NANG CHAUH-4

NANG CHAUH-4

"Bawihte lokal rawh keini chu kan pahnihin i cake ei tur nalh deuh kha va lam daih ang. U Dindini khan a siam zo tawh ngei ngei ang. I ţhiante zan a lokal turin kan sawm nghal dawn nia" tiin Fiona chuan a fapa a kai hrang a, nui sen sen a min en chungin "Lo awm lawk rawh aw, Tommy paw'n ka rei lo ang a tih kha. Cake mawlh kha a nghakhlel tawh a, ţhenawm nula kan siam tir a, ka va enpui lawk ang e" a ti leh siam siam a, Fiona lehzel chu kal lo turin ka duh takzet. Kan boruak a hrethiam ru vek ni te'n ka hre leh hnuhnawh a, "Va kal rawh u birthday ah te chuan cake leh present alawm hmuh chakawm ber" ka tih rualin kan present ken ve ka hrechhuak zawk. 

"Ehe...kan present ve tur kha car ah a awm daih a, Tommy khan a phur let leh daih ang" ka ti hluai a, pawi ka tiin ka zak takzet. 

"A ho lutuk in la awm rei dawn tho a, a rawn phur let leh mai dawn alawm. Tommy-a haihawt lutuk hi chu aw" Fiona chuan la nui sang reng chung hian a ti a, an kal lawk tur thu sawi nawn lehin a fapa nen phur zetin an chhuak. Pawimawh a ko tu nei ve ila ka ti takzet a, ka phone lah a reh vung vung mai si. 

"Tumah an awm tawh lo va, chak ber ang a lan tum ţalh a ngai tawh lo. Inthlahdul rawh" ti a min hrilh chuan "Zam miah lohna hmunah intih chak luih a ngai reng reng hleinem. Min hrechiang emaw ila inti fo a ni maw?" ngeiawm zetin ka ti a, a mitmengah thinrimna hmuh tur a awm tawh lo va, thil thleng kha engahmah ngai lo ni awm takin a inbengdai leh hman vek tawh. Heng mai mai te hian ka thinrimna belh chhahin ka ngei hlur ţhin. 

"Kan nun a pawimawhna nei ve lo te hian min hrechiang duh phian" a tihziah danin ka thusawi tawh min vuak let nan a hmang lehpek a, a hriat laiin pawm thlap duh lo mah ila a sawi ang khan ka zamin ka inti chhel lui tak meuh. 

"Kan tello a nun hmang thei miah lo a ruk a min chhui zui a min umzui tu te hian min hrechiang duh a, chutiang mi chu i lo ni ve zawk em ni?" ti a ka zawh chuan a lo nui hawk. 

A ban phak mai a ţhu ka ni bawk a ka inrin hma hauh a ka banrek a rawn vawn chuan rum tak a melh chungin "Min thlah rawh" zawi tak si sehchilh rap rap tho si hian ka ti a, lak let tumin pawt fat fat mah ila min thlah duh ţhak lo.

Thuk tak a thawk a hip luh vang vang hnuah "Hmuh tir duh che ka nei mai chauh a ni. Hun a duh rei lo vang" a ti a, rei vak lo a a mit a ka en hnuah pumpelhna zawng lehin "Min hmuh tir tur chu engpawh ni se hetah lo la la ka lo en ang" ka ti ve tlat thung. 

Min chelhna avanga ka hrehawm tawrhna leh tal chhuah tum a ka lo chai ve na zawng zawng te chu pawisa duh lo va namnulin min pawt tho lawp a, thil min hmuh tir a tumna lam min panpui tum a inchung pan chhohna kailawn min chhoh pui lai chuan ka kut pawh let la tum ve ţang ţang chungin "Ka lo nghak ang che ka tih kha i hrethiam lo em ni? Min thlah vat rawh. Anih loh chuan---" ka ti hman chiah a, vin viau mah ila hlauhawm tak a min en takah chuan tal buai tawh lova ding chawtin ka hmui hnuai lam ka pet a, "I ka te takte chip tir tur che khan ka tih ţhin dan kal hmang min hman luih tir suh, i hriatchian tawh kha" ti a min vau hnu phei chuan ka ţi dak. Thawm dang siam leh hlauin nghet zetin hmui ka chip tlat a, min chhoh pui leh tur a a inher dawn lai a a nui hmel kha ka lo hmu hman. Hnial chi ni tawh lova hriain ţha deuhin ka zui a, min hmuh tir tur chu a pawimawh viauah ka ngai mai. 

