NANG CHAUH-12

NANG CHAUH-12

REBECCA

Thinrimna a ti lang duh miah lo chu mak ti viau mah ila zawt chiang lovin "Haw ka duh" tih leh thawh ka rual a, zawh chian ngaiah ka ruat tawh lo. Hmanah khan engkim ka sawi vek tawh. 

"Haw nghal mai i duh tak tak maw?" ti a min zawh hnuah kan in pan na kawng a thlek zawk a, "In inah a lo nghak ang che" tiin Tommy-a awmdan tur ni a a rin chu Msa bawk chuan min hrilh leh a, huphurh ru zetin hnuai lam ka bih a, min hrilh hma pawh khan kan in a min lo nghah rinna ka nei sa. Mahse kan in ber a ka haw loh chuan kalna tur dang ka nei chuang lo. 

"I hmu duh takzet maw? Khang thil a thlen hnu khan hmu leh turin i inpeih tawh tihna em ni?" ti a min zawh chuan muangchangin amah en turin ka hawi chhuak a, "Eng thil pawh thleng tawh mahsela ka biak a ţul tho tho dawn" ka ti zui sep. 

"Min biak ţul i ti ve lo em ni? I ţawng chhuak duh tawh a nih chuan i biak hmasak ber tur chu keimah ka ni" a tih lai chuan ngawih chuhin ka hawi sawn a, beidawng duh lovin "Ka hriat loh tur a i lo thup tlat tawh ţhinna ah kha chuan ka hrethiam ang che. Mahse tunah engkim ka hre tawh a, naute pa ka nihna angin thil thlen dan ka hriat ve a ţul" a ti leh a, hmanah khan tun ang hian lo hre duh daih tawh se chu tih tlak loh hram dan a awm mahna. 

"Ka hrilh che kha. Kan inbiak lai khan ka sawi chhuak ngam lo a, mahse kan inbiak zawh hnuah message ka thawn che a, min chhang let lovin Fiona nen a in mu lai ka dawng ta zawk a" mahni inveng ran chung hian ka ti a, a ngaihna hriat loh hmel zet a mit hmul ti kang uk a min melh pahin "Eng message maw?" a lo ti leh nghut a. 

Kha zan, min chhan let hun nghakhlel leh hlauthawng bawk si a ka awm lai te kha ngaihtuah letin ka awm a tawt up up a, ka lo nat tawhna ţhin zawng zawng te khan min deng leh dawt dawt a, tam takin a belh chhah tawh lehnghal. 

"Thlalak ka dawn zan khan message ka thawn ngei che. Kan inbiak lai khan hrilh nghal mai che ka duh a, mahse ka sawi chhuak hreh tlat a, ka zamin ţawngka ngei a sawi kha ka hreh a ni ber. Mahse hrilh ngei che ka duh a, kan inbiak zawh hnu lawk khan ka rai thu leh thla hnih lai a nih tawh thu ka rawn hrilh che a, chhanna ka dawng lo. Ka thinlung ti keh chhe vek thei thil ka dawng zawk a nih kha" ti a ka hrilhfiah hnu chuan ka biangah dawmin amah en turin min ti lui leh a, a mitmeng a mak tihna langchhuak chu ka hmuh hmasak ber a ni. 

"Message i hnutchhiah maw? Engmah ka hmu lo, keimah a inham buai i duh tawh loh thu i rawn sawi kha chu zing ah ka hmu a, zanah khan engmah ka hmu lo. Phone ka kawl tawh lo a niang ka hrechiang thei tawh lo" a ti buai ve nak a, rei vak lo a ngawih hnuah hrechhuak thut ni awm tak hian "Ka phone kha" ti leh hluaiin "Aw ka kawl tawh lo. Ka pindan ah khan a awm lo, zingah Tommy-a hnen aţangin ka la let" a tih zawm leh zat. 

Chu thu ka hriat hnu phei chuan ka thawk thlengin a mumal thei tawh lo. 

"Eng chungchang ber nge i sawi chu?" tiin hrechiang lo ni awm takin ka zawt a, ngaihtuahna mumal ka pu thei tawh lo reng a ni. 

"Ka sawi tawh ang khan tlai aţangin zu kan in a, zan tir a kan inbiak kha chu ka la hria. Ka intiamna zawng zawng te kha tun thlengin ka la hre vek. Kan inbiak zawh khan ngaihţha deuhin phone kha dawhkanah ka dah a, ka intawpna tur a ni bawk a tiin ka in leh nghek. Ruih tawh hnu chuan ngaih a sam tawh a, ka phone kha ka kalsawn daih a nih hmel" a ti a, a insehruh ţeuh tawh. 

