THROUGH THICK AND THIN-19

THROUGH THICK AND THIN-19

DINPUIA

"I ţhiante chu an ţangkai pur pur hle mai" ka din na bul a lokal pah a zang vah a a tih chuan ka lo nui liam ve mai. Kimkimi leh a ţhiante ka phal lo chung an che lui tlat a, puih ve mah ila ka lu na bur reng chuan awm a ti nuam lo. 

"Inu nen kan inbia a, pawisa tlem te chauh nei chung a bul i ţan tur hi a lainat khawp mai che" a tih chuan ka nui suk. He in min pe hi ka tan a a thil ţha tih awm chhun a ni. 

"Chutiang tak a min lainat anih chuan pawisa tam tham tak min rawn pe se la" elhsen zetin ka ti let a, ka nu leh ka bialnu hlui Muantei te hian inbiak reng nachhan tur an nei tawh lo. Ka chanchin an lo sawi dun lehnghal phei chu ka duh lo hul hual. 

"I bialnu hi thlah turin an duh che. A chhungten an duh lo ringawt che te hi inu in tlawmah a la ve a, i thlah phawt chuan i duh duh pek che a in huam. Ka beisei leh dawn che tihna ni miah lovin tlawmah te la ve la, duh lo tu che chu duh bik mah ta che" ngen ngawl zet a a tih hnuah Kimkimi inchhung a a ţhiante rual a che ve sawk sawk chu ka kawk a, "Saw..min duh vang alawm a rawnkal" ka ti liam satliah. 

"Amah chuan a duh ang che chu, a chhungten an duh hleinem che. Inu in engkim min hrilh vek. Hmeichhia sawn a zar nasa che--" ka nui hawk riin a ţawng a ti tawp chat. 

"Nih leh nang? Ka rawn biak hun che ngaichangin i ţhu mai mai zel nge ka chhungte zawng zawng i rawn be ţhin? Kimkimi hi engtin paw'n awm se la nang berkher hi chuan sawi ve ngam tur i ni lo" ka ngaih nep zia lan tir ran chungin ka chhang let. Kan vai te takngial paw'n 'Buaithlak emai' an tih ţhin kha a nia, duh aiin ka inham tang rei mah mah. 

"Ka ngaihtuah vang che a rawn biak tum reng ţhin che ka ni. I biak theih loh changin ka mangang hma a, i chhungte phone number ka neih ho a rem rem ka be kual mai anih kha, zar buai leh ngaihsakna a in ang lo. Inu nen kan sawi dun ţhin a, hmun dang a ka awm lai a ni bawk nen, hmaichhan ngei a sawipui che ka duh vangin rei tak chhung ka ngawi zawk a nih kha. A chhungten an duh miah lo chung che hian i neih theih i ring em? A mizia leh awmdan vel enin chhungte phallo chung ti lui pung pung duh chi a nih loh hmel ropui sia, an duh loh dan a awm tum mahse a ngam kher lo vang" a la ti zat zat. A ţawng thei zual sauh emaw tih tur a ni. Ka nu lahin a be ţha duam reng a, a tir phat aţang khan Kimkimi zawk hi a lawm tak tak ngai meuh lo. Ka duh tawh loh hnu thlengin he nu zawk hi a la beisei ţang ţang. 

"Chu in lo va vei dun awm ve. Kimkimi nen a kan chungchang a nia, in ngaihtuah sak kan ngai lo" ka ti bung nghut a, ngati nge maw chhungte induh loh tawn leh mi pahnih inkar a tlakzeh tum phet hi an awm ziah ni? Ka chhung te leh Kimkimi chhungte, Muantei thleng hian Korean an an tum te pawh a nia nge. 

"I nu chuan i ţhatna tur a duh vang zawk liau liau a ni. A fapa i nia, a hmangaih che a, i pa diktak nen pawh i bulţanna tur sen so zawng zawng tum an inhuam vek. Lianpui si hian i ngaihtuah a tawi lutuk, i hma lam atan hun ţha a inhawng mek a, chu ai chuan hmeichhia i thlang zawk a, i nei ngei thei dawn nge dawn lo i hre lo lehnghal" a ti leh duah tawh. Hahdam duhin pawnah ka chhuak a, min rawn zui chhuak nghalin a ţawng zet zet a, pause daih theih se ka ti rum rum. 