A pindan chhung ka lut chiah chu nghet zet a kut hum ruhin reilote mit ka chhing a, thawk ka la vang vang. Muanchanga meng lehin ka taksa thunun nasa viau mah ila ka mit ber ka thunun thei lo. Ka hma a thlalak tam tak intar dal chu ka enkual ruai a, enchik bik tur leh en hmasak ber tur pawh ka hre mang lo. Min rawn tlawh ţum a kan lak dun a tam ber a, a ţhen chu a fiah lutuk lo hlawm. Kan lengkual nasain thla kan la nasa hle a, ka nun aţanga paihchhuah tumna rilru ka put ţan aţang khan keichuan heng zawng zawng, Msa ka hriatchhuah theihna zawng zawng hi ka dah bo vek a, ka ti ral em lo. Zawi muang a pan hnaiin uluk lehzualin ka en a, kan la naupang lehzualin kan hlimzia kan hmelah a hriat. Milem kan la ni lo va, lem chang mai mai kan ang lo. Hlimna in kan mit thlengin a ti de sar a, kan nui thlengin a tak tak vek a ni. Zawi leh nem tak a nui chungin ka en zual a, thil pakhat lo awm tel ve hmaah ka ding chat. Lehkhapuan kan duh loh paih tur a kan hrual hlawm hrep hnu tih mar chawp leh tih a hriat hle a, ka phur thut ţum a ka poetry ziah, ka zahpui leh si avanga ka paih leh tak kha a ni. Ka kiangah awmin min fuih phur a, ziak zawm leh tur a min hrilh char char chung pawh a a hmuh lai ngei a ka paih tho kha a ni. 

"I va ziak thiam ve, chhunzawm char char la nakinah ila ţangkai pui maithei asin"

"Mi te ang a ziah thiam ve ka chak a, lungkuai deuhin, chhiar tawh pawhin chhiar nawn leh an chak et et tur khawp a ţhain"

"I inzir peihin zirtur neih reng i duh zawk a, zir zel la iti thei ang. Thiam ve lo mah ila a ţul hun a pui tur che ka awm reng a, ka pui ang che, ka thutiam ni rawh se"

"Aa..ka zak leh si. Thiam lo chungin a ti ve ţalh min ti palh ang. Mi nuihzat mai mai ka ni hlauh palh ang. A ti mi an awm a, thiam ka in ti lo"

"Ehe..khaw nge i rintawkna kha? Thiam sa an awm hleinem" 

Ka ziah ţum a kan thusawi te kha ka hriat naah lo la awm rengin a ri nawn tluk tluk a, ka phum bo vek tawh emaw ka tih kha a ngai ang zanin awm tawh lo mahse ka lo la phum bo hauh lo, he lehkhapuan ang chiah hian. Ka thil en lai ka hmu fiah lo tial tial a, a phe ruai tawh vangin a chuar lai takngial pawh ka hmu chiang thei tawh lo. Min rawn hnaih tih ka hriat rual rualin "He thil hi i lo la kawl reng maw?" tiin bang a lehkhapuan intar kawk chungin ka zawt a, hlui deuh tawh mahse ka kutziak ngei a ni tih ka hria a ni. 

