NANG CHAUH-3

NANG CHAUH-3

"Kar leh mai hi a fapa birthday a ni tawh a, chuta kal ve tur chuan min beisei a, lo be chiang la kan telpui ve dawn em ni?" inthlahrung ru tak chung a zawt ve tho ka ni. Mahse eng nge ka hriat tak thut ni? Khati khawp a pumpelh tum a tlanchhe ţhin si kha vawi leh khatah danglam thutin hriatchian chakna in ka khat ta tlat. A thawnthu a ki kawi riau a hriatna ka neih tlat vang a ni maithei e. 

Bungraw lakna leh an indawrna a lehkha pawimawh vel dawhkanah chhawp chhawk nuaihin a endik mual mual a, Msa chungchang bawk ka sawi leh tak vangin a thil tih lai mek chawlhsanin min en turin a rawn dakchhuak a, "A fapa birthday i hria a maw?" mak tih hmel zet hian a ti a, ka sawifiah hmain chair awl remchang pawt hnaiin dawhkan bulah chuan amah hmachhawn zawngin ka ţhu ve. Ban hnuah tlai deuh tawh mahse he thil sawipui tur hian a dawrah ka kal kawi vang vang. Hnathawk tur chhawr lai a nei tho a, ka kal kawi chang chuan hun awl a insiamsak mai zel. 

"Bazar ah kan inhmu a, a fapa lawm zawng an lo lei ve. Reilote kan inbia a chutah chuan min hrilh a" zep nei chungin thil thlen dan tlem ka hrilh. A lungawi loh hlauin thil ei tur a kan chawlh dun vel kha chu ka sawi tel lo. 

"Ka lo bia ang" tih ringawt a min chhangin a thil tih lai a chhunzawm leh a, ka hrilhhai lek lek. 

"Ka beisei leh vang a ni lo tih i hria tiraw? Nupui a nei a, a nupui a awm ve reng dawn a, fapa a nei bawk a. Ka sawi awmzia chu ka ţhian a ni ve tho a, an hlim naah ţawiawm ve ang ka tihna zawk a nia" ka ti zung zung a, kan inhau ve vak ngai lo na a tun ţum chu a lungawi zan lo niin a lang. 

"Kan kal dawn nia" en pawh min en lo vin a ti leh tawp a, sawi leh mai tur ka van kher mai. Ngawih reng chu dik berin ka hre bik si lo "I kal chak loh chuan ka ti lui chuang miah lo che. Kan vaiin hman a ţhian kan nih lai ang khan inhmukhawm leh ila ka ti mai mai. Hun kal tawh chu hun kal tawh ni se la, ţhian kan ni leh vek thei a, ka phatsan dawn che tihna a ni kher lo bawk a" ka ti zui leh mual mual a, Msa nen kan inhmuh leh hnu aţang kha chuan ka ngaihtuahna ka kawm nasa a, keimahin ka inkawm melh melh a ni ber. Chuvang tak chuan Tommy ka be tlem sawt a, englai pawh a inbe chawt ţhin ni lo mah ila ka thil tih tur leh eng eng emaw ka hrilh ţhin te kha ka lo hrilh theihnghilh ţhin a, mi pangai tan chuan ngaih tih ţhat lohna tham a ni ve tho. Engkim hre chiang vek tu a lo ni kher bawk nen, ka insiamthat thuai thuai a ngai a ni. 

"Ka hman theih tak leh ka hrilh leh che ang a, ka buai lai anih chuan kan kal thei kher lo ang" ti a min hrilh pahin min zirchian tum ni awm takin min en veleh duh tawh a, danglamna lantir ka tum lo lui ve tlat. 

"I tih dan dan ni rawh se. Kal ngei ngei ang ka ti chuang lo va, hun ineih chuan ţhian kan nih leh theih nan tal pawh tel pui ve ang ka tihna mai mai" ka ti nawi niaih. Diktak chuan hrehawm ka tiin nuam lo ka ti ve tho a, min ngaihsak em em tu leh englai mah a min phatsan ngai lo tu tih lunghnur a rilru nuam lo a siam hi ka duh dan a ni bik lo. Ka ngaihdan leh rin dan te kha a dik chiah em tih te, tu nge lo dik char char zawk tu nge dawt sawi zawk tih te hriat ka duh. Ka lo tlan chhe duai duai ţhin kha mawl ka inti thar leh a, ka ngaihtuah chiang lo ţhin ngawt mai. Chu chuan mihring thil ti sual thei ka nihzia min hriat thar tir a ni. Midang tih sual hre hlur lo va mahni tihsual aţanga inzir te pawh hi a lo ţha phian zel a nia. 

