THROUGH THICK AND THIN-17

THROUGH THICK AND THIN-17

KIMKIMI

"Didik lo chhuak tawh rawh..ka nghak reng che nia, duhtawk tawh rawh" ti a ka ngen ri leh kawngkhar ka beng ri a inpawlh nawk nawk a, in neitu ten thawm an hriat ka hlau tho si ka chum ri bur bur ngam lo. 

Timothy-a chanchin kan hriat hnu lawk khan blanket a la intuam tlat chungin bathroom ah min ngen angin ka hruai lut a, darkar khat dawn a awm tawh a, chutiang zat chiah chu a blanket sin lai pawmin bathroom kawtah ka ding tawh. A chang leh a intifai ri ni awm tak, tui a in leih thawm ka hria a, a chang leh ţap hlawp hlawp ri ka hria a, a awmdan a mumal lo takzet. Thil pawi a tih hlauin ka kalsawn ngam lo va, thawm a chhuah loh hlek chuan ka ko vat vat zel. 

Kei ngei pawh ka mumal chuang lo. Ka thin a rimin ka rilru a na takzet a, chhum chhah deuh hui kian theih miah lohin min hual khup ang mai ka ni. Timothy chanchin lawmawm loh apa ngeiin min rawn hrilh leh bawk nen, ka nun a mi pawimawh ber ber ten buaina leh vanduaina nasa tak an tawk mek a, ka awm tawt lutuk te chu thaw vak vak mah ila a kian phah lo. 

Didiki patea te inah buaina a va siam a nih ka ring a, dem nachhan tur ka hre miah lo. Khum kilah blanket a inkhuh hlunin a ţhu tawp tlat a, a sam a hnawk niai a, dim lo zet a sawisak a ni tih hriat takin a hmai a dukin a vung luk a, mi â ang maiin a en ngai en tlak tlak mahse a mitah khan hlauhna leh natna chiang tak a langchhuakin a hmuh theih a, zawi te a pen ri mai mai paw'n a ti phu zawk zawk. Chu chu Didiki lo awmdan ka hmuh dan a ni a, Timothy-a hmuh dan pawh a ni. Khatiang reng reng a Didiki chhantu nei lo leh beidawng hmel kha ka la hmu ngai lo. Hmeichhe huaisen tak a ni a, harsatna tawk mawlh mawlh mahse inti chak lui zelin eng thil pawh a hmachhawn thei zel. Chuti chung chuan beidawng lutuk chhan tu ngai ngawih ngawih hmel a pu a, Timothy-a tan chuan rilru fim hmang thei lo lek a chet rum rum a awl viau ang. Ka rin aiin a dam zawk a, a hlauh zia a hriat vang ta pawh a ni maithei chiai miah lovin a buaipui hmasa thei tho. 

Zan a message a reply loh hnu chuan a mu tawh ah ngaiin ngaihţhat lohna em em a nei lo a ni awm e. Zingah lehzel a biak theih tak lohah chuan a ngaihţha lo in min rawn hrilh a, biak tum ve nghal char char mah ila ka thei bik lo. Class kal dawnah kan inhmu a, biak kan tum leh a, ka call lehzel a chhan tak lohah chuan a mangang lehzual a, endik turin kan kal ta ringawt a ni. 