Ka ngaihtuahna zawng zawng thleng a min hriat sak vek tum ni awm takin chik zetin min en a, "Paih bo ka la nei ve lo. Engkim a ngai vekin a la awm a, ka tifai anih loh chuan ka khawih ngai lo. Tuman an khawih lo" ti a min hrilh hnu chuan lem zet a nuiin "Awmze nei tawh lo vek a nia, paih bo vek tawh ta che. Heng hian natna chiah a hriatchhuah tir ang che. Hengah hian natna bak cham bang a awm lo. Thil dang min hmuh tur i la nei em?" ka ti a, ka tihdan ngai bawk a inti chak luiin leh inthunun lui tlat chungin Msa chu ka en a, ka zam rukna leh danglamna a hmuh ka hlau ru takzet. 

Chhanna ka dawn lawk loh vang a kal mai ka tum chu "Thlalakah hian natna chiah i hmu tak meuh maw?" tiin min zawt a, ngawi zawkah ka ţang ve ta thung.  A reh tlawk tlawk a, a zawhna chhan tumna ka nei hauh lo tih a hriat takah chuan ka banah pawtin bangah min nawr bet rawk rawk a, a taksain min khuap run takah chuan ka tang der. A chetdan avanga hlauthawng zet a thaw hlawp hlawp chungin tal chhuah ka tum a, mahse awmzia a awm loh zia chiang takin ka hria. Kei aiin thahrui a ngahin a chak daih zawk a, hetianga min tih tawh chuan tal chhuah a tlan bo ngaihna a awm lo ţhin. 

Ka khabe ah dawmin amah en thei turin min kuai dak a, "Hmuh tur dang i nei tawh lo. Eng emaw zawn chhuah ka la duh tlat vang zawk a ni, nangmah aţang hian zawn chhuah leh hmuh duh ka la nei" a ti a, a mitmeng rum zet phenah chuan a tih tak zia chiang takin a hmuh tel theih. 

Ngaipawimawh lo awm tak a awm lui tlatin ka chek tlak a, "Ka hnen aţang hian eng thil chiah nge i la beisei cheu a? Eng ber nge duh i la neih?" tiin awki nem lo zetin ka zawt a, inbe tawh lo tur a kan inthlah ţum khan ka phurna leh tha thona zawng zawng te bo vekin ka thlarauin min chhuahsan ta mai emaw ka ti hial a, engkim min laksakin min ei hlum lo chauh a ni ber. Ka luhlulna leh induhtawkna vang chauhin ka invuan ding hram hram a, tlu lek lek ţhin mah ila mipa, min ti na tu lehnghal vang a tluk ka tum lo bur. Ka tello a a awm theih chhung chu a tello a awm theih ve ka tum lui tlat a, min biak a tum loh miau chuan biak bik ka tum ngai lo. Keimah chauhin ka tuar ngawt ngawt a, ka dam chhuak hram a ni. Min hliam na em a, dam hlen lo mah ila tawrh a har em em tawh hran lo. A phu lo chungin hun ka pe zel a, siamţhat theih loh siamţhat theih ka inring tlat a, min biak apiangin ka be ve zel a, ka thinlung mai ni lo ka hma lam hun thlengin a ti chhe lek lek hman, ding thei lo khawpin tlu na hman ila chuan tun dinhmun hi ka thleng kher lo vang. Tunah chuan pek tur engmah ka nei tawh lo. 

Ka khabe a dawmna chu thlahin a kutţangin dimtein ka biang a chul ta zawk a, inthunun nasa viau mah ila ka mitmengah nuam ka tih lohna a lang chhuak hman lehpek a ni maithei. Min fiam a min chhaih thinrim reng rualin ka thinrim meuh chuan min thlem leh ţhin a, hmanah kha chuan ka na a hmu thei ngai lo. Mahse hman a ni tawh, kan la naupang lutuk. 