"I ril a ţam em?" tiin min zawt ta daih a, a ţam loh thu hrilhin a dawr bungrua ka enkual a, "Dawr chhung a khat ţan reng mai a, hmun zau zawk i mamawh a nih hi" ka ti luam a, ka zahzel te pawh a ang tawh zawk. 

"Hmun lun lai a ngai ţhin sia dawr luah tur a vang em a, ti hian awm mai mai rih rawh se. Min nghak law law la haw pahin ka thlah dawn che nia" a tih chuan ka hnial duh ta bik lo. 

A insawi ang ngeiin kan inthleng min thlah a, "Vawiin chu ka lo lut kawi lo mai ang" a ti teh tlat. 

"Thingpui tal lo in la, in chhung a rei hleinem ka lum sak dawn che nia" ti mah ila "Ka ute in a kawi a ngai sia ka tlai lutuk ang" a ti tlat tho. 

Ka sawm chhuah theih tak lohah chuan chhuk nghal mai ka tum a, amah bawk chuan min lo be dingin ka phone min dil a, a hmuh tur a pawi em em a awm hran lo bawk a tim hauh lovin ka pe. A phone ah eng emaw enin ka phone ah a chhu lut a, en dawk dawk ka duh bik loh vangin eng chiah nge a tih ka hriat pui lo. Ngaihven lo âwm takin ka awm lui ve tlat.

"Hei Msa phone number a nia, nangman i lo zawt chiang dawn nia" a tih takah chuan za vak lo hian ka nui ta ringawt a, ka phone min pek let leh pawh chu chhuh lawk lovin ka vuan reng. 

"Aa..a ngai kher lo. A bulah pawh khan be hmasa tur ang chein ka insawi tho a, kal kher a ngai chuang hleinem" ka ti bah nawk a, a thil tih duh dan chuan a ngaihna min ti hre lo hle. 

"Ka ring che ka tih ziah kha, thikthu leh lungawi loh vang a pe che ka ni lo. Ka rin vang zawk che a nih hi" ti a min hrilhfiah takah chuan zam ru tak chung a nui lui reng chungin muangchangin phone ka la let. 

"Rinthlakah ka ngai che a, ka vawn tawh ka thlah ngai lo ang bawkin ka ngaihdan ka sawhsawn zung zung ngai lo" nghet charhin a ti leh a, hman a Tommy leh tun a Tommy ka khaikhin hian mihring inthlak danglam nasat theihzia ka hmu a ni. A chhe lam a ni emaw a ţha lam a ni emaw, midang rindan chin tawk neih a ngai a, inven chin neih a ngai bawk. Nasa takin kan danglam thei si a. Tommy inthlak thlengna hi a chhe lamin a ni e ka tihna a ni hauh lo. 

"Tun hnai te hi i zia a zawi zual tlat. Dik lo a awm chiang mai" Mapuii bawk a ni. Ţhu awn diai in ka chal ka hmet niap niap a, Zirtawpni a ni leh der tawh a, Msa ka la be lo zel. Tommy nen a chanchin kan sawi dun ngai tawh lo va, engkim pangai takin a kal leh vek tawh. 

"Movie ka en rei thei lutuk a, ka lu a na bur zel" ka ti a, chhuanlam fahrah te te ka siam reng mai. 

"Mipa vang te a lo ni lek zawk lo maw? Kei chu ka ngaihsak lo khawp a, vai ho ang hian inngaihzawn dawn a lam ngai zel phei se la chuan pasal ka nei lo tawp ang" nui har har chung hian a ti a, ka huphurh tak tur chi a ni ve. 

"I lam ve ziai ziai mai ang chu, i lo zei ru phian lo maw?" fiamthuin ka ti ve zeuh. 

