THROUGH THICK AND THIN-18

THROUGH THICK AND THIN-18

KIMKIMI

"Ka buai nileng ka tih mawlh mawlh kha, ngati nge i rawnkal ţalh?" Dinpuia ka hmuh rual rualin ka vui lehnghal pung pung. Timothy-a te in piah tlem a thim deuh laiah a lo awm a, ka zawhna pawh chhang lovin min kuah ringawt. 

"Buaina i tawk leh tawh em ni?" kuah let ve chungin ka ti leh hnuhnawh a, duat tak a ka sam chulin ka chhip a fawp pah bawk. 

"I ţha em?" tiin min zawt ve thung a, a awmdan teh thut chuan min ti hrilhhai zawk hle. 

"Ţha e hei tunah pawh hmu tur che a ka lo chhuah vat hi. Eng nge awmzia?" ti a zawt lehin ka inla hrang a, a ban a la vuan reng chungin a hmel en tumin ka dak deuh a, a thim deuh vangin ka hmu chiang thei lo thung. 

"Didiki chungah eng nge thleng? Nang chu i ţha tiraw?" min ti a, Didiki chung a thil thleng ka hrilh miah lo va, a hriat ka hlau hle zawk. Engtin nge a hriat theih rin dan tur takngial pawh ka thiam lo. 

"Ţha e..eng thil vak mah a thleng lo" ka ti zawi sep a, chiang lo deuh a a inhmuh theih ruai tho vangin dawt ka sawi tih a hriat ka hlau a, a hmelah pawh en duh tawh lovin ka hawisawn a, kan ţhiante takngial pawh ka hrilh lo va hriatchian chak viau mah ila ka zawt ngam lo. 

Ka ngaihtuahna hria ni awm takin a kut lasawnin phone a phawrh chhuak a, thimah phei chuan a eng zual duh bik kher mai. A hmeh mawlh mawlh hnuah ka mit zawhah ka chhiar theih turin a rawn dah a, ka phawk nghal hra. 

[Didiki an pawngsual an tia, in inhmel hriat sia, tak tak em ni] tih thu ka chhiar chuan min ţhawng takzet. A chhan letna hmuh tur a awm lo va, a thawn tu lah a hming a lang bawk si lo. 

"Tu thawn che nge?" zam leh mak ti tak chungin ka zawt a, an hriat darh vak mai ka hlau a ni. 

"Ka hre lo heti zawng hi ka dawng" a ti sup a, dawt min hrilh ngai mang lo va tun ţumah phei chuan dawt min hrilh ka ring lo lehzual. 

"Keini lo ţhian a neih âwm ka hre lo va, an rawn ti mai mai niang" ka la ti tlat a, a tuar tu ni ve lo mah ila sawi nuam ka ti chuang lo va, Didiki pawi ka sawi palh ka hlau bawk. 

"Thil thleng a awm lo tak meuh maw?" ti a min zawh leh takah chuan min ringhlel deuh ni ah ka ngai. 

"Lo pawngsual pawh ni se rawn hrilh tu che khan engtin nge a hriat daih theih? Midang daih hnen aţangin kha thu kha i dawng a" ka ti a, ka aw ah thleng chuan mak ka tihna a lang chhuak hial ta ve ang. 

"Ka hre lo le. In him chuan a ţha, ka hmuh veleh ka rawnkal nghal vang vang anih hi. Didiki chu a ţha takzet maw?" a ti nawn leh a, sawi dan tur a vang duh kher mai. 

"Kan riak dun dawn a" ka ti sep a, dawt hrilh reng nuam ka tih loh rualin ka sawi dawt ngam chuang lo. 

"I zuk riak thla dawn maw?"

"Aih kan inah a lo riak dawn. Nidangah pawh a nutei hlau chung chung paw'n a lo riak fo a, zanin pawh a lo riak ang. Kinah zan dangah i duh leh i lo leng lui ve dawn nia" kan thusawi lai thlak tumin ka ti na a lo leng lui fo mahse pawi tihna ka nei vak tawh lem lo. 

