NANG CHAUH-2

(Youtube lamah pawh min lo comment sak ve ţhin dawn nia🥰)

NANG CHAUH-2

"Msa kha haw hma a tum em ni? Ngati nge a chhuah tak daih?" Puipuii'n rawn ţhut ve pah a a tih chuan "Ka hre lo le" tih ringawtin ka chhang. Lalrinmawia nen khan an chhuak a, Tommy biak lawk tum a thawh zawk ka tum lai takin Puipuii a lokal leh ta si a, ka ţhu veleh mai. 

"Hringnun hi kan duh angin a kal vek thei ţhin lo a ni tiraw?" zawi te a a tih chuan lu ka bu zeuh a, "Ni ngawt mai. Mahse Pathian remruat dan a nia, kan duh apiang nei thei ila Pathian auh nachang kan hre nang. Kan tan a ţha turah ngai zel mai ang" ka ti a, Pathian remruat dan leh kan chung a a rorel dan hi a chang chuan hriatthiam a har ţhin ngawt mai. Kawng mam ţha takah kan kal mek emaw tih laiin a bubohin a ki kawi thut a, a tello a kan awm theih loh zia leh kan lo mamawh zia kan hre thar leh ţhin. 

"Nang chu i hlawhtling tawh a, i chanchin hre tam lo mah ila ka en che hian hna ţha tak inei tawh niin a lang. Ka hmuh tirh che khan i hahdam hmel a, khatianga hahdam hmel pu khan ka la hmu ngai lo che. Msa nen in inbiak zawh hnu a ka hmuh leh che hian ila theihnghilh tak tak lo niin ka hre leh a, kan inkawm lohna rei tawh viau mahse thil tam tak danglam lo a la awm a ni" a ti dap dap a. A sawi dik chiah reng a ni. Boruak nuam takah hahdam fe a ka awm laiin chhum chhah tak a rawn zing thut a, ka buai hman ţhelh anih kha. Naupangte ka nih lai a ka bialpa anih tawh vang a theihnghilh thei lo ka ni lo va, ka nunah hian midang zawng aia hmun chang hnemin pawimawhna a ngah zawk. 

"A chanchin ka hre ngai bik lo va, ţhian a ngaina ve em a, nang lah ţhian tam deuh kawm thiam lo chi i lo ni bawk nen, in inzui rei ka ring lo hrim hrim a" ţawngkam leh awki pangai takin a ti a, min deusawhna hriat tel tur a awm ta lo. Msa chanchin sawi reng ka ning deuh hlek a, tum loh deuhin ka hmu thut bawk nen, ka ngaihtuah zui reng palh ang tih ka hlau bawk a, ka hlauh zawng zawng pumpelh nan "Nang engtin nge i awm tak zel?" ti a zawtin kan thupui ka thlak. 

"Min awt lo ngawt ang. Pasal ka nei a, fa pahnih ka nei tawh, hmelţha deuh deuh" a ti a, a nui ve tak na a a nui chuan a mit a thleng pha tlat lo a ni. 

"Chhungkua i din der tawh anih chu. Chhungkaw din te chu an awhawm lutuk alawm" ka tih hluai laiin "Chhungkaw hlim din thei chauh ka awt" a lo ti khauh. Sawi tur ka hriat mai loh vangin min hrilhfiah hun ka nghak a, a hawi kual a, tui a in a, a kut humin a phelh leh ţhin bawk. Chuti ang a rei tak a awm hnuah chuan min rawn enin za lo chung chungin a nui lui a, "Min awt miah lo ang" zawi te thoin a ti leh. 

"Mi hausa fapa ania, a hunlai a zir a thuamhnaw nalh leh man to nei ve zel thei chin" a ti a, a chawl leh det. Mi hnem thiam lo chi ka nih avangin ngawi rengin dawhthei takin a sawi zawm hun ka nghak zel. 