"Teuh lo mai ka lam ve chuan ka kawchhungah ramhuai a lut emaw an ti zel. Tunah pawh pasal ka neih loh mai hlauin chhungte an mangang ru tawh a, lam zel ngai phei se la chuan mipa hrim hrim ka melh lo tawp ang" a ti a, a thusawi chu amah ber berin hlim puiin a nui uarh uarh reng mai. 

Ka lu na ut ut reng mai hmet reng chunga haw tum a ka kal pah dat dat laiin theihnghilh nei a inhria in ka ding det a, "Charger ka hawn em le?" ti a inzawtin remchang laiah bag ka nghat a, a chhung ka hai zui rawk rawk. Thil ţullo te tham te te ka ak ve ruih a, ka zawn ka hmu chiah tihah tuemaw hian ka kawngah min kuah a, ka beisei loh em vangin ka phu nasa hle. Ka thil zawn lai chiah a rilru pe ka ni bawk a thawm ka hre lawk lo hrim hrim bawk. 

"Ka ti hlau che ni maw?" ka awmdan avanga nuihza si insum tak chung hian a ti a, Tommy a lo ni reng mai. College building chhungah ka la awm a, hmuh ka inbeisei miah lo bawk. 

"Min ti phu nasa lutuk alawm. Eng nge i rawn tih reng reng a? I rawnkal ngai miah si lo va" ka ti hluai a, mak ka tihna ka thup hleithei lo. 

"Ka u fanu chungchangah ka lokal" a ti a, midang ngaihven lek lovin ka kawng a la kuah reng chungin ka darah a khabe a nghat a, "Hetah hian i thawk tih hre lo ila chuan zirlai naupang tu emaw ber nu emaw ka ti ngei ngei ang che" ka beng bul a a tih chuan nui chungin zawi tein a banah ka lo beng a. 

"Min va hmu upa ve kum30 ka pel dawn chauh a nutling angin min hmu tawh maw?" ka ti a, midang an awm leh awm loh hriat tumin mit ka len kual a, kan awmdan chu nuam ka ti chiah lo a ni. 

"Teuh lo mai, i hmelţha a i lang upa ve thei lo. Bakah ka fa te nu bak tu nu mah i ni dawn lo hrim hrim a" 

"Ţawngkam te lah hi i thiam ve sia" ti a fiam chungin ka inla hrang a, ka sam tuai ţhain bag ka ak a, kuah rem lo turin ka awm lui ngat. Sawi chhuak lo mah ila nuam ka tih lohna lantir ve ka duh a ni. Ka hnathawhna hmun a ni a, miin min hmu thut thei reng bawk. 

"I thil tih tum i zo tawh em? Thil dang tih i ngaih tawh loh chuan kan haw rual dawn mi?" ka ti ta zawk a, a thusawi lai mek kha a chhunzawm ka hlau ru takzet. Tommy nen a inneih leh fa neih chungchang vel kan sawi dun chang hian tun thlengin nuam tih lohna ka la nei tlat zel. 

"Kal ila" awlsam zet hian a lo ti ve mai a, ti ti dang ka sawipui a, chhun a thil ka ei mumal loh vangin a dawr bul a restaurant ah min chawlh pui a, thil dang ho mai mai kan sawi lai a "Ti daih ila i ning ve lo em ni?" ti a ka zawhna chu hriatthiam loh hmel zet a min melhin a mit ko a san ak a, "An ti thei tho sia, an hman lo anih pawhin an nupui emaw an pasalte an awm a, an fa te buaipui reng hi i ning lo em ni? Nangmahin i inchawm thei a, i thu thuin awm ve tawh la. Hetianga itih hian inu an duhsak sawtin i hre tak meuh maw?" ka ti a, thil hi a landan ang a ni lo tih ka sawi tawh kha. Mi hausa chhungkua a seilian chu a ni meuh mai, nu leh pa ţha tak uapna hnuai a nuam sa tak a seilian emaw ka lo ti ţhin a, mahse chutiang chu a lo ni miah lo. Tommy hi sawn a ni a, amah hi an chhungkuaah naupang berin a ute ho hi a pa fa hmasa an ni. Kum8 mi vel anih laiin a nu hi a pa in a hruai lut a, tun thlengin an la inkutsuih lo. A ute ho nu hi a la dam a, pasal nei lovin amahin a awm thung. Hei vang hian a nu hi a unaute ho hian an haw hle a, an be ţha duh ngai meuh lo. 

