NANG CHAUH-5

NANG CHAUH-5

Ka thusawiin a ţhawn em vang a a ngaihna hre lo va a din reng lai chuan a awmah dawmin muang changin ka chul a, chet la hmasa zawk ka nih hnu ngat phei chuan a taksa ţang te chu ka hriat hmaih lo. 

"I duh dan takin Tommy ka ţhen ang a, hriat tel loh a neih la awm ho zawng zawng ka hrilh vek bawk ang. Chuan nang paw'n nichin a ka sawi ang khan Fiona te nufa hi hnawtchhuak la, Fiona i chhuah tir chuan in fapa pawh hi chhuah tir ve rawh. I chhuah tir ve ve hnuah min nei ang che" 

Chu thu ka sawi zawh hnu phei chuan a tawlh hnung dawrh a, mak ti leh tih tur ber hre lo ni awm tak a a la awm reng ka hmuh chuan na ti tak chungin ka chek tlak. Ka din ngil theih nan bang ka ngheng a, anih loh chuan ka awn leh ruai ruai mai ang tih ka hlau a ni. Kei aia Fiona a la ngaihtuah zawk zia ka hmuh chuan min tih nat nan hun ţha ka pe nawn leh der tawh niin ka hria. Chu hun ţha chu a bawh pelh miah lo bawk. A duh duh a min chaih kawi loh nan harsa zawngin thil ka kal pui a, a tan a thil harsa tak tur tih tir ka tum a, a sawi ang ţhin angin a tan a hmeichhe pawimawh awmchhun chu keimah chauh ni reng ila chuan thei dawn lo mahse keimah vangin a tum chhin ngei ang. Tum chhinna pawh a nei miah lo va, ka thang kamah inawk nghalin na ka tuar leh ta zawk a ni. 

Amah la en reng chungin tih luihna tak meuhin ka nui a, "I thei lo em ni?" ti a ka zawh leh hnuah pawh chhanna ka dawng lo. Ka nghak vang vang a, reitak hnuah pawh min chhan theih chuan loh vangin ka nui hak. 

"I duham lutuk anih kha. I ta chauh ni reng tur a min duh rualin Fiona i duh tel tho a, ţhian chauh maw? Ţhian chauh ni ula hetiang hian in awm miah lo vang. Naupang hi i fapa a ni. Mi zawng zawngin a ni lo ti mahse a ni ka ti tlat tho ang. Tleirawl khawngaihthlak, a pa in a thih san hnu a a patea te ring a nung mawl ve tawp kha ka ni tawh lo. Tleirawl khawngaihthlak englai pawh a i puih ngai reng kha ka ni tawh bik lo. Kha tleirawl mawl mang ve tak, i duh duh a i bum kual mai mai theih kha ka ni tawh lo. Suangtuahna leh duhthusam lem fe fe, engtikahmah a tak ram thleng ve ngai lo tur beisei chunga inhrem reng ka tum tawh lo. Thil tak tak zawngin ka um a, a tak ram a chen duh tawhin kha mumang lem lutuk aţang khan ka harh chhuak tawh. Inhnuaiah ka lo nghak ang che" ka ti a, hawi let miah lovin kawngkhar lam ka pan a, ka chhuah dawn lai mekin a aw bawkin min ti ding leh. 

"Min zui zel a, ka hnar chung pawhin hre lo ang hmiahin min zui lui zel. Nitin ka hrilh che a, ka zir naah a zir ve a, ka awm na apiangah a awm ve. Bik bo dan ka ngaihtuah ang ka ti ţhin a, hun min pek i tiam bawk a. Ka nu enkawlna hnuaiah ka awm a, hrilh lo tur a ka tih pawhin ka awmna a hrilh zel. Hei pawh ka hrilh tawh hnu tho che. Keimah a ka in enkawl theih hun, ka bik bo theih hun nghak turin ka hrilh ţhin che" chhuahsan ka tum meuh chuan a sawifiah ve duah. A dik chiah, ka hre vek tawh. Hmeichhia hi kan lo inang lo thei khawp a, ka hriat lai ngei a ţawngkam na tak tak hmang a a hnar ve pawhin hre lo ang hmak a ni tak tak a, charh beh ang mai a ni a, min huat vang hrim hrim a ti lui pawh a ni maithei, mahse hriatthiam theih miah loh ka la nei tho. Min ti na takzet tih hian a sawi fiah thei ber ang. 

