NANG CHAUH-8

NANG CHAUH-8

"I chiang em?" ti a phawk hra a min zawh chuan "Ka chiang lutuk tlat" tiin nui chungin ka lo chhang a, Msa ka duh ţhin zia a hria a, Msa aia ka thlang zawk chu awih har a ti ve a nih hmel. 

"Min thlah miah suh" ti a min hrilh leh hnu chuan dam deuhin min kuah a, "Tehreng mai..nunhlui tam tak ka lo neih pui tawh vang khan ka tihpalh lutuk" ka ti a, dim te in a hnung ka chul pah a, mi te'n a ţhatna hmu ve kher lo mahse ka tan chuan a hlu takzet. 

"I nunhlui ka ngaipawimawh lo, i hun lo la awm zel tur a ka tel ve theih chuan a tawk" a ti a, ka vanduai bik loh zia ka hriat phah ţhin. Na tak a min siam tu an awm rualin min tuam dam sak tum tu kan nei leh ţhin. 

"Ka lawm e" ti a ka phun sep hnuah tlem a awm hlat pahin "Kan ţha tawh em? I la thinrim reng em? Msa leh kei, min haw lo ve ve ang chu tiraw?" tiin fimkhur deuhin ka zawt. 

"Nangmah inih phawt chuan ka thinrim reng dawn lo tih i hriat kha. Msa kha chu i sawi ang khan nunhlui a ni tawh a, nuam lo a tih loh nan ka hre lo der mai ang" a tih hnuah "Mahse neih let leh che a tum a nih vaih chuan ka chhuah miah lo ang" a ti fiamthu zui a, "Lungngai suh, eng thil mah a ti lo vang" thutak deuhin ka lo ti thung. Kha mi ni a ka hnar dan aţang khan engmah a ti zui dawn lo tih ka chiang. Ani aia Tommy ka thlan zawk thu chiang takin ka hrilh a, min umzui lo tawp ang. 

"Ka ring che" ti supin ka kut min vawn sak a, min rin zia a sawi reng ţhin a, tun aţang chuan min rin ang ngei hian rinawm tak a awm ka tum. 

Msa nen kan inhmu lo leh vang vang a, ka ngai ţhin takzet, ka pawm thlap. Mahse duh ka thlang fel tawh a, hmuh loh a ţha zawk. Hun a rei ang a ka ngaih zual pui chu a reh leh mai ang.  

Chawlh a ni bawk a nidang aiin ka mu rei hret. Zan ka mu ţha ngai lo va, Tommy zawk be reng chungin ka hriatna aţangin Msa ka thehchhuak hlei thei lo. A da tial tial dawn emaw ka tih laiin a tak telh telh emaw tih mai tur a ni a, ka sawi tawh angin a reh hun tur ka nghak tawp. Ka ngaihtuah nep deuh hun tur te, ka kalsan lai a a na leh hrilhhai hmel te khan keimah a hna an thawh theih miah loh hun tur ka nghak tawp. 

"Tho har thei sia aw..tho tawh rawh chaw kan ei dawn. I thawh tlai lutuk chuan ka nu ngaihdan a ni lo ang" Kimpuii'n a rawn ti lut bawrh bawrh a, zangthal a mu in ka nghawng thleng rizaiin ka la khuh hlun a, parda a hawng sawk sawk lai te chu thawh tum chuang lovin ka lo en reng ringawt. 

"I peih loh hmain ţhu pawp la i tho a ni mai. Keipawh a hma kha chuan zan mut dawn a ka huphurh ber chu zing thawh a ni ve ţhin tho a, mahse hmeichhe nih chuan thawh hma hram hram a ţha. U Tommy-a bulah ţhenawm ten 'Ani chu a tho tlai thei lutuk. Inchhungah engmah a ti ngai bawk si lo' an tih vaih chuan a hnual rawih maithei a nia aw. Ka tho hma ţhang a, ngaiah ka nei tawh. Nang pawh hna kal a ngaih ni chauh lo ah pawh tho hma ziah rawh taksa tan a ţha hrim hrim" a ti zui bawrh bawrh a, ţawng pahin a che sawk sawk reng bawk a, dawhkan a lehkhapuan ka dah hnawk nuai te nen lam a remfel a, ka nau mah ni se min zilh tu zawkah a ţang fo tawh. 