"Hmeichhiain mipa mahni hmasial tak a hmangaih tlat chuan natna chu a tawrh tur alawm. A nupui hmasa a hausa a, beisei a la neih miau vangin ka pa hian ka nu hi neih pangngaiin a nei duh tlat si lo va, ka unaute tan chuan zah vak ngaihna a awm lo a ni" a ti hnual rawih a, an upa ve tawh na a a hming a inkawl mai mai ang vel chauh an ni. 

"Inu chuan a tuar nasa ve dawn anih chu. A ngaihtuah vang che a nih ka ring" ka tih lai chuan harsa tih hmel zet hian a thaw hrawk a, "Ka nu chiah hi tuar tu a ni lo. Ka pa nupui hmasa pawhin a tuar ve tho a, an pathum inkar a thil thleng zawng zawng hi ka hre ve vek lo va, ka nu hian thiam lohna a nei ve ţeuh ang. Mi pasal a ni tih hrerengin a kawp lui a, an thil sual tih zarah ka piang a, an tih sual vang a awm ve mai mai ka nih ber chu. Hman aţang tawh khan inchhungah lang lo thei ang ber a awm ka tum ţhin a, zan a chhuah leh ţhiante in a riah mai mai te ka chin ţhin kha. In khatah awm vek mah ila ka unaute hmuh loh turin ka bi ru ţhin. Min hmuh apiangin an rilru ka ti na thar leh zel ni ah ka ngai ţhin a, ka pa lahin a nupui hlui a thlah tak tak thei chuang si lo. Hei hi a nia mipa leh hmeichhe danglamna chu. Hmangaih naah hi chuan mipa hian mahni hma an sial a, dil leh laksak chiah an thiam. Mipa ve tho ka ni a, mipa zawng zawng ka sawina a ni hran lo. Mahse ka sawi ang hi mipa tam zawk an ni thung. An duh an hmuhna anih phawt chuan midang an ngaihtuah tawh lo. Ka pa pawhin a fa te hrehawm tawrh a hmuh theih miah loh hi. Hmeichhia in tih tak zet a mi a hmangaih tawh chuan mahni hma an sial ve ngai lo. An tih theih ang ang tiin an neih ang ang an pe chhuak a, mipa in a dil apiang a pe a, phut let a nei ngai lo" tiin min hrilh melh melh a, mipa a nihna angin sawi a harsa viau ang tih ka hria, a bialnu ka lo ni lehzel nen. Ka mit a en chungin ka kut a vuan a "Ka pa ang mipa hi ka ni ve lo vang. Hmeichhia ka hmangaih tawh a nih chuan hmeichhe dang enkânin amah chiah ka thinlung zawng zawngin ka hmangaih ang a, ka thinlung zawng zawng ka pek duh hmeichhia chu ka hmu reng tawh bawk" ti a min hrilh leh hnu chuan keimah a sawina a ni tih hria in ka kut ka la sawn a, "A chhan chu vawikhat i hmuhna ringawt pawh a i lungphu ti rang vek thei hmeichhia ila tawn loh vang mai mai a nih kha" ka ti sap. 

"Min ring lo a ni maw?" ti a min zawh chuan lu ka thing a, "Keimah zawk hi ka inring lo" ka ti rilru a, a awmah khawihin a lungphut dan hmang hre thei kher lo mah ila "I thinlung hi a ţha em a, engtik ni ah emaw ka la tihnat sak ang che tih ka hlau a ni" ka ti a, ka rilru put hmang diktak, neih tumna ka nei miah lo te leh hetiang lam kan sawi chang a hrehawm ka ti zawk mah ţhin te hi hrevek se la chuan na a ti ve hle in ka ring. 

"Engtik niah emaw nitin a amah chauh duh zual zel thei tur a siam thei tu che i tawng anih chuan min hrilh dawn nia, ka haw miah lo ang che" 

"Hmeichhe dang ka duh lohzia ka sawi reng ţhin chung pawhin min rinna tlem te chauh i nei tho a, ka pa vang em ni?" tiin min zawt leh a, keimah ka inrintawk loh vang zawk a ni reng si. Nunhlui ka phum bo vek tawh emaw ka tih kha vawi leh khatah a vaiin ka mit hmuhah ngei a rawn inlar leh a, hun lo la awm tur ka hriat lawk miau loh vangin eng nge lo thleng zel dawn ka hriat lohna hian inrin tawk lohna min siam sak a ni. 