"An ni pawisa ka mamawh lo ve. Nu leh pa inti ve sek tawh suh se. An kawppui te lak a an rinawm loh ka tuar ber a, anni pahnih vang a tawrh zel ka tum tawh bik lo. Pawisa aiin mihring a bikin ka bialnu hi ka ngai hlu daih zawk" tiin chiang khel khawlin ka hrilh a, a la hrethiam lo fo anih chuan a damlo enkawl lai ka ni duh lo nasa khawp ang. 

"Thisen zawm hi chu rin aiin kan lo in hmangaih ţhin a nia, kumkhuain i nu leh pa an ni reng dawn. Engkim an tihsak vek che a, an duh pakhat lek tih sak ve chu a har viau em ni?" nem uchuak zetin a ti leh a, a meng khawngaihthlak thiam hle bawk. 

"Hetiang mai mai sawi tur chuan lokal tawh suh. Ka sawm chhuah i ni lo va, ka lawm duai duai loh che paw'n ngaihdan chin i nei thiam dawn nia" ti supin inchhungah ka lut a, choka aţang chuan kan in hlui rim a rawn nam. Chhungpuinu in min puih tumin chhang a siam veleh tawh a nih hmel. 

A rukin nachhawkna ka zawng a, Kimkimi'n hria se chuan zawhna tam tham zetin min kap leh pawp pawp ang a, Muantei'n ka lu na a ti zual tawh bawk nen ka puak nge nge ang. Ka bag hman ţhan loh berah mum hnih vel lek a lo awm a, tui ka in hmasa te te a, damdawi chu hmuam lehin tui nen a dawlh rual ka tum a, hlauh ang ngeiin damdawi mum tello in tui chiah ka lem. Tuiin a chiah hnip tawh bawk a, a kha takzet. Hremna tenau lo tak a ni. Thil kha hrim hrim ngai na lo chi nih phei chuan khurh ngawng ngawng na tham a kha a ni. Keimahin pindanah ka inkhung hrang hlauh a, ka hrehawm tuar min hmu an awm lem lo. Damdawi mum chu lem theih ngei tumin tui ka in khawlh khawlh a, ka hlawhtling ve hram. Lu nat ka hrat a, nachhawkna ka leiin a mum chi min lo pe zel a, tlangval lianpui nachhawkna tui chi inpek ngawt thu a awm lo bawk a ni. Damdawi mum ka dawlh thiam lo hi ka thuruk tuma hriat ve loh a ni tel bawk. 

Choka ah lutin eitur ka zawng a, chips kheh sa a lo awm nual. Ka tui lo tih reh nan tlem ei ka tum a, ka ei tui tak si vangin over bul a Kimkimi ding thlir pahin duh ai tam ka ei. 

"I va hneh sawh tawh awm ve" ka tih hnuah aw ka thian kharh a, a bei rei lo riau. Nui sen sen chungin ka lam hawiin a rawn inher a, school naupang anih lai ai ngawt chuan a thau ve ta deuh. 

"Siam awlsam ber chi a nia, siamna hmanrua kan rem chhuah lai khan ka ţhianten an ei chak tlat a, thiam awmchhun ka ni bawk a ka siam chawp sak vel nawk nawk anih hi" oven kawk sek chungin min hrilhfiah a, ngun tak a ngaithla in zawi muangin lu ka bu zeuh zeuh. 

"Didiki hi?" ti a ka zawh chuan a tim leh nghal dai tawh. Melh tur a zawng kual a, dawt a sawi chuan min en ţha ngam ngai lo. Fredy-a rilru na dawp chhuah a awl bawk a, Kimkimi ka zawh hnu khan Fredy ka zawt veleh a, chanchin ka hre vek tawh. Number hriat loh aţang lehnghalin dawt hlang tawp ka dawn ka ring lo a ni. 

