a zir nasa in a inren a, kan rethei rei bawk a ţullo ah pawisa a hmang lo khawp mai. Kimpuii ve thung hi chu a duh leh awh zawng lei tawp tawp chi a ni ve thung a, fridge ah nail polish a awm ruih a, make up lah a hman duh miah loh tur thlengin a awm ruih. A ţhianten dil se a pe zel a, a thawmhnaw thlengin ţhenawmte tlangban a inpho ka hmu ngun. Vei a nei lovin a ţhat ţhat hian a ţha tawp a, inhauh nikhua a lamţang atan a ţha tur chi a ni. Unau zingah hi chuan danglam bik an awm chawk a nia. 

Chaw ei lai pawhin ka nu in Lucy chanchin min la hrilh melh melh a, reilote ah nau doctor kan nei ve mai dawn. Ka beidawn ber lai pawhin khawvel thil a hahdamna zawng lovin Pathian ka bel tlat a, malsawmna ka dawn nasat lehzual phah niin ka hre ţhin.

"Kimpuii inleng lah hi ka duhzawng a ni hauh lo. Kan inchhung a a rawn leng lut ve duh hi a lawmawm viau rualin makpa atan ka duh miah lo a nia, pasal tlak a ni lo" ka nu in a tih chuan rang zet hian "Keipawn ka duh bik lo, min duhpui deuh pa pawh kha ka duh chuang lo" a lo ti zung zung a, kun ngul chungin ka nui tet tet. Hetiang thil an sawi tawh chuan ka inrawlh duh ngai lo. 

"A ţha lawm mawle officer a nia, i neih chuan i nuam sa dawn asin"

"Awiii hmelchhia ro roah pawh a zia deuh hlek an awm ve a, ngaihdam theih chin te. Min duhpui berkher kha chu ka duh thei hlawl lo. A kareh a zau bakah a hmui a lian si, duh tak tak se chu min hmuam thawih thei ang"

"A hmuam duh bik kher nang che" ka nu chuan a la ti ţalh a, a fel em a a duhpui ve a ni. Kei takngial pawn sawiselna tur ka hre lo a fel a ni tawp mai. 

"Pasal neih tumna ka la nei lo. Kan siam nuam sa ve thei chiah che a, ka neihsan rih dawn lo che" Kimpuii chuan a ti ta ngawt a, ka nu in ner nangin "I u hlawh neih hnu aţang phei chuan i chhang siamna man hi ka hmuh tawh lo reng reng" a lo ti daih. An tihziah danin an inhnial leh char char a, ka kham san. An awmdun tamin zankhat lek riak a pakhat zawk a zin pawhin an inngai hman zel a, an awmdun hlekin an inhnial char char zel thung. 

"Ka pasal tur lehzel min thlan sak tum tlat lo la" ti a Kimpuii phun nang nang chu ka hriat tawp ber a ni. 

Ka inbual zawh hnuah vawiin inhmuhkhawm naa hak tur ka enkual a, khumah ka chhawp chhuak rui. Pawl12 kan nih hunlai a ka classmate te nen kum10 chuang a liam hnuah inhmuh khawm lehna neih kan tum a, phur ve tehchiam lo mah ila Tommy-an tih tak zet a min sawm vanga kal ve tum ka ni. 

"Min ko em ni?" ti a min zawt chungin ka pindanah Kimpuii a lo lut a, khum a ka thawmhnaw dah ho chu a melh pah ralh.

"Ka ha kual chhin ang a a nalh ber lo thlang rawh aw" ka ti a, kan inhmuh lohna a rei tawh hlawm a, vawiin bak kan inhmu leh tawh kher lo bawk ang a, chuvang tak chuan nalh deuh a kal ve ka duh a ni. 

"Tehreng mai nalh ka hria lawm" a ti a, a tir a a phur ve tehlul nen ka dahchhuah zawng zawng ka hak hnu pawh a ka duhthusam ka hmuh theih tak lohah chuan a ţhu ngui bur tawh a, a nin hmel takzet. 

"Tun a i hak lai kha a nalh em kha. Duh lo zel lo la" a ti bai bai tawh a, duh dan zet a mu chungin min en a, min ngaihven ţha duh tawh lo.

"Nalh chu ka ti lutuk a, ka dul kiar a ti lang ka tia" muang charh a tih pahin a dang ka khai chhuak leh a, "Hei chiah hi ka ha tawh ang" ka ti zui bawk.  