"Ka pa ang ka ni ve lo vang. Ka huat zawng ka entawn duh i ring em ni? Nge Msa nen in inhmuh leh vang zawk?" ti a min zawh leh chuan "Msa m-maw?" ka lo ti bah niaih. 

"Ummm.." bu nghat chung hian a ti a, "Kum tam tak hnuah a lo la tlangval ve reng a" a tih leh hnu phei chuan mak tiin ka ang pham mai. 

"Fa a nei tawh in ti a ni lawm ni? Tlangval a la nih chuan naupang kha tu fa nge? Zep ţhen i nei em ni?" vin miah lovin ka zawt. Ka thin a rim lo va, zep ţhen a nei anih pawhin huatna ka nei lo. Engkim hian chhan a nei vek a, a chhan hriat vek hnu chauh a ngaihdan siam ka zir tawh. Chuti chung chuan theih loh chang ka la nei fo. 

"A fapa a ni lo. Fiona fapa anih kha, hre lo turin ka duh zawk ţhin che a, mahse hriat hun i la nei tho ang. Engkim hre vek la, zep leh thup nei tawh lo ila ka tan pawh a nuam zawk ang" a ti zuai raih a, a zep chhan hre lo mah ila rindan tawk ka thiam tho. Amah aia Msa ka thlan zawk a ring a ni maithei a, zep tlat tur a ti tu an awm a ni maithei bawk. Mahse Tommy hi ka hrechiang a, midang chhiatna tur khawp thil sual ti chi a ni lo. Ka hriatna a rei tawhin ka hrechiang ve tawh viau a, a rilru ţhat zia chiang takin ka hre tel a ni. 

"Han sawi zel teh, min hrilh vek rawh. Engkim a tawp vek tawh a, Msa nen inlaichinna kan nei tawh lo. Min hrilh vek la, Msa nen a kan inhriatthiam lohna te dah bo in ţhian tal kan ni leh thei maithei asin" awki dam dap hian ka ti a, kan thilsawiin a zir lo va, rilţam viau e ti lo chuan ka ei tlem leh si phian. 

"Dawrah kan sawi zawm dawn nia" a ti a, kan ţhut luhna a rei tawh a, midang ţhutna kan dal hlauin a dawr lamah kan kal ta zawk a, ka phatsan phah dawn lo a ni tih lantir nan a kutah ka vuan reng a, inkai rialin dawr chhungah kan lut. 

"Fiona hi hmeichhe luhlul leh rilru lian chi a ni ve a" tiin bul a ţan a, anmahni dawr tu te leh thawk tu te an awm suau suau reng vangin thlang lam reh laiah kan ţhu chhuak a, thli fim a tam bawk nen a hahdamthlak phian. 

"A chhungten an thunun hleithei lo. Naute pa hi tun thlengin tuman an la hre lo va, Msa a bel chawt a, hmeichhe naupai kalna tur hre lo lo hnar a hreh ve tho si. Msa nen hian kan inbe pawp reng a, ka hriatchian ang tho che hian ka hrechiang ve. A mangan zual changin min rawn hrilh ve ţhin a, Fiona chhungte kan be ţhin a, hruai haw tumin an rawn kal fo na a a haw duh tlat lo a ni. Pastor chhungkua an ni a, an fanu neihchhun vangin an mualpho reng a, anni pawh an khawngaihthlak. A hmuh apiangte hnenah a pasal a nih thu a sawi ţhin a, Msa zak tak takin a siam fo a, nau a nei a,mi a ang pha lo va, naupang dang aiin enkawl uluk a ngai zawk a, Msa a inham tang laklawh zel. A chhungten a fapa an laksak pawhin a haw duh chuang lo va, Msa ka hriatchian viau laiin thil thleng zawng zawng ka hre kilh kelh lo va, ka sawi ho hi ka hriat chin chu a ni mai" a ti a, Msa chanchin a sawi chhung zawngin chik zetin ka lo en reng a, dawt a sawi lo. Thudik tak vek min hrilh niin ka hria. 

