THROUGH THICK AND THIN-16

THROUGH THICK AND THIN-16

DIDIKI

"Tenawm lutuk..rintlak hle ang a insawi chung a midang be dawk dawk tho si. Ka hre hma hlauh a a tihzia hle mai, khanu kha i biak chhung chu min rawn be ve tawh suh ang che" ka thin a rim takzet a, ţawng rin palh ka hlau tho bawk nen, zawi te si sehchilh rap rap siin ka sawi zo thei hram. 

"Ka duh zawk che" 

"I duhthlan tur zingah ka tel ve lo. Hmeichhia te hi mipa in in duh ber inthlan turin in hmaah kan ding tlar ţhap ngai reng reng lo. Rintlak leh innghahna tlak a kan ngaih te, kan hmangaih te lakah kan rinawm tlat a, kan neih zawng zawng kan pe vek chungin phut let kan nei ngai lo. Mi thinlung i neihsak tawh anih chuan a kehchhiat loh nan enkawl ţhat sak viau zawk ta che. Hmeichhia te hi football ang a pet kual mai mai tur kan ni bik lo" ka ti duah a, min rawn hnaih leh phei chuan tawlh hnun na tur hmun awl awm se ka ti kher mai. 

"I thinlung ka neihsak tawh che tihna ni maw?" tiin nui suk chungin min zawt a, a chhungte awm hnai lo se chuan a nui hmel nawh reh nan hrim hrim ka hnek pawp duh ngei ang. 

"Min rawn be ve tawh lo la a ni mai. Min ngaihsak âwmin awm der vel tawh lo la, hmeichhe dang a ruk a biak dawk dawk a ngai lo tihna a ni mai. Zalen deuhin i be thei tawh ang" thinrim zet a ka tih hmawk hmawk hnu chuan a nui chhuak ta hawk a. 

"Ka cousin anih kha. I patea te in a i awm lai paw'n ka lo hruai tawh kha" ti a min hrilhfiah chung pawhin ka bang bo khawp mai. 

"Hmeichhia i rawn hruai awm ka hre lo" ka lo ti ha a, a rawn leng tam lo va, a rawn len ve chhunah pawh hmeichhia a rawn hruai ngai lo. 

"Hmeichhia a ni hleinem" a la ti tak deuh deuh a, ka hrilhhai lutuk chu ka inkhawngaih zawk. 

"A hming tawpah 'i' a awm kha. Hmeichhia ni lo se a awm tawp nang" tiin ka la hnial ve zel a, ka ngaihtuahna buai nuai vang chuan ka khap fak fak tawh. 

"Ka dah uang mai mai nih kha. Nghaktea a lawm ka biak" a tih takah chuan awlsam zetin ka hrechhuak leh ang lawi a.

"Parlawmi itih kha Nghaktea a ni tak tak maw?" 

"Ka call ang a i be dawn nia" a ti a, a ning deuh tawh a nih hmel. Ka dang duh bik lo, chiang tawkin hre ve vek ila rilru a nuam deuh ang chu. 

"Kha be rawh" ti hlukin a phone leh ka beng a hmehbel chawt chawt a, ka lo vuan vat. 

"I rawn call leh kher a ka thil download a buai vek ang e" a rawn ti nghal bui bui a, a aw thum dan aţang ringawt pawhin Nghaktea a ni tih ka hre nghal. Ka nuih a za ru viau na a ka insum lui ve tlat. 

"Inti pa deuhin chak tawk tawkin bike i khalh a, bialnu i nei duah a, i landanah lah pa loh i hlau thei si, i aw a thum ţha bawk ngati nge Parlawmi inih tak daih" 

"Ehe...Lalrindik" ka aw hriat a inbeisei loh hmel kher mai. Ka hming a min koh zawh hnu chuan a nui zui vak vak a, a landan ka mitthla a, fiamthu pawh ni se a hming tur a an thlan berkher chu a inhmeh lo takzet. 

