NANG CHAUH-6

NANG CHAUH-6

Ka ban theih veleh hreh tak chungin Msa te in lam ka pan a, huphurh ngang ka ni bawk a thleng hma ka inti ngei mai. Door bell hmeh nghal mai ka tum a, mahse tim leh deuhin ka ţhulh leh rih. Ka lungphu rang tial tial te chu chiang takin ka hre thei a, ka zam zia ka hmelah a langchhuak ngei bawkin ka ring. Puipuii duh ang kha tihsak ngei ka tum a, hmanni a kan awmdan kha a dik loh zia sawiin ka lak a beisei nei tawh lo tur a hrilh ka tum bawk. Mahse a hun a thlen meuh chuan theihna tlachhamin ka mangang leh der tawh. 

Ka huaisenna neih ang ang te sawmkhawmin door bell ka hmet a, min chhawn hun ka nghak ran. Tuma'n thawm an neih tak lohah chuan ka hmet nawn leh a, vawi li nga vel ka hmeh hnu pawhin min chhawn tu an awm chuang lo. Kawngkhar a inkhar phui lo va, tu emaw an awm ngei ringin ka hawng riai riai a, inchhung a ka pen luh hnu pawhin thawm ka la hre lo. A reh ruai a, khua a tlai duai tawh a, tukverh tinah parda a inzar vek bawk vangin inchhung a thim deuh khup a, engmah hmuh theih loh khawp a thim chhah erawh a la ni lo, khua a la thim lo va, parda zar vek mahse eng tello pawhin ka la hmu thei tho. Ka kal thuk zel rualin ka mit ka len kual pah ruai a, ţhutkhawmna pindan ka lut thleng a, chutah chiah chuan Sofa pakhat a Msa lo mu ka hmu a, a banin a hmai a hliah daih vangin a hmel ka hmu chiang thei lo thung. 

Ka biak hmain chil ka lem khawlh a, hmanni aţang kha chuan be hmasa tu nih ka hreh tlat tawh.

"Door bell ka hmet vak vak a, Fiona te nufa an muhil a nih ka ring a, i awm ka ring lo hman tawh a" ka nghah vang vang hnu pawh a chhanna ka dawn loh vang chuan mithmul tichuarin ka thlek kual a, enchiang lehzual turin ka kal hnaih hret hret. 

"Hmu tur chein ka lokal a, Puipuiin thil pawimawhah min rawn tir a ni zawk mah. Reilote i biak lawk theih angem?" tiin ka zawt leh a. Ka bia a, thawm ka chhuah reng chung pawh a a taksa a che miah lo chuan ka ngaih a ti ţha lo ţan a, ka hnaih zual zel a, a mutna sofa bul chiahah ka ding tawh a, chiang lehzualin ka hmu thei tawh. A mit a chhing tlat a, a hmai lang thei chin a a vun a dang lap bawk. 

"Ms" ti a ko chungin ka kun a, hre awm a a lan loh vangin ka ko nawn leh a, min chhang lovin a mut ngaiin a mu reng.

A taksa khur ka hmuh chuan hlauthawng ţanin a mutna bulah ka ţhingţhi rawp rawp. Ka bag ah lai chu la thlain ka bulah ka dah rem a, a chal a a dah reng a ban dimtea ka lakthlaksak rual a a chal a thlanfim bawl ţek ţek ka hmuh phei chuan meng zau kawkin ka hlauhthawnna a nasa lehzual. A hmai chu a dâng chauh a ni lo va, na a tuar tih a hmuh tel theih. 

"Ms i ţha em? Na inei em ni?" ti a mangang deuh chung a zawh pahin a biang ka khawih a, a vawh mai bakah a thlan chuan a vun a ti hnawng chap bawk. 

