NANG CHAUH-7

NANG CHAUH-7

"I kal daih tawh turah ka ngai a" Msa aw ka hriat veleh ka inher a, phak chuap a choka a a lo lut ka hmuh chuan zawi tein langsar vak lo in ka nui a, "Nizan khan i muhil i harh hunah i hmuh turin ka lo awm ang ka tih kha ka hrereng alawm. Ka thutiam ka bawh chhe ve ngai lo ka tih kha" ti a ka hrilh hnuah ka fian ken lai dah thlain a din na lamah ka phei a, in hmachhawn a dingin kan inkar hmun ruak a zau lem lo. 

"Nimin ai ngawt chuan hmuh i nuam alawm. I dam tawh hmel deuh" ka tih leh hnu chuan tawi te a nuiin zah hmel takin a tukhum a tuai a, "Nia..na ka nei leh tawh lo" a ti ve sup. 

"A ţhat hlauh chu. Chhun lai a ni tawh a i ril a ţam tawh ka ring, inrinni a nih vangin hna a kal ka ngai lo hlauh a, rawngbawl ka tum zet na a i pum ngeih loh thil ka pek palh che ka hlau a, ka thiam dan tawkin buh hawp ka siam ve a, ţhu la lo nghak rawh ka rawn pe ang che. Nem deuh hlek i ei loh chuan i pumin a zo lo ang a a na leh palh ang" ka ti zung zung a, "Aw..ka lawm viau ang" ti a phun supin chair a pawt tawlh a, ka eitur pek tur a nghah lai te chuan a mitin min chhui zui reng niin ka hre tlat a, ka che reng reng chu ka khawr deuh ţut ni maiin ka hria. Ka inher veleh dawhkan a kut dahin a hawi kual a, a thil sual ti lai ka man ang mai a ni. A awmdan chuan ka nuih a ti za angreng hle.

"Kha le, thlai tlem ka telh a, ka thiam dan danin ka siam ve. Rawng bawl ka thiam lutuk lo tih i hriat kha, mahse thiam lo viau mah ila i pum tan a ţhat chuan a ţha ni mai" ti a hrilh chungin a hmazawnah ka ţhu ve a, lawmthu min hrilh leh lai chuan a ngaih loh zia lantir nan lu ka thing a, a thil ei lai chu ka thlir ta zawk. Fianin a hawp a, tui ka tih vak loh nen Msa chuan tui tih hmel takin a ei a, "I siam thiam khawp alawm" tiin min fak pah zeuh bawk. 

"Tui itih chuan ei ţeuh rawh" nui chung hian ka lo ti a, ka siam anih phawt chuan tui ti lo mahse a fak tho ang. A tih ziah dan ve reng a ni. 

"I ei ve dawn lo em ni?" ti a min zawh chuan "Nichin lawk khan ka lo ei tawh a" tiin ţha deuhin ka chhang ve mai. Lu a buk zeuh hnuah ei zawm turin a kun leh a, "Tommy-an a lo be leh che em?" ti a min zawh lai paw'n a hawi chhuak lo hrim hrim. 

"Nizanah min biak a tum ngat ngat a, biak theihin ka awm mang si lo va tukin keimah zawkin ka bia lawm" ka ti a, dawt ka hrilh. Tommy ka la be lo hrim hrim a, zan a min biak theih loh chhan te, chanchin ka hrilh miah loh chhan te nen engmah ka la sawifiah lo. 

Hrilhhaithlak khawpin a reh zui a, ka beng a ngawng ta emaw tih mai turin thawm hriat zui tur a awm lo. Ţawng chhuak hmasa zawk nih kan ngam lo ve ve a, sawi tur ka hre hlawl lo a ni ber. A thil ei na plate ruak chu la thuaiin ka sil sawk sawk a, ka kal chhan ber Puipuii thu min chah pawh tun thlengin ka la sawi lo. 

Plate ka sil zawh veleh kut hru thuakin ka inher a, min lo enreng vangin kan mit leh mit a intawng leh a, tun ţum chu min en lo angin a awm kual der vel tawh lo. Hawisawn hmasa zawkah ţangin ka zam deuh hlek chuan ka kut la hnawng chap chuan ka khelah dawmin ka ti che sek a, "Ka kal a ngai tawhin ka hria" ka ti nawi zui niai. 

"Ngati nge?" tiin mak tih hmel zetin min zawt a, "I birthday ah ka ti buai hrep che a, pawn lamah eitur ka leisak tal ang che" a tih zawm zat. 