"A nuam sam lo a, lokal chu duh viau mahse a lokal ve ta lo mai" a ti bah nawk.

"A zia lo hle mai" ka ti sup a, zia lo ka ti ve tak tak. Pawngsual hi tu hmeichhia mahin an phu lo. An thawmhnaw kan sawisel ţhin tak na a mipa ang bawkin hmeichhia pawhin an duh duh ha turin zalenna an nei. An thawmhnaw a pan deuh leh an duhthlanna a nia, an kekawr a chhin deuh pawhin an duhthlanna tho. Hmeichhe incheina ai mahin pawngsualtu hi dem tawp ila kan ti fuh ber ang. Mipa fel leh hmeichhe zah nachang hria chuan thawmhnaw an hak duh dah vang maiin hmeichhia an sual lui ngai chuang lo. Keipawh hian ka bialnu lo chu ka it eih lo reng reng. Hmeichhe dang chuan chhing fe fe ha in feng mahse an thawmhnaw man zat tur ka chhut daih zel a, pawnchhe tiat lek lek ha a feng ţhin ka hmu fo, ka bialnu in a tih ve loh chuan ka lawm tawk em em. An duhthlanna ka zah sak viau na a ka bialnu tih ve atan ka duh lo va, 'ka thawmhnaw a chhing emai min pawngsual rawh u' an ti lai ka la hriat loh bawk vangin thlir liam tawp ila a ţha mai. Nupui atan a kan duh leh duh loh chu a ruk a ngaihdan siam mai tur a nia, an zahawm loh ti tu te pawhin sawi chhuah hluai reng kha ţul ka ti ve lo. Hmeichhia te pawh hi mipa ang tho a ropui tak a duan an ni. Mahse ka ngaihtheih loh chin chu ka hau ve fo a, ka mutpui lui ngai lo thung. Tupawhin duhthlanna leh insum theihna, chhia leh ţha hriatna kan nei vek a, pawngsual hi chu sual vang liau liau a ni. Pawngsual tu lo chu dem tur ka hre ve tlat lo. Kimkimi chungah thleng ve ngat se la chuan pawi khawih tu chu ka umzui thui viau ang. Bulţanna tur ka duh luatah ka hlat tak tak hman ţhelh a, phu lo viau mah ila min hmangaih zia ka hriat hnuah pawisa aiin ka thlang leh ta zawk a ni. 

"I ţhiante an awm ve sia pahnih lek chu kan kham lo vang" tiin ur mai theih turin a buatsaih leh sawk sawk a, ei zawng a a rik rawp rawp tawh loh beisei ang. 

"I ur lai saw a la tawk lo mi?" ka lo ti a, a rei lutuk chuan a chung a ri leh ruap ruap ang a, beisei pha zan lo chung a beisei khum daih ang a sawi luih leh a ngai palh ang. 

"Tawk lo deuh...ka ur na a la rei lutuk lo a, buaipui chhung a rei ve lawm. Awlsam viau mahse i duh leh ti ve chhin la, nang phei chuan midang aiin i hrechiang zawk daih ang chu" a ti khar khar. A inchhirawm thei ţhin. 

"Awle...ka hauh loh che kha" awki dam pangai takin ti mah ila ka hriat phak ngei turin a thaw halh a, a hah hmel takzet. 

"Ka lo chhawk ang che chu" ka tihin lu a thing leh tho sia. 

"Ngai lo mai rawh se. Keimahin ka ti zo law law dawn. Ka tih lai hi ka thiam ve chhun a nia, chiang deuhin ka thiam ve. Chuvang chuan lo sawisel kher lo la" fán raihin a ti leh a, hmeichhia tak hi chu a. 

"Eng lai nge ka sawisel?" ka ti hu a, ka thusawi khi min hriatpui vek ang a, a ri a sawisel ka nei lo. 