"Tommy chiah hmu thei tur a awm a, ka hmuh loh turin a lo delete a niang. Hmu hmasa zawk anih vang a nih dawn chu i naupai chungchang a hriat" a ti a, Tommy-an awlsam tak a a hmu thei hi a mak lo. Khang hunlai khan phone changkang kan la nei pha lo a, hawn zel buaithlak a tih miau vangin Msa hian phone a lock ve ngai lo. 

"Anih chuan engkim hre sa vekin ni maw min lo umzui reng ţhin. Nang nen a kan inlaichinna thlengin a hre vek a, a hre lo der mai mai zawk a ni. Ţhiante nen a inhmuhkhawmna kan neih ţum te, Fiona fapa piancham a kan lokal ţum te khan kan chanchin a lo hre vek tawh a, hre miah lo angin a awm tlat thung a" mumal lo zetin ka ti mawlh mawlh a, ka awm dan chu hmuh hrehawm a ti deuh nge ka banrek ah hmerin "Lokal rawh ka thlah ang che" ti a min kalpui mai a tum chu chesawn duh lovin "Keimahin ka haw ve mai ang. Veng chhung vek a nia keimahin ka haw thei" tiin ka lo ţang tlat. 

Hriam hrak a min melh chung hian "Kan inbiak a la ngai" a ti nghet charh a, "Nakinah kan sawi dun leh dawn nia, kan inah Tommy-an min lo nghak reng tawh ang a, buaina a chhuah leh ka duh tawh lo. Ka nu mit hmuhah ngat phei chuan" ka lo ti ve thuai. 

Min hnial ve tawh lo mahse ka thusawi ngai pawimawh duh chuang lo a, min kai dawr dawrin car ah min nam lut rawk rawk. Khua a thim tawh bawk a, kan inchai vel min hmu tur an awm lo hlauh. Kan inkawt a a din rualin ka chhuk vat vat a, ka tih ang zelin a ti ve. 

"Inchhungah a lo awm tak tak a nih chuan rawn lut ve turin ka duh lo che" rum zetin ti mah ila "Heta ţanga ka hmuh phak loh chin in kawt lai velah sawn a lo awm palh ang" naupangchhia zet a tiin ţan a khawh ve tlat. 

"Lo awm pawh nise engtin mah min ti lo vang" ka ti zuai raih tawh. 

"I chiang chiah maw?" tiin min lo zawt ve vat a, Tommy-a rinna a tlachham tawh a, min ngaihtuah lutuk vang a ni tih hre mah ila an pahnih a inhmuh tir ka duh rih lo. 

"Va fiah phawt ang" tih leh min kaih a rual a, kan in lam a min kalpui lai te chuan ka kut lak let  tumin ka pawt ve fat fat. 

"Min thlah rawh Malsawmkim" ti hriam hrakin ka ban ti che ve reng mah ila a vuan nghet telh telh emaw tih mai tur a ni. A hmerna lai vel chu a na ut ut tawh. Kawngkhar a kik karh karh a, Kimpuiin kawngkhar a rawn hawn hnuah min thlah ve chauh a, ka tuai nghal vut vut. 

"Ehe, U Ms-a chu eng nge i rawn tih?" Kimpuii chuan a lo tih hluai hnuah luhna tur pawh min kian lovin "I hmui te kha a pem em ni? In chezual palh em ni a?" hnai deuh a Msa hmai bih chung a a tih hnuah "Ngati nge i pem nuan a?" a ti leh hluai. 

"I nu a awm em?" tiin Msa chuan a lo zawt ve thung a, la phawk hra chung a Kimpuiin lu a thin hnu chuan ka dinna lam rawn hawiin "A awm loh chu. Tommy-a a lo awm a nih pawhin buaina ka siam lo vang" a ti ve thung. 

"Champhai a ka nutei a thi a, ka nu chu tlaiah khan ka nutei fate rualin a kal ve daih alawm. Rebecca hi hrilh kan tum nasa a, phone a la thei hlawl lo va, bakah U Msa pawh, hmai pilh nuan chung khan ka nu i hmu ngam reng reng em ni? A lo hau leh hrep mai tur che a sin. Hetiang hian ka hmu ngun tawh lutuk che, bike i tluk pui loh leh i insual a, tun a mi kha eng vang ber nge?" Kimpuii bawk chuan kan boruak hrethiam lovin a ti leh zat zat a, kan chhanna nghak lem lovin "Rawn lut phawt teh u" a ti chhuak leh hap. 