"Engtia rei nge nghak tur che a min beisei? Kan boruakin chhiat lam a pan zel tih hrereng chung pawhin a ţhat leh beiseiin ka nghak zel che a, i hla tial tial a ni tih hrereng chung pawhin ka nghak lui tho che, min be tam lo tial tial tih hrereng chung pawhin a buai a niang tiin ka nghak che a, hnawl ka ni tho. Ral aţanga nghak ţang ţang tu che kha ngaihven loh leh chan chhe zawk ka ni tho. Naupang a tel ve hma pawh a hnar bo theih loh chu naupang a tel hnu phei chuan i hnar lo tawp ang. Hei aia ţha hi ka phu ve in ka inhria" ka ti a, ka chhuahsan lui ta tho. 

"Khaw nge an awm daih ang le ka lo tia, ka zawng kual thuak thuak cheu a, inchung lam en nachang reng reng ka lo hre lo" inhnuai ka thlen thlak leh rualin Fiona chuan zangkhai vahin min lo be thuai thuai. 

"Hmanni kan inhmuhkhawm naa kan thlalak ho kha kan enkual a, kawl ve lo pawlah ka ţang leh pek a" nui lui chung a chhangin ka ţhutna ngaiah bawk ka ţhu leh. 

"I hna chelh mek te ka lo hre ve a, i pui tawh bik hle mai. Kei ve chu inchhungah nitin nau ka awm a, incheina hun ka neih loh mai bakah chhuak hmanin ka khawsa ngai lo hrim hrim. Tlem viau mah ila ka buai ve thei a nia aw" a ti siam siam a, a la pangai reng. A ţawng duh ngai a la ţawngduh rengin hlim hmel a pu reng bawk. 

"Hna te i dil ve lo em ni?" 

"Dil lem lo. Naupangtein nu ka ni daih a, hna dil hman paw'n ka khawsa lo. Bawihtea lah buaipui ngai chi a ni bawk nen, a sen lai phei kha chuan a hrisello lehzual a, Msa nen hian hospital ah kan inhruai chhawk reng mai" ka thil hmuh leh hriat te hi a vaiin natna chauh a ni. Ka inthukru lo ti mahse ka awih tawh zawk maithei, buaipui ngai a lo ngah em anih hi. Ka chanchin ve mai mai chu a ngaihven zui hman lo tawp ang. 

"A zia lo hle mai, tunah eng nge a an tawh?"

"A hrisel ve tawh lutuk. Naupang dang ang em chu la ni lo mahse a ma tawkah chuan hma a sawn ve lutuk. Kan lawm tak tak a ni" chanchinbu awmkhawm ruih remţhat mawlh mawlh pahin a fapa chanchin chu min hrilh a, puitling kan ni bawk a, in ngaina lo ru ve ve mah ila kan ti lang chhuak lo. 

"I nu leh pa te an dam em? Msa nu te khuaah khan em ni an la awm reng?" 

"Awm tawh lo. Ka pa pension hnu kha chuan Aizawl ah tho hian an awm ve. Ka uten nupui an nei tawh a, kan upa berin inhrang a chang ve tawh a, midang an la awm ho vek. An rawn leng zeuh zeuh a, vawiin chu in lokal dawn bawk sia, lawm hut hut kan ti lem lo bawk nen kan sawm ve ta lo mai. Bawihtea thil tur zingah ka u in a rawn dah zawk a, a hranpa in an lokal lovang" a ti duah a, nutling pangai tak tak a ang ve tawh khawp mai. Msa a zar sek dan leh a tihbuai zui dan zawng zawng thleng hian hrevek lo ila chu chhungkaw nu nih tlin leh mi fel tak angah ka ngai ngei ang. A landan en mai chuan zak zum leh fel tak, mi pawisawi ngai miah lo a nih duh hmel a, a landan letling thawk a ni thung. Landan hian mihring te hi min bum fo reng a ni. 