"Ka lo tum ang let tawh rawh i haw har chuan an lo hau ang che" a ti ţha ve mai a, a thinchhe lutuk ţhin te kha la reh vek lo mahse a hma ang pung pung a ni tawh ngai lo va, a ţha lam a hma lam a pan zel hi ka lawm ru ve ţhin hle. Min hriatthiamna thlengin a ngah sawi ve viau tawh. 

"Awle ka lo bia ang che. Min lo ngaihtuah suh kan ţha a nia" ti a ka thlamuan hnuah in lam panin ka kal hmawk hmawk a, in ka thlen hma deuhin ka inher vut a, Dinpuia ka hmuh naah bawk ka tlan let leh. Bike a ti nung vek tawh a, haw mai tumin a inring thlap tawh. 

"Lo be tu che kha..a number kha ka lo la ve lawk. Nang chuan i zawh kher a ngai lo va, keiman tu nge anih ka zawt duh" ka tih takah chuan sawi buai lovin a phone min pe a, number chu ka la chhuak thuai. Min rinhlelh loh nan "A duh duh a sawi ve ringawt a tunge a nih ka hrechak deuh hlek a, ka hriat theih tak leh ka rawn hrilh ve dawn che nia. A hriat chian hmel ropui che sia" ka ti deuh kher a, a lo tal tam tawh ţhinna in a zir lo bawk a ţhian maksak deuh deuh a nei nawk. 

"Min hrilh mahla ka hre ve kher lo maithei. I mutthilh hma zawng chanchin min rawn hrilh ang che" thupe aw zet a a tih chuan thuawih ber áwm ang zia zang hian ka lo bu nghat nghat. Kal hmasa tawh lovin ka thlir liam hmasa te te a, in lam ka pan veleh chauh. 

Midang ngaihven lem lovin bathroom ah ka lut tlang a, ka hriat chak em em chu ka call ta tawp a, hmeichhiain min lo chhang. 

"Tu nge ka biak aw?" ka ti hmasa te te a, ka aw thleng chuan ka ti nem lehzual. 

"Lapuii. Tu nge i nih zawk a?" ring angreng tak hian a rawn ti a, ka hriat sa mah ni se min ţhawn takzet tho. 

"Kimkimi ka nia, Didiki ţhiannu" ka ti dek dek a, "Ka hria che" a ti deuh hmuk. 

"Didiki chanchin kha i rindan i lo sawi tawp a, miin an hriat tam phei chuan Didiki a mualpho dawn lutuk a" ti a chhuah chhal mai ka tum lai chuan a nui ri ka hria a, hriat nuam tak a ni lem lo. Dinpuia a lo chik a, a thlalak a neih tuar vang hrim hrim khan ka ngaina tawh lo sa a, ka thusawi a nuihzat leh hnu lek phei chuan ka ngaina lo lehzual. 

"Inţhenawm kan nia, kan in a insi lo chauh. Didiki nutei te chu a au rin theih em kha, pawn a ui ka kaih chhuah lai a ni bawk a, Lalawma police in an rawn la lai thleng khan ka hmu vek. Ka rindan ka sawi lo khawp mai, Lalawma te chu man se ka tihna a rei tawh, a tenawm emai khapa ve kha" a ti a, a thusawi chu vei loh hmel zetin a ţawng liam puat puat a ni ber. 

"In vengah chuan hria an awm nual dawn ni maw?" ka ti ta ringawt. 

"Awm lo ang, pawnah ui ka kaichhuak ka tih kha. Didiko te in kawtah ka kal a, Lalawma an rawn hruai laia a nutei ang ri ka hria lawm. Ka chhungte hnenah pawh ka sawi lo hrim hrim. Hrilh tur leh tur loh te chu ka hre ve bawk" a ti leh zat zat a, min hua ang paw'n a awm chuang lo. A thawveng ve satliah ni berin a lang. 

"Awle i hriat chin ang pawh kha tuma hnenah sawi suh aw. Didiki a mualpho vek dawn a, a chhe lam zawng a sawi duh tam tak an awm leh dawn a, chung chuan a ti hnual zo leh vek ang" thlem ti tih hian ka ti a, hrechiang a inti ropui sia, sawi tam lo tur a hrilh bak hrilh tur dang ka nei lo. 

