THROUGH THICK AND THIN-13

THROUGH THICK AND THIN-13

KIMKIMI

"A phal lo chung chung nau ka ti tla a" a thu min hrilh dang zawng zawng aiin he thu hian min deng na zawk. Thil dang paw'n min ţhawn tawh tehlul nen nau tih tlak chungchang kher hi chuan min ţhawng nasa lehzual bikin pawi ka ti takzet. 

"Nau iti tla maw? Timothy-a fa tihna em ni? Ngati nge chutiang i tih a?" ţawngkam dìm tak chungin zawhna ka zawt mawlh mawlh a, awki takngial pawh ka san lo. Ka thin a rim lo va, min ţhawng lutuk a rilru pangai ka pu thei hleithei lo a ni ber. 

"Ka la naupang lutuk a" ţah aw ţuau a tiin min kuah bet tlat a, "Ka zak a, ka hlau a, tumah ka hrilh ngam bawk si lo" a tih zawm leh a, a thaw a rangin a ţah a chhuak hle tih a hriat. 

"Keimah tal min hrilh lo a nih chu aw. Kan pahnihin tihdan tur kan zawng mai tur a nia, nausen pawisawi lo paih tawp ai chuan hum hram dan ngaihtuahin remchang awm apiang kan ban rawk rawk mai tur" ka ti vang vang a, kei aiin hrehawm a ti dawn tih ka hria a thinrimin engmah ka la sawi chuang lo. 

"Mumang ţha lo tak tak ka nei a, muhil ngam lovin zan tam ka tlaivar a, Timothy lahin thinrim vangin rei tak chhung min be duh lo va, ka dem miah lo, nau ka pai tih a hriat khan a hlim takzet a" ti a min hrilh hnuah a tho sawk sawk a, keipawh ka ţhuchhuak ve nghal. 

Khum hnuai aţanga suitcase lian vak lo phawrh chhuakin a uluk takin a hrufai a, khuma a rawn dah hnu chuan bang nghengin insi rialin kan ţhu a, Didiki chuan suitcase chu a pawm tlat. 

"Eng nge a chhungah khan i dah?" ka lo ti a, thil hlu tak chu a ni phawt ang. 

A malchungah suitcase nghatin suitcase chungah a kiu a nghat veleh chhawng a, a kut a a biang dawm lehin min rawn en a, tawi leh derthawng takin a nui a, a nui hmel a ral leh hma kher mai. 

"Nang ka hriat hnu che khan Timothy leh kan ţhian dang te hi ka hre ve chauh a, chuvang chuan ka pawh ber che. Timothy nen hian in in thleng a a inhnaih vang hian ka hmu ngun zual cheu a, a tir chuan midang ka kawm ang tho hian ka kawm ve. Ka ngaina a, fel ka tiin kawm nuam ka ti ţhin. Tlai khat chu kan veng a lokal remchan em vangin kan in a rawn zawng chhuak a, ka nutei lah mi mitmei veng miah lo chi a ni bawk nen, Timothy leh a ţhianpa awm laiin nasa takin min hau a, an lokal thut vangin ka lo be luam a, ka nutei bai chhuan ka lo vil theihnghilh a ni. Min hau chiam chiam a, an ţhian dunin an en tawp a, khami ni khan an haw tur ka thlah laiin a rual a haw ve daih turin min sawm" a ti a, a nui hul hak a, keipawh chau deuhin ka lo nui ve. Ka nuih a za hleithei lo a ni ber. 

"School naupang chiah kan la nia, a hmuh lai ngei a ka nutei'n min hauh hnu kha chuan nitin eitur min rawn ken a, nangni chuan lei thei vek mah ula min pek bik chuan in thik ang tih hlauin a rukin min pe ţhin a, ka bag ah min pawt ding a, zipper hawngin min kensak ang ang a thun rawk rawk ţhin" ti a min hrilh zo chu a hmai tuaiin a insut hruih a, a ngaihtuah let a ni ngei ang. 

