THROUGH THICK AND THIN-12

THROUGH THICK AND THIN-12

DIDIKI

"I hah tawh em?" ka bula a rawn ţhut chuan nui chungin lu ka thing a, bungrua an thiar char char a, khum an fit leh vek tawh bawk nen amah tak hi a hah tawh ang. 

"I hah tawh zawk ang. Khum fir ringawt pawh kha hahthlak tham tur a nia, ti hian ţhu hahdam ve rih rawh" ka lo tih chuan "Khum kha chu ka ti ve vak lo. Dinpuia leh Sawmtea ten an thiam hlauh a, an zo hma khawp mai" a ti na a a pui ve lai ka hmu ru reng. 

A darah ka kut pakhat dahin ka kut chungah ka khabe ka khat leh a, "Sam lah hi bei buk ve thei sia" tih pahin nui chungin a sam ka hui a, a beng a bengbeh ni awm tak lo bet va ka hmu ta chiah bawk. Cheh beh a nih leh nih loh hriat tumin a beng ka khawih a, a lo kaw tlang a, in lak hran pahin "I beng i verh vel elaw?" ka ti hluai a, zawhna ka zawh pah chuan a darah ka beng zeuh.

"Ka cousin in min tihsak a" a tih sup hnuah midang hmuh hlau zetin a sam a siam ţha zui mawlh mawlh. 

"Zanah ka met ang. Tukinah min meh sak a tum a, haw hunah law law ka tia" a ti leh a, buk lutuk a ni chuang lo bawk a inhmeh ka ti zawk daih mahse ka sawi chhuak duh lem lo. 

"Kim, Timothy hian beng a verh ngei a, in hmu tawh hlawm em?" ring ţha leng lawng hian ka ti ta zawk a, Kimkimi chuan rawn ensak ve in kan nui zui uar uar a, an chhaih tak sap sap ah chuan nui ruh ruh chungin a khup pahnihah a kiu a nghat a, zak angin awm lo mahse a lai ve deuhin ka hria. 

"Khum a awm tawh bawk a, reilote ţhu hahdam ve teh ang" ti a Afela khum a a ţhu chu a ri awk a, mihring thawm a ni. Ngaihţha lo zetin kan haw ţhap a, Fredy mu lai a ţhut bet ran. En lawk miah lovin a ţhu a nih hmel. Kan awm loh na lamah a ke a dah uai a, a pum leh awm bawr velah a ţhut a ni. 

"Tho vat rawh Afel" Kimkimi chuan a ti tuarh a, Afela makti hrilhhai chu thawh lawk nachang a hre bik lo, min ve hau a, Dinpuia'n a ban a a pawh hnuah muangchangin a tho ţual ţual. Khum a kan puan phah a par a, a tshirt hak lai a par ve tho si, a cher bawk nen hmuh mai a har ve bawk a ni. 

"A na em Bawiha?" Kimkimi chuan ti leh thuaiin Fredy mutna bulah chuan a ţhu a, keini ho pawh enchiang turin kan tho sap sap. Afela a thauin a rit angreng si a, tih luih ni miah lo mahse a ţhut nat palh kan hlau a ni. 

Kan din bial lai chu min en kual ralh ralh a, chumi hnuah Kimkimi kuai kunin a hrilh ru a, an unau chuan engmah an sawi lo. Kimkimi takngial pawhin ngawi rengin a nau chu dim takin a kai tho a, a thinrim emaw tiin ka hlauthawng hman hle. Midang pawhin ka rilru ang chiah an pu ve ţheuh ang. Pawn lamah an inkai chhuak a, enzui turin Lawmkima a kal vat. Rei vak lo hnuah nui tet tet chungin a rawn lut a, "Bathroom ah an lut" a ti sep. Lawmkima thusawi kan hriat hnu chuan kan thaw huai a, a nat leh nat loh hriat chian tumin ka chhuak veleh a, bathroom pawnah Kimkimi a lo ding reng a, min hmuh veleh a hmuiah a kut zungchal a dah a, lu a thing pah nawk nawk bawk. Kal hnai leh deuhin "A na lo maw?" tiin a beng bulah ka phun ser ser tho. 

