NANG CHAUH-11

NANG CHAUH-11

REBECCA

Msa'n "Inbe lawk ang" a tih hnu a Fiona ban a kaih lai chuan ka hmuh dun chang leh a hming a lam rik chang apianga na ka neih ţhin khan min chhun tlang leh zawk a, khap daih hmak duh tawh mah ila ka khap dai hleithei ţhin lo. Inchhung a a luh pui hnuah Tommy banah sawi detin "Motor i ken tho chuan motor chhungah lo nghak rih mai ang. Kawt lai a din reng chu a nuam lo emai" ka ti a, kan kal hmaa Msa te luhna lam a melh lai ka hmu hman. 

Fiona thu min hrilh ho kha ka ngaihtuah zawm nasa a, Tommy-a sawi nen ka khaikhin fo. In an lohna tam tak a nei chungin Tommy hi ka mi rin ber a ni miau a, mi zawng zawngin min hnungchhawn lai pawh a min vuan a min kai kal a min ngaihsak tlat ţhin tu a ni. Chuvang tak chuan dawt hlawm tawp chu min hrilh ka ring lo a, Fiona sawi zawng zawng kha ka awih vek lo bawk. Msa nen a kan inţhen chhan hre lo âwm tak a a awm vel te khan ka rin lohna a belhchhan. Engkim mai kha lemchan vekah ka ngaih phah a ni. Mahse Tommy zawk rin vek ka duh laiin tun a ka hmuh dun leh dan khan ngaihţhat lohna tam tak min neih tir leh tawh. 

Nghahna tur hmun dang a awm lo bawk a, motor chhungah Tommy nen kan ţhu dun ran a, a reh tlawk tlawk a, kan pahnihin eng thu mah kan sawi chhuak lo. Hnuai lam bih tlatin ka malchungah ka kut ka dah a, tih tur dang a awm lo bawk nen, ka kut ţang ka khal niap niap. Min biak a tum miah lo ni a ka hriat hnuah "Fiona khan inhmuh puiah min sawm a, i buai ka rin vangin ka hrilh lo mai che a nih kha" tiin boruak reh leh rit lutuk ţhiat darh tu zawkah ka ţang leh ta nge nge. 

A lam ka hawi lai chuan inthiam loh hmel zet a min lo en ve in "Ka tihpalh a nih kha, khatiang a awm kha ka tum lo. A fapa--" a tih lai mek chuan lo pawt chatin "A ho lutuk, ţhian i nihna angin hnem a ngaih chuan i hnem tur alawm. A fapa a dam lo reng a ka hria, ka tlawh ve thu te ka hrilh nghe nghe che kha" ti a ka hrilh hnuah "Ti nge hetah kher a koh che? I kal leh tawh em ni?" tiin min lo zawt thuai. 

"Aw hmanni ah a pa te in a a kal ţumin kan inhmu a, a in thlengin ka zui haw" ka tih hnu a a mitmeng thim khup khup leh a inseh ruh nghal mai te chu ka hmuh hmaih lo. Zawhna min zawt miah lo va a ngawih reng takah chuan sawi zawm lehin "A ţhat loh hmel em vang khan ka ngaihtuah a, a hmel a dik lovin a chauh hmel em em bawk si. Thil a ei lo emaw zu a lo in leh vak a nih ka ring a, kha mi ni a kan inkar ka tih tawp vek hnu khan a a rilru put hmang a mumal dawn lo a ni tih ka ring sa a, ngaihtuah chiang mang lovin he in hi ka thleng leh a" ka ti a.

Ka thusawi a ngaihthlak zawh chuan hriam hrak a thaw hawkin "Anih chuan ka ţhianpa, i bialpa hlui ni bawk i la ngaihven takzet zia min hrilh mek tihna a ni maw" a lo ti hluk a, "Aw" ti a chhangin a thusawi chu ka pawm chawpchilh nghal.

