NANG CHAUH-10

NANG CHAUH-10

FIONA

"Bawihtea hi i kalsan ang maw?" tiin Msa chuan min lo zawt thuai. Ka thu hrilh ho vang a mak a tihna a thup hleithei bik lo. Hetiang thil tih hi ka la tum ngai tlat lo a, ka fapa ka ngaihtuah zia a hrechiang em em bawk. 

"Aw, ka tum dan chu a nia, mahse reilote chiah a niang. Chhun leh zan a thawh kawp theih te awm se ka ti zawk. Pawisa khawl ngah vat a midang puihna tello a Bawihtea enkawl ve theih ka duh" ka ti zuai raih a, ka laktlak loh lutuk vang a naupang pawisawi lovin a tuar reng mai hi ka lainat ngawih ngawih ţhin. Msa kan bel reng thei dawn lo va, ani pawhin min pui reng thei lo ang. Nakinah buaina kan la tawk tho tho ang a, a tlai hma ngei a hnathawh tur zawn ve ka duh tawh a ni. Mizoram ah ngei ni thei se ka tih laiin hna a van bakah ka tan chuan pawisa tam hlawh theihna tur a awm ve lo ang.

"I khawngaih lo em ni? Inu leh pa chu thuhran, in mo te an fel si lo a" tiin kan inchhung hahthlak ţhinna pakhat a rawn sawi chhuak zeuh. 

"Ka awmdan vang khan keichu min la haw reng maithei. Mahse an tupa ve tho a nia, an hmangaih em em ang. Ka kalsan dawn a nih ro ro chuan midang hnenah ni lo ka nu hnenah ngei awm se ka duh. Nang chu sawi ngai loh ah dah ta ila, ka nu aia hmangaih tu tur an awm lo. Ka nu bulah awm se rilru nuam deuhin ka awm thei ang" ti a hrilhfiah pahin ka fapa muhil leh bam tawh chu ka melh a, ka tello chuan engmah a la ti thei lo. Msa bulah mu ve ţhin mahse inchhung ah ka awm ve a ni tih a hriatchian vang chauh. Awm ve lo ila chuan Msa bulah awm reng mahse min zawngin a ţap tho tho ang. A mit a fiah loh vangin naupangte anih lai aţangin tarmit a vuah tawh a, thil a thiam chak lovin ka hrilh loh chuan ha nawh nachang pawh a hre lo. A thiam lo ni lovin tirh zel a ngai. 

"A ţullo, helamah thawh tur zawng rawh" a ti hluk a, ka rindan chiah. Ka fapa hi a hmangaih ve em a, a hrehawm a hlau ţhin. 

"Hna a van em hi. Lehkha ka zir sang lo a, ka thawh ve theih chinah lah hlawh a tlem dawn ropui si. A thlawn a i puihna dawn reng hi a zahthlak hrim hrim" ka lo ti ve thung a, insawn chhuak tur a min tih khan a dinhmun hria in keichuan ka hrethiam vek. Vuina leh thinrimna ka nei lo va, mahse Bawihtea zawk hian in nghet ang a a lo neih ve tawh kha chhuahsan a hrehin a ţap nasa. Msa thleng khan a ngen lawm lawm a, khawngaih viau mah ila motor ah ka nam lut lui a, Msa in min hmuh sak tho luahin kan awm ve naw naw. Bungrua kan la nei tam em em lo va, tv a awm bawk si lo. Nuam lo a tih thu a sawi reng a, Msa a huat mai hlauin a ţha lam zawngin ka hrilhfiah a, naupang na na na chuan a lungngaihna te a theihnghilh leh vat. 

"A awm mai ang, kan zawng dawn nia. I tello in a awm thei lo. Thutlukna atthlak deuh deuh an siam tawp ngai lo" tiin min zilh a, phur rit a min ngai duh miah lo mai hi mak tih chang ka nei fo.

"Awm chu a awm ngei ang. Mahse Bawihtea nen a kan inenkawl theihna khawp anih a ngai a, keichu hrehawm deuh mah ila Bawihtea a nawm sak phahna a nih chuan ka tuar thei vek. Nun hman tur kan nei hrang ve ve a, inhman ţawm tawh lo ang" ka ti ta nge nge a. Hmeichhe mawl mang ve tak, min ngaina tak tak tu te leh min ngaina lo ru deuh tu te thliar thiam vak lo chi ni mah ila an awmdanah khan chiang takin a langchhuak a, kei takngial pawhin ka hmu ve thiam. Rei tak an lo innghah tawn tawhna kha a thawn mai mai ni tawh lo turin ka duh a, ţhian bak a Msa ka en loh zia Rebecca hian hria se ka ti bawk.