Zawite a sawi pahin "Ms" tiin ka ko leh a, min chhan theih tak loh avang chuan ka chiai in ka thlaphang tawh takzet. Tihdan tur ngaihtuah a ka enchik leh deuh hnu chuan a kut lehlamin a pum a dawm reng tih ka hmu a, a na lai tur chu ka hrethiam mai. Pumna hian a buai fo ţhin reng a ni. Amah bawk chu en lehin "I pum a na leh em ni?" ka ti leh a, min ûksâk bawk si lo. Tih ngaihna dang ka hre tawh lo chu midang pun mai tumin ka ding hluai a, ţhenawm an nei a, an puihna in taxi ka hmu thei mai ang ka ti rilru a ni. Rilru ka siam fel hnu a kal mai ka tum chu ka kutah min lo vuan a, hmanhmawh zetin ka awmdan ngai chiahin ka awm leh. 

"Ka ţha" chau tak chung a tiin a meng diar diar a, a mitmeng a dul ve raih mai. Pumna vanga hetianga a awm hi tam tak chuan nep an ti maithei a, mahse ulcer a neihna a rei tawh a, hman aţang tawhin damdawi a ei ţha peih ngai si lo. Ka hrilh loh phei chuan a theihnghilh zel a, a hunlaiin na viau mahse a dam hi chuan a dam chiang thei em a, ngaihthah zui mai a awl ţhin. A buai ve fo a, a na a chhuah chuan hrehawm a ti ţhin hle. Mahse tun ang em hi chuan ka la hmu ngai bik lo. 

"I ţhat loh hi, i thlan vek a, i khur bawk a, he ti chung hian engtin nge i ţha ang a ka ngaih luih theih ang? I pumna bawk em ni?" tiin ka zawt nawn leh. Harsa tih hmel zet a thawk lain zawi deuhin lu a lo bu a, thil ei loh mai mai a la ching reng a ni tih hre nghal mah ila hriam hrak a melh chungin "Vawiinah thil i ei em?" tiin ka zawt ta tho a, chau tak chungin lu a thing a, ka hriat dan a dik leh chiah. 

"Zu i in em?" ti a thinrim tak a ka zawh lai chuan tlem a rawn meng fiah deuhin lu a thing leh a, "School ah ka awm nileng" a tih hnu chuan na a la tuar reng tih hriat takin a ţhen zui tlawk tlawk. A pum a dawm ngawt ngawt a, ka hmuh tirh a a chal a thlanfim bawl ţak ţak khan a nat zia a tarlang chiang awm e. 

A na tuar ka hmuh meuh chuan ka thinrimna a kiam leh duak tawh a, thawk khat lai khan zu in ve zeuh a ching a, in tam lo mahse a in ve hlek chuan ka haw ţhin hle. Tun hnu hian eng nge a dinhmun ka hre tawh lo va, a la in maithei a, a in lo hlen maithei bawk. 

"Taxi ka zawng ang a, hospital ah kal mai ang. In a tuar ngawt ngawt chuan a hrehawm dawn emai" ti a hrilh chung a din ka tum chu Msa bawk chuan min vuan bet leh tlat a, "Min thlah rawh hospital a kal a ngai a nih kha" ka tih meuh chuan na ti viau mahse ţhut a tum lui ţalh a, harsa ti viau mahse a hlawhtling thei hram. Nghenchhan tur ka dah sak a, awn deuh a ţhuin a thaw huai.

"Nachhawkna ka ei tawh a, a dam mai ang. Hospital a kal a ngai lo" a ti leh ang lawi a, a nat ţhin dan hrechiang viau lo ila chu dawt a sawi emaw ka ti ngei ngei ang. 

"Nachhawkna i hmuh remchan apiang ei tawp lo tur a ka hrilh ziah che kha. A na chhawk tak tak si lovin a ti zual zawk mai tur a sin" tiin ka hau hlak hlak. A hmui pet zeuhin "Ka hre tawh lo, i awm lohna a rei tawh a" zawi sup a a tih hnu chuan a reh zui vang vang a, a hrilhhaithlak duh zawk hle. A landan pangai ni lova derthawng tak ang a a lang chu hmu rei duh lovin ka hawisawn thuai a, zahzelah "Puitling i ni tawh a, hriselna ngaipawimawh a in enkawl thei rual i ni tawh" ka ti a, ngaihven loh luih tum mah ila a rukin ka en leh zeuh ţhin. Ani pawhin na a tuar a ni tih thup a tum ve viau na a a thup hleithei bik lo. 