"Tukin chu chaw ka ei chak lo. Ka chau ve deuh hrim hrim a, min ei san mai rawh u" zik mar ţuah ţuah pahin ka ti a, khum a a rawn ţhut lai chuan mit ka lo nuai nuah nuah. 

"Nizan pawn i ei loh kha. Tunlai chu chaw i eithei lo riau. Eng emaw mawlh tu che a awm em ni?" a ti a, a thutakin chhanna beiseiin min melh ran. 

"Awm lo e..ka ei peih lo ve satliah mai mai. Chhunah thil dang ka ei leh ţeuh mai ang" ka lo ti a, a ngaihţhat theih nan ka nui lui. 

"Chaw ei loh mai mai hi a ţha lo teh mai a sin. Mahse i nawm loh hmel emai i peih hun hunah i ei mai dawn nia" a ti a, min zilh zui duah lovin a chhuak ve mai. Kimpuii a kal liam chiah chu ka thaw huai, hman ang tho kha ka la ni. Ka mimal buaina te hi chhungte hriat loh turin ka la thup tlat ţhin. 

Chhunah thil tlem ka ei a, ka nu leh Kimpuii te bazar turin an chhuak. Keimahin ka tei ruk ruk reng a, inchhung awm ka ning lutuk chu ka chhuak ta nge nge. Kal thui tum ka ni lo bawk a ka thawmhnaw takngial pawh ka thlak lo. Ka pa thih ţum a midang hriat loh a ka kal daih na, Msa'n min rawn zawn hmuh naah ngei khan ka kal a, a hmun a rem bawk a, ţhut hahdam pahin ka piah lawk a naupang ho inkhel chu ka thlir a, rei ka ţhu peih leh chuang lo. 

Hmanhmawh lo takin ka let leh a, hmelhriat ţhenkhat min lo be tu te pawh a rul tawk lek lekin ka chhang. Kan inpan awlsamna step zawh lovin kawngpuiah ka kal kual a, Msa pa te in chu ka kalpel dawn zet na a a nau Gracy-in gate chhung lam an kawt zawl a lo silfai lai mek ka hmuh chuan ka ding leh hnuhnawh. 

Gate tlem a inhawng bawk a, chutah chuan dingin "I va fel ve a" ka ti leh hram a, rawn hawi chhuak thuaiin ka lo ding vang a hmuh takah chuan a nui zui ver ver. 

"Ka buai lutuk a ka ti fai lawk hman lo a, khaw nge i kal? Nang berkher chu hmuh che ka inbeisei vak lo a sin" zang vah hian a ti a, min rawn pan hnai vat bawk.

"Kimpuii a awm si lo va, mahni chiah a awm chu khua a har duh em a ka leng kual mai mai anih hi. Haw tlang ka tum laiin ka hmu thut che a" tiin ka lo hrilhfiah a, Lucy nen inkawmngeih viau mahse ka hmu khat hle. A fel reuhin inhmu khat mah ila min be bawrh bawrh thei tho zel. 

"I hman chang chuan rawn leng ve ţhin rawh. Keipawh rawn len ka tum ţhin a mahse inchhung che tur keimah chiah ka ni sia, duh duh hunah ka chhuak thei tawh lo. Lucy nen kan inbe zeuh zeuh bawk a, ka ngai reuh tak tak, ka kawm ve ber a ni bawk sia" a ti leh siam siam a, Msa chanchin zawh ka tum zet na a ka ţhulh leh. 

"Kan buai tlang a nih hi. I hman veleh i lo leng dawn nia" ka ti ta zawk a. 

"Ka u te pawh" a tih lai mekin "Rebecca" ti a min ko ri ka hre zui zat. Ka thawhpuinu Mapuii leh Msa inzui ka hmuh chuan mak tih lutuk vangin ka phawk hra. Inchhung aţanga rawn inzui chhuak an nih hmel a, an inpawh hmel takzet. 

"Mapui, hetah eng nge i tih?" ka ti hluai a, hmuh ka inbeisei loh ber te zing a mi a ni. 

"Ka ni a dam lo a, an buai angreng sia ka riah pui a, in veng a ni tih ka hrereng. Hrilh che tum reng siin ka lo theihnghilh leh ţhin. Ka buai nghal char char a, phone khawihna hun takngial pawh ka nei lo" tiin a insawifiah zung zung. 

