NANG CHAUH-9

NANG CHAUH-9

(Fiona leh Rebecca POV hi ka ti hrang zeuh zeuh dawn a, a tirah ka ziak zel dawn tho a hriatthiam theih zel tho ang aw)

FIONA

"Eng nge awmzia?" ka lo ti ha a, hriatthiam loh hmel tak angin awm mah ila engkim ka hrethiam. A chapona avang hian inpawm duh dawn miah lo mahse hlauhthawnna nasa tak a nei ve. 

"Ka chungchangah eng emaw hriat i nei em ni?" tiin min zawt a, chik zetin min en a, ka thil sawichhuah zeuh a ngai thutak leh lutuk chu ka khawngaih letling. Fimkhur tur a ka duh em vang a sawi ka ni. 

"Nei lo e...ka hriat tur âwm ang a awm em ni?" tiin ka lo zawt ve thung. Lu thin pahin "Awm lo" a ti sep a, tun thleng hian min ngainat theih miah loh chhan hi ka la hre lo. A ţul em vang leh loh theih loh thilah Msa hnaihah zel ka awm a, mahse Rebecca chungah hian rilru chhia ka la pu ngai lo. Tu chungah mah rilru chhia ka pu ngai lo ti ila a dik zawk ang. A chhe zawngin vawikhat lar ve hluai tawh mah ila ka rilru chhiat vang a ni lo. 

"I fa neihna pa hi Msa'n a hria em?" tiin min zawt leh a, "Aw hria e" tih chiahin ka chhang. A hriat mai bakah a haw takzet a, haw lo ang a a awm a ngai a, hre lo der mai turin ka hrilh ţhin bawk. Kha mihring ngei pawh khan tun thlengin Msa hian a hre ru kiau a ni tih a la hre miah lo ang. 

"Chuan engtin zel?" a lo ti leh a, a hrechak ngang ni tur a ni reilote pawh a nghak thei lo. 

"Khatiang a ka mualpho vak hnu leh ka nutei te in aţanga ka tlanchhuah hnu khan Msa ka bel chawt a, zirlai ve tho a nia, thawhchhuah a la nei bik lo. Inthlahrung dakin ka awm ţhin mahse amah khan nuam lo ka tih a hlau ţhin a, ka in ang chiah a ngai turin min hrilh fo mai. Ka inkhung bo reng hlauin huaisen tak a hmachhawn turin min hrilh ţhin a, a puihna vang liau liauin college ka zawm leh ngam. Ka hnaihah awmin min veng tlat a, ka rilru natna tur leh hrehawm ka tihna tur khawpin tuman min chhaih nawm nah ngai lo. Mipa tam takin min zah loh sawt a hlau a, kut thawh zawng a min fiam duh mai te an awm a hlauh em vangin min venhim kha a tih hmasak ber turah a ngai" ti a ka hrilhfiah dap dap lai chuan a hmel a dur khup khup. Thup tum viau mahse Msa nen a kan inhnaih ţhin thu hriat chu nuam a tih loh zia a lang reng. 

"Mahse i ngaihdan leh i rilru a awm ţhin ang kha engmah a thleng lo. Msa hi ka duh reng reng hleinem. Ka ţhian a nia, ka unaupa leh nu leh pa thlengin a ni kawp vek. Chubak thil dang a awm lo hrim hrim. Ka ti tak tak a nia" tiin ka thlamuan leh. Buaina ka tawk nasa em a, min hnaih lo thei lo dinhmunah a ding zawk a ni. 

"Chuta ţang chuan Msa hnenah i awm hlen ta tihna em ni?" ti a min zawh chuan ka chhan hmain lu ka thing vat.

"Teuh lo mai. Ka pa thinrim zual a reh hnuah kan inah ka let leh a, a hma ang chiahin kan chhungkuain hlim deuhin kan awm zui leh a, ka mualpho tawhna kha haiderin kan nui ho leh dar dar thei a, ka chhungte berin min pawm leh ta chu nuam ka ti hman viau mahse min hmangaih takzet tu ni a inchhal a rawn lang a" tiin za lo deuhin ka nui zui hak. Hmanni khan boruak ti nuam lo vek khawpin Msa nen khan awm leh lo se la chuan hetiang thil hi ka sawi chhuak miah lo ang. Mahse an inhriatthiam lohna ka sut kian sak theih takin tiin ka sawi zawm leh. 