"Luhlul chhuah tlat lo teh. Taxi ka va zawng lawk ang a hospital ah kal mai ang. Nih loh paw'n driver puih kher ngai lova nangmah a i kal theih chuan i car in ka hruai mai ang che"  ka tih chuan a mit ko a san ak a, "I khalh thiam maw?" tiin rinloh hmel zetin min zawt zui zat bawk. 

"Car ka neih loh vangin ka la khalh tam lo na a ka chetsual pui bik lo ang che. Chahbi min lo pe rawh, hospital ah chuan ka hruai ang che" nghet charh a ka tih takah chuan chahbi khaina lam a kawk a, harsa viau mahse ka mangan em vangin tih tur ţul ang apiang ka ti thei vek. Hospital thlengin duh a thlang a, a duh naah tak ka hruai ngei bawk. 

"Malsawmkim a hun tak a thil ei ziah turin ka hrilh che kha. I rawnkal hnuhnun ber ţum a i dinhmun ţhat loh zia te kha ila hria em? Endoscopy in a ti tawp rih thei hlauh a, mahse khatiang kha a thleng leh anih chuan zai i ngai tawh ang" ti a doctor in a sawi chuan a chhan ka lo zawt vat. 

"Pumpui chhunglam hi a pilh thei a, chu chu gastritis kan tih hi ania, enkawl ţhat loh chuan a pilh kha a khuar a, a thuk chinah khan ulcer kan ti a, ulcer chu a khuar nasat chuan a pawp thei. Tin, a ulcer laiah khan thisen zam artery te a lo awm a nih chuan thisen zam kha a lo mawih a, a chat a, a thi ta vak ţhin a, chu chu ulcer bleed kan ti. Chutiang chiah chu a ni mai Ms-a awmdan chu" tiin chipchiar deuhin min hrilh a, Msa pawh a harh deuh tawh bawk a, Doctor chu hlauhawm zet a melh chung hian "Lalnunpui ka nat dan hi sawi uar ziah suh" a ti hluk a, a la chau deuh tho na a a awki pawh a pangai deuh tawh. 

"Ka sawi uar maw?" ti a nui vur vur chung a a zawh hnuah "I tluk tawp hnu a an rawn hruai che pawh khan nep ila ti tho tihna em ni?" elhsen zet a a tih chuan keimah zawk min nghawr dawt a, "Duh tawk teh mawla" tiin Msa chuan lo vau khur khur mahse "Tunah a ţha tawh em? Ulcer lai chu a thi leh em? Nichin lawk kha chuan a pum hi na a ti lutuk a" ka ti a, mangang tak chungin ka zawt mawlh mawlh. 

"Aih hlauhawm a awm lo. Damdawiin ka chiu tawh a, a hmel en phei chuan nidang zawng aiin a ţhat hmel tawh zawk. Damdawi eitur ka hrilh ang a, reilote hahchawl ve hrim hrim se la a haw thei mai ang" a ti liam satliah a, lo bu nghatin Msa ka melh zawk a, Dr hnen a zawhna zawh ka tum leh lai takin amah zawk chuan "Stress nasa tak---" a ti hman chauh a Msa'n a hmingin a lo ko vin hlur a, "Eng nge? Tih sual ka nei em ni? I bialnu in a hriat ve chi loh tur khawp a hlauhawm engmah a awm hleinem" a ti hram a.

A ţhianpa chu rum zetin melh run mahse "Ka--ka bialnu a ni lo" a tih bah ve niai tho a, a bialnu emaw min tih vang chuan zak ru tak chungin hnuai lam ka bih a, ka biang a sa hat hat. 

"A ni lo maw? A ngaihtuah danah che leh i en dan aţang khan i bialnu emaw ka lo tia" nui vur vur chung a a tih hnuah min rawn en lehin "Ka tih dik loh a nih kha Rebecca, Msa nen hian kan inhriatna a rei tawh a, khatiang kha kan inbiak ţhin dan a nia, min lo hrethiam dawn nia" thutak deuh zawk hian a ti a, tawi te a nuiin a pawi loh thu ka hrilh. 