"A va zia lo ve. A dam lo tih pawh ka hre reng reng hleinem" tih pahin Msa ka melh zawk a, danglamna a lantir ve lo hrim hrim. 

"Chutianga na lutuk a ni lo a, ka pa in a ngaihtuah deuh mai mai mawle. Naktuk ka la awm ang a, thawhţan aţang chuan ka haw veleh tawh ang" ti a min hrilh lai chuan Msa pa in a rawn au a, "Lawk aw..lo la haw suh ka rawn chhuak leh ang. Ms i hmanhmawh viau chuan min ngaichang duh kher suh. Chanchin ka rawn hrilh dawn che nia" a ti zung zung a, a rawn chhuahna lamah bawk a tlan let leh. 

"Lo nghak rawh aw U Rebecca, inhnuai lam ka zuk endik lawk ang e" ti a chhuanlam siamin Gracy pawh a kal ve nal nal. Chanchin eng eng emaw a hre ve nual a, sawi duh kan neih a ring a ni maithei. 

Msa chuan min biak hmasak ka ring a mahse min hrengai lo ang mai a min kalpel in gate pawn hmun zau lai a car a dahna lam chu a pan daih a, ka hrilhhai angreng hle. Ka dinna ngai a ding reng bik lovin a kalna lamah chuan ka phei ve thuai a, car a a luh hma chiahin ka pawh hman. 

A hma chiah a ka din ve reng takah chuan "Eng nge?" a lo ti bung nghut a, a hmelah thinrimna emaw natna emaw hmuh tur a la awm chuang lo. Ka hmuh chhun chu a mit sen ram te leh a mitmeng dul ruih te, ka ngaihbel nge a damloh lai ang chiah khan a vun a la dáng ni maiin ka hria. Ţawngchhuah tum mah ila ka thei mai lo, ka hrawkah hian hnawh tu lian tak a awm ang mai a ni leh tawh. A la damlo reng aniang a tih thlengin ka ngaihtuah a, thil a ei ţha lo leh aniang tih te. En ran chungin aw ka thian kharh a, "I ţha em?" tiin ka zawt a, duh aiin ka aw a nem.

"Ka ţha lo lo ti la ila eng nge ni zel ang? Engtin nge i tih ang?" tiin cho deuhin min zawt let. 

Chhan dan ka hriat mai loh vangin hmui ka chip tlat. A ţhat loh thu min lo hrilh tehreng pawh ni se tih dan tur ka hre bik chuang tlat lo. Milim ang mai a ka din reng takah chuan car kawngkhar hawngin "Min buaipui tawh lovin i bialpa hnenah let leh zawk rawh" ti vawt raihin a ţhu lut nghal daih bawk. Car a tih nun lai chuan ka thlaphang takzet a, lehlamah thlanpheiin kawngkhar ka hawng rawk rawk a, ka ţhu lut ve nghal. 

"Eng thil nge i tih?" tiin min lo zawt a, mak a tih zia hre turin a hmel ka hmuh kher a ngai lo. Hma lam en ran chungin ka ţhu ngawi reng. 

"Chhuak rawh" ti leh nghut mahse chhang buai duh lovin ngawih ka chuh tlat. Ka chetdan aţang chuan engpawh sawi se ka kal dawn lo a ni tih hriattir ka tum. A beidawn hnuah "Ka hrilh lawk lo che angin sawi hlek suh. Min kalsan theihna hun ka siam sak che a, nakinah inchhir suh ang che" a ti a, a in lamah bawk min kalpui. Let leh ka tum vang a ni hauh lo. Ka inchei lo va, chhuah inring sa ran ka ni miah lo chungin ka zui tawp a, mahse let leh ka tum vang a ni lo. 

Inchhung a luh hnuah zau takin kawngkhar a hawng a, tim dai a pawn lam a ka la ding reng min hmuh chuan a nui suk. 

"Ngati nge? I rawn lut ngam leh si na nge? Rawn kal duh a ţan khawh tlat zawk inih kha" ti a min ţawng el vel hnuah "I rawn luh duh loh chuan kawngkhar ka khar dawn a nia" tiin min vau leh a, ka la tim deuh hlek na a khar a tum tak tak takah chuan hmanhmawh deuhin ka lut. 