"In tharah ka awm tawh tih i hre reng awm sia, i va rawn inlan ve lo ve. Chaw te rawn ei ve ta che" ka ti a, Timothy-a te hian chhung an ngah a, chung ho zingah chuan Nghaktea hming hi a sawi zin pawl a ni. Timothy-a te in a kan kal changin a rawnkal veleh zeuh ţhin a, amah hi nel a awlsam. Hmanah kha chuan kan inhmuh kher loh pawhin min rawn be ve fo a, keiman pawh lutuk lo mah ila rei deuh min hre tawh ang maiin min be ţhin. 

"Tunlai chu chaw ka heh lutuk a, ka nu a zak rih a midang in a chaw ei chhuah a la phal lo deuh a, ka chaw eitui zual a reh hunah ka rawn ei ang" nui huah huah chungin a rawn ti a, keipawh tawite in ka lo nui ve. 

"Pawi hleinem i ei ţeuh ang a ni mai lawm. Hun i neih remchan veleg chaw ei tur kher lo paw'n rawn la leng ve rawh aw" tiin ka sawm nawn leh a, mahni a awm nuam ti chi ka ni na a ka in a fal a, a la hlimchhawn bawk nen inleng neih nuam ka ti rih zawk. 

"Tehreng mai...min hmuh hunah phu zawk kher lo la aw"

"Engvangin?" 

"Ka danglam tawh...i bialpa kha i ţhen phah rum rum ang tih te ka hlau a, in inkar a khik phah chuan nuam ka ti dawn lo a nia" a rawn tih leh lai chuan ka lo nui vak. A danglam ve thei lo reng reng. 

"Hlauthawng suh in inang emai" uar fe in ka lo ti veleh vat.

"Inang min tih zel vang alawm danglamna ka zawn. Ka lu ka nawr kawlh vek"

"Eng nga?" ka ti ta hluai a, a sam a ti sei ve ţhin hle sia, han ţawn vel te kha nalh a ti teh tlat a. 

"Ni e ka nawr kawlh vek. Ka bialnu hian sam chul tur a nei tawh lo va,a hawi a hawi mai" a tih chuan kan nui leh rih ţhin. Rei vak lo kan inbe zui a, rawn len a intiam hnuah kan inbiakna ti tawp hmasa tu zawkah ka ţang a, Timothy-a awmah phone chu na zetin ka nem bet zui zat. Ka kut nen a lo vuan kawp vat a, lungawi tawh angin la awm duh lo mah ila ka ngaih a ţha veng veng tawh thung. 

Min thlah zawkin a let lehnghal a, keimah a ka awm rak rak laiin Lapuii bawkin min rawn biak a tum leh. Lak loh ka tum zet na a chanchin ka hriat duh tho vangin phur vak lovin ka chhang a, a rawn phur viau thung. 

"Ka be tawh sin" ring leng lawng hian a rawn ti a, sawi zel turin ka lo hrilh. 

"Ka call a min be ţha vak lo na a bul ţanna chauh a nia, ka hmuh khat thu te ka hrilh chiam a, ka duh zia zawng zawng te nen. Bialnu a nei tih ka hriat thu te pawh ka sawi tlang vek. A chang leh min chhang lo va, a chang leh a rul tawk chiahin min chhang a, ka ţhiannu nen nizanah kan inchawi bawk sia, ka biak zel theih ngei ngei a ngai" a rawn ti zawt zawt a, amah vang hian buaina ka tawk ang tih ka hlau takzet. 

"Eng nge in inchawi chu?" 

"Pawisa...pawisa tam ve deuh kan inchawi a, min duh tur a ka siam theih phawt chuan ka chak zawk tihna a ni mai. Pawisa aimah chuan chak zawk kha a pawimawh. Bakah amah kha ka duh chi a ni hrim hrim a, ka duh tawh chu ka bawh huam huam zel kha i hre mai em?" nui har har chungin a rawn ti leh a, beidawn lutuk vangin ka lo thaw halh ringawt. A hmelţhain a pian a nalh a, a hleitling zeih zawih hle bawk. Kei aiin a sang fe zawk a, Kimkimi ai paw'n a sang mah zawk ang. A nalh reuh em vangin hmuh a nuam an ti ţhin a, awm ţha duh phei se la chu pasal ţha deuh a nei thei ang. A landan a zahpuiawm lohin an khawsa thei a, a duh tawh birh tlut chi a ni bawk nen thil pawi a thlen phah ka hlau takzet a ni. 