"A mutthluk laiin pheikhawk hrui i suihzawm sak a, a chang leh pen i thuhruk sak a, in in hre miah na nge?" beidawn hmel zet hian Msa'n a lo ti ve thung. Dr nen chuan kan in en ren rawn a, tu nge a nih rin ngaihna ka hre lo. Dr chu a ngaihna hriat loh hmel zet a a awm vang vang hnuah a kut humin a hmuiah a dah a, a nui zui tet tet. 

"Puipuia anih kha Rebecca, ngaihtuah rawh Pathaua kha" Msa bawk chuan dawhthei lo fe hian a lo ti leh a, ka hrechhuak nghal zawk. Thau deuh, eithei deuh, chimawm deuh a ni ţhin. High school kan kal hnu aţang khan ka hmu tawh lo vang vang a, a cher ta bawk nen, Puipuia kha a nih rin ngaihna ka hre lo a ni. Ka pen a thukru mai a ni lo va, ka tiffin min eipui luih chang a tam. 

"Ka hre reng reng hleinem che. I chimawm ţhin tehlul nen doctor hial i lo ni tawh a, ka lawmpui lutuk che" ka ti ve hluai a, ţawngkam ka thiam lo ka tih tawh kha. 

"Min hai fo alawm, ngaiah ka nei tawh. Nangpawh ka hre lawk bik lo che a, i hming ka hriat hnu pawh khan ka hrechhuak nghal mai chuang lo che a, i danglam tawh a ni ngei ngei ang" a tih chuan ka lo nui hak. Kan inhre ţha ve lem lo va, ti ti zui vak tur a awm lo. Ţawngtam vak lo chi ka ni bawk nen, ţhian siam ka thiam lo ve hle. 

Puipuia damdawi ziah chu lei turin ka kal a, private hospital a ni bawk a, damdawi lei nan hun a duh rei lo deuh. Tommy-a chanchin ka la ngaihven leh miah lo va, Kimpuii hnenah ka ţhiannu hospital a ka awmpui thu message in ka hrilh a, dawt tlem ka hrilh. Msa a nih thu ka sawi chuan a chiai vak ang a, ka nu thlengin a ti buai ang tih ka hlau  a ni. 

Ka damdawi lei chu ak ţhain Msa ka lam kawi a, Puipuia chuan ţhian a nihna lantirin min thlah thlap a, min thlir liam thlap. Kan let leh hnu pawhin inchhung a la ruak huai a, Fiona leh a fapa thawm reng reng hriattur a awm lo. Zawh hun a ka ngaih rih loh vangin inchungah ka chhohpui a, ka luh hrehna em em ah vawihnih na atan ka lut leh. A mut duh tawh bik rih loh vangin nghen chhan ka siam sak a, keipawh khumah chuan ka ţhu ve. 

"Antibiotic leh a nat hun a eitur bik nachhawkna ka lei a, i pumna a reh hmak rih loh vangin Puipuia khan nachhawkna hi ei nghal a pawi lo a ti. Mahse i mut a ti chhuak deuh maithei" ti a hrilh pahin ka damdawi lei chu a kutah ka dah a, thuawih takin a ei ve mai. Khum bul dawhkan te ah bottle ka dah leh a, a hmel hmuh pawh a nuam leh ta deuh. 

"I ril a ţam em? Eitur ka siam sak dawn che em ni?" 

"Ka pum a la dam chiang lo va, thil ei ka chak rih lo" 

"Mahse pum ruak a awm zui reng kha a ţha hleinem. I pumna a ziaawm theih nan thil i ei a ngai alawm" ti a ka hrilh hnu a thawh mai ka tum chu a tihziah danin ka kutah min lo vuan leh hman a, chin ţhanah a nei anih ber tawh hi.

"Khaw nge i kal dawn?" tiin zam hmel zetin min zawt zui zat bawk.

"Ei mai theih tur a siam awlsam a awm em ka en lawk dawn" ka tih pawh chuan ngen ngawl zet a min melh chungin "A awm lo ang kal lo mai rawh" a la ti tho a, min melh dan chuan ka awm a ti nuam lo leh pek. 

"Chawl hahdam tawh rawh mutthilh tum la" beidawng zet hian ka ti a, a thu te lo va awm tir a har thei hle. 