"Na lo e. A ţhut rualin a pumin a pump a, a chhungah hian amahin a chingfel mek. Acid tui an siam chawp kha a lo hawp hnem ve bawk sia" a lo ti ve ser ser a, a hmui hupin ri si lovin a nui dir zui char char. 

"A kuaţha lo em ni?" ti a ka zawh leh chuan a nuihzat vang a ţawngchhuah harsa ti tak chung hian "Ka hre lo" ri mang lovin a ti a, chauh hmel deuh leh na nei ni awm tak a Kimkimi a hrilh ru lai te ka ngaihtuah let leh a, ka nuih a za kher mai. Lut rawh min ti ni awm takin Kimkimi chuan min nem nawk nawk a, keipawh a rawn chhuah hman hlauin hmanhmawh tawkin ka tlan lut. 

"A ţha em Fredy chu?" Afela ngaihţha lo chuan chanchin min lo zawt leh hram a, ka bu nghat nghat ringawt.

"Fimkhur tur che nia tlem a tlemah iti na lo chauh anih kha. A fel ve tehreng nen kan tir phar dawr dawr reng a" Siami chuan lungawi vak lo in a ti zui nang nang a, midang chuan kan sawi zawm lem lo. Bathroom a luh nghal chhan kan hrevekin a rinawm. 

An rawn luh leh hnu pawhin a inla hrang tlat tawh a, a ngawichawi lehzual a, biak nazawng a chhang lo bawk. Chaw eikham veleh Dinpuia'n an unauin a thlah ta ringawt a, amah pawh a haw tlang nghal aniang a lo let leh tawh lo. 

Rawn len leh vat tumin midang pawh an haw ve zel a, Timothy chiah a bang. Haw a la hmanhmawh lo bawk a kan tihfel zawh loh kan tifel dun a, lian vak lo mahse ka leng tawkin a nuam angreng reuh khawp mai. 

Suitcase te ber, a hranpa a keima lei ve ngat. Hman a a phur lutukin eng emaw a lei chiam ho ka dahţhatna hawn mai a tum chu rang zetin ka chhuh sak a, a ngaihna a hre lo kher mai. 

"Hei chu hawng suh thil pawimawh ka dahna anih hi" zam tak chungin ka ti a, ka hlauhthawn em vang chuan ngaihţha lo tih hriat zetin min en vang vang a, thawmhnaw min leisak ho, ka hak zawm duh miah loh te pawh a awm. Ka ti ri ral tawh emaw a ti ngei ang a, mahse a vaiin ka la dah ţha vek. 

"Eng thil pawimawh nge?" tiin min zawt ta ngei a, ka mit a min en reng vangin hawi sawn hmasa zawkah ka ţang. 

"Hmeichhe thil a nia, mipa in an khawih chuan a zahthlak ve a" ka ti nawi niai a, awih dawn miah lo mahse awih angin awm der se ka ti takzet. 

"I duhna takah va dah ţha rawh. Ka en lo ang" a tih takah chuan rang zet a thoin ka ngaihtuah chhuah theih hmasak ber khum hnuaiah ka hnawh lut rawk rawk. 

Lawmkima pher min kensak chhuat a kan phah mek chungah kan la ţhu dun a, kan hmaah lehkhabu la remfel loh ho a darh niai. Ka hlauhthawn em vangin thil dang tih nachang ka hre lawk lo va, ka ţhut ngaiin ka ţhu tlawk tlawk ringawt. 

"Bulţan ţhat leh ka duh" ţawng zawi viau mahse ka bengah chuan ring tak a dar inkhawng ang mai a ni. A thusawi chuan min ţhawng takzet. Thinlung tak a min ngaihdam theih pawh ka rin loh laiin bul ţan ţhat leh a duh thut a, ka mak tihna chu ka hmelah a lanchhuah hial ka ring. 