"I ei tlem thei emai, ei ve ţeuh rawh aw" Tommy-an atih chuan nui lui chungin lu ka bu zeuh a, eizawm turin ka kun lehnghal. Msa nen a kan boruak chu a ţang ru ţeuh a, ka hmazawn chiahah a ţhu lehnghal. Chu chuan a ti hrehawm zualin a thawipik thlak takzet. Ka chet dan zawng zawng chu a mitin a chhui ve zel a ni tih hre turin amah en tur a hawi chhuah kher ka mamawh lo. 

"Ka thil siam kha tui itih ka beisei" Fiona chuar phur tak a nui chungin fak beisei zetin min en ran a, "Duh lo ka nei mang lo va, a tui lutuk. Keimahni chiah min sawm bawk a kan pawimawh ve hmel a a lawmawm takzet" ka lo ti a, Msa chuan vawikhatmah min la be leh lo. Min enkanin Tommy zawk hnenah chuan "Vawiin khan rin aiin i rei lo va" a tih hnuah min rawn melhin a nui suk a, "I bialnu in a pawt na viau che em ni?" tiin a zawt zui zat. 

"Birthday lawm tur a kal dawr thilin min ti buai kha ka inthlahrung viau zawk a, hmanhmawh deuhin ţul ang ang ka ti sawk sawk a, ka rawn let lehnghal. Present ka phur let leh ta daih bawk sia" a tih lai chuan Tommy chu lo en in a rilru tih nawm nan ka nui a, tlai a kan ţhutkhawm leh hnu a a vawikhat nan Msa chu hlauhna nei miah lovin huaisen leh hriam hrakin ka melh a, "Kan inbiak hleih theih loh vangin a mangang a, thil ţha lo a thleng ta emaw tih mai turin a reh vung vung a, hmanhmawh lo thei lovin ka siam a nih kha, thil dang aiin min dah hmasa ve ţhin bawk nen" awmze nei zetin ka ti ve ngat. 

Ka thil sawi vang a a mitmeng thim khup khup te chu ka hmu ru reng a, a nung chunga min hal hlum daih duh mai hmel te pawh a pu alawm le. Ngeiawm zet a a chek tlak hnuah "Anih dawn chu. Shillong a a awm loh hnu thlengin in la inbe pawp zel tihna em ni?" tiin Tommy bawk chu a zawt leh a, a hre daih tawh turah ka lo ngai char char a, nge min runluih a duh vang mai mai zawk? Ka awm zel dan hriat te pawh a duh a ni mahna. 

Tommy chuan pangai takin kan inbiak zui thu a sawi ve mai a, Fiona a fing hlauh a, titi dang sawiin a phul hluai. Nuam ti lo ru tak chungin ka hmang zo ve thei hram a, kal nawn leh ka tum tawh lo kher mai. 

"Ka thusawi i ngaithla miah na nge?" ka hmai zawn a kut vai chunga Mapuii'n ring leng lawng a zawhna min zawh chuan ka harhchhuak zawk. Mi bul a ka awm lai chuan mahni leh mahni inkawm melh melh hi ka sim a ngai takzet. 

"Ka tihpalh lutuk...eng nge i sawi lak mek khah?" ti a ka zawh chuan min thlek vang vang phawt a, chumi hnuah "Dik lo a awm tiraw?" a ti a, chhang lovin lu ka thing ringawt. Ka kut vuanin na te lo te in a beng zui thak thak a, "I thinlungah khan engkim thukru bo vek suh. Eng emaw tibuai riau tu che i nei anih chuan sawichhuak ngei ngei rawh. I buaina ka chinfel sak thei lo chein ka ţanpui thei lo che a ni maithei a, mahse ngaihthla tu ţha tak ka nih hi. I duh duh sawi la, ka lo ngaihthlaksak ang che. Khawiahmah a chhuak leh tawh lovang tih ka tiam che" a ti dap dap a, a awki leh a mitmengah chuan a tih tak zia a lang chhuak hial. Min ngaihtuah takzet niin ka hria. He hmun a ka thawh tirh aţang khan kan inkawp chawt a, eng ang pawn thup bo tum mah ila Mapuii anih chhung chuan ka thup bo hlen thei chuang lovang. 