Ţhutkhawmna pindan lam pan nghalin jacket pan te a hak chu a phelh a, ţhutthlengah a theh thla tawp a, a hnungah ka zui ve zel. Thil dang zawng chu en liam zel thei mah ila zu bur ka hmuh takah chuan ka meng kawk a, a dahna hma chiahah a ţhu zui zat bawk. In mai a tum ni a rinna ka neih hnu chuan a banah vuan vatin "Eng nge tih i tum a? Zu i in thei hleinem. I pum tan khan a ţha lo lehzual bik a, in tawh lo turin i intiam tawh hrim hrim bawk a" hriam hrak a ka tih lai a min melh dan chu hmuh a nuam lovin a hlauhawm lek lek. 

"Thutiam te chu bawhchhiat leh a thiang a, bawhchhiat ka thlang a nih hi. Min rawn ngaihven a ţul tawh lo. Ka bulah i hun khawhral tawh lovin min kalsan la i bialpa buaipui zawk rawh" tiin min hnar tum nawn leh mahse a kut a vuanin ka ţhut hnaih sauh. Let leh dawn lo mah ila ka ţhian a nihna angin a tan a ţha miah lo a ti tur chu ka khap thiang a ni lawm ni?

"I nun a thil thleng zawng zawng ka hriat pui vek lo che a, keimah vang a ni emaw Fiona leh a fapa vang emaw pawh ni se hetiang zawng chuan in sawisa suh. I ngeih loh zia hrechiang ber tu i nia, khap tu nei miah lo mahla zu hrim hrim hi khawih miah lo tur i ni zawk" ti a ka hrilh hnu chuan a kut lak let a tum a, ka lo vuan lui tlat. Mahse na fe in a phih let ta tho a, tihpalh tak meuhin zu bur chu a kutin a tauh a, na tak a tauh a ni bawk a chhuatah a tla keh chiang hle. Ka phu nasa lutuk chu ka ţe ţhat nghe nghe. A rimchhia in luak a chhuak nghal ut ut a, ka insum hram hram. 

"I ti dik chiah, in sawisak leh ka tum. I duh ang chiahin Fiona leh naupang enkawl uluk ngai bik ka chhuah luih tir a, naupangin ţap chung a min ngen lawm lawm lai khan khawngaihna nei lo ang maiin ka hnungchhawn. I duh ang vek a engkim ka tih hnuah i insawi loh dan ang chiahin i awm veleh thung a, i sawi anih chuan engkim ka ring vek zel. 'Kha zan' itih i sawi ve ziah sawi thui i duh ngai loh thleng khan i palzam thei tawh ah ka ngai a, dawt hlir min hrilhin infiam nan min hmang a, ka hnawhchhuah tak naupang kha damdawiin a awm mek thu ka hre lehzel a, dam deuh a ka awm theih i ring em ni?" a ti khur khur a, Fiona fapa chanchin chuan min ţhawngin hrehawm ka ti takzet. Msa rilru tur thlengin ka hrethiam, a chanchin ka sawi fo ţhin a, a thin a chhiain dawhthei loh viau chang te nei mahse thinlung ţha tak a nei thung. Hei vang tak hian zar buai reng tu Fiona pawh hnar tak tak thei lovin a bulah a awm tir reng, pa nei lo a fapa thlengin.

"Kal rawh" vin zetin a ti leh a, ţi dekin ka en reng a, a awmdanin ka thinlung a la khawih thleng pha hi a chhan ka hre bik lo. Hetiang a ka hmuh hian duh lo viau mah ila ka la na tho. Thinlung a vei leh amah tibuai tu hrang hrang a neih vangin amah leh amah a inhloh lek lek niin a lang. A kiang a awm tur a mamawh a, amah chauh a awm turin ka kalsan thei lo. 

Rimchhia ti viau mah ila muangchang a pan hnaiin a thil tih keh chhar turin ka ţhingţhi a, ka uak leh lek lek ţhin. Chhar zawh vat vat duhin ka chhar khawm sawk sawk a, ka fimkhur lo bawk a glass keh them chuan ka kut a at a, a thip zawk rualin thawm ka chhuah a, hmui ka hup leh vat. Msa chuan min rawn pan vatin ka bulah a rawn ţhu a, uar zet a thaw chhuak hakin a tho leh a, "Tah sawn va ţhu rawh" ti a min hrilhin sofa a kawk a, ka hmuh phak loh turah a kal liam zui a. 