"Bul kan ţan ţha leh daih tawh alawm. Kan inhuat vak hnu a ţhian a kan insiam leh khan keichuan bul kan ţan ţha leh ah ka ngai" zam chung chung hian ka ti a, thil thleng tawh zawng zawngte kha chiang zetin a rawn inlar leh uar uar a, a sawi chhuah leh ka hlauh em vangin ka tha a khur ru der der a, boruak a uapin thawk thlengin a harsa. 

"Ţhian chauh ni lovin hman a kan awmdan ang khan" ti a min hrilh rual chuan a unaunu thusawi kha ka bengah a ri tel zel. 

"Ka nau hi a kum a la tlem a, thil a la ngaihtuah thiam tak tak lo va, college in kal ţan ve bek bek chauh a, thil tam tak in la tawng ang. Kan duh lo che a ni hauh lo mahse hmeichhia la ngaihven lo se kan duh a, naupang te chauh in la ni ve ve bawk a, inthlah har intih zel hmain inthlah tum ula, Pathian ruat innih chuan nakinah Pathianin remchang a siam sak leh mai ang che u" min ti anih kha. Thumal tin te kha chiang takin ka la chhinchhiah a, thiam ngei tumin zir vak vak lo mah ila tun thlengin ka la thiam nal hle. Min duh loh vang anih loh thu sawi mah sela khatiang thu min hrilh chhanah khan min duh loh vang bak puh tur ka hre lo. 

"Ka insit miah lo va, englai mahin ka in ngai hniam lo bawk. Mahse kei aia ţha an tam ang. Keichu ka ţha lo em a, ngaihven hlawh duh vanga ka ţhiannu ngei chung a ka thil tih pawh i hriat chian kha. I fel a, kei aia let tam tak a ţha neih rawh" ka ti a, za lo deuhin ka nui zui. 

Min rawn hnaihin ka kut a vuan a, ka kut khur ru der der te chu a hriat ka hlau kher mai. 

"Mihring chuan tihsual kan nei thei vek. Engtin paw'n lo awm tawh la pawi ka ti ve lem lo. Ka duhna che a bo thei lo va, bul ţan ţhat leh ka duh" a ti a, thu min pe a ang mah zawk. 

"Chapona i nei ve miah lo em maw ni? Ka tih retheih ţhin em che kha, ngaihdam theih miah loh tur thil ka ti bawk a, engtin nge min la duh reng theih zawk?" vin lek lekin ka ti a, tlawm zawk a ni zel hi ka khawngaih a, ka huat phah ţhin. 

"Ka chapona aiin i pawimawh zawk. Neih let leh theihna che anih phawt chuan ka chapona mai mai chu ka phum bo mai ang" nghet charhin a ti a, kan inţhen hnu khan ngaihzawng dang kan la nei leh lo ve ve a, ţhian a insiam leh tumin nasa takin kan bei ve ve bawk. 

"A hma ang bawk khan kan tawp leh ang tih a hlauhawm emai. Thil tam tak ngaihtuah a ngai a sin" ka tih hnu chuan ka chawl det a, a unaunu thusawi bawk kha a ni ka hriatchhuah leh tak ni. Thil ala ngaihtuah thiam tak tak lo a ti anih kha. 

"Kan ngaihtuahna a la tawi a, thui tak kan la thlir thiam lo. Kimkimi leh Dinpuia te ang kan ni ve lo va, anni chu engpawh tawk se Dinpuia a upa deuh tawh a, thil lo la awm tur te ngaihruat nachang a hria ang a, Kimkimi a puitling fak bawk a. Keini chu kan la puitling lo a, kan kum a inzat chiah bawk. Buaina ho te pawh hmachhawn thei lovin kan tawp leh mai ang" ka tih zawm leh a, min kal tir mai tum tawh loh hmel tak a ka kut a hmer nghet zual sauh te chu ka hre ru reng. 