"Naupangte mah ni ila min ngaihsak theih em vangin zawi zawiin duhna a piang a, ţum khat tlai deuh a kan lo thlen ve ve ni kha, i hre tawh lo maithei. Ka nutein min tir kawi a, ka tlai phah a, a ni lahin min lo nghak ve reng bawk a, Sir Biaka mood fuh loh ni a lo ni kher kher bawk nen, chhan dang awm miah lovin kan tlai vang ringawtin class kawtah min ţhingţhit tir a, khatia kan ţhingţhit lai kher khan min duh thu a sawi a, a bialnu ni turin min sawm" a ti leh a, mittui tling pam chungin a nui zui hak hak. 

"Kan inzui chho a, ka awmna te chhungkaw chanchin leh min tih duhdah zia te, Lalawma chanchin thleng a a hriat hnu phei kha chuan ka patea te in aţanga min hruai chhuah hlen theih dan tur ringawt a zawng a, a la naupan ve tho vangin min ngaihtuah viau mahse tih ngaihna vak a hre bik lo. Zan rei tak tak thleng kan inbulah a ţhu a, Lalawma leng haw a hmuh veleh min rawn hrilh vat ţhin. Lalawma khan a duh ang zan a min khawih theih a hlau ber a, min veng chawt a ni ber. Khatih hunlai kha chuan ka him a, muttui loh lai ka nei ngai lo" a ti leh dap dap a, a mitmeng a ngui ruai a, chhel viau mahse hun liam ta te kha a ngai ve niin a lang. 

"An inah kan kal fo ka tih tawh kha. College kan kal hnu phei kha chuan kan kal ngun lehzual a, a chhungte an awm ngai si lo, induh tawn ta na na na chu kan chesual fo a, a thik thu a chhe tial tial a, mipa dang ka be tam lo viau chungin mipa dang vang a inhauh chang kan ngah. A ta a min siam ngheh a tum tlat a, kan chetsual fo hnu chuan kan fimkhur reng seng bik lo a, ka period hun pangai a ka period loh khan ka inringhlel nghal. Thil ka ei tui lo va, ka ei ve paw'n ka luak chhuak leh zel. Ka chelin ka dawl dâng a, i ngaihţhat loh ţhin zia te nen lam khan ka la hre vek. Ka hrilh ngam si lo che a, keimahin ka tuar tlawk tlawk a, ka mangan tawpah Timothy ka hrilh a, ti tla tur a min tih ka rin rilruk nen ka rai thu a hre chiah kha a hlim lutuk, i awih lo zawk ang" a tih pahin min rawn en a, "A ta chiah ka ni tawhah a ngai a, ka patea te in aţangin ka chhuah phah thei turah a ngai a, college kal ţan tir chiah ni mah ila kan inneih theih a ring a, a fa ngei ka pai kha a hlim takzet" zawi tein a phun sep sep a, a ţawng zawih em vangin ka ngaithla uluk hle. 

Suitcase a hawng a, thawmhnaw tereuh te te a lo dah far a, min rawn en lehin "A phur lutukin a lei vek anih hi. Bazar kan kal dun a, ka thil tur min leisak rualin naute thawmhnaw a hmuh khan a pel thei hlawl lo. Pawisa a nei tam bik lo chung khan a neih ang angin a lei a" a ti sep sep a, a en ngai a en tlawk tlawk lai chuan a biangah mittui a luang ngiai ngiai a, mit a khap lo va, a hmui a pet fan fan a, hetianga derthawng hian Didiki hi a la awm ngai lo va, a hrehawm ber lai pawhin hetiang hian a tawrhna a la lantir ngai lo. Kehchhe vek tawh leh beiseina pakhatmah nei tawh lo a ang ber. 

"Nih chuan ngati nge i tih? Timothy ber a inhuam a, mawhphurhna a la ngam a, a phur em vangin i rai thu a hriat veleh thawmhnaw thlengin a leisak nghal a, a fa tan pa ţha nih a inhuam a, neih che a inhuam bawk a, ngati nge i fa ngei chu i paih ţalh?" ka ti hmarh hmarh a, ka ţhiannu mah ni se ka dem ve lek lek a ni.