"A nawm sak i duh tak tak chuan a bulah awm rawh. Pawisa thawn ţeuh ţeuh mah la hmuh phak a i awm loh chuan nuam a ti lo vang. Kal bo lam kha ngaihtuah tawh suh" thupe aw tak hian a ti a, Bawihtea a ngaihtuah vang a nia, a lawmawm viau rualin ka thil tum hi harsa ka tih tawh tehreng nen a ti harsa lehzual vek.

"I hrethiam lo emai. Mipa hi chu chip chiar deuh a hrilhfiah kilh kelh in ngai kher zel a, nidangah uluk zawkin kan sawi leh mai dawn nia" ka ti ta tawp. Min sawi nawi sak reng chuan rilru ka thlak leh mai ang tih a hlauhawm. Ka chak lohna ber ka fapa a hmang ţangkai kher zel lehnghal. 

"Tommy-a hriattir i phal bawk si lo" a lo ti leh hluk a, hre lo der tur a ka tih ziah vang hian min chhal reng mai ni.

"Ti hian haider char char la, kan inkar a engmah thleng ngai lo ang hmiahin a awm a, keipawh ka awm thiam ve tho alawm. Engahmah pur buai lo ila, rawn inrawlh lo law law se ka duh zawk. Bawihtea hnenah pawh hian ka hriattir kher lo ang" ka ti hlak hlak a, ka sawichhuah chang apianga ka pik tlat zel hi ka ning. 

"I tih dan dan le" a lo ti veleh mai a, dar9 vel thleng min awmpui hnuah min haw san. Kan inkarah hian mipa leh hmeichhe inkara induhna ang hi awm miah lo mahse kan in ngai hlu tawn hle. 

Rebecca kha buaipui duh tawh lo angin awm mah se la a la duh zia ka hria. A hmeichhe hmangaih awmchhun a ni miau a, a tan chuan engpawh a ti duh ang. Kan inchen chilh rei bawk a ka hrechiang thawkhat viau. Vawikhatmah a la rinawm loh san ngai lo a, a rawn thinrim peih lutuk chang chuan a ning lutuk hian mak sak deuh deuhin a runluih a, a runluih dan lah kha huatthla la zawngin a ni ngai lo. A nuihzatthlak mah zawk. Khatih lai kha chuan kan la naupang ve em a, hmeichhe ngaihsak lo leh an zia hre vak lo chi a ni bawk nen, tih ngaihna a hre vak ngai lo. 

Zingah Tommy a rawn lang hlawl. Bawihtea damlo a hriat mai bakah kan awmna ward leh khum number thlengin a hre chat vek a, Rebecca nen an inbia a nih ka ring. 

"Min rawn hrilh ve ta che" a ti nghal tawng a, tlangnel zetin ka bulah a rawn ţhu thla ve nghal bawk. 

"Ka hrilh loh che chuan i hriat ka duh lo ah ngai mai rawh. I duh tawh loh hnu hi rawn ngaihven der ve sek suh" ka lo ti bak hluk. A zakthei lo ve em a sin. 

"Khawi a pawisa in nge bill pek i tum?" min ngaihnep hmel fahran a a tih hnuah "Msa pawisa bawkin em ni?" tiin min zawt zui zat a, a awki a min tih elna lang tel ve te chu ka haider hram hram. Damlo dang an awm ve a, Bawihtea a awm bawk. Thinrim a ka chhang let anih chuan kan boruak an hrethiam vek dawn a, chu chu ka duh loh ber te zing a mi a ni. 

"Nang ang emin hausa lo mah ila dam chuan pawisa chu a awm ve zel. Hman khawp ka neih chuan ka duh tawk. Chuvang chuan tun bak rawn kal tawh suh. I pawisa kan mamawh miah lo a nia" tiin awki pangai thei ang berin ka hrilh a, ka ţawng zawi hle bawk. 

"Rebecca hnenah eng thil nge i lo sawi?" min en run chung a a tih chuan za lo deuhin ka nui ro halh. 