"Tawpna siam tu ka ni lo va, thinrim viau mah ila thu tawp kha ka siam a ni lo. Puitlin lam kan pan mek a, min ring rawh. Bul kan ţan ţha leh anih chuan i hlatah ka awm lo vang" luhlul chhuah a min la hnial tlat vang chuan beidawngin ka thaw halh a, hmanah kha chuan inti pachang luiin hrehawm a tih theihna tur ţawngkam ka hmang reng ţhin a, mahse ţhat a chhuah lui zel a, ţhatnain min hneh zel a, zawi zawiin a lam ka hawi leh tawh a, min thlem char char se la chuan ka ţang rei thei dawn lo tih ka inhria. 

"Ngaihtuah thui a ngai ka tih tawh kha. Kimkimi chhungten Dinpuia an duh lo ang hian i chhungten min duh lo tlat ta se engtin nge i tih ang? Hman ang bawk khan hrehawm kan tuar leh dawn tihna em ni?" ka ti chhuak ta hial. A chhungte hian an duat em a, an in a kan kal chang te hian Timothy-a ţhiante kan nih chhung chuan tupawh min be ţha vek. Mahse a rukin a unaunu ngeiin inţhen turin min ti tho a, ka hlim lai tak lehnghalin. 

"Chutiang mi an ni lo. Chhungte lamah harsatna kan tawk lo vang" hriatchian hmel fahran a a tih chuan pangai tak a awm ka tum nasa hle. 

"An ni ka ti lo va, Kimkimi ngeiin chhungte vangin harsatna tam tak a tawk a, i ţhiannu ve tho a nia. Hetiang chiah hian i chhungte awm ve ta se engtin nge itih ang?" chiang zawkin ka zawt nawn leh. 

"Thuneihna an nei hleinem. Ka pa duh loh zawng a nia, buaina a awm lo vang" a ti nawn leh. A u khan apa thu hmu lovin khatiang thu kha ka hnenah a sawi a ni maithei mahse lo dawngsawng tu tan chuan a ngeiawm dan a ngai reng. 

"Ţhian kan nih hian nuam kan ti zawk daih. Inrem loh kan nei ve lo va, tun thlengin kan inţhianna siamţhat tumin kan la bei zel a, tih chhiat leh ka duh tawh lo" hreh tak chung a ka tih hnuah ka hmui petin hnuai lam ka bih a, ka tan a inpe zo em em leh midangin min sawisel luai luai lai pawh a ka thlavang hauh tlat ţhin tu sawmna hnar a, tih beidawn hi thil nuam a ni lo. 

"Nuam kan tihna hmun zawk kan hre ve ve. Min ring tur a ka tih che kha, ka kum chu engzat pawh ni se ka duh che chuan a tawk" a la ti zel a, beidawn a tum loh hmel takzet. 

"Mipa chuan thu tiam zung zung in awlsam a, bawhchhiat leh in awlsam bawk a, hmeichhe vanduai tak tak te zing a ka tel ve ka hlau a, college ka kal chhuak ve ţep tawh a, ka chhuah hma chu boruak dang engmah ka duh tawh lo"  tiin tlang rawtin ka hrilh a, amah aiin hrehawm ka ti zawk daih ang. 

"Ka nghak ang che. I inpeih hun hun ka nghak ang che. Ka rintlak zia i hmu mai ang" tumruh fe in a lo ti leh vat. A fel teh lul nen, a nun a min lo la lut kher kher hi a pawi ngawt mai. 

Lehkhabu chunga ka dah ka phone chu a nghawr det a, Fredy-a hming a chuang kalh. Message min lo thawn lehpek tawh aniang. Nitin zantin message min thawn reng a, min star zia a sawi reng ţhin. 

[U Didik..vawiin kha min duh loh phah lo ang tiraw? Ka hah miah lo a nia, U Afela kha a rit lutuk a] tih zawng a ni. Nui sak chungin Timothy ka en a, min rawn enpui lo bawk a zawhna min zawt ni awm takin a mitko a lo san ak. Boruak dang siam inbeiseiin Fredy khawngaih chung chungin phone chu a hmuh theih turin ka dah a, ka message dawn a hmu ve chiah chu a nui chhuak ta hawk a. A tirah ning viau mah ila tunah chuan ka lawm tawh. Ka tan chuan a la naupang deuh bawk nen a lawmawm takzet. 