"Eng vang a min ring thei ngai miah lo nge i nih? Thudik tak vek ka hrilh ţhin chung che khan ngati nge min huat luih tlat?" tiin nem deuhin min zawt leh ta zawk a, a aw chu ngaihthlak a harsa in min ti na lek lek thei hial. Min hrilh a, min hrilh tawp a, ka dawnsawn dan tur ngaihtuah duh lovin a sawi tawp a, ka hmuh phak miau loh vangin thudik leh dik lo ka thliar thiam lo. Thlalak hmuin hmeichhe thawm ka hre zut a, awlsam fein a sawifiah a, min hrilhfiah ah a in ngai. Mahse min hrilh ringawt a, thu ngaihthlak nuam tak tak min fah fo mahse a chezia a a lan miau loh vangin ngaih a ţha thei chuang lo. Ka hmeichhe huat ber hming a lam fo a, an hlim dun ţhin zia ral aţang pawn ka hre phak hial ţhin. Thil dang tam tak a la awm, min ti rethei takzet a ni. 

A mit a thuk tak a melh chungin na zetin ka hmui ka seh a, ka khawhmuh a phe leh ţan tawh a, mahse ka mittui lo hnai zel chu ka pawisa lo. Naupang tak tak ka nih lai aţanga tun thleng a ka mipa hnaih ber awmchhun a ni a, tih tak zetin ka lo duh tawh ţhin. Hringnun thui tak a ka ngaihtuah thiam hma phei kha chuan a tello a awm thei miah lo ah ka inngai ţhin a, mipa dang min duh der ve tu te hmuh kánin ani chiah hi ka hmu thei ţhin. Mahse ka mipa duh ber ngei khan ka thinlung ti keh chhe vekin pawimawhna nei ve miah lo angah min inngaih tir a, duhna kha huatnaah a thlak thleng a ni. Mi chuan 'i hmangaih' min ti maithei mahse hmangaihna an tih ziah hi tun thlengin ka la hrethiam chuang lo. Hmangaih ni ila ka haw thei dawn em ni? 

"Huatna maw? Ka huatna che hi maw?" ti a zawtin vawt raihin ka nui a, "Ka huatna che hi 'hua' tih ţawngkam hian a sawifiah zo kher lo vang. Thukhuh tak a kan sawi ang vel chauh a ni" ka ti a, thu mal tin te chu a hriat loh hlau ni awm takin ka lam fiah hle. 

Ka thusawi ngaihthlak nuam vak lo chuan a thawk a ti sak ve niin a hriat. Mit ti zimin min melh chhuk run a, a lungawi loh zia ka lo hmu chiang hle. 

"Chutiang tak a min huatna tur khawp eng thil nge ka tih?" tiin a aw thuk raih chuan min zawt a, "Ka ţhian pakhat vangin i lungawi lo ţhin tih ka hria. Hnar tum mah ila min umzui zel a, ngaihzawng a neih thu ka hrilh lai che pawh khan i hrethiam ve viau a, kan pahnih a school kan luh dun ţhin ang tho khan college khatah kan kal dun a, ţhian chauh tih kha ka sawi ngun ber a ni. Min ring duh tlat lo  va, engkim siamţhat dun i rem ti a, hmu tur chein ka rawnkal vang vang a, kha zan---" a tih lai mek chuan lo pawt chatin "A tawk" vin zet hian ka ti a, ka mittui luang thla ngiai ngiai chu ka ngaimawh zo lo. A thusawi tum ka ngaithla peih lo va, kha zan kha ka ngaihtuah chhuah apiangin ka thinlung a na takzet ţhin a, boruak hian ka chuap a thleng pha lo emaw ka ti hial ţhin. Dak vahin ka en a, huatna leh thinrimna tam tak ka pai te chu ka mitah a langchhuak thei vek ang.

"Englai mahin kan ţha ngai lo. Kan inlaichinna neih ve ţhin khan ţhat lai a nei ve ngai lo. Siamţhat theih engmah kan nei lo. Hmanah khan kan ţha lo va, tunah ţha a awm leh chuang lo va, nakin zel thlengin a ţha lovang a, engtikahmah a ţha ve ngai lovang" ka ti hmarh hmarh a, a thiam lohna leh tih dik loh a pawm ve mai dawn emaw ka tih laiin ka biangah nghet takin a dawm a, chiang zetin min melh run bawk. 