"Min sawisel i tum? Ka ur lai mek saw a kan i hlau" 

"Hlau lo e..kang mahse i siam anih chuan a tui tho ang. A siam tu ber hian i zir em a" ka tih meuh chuan a nui lek lek tawh. Tlawm zawk nih hlauin a la insum mai mai. 

"Doctor nu kha tu nge?" ti a min zawh pahin min melh ram ram. 

"Muantei" 

"A hming chauh ka zawt hleinem che. Pawn a in va ding dun te kha ka hmu ru reng che u. Amah kha ka la hmu ngai bawk si lo va, i ţhiannu tho tihna em ni?" tiin min zawt chik khawp mai. 

"Ka bialnu hlui a nih kha. Ţhian kan ni paw'n ka hre lo" 

"Nih chuan eng nge in nih a?" a ti vin hlar. A thil tih lai a chawk sawk sawk a, a inpawlh ţha duh viau ang. 

"Hand mixer a awm kha, kha khan ti la a inpawlh zual ang a, a tui zawk maithei" ti a thurawn ka pek ve te chuan a hma ai mah a rumin min melh. Hmeichhia hi chu an thinrim laiin meng rum thei viau mahse mipa an thinrim ve tawh chuan mittui an ti tla leh zung zung a, thiam thil an nei mak thei riau. 

"Ka zawhna pumpelh dan zawng daih kher suh. I bialnu hlui a nia, ţhian innih bawk si loh chuan eng nge in nih a? In la inkawp reng tihna em ni? Hmeichhe dang vang hian rilru nuam lo deuhin ka awm reng a, ka kham ve lek lek zel" a ti hmarh hmarh. 

"Ka engmah a ni tawh lo. Lerh viau turah min ngai ţhin suh. Finfiahna i neih loh chuan min ringhlel ringawt lo tur a ka hrilh tawh che kha" ka ti bung nghut a, vawikhatmah ka la phat san lo. A hriat miah loh a zan khat lek kawp zawk tur chu an tam mahse bialnu pakhat ka neih chuan ka duh tawk. Insawifiah reng mah ila ho te te ah min ringhlel ziah. 

A tum zui bar a, a thil tih lai ti hmawk hmawkin min melh leh tawh eih lo. Engmah a sawi chhunzawm tak lohah chuan midang puih tumin ka tho a, "Khaw nge i kal dawn?" tiin ka kal tur min lo dang leh ang lawi a. 

"Ţhiante ka'n pui ve lawk ang e" 

"Thinrim zawkah hian ţang ve ziah zel lo teh" ti a min puh let ngat phei chuan ka hamhaih lek lek alawm le. 

"Mipa dang i hriat ngai miah loh nen ding hrang ve daih ila i ngaihdan a ni bik miah lo ang. Kan awm ho lai a a thusawi duh dan te kha ngaihtuah ve la, pawn a in phun sup sup laiin rilru nuam deuh a cake ka siam mai mai theih i ring em ni?" a ti leh duah. Kan hmuh phak turin a rawn lawr sek a, ka luh hnuah cake a lo ur leh diam hman a, power a nei bik lo va, cake buaipui pah a min rawn thli thlai anih mai hmel. 

"Ka engmah a ni lo ka tih tawh kha" ka ti nawn leh a, sawifiah vak dan a vang ţhin khawp mai. 

"Ka rinhlelh che in ţha deuhin min hrilhfiah duh ngai miau lo a, i ngaih a sam leh lutuk a, ka nawr deuh che leh thinrim zawkah i ţang a, ka rilru nawm theihna tur tal sawi ve la" min melh ralh chungin a ti a, a mitmeng rum leh alh hluai kha a bo leh duak tawh.

"Ka tan chuan pangang ang vel" ti a ka hrilh chuan lawmawm tawk lekin a nui a, a thikthu chhiat zual lai tih lohah chuan a lawmawm reng. 

"Nih chuan tlanchhe zel tawh ang che. I in hnaih tir leh hrut hrut chuan pangang tak tak ka pe tawh ang che, ka hlau ve miah lo a nia" a ti khar khar. 