"Ka bialpa hlui a nih vang a la ngaihven ka ni lo va, ka ţhian a nih vang a ngaihsak ka ni. Naupangte tak tak ka nih lai aţanga ka ţhian neih chhun a ni ţhin a, khatiang a mumallo tak a ka hmuh khan ka nam nul mai mai thei lo a ni. Ka bialpa ni ţhinin nunhlui sawi tur tam tak nei dun tawh mah ila kan inkawp nawn leh thei tawh dawn lo a ni tih kan hrethiam ve ve a, engkim kan ti chiang vek tawh bawk. Ka rual a kal zel tur zawk a ka duh chu Msa ni lovin nangmah zawk i ni ti a ka hrilh tawh che kha. Dik tak a awm ka thlan chhan leh thudik ka hrilh zel nachhan che chu thup ngai ka neih tawh loh vang a nia, min rin thu i sawi ţhin a, rinna hlut zia hriain rin theih turin ka awm bawk" ka tih hnuah chawl detin muk zetin ka melh a, "Mahse nang hi engtin nge ni ve? Ka hriat loh tur a thuhruk i nei em? Dawt min hrilh chang i nei em?" tiin ka zawt zui zat. 

"Eng nge maw i sawi le? Eng ber nge i hriat loh tur a ka thup i rin?" tiin min zawt let a, a zam zia ka hmuh rualin a awki dik lo pawh chiang takin ka hria. Mit la sawn duh lovin a mitmeng buai nak a melh reng chungin am zetin thawk ka la a, "Fiona" ka ti zui sep. 

"Eng nge Fiona chu?" a lo ti bung hmuk a, "In pahnih bik hian nunhlui in lo nei ve tawh em ni?" tiin rilru a ka vei ruk reng ka sawi chhuak. 

Chu thil ka sawichhuah hnu chuan min rawn awm hnaih rawk rawkin ka kutah a vuan a, "Chutiang a ni lo, kan...kan...ka sawi awmzia chu" a ti bah nawk nawk a, a ha sehchilh rap rapin a thaw a hriam hrak a, "A fapa vang a a hrehawm ti kha a lo ţap pur a, a awmdan khan min ţhawng a, tih vak ngaihna ka hre lo. Ţawngka a sawi dawnin sawi tur a vang angreng sia, Fiona hmuh lai a tih zah tum ran che ka ni lo. Ka awm dan avang khan ka tih palh, khawngaihin thinrim nan hmang suh" chiai tak chunga a tih hnu chuan "Ka zawhna ber kha i chhang lo" tiin ka lo hrilh nawn leh. 

Insiam ţha in hmalam enin a ţhu a, "Eng nunhlui nge neih pui se min tih? Msa nen an cheng dun a, ka ţhiannu a ni ve tho bawk a, an chanchin sawi i duh miah loh lai khan an inah ka kal zeuh zeuh. Chu zawng chu" a ti liam puat puat. 

A lam la hawi zui rengin min chhan dan a hmin zo chiah lo chung chuan "Ka thin a rim reng reng lo mahse tihsual tawh chuan hlauhna kan nei lian tawh a. Ka lo ding ve reng min rawn hmuh khan nangmahah pawh hlauhna ka hmu tel a, eng emaw chu a awm tiraw? I awm dan en khan ţhian mai mai leh a rilru hahna i hnem vang ringawt niin a lang lo. I tan a mi pawimawh deuh bul a awm i ang zawk mah" awki dam dapin ka ti a. 

Keimah a awm hi thikna nge natna a nih ka hre lo. Ka chiang thei tlat lo. Chhungril a hlauhna ka neih tlat na hian min ti hahdam lo tih erawh chiang takin ka hre thung. Tommy hian Fiona a duh ve ang tih ka ngaihtuah thleng pha ngai lo hrim hrim. 

"Ka mi rin em emin mualpho takin min siam a, nang pawh inveng uluk rawh. Kan hnaih a awm, min hmangaih tak tak tu ni a kan ngaih te hian min bumin min ti na duh chawk a nia" ti a Fiona thu min hrilh kha ka hrechhuak leh uar uar. 

Nunhlui an lo nei dun tawh tak tak a nih chuan Fiona thu min hrilh khan tunah hian awmzia a nei ta ziah tihna a ni mai. An pahnih inkarah hian tang rengin Tommy hian mualpho tawkin a lo siam tawh em ni ang? Mahse chutiang a tih duh chu ka ring si lo. Ka ngaihtuah chian poh leh ka hlauhna a ţhang lian zual zel. 

Tommy chuan am zet a thawk a lak leh hak hnuah "Chutiang a ni lo, Msa'n min inhmelhriattir ni aţang khan inpawh takin kan inkawm zui zel a, ţhianţha pangai chiah kan ni. Msa nen a an inkawp nghal thu ka hrilh fo che kha, min rin ngei a ngai ang. Nangmah bak hmangaih ka nei lo" a lo ti veleh a, nghet takin ka kut a chelh pah reng. 