"Eng thil nge thleng? Min huat nachhan chu sawi ta si che" ti a min zawh laiin ka kekawr ipte a ka phone ah lai a ri hlauh a, hriam hraih a thaw chhuak hawkin a kut a la sawn a, a thusawi lai mek tibahlah tur a phone a ri chu ka lawm ru kher mai. 

Ka phawrh chhuah lai chuan a lo en ve reng a, Tommy-a hming lang kalh pawh a hmu ve ngei a ni ang ka chhan dawn lai a ka melh zawk khan a thinrim hmel ka hmu tlat.  

"Aw Tommy?" 

"Rei min ti tawh em? Kan la buai lawk a i chanchin ka rawn ngaihven zawk" 

"Ti lo ve ka ţha alawm. Rilru nuam deuh khan a ţul ang ang ti rawh"

"Awle ka rei tawh lo ang aw. Ka ti zung zung ang a, rawn let vat ka lo tum dawn nia" 

"Hmanhmawh lutuk phah chuang lo la" ka tih lai mek laiin ka khabe ah dawm lehin tihluihna takmeuhin Msa chuan min fawp a, ka thusawi lai a tawp chiang hle. 

"Rebecca" ti a Tommy-an min ko ri chu hre mah ila chhang thei lovin hlauthawng tak chungin nam kian tumin beisei bo tak siin ka ka bei let ve ţang ţang a, ka kut lehlamin a awmah ka chum a, leh lamin phone ka keng a, Tommy-an hriat a neih loh nan tih tawp tumin ka rin hmeh mawp mawp. Na lehzual a bang a min nam beh lai chuan zawi tein thawm ka chhuah a, nuam ka tih vang a ni hauh lo thung. Theih tawp chhuah a la bei let ve zelin nam sawn tum reng chungin ka tal fat fat a, kei aia a chak zawk daih vangin inlak hran tum viau mah ila inlak hran mai a har takzet. Ka tal nasat pauh leh min vawnna a nghet sauh a, phone kha ka hmet tawp chiang em ka hre lo va, chuvang tak chuan Tommy-a hriat hlauin eng thawm mah ka chhuah ngam tawh lo. A awmah chuan namin ka chum ve zel a, mahse ka banrek a vuan a ka lu chunglam a a nem beh lehzel takah chuan chet ngaihna a awm tawh lo. Ka hmui ka chip lui tlat chu ngaithei lovin a rawn seh hlak a, a thip kher mai. Chu chu remchangah lain ka ka chhungah a lei a rawn hawl lut a, min mamawhna leh min ta neih bik zia lantir tum ni awm tak a min fawh lai chuan nghet zetin mit ka chhing a, ka hriatna fim tak chu ka taksa in zawi zawiin a phatsan ţan a, ka in danna bang ka vuan lui reng thei lo. Min fawhna te, a rim leh a awm khauh ţha zet te, kan chhehvel a thlalak intar dal te thlengin thil tam tak min hriat chhuah tir a, engkim mai chu ka hriat bel sa vek niin a dik thlup vek niin a hriat. Keimah leh keimah chu nem zel a inhriain ka chhanglet ve a, ka kut a vawn beh loh lam zawk chu muangchanga ti chein a awmah ka dawm a, a tshirt ah nghet zetin ka ţham zui zat. 

Ka taksa ka thlah dul ve tak hnuah chuan ka dodal tawh lo tih hriain ka banrek a vawn beh tlat chu a thlah a, ka kawngah dawmin kan taksa a ti si chet a, min fawhna chu a nem sawtin a hma ang khan tih luihna a tel tawh lo. A in lak hran hnu chuan thaw hlawp hlawp chungin ka meng riai riai a, ngawi rengin kan inmelh reng a, sawi tur kan hre lo ve ve. 