"Damdawiin hna a thawh hunah chuan duh lo mah ila ka muhil dawn tho tho" a tih hnu chuan chawl detin tak runin min en a, "Ka mutthilh hma chu reilote awm ve rih rawh...khawngaihin" a ti zui sup. Ka en vang vang hnuah ka thaw chhuak halh a, "Khaw nge Fiona leh i fapa?" ti a ka zawh chuan "An inah" a ti nghut a, hriat chian chakin mit hmul ti chuar nang chungin ka ngaichang a, zawh loh chuan min hrilh lehpek lo tawp ang.

"Eng ti turin nge an kal? An riak dawn em ni? A tlai tawh ang reng si a" sana en pahin zawhna bawk ka siam leh a, rawn haw loh a hun tawh tlat lo a ni. 

"An riak ang" a ti leh tawp a, a sawi chak lo ni a ka hriat vangin ka zawt zui duh lo.

"Zu in i ching leh em ni?" tiin ka zawt ta zawk a, "Ka kalsan hnu che khan" tih ka belh tel hram. Min be lo va, keipaw'n ka be bik lo tih ka sawi ţhin mahse kalsan tu zawk chu keimah ka ni. Chhan ţha tak ka nei thung. 

"In tawh lo. Ka in tawh lo ang ti a ka tiam hnu che khan ka la khawih leh lo. Kum tam tak ka in tawh lo tihna a nih chu" nghet charhin a ti a, thudik a sawi zia lantir a tum ni áwm tak a ni.

"Nih chuan thil ei loh i hrat tihna a nih chu. I mamawh ang i ei lo va, i pum khan huat a ngahin pum ruak lutuk a awm reng te a haw bik a, pum ţha pangai aiin a derthawng zawk. Mahni in enkawl ţhat nachang hre tur i nia sin, ulcer hi a nasat viau chuan a hlauhawm thei tih i hria em?" hriam hrak a melh chung a ka vin hlak hlak laiin a nui hmel ka hmu a, ka thusawi lai chhunzawm lovin ka vin ngai a vin reng chungin "Eng ber nge i nuih? Natna hi nuihzatthlakin i hria em ni?" tiin ka zawt ta zawk a. Eng natna mah hi nuihzatthlak ka hre ve lo. 

Lu thin pahin "Ka natna lam a ni lo. I danglam tawh takzet" ti a min hrilh chuan a ngaihna hre lo tak a en ha chung hian "Engti zawngin nge ka danglam?" ka ti a, mihring chu nasa takin kan danglam thei ka tih ţhin tawh kha. 

"Ka mit a i en changin i lai chhe lek lek ţhin a, ho te te ah zakin i sen ap ap hman zel a, mahse tunah chuan ka mitah tlang takin min en ngam tawh a, school naupang kan nih lai ang khan min ngam tlak tawh lo thung" a ti a, min tlawh tur a a lo zin ţum pawhin ka lo hmuak a, a hmel ka hmuh khan ka zak leh si a nih kha. School naupang kan nih lai kha chuan atna lai kan la nei a, college kan kal hnu a kan inbe leh chiah kha chu engkim a danglam vek. 

"I thinchhiat dan erawh a la ngai reng" a ti tel zeuh. 

"Thil tam tak a thlen hnu leh kum tam tak a liam tawh hnu hian engkim la pangai vek turin i beisei em ni?" ti a zawtin derthawng takin ka nui a, ka nui lui a ni zawk mah.

"Engkim a danglam vek tawh" zawi tein ka phun sep. 

"Ngati nge i tih tawp thut?" zawhna ngai bawk min zawt leh a, a awki erawh a danglam thung. 