"I ti dik chiah, min ti buai khawp mai. Ka piancham hmang ţha hleithei lo khawpin ka buaipui tluan ţhak che a, inthlak te pawh ka duh ve tawh" ka tih laia a zam hmel kha ka hmuh hmaih lo. 

"I la nalh tho kha, thil ei chhuah pui che ka duh ringawt. Ka ti buai nasa chein hah deuhin ka siam che a, eitur lei sak che ka ba ve hrim hrim" a ti tlat a, ka remtih hma chu luhlul a chhuah leh tlat tho ang. 

"I la dam chiang si lo pawn lam a ei chhuak chi i la nih loh kha. Min chelh tlat dawn anih chuan ka thiam zawng ka siam ang a ni mai" ka ti ta nge nge a, ka duhzawng sawi ve nan te pawh a ţha khawp ang chu. Min chelh tu zawk a nia, a ngaithla duh turah ka ngai. 

"I awm ang maw?" tiin mi  zawt leh a, mak a tihna a thup hleithei lo. A awmdan chu hre lo der tlatin "Eng nge i ei duh? Chhuah ting tang a peihawm chiah si loh a a awm awm hi siam mai ang aw" ti a ka zawh chuan naupang lawm zawng hmu ang maiin a khi ve vur vur. 

"A tui dan a la ngai reng, soup siamah na na na chuan tuman an tluk lo ang che a" ti a min fak mawlh mawlh pahin ka eitur siam ho chu hlim deuhin a ei a, mangang tak a en chungin "Vawi khatah ei ţeuh ţeuh suh. Pum ruak a i awm loh chuan a ţha a ni mai. I ei ţeuh ţeuh chuan i pum a na leh mai ang tih a hlauhawm. Tui iti anih paw'n ei dim deuh rawh. Mahni in ngaihtuah na chang hriat ve tur" tiin ka lo khap vat. 

"I thil siam ka ei lohna lohna a rei tawh a, ka ei leh hun tur ka hre lo bawk a" ti a min chhan chuan chek tlakin lu ka tling ne ne a, "Dah ban ka nei nual a, i rilţam hunah i ti lum leh mai dawn nia" tiin ka ding hluai a, a ei loh deuh a ka hriat leh plate ruak ang ang ka seng fel leh zung zung a, a duh tawk ve ta aniang ani pawh ding ve in min seng fel pui a, "I birthday ah ka ti buai che a, tunah rawng ka bawl tir leh che a" inthiam lo ve ni áwm tak a a tih chuan nuih sawh deuh chungin "Nimin kha chu birthday nuam lo ber a ni ngei ngei ang" ka lo ti zeuh. 

"Tak tak maw?" thutak zet a a tih takah chuan amah ka en nghal vat. 

"Ka uang mai mai a nih kha" ka ti leh ta zawk a, ka plate kenlai min laksakin thleng sil naah a dah a, ka chet hma hauhin dawhkan a hru leh zung zung a, kut a silfai leh lai te chuan ka lo en tawp. 

"Ti hian dah rih rawh nakinah ka sil mai ang, lokal hmasa phawt rawh" tih leh ka ban a kaih a rual a, ţhutkhawmna pindanah bawk min hruai lutin sofa ah min nam ţhu a, "Lo nghak lawk rawh" a ti leh tawp a, inchungah a tlan chho zui daih. 

"Hman a ka pek che kha i hman zawh tawh takin" tiin diary min pe leh a, kum18 mi lek kan nih laia min pek ai kha chuan a kawm ringawt pawh a mawiin a man a to hmel zawk. A inah kal lo ila chu min pe kher lo maithei a, kan inhmu tawh ta sa sa tiin min pe turin a lokal vang vang maithei bawk. Ka la ngaihsak vul chuk ang a a ngaih hlauin ka zawt chiang duh bik miah lo thung. 

Lak tum a ka ban lai chuan lo pawt let lehin "Duhthu sam phawt rawh" a ti leh tlat tawh a, a ngaihna ka hre lo kher mai.

"Present lak dawnah duthusam kher a ngai em ni? Ka birthday pawh a nih tawh loh hi, nimin khan a zo daih tawh" tiin ka hrilh nawn leh a, present lak dawn a duhzawng ngaihtuah daih chu ka vawikhat hriatna a ni. 

"Present ah a thawk ve lo tihna em ni?" ti a min zawh let chuan ka nui hak a, a ngaihven loh zawng tak a ni ve bawk nen a hre lo lutuk hi a dem awm hran loh. 