Kimpuii kan zui luh hnuah kawngkhar ka kalh a, "Tikhan lo in buaipui teh u, buai lai laiin in rawn haw a, ka in suk zawm leh lawk dawn nia" ti a min hrilh tawh hnuah pawh Kimpuii chu ka zui ve zel a, a rual a ka kal ve zel chu mak a ti deuh hlek a niang "Eng nge a?" a ti he haw a, chhang lem lo in bathroom thleng ka zui lut. Hmai hrukna towel ka tih huh hnuah ka sawr fu leh a, chutiang a ka tih lai te chuan "Sawpa saw ngati nge saw ti nen nuam sawn a awm a? A la puitling ve thei miah na nge? Tlangval pui tawh si buaina a la nei reng em ni? In la inhmu miah lo maw ka tia, khaw nge in lo inhmuh leh reng reng a?" tiin Kimpuii bawk chuan min zawt leh mawlh mawlh a, "Kawtah sawn" tih bakin ka chhang lo. Chhan ngei ngei ngai min zawt ang tih hlauin ka chhuak leh vat. 

Ţhutkhawmna pindanah ka let leh a, tv bul a cabinet aţangin damdawi bawm ka la chhuak hmasa leh te te a, a bul a ka ţhut hnuah hnawih tur awm chi ka zawng a, palh thilah tiin ka nu hian inven nan a kawl ve reng ţhin a, tunah pawh a lo awm leh vang tawh. 

"Pem nasa lo mah la hei hi hnawih tho rawh, a nih loh chuan a rei hnuah awm a ti nuam lo ve thei palh ang" ti a hrilhin Msa chu damdawi pek ka tum a, "Keimah a inhnawih chawp nghal turin min beisei a mi?" a lo ti ve thuai a, ka damdawi pek tum pawh a la chuang lo. 

Sawi buai lovin lapui ah damdawi chu ka tat a, ka rin lawk ang chiahin a pem aţanga thisen tlem chhuak ve te chu a lo ro tawh. Towel ka tih huh lawk sa a a hmui pem lai ka hruk lai chuan a phu ve zawk a, ka thil tih lai ka tawp zui chat. 

"Ka ti na che em ni?" tiin ka zawt thuai a, nasa lo te a lu thin pahin "Na lo, a thip hlek ringawt" ti a min lo chhan hnu chuan "Ka hru dim deuh tawh dawn nia" ti a hrilh lawk lehin ka awm hnaih a, nem deuh zawk hian ka hruk sak leh a, ka hruk zawh hnu a damdawi ka hnawih lai te chuan "Kum a liam hnem tawh a, danglam na tam tak i lo neih tawh ka ring a, mahse i thinrimna i lo la thunun thei chuang lo a nih hi. Tharum hmang hian engmah a chinfel theih ngai loh" tiin ka hau pah mawlh mawlh. 

"A thil tih zawng zawng kha en liam mai mai chi niin i hria em ni?" lo la ti khur khur mahse "Khatiang zawng a in pahnih a in intih nat tawn khan eng mah a ti dik thei chuang lo" ka ti ve ţalh. Tlem a min rawn hnaih hlekin min zirchian tum ni awm tak hian min melh run a, "Kei nge ani kha i ngaihtuah? Tu zawk vangin nge i nat?" a aw thuk raih a a tih chuan ţang ţeuh chung hian hnuai lam ka bih a, chhan ngaihna ka hre lo. Nat chu ka na teh meuh mai, mahse Msa vang nge Tommy zawk, keimah vang pawh a ni thei, a nat chhan ber ka hrechiang thei lo. Thawk chhuah harsa khawpin ka na ut ut a, ka awmdan chiah hi ka sawi chhuak thiam lo hial zawk. Tu te pawh hian infiamnan mai mai min hmang ni berin ka hria. 

Ka kun ngul reng chu ngaithei lovin ka khabe ah a dawm a, amah en tur a min kuai dakin "Eng chiah nge thleng sawi tawh rawh. Naute chungah chuan eng thil nge thleng?" tiin zawhna ngai bawk min zawt leh. 