"I biak reng chuan a block daih mai tur che sin" tiin ka sawi ţhaih a, an phu em vangin keichuan hlim dun reng turin ka duh. 

"Sim card lei tur a tam emai. Bakah a chhungte aţang paw'n a biak theih a, an inah a len theih bawk a, khalam zawngah kha chuan min ngaihtuah suh" ngaihsam zet hian a ti leh a, ka thinrim lek lek tawh.

"Be tawh lo la a ni mai. Bialnu nei lo se chu thuhran, i biak luih zel dawn chuan dan theih dan che ka ngaihtuah ve zel dawn a nia" ka ti khar khar a, tlemin hlau ve deuh se ka duh hrim hrim. 

"Tikhan min ti lo teh. I thuruk ka kawl ţeuh hi aw..khatiangin ţhiante an ti ngai lo. Nupui a neih hma chu duh duhin kan la be thei ka tih tawh kha. Min dan tum buai lo mai rawh ka ti lui dawn tho tho" a ti a, luhlul a chhuah ve tlat. 

"Ţhian karah chuan engpawh a thleng thei a, i hlat tak vang maia a thuruk i vawn sak thei lo anih chuan i nep hle tihna anih chu. Inkawm tam tawh loh vang a a thuruk sawi chhuah sak zawt zawt kha a hniam thlak lutuk. Khatiang mi kha chuan tupawh kawm se tu lakah mah an rinawm loh ang. Ka sawi ang chu i ni ve anih chuan thil tam takah phak lo che mah ila ka hmu hniam nghal ringawt che" thinrim zetin ka ti a, chhungte paw'n an thunun theih loh hi ka thunun thei kher lo vang mahse a huang tau lutuk tur chu ka dang thei tho ang. 

"Min phatsan hmasak chuan ka phatsan hreh bik lo che. A bialnu kha i ţhiannu pawh lo ni se i ţhiannu ka ni ve tho a, ka duh ve tho a, bakah kan inchawi leh kher kher bawk nen. Tun ţum chu min dang lo mai rawh" a ti a, a tawp zui hmak. Phone hum ngawt ngawtin ka ngaihtuahna ka hmang nasa hle a, ka thuruk a tarlang vek anih pawhin keimah ngeiin ka lo tih nat tawhna rulh letna a ni mai a, engpawh huamin a kal thui lutuk loh dan tur ka zawng tho tho ang. 

"A rawn be tawh che a, a number chu i la hria ang a, rawn biak leh a tum che chuan lo chhang tawh lo la, i chhungte hnenah a hming hrilh lawk la, Lapuii tihin rawn hmuh che a tum anih chuan i awm loh thu i hrilh tir zel dawn nia" Dinpuia ka be ta ringawt. Kimkimi hriat loh thil tam tak a hre tawh a, hrilh lawk hrim hrim ka duh a ni. 

"Ka block nghal daih" a tih takah chuan ka thaw huai a, mahse a beidawng duh dawn lo tih ka hre tho. Hmeichhe nasa hi chu mipa aimahin an hlauhawm thei. A naupanna rilru tam tak a la paih lo va, dawr a a duh duh a lei thei ang hian a duh chu nei thei turah a in ngai ringawt zel. Atthlak tak takin a che fo a, midang pawi a sawi chang a an tih let ve chuan anu an hmachhawn a ngai ţhin. Anu in a duh duh a pek miau vangin engkim nei theiah a in ngai a, a ţhan hnan tawh a ni ber. Mi bialpa chhuhsak phei chu pawi a tih loh ber pawl a ni. 