Ani ang ang a min ngaihsak tu leh ţha tak a min cheibawl tu hi khawvelah an awm kher lo vang. Chuvang tak chuan min hmangaihna hi ka la ringhlel chhin ngai lo. Mahse tun ţum chu eng emaw ngaihţhat loh riau na ka nei tlat. Thup a nei ni tlat a hriatna ka nei a, ka thil hlauh ber a ni bawk. Phatsan leh bumin ka awm leh mai ang tih ka hlau a ni. 

Zawhna dang ka zawh leh hmain Fiona te nufa leh Msa te rawn chhuak ka lo hmu hman a, "Fiona leh Msa te pawh an rawn chhuak alawm" ti a hrilh hriat ve hnu chuan min vawnna thlahin a ţhu ţha sawk sawk a, Fiona vang a kal ka ni bawk a ka hmuh rual a chhuk mai ka tum chu "Khaw nge i kal dawn? Kan la sawi zo reng reng hleinem, ngaihruatna mawl mawng tak tak nei nghal ringawt suh. Ka hrilhfiah ang che" tiin min lo be ding a, "Awle nakinah kan sawi leh dawn nia" ka ti ţha ve mai. 

Motor aţanga ka chhuah rualin Tommy pawh a chhuak ve nghal zat a, "In lo la awm a ni maw?" ti a Msa'n min rawn biak chuan nin hmel zetin a thaw hawk a, "Kan la awm ve reng a nih hi" tiin a chhang bul hmuk bawk. 

Kan pali chuan boruak khirh tak hnuaiah kan ding ţham a, Tommy an "Tih tur a awm tawh lo bawk a kan haw san mai ang che u" a tih veleh Fiona chuan "Rebecca inbe lawk ang" fir zet hian a rawn ti ve zat. An pahnih chuan hrilhhai zetin ka en tawn a, "Sawi hmaih ka nei ka tih tawh kha" min melh ran chung hian a ti leh a, Msa leh Tommy chu "Bawihtea hi min lo ven sak lawk rawh u" ti a a ngen hnuah amah zui turin min mitmei a, Tommy-a zawk chuan min dan tum viau mahse sawi nawi lovin ka zui ve mai. 

Inchhungah inzui lutin ţhutthleng pakhatah kan ţhu dun a, inhawng tak a kan titi hmasak ţum ai kha chuan kan inhnaih deuh. 

"Ka fa neihna ka tih ziah kha a hming ka hrilh theihnghilh che a" a ti ţha leh a, ka tan a pawimawh a nih ringin sawi turin ka lo hrilh. 

Min en vang vang hnuah harsa tih hmel zet hian "Tommy" a ti chhuak hap a, a thusawi chuan min ţhawngin na tak a vuak chawrh ang mai ka ni. Sawi tur pawh hre lova inpet ruh ţeuh chungin en ngai ka en tlawk tlawk a, chhuah nghal nal nal duh mah ila che hlei thei lovin ka zawi vek a ni ber. 

"Min rin leh rin loh ka ngaipawimawh lo a, min ring tur a nawr luih che ka tum hran lo. Mahse i hriatna khan eng emaw a hrilh ngei che ka ring. Pianpui finna kan neih hian thil dik leh dik lo te, rin tur leh rin loh tur te min hriattir ţhin. Thinlung chauh ni lo kan hriatna in a min hrilh te hi ngaihthlak ve a ţul chang a awm ţhin" a tih leh te pawh chuan chhan ngaihna ka la hre chuang lo. Ka hlauh ber ka sawi zo chiah a, ka hlauh ang chiah a thleng nghal pang a, ngaihthlak a en liam mai mai theih chi a awm miah lo bawk. 

"Msa nen in inţhen rualin Tommy nen khan in inzui nghal daih a, Lalrinmawia hnen aţangin in chanchin kan lo hre ve fo. Hma i sawn nghal mai kha mak ka lo ti ţhin che a, mahse Tommy nen khan in inzui nghal chiah em? Nge an dawt phuah chawp zawk?" tiin min zawt ve thung a, za lo deuhin ka lo nui hul hak. 