"I hming ka sawi ri miah lo a nia, thinrimin i che buan buan dawn tih ka hriat vang alawm ka thup tlat. Mahse thudik i hrilh vat lo a nih chuan keiman ka la hrilh ang" tiin ka vau ve. Hlauh leh eng helh nei miah lo va a awm kual vel te hi ka ngei hlur. 

"A ring hleinem che. Kan mi rin loh laklawh tawh te chuan engpawh sawi se kan ngaithla liam mai mai. Tum buai duh suh, ka thu awih la chuan hetiang thil hi a thleng lo vang" ti khur khurin min dem tu zawkah a ţang lehnghal. Engtin nge ka lo hmangaih theih? tiin ka inzawt fo. A ze ţha lo lai a thup hneh sawh em a tin ni tun a Rebecca lak a a inthup ang chiah hian.

"I thu awih ila chuan damchhungin inchhir reng rengin hun ka hmang zawk ang. Nang ang a pawisak nei lo ka ni ve lo. Chuan i hmuh ang hian kan awmna hmun hi ti ti nan a rem vak lo a, inphawrh mualpho lo teh ang" midang hriat phak loh tur tho hian ka ti leh a, sawi zawm ta bik lo mahse "Pawisa ka pe ang che" a ti ţalh tho. 

"Ka mamawh ang chu ka nei ve ka tih tawh kha" ka lo ti leh hluk. Bawihtea'n tui in a duh thu min hrilh veleh ka intir nghal thuai thuai a, Tommy-a paw'n a kutah vuanin a fiam ve zeuh zeuh. Duh a neih leh neih loh te a zuat luam a, min biak dan nen a inang lo hle. Naupang a nihna angin ţha deuhin be mah se la ka pai tirh ang reng kha a la ni, tun thlengin a la duh chuang lo va, a fapa a ni tih miin an hriat a hlau ngawih ngawih. 

"Engtia rei nge in la awm ang?" ti a min zawh chuan lu ka thing mawl tawp. Damţhat ver vawr lai a nei khat si, rilru nuam lo deuhin ka awm phah reng mai. 

A haw tur chu "Min lo thlah rawh" a ti deuh tlat a, lokal tawh lo tur a hrilh chian law law ka duh vangin ka lo remti ve mai. Bawihtea ka ngaihtuah deuh hlek a, Pa Mawia bawk ka ti buai leh. 

Ward aţanga kan chhuah chuan Bawihtea enkawl tu doctor bawk kha ka tawk leh a, nidang ang bawkin min hmuh rual chuan ngainat awm tak a nui chungin "Nizan in mu ţha thei em?" tiin min lo zawt a. 

"Aw kan muttui lutuk ringawt" zangkhai vahin ka lo ti ve vat. 

"Sangsanga a harh tawh em?" a tih leh lai chuan lo bu nghatin "Harh tawh e, a lo nghakhlel tawh ngawt ang che" ti a ka hrilh hnuah ka bula Tommy-a ding chu kawk zawkin "Hei ka'n thlah lawk ang a i rawnkal hmain ka let leh hman ang" ka tih zawm leh a, hmanhmawh lutuk lo tur a min hrilh hnuah min kal pel a, keipawh hma lam panin ka kal leh hmawk hmawk. 

"In doctor chu ava bengvar ve" min elhsen zet hian Tommy chuan a lo ti leh hmanhmawh. Mi tam loh deuhna laiah ka ding te te a, a ţawng duh dan chu ngei viau mah ila chhang let lovin "Tun bak chu rawn kal duh tawh suh. Pathian zarah kan ţha ve zel a, ngaihsak tu kan nei ve reng bawk. Bawihtea hian a hmuh fo che ka duh lo a, apa i ni tih a hriat phei chu ka duh lo lehzual. Hmanah khan i lo duh lo tawh a, paih tur a min tih aţang khan i fa a nihna a bo ve nghal.  Sawina hun a ni lo tih ka hria mahse i hnen aţang hian phut kan nei lo va, i awm nawm nan ringawt a rawn lan a ngai kher lo" dam thlap hian ka ti a, thil dang sawi duah a inhnial leh vak vak ka peih tawh lo. 

"Nangmah vang a lokal ka ni lo. Naupang damlo i hrek nasat ka hlauh vang zawk. Pawisa pek duhna che ka neih lai hian la la, a mamawh leh eichak zawng leisak ve rawh" ngaihsak tak tak si lo va a tih liam puat puat lai te chuan ka lo ngei kher mai. 