"A ninawm..sawi zui tawh lo teh" ka ti hluk a, hmeichhe lungawi zân lo chuan message thui tak tak min thawn duah zel a, ţawngka ngei phei chuan ngaihthlak tur a tamin a ninawm lek lek ţhin. Message kan reply seng lo va, ţawngka in kan hnial hneh bawk si lo. An awm loh hlekin kan zawng leh chung tho si. 

"Sawi zui ngai tawh lo turin awm zawk rawh. Hman aţang tawhin hmeichhe dang vangin kan inhau ngun lutuk tawh" a tih zat zat lai chuan a hmuiah ka fawp a, ka awmah namin a tal bat bat. Ka thlah duh miau loh vangin min chhang let ve a, ka hmui hnuai lam nasa lo fein a pet a, uar deuh se ka tih lai takin na zetin a seh a, a inla hrang zui zat. Pawn lam a him ţhat viau laiin a chhung no lai aţang chuan tam lo mahse thisen a chhuak tih ka hria. Ka hmui tuaiin ka nui suk a, a thip ve reuh hle. 

"I duh dan a mak sawt hle mai" tih pah a ka hnaih lai chuan a thil ken laiin min tin uaih a, "I mawl em ni? Midang an lokal thut ang a sin, kan pahnih chiah a kan awm loh hi. Khatianga min hmuh vaih chuan i ţhiante ho hian min ngai nep dawn lutuk. Ka sehna che kha a nat chuan ka tihpalh, ka inpawm thlap. Mahse midang awm laiin min fawp tawh reng reng suh" a ti zat zat. Ka awm a nam lohna lam zawkah hmanrua a lo keng reng. Ka in en chiang a, ka tshirt hmawr lam leh ka kekawr berh luai ka hmuh chuan ka chek tlak. 

"I chawh lutuk i pawlawh man a nih kha. Tih tur a la tam a, i la bal dawn chauh. Inbual kher lovin inthlak ringawt mai rawh" a tih hnuah min ngaipawimawh âwm lo fe in a tih lai a chhunzawm a, a cake ur lai a theihnghilh thung. 

"Khawi hmunah pawh fawp che ila i tui dan a ngai reng" uang thuang zet a ka tih hnuah oven awmna lam ka kawk a, "I cake ur saw lungah a chang daih ang e" ti a ka hrilh chuan a hawi phei vut a, nui vur vur chung a lo hawi let lehin "Timer ka set vek, i hman ngun tehreng nen a chang chuan i ngaihtuah chiang lo ve thei ngawt mai. A hunah i oven zawk sawn min rawn hrilh mai ang" intithei zetin a lo ti a, tun thleng a a la tawk lo anih chuan cake chung sak deuh kan ei leh dawn tihna a ni mai. 

"Nih chu..i rem hre khawp mai. Ka inthlak chhungin lo peih fel hman rawh a tui dawn hmel sia, ei vat vat ang" a hmanhmawh deuh theih nan ka ti a, naupanlai aţanga an siam lai ka hmu chung paw'n ka ti sual fo a, thiam chiang inti viau mahse a thiam tak tak hma chu tisual ve nawk nawk rawh se. Kan in aţangin siamna tur ţul ho ka keng ţeuh a, min hman zawh sak lo turah ngai ang. 

Ka thawmhnaw bal ka thlak sawk sawk a, suk tur ka nei nghal phawt. Ka lu na lah chu a reh hleithei der lo. Damdawi mum khat la awm chu hreh tak chungin ka ei leh a, harsatna ka tawk leh nasa. A kha a reh hma hmain ka nu in min rawn biak a tum lehnghal. 

"Eng nge?" ka ti bung hmuk a, Muantei nen a eng eng emaw an lo la sawi dun nasa tih ka hriat hnu phei chuan ka lungawi lo khawp mai. 

"Muantei a lo thleng tawh em?" 

"Thleng tawh"

"Hei ipa nen kan awm a, kan ngaihtuah deuh hlek che a, i la awm hrang ngai si lo va, a nawm dawn hmel em?" a rawn ti nem duai. Min ngaihtuah tak tak lo tawp ang. 