"Min ngaihsak miah lo tu chuan hriat a phu reng hleinem. Midang ka aţanga in hriat chu in lo awih nghal mai maw? Chutiang chuan em ni min lo hmuh ţhin?" ti a thinrim zet a ka zawh laiin a ni chuan mak ti hmel pu tak hian "In inkawp nghal lo maw?" a lo ti ve thung. 

"Ka nun a mipa awm chhun ni reng ţhin a ni a, na tak a min siam hnu lawkah hma lam pan a mipa dang ka vawn lehnghal mai theih i ring reng reng em ni? Nang ang ka nih ve loh hi, taksa hmangin tu mipa mah tih lungawi ka tum ve ngai lo a, mipa hrang hrang ka mut pui lawr duah ngai lo. Mi ngaihzawng lek phei chu" ka ti bak hluk hluk tawh a, a chungchang ka sawi chhuah tak vang chuan na tih hmel zetin min en tlawk tlawk. A mittui tling pam te chu hmu lo derin "Msa puihna i mamawh vang chauh a awm ve reng i ni maithei, loh theih loh thil anih phawt chuan ka hrethiam lutuk che. Mahse i hmang ţangkai a, min hnawh bo tumin hma i la char char a, i lemchan hi ka ning zo zai tawh. Nang ang a lepchiah turah min ngai ve hlek suh" ka ti leh fek fek. Tommy vang a ka thinrim tawh sa nen ka insum zo ngang lo a ni e. 

"I chapo lutuk vangin thudik tak i zawng duh lo zawk a nih kha. I dik reng bik loh zia i hriat ve a ngai. Tommy hi i ngaih ang a thianghlim a ni lo. A fapa pawh pawm duh lovin ti tla turin min hrilh a" a tih leh chuan thil dang zawng aiin min deng na zawk. 

"Eng tin maw a tih?" tiin ka lo zawt thuai reng a ni. 

"Ti tla turin min hrilh a, hmangaih dang a neih vang a a pawm theih loh thu min hrilh. Kei lahin engpawh huam a pai tlang ka duh zawk a, buaina tam tak tawk dawn mah ila ka ril a rah ngei tihlum turin huaisenna ka nei lo. Ti tlak ka tum loh thu ka hrilh veleh min ţhen a, min lo hmangaih loh zia ka hriatchian phah. Mahse nang erawh chu a hmangaih takzet che niin ka hria, a en ţhin dan che hian vawikhatmah min en ve ngai lo" a ti melh melh a, ţap lo turin a insum nasa hle. 

"I thu min hrilh tawh zawng zawngte hi remkhawm dan ka thiam lo. Na tak a min sawi dawt dawt thei vek i sawi a, dawt leh thudik ka thliar hrang thiam rih lo" chang fak hian ka lo ti leh. Ka hriatna a buai nuai nuai ringawt a, dawt leh thudik ka thliar hrang thei rih lo tak tak. Ka mi rin ber leh rin loh ber, ka lo huat em em ţhin te inkar a ni lehnghal. 

"Mahse rindan chu i nei, i ngaihdan neih tawh sa i paih thla hreh mai mai a nih kha. Ka hrilh lawk tawh che kha, min hnaih tu te hian min ti na fo. Tunah hian thudik chiah ka sawi, hospital a min rawn tlawh ţum pawh khan dawt ka hrilh miah lo che. Lalrinmawia hnen aţang ngeiin kan hria a, nau ka pai hnu khan Msa nen in inţhen hnu lawk aţangin a ruk a in inkawp char char thu a sawi. Chutiang chu ni lo se Msa hi rei tak chhung a reh tlawk tlawk lo ang. Tommy leh Bawihtea chungchang chu, i duh chuan i finfiah thei ang. I duh duhin i ti dawn nia" inringtawk zet hian a ti a, a fapa a ngaihsak zia mit ngeiin ka hmu tawh a, a fapa chungchangah chuan dawt a sawi ka ring lo a ni. 

"Min lo hmang ţangkai kual vek tihna a nih ber chu. I fapa tel ve naah kha chuan dawt i sawi lo ang tih ka hria mahse thil dangah chuan tu nge rin tur a rin loh tur ka hre lo. Ka sawi tawh ang khan i thu min hrilh zingah te pawh khan dik leh dik lo ka la thliar thiam chuang lo" tih leh din ka rual a, kawngka pui lam pan a ka kal hmawk hmawk chu min umzui det det. 