"Sawi dawn bik nang. Anih aw muttui" phone a ti tawp zui hmak. Thu lawmawm sawi lo mah ila a mizia chuan ka nuih a ti za ve lek lek. 

"Kimkim, U Didiki khi chaw a ei si lo va, thil dang kan siam sak dawn mi?" bathroom bulah ka nau a lo ding leh reng tawh a, khawi khawi emaw aţang hian a rawn pawk chhuak nulh nulh a, min ti phu leh dawrh ţhin. 

"Zing a i pek ang kha pe leh mai rawh. Hrehawm tawpkhawk ah hi chuan chaw ei a har duh alawm. Thingpui pe tawh lovin coffee siam sak la, tui a ti zawk maithei" ti a ka hrilh hnu a kal mai ka tum chu min vuan bet leh ţhung tawh.

"Eng nge?" ka ti vin hlar a, a chang chuan ka hne hluah hluah zel. 

"Ka siam thiam hleinem. Min tih pui lawk la" inthlahrung dek hian a ti a, coffee leh cake ka pe tawh tho a, a ril a ţam lutuk ka ring lo. Mahse ka nau hian a ngaihtuah tlat a, ka pindan a rawn lut hreh siin ka pindan vul velah a tei kual chhen a, Didiki'n nuam lo a tih phah ka hlau letling zawk. 

"U Rintei zawt mai rawh..Tetea pawh a awm kha. Didiki ka chhuahsan rei tawh a, amah chauh chuan nuam a ti lo vang" ka tih hnuah ka ban ka la let sawk a, ka kalsawn lui tho. Ho te te ah min ti buai reng a, ngaihtuah ka ngah chang phei chuan ka zaidam reng seng ţhin lo. 

"Khaw nge i chhuah dawk dawk a?" ka nu aw chu a nem lem lo. Didiki chauh hmuh ka inrin laiin ka nu a lo awm veleh khur tawh. 

"Dawrah ka kal" ka ti liam satliah a, ka chhuak rei lo bawk a tun ţum chu chhuan lam tur ka van bik lo. 

"I chhuah dawn chuan min hrilh ziah rawh ka ti ni lawm ni? I ţhiannu a rawn riak a, chhuahsan reng lovin kawm zawk ta che. Lehkha te hi i zir khat lutuk reng reng. Heti ringawt chuan BA hi i zo lo tawp ang" a ti buan buan a, Didiki awm lai takngial pawh a min hau bawrh bawrh tho chu ka lo inthlahrung.

Chhang let lo mah ila khumah ka ţhu tum bur a, Dinpuia a sawi chhuah leh ka hlau ru hle. A chhia zawng zawngah an puh vek zel a, ka zirlai ka tihchhiat deuh leh Dinpuia vang a ngaihtuah thei lo ah min ngai a, inkhawm ka ţhulh chang leh Dinpuia vangah bawk an ngai leh a, an puh chhiat vak vak hian hlat phah turah min ngai a, mahse ka khawngaih phah zel zawk. 

"I nachhawkna ei chuan a chhawk deuh tawh che em? I taksa na chu a zia hawk ang ka ring" Didiki chu nem deuhin a be leh ang lawi a, sawi kher lo mahse Lalawma'n a sawisakna kha na a tih a ring a, nachhawkna a ei tir a, kei phei chuan pek na chang ka lo hre miah lo. 

"Lungngai reng reng suh, tlem te chiahin kan hria a, i nun tawpna tur a ni miah lo bawk. Chak zawk leh ţha zawkin ila ding chhuak leh thei a, ka hrechiang che a, i chhel zia thlengin ka hre ve ţhin a, kunin tlu hle miah lo la, ţawngţai mawlh mawlh la, thinlung tak a amah kan biak chuan a ngaithla ngei ngei ţhin" ka nu bawk chuan a ti leh dap dap a, hun remchang apiangah a fuih mawlh mawlh reng. Lo inrawlh buai lovin uluk deuhin ka ngaithla ve. Kan ţhiante lah chuan chanchin min zawt sek a, chhuanlam fahrah te te ka siam reng a, an awih chiah lo na a min zawt lui pung pung chuang lo. 