"Kan nei ka tih mawlh mawlh kha" ka ti vin ţhat a, kawngkal an awm ve reng tih hre leh nghal thuaiin hmui ka chip leh vat. 

"Kan mamawh loh zia ka hrilh tawh che kha. Kan nufa hian i puihna kan mamawh lo a, kan tibuai lo ang che. I pawisa tello hian kan damkhaw chhuak thei lutuk ang. Min rawn ngaihtuah der ve duh tawh suh" ka tih hnu a kal mai ka tum chu "Msa hlimna i duh luatah i lo ţawng tam lutuk palh ang e" a ti a, Rebecca hnen a ka puan vak a hlau a ni mahna. 

"Msa hnen a ka awm hnawk ve reng chhan bak ka hrilh lo. Thudik hi a thup reng theih ngai loh a, a la lang chhuak dawn tho tho. Finfiahna turin Bawihtea a awm bawk a, ka hrilh tawh che kha. I ta lo tur pui i khal rei mah mah tawh, dawt i chulh hliau hliau lehnghal a, a duhna che leh rinna zawng zawngte hi huatna in a thlak thleng thuai ang. Amah a thudik a zawn hmuh chawp hma hian nang mah ngei khan hrilh vat rawh. Anih loh chuan keiman ka hrilh ang. Min ring lo pawh ni se finfiahna nen chuan min ring lo thei lo zawk ang" ka ti ve salh salh. Hlauhna chhe te mah ka nei tawh lo a, inhnam hnawih ka duh tawh loh vang a ngawih bo pui ka ni zawk. 

"I chhungte nen in inkar a ţha dawn chauh a, iti mualpho leh mai dawn tihna a ni maw?" tiin cho takin min zawt let a, chungnung leh dinhmun ţha zawkah a la in ngai reng. 

"Rebecca chauhin a hriat chuan ka chhungten an hre ve kher nang. Dawt leh bumna hmang a kan neih reng reng a tlo ngai lo. Rebecca hian Msa a la hmangaih zia kan inkawm hnu khan ka hre ve tawh a, chuvang tak chuan keimah chiah ka in ngaihtuah vang leh na tawrh ka duh tawh loh vang a ka up beh ţhin zawng zawng te kha sawi chhuah ka hreh tawh lo. Nang paw'n an la inhmangaih zia i hmu ve tho ang a, Rebecca hi i hmangaih takzet anih chuan ka tih ang hian ti ve rawh. Thudik hrilh la, thudik a hriat vek hnuah duhthlan tir rawh" tiin ţha deuhin ka hrilh.  

"Ngawih bo pui zel la kan vai tan a ţha a ni mai. Ţhian kan ni reng ang a, kan inpawh reng bawk ang. I ka i ang a nih vaih chuan ţhian kan nihna iti chhia ang a, huatna i piantir thung ang. Mi pawi sawi hlau reng reng a hman hlel i ni bawk a, kan pawi i sawi loh nan i thil khung ţhat tawh sa kha ţhiat darh reng reng suh" a ti a, ka thil hrilh ve te chu a ngainep kher mai. Min tham lo lutuk chuan sawi chhuah vek min ti chak zek zek. 

"Ka sawi ngam loh i ring deuh niin ka hria. Ka thil tawn tawh zawng zawng te avang khan hlauhna ka ngahin ka inkhung bet reng a, mahse ka zalen tawh. I sawi ang em em a fel ni lo mah ila mi chhiatna tur a thil tih ka duh ve lo a, ka chungchang thu mak pui pui a hriat te kha i hnen aţang vek a a hriat a nih ka ring hmiah. I nu tawrh ang hi hmeichhe dang tawrh tir ve suh" ti a amah khei thei ber tur ni a ka ngaih ka sawi chhuah hnuah ward lamah ka let nal nal. Ka inti mualpho tel veleh dawn ni a ka ngaih vang a ngawih ka chuh tlat ţhin te, a awm ang ang a ka en liam mai mai zel ţhin te hi ka inchhir rum rum tawh. Mahse ka en liam tawp khan ka tan engmah a nih tawh loh zia lan tir naah ka ngai ţhin a, tun thlengin ka ngaihdan a la ngai reng. 

Ward chhung a ka luh leh chuan kan khum bulah doctor kha a lo ding vang tawh a, Bawihtea hlim hmel hian rilru hahna tam tak a chhawk rualin ngaihtuah a ti thui duh viau. 