"A ţhat chu..number dang hmang a a lo biak che pawhin i block zel dawn nia. Kimkimi ngaih a ţha lo hma ţhin si a kha thil kha hrilh kher lo la, tih tawp dan ka lo ngaihtuah ang" ka ti a, be miah lo turin ka hrilh mawlh mawlh. Mipa hi chuan hmeichhe dang han biak mai an awlsam a, biak mai mai leh zanhnih khat han awmpui zeuh kha pawi a tih loh ka hlau a ni. 

"Awle kan in a rawnkal tur chu lo dang tlat rawh. Ka chhuak hnai tawh a, ka chhungte kal tlangin ka in thar kha a lo hre palh reu reu ang e" thupe aw zet hian a ti a, ka tibuai em a hmeichhe pakhat dang turin thu min pe hreh bik lo va, ka hnial ngam lo bawk. 

"Ka lo tum ang. Ka thei lo anih pawhin ka lo tum tho ang" nghet charh a ka tih hnuah kan inbiakna ka ti tawp a, thil ţha lo tak tak ka lo tih ţhin te khan min vaw let mek zel anih hi. 

"Nuam i va tih loh hmel ve" party na hmunah ka awm leh vang tawh. A chang chuan tawp san duh viau mah ila a theih loh chang a awm ţhin. 

"Lapuii nen kan rawnkal a" ka tih chuan a hawi kual a, pawn a ka koh chhuah daih vangin zawng vak vak mahse a hmu lo vang. 

"In lo la inkawp reng emaw ka tia, engtik laiin nge in lo inţhen?" tiin ka zawt a, a mitmengah a rui tawh tih ka hria a, keipawn tlem chu ka in. Rawn len nan tak an hman ka hlauh vangin ka inah ka ko duh lo va, ka patea te in a la awm rengah min ngai ang, Lapuii'n a hrilh anih loh chuan. Hepa ka hmuh duh vang a kal ka nih rualin intih thawven ka duh vang te pawh a ni tel. Midang puihna dil turin ka thil tih te kha tumah ka hrilh ngam lo va, Timothy-a hnenah takngial pawh ka sawi chhuak ngam tawh lo. Ka ţhian ka ti na a, ka ţhian ve tho vangin ka rilru a hahin ka hlau veleh thung. Kan thil tih te hi kan chungah a let ve zel niin a lang. 

"Kan inţhen reng reng lo. Chhuak lo turin a intiam vek a, zawngi chu dawt min hrilh a ni maw" thinrim zetin a ti nghal bawrh bawrh a, thawh mai a tum chu na takin ka lo pawt ţhu leh. 

"Mipa dang biak a nei sia in inţhen tawh anih dawn hi ka lo tia" ka tih leh hnu phei chuan keimah thleng thlengin a nung chung ngat a min eizawh vek duh hmel a pu. 

"Tu nge a biak chu? A rinawm zia a sawi cham chi a, a rukin biak a nei maw?" ka hmai bul setah ring zetin a au a, ner nang chungin ka tawlh hnung dawrh. Hausa lo se chuan Lapuii hian a kawp lul lovang. Tu hmeichhia mahin an kawp lo ang. A mawl bel bual si, mi hausa lawm hrim hrim an tam bawk a an hausakna hian a chhan mai mai chauh. 

"Au vak vak suh midangin an hre phak ang a sin. Tun a mi pawh hi a rukin ka hrilh che anih hi. Lapuii hnenah ka hming sawi lang miah lo la, a biak pa hmuh a tum apiangin i dan zel theih nan ka hrilh zel ang che" thlem ti tih a ka tih chuan phur zet hian a bu zuk zuk a, min rawn hnaihin a beng a chhi ran. 

"A biak tum chu Dinpuia a nia, vawikhat vel chu a be tawh maithei" ka ti dek dek a, "Dinpuia maw? Tu Dinpuia? Khawi a mi nge?" a lo ti zung zung a, tawlh hlat duh viau mah ila hmun awl a awm tawh lo. 