"Vawiin chu tirh a nuam ka ti reng a ni" la nui ruh ruh chung hian a ti a, an in a kal tawh chuan kan hrevek ang. Naupang ber a nihna a lang ţhin a, anu leh paten an duat bawk nen, a ute ho hian an tir ngai mang lo va, an tirh ve chhunah pawh tirh kal a har. 

"Min rawn be ve reng mai ni. A peih rei dawn chuang lo va ka tia ka en liam tawp mai. Thil pek tur che ka nei a ti reng bawk a, keini aia kum khat lek a naupang pawh kan hmu naupang viau zel a, min han biak tak tak hi chuan nau awmah ka in ngai" ka ti fiamthu a, kan nui dun leh rih ţhin. Boruak a danglam ta chu ka lawm ru kher mai. 

Lehkhabu kan ti fel a, ka duh ho ka rem ţha a, Bible ka hmuh chuan ka thin a rim tlat. Paih tur zing a ka dah lai chuan ka rilru a nuam bik lo va, paih duh lawk lovin rei tak chhung chu ka keng reng. Mahse ka inti luhlul a, min pui ve ngai hlei lo chu tiin rilru nuam lo leh thlamuang lo ru tak chungin paih turah ka dah a, lehkhabu dangin a hliah vangin Timothy chuan paih turin a chawi chhuak a, Bible bik chu a rawn keng lut leh. Paih tur dang a len theih nan a hai a nih ka ring. 

"Hei i paih tel palh" ti a min hrilh chuan en mang lovin "Tihpalh a ni lo" ka lo ti liam satliah. 

"Bible hi maw?" a ti leh ngat. Tlemin a awki a san ve deuh bawk. Ka thil rem lai vuan reng chungin ka hawi let a, a lungawi loh hmel takzet. 

"Ni e. Ka paih a nih kha. Ngati nge? Lehkhabu dang pawh ka paih nual tho a" cho zet a melh ran chung hian ka ti a, ka duh lo a ka paih a ni mai. An ngaihpawimawh a an sawi reng hian rilru an ti nuam lo zual mai mai. 

"Lehkhabu dang ang a nih loh hi"

"Ka tan chuan lehkhabu dang ang tho anih kha. Ka nu min pai tir a nia, ka keu ngai chuang lo va, inchhung a zim bawk nen a hnawk mai mai" ti a ngaihsam zet a ka chhan hnuah ka lehkhabu remna lam bawk ka hawi leh. Ka banrehah vuanin min pawt dawrh a, ka inring hman lo bawk nen, ka ţe ţhat nghe nghe. 

"Bible anih hi. Keu ngai lo mah la i bulah tal dah ţhin rawh. Thlamuanna a pe ve miah lo che em ni?" a zawhna chhan nan muangchangin lu ka thing. 

"Beidawnna min siam zawk. Ka mamawh lo i duh leh nei rawh"

"Bible i mamawh lo maw? Eng angah nge i in ngaih a?" vin zet a a tih chuan ka lo nui hak. A duhin kawl se la duh lo in kan kawl lo ang a, tumah in nawr luih theih a ni lo. 

"I rui ţhin a, beng i verh a, tattoo i nei nual a, kohhran i bel lo a, Bible paih ka tum veleh mi fel ang ziazangin i awm leh a, i landan ringawt pawh khan i ngaihpawimawh thar em em Bible kha a kalh vek ang" ka ti salh salh a, Pathian nen a inzawm thei thil reng reng kan sawi anih chuan ka thinrim nghal ţun ţhin. 

"Fel ka inti lo. Ka landan pawh midangin min fak ka beisei ngai lo"

"A fel hmel e an ti lovang che. An hmuh rual che in 'a sual ve viau ang' an ti zel ang che" ka lo ti leh hmanhmawh. 