"Ka awmna hmasa ai chuan a nuam zawk ang. Tu ka pa zawk nen nge in awm?" ka ti ve thung. 

"Pawisa pek che a tumin i la duh lo a, pawisa tlem te nen chauh chuan rei i daih thei dawn lo a sin. Luhlul chhuah lui tlat suh. A rei ang a, i neih loh tak tak hunah kan thu ila zawm dawn tho tho a nia" ka zawhna pehhel zet a a chhan hnuah min vau zui zat a, ka thawh theih chhung chu an pawisa lak tumna ka nei tawh lo. Pawisa hmang a duh duh tih kual tir theih ka ni lo. 

"Tikhan khawl leh zawk rawh se. Min pui thei ţhianţha ka ngah a, ka mamawh em em hran lo" ka ti nghat a, hma lam ka pan zel thu hriattir ngei ka tum. 

"Muantei khan a la sawi nasa ţhin che a, a la ngai viau che anih ka ring. Kan in a i hmeichhe rawn hruai luh hmasak ber a nia, i tan pawh a hlu ve viau tho ang a, hna ţha deuh a nei tawh a, in inpui tawn reng thei dawn bawk a, ţha deuhin lo be rawh" thupe aw zet a a rawn tih chuan insum zo lovin ka nui chhuak hawk. 

"Min nam nul mai mai suh ang che. In kha i hmingin a la awm lo va, ka duh chuan in luah man thlengin ka chawi tir thei che" khauh zetin a rawn ti leh. Insawn chhuah ka tum tirh khan min pek thu a sawi tawh. Muantei a rawn let a, ngaihtuahna dang a nei leh a, a ti mah mah tawh a ni. 

"Min pek thu i sawi hnuah rilru i thlak leh tihna a ni maw? Pawisa min pe duh lovin in luah man thleng a min chawi tir i duh a, luah tur dang ka hmuh hma ka awm tho a ngai dawn sia, engzat nge ka chawi ang?" tiin ka cho let. Nu te hi fate chungah an nunrawng ve thei tih ka lo hre ngai lo hetianga ka nu a awm hma hi chuan. 

"I mawl lutukna hian a ti rethei dawn che anih hi. Kimkimi hi a pawimawh viau em ni? Hetiang em em a tibuai tur che hian eng thil nge a tih?" 

"Nu leh fa inkar a nia, Kimkimi a tel ve lo"

"Luhlul chhuah tlat lo tur a ka tih che kha. Ka lawmna i siam hma chu thla tin 5000 min rawn pe ziah ang che. I in luah lai nawm dan ngaihtuahin min pek tur hi a la tlem mah mah. Kimkimi hi ka duh lo ngawr ngawr a ni lo va, ipa te nen a an inchhun dan i hre vek a, kawp zui zel chi a ni lo. Kei ai mahin Kimkimi chhungte an hel nasa zawk. I nu ka nia, i tan a ţha tur ka hre ber" ti a dam dap a min hrilh lai chuan ka nui suk. Mipa hian mipa kan nih vang ngawtin rilru natna kan pumpelh thei bik lo. 

"Ka nu i ni hleinem. 5000 chu thla tin ka rawn pe ang che" zawi te a ti hlukin phone ka dah a, ka thin a rim takzet. In bengdaih tum a ka din reng laiin hnunglam aţangin tu emaw hian min rawn kuah a, choka ah Kimkimi a awm a, amah anih ka rin loh vangin rang zetin ka inla hrang. Mahse midang ni lovin Kimkimi a lo ni zawk a, thaw a veng hawk. 

"Midang awm laiin engmah ti lo vang itih kha" ka lo ti fiamthu a, min vin vak ka beisei laiin lainat hmel zetin min en a, ka nu nen a kan inbiakna hriat chin a nei niin a lang. Kawngkhar a inhawng huai a, khar na chang ka hre lo lehpek a nih hmel. Ka fimkhur loh zarah rilru nuam lo vin ka siam leh ringawt dawn chu a nia. 