Msa te in kan kal aţang khan kar khat a liam leh tawh a, kan haw rualin a phone number thlengin ka delete nghal vek a, theih tawp chhuahin ngaihtuah loh luih hram hram ka tum tlat a, inthunun tum viau mah ila ka hriatna lehzel thlengin ka thunun zo lo. Keimah a ka awm chang ngat phei chuan ka hriatnaah a rawn lang nghal zut zut a, amah ka ngaihtuah phah ţhin a, nunhlui zawng zawng thlengin ka ngaihtuah chhuak leh ţhin. 

"I hrethiam ve lovang Mapui...tunah tak hi chuan misual tak niin ka inhria" ti sepin hnuai lam ka bih a, ka zak a ni. 

"Ka bialpa mek hi duhna tak tak ka nei thei lo va, ka bulah ka awm tir reng tho si. Mi pakhat tun thleng a ka thinlung luah tlat tu a awm a, kal bo tir tum nasa viau mah ila kal bo duh lovin ka thinlungah hian a awm tlat reng. Kum a liam zel ang a, ka nuai bo ve thei mai ang ka ti rilru ţhin a, mahse kum tam tak a liam hnu hian ka dik loh zia ka hria. Thuk takah a lo la inphum tlat a, vawikhatmah, second 1 lek pawh a lo la chhuahsan miah lo" ti a phun sep sep chungin Mapuii chu ka en a, na ti chung chung a nui luiin "Misual tak chu ka ni ve chiang alawm. Ka bialpa hi thudik tak hrilh tur ka nia, ka duh tak tak lo anih chuan kal tir ve mai tur ka nia, mahni hmasial ka inti ţhin. Ka bul hnai a a awm hian him angah ka inngai a, ngai pawimawh tak tak tu nei ve ah ka inngai a, thil dang zawng aia min dah hmasa ber tu neiah inngaiin ka la vuan lui ţang ţang"

Mapuii chuan ka kut chu nghet zetin min vawn sak a, min lainat hmel kher mai.

"I duh tak zawk chu engtin nge ni ve dawn? I rilru put hmang hi a hre ve hrim hrim em?" 

"Ka hre lo le..amah chiah duh tak tak ka neiah a ngai a, a ngai dik chiah bawk. Mahse kan rilru put hmang a inang lo. Kei aia hmeichhe ngaih pawimawh a nei a, a hnaihah a awm tir reng. Chu nu hmun chu engtikahmah ka luah lan thei ngai lovang" 

"Anih te chuan ngati nge i la ngaihtuah reng bik? I ta a ni thei ngai dawn miah lo tih hrereng chungin ngati nge i la duh tlat? Kawng awlsam lam zawhin duh tak tak zawk tu che chu i duh ve mai thei lo em ni?" tiin min zawt a, duh tak tak la nei ve ngai miah lo tan chuan a awm ve viau. 

"Ka bialpa chunga ka thil tih hi dik lo iti ve tho em? Min duh ngawih ngawih a, min hmangaihzia a sawi fo. Chu ti chung chuan ka thinlungah mipa dang a awm tlat tho sia" ka tih chuan a lo nui liam mai. 

"Hmangaih hmasaber chu a theihnghilh theih tawh ngai loh an tih ţhin kha. Nangmah chiah i ni miah lo a nia, I hmangaih hmasaber a nia, a ni reng tawh bawk ang. I thinlungah khan nung rengin hmun a chang reng tawh ang a, theihnghilh tumin nasa takin bei ngat ngat mah la engtikahmah i theihnghilh thei tawh ngai lovang. Mahse kha kha i kut vuan reng tu tur a ni hleinem. I kawngzawh apiang englai pawh a zawhpui che a vuan reng tu tur che a ni tihna a ni kher lo. I thinlung ngaithla la, a hriat tir ang zel chein ti la, a hruaina lamah che kal tawp rawh" tiin min hrilh a, keimah chiah a ka khawl khawm reng ka sawichhuah tak avang chuan tlemin ka veng ve hawk.

Tommy ka be khatin min biak a tum apiangin chhuanlam fahrah te te ka lo siam ţhin a, ka chauh thu leh ka mut a chhuah zia ka sawi ngun ber. Rei tak chhung min ngen hnuah a dawr a kal kawi ka rem ti ve hram a, min rawn hruaiin car a dahţhat hnuah kein a dawr lam kan pan a, ka kutah min kai naa a rualin ka kal lo. Ka hmaah kalin muangchangin a hnungah ka zui a, dawr thlen hmaa a din tak daih vang chuan mak tiin ka lo en ha.