"Kha zan khan thu tam tak kan tiam hnuah min kalsan leh tho a" a tih chuan hriam hrak hian ka thaw hrawk a, kha thil kha sawi chhuah ka chak hran lo. Thu mawl mang fe fe kan tiam a, kha zan khan a rui a, kan inhau hrep. Zu in tawh miah lo turin a intiam nghe nghe. Keipawhin ka kalsan miah loh tur thu te ka tiam ve a, mahse kalsan lo thei lovin min siam a ni. Kha zan ka ngaihtuah let chang apiang khan ka thinlung hi hahthlak khawpin a na ut ut ţhin. Ka hrilhhai zia leh dawnsawn harsa ka tih zia te kha ka la hrereng a, ka mit rawn fiah lo ţanin mittui a tling leh pam tawh. Amah hnungchhawn turin rang zetin ka inher a, ka ţhutna aţanga ka thawh kán hma hauhin ka kal daih hlauin hnunglam aţangin nghet zetin min kuah a, "Kal suh" ka beng bul a ngen ngawt zet a a tih chuan mit ka chhing a, ka lo dan ve ţang ţang ka mittui te chu mit ka chhin rualin zalen takin ka biangah an luang thla ngiai ngiai a, ka ţahchhuak ut ut chu dan tumin nasa tak a insum chungin ka hmui ka chip tlat.

Ka awmdan chu hrethiam ni awm takin min kuah nghet zual sauh a, ka nghawngah a hmai phumin "Ka tihpalh anih kha...ţap suh" tiin dam dapin min hrilh. Rei tak chhung chu che lo leh inbe miah lovin kan awm ngaiin kan awm reng a, ka hnung leh a awm insi chetin kan taksa lumna kan inţawmpui tawn a, puan lum tak hnuai a awm ang mai ka ni. 

Ka mit ka men rualin "Ka hua che" tiin ka phun sap a, "Min ţawngkhum ţhin dan te leh i awmdan zawng zawng te hi ka haw vek" ti a ka hrilh lai chuan ka mittui a tla leh a, khami ni khan lokal kher lo ila ţha tur. 

"Ka hria" a ti nghut a, ani pawh keimah ang thoin a thawk a sak ţalh a, a rilru put hmang erawh ka hriat pui lo. 

"Thu ngaihthlak nuam tak tak sawiin min tiam a, chuti chung a tawrh hrehawm tham natna min thlen leh si te kha ka haw takzet" ka tih leh pawhin "Ka hria" tih bakin min chhang lo. 

"Engtikahmah ka ngaidam lovang che" chang fak a ka tih leh hnu pawh chuan "Ka hria" tih bawkin min chhang leh a, thiam lo zawk anih miau vangin insawifiahna tur a nei tam hauh lo ang. 

Boruak ka hip luh vang vang hnuah harsa ti tak chungin "Duhna che ka nei tawh lo va, ka duhna ţhin zawng zawng che kha lak bo a ni vek tawh" ka ti a, zawi te si sehchilh rap rap si hian "Dawt i sawi" min ti thung. Min kuah nghet sauh danah min kaltir mai a tum loh hmel hle. 

Chhang let tawh lovin ka ngawi reng a, hmanah khan ka pianchamah tak engkim ka ti tawp a, tun ţum hian ka ti tawp leh thei angem ka hre lo. Dawt sawiah min ngai a, a ngai dikchiah bawk. Amah ang a duh leh englai pawh a ka rilru a awm reng ţhin mipa dang tumah an awm lo. 

Ka ngawih reng hnu chuan ka nghawngah dimte a fawp zeuhin "Happy birthday" a ti zui sup a, hria ang a a la awm miah loh vangin a theihnghilh ah ka ngai hmak tawh. Sana ka en a, zan dar8 chiah chiah a ni. Kan buai nek nek chhungin a lo tlai duai tawh a, ka chhungte hnenah chanchin ka la hrilh leh lo ka bialpa takngial pawh. 

Tommy ka hriatchhuah lai tak chuan ka phone a ri ral ral a, ka hnaihah dah lo mah ila a reh em vangin chiang takin a ri a hriat theih. Thawh tum a ka chet hrut lai chuan "Kal suh" a lo ti leh vat a, amah hmu thei tur a inher pah a "Tommy a ni tawh ang. Vawiinah apa nen an zin a, chanchin min rawn hrilh dawn aniang" ka tih hnu pawhin luhlul chhuahin lu a thing a, "Chhang suh...khawngaihin" ti a min ngen leh hnu chuan beidawng zetin ka thaw halh. 