"Thawk lo ang..bakah ka tan duhthu han sam vel a ngai ve tawh hleinem" ka tih chuan a ngaihna hre lovin mit ko a lo san ak a, a chhan min zawt zui zat bawk. 

"A chhan chu ka duhthusam a thleng vek tawh a" ka tih leh hnuah min hnialna hun siam tawh lovin a diary ken lai chu ka la a, ka ţhutna sofa nghengin chhuatah a ţhu a, min hnaih hle thung. Ka kutah vuanin na lo te in a hmer a, "I duhthusam thleng dik tawh chu eng nge ni a?" tiin fimkhur takin min zawt a, ka kut a vawn reng lai chu en in "Thil dang sawi ang. Ka lokal chhan diktak zawk chu Puipuii'n min rawn tirh vang a nia, a hnathawhna nu fapa hi school aţangin an hnawt chhuak a, school dang a dil an hreh deuh a, Puipuii nen in inhre ţha tho a, i school enkawl lai hi an beisei deuh hlek a, lehkha pawimawh---" ka ti hman chauh a, "Thawhţan ah lokal rawh se" tiin ka thusawi lai a lo pawt chat a, a rem ti hma lutuk chu ka hrethiam lo lek lek. 

"Naupang chanchin ka la sawi tel lo" ti leh mah ila "I sawivek hnuah min dil lui dawn tho" a ti nghut a, lawmthu ka hrilh ta ringawt. Awlsam deuh a sawifel theih si rei fe ka awm phah a, ka nu leh Kimpuii lah dawt ka hrilh a, Tommy-a ka la be miah lo bawk a, dik lohna ka ngah ta khawp mai. 

"Ţhi i awrh na nge?" ti a min zawh chuan ka ţhut lohna lam a ka bag inhung vang chu banin ka ţhutna lamah ka pawt hnai a, side table chawikang lehin ka hmaah ka hung a, ka ţhi awrh reng ţhin, nuam ti lo chung chung a ka lakthlak tak kha side table ah chuan ka dah a, "Hei hi eng tihna nge?" tiin a enchian hnuah min zawt vat reng a ni. 

Ka ţawng chhuah hma a thawk ka lak hmasak te te hnuah "A kawh tum ber chu nang nen a kan inlaichinna neih ţhin zawng zawng tih tawp vek a hmalam pan ka duhna a ni ber ang" ka ti a, min phuar ţung reng tu awm tawh lo se, kan inhmuh leh hunah pawh zalen takin awm ve tawh ila ka duh a ni. 

Min hmuh chian lehzual theih nan a inher remin ka mitah thuk takin a en a, "Tommy vang a ni em?" ti a min zawh chuan "A chhan pakhat chu a ni" tiin ka lo chhang. 

"Ka duhthusam a thleng dik tawh ka tih kha, a thlen dik chhan chu Tommy ka tawn vang a ni" tih zawm lehin ka kut a vawn lai chu ka la let a, "Ka duhthusam mipa chu Tommy ang hi a ni" nghet charh a ka tih hnu chuan hriam hrak a thaw chhuak hrawkin hnuai lam a melh a, "I hmangaih takzet tihna em ni?" tiin a phun sup a, a hrilhhai leh beidawng hmel ka hmuh chuan keimah zawkin hrehawm ka ti leh daih tawh. Muangchang a lu thin pahin "Aih" ka ti ban charh a, rawn hawi chhuak leh vatin a mitmeng thlengin a buai ve niaih. 

"Hmangaihna hi chu nupa nih hnuah lo chuan a awm tak tak thei lo ang ka tih tawh kha. Mahse Tommy ai chuan ka duhna che a nasa zawk" tiin ka rilru put hmang dik tak ka sawi chhuak a, thudik a nih miau vangin pha buai lovin ka pawm thlap. 

"Ka hrethiam lo" a ti zuai raih a, khawngaih viau mah ila ka inti pachang lui tlat. 

"A chhan chu ka duh zawk ni mahla min ti na tu zawk i nia, thil thleng tawh ka theihnghilh ve mai mai ngai lo va, na ka lo tawrh tawhna phei kha chu ka theihnghilh thei lo lehzual. Kan nunhlui ah khan na tam tak min thlen a, tun thleng hian ka hmuh che apiangin kha na bawk kha a lo let leh ţhin. Ka phum bo vek tawh emaw ka ti ţhin a, mahse hriat reng duh vang a chhinchhiah thlap thlap ang chiahin a indawtin a lang leh zut zut a, nizan a ka hua che ka tih khan ka ti mai mai lo va, dawt a ni miah lo bawk. Ka huat em che avang hian engtikahmah ka ngaihdam theih che ka ring lo" ka ti a, thinrimin vin vak vak lo mah ila ka thusawi mal tin te chuan a deng ve dawt dawt maithei. 