"Ngati nge i din?" tiin ka zawt a, ka ţawng loh chuan ţawng chhuah hmasak a tum loh hmel em vang a zawt ka ni. 

"I thinrimna tur thil tih ka nei em ni?" ti a min zawh let ve takah phei chuan mak ti lehzualin ka meng kawk a, "Teuh lo mai, ngati nge chutiang chuan i ngaih a?" ka lo ti thuai thuai. 

Ka zawhna min chhang tawh lovin dawr lam panin min kalpui hmawk hmawk a, mi pui an zi nak nak a, sawifiah na hmun a tan a rem lo ve bawk a ni. Hnathawk ten min hriatchian tawh vangin min hmuh chuan hlim hmel an pu ţheuh a, min be luam mahse chet an ţhulh phah lo. Tommy nen chuan thlang lam, midang min chim phak lohna hmunah kan ţhu hrang leh daih a, ti ti na hmun atan chuan a rem ber. 

"Thinrim ang a min ngaih chhan chu sawi tawh la" tih pahin tlak dal an siamah chuan ka bawk a, thli fim a thaw heuh heuh bawk nen boruak a nuamin ka dai sawng sawng. 

"Min pumpelh lui tlat a hriatna ka nei" a tih takah chuan ka phu deuh zawk. A thil sawi berkher chu ka beisei loh ber te zing a mi a ni. Min hrethiam thlap ang khan a awm ziah si a. 

"Pumpelh lui lo ve, chutiang chuan ngati nge ka tih kher ang?" ti a ka zawh leh chuan a koki lo san ak in "Ka hre lo. Mahse biak che ka tum apiangin chhuanlam siamin min hnar dan i zawng a, nidangah iti ngai lo. Chau viau mahla chanchin min hrilh thei lo khawpin i la awm ngai lo va, ţhian kan nihna chu thuhran ni se kum hnih kan inzui tawh a, zantin chhuanlam i siam ngai lo. Min be ziah turin ka ti lo che mahse min be duh miah lo ang a i awm thut vang hian ka ngaih a ţha fahran lo" a tih chuan inthiam lohnain ka thinlung a chhun na zawk a, a ti dik chiah a ni. Msa te in a thil tam tak a thlen hnu khan nasa takin pumpelh ka tum. Ka hriatna hi ka nunhlui leh Msa te, zawhna la chhan loh tam tak ten a bawh paw ruai a, chumi tih kian nan leh inbeng daih a ngai awh leh nan hun tlem ka mamawh a ni. Ka rilru put hmang diktak ka hrechiang hleithei lo va, chutiang nuaih anih vang chuan Tommy hmu turin ka inpeih lo va, eng thil mah thleng miah lo ang a ka awm thiam ka ring lo a ni. Mahse a hnen a ka sawi ngai loh ho kha hrilh tumna ka la nei chuang lo. Min rinhlelhna a nei nasa lehzual sauh ang a, a zawng zawng a hria anih chuan a na takzet bawk ang. Tommy berkher tih nat chu ka duh loh ber te zing a mi a ni. 

Tlak dal ka bawh lai mek chu thawh chhuahsanin thli thaw la inchhem tir reng chung chuang zangkhai zetin ka nui a, "Ka tihpalh, nitin hna a kal chu a chauh thlakin tih tur neuh neuh a awm ve reng a, ban veleh ka nu leh Kimpuii ka pui leh a, ka chauh thu ka sawi ţhin kha chhuanlam a ni lo. Ngaihsak lo che min ti maithei mahse ka buai vang leh chauh vang chauh a ni. Tel ve na i nei lova, i chungah thinrimna engmah ka nei lo" ka ti a, natna siamsak ai chuan dawt sawi ka thlang leh ta zawk a ni. Thil sual ti tu angah ka in ngai reng ţhin a, amah leh a rinawmna te, min duh na thleng hian phu lo vek niin ka in ngai ţhin. 

"Thup ţhen i nei lo takzet maw?" engkim hrevek tawh ni awm tak a min en chunga zawhna min zawh chuan zam ru tak chung hian "Eng ber nge i lakah thup leh chuan tur ka neih?" ka ti a, hriat tham khawp ni lo mahse ka zam luatah ka aw thlengin a khur thei hial. 