"Ka lo duh mai bik lo va, rei tak ka lo hriat ţhan tawh anih vangin a huat turin awm lo mah ila aw ka pawh mai duh lo. In la hrang tlatin ka hnungchhawn lui a, mahse a beidawng duh lo. Min kherh ngat ngat a, ka mualpho vang a min khawngaih thu leh mipa dang ang a nih ve loh thu te a sawi cham chi ţhin a, ring tawp turin min hrilh ţhin. Thla tam fe chutianga a awm takah chuan ka nem ve ta nge nge a, ka ţhian ni ţhin kha ka bialpa a ni ta daih. A insawi rinawm thiam bawk a, ka hriat ţhan tak mi a lo ni bawk nen, ka ring leh bur tawh. Ka nu leh pa zahawm a tih thu sawiin a lo leng duh ngai lo va, Msa te inah kan inhmu ţhin. Msa nen pawh an inkawm ve bawrh bawrh zel a, kan pathum a zu in ho chang te kan nei" ka ti a, ka zu lo in ve zeuh tawh thu ka sawi lai chuan ka zak angreng hle. Ani a fihlimin ngaithei lo bur chi a lo ni bawk nen, mak tih hmel zetin min melh naa ngawih a chuh tlat thung. 

"MA ka zir tawh hnuah ka rai ta nge nge a, inrinhlelh na chang ka hre lawk lo lehnghal. Ka nu zawkin min ringhlel a, midang hriat loh a min zawh ruk a chin tak fo ah chuan tih fiah nan ka test ve a, ka lo rai ngei bawk. Min hmangaih takzet ni a ka hriat vangin hlauthawng viau mah ila thlamuanna chin ka nei. Mawhphurhna a lak ngam ka ring tlat a. Lehkha a zir ve tawh loh vangin Msa inah Msa awm loh laiin ka ko a, ka sawi tur ngaithla duh lawk lo va min mutpui leh mai a tum lai chuan ka lo hnar a, khami ţum a ka hnar kha ka ti fuh hle. A chhan chu a lawm ve ngei ringin ka rai thu ka hrilh a, mahse ti tla turin awlsam deuhin min hrilh" ka ti a, ka sawi zawng ringawt pawhin ka la tawt up up. Ka thaw chhuak hawk a, Rebecca-i tui thlit chhuah sa chu banin ka in khawlh khawlh. Ka in hmanhmawh bawk a ka khuh zui kharh kharh a, ka daih deuh hnuah "Ni tam tak chhung ka in ngaihtuah a, buaina nasa tak ka tawh leh phah ngei dawn a ni tih hre mah ila ka fa ngei anih vangin ka paih ngam hlawl lo. Ka pai tlang tur thu ka hrilh chuan a thin a ur takzet a, ka rilru put hmang sawi chak viau mah ila sawi ve na hun min siam sak lo va, min ţhen nghal hmiah bawk. Ka rilru a na in ka vai ruai reng a, bum ka awlsam lutuk kha ka inhaw hlur ţhin. Ani chuan hmangaih dang a lo nei reng a, a hming sawi lang miah lo tur leh naute chu keimah a enkawl turin min hrilh. Kum1 ai tam mah min hmangaih miah lovin min hmangaih tak ang siin a lo awm reng a nih chu" ka ti a, rapthlak ka la ti lutuk chu ka chek zui tlak tlak. 

"Rilru hah deuh chungin tumah hrilh ngam si lovin ka awm a, ka nu takngial pawh ka hrilh lo. Mahse inthup tum nasa viau mah ila ka pum a len zel takah chuan ka chhungte zawng zawngin an hrechhuak leh a, ka fa paina min zawt hmasa ber a, ka hrilh duh lo. Min hau nasa in kan upa ber chuan a thinrimna thunun zo lovin kut min thlak nghe nghe. Min sawisak nasat hmain ka nu in a lo dang bet ţang ţang a, midang zawng chuan min en tawp. Ka u ngeiin inchhung aţanga min nam chhuah rawk rawk lai pawhin ka pa in a lo dang miah lo. An inbengdaih hun nghakin lut leh ila chuan tuman kut min thlak zui lo ang a, min be duh lo mahse nasa zet zetin min hau tawh kher lo ang. Mahse keimah vang a an mualpho leh tur chu ngai ngam lovin Msa bawk ka pan leh. Ka inthlahrun em vangin lut mai ngam lovin kawngkhar bulah ka ding leh a, amah bawkin min hruai lut a, khami ni aţang khan ka awm ta reng" ti a ka hrilhfiah hnuah ka chawl leh det. Chik zetin min lo la melh ran a, insawi khawngaihthlak chawp tum ka ni lo va, a khawngaihna dawn duh kher lo mah ila min khawngaih leh khawngaih loh ka hre thei lo.