"Nia an ti ang. Mahse Bible ka ti duh dah ngam lo. Ka landan chu engpawh lo ni se, kohhran ka bel emaw bel lo emaw Bible paih ngam tur khawpin huaisenna ka nei ve lo. 'Ka rui tawh lo vang' ti a ka hrilh hnu che khan ka la rui leh miah lo bawk" ti a min hrilh hnuah Bible kawm a bal kai te chu a tuai fai a, ka lukham bulah a dah. 

"Ka duh lo ka tih te chuan kawl tur a min nawr luih tlat kher a ngai em ni? I paih ngam loh leh hawn la ni mai lawm" ka ti vin hlar a, ka thinrim tawt up up chu ka ţap lek lek tawh. Ka sawichhiat bawih bawih lahin a haw duh ngai der si lo. 

"A veng ang che. Fello mah ila ka thu awih rawh. Kristian ni lo te paw'n zah nachang an hria, i chhiar peih lo a i ring lo anih paw'n zah rawh" awki pangai tak hian a ti a, ka thinrim ţun reng thung. 

"Ngati nge i thinrim theih ngai miah loh a? I thinrim duh loh hian ka haw daih zawk che" vin fe hian ka ti leh a, ka darah vuanin khumah min nam ţhu a, ka hmaah a ţhingţhi zui zat. 

"I sual vang hrim hrim a ni lo tih ka hria lawm. I awmdan tur ka hriatthiampui che. Ka fel bik lo a, ka landan pawh mi nu leh pa te duh loh chi" a ti a, a nui hawk a, ka kut a vuan chungin "Mawi ka tih danin ka tia, ka chhungte phei chuan nang aiin min sawisel nasa daih zawk. Bible chungchangah kha chuan Bible hian ka bo thuk ber lai pawhin min thlamuan tho ţhin. Pathian ka ringhlel ngai lo va, ka biak tam loh pawhin min veng turin a awm reng tih ka hria. Nangpawh i hriat miah loh lai paw'n a veng che. Ka sawifiah thiam ve vak lo va, mahse Pathian sawisel a dem vak vak ţhin te hi a ruk tak chuan an rilru a nawm ka ring lo. Kristian chuan Pathianin min ven nasat zia kan hrevek a, chuvang chuan Bible hi chu zah hram hram rawh. Pathianin a hrem che chuan a na lutuk ang. Tun a i tawrh zawng zawng ai hian a na zawk ang" a ti ve duah. A ţawngtam loh tehlul nen. 

"Min veng se chu kan hrehawm reng nang. Ka nu leh paten tihtakzetin an au ţhin a, nitin chhungkua in kan ţawngţai a, mahse chhanna ka la hmu lo. Eng nge a chhan ni dawn?"

"Ka hre lo. I sawi tawh ang khan ka fel bik lo va, sawi thui vak dan ka thiam lo va, hriat ka neih tlem bakah ka hriat chhun pawh ka hrilhfiah thiam lo. Bible hi chhiar ţhin la, i zawhna tam tak chhanna i hmuh theih ka ring" a tih hnuah ka tukhumah dawmin min kuai kun a, dim tein ka chalah a fawp a, ka ip chawih a, ka taksa a ţang ţeuh bawk. 

"Zanin i muhil thei angem?" ti a min zawh chuan lu ka thing ne ne a, "Ka mut ngai loh naah ka mu dawn a, keimah chauh ka ni dawn bawk nen. Ka hlauh ber Lalawma a awm tawh loh vangin ka thlamuang na a zankhatna a ni bawk a ka muhil mang lovang" ka ti a, ka kawngah vuanin min melh ran a, min ngaihtuah zia ka hmu thei vek, ka hmu lo der mai mai zawk a ni. 

"Kimkimi sawm la, a riahpui theih che leh ka han lam lawk ang a" 

"Aa...a chhungten an phal lo vang" ka ti zuai raih a, Kimkimi chuan min riahpui thei se duhthusam. 