Tih thinrim ka duh loh vangin ka kawr hmawr in ka kut pem lai chu ka tuam a, sofa ka pan leh hna hna. Bawm lian vak lo leh lapua kengin a rawn let leh a, thisen kai darh vel a hruk laiin lapaw dangin a pem lai a hup bet pah bawk. 

"Ngati nge min kalsan ve mai loh? Ngati nge hnawh kian che ka tum pawhin luhlul i chhuah luih zel?" ti a min zawt chungin ka kut a tuam pah mawlh mawlh a, barbie ka khalh ţhin laia a ke bung lek lek min tuam ţhat sak lai te kha mitthla ah a lang uar uar. 

"I ţha ngei em tih chian phawt ka duh" ka ti sep a, "I hmuh danah ka ţhat hmel vak lo tihna em ni?" tiin min lo zawt leh. 

"I ţha lo alawm. Engmah thukru bo lo la, zu hian inchiah nu suh. I rilru hahna a kiam phah dawn chuang lo. I vei zawng te kha dah chhuak vek la, tu emaw ti ti pui rawh" ti a ka hrilh hnu chuan "Tu nge ka sawipui ang?" a lo ti veleh. 

"I ţhiante i sawi pui thei a, i duh phawt chuan keipawh min sawipui thei" ka ti a, a ruk tak chuan ka inthlahrung ve takzet. A chhuah tir hnu lawkah Bawihtea hospital ah a awm lehzel nen, thiam lohna chin tam tak ka nei. 

"Nangmah maw ka sawi pui ang? In i chhuahsan dawn a i thusawi te kha i hre tawh lo em ni? Kei ni lovin Tommy i chhuah pui kha" a ti nghet charh a, puih a duh ring lo mah ila "Chupawh nise kan sawi dun thei tho alawm..ţhian angin" ka ti a, ţhian ka telh hram. Kal sawn lehin chhuat a hru fai a, engmah min sawi pui dawn lo emaw ka ti hman hial. Mahse a hmaa a tih ang bawk khan chhuatah ţhuin ka ţhut ve na sofa chu a ngheng leh a, "Eng nge sawi tur a min duh? Ka chhuah tir hnu a Bawihte damlo zui hian inthiam lohna min neih tir thu nge nangmah vang a ka tawrhna zawk? I thusawi ang a i awm ve leh theih tak si lohah chuan Bawihtea hruai leh turin min duh tihna em ni?" ti a min zawtin a rawn hawi let a "Chung ho chu em ni sawi tur a min duh?" a ti leh a, Bawihtea chungchangah chuan a chhungten an enkawl theih loh chhan Fiona zawh chian ve reng reng ka duh. Mi chhungkaw chanchin a nih tawh chuan Msa ka zawt chhuak thei dawn si lo va, thiam lohna tam tak ka neih ve vangin engkim zawh chian a ka theih ang ang a puih ve ka duh. Ka thil tum ruk chu thupin "Hruai luh leh i duh phawt chuan i duh ang tak chuan ti rawh. Kei min hrilh lovin anmahni hnenah hrilh la, an lo hel ve deuh anih pawhin thupha chawi la, enkawl i inhuam phawt chuan a puitlin thlengin enkawl rawh. I enkawl reng theihna tur anih phawt chuan Fiona hi nei law law la, chhungkaw pangai angin awm ve rawh u" ka ti a, ka sawi tur diktak ka sawi niin ka hria. 

"Chu chu i duh dan tak maw? Nang leh Tommy, kei leh Fiona. Kan vaiin engmah thleng lo angin kan awm ang a, chutiang chu a ni em?" ti a min zawh chuan inveng takin "Chutiang a ni lo. I ţhatna tur ka ngaihtuah vang zawk" ka lo ti vat. 

"Fiona hian ţhian bakin min en ngai lo, tun thlengin" ti a min hrilh chuan mak ka lo ti kher mai. Zar buai char char tu leh na tak a ka hliam chhan kha Fiona ngei a ni. 

"Ka puihna a mamawh vang chauhin ka inah ka awm tir ve a, hmangaih a nei. A fa neihna pa chiah hi mipa hmangaih a nei. Keipawh englai pawh a min luah khat ţhin tu hi Fiona a ni lo" a tih chuan ka thinlung hian ka awm hi a deng dawt dawt ni maiin ka hria. Ka hlau a, Fiona ni lo hmeichhe dang chu keimah ni turin ka duh. Rilru mumal lo tak ka pu reng mai hi a chhan sawi tur ka hre bik lo. 