"Tlem te chiah ka hria" tawi te a nui chungin a ti a, "Tun a ka siam lai bak chu ka siam belh tawh lo ang, ka ti hek mai mai che. A siamna tur kan rem chhuah ho kha a tam tham ve tho a, nang chuan i thiam sa a, nangman siam vek tawh la, kan zuar kual ang a in luah man daih chu i nei lutuk ang. Mi paw'n rethei deuhin bul an ţan ka tih ţhin kha hrereng rawh" a tih zawm leh. Ka nu thusawi ngawt ai chuan ngaihthlak a nuam deuh. 

"Min siam pui ve ang chu, i thiam em kha. Bakah min hau tur a i awm ve reng loh chuan ka siam tui thei lo ang" nui ruh ruh chungin ka ti ve thung a, amah vangah ngaiin a inhnuhdawh ka hlau a ni. Kei aiin naupang daih mahse kei aiin a puitling zawk a, ka chakna ber a ni. Min kalsan mai ang tih ka hlau takzet. 

"Tu nge ka awm ve reng dawn lo ti a? Siam ve thiam lo mah ila ka awm reng dawn tho lawm. Nu ka nih ve hunah chuan ka fate hrehawmna ka thlen sak ve miah lo vang" ţap ţuau a a tih takah chuan ka kuah hlu hlu. Kimkimi anih chhung chuan a ţul tawpah lo chuan tumah a ti na lo vang. 

"Min puih dawn kha...naupang thawnthu hrilh a chakawm tawh a, nu nih i inhuam tawh chuan nei tawh mai ila" uang thuang zetin ka ti a, a nui ri hriat leh chu a hahdamthlak khawp mai. 

Ţhiante an awm miau vangin pindan kan chhuah san vat a, Kimkimi'n tih tur a zawn laiin keichu pawnah bawk ka ding chhuak leh. Ka ipik deuh chang a ka tih ziah danin meizial ka zu a, ka ta ni tawh a ka rin thlengin min laksak leh duh a, nu mak tak a ni. 

"Dinpui i chhuak nghal daih sia ka rawn zui chhuak che. Kimkimi nen hian in ngui dun bur a, in in hau em ni?" tiin Sawmtea'n min rawn zawt a, Kimkimi ţhiante zing a ka ngainat ber a ni. A zaidamin a dawhthei a, finfiahna tello a thutlukna siam duh lo chi leh ze nghet charh chi a ni. Amah aiin midang a dah pawimawh hmasa a, an ţhianho ah hian upa ber lo mahse u ber chan a chang. A upa ber te pahnih Siami leh Rina ve hi zawng lei char a sangha man tur zawng tlat chi an nia. 

"Hmeichhia hi chu an bul a awm rengin nin chang kan nei a, an tello in kan awm thei der si lo" fiamthu a ka tih chuan nui vur vur chungin min kuah a, "Hman a ka bialnu ve deuh paw'n a period laiin min kek hrep alawm. Ka lo duat lo deuh a niang" a ti ve sur sur. 

"Thla tin lu meh hun bi i neih a ngai a ni maw?" ti a ka zawh chuan a sam tuai chungin "Aaa..ka met chuang lo. Kan inţhen leh vat. Ka duat mah mah nge duh aiin a in lu ling a, nang chu i vannei. Kimkimi nen hian kan inkawmna a rei tawh a, sawiselna tur ka hre lo a fel khawp mai" a tih mual mual chuan ka lo thlawp hmin hmak. 

"A fel khawp mai min la kek ve em lo bawk a" ka ti a, eng eng emaw sawiin min ti hlim phian. Dik lo deuh hlek awm hi a hmu thei riau a, Sawmtea nen hi chuan kan inhmuh tirh phat aţang tawhin kan in ngaina nghal khawp mai. 

"U Dinpui" min rawn be tu aw ring ţha zet vang chuan ka beng aţangin phone ka dah hla hret. Kimkimi rawn hruai a tum chuan ka phal lo tawp ang.