"Thawhchhuah a nei lo va, a chhungte pawisa hmanga thilpek man to leh ţha fe fe min pek ţhin lai te khan ka intihtheih pui ţhin hle a, chhungte rinchhan tur thoin pasal ka nei. Hna kan nei lo ve ve a, kan inthuamna a changkangin kan nalh dun viau zel thung. Zu in a ching a, a hunlai kha chuan pa ka ti tlat. Chhungten ka pasal atan zu in mi an duh lo chung khan hmeichhe ţhenkhat ang thoin siamţhat theih inringin ka nei lui a, 'kan innei ang a a sim ve mai ang' tihna rilru ka pu tlat. Mahse ka ngaihdan ang kha a lo ni hauh lo, mipa zawng zawng an ni vek e ka tihna a ni miah lo va, ka pasal hi chuan min nei a, a ngaih a ţha a, zu a in nasa zual sauh a, min namnulin ka thinrim a pawi ti lo tial tial a, min thlem thatchhe tual tual a, kei ai mah a thinrim a ching thuai. Ka pasal a sual bawk, chhungte chawmhlawm mai kan ni bawk si, fa kan neih hnu phei chuan ka inthlahrung ţhin hle. A unauten nupui an nei ve a, keini ang a buaipui ngai tumah an awm lo. Mihrang na na na chu ţhatna in a daih reng seng lo va, ka rilru natna tur a ţawng zeuh an ching chho a, indan hial an sawi rik takah chuan insiamţha a hnathawh tur zawng ve turin ka pasal ka nawr nasa ţhin. Zantin hrilh ve melh melh mah ila awmzia a nei lo. Fa kan neih leh hnuah inhrang kan chang ve ta ngei a, pasal rintlak loh ka neih miau vangin a rem rem ka thawk. Ka pawisa khawl zu in nan a lak chhuah ruk vek te a ching a, hausa leh nuamsa ţhang a ni bawk a hnathawh a tum der lo. Thiam fal bik a nei lo va, a lo changkan ţhin em vangin a phak tawk a thawk zak leh si. Ka nun hi ngaihtuah phak bakin a hrehawm a, ka fate vang hian ka tuar hram hram a ni ber" zuai raihin a ti a, rethei ngai lo a ni a, a nawm sak ţhin tehlul nen ka khawngaih kher mai. Mihring hi a ngai rengin kan awm thei lo reng a ni. 

"A zia lo hle mai. Hmeichhia hi chu kan lo chhel takzet. Inţhen hi thil ţha ber a ni lo va, in retheih viau chuan fa neih belh tawh rih lo la, i fa te vangin i la tuar ţang ţang a i fakawm thlawt. Hre sa a nei tan ngat phei chuan tawrh chhel a ngai lehzual a, ţawngţaipui char char la ila tuarchhuak ve maithei asin. Pasal neih hi fimkhur a lo ngai khawp mai" ka ti a, ka thiam dan tawkin ka hnem ve. Ka la tawng ve lo va, a hrehawmzia hrethiam chiah lo mah ila ka ngaihruat thiam. 

"A buaithlak a nih hi" a ti hluai a, hah hmel zetin a thaw hawk a, "Ka sawichhuah chiah hian a hrehawm zia a chiang lehzual" a tih zawm zat. 

"Mi in luahin em ni in awm?"

"Ni lo e..kan pa te inhnuaiah kan awm a, in luah man chawi a ngai lo va a zia phian. Mahse naupang an hautak ve si a, in hrang a awm chuan chhungte ban reng a nuam tawh si lo va, ka chhungte zawk lah hian min puih an chak lo. Kan pa hi fel se a phak tawk ang ang thawkin inhlawh ve lawp lawp se chuan kan neih loh deuh chang pawh a min puih an hreh hauh lo ang. Hetiang reng a a awm chhung chuan ka chhungte tan pawh a tha nat thlak ve a, ka phone number la la thawh tur i hriat chuan min rawn hrilh ţhin tawh aw" a tih chuan ka phone ka pe vat a, a number a chhut luh mual mual lai chuan lainat takin ka lo thlek vawng vawng. Min phatsan hnu kha chuan amah aia ka khawsak nawm ve theih deuh hunah chuan nuam ka ti ngawt ang ka ti ve ţhin a mahse vanduaina a chung a a thlen meuh chuan nuam ka tih phah hauh lo. Phuba la a rawng tak tak a che ţhin te hi an hlim phah tak tak ka va ring ta lo em. 

Tlaiah chaw kan ei ho a, inpawh tlang tak a ti tiin ka ţhiannu Puipuii pawh ka hnaihah a awm reng. Hman ang reng kha a la ni, ka hnaiha a awm chuan ţhianţha ka nei ve tih ka hria a, ka thla a muang ţhin. Puipuii nen sawidun tur kan ngah ringin Tommy paw'n min tibuai duh lem lo va, min hrechiang bawk a, a ţul hun ni a a rinah chuan hun min pe mai zel. 