"Au vak vak suh ka tih che" ka ti vin ţhat a, thuawih takin lu a bu leh nghat nghat. 

"A phone endik sak la a ţhat ka ring. Dinpuia number delete sak daih la, vau ve deuh bawk la, a duh duh leisak tawh rih lo la" ka ti leh a, chhungten an pe reng seng lo va, a dil reng ngam bik lo bawk. Roek-a lo hi chu mamawh lai a pur tur dang a hre bik lo va, a vau zam mai theih ka beisei a ni. Kei tak pawh hian Timothy ka bum reng thei dawn lo va, hetiang hmunah hian ka kal mang tawh lo vang. Chuvang tak te pawh chuan Roeka hi hmu ka ni. 

"Ka lo ti vek ang. I hming ka sawi lo ang a, phone ka check sak ang a, nangin tih dan tur min rawn hrilh zel ang"

"Ni chiah e. Ka hming i sawi chuan Lapuii'n min ringhlel dawn a, a kalna tur min hrilh duh tawh dawn si lo va, ka hming sawi lang miah lo la chuan keiin a kalna tur a rukin ka rawn hrilh zel ang che" tiin naupang lehkhazir tir ang mai a chiangin ka hrilh fiah a, tihsual a neih loh ka beisei. 

"Awle tunah a chhungah a awm maw?"

"Awm e mahse Dinpuia chungchang i la sawi thiang lo. A phone i en sak phawt ang a, Dinpuia a biakna i hmuh fuh hunah i zawt chauh dawn nia. I zawt chhuak thei lo anih pawhin a kalna tur chin ka hrilh zel dawn tho che a, lo dang char char ang che. Dinpuia hian a duh miah lo a, thiam lohna a nei lo tih hre tel bawk la, a pawimawh ber i bialnu chan i duh loh chuan a ruk thei ang ber a kan inbiak a ngai bawk ang" tiin rem ka ruat zat zat a, ka remruatna ang ang a pawm thlap vek. 

"Chuan in lamah min hmu turin rawn kal hlek suh ang che" hriam hrakin ka ti leh a, chu pawh chu a lo pawm leh thlap. Ka nui sak a, a pawi lo sawi tawh mah ila a nat lehna tur ka dang rih thei tal a lawm. Ka ţhianţha ber ania, ka thil tih a hriat kher a ngai lo. Lawmthu min hrilh ka phut lo va, ti hian a rukin ka veng tlat ang. Chhungte vangin a buai tawk tawh a, dawrawm chi a ni bawk si, Lapuii te ang hmeichhe nasa hmachhawn turin ka duh lo. Ka thuruk a hriat chhuah palh a min hua anih pawhin ka chan tur rengah ka ngai tawh ang a, ka ven zawm reng tho ang. Lapuii hian pawi sak em em a nei loh zia ka hre chiang a, a inrawlh hreh hauh lo vang. 

Ka thil tih ruk hre miah lovin min phur haw a, a ţhianten min zui na a tute nge an nih ka ngaihven lo. Lapuii pawh a nui uar uar reng a, in nei tuten thawm an hriat hlauin kawngpuiah ka chhuk a, keimahin step thui zawk ka zawh mai ang ka ti rilru a ni. A ţhian dang te rak nawk nawk thawm chu ngaithla mang lovin ka chhuk hmawk hmawk a, phone ka en pah a, Timothy-a message a lo awm ţeuh tawh. Nui ver ver chungin pakhat te te in ka chhiar a, ho deuh deuh min lo thawn ţeuh. A theih ang ang ka chhang pah mawlh mawlh a, ka chhuk thla chak pawh a in ka thleng har lo. 

Kawngkhar kalhna ka hawn veleh step a rawn chhuk ve thawm ka hria a, Timothy-a anih ringin hlauthawng deuhin ka hawi let a, Timothy ai pawh a ka hlauh lehzual Lalawma a lo ni. 