Kan hmuh danin a zir lo bawk a kan rilru a na duh takzet. Pawi khawihtu sawi tir tumin kan thlem char char a, a in a fal deuh vangin vengchhung tlangval awm ţha duh lo a nih ka ring a, Lalawma anih ka ring lo hrim hrim. A hlauh em vangin a sawi lawk thei lo a, chuti chung chuan kan zawt lui zel. Timothy phei chu dawhthei tawh lovin a thinrim hman hial a, a vin chang apiangin a rukin ka lo vuan ţhin a, keimah zawkin dam deuhin ka zawh chhunzawm zel. Rei tak chhung kan zawh ngat ngat hnu chuan a sawi ta nge nge a, a thusawi chuan min ţhawngin min ti hrilhhai lehzual hle. Ka mipa hriatchian lutuk, mipa a zawng a zaidam ka tih ber ţhin Timothy takngial pawh a bialnu pawngsual anih thu leh pawngsual tu a hriat meuh chuan a inbengdai zo lo va, chhia leh ţha hriatna fim pawh pu lovin thinrim zetin a tlanchhuak a, lockup a a awm thu min rawn hrilh chiah khan a rilru fim loh tur zia ka hrechiang lehzual. Thinrimna leh rilru natna te, thil sual ti tu na tawrh tir ve duhna ten a hriatna an ti nu phut ang a, fim kakin ngaihtuahna a hmang hman lo. A che phut a, a ngaihtuahna a awm hmasa apiang tih tumin a kal chhuak a, pawi a khawih ta chiah a nih hmel. 

Keipawh chutiang tho chuan ka awm a, Didiki hnenah khan sawi tur ka hre lo. 'A ţha leh vek mai ang' ti ringawt ila eng nge ţha leh vek tur awm? 'I dam leh mai ang' ti dawn ila a hliam hi a dam leh thei dawn em ni? A taksa hliam chu a dam ngei ang mahse a thinlung a hliam hi chu a dam tawh miah lo ang a, a damchhungin a hrereng tawh ang a, hlauhna nasa tak a neih te hian damchhung a daih lo anih pawhin kum tam tak chu a daih ngei ang. Dam leh chu sawi loh natna tam tak a thlen belh zawk ang. A inrintawkna a bo ţhen ang a, a inthlahrung lehzual ang a, mipa bul a awm nuam a ti lo ang a, miin an en deuh hlekin a thil tawrh an hre vek emaw tihna a nei ang a, thil dang tam tak a la awm ang. Damchhungin nuam tih lohna a nei reng tawh maithei. Hmeichhia hian hlutna kan ngah tehlul nen ngati nge mipa te hian min hlut na chang an hriat loh ţhin le? Min veng him tur zawk a kan ngaihte hian min ti na fo a, hmeichhe zahawm inti ngaisang hle hlawm si kan zahawmna min laksak an hreh leh der si lo. Hmeichhe pawngsual hrat phei chu ka haw lehzual. Hmeichhia in a an duh lo chung an khawih luih lai hian engtin nge hrehawm an tih miah loh theih? An nupui te, an farnu te leh an nu te ngei pawhin he thil hi an tawk ve thei a ni tih an ngaihtuah thleng pha lo em maw ni? Hmeichhiain kan duh lo anih chuan tu mipa mahin min tih luih theihna an nei lo. Mi tam takin a ţhat lohna au chhuahpuiin tam tak hremna pe tawh mahse he thil hi a reh thei tak tak chuang lo anih hi. 

Ipte a ka phone ah lai nghawr det det chu ka la chhuak vat a, ka nu a lo ni.

"Aw..Nu" 

"Didiki kha kan inah rawn hruai chho mai rawh. Amah kha ngaichang la, a inpeih hunah motor in Tetea leh Bawiha ka rawnkal tir ang" a rawn tih chuan ka mittui a tla ringawt a, a chhan ka hre bik lo. Didiki ka khawngaih lutuk kha ka hnuk a ulh ţeuh reng mahse ka tih hnual zual hlauin ţap lo turin ka insum tlat. Ka kawchhung a rit nulh reng chungin ka ţhiannu tan ka inti pachang hram hram a, ka thinrim lutuk vangin a rukin insehruh ţeuh reng mah ila ţawngkam nem ka hmang char char a, ka ţah loh nan a ka indanna bang zawng zawng te chu ka nu aw ka hriat rualin a tlu nghal vek. 

"Aw ka rawn hrilh leh ang che" ka ti tham ţiak a, ka insut ri hreih bawk. 

"I ţhiannu hriatah ţap mah ta che, nang chu inti pachang rih rawh" tiin min rawn khap a, ka thawm a hriat hlauin bathroom aţangin ka tawlh hla hret. 