Didiki tello in Timothy-a nen class kan kal a, min lo zawt leh tho a, Didiki an hmuh loh vangin an ngaih a ţha lo hlawm khawp mai. A chung a thleng tur áwm ang rin zawn theih dan an hre chiah lo bawk a a dam loh thu kan hrilh ta ringawt.

"Eng nge na?"

"Ava zia lo ve kan ve tur a nih chu"

"Nimin khan lo sawi ţha ula chu kan rawnkal vang vang tur a nia"

"Vawiinah kan kal thei tho alawm" ti te in an phun nghal sup sup a, Didiki hian a chanchin kimchang hi midang hriat ve vek a duh tlat lo ţhin a, mahni a tuar tawp chi anih vangin kan ţhian dangte hian keimah angin an hre ve kilh kelh lo. Hria se chuan ngaihdan an siam thiam nghal mai ang. 

"Mahni a awm a duh zawk ang. Didiki chu tihbuai a duh loh ţhin em hi. Kan kal khawm vek phei chuan kan bengchheng leh vak vak ang a, min hnar haw tho tho ang" ka lo ti vat a, min en ţhap. 

"Min hnar haw dawn mahse ţhiante ngaihsak kha a ţha hrim hrim. Kan ngaihsak miah loh chuan a vui palh ang" Afela chuan a lo ti khauh a, puih in beiseiin Timothy ka melh vat a, kan thusawi lai ngaihven ang paw'n a awm lo. In lam a Didiki amah chauh a awm a ngaihtuah daih a nih ka ring. 

"Phone aţangin in ngaihven thei tho alawm. Keipawn nuam ka ti lo a nia, nuam in ti miah lo ang. Ka sawi tawh ang kha ni mai, a damţhat paw'n ri luih luih a ngaithei lo va, tunah phei chuan a ngaithei lo lehzual dawn a, duh leh a dam deuh hunah kan kal zawk mai dawn nia" an awih ngei theih turin ka ti a, Siami leh Rina ten min hnial veleh deuh mahse kal lo turin ka thlem thlu thei hram. 

Ni a liam ve zel a, Didiki chanchin an ngaihven telh telh a, class kal a ţhulh rei ta lutuk te chuan an ngaih ti ţha lo zualin min zawt sek hlawm a, Didiki lah an be thei ţhin si lo. Kal mai an tihin ka dang ţung a, keimah thleng thlengin min ringhlel leh zo tawh. Zep ka neih an ring tlat tawh a, Didiki nen eng emaw tak thup neiah min ngai. Ka awmdan engkim nidang aiin min en ngun lehzual bik ni te'n ka hre ţhin a, min chikin Siami leh Rina phei chuan ka kalna apiangah min zui. 

Dinpuia insawn luh ni a lo thleng a, Timothy leh Didiki tih loh midang kan kim vek. Dinpuia ţhiante tlem an awm bawk. Zing karah an hnathawkte nen bungrua an lo dah diam tawh a, tihfel pui a ni tawh mai. Inrinni a ni bawk a kan hmanhmawh vak lo hlawm aniang rem mai lovin kan la ţhu muang rih. A ţhiante zinga Dinpuia a kal veleh "Ngati nge Didiki leh Timothy te hi an rawn kal ve loh?" an ti lehnghal chat. Kan thlen khawm tirh aţang khan an zawng tawh a, an ngaih a ţha lo tawh ropui mai bawk nen an thiam awm lutuk tlat. 

"Timothy-a lokal loh chhan chu ka hre lo. In aţangin ka chhuak hma a, in inbe turah ka ngai a?" ka ti bah niai a, an mitah ka en ngam hlawm lo hrim hrim.

"Kan be thei lo a, Didiki pawh kan be thei chuang lo. Thil thleng eng emaw a awm anih ka ring tlat tawh. I ţi deuh hra reng a, Didiki kan sawi changin i awmdan a danglam ziah bawk a, zep i nei chiang lutuk. Thil thleng chu engpawh lo ni se hrilh tlakah min ngai tawh lo tihna em ni? Mimal thil lutuk leh kan hriat atana pawi thei anih chuan min hrilh mai la, engmah i sawi chiang duh bawk si lo" Rina chuan a ti hmarh hmarh a, a tum zui bar. Midang pawh an lo bu tliar tliar a, zep neih reng hi kei tak pawh hian hrehawm ka ti. 