"Khami zan a thil thleng vang kha a nih chuan engtin nge ka tih dik leh theih ang? Tih theih eng emaw chu ka nei ang tiraw?" tiin beisei nei deuhin min zawt a, "Teuh lo mai" tih pahin lu ka thing nawk nawk. 

"Engmah tih theih leh siam ţhat theih i nei tawh lo. Kha zan khan engkim min laksak vek" ka tih zawm leh a, ka rinna te, ka ţhianţha tak a nihna te zawng zawng nen, ka duhna chauh hi a lak loh awm chhun a ni. 

"Ka hmangaih che" a ti sup a, ţawng zawi viau mahse a thusawi chuan min ţhawng dawtin sawi zel tur ka hriat loh phah a, a thu tak em vang chuan ka ţhutna ngaiah ţang ţeuhin che miah lovin ka ţhu reng a, hnial pawh hnial duh lovin a ţawng chhuah leh hun ka ngaichang ran. 

"School naupang lek la ni chung a ka duh tlat che kha tun thlengin ka la hrethiam lo. Min nawr tu a awm tlat a, ka duhna che lantir hrehin nitin a ti thinrim che in ka zar buai che a, kan awmdan kha ka nin hnuah ka rilru put hmang ka hrilh che a kan inkawp ve ren rawn a, ka pa nupuiin min ngaithei lo va, tikhan ka nu in min rawn hruai a, nitin kan inbia a Fiona thawm i hriat hlekin i thinrim a, a tam zawk kha chu ka ti lui ţhin. Ka biak che apiangin Fiona hnaihah ka awm a, a thawm i hriat theih nan keimah zawkin ka hnaih lui ţhin. Ka ţhianten i chanchin min rawn hrilh ţhin a, an rin aiin i lo la thutak daih a, i tan a lehkhazir a pawimawh zia hriain min ngaihtuah nep deuh hlek nan a ka tih a ni. Mahse ka hlim phah chuang lo. Ka tihnat che apiangin keimah ka na let zawk ţhin a, kan inţhen khan thil ţha tihsak che ah ka in ngai a, mahse kan inbiak leh takah kha chuan insum zo lovin Shillong thlengin ka rawn umzui leh che a, ţhen tawh miah lo tur chein leh kan inlaichinna in a tihchhiat phah loh nan che a fuih zawk tur chein" tiin a inpuang a, khang hunlai kha chu ngaihzawng te duh tluk hunlai leh vei ngawih ngawih hunlai a ni ve hrim hrim a, ka hma hun tur ngaihtuah a intih ve lai, school naupang chauh kan la nih lai khan ka zirna in a tuar phah lo va, shillong a ka awm tawh hnu a na tak a min siam khan a chhiat phah ţhelh a, ka dinhmun hrerengin ka zir lui hram hram zawk a ni. 

Ka mit a min en ngam leh hnu chuan "Inkawp reng mah ila kan zirna hmun a hran miau vangin ka haw san leh che a, mipa na na na chuan hlimna tur ka hmu chawp zel a, hmeichhia in kawppui te in ngaihsakna ang hi ka hrethiam pha ve lo. Min vin a min hauh pung pung chang te, min rinhlelh chang te hian ka ning ţhin a,  khang hunlai aţang daih tawh khan ka lo hmangaih reng tawh che a, ka luhlul em vangin ka inpawm duh lo mai mai a ni" a tih leh phei chuan tam tak chu ka hrethiam. A awmdan ţhin ka hriatchhuah rualin a awm chhan ka hre thiam ruai ruai. Min runluih nasa ţhin hle a nih kha. 

"Chutiang anih si chuan ngati nge ka biak duh loh hnu che khan min hmu tur a i rawnkal leh mai loh? A hunlai khan min ngaihven vat vatin min ţhen theih loh thu te, min duh takzet zia te min hrilhin min ngaipawimawh zui la chuan hrehawm ka ti nep deuh ang" ka ti ve sep sep a, sawt tawh lo viau mahse ka sawi chhuak lo thei bik lo a ni. 