"I awih lo maithei a, mahse Fiona leh a fapa chungchangah chuan a nem zel a, a khirh rei thei lo" a tih leh lai chuan na ru tak chung hian ka nui a, ka chungah chauh a nemin a khirh lo emaw ka lo ti ţhin. Msa ka huat nachhan ber pawh a ni. Keimah ang chiah a ngaihsak hmeichhe dang a nei tel tlat hi ka haw hle ţhin.

"Chuan...anihna takah chuan khang hun chhung zawng khan a fa ni miah lo chu fa angin a lo en char char ţhin tihna maw?" ka ti hluai a, mak ka ti takzet. A fa a ni lo takzet em tih ka chiang ngam lo. Tommy-an a fa a ni lo a tia, mahse Fiona khan...lu ka thing a, keimah bawk natna ka inthlen leh dawn vangin ka ngaihtuah zawm duh lo. 

"Aw..fa angin a en a, Fiona awmdan ang apiang a en liam tawp a, a hnaah a insawr bing nasa lehzual a, Fiona hian luhlul a chhuah luih zel vangin a beidawn hnu phei chuan tu thusawi mah a ngaithla tawh lo. He ti hian chhungkua angin an awm a a ni mai" ka thu ngaihthlak avang chuan ka na lehzual a, ka thawk a sakin thawk harsa ka ti hial. Tommy paw'n sawi harsa a tih ve hmel hle a, hrechiang viau emaw ka inti a, ka lo va hrechiang lo em. Rei tak chhung a lo chenpui tawh chu a hmangaih ngeiin ka ring bawk. Hmangaih lo se chuan chhuak duh lo mahse a nawr chhuak lui em em ang. 

"An chen dun reng miau vangin nangmahah beiseina ka nei ve ţan a, a inţan na hre lo mah ila ka hmangaih che tih erawh ka hria. Min duh let ve theih nan a beiin rei tak chhung ka thiam dan danin ka ngaihsakna che ka lan tir a, ka hmangaihna che hrethiam tawh tur inih laiin ngati nge ngaihţhat lohna leh hlauhthawnna ila neih tlat?" ti a min zawh chuan zawi te a thaw chhuakin a darah ka lu ka nghat a, "Ka ringhlel lo che a, ngaihţhat lohna pakhatmah ka nei lo. I ţha em a, ka chungah ţhat i chhuah nasa em a, dik takin ka chei bawl ve thei che angem ka hre lo va, ka chunga ţhat i chhuah ang hian ka ti ve thei angem tih ka hriat loh mai bakah inrintawkna ka nei lo. Mi hliamin ti na dawn ta ila ka tihnat duh loh ber te zing a mi i ni" ka ti dam dap a, "neih duhna rilru ka pu ngai lo" ti ţhin mah ila a nat meuh chuan keimah bawkin hrehawm ka ti leh dawn tho. 

"Min ti na dawn reng reng hleinem. Ka tan a i thil tih ho te ang a i ngaih pawh hian min ti hlimin ka hmangaih lehzual phah zel zawk che a, i thil tih engmahin min ti na thei lo vang, ka chiang takzet" a ti a, ka kut la kangin zawi tein a fawp pah bawk. 

Ka hmui ka pet vang vang phawt a, chumi hnuah chuan "Ngati nge hetiang tak a nasa a min hmangaih?" tiin ka zawt veleh. 

"I hlu a, i pawimawh bawk vangin ka hmangaih che" tih chauhin min chhang. A sawi kim viau tho si. 

Kan haw kawng chu nidang aiin a reh a, khua a thim thet thet tawh a, kan rilru kan kawm ve ve a, kan ngaihtuah erawh a dan daih ka ring. Kan inkawt a din chuan nidang ang a leng lut tur a sawm lovin bag ka ak nghal mai a, amah bawk chuan "I ţhatna ka hmu a, hmangaih i phu a" zawi deuh hian a ti sup a, a ngaihna hre lo zet a ka lo en dauh dauh lai chuan ka hmuiah dim dawih takin min fawp a, ka tukhumah dawmin min awm hnaih a, ka lo chhan let ve takah chuan a thuk tial tial a, ka tih tawp loh chuan pawi tih lohna neiin nakin zelah ka duh loh tawp thil a thleng palh ang tih hlauin a awmah kut ka dah a, zawi te a nem chung hian "Kan awmna hi" ri chhuak mang lo hian ka ti a,tuma'n min hmu dawn lo tih hre mah ila chhuanlam ka ngaihtuah chhuah theih awm chhun a ni. A mitah en ngam lovin hnuai lam ka melh a, englai pawhin ka hnar ţhin a, min ţawiawm reng tur a ka duh laiin kan inlaichinna thuk zawk a kalpui ka duh ngai lo. 