"Ka duh reng vang a awm chilh ka nih bik loh zia min hriat sak la, loh theih loh thil a ni zawk mah. Ka chhungte khan min rawn ngaihsak a, min rawn koh leh ka ring a, ka lo ngaichang reng ţhin. Mahse min rawn ngaihsak lo va, nau ka neih ni thlengin tumah an rawn lang lo. Msa bawkin engkim a buaipui a, nau ka neih lai pawh hian zirlai tho a la ni. Pawisa a neih bik vang leh a hausak vang a ni bik reng reng lo. A nei lo ru viau maithei a, ka hriat lohin a buai ru fo maithei. Mahse midang angin hmeichhe naupai awmna tur mumal nei lo kha a en liam mai mai thei ve lo. Nau ka neih ni pawh kha exam a neih dawn lai vel a ni a, chuti chung chuan min buaipui tho. Fapa ka nei a, naupang dang ang a ni lo. Naupang hrisel ţha pangai chu ni se tun thleng hian min pui kher lo maithei. Mahse ka fapa dinhmun a hria a, ka fapa thlengin min enkawl pui leh a, ka chung a a thil tih zawng zawng hi engtikah mah ka rul let seng kher lo vang. A tan a ka ţangkai ve theih dan ber ngaihtuahin rawng ka bawl a, inchhung ka ti fai a, a thawmhnaw ka suk sak a, inchhung a tih tur awm ka theih ang angin ka lo ti ve ţhin. Tunah chuan i lo let leh ta bawk a, ka tih ai i tihsak thei tawh ang a, beiseina sang tak nei ngam si lovin a nghak reng ţhin che niin ka hre ţhin reng a, a nghak chhuak ta che a nih hmel. Msa pawh a lawmpuiawm khawp mai" ka ti leh duah. Ka lawmpui zia tihlan nan ipik ru deuh chungin ka nui lui a, kan hriat lai ngei pawh a an inbiak duh danah khan fello eng emaw a la awm anih ringin ka sawi duh ngai loh ka hrilh ta vek a, hlim deuh a hmalam an pan dun theih ka beisei. An inkar a buaina thlen tu nih ka duh tawh lo a ni. Rebecca mai bakah Msa thlengin, an thiam loh a nih rualin an nat ve ve nachhan ah ka tel ve tho. Tin, keipawhin tum ruk ka nei ve a, hnawksak mai nih ai chuan harsa ti dawn mah ila ka thil tih tum hi tih ngei ngei ka duh. 

"Msa nen a kan inkarah engmah a awm tawh lo. I fa neihna pa chu a hming ka zawt kher lo vang che. Mahse a la rawn lang ţhin em? A fapa hi a rawn ngaihsak ve em?" tiin min lo zawt a, sawi kim viau a ka in ngaih tawh hnuah pawh hriat belh duh a la nei cheu. 

"A ruk chuan chanchin min rawn zawt ve ţhin. Sawi tawh ang khan Msa hnenah hian hre lo der hmak turin ka hrilh a, an inhmuh chang pawhin thinrim tak chungin pangai deuhin a awm lui ţhin. A hlimchhawnah khan harsa ti viau mah ila keipawhin a tihdan zirin ka hre lo der hmak a, inlaichinna nei ngai lo ang leh kan inkar a engmah thleng ngai miah lo angin ka awm. Mahse ka fapa nen hian inpawh tir ka duh lo va, Msa awm loh laia a a rawnkal tawp te anih loh chuan a chanchin pawh ka hrilh ngai lo. Ka ring tawh hlawl lo va, ngaihven áwm takin awm ve ţhin mahse a ţhat derna mai mai ah ka ngai a, inbum nawn tir leh ka tum tawh lo. Mipa hrim hrim rinna ka nei tawh lo a ni ber" ka ti a, tawi te a nuiin pawn lam ka thlir a, buaina neuh neuh ka neih reng hma, zalen tak a ka awm ţhin lai kha ka ngai vawng vawng ţhin. 