"Ka inrintawk lutuk vang a ni ber ang chu. Min hmangaih takzet niin ka hria a, ka biak loh che a, ka rawn tlawh kher loh che pawhin tlawm zawk a i ţan leh tho ka ring a, i rawn let leh tho ka rin vang a ni" a ti a, a chek tlak a, a lungngaih hmel takzet. 

"Nih leh naupang kha? I naupang chen pui reng pa ang a en tu che kha eng tin nge i sawifiah dawn? Keichuan i fapa anih ka ring nghet hmiah" chang fakin ka ti a, Fiona leh a fapa ka ngaihtuahin khawngaihna tam tak ka nei, mahse khawngaih viau mah ila an pahnih khan hmuh nuam ka ti hauh lo. 

"Ka fapa a ni lo" ti bung nghutin ka bulah a rawn ţhu chho a, kan inhnaih leh tawh hle. 

"An chhungkaw buaina vang zawk a ni. Bawihtea a hrisel lo a, naupang dang angin a chak ve lo bawk a, a mamawh ang enkawlna a dawn theih loh vang a awmpui ka ni. An buaina erawh ka sawi ve a mawi lo a, min mamawh vang chiahin an nufa in ka awm pui. Khang kum liam ta chhung zawng a ka ngaihven nasat ber leh ka thinlung a awm reng zawk chu nangmah i ni, Fiona ni lovin" a ti a, engkim min hrilh vekah ngai mah ila rin leh ngaihna ka hre tawh lo. A thusawi leh Tommy-a min lo hrilh tawh ah te khan danglamna tam tak a awm. Beiseina ka neih thar phah lo va, ka let leh chuan nakinah ka na leh tho ang tihna rilru ka pu tlat tawh a, beidawn a ti zual mai mai chauh tawh. 

"Min huat zia ka hria a, min hmangaih tawh miah lo la chu ka hnung tawlh hreh lo mahse engkim a lang tlang vek. I hmangaih chu Tommy ni lovin keimah ka ni. Tommy hian a hmangaih takzet che tih ka hria a, neih let leh che tum a ka bei leh a nih chuan a tan pawh a fair lo ang. Mahse kan in a i rawnkal hmasak ber ni a i thusawi kha, Fiona te nufa ka chhuah tir anih chuan Tommy kalsan a i rawn let leh tur thu i sawi kha, i sawi ang chiah khan ka ti vek. An let leh tawh a, hetah an cheng ve tawh lo" ti a min hrilh leh takah chuan Fiona te nufa reh vang vang chhan ka hre fiah leh chiah. Mahse a tlai tawh lutuk. 

A khabe ah dawmin a hmuiah keimah zawkin ka fawp a, ka chet dan mak a tih chhung a rei lo. Rilţam tak ang mai a min chhang let ve vatin ka sam karah a kut ţang  rawlh lutin min hnaih lehzual a, min fawhna chu a tirah nemin zawi viau mahse a duhthaw zel a, ka taksa in min phatsan leh mai hlauin inla hrang hmasa zawkah ka ţang. 

"A tlai tawh" tiin ka phun sep a, kan la inhnaih em vangin a taksa ţang ţeuh chu chiang takin a hriat. 

"Ka zawh mawlh mawlh ţhin lai che khan Fiona a inrawlh ve sek ţhin chhan kha min hrilhfiah ni la chuan hriatthiamna che ka nei ve deuh ang. Inbiak reng i nin deuh chang pawhin ka thinrim min runluih kher lovin ţha deuhin min hrilh ţhin la chuan min biak peih hun ka lo nghak mai ang. Mipa leh hmeichhia hi kawng tam takah kan inang lo va, kan inhrilhfiah tawn a kan inhriatthiam tawn loh chuan tu emaw zawk zawk kan na ngei ngei. Fiona te nufa chungchang thlengin, biru reng lovin min rawn zawng hmu la, i rilru put hmang leh i awmpui chhan zawng zawng te hi min hrilh vek la chuan kan na lo ve ve ang a, Fiona te nufa leh Tommy thlengin tumah a kang kai ve lo ang. Tunah inpuangin engkim min hrilh vek a, thudik i sawi tih ka hria mahse a tlai tawh, kum a liam hnem tawh em a i thusawi zawng zawng khan awmzia a nei tawh lo" ka ti a, a hmel hmuh a nuam lovin kei ngei pawh hian hrehawm ka ti takzet. Fiona hming a lam changin ngaithla ţha peih lovin thinrim nghal zel mah ila min ning nghal mai lovin min hrilh lui thei alawm. 