"Dawt ka hrilh miah lo che ka tih tawh kha. Msa nen a in in ţhen chhan tal hi min hrilh ve thei a ngem? Hriat engmah ka nei lo takzet a nia" a ti pah mawlh mawlh bawk. 

Pawn ka chhuah hnu chuan Tommy-an pawisawi loh hmel zetin min lo en a, ka hua nge haw lo ka inhre thiam rih lo. 

"Ka tel ve na anih chuan tunah hian sawi law law rawh. I zep tlat a nih chuan ka sawi chhuah tak zawng zawng khan awmzia an nei lo ang" ti a min ngen lawm lawm chung a ka banrek a rawn vawn chuan rang zet a hawilet in ka kut ka phih dawrh a, ka insum zo lo chuan a awmah na vak lo in ka nam, a inring lo bawk a nam na lo viau mah ila hnung lamah a pai chhat chhat. 

"In mut dunna ngei min rawn thawn hnuah pawh i la haider cheu dawn tihna em ni? Pawisawi lo ni awm tak khan awm kual vel tawh suh" ka ti vin tuar a, ka bul velah tu tu nge awm ka ngaihtuah hman tawh lo. Mak ti awm takin a meng kawk a, a ang pham lehnghal. 

"Chutiang chu ka thawn che maw?" ti a min zawt lehin amah leh amah a inkawk a, ka lo ner nawk. 

"Thawn e, i phone number ka kawl reng ţhin. I phone aţang ngei a kha thlalak kha dawng ka ni" ka tih lai mekin tu emaw hian ka darah nghet zet a vuanin min kuai her lawp. 

"Eng thlalak maw i dawn?" tiin Msa chuan min zawt a, ka chhan hma hmain dawhthei lo zetin "Eng thlalak nge i dawn?" min sawi det pahin a ti leh khur khur. 

"In pahnih a in thlalak" tham ţiak hian ka ti a, a ngaihna an hriat loh hmel hle. Kei lahin hrechiang inti fe in ka dawn ni te nen lam ka sawi fak fak thei a, ni zat ka sawi hnuah pawh Fiona chuan "Chu chu eng ni ber nge? Ka thawn miah lo che" a la ti ţalh. Lem a chang der leh vel te chu ka lo haw hluah hluah. 

"I hre lo maw? Thu tam tak i tiam zut zut kha, zu in tawh lo tur te, min neih ngei i tum thu te in. I rui lutuk a i hre tawh lo em ni?" tiin Msa chu ka zawt ve thung. 

"Kha zan a thil thleng kha hriat ka nei lo. Fiaona, kei leh" a tih hnu chuan chawl detin Tommy chu a melh vawt raih a, "Nang chiah kan awm" a ti nghet charh. 

Engmah la hrethiam chuang lo ni awm takin Fiona chu a la ding zum zat a, Msa bawk chuan "Zu kan in ho vek a, kan inbiak zawh hnu khan a tawp nan tiin ka inbelh nghek. Ka duh tawk hnuah mu turin ka kal hrang a, chu chu ka hriat chin a ni mai" a ti a, ka ngaihthlak duh ngai miah loh kha tunah awlsam zetin a sawi fiah leh ang lawi a, Fiona a la ngawi ran thung. 

"Thudik i sawi a nih chuan i mut hnuah Fiona hi i pindanah rawn lutin khatiang thil kha a ti tihna em ni?" tiin la ringhlel reng chung hian ka zawt a, "Kei aiin a mu hma" ti a min chhan leh hnuah Tommy hnenah bawk chuan "I tih a ni em?" a ti nghut a, chhanna dawng miah lo mahse a tih a ring ni ngei tur a ni "Min lo bum reng maw? Kei leh Fiona mai ni lo i bialnu thlengin i bum. Engtin nge i tih theih zawk a? I hmangaih zia leh i tih nat miah loh tur thu min hrilh reng chungin dawt i hrilh char char a" a ti a, a chiai in tun lawk a a thil hriat thar chuan a ti mangang ve takzet niin a lang. A ţhian kawm ngeih ber pawl a ni a, buai chhe viau mahse mak ka ti lo vang. Kei takngial pawh hian rilru mumal ka pu thei lo va, buai chhe lo turin ka inthunun hram hram. 