"Kan pahnihin hmalam pan turin kan inpui tawn a, kei lo chu neih a nei lo. Bihruk bo daih tum ţhin mah ila a dimhmunin a zir lo zel a, ka pui leh nge nge ţhin. In anna tam tak kan nei a, min duh lo tu te kan hmangaih tlat. Englai pawh a min uap tu ka tih kha chuan a tlai tawh thu min hrilh a, duhthlanna a siam fel tawh. Tih danglam theih a awm tawh lo" a tih leh phei chuan hahthlak khawpin hrehawm ka ti tawh a, rem thei tawh lo mahse khawngaihna tam tak ka la nei. 

"Chutiang chuan ngai tawh lo la. A fa neihna pa chu a la hmangaih emaw iti niang. In anna in ngah phei chuan in in siam rem thei zawk ang a, in in mil phian thei zawk a sin. Ţhian in ni char char tawh a, hmangaihna a piang hma zawk ngawt ang chu" harsa ti tak chungin ka ti a, ka inthiam lohna a kiam theih takin ka ti a ni. 

"I awm a nawm theih nan hmeichhe dang nen min hmeh bel lui duh suh. Nuam lo ka ti zual zawk ang" a lo ti ve thung. 

Kan ngawih dun reng hnuah "Tommy-a hnenah kan chungchang hi ka hrilh vek tawh a" ka ti leh sep a, ka sawi uar ngam lo.

Hma lam hawi pahin muangchangin a bu nghat nghat a, "Eng nge a sawi? Ka chungah a thinrim viau lo maw?" tiin min zawt pah bawk.

"Dam deuhin a pawm thlap thei vek. Chip chiar tak chuan ka sawi lo. Kan inkawp nawn leh thu ka hrilh a, a rilru a nuam zan lo na a min rin thu a sawi a" ti a ka hrilh chuan "Awle" tih ringawtin min chhang. 

"In inkar boruak ka tih nawm loh phah a nih chuan ka tihpalh lutuk mahse dawt hrilh reng ka duh tawh lo a ni" ka ti a, "Ka hrethiam" a lo ti leh tawp. Sawi tur a van em vangin "Engtin nge i tih zel dawn? Fiona te nufa chungchang a nia ka tih?" ti a ka zawh leh chuan "Ka hre lo le. Hospital ah a awm a, ka ngaihsak lo thei dawn lo a, thil dang chu ka thlak danglam lo ang" tiin ţha deuhin min chhang a, min hmu thei lo mahse mit ko ka lo san ak.

"I hruai let dawn lo em ni? An mamawh che anih chuan hruai let leh mai la, i bulah chuan an thlamuang deuh ang chu" ka ti a, ka nawr a ni mah zawk.

"An duh lo ang" a ti leh tawp a, chiang takin hre kilh kelh lo mah ila naupang nen hian inzawmna nghet tak an nei niin ka hria a, ka ring nghet bur. Chutiang tur chuan a fa diktak a nih kher a ngai lo. Ka ţawngchhuah leh hmain ka phone a ri hlauh a, Tommy-a bawk a ni. 

"Ka kal tawh mai ang" tih leh thawh ka rual a, a hriat lai a chhang duh lovin phone chu ka ak ţha leh. 

"Zu lo in tawh miah suh. Hetiang sawi tur hian dikna ka nei lo tih ka hria, mahse engpawh ti la, ţha deuh a i tih zel theih ka beisei" tiin ka kalsan hmain ka hrilh a, tun ţumah pawh hian ka kal tur min dang lo. 

"Eng nge in an?" Tommy-a puihna in Fiona ka be pawp a, an nufa a hmu turin hospital ah ka kal vang vang. Hna a ka kal hmasak vangin a tlai leh ruai tawh. 

"Kan ţha tawh lutuk. Vawiin phei chu nidang aiin a harh zawk" Fiona chuan nui sangin min lo chhang a, a fapa lu ah a chul pah hliau hliau. 