"Ka hlau" a ti leh sep a, min la en chuang lo. 

"Engkim ka hlau vek. Ka nu leh pate'n beiseina sang tak nen Aizawl a lehkhazir turin min dah a, ka rai thu an hriat hun a an awmdan tur ka ngaihtuahin ka hlau a, ka nutei min hmuhsit dan tur zia ka hmu tlang vek a, chuvang chuan ka hlau bawk. Mipa, nupui nei hma lutuk tlangval kham tak tak si lo, nupui neih hnu a lerh leh tam tak an awm tih ka hriatin ka hlau a, mihring pangai reng theih lohna hian hlauhna nasa tak min siam a ni. A chhungten an hriat hunah buaina nasa zawk siamin mualpho tak a ka awm hnuah nei thei lovin ka awm leh tho si ang tih ka hlau a, naute pa ber ka hmuh phak lohah an dah bo daih mai ang tih te ka hlau a, a u in Timothy thlah tur a min hrilh hnu phei kha chuan ka hlau lehzual" a tih hnuah muangchangin min rawn en a, lu thin ne ne pahin "Min ngaih ang em em hian ka huaisen bik lo. Hlauh ka ngah lutuk" a ti zui sep. 

"A u chuan eng nge a sawi? Tu a u zawk nge?" ka lo ti leh a, chhungte inrawlh ve sek hi ka duh loh zawng tak a ni. 

"An upa ber kha" a ti a, a thusawi a sawi chhawng zui a, nau pai rilru hah lai a ni dawn bawk nen, hlauh a ngah em em chu ka dem hran lo. 

"Timothy hnenah a u tih dan che chu i hrilh em?" ti a ka zawh leh chuan harsa tih hmel zet hian a thaw chhuak hawk a, "Hrilh lo. Unau inhmangaihna hi a nasa a, ka hrilh duh lo. Chan chhe zawk leh thlauh thlak zawk ka nih ka hlau leh tho. Nau ka tih tlak tur thu chiah ka sawi" ti a min hrilh hnu chuan a hmui hupin a kun zui daih a, a hnungah ka chul a, tih theih ka nei lo lutuk hi ka inhaw ţhin. 

Insut hraih chungin a rawn dak chhuak leh a, a rim leh hnar a sen ram tawh. 

"Min dan a tum nasa, ka kalna apiangah min zui a, ti tla lo turin min ngen ţang ţang a, thu tam tak tiamin min thlem nasa. Mahse luhluk ka chhuah a, ka mit ti del luiin ka beng ka chhu ngawng tlat a, remchang ka hmuh veleh kan ţhenawm nula puihna in ka ti tla a, ka rilru a nain chaw ka ei theih loh chhunzawm zel a, hmuh theih khawpin ka cher chak. Ka ding ţawk ţawk a ni ber. Nau ka tih tlak aţanga ni hnih hnu velah ka hrilh a, a thinrim lutuk khan kut min thlak a tum a, lo indang turin chakna ka nei lo. Nghet takin mit ka chhing a, kut min thlak vanga ka taksa a na a lo thlen hun ka ngaichang tawp. Ka awmdan chu a hmuhin kutthlak chi ka ni lovin a hria aniang min kuah ta zawk a, mahse rei min kuah lo, min kalsan chiah khan ka ruak huai a, hrehawm ka ti ve miah lo ah a ngai a, hrehawm ka tihzia erawh ka sawifiah thiam lo" a sawi zawh chuan naute kawr tur a an lei lawk pakhat chu a la kang a, Didiki mah ni se a mittui a dang thei bik lo. 