Thla te la ho in kan hlim tlang dar dar hle a, lokal ve thei lo an awm nual. Chung zingah chuan Puipuii'n min kawm duh tawh loh hnu a hrehawm ka tih hlau deuh ţhin Awmtei kha a tel ve a, Pastor nupui ni tawhin hmun dangah an awm daih a a lo tel ve thei ta lo. Ka hmuh chak tehlul nen. Puipuii bialpa hlui leh Msa cousin ni bawk Hriata pawh ram dangah hna thawkin a awm a, a lokal thei lo langsar zual te zing a mi a ni. 

Haw pahin Puipuii kan thlah kual a, a tlai deuh tawh vangin nidanga len ka tiam a, chhukpui kher lovin kan let lehnghal. 

"Lalrinmawia nen khan kan ti ti luam a, a thusawi zingah khan ka beng verh zual deuh tu a awm" tiin bul ka ţan a, ka hriat chak zawng chu ngaihven zet hian "Eng ber nge?" a lo ti vat. 

"A fapa in mi a ang pha lo a ti a" ka ti sep a, bialpa te hnen a bialpa hlui te chanchin sawi hi thil nuam tak a ni lo. An inhriat ţhat viau phei chuan. 

"Aw Down syndrome a nia, vawikhat ka hmu tawh a, a lawmawm reuh lutuk" a ti a, Msa fapa chungchang hi ka hnenah a la sawi ri chhin ngai lo. 

"Nih chu mawle..Fiona chuan a luh khung tak tak em ni?" tiin ka zawt leh a, rei tak chhung an ti ti a, an lo inkawm nasa ve ţhin bawk nen, kei aia a hriat thui ka ring tlat a, ka rilru nawm loh hlau a zep mai mai anih a rinawm. 

"Ka chiang chiah lo" a ti liam satliah a, mipa in mi chanchin sawi chiam an hreh tlat zel hi hriat chian chak lai hi chuan ka haw ţhin ngawt mai.  

"I ţhiante ho nen in inhmukhawm leh dial thei a, vawiin chu nuam iti berin ka hria" ka ti a, ka fiam ve luam. 

"Dawrah an rawnkal zeuh zeuh a, anni ho hi chu ka hmu ve reng. Ţhian i siam tam hman em?" tiin min zawt ve thung a, phur zetin ka lo bu nghauh nghauh. 

"D hlui kan ngai thar leh em?" a ti fiamthu a, min zawh a chakna a rei tawh ang. Thu inhmuh loh leh dawn sawn sual palh a awm loh nan chauh a fiamthu a min zawt a nih hmel. 

"Teuh lo mai nupui nei mai tur ka ngaih duh bik i ring em ni?" nui hak hak chungin ka ti a, mahse ka hmuh hma pawh khan ngaih veng veng chang ka nei ţhin. Kan thil tih dun ţhin keimah chauh a ka tih chang te hian ka ngai zual a, hmun dang a ka awm lai te pawh khan be lo turin ka insum hram hram ţhin. 

"Msa hi nupui ka neih khalh mai dawn em maw ni" a ti zeuh a, a lam ka hawi rang hle. Inneih a duh tawh thu sawi zeuh a ching a, ka la inpeih lo nasa mai si. A sawi chang apiangin ka hnial fithla ţhak zel. 

"Kan hming bul a Pi leh Pu a awm hmain inneih naah kan kal dun hmasa phawt ang chu" pehhel deuhin ka lo ti ve. Ka malchunga ka kut dah rawn vuanin thutak deuh zawk hian "Ka vawn tawh ka thlah ve mai mai ngai lo va, i hrereng dawn nia" a ti a, Msa nen a kan inbe lai a hmu a, kan thusawi hre lo mahse kan chezia leh hmel hmang chiang takin a hmu ang. Chu chuan a ti hlauthawng a ni.

"Nghet tawkin vuan char char ang che" lai ru angreng tak hian ka ti a, Msa chiah ngaihzawng ka la nei a, tlai khawhnuah Tommy a ni veleh a, hetiang lamah hian ka zei tehchiam lo. 