"Ka hrilh tawh che kha. Duhthlan tur ka nei tlem ka tih tawh kha. Chhungkua chu ka ngaipawimawh ngei a, mahse kan retheihna rawn belhchhah tu tur ai chuan nakin a kan hausak ve theihna tur kha ka ngaipawimawh zawk a, min enkawl tu ber ka patea te nupa khan keimahah beiseina sang tak an nei reng ţhin a, naute kha pai lui zel ila chu ka lehkhazir nan sum an seng phal tawh lo ang tih te ka hlau a, ka hrilh hnu lawk che a khang thlalak ka dawn tak vang te pawh kha a ni tel. Inthiam lohna nei ve ţhin mah ila khang hun laia ka dinhmun nen khan ka hmeh bel a, thiam ka inchan chawp leh ţhin" ka ti a, ţawng zawi viau mah ila a hmel dur khup khup te chuan ka sawi tak zawng zawng kha a hre pha vek a ni tih a lan tir a, a thawk dan aţang ringawt pawhin a thinrim zia a hriat. Mahse ka chunga thinrim theihna dan a nei lo. Min dem dawn a nih pawhin min dem rual a a indem tel ve zel a ngai ang. 

"Ti nge min rawn call leh mai loh?" ti a min zawh chuan za lo zet hian ka nui ro halh a, "Ka call che, ka call ngun lutuk che. Kha thlalak ka dawn hma zawng kha chuan biak che ka tum ve ţang ţang" thiam inti ru tak chung hian ka ti a, ka call nawn leh ngei a, a la thei tawh lo zawk a ni. Message min rawn chhan har em vang khan en tur a hrilh leh tumin ka call ve bawk mahse a hnu lawk a kha thil ka dawn takah kha chuan call hmasa tu zawk nih tumna ka nei tawh lo. 

"Ka sual vang leh ka duh loh hrim hrim vang a kha thil kha ti ka ni bik lo. Biak theihin i awm lo a, keimah chiahin engkim ka hmachhawn vek a ngai. Thlalak ka dawn hnu phei kha chuan ka nun hrim hrim kha mumang ang ruai vek a ni tawh a, nangmah leh i hmangaihna bak mamawh ka nei lo chung khan min ngaipawimawh duh miah lovin i duh duh danin i nung a, Fiona ka ngaithei lo ngawih ngawih ţhin te kha ka sual vang ni lovin hmeichhe pangai ka nih ve tho vang zawk a ni. Ka duh ang chiah che khan min duh ve turin ka duh che a, nangmah chiah ka ngaihtuah ţhin ang bawk che khan keimah chiah min ngaihtuah ve turin ka duh che mahse ka duh ang kha a thleng ngai lo. Hmuh dun cheu chu sawi loh a hming i lam mai mai pawh ngaihthlak hrehawm ka tih tawh teh lul nen kha thil khan min rawn deng leh a, nau ka lo pai kher kher bawk nen, kan inţhenna leh thil dang engkim kha ka tawrh nat lehzual phah a, ka huat phah lehzual bawk che. Mumang ang ruai reng ka nih lai te khan thil pakhat chiah ka rilru ah a awm ţhin a, min phatsan tu vang mai maiin ka tuar tlawk tlawk dawn bik lo ka ti ve tlat a, nakin a mi nuihzat ka nih lohna tur leh ka nu leh ka naute nuam sa tak a an awm ve theihna turin hma lam pan zel ka thlang a, min dal tu ber tur ni a ka ngaih ka dah bo a, mahse hrehawm ti chung chungin kha thil kha ka ti. Rei tak chhung chu ka mumal loh lehzual phah a" ka ti a, thil dang ka sawi zui tawh lo. Ka sawi zui dawn a nih chuan Tommy-a hming ka lam rik tel ngei ngei a ngai dawn. Khang hun chhung, hun harsa ka tawh chhung zawng pawh a min pui char char tu leh hmalam pan a ka kal zel theihna chhan ber chu Tommy a ni. Mahse a ni pawh tunah chuan min bum ţhin tu chauh a ni tawh. Engkim kha a der vek a lo ni reng a, a awmdan ţhin ngaihtuah chian lek phei chuan a awihawm hlawl loh. 

Thinrimin min vin khur khur dawn emaw ka tih laiin "Ka tihpalh" a ti ta zawk a, inchhungah ka nau a awm ve a ni tih hre lo ang hmiahin min kuah a, "Min huat nachhan ka hre tawh a, ka ngaihsak tawk ţhin lo che kha ka thiam loh a ni. Min biak leh min hmuh i tum loh chhan te, min huat chhan te hi ka thiam loh vek zawk" a tih zawm leh a, thudik a hriat meuh chuan a thiam loh thu bak sawi tur a hre lo a nih hmel. 