"Fiona te nufa ka chhuah tir chuan Tommy nen a in inlaichinna ti tawpin i rawn let leh tur thu i sawi a" a ti nawn leh a, zawhna min zawt a ni mah zawk. A aw thlengin natna a langchhuak a, khawngaih viau mah ila inti pachang luiin mittui ka dang ţang ţang. 

"I tih duh tak tak ka rin loh vang chauh a sawi ka ni. Keichuan Tommy hi ka ti na thei lo va, tih nat ka tum miah lo bawk. I ţhianpa ngawih ngawih a nia, ka tan a hlu takzet bawk a, kan buaina leh nat ţhin naah hian pawi sawi lo telh tir ve ka duh tawh lo. Hun dik lo ah kan intawng a, midangin min belh a, dik lo a awm tih hrerengin kan chhunzawm lui zel a, thil ţha hlawhchhuah kan neih miah loh hi. Kan na ve ve dawn tih ka hria mahse kan tih tawp tak tak a ţul tawh a ni. Min kal chhuah tir tawh la, Fiona leh a fapa pawh kal tir la, nangpawh inchhuah zalen tawh rawh. Nunhlui ah chengin inkalh khum reng tawh lo la, engkim theihnghilhin bulţan ţha leh zawk rawh" ka ti a, na viau mah ila ka nui lui ţalh. Ka fapa a ni lo ti a min hrilh khan ka ring thlap a, kha zan kha hrereng mah ila na ka tih zual em vangin ka sawi chhuak tel duh ta lo. 

"Engkim theihnghilhin bul i ţan ţha thei tak tak ang maw?" tiin min zawt a, kan thusawi mek chu kan pahnih tan a harsa ve ve. 

"Ka tum tlat ang. Nangpaw'n khawngaihin theihnghilh vek i tum tawh dawn nia" ka ti a, khawngaihna ka la neih ve tho vangin derthawng leh hrilhhai lutuk a a awm chuan ka ţah a ti chhuak ve lek lek. Mahse ka insum lui zel a, a lanchhuah loh nan thuk tak a thaw lutin a tawp nan tak tak nghet zet a kuahin a darah khabe ka nghat a, min hmu thei tawh miah lo mahse tawi te in ka nui a, kan inhmu leh ting tang tawh a, ka tan tak pawh hian a awlsam kher lo ang. 

"I in enkawl ţha dawn nia, i damloh tawh loh nan thil ei loh mai mai ching tawh lo la, hmeichhe dang chu ti lungngaiin ti mangang ve tawh suh" tiin ka phun leh sep sep a, amah zawk inla hrang hmasa ah ţangin ka biangah a dawm a, a ni pawhin a tawp nan ti awm takin ka hmuiah a fawp a, "Kal tawh rawh" a tih lai te chuan kan la inhnaih hle a, kan hmui a insi leh lek lek. 

"Rilru ka thlak leh hmain kal tawh mai rawh" a ti leh a, zawi muangin ka tawlh hnung a, ka malchungah ka bag nghatin ka tuai thuak a, Msa chu rei lo te melh leh zawkin hmanhmawh zetin ka chhuak zui a, ka ken luh ang ang ka chhuah pui vek a, amah ka hriatrengna ţhin ka ţhi ro ve tak ţhin kha ka hnut chhiah thung. 

Taxi rawn tlan remchang ka phar ding a, ka kal duhna ka sawi hnuah a hnungah ka ţhu lut a, kalh khum ka nihna ţhin leh ka tan beh rengna ţhin kalsan vang vang angah in ngai mah ila thawveng takin ka nui zui thei lo va, driver hmuh hlau deuhin mittui ka hru leh zeuh ţhin. 

In chhung ka luh rualin ka nu leh Kimpuii ten ka damlo enkawl lai chanchin min lo zawt chiam a, a ţhat thu hrilhin ka pindan ka pan ding nghal. 

"Inthlak thuai thuai rawh thingpui ka lo lum sak ang che" tiin Kimpuii chuan min au zui lang lang. 

Ka tha a tho lo bawk a muangchangin ka che a, ka nau thingpui lum pawh ngaihsak lovin ka harh deuh beiseiin ka inbual nghal daih a, tuivawt vur paw'n min ti harh zo tak tak lo. Kum8 mi lek kan nih lai,amah ka hriat tirh phat aţang khan thil min tihsak rualin ka thil neih ţha ţha min laksak zel a, engkim a la vek tawh bawk a pek leh chuan tur ka nei tawh lo. 