"Mak i va tih hmel ve. Ka zawn hmuh theih che i ring lo em ni?" ngeiawm zet hian a ti a, mak ka tihna a la reh loh vangin chhan lawk nachang hre lovin ka en ngawt ngawt ringawt. 

"Min tlanchhiatsan rei tawh bawk sia ka ngai tawh che a, i ţhiannu nen a in haw kha ka rawn zui ve zel che a, step ah khan phone chauh ngaihtuah lo la chu ka thawm i hria ang mawle, a van pawi tak" a ti leh a, a awki chu a hma ang chiahin a la ngeiawm reng. 

"In bulah ka awm tawh lo va, thu min pe kual thei tawh lo. Ka hmu chak em em lo bawk che a, chuvang chuan mangţha le" ka ti a, kawngkhar ka pawt hawng chiah tihin ka hnunglam aţangin na zetin min nam a, chhuatah ka bawk lut thlawp.

Rawn lut ve in kawngkhar a kalh a, ka samah ţhamin min pawt tho lawp a, ka hmui a hup nghal hmiah bawk. Khum lamah min pawt phei a, sual let ve mah ila awmzia a awm lo hle. Khuma ka kawr dahin ka hmui a tuam phui a, ka kut a hnung khirh lai te chuan theih tawpin ka tal ve fat fat, ka tal nasat pauh leh ka ban a na ting a ni mai. Mahse chu chu pawisa lovin tal chhuah tumin ka nei ţang ţang a, au chhuah ka tum nasa hle bawk. 

Ka ţan nasat em vangin a duh angin min ti thei bik lo va, a thin in a tuar loh chinah min kuai her lawpin ka hmaiah a hnek pawp a, khumah ka let thla tawp a, nikhua ka hre vek na a ka lu a hai nasa takzet. Dim lo zetin bawkkhup zawngin min kuai a, a kut a phuar zui mawlh mawlh a, ka mittui vangin ka khawhmuh a phei ruai a, zangthal zawng a min muttir leh hnu chuan ka hah lutuk vang te, ka ţah a chhuah lutuk vang te, thinrimna leh hlauhna inpawlh nuk vang te chuan ka thawk a rangin ka awm a insep lawp lawp a, nui vur vur chung a ka mal a chul lai chuan ka theih tawp a na in ka tlawh pawp a, a tlu ve lek lek. Thinrim zetin min melh khur a, a mitmeng mawlh mai chu a hlauhawm takzet. Ka kawr awmah ţhamin min pawt kang a, a vawihnih nan min hnek leh a, min thlah rualin khumah ka let thla leh hnawk a, ka chau takzet. Mahse ka inti harh lui ţang ţang. Min khawih leh lai chuan lo tlawh ve bawk mah ila ka tlawh na zo tawh lo. Ka awm bawr lang vek khawp a ka kawr hlim chhoin ka taksa a zut kual a, nghet zetin mit ka chhing tlat a, ţap ri thei lo mah ila ka mittui luang chuan ka rilru put hmang tam tak a lanchhuah tir ngei ang. 

Ka chau tawh bawk a ka kekawr pawh awlsam takin a phelh thei a, hlauhna leh natna chauh lo chu engmah dang ka hre thei lo. Au ka tumin ka aw a chhuak thei bawk si lo, ka mangangin ţanpui tu ka mamawh takzet. 

Ka hlauh ber ţhin chu ka chungah a thleng ta ngei. Duhtawkin min pawngsual a, bei let nasa mah ila awmzia a nei ve tawh lo. Ka inveng ve ţang ţang ţhin a, duh hunah ka inbual ve ngam ngai lo va, a awm loh hun zel chan a ngai a, in a ka awm changin ka pindanah ka inkalh khum tlat a, min hauh phah fo a, kan taksa a in nawk palh hlau reng rengin nitin ka hel zak zak reng a, chaw ei lai takngial paw'n a hmel ka en ngam ngai lo. Tih theih ka neih tawh loh zia hria in min phuar na a phelh a, ka hmui tuamna erawh a phelh duh chuang lo. 