"Ka inti pachang ve char char tho lawm. Khawngaih viau mah ila ka la ţap lo hrim hrim. Mahse a buaina leh harsatna tawh te hi hnem ngaihna a awm lo thei lutuk a, a ţha lam sawi tur a awm ngai bawk si lo. Harsatna tenau deuh tawk an awm chuan a ţha leh mai ang kan ti liam puat thei a, mahse Didiki chu a nih ve loh hi. A harsatna min hrilhin hnem dan tur ka hre ngai lo. Hnem ngaihna awm miah lo khawp buaina tawh chu ngaihtuah ve la, a na duh ţhin dawn em asin" ka ti a, ka nu ka vin pung pung. A ni tak tak a, amah hnem nan beiseina neih leh tir tur khawp sawi tur engmah ka hre ngai lo. Didiki tawrh ang zawng zawng hi chhel tak tan lo chuan tawrh chhuah a har viau ang.

"Ka hre vek, ka hriatthiam pui vek. In inpeih veleh rawn sawi rawh. Thawm dim ula, in neitu te pawh kha fel viau mahse mi hrang tho an nia, an la hriat loh chuan hrilh duh kher suh u. Tikhan ngawi rengin rawn hruai chho mai rawh u helamah a thlamuang zawk ang" a rawn ti leh a, ka nu ka biak zawh chuan bathroom lam ka melh a, kawngkhar a la in khar phui tlat. 

Dinpuia pawhin a thawh veleh min rawn bia a, Didiki chanchin hrilh lo mah ila class ka kal loh thu erawh ka hrilh. In neitu ten an hre miah lo hi mak ti an awm maithei mahse Didiki hi mahni a awm a ni a, a ţawng tam lo bawk nen, in neitute nen hian an intlawhpawh lo hle. Didiki in aţang hian an thawm kan hre thei lo va, pawn a kan au vak vak anih loh chuan anni pawhin kan thawm an hre kher lo vang. Timothy kha pawn lamah ka au vak vak ngei a, mahse kan len luh zeuh zeuh vangin ngaihţhat lohna an neih phah loh ang. In neitu nu ber hi huan a thlai a lak pahin a lut kawi zeuh zeuh a, midang nen chuan an inpawh tehchiam lo. A la awm rei lo ve bawk nen inpawh vakna hun a la awm lo bawk a ni. Ka nu in a hre ve kha a mak lem lo bawk. Timothy-a chhungten an hriat chuan ka nu in a hre dawn chiang sa. 

Inchhungah lutin thawmhnaw ka zawn sak a, hetiang thil tawh hi hmeichhe tan chuan a zahthlak a, kan inah chuan a rawn chho duh kher lo maithei. Mahse engkim a awlsam zawk nan hruai luih ka tum tlat. Hetah chuan zanah a muhil thei tawh lo ang. Thawmhnaw leh towel pawmin ka chhuak a, bathroom chhungah chuan thawm a awm tawh lo. 

"Lo hawng tawh rawh Didik...i damloh phah vek ang. Tlem lo hawng la towel leh i kawr hak tur ka rawn rawlh lut ang a i in thlak dawn nia" kawngkhar kik kerh kerh pah a ka tih hnu chuan kawngkhar kalhna a ri rak a, tlem a nam kau a, a inthlakna tur ka lo pe vat. 

"Pawn lam aţangin ka lo nam ang. I kalh daih chuan rilru a nuam lo va, kalh tawh suh" ti a ka ngen takah chuan a kalh lui ta bik lo va, a inthlak chhung pawh a rei khawp mai. A rilru mai bakah a taksa a na tel tih hriain dawhthei deuhin ka lo nghak leh. Chhunglam aţanga a rik tak rek rekah chuan a zo tawhah ngaiin ka hawng a, thawm hnaw a inbel vek tawh a, towel a a lu tuamin a ding zum zat a, Didiki pawh a ang tawh lo. A ţi dek a, chumai bakah a ban rek a duk val kual raih a, a hmai duk nasa lutuk mawlh mai te chu en reng a har. 