"Eng nge Fredy? Au tawh suh i ţawng ka hre pha vek tho ang" 

"Nalh deuh a cake siam dan min lo hrilh teh. Tih dan tur sawi la ka lo ti zel ang" phur zetin a rawn ti a, a va buaithlak ţhin.

"A theih loh..sawi mah ila i siam thei lo ang. Pawisa i neih chuan lei tur zawng zawk rawh" 

"Pawisa ka nei lo lawm..ka pawisa neih chuan tereuh te te hum bo tham lek lek chiah a daih a, phone aţang hian inhrilh theih se ţha tur aw" a ti ngawih ngawih. 

"I u Didiki chu eng nge a an tawh?" tiin ka zawt a, Kimkimi'n sawi duh hek lo ti hian Fredy ka zawt nitin mai.

"A hliam vel chu a dam vek tawh a mahse amah hi a la ţawng tlem lutuk a, thil a ei tlem bawk sia, chuvang chu nia cake nalh deuh siam sak ka duh" a rawn ti zuai raih. A star tirh khan a u hriat lohin min hrilh a, ka nuih a za viau. Mahse rin aiin a la thutak a, a lawmawm reuh riau. 

"Tlaiah lokal la ka siam pui ang che" 

"Mahse U Didiki ţhian te an awm vek dawn a, an hre vek dawn sin" a ti bui bui a, ngaihtuahna chu a nei ve. 

"I ţhiannu birthday angin i sawi dawn nia, nalh deuhin ka siam pui ang che" ka ti nawn leh a, phur zet a a yes ri ka hriat chuan ka nui ru tet tet. 

"Pawisa ka nei lo ka tih tawh kha aw. I insawn ve chauh sia pawisa pek loh che chu a nuam dawn si lo va, ka hman chang apiangin i in ka rawn ti fai mai ang" a ti a, ka rilru a awm mek a rawn sawichhuak chat. 

"Lutuk tlat...school banah te i lokal kawi ţhin ang a, in i ti fai ang a, keiin i u Didiki cake tur ka siam zeuh zeuh ang a" 

"Ka rawnkal apiangin maw i siam ang?"

"Teuh lo mai..a ei ngun lutuk chuan a hne ang. Min rawn puih ngun deuh leh ka chhang siam a tui ting a ni mai" ka ti a, a phur khawp mai. Kimkimi'n nau mawl deuh a nei hi a tih zia, min ti hlim viau zel. Pawl12 ka nih khan tiang em em hi ka ni lo a sin le. 

"Thingpui kan lum zo a, cake chu rawn ei chiah la" Kimkimi zawk pawh a rawn inti thei khawp mai. Ka kuah lut a, dawhkan an lo kil bial laih. Ka eitur bik ka lak chu a chung ka hmet chhin a, kik kerh kerh ila a ri keuh keuh thei ang. 

"A tui dawn hi..i va bawn ve a" ti a ka fak hnuah ka ei a, Didiki insawn ni a an rawn ken ai chuan a tui deuh. 

"Awii...tui lutuk...ahh..ka lei ka lem tel daih. Khaw nge ka lei hi? Siam pathlawi khaw nge ka lei? I siam tui zia hi aw" Rina chuan a ti tuarh tuarh a, a phar kual vel te chu hmuhnawm tham a tling. 

"Uar uchuak lo hian a infak theih aw Rin Nuthlawi, i lei lem daih la i rak i rak lo tawp ang" Siami'n ner nang nang chungin a lo ti ve thung. 

"Mahse Dinpui mipa hi chu mahni a a ngat phei chuan kan inthlahdah a, in hi i lo dah hnawk lutuk ang e aw" George-a chuan thutak zetin a ti bawk a, ani hi ka ţhianţha ber a ni. Nui vur vur chungin "Lungngai suh..min pui tu tur ţha deuh ka nei" ka ti a, vei zui lo zetin ka cake ken lai ka ei a, Kimkimi nen min entawn zak zak hlawm, an hre lo ve khawp mai. 

CONT...