THROUGH THICK AND THIN-20

THROUGH THICK AND THIN-20

DIDIKI

"U Didik, hei i ta tur anih hi" Kimkimi Nu, Nu Mahruaii nen chaw eina kan tihfel laiin Fredy chuan cake nalh deuh a rawn chawi lut a, rei vak lo hnuah Kimkimi a rawn lang ve chiah bawk. 

"Dar8 a ri tawh a, eng em em nge in tih a? Nangpawh tlaiah i chhuak nulh a, khaw nge chaw i ei?" ti a zawhna zawt chungin an pahnih chuan a en tawn chhen a, an ţi dai hmel chuan nuih a ti za duh angreng hle. 

"Chaw ka la ei lo. Mawitea nen cake hi kan siam char char a, tlaiah khan kan siam ţan a tunah kan siam zo chiah" Fredy chuan a ti zung zung a, Kimkimi erawh chu a ţawng ngam lo a ni ber. Dinpuia a puih tur thu Fredy nen kan hriatpui a, midangin an hre ve lem lo. 

"Ka awih hlawl lo, Mawitea nen eng cake mah insiam thiam lo vang. Atta nuai tur paw'n ka tir beidawng ţhak zel cheu a, buaipui ngai lehzual phei chu in siam dun lo tawp ang. Tu nge siam sak che?" Nu Mahruaii bawk chuan a ti leh pang pang. 

"Tak tak chuan ka lei anih hi. Ka lei hnuah Mawitea te inah ka leng kawi leh a, haw a phal lawk lo a" Fredy bawk a ni. A kalna tur áwm ang keichuan ka hre ru ran a, a pha ve char char. 

"Khawi a pawisa in nge i lei?" tiin Nu Mahruaii chuan khauh takin a lo zawt leh. 

"Ka pawisa khawlin. Min zawt tawh lo teh Nu..ka rilţam tawh nia" a ti nang nang a,  Nu Mahruaii lahin "Pawisa i khawl thei ngai lo reng reng. Dawt hlir a nih kha i sawi, Didik chaw ei siam sak miah suh, amahin insiam chawp vek rawh se. I eina sil vek bawk ang che" a lo la ti tho a, Kimkimi zawk hnenah chuan "I nau hi khawiahmah hruai peng tawh hlek suh. Nang pawh class i kal tih loh chu chhuak tawh suh ang che" a ti a, thinrim deuh chungin choka a chhuahsan. An kalna a hre nghal mai ni awm tak a ni. 

"Kha cake hi ei rawh. Chaw i ei thei si lo a, i ei tur liau liau a ka siam a nih hi" a nu thinrim pawisa lo takin a ti a, a rilru ah a vei zui miah lo a ang zawk. 

"I siam thiam a maw?" ti a ka zawh chuan Kimkimi'n min rawn hnaih ve in "Dinpuia a rawn ti buai khawp mai. Kei phei chuan a lokal ve dawn tih ka hre miah lo a, a rawn lang hlawl a, rawngbawl buai lai laiin Dinpuia a lo tur ve sek a" tiin ka beng bulah a phun ser ser a, cake lah pahin "Ka lawm lutuk" ka lo ti ve sep.

"A ho mai mai..lawmthu sawi a ngai lo aw. Chaw i ei theih loh vangin puar theihna dang ka ngaihtuah a nih kha" a ti lung lung a, a inti thei khawp mai. 

"Chaw ei ka lo siam dawn che em ni?" ti a ka zawh leh pawh chuan nui tet tet chungin lu a thing. 

"Ka ei daih tawh,ka nu kha ka tihder mai mai lawm. Ka ei tawh ka tih chuan Kimkimi nen a chhuak dunah min ngai dawn a" a tih lai mekin Kimkimi chuan a hnungah a beng thlawp a, a ri ring bawk a a na ve khawp ang Fredy pawh a er ngang ngang. 

"Nge min ben ve ringawt?" a ti pawr chhar chhar mai.

"Keng lut rih suh ka tih mawlh mawlh kha. Dinpuia te kutchhuak tih a hre vek ang. Nangmah vangin an khirh lehzual sawt dawn anih kha. An mu leh vat dawn tho a, an mut hun nghak rawh ka ti mawlh mawlh alawm" a ti a, ţawng ring ngam lo mahse a thinrim hmel khawp mai. 

"Cake siam thiam an tam alawm. U Dinpuia te chiah cake siam ţhin an awm lo. An siam ai nalh a siam thiam an tam mai" a ti zat zat. 

"Siam thiam dang hmelhriat i nei hleinem mawle. Lei chawpna tur pawisa i nei miah lo bawk a, bike hlui i chhawm a petrol man takngial pawh i nei lo va, tukin ah pawh ka pa i dil kha. Min zui tawh hlek suh ang che, nangmah vangin buaina ka tawk reng ringawt" a tih bawrh bawrh hnuah choka aţangin a chhuak tau nghawng nghawng a, an inah ka la awm reng a, an unau inhau hian ka ngaihtuahna kal ding lutuk tur a pawt peng ţhin. Nidang ang chu ni ila ka ngaithei lo viau ang a, mahse vanduaina ka tawh hnuah chuan rilru la peng tur ka mamawh a, an inhau ri hi ka ngaithla reng duh ţhin.

"Chhe ngheng nghawng e...a ke ruh sawh ngheh tum ni awm tak a na hian chhuat a rap a" Kimkimi thinrim en reng pah a a tih hnuah "Vawiinah U Timothy a rawn leng em?" tiin min zawt zui zat. 

"Aw leng e mahse a leng rei vak lo" ka ti a, hnual rawih ni awm tak hian a thaw halh a, uchuak takin lemchang ţhin mahse nuam lo ka ti ru khawp mai. Naupang te mah ni se min duh ve reuh em a, khawngaih chang ka ngah ve tawh. 

"Kan in hi a inhnaih mah mah a, ka pa in sak ţhat te a sawi a, kan sak ţhat chuan U Timothy-a te in hnaih lutuk lo a ti tawh turin ka hrilh ang" a tih chuan nui hak hak chung "Ngati nge?" tiin ka lo zawt ve.

"Guitar a perh reng zel a, a zai ţhin bawk sia, a zai loh leh midang zai a play a, lehkha ka zir thei lo" a ti ve ngei. A elpui ber a ni tih hria in a ngaithei lo ve khawp mai. 

"Nang hi chu i rilru a ţha em a, tu hmeichhia mah i tih nat theih ka ring lo. Tun a i rilru ang hi pu reng la, nakinah bialnu ţha deuh ila nei ang a, hna te i la nei ang a, i inpeih hunah nupui ţha deuh i nei bawk ang a, i nupui tur hi la hre lawk lo mah ila hmeichhe vannei tak a ni ngei ang" ka ti a, ka rilru put hmang diktak ka hrilh. 

"An sual loh chuan ka ti na lo ang. Nang chu ka ţhiante paw'n chhe lo an ti vek che" tih pahin ka hmaah tak a ding a, "Hmanni a an hmuh che khan an sawi vek" a ti a, a pa lo lut mek chu mitmeiin hrilh ka tum a a hrethiam miah lo lehnghal. A rawn luhna lam hnungchhawn zawngin a ding tlat a, keimah zawk ka zak takzet. 

"Ka rawn hrilh nghal che kha, ka ţhiante paw'n chhe lo an ti vek che a, keipaw'n ka star che ka tia mahse fiamthu ah min laksak a, ka fiamthu miah lo a nia aw. I hmelţha ka tia, i mizia zawng zawng te nen ka duh vek" ring leng lawng a