"In chanchin hi mi kâ aţangin ka lo hre ve ţhin a, in innei dawn tih thawm te a awm a, Msa hi i pasal ang a i sawi ţhin thu te" a tih lai chuan ka lo nui hak. Awih lo lutukin hmalam ka hawi leh a, a nuih a za ve hauh lo. 

"An rinthu an sawi ve mai mai a nih chu. Nupa emaw min ti fo a, thudik a nih loh phawt te chuan tiin mipa zawk chuan an ngawihsan thei mai zel. Mahse ka hrilh fiah thlap ţhin. Nupa kan nih loh thu ka sawi ţhin a, ka pasal ang a sawi lovin a unaunu ang a insawi chang ka ngah" ka ti a, a ner ru zeuh lai ka hmu a, min ring lo ni a ngaiin ka sawi zui duh lo. 

"In inţhen hnu lawkah Tommy-a nen in inkawp nghal mai sia, in inkawp nghet phian lehnghal a, inhmuhkhawmna inneih hma pawh khan in bazar dun lai kan hmu cheu a, i awih loh chuan Lalrinmawia kha i zawt thei ang. Ani kha kan inleng ber a nia, rawn pawh cheu ka duh viau na a Msa'n a phal tlat lo a, mahse eng nge in inţhen chhan ni reng reng?" tiin ka zawt ve thung. A mitmeng inthlak danglam nghal daih ka hmuh takah chuan ka zawt kher kher chu ka inchhir rum rum. 

"Msa nen a kan chanchin chu sawi lo teh ang" ti hmak mahse "Msa hian tun thlengin in inţhen chhan a la hre miah lo a nia" ka ti leh hram. Biak tlang theihin a awm lo a, a ti tau mai maiah ngaiin a be duh bik lo va, a lungawi hun a a rawn biak leh mai a ring a ni. An innghak tawn a, tlawm zawk nih an duh lo ve ve a, an inţhen hlen ta ni maiah ka ngai. 

"Kan pahnihin kan hre thung a lawm. Mahse sawi a ţul tawh lo. Awmzia a awm tawh dawn chuang lo va, kan vai a hmalam kan pan theih a ţha ber" a ti a, a ngaihna ka hre lo kher mai. 

"Kei hian in inţhen chhan ka hria maw?" tih hu pahin ka inkawk va a, a mitmeng a nem hran lo. Min thik ţhin ngei tih chu ka hria mahse chu ringawt chu inţhenna tham niin ka hre lo. Msa ka zawh lahin 'Nangmah vang a ni lo ang' a ti awlsam et zel sia, ka bo deuh hu mai. 

"Keimah vang em ni?" ka ti leh a, kal a rawt ta daih. Pawisa phawrh tum a bag chhung a zen lai chuan "I chapo lutuk anih kha" ka ti a, a thil tih lai a tawp chiang hle. Ka lam a rawn hawi veleh "Ka sawi theih a awm miah lo tih ka hria mahse i thu i duhin i hma i sial em a, in hlim thei lo a nih kha" ka lo ti leh a, thinrim hmel viau mahse min chhang let duh lovin hmui a chip tlat. 

"Shillong a i awm hnuah pawh in inbiak changin ka rawn fiam ve zuk zuk zel che a, Msa a rawn kal chang pawhin ngaihsak tur che in ka hrilh ţhin. I thil hmuh leh hriat te aiin i ngaihdan i dah lal zawk a, in inlaichinna kha i duh duh a kalpui i tum a, Msa hlimna tur i ngaihtuah ve ngai lo va, a buaina leh ka tihbuai dan zawng zawng te pawh hrilh ve ngamin i awm ngai lo. Ka hming a sawi hlekin i thinrim nghal hlur zel a, siamţhat tum inti ve mah la ka pawm ve chuang lo. I duh dan ang chiah a siamţhat i tum a, i hlimna chiah i ngaihtuah. A ţhiannu ka nihna angin a thlavang ka hauh ve a nih chu" ka ti ve salh salh a, amah hi ka haw lo mahse a awmdanah hian dik lo lai a tam. Msa hi a khawngaihthlak lutuk tlat. Kei phei chuan ka chanchin a hre vek tawh turah ka ngai a, tun thlengin a lo la hre lo a nih hmel. Msa'n a lo la hrilh miah lo tih ka hre chiah a, mahse demna pakhatmah ka nei lo. Inhawng deuh hlek se la chuan a hrilh daih tawh ang. A inhawng duh lo va, a ngaithla duh lo. A induhtawk lutuk na hian an pahnihin a ti na a nih ber hi. 

