THROUGH THICK AND THIN-14

THROUGH THICK AND THIN-14

KIMKIMI

"Lapuii chu tu nge? Engtin nge Dinpuia a hriat?" ti a ka zawh chuan ner nang chung a dar a ti che zeuh a, "Ka hrelo..party na aţang vel bakin a ni lo ang. Lapuii chu kan thawhpuinu nau a nia, chhungten enkawl ngaihna vak an hriat loh, awm ţha duh lo chi. Nizan paw'n a rui a, a u hnenah ka number dilin khang ho kha min rawn thawn a, engtin nge Dinpuia ka hria tih a hriat ka hre lo. Tihian ka zo vek tawh min zawh belh mahla chhanna ka nei tawh lo. Dinpuia hian hmeichhe rui ngai lo nangmah chiah hriat a nei a, a hmelchhiat dang te chu ruih mai pawi ti lo vek an niang. Hei vang hi a nia ţhen rawh kan tih chhen ni" a ti deuh duah a, Dinpuia sawichhe tel kher lovin engmah an sawi tak tak thei lo.

"In hmu chhe laklawh mai mai anih kha. Mihring hi kan danglam thei tih hriat tel tur. A ţha lam a ni emaw chhe lam a ni emaw, engti zawng paw'n kan danglam thei" a hriat loh hlauin fiah zetin ka sawi. 

"A rei tawh lutuk alawm Kim. I ţhatna tur kan duh a, hlim deuhin awm ve la kan duh. Keini chuan pasal ţha deuh la nei turin kan duh che a, Dinpuia ah hian inham tang reng suh. Nakinah i inchhir zawk ang" beidawn hmel zetin a lo ti ve thung. Min thunun thei tak tak lo tih an hre ve tawh hlawm aniang.

"Ka inchhir lo ang, hmalam pan a tum ve mek a, insiamţhat a tum lai mek hian thlawp tlat ka duh. Duh leh ka nu hrilh la, mahse min mamawh hun lai tak a nia, ka sual vang hrim hrim a thuawih lo ka ni lo" ti a ka hrilh chuan a lo thaw hawlh a, a beidawng ka tih tawh kha. 

"Mihring an danglam theih rualin siam ţhat theih miah loh an awm ve tih i hre tel dawn nia, beiseina nei sang lutuk suh. In siamţha tur chu ni se hman hmanah khan a insiamţha tawh ang" a ti a, Fredy-a rilţamin min rawn tibuai ta hlauh. 

"Ti vat vat ta che u, Kimkimi pawh hma tawkah i rawn haw a, tun thlengin chaw a la ei theih loh a, chawhmeh rim ringawtin a puar theih loh" vin zetin a rawn ti lut a, U Rintei nen kan in melh relh ringawt. 

"A theih ţep Bawiha, bai a la awm emaw ka tia a lo awm si lo va, hei a hmin ţep ang" U Rintei'n a tih pawhin "In muang hrim hrim. Lenna aţanga haw hma chiah in thiam a" a la ti ţalh a, eng nge maw ka haw hma pawh chu a huat em em ni? 

"I mood a fu lo ve hrim hrim anih kha. Ka nu ten min hauh lo nan ka lo haw hma ve a ni mai lawm. Chu chu eng nge i lo huat ve em em a?" ka ti deuh kher. Ka thil hmuh leh hriat ten min tih hnual lai a ni ve tho a, ka zaidam reng seng bik lo a ni.

"Tlaiah chuan kan walk tak tak ang maw?" min hnial buai lovin a ti ta zawk a, mawl viau mahse thinrim tak tak leh tak tak loh a hrethiam ve. 

"Khua a chhe e, tlaiah pawh ruah a sur reng tho ang. Ruah sur lai chuan walk duh suh u" U Rintei'n a lo ti a, ka pawm pui thlap. 

"Nihliap a awm reng a, ruahsur hun a hman ţangkai a tan lawm kan lei" a ti ţalh a, ka bula awm nuam a ti thar thut a, kan ţhianho zing a awm ve duh ngai mang lo kha nilengin duh duh a an tirh kual theihin a awm ve reng a, a pum nuam lo an hriat a hlau em em bawk a, ka leng min hruai haw tu nih ţalh a tum a, a thil lei ka hmuh ruh zawng zawng te nen. Ke a kal tam peih ngai mang si lo khan walk puiah min sawm sek a, ruah sur a chhuah hreh ngawih ngawih ţhin kha chhuah a chak thut bawk a. 

"Nang hi Didiki i star chiang mai" ka ti chhuak phawng a, U Rinteii nui ri in a zui nghal zat. 

"Ka star lo bawk. Kei aiin a upa daih zawk a, min vin peih bawk si ka star peih lo" a tih hnuah a inher vut a, ding tawkin choka aţangin a chhuak a, a rilţam thu a sawi tawh lo. Tun lawk a a awmdan ka hmuh phei kha chuan ka rinhlelhna a zual telh telh. 

Min pumpelh a tum zui char char a, ka awm ve naah a awm duh lo. Ka melh hlekin a hawi sawn vat zel a, nileng a a awmdan ka hmuh leh hnu phei chuan ringhlel mai ni lovin a star tih ka sawichiang ngam. Ka thin a rim lo va, ka nuih a za mah zawk. Zu a in thu sawiin a hek zawt zawt a, tunah lem Didiki hmuh chakin a hmanhlel leh a, Timothy-a nen a an inlaichinna te hi hrilh ka chak rum rum. A duh takzet lai a ni bawk a a ţap pur thei hialin ka ring. 

Dinpuia nen inbe leh mah ila Lapuii chungchang ka sawi ri duh rih lo va, inhmuh hun a sawi a tan ka khek. A star ve satliah mai mai pawh a ni thei a, ka buaina ber zawk chu thlalak min lo thawn tu leh min be sek ţhin tu kha a ni mai angem tih zawk a ni. Kan buai ngun tawh em vangin hetiang lam a buai kual vel hi ka peih tawh vak lo va, thawm a nei zui lo anih chuan khin buai ka tum hran lo. Hmeichhe dang message min thawn tu satliah aia buaina lian zawk a tam lutuk a, thil dang a inham buai ka peih lo a ni ber. 

"Lapuii i hria em?" kan college piah deuhah kan ţhu dun a, a insawi ang khan min lo nghak tak tak a, hma tawkah kalin kan inzui a, zawh chian ka duh vangin hma deuh hlek a thlen a ti ti hman ka duh a ni. 

"Hre nang...tu nge chu chu?" a ti hu a, a hmel aţang ringawt pawhin a bo zia a hmuh theih. 

"U Rintei thlalak a lo thawn ţeuh a, i thlalak vek a nia, a thlalak thawnah chuan i bulah hmeichhia an lang ve tlang pui a, number kan hriat miah lohin min rawn thawn kha a tel bawk. U Rintei ţhiannu nau a nia, inrinni zan an chaw eikhawm naah rui phualin a duh zia che ka u a lo hrilh vak a ni awm e" ti a ka hrilh chuan fiamthu thawh ang mai ka ni, a nuih a za khawp mai. 

"Chu ka va luck ve" a ti hluai a, keipawh ka lo nui ve mai. 

"Ka sawi tum zawk chu min lo be ziah tu kha Lapuii chu a ni angem le?" thutak deuh zawk hian ka ti leh a, a ngaihtuah ve vung vung tho. 

"Ka rinhlelh ber ka hrilh tawh che kha. Lapuii itih chu ka hre ngai lo. In college a a luh ve loh phei chuan Muankima nen a in thlalak kha a tan neih ngaihna a awm lo" a ti a, kan ngaihdan a inang lo leh tawh. 

"Didiki ila ringhlel tho tihna maw?" nui hak chungin ka zawt a, a lo bu nghat. A ngaihdan a sawh sawn ve mai mai ngai lo va, thu duh tih takah sawifiah vak mah ila a ring tlat tho ang. 

"A nih loh zia ka sawi peih tawh lo. Mahse khatiang thlalak kha ka chhungten an hmuh reng chuan an rilru a sak tial tial dawn a, nangpawh zanah chhuak tawh reng reng suh. I ţhianten an sawm che paw'n hnial tlat tawh ang che. An hmuh theih chhan hi i thiam loh a ni ve tho a, a thawn tu a dem awm rualin ka dem ve tho che. Kal daw daw reng lo la chuang khang thlalak kha an hmu dawn lo hrim hrim" ka ti hlak hlak a, nui ruh ruh chungin a lo ngaithla. 

"Min hau tur ringawtin a ni maw hma tawk a min hruai chhuah" a ti fiamthu a, hmeichhia ringawt ka dem thei tlat lo a ni. 

"Ka hau che a ni lo..kan tan vek ania, ka chhungte an nem zel theih nan ţha deuh a awm turin ka duh che. Hma sawn i tum a, a lawmawm. Ka theihna apiangah ka pui ang che. Nangpawh zanah chhuak tawh lo la, kan inpui tawn tihna a ni mai" uang miah lovin ka lo ti ve thung. 

"Kal tawh lo ang..i u thlalak dawn chu a hlui vek aniang. Ka danglamna te lo hrilh ve la, thlalak ai hian a sam a buk tawh zawk tih vel ten" ti a min la fiam zel vang chuan "I ninawm" ka ti hlak a, hetiang lam ka sawichhuah chang hi chuan fiamthu ah a la lui tlat zel. 

"Min hau reng lo in min veng ţha viau rawh"

"Eng vangin maw?" 

"Aww...hmeichhiain min ruih chilh tawh chuan min duh takzet tihna a ni mai. Bialpa i nei luck sia a chhuh sak daih che nge aw" a tih leh lai chuan insum hman lovin a awmah ka beng pawp a, duh aiin ka beng na. A ri ring bawk a a na viau aniang a dawm ve vang vang. 

"Hmeichhe dang vangin kan buai ngun lutuk tawh. An duh der ve che anih pawhin duh ve lo la a ni mai. Duh ila chu bialpa dang ka nei ve ţeuh thei tho" ka ti ve ngat a, thinrim a sawi ka ni lo thung.

"Nei chhin teh" ka mit tak a min en run chungin a ti nghut. 

"Engtin nge i tih ang a?" cho zet a melh ve chungin zawt a, a tih tur ka hrechiang viau tho. 

"Nei chhin la i hre mai ang" ti a min hrilh hnuah a nui suk a, mipa dang nen a min hmeh bel hi chu a duh lo ve chiang a lawm. 

"I ţeng leh dawn emai ka nei lo mai ang. Mahse nang pawh rinhlelh tur hrim hrim paw'n awm tawh bik suh. I thil tih tumah chauh i rilru pe la, puitling deuhin awm tawh rawh" tiin pangai takin ka hrilh a, ka naupang zawk na a zilh tu zawkah ka ţang ziah. 

"Awm dawn lo e..hmeichhe dang ka duh hleinem. Nangmah hi ka thih chilh rap dawn che" a tih chuan ka lo nui vak a, nui dun ve ţhin mah ila, min fiam bawrh bawrh chang a a hlim hmel ka hmuh chang te pawh hian ka khawngaihna a bo ngai chuang lo. 

"I over mah mah..thu thar a awm tawh em?" 

"Aw ka awmna tur luah mek tu te khan niminah ka nu an rawn bia a, in luah tur dang an hmu tawh. Ka luah thei ţep tawh ang" ti a min hrilh chuan "Ava ţha ve iti tak tak thei ţep tawh anih chu" phur fe hian ka lo ti hluai a, huphurhawm viau mahse a tum a hlen thei tur chu ka lawmpui takzet. 

"A ni mai ang chu..tlaiah kan endun lawk dawn mi?" ti a min sawm chuan ka in ngaihtuah rauh rauh a, ka haw tlai leh chuan ka nu a lungawi lo leh viau ang a, mahse enpui ve ka duh tho si. 

"Kan kal dawn nia, ka haw theih hunah ka lo hrilh ang che" ka ti ta nge nge a, chhungte thuawih loh reng hi nuam ka ti bik miah lo na a hmuh ve ka chak. Tuar let dawn mah ila ka tan a mi pawimawh tak tak te hi chu puih zel ka duh ţhin. 

"Umm..kal tawh rawh i ţhianten an lo nghak tawh ang che" ka hnunga dawm pah a a tih chuan peih lo deuh chungin muangchangin ka che ţuah ţuah a, ka bag pawm tu zawk anih vangin ka din rualin min lo pe vat. 

"Tunlai chu class kal ka hne tlat. Lehkhazir ngat phei chu ka peih lo lehzual" ka tih nang nang hnuah "Nangmah vang a ni miah lo a nia, peih loh thut lai hi ka nei ve ţhin hrim hrim" a din ve rualin ka lo ti leh zung zung. 

"Ka awih lo keimah vang a niang" tiin min fiam leh a, min hawsan hma loh chu min chhaih char char. Kan inmil ve lutuk te chuan ngaih an ti ţha lo rum rum. Mahse ţullo ah rilru ka ti hah duh tawh bik lo va, thil thleng thei a ni tho chungin hlimna lam lo chu ka ngaih ruat vak vak peih lo. 

Ka khawtlai rei bawk a ka ţhianten min lo nghak ţhap tak tak a, nidang ang bawkin ho mai mai sawiin an lo ri leh laih laih tawh a, Siami leh Rina inhnial thawm a ring leh hle. Didiki'n min lo nuih ver ver a, a hmel hmuh a nuam takzet. 

"Kan hmu reng cheu kan rawn ti buai duh lo cheu nih kha. Dinpuia chu ni ila ka ţhen daih tawh ang che mawle. Rim theih loh bialnu ka neih peih dawn lo reng reng" Lawmkima'n a lo tih chuan ka melh rum der vel a, "Tikhan min ti suh aw. Ngaihţhat loh sa nak laiin min ţawng chhiat a nge" tiin ka lo khak. 

"Ngaihţha hle mai rawh..hmelţha lem lo mahla nang te hi chu i fel reuh a" Sawmtea'n a lo ti ve zat. Anni pahnih in a an fiam ngam ve ber ka ni miau a. 

"Anu in bik miin an luah tak kha an chhuah san tawh dawn a, Dinpuia a lut ve thung ang. Puih a ngaih chuan ka lo sawm vek dawn cheu nia" ti a hrilh pahin ka melh kual a, huphurh hmel pu an awm lo. 

"Kan hman te chuan kan pui ang chu. Mahse anni chu motor an nei nual a, bungraw lian tham ho chu a chhungten an dah sak dawn lo mi?" tiin Siami'n min lo zawt ve thung a. Hei tak hi chu keipaw'n ka la hre bik lo. Zawhna chang ka hre lo hrim hrim. 

"Ka lo zawt ang. Ka sawi zawk tak chu mahni chauh pawh nise insawn hrim hrim chuan inchhungah tih tur neuh neuh a awm ţhin a, a ţhiante ho an fel vak si lo va, keimahni ho hian tih sak zawk ila ka tia" inthlahrung ru tak chungin ka ti leh a, a ţhiante hi ruihhlo ti deuh vek leh zan lam a awmkhawm luih luih ngaina chi deuh vek an nia, an thil tih ka sawi sel lo va, anmahni pawh ka haw hran lo. An thlem lunglen leh ka hlau a, a thil tih tumah rilru a pe thei lo ang tih ka hlau a ni. Fel deuh deuh pawh an tam tho a, mahse Dinpuia zawk hian a hrilh kher lo maithei. 

"Hmeichhe ho lah hi lehkhazir a kan inkhung chawt chawt chang te leh nawm chenna lam kan ngainat loh deuh hlekin chut min tia, mahse chut an tih ţhin te an han hlawhtling a, a chut chutin nupui an nei ţha leh a, ka pa pawh hi a bang lo. Nihna sang chelh lo se la chu ka nu hian a duh teuh lo. A ţha ve phian thung a, hmelchhia leh hmelţha inpawlh aţanga chhuak ka nia, ka zia ve em hi" Afela'n a lo ti ve bauh bauh a, nuihpui bawrh bawrh mah ila a ngaihdan chu dik na chin a awm tho mai. 

"Ipa hmelchhia i ti ringawt a ipa nen in inan em hi. Nupui ţha deuh neih iduh chuan ipa ang a nihna sang i chelh ve a ngai dawn nih chu. Hmanni mi lah khan a duh ta si lo che a" Sawmtea'n a lo ti zeuh a, ka buai buaiin ka buai a, Afela te chungchang ka lo hriat pui ve tawh lo reng reng. 

"A mawl a nih kha" uar zet a a tih chuan kan nui dar dar a, a nui ve duh miah lo lehnghal. 

"Bialpa a nei lo emaw ka ti char char a, ka duhthu ka va hrilh a, a bialpa nen phone an inkawl thleng lai a lo ni sia, bialpa te phone kawl tir reng reng atthlak lutuk" a la ti bawrh bawrh a, a ngaihdan anih loh hmel kher mai. 

"Nia a tih chi vak loh. Rilru ţha vak lo an nih phei chuan an tan a pawi deuh tur an tih palh a hlauhawm a. Mipa chu mipa kan nia, tih dan dan a la awm. Hmeichhia bik hi fimkhur an ngai, an awmdun laia an khawih tir anih chuan a zia a, kawl tir tawp ang hi chu a tih chi lem loh khawp mai" Sawmtea'n a tih chuan ka lo bu nghat nghat a, kan nun nghawng a tichhe vek thei thil a thleng palh ve thei tlat a. 

"Mahse Afela kha chu a vanduai ve hrim hrim ka ti. A hrilh ngam ve lai takin phone a lo kawl si lo va" tiin Timothy-an a rawn thar thawh leh. 

"Hmaichhanah hrilh ka tum ve a, ka la tih ngai loh thil a ni bawk nen, zun ka cheh mai dawn ni ten ka hria a" nui huah huah chung hian a ti a, a star deuh nu kha ka hmu ngai ta miah lo reng a ni. 

"A bialpa kha biak zui vak mai tur che lawm. I la na viau em? Hmeichhe duh i nei ngai mang si lo va, i duh ve chhunin bialpa a lo nei daih sia" thutak deuhin ka lo ti ve thung. 

"Min block daih a be zui mah ila a hmu ve dawn chuang lo va, ka la na lem lo. Pathianin kan tan a mi ruat a nei vek a, ka thil ei theih zat a la ngai reng" ngaihsam zet hian a ti a, ka lo nuih sak. Nia, Pathian hian kan tan a ruat a nei vek a, kan ta ni lo tur chu neih ţalh tum mah ila kan nei thei chuang lo vang. Kan ta tur anih chuan buaina tawk rap rap ila hlimna in kan tawp tho ang. 

"Scooty hi tu emaw ber hawn tir la, in kan en zawhah kan lam kawi ang a a ni mai lawm" ti chungin kan piah a ka ţhiante ding khawm laih chu a en a, an khalh thiam vek na a tu ber nge lirthei keng lo ka hre lo. 

"Kan lawm kawi leh hman dawn mi? Haw tlai lutuk kha a chi vak loh a" 

"Hman ang kan rei lo ang a, va zawt lawk rawh" a tih leh takah chuan ka ţhiante awmna lamah ka phei leh hnak hnak. 

"Ka scooty saw hawn thei in awm angem? Haw lamah ka rawn lam leh mai ang a" ka ti ban charh a, ka tibuai zing lutuk a ka inthlahrung ve ţhin. 

"Keiman ka lo hawn ang. Midang chuan an keng vek a, Didiki lah in veng lam a haw tur a ni bawk sia, an lo hmuh palh a hlauhawm a" Rina'n a tih chuan ka lawm kher mai. Kawngpui anah an awm a, ka tan chuan a awlsam ber bawk. 

"Ka lawm viau ang..ka rei lutuk dawn lo a, ka rawn lam leh vat ang" 

"Inthlahrung suh..Siami inphurh tir ai chuan a nuam dawn hrim hrim" a ti tel zeuh a, inhnial riin a zui leh a, ka hmanhmawh deuh bawk a an zing a tel rei lovin ka kal leh vat. 

"A reh tawh e...fal deuhah nangmahin i awm dawn nia, i hlau miah lo maw? Timothy hian thlahrang a hlau thei lutuk a, kan naupanlai aţang tawhin thil dang zawng aiin thlahrang a hlau. Mitthi te hi a hmu ngam vak lo va, chutiang chu ini ve em?" ka ti ha a, a nuih a za em em mai lehnghal. Thui tawk kan tlan tawh a, veng inhnaih tak a awm ţhin si kan inhlat tawh dawn khawp mai. 

"A nuam zawk daih ang chu. Hlauh zawng a inang lo va, mipa nih vang ngawtin mitthi hlauh loh tur tihna a ni chuang lo va, mahse keichu ka hlau lem lo. Thlahrang ai chuan i thinrim ka hlau zawk" a ti tel leh zeuh pek a, accident ka hlauh vang chauhin engtinmah ka ti lo. 

"Thlahrang aiin ka rapawm zawk tihna a nih chu. Kan naupanlai chuan ka veng zawk ţhin a, zankhat pawh kan pahnih chauhin inah kan awm a, kan ţhenawmpa ruang awm zan anih vangin kan chhungte an kal vek a, Timothy-a te in zawkah kan awm. Current a awm lo chiah chu min kuah nghal chawt a, ka chetsawn hlekin a ţap pur zel sia, kalsawn a phal thlawt si lo va thimah kan awm char char alawm" ka ti siam siam a, kha thil kha ka la theihnghilh thei lo. Engah min chhan ziah a, thimah ven ziah a ngai ve thung. 

"Ava inhmeh lo ve" Dinpuia pawhin a lo ti ve sup a, Timothy nen hian an inhriatna a rei tawh a, an inkawmngeih tak tak hmain ka rilru ti hrehawm zawngin a awm zel a, Timothy hian a la pawh tak tak thei lo niin ka hria. Mahse an inhmuh chuan an inbe ziah tho. 

"Inhmeh lo lutuk..amah pawh a zak a, midang chuan an hre kher lo ang. Pangang i hlauh ang vel khan mitthi a hlau" ka tih chuan ka rin dan chiahin "Deuh kher che chuan" a lo ti hluk a, pangang kher hi chu a te pawh a lian pawh hlau tak a ni. 

A awmna tur in chu beisei aiin a lo ţha daih a, a hmun a remin a nuam a, a fal deuh chung pawh a man chawi a an luah reng duh hi ka dem ta lo. Dinpuia awm tum lo se chuan an la luah zawm reng ang. 

Inchhungah kan lut a, an lo in pack nasa tawh. A inthlahrunawm lek lek zawk. Min lo lawm thiam hle a, kan ţhut rualin tui intur min lo pe sawk sawk. An fanu lah chuan min rawn hnaih hrut hrut a, rei pawh kan la ţhut hmain ka malchungah a ţhu vang tawh.

"Amah chiah a la ni sia, kan awmna a fal bawk nen a khua a har ve ţhin a" nu ber ni awm tak chuan a lo ti sawk sawk a, chawpchilh deuh a luah tur dang an zawn a ngai hi ka khawngaih ru angreng. Inchung leh hnuai awm se chuan an luah zui zel thei ni mai tur. 

"Naupang ţhenkhat chuan hmuh ngai loh an hmuh hian an lawm ve hrim hrim a" ka ti a, ka ţawng zawng a ka hmui che ve zel lo man a tum tlat vangin ka sawi duh ang pawh ka sawi hleithei lo. Ka ţawng loh hnu pawhin tih chet leh tum ni awm takin ka hmui chung lam a lip chho thul, nu leh pa hriat lai a khak chi a ni mang si lo va, Dinpuia leh in luah tupa kawngka bulah dingin an ti ti a, min rawn melh leh zeuh zel bawk a, ka zang angreng hle. 

"Tupawh a nel vek hrim hrim a, midang a hmuh ngai loh vang a nih kan ring a, lo leng lut tawh phawt chu an malchung a lo chuh vat zel" a ti a, a fanu in a min tih dan hmu reng chungin a khap mang si lo va, ka mangang viau tawh. 

"Min lo en teh" tih pahin intithei zetin a hnar hmawr chunglamah a nawr chho a, kan bulah Dinpuia lokal ve in ka ke bulah a ţhu hniam a, naupang chu dim te a dawmin a fuih sauh sauh bawk. 

"Bawihte a u hnar kha han tihsak ve chhin teh. Thla ka lo laksak ang che u" ti a a hrilh lai chuan rum zetin ka lo melh hrawk a, a hmu lo der hmak. Phone lek chhuakin a tawlh hnung a, naupang lah a phur. Ka hnarah ban de de in ka hnar hmawr a khawih a, a kut lo man bet mah ila a ti lui zel. Ka hnar hmawr chung lam a a nawr chhoh ve lai chuan phur zetin Dinpuia chuan thla min laksak thuai a, keimah tih loh chu an nui vek. 

"Hei pawh hei pawh" naupang chuan a ti leh a, ka hmui chunglam bawk chu a lip leh a, hrehawm ka tihzia hriain Dinpuia chuan a ngaihven zui tawh lo. Hmui hnuai lam ka tih pawrh vang ringawt paw'n ka hnar awmdan a mak ka ti tawh a, khata ţang khan ka ngaihdan ni lo ah pawh hmui ka ti pawrh ngai ta miah lo a nih kha. Tunah lem naupang hauh ngam bawk si lohin chhe thei ang berin min siam a, Dinpuia lahin min la nuih ţhaw zui. Ka thin a rim lek lek hman hial. 

"Vawikhatmah ka kalpui tawh lo vang che. A hnar a nawr chhoh chuan duh tawk mai tur a nia, nang lahin ti rawh ti rawh ilo ti sek a" ka ti vin hlak hlak a, haw tumin pawnah kan chhuak a, in bul vel enkual lawk a duh vangin kan kal kual leh rih. 

"Nang te chu i chhiat phah ve chuang hleinem" tih pahin min kuah a, a kutah lo vuan vatin "Ka chhe awm e...naupang pawh kha a hmelţha a a chhiat vek phah tho lawm" a kut ţang khal niap niap chungin ka la ti tan tan. 

"Nakinah chuan heng lai velah hian in an rawn sa sup sup ang a, fa kan neih meuh chuan ţhenawm kan ngah tawh viau ang" min tih lungawi tumin a ti ta daih a, lo chek tlak mah ila ka hawi kual ve ruai tho. 

"Bul i ţan dawn chauh a, kum10 hnu velah bak fa kan nei lo phawt ang a..nia, mi an tam hman tawh maithei" hawikual reng pahin ban charhin ka ti veleh bawk. 

"Kum10 hmain ka hlawhtling hman ang. Neih nei mang lovin bul ka ţan dawn a, mahse dinchhuah nan kum10 lai nghah ka tum lo" tumruh zet a a tih chuan lawm avangin ka lo nui ver ver. Hetiang rilru hi hmanah khan lo pu tawh se ţha tur. 

"Ka pui ve zel dawn che a, chuvang chuan 'ka' ti lovin 'kan' ti tawh rawh. Kan taimak phawt chuan kan hlawhtling ve em em ang. Kan hlawhtlin veleh min nei ang a, kawt zawlah khan pangpar chi hrang hrang ka dah thluah ang a, taimak vang liau liau a hlawhtling kan ni dawn bawk si, a nuam dawn e" ti a duhthu ka sam vel chuan a nui hawk a, reilote kan tuar ang a, kan hlawhtlinna chuan rei tak chhung a daih thung ang. 

"A hmun hi a hla sia i rawnkal reng thei ang maw? Ka thlahin ka hruai hman tawh dawn miah lo che a" 

"Thei e..tam thei ang ber ka lokal ang. Scooty ka nei a, min thlah leh hruai vel kha chu a ngai dawn lo hrim hrim. I tih tur ang ang ti chawt la, i thil zir ang chiah chiah a ti lovin i zir aţang khan a ţha zawk zel ngaihtuah la, i ti thei tih ka hria, i ti thei em em ang" 

"Ka bialnu inih hma khan midang bialnu lo ni hman mahla neih tum chein ka bei char char tho ang" a ti a, ka chhipah a fawp zeuh a, midang bialnu nih daih chu khawilam min hriat hma daihin ka hre tawh a, ka hmuh tirh aţangin ka chhinchhiah kiau. 

"Chuvang chuan midang chhuhsak buai ngai lovin min veng ţha hle rawh. Anih loh chuan duh lo mahla ka kalsan daih tawh dawn che nia" tiin ka vau fiam a, a hlau leh tho ang. 

"Ka umzui zel ang che. Chuan ka lawm e aw" a tih chuan ka hrethiam lovin ka bang bo takzet. Kal zawm lovin ka ding chat a, a mitmeng en tumin ka dak ha a, "Eng thilah nge lawm thu min hrilh?" tiin ka zawt zui zat. 

"I pian ve vang hrim hrimin ka lawm. Ka hnaih a i awm reng vang te, ka tih lungngaih chang che pawh a i beidawn duh loh vang te, bulţan ve ka tum a, zir sang ve ringawt mah ila thiam bik ka ni ngai lo va, tun a ka thil tih tum ni lo tih tur dang ka hre lo. Pawisa tlem te chauh nei chungin bul ka ţan dawn a, min thlawp tlat a, ka hnual changin min fuih a, engkimah ka lawm. Mipa dang hian nangmah ang hi an mamawhin an duh ve tho ang. Mahse ka pe dawn miah lo a nia" a ti ve duah a, ngaihsak ang a a awm ngai loh vangin ka thil tih te hi a hre ngai lo maw ka ti char char a, a mitmeng a fimin a tak run a, min fiam tawh miah lo. A tih tak tak zia ka hmu a, chu chuan min ti lawm lehzual. 

"Midang hnen a min pek tum mah la ka kal dawn lo hrim hrim. Lawmthu min hrilh a ngai hran lo. Min ngaihsakna itih lan hian ka lawm tawk lutuk. Ka la naupang a, thui tak ka la thlir thiam lo. Kan hma hunah eng nge lo thleng zel dawn hre lo mah ila thil lo thleng thei apiang huaisen tak a hmachhawn ka inhuam a, la naupang viau mah ila ka tuar ve thei em em ang" tiin thiam lo deuh chungin ka hrilh ve a, ka thusawi te kha ka ti tak viau thung. A dinhmun hniam lai a ni emaw, a dinhmun ţhat lai a ni emaw englai pawh a a kiang a awm reng ka duh a ni. Tam tak chuan atthlak an ti ngei ang mahse ka thinlungah thuk takin hmun a chang tawh a, chhungte leh harsatna hrang hrangin an nawr chhuak zo tawh lo. 

CONT...