"Ka hre lo le. Engkim a danglam vek tawh, i danglam tial tial a, Msa i hmuh leh hnu phei chuan i danglamna hmuh a harsa lo lehzual, a bikin an in a kan kal hnu aţang khan. Nge ka kal chak pui lutuk zawk che? Ka nawr lui nasa mah mah che em ni?" 

"Teuh lo mai, kei phei chuan danglamna ka neih awm ka hre lo. Nang leh Msa vang a ni lo ve ve. Sawi tawh ang khan ka chau a, ka buai bawk. Chu zawng chu a ni mai" tiin dawt bawk ka hrilh leh. 

Thuk tak a thawk lak pahin min kuah a, "Ka seilenna ţawp zet hriattir duh khawp a ka rin ngam awm chhun inia, nangpawn a chhan chu engpawh nise nuam tih loh rukna emaw buai rukna ineih chuan min hrilh thei reng a nia, englai pawhin i tan ka awm reng ang. Nang pawh ka tan a i awm reng ka ring tlat bawk" a hmel hmu thei lo mah ila a aw aţang ringawt pawhin a tih tak zia a hriat. Nunhlui ngaihawm loh leh nat vawng vawngna tur a nei a, inthlak danglam a la awm meuh loh vangin tun thlengin nitin a la nat reng ka ring. 

"Ka hmangaih takzet che a, chân che ila chuan ka tuar thei lo ang" zawi sup hian a ti a, a tawrh theih loh tur zingah hian kei min chân mai bakah thil dang tam tak a tel ngei ang. 

"Ngati nge min hmangaih em em le? Nang ang a mi ţha hi ka phu ve lo" tih sep pahin ka kuah let ve a, min hmangaih nasat pauh leh inthiamlohna ka nei lian leh zual ţhin. 

"Kumkhua a hlimna leh khawvel a hmangaihna awm zawng zawng hi i phu vek. Ka hnaih a i awm phawt chuan hmangaihna leh hlimna bakah thil dang engkim ka pe vek ang che" min kuah nghet sauh chung hian a ti a, beidawng zetin ka thaw halh a, "Ka tihpalh" tiin a hriat phak loh turin ka phun sep. Hun lo la awm tur hre lawk thei ila chuan a rilru nawm nan a sawi ve tur ka hre deuh tur. 

Haw mai thei tur a ka insiam mawlh mawlh lai chuan ka phone a ri ral ral a, Tommy a nih ringin ka vat mahse beisei loh takin Puipuii a lo ni. Phone number kan inpek hnu khan kan la inbe miah lo va, an pa fel loh zia min hrilh nasa bawk nen ngaihţha lo zet chungin ka chhang. 

"Rebecca eng emaw tih tir lawk duh che ka nei a" pangai tak a rawn tih takah chuan ka thawveng huai. 

"Eng nge ni? Ka tih theih zawng anih chuan ka tih sak em em ang che" 

"Eng lo a nia, ka hnathawhna nu hi a fapa a fel vak lo a, pawl11 zir mekin kohhran school ah a lut a, mahse insual a hrat a, dan a bawhchhe deuh reng a, a lut zawm thei ta si lo va, ka chanchin a hre nual tawh bawk nen Msa te school kha an beisei deuh a" a ti a, sawi zel a hreh ve deuh a ni ngei ang laklawh deuhin a chawl a, zawhna dang zawt buai lovin ka ngaichang tawp. 

"I hre thei em?" ti a min rawn zawh chuan ka hriat theih thuin ka chhang. 

"Kum lak lawh a ni bawk sia, sawi sak turin min beisei a, mahse keiman ka sawi chuan awmzia a awm lo vang. Ka hnathawhna nu a nia, a lawmna siam ka duh ve tho bawk si. In boruak chu hre tho mah ila nangin i sawi chuan a ngaipawimawhin ka ring a, hna i ban veleh Msa chu min hmuh sak zawk thei angem?" ka hlauh lawk ang chiah. A hnathawhna nu lawmna tur a nih chuan Puipuii ka puih ve theihna a ni dawn a, mahse school an bang tawh ngei ang a, an in a kal ka tum tawh lo bur bawk si. 