Kan inkawt remchang laiah a ding a, kan chhuah dun ţum chuan ka nu ngaihţhat nan inchhung thlengin min thlah lut leh ţhin. Ho te te sawiin nui hak hak chung hian inchhungah kan inzui lut a, Kimpuii chhang siam rim a nam vang vang.

"In lo haw ta a ni maw? Lo ţhu rawh Tommy thingpui te kan in dawn nia" ka nu in a lo ti zung zung a, inthlak tur a kal hmasa lovin keipawh ka ţhu veleh rih. 

"Ka rawn kawi zawk a, thingpui ka in lo mai ang zanin chu nidangah ni tawh rawh se" Tommy chuan a lo ti ve thung. Ka nu chuan chelh tum viau mah se la bungrua lo thleng tur a awm vangin a dawr a tlang leh a ngai a, a hmanhmawh ru et et tawh zawk maithei. 

Kawt lai thleng bawkin ka thlah leh a, kan inthlah tawn zak zak anih ber mai hi. A rilru nawm nan "Nupui a nei dawn niin an sawi si a, a nupui neih hun tur te ka zawt a" ka tih hnuah nui chung hian "Ka pasal tur a rin lawk sa nei reng chungin ka pasal neih hun tur min zawt ve bawk a" ka tih zawm leh a, Tommy-a dinhmunah ka indah chhin vel a, keipawh ni ila insawifiahna ngaihthlak ka duh ve tho ang. Ka la theihnghilh loh zia a hrechiang em em mai bawk si.

"Ka rin rual chein i rin ve theih tur a rintlak a awm ka tum ţhin a, hmeichhe dang tam tak zing a ka hmuh theih awm chhun i ni. Msa kha hun ţha i pek rualin ka pe ve zel a, hun ţha ka neih ve hi tihchhiat a bawhpelh ka tum lo" ti a min hrilh chuan ka ngawi reng ringawt a, chhan mai ngaihna ka hre lo. Amah bawk chuan "Engahmah ka nawr lui dawn lo che a, ka ngaichang reng zawk ang che" a ti leh a, a tlan liam hnu thlengin ka din na ngaiah ka ding reng ringawt. A insiamţha nasa in kohhran a bel tlat a, ka tan a a tih theih ang zawng zawng a ti vek ţhin. Min hmangaih ang a ka hmangaih ve thei lo hi pawi ka ti takzet. 

Thawhţan a lo nih chuan peih lo viau mah ila hnaah ka kal a, ka zawi ni leng a ni ber. Ka taksa chauin zawi viau mah sela ka ngaihtuahna a vak thuiin a kal kual nasa viau thung. Ka lo ngaihven ngai loh leh ka hriatchak ngai miah loh thil tam tak hrechakin ka duang chhin vel ţhin a, college ka zawh hnu leh Msa nen a kan inbiak tawp ni aţang khan ka pumpelh ngat ngat a, a hming leh a chanchin hrim hrim ka hre duh ngai lo. Ka hmuh leh tak hnu hian khami hnu zel a a chung a thil thleng ka hre chak ta et et. 

Ka hnung a min dawm pahin ka thawhpui Mapuii chuan "I va nguai em em ve na i nei em ni?" tiin min zawt hial. Class ka neih loh lai chuan dawhkan bawhin ka awm ngaiin ka awm reng a, a ngaih ka ti ţha lo anih hmel.

"Dam e nizan ka mengrei a, zingah ka tho hma leh a" ka ti a, chhuanlam ka siam ta ringawt. 

"Thawhţan hi chu a ninawm ve hrim hrim bawk a, class ineih dawn loh chuan chhing sek la i harh hawk mai ang. Keipawh reilote ka chhin sek chuan ka harh kawk zel" a ti siam siam a, mutchhuak lo chungin mit ka chhing a, keimah leh keimah ka inkawm melh melh a ni ber. 

Tlaiah Kimpuii thil min chah lei turin bazarah ka lut a, kal tur a min tihna dawr a inhawn miau loh vangin ka zawng kual nasa hle. A vang hrep lehnghal a, ka beidawng hman rum rum tihin dawr pakhatah a lo awm teh mial. Ka lei zawh veleh haw tumin ka kalna ngaiah bawk ka let leh. 