"I ha chhin hnem tawh e. Ila inherh miah lo kha a mak zawk" a lo ti zeuh a, hmeichhia hi chu kan mak ve khawp. Zanah hak tur ruahman sa vek mah ila kan han inchei meuh chuan kan ha kual leh tho tho zel. Thawmhnaw duhtak a kan lei ho te hi hak dawn tak tak chuan kan duhthusam a lo ni leh lo ţhin a, midang kan pe phal leh chuang der si lo. 

"Awii..a nalh lutuk. I nalh ber dawn anih kha, i inhmeh zia chu kha kha ha ngei ngei rawh. Keipawh kan insu ve tawh ang e" ti zawt zawt chungin a tho a, min tlanchhuah san dawr dawr. Makeup hman hi ka thiam ve lutuk lo va ka hmang khat ve khawp. Chuti chung chuan tlem ka intat ve a, ka inchei zawh vek hnu chuan nalh ka inti ve nasa mai. 

Inhnuai a ka chhuk meuh chuan Tommy a lo awm reng tawh a, upa ve tawh viau e ti lo chuan ka inchei ţhan loh dan tak a ka inchei min hmu chu ka lai lek lek. 

"Kan kal nghal mai dawn mi?" ti a min zawh pahin a sana bun lai a en a, min fak der chiam lo chu ka lawm ru angreng. Ka danglamna erawh a hmuh hmaih ka ring lo. 

"Aw kal ang. Kimpui ka kal a nia aw ka lo haw har lo ang" ka tih chuan nui chungin a ban a vai a, ka chhuah dawnah ding lawk tur a min hrilh leh hnuhnawhin Tommy-a hriat phak loh hian "A lokal ve chuan hmu lo der mai rawh aw. I upat ve tawh kha puitling deuhin hmachhawn ang che" a ti a, a ţawngzawi ve sar sar hle. Chhang lem lovin ka chhuak a, kan inţhen chhan zawng zawng te min zawh reng hnuah ka hrilh ve vek a, kum tam liam tawh mahse min la ngaihtuah em em tho. 

Tawi khawmuang tawh lovin car ah ka lut a, Tommy pawhin ama pualin car a nei ve tawh. Ka hnen a a tiam ang ngeiin chhungte puih nain dawr lian vak lo a hawng ve a, tlem tlemin a ti lian chawp zel a, tunah phei chuan hlawkna a tel nasa tawh. Sawrkar hna sang thawk lo mahse chhungte tibuai miah lovin nuam sa deuhin a awm thei tawh. 

"Khua a duai angreng sia i inha lum lo anih kha" Tommy-an a tih chuan dak chhuak lehin van lam ka thlir leh vel a, ni a lang mang tawh lo. 

"Sur mahse boruak a ti vawt pha leh tak tak chuang lo vang. Inchhungah kan awm reng dawn tho a, vawt ka ti lo turah ngai tawh mai ang" ka lo ti zung zung a, kan inbe zui lo. Kan inhmuh khawmna tur hmun lam pan a kan tlan lai pawhin hmalam enin ka ngawi reng a, diktak chuan Msa hmuh ka huphurh ru ve reng. Thinrimin kan inţhen a, kan inbe zui lo vang vang kha a ni a, ka hmuh hunah eng nge ka sawi ang tih te ka ngaihtuah. Fa a neih zui dan thlengin ka hre lehzel nen haw viau mah ila keini ang rual tan mi zingah lehnghal kan mimal inhuatna tih lan a chi dawn der si lo. Ka ngaihtuahna hria ni awm takin Tommy chuan "Msa leh Hriata an lokal thei lo maithei" a ti a, ka melh zawk a, inthiam lo ru zet chungin hmalam bawk ka en leh. 

"Msa leh Hriata ka ngaihtuah hleinem" ka ti ve tlat a, a awih kher lo vang. 

"Nupui pasal nei an awm nual tawh ang a, tam tak chu ka hai maithei a ni" nui lui chung hian ka ti a, sawi tur dang ka ngaihtuah zui neuh neuh. 

"Ţhenkhat chu ka hmu leh zeuh ţhin a, plastic surgery kan la uar ve lem lo bawk a i hai lo tlang turah ngai ang" a ti fiamthu a, ka lo nui ve mai. 

A chhung a kan luh lai chuan Tommy banah ka kuah a, englai pawh a ka rinchhan, rintlak leh ka rin sual ngai miah loh a ni. Kan hmuh apiang ten min lo lawm thiam em em zel a, ţhian ka kawm tam lo va an hmel ka hai hauh lo na in han pawh lutuk ka nei lo. Chuti chung chuan kan inchibai kual a, rin ai daihin a hlimawm. 