"In chhuak thei ţep tawh a, in ngaihawm leh dawn hle mai" a lo ti a, Bawihtea awmdan leh hma a sawn dan te min lo hrilh zung zung. 

"A va lawmawm tak. In fel hlawm sia, chuvang a nia kan lokal zel ni. Nangni pawh kan ngai leh ngawt ang che u" ka ti ve luam. 

"Lokal leh vat rawh u intih ngawt chi lah a ni der si lo a" nui hawk hawk chung hian a ti a, tu tan pawh a ţha em em vek. 

"A theih hram chuan lokal loh kan duh. In hnathawhna hmun hi chu a nelawm vak lo emai. Thlaphang deuhin kan rawn kal ţhin lehnghal a" fiamthu ti tak deuh siin ka lo ti veleh. 

"I ngaihsak ţha bawk a lokal a ngai tawh lo turah ngai ang" a tih hnuah "Fiona tiraw kha?" tiin ka hming min zawt zui zat. 

"Aw ni e, hospital ah tak hi chuan ka hming hi a langsar ve vak lo" tiin nui chungin ka lo chhang a, naupangte mah ni ila nurse pawh in 'Sangsanga nu kha' tih ten min sawi a, min ko bawk ţhin. Bawihtea hi an chhawnchhaih peih bawk a, a hming a ri hmasa zel. 

"Hre hmasaber ka ni vah dawn ni maw?" a ti a, ka chanchin min zawt zui lovin thil dang min sawi pui zui daih a, ka lawm ru kher mai. 

Hospital ah chuan kar khat lai kan awm belh leh a, a hna a ni bawk a doctor pawh nitin rawn langin min biak hmasak zel hnu phei chuan kan in nel ve tawh viau. Min biak hmasak hun nghak lo va biak hmasak ve chang te ka nei a, ţhian ang maiin inkawm ve tawh mah ila ka chanchin min zawt ngai lo. Chanchin sawi tlak ka nei lo bawk si, min zawt ang tih ka hlau zek zek zawk. 

Kan chhuah dawn niah chuan ka nu leh Msa te an rawn kal a, ka hmuh ngai miah loh lai paw'n ka ngai ţhin a, ka hmuh takah phei chuan ka ngai lehzual. 

Ka nu chuan "Bill vel ka va ti fel ang e" tih leh kal a rual a, Msa chuan Bawihtea a pawm a, motor a min lo nghah tur thu sawiin a chhuah pui a, keimah a ka insiam zawm rek rek laiin kan doctor-a bawk kha a lokal leh. Coat var a lo ha tawh lo a, haw ve mai tur te pawh a ang. 

"Khaw nge Sangsanga?" ti a min zawh chuan chhuahna lam kawk zawkin "An kal pui tawh a, motor ah a awm tawh ang" ka lo ti liam satliah a, a haw turin min rawn be kawi mai mai a nih hmel. 

"Rawn hmuh lawk ka tum a, pawi loh chu. In awmna i sawi chiang thiam tho" a ti a, a ngaihna hre lo fe a ka en he haw lai chuan nui sukin "Ka rawn la tlawh ang" a ti leh tawp a, a chhuak nghal nul nul. Kan in awmna kha min zawt tawh tak e. Chiang kelh kawlhin ka lo hrilhfiah ngei bawk. 

Ka nu pawh lehkha pawimawh keng va chung a lo letin "I zo tawh em?" a rawn ti teh tawp a, ka chhan hma hmain ka pack sa a khawm nghal mawlh mawlh. 

"Keiman ka lo khai mai ang. A tam chuang lo a, tikhan lo va chhuak tawp mai rawh" tiin a ban a dawmin dan ka tum a, a khai sa te pawh laksak tum viau mah ila a vuan nghet tlat. 

"Ka khai thei alawm, kan inkhai sem dawn nia, nangmah a engkim tih vek zel a ngai hleinem. Min mamawh chang chuan min rawn bia la, min dang tu an tam viau paw'n puih dan che ka ngaihtuah zel mai tur a nia, tunah pawh ipa phalna thlapin ka lokal" ti bawrh bawrh chungin ka a lehkha ken lai a thlep pah mawlh mawlh a, a bag ah laia a thun hnuah khai tur a a lak khawm sa ho khai lehin "A bang kha rawn keng la min rawn zui rawh. Ka ti fel vek tawh a, kan haw thei nghal a ni mai" ti a min hrilh leh hnu chuan keipawh muangchang tawh lovin ka nu sawi ang chuan ka ti ve mai a. Ka hmelhriat sa la chhuak ve lo te ka mangtha hnuah ka kal chhuak hlawk hlawk a, ka nu ka um dawr dawr. 