"Mi kut a tuar a, Didiki a zah ka hlau a ka zep anih kha" ka ti ta nge nge a, pawngsual anih thu erawh ka zep tlat tho. Sawi chhuah sak tumna ka nei miah lo bawk. 

"Mi kut a tuar a? Engtik khan nge? Tu nge sawisa a? A na viau em ni?" Rina bawk a ni. Zawhna a ngah khawp mai. 

"Class kan rawnkal loh ni khan" inthlahrung takin ka ti zawi sep a, ka thusawi chuan a ţhawng ve hlawm takzet. Engkim hre vek phei se la chuan tun ai hian an danglam nasa zawk ang. A zia dang bik viau mahse ţhian kan nihna angin an hmangaihin an ngaihtuah takzet tih ka hria. 

"Tu nge sawi sa?" Sawmtea chuan a lo ti nghet charh a, midangin min ngaichang ţhap bawk. 

"Lalawma, a patea fapa kha" ka ti leh tawp a, Dinpuia'n a hriat phak ve hlauin an awmna lam ka melh zawk a, a ţhiante nen an lo la nui dar dar a, ka ţhiante an awm ve bawk nen min ngaihsak vul chuk lem lo. 

"Ngati nge a sawisak? Didiki lah a inthiar chhuak daih tawh a, pawisa a va beisei tihna em ni?" tiin Sawmtea bawk chuan min zawt leh.

"Ka hre lo le, a sual vang hrim hrim aniang. An in a a awmlai pawhin Didiki hi a ngaithei ngai lo va, a nutei lahin khawp a hnekin a ţan tlat bawk si, a in lu ling tial tial a, veng danga a awm tawh hnuah pawh a la umzui ţawng ţawng anih hi" ka tih lai mekin hmeichhe pakhat a rawn lut zan zan a, a thau lo na a a nu lian khawp mai. Ka la hmu ngai miah lo va, a hriat zawng kan awm lem lo aniang keini min rawn ngaihsak lovin Dinpuia te awmna lamah a phei tlang a, kan en zui ţhap. An in ngam tlak viau anih hmel mipa ho chuan ring zet zetin an fiam bawng bawng a, a ţhian satliah ah ngaiin ka ngaihven zui duh ta bik lo. 

"A khawih na viau em? A inah khan amah chauhin a la awm tho tihna em ni?" ka dar a dawm chungin Siami chuan min zawt ve thung a, lu thin pahin "Kan inah" ka ti sep. 

"Tunah eng nge a an tawh? Kan tlawh ve a rem chiah lo tihna em ni?" ti a Lawmkima'n min zawh chuan ka aw rang hle. 

"A hriat chuan a zak lutuk ang. Didiki mizia in hria a, in ngaihsak dawn tih hrereng chung a a hrilh loh cheu chuan in hriat a duh lo tih a ni mai. Tlawm nih ringawt pawh a hreh tawh nak laiin sawisak nih phei chu a duh teuh lo. Chuvang tak chuan in hriat a duh ka ring lo. A lokal leh theih hunah pawh hre miah lo angin awm rawh u" ka ti zat zat a, midangin kan ţawng an hriat phak kan hlau bawk a kan ţawng zawi tlang hle. 

"Ka khawngaih reuh e, hmeichhe kutthlak duh khawp a sual chu sawisak ve hrep chi anih chu" Afela chuan thinrim tak hian a ti a, hrechiang phei se la chuan mipa ho hian kutthlak an chak vek ang. 

"An man tawh alawm. Didiki patea pawh kha a thinrim ve khawp a, a fapa mah nise a thil tih kha ngaihdam tlak a ti bik lo. Rilru na deuh chung a a enliam ka ring" ka ti a, Didiki mai bakah a patea kha ka khawngaih takzet. Pa zaidam duam leh ţawngtam lo tak a ni a, a rilru a nghet charh thung. 