Ka hawikual vel a, hman a intluk tlang tak a awm ţhin, uniform inang vek ha a lungkham nei lo a nui ho dar dar ţhin te kha kan ang tawh lo. En mai pawhin kan danglamna tam tak a lang a, a ţhen nun nuam leh khawsak ţhat hmel fe fe, hna ţha tak a nei tawh ang tih tur an awm laiin nitin a inhlawhfa chawp ve lawp lawp te pawh kan awm ang. Belhchian hma hauh a ngaihdan siam ţhin ka ni lo na a thil tam tak hmuh tlang theih a awm. Thawmhnaw hi kan intehna ber tur a ni lo tih hrechiang ber tu ka ni a, hlawh ţha pangngai tak ka nei chung hian thawmhnaw man to lei ka tim tlat mahse an landan leh khawza ziaah tam tak a hriat ve theih. Inang ţhap a uniform leh zing a kan chawhmeh ang emaw nu ten min siam chawp sak lawp lawp chhun ei atan a kan pai ţhin hunlai kha kan intluktlan hun lai ber a ni. Kan hma lam hun tur hre lawk miah lovin thawveng zetin kan awm a, kan hma hun hmu lawk tu zirtir tu te leh nu leh pa te thusawi awih duh lovin luhlul kan chhuah a, kan runluih a, an thusawi lo dik ţhin zia kan hre chho ve zel thung. Zirlai thiam loh ngah leh zir peih loh te hi intihtheihna leh fiamthuna chi a lo ni miah lo tih kan hrechiang ve zel a, ţhianten 'zir bik suh aw' an tih pawh a zir bik hlawk zia a lang chhuak zel. Zirtirtu ten 'in la inang dawn miah lo a nia, in dinhmun a la inthlau dawn' an tih te khan tam tak chuan an ngai thutak lo va, kum naupang te chiah kan la nih vang khan kan nakin hun kan ngaihtuah phak tak tak lo. Mahse puitling zawk te chuan an lo hmu lawk vek a, hmu lawk lo se la chuan tuman lehkhazir turin min nawr lui reng lovang. School naupang kan nih lai kha lungkham em em neih loh hunlai leh hlim tak a ţhiante nen a hun kan hman theih hunlai mah ni se kan hmalam hun hril tu a lo ni tel reng a, hringnunah hian pawimawh lo lai a lo awm miah lo anih dawn hi. 

"Eng nge ang i tih? Nuam i ti em?" tiin Tommy chuan min zawt a, nui sang chung hian "Nuam lutuk hman a belhchian ka lo tum lo ţhin kha ka inchhir tawh zawk" ka lo ti a. Ani pawh a hlimin a mitmeng fiah tak chu a nung sar a, a lang mawi lehzual.A hmelchhe hran lo va, a mitmeng leh a hnar ngul invuah fu tak hian a chawi hle. Amah aia hmelţha kat nuk mah sela a chhungril ţhatna ka hmu tel tlat a ni. 

"Ţhian siam nan a la tlai hleinem. Kal kual la be bawrh bawrh rawh i rin aiin an fel vek ang" ti a min fuih hnuah ţhian siamna hun min pein a kal hrang a, bul ţan dan tur hre mai lo va ka din reng laiin hnunglam aţanga "Rebecca" ti a min ko ri ka hria a, ka inher rang hle. 

Chutah chiah chuan school ka kal lai a ka ţhiannu ber ni ţhin min phatsan zui ta Puipuii ka hmu a, hun kal tawhah chuan engpawh thleng se school kan kal lai a inrinni leh chawlhni kan chawlh hnu a Puipuii nen kan inhmuh leh a ka hlim ţhin ang chiah khan ka hlim. Tleirawl kan nih lai ang khan inkhuahin au chel chul lo mah ila a kut cher leh thap hruapah chuan ka vuan a, ka chhungril thlengin a lum vung vung thei hialin ka hria. Hmanah kha chuan ka thinlung a thu awm zawng zawng te, ka thuruk zawng zawng nen, ka hlimna leh lungngaihna zawng zawng te nen lam a vaiin ka hrilh vek ţhin a, ka inbunruahna ber ni ţhinin ka lungngaih lai ber pawh a min hnem ţhin tu a ni. Thil ho te vang khan min phatsanin min hre ngai lo ang hmakin awm lo se la chuan tun thlengin ţhianţha kan la ni reng ang. 