Rilru pe lo deuhin tv ka en a, ka nu khawhar inah kalin Kimpuii choka lamah a buai hle bawk. Door bell a rik veleh phur na nei em em lovin ka tho a, kawngkhar ka hawn rualin rilru buai hmel zet leh ngaihţha fahran lo tih hriat tak a Tommy-a lo ding reng ka hmu thut a, biak theihin ka awm lo bawk a a lo haw thu ka lo hre lo reng reng. Lo lawm ka tum lai takin amah zawk chuan min kaichhuak hretin thlahlel deuhin min kuah a, "Kar khat chhung khan eng eng nge i lo tih? Biak pawh che ka tum reng a, biak theihin i awm lo a" tiin min zawt a, a aw ah chuan thinrimna a lang chhuak ve hial. 

"Ka ngaihtuah takzet che a, rawn haw vat vat tum mah ila ka pa duh hun te ah lo chuan ka lo haw thei lo va, Kimpuii hnen a han zawh em chu ka hreh ve deuh sia, i reh hmak a, thil ţha lo a thleng ta mai emaw ka ti hman rum rum. Kan rawn haw veleh ka rawn kal nghal anih hi" ti a min hrilh leh hnu chuan a hlauhthawnna leh thinrimna zawng zawng te chu tih nep sak tumin a hnungah ka chul a, chumi hnuah chhe te a tawlh hnungin a mit a en ran chungin "Ka tihpalh" ka ti a, ka nui lui hram hram. 

"Tihpalh tih kha ka hre duh lo. Eng thil nge thleng ka hre duh. I reh vang vang ringawt a, ka kal ni a kan inbiak bak kha vawikhatmah biak theihin i awm leh tawh lo" a la ti tho a, kawngkhar melh zawkin Tommy chu ka en let leh a, "Lo lut hmasa phawt rawh. Kawngkalin kan thawm an hre hlauh palh ang. Thingpui tui deuhin ka lum ang che" ka ti ve thung.

A che chang duh lawk lo a, keimah zawkin a kutah vuanin inchhungah ka kai lut veleh thung a, kawngkhar ka khar leh te te a, a rawn thlen hma a tv en a ka ţhutna thlengin ka kai a, "Kan sawi dun hma in thingpui ka va lum phawt ang" zam tak chunga ka tih laiin "Aih, thil thleng tur âwm ang ngaihtuahin rilru nuam lo deuhin kar khat chhung lai ka awm a, tunah sawi vek zawk rawh" nghet charh a tiin luhlul a chhuah ve tlat tawh. 

A bul a ka ţhut thlak ve lai chuan choka aţangin bawr deuhin Kimpuii a rawn chhuak thut a, "Nu Mapeki dawrah ka kal lawk dawn nia, dawr nghah pui pahin ka nu ka lo nghak nghal ang" ti a min hrilhin a chhuak nul nul a, Tommy nen chiah a kan awm hnu chuan boruak a ţang ru kher mai. 

"Sawi tawh rawh le. Him pialin ka rawn hmu leh tho che a, i biak theih loh chhan chiah hriat duh ka nei" tiin min lo nawr lehnghal. 

Kun hlek chungin a thinrim loh nan a kutah ka vuan hmasa te te a, a lo haw hun a hrilhfiah dan tur nasa takin ka ngaihtuah tawh. Dawt tam tak lo hrilh tawh ţhin mah ila dawt sawi zawm zel ka duh tawh bik lo a ni. Msa nen kan la inhmu leh fo maithei a, inhmuh tum miah lo mah ila palh awm thei a ni. Eng chen chiah a thui nge ka hrilh dawn ka hre lo va, thil thleng zawng zawng ka hrilh vek thei lo anih pawhin Msa nen hian school naupang kan nih lai chauh ni lo college kan zawk ţhak hnu thleng khan inlaichinna nghet tak kan la nei tih hriattir ka duh. Tommy hian min rin vang maiin mi â ang mai a chei bawl ka duh lo va, kan inkar hi thianghlim tawh turin ka duh a, kan inlaichinna hi fair deuh a kal pui zel ka duh. Zep neih ţit ţet ka peih tawh lo a ni.

Inti huaisen chawpin ka hawi chhuak a, min lo ngaichang ran. 