"Inthiam lo reng rengin hun ka hmang a, Timothy-an min hlat a, ka dinhmun hre tu awmchhun anih miau vangin ngaihsak tu dang ka nei lo. In zingah tel ve reng mah ila ka hrilh ngam lo cheu a, keimah a tawrh ka thlang a, Timothy lak a ka rilru put ţhin dan thlak thleng tumin ka bei a, rilru ngai ka put reng chuan ka tuar rei lutuk dawnin ka inhria a ni. Min ngaihsak tak ţhin tu kha sawisa zuiin rethei takin ka siam zui a, chuti chung chuan ka inthiam lohna a reh thei chuang lo. Chhungkaw khawsak pangai ni ve ila chuan min nei dawn lo mahse ka pai tlang em em ang, ka fa ngei paih kha ka duh dan a ni bik lo. Naupang dang te hi ka thlir vang vang ţhin a, 'ka fa kha dam se chuan' tih hi ka ngaihtuah hmasak ber a ni ţhin" ti a min hrilh leh hnuah a kawr ken laiin a hmai a hup a, a ţap a ni tih hre mah ila hnem ngaihna ka hre lo. 'A ţha leh vek mai ang' ti dawn ila ţha leh vek tur a awm chuang der si lo. A ri a ţah hreh viau mahse a natna a thup tlat a sawichhuah takah chuan na thar lehin a ţah a chhuah em vangin thawm a chhuah tho a, a zah hlauin ka haider. 

"A hrehawm ngawt ang. La tawng ve lo mah ila hmeichhia ka nihna angin ka hriatthiampui che. Ţawngţai ţhin la, Pathian duh loh zawng itih miau vangin thupha chawi la, chakna dil tel bawk la, Pathianin tun aia chakna nasa zawk hi a pe ang che" ka tih chuan rang zet rawn hawichhuakin thip zetin min melh a, "Pathian kha sawi ve ziah suh. Midang tan chuan a awm tih ka hria, mahse ka tan a awm ve lo va, rinna pakhatmah ka nei lo. Min tih thinrim iduh loh chuan Pathian hming lam tawh suh. I duh chuan ngawi rengin ţawngţai mai rawh" thinrim lutuk vang a sehchilh rap rap hian a ti a, a che hrut a, lukham bula a Bible dah chu chhuatah hnawl thlain a mu a, puanin a inkhuh zui a, ka rilru a na kher mai. 

Muangchang a suitcase ka khar phui laia ka mittui tla chu a hriat hlau takin ka hru hul vat vat a, a dahna ngaiah dah lehin chhuat a Bible let reng chu ka chhar bawk. Timothy khan tlem te chu min hrilh tawh a, a ni pawh a rilru a nat ve hmel hle. 

Kimkimi bulah muin ka kuah a, a muhil lo tih hre mah ila a che tawh lo hrim hrim. A khat tawkin a insut leh hraih ţhin a, Timothy-a nun mumal lo thut kha heng vang hi a ni ngei ang. A mit ko a verh te khan sawiselin a tihchhan ka zawt a, chhanna mumal min pe lovin a nui liam mai a, tattoo chhut a ching ţan a, ka sawisel zel. A tihchhan ka zawh apiangin 'a nalh' tih bak chhanna ka dawng ngai lo. Vawikhat chhut mai duhtawk lovin a uar zel a, a ban a ziak rang fur tawh a, a nghawngah pawh tlem chu a tih tir leh tawh. Vawiinah a beng a verh tih kan hre leh a, a lungngaihna tih reh a tum dan a ni maithei a, a lan chhuahtir dan a ni maithei bawk. Nidang ang anih phak lohna te leh a tlak hniamna leh nguina te thleng a a lantir ve dan a ni maithei a, a do let tum dan a ni maithei a, kan hriat tur a lanchhuahtir a tum dan a ni maithei bawk. Timothy hi ka hrechiang a, a duh tawh chu a duh bur ţhin. 

"Nakinah intan hun remchang a awm leh mai ang. Inzawmna thuk tak innei tawh a, nau hial i pai tawh a, Timothy paw'n engtikahmah a theihnghilh tawh lo vang che" ka ti a, engkim min hrilh takah chuan vawiin a an awmdan leh an inmelh dan te kha ka chhui let a, a la tawp tak tak lo niin ka hria. Fel bik miah lo mah ila ţawngţaipui mai loh chu tih theih ka nei lo. 