"Eng nge na hrim hrim? In chanchin ka lo hre lawk lo a, pawi ka ti khawp mai" ti a zawh pahin Fiona bulah chuan ka ţhu ve a, Bawihtea kut a ka vawn lai chuan min lo nuih ve ver ver. Vawi hnih lai min hmu tawh a, present ka pek hnu phei kha chuan min nel ve tawh hle. 

"Pneumonia a nia, Bawihtea angah hi chuan a nasa duh bik a, chuvang chu a nia min admit leh. I rawnkal vang vang a a lawmawm lutuk, i buai dawn tehlul nen" tiin min lo hrilh a, midangin kan tu an neih sup sup laiin an nufa in an lo awm ve rek rek a, rilru an ti na duh takzet. 

"Hospital ah in lut zeuh zeuh tawh tihna em ni?" ka ti a, hriatchian ka chakin zawhna ka ngah khawp mai. 

"Aw a hrisel lo a, ka hrilh tawh ang che khan naupang dang aiin buaipui a ngai nasa zawk a, hospital ah hi chuan kan mikhual lo khawp mai" zawi te a nui chung hian a ti leh a, Bawihtea pawh a nu nui a hmuh chuan a lo nui veleh vur vur a, a lawmawm reuh kher mai. 

"Sangsang kha hei hi kan lo pe ve ang che" pa pakhat hian a rawn ti a, polythene a chhang leh frooti tih vel a dah khawm ruih chu kan ţhutna lamah a lek va a, naupang a pawm a, a naupang pawm lai chuan venflon a vuah va bawk.

"A ngai lo Pa Mawi...ei tur a nei ţeuh a, thil a la ei tam thei tak tak si lo va nangmah ni khan ei zawk rawh u" tiin Fiona chuan lo hnar a tum a, mahse pek a tum lui tlat tho. Hnar ngaihna a hriat tawh loh hnuah a thil pek chu lak pahin lawmthu a hrilh ta ringawt. 

"Msa leh i fapa hi an inpawh viau lo maw? A pian hlim aţangin em ni a awmpui che u?" tiin bul ka ţan a, hun in min nghak ve mang si lo va ka peh hel kual duah peih tawh lo. 

"Aw inpawh ve e. A pian ni khan Msa chiah ka kiangah a awm. Nurse ho tih lohah chuan Bawihtea pawm hmasaber tu a nia, an in ngaina lutuk. Kum a tlin hnu phei chuan Msa bulah char char a mu. Kei ai mahin a ngai zawk" a ti a, zep ţit ţet nei lo va ţha deuh a min chhang duh chu ka lawm ru angreng hle. 

"I chhungten an ngaihsak miah lo em ni?" ka lo ti leh a, ţhu kun lapin a kut ţang a kal niap niap a, sawi harsa a tih hmel khawp mai. 

"Keimah vangin an mualpho ngun em a, min ngaihsak lo mahse a áwm ve tho. Kohhranah rawngbawl tu an nia, an fanu neihchhun lahin mualphona ngawt ka thlen sak a, ka chhungte hi ka dem ngai lo hrim hrim" a ti a, dak chhuakin nui ver verin ka lam a rawn hawi a "Min duat teh lul nen awmdan ka thiam lo va, ka duh duhin ka awm a, an dawl zawh loh hnuah min ngaihsak duh lo a, mahse vuina ka nei lo. An tih tur tak an ti niin ka hria, ka insiamţhat phah miau a" tiin min hrilh zawm leh a, mak ka lo ti viau thung.

"Msa hnen a i chen ve hnuah pawh i chhungte chuan rawn hruai che an tum ngun a ni lo'm ni?" ka lo ti ha. Ka hriat hmasakber dan a ni miau a. Ka zawhna chuan a ti nui ve hak hak. 

"Chutiang chuan tu nge sawi?" tiin min zawt let a, Tommy-a hming sawi lang duh lovin "Mi sawi ka hriat a nia" tih ringawtin ka chhang. 

"Kan inchhung a ka awm lo kha an vaiin an lawm zawk vek ang. Bawihtea pian ni takngial pawh a lokal duh lo chuan min hruai let duhna an neih i ring em?" ti a min zawh chuan lu ka thing mawl tawp. 

"A piancham a chaw kan rawn ei khan an ngaihsak viau niin i sawi sia" ka lo ti leh khauh a, a nun hi kei ai mahin a hnawk zawk. 