"Ipa nen in zin zan kha, khami zan khan Msa bulah ka awm" ka ti chiah chu "Msa maw?" ti a min lo zawt let thuaiin a mitmeng a thim khup khup a, "Aw Msa..kha zan khan a bulah ka awm a, diktak chuan college kan kal hnu khan kan la inkawp zawm zel a" ka ti ban charh a, hman a engkim ka hrilh vek ţhin ang kha a ni tawh lo. Ka zam takzet a ni. 

"In inkawp leh maw? Engtik ah? Engtia rei?" tiin zawhna tam tak a nei a, heng vang tak te hian a nia rei tak chhung ka inbuatsaih. 

"Rei deuh chhung...thu ho te te sawiin kan inbe leh a, kan la in ngai ve ve bawk a kan inkawp leh thuai" ka ti a, hman ang khan intithei deuhin kan chanchin ka hrilh thei tawh lo. 

"Engzat chiah nge? Fiona nen khan an inkawp nghal a ni lo'm ni? An inzui nghal char char kha" a ti leh hluk hluk a, "Ka hre lo le, kan inhauh ţhinna ber kha chu a la ngai reng a, Fiona nen an inkawp nasat lutuk vangin kan inhau leh fo. Mahse min hmu tur te'n a lokal a, a hman chang apiangin min rawn bia a, hlim ve viau ţhin mah ila rei a daih thei tak tak lo. A tawpah phei chuan na takin min hliam a" ka tih lai mekin "I rawn ţah vak zan kha a ni em? Mumal lo deuh a i awm zui reng kha" tiin min lo zawt leh thuai. 

"Kha thil kha chu sawi tel lo teh ang" tiin ka khap vat. Ka ţhen hmakna chhan ber pawh a ni. 

"I inhloh ţhelh kha, khami ţum kha i ţap ka vawikhat hriatna" tiin zawi tein a chek tlak. 

"Tun thlengin i ţap ka hre leh tawh lo a, anih chuan khatianga siam tu che kha Msa hi maw?" a ti a, mak a tihna leh a thinrimna te chu a inchen chiah awm e. 

"Ni lo e..chutiang a ni lo. Thil zawng zawng kha a dik lo in a buai nuai vek a, thil thlen dan kilh kelh sawifiah vek thei lo mah ila Msa hi i ngaihdan ang em em a ni lo" ka ti a, a ngaihdan chiah sawichhuak lo mahse mi ţha tak ang chuan a ngai lo tawp ang. 

"Nih leh a inah chuan eng tiin nge i awm? Zan thlengin i awm a, eng em em nge i tih? I la hmangaih reng tihna em ni? Phone i chhan theih loh chhan kha a ni em?" tiin min zawt leh mawlh mawlh. 

"Ni lo e" tih bawk a chhang lehin ngaihţha zan lo chungin a banah ka dawm a,"Ka hrilh lawk ang che khan Puipuii min tirhna angin ka kal a, ka hmuh lai khan lo damlo in a pum a na vak a, ţhian ka nihna angin ka kalsan thei lo. Hospital ah ka hruai a, na a tih ve em vangin amah chauh a awm turin ka hnutchhiah thei lo" tiin inthiam lohna nasa tak nei chungin ka hrilhfiah. 

"In pahnih a in awmdun zel dan chu ka ngaithla peih lo va ka hre duh lo bawk. Ka hriat duh tak zawk chu a hnen a awm i thlang zawk em?" ti a min zawh chuan thil dang a sawi leh hmain "Duhthlanna ka siam fel tawh a, ka thlan zawk chu Msa a ni lo" pehhel deuhin ka lo ti a, "Dawt ka hrilh ţhin vang che khan min hrethiam dawn nia, Msa nen a kan inkar a thil thleng zawng zawng kha tihpalh ah min ngaih sak la, kan sawi fel vek tawh a, thleng leh tur a awm tawh lo. Zankhua a a in a ka awm vang khan ka tihpalh a ni. Biak che duh viau mah ila hrilhfiah dan tur che ka hre mai thei lo a, i nat loh dan tur zawng a sawifiah dan ka ngaihtuah nasa. Ţhian ţha tak in ni a, keimah vang a in inhmuh thiam loh ka duh lo. Ka thusawi dang te i awih lo anih pawhin Msa hnen a let ka tum loh thu ka sawi kha chu i ring thei ang" tiin ka belh leh a, ven phah hawk lo mah ila min delh bet tlat tu ka neih ţhin kha tlemin a zâng ta deuh.

CONT..