"I sawichhuah chuan mualpho tur zawk kan hre ve ve. Tuman an melh peih ngai loh kha an melh hrek hrek tawh mai ang che" ngeiawm zet a nui chung hian a ti a, min vau zawm leh khur khur bawk. Min thah hial pawh a hreh loh thu thlengin a sawichhuak a, che lovin ka ngaithla tawp a, k ât ruai vangin a thusawi inzawm lo tak tak te chu ka remkhawm thiam lo. Ka inven ve ţhinna te khan awmzia a neih loh zia chiang takin ka hria a, thil dang erawh hriat mumal ka nei lo. 

Min chhuahsan hnu chuan ka hmui tuamna phelh tumin ka ban tih chet ka tum a, a nat em vangin ka ti che thei mai lo. Muangchangin ka chet hret hret a, a nat zawk chang chuan ka chawl leh det ţhin. Hnunglam a ka kut phuar tlat chungin a chang leh zangthalin min dah a, a changin saisirin min awm tir a, chuvang chuan a na lehzual hle. Ka beih ţang ţang hnuah harsa ti tak chungin ka hmui tuamna ka nghawng thlengin ka pawt thla thei hram a, au vak vak mah ila awmzia a neih tawh dawn chuan loh vangin thawm chhe te mah ka chhuah lo. Ka thaw hlawp hlawp a, thil thleng zawng zawng kha chiang tak a rawn inlar chhawk sekin thlanin min bual huh vek mahse ka khur nasa hle thung. Ka piah lawk a blanket inthlep chu ka ban a, ka ban a nat em vangin ka ţhen leh tlawk tlawk ţhin. Ka che reng reng chu a muangin mumal ka nei lo va, mahse kawngkhar a ri rek ka hriat rual chuan rang zet a ţhu chhuakin khum lu kil lam bang si rak thlengin ka tawlh a, blanket ban leh rawk rawkin ka inkhuh a, ka hlauh em vang nge ka na ka hre chang lo va, ka khur nasa zual sauh thung. Kawngkhar lam ka melh ran a, tumah an rawn lut lo. Zawi tein a ri leh rek ţhin a, a rik apiangin ka lo phu nasa hle ţhin. 

"Didik" kawngkhar a inhawng zui rawp a, ka phu nasa kher mai. Ka taksa a la khur der der reng a, tawlh hnunna tur hmun awl awm tawh miah lo mahse hnung lamah ka tawlh char char. 

Ka awmdan a hmuh chuan a ţe ţhat a, min rawn hnaih mai lovin "Timothy" ti tuarh tuarh chungin a tlan chhuak leh a, a awmdan chu ka en reng a, ka chesawn ngam chuang lo. Ka awmdan tak pawh ka sawithiam lo, ka ruak huai a, hlauhna chauh lo chu thil dang engmah ka hre lo. 

Kawngkhar lam ngawt ka la melh ran reng a, Timothy a rawn luh ve chuan min rawn hnaih thuai thuai a, "Ngati nge?" ti a min zawt mawlh mawlh reng chungin ka khabe ah a dawm a, a kut lehlam a ka sam min tuai mam sak lai chuan mittui ka khaw hmuh a ti phe ruai a, ka taksa mai bakah ka rilru natna te zawi zawi a lo let lehin ka mittui a luang a, dan tumna ka nei lo va, dan tum mah ila ka thei chuang lo vang. 

"Kimkim ngati nge? Tu nge sawi sa che? Nizanah tu nge rawn kal?" tiin Kimkimi chuan min zawt ve mawlh mawlh a, an zawhna chhan tumin ka kâ ka ang a, ka hmui a khur hlak hlak a, zawi te te a thawm chhuah zeuh zeuhin ka ţapchhuak ta nge nge a. Timothy chuan min kuah vat a, ka taksa a pawm beh tlat hnu chuan ka tha khur nasa lutuk pawh a hriat theih ka ring. Min hnem chang apianga a tih ziah dangin ka hnung chul tumin ka hnungzangah a kut a dah a, mahse nidang angin ka hnung a chul lo. Min kuah nghet zual sauh zawk a ni tih ka hre thei a, "Tu nge hetianga ti che?" ti a ka beng bul a a phun sup chuan zawi viau mahse a thinrim zia a hriat hle thung. 