"Rebecca" ti a min ko ri ka hriat chuan ka ding chawt. Min ko nawn leh a, ka piah lawk a toys dawr kawtah Msa te pafa an lo awm reng mai. Mi hriat lai chuan ka mizo hming a hmang ta em lo ve. An dinna lam ka thlek reng lai chuan min lo hui a, kal tlang luih chi a ni tawh mang si lo va, hreh deuh chungin ka pan hnu hnu.

An hnen ka thlen rualin "I bang chiah a?" tiin min lo zawt a, a fapa zawk en reng chungin lu ka bu zeuh. 

"Hna min thawh pui a, lawmman atan motor kan lei a" ti a min hrilh chungin a fapa lu ah a chul a, Tommy-a sawi ang chiah kha a fapa landan a ni. 

"Khawmaw i motor thar chu?" ka tih chuan a bul hnaia a dah motor lem chu pawm kangin intithei zet hian min hmuh tir a, naupang chhaih thiam lo chi ka ni bawk nen lawm zui dan ka thiam lo. 

"Barbie zingah sawn duh va thlang ve la, ka lo lei ve ang che" a tih chuan melh hrawk chung hian "Barbie lawm rual lek hmuhin min hmu em ni?" ka ti chang fak a, a nui ruh ruh ringawt. Min chhaih thinrim vel hi a nuam tih ber a ni ţhin reng a ni. 

"Hmanni khan in rualin ka ei ve hman ta si lo va thil min eipui la" pangai tak hian a ti leh a, a fapa in min lo en ve reng bawk. A sawmna chu hnar tur ka nih laiin ka hnar leh ta lo. Restaurant ah kan inzui lut a, ka nu thingpui dawr tetakte a thil kan eidun ţhin lai kha ka hrechhuak uar uar. A fapa nen an ţhu dun a, an hmazawnah keimahin ka ţhu ve thung. Ka zamin biak mai dan tur ka hre lo angreng hle a, ka hmuh hmasak ber ang em kha chuan nuam tih lohna ka nei lian tawh lo. 

Rin ai takin a fapa chu a thawm a zawi a, kan duhzawng kan chah hnuah "Karleh mai hi Bawihtea piancham a ni tawh a, i lokal ve ang chu" a la ti tak deuh deuh a. 

"Kum engzat na tur nge?" 

"Kum7" 

"Tommy ka lo sawipui hmasa dawn nia" ka ti a, nuam tih lohna em em nei tawh lo  mah ila kan boruak a ţang at reng tho. 

"Engtik khan nge?" ti a min zawh chuan ka bang bo angreng hle. 

"Eng ber chu maw?" ka ti let ha a, "Tommy" tiin a lo phun sup. 

"Kum2 a ni tawh. Kum2 chhung kan inzui tawh ka tihna" tui no a lemziak ka kut zungchal a chhui kual chung hian ka ti a, a ţhianpa inlaichinna ka siampui ve tho va, ka huat zawng ka sawi ţhin ang chiah a ka awm ve tho vangin inchhuang tak angin ka awm thei lo. A fapa in ka kut lo vuanin tui a ngen a, ka thlit sak lai chuan "I hmangaih em?" tiin min lo zawt leh. Naupang tui pek pahin ka melh zawk a, ka kut la let lehin dawhkanah ka kiu ka nghat a, ka kutphah a biang dawmin hmun dang ka en leh rih. 

"Ka hre lo le. Ţhenkhat ngaihdan ţawmpui ka nei nual a, nupa nih hma chuan hmangaihna a awm theih ka ring vak lo. Ka la hrethiam ve tak tak lo te pawh a ni mahna" amah pawh en chuang lo in ka chhang a, kan inkar a thil thleng te kha a sawichhuak leh mai ang tih ka hlau a ni. A thiam zawk nih kan inchuh leh ang a, rei kan sawi hmain ka thinrimna bawk kha a alo let leh ang. Hmangaihna leh inlaichinna chungchang sawi dun pawh nuam ka ti chuang lo va, chuvang chuan ka sawi duah duh lem lo. Keimah leh keimah ka inzawh ţhin, chhanna ka hriat si loh, hun a hman zui zel dan zawhna hun remchang ka nei mek a, ngaihthlak nuam lo deuh hriat tel a ngai ang tih ka hlau leh tho si. Tommy-a ka zawh chhuah theih miah loh ka hriat chak tho si Fiona chuan a luh khung chiah em tih chu ka zawt ta nge nge a, "Ka in a rawn hawh" tih chiahin min chhang. 