"Vawiin kher lo ah a theih loh em ni? School an bang vek tawh awm sia" 

"Vawiin a i kal theih chuan duhthusam a nia, rilru hmanhmawh a phi cheng chi a nia, keipawh ka haw tawh tho mahse min rawn phone sek a, an inah chuan a remchang zawk daih lo em ni?" a rawn la ti tak deuh deuh a, ka chhan lawk loh vang chuan "Hun i neih chuan min kal sak hram mai rawh. Min mamawh hunah ka tlanchhe bik lo vang. Tun ţum chu puih ka ngai takzet" ngen ngawt zet hian a rawn ti leh a, chhuanlam tur ţha tak awm se ka va ti em.

"Awle ka lo bia ang. A ţul tur ang min lo thawn la, chanchin ka rawn hrilh leh dawn che nia" ka ti ta nge nge. Hreh viau mah ila puih theihna dang ka nei tlem a, a hnathawh naah duhsak a hlawh phah maithei a sin. 

"Vawiin chuan ka hman kher lo ang a, naktukah kal dan ka lo ngaihtuah dawn nia" ka ti ţalh tho a, kal nghal mai ka huphurh ve deuh a ni. 

"Ka lawm ngawt ang, ka hnathawhna nu ka lo hrilh vat dawn nia, chanchin ka lo ngaichang reng ang" a ti a, rei kan inbe zui lo. Hmuh tawh loh hram ka duh nen ka hmuh leh ngei ngei a ngai dawn a ni. 

Zanah Tommy a rawn leng ve teh mial a, thu pawimawh min hrilh tur neiin a insawi. Ngaihtuahawm kan nih tawh loh miau vangin inthlahrung lo takin pawnah kan ţhuchhuak a, zan boruak nuam leh reh ruihah chuan thawpik ru takin ka awm a, a ţawngchhuah hun ka ngaichang reng a, engmah a sawi mai loh vangin "Puipuii'n min rawn bia a, Msa hmuh sak turin min hrilh a" tiin boruak reh tak ţhiat hmasa tu zawkah ka ţang. 

"Tu maw hmu rawh a tih?" 

"Msa.." zawi te a ti sepin thil awmdan kimchang takin ka hrilh a, "A lo remtih loh ka hlau a, Puipuii tan tihsak ngei ka duh bawk si a, ka hlauthawng angreng" tiin a tawp ka khar a, Fiona ka hmuh tel ngei a ngai dawn bawk nen, ka kal thu a hriat leh takin nakin a boruak chhe thut thei pumpelh nan a hrilh ka ni. 

Nelawm tak a nui chungin dimtein ka kut a hmer a, "Puipuii rilru nawm nan kal sak hrim hrim la, a remti lo anih tak leh tih ngaihna a awm lo a ni mai a. A phut tlat che a nih chuan kal sak rawh. I kal lo anih chuan nangmah zawk i rilru a nuam lo leh reng ang a" min ti a, "Hman ila chu ka kalpui thei tur che a nia, mahse naktuk hian zin ka ngai thut a, hrilh tur che a rawnkal ka ni pakhat a" ti a a sawi chuan min ţhawng takzet. 

"I va sawi lawk lo ve, nimin lawkah pawh kan inhmu reng si a" mak ti tak chungin ka zawt a, a zin tum ni hi ka piancham a ni chiah bawk. 

"Nia ka pa kalpui lawk a ngai a, a sawi lawk si lo va, tlaiah khan min hrilh chauh a, i piancham a ni tih pawh ka hria, hnial ka tum viau na a a tih tawh chu a ti lui tlat ţhin si a" a ti a, pawi a tih takzet zia a lan theih hial vangin tih phur nan a lo nuiin "A pawi lo. Ka upat tawh em hi, ka piancham ka lawm ngun tawh lutuk a ka ngaihlu vak tawh lem lo. Kumtin a thleng ziah a, kan dam anih chuan lawm dunna hun kan la ngah lutuk. Duh leh ilo haw hunah pawh kan lawm ţha leh thei a" awki zangkhai vahin ka ti a, dawt ka sawi lo ve khiah. Ka piancham nuam tak a ka hman lohna a rei tawh a, duh lo mah ila hriatchhuah ka nei ngei ngei ţhin. 