Ka phone a rik leh takah chuan nasa lo te hian ka phu a, ka lo keng tawh lo. Chhuat a ka phone let bal chu ka chhar vat a, Tommy bawk a lo ni. Engmah sawi lovin ngawi reng mah ila chhan a ngaih thu hriattir nan Msa chu ka en hmasa leh a, ka sawitum hrethiam ni awm takin lu a thing a, "Chhang suh" a ti zui sup. 

"Ka chhan ngei ngei a ngai" ti a ka hrilh hnu chuan a thaw hawk a, kalsawn em lo mahse hmun min siam sakin a tawlh hret. 

"Tommy" 

"Ka ngaichang reng che a, a reh vung vung a, ka ngaih a ţha chiah lo a. I ţha em?" ti a min zawh lai chuan nghet zetin phone ka hum a, inbeng dai chawpin buai loh hram ka tum. Msa taksa in min la khuap run a, chhan nghal zung zung harsa ka ti takzet. 

"Aw ţha e. I ţawng ka hre thei bik lo va" ti a chhuanlam ka siam lai mek a kan mit leh mit a intawn chuan ka lungphu a rangin ka thunun zo lehpek lo. Ka kawng a dawm a nghet zet a min kuah chuan zawi tein ka thaw hak a, ka nghawngah hmai phumin a thaw lum ham ham a, awmzia a awm dawn loh zia hria in nam sawn tumna ka nei tawh lo. Ka tlawmna lantir nan beidawng zetin ka thaw huai ringawt.

"Eng nge i tih?" 

"Ka ţhu mai mai, tih tur a awm vak rih lo va, awm mahse mahni in lo ah chuan chet thiam a har em a, engmah ka la ei lo va, ka awm tawp rih mai mai. Ka tih tur dang leh chu i hre thei mai ang. Keimah bawk ka inkawm leh" tiin dawt ka hrilh. Mit ka chhing vang vang a, dawt ka hrilh fo vang hian ka inhua a ni. Hetianga Msa'n min kuah thei leh ka awmdan ka huat miah loh vang hian ka inhaw lehzual a. A dik loh zia hre mah ila inchhung lum nuam tak a awm ang mai ka ni. Him bik riauin ka inhre tlat. 

"I ţhat chuan a lawmawm. Midang awmlai rengin mahni leh mahni inkawm char char bik lo la, present ka phur let tih ka hre chiah a, ka rawn keng let leh mai ang" 

"Awle..Fiona hnenah ka hrilh tawh a, an nghakhlel ru tawh viau maithei a ni" 

"Lo hmanhmawh suh se an hmu dawn tho tho. Ka dah aw..ka hmangaih che" chu thu chu hlim nui riin zui mahse inthiam lohna in ka chhunglam leh pawn lam hi min ei zo lek lek a ni ber. Ka thaw te chu ka hrawk a tang tlat ang hian a awm a, englaimahin a beisei leh a hriat chak ber thu tawi te hi hrilh ve thei ngai lo mah ila tunah phei chuan ka thei lo lehzual. Ka awmdan hi hre ngat se la chuan na a va ti dawn em. Ka hrilh ve hun nghak lovin phone a ti tawp a, hnuai lam ka bih a, hmeichhe awm nem zawk ka nihna lang chhuakin ka mittui bawk a tla leh a, "Ka tihpalh" ri mang lovin ka ti a, phone a dah tawh miau vangin a hre thei tawh lo. 

Ka biang a mittui luang min hruk sak lai chuan hawi chhuakin "Ngati nge nangmah kher inih a ngaih?" ţap chung hian ka ti a, ka awmdan leh Tommy-a dinhmun te, ka dawt sawi te leh engkim mai chuan min ti thinur vek. 