"Keiman ka han sawm lawk ang. Sual hmel min ti viau mahla Kimkimi nu leh pate chuan min ring a" a tih hnu chuan a nui suk a, a ding pah nghal bawk. 

"Engtin nge i sawi ang?"

"A hlau a ka ti ang" fiamthu bawkin min chhang. Phal hlauh se ka ti ngei mai. Kimkimi chu ka hrilh ngai miah loh hrilh tur tam tak ka nei. Ka ipik lutuk ţhin te pawh hi Pathianin min lak kian sak thei lo va, ka ţhiannu hnenah thlen ila ka thawl hawk zawk ang. 

"An phal theihna tur anih chuan engpawh sawi rawh. Mahse thlahrang chu nangman alawm hlau ber" melh ran chunga ka tih chuan a ţhen sak a, "Hlauh zawng te chu kan nei vek a" ban charh a a tih hnuah dawhkan a a bike chahbi dah a la a, Kimkimi hruai turin a kal zui a. 

Ka nghah chhung zawngin engmah ka ti thei lo. Ka inchhung tetakte ah chuan ka vei tawn sek a, chanchin min lo hrilh hun ngaichangin phone ka hum ran bawk. Darkar chanve ai tam mah ka nghah hnuah Kimkimi nu zawkin min rawn bia a, Dinpuia a awm leh awm loh min zawt a, a awm loh thuin ka lo chhang. Kimkimi nen a inbiak tir miah lo turin min hrilh a, chu erawh ka chhang tawh lo. Lokal an phal tak hnu chuan phur takin khum phah ka pawt mar a, lehkhabu ka rem zawh tak loh te pawh ka rem ţhat zawm zung zung. Keimah chiah a ka riak lo tur chu ka lawm kher mai. Sawi lang lo mah ila zingkar aţanga ka huphurh lawk a nia. Timothy-an Kimkimi chhungte dil nachang a hre hlauh chu ka lawm kher mai. 

An rawn thlen veleh Kimkimi chu phur zetin khumah a lawn kai a, nui ver ver chung a Timothy kawh va pahin "Guitar ka ken luih tir a, inthar lawm nan zai ang u. Dinpuia ka video call ang a lo ngaithla ve rawh se" a ti siam siam a, a hlim em vang chuan Timothy nen in enin kan nui ringawt. Ţhian ţha ngang an ni bawk a Timothy chuan Kimkimi duh ang chuan a tihsak a, Dinpuia pawh kan video call thlap. Ka chanchin an lo inhrilh tawn nge ka hre lo va, Pathian hla hlir an sa a, an pahnih zai Dinpuia nen kan ngaithla a ni ber. Bialpa te ngaihthlak tur meuh a a hla sak duh zawng chu mak ka ti a, inthar lawm nan a zai an ni bawk si, ka chanchin an inhrilh tawn tawh anih ka ring hmiah. 

An hla sak chu ka sawi sel a, "Ka inluah thar lawm nan" tiin hla dang ka thlang a, inngaihzawnna lam hla a nih vangin Timothy chuan min en leh zeuh ţhin a, kan in en fuh chang apiangin lai takin ka hawi sawn ţhin. 

Kan duhtawk meuh chuan Dinpuia chu a thawm hriat tur a awm ve tawh lo. A hmel kan hmu thei tawh lo va, a muhil tih hriain fiamthu thawn nan kan hmang zui a, Kimkimi te cake rawn ken a la awm bawk a thingpui te kan in leh. Ho te te sawiin kan ti ti a, pathum chiah ni mah ila kan hlim tlang dar dar hle. 

Timothy-a haw hnuah kan mu ve nghal daih a, kan riak dun thei chu nuam kan ti bawk a inkual chialin kan mu. Hmeichhe awmdun tih takah kan la nui har har reng a, ka chet zawng a ka lu bul a Bible ka sik apiangin ka thuruk vawn ţhat reng hi Kimkimi hrilh mai duhna ka nei ţhin a, nui nasa viau mah ila ka hah ruk em vangin ka thaw leh halh ţhin. 