"A tlai tawh kal tawh ang. I fapa midang kutah i dah bawk sia, kha hei hian ka lo kan ang che" tih pahin pawisa min pek a tum a, kan inkan ţhinna tlangpui aiin a tam deuh. 

"Pawisa min pe dawn anih pawhin inkan na ang chauh min pe rawh. Lawmawm viau mahse a vai kha chuan ka la duh lo. I ngaih ang em emin ţanpui kan ngai lo a nia" ka ti a, ka thusawi te khan a ti thinrim nge a mitah khawngaihna a lang tawh lo. Min khawngaih takzet vang a min pe a ni lo. 

"Hei hi ka kan na cheu a nih hi. A ni lo zawngin la duh suh. Keipawhin retheihna ka paltlang tawh a, thlaphang deuh a awm hrehawm zia ka hria. A tlai tawh bawk sia ka lo va kal hmasa ang aw" tih leh thawh a rual a, pawisa min pek tum chu dawhkanah dahin min ngaichang zui duh lovin a kal nal nal. 

Kan thil ei man tur a dah tel chu chhuah pahin ka pe a, ward lamah muangchangin ka kal. Ka awm a tawt up up a, ka ţah a chhuak ut ut bawk. Ka kal pel tawh ni a ka ngaih te ka sawi chhuah leh vang a ni maithei. Hrehawm ka ti ve takzet ţhin a, mipa pahnih lai maiin hnehsawh tak a min bum kual mai mai theih vang te hian ka inhaw hlur ţhin. Ka nu ka ngai ngawih ngawih ţhin a, hun hi her let a bul ţan ţhat leh ka chak ţhin. Ka fapa chu awm lo se ka dam tawh kher lo ang. Vawi tam tak tih nawn tluk tluk ngai mahse ka nunna lak tumin ka bei char char tho ang. Mahse ka fapa hi kumkhua a tan em chuan ka kalsan thei lo. Ka hmangaih ang hian tuman an hmangaih ve thei lo ang. Harsa ti viau mah ila min entawn tu leh min ngaisang takzet tu ka neih tawh vang hian ka nung lui hram hram. 

"Ka pi hei i purse i thlauh a" ka hriat phak tur a tiin rei lo te hnuah purse min rawn pe a, amah pawh en lovin ka la mawl tawp a, ka kalna tur lamah ka kal leh mawp mawp. 

"Sangsanga nu kha i ni em?" ti a min zawh leh takah chuan ka sir a ka rual a kal ve zel chu ka en a, tun a ka fapa enkawl mek tu doctor a lo ni. 

"Aw ni e...ka lo hre reng reng hleinem che. Ka puar lutuk a ward lamah ka kal leh mawp mawp a" inthiamlo tak chung a ka tih bah nawk nawk lai te chuan fiamthu ka thawh emaw tih mai turin a lo nui hawk hawk. 

"A pawi reng reng lo. I thil thlauh ka hmu a ka rawn umzui mai mai che. Sangsanga chu ngaihtuah duh suh. Naupang hi rin aiin an chhel a, in ţha leh vat mai ang" tiin min thlamuan a, ka awmdan mumallo lutuk chu Bawihtea vangah a ngai a ni ngei ang. 

"A lawmawm hlauh a nih chu. Fate an damloh hi chuan thlaphan a awl em a, ţullo deuh deuh ka ngaihtuah leh chiam ţhin" tiin ka awmdan chu ka thup mawi veleh. 

"Ţullo deuh deuh lo ngaihtuah duh tawh suh. A zia awm chak khawp a nia" a ti a, ward luhna peng kan thlen nghal mai vangin "Zaninah tui deuhin in lo mu dawn nia aw" ti a min thlahin min kal pel zui a, private hospital a ni bawk a damlo an tam lutuk lo a, thawk rei deuh tawh ho chuan min hre tawh viau. Bawihtea damloh apianga kan pan ţhin a nia, tun ţumah pawh pawisa nei lo chung chungin kan pan leh. Mahse ka nu in a rukin min pe thei dawn a nih hmel. 