"Tihpalh..ka lo ngaihven lo a" a aw a zamna ka hriat tel takah chuan hawichhuak vatin tawi tein ka nui a "Inthiam lo duh suh, ka ţha alawm" ti a ka hrilh hnuah a thlamuan deuh nan a hmuiah bawk keimah zawkin ka fawp leh zeuh. 

"I thlen hunah min lo hrilh dawn nia, upa ve tawh viau mah ila ka nuin hauh ngam loh a nei si lo va, ka haw tlai chuan min lo hau palh ang, in a ka awm hnuah min be chhunzawm mai dawn nia" zangkhai thei ang ber hian ka ti a, min thlah nan ti awm tak a min kuahin "Ka hmangaih che" a ti nawn leh a. Inthiam lo ru tak chungin mit ka chhing a, ka hmangaih che min tih chang hian thu ngai chiah hi ka hrawk aţang hian a chhuak ve thei ţhin lo. Hnawh tu awm tlat zelin ka hrilh ve thei ngai lo. Hei vang hian ka inhaw ţhin a, mahni hma ka sial lutuk vang leh a chunga ka nunrawn em vang hian keimah leh keimah ka inhaw leh ţhin. 

In ţha ve pangngai tak kawtah Tommy nen kan ding dun ran a, Msa phone number nei reng chung khan ka be ta miah lo va, Tommy zawk bawkin lo biain a fapa piancham lawmpui turin min hruai a ni. Inchhunga kan luh hmain Msa zawk a rawn chhuak a, thudik tlem tlem ka hriat tawh vang nge a hmel ka hmuh rual chuan ka lungphu pangngai lo nghalin a phut dan tur aia nasa in a phu a, awlsam te a ka danglam thei chu ka duh lo ru kher mai. Kan mit a intawn chiah chuan kan chheh vel a thil engkim chu a ding chawt vek emaw tih mai tur a ni. 

"In rawn thleng thei maw?" ti a pangai tak a min lo zawh takah chuan ka mit la sawn vatin ka bul chiah a ding Tommy ka en ta daih.

"Aw kan hun tiam aiin kan rawn tlai a, traffic kan puh ve mai" Tommy chuan ka kawnga min kuah pah hian a ti a, ka zam em vangin ka taksa a ţang ru ţeuh. 

"A pawi lo..rawn lut rawh u" a lo ti ve mai a, inchhung lut tur a a inher hmain Tommy-an ka kawng a a kuahna lai chu a melh hram. Rei lo viau mah se la chiang zetin ka lo hmu hman. 

Fiona paw'n min lo lawm thiam ve khawp a, an inchhungah chuan mi bungraw neih aia changkang leh ţha fal hmuh tur a awm lo va, en mai chuan pawisa nei deuh niin an lang lo. Kan school luhna ţhin kha a ta a ni tawh tih ka hriat miau vangin mak ka ti angreng hle. An pathum chauhin an lo awm a, midang an sawm miah lo a nih hmel. 

Ţhutkhawmna pindanah kan inzui lut dial a, a fapa te kha amah si chet zelin a awm. 

"Rebecca, birthday lawm naah i kal tawh ngai em?" tiin Msa chuan awmze deuh hian min zawt a, ka en ve veleh min lo nuih a, ka vawikhat kalna a ni lo tih kan hre ve ve. Kan pahnih chiahin. 

"Aih, hmanah vawikhat ka kal ve tawh" ka ti a, zep hni hne lo va ka pawm nghal maina chuan a ţhawng ve niin a lang. 

"I kal ve tawh maw? I inkhung chawrh chawrh reng emaw ka tia" Tommy zawk chuan a mak tihna thup zo lovin a sawi chhuak hluai a, "Aw" ka tih sap hnu a Msa mitmeng thim khup khup leh a nui hmel ral riai riai ka hmuh chuan ka khi sak. 