"Min ngai a ngem?" ti a min zawh thut chuan chhan ngaihna ka hre lo kher mai. Ţhian bak pel a kan inkawp ngheh tak tak hnu hian kan la inţhen hrang miah lo va, ka ngai dawn em ka hre lo. Tawi te a nuiin zawitein ka bu zeuh a, "I in enkawl ţha dawn nia" ka ti sap a, a awm loh hun a ka awmdan tur ka ngaihtuah thiam tlat lo.

"Ka zawhna i pumpelh leh tawh a nia" a tih lai chuan hrilhhaina leh beidawnna a mitah chiang takin a lan tir a, hmuh nghal mai a har lo hle. 

"Tehreng mai...ka ngai ang che" ka ti nawi niai a, min zirchiang ni awm tak a min en vang vang hnuah a kut la sawnin "Tun hnai hian ka mangang hmain ka zar buai nasa mah mah che iti maithei  mahse kan kal kawng leh kan thlekna lampang te, kan rilru put hmang thlengin a hrang zel niin ka hria" a ti a, kan sawi zo vek tawh emaw ka tih kha sawichhuak lehin bul a ţan ţha leh a, ka danglamna ka hriat chian em vangin ning thei niin ka inhre lo. Chhan tumin ka ang zuau a, mahse a thusawi hnial kalh theihna tur ka ngaihtuah chhuak thei lo. A hlim lo hmel chu hmuh nuam ka ti bik lo va, ka thinlung thlengin uai tu awm ang maiin a rit nulh thei hial. 

"Ka tan a i hlut zia i inhre ngei ang a, awm lo la chuan hun harsa ka tawh mawlh mawlh reng lai khan ka damkhawchhuak zo kher lo maithei. Tumah ka neih loh lai pawhin ka ţhian i ni reng ţhin a, nang nen a kan inhria hi ka lawm takzet" ti a ţawng thlamuan chungin keimah zawkin a kut ka vuan ve thung. Min kuahin ka samah a hmai a phum a, tun ţumah pawh hian dawt ka hrilh lo. Hun harsa ka tawh lai zawng zawngin ka ban phak maiah a awm reng a, awm dun kher lo mah ila ka duh hun apiangin ka bia a, a muttui lai kaihthawh chang lah ka ngah. Msa nen a shillong a kan awmdan kha hrilh ngam si lovin ho te te ka sawipui ţhin a, biak tur leh ngaihsak tu ka neih vang hrim hrim khan ka thlamuang huai ţhin. 

Chaw ei kham veleh hna a kal turin ka insiam a, thawmhnaw ka inbel hnuah darthlalang hmaah ţhuin ka sam ka khuih a, samkhuih ka dahthlak rual a ka phone ri chu ka en vat. Min rawn biak tum tu hming ka hmuh chuan ka nui sak a, an kal a hun tawh a nih hmel. 

"Happy birthday" phur zetin a rawn ti leh a, vawithum vel lai a sawi tawh. 

"A tawk tawh. Message thui deuh ka dawng tawh bawk a, lawm zo vek tawhah ka inngai thei tawh" ka lo ti fiamthu a, ka thawh veleh min wish na ka hmu hmasaber. 

"Hei kan kal dawn chiah a, ka ngai che" 

"Em em che hian, nizanah kan inhmu zo chauh a, kan inbe leh mek bawk a" 

"Kan cham chen tur a hriat si loh a, ngaihtuah ringawt pawhin thi nghal maiah ka in ngai" fiamthuin a ti ve zeuh a, ka lo nui hak hak. 

"Ipa thu thu khan awm rih phawt mai rawh. Inu i ngaihtuah anih chuan i pa thuawih a ţha rih. I lo let hun ka lo nghak reng ang" ka ti luam a, an kal hun anih tawh vangin kan inbe zui rei lo. 

Dressing table ah phone ka dah leh a, darthlalang a in en reng chungin hreh tak chungin muangchanga chein ka ţhi awrhlai ka phelh a, ka kutphahah dahin a locket ka thai neuh neuh a, ka hriatreng naah chuan nunhlui bawk kha zawi zawi a rawn inlar lehin sawt lo leh awmze nei tawh miah lo mah ni se ka lo chhui kir leh ţhin. 

CONT...