Bawihtea bulah chuan Pa Mawia lo awm  ve tawh lovin Msa zawk a lo awm a, an lo inchhaih nui leh nasa tawh. Khum bul a ţhutthleng seiah ţhuin Bawihtea kut a vuan tlat a, ngawi reng a kal pelin a bul chiah a kil lamah ka ţhu. A reh vung vung hnuah ni hnih chhung chu ni zawnin a rawnkal a, Bawihtea a hlim phah khawp mai.

"Engtin nge i rawn luh theih zawk? Inkan hun a ni tawh lo a ni lawm ni?" ti a zawh pahin a hmel ka en a, hmuh a nuam lem lo. A hma ni chiah a a lokal lai ang tho khan a mit a sen ram a, a chauh hmel takzet. 

"Puipuia'n min sawi pui a, ka lo awmpui rih ang che u" a ti liam satliah a, Bawihtea bawk a buaipui chhunzawm leh. 

"Dam vat vat rawh aw ka ngai tawh che" ti a hrilh pahin Bawihtea lu a chul thuak a, Bawihtea lah chuan nui vur vur chungin "Min ngai lo e a" a lo ti ve thuai. 

"Ngai tehreng mai, tunah pawh ka lokal vang vang hi" a tih hnuah "Vawiin eng nge in lo an?" tiin keimah zawk chu min zawt leh a, "A zia ve zel niin a lang. Chhuah thuai thuai a duh tawh a, venflon vuah reng hi a ning ve ţhin bawk sia" ka lo ti a, a sual a chhuah phei chuan a buaithlak chang a tam. 

"Tommy-a chanchin i hrilh tawh em?" tiin pangai takin min zawt leh a, chhang buai duh lovin lu ka thing mawl tawp. Kan chanchin ţha lam a ni emaw, chhe lam pawh ni se hriat a phu lo hrim hrim. A fapa pianchamah pawh a bialnu a rawn hruai ngat duh a, boruak chhia leh buaina dang ka duh tawh loh vangin ka en liam mai mai tawh. Amah nen a inhnial vel leh thil dang hrim hrim sawi dun leh ka duh tawh lo bur. Engkim a pangaiin a kal leh tawh a, mihring laktlak loh lutuk nun a inhnamhnawih leh ka duh tawh lo. Hre lo ang hmiahin awm ila, engmah thleng lo ang maiin en liam mai mai ila a tawk chiah. Keimahah hian nghawng a nei tawh loh zia thlengin hre ve rawh se. Rebecca nen an rawnkal dun te khan danglam viau turah min ngai maithei mahse min tih nat em vangin ka tawp hmak a, a nun phung engmahin min ti danglam zo tawh lo. Hmeichhia engzat pawh rawn hruai lut se ka engahmah a thawk tawh lo. A tawp khawk a thleng ve tawh a, ka khawngaihna ngen ngawih ngawih mahse ka let tawh lo vang. A hre lo emaw tiin Msa hnen a ka fa paina zawh te a ching a, tenawm lutuk. Lalrinmawia nen chiah an rawn leng lut ţhin a, ngaihdan a neih ve te a ring lo em maw ni. Min bum nasat hlawm em vangin mi mawl lutuk ah min ngai vek a nih hmel. A thil tih hi chuan a la vaw let ve khawp ang. Hmeichhe sual leh rapthlak kan sawi ţhin ai pawhin a sual daih zawk. Msa lah hian ka la hmangaih viau turah a ngai tlat a, hei vang hian a chanchin min zawt reng ţhin. Engkim haider mai tur a ka hrilh ţhin te hi Tommy-a ka hmangih lutuk vangah a ngai a, ka tan engmah a ni tawh der si lo. Ten hluah hluah chang ka ngah zawk. 

"Rebecca chanchin i la sawi leh miah lo a, eng nge in chanchin ni zel?" tiin ka lo zawt ve thung. Min hmu tur a a rawnkal kha chu ka sawi chhuak duh rih lo. 

"Eng ber nge ka sawi ang?" ti a min zawt letin a nui suk a, hlimna tak tak ka hmu tel chuang lo. 

"A rawn let em tih te? A ring thei tawh che em? tih te, a ţul chuan Tommy-a chungchang hi hrilh mai rawh" ka ti a, Rebecca hi chu ngaihdan nghet nei tlat chi a nia, sawh sawn tir a har khawp. Keipawh min haw lak lawh a, kan sawifiah dun dawn nia ti a kan biak dun paw'n ka aw a hriat tawh chuan engmah a ngaithla duh ngai lo a, a sawi pui tak tak theih loh. Msa paw'n "I hriat chian kha" a ti chiah reng bawk. 