"Engin nge i lokal? Msa nen in rawn inthurual awm si lo va" ka ti a, ka kal chak bawk a ka umpha har lo. 

"Thurual nang, biak pawh ngaihna ka hre hleinem. Ka rawn luh dawnah amah zawkin min lo hmu a, kan rawn inzui lut thei mai mai anih kha. I va cher em em ve, engmah i ei ngai lo em ni?" a ti hluai a, ka lam lo hawiin kal pah reng chungin min en dik nasa hle. 

"Ka thau lai i hre tawh em ni? Min hmuh loh rei vang ngawt khan danglam viau turah min ngai lo la, ka ngaihtuahawm loh a nia" tiin ka ţawng thlamuan a, rei tak hnu a inhmu leh chauh kan ni bawk a ka thil tih tum te kha ka la sawi pui duh rih lo. 

Taxi dang chan chawp leh ai chuan tiin ka nu chu kan rualin kan haw pui a, a hmaah ţhuin a tihziah danin a ti ti leh melh melh. A thusawi ho deuh deuh te chu nui sangin ngaihnawm ti takin ka lo ngaithla a, reilote chhung chauh la awm dun mah ila min uap lum nghal veng veng thei. 

Min thlah hmasa lovin Msa chuan ka nu zawk a thlah hmasa a, a chhuk dawnah "Ka rawn la hmu leh ang che u. Bawihte nangpawh lo dam zel rawh aw. Ka lokal leh hunah thil tui deuh deuh ka lo ken dawn che nia" a ti a, kal hmasa tur a min tih tlat vangin inchhung a luh hmain kan tlan chhuak leh a, tukverh a dakin ka hawi let a, ka nu chuan min lo la thlir reng. Motor dang a awm lo bawk a, a lan theih chhung zawng chu ka dak chhuak reng a, ban ka vai zeuh zeuh bawk. 

Ka ţhut luh leh veleh Msa chuan "Tih tur ka ngah deuh a, ka rawn leng hman kher lo ang. Nidangah hman deuhin ka rawn leng zawk ang" tiin a buai thu min lo hriattir a, "Awle, rawn len a ngai chuang hleinem. Min rawn hruai ringawt pawh hi a lawmawm lutuk ringawt. A dam tawh vang a chhuak kan nia, min ngaihtuah duh suh" ka ti a, min ngaihsak miah lo mahse ka hrethiam lutuk. 

"Ka rawn la kal ţha leh ang. Mamawh in neih chuan min hrilh mai dawn nia" a ti a, let leh turin min sawm lo va, min sawm mahse ka let leh tawh kher lo ang. 

"Eng nge in chanchin ni zel?" ti a zawh pahin ka thlek dek dek a, a awmdan hmangah thu lawmawm dawn ka inbeisei lo. 

"Ka la hmu leh lo" a ti bung nghut a, zawh zui chak awm loh viau mahse "Nang aiin Tommy a thlang zawk tak takah i ngai a maw?" ka ti leh hram. 

"Aw, chuvang a inla hrang chu ka ni. Keimah vang a a nat miau te chuan na thlen sak ka duh tawh si lo va. An pahnih a hmuh loh theih dan ka zawng leh mek. Tih theih dang a awm lo" a ti bul hmuk hmuk a, a tirah khan engkim lo hre ve ila emaw an inţhen chhan tal hria ila chu a zia deuh tur a nia. 

"Naktukah Bawihtea nen kan lokal ang. Chahbi spare ka la kawl tho a, hna ţhulh phah nan hmang lo la, theihnghilh lak duh lawk ka nei a" ti a chhuanlam siamin ka thil tum ka hriattir a, "Tihfai ngai a awm lo a nia" a ti a, min hnial min lem lo. 

Thawmhnaw min thiar luhpui hnu a haw lehnghal mai a tum chu "Rebecca biak pawh theihna tur min lo pe" ti a ka dil chuan hriatthiam loh hmel zetin a mit ko a lo san ak.

"Enga tan?" tiin min zawt let a, ka thil dil chu mak a ti viau a nih hmel.

"Hmanni khan min rawn tlawh ve a, rei a awm lo. Min ngaihtuah hmel em a, chanchin ka hrilh ve duh deuh a" ka ti nuah nuah a, a lokal ţum khan ka lo dil theihnghilh palh a ni. 