Lo kuah let ve in a nghawngah hmai ka phum a, he thuruk hi rei tak chhung ka thinlungah thukru bo in ka hliah khuh lui tlat a, min lo ti na tawh ţhin tu, tun thleng a la dam chiang thei miah lo ka ţhiat darh leh ta chuan min ti kehchhe vek a ni ber. 

Kan inbengdai tawh ni a a hriat hnuah dim te a ka sam chul pahin "Kha mi zan khan engthil mah a thleng lo" tiin min lo hrilh ve a, chhang let lo mah ila a sawi zawm hun ka nghak ran thung. 

Ka kal daih hlau ni awm takin nghet lehzualin min kuah a, "Khang hunlai khan ka la naupang a, ngaihtuah chiang mang lo a thil tih chang ka nei ţhin. Kha zan khan rui viau mah ila ka intiamna kha ka hrechiang a, hloh che ka duh loh miau vangin ka tiam ang a awm ngei ka tum. Mahse zingah message chhiar nuam lo pui pui i hnutchhiah kha ka hmu a, ka be thei lo bawk che a, kan inbiak hnuhnun ber ni a ka ngaihah lah kan inhau der si lo. Thiam zawk a in ngaiin ka ngaihven zawm duh lo che a, midang ka aţanga i chanchin ka hriat kha ka ring mai zel a, ka ngaihven duh loh lai che pawh khan nang chauh lo chu ngaihtuah ka nei ngai chuang lo" ti a inpuangin a insawifiah ve duah. Ka lung phu a rangin engvang ber nge ka hre lo va, tlawm ngawih ngawih ni a ka inhriat vang nge ka nat lutuk vang zawk? Kei ngei pawh hian ka hrilhfiah thiam lo. 

"Chan nawn leh che ka duh tawh lo" nghet charh a tih leh hnuah "Chan che duh lo reng chungin langsar takin ka ngaihven duh lo che a, ka hmangaihna che aiin min hmangaihna a nasa zawk tiin  ka inhrilh ţhin a, ka tel lo a i nun theih ring lo luiin i rawn let leh vat ka ring thung. I lak a ka rilru put ţhin dan te kha huat na a thlak thleng ka tum ţhin a, ka hlawhchham ţhak. Tommy a nen a in inkawp thu ka hriat hmasak ber te khan ka thinrim takzet a, inbe tawh ngai lo mah ila phatsan ah ka in ngai tho. Mahse ka haw ngai chuang lo che, ka ngai ţhin che. Ka bialnu i nih vang chauh ni lo vin ka ţhian i nihna ang pawn" dam deuh a a tih leh hnu chuan in la hrang hmasa zawk ah a ţang a, min kalsan tur ni lovin ka mittui min hruk hul sak tur chauh zawkin. 

Msa bawk chuan "Vawiin khan thudik ka hre ve chiah a, thikthu vang chauh a khatianga rawn ti kha i nih loh zia ka hre chiah. Nau i pai thu leh harsatna tam tak i tawk tih ka hre lo tak tak a, message kha hmu hman ila chuan ngaihtuahna leh tum dang nei lovin ka awm pui tlat ang che" a ti zuai raih a, a aw aţang ringawt pawh chuan pawi a tih ve zia a hriat. 

Nunhlui ah khan lungngaihna tam tak awm mahse la min ngaihsak loh hrim hrim vang a ni lo va, a hriat bik loh vang a nih zia a sawi chuan tlemin min ti lawm ve deuh a, kei leh naute kha a duh reng vang a kalsan a ni bik tlat lo a ni. Tlemin zang ve deuh tawh mah ila Msa hnenah chuan "Eng thil mah a la inthlak thleng chuang lo. Kan hriat loh vang leh kan pahnih a kan inhriatthiam tawn loh vang pawh ni se tunah chuan a tlai lutuk tawh" ka ti ta tho a, rang zet a ka kut lo vuanin "A la tlai lo, hun ţha dang min pe leh thei a nih chuan siamţhat ka tum ang. Thudik i hre vek tawh a, kan tum nawn leh thei lo mi? Fiona hnen aţang pawn engkim i hriat tawh kha" ngen ngawl zet a a tih hnuah "Tommy bik kha chu, a thil lo tih tawh ţhin ka hre vek tawh a, vawiin a a cheibawl dan che ka hmu bawk a, engtikah mah hnungtawlh zawkah ka ţang tawh lo vang. I tan a mipa ţha leh dik ni a i ngaih tlat vangin kaltir che ka rem ti a, Fiona ai khan a endan che danglam bikin a hmangaih takzet che ni ah ka ngai a, mahse tunah chuan a ni tawh lo" thinrim zetin a ti veleh thung. Ka tan a tling tawk tawh lo ah a ngai a ni ngei ang. 