Muangchangin inchhungah a lut a, khum siam fel vek tawh mah ila a pan duh lo. Chair pawt hnaiin tukverh bulah a ţhu a, pawn lam a thlir vang vang. A bulah ţhu ve in kan ngawi dun tlawk tlawk a, a hma ang tho in sawi tur ka la hre chuang lo. 

"Ka nu in helamah lo haw chho rawh se a tia" ka ti sep a, hreh chung chungin ka sawi chhuak. A en ngai a la en tlawk tlawk a, ka thusawi chu hria ang paw'n a awm lo. 

"Darthlalang min lo lak teh" kei aiin a ţawng zawi mah zawk. A hmai a duk nasat em vang chuan in en lo turin ka duh zawk a, chuvang chuan ka kalsawn mai duh lo. 

"Min chei rawh" a ti leh hnu phei chuan awmdan thiam a har hle. 

"I hmai kha a la vung nasa sia, a dul nual bawk nen. Kan khawih chuan a na lutuk ang" zam deuh chung hian ka ti leh a, a in en duh miah loh nan a sawi ka ni mah zawk. 

"Chuvang tak chuan min chei rawh" ti chang fakin min rawn melh a, a mitah chuan engmah a hmuh theih loh. A ruak huai a, hlauhna leh natna takngial pawh a lang tawh lo.

"Min khuh bo sak vek rawh" a ti leh takah chuan hreh deuh chungin ka tho ţuah ţuah. Didiki chu a chhel ka tih fo kha, bathroom ah rei tak a inkhung hrang a, a vai chuan hmachhawn ngam rih dawn lo mahse tluk mai a tum lo niin a lang. 

A hmai ka chei mawlh mawlh lai chuan mittui vangin ka khawhmuh a phe ruai a, mahse ka insum ţang ţang. Vanduaina tawk zawk pawh chhel tak a awmin a la inti pachang lui tlat thei a, a kehchhe hneh viau dawn tih hre reng mah ila chak tak a awm a tum tlat. Chuvang tak chuan ţap bik nih ka zak a ni. 

"Ka zo tawh" zawi te a ka tih leh sep hnua a men leh chuan a mit a sen leh ram tawh a, mittui a tling pam bawk. 

"A tam zawk chu a hliahin ka hria" ka tih leh hnu chuan a kun ngul a, a insut hruih a, lainat viau mah ila tun dinhmunah chuan ţangkaina ka nei lo hle. 

Rawn hawichhuak lehin "Timothy-a chanchin i hre leh tawh em?" tiin min zawt a, chhan tumin ang zuai tawh mah ila chhang lovin ka thaw halh a, lu ka thing ta zawk a. 

"Ka nu in rawn chho rawh se a tia, kan inpeih hunah min rawn hruai tir dawn a" ka ti a, kan ngawih leh reng tawh vangin boruak reh lutuk ţhiat hmasa tu zawkah ka ţang leh. 

"Rawnkal rawh se" a ti awlsam et a, a ţang eih lo chu mak ka ti kher mai. 

"Hetah chuan ka awm duh tawh rih lo. Engkim hi ka ten vek, keimah thleng hian ka inten hluah hluah" a tih zawm leh a, vin vak vak lo mahse a thinrim zia chiang takin a hriat. 

"Awle kan bia ang e" ti a ka hrilh hnuah ka nu bawk chu ka be leh a, hna a kal bik lo a ni maithei Tetea te a rawn tirh nghal tur thuin min chhang. 

"An rawnkal nghal dawn a, khawi towel kha ka lo zar ang" ka ti a, a lu tuamna chu lakthlak sakin khum bul tukverh bul zawk ni sa laiah chair ka dah a, chutah chuan towel chu ni em ro turin ka dah pharh a, min tir tawh miah lo mahse a sam ka khuih mam sak leh. A dawh tawp a, engmah a sawi tawh lo. 