"A ţhat hlauh chu..mahse an man hma khan sawi sa hrep hman ila ţha tur" Siami chuan a lo ti veleh a, a zavaia hrilh chi an ni vak lo. 

"Khawngaih viau mah ila ka thawl huai mai. Thil pawi lutuk a thlen ka hlau ber a, class ţhulh ngai vak si lo kha a ţhulh ta reng sia, ka ngaihtuah ru angreng a, hliam na lutuk a tawrh loh a amah sawisa tu an man tawh chuan a ţha ni mai. A hliam te han dam fel se la min rawn zawm veleh thei mai ang" Rina chuan a tawp kharna ang deuh hian a ti a, Dinpuia te awmna lam kawk zeuhin "Saw nu saw tu nge a? A tlangnel hmel angreng sia Dinpuia nen an inhre ţha anih chuan nangpawn i hre ve ang tiraw?" tiin min zawt ta daih a, chiang deuh a ka en paw'n ka hre thei der lo.

"Hre ngai lo hrim hrim tun hi ka vawikhat hmuhna chiah. Ani chu ţhian a kawm tam a, mipa zingah pawh sawn ka la hmuh ngai miah lo pakhat a awm" ka lo ti a, a ţhian dangte erawh an ţawng duhin an nelawm hlawm takzet. 

"A ţhian te ţhian leh chhawng tihna em ni? A pawi hnuah i ngaipawimawh thar viau ang e aw, nakinah tu nge anih chiang deuhin zawt vek rawh" Rina bawk chuan a ti leh a, Dinpuia leh hmeichhe dang chungchang kan sawi kai takah chuan mipa ho in min ngaihven tawh lem lo va, Rina leh Siami bawkin an ngaihven nasa. 

"Keipaw'n mipa ka kawm tho cheu a, hmeichhe kawm chang chu a nei ve bawk ang chu. Ka mit an tih kham lem loh chuan ka en liam thei zel a, ka duh loh chinah chuan ka hau ve fo" ka ti na a ka lo melh leh ralh ţhin. 

"Keini inkawm dan nen a inang lo maithei a, kan thli thlai ru reng ang a, ramri an pelh vaih chuan ţek ve chhawk tawh ang che" tiin ka beng bulah Siami a phun sur sur. 

"Siam pathlawi eng nge i hrilh ruk bik kher a? Ka hriat ve phak turin zawi te te siin sawi ta che" Rina chuan a lo ti hlar a, debate kan ţan leh dawn anih hmel.

"Ka duh duh ka sawi ang Rin nuthlawi, engkim hriat tum ve vek kher zel suh. Ka rel chiam zawk mai tur che a sin"

"I ngam chuan min rel zuah zuah rawh. Puan tur che ka ngah emai, i hmui hmul i ziah tlauh tlauh hnu pawh a a ţo theih chuan loh vang a inti pa lo mai mai anih kha" a ti a, ngeiawm zetin a nui zui uar uar a, mipa ho pawhin min ngaihven leh ţan tawh.

"Ve lutuk che hian, i mipa nihna chhinchhiahna lian lutuk i bilh bo theih loh vang a inti nu lo mai mai inih kha. Thlasik lai paw'n a ţhut hnur zel tho kha" Siami chuan ring leng lawng hian zam duh bik miah lo hian a hnial a, Dinpuia ţhiante ho nui ţhaw in kan lam an rawn hawi ta ţhap a, ka zak angreng hle. An inhnial tawh chuan mi mitmei an veng lo va, kan ţhian ho chiah kan awm emaw an ti ţhin. 

"Lalnunsiami dawheh zeh zuah lutuk hi chu aw. Ţawng thei ropui si, zahmawh sawi lah i tim miah bawk si lo, pa si lo nu si lo a i awm vang anih kha ngaihzawng i neih theih miah loh. Mipa hmuh laiin i hnarin i faifuk rut rut kher zel lehnghal" Siami ai mah a ring hian Rina chuan a ti veleh a, Siami angin sawi tur a hre vak ngai lo thung. 