"A chi loh..mut a la hun chiah si lo va, a mangang lutuk palh ang. Bakah---" ka tih lai mek chuan ka sawi tum min sawi zawh tir duh lovin min kuahna thlahin ka biangah a dawm a, ka mitah thuk leh chiang tak a min en in "Zanin chiah" a ti a, a thusawi chu hrethiam lovin "Eng chu maw?" ka lo ti ha. 

"Zanin chiah Tommy hi theihnghilh rih rawh" ngen ngawl zetin a ti a, a hlauhthawng hmel ringawt te chuan min rawn tlawh ţum a min haw san dawn lai a hlauthawng tak chung a amah lo mipa dang ngaihtuah miah lo tur a min hrilh lai te kha min ti hrechhuak leh uar uar a, a hlauthawng tak tak ni a ka hriatna chuan ka kal hmaa ka tum ruk ran, engkim ti tawp vek tur a ka chakna ka fawm khawm ve zawng zawng te kha a ti chau tial tial ni maiin ka inhria. 

Ka phone a rik nawn leh chuan ka bag dahna lam lam ka hawi a, keimah vangin pawisawi miah lo leh thiam lohna nei ve miah lo, phu loh khawp a nasa a min duh tlat tu chu mangangin ngaihţha lo deuhin a awm leh ang a,  vawi tam tak natna min siam ţhin tu zawk hnenah awmin min ngaihsak takzet tu ka nam nul a, nep ka in tiin ka in zahpui takzet. 

"Ka ţhat lohna leh thin lohna lam hlir min phawrh chhuah sak ţhin a, heng vang te hian ka haw ţhin che tih i hria em?" tham chhal hian ka ti a, ka mittui tla chu rang zetin dim tak siin min lo hruk sak a, "I pianchamah kher kher chuan ţap suh" ti a aw dam dap a min hrilh hnuah ka chalah a fawp a, chumi rual chuan ka biang a a dawmna kut chu la thlain nghen chhan tur ka siamsakna laiah khan a let thla hnawk a, a pum dawmin nghet zetin mit a chhing tlat bawk. 

"I ţha em? I pum a la na viau tho em ni?" ti a zawh pahin ka mittui la cham bang te chu ka tuai fai sawk sawk a, na a ti hmel ka hmuh hnu phei chuan ka chiai leh vek tawh. 

"Ka harh leh hmain i piancham a ral hman daih ka hlau sia, ka luhai muai muai reng a" a tih takah chuan ka rilru a nuam deuh. Mahse a la na tih ka hria. 

"Min ti hlauthawng hman alawm. I damdawi ei vang kha aniang, muhil la a reh mai ang" naupang ang mai a a awm chu insum thei lovin nui chungin a awmah ka dawm a, "Mu ţha rawh hetianga i mut chuan i harh hunah i sil ţhum mai ang" tih pahin ka tho a, a nghenchhan tur a ka siam ka lak lai chuan "Ka muhil bik lo law law ang" a lo ti leh a, muhil turin ti mawlh mawlh mah ila min hnial char char. A harh hun a ka piancham a lo ral hman a hlauh vang maiin. 

"Tommy ka biak i duh loh a, heta awm tur a min duh bawk chuan ka thuawihin mu mai mai rawh. Buaipui tur ringawt chein tun thlengin i kiangah ka la awm a, chuvang chuan muhil la chawl hahdam rawh" tiin aw nem deuh zawkin ka hrilh a, min hnial lui ngam tawh lo. Ka kalsawn daih hlau a min vuan reng chungin a mu ţha a, "Ka mutthilh hlanin i kal bo dawn lo tih i chiang maw?" a ti a, min la ring ngam tak tak chuang lo a nih hmel.

"Nangmah ang ka nih ve loh hi. Ka thusawi angin ka awm ţhin. Ka tih theih loh tur ka tiam ngai lo" nghet charh hian ka ti a, "Khami zan khan eng nge thleng ka hre lo" a la ti ve ţang ţang.