A insawifiah dawn emaw tih laiin Tommy chuan "Mi thianghlim angin awm duh suh. Hman a i thil lo tih tawh kha sawisel bo a awm lo" tiin Msa chu a khak a, ka awm lai reng a a thil sual lo tih tawh an phawrh sak avang chuan a thinrim a insum zo lo a ni chek ang chu "Nau ka pai tir te te hnuah naute ti tla lo thei lovin ka siam ve em hleinem" a ti chhuak ta khawl a, Msa chiah a vaw let emaw a in tih laiin na takin min vaw tel ve. Ka nghing dawt a, ka taksa pumpui a lum chhuak vek. 

Ding khawng at chungin hlauthawng tak chungin Msa chu ngam leh ngam lovin ka melh a, a kut a hum nghet hle a, Tommy chu that duh mai hmel a pu. 

"Eng naute? Tu maw rai?" a ti vawt raih a, khawvel hi a ding chawt ni maiin ka hria. Ka mit chu mittui in zûk kual nghal thuaiin ka mit chhung lam a chìm nasat hmain tih thawp theih inbeiseiin ka khap fak fak a, ka hriatna zawng zawng te chu na hlirin a luah khat vek a, tawrh a har takzet tawh. Thawm engmah ka hre lo va, ka hma lawk, min hlat lo te a mipa ding chiah chu ka hmu thei bawk. Min hmangaih em vangin ka natna turin engmah a ti lo turah ka ngai ţhin. Tommy-a hnaih lehzual tur chuan muangchangin ke ka pen chhet chhet a, a hma zawn chiah a ka din hnu a amah en tur a ka dah chhuah meuh chuan mittui ka lo dan beh ţang ţang kha an luang chhuak ngiai ngiai tawh a, ka thil hriat zawng zawng te chu mak ka ti takzet. 

Chiang tak a min en hnu chuan chhia leh ţha hriatna nei let leh ni awm tak hian ka hming a min ko in min khawih tumin kut a phar chhuak a, min tawh hman hlau takin hnung lamah ka tawlh let thuai. 

"Harsatna ka tawh chang chuan ka be hmasaber ţhin ngei che a, thil thar eng emaw a awm in hre hmasaber i ni ziah bawk. Depression ka neih nasat lai a min rawn tlawh ţum te khan doctor min hmuh pui ngei a, mahse ka natna vang chauhin. A chhung a lut ve lovin pawnah min lo nghak daih lehnghal. Ka bul a i awm theih loh chang pawhin ka be reng ţhin che a, ka dinhmun chhiat lai ber pawh a min ţawiawm tu awmchhun i ni. Ka thil tawn tam zawk hrilh ţhin che mah ila nau ka pai thu kha tu hnenah mah ka sawi chhuak lo. I doctor min hmuh pui ngei pawh kha engmah ka hrilh lo" ka tih mawlh mawlh hnu chuan chawl detin hriam hrakin thawk ka la hrawk a, muk zet a en chung hian "Engtin nge Msa fa ka pai tih leh ka ti tla a ni tih i hriat?" tiin ka zawt zui zat. 

Thunun theih loh khawpin ka biangah mittui luangin ka khaw hmuh ti phe ruai mahse Tommy-a mitah tak chuan ka en lui char char a, ka thil hriat leh hmuh zawng zawng te hi a makin ka awih thei lo hial zawk. Ka hmangaih leh hmangaih loh hre miah lo mah ila ka duh a ni tih erawh ka hria. Kan hun hman dun ţhin zawng zawngah khan pawimawh lo lai a awm lo a, mi zawng zawng aia ka khawsak leh nun a hniam bik lai a ka tawn a ni. Ani pawh ka kiangah awm rengin min pui a, min kaihruaiin min hmangaih a, mi pangai angin ka nun leh theih phah a ni. 

Rei tak chhung tal buaiin min hlat tur a nam sawn ka tum nasa ve ţhin. Ţhian kan nihna kha duhtawkin inlaichinna neih pui duh lovin nam kian tum ngang ngang mah ila a rawn let leh vat ţhin a, rilru ngil tak ni a ka hriat vangin ka inhneh tir ta nge nge a nih kha. Kan inkawp nghehna la rei lo viau mahse ţhian kan lo nih reng tawh vang khan ka hrethiamin ka hrechiang tel viau emaw ka lo ti ţhin a, a felin fiamthu a duh a, ka chauh ber chang pawh a min ti nui thei tu a ni ţhin. A rilru a ngilin dik takin thil a ti ţhin emaw ka lo ti reng ţhin a, mahse tunah tak chuan a ngaihna ka hre lo takzet. A hma ang khan amah a nih leh nih loh ka hre chiang thei tawh lo va, hriat ngai miah loh mikhual ang mai a ni tawh. 