Ka inbengdai deuh ni a a hriat hnuah blanket chuang bang la awm te chu pawt marin ka hnung khuh nan a hmang a, min kuahna a thlah hnuah ka biangah dawmin ka chal a fawp vang vang. 

"Tu nge? Tu nge lokal? Tu nge hetiang a ti tu che hi?" ti a min zawh mawlh mawlh hnuah pawh hmui ka chip tlat a, an pahnih chuan ka en tawn zak zak reng.

"Sawi rawh Didik..nangmah chauhin kan dah tawh dawn lo che a, Timothy-a nen kan awm reng tawh dawn a, tumah hlau suh" Kimkimi chuan a ti a, rei tak chhung ka sawi theih nan min thlem zui a, Timothy phei chuan thinrimin min vin khur khur hman hial. Ka ţhiannu chuan beidawng duh lovin min zawt nawn sek a, min ngaihtuahzia ka hmuh chuan natna bawk a lo let leh a, mittui a hnai leh uar tawh. Ka awmdan hmu reng chungin min zawt zawm zel a, Lalawma hming chu ka sawichhuak ta nge nge a. 

"A rawn lut a..min pawng sual a" aw khur der der chungin ka phun sep sep a, min vau thu ka sawi tel hma leh engtin mah ti lo tur a ka tih hmain Timothy a tlanchhuak hman a, Kimkimi'n umzui mahse amah chauhin a rawn let leh.

"Thil atthlak a ti lo vang" a tih sep hnuah khumah rawn ţhu thlain muangchangin min min ban a, ani pawhin dim tein ka sam min hui mam sak a, "Ka zawt tawh rih lo ang che. Nizan leh tukin thleng a a biak theih loh che vangin Timothy kha a mangang a, chanchin min hrilh hnuah biak che kan tum leh a, phone ri i hre hrim hrim em?" ti a min zawh chuan lu ka thing a, ka silent lo na a a ri engmah ka hre lo. Kimkimi a rawn luh khan khua a var tawh tih ka hre chauh a, dar zat phei chu rin ngaihna ka hre lo. 

"Hawh...lo mu ţha rawh. Ka lo pui ang che" a tih hnuah min buaipui zui sawk sawk a, ka taksa ah na lo lai a awm mang lo va, chu chu hrethiamin dim tein a che a, min mut ţhat tir lai te chuan a insuk leh hraih ţhin. Ka mut fel veleh ka bulah ţhuin ka sam a chul a, "Hre lawk ila chu ka lo riak mai tur. A thil tih man hi a la hmu em em ang. Keinin kan hrem thei lo anih pawhin Pathianin a la hrem tho tho ang" a ti melh melh a, a reh zui vang vang. Ka blanket sinlai siam ţha in ka dar thlengin a khuh phui vek a, a tho tharh a, no leh lapua te nen a rawn let leh vat a, ngawi rengin lapaw huhin ka hmai a hru fai zui mawlh mawlh. 

Rei tak chhung kan pahnih a kan rilru ve ve kan kawm melh melh hnu chuan Kimkimi phone riin min hruai peng a, mumal rih lo viau mah ila a hmel awmdan leh inthlakthleng dan te chu ka zir thiam vek a, thu lawmawm a dawng lo tih ka hria. 

"Eng nge?" a biak zawh veleh chau tak chungin ka lo zawt vat. 

"Timothy kha...tunah chuan lockup ah a awm" hnuai lam bih tlat chungin a phun sep a, a thang rei ka ti reng a ni. Ka thusawi ngaithla zo hman se chuan pawi a khawih thui lo ni mai tur.

CONT...