"Ka u in present a rawn dah a, ka ute zingah pawh present rawh dah tu chiah khan min ngaihsak mahse a nupui a ngam lo va, min ngaihsakna a ti lang ngam lo. Ka nu in min ngaihsak bawk a, ka nu pawhin ka u ang thoin ka pa a ngam lo leh a, rei tak hnu a kan vawikhat inhmuh lehna a nia, a awlsam zawngin ka hrilh che anih kha. Nu te chuan fate engtin pawn awm se an thlauhthla ve mai mai thei ngai lo. Khami ni pawh khan rawnkal ve duh viau mahse dal tu a ngah em a ni" a ti a, a thawk a sakin hrehawm a ti a ni tih a hriat khawp mai.

"Eng thil chiah nge i tih? Engtin nge an en san hmak theih zawk che?" tiin ka lo zawt leh. An fanu leh farnu neihchhun ngaihsak miah lo va midang kut a an dah thei chu mak ka ti takzet. 

"Lokal rawh pawnah chhuak ang" a ti a, a fapa hriat laiin a sawi duh lo ah ngaiin ka tho tharh. Pa Mawia a tih kha ko in Bawihtea lo awmpui zawk turin a ngen a, Pa Mawia pawh a inhawngin kan chhuah hma hauhin a rawn thleng phei. 

"Canteen ah kal law law ang. Nang pawh i ril a ţam ang, Pa Mawia a awm tho a in eipuar ve lawk rawh" ti a sawmin canteen awmna lam ka zawt pah a, kan kal chhung zawng chuan kan inbe lo. A chhungah kan lut a, tlai lam anih tawh vangin mi an tam lo. Chuti chung chuan a kil ber kan chuh tho a, in hma tawn a ţhu ranin kan eiduh zawng kan hrilh a, ka zawhna ngai bawk kha ka zawt nawn leh. 

"Hman a ka mualpho vak kha i hre ve lo em ni?" tiin min zawt hmasa te te a, ka bo kher mai. 

"Hre nang, engti zawngin nge i mualpho?" ka lo ti ve thung. 

"Aizawlah i awm lo a i hre ve lo a nih dawn chu. College kan kal laiin a nia" a ti a, a ngawi ta daih a, hrechak viau mah ila "Sawi a hrehawm chuan sawi chhuak duh kher suh. Ka hrethiam vek che a nia" ka ti a, ka nawr lui duh lo. 

"Miin an hre vek tawh tho a, sawi hrehawm deuh mahse i hriat ve pawi tihna ka nei lo. Bakah keimah vangin Msa nen in buai fo tih ka hria a, keimah vang a buaina awm reng hi ka hne ve tawh hrim hrim" a ti a, kan thil chah an rawn dah a, an siam chhung a rei lo bawk a a dai duk mai. 

"Hmanah khan ka video bawlhhlawh tak a lar chiam tawh a, mipa hmel lang si lovin chiang zetin ka hmel a lang a, dem tu leh nuihzat tu ka ngah hle. Ka bialpa a nia, ka duh em vangin a duhzawng ang ka tihpui a, mahse min ti mualpho tu a ni ta zawk a" a ti sep sep a, a thu min hrilh chu rapthlak ka tiin ka chek tlak tlak. 

"Ka pa a thinrim em vangin ka nu in ka nutei te inah min awmtir a, mahse a fate an sualin na tak takin min ţawngkhum reng a, min hmusit a, an inlengte hnenah lah hlawh nei a min awmpui angin ka hriat lai ngeiin min sawi ţhin a, ka nin tawpah ka tlanchhuak a, Msa ka bel leh chawt a, ka mualpho dan engkim a hre ve vek a, mahse a ni chuan a sawichhuak ve reng ngai lo. Min fuih a, huaisen tak a hma lam ka pan theih nan min pui ţhin" tiin a chanchin min hrilh pahin Msa chu a fak a, "Ka mi rin em emin mualpho takin min siam a, nang pawh inveng uluk rawh. Kan hnaih a awm, min hmangaih tak tak tu ni a kan ngaih te hian min bumin min ti na duh chawk a nia" tiin min sawi ţhaih zui leh a, a sawi zawm leh mai dawn emaw ka tih laiin thil a ei leh daih a, ka ngaihţha lo chuan "Eng emaw hriat i nei em ni?" tiin ka zawt ta tawp.

CONT...