"I hmui pawrh hlerh hlurh anih chu. Mi mawng tiat lawih hmui i nei a, ka hnar design i sawisel ve khanglang zel a"

"Ka sawisel awkawng lo, mahse maw Siam pathlawi, i nuih ve vak vak chang hi chuan i hnar a phu hlerh hlerh zel sia, van lamah a thlawh chhoh pui nul nul ang che tih ka hlau ţhin" uar zet a nui chung a a tih lai chuan a thle lawlh a, a tum zui hmak bawk. Mihring hian kan taksaah hian duh loh lai kan nei ţheuh a, a hnar chungchang sawi hi Siami hian a duh lo ţhin hle, kan nihna ang ang a kan inpawm thiam erawh a ţha. Keimahni kan inpawm thlap loh chuan midangin min pawm thei lo palh ang. 

"Kut rang bawk kutthlak na bawk, mi sawichhe zawt zawt, miin an sawi ve a ngaithei leh der si lo. Pathian min siamah ka lungawi iti zuah zuah zel a ni lo'm ni? Nge min ben leh tak lawlh a" a ben na lai tuai vut vut pahin Rina chu a phun sep sep chauh tawh. 

"Lungawi ka tum ka ti nih kha. Ka hnar hmang hian thlawk thei ila chu ka zin kual nasa tawh viau ang. Thu pawimawh sawi lai laiin mi lo hnial ve sek suh. Kimkim ka sawi ang chuan ti ngei ngei rawh aw" a ti leh ta daih a, min biak hnu chuan a ţawng ring tawh bik lo.

"Nia ka mitmei ru tho alawm. Tunlaiah mi inngaizawng an ti buai vak vak ngai tawh hleinem bakah hmeichhia midang ti buai chiam chiam zel chu lemchanah chiah ka la hmu" ka lo ti sam et a, hmeichhe zak lo deuh nih a ngai a, mi mitmei ven miah loh a ngai bawk a, mizo hmeichhia chuan an tih ngam ka ring tehchiam lo. 

"Tibuai tehreng e..mi pasal chhuhsak hmak duh te pawh an awm ţhin alawm le. Hmeichhia kan inang lo a, nangmah ang vekah ngai suh. Langsar deuhin chhuh che tum lo mahse a rukin fing deuhin chhuh dan che a ngaihtuah daih thei. Thil hi thui tak thlir lawk tur" 

"Nia Kim, Siami sawi chu a dik ang. A hnar kaw lianpuiah khan mit pahnih dang a awm tel a, mit pali hmang chuan i fate awmdan tur thlengin a hmu lawk vek thei ang" uar zetin Rina chuan a lo ti lehpek a, mitmeiin ka khap vat. 

"Khap duh suh Kimkim, Dinpuia ui thar chu lo bauh vel mai mai rawh se" 

"Dinpuia vawk pui hi chaw pek a hun tawh lo maw? Rawl vek khawp khan han lim leh tak tak se la" 

"Tu nge rawl vek khawp a chaw lo ei reng reng a? Chakai bawp pawh seh keh ve si se lovin i hmuiin i chilh keh rap rap thei a ni lo'm ni? Dinpuia ui bauh peih lutuk hi ka hne" Siami chuan Rina melh ram ram chung hian a ti a, ngeiawm zetin a nui suk bawk.

"I chaw ei nasa thei lutuk i rawl ţhum zel kha, chaw ei kham a malis i ngai ziah. Dinpuia vawk chawheh si thau kung kung thei lo hi a buaithlak, talh hmak a ngai a ni" Rina pawhin uar zetin a ti veleh a, Dinpuia hming a lan vang nge a au vak vak tawh lo thung. 

"Ngati nge Dinpuia thleng a in telh ve tak a?" an inhnial thui leh hmain ka lo inrawlh ve vat. Min chhan ngaihna an hre vak lo va, Dinpuia a lo phei ta bawk nen, an ngawih ve ve takah chuan ka thawveng huai. La ti ngai lo ve ve mahse la inhnek nge nge se a ţha ang. Min fuih ve dawn maw tih pawhin an inhnial leh nge nge ţhin. Tihian nui awr awr chungin an inphur haw leh ang a, nitin a an tihdan a ni. 