"Hman a mi chiah ka nei" inthiam lo hmel tak hian a ti a, beidawng zetin ka thaw halh. Mahse "A nau biak theihna ka nei" a ti leh hlauh a, a neih ang ang chu min pe turin ka hrilh a, a hmanhmawh tawh bawk nen ngaihţha vak lo chungin min pe a, a tan vek a ni tih hre hek lo le. 

A haw hnuah inchhung tifai nghal zung zungin hospital a kan puan hman ho suk turin ka chiah a, no vel ka sil leh hnuah Bawihtea mutchhuak ka mutpui. Sana ka melh zeuh zeuh reng a, a nau phone hmang a ka biak dawn chuan an ban hun nghah a ngai ang tiin ka chhut neuh neuh reng a, sana te chu kal muang ka ti kher mai. 

Rawng ka bawl zawh vek hnuah Kimpuii ti a a hming ka chhinchhiah chu ka call a, min rawn chhang thuai. 

"Kimpui, Fiona ka nia, i u a lo haw tawh em?" tiin ka zawt nghal thawr. Mak a ti ru viau maithei. 

"Aw haw tawh e, i be duh em ni?" pangai takin a rawn ti a, ka biak lawk duh thuin ka lo chhang. 

Rebecca a ti lang lang a, vawithum vel a koh hnuah "An be duh che lo hmanhmawh rawh" a ti leh a, ka nghak rei vak lo. Rebecca-i ngeiin "Hello" a rawn tih takah chuan ka thaw huai. 

"Fiona ka nia, hmanni khan i phone number ka lo dil theihnghilh daih che a" tiin bul ka ţan a, min chhang dawn tawh lo emaw ka tih hnuah "Aw..eng nge ni ta?" a rawn ti ban charh. 

"Hrilh hmaih che ka nei a" ka ti a, rin aiin ka zam lehnghal. 

"Eng thil nge?" ti a min zawh chuan "Hmaichhan a hrilh che ka duh a" ka lo ti nghal vat. 

"Hospital ah bawk em ni? A pawimawh dan a zirin ka rawn pan ang che" a ti a, min la ngaina chuang miah lo tih a awki leh ţawngkam aţang ringawt pawhin a hriat. 

"Ni lo e, tun a kan inluah hi i tan zawn hmuh a har takin naktuk tlai in ban hunah Msa inah lokal mai la, amah a awm anih pawhin pindanah a tawm bo leh daih tho ang. Kawt laiah ka lo nghak mai che ang a" tiin rem ka ruat zat zat a, Msa awmdan tur chiang bik lo mah ila a rawn kal duh nan a ka tih a ni. 

"Hmun dangah a theih loh em ni?" tiin min zawt veleh a, "Bawihtea ka hruai dawn sia, mi tam vak loh naah ni se ka tia, a la damkawr a" ka tih chuan aw a pawh ve hram. A phur vak lo niin ka hria. 

Tommy awm ve ngei se ka duh a, kal tur a sawm ve ka duh. Chuvang tak chuan a nia ka in awmna zawn hmuh harsa miah lo harsa ang a ka sawi. Tommy hian ka awmna a hriat ka duh lo. 

Msa inah chuan ka kal ngei a, inchhungah Bawihtea tv entirin kawt lai a ka plant rem tlar ţhat ho ka en lawr dan dan a, ka tuipui bawk a hun ka khawhral ve na ţhin a ni. 

Thawm ka hriat veleh ka inher a, Tommy-a a lo ni. 

"Engti turin maw Rebecca nen chuan min koh a? Khaw nge amah chu?" ti a min zawh pahin a hawi kual a, rawn vin nghal pung pung mahse zam duh bik miah lovin ka lo melh ran. 

"A lo la thleng lo, a rawn thleng thuai ang. Ka hrilh lawk tawh che kha, thudik a thup bo hlen theih loh ka tih kha" ti a ka hrilh nawn leh hnu chuan hmusit zetin min nuihsawh.

"Drama a nih loh hi, i thup rei tawh a, a awih chuang lo ang ka tih ve thung kha. Eng vang a sawichhuah chak thar et et nge maw inih le? Nang hi Msa thlengin i lo hrilh tawh lo maw?" min ti a, lu ka thing nghal vut. 