Ka kut a vuan reng chu nuam ti lovin ka pawt let a, chhuanlamah "Lo che sek suh, i hmaiah damdawi ka la hnawih zo miah lo a nia" bah nawk hian ka ti a, kan thil sawi lai mek hi sawi zawm zel ka chak rih lo a ni. 

"Ka che lo..ka kut chiah---" min hnial tum a a tih lai mekin door bell a ri a, vawikhat mai a ni lo lehnghal. Tang hra a Msa enin "Tommy a ni tawh ang" zam tak chung hian ka ti a, ka huphurh deuhin a hria ni ngei tur a ni "Ka va hawng ang" tih leh thawh a rual a, door bell ri tawh lo mahse kan hawn hun a nghak reng dawn tih ka hria. Hawn tum a kal mai a tum lai chuan a banah ka lo vuan a, a rawn hawi let leh thuai. 

"A ngai lo, he ta a hmuh che chuan ani pawh a lungawi lo thar leh ang a, naupangchhia ang mai a che in buaina in thlen leh mai ang. In pahnih ve ve in in ti na tawk tawh. Thil chhe zawk a thlen leh ka duh tawh lo" ti a ka khap chuan a lungawi lo kher mai. 

"I la ngaihtuah cheu tihna maw?"  a ti hman chiah tihah chuan lo pawt chatin "Nangmah zawk hi i nat leh ka hlau" ka lo ti thuai a, mak a tih hmel takzet. 

Door bell a rik leh chiah chuah chuan choka ah ka pawt lut dawr dawr a, "Hetah hian ngawi rengin lo awm rawh" ti a ka chah thlap hnuah kawngkhar hawng turin ka kal leh hlawk hlawk. 

Kawngkhar ka hawn rualin pawn a Tommy-a lo ding reng chu ka hmu nghal mai a, "Him deuhin ka hmu che a a lawmawm hle mai" tih pah a engmah thleng lo ang mai a min kuah a tum chuan ka tawlh hnung rang hle. Na tih hmel zet a min en lai chuan hnunglam ka hawi zawk a, Msa leh Kimpuii te an rawn dak lo hlauh. 

"Eng nge i rawn tih?" chang fakin ka lo ti ve thung.

"I kalna tur awm a ka rinah ka zawng kual che a, min ti mangang takzet. I thinrim dawn tih ka hria mahse vawiin thil thleng kha ka sawifiah thei" a tih chuan nasa lo deuhin ka lo nui hul hak. 

"Eng nge i sawifiah ang?" elhsen zet a ka tih hnuah "Ka naupai chungchang leh ka tih tlak tak dan te i lo hriat ve vek thu em ni i sawifiah ang? Shillong a ka awm hnu thleng a Msa nen kan inlaichinna hre vek chung a i hriat loh der dan em ni min hrilhfiah i tum? Ka rilru tur ngaihtuah miah lo va midang hriat laia i sawi chhuah chhan te kha engtin nge min hrilhfiah i tum? Msa beih let nan a hmanraw rapthlak ber chi i hman chhan te kha i sawifiah thei dawn em ni?" ka ti zat zat a, ka thu hriat thar engkim a mal te te a ka thur chhuah tak khauh khauh ah chuan pha dui a min en chungin  min rawn hnaih hret a, "Chutiang a ni lo. Ngaihsak ber ang che a a lang leh Fiona ngei pawn thu maksak zet zet a sawipui reng che khan ka inthunun theihna min hloh tir a, ka duh loh danin ka awm phah a nih kha. Thiam lohna lai ka nei ve tih ka hria" a tih lai mek chuan "Ka chau lutuk" tiin ka lo pawt chat a, "Eng pawh sawi la tunah rih chuan ka ring dawn chuang lo che a, i thusawi ka awih vek thei tawh rih lo ang. I inbengdaih theih nan eng emaw chen chu hun in pe rih la, keipawh hmun awl min siam sak tel ve rawh. Rin loh lutukin engkim kha a thleng thut vek a, ka la ring zel thei dawn che nge ka thei tawh dawn lo ka hre lo takzet" ka tih hnu chuan zam tak chung hian Tommy chuan "Ka tihpalh a ni. Natna ka thlen che tih ka hria mahse min ngaihthlak ve a ngai. Dawt ka hrilh ţhin che tih ka pawm thlap mahse ka hmangaihna che hi chu dawt a ni ve lo. Ka hmangaih takzet che a ni" a lo ti ve thuai. 