"Kimkim kan lo thleng" Fredy-a rawn lut chuan keimah zawk min be chungin Didiki zawk a en daih a, ka nu a chiai buai ang a, ka unaute chuan an hre lo thei lo ang. 

"Aw kan lo chho ang lo han chho hmasa rawh" tih pahin Didiki ka din hliah a, kal mai lovin min melh ran a, hrehawm a tih ve hmel kher mai. 

Ka nau a kal veleh Didiki kaitho in ka chhuahpui ve a, kawngkhar ka kalh hnuah step ah muangchangin ka chhoh pui leh a, in neituten kawngkhar an khar hlauh. A hnungah ka ţhutpui a, pawn lam bawk a thlir leh. Ka unaute a hmaah an ţhu ngawi ran a, in kan thlen thlengin tumah kan inbe lo. 

Ka pindanah ka chhoh tlang pui a, ka nu in min rawn zui lut nghal zat. Didiki khum a ţhu chu ka nu in "Mu rawh Didik, nizan i muhil mumal awm si lo va tikhan muhil bawrh bawrh rawh" a lo ti thuai thuai a, khum hmawrah ţhu in min pawt ţhu ve nghal bawk. 

"Police station aţangin i pa Muana an rawn bia a" tiin bul a ţan a, Pa Muana hi Timothy-a pa a ni. 

"Timothy-a cousin duty lai a lo nia, a unaupa chuan ipa Muana a rawn ko a, an nupa in an kal nghal a, Didiki patea te man tir a lo nia, an inah kalin an fapa a va sawisa chiam a ni awm e. Timothy-an engmah a sawi duh si lo va Didiki patea te inah an tlan leh dawr dawr a, a nutei'n 'ka fapa hi Didiki pawngsual tu ah a puh a' tiin a lo ang chiam chiam bawk a, Didiki patea ho a rawn let lehin Timothy-a chu an la chhuak a, tunah an inah an awm mek ang. Office ka kal loh ni a ni hlauh a, ni lo se chu inah ka awm dawn lo va, ipa Muana te nupa an mangang bawk nen ka awm hlauh a a tihzia. Tunah Didiki patea pawh ipa Muana te inah a awm mek. Nakinah an rawn phei turah ka ngai ngawt a" ti a min hrilhfiah chuan ka thaw deuh huai. Timothy-a a chhuak tawh a, Lalawma pawh an man ngei ka ring. Ka ngaihtuahna hria ni awm takin ka nu chuan "FIR theh lut ila thil sual ti tu hi man se la a ni mai" chang fak hian a ti a, ka nu in Didiki a ngaihven hlauh chu ka lawm kher mai. Ka pa ka la hmu miah lo va, hnaah a kal hman tawh a nih ka ring. 

"U Didik, kha thil tlem ri rawh, i duh ber tur kan hre si lo va, Tetea'n keng vek mai rawh a tia" ti mual mual chungin Fredy a rawn kal hnai a, kan tray neih lian berin theitui, tui pangai leh thingpui te, kan chhang kawl zawng zawng ni awm tak chhang chi hrang panga vel leh chips a rawn chawi lut a, a ni pawh tonsil vangin a khua sik hluah a, school a kal loh ni tak a ni. 

"Ava tam em em ve" tih hluai pahin ka nu chuan dawhkan tè a pawt hnai a, "Hetah hian hung la i khuasik tawh loh chuan ipa in ti tur a a hrilh che kha zuk ti rawh" a ti zui bawrh bawrh. Tray dah pahin Didiki chu lainat hmel zetin a melh leh ralh ţhin a, nachang ka lo hre ve miah lo va, Tetea nen eitur pek nachang an hre hlauh chu a tihzia hle mai. Engmah a la ei lo va, a ril a ţam viau tawhin ka ring. 