"A awih lo ang" a ti leh nghut a, Tommy-a nen kum tam tak an inzui tawh a, a bei nghet viau tawh maithei. Msa nen a an chanchin sawi pui ka tum lahin a sawipui theih der loh. Hman ang tho khan a la in kharkhip tlat a, a ngaihdan reng reng dik berah a la ngai tlat. 

"Finfiah turin Bawihtea a awm reng alawm. Keimah ang chiah a a bum ve i phal em ni?" ka ti a, Tommy-a nen a an inkawp thu kan hriat hlim khan mak kan tiin a la na takzet. Lalrinmawia ka aţang ngei a kan hriat anih vangin awih loh chi a ni der si lo. Chanchin engkim ho te te thlengin a rawn thlen ţhin a, Msa pawh zawi zawiin a inla hrang ve zel. An tawp hlen tawh dawn emaw ka tih hnuah a buaipui leh chiam a, hma lam a la pan tak tak lo ni a a hriat vang a ni. 

"Nang angin Tommy-a a hmangaih ve lo" tih chauhin min chhang. He pa pawh hi a duh hun te ah lo chuan a sawipui theih der loh. 

"I neih let theihna tur a nih chuan bawh ve huam huam rawh. Engtin pawn lo ti che se tlawmah la lo la, in in ţhen chhan ber te sawi dun ula, a ţul leh ngaihdam i dil ang a, luhlul in chhuah dun reng chuan in na ve ve reng mai ang" tiin thurawn pe ve mah ila "Kan inţhen chhan ka hriat loh hi" a lo ti leh hluk. 

"I zawt dawn reng alawm. A sawi hma chu zawt nawn char char la, a nin tawpah a sawi mai ang. I zu in vang leh a lehkhazir chhung nghak lo va i mutthilhsan vang chu a ni thei lo chiang alawm" ti a ka hrilh leh hnuah ka ngaihtuah zui neuh neuh a, kha zan aţang kha chuan zu a in zui duh ta miah lo va, Msa berin a in loh chuan ka in lo ve mai bawk. Ngaihtuah chian poh leh hriatchian a chakawm telh telh. 

"Ka ngaihven tawh lo vang" a ti nghet charh a, "Engtin maw i tih? Beiseina i neih thar leh hnuah i beidawng lehnghal dawn em ni?" tiin ka lo zawt thuai. 

"Ka kham tawh" ti supin min rawn melh zawk a, Bawihtea mutchhuak chhing diar diar tawh chu a sam a chulsak lehin "School naupang kan nih laiin bul kan ţan a, school naupang kan nih lai vèkin kan tawp leh a, college kan kal hnuah bul kan ţan ţha leh a, kum3 a daih ţawk. Ka ţhi pek a la awrh reng ka hmuh khan hma lam a la pan tak tak lo ah ka ngai a, ka bawhzui leh. Mahse hnawl ka ni leh tho. Min ţhen chhan a sawipui theih bawk si loh. Ka tlawm tawk tawh viau" ti a min hrilh chuan ka awih lo rum rum. Khang kum liam ta chhung te khan beisei tur a awm miah lo chungin a beisei ru reng a, tunah an inhnaih leh ta cheng a, a beidawng leh hma hle si. 

"I pawh tlai lutuk a a pawi ngawt mai" ka lo ti ve tak na a Rebecca hi Aizawl a a awm nghehna a la rei lo ang. A chanchin hriat kan nei tlem a, Tommy-a nen a an chanchin kan hre tlut tlut a, thil dang kan hre mang lo. 

"Bawihtea chanchin hi Tommy-a hrilh i tum lo em ni?" tiin min zawt leh a, ka la hmangaih rengah a ngai ka tih tawh kha. A thinrimna te ti lang chhuak miah lo tur leh, bawihtea pa diktak hre miah lo ang a awm tur a ka tih te khan ka hmangaih vang a tihnat ka phal lo ang ah a ngai a, ka hriat laiin Tommy-a dik lohna a sawi ngai lo. 