Tommy-a hnen aţanga chhanna ka dawn loh hnu phei chuan mahni leh mahni inkhawngaihna nei chawp chilh nghalin ka mittui luang hruk fai pahin za lo zetin ka nui hul hak. 

"Engkim i lo hre vek tihna a ni maw? Msa nen a kan inlaichinna te kha i lo hre vek a, nau ka pai a ka ti tla leh a ni tih thlengin i hria. Ka hun hman dan zawng zawng kha i lo hre ru vek a, min lo bum mai mai zawk a ni. Min ţanpui tu angin i awm der a, min duh derin min hmangaih der a, Msa nen a kan inţhen hlen theih nan a der bawkin inlaichinna min neih pui a, i fapa leh i bialnu hlui enkawl tu tur atan a i duh vangin. Tun maiah pawh khan Msa vuak let nan min hmang ţangkai leh a" ka tih lai mek chuan "A dik lo vek" tiin min lo pawt chat a, "I tan a ka thil tih zawng zawng te leh ka rilru put hmang te kha a tak tak vek. A der mai maiin engmah ka tih sak lo che a, ka hmang ţangkai ngai lo che" a tih zawm leh a, khua tlai ruai tawh mahse ka dinna ngaiah ka ding lui tlat a, chet sawn nachang hre lo mah ila Msa zawk chuan Tommy a hlat turin min pawt sawn. 

"Nau i pai maw?" ti a min zawtin ka hriatna mang ruai tawh chu kaih thawh leh tum ni awm takin min sawi a, "Nau i pai maw? Tu fa maw a nih?" tiin min zawt leh a, chhan tum zuau ţhin mah ila chhan dan mai ka hre lo. Sawi hmasak tur ber pawh ka hre lo. 

"Keimah a ni em? Sawi vat teh" vin zet hian Msa bawk chuan a ti leh a, zawhna ngai hlir min zawtin min vin vak vak mah sela Tommy ngawt chu ka la melh ran reng tho a, thinrimna leh natna hlirin ka khat a ni ber. 

Chhanna ka pek duh tlat loh vangin Msa pawh chu a beidawng ve ta a niang, min vawnna thlahin bang nghengin a ding a, inbe miah lovin kan ding reng ringawt. Tommy takngial pawhin min rawn hnaih ngam tawh lo. Vau lawk miah lovin Msa chu a ri phut a, Fiona ţe tuar thawm ka hriat chuan Tommy chu kawt lai zawl laiah a lo let reng tawh. En ve reng mah ila thinrimna, zahna leh natna te, thil tam takin ka hriatna an tih nut phut vangin ka mit hmuh a thil thleng mek chu ka sawifiah thiam lo. 

Khua a thim deuh ruai tawh a, ţhenawm hnai lutuk an neih loh vangin eng lo chhuahna tur a awm mang lo. Chuti chung chuan ngawi rengin gate aţang chuan ka chhuak a, min rawn umphak hlauin taxi stand ka thlen hma chu chak zetin ka kal hmawk hmawk a, ka thlen hmain taxi lo tlan remchang ka hmu hlauh. Ka zawn a a rawn din rualin ka ţhu lut nghal vat a, kan veng awmna ka hrilh hnuah glass down in thli thaw ka inchhem tir a, min hmangaih tu ni a kan ngaih, kan mi rin tak ten min bum hian tawrh dan thiam a lo har zawk daih a nih hi. Fiona ka huat ngawih ngawih lai a amah vang a ka nat ţhin lai ai pawh khan tunah hian ka na daih zawk. 

Ka pa thih zan a ka kalna ah bawk khan kal lehin hmun biru deuh hlek lai a phul ah ka ţhu a, a tlai tawh bawk a tunah chuan tlai tin a naupang inkhel ţhin te pawh an thawm hriat tur a awm lo. Ka mimal buaina hi ka chhungten an hriat ka hlau ţhin a, in thlen hma a inbengdaih phawt ka duh a ni. 