"Didik i rilţam loh paw'n tlem tal ei tum rawh. Pum ruak lutuk a awm chu a ţha ngai lo. Ti hian awm la engkim kan buaipui vek mai ang. Beidawn phah nan hmang miah lo la, i lamah kan ţang vek a, i patea pawhin a fapa thlavang a hauh ngam hauh lo ang" a ti nghet charh a, ka nu hi ka hrechiang a, a mantir ngei ang tih pawh ka ring. 

Thingpui ban tur a Didiki a kun lai chuan ka nu in ţhut hnaih vatin a ban sak a, chhang an dahna bik chu a chawi kang tel bawk. 

"Vanduaina hi kan nun tawpna a ni miah lo va, bul kan ţanna chauh a nih chang te a awm. Hrehawm viau dawn mahse i hma hun tihchhiat phah nan hmang lo la, a hma aiin chak lehzual sawt la, hma lam pan zel a harsa dawn tih ka hria. I ke pen a sak ang a, i thil thlir a tawi ang a, i ngaihtuahnaah a inlar nawn awn awn reng ang a, mahse inrah beh tir miah suh. Harsa dawn mahse pen lui ţang ţang rawh" a tih lai mekin Didiki patea chu Fredy bawkin a rawn hruai lut a, dressing table bula ţhutna chu la in ka lo pe vat. 

"Didik, Lalawma chuan a pawngsual tak tak che em ni?" dam duam hian a ti a, dam thluam mahse a rilru a buai ve hmel kher mai. 

"Aw" tih ringawtin Didiki chuan a chhang a, a thil ei lai chu harsa tih hmel zetin a lem khawlh. 

"Khang kha a sawisak na che em ni?" tiin zawhna mawl mang tak a zawt leh a, a kawh bik pawh hriat theih lohin a kut zungţangin a kawk kual a, thil thleng zawng zawng chu a beisei loh tawp thil vek a nih hmel. Didiki chu a bu nghat a, insut feih ri kan hriat veleh ka nu chuan duat takin a lo kuah vat. 

"A zia lo hle mai. Tlangval pakhatin khatianga a rawn puh dawt a kut a thlak zui rum rum lai khan ka hrilhhai viau a, fate chu sual viau mahse thil rapthlak tak ti turin kan beisei lo ţheuh ang a, kan nu in police a phone lai pawhin lo khap nachang ka hre lo. Midang pawngsual ah puh se chu ka awih kher lo va, i hming a lam rik takah chuan awihna chin ka nei a, Didiki ngei ka hmuh hma loh chuan ka awih diak diak chuang lo" a ti charh charh a, ka nu ringawt a en danah ka nu a hrilh ber niin a lang. 

"Nia nangni lam pawh in rilru a na viau ang. Mahse pawi a khawih a, hrem a phu. Mihrang pawh ni lo a unaunu ngei a pawng sual a, a rapthlak lehzual. Didiki thil tawh mek hi ngaihtuah phak bakin a rapthlak a, tunah chuan naupang kal zir ţan tur ang chiah a ni tawh. Anu leh pate hriattir leh hriattir loh chu Didiki thu thu ni sela, lokal rawn inhnuai lamah inkawm ang, thingpui te kan in dawn nia" ka nu in a tih chuan tihzia ka ti ru khawp mai. Didiki hriat lai a thil tam tak sawi chiam kha ţul ka ti lo a ni. 

An inzui chhuah dawn lai pawhin Didiki patea chuan a chal a dawm leh vang vang ţhin a, ka khawngaih takzet. Fate sualna hian nu leh pate hi a ti mualpho in a ti na ţhin takzet a, mahse chutiang sawi duah thei ka ni lo. Thu ka awih bik lo va, kei ngei pawhin ka ti na ve fo ang. 

Didiki thingpui no a ruah veleh ka dahţha sawk sawk a, khum hlat deuhah ka hung. Zawi muang a che in ka khumah chuan saisirin a mu a, a ke a tawm tlat bawk. A bulah mu ve vat mah ila nidang angin ka kuah thuak thuak tawh lo. Zangthalin che lo in ka mu reng phawt a, tih tur a awm loh em vangin phone ka en ta ringawt. 