"Min hmangaih takzet a nih chuan khawngaihin min kalsan rih rawh. Chipchiar tak a ka ngaihtuah theih nan hun eng emaw chen min pe phawt rawh" ngen ngawl tak a ka tih hnu pawh chuan "Ka tihpalh takzet" tiin ngaihdam min la dil tho a, thil ti sual nasa viau mahse hetiang a beidawng tak a ka hmuh vang hian ka awm a tawt ve up up thei tho. Ka haw dawn nge ka khawngaih dawn tih ka hre lo. Dawt min hrilhin min bum ţhin ngei, mahse a mangang takzet tih ka hria, chu chuan min ngaihtuah ve tak tak a ni tih min rin tir tlat a ni. Ani pawh Msa ang bawkin pem a nei ve thluah tho a, Kimpuiin a rawn hmuh ka hlau hle. A hliam pawh hre chang lovin min zawng buai ve char char a ti rilru in ngaihsak miah lo va haw tir mai ka duh bik lo va, "Min lo nghak lawk rawh" tih leh damdawi ka dahna lam a let ka rual a, Msa ka hnawih sak tho kha hum ran chungin Tommy-a min lo nghahna lamah ka kal leh thuai. A ban rek a vuanin damdawi chu a kutah ka dah a, ka hum tir hnuah "I hmai a hnawih tur a nih hi. I haw veleh i ti fai ang a, chumi hnuah chuan damdawi hi i hnawih dawn nia, zanin ah a na ve hlek anih pawhin naktukah a zia mai ang" tiin ka hrilhfiah a, ka damdawi pek chu enin a bu nghat a, "Khawiah mah kal bo miah suh, ka rawn bia ang che" a lo ti veleh vat. 

"Awle, tluang deuhin i haw dawn nia" tiin ka thlah a, a kalsawn hnuah pawh a rawn hawi let zeuh zeuh a, a lan theih chhung zawng ka lo thlir ve reng. Ka hmuh phak loh chin a thlen veleh kawngkhar ka khar a, ka kalh leh thlap hnuah kawngkhar nghengin ka ding a, mit ka chhing zui vang vang. Tommy berkher a ni hian min ti hrilhhai takzet a ni. 

"A kal tawh mi?" ti a Msa ţawng ri ka hriat chuan ka meng nghal thuai a, ţhutkhawmna pindanah lo ding leh run tawhin ngaihţhat loh hmel zetin min melh pah bawk. 

"Choka ah lo awm reng rawh ka tih kha" lungawi zan lo chung a ka tih hnuah "Ka awm reng a, i kawngkhar khar ri ka hriat veleh ngaihven tur chein ka lokal a nih hi" inveng ran chungin a lo ti ve thuai. 

Am zet a thawk ka lak halh hnuah ţhutkhawmna pindanah bawk chuan phei ve in sofa a ţhut hnawk pahin "Aw tunah khan a kal chiah" tiin ka phun sep. 

"A ţha vek em?" ti a min zawh leh chuan ka bu nghat a, "Aw ţha vek. In beng daih nan hun insiam phawt turin ka hrilh a, ka in ngaihtuah ve na hun min pe turin ka hrilh tel bawk" ka tih hnuah "A tlai tawh, nangpawh let ve tawh rawh. Fiona te khan an lo nghak reng ang che ka ring" ka tih zawm zat. Zanin tak chuan ka thik miah lo lehnghal. Khatiang teh hrep a kan boruak a awm hnu kha chuan an nufa te lek a an inluah a an let ka ring lo a ni. 

"An awm ţhang a, an lo awm thei mai ang. Ka duh ang ka la sawi zo lo ka tih tawh kha" a ti a, ka ţhutna lam panin a rawn pen phei hmawk hmawk a, ka ke dahna bulah ţhu hniamin "Zanin chu in inah ka awm tlaivar mai thei angem?" ti a min dil hnu phei chuan "Eng maw i sawi?" ka lo ti hluai. 

"Engtin mah ka ti lo vang che, ka sawi chiang ngam thlap. Mu miah lo in ka awm mai mai ang. I ţha ngei em chian ka duh a, ti ti pui tur che ka la nei hrim hrim a" a ti a, a zam ve deuh niin a lang. 