"Puipui i dam em? School kan kal tawp ni kha ka hmuh tawpna che a nia. Kawng hran kan zawh hnuah kan inhmu leh hlawl a a mak e, i la danglam miah lo" ka ti chul a, kan tleirawl lai ang mai khan ka naupanna lai a lang chhuak ni berin ka hria. 

"Aw dam ţawk ţawk ti ila ka fate vang chauhin ka dam ti ila a dik zawk ang. Sawipui tur che ka ngah a, mahse i hnung a mi khan kei aiin sawi tur a ngah zawk ang. Hun a la tam tho a nakinah ka rawn pan leh ang che" ti a min hrilh chuan hnunglam bawk ka hawi leh a, rang zetin Puipuii dinna lamah ka hawi let leh. Chakna min pek tum ni awm takin ka kutah a hmer a, zawi zawi a min thlahin hmun dang a pan a, lokal miah lo tur a ka lo dah tawh, ka hmuh chak loh ber nen kan inhmachhawn ta ran mai. 

"Ila danglam lo hle mai Lalthanmawi" min ti a, he pa chiah hian ka hming pum ngatin min ko ţhin. 'A nalh' ti a min hrilh tu tam vak lo mahse hepa hi chuan ka mizo hming hi nalh a ti teh tlat a. 

"Eng ang chiah a danglamin nge min hmuh i lo tum a?" tiin ka zawt a, ka sawi chhuak lo na a a ni pawh a la danglam lo. A palianin school naupang kan nih lai ang khan a cher tawh bik lo va, a taksa a inphut mawi tawk tawh a, a lang lian lehzual. Mizo mipa pangngai satliah leh private school lian vak lo enkawl tu ve mai a ni a, chutiang chuan ka ngai lui tlat ţhin. Mahse hman ang reng khan hmelţha ka la ti tho a, ka mit a dik chiah lo ang a ngaih tum mah ila a har ţhin khawp mai. 

"Raipuar purin emaw naupang intiat deuh deuh 5 vel nen te" ti a min fiam chuan za lo deuh hian ka nui hul hak. Mipa tak hi chu, hriam hrei tel hauh lova min sawisak a min tih nat tawh hnu hi chuan hmeichhia ang pawhin min en tawh lo. An ţhian ngam tlak tak ang hian engahmah min ngai lo ang maiin fiamthu thawh nan min hmang leh zel thei a, an mak takzet. Mipa zawng zawng ka tihna a ni hauh lo a nia. 

"Nang angin fa neih ka hmanhmawh ve tehchiam lo va" ka tih chuan a nui tawi tak tawh. Lehkhazirin ka awm bo rei a, ka hriat a ring kher lo ang. Ka zamna zawng zawngte thupin ka hawi larh a, hmu hreh viau mah ila loh theih loh a ka hmuh takah chuan tlanchhiat mai ka tum bik lo. Min chhan lawk lohah chuan ngeiawm zet a nui chung hian "Sawi tur a va vang awm ve. I ţhiannu em em kha i nupui a lo ni ta mai sia" ka ti a, a tir aţang khan he thil hi a thlen ka ring lawk vek.

"Nupui ka nei lo" ti hluk mah se la a ka awih chhe te lo. Msa hrim hrim hi rinna ka nei tawh lo. 

"Nupui a tan Pastor fanu neihchhun i nei thei a, i nau te ho thleng a awmsak ţhin tu che chu inneih hnu ngat phei chuan a fel viau lo maw?" ka la ti lehzel. Ka sawi tam tial tial a, ka thin a rim tual tual. Ka lo upbeh ţhin zawng zawng kha a hlawm hlawm a rawn inlar sup sup a ang ber. Mi mitmei ven a ngai a, mahni leh mahni inthununin ka tihziah danin ka dang bet leh rih mai mai. Ka chung a a thil tih zawng zawng, a ţha lai tih loh kha chu ngaihdam tlak a awm lo. Ka rinna zawng zawng ka pe vek a, phatsanna bak dawn let ka nei lo. 