Whatsapp a kan ţhian ho group ah message tam tak a awm tuarh a, kan kal loh ţhup vangin an ngaih a ţha lo a ni. Mimal angin min rawn be diat diat bawk a, tumah ka chhang let lo. Didiki te in a kan awmlai aţang tawh khan min rawn call an tumna thlengin ka hmu a, tumah ka be let chuang lo. Didiki phalna lo chuan engmah ka sawi chhuak duh lo a ni. Kan kal loh chhan min rawn zawt ber a, an ngaih a ţhat loh thu te, an tello a kan inti hlim bik ni a an ngaih thu te a inpawlh nawk. Dinpuia message pawh a awm nual a, a thawmhnaw pack tawh te thlengin min rawn thawn a, an hnathawk te ho nen a an thlalak te, a chhang siam lai te min rawn thawn a, kan boruak hre ve hek lo kan boruak tawn mek nen a inrem lo pui pui min thawn a, class ka kal lo tih a hre bawk nen ka chhang let lo chu a vui lek lek. 

Dinpuia chu chhangletin ka buai thu ka hrilh a, ka biak hman rih loh thu hrilhin hrethiam turin ka ti bawk. Kan ţhiante erawh chu chhan dan tur ka hriat miau loh vangin an message zawng zawng te chu chhiar vek mah ila chhan lohin ka dah a, ka chhan loh vang a an vui thu ka dawng nual bawk. 

[Kan inah lo phei lawk teh] U Marie message ka hmuh chuan ţhuchhuak thuaiin Didiki ka en de de a, mit a lo chhing tlat. Thawm dim deuhin khum aţangin ka chhuk a, pindan ka chhuahsan hnuah ka khar ţha leh thlap a, ka pindan bul a bang ngheng a Fredy-a lo ding reng ka hmuh chuan ka phu nasa lutuk chu ka auchhuak lo chauh. 

"Hetah eng nge itih? Min ti hlau alawm" zawi te hian ka ti a, thawm ka chhuah nasa ngam lo. 

"Ka ding a nih hi" a lo ti hluk.

"Ngaipawimawh lo angin awm vel suh. A thil tawn hi hre leh lutuk angin awm suh. Loh theih lohin chhungkaw thumin kan hria a, hrehawm a tiin a zak dawn lutuk. I ngaihtuah anih pawhin veng reng kher suh. Tunah chuan a muhil in ka hria, a muhil lo maithei bawk" ti a ka hrilh hnu a kal mai ka tum chu ka banah lo vuanin phawk hra in min en a, "Khawnge i kal dawn?" a ti hu bawk. 

"U Marie in min ko a ka kal lawk dawn. Timothy-a chungchangah a nih ka ring. Ka ngaihtuah ve tho bawk sia ka va kal lawk ang e" tal fat fat chung hian ka ti a, min thlah nachang pawh a hre lo. 

"In man tir dawn em? An man tawh zawk em? Man tir ngei ngei rawh u aw. U Didiki inah leng ang ka tih ziah kha. Nizan a ka sawm che pawh khan leng peih ve mai la chuan tuman an sawisa miah lo ang" lungawi tak chunga a tih hnu chuan ka thaw hak. 

"Chutiang sawi hun a ni lo. Min thlah vat la a ni mai. U Marie chu ka va hmu lawk ang" ka tih hnu pawh a min la thlah mai loh vangin ka talchhuak lui a, ka nu leh Didiki patea lo titi mek pawh chu hrilh lem lovin ka tlanchhuak. 

Inchhungah hmanhmawh takin ka lut a, Timothy-a tih loh chu an lo awm mek. An ţhu ngui bur hlawm a, tukin a Timothy-a chanchin khan a ţhawng viau ang tih ka ring. Didiki chanchin lawmawm loh tak an hre lehzel nen anni pawh an khawngaihthlak. Min hmuh an inbeisei hmel vak loh hlawm a, U Marie chuan min hui a, kan pahnihin kan kal hrang a, a hmel hmuh a nuam lo lehzual. 