"Ka ţhiante sawn chawhmeh an lei tam sia, chaw ei ve rawh u aw" ka bulah lo ţhuin a ţhiante chu a sawm a, an in en kual te te hnuah Afela chuan "An vawksa lei kha a tuihnai emai ei ve pawh pawi ka ti lo. Engtin nge siam in tum?" tiin a lo zawt a, Dinpuia pawh a nui ve hawk.

"Ka hre lo le, i siam duh chuan nangman i duh ang takin i siam dawn nia" la nui reng chunga tih pahin ka ţhiante biak rem tur a ţhu kun deuhin ka malchungah kut a nghat a, zu rim hriat ka inbeisei laiin ka hre miah lo va, ka lawm kher mai.

"Lawmkima leh Sawmtea te hian ka duh angin an siam thiam lutuk. A siam tak hi chu ka thiam chiah lo va, eng eng nge tih tur awm?" tiin bungrua enkual pahin a zawt zui zat. 

"Nangni chu lo awm mai mai rawh u. Sawng ho sawn ti se la, duh leh sa chu in buaipui ang a" a ti a, keini aia a upatna a tam lutuk lo chungin nau angin a en ve khanglang niin a lang. 

"Pui tur chein kan lokal a, engmah ti lo a chaw ei tawp chu a inthlahrunawm. Kan theih ang ang kan lo ti ve ang" Sawmtea chuan a ti ve tlat thung. 

"Rawng in bawl dawn chu, thildangah an phut lo ang che u. Tu ber hi maw ka ui?" nui ruh ruh chunga a tih lai chuan hmeichhia bawk kha a lo phei a, kan ţhut khawm ţhapna bulah chuan nui ver ver chungin a rawn ding ve. 

"Ka rawn luh lai khan ka lo hmu miah lo cheu a, tu te nge a Dinpui? Ka la hmu ngai miah lo va" a tih laia Siama leh Rina lo ner nawk chu a hmuh ka hlau ru angreng. 

"Hei ka bialnu anih hi" ti a a hrilh hnuah "A hmelţha em?" a ti zui zat a, hmuhsitna leh tih elna a tel lo. 

"A ni maw? In zingah ka awm lo rei a i bialnu neih pawh ka lo hre hleinem. Hmelţha lutuk ringawt" ti a min fak hnuah a nui sak a, "Midang ho hi?" a la ti hram. 

"Ka ţhiante tho"

"Aw..anih chu. In rawn pui ve vang vang a in fel hle mai. Hna vangin ka rawn thleng hma ve thei lo va, hospital hi chu kan buai thei khawp a" a ti siam siam a, tunah tak chuan misual tak a ang lo. Nakin zel chu ka hre bik lo le. 

"Nurse em ni inih a? Nia, hospital a thawh chu a hahthlak khawp ang" Rina chuan a lo ti vat. 

"Ni lo e..doctor zawk" tih pahin Rina bulah a ţhu thla ve a, Afela a ţhu ve bawk nen an tawt hmel nasa. 

"Nih chu..hlawh tam deuh inei tawh bik ang a, a nuam viau ang. Chhungte tlawn kher ngai lovin i duh duh i lei thei tawh ang a" Rina'n a tih chuan a nuih a za ve hle. 

"In ţhianpa vang hian ka zir thei lo ţep alawm. Ka buaipui nasa lutuk a ka zirna thlengin a chhiat phah ţep a" nui chunga a tih chuan a fiamthu ah ka ngai. 

"Ehh...in ni ţhin chiang mai" Siami'n a lo ti vat a, lai deuh chunga Dinpuia a melh vel te chu hmuh nuam ka ti lo ţan. 

"Ka buaipui nasa ringawt a min buaipui ve kher lo maithei a sin. Sawi tawh lo ang u bialnu te a nei tawh sia, ka fiamthu mai mai anih kha" nui hak hak chungin a ti a, a fiamthu kher lo maithei. Nakin hun zel pawh...ka la hre thei chuang lo. Doctor ve lai chuan mi bialpa a buaipuiin a umzui duk duk bik lo turah ka ngai.

CONT...