Kimkimi kuah bet tlat chungin aw ka thian kharh a, huaisen inti ve viau mah ila tun ţum tak hi chuan ka huaisenna ka sawmkhawm ve nasa hle. 

"Kim hrilh tur che ka nei a" ka ti chhuak thei ţawk a, ka hrawk te thleng chuan hnawh tu awm ang mai a ni. Chuti khawp chuan ka sawichhuak hreh. 

"Eng thil nge? I sawi duh apiang sawi rawh. Ka lo ngaithla char char ang" inhawng takin a ti a, Kimkimi anih chhung chuan ka tan a inhawng reng dawn hrim hrim. 

"Timothy nen hian ţhian chauh kan ni lo va, kan inkarah thil tam tak a thleng tawh" ka ti a, ka insiamţha a, ka ţhiannu chu ka la kuah reng tho. 

"Eng thil nge thleng? In lo inngaizawng reng tihna maw?" a ti a, mak a tih hria hre turin a hmel ka hmuh kher a ngai lo. A mak tihna chu a aw ah a lang chhuak chiang hle. 

"Aw hriattir che u a duh viau na a keiman ka phal tlat lo va, in zing a tel hnuhnung ber ka ni bawk nen boruak dang thlen tu a min ngaih hlauin zep rih turin ka ti lui tlat a, kan awmkhawm ţhup laia min ngaihsakna a tih lan chang te hian ka duh lo hle ţhin. A rukin an inah ka leng fo a, a chhungte sawrkar hnathawk vek an ni bawk nen hmun dang a len ai chuan tiin an inah kan kal a, a thiam ang angin eitur min siam sak ţhin a, in lamah min ti hrehawmin tv takngial pawh ka en ngai lo tih a hria a, an in a kan kal chang chuan ka movie duhzawng apiang min enpui ţhin. Ka hrehawm zia a hriat belh zel a, min duat zual sauh a, min khawngaih ţhinna kha hmangaihnain a thlak thleng anih ka ring" ka ti a, ka hrilh hreh ber ka la hrilh chuang lo va, ka la tawt up up reng tho. 

"Anih loh paw'n a hmangaih vang chein a khawngaih phah che a ni ve thei tho. Lan dan hi intehna tur a ni lo va, Timothy chu a landanah hian fel hmel a pu vak lo va, awm ţha duh lo deuh a ang a mahse a fel lutuk. Ka hrilh tawh che kha, a rilru a ţha a, kan ţhian zingah chuan khawngaihna a ngah ber. Mahse mak ka la ti tho. In lo inngaizawng reng a, midangin hre lo se chu ka hrethiam. Keiman ka hre lo thei hi mak ka ti" a la ti tho a, min demna thu erawh a la chhak chhuak lo.

"A duat tehreng che nen ngati nge in in ţhen? Nge inla inkawp ţha reng? Hriatthiam in har sia" a tih zawm leh a, zawhna min zawt pah mawlh mawlh. 

"A duh loh dan deuhin ka awm a, ka ti thinrim takzet a, kut min thlak hman ţhelh a, a insum hman hlauh a, ka awmdan khan a zir lo va, ti suh a tih ngawih ngawih ka ti lui a, kut min thlak mahse ka dem miah lo vang" ka ti a, khami ni kha ka ngaihtuah let leh a, na a tiin min haw em em a, kut min thlak a tum uaih hman a, ka derthawn em vangin a insum thei hlauh. Chuti chung chuan min la ţhen chuang lo va, keimah zawk ka inla hrang a ni. 

"Ava mak ve. Timothy a thinrim ve ngei maw?" tiin nui hak hak chungin min zawt a, "Ngati nge? Mipa dang nen i kawp em ni?" ti a min zawh leh hnu chuan ka nui hul hak. 

"Aih...a phallo chung chung nau ka ti tla a" zawi tein ka ti sep a, ka rin lawk dan chiahin a reh zui vang vang.

CONT...