"Muhil rawh" ka lo ti vat. Kha zan kha sawi chhuah reng ka duh lo. A mu tawh tak na a a rilru a la nuam zan lo tih a hmelah a lang chhuak a, thlamuang tak a a mut theih nan a chalah dimte a dawm hmasain a samah ka chul a, "Ka kal dawn lo. I harh veleh a i hmuh hmasakber theih turin ka lo awm reng ang. Muhil phawt la, i harh hunah a lo dam leh vek mai ang" tiin ka thlamuan pah a, naupang damlo enkawl ang mai ka ni. Ka nep em vang hian Msa ka huatna aiin keimah leh keimah ka inhuatna a nasa zawk hial ang. 

Msa mu chu a bul lawkah ţhuin engtia rei nge ka thlir tawh ka hre lo. Muttui viau mahse a ruk a ka kal daih hlauin nghet takin ka kut a vuan bet tlat reng a, ngaihzawng awmzia kan hriat tirh aţangin min umzuiin min chhaih buai reng a, min pawh pen dan a zawng ruai reng bawk. Ka kalsan daih hlau em em reng chungin ka duh loh zawngin a awm lui zel a, min chelh tum reng ţhin mahse tal chhuah theihna min siam sak zel. Fiona hi la lut thuk lutuk lo se chuan hlim deuhin kan awm dun ang a, ka pasal a ni tawh hial maithei asin. Mahse pahnihnaah ka awm ziah a, tunah pawh a hnen a cheng reng zawk chu kei ni lovin Fiona tho a ni. An pahnih a an inhriat ni aţang khan hun siam sak zel lovin inlak hran nghal nachang lo hria ila ţha tur. Ka tum ve viau pawhin a neitu zawk ka ni thei lo va, neih tumin theih tawp chhuah ţhin mah ila, vawi tam tak hun ţha pe ţhin mah ila, kan ta ni lo tur chu engtikahmah kan ta ah kan siam lui thei dawn lo va, kan tum nasat vang maiin kan nei thei dawn lo a ni tih ka hriat phah a ni. 

Msa muhil lai chu la thlir reng chungin tawi te in ka nui a, natna chiah min thlen tu nen a kan inlaichinna hi tih tawp tak tak ţulin ka hre tawh. Msa leh Tommy, ka tan a mi pawimawh tak ve ve mah ni se thutlukna ka siam a hun tawh. He thilah hian Tommy ka hnuk lut ve thei lo va, min duh takzet tu leh ka hlim loh hlau tak ţhin hi natna ka siam sak thei bik lo. Msa hi chu theihnghilh tumin nasa takin bei mah ila engtikahmah ka theihnghilh thei dawn lo. Ka nun a mipa ka lak luh hmasak ber anih vangin englai pawhin ka thinlungah a awm reng tawh ang. Mapuii paw'n min hrilh tawh kha, kan duh takzet a, kan thinlungah hmun kan siam sak tawh anih chuan an awm reng ang a, eng lai pawhin an nung reng ang. Mahse ka thinlungah a awm reng anih pawhin kumkhuaa ka kut vuan tu a nih kher a ngai lo. Ka tan a ţha lo va, tûr hlauhawm tak, nasa tak a min ti chhe thei tu ang chauh a ni. 

Ka kut a vawn lohna lam zawk chuan zawitein a hmai ka chul a, ka duh takzet a, ka pha hauh lo. Ka huatna hian ka duhna a hliah bo thei lo. Mahse ka duh em em rualin thuk tak a min hliam tu a ni tel bawk a, ka rin ve ţhinna zawng zawng te kha amah ngei hian a la bo vek. Tommy lak a ka rilru put hmang hi chiang takin ka hre thei lo. Mahse hun harsa ka tawh lai a ka tan a a thil tih zawng zawng te kha engtikahmah ka theihnghilh thei tawh lovang a, rulh let tum mah ila ka rul let thei lo ang. Khur thuk tak a ka tâng min chhan chhuak a, nung zui zel thei turin beiseina leh chakna min neih tir a ni. Mipa, amah ka hmuh rual a hmeichhe dang hmuh tel zel ngai, ka lawm lo chung pawh a thlah duh miah lo, rilru na leh hrehawm reng reng a min siam ţhin tu ai chuan min hmangaihzia min hrilh reng a, ka pawimawhna min hriattir tum tlat ţhin tu hi ka tan a ţha zawk a, ka kiang a awm reng turin ka duh tawh zawk a ni.

CONT...