"Eng nge awmzia? A luhkhung che chuan i nupui a ni mai lo em ni? Fa innei tawh lehnghal a, neih i tum miah lo amaw?" ka ti a, ka ţhutdan siamţhain dawhkanah ka kut pahnih ka dah a, a fapa nen ka entawn zak zak. 

"I rindan leh ngaihdan kha a tak angah ngaiin ka thusawi aiin dik iti zawk a, ka chhanna neih a ngai reng. Ţhian chiah kan ni" a ti leh nghut a, Fiona nen an inhnaih vang a ka sawisel apiangin ţhian an nih thu a sawi ţhin a, Lalrinmawia nen a kan ti ti hnu phei kha chuan ţhian chiah an nih ka ring lo lehzual. 

"Fa hial inneih tawh hnuah pawh maw?" ka ti a, ka thin a rim leh lek lek tawh. Kan thil chah an rawn dah ho chu siam rem mawlh mawlh pahin a chhanna ka ngaichang pah reng a, keimah leh keimah ngei pawh hi ka inhrechiang lo. Amahah hian beisei ka la nei ti dawn ila beisei neih leh ka duh tawh lo bur a, ka tum hauh lo bawk.  

"Ni e ka ţhiannu alawm" awlsam fe hian a ti liam satliah mai a, thil hi a landan ang diak diak a ni lo ve fo a, tupawhin thuruk kan nei. Chuvang tak chuan hriat chian zel ka chak tlat a ni. 

"Puitling ka nih tawh hi. Engpawh sawi la pangai takin ka dawngsawng vek thei tawh. Kan inkarah engmah a awm tawh lo bawk a, thudik tak min hrilh thei tawh ang" ka hlauhna te dahţha in nem deuh zawk hian ka ti ta nge nge a, khawvel a ni miau a, duh lo mah ila eng eng emaw chuan min la deng dawn tho tho. 

"Ka sawi i awih ţha duh ngai mang si lo min zawt tut tut reng a" a ti a, ţhian chiah ni se la chuan kha leh chen a inthuhruk bo hmak ka ring lo. 

"Awih tur leh awih loh tur chin ka thliar hrang thiam ve a, bum mai mai rual ka ni tawh lo tih i hre bawk ang a, i nun a thil thleng ka hre tam lo viau a, chuvang a zawt che chu ka ni. Thil dang a awm tawh lo" chiang zawkin ka ti leh. Kan inkawmngeih ţhin tehlul nen kan induh tawnna kha thuk zawk a kalpui lovin thukru tlat ila chuan kan tawpna a hlimawm zawk ngei ang. 

"Lehkha ka zir a, tihtak zetin ka zir ve. Ka pa aiawhin school ka enkawl. Thil danglam thleng a awm hran lo" 

"Fiona ve chu? I fapa nu hi a ni em?" ti a ka zawh chuan lu a thing a, kan thusawi hmang a hriatthiam leh hriatthiam loh hrechiah lo mah ila a awm ve reng lai chuan sawi zawm chi niin ka hre lo. Mahse ka mak tihna erawh ka thup thei ngang lo a ni. 

"Ţhi i nei nalh hle mai" a ti zeuh a, ka hlauthawng hmel a hmu nge min nuih suk a, a fapa thil ei a buaipui zui a. Hman a a ţhi min pek kha ka la awrh reng a, kan inhmuh khawm ni pawh khan ka awrh. Ka inbual lai chauh lo chuan ka phelh ngai lo va, ngai a ka neih tawh miau vangin ngaihven nachang ka lo hre lo. A rei tawh em vangin a hlui deuh tawh a, chuti chung chuan ka phelh duh lo ve tlat. A locket hum bo reng chungin a thusawi hre lo ang hmiahin ka hmaa eitur inchhawp ka ei zui mawlh mawlh a, ka awrh reng nachhan min zawh chang hian sawi tur ka hre ngai lo. Ka sawi duh lo ni lovin kei ngei pawh hian ka hre tlat lo a ni. Shillong a ka awm hnuah vawikhat min hmu turin a rawnkal vang vang a, chumi ţum a min leisak chu a ni nghe nghe. Kan enkual fe hnu a a ţha ber ni a kan rin kan thlan chhuah ve a ni a, a man a to ti viau mah ila min leisak lui tlat. Tunlai a awrh atan chuan mawi vak tawh lo mahse a ţhatna leh hlutna a la bo lo.