"Ka ţha alawm, ka rilru a na in lungngaihna tam tak ka nei a, phat kual ka tum hran lo. Mahse ka ţha tak tak, min ngaihtuah duh suh. Nangmah kha i chauh hmel daih zawk a, haw la hahchawl phawt la, naktukah kan sawi zawm leh dawn nia, kan sawi dun tur hian min nghak reng thei tho" ti mah ila "Ka nghak ve thei tawh lo. Kum tam tak chhung ka nghak tawh a, ka sawi duh ang hi sawi zawh vek ka duh tawh. A nih loh chuan a tlai tawh i ti leh dawn a, tlai reng bik ka duh tawh lo. Duh leh hetah ka inbual thei tho a, a nih loh leh ti hian ka awm zankhua ang a a ni mai" luhlul zetin a ti leh tlat tawh a, Kimpuii nui kur kur ri ka hriat phei chuan ka zak ru hle. 

"I sawi awmzia ni ta ber chu, inbual kan phal loh chuan khati khan i awm char char mai dawn maw? Buaina i tawk leh tawh a ni lawm ni? I insual a nih leh lek phei chuan i rimchhe ngawt ang" Kimpuii chuan a ti lang lang a, keiphei chu ka hawichhuak tawh lo hrim hrim. Kan thusawi engzat chiah nge a hriat hmang ang tih lam daih ka lo ngaihtuah. 

"Rawn riah duh a ţan i khawh lui tlat dawn a nih chuan inbual phawt rawh. I tlan bo rei bawk a i tan liau liau mikhual pindan ka lo ti fai ang" Kimpuii bawk chuan a ti leh a, rang lutukin ka hawi chhuak a, Msa pawh a lo ding ngil at tawh. 

"A ţullo hrim hrim, duh leh chaw ei se la, haw zawk rawh se" ti ve mah ila "Ka nu pawh awm se a phal tho ang. Ka tet laia min duat manah leh Lucy-i a puak hah ţhin man a ni mai" Kimpuii chuan a lo ti fiamthu a, choka ah a lut nghal daih. Lucy-i a tih hi kan te ber kha a ni. 

Msa lah chuan "Inthlakna tur ka nei lo" a lo ti leh hmanhmawh a, Kimpuii ber lah thawm dim miah lovin choka ah a che ri leh bur bur tawh. Ka pindanah lutin Tommy-a tan a ka thawmhnaw lei thar hlak ka phawrh chhuak a, Msa hi lian hret mahse a ha ve thei tho ang. 

Towel leh thawmhnaw ka pek hnu chuan kal nghal mai lovin "Ti nge mipa thawmhnaw te i kawl a?" tiin min lo la zawt tak deuh deuh a. 

"Tommy-a thawmhnaw a nih kha" ka tih chuan a nur nang. 

"A lo riak ţhin a mi?" a ti chiah reng a, "Lo riak zeuh zeuh" tiin dawt ka hrilh. A lo leng ţhin a, chuzawng chu. Chaw a lo la ei lo va, riah ngat phei chu keinin phal ringawt mah ila ka nu in a phal dawn lo hrim hrim. Msa hi chu a dan a dang deuh a, ka nu in thingpui dawr a siam lai a a chhawr pur pur ţhin a nia, Msa Aizawl a awm leh hnu khan kei ka awm lo ve thung a, awm lo mah ila reitak chhung kha chu ka nu a la pui tho. Ka naute zirna a hautak in pa kan nei lo hma bawk si, ka nu a buai lutuk hlauin a pui ve fo a, ka pa pawhin a ngaina a ni ngei ang a chemte ro deuh pawh Msa bawkin a kawl vang kha. Mahse engkim kha a buai ta nuaih a, a chanchin ka zawh ngai miau loh vang khan kan inţhen hnuah a pui zel nge ka nu te thlengin a bik bosan tih tun thlengin ka la hre lo. Boruak hrethiamin ka nu takngial pawn engmah a sawi ngai lo. 

Tommy-a kawr han haksak ngawt chu a hreh hmel hle a, hak tawh hnu ah a ngai a, a thar hlak a ni tih ka sawi duh lo. 

"Va ti vat rawh, Kimpuiin khan bathroom a hmang ve duh thuai ang" tiin ka lo tur a, Tommy-a thawmhnaw a nih thu ka hrilh hlim khan a thik tih ka hria a, min ti buai ţhin bawk a, tihbuai ve ka chak vang hrim hrim a hrilh lo ka ni. Inthlak tur a ka kal dawn thlengin naupang ang maiin thikthu a la tihlan kha. 

CONT...