"Hrilh ve a ţul lo, bialnu a nei a, sumdawnna lamah a buai a, an chhungkuaah neuh neuh a awm ve reng bawk si. Heta a rawnkal loh theih dan berin chhuanlam a siam leh duah tho ang a, hre ve lo law law se, rawn inrawlh buai lo law law se a ţha ber" ka lo ti hlak hlak. 

"I tih dan dan le" a ti ve ta nge nge a, an chungchangah bawk luhpui lehin "Tommy-an duh duh a a hruai kawi i remti hi mak ka la ti tho. Thudik hrilh la, finfiah thlap bawk se a ring mai dawn alawm" ngen ngawl zetin ka ti leh a, tlaiah khan Tommy-a hming ka sawi lang lo a, sawi lang chiah ila chu zawhna a tam dawn lutuk. Msa ngeiin hrilh se ka duh a ni. 

"Ka kham tawh ka tih kha. A ring laklawh tawh a, min haw let zawk ang" a ti tlat. In an na lai an ngah lutuk hi a pawi ber. An luhlulin rilru an siam fel tawh chuan tih luih theih an ni lo ve ve. 

"Finfiahna kengin keiman ka hmu mai ang. I thil min tihsak ka rulh letna che a ni mai. Duh leh kan thar thawh leh ang a, buai leh mah ila pawi ka ti lo. Ka hlimna turin thil tam tak i kalsan ve tho a, Tommy-a nen a buaina chhe te neih leh chu pawi ka ti lo" ka ti a, keimah ka nih phei chuan min ring lo zual maithei. Ka thu hrilh zawng zawng te kha a awih lo vek maithei bawk. Mahse min ring emaw ring lo pawh nise zep ţhen nei lo va hrilh vek tawh ka duh. Zawhna a ngah leh chhanna ka pe tam ang a ni mai. 

"Lo buai ve lovin Bawihtea hi enkawl la a tawk mai. Hrilhfiah leh mah ila ka tlai thu sawiin min hnawl leh tho ang. Kei chuan ka pan tawh lo ang" a ti nghet bur tawh. 

"In thu in duh emai. Ngaihdan nghet in nei tlat bawk sia, buaipui vak dan cheu ka hre lo. Hetiang zia in neih chhung chuan inkawp leh mah ula in hlim chuang lo vang" tiin ka ang hlak hlak.

"A tawp vek tawh, chhut buai duh tawh suh" a lo ti hmuk. 

"I hmangaih a a ni paw'n a la hmangaih che tih ka hria" tiin ka hrilh nawn leh tho a, Msa nen a kan chungchang ka sawi lai a a awmdanah khan tlem chu ka hmu ve thiam. Inţhen tawh mahse Msa hi a la dah bo tak tak bik lo niin ka hria. 

"Tommy-a a hmangaih lo tak tak a nih chuan ţhat chhuah lui tlat la, neih let leh tum ngei ngei rawh. Chutiang a i ti anih loh chuan damchhungin i inchhir tawh mai tur a sin. Hun ţha i nei leh mek a, bawh pelh bik reng reng suh. Rei tak hnuah in in tawng leh a, Pathian remruat a ni maithei a sin" ka ti a, a mut tlem zia tarlang tu a mit hnuai a chiang lo ruai a val kalh te chu hmuh hrehawm ka ti takzet. A ma tan a nung ngai lo lutuk a, a ţhiante ngei leh a hmangaih ber thlengin, kan ti buai ţhin takzet. Tunah chuan hlim ve tak tak tawh se ka ti. Hlimna tak tak nei lehin a ma tan nung ve tawh se la. Keini pawh min ngaihtuah lutuk tawh lo se la a ţha ber. 

"Bawihtea hi tlemin a changkang ve deuh tawh a, a naupan zual lai ang em em khan buaipui a ngai tawh lo bawk a ka nu te hnen a dah a phai lam a hnathawh tur zawn ka rilruk a, Bawihtea chauh chu tuman an sawisel lo ang. Kan nufa tan eng emaw tal ka tih a ngai" tiin ka thil tum ka hrilh a, "Pawisa ka tuak char char ang a, ka ngaihtuahawm loh veleh Bawihtea ka hruai ve ang tiin rilru ka siam a" ka tih zawm leh a, ka sawi tawh ang khan reitak hnuah inhmu in an inhnaih leh thei chauh a, an inkar ti zau a ti khi tu nih ka duh tawh lo a ni. 

CONT...