"Engtin nge a awm? A ţha em?" ti a min zawh chuan lu ka thing a, a hming sawi lo mahse Didiki a sawina a ni tih a hriat nghal mai. 

"A pawi ngawt mai hetianga hmeichhe pawisawi lo khawih duh tu hi chu mipa hming pu tlak pawh a ni lo. Didiki chu ka khawngaih takzet" a ti a, a khawngaih ve tak tak ni a ka ngaih laiin "Mawla khi rawnkal a tum reng a, ka dang thei hram anih khi. Lockup ah a awm a, kan vaiin kan mangang a, a hma zawng a buaina tawk ngai mang si lo lockup a awm a ngai hial a, Didiki chu khawngaih viau mah ila a rawn hmuh a, a thil tawn te kimchang tak a Didiki hnen aţanga a hriat leh chuan pawi a khawih belh leh ang tih a hlauhawm. Ka rawn koh chhan che pawh a nia, i thu a awih ber a han thlem ve rawh" a ti leh ta daih a, a ngaihna ka hre lo kher mai. Ka hrilhhai hmel chu a hmuhin "Engahmah ka ngaih loh vang a ni lo. Nidanga an inhmuh na tur khap ka tum miah lo va, a hlimchhawn a la nia, Didiki rilru na hmel a hmuh chuan pawi khawih leh mai hreh lohna a neih ka hlau. Chuvang zawk chuan rawnkal rih lo se ka duh" tiin min hrilhfiah leh. 

"Pa Muante te sawn engtin nge an ngaih ve? A rawn hmuh an duh nge duh lo? An khap ve tho em ni? Didiki'n a mamawh ber a ni maithei asin" 

"Ka tih chuan an pawm vek ang. Thil ţha lo dang thleng thei pumpelh nan a ni mai. Nidangah chuan ka khap ngai lo ka tih tawh kha" luhlul zet a a tih takah chuan Timothy-a pindan lamah ka kal hnak hnak a, U Marie hi Timothy nen a min awm lian tu ti ila engkim a min kaihruai ţhin tu a nia, a thu kan awihin kan zah ţhin viau. Mahse tun a a thil hi chu ka thlawp lo khawp mai. 

Khum nghengin chhuatah a ţhu a, a hmazawnah ţhu ve in a hmai vel endikin ka thlek vang vang a, hliam engmah a nei lo. A mitmeng a vawt raih a, a thinrim a la reh loh zia ka hmu nghal thei mai. 

"I duh phawt chuan lokal rawh. U Marie chuan engpawh sawi se ngai pawimawh duh suh. Didiki leh nangma tan pawina a awm lo hrim hrim. La thinrim tho mahla a zualpui a reh tawh a, Lalawma pawh an man ngei bawk ang a, inhmu mah ula eng thil pawi mah a thleng tawh lo ang. Tun dinhmunah chuan Didiki hian a mamawh ber che. Thil dang sawitur a hriat miah loh lai pawhin i chanchin min zawt a, a ngaihtuah lutuk che. A rilru nawm nan tal rawn hmu rawh" ka ti ta zawk a, hmu lo tur a thlem ka tum lo bur. A rawnkal luih loh danah eng emaw thiam takin a sawi leh tawh anih ka ring. 

"A zia deuh tawh em?" ti a min zawh chuan nui lui chungin lu ka lo bu nghat.

"Thil i eitir em?" tiin min zawt leh a, ka lo bu leh nghat nghat a, kan in a rawnkal turin ka hrilh nawn leh a, hrilh ngun a ngai hran lo. 

Kan inzui chhuah lai chuan U Marie in min au zui a, "Pawi i khawih phah leh hlauh ang e, a ţul ber rih lo ania" a tih lai chuan Pa Muana'n a lo khap a, kan in lamah kan kal lui. Hetiang a chhiatna tawp khawk kan tawh chiah hian ţhiante an hlu lehzual a, min hmangaih tak tak tu kan hrechiang lehzual ţhin. 

CONT...