"Rebecca chiah ka hrilh ang. Duh a thlang dawn a nih ro ro chuan thudik a hriat vek hnuah thutlukna siam chauh rawh se. Zep neih reng leh mi pahnih inkar a ka hming lang ve sek hi ka kham tawh hrim hrim. Chuvang chuan ka sawi vek dawn, min rin theih nan ka ko ve che a, a hmangaih takzet che anih chuan a pawm tho tho ang che" ka ti ve kher a, an hmuh phak loh a awm vat ka tum tho a, mahse ka awm loh hma ngei hian Msa tan thil ţha tih ve ka duh. 

"I luhlul ve reuh phian a, i fapa a ni lo ti reng siin ka fapa anih thu sawi i tum leh tho a, hmeichhia tih takah i mumallo in i thu a nawi hle mai" a ti hluk hluk a, a ţawngkam leh engkim hi ka haw hlur tawh. 

"Nia hmeichhia hi chu kan dil chhut a, hriatchian chak kan ngah ang bawkin thup hlen theih loh kan ngah bawk a, i hming lam rik reng ka duh loh vang te leh pumpelh che ka tum lutuk na lamah ka thup rei mah mah zawk a, hre vek law law se la, chinfel chu i hna a ni ve tawh ang chu" ka tih chuan min kuah thlawp a, mak ka ti ngei mai. 

"Min thlah vat rawh" ka ti vin hlar a, "Tunah chuan la hrilh suh. Nakinah keiman ka hrilh zawk ang. Ka nu damlohna in rilru a ti buai a, buaina dang ka duh tawh rih lo. Intiam vat rawh, a rawn thleng ţep ang. Msa pawh a rawn haw har tawh lo ang. Chumi hma chuan sawi rih lo turin intiam vat vat rawh" a ti mawlh mawlh a, a hlauthawng ve takzet niin a lang. 

Min kuah ngheh em vanga tal fat fat chungin "Min thlah phawt teh" tiin ka lo ngen thung. Mahse ka ngenna chu ngaipawimawh zo lovin "Ka sawi ang chuan ti mai rawh. Ka nu ka buaipui zawh hunah keimah ngeiin ka hrilh ang. Thuruk neih reng ka duh tawh bik lo va, chuvang chuan ka sawi ang hian ti ang che" fir takin a ti, "Thla tin pawisa ka pe ang che. Chu chu i duh ber a ni lawm ni? Naupang enkawlna hi ka tum vek ang. Lo la ngawi leh rih rawh" tiin ka beng bulah a phun zui mawlh mawlh. Mahse chutianga a phun sup sup lai chuan thawm nei miah lo va gate chhung a Rebecca rawn lut ka hmu thut a, kan inmelh chiang kelh kawlh hle.

"Min thlah nghal rawh" khauh tak a ka tih hnuah na takin ka nam leh a, nam kiang dawrh thei lo mah ila ka chet dan chuan a hriatna a vaw harh ni ngei tur a ni ka hawina lamah a inher ve thuai. Rang lutuk a min din hlat nghalin za lo zetin a nui ro hak a, "Ngaihdan dik lo nei duh suh. A fapa vangin a rilru a buai a, ţhian kan nihna angin ka lo hnem a nih kha" tiin Rebecca chu a hrilh a, "A dik em?" ti a min zawh ve pahin min mitmei nasa hle bawk. 

Msa a awm lo ang ti a Rebecca ka hrilh vek tawh hnu a Msa rawn haw veleh chu pawi ka ti takzet. Ke in a rawn haw a, Rebecca ang bawkin thawm nei ring lo hle mahse kan lo en ţhap. 

"Eng nge in tih?" ti a kan vai a min zawh hnuah rawn lut tlang ve in Rebecca bulah chiah chuan a ding a, hriam hrak a Tommy nen min rawn melh hnuah Rebecca chu en lehin "Eng nge thleng? Ti nge i hmel a va dik lo ve?" tiin a bialnu hlui chu a zawt leh a, "Ka ţha vek" ti a a lo chhan hnuah hnuai lam a bih zui daih. 

"Ngaihtuah duh suh, keiman ka lo zawt fiah ang" ti a Tommy-an a chhan hnu ah Rebecca chu a pan a, Msa'n min rawn pan ve thung. 

"In be lawk ang" a ti nghut a, a lungawi loh hmel hle. Ka banah dawmin min hruai hrang nghal daih mahse engkim sawichhuah vek ka la tumruh hle. 

CONT...