Zing a ka harh chuan ka bulah Didiki a lo mu ve tawh lo va, sana ka en vat. Dar7 a ri tawh a, chawlhni a ni bawk nen ka haw vat loh chuan ka nu te ngaihdan a ni lo leh dawn a, min mamawh hunlai tak a ni bawk nen ka haw san hreh khawp mai. 

Khum aţanga ka chhuk rualin kawngkapui aţangin a lo lut ve chiah a, towel a keng a, inphih fai tawh mahse a la bui luk tho. 

"Va inphih harh ve rawh thingpui ka lo lum ang" tih pahin towel min pe a, kan mut har deuh vangin ka rit luk a, hmai phih turin bathroom ka pan ve vat. Chaw ei pui leh duh viau mah ila ka chhungte an khirh ve bawk si a, tun dinhmunah ngat phei chuan engahmah ka nawr lui ngam rih lo. Ka luhai deuh bur reng chu tawrh a hrehawm lek lek vangin lu ka su nghal a, bathroom aţanga ka chhuah meuh chuan Timothy a lo awm vang tawh. Didiki'n thingpui a lo siam mek a, ka rei ringin a lum hma duh lo anih hmel. 

"Tho chiah ni maw?" nui vur vur chungin Timothy chu ka fiam a, a sam a tuai thuak a, a la met chuang lo a ang. 

"Anu in chawhmeh a rawn dah tir anih kha" kan lam rawn hawi pahin Didiki zawk chuan min chhang a, Timothy hnenah "Thingpui i duh ve em?" tiin a zawt lehnghal zat. 

"Aih..duh lo mai ang" a tih laiin keichuan a thil rawn ken ho ka lo en daih a, nizan a a thu min hrilh ka hrechhuak lo thei lo va, anu in sa leh thlai leh tel te, chi hrang hrang a rawn ken tir nual a, ka chhungte ang chu nise eng thil mah an pe lo vang. An inthlah hlen tawh a, ţhian chauh anni tak tak tawhah an ngai nge U Marie chiahin Didiki hi a duh lo zawk? Timothy-a nu leh pa te hi mi fel tak an ni a, an piangthar ţhain an nunah a lang chhuak tel a, an bul a awm a nuamin a thlamuanthlak. Didiki te chhungkua hi rethei viau mahse an fapa in a duh phawt chuan an duh em em ang. U Marie chiahin a rukin a duh lo anih ka ring a, a chhungte hnenah a sawichhuak ngam kher lo maithei. 

"Inu chu a va ti ţha ve, nachang kan lo hre miah lo a, ngaihtuah chhuah nachang a hre hlauh chu a tih zia hle mai. Kan haw rual dawn nge hetah chaw i ei ve dawn?" ti a ka zawh lai chuan Didiki'n awmze nei zetin min lo melh ralh a, "Chawhmeh i rawn ken sak ţeuh sia, i ei ve nghal dawn anih ka ring ngawt a, keichu ka chhungten an phal dawn lo va, ke in ka haw thei tho a, Tetea pawh ka phone thei tho" ka ti kual leh vel a, ruah a tla cherh cherh reng a, ke a haw chuan ka huh nasa hman maithei. 

"Thingpui kha in zo la kan haw rual dawn nia" a lo ti ve mai a, an lo thinrim hman hlauin ka in sawk sawk a, khawngaih viau mah ila ka chhungte ka hlauh vang hrim hrimin ka haw san. 

"Nang chu i chhungten an phal awm tho sia chhunah zuk leng thla leh la, amah chauh chuan a khuahar dawn e" kawngchhe lai kan tlan pel tawh bawk a pangai deuhin a ti ti theih tawh. 

"Ka hre lo le. Amah a awm a duh zawk ang" a ti liam satliah a, tun a an inkar tak hre lo mah ila eng emaw a la awm ka ring nghet bur tawh. 

"Ka chhungte hi khirh viau lo se la chuan ka riah pui ziah thei tur a nia" ka ti zuai raih a, a dar a khabe nghatin a kawngah ka kuah a, ani hi chu ka ţhiante zingah ro ro pawh ka thlamuanpui ber ţhin a ni. 

"Inu hi a hlauhawm a, rul hlauhawm chi pawh a rap hlum ngam ang" a ti fiamthu a, a nui zui hawk a, tawi tein ka lo nui ve. A duh loh zawngin awm lui tlat ila chuan pawisak a nei dawn miah lo tih ka hre kar a, Timothy ngei pawh hian a hria ang. Kei ang bawkin ka nu hi a hrechiang ve. 

Kan inkawt a a din rualin ka chhuk tharh a, ka lut nghal mai lo. Bike bul a ka din reng takah chuan min melh vang vang a "A ţha vek em?" ti a min zawh chuan lu ka thing. 

"Dinpuia pa diktak ka hre tawh a" zawi fe a ka tih sep hnuah thawk ka la halh a, din rei chi anih tawh loh vangin thil awmdan ka hrilh thuak thuak. Min puih theih dan a hriat beiseiin ka hrilh a, sawi tam chi anih loh vangin midang hnenah erawh ka sawi lo. 

"Engtik nge insawn chhuah a tum deuh?"

"Ka hre lo..a hla tawh lo ang a ti ringawt a, hlawhfa chhawrna tur a neih dawn loh vangin a tam thei ang ber amah a tih theih a tum a, a inzir ve mek a, a insawn chhuah a bul a ţan ve hunah chuan theih ang ang a puih ve ka duh a, ţangkaina zawn ka duh. Mahse ka chhungte hi an khirh zual zel a, ka rilru a hah thei tak tak a ni" ka ti a, ka sawichhuah ngat phei chuan ka hah lehzual. Kawng zawng zawng hi a ping nghal vek ni a ngaih chang te ka nei a, chutih rual chuan beiseina ka nei tlat tho si. 

"Eizawnna a vang sia a buaithlak anih hi. A thiam hunah chhuak tawp se la, miin an hriat hma chu a siam ang ang kan zawrh sak ang a ni mai lawm" a ti a, a ngaih awlsam hmel phian. 

"Khaw nge kan zawrh ang a?"

"A rem remah. Kawng a awm ve zel mai ang, i rilru lo hah tawh suh se" nui chung hian a ti a, a theih ngawt bik loh zia tih lan nan lu ka thing a, ngaihtuah chian pauh leh a hah zual ting.

"Fim kak a awm tum reng la, hmasawn theih dan tur ngaihtuah rawh. Lut phawt teh ruah a tla reng sia i huh nasa hman palh ang" ti a min hrilh chuan bu nghat nghat mah ila ka che chuang lo. 

Bike hung remin amah pawh bike aţang chuan a chhuk a, "Ka luhpui ang che" a tih hnuah ka darah min kuahin gate a hawng zui zat a, hmun dang a chaw ei lovin an duh angin zingkarah ka haw a, hlauh vang a hmu hreh ka ni lo mahse tunlai chu ka nu leh pa te ka hmu chak lutuk hran lo. 

Kawt lai hul chinah ka ding leh a, a san em vangin amah en tumin ka dak ha a, ţhian kan nihna ang a kan inzawmna a thuk em vangin min lainat hmel ka hmuh hi chuan ka rilru a no lehzual vek zel. 

"Eng thil pawh ti ila min demin min hau lo ang tiraw? Kan hma hun zel tur ka hre lo va, thutlukna atthlak tak tak ka la siam lo ang tih ka sawi thei lo. Ka hmangaih a, amah lo chu ka ngaihtuah thei lo. Ţhen mah ila mipa dang min kawhhmuh sup sup mahse Dinpuia nen ka khaikhin zel tawh dawn a, nawm sak loh ka hlauh vangin ka ţhen anih chuan engtikahmah ka hlim thei tawh lo vang. Nang chuan ka thil tih apiangah min thlawp tlat ang tiraw?" ti a zawt chungin chhanna lawmawm dawn beisei ran chungin ka melh chho ha a, "I nat dawn loh phawt chuan" ti supin min lo melh chhuk ve run bawk. A mitmeng a tak ran a, ka nat a hlau takzet tih ka hria. 

"Ka na miah lovang. Dinpuia ka puih a, aman min thlah miah loh bawk chuan ka na lo vang. Min ţhen luih tir chuan ka na zawk ang. Keimah leh keimah ka inhloh vek ang a, ka inzawng hmu thei tawh kher lo vang" fiah zetin ka ti a, ka chhip aţangin ka sam a chul thla a, thlamuan ngai ni a min hriat changin hetiang hian a ti ţhin. 

"In la tuar chhuak mai ang. Bul ţan phawt se la, ka hmelhriat te kan be kual ang a tihdan a awm ve mai ang. Mahse a ti na che anih chuan ngaidam mahla ka ngaidam ve tawh dawn lo a nia" nghet charh a a tih chuan ka lo nui suk a, Dinpuia vangin ka na fo tih a hria a, kalsan mai turin min duh ţhin mahse ka thei tlat si lo va. Ka hlim lo leh na lai hmel hmuh hi a hrehawm tih ber te zing a mi a ni ngei ang. 

"A puitling ve tawh alawm. Hmalam pan a mahni a bulţan duhna rilru te a nei ve tawh a, duh reng vang chuan min ti na tawh lo tawp ang" ka tih laiin nihliap pahnih kengin Fredy a rawn chhuak a, min rawn hmuh chuan reilote chhung mak ti hmel a pu a, a tum zui bur. 

"Khaw nge i kal dawn?"

"I rawn haw har sia, ka nu ten zuk lam rawh an tia, ngati nge i rawn haw thawt thawt a?" vin deuh tak a min tih chuan a ngaihna ka hre lo kher mai. 

"Ka hawsan phawt ang che aw. Chhunah tih tur a awm leh dawn chuang lo va, sawi tur dang i la neih chuan min rawn ko leh mai rawh aw" a ti a, fiamthu miah lo mahse nui ruh ruh chungin a inher a, a ni pawh hi a maksak thei riau. 

"Zuk kal leh lawk rawh ka lo lam ang che" Fredy bawk chuan a ti leh a, Timothy kal enliam tur a ka inher lai a ni bawk a, ka hnungah min lo nam a, kal leh turin min tur sek.

"Eng nge maw i hriat le?" thinrim ţun a inherin vin zetin ka zawt let ve a, ke a kal a ti kher zel lehnghal. 

"Khulam vengah khuan ka kal khat a, ka kal leh chak. Nuam ti lo ila chu kein ka kal kher nang. A reh ţha sia ke a kal mai mai a nuam a" a ti zawt zawt a, min tur chhunzawm lehin nihliapin ka mal leh ka chawnah te na lo te tein min hawlh thuak thuak reng bawk. 

"Chaw ei a hun mai dawn..kan kal hman tawh lo vang. Duh leh tlai lamah Didiki tlawh pahin kan kal dawn nia" ka ti a, tunlai a awmdan hi a maksak thei riau. Ka ţangkaipui ber tur anih vangin ka hnial ţung duh lem lo va, zawhna ka zawt duah peih lo bawk. 

Haw hma inti viau mah ila ka nu chuan rei min ti tho a, inthlak tur a ka pindan a ka kal hnuah Dinpuia ka bia a, thophang aw deuhin min chhang lehnghal. 

"Nizanah kan hriat loh laiin i muhil daih a, kei aiin i tho har leh tho a nia" chek tlak tlak chung hian ka ti a, chhunah a hah bawk nen, a muhil hma kha ka dem hauh lo. 

"Nia a zia lo tak tak a ni. In zai rei em?" ti a min zawh lai te pawh chuan a la phak chuap. 

"Rei lutuk lo. Inchung lamin bengchheng an tih kan hlau a, tak tak a i chau ve anih kha. Nang aiin ka mu har na a ka muttui lutuk keipawh" ka ti a, kan thusawi erawh ka sawi chhawng lem lo. 

"Ka insawn ve hunah min riah pui ve la a ţha ang" a ti fiamthu a, nui hak hak chung hian "Ka rawn riah theih dawn loh zia hrechiang ber tu hian khatiang zawng khan fiamthu thawh ve vel lo mai teh" ka lo ti a, riak ila chu ka nu in min ţhuai nasa ngawt ang. Thawpik viau mah ila ka ngaihtuahna chu ka nuihpui ver ver tho. 

"Vawiin kan inhmuh theih loh hmel sia, dam chuan naktukah ka rawn lam ang che" a tih chuan ka thaw hak a, kan awmdun theih dan an dan pin nasat zia a hre ve mang si lo.

"Ka nu in scooty keng turin min ti a" ka tih chu nui hawk riin a zui a, hmusit zet a min nuihsawh a ang mah zawk. 

"Ka lo chang tho ang che..i hnungah ka tlan zel ang a, in college bulah kan inhmu dawn nia" luhlul chhuahin a ti ve a, hman aţang tawhin inthlah turin min ti fo a, harsa viau mahse a rukin kan inkawp lui tlat. Min ngaihtuah vang a min thlah a tum ve zawk tih lohah kha chuan amah zawk hi chuan vawikhatmah min la ţhen lo. 

"A ţha ngawt ang. Rei a ngai tawh lo ang, an rin turin reilote ka awm ang a, min rin deuh hunah an inthlah dul leh mai ang" tiin ka thiam ang angin ka sawi mam ve. Ka chhungte awmdan vang hian ka inthlahrung ve ţhin. 

Kan inbiak zawh hnuah inhnuaiah ka chhuk leh thuai thuai a, ka la inbual loh vangin chaw ei ka rawt nghal chung chung. An lo la inpeih chiah lo va, rilru hmanhmawh ru deuh chungin ka vei tawn sek a, choka ka luh veleh U Rinte in a rukin min lo hui a, phone min hmuh zeuh zeuh bawk. Hrilhhai deuh chungin ka hawi kual leh te te a, U Rintei dinna lam chu muangchangin ka pan chhet chhet a, a bul a ka din ve veleh "Nizan chu Dinpuia thlalak ka dawng nawlh a" tiin ka beng bulah a phun ser ser. 

"Eng thlalak maw i dawn? Tu hnen aţangin?" ka lo ti thuai a, thlalak min thawn ţhin tu kha ka ngaihtuah chhuak lo thei lo va, hlauhthawnna in ka khat a ni ber. 

"Aa..ka dawng tihah kan thawhpui nau a nia, nizanah an inah chaw kan eikhawm ve tho a, a rui deuh chhe lehnghal a, Dinpuia ka hria tih engtin nge maw a hriat zawk ni a star thu min hrilh chiam a, thlalak tam tak min hmuh a, dil miah lo mah ila ka rawn haw hnuah whatsapp ah min thawn a, i hmuh turin ka la dah ţha mai mai mawle" a ti a, a ngaih nep hmel viau. 

"Khawmaw ka lo enchhin" tih pahin kut ka phar chhuak a, phone min pek pahin "A duhawm loh tehreng nen, hmeichhe ho lah hi mi pangai zawn ţhin tur a nia" a lo ti ve thung. 

Thlalak ho ka hmu chiah chu vuak chawrh ang mai ka ni. Min ţhawn em vangin ka phu deuh zawk nghe nghe. Ka hmuh zing a pakhat hi chu ka dawng tawh ngei a, ka hriat ngai miah lohin min lo thawn. An awmna hmun leh an awmdan te, an thawmhnaw hak lai thlengin a inang vek. 

"Tu nge lo thawn tu che hi?" tiin ka u chu ka zawt leh a, "Lapuii" ti a a hming min hrilh pahin phone min chhuh sak leh a, min rawn be buai sek tu leh thlalak min thawn reng tu kha a ni thei mai angem? Buaina ka ngah tawh tehlul nen a inbelhchhah reng mai nih hi.

CONT...