Ka sual vang hrim hrim a ka nau pai lai kha paih ka ni bik lo va, duhthlan tur ka neih loh vang zawk a ni. Ka hriat zan la la in Fiona hnen aţangin khatiang thlalak maksak deuh deuh kha ka dawng a, thinrim vang a ka biak duh loh hnu khan a bialnu ka nih angin min thlem heuh heuh turah ka ngai a, mahse a peih rei lo. Vawi hnih thum vel ka chhang duh lo a, a reh zui ve vang vang. Ka luhlul em vangin biak hmasak leh ka tlawmngai tawh a, Fiona nen an hlim dun zel turah ka ngai hmiah. Zirlai ka la ni a, kan dinhmun chhiat zia hriain zir zawm zel ka duh a, kum khat lek pawh ka chawl phal lo. Ka in ngaihtuah ve nasa a, Tommy-an min rawn tlawh ţum te khan hrilh duh viau mah ila ka ngam ngang lo a ni. Hlau chung chungin kha thil kha ka ti ve tho a, tun thleng hian nuam tih loh rukna ka la nei ţhin. Thil dangah khum vekin inhre mah ila huaisen lamah erawh Fiona ka tluk lo. Ani chuan thil dang aiin a fa a thlang a, keichuan ka naupai lai ai khan thil dang, kei leh ka chhungte nawm sak zelna tur ka thlang thung. Inthiam lohna ka neih chang pawhin inkheng khawng luiin zirlai ah ka bur tluk tluk a, ka rilru a a luh loh chang pawhin ka bih lui tlat zel. Tuman an sawi chhuak tawh dawn lo emaw ka tih hnuah Tommy khan a rawn sawi chhuak leh a, ka fimkhur tawk lo a ni mahna. 

"Hetah hian i la kal ziah a ni maw?" ti a Msa'n min rawn zawh thut chuan ka phu zawk a, mak tiin ka meng phar nasa hle bawk. Muangchangin ka ţhu ngil a, hawi let lem lo hian "Engtin nge hetah ka awm tih i hriat?" tiin ka lo zawt ve a, ka bihruk chang pawh a min hmu zawng hmu chat thei ţhin si ngati nge khang kum chhung khan min zawn ngai miah loh le?

"I lung ngaih chang apianga i kalna leh i nihna ang a i lan ngamna hmun a nia" tiin min lo chhang a, a sawi dik chiah. 

"Nang aia ngaihsak ka nei ni a i hriat vang a min hremna chu hetiang hi maw? Ka hriat loh tur a thudik thup tlat leh min hrilh i tum miah lohna hi" a ti a, thudik chuan a ti na ve takzet a ni tih hre turin amah ka hmuh kher a ngai lo. A aw aţangin a hriat vek. 

Nghet zet a ka kut hum ruhin am takin thawk ka la a, tawi te a nui chungin ka hawi let  ta nge nge. 

"Aw kei aia hmeichhe dang i ngaihsak zawk vang khan ka hua che. Hnaih lo turin ka ti fo che a, ka naupan vang leh hmeichhia ka nih vang a ka thikthu chhiat bik vangah i ngai tlat a, ka thu angin i awm duh lo lui zel. Ka nun zawng zawng i tihchhiat vang te leh min tih nat em vang te paw'n ka hua che. Pasal nei lo va nau pawm ai chuan zir zawm zel ka duh zawk a, chuvang chuan ti tla turin thutlukna ka siam phah ta a ni. Inthiam lohna leh natna i hriat ve theih nan a that ka ni bawk" tiin ka phun sep sep a, thinrimin min vin vak dawn emaw ka tih laiin min rawn hnawih leh hretin ka bulah a rawn ţhu ve a, "Chutiang chuan i ti lo ang" awki dam deuh hian a ti ta zawk a. 

"Eng ang pawn min hua la, min huat vang ringawtin i ti hlum lo ang. Mi aiin chhungkua i ngaihlu zawk a, ti lo thei lo a siam tu che a awm vang zawk a nih kha" min ringtawk zet hian a ti a, ka thil tihin a vuak nat zia chiang takin ka hmu a, chuti chung a thinrim miah lo va ka bul a a la awm thei chu mak ka ti hial zawk.

CONT...