"Shillong a ka awm lai khan ka ţhian pakhat birthday lawm naah ka kal ve tawh a, tun ang hian mi kan tlem lo, kan zi hut hut a, a nuam ve reuh lutuk. Ţhian dang ka hruai tel vang chauh a kal ngam ka ni" ka tih zawm leh a, dawt ka sawi lo miah lo tak tak a, Msa min rawn tlawh ţum khan kan kal dun ve ngei kha. 

"Ţhian maw? Ţhian kawm lo vin lehkha ka zir char char i rawn ti ţhin si a" Tommy bawk chuan zawhna min lo zawt leh. Ţhian ka kawm ţhin âwm a hre lo a, ka kawm vak ngai lo reng a. 

"Ka ngaihtuah chian deuh chang chuan ţhian a chhiar loh chang ka ngah ve tho" ka tih leh hnu chuan Msa mitah tak en pahin "Kha pa khan min hmang ţangkai mai mai a ni" chang fak hian ka ti a, a buaina theihnghilh nan leh a khawhar hnem tu a tan chauh min hmang a, keimah chauh min duh ang a insawi siin a chet phungah min duhna a lantir ngai lo. Hei vang tak hian a ni siamţhat kan tum pawh a a siamţhat theih ţhin loh. Ka sawi tawh ang khan hmeichhe dang a awm ve tlat tawh. 

"Kha pa kha maw? I ţhian chu mipa maw a nih?" Tommy bawk a ni. Ka chhan leh hmain Msa zawk chuan chek tlak chungin Tommy zawk chu a en a "Bialnu inei hmelţha em a, bialpa a nei ve nual tawh anih pawhin mak ti vak duh suh" a lo ti a, Tommy chuan ka kut la in a vuan a, ka lam rawn hawiin "Min hrilh loh i nei nual a ni maw?" naupangchhia zet mai hian a ti a, engkim ka hrilh vek ţhinah a ngai a, thil engkim a hria ka ti fo ţhin anih kha. Mahse thil engkim ti ţhin mah ila tupawn zep ţhen chin kan nei ţheuh. 

"Ka nun a thil thleng pawimawh chin chu ka hrilh vek ţhin che a, ka hrilh loh che chuan a pawimawh lo ah ngai mai rawh. Ka bialpa a ni lo va, ka ţhian lah a ni hek lo. Kawppui leh ţhiante hi kan tan a mi pawimawh tak an ni a, kha pa kha chuan ka tan pawimawhna a nei lo" ti chungin Msa chu awmze nei deuhin ka melh ralh a, a hawi sawn rang kher mai. Inpawh tak a inkawm khawm vek ţhin kan ni bawk a, sawi hrehawm vak a awm ngai lo. Chu chu hrethiamin Fiona pawh a inrawlh lo va, a ţawng apiang a entawn zak zak ringawt. 

"Ka uang anih kha min hrilh vek turin ka ti miah lo che a nia, sawi nuam lo itih zawng leh ka hriat atan a i duh loh chu min hrilh lui kher duh suh. I mimal thil chu zah nachang ka hre ve a nia" ka rilru nawm nan a min ţawng thla muan hnu lawkah a phone a ri ral ral a, an inbiak dan hmangah thil pawimawh tak a nih hmel. Ka rin lawk ang chiahin "Dawrah buaipui ngai a awm thut a, ka kal lawk ang a ka rawn let leh ang" a ti ta chiah a, chelh luih chi niin a lang lo va, a rei loh tur thu sawi mawlh mawlh chungin inthlahrung leh hreh tak chungin min kalsan. Chaw ei ho tur kan ni a, a rual a ka kal ve zel a mawi si lo. Tommy-a kal hnu phei chuan boruak chhe lehzualin a nuam lo lehzual a, kan pahnih a kan inbiak ţum a ţha deuh a thu sawi dun theih si Tommy leh Fiona an awm ve tak vang a nunhlui kan sawichhuak leh te chu a chhan min zawt ta se a chhan hrereng chungin kan pawm duh lo ve ve ang. Kan hun lo hman tawh te leh kan inţhen tak dan kan sawichhuah chuan ka thinrimna a lo let leh mai ang ka ti ţhin a, chutiang chiah chu tun a ka awmdan leh thleng mek ang hi a ni. 

CONT...