"Karleh chu ka lo beisei ang che aw" restaurant kawtah kan awm tawh a, thil ei ho tur ringawt kan ni a, kan eizo ta bawk a kan inţhen hran a hun leh der tawh.

"Tommy ka lo hrilh ang a, a hman tak hlauh leh kan pahnihin kan lokal ang" ka ti veleh ţalh a, ngaihthlak nuam a ti lo maithei mahse ka chunga a thil tih zawng zawng ngaihtuah chuan a nep lutuk. 

"Awle chanchin kan inhrilh dawn nia" a tih hnuah a fapa chu zo takin a pawm nawlh a, "Thlah i ngai em?" ti a min zawh chuan "Ngai lo e, nitin keimahin ka haw ziah a, haw dan ka thiam lutuk" tiin ka lo chhang vat. 

"Ka rawn hmu leh ang che" tiin min thlah a, a hrilh angin a fapa chuan ka lam hawiin ban a vai lawp lawp. A chungah eng nge thleng hre rih lo mah ila hriat hun ka la nei tho in ka ring. Kum tam tak kan inbihruksiak a, min hmuh hlau a ka bihruk reng bakah min man hlauin ka tlanchhia a, khang hun chhung khan ka biru min zawng miah lo nge hmuh ka hlau tih hriain min hmu lo der char char zawk? Fiona kha a fapa nu a nih loh chuan tu nge a fa neihna nu chu ni ta ang? Ţhian chauh ni siin ngati nge tupawn a luhkhung an tih vek? Ka hriat naah zawhna tam tak a inlar zut zut a, chhanna ka hriat miau loh vangin engahmah mark ka la hmu lo. Eng chiah nge thleng ang aw ka ti rilru vawng vawng a, haw kawng tluanin ka ngaihtuah. Amahah rinna ka nghat tawk lo nge thikthu ka lo ti chhe mah mah ţhin zawk? Min hrilhfiahin dawt sawiah ka puh a, hrechiang lo va ka ngaihdan siam mai mai a dikah ka ngai zawk tlat zel tho si. Ka la theihnghilh lo tih ka pawm ngei, naupan lai aţanga ka ţhian lo ni tawh leh ka ţhatna tur a engkim ti ţhin tu chu engtin nge ka theihnghilh theih tehlul ang? Mahse ka la duh em? Ka ring chiah lo. Duh ni ila a awmna hrereng chungin ka bihruksan reng lo tawp ang. Hmalam ka pan tawh a, a hmel ka hmuh leh tak vang mai maiin ka hnungchhawn tawh lamah ka hawikir thei tawh lo.

"Ka thil chah che i lo hawn em?" Kimpuii'n a ti lang lang a, ka thil lei sak chu ngawi reng a phawrhin dawhkanah ka dah. Phur zet a a lak hnuah "Rin aiin ka hmu ţha. Taka U Msa nau Gracy kha a lokal a, a haw deuh chiah" ka thil hawn uluk fe a endik chungin a ti a, Lucy ang thoin lehkhazirin hmun dangah a awm a, Aizawl a ka awm leh hnuah hian ka la hmu leh miah lo. 

"Eng nge a rawn tih?" tiin ka zawt satliah a, ka ngaihven lutuk lo. A nuhrawn fanu a nia, a naupanlaiin duat viau mahse Msa chuan a ngaihven zawm ka ring lo.

"Niminah a rawn haw a, Lucy a awm takin tiin a lo leng lut mai mai. A nu leh pate ka nel vak si lo va, U Msa chanchin chiang zawkin ka lo zawt a" a tih chuan ngaihven hluai ang a awm duh si lovin beng ka chhi kar a, "A ngaih ţhin zia a sawi luam a" a ti daih. Nui vur vur chungin min melh ralh a, hrechak lutuk a ka zawh zui a beisei a ni. 

"Unau te chu an in ngai ve bawk ang chu" ti satliahin ngai pawimawh awm lo takin ka awm lui a, inthlak tur a ka kal lai a a mak ti hmel ka hmuh chuan a hmuh lohin ka nui suk. Amah ngei ka hmu tawh tih a la hre lo mai mai a ni. Engtik niah emaw chuan zawhna tam tak ka neih hi chhanna ka la hmu vek ang. 

CONT...