"Nupui ka la nei lo" a ti nawn leh a, a mitah tak enkal mah ila dawt min hrilh hreh chuang miah lo. Ka la naupan deuh hlek lai kha chuan movie a ka hmuh ţhin ang chiah a awm kha ka chak ţhin a, 'ka awm loh hlanin engtin paw'n lo awm la, midang lo nei mah la ka ti buai tho tho che ang a, hlim deuhin i awm bik miah lo vang' ka ti ve pang pang zel a, ka thil lo tih tawh te leh sawi tawh te ka ngaihtuah let chang a min ti zak tu ber te zing a mi a ni. Lemchan leh a tak tak in an loh zia ka hre chho zel a, film leh lehkhabu ţhenkhat angin a tak tak thil hi chu hlimna in a tawp kan khar kher lo. 

"Nih leh i nei dawn zawk em ni? Ni dawn tak e, tukin kha chuan nupui nei mai tur ang a i chanchin thang vel ka hre leh si" ka ti leh hluai a, a hmel rum tak phen a lungngaihna inphum ru chu ka hmu lo der. Rei tak chhung ka lo hriat tawhna angin amah ah danglamna chhe te te a awm pawhin ka hre thei a, min hrilh kher lo mahse keimahah hian hriatna a lo awm ve tawp zel. Ka sawifiah thiam chiah lo. 

"An duh duh lo sawi ve mai mai teh se. Eng nge itih tak zel? Hmun khat a awm reng chung hian chanchin a inhriat loh theih khawp a" tiin min zawt ta daih a, thawk ka la hmasa leh te te a, 'engvang a thinrim ngawt nge maw ka nih le? Ka thinrimna takngial pawh a phu tawh lo'. Aw ka then kharh hnuah ka hna chelh mek ka hrilh a, "A ţha khawp alawm. I thawhrimna rah anih chu. Tommy-a a awhawm ta hle mai, nupui ţha tak a la nei dawn che a" hlim hmel pu tak chung hian min fak a, ka hnathawh takngial pawh hre lo hian Tommy nen a kan inlaichin dan a hre leh tho si. 

"Ka vannei daih zawk, pasal ţha deuh ka nei dawn a" ka ti veleh a, Tommy-a dinna lam ka hawi a, Bsa leh Sawmpuia te nen an lo ti ti mek a, ka hmangaih leh hmangaih loh hre hawt lo hian ka nei thei ange maw. 

"Umm..hlim deuhin awm zel rawh. Tommy chu a fel a, i thlang sual lo tawp ang" a ti a, chik zet a ka en laiin min thlah nan ti ni awm takin ka darah a hmer zawk a, a ţhian te a zawm ve leh a. Dawhkan bul a chair pawt tawlhin ka ţhu hnawk a, a chhan ka hriat si loh ka awm a hnawh tu awm tlat bawk si chu tih bo tumin ka thaw hrawk a, tui ka in khawlh khawlh bawk. 

"Oxygen bur pai an awm leh awm loh ka zawn kual sak dawn che em ni?" rawn ti tu chu Lalrinmawia, school naupang ka nih chhung zawng a min chhaih buai ţhin tu a ni. Kan naupan zual laiin min vel ţhin a, kan upat hret hnuah min fiam thung. Ka ep chiahah ţhu ve in nui vur vur chungin min en ran a, a ha a la kuh viau tho na a a landan a pangai tawh khawp mai. 

"Mahni pawh inhap buan buan duh tur khawp a thinchhe ţhin si min va hau lo ve" a tih chuan tawi te in ka lo nui a, Msa leh Tommy te dinna lam a melh a, thil awmzia a hriat nghal vek ka ring. Kawng hran ţheuh kan zawh hnua Tommy-a hnaih tu ber a ni a, Msa nen a an la inpawh leh pawh loh erawh ka hre ve hran lo. 

"A fapa in mi a ang pha lo va, hmeichhia zawkin a luhkhung ngei a, neih tumna a la nei rih lo. Theihnghilh theih loh a la nei a ni maithei. Mahse hmeichhia chu ni ila hmangaih tu leh nei duh tu ka neih tho chuan mi pa neih aiin min hmangaih tu neih ka thlang zawk ang" awmze nei deuh hian a ti a, hmanah khan hmeichhe ho in an pawisa pai tlem te te thawh khawmin a hnenah hian an pe a, ţawngkam thiam tih takah thurawn a lo pe ţhin. Kha thil kha a la bansan lo niin a lang. A thusawi chu nuih liam pui mai mai mah ila dik ka ti ru viau thung. 

CONT...(An hun hmasa ka hrilhfiah vek tho vangin he thawnthu hrethiam tur hian thawnthu hmasa zawk Eighteen tih kha chhiar kher a ngai lo va, a hre duh tan erawh chhiar turin a awm reng tho e)