"Ngati nge nang kher inih zel? Ka thinlung hliam tihdam a thawm nat nan khan hun a duh rei zia i ngaihtuah ve thiam em? Hma lam pan tur a ka beih nasat tur zia leh hun a duh rei zia i chhut ve thiam em? Engkim a tawp vek tawh a ka ngaih hnuah Tommy nen bul kan ţan ţha leh a, mahse a hma zawng pawh a in thukru reng si tunah lem ka hmuh turah i inlan leh zut a, i ţhianpa in min duhna hi i hmu thiam ve em? Nangmah vang a dawt ka hrilh hian engzat chiah a nasa in nge natna ka insiam i hmu nghal mai thei em?" ka ti mawlh mawlh a, min sawm a, ka duh vang a kal ka ni. Mahse thil thleng engkimah hian amah lo chu dem tur ka hre chuang lo.  

Min chhan tum ni awm tak a a an zuau lai chuan lo hma khalh lehin "Kum tam tak hnuah pawh min chen chilh zui zel a, heng i thil tar zawng zawng te hian lungngaihna chauh ni lo thil dang a hriatchhuah tel tir che anih chuan nga ti nge hman hmanah khan chu thil dang chu i umzui zawk loh? I bi ru ta sa sa ngati nge i rawn inlan leh hlawl?" ka tih zawm leh a, zawhna bawk a ni. A awmna hre reng chungin zawn chhuah a tum lo min ti maithei, mahse min ti na takzet tu chu zawn chhuah a umzui kha a chakawm hlawl loh a ni. 

"I hmangaih em?" a ti leh nghut a, thil kan ei dun ţum a min zawhna ngai bawk kha a ni. Ka chhanna erawh a dang ta deuh. 

"He zawhna min zawt sek tur hian dikna i nei lo. I lo buai ve na tur a ni lo" nghet charhin ka ti a, hmanni ang khan ţha deuhin ka hrilhfiah thei ta bik lo. 

Min vawnna ngai a nghet zet a min la vuan reng chungin ka mitah thuk takin a en a, "Ka zawhna pumpelh i tum zawk anih kha. I hmangaih miah lo, a dik em? I hmangaih lo tiraw? Ka hmang ţangkai mai mai che ah i ngai tiraw? Kan inang chiah. Tommy hi hmangaih miah lovin i hmang ţangkai mai mai a ni. Guard ang lek a ni, vengkim tur che a i rawih---" ka thinrim insum zo lo chuan a sawi zawh hmain a hmaiah ka beng a, a mitmeng thim nghal khup khup te leh a thinrim inseh ruh ţeuh chu hlauhna nei miah lovin "Ramsa hlauhawm tak chiah i ni. Zahawmna chhete mah i nei lo" ka thinrim lutuk chu ka thaw hlawp hlawp a, ka ben na avanga ka kut thip ser ser chu ka hum tlat bawk. 

Min ti el tih hriat takin ngeiawm zet hian a chek tlak tlak a, "Ni e ramsa hlauhawm ka nih hi. Ramsa hlauhawm tak natna hmang a ei ral tu che" a tih hnuah "Hmuh tir che ka tum kha i en chak tawh em?" ti a min zawtin a kal hrang a, drawer aţangin chemte tereuhte kutphah a hum bo tham lek, nalh tak tur a cheimawi, hriam vak lo, ka pa in a dam lai a a duh em em ţhin ngei kha a rawn phawrh chhuak ka hmuh chuan mak tiin ka meng zau kawk a, a lo la kawl reng ang tih ngaihna reng reng ka hre lo. Drawer bulah chuan kal phei ve sawk sawkin laksak mai ka tum a, khawih pawh ka khawih hmain a khung leh hmak a, a din hliah zui daih. 

"Min pe let rawh" min pek mai beisei ti tih, min pek duh loh hlau rilru tho chung a ka dil chuan a nui suk a. 

"I ta a ni lo" 

"Ka ta anih kha, ka pa in a lawm em vangin ka kawl tir ţhin a, a nei tu tak chu keimah ka ni. Engtin nge i kawl daih theih zawk?" mak ti ru zet chungin ka zawt a, school naupang ka nih lai daih a ka neih tawh a ni a, ka pa ţhianpa driver ve tho min pek a ni. Ka hman rim ţhin em vangin ka hmuh zawk chhung khan ka ta ngei a ni tih ka hre hman vek a, tunah phei chuan a hman theih tawh kher loh ang chutih rual chuan ka tan a a hlutna a la bo chuang lo. Ka zawng nasa ţhin hle nghe nghe. 

"Hospital a i pa ka tlawh ţum a min pek a ni. I ta a ni tawh lo" ngeiawm zet hian a ti leh a, beidawng duh bik lovin "Min pe let turin a ti ngei ang che. A nei tu diktak zawk ka ni a, khawngaihin min pe let rawh" ngen ngawl takin ti mah ila "Ngati maw? Tommy pek turin maw?" ti a min zawt letin a nui zui hawk. 

Inbengdaih nan a boruak ka hip luh vang vang hnuah beidawng ru zet hian ka melh a, en mai pawhin ka hnen aţanga a thil hriat duh a hriat vek hma chuan min chhuah zalen leh tawh miah lovang tih ka hre thei. A bul a awm tur a min duh chuan ka tan beh tlat theihna tur eng eng emaw a nei ziah. Engchiah nge keimah aţanga zawn chhuah duh a neih hre lo mah ila kan inhmuh leh hmasakna ber ni aţang khan a lo ruahman lawk daih tawh ang. He inah hian lokal lo tawp ila ţha tur. 

"Eng ber che zawn chhuah i duh chu? I duh ang chu zawng rawh. Nge chi dang deuhin kan kalpui ang? Nang chiah hi tun thleng a ka mipa duh ber ila ni reng tih i chian viau a, ka pa in a thih dawn thleng a a ro em em i kawl vang a i duh duh a min chaih kual vel i tum ro ro anih chuan hman ang khan awm leh ila, heng thlalak hlui tawh tak tak a kan awmdan ang chiah hian" ka tih takah chuan a beisei miah loh ka sawi tih a landanah a hmuh theih. Mak tih hmel zet a "Maw?" a tih chuan tifuh inti zetin ka nui suk. 

A duh dan chiahin thil a thleng mek a, ka duh neih tum ran chi ka ni tih hriain ka pa ka hmuh rual a ka hmuh tel ve ziah ţhin, rei tak a lo dahţhat tawh, pangai tak a kan awmdun lai pawh a min hmuh tir ngai miah loh min hmuh tir thut a, neih let nan engpawh ka ti duh dawn tih a hria. Kum tam tak kan inhmuh tawh loh hnuah ţhian hluite nen a kan inhmuh khawm leh naah tihpalh thil thuin kan inhmu a, midang awm ve lai anih vangin pangai takin min kawm. Chutah chiah chuan a ţhi min leisak ka la awrh reng a hmu a, ţhi mai mai pawh phelh thei lo chuan ka la theihnghilh miah lovang tih a hria. Bazarah min hmuin thil ei puiah min sawm a, beisei nei miah lo se la chuan a tih ziah danin min tawm bo san leh hmak ang. Tumah an sawm ve lohna a fapa birthday ah min sawm leh chiah bawk. Heng hi ka rindan mai mai a ni na a ka rindan hi dikah ka pawm hmiah. 

"Nichin a i awmdan aţang kha chuan Tommy nen hian inţhen mah ila pawi tihna i neih loh zia a lang a, Tommy hi ţhen a i hnen a let leh tur a min duh anih chuan Fiona te nufa hi chhuah tir rawh" ka ti nghet charh a, ka thusawi tawp lam bik phei chu ka lam fiah lehzual. Tommy hnen aţangin engkim ka hre tawh a, a chhuah tir hleithei lo tih te nen lam. Awlsam zet a a duh apiang neih tir zel ka duh tawh bik lo a ni. 

CONT..