THROUGH THICK AND THIN-15

THROUGH THICK AND THIN-15

DIDIKI

"Dinpuia phone number ka nei tawh sin. Mi ka zawt kual nasa a, ih maw..ka u ţhiannu nau bialpa a lo nia mahse U Rintei kha chuan a number a nei lo va, ka ţhiannu leh a ţhianpa an inhre veleh chhawng a, chuta ţang chuan ka nei. Ka neih theih dan a kual nasa bawk a, ka ti bo mai mai lo vang" phone aţanga min rawn hrilh mah ni se a aw aţang ringawt pawhin a phur zia a hriat. Lapuii hian a star thu min hrilh fo a, a kal thui pui peih ka ring ngai miah lo va, ka lo ring sual a ni. 

"Bialnu a nei a, an ţhat lai tak a nia" ka ti ban charh a, thil dik lo ka tih ve tawh tho vangin ka hau bawrh bawrh ngam tlat lo. Hauh chu ka duh mahse ka tim tlat. 

"Awii...chutiang a ho lutuk" uar zetin a ti fan raih a "Nupui a la neih loh phawt te chuan duh duhin kan be thei lawm. Nupui pawh nei se tunlaiah nupui nei chung a ngaihzawng nei an tam e, i ti ve lo mi? Keichu mi pa pawh ni se ka duh zawng an nih chuan pawi ka ti lo reng reng, ka duh zawng an nih a pawimawh ber" thawveng fe in a ti leh ham ham a, a nui pah har har bawk. 

"Mi pa te chu an nupui fanaute an khawngaihthlak alawm. Nang hi chu i ţawng liam puat puat zel a, nupui nei lai an nih chuan i duhzawng pawh ni se hnaih reng reng suh. An nupuite an rinawm loh san anih chuan nangpawh chutiang chuan an la ti ve tho ang che. Dinpuia kha chu tikhan star tawp la, kal thui pui suh" tiin ka chah ve lawm lawm a, a thu ang chiahin a kal dawn tih ka hre tho. 

Ruah a tlak cherh cherh vangin phone dawm reng chungin tukverh ka khar a, keimah chiah ka ni bawk a a khawharthlak. 

"Ka be chhin dawn hrim hrim. Bakah a bialnu min hrilh tu khan a hrechiang aniang 'a bialnu a fel lutuk' a tia, a fel phei chuan engtinmah min ti awm lo e. Biak ringawt te chu a pawi vak hleinem, an in pawh ka hria a, ka la leng maithei ni" a la ti tak deuh deuh a, a nui har har reng ri te chu ka hne thar riau. 

"A fel vang tak chuan alawm Dinpuia be suh ka tih. Mi fel deuh itih nat khan i hlim dawn chuang em ni? Ka thusawi hi awih ringawt rawh. Kan pawisawi ngai miah lo mihring tihnat hi a nuam miah lo a nia, i hlim tak tak chuang lo vang" chak khel khawl hian ka ti a, ka tawng tawh a, thil ho te vangin Dinpuia ka hua a, tihnat ka tumna lamah Kimkimi thlengin ka ti na tel a, tun thleng hian nuam ka la ti lo va, inthlahrunna nasa tak ka la nei a, Dinpuia nen ka hmuh dun ngat phei chuan ka nuam tih lohna leh inchhirna a nasa lehzual. 

"I ninawm e..kan ţhenawm maiah i awm tawh si lo va ka ngaih vang chein ka rawn be ve hram hram che a, min hau reng kher lo la" a tih bui bui laiin kawngkhar a ri det det a, rang tak a thoin ka hawng vat a, Timothy-a a lo ni. Zai zirin lut turin ka hrilh a, a lokal hun chu a fuh chiah lo kher mai. 

"Nang pawh i ngaihawm mahse hei inleng ka nei a, nakinah ka lo be leh ang che aw" ka ti ta zawk a, sawizawm chi a ni rih tlat lo.

"Min rawn be ngei ngei ang che. Sawipui duh che ka la ngah tehmai nia" thupe zaw zet a a tih hnuah min ngaichang si se lovin a dah a, a thawven rualin a rilru a nghet a, keimah ang bawkin a luhlul bawk. Chuvang tak chuan ka hlauthawng lehzual. A insawi ang hian a awm tak tak ang tih ka hlau a ni. 

"Tu nge?" ti a Timothy-an min lo zawh chuan lu ka thing a, "Khumah hian lo ţhu zawk rawh. I ţhutna kha chu a phah a awm si lo va, a ruh lutuk a" a zawhna chhang lem lovin ka ti daih a, Lapuii chanchin ka sawi peih rih lo. 

Khum a a rawn ţhut ve rualin "Ruah a sur sia, i huh hman em? I rawnkal duh kher a nih kha" ka lo ti sawk sawk a, thil dang sawipui ţalh ka tum a ni ber. 

"Huh hman lo chiah chiah..Kimkimi a rawnkal theih loh hmel sia i khawhar ka hlau a. Tu nge rawn be tu che kha?" a ti nawn leh ngat a, ka danglam ho te leh langsar vak lo thlengin a hre vek thei zel a, tunah phei chuan min melh run bawk nen dawt sawi chi a ni dawn lo hrim hrim.

"Lapuii..ka patea te ţhenawm nula kha" ka ti sep a, ka hawisawn nghal daih. 

"Khawi a kal puiah nge a sawm che?" a ti nghal ngawt a, Lapuii nen kan inbiak tawh chuan zan a chhuak turah min ngai tlat tawh zel. 

"Khawiahmah...ka awm lo thut sia, min ngai a min rawn be ve mai mai anih kha" ka ti nawi niaih a, Dinpuia hming ka lam ri ngam lo hrim hrim. Kimkimi ka tihnat vang khan a thinrim takzet a, Lapuii'n biak a tum thu ka hrilh chuan keimah zawk min dem let ka hlau a ni. 

"La hla deuh mahse chawlhni ah chaw rawn ei la, mahni chiah a chawlhni hman chu ka nu in a khawngaih deuh che aniang" nui deuh hlek chung hian a ti a, ka beisei loh deuh a sawi tak thut vang chuan mak ka ti kher mai. Ka chhanna a ngaichang ran a, kan inlaichinna hi a nu leh pate'n an hriat leh hriat loh ka hre lo va, a unaunu erawh hmuh ka chak lem lo khawp mai. 

"A zahthlak emawi a..ka lo len ţumin an awm ngai si lo va ka nel ve vak lo a, chaw ei tur a nei a lo ti mai rawh" nuam ti lo deuh chungin ka hnial a ni ber. 

"Chhungkua kan tlem emai zak duh suh. A la hla tho a, lo inpuahchah lawk la" a ti fiamthu a, ka chhungten min hlat turin hrilh ve ta se la chaw a rawn ei ngam bik kher lo vang. 

"Ngati nge hetiang hian i awm tlat a?" ti a ka zawh chuan hrethiam lo fe hian a mit ko a lo san ak a, "Min umzui reng a, a theih tawh loh ka tih hnu pawhin i beidawng duh lo va, ţhian angin awm reng tawh zawk ang ka tih kha" tiin ka hrilhfiah a, a fel em a eng emaw vang a kan inhmelmak leh ka hlau a ni. 

"Kan thei lo ve ve tih ka hriat vang anih hi ka hnaih luih tlat che. Min mamawh reng chungin min mamawh lo angin i awm a, i luhlul lutuk a a buaithlak" 

"Ţhian ni ila ka duhtawk viau. Anih loh chuan thil ho te te ah kan inhau leh ang a, chhe deuhin kan inchhuah leh mai ang" tiin ka ngaihtuah na a thil awm chu ka sawichhuak ta nge nge a, khatih hunlai khan hlauh ngah viau lo ila chu engkim kha ka paltlang lui ngam tur. 

"Ţhian chauh duh tawk lo ta ila?" ti a min zawh chuan ka huaisenna te sawm khawmin a mitah ka en lui a, "Keiman ka duhtawk thung alawm. Inlaichinna hi mi pahnih kalpui tur a nia, pakhatin a remtih loh chuan a kal thei lo" ti ve mah ila ka zam ru takzet. Ka la duh reng tih a hria ang a, dawt ka hrilh a ni tih a hriat chhuah ka hlau a ni. Ka duh mai ni lovin ka hmangaih takzet. Kimkimi sawi kha a dik ang, nau hial ka pai tawh a, kan inzawmna a nghet tawh a, duh duh a ka thehchhuah theih a ni bik tlat lo. 

"Dawt i sawi" a ti chiah reng a, hawisawn pahin beidawng zetin ka thaw hak. 

"Inthiam lohna hian tun thlengin nitin min kher nget nget reng a, min ei zo lo chauh tawh niin ka hria. Ngaihtuah loh tum mah ila ka hriat naah a awm ngheh em vangin ka ngaihtuah lo thei lo a, mumang rapthlak tak tak ka nei ziah a, ka awmna hrehawm ka tih vang a intih thawven tum a zan a chhuak ţhin chu ka ni meuh mai mahse zu ka in hian ka muttui ve thei deuh a hriatna ka nei a, harh miah lova zing thleng a mut tluan ve chang te ka neih theih phah ţhin a, anih loh chuan mumang rapthlak deuh deuhin min umzui reng a, theih phei se chuan ruih chhum hmawk chak chang ka ngah mai. Ka chetdan leh ka thil tih kha a nunrawnthlak in hrehawm tawrh ka phu tih inhre mah ila nitin zantin a tawrh reng mai chu ka hne ngawih ngawih ţhin. Hriat chhuah reng duh lo mah ila ka hmuh che apiangin ka hrechhuak a, ka inthiam lo zual sauh a, chuvang tak chuan ţhian bak pelh ka duh tawh lo. Ţhian ni ila, college ah chiah inhmu ila, a hranpa in inhmu reng lo ila, chu chuan ka hrehawm tawrh tawh sa te hi a ti nep deuh ang" ka ti sep sep a, mumang ţha lo ka nei fo reng a, ka sawi chhuah duh ngai lo. Mahse tun ţum chu amah hnar nan ka duh a ni. 

"Khang kha chu i damchhungin i tuar tawh ang. Inthiam lo ru zetin i awm char char ang a, tuman an pui thei lo vang cheng. I tawrh ho kha chu i thil tih rah a nih kha" a ti chang rat a, ani pawh tun thlengin a la na tih ka hria. Ka thil tihah khan ka tihchhan chhuan lam tur zawngin thiam inchan chawp ţhin mah ila chhungril takah hian englai mahin thiam ka inti ngai lo. Tuman min paih luih sak lo va, ka duhthlanna a ka tih a ni. 

"Mahse hmalam pan kan tum ve tawh ang chu" zawi te a a tih leh takah chuan hawichhuakin muangchangin a lam ka hawi a, a mitmeng uk kharhah chuan min lainatna bak hmuh ka nei leh tawh lo. Ka hmu duh lo ţhin a, thiam lo zawk ka ni a, lainat tu neih ka duh lo. Ka zuau phah mai mai ang tih ka hlau a ni. Hawisawn leh vatin nghet zet a mit ka chhin rualin ka mittui te chu zalen takin ka biangah an luang thla a, ka chhel tluan bik thei ţhin lo. 

Meng lo mah ila kan taksa a insik chiah chuan min hnaih hle tawh tih ka hre thei.  Ka mittui min hruksak hnuah dim takin min kuah a, ka la meng ngam chuang lo. 

"Anih tur ang a ni zo tawh a, mahni inhrem reng hian awmzia a nei lo teh a nia. Ka sawmna che kha pawm la, bul ţan ţha lehin hma lam pan tum tawh zawk ang. Zantin hmu kher lo che mah ila i ţah hnem tawh ka ring a, a tawk tawh" ti a min hrilh chuan ka ţahchhuak vanga ka hmui khur der der chu ka seh tlat a, ka seh nat em vangin thisen a chhuak hial mahse na ka hre miah lo. Ka tawrh tawh zawng zawng aia hrehawm leh na tawrh zel ka phu a, ka tih dik loh rah sengah ka in ngai. 

"Ka fa ngei ka ti tla a, min ngaihsak a min hmangaih tak tak tu te ka hliam fo a,hlim ka phu bik lo aniang" harsa ti tak chungin ka ţawngchhuak veleh a, ka natna tawrh ang tawrh tir ve ka tum lai khan ka hlim ngai lo va, midang tihnat a an chhiatna tur a thil tih hi hlimna a nih loh zia chiang takin ka hriat phah. 

"Phu e..i tawrh hnem tawh kha. Hlim deuhin i awm tawh dawn nia" ti a min hrilh chuan amah la kuah reng chungin ka dak chhuak a, hmanah khan ka thlamuanpui takzet ţhin a, tunah pawh a la ngai reng. A kiang a ka awm chuan inchhung lum leh nuam tak a awm ang mai ka ni ţhin. 

Ka hmui a min fawh chuan ka lum pup thei hialin ka hria, ka luhlulna vanga rei tak ka lo thup tawh zawng zawngte kha rawn let lehin ka thlahlel thar leh a, ka lo chhan let ve na chu remchangah lain ka ka chhungah a lei hawl lutin zei zetin a chet kual tir a, keipaw'n duhthaw zetin ka lo chhang let ve zel. Ka kawr chhung a zen lut a ka taksa hlang a chul kual lai chuan ka thaw a rang tawh hle a, mamawhin la thlahlel viau mah ila nakin a kan tawrh lehna tur bawk a thlen hlauin inla hrang hmasa zawkah ka ţang a, zawite a la thaw hlawp hlawp chungin lu ka thing ta ringawt. Ka awmdan a hmuh chuan a nui suk a, ka chal a a fawh leh zeuh hnuah a kutin ka sam min tuai mam sak a, chhunzawm ka duh lo tih a hrethiam bawk a a inla hrang zui ve mai. 

"Ruah hi a tam zel sia, raincoat i pai em?" tukverh bulah ka ding a, a hma aia ruah lo tla tam zawk ka hmuh chuan hawi letin ka zawt a, lu a lo thing a, ka ngaihtuah tehlul nen a mangan hmel vak loh. 

"Engtin nge i haw ang?" 

"A bang veleh mai ang" a ti a, a ţhutna aţanga tho vein ka bulah a rawn ding a, pawnlamah eng a awm loh vangin a thip khup a, ruah a tla reng bawk nen a rapawm lek lek. 

"Ava thim mep mep ve. Haw kawng eng nge a an ang aw?" a ti vang vang a, min bia a ang lo. Amah leh amah inzawt a ang mah zawk. 

"Haw kawng chu a zia ang bakah current a thim tel loh te chuan pawn lamah eng an dah fur ang a, haw a harva vak lo vang" ka lo ti tho a, a harsa lo ang ka ti ngawt na a thli a tel bawk nen, a nuam lutuk lo maithei. 

Min kuah pah a "Min lo thlah" a tih sup chuan ka lo nui hak a, fiamthu mai mai a ni tih hre mah ila "Em em che hian..nula rim ve lem thlah ngai leh si te chu. Naupang ber i nihna hi a lang leh ţhin" la nui reng chung hian ka lo ti a, kawl a phe zawr a, khawpui riin a zui a, nghet deuhin ka beng ka hup tlat. 

"Ka lo riak mai dawn" a tih hnu phei chuan rum zetin ka melh a, in neitute mak tih tur a awm ka duh lo hrim hrim. Hmeichhia mahni chauh a awm ka nia, ka luah ţan chauh bawk a, zingah an tho hma thei bawk nen Timothy-a bike an hmuh chuan mak min ti lutuk ang. 

"Inring sa a lokal tur che lawm" vin ţha a ka tih chuan "Riah inring sain ka lokal" a ti a, a nui zui ruh ruh a. 

"Nuihzatthlak loh emai, keichuan ka ui lo va mahse inchung ho in an hriat chuan mak min ti lutuk ang. Hrim hrimin i hlau em ni?" ka ti chhuak phawng a, tukverh aţanga pawn lam a rawn thlir ve aţang khan a awm a nawm loh hmel vek. 

"Ruah sur hlau rual ka nih tawh loh hi" ti ve bawk mahse a hlau a nih rinna ka nei tlat. A zah hlauin ka zawh chhunzawm duh lo va, ruah sur chhung zawng kan nghak dun ran a, anu in vawi hnih a rawn be hman a, dar11 bawr velah a bang ve chauh. Bike a dahna thleng ka thlah a, in neitu te an reh tawh bawk a kal hmain zantin atan a vawihnih nan ka hmuiah min fawp leh hram a, reitak hnuah hlim deuhin kan inthlah veleh thei ta. 

Kan boruak a ţha chho ve zel a, kan ţhian dangte hnenah sawi dawt lo mahse an hmuh laia min ngaihsakna lantir a hreh tawh bik lo va, Rina leh Siami te phei chuan min chhaih fiam leh zeuh ţhin. Midang chu min ringhlel âwmin an awm lo va, min rinhlelh ngaihna an hre lo a ni ber ang. Inrinni ah Kimkimi leh Fredy an lo leng a, Fredy hriat loh laiin Timothy-a te in a chaw ei chungchang kha ka hrilh a, a lo phur khawp mai. Ei ngei ngei turin min hrilh a, kan inkawp nghet dawn anih ro ro chuan inpawhna zel anih thu a sawi. 

"Kimkim lo han kal hmasa teh" tih pahin Fredy chuan Kimkimi a nam sek a, a ngaihna kan hre lo dun hle. Haw an tum tawh a, haw dawn a ruaiah kawngkhar bulah a la ding tlat a, Kimkimi chhuah hnua chhuah ka tum chu min dang tlat bawk. 

"Ilo haw ve dawn lo em ni? Kan haw rual loh chuan ka nu'n min lo hau ang" hrilhhai angreng takin Kimkimi chuan a lo ti a, a ngaihţhat chiah loh hmel hle bawk. 

"Haw dawn e..ka haw ve loh ten. U Didiki thil hrilh tur ka nei a, lo han kal rawh" a ti leh a, Kimkimi a melh rum nen ka lam a rawn hawi leh chuan a nui ţhaw thung. 

"I va han ninawm tak e aw. Min zui tlat zel lehnghal a, ka hruai tawh miah lo ang che" ti nang nang chungin Kimkimi chu step ah a chho hnak hnak a, a rawn hawi let zeuh zeuh a, a liam hnuah Fredy chu ka hmaah tak a rawn ding tharh. 

"U Didik hei ka pawisa khawlin ka lei a, i ta tur vek anih hi" tih pahin Kimkimi bag a kensak aţang chuan bawm nalh angreng tak a rawn phawrh chhuak a, bag ken a chuh tlat kha mak ka ti reng a ni. 

"Eng thil nge awm a?" 

"Chi hrang hrang a awm ţeuh. I duh tur chi vek a nih kha. Mahse ka kal hnuah chiah i hawng dawn nia" zah hmel zet a nui chungin a duh dan a sawi zuah zuah a, ka nui chhuak lek lek tawh. 

"Hetiang min pek kher a ngai lo asin. Nangma tan hmang zawk la, nidangah chuan ka thil tur lei tawh lovin school ban a i pum a rik ruk ruk tawh loh nan eitur te i lei tawh zawk dawn nia" tiin ka hrilh a, a khawngaihthlak letling zawk. 

"Min van ngaihtuah" a ti zawi sup a, ka hriat phak loh tur a sawi mah nise ka hre pha vek tho. 

"In aţangin eitur ka pai a, ka rilţam vak ngai lo. I en hunah a ţhat leh ţhat loh min hrilh rawh aw" ring deuh zawkin a ti leh a, bawm cheimawina chu ka khal niap niap a, enchin tum a ka kun laiin ka biangah a fawp a, step ah chak deuhin a tlan chho zui bawk. A hnunglam enin ka nui ver ver a, nakin a a bialnu la ni tur chu a vannei ngawt ang ka ti rilru ve neuh neuh. Kimkimi'n min lo la nghah tho ringin stepah hmanhmawh lo deuhin ka chho a, mahse kawngpui panna stepah an lo chho hman tawh a, an chho thui tawh hle bawk. Fredy chuan kaiin a chhoh pui hmawk hmawk a, nui chungin ka thlir reng a, ka au zui duh ta lo. 

Ka khum bawk pan ding leh nghalin bawm chu ka hawng a, keimah chauhin awm mah ila ka nui nasa kher mai. Bakilh leh bracelet te, samţawnna te a lo ni nuaih a, bengbeh te pawh a tel. Phone phawrhin thla ka la a.

[Ka lawm lutuk e..a mawi hlawm khawp mai. Nidangah chuan nangma tan chauh pawisa i hmang tawh dawn nia] tiin tawitein ka thawn a, thlalak nen thlap lawmthu ka sawi. Tlereuh ka ngaina lem lo na a uluk takin ka dahţha thlap. 

[Nakinah pawisa ka neih hunah rawng tla thei lo chi ka leisak tawh ang che] a rawn ti a, a rilru a ţhain a thianghlim a, tuman tih nat sak lo se ka ti takzet. 

"Ka zak e" ti sepin ka kun ngul a,an in gate bulah kan awm tawh. Min sawmna tih hlawhtlin ngei ka duh a, min duhsakna lantirna anih vangin ka hnial lui duh lo. Mahse kal thei tur a ka huaisenna ka sawmkhawm ve zawng zawng te kha an chau chhe leh vek tawh. 

"Lut mai mai rawh zahna tur a awm lo" dawhthei lo zetin a ti a, ka in aţanga kan chhuah dawnah ka hreh lutuk vangin min ţawng thlamuan fe tawh a, tihian an gate bulah ka tang leh. 

"Ka bulah awm tlat la khawiahmah kalsawn miah suh ang che" ka ti khar khar a, nui tet tet chungin a bu nghat nghat. A ban a vuan tlat chungin muangchangin ka kal chhet chhet a, mahse inchhung kan luh dawnah ka vawnna ka thlah. Hmuh nuam lo an lo tih ka hlau a ni. 

"E...in lo thleng Didik, chawlhni zing lehzel a mahni a ei chu a khawharthlak ka ring a, hun i insiam theih nan hma deuhah ka hrilh lawk tir che anih kha. Lokal rawh lo ţhu rawh" anu in a lo ti zung zung a, Timothy chuan hnunglam aţangin ka darah a vuan a, min nawr kalin ţhutna awl bula ka din hnuah min nem ţhu a, ka bulah duhdan deuhin a rawn ţhu ve nghal zat. 

"Nia min lo sawm a a lawmawm tawp. Ka inthlahrung lutuk tho a mahse min sawmna hnial kha nuam ka ti lo zual a" awmze nei lovin ka rak nawk nawk a ni ber. Timothy lah chuan phone a khawih a, ka tlangnel hma nan a ti nge min pui duh der lo. 

"Mahni a awm hrehawm zia ka hre tawh a, hna ka neih tirhin keipawh Aizawlah keimah chiahin ka awm a, ka chhungte kan khaw lamah an awm a, min rawn tlawh zawk a an haw leh vat a, mahni chauh a awm chuan inchhung hi a reh ngawih ngawih mai ni" anu bawk chuan a ti leh a, a hmelţha a, a fel bawk nen a fate ho an vannei takzet. Mahse keipawh ka nu in min ngaihtuah takzet tih ka hria, a bulah awm lo mah ila a hmangaihnain min uap tlat tho. 

"I inluah thar chu eng nge an? A nawm dawn hmel em?" tiin apa in min lo zawt ve thung.

"Aw nuam lutuk..in neitute an felin kan inpawh a, kawmthlang a an thlai chin an lak apiangin min pe ve ziah bawk a, mahni chauhin awm mah ila a thlamuanthlak" ka ti a, tlemin ka zamna a nep ta deuh. 

"I khuahar hman lo tawp ang. Kha zan tin a rawn leng peih tur kan nei alawm, kan rawn tir ziah dawn nia" nui har har chungin Timothy-a u chiah Remremi'n a lo ti a, chhan dan ka thiam si lo va ka nui ve ringawt. Naupang min tih vanga a nau thlah tur a min ti tu an upa ber Marie erawh a ţhu tum bur reng a, min hmu ang paw'n a awm lo. Phone a hmet mawlh mawlh reng a, tunah phei chuan a senior tawh a, inchhungah a lal ang a hrawn a hrehawm sawt maithei mahse hman ang khan ka hlau tawh lo. Hlauh tam tak ka neih laia hlauhna min siam sak belh tu a ni a, a vau zam mai mai theih a awm ka tum tawh bik lo. 

Chaw ei lai paw'n Marie chu a ngawi tlat a, min la en duh chuang lo. A ţhian emaw a bialnu leh nupui tur emaw ka ni miah lo chung a min ngaithei lo ve em em hi mak ka tih rualin ka thiam ve tho a, khawsak en chi anih phei chuan ka tling lo sa bal. Mahse duh vang reng a rethei kan ni lo va, kan sual bik vang a rethei kan ni lo. Chuvang chuan inringtawk tak a awm ka tum lui tlat. 

Chaw eikhamah an phallo chung zak chung chungin thleng ka sil lui a, Remremi'n a ti fel ve thung. A tihfel zawhah pangai takin min chhuahsan mai a, ka bulah Timothy a ding ve tlat a, ka hrilh lawk ang khan ka hlatah a ala awm lo. 

"Marie kha lungawi lohna a nei em ni?" ka ti ser ser a, an hriat phak ka hlauh nen "Saw saw pasal a mamawh" a awki ngai patin a lo ti ve thung a, rawng tawkin ka kiu in ka nghawk. 

"I ţawng ring lutuk. A hriat phak chuan a mood a fu lo lehzual dawn sin" tiin ka khak a, "Nuam tih loh phah nan hmang duh suh. Mi tih tlangnel a thiam vak lo va, a haw hran lo ang che" a ti liam satliah a, ho a tih hmel viau.

A phone ken lai chu a nghawr der der a, ka hawk dak bawk a hmeichhe hming ka hmu hman hram. 

"Ka rei lo ang" ti supin choka aţangin a chhuak daih lehnghal a, tu hmeichhia mah an ngaih a ţha bik lovang. 

Kut ka sil laiin ka hmuh duh loh ber Marie a rawn lut a, filter awmna lam pan ding nghalin tui a in a, chhuah mai nachang ka hre bik lo. Hlau tawh lo mah ila zamna ka la nei a nih hmel. 

"Ka awm lo ţep tawh" a tih chuan a dinna lam ka hawi vut a, a aw a nem lo hle. Midang an awm miau loh vangin min bia anih ka ring ngawt a, min melh ve tak ranah chuan ka ring sual lo tih ka hria. 

"Ka hna vangin khaw hranah ka awm dawn a, in la naupang deuh hlek ka la ti tho" a ti a, ka chhang let lo na a ka sawi tawh ang khan ka hlau tawh bik lo. 

"Lehkhazir zawk rawh u..hna inneih hunah chauh inkawp ula in hlim zawk ang. Tun a in inkawp lui tlat anih chuan inhma hun tam tak a ti chhe zawk ang. Duhsak bik ka nei lo va, ka nau tan hian ka duh lo hran lo che. In khawsak ka hria a, nang phei chu zir nasat i ngai lehzual. In hma hun ka thlirpui vang zawk cheu anih hi" ti a min hrilh pahin ka bulah a rawn ding ve a, "Engtia rei nge in daih dawn in hre miah lo a nia. Tun a in hmangaih deuh te hi nakinah chuan hmelhriat loh mikhual ang maiin in en luih a la ngai a, nakin a hriat ngai loh ang a in la en mai mai tur te kha in hma hun tihchhiat tir suh u. Ka nau hi i hma hun tih chhiat tir lo la, ka nau hma hun hi tihchhiat sak suh. Inkawp tawh rih lo ula in tan a ţha ve ve. Nang chu ni ila ţha deuhin lehkha ka zir zawk ang" mei nei deuh hian a ti a, thinrim hmel pu lo mahse a ţawng duh dan chu dawn sawn a nuam chuang lo. 

"Lehkhazir nachang hre lo lek a inkawp turah min ngai aniang chu. Mihring kan inang lo va, keini chuan kan hma hun atan kan zir ţhat phah daih maithei a, thil hi kawng khat chiah thlir loh tur. Kawng hrang hrang a awm thluah a, a ţha lai ho lak khawm thiam a pawimawh zawk" ka ti ve ngat a, ka chhungte leh ţhiante ni miah lo phei chu in thunun tir ka tum tawh lo. Ka duh bak thleng thleng min nawr phei chuan ka runluih duh zawk hial ang. 

"I kawng sawi hrang hrang kha ka zawh vek tawh. Chuvang tak chuan ka sawi tak ngaihdan kha ka neih phah. Ka lawm lo che a ni lo va, lawm loh na chhan tur che ka nei lo. Mahse ka thusawi hi awih ula in inchhir lo zawk ang. Ka kal hmain Timothy pawh ka ti ti pui ang. I sil zawh tawh chuan rawn ţhu hahdam ve tawh rawh" a ti a, a chhuah hnu pawhin ka din ngaiin ka la ding reng. 

Timothy a rawn luh chuan ka lo melh ram ram a, "Eng nge?" ti supin min rawn pan hnai a, ka hmaah min si lo chauhin a ding. 

"Tu nge i biak kha?" ka ti chang fak a, ka melh chho vah a, a awmdan khan min ti lungawi chiah lo bawk nen Marie nen kan inbiak hnu phei chuan ka lungawi lo lehzual. 

"Ţhian mai mai anih kha"

"Ţhian mai mai biak dawnin kalsawn kher a ngai em ni? Ka hriat atan a pawi tur awm lo se i phone i kal pui daih lo vang" ka la ti khar khar a, mipa hi chu a chang chuan an hahthlak ve ngawt mai. 

"Tu nge i biak kha?" chhanna ka dawn loh vangin ka zawt nawn leh. A mitah tak ka melh kal bawk nen tlemin a zam hmel deuh tawh a, chu chuan ngaih a ti ţha lo lehzual. 

"Midang hriat loh a sawi ngai khawp khawp chu a va pawimawh awm ve" chaltlai deuhin ka ti ve ngat a, a sawi vek hma loh chu zawh char char ka tum. 

"Thil ho te..i zawh tawh chuan chhuak ila" tih pah a min kuah a tum chu a kut ka benthlak sak a, a thaw hak a, ning mahse ka hriatchian vek hma chu ka beidawng dawn bik lo. 

"I ţhian chauh a ni lo tiraw?" ti a ka zawh chuan lu a thing a, ka ngaihdan vel a ni. Ţhian chiah ni se ka hriat ve phak lohah tu hmeichhia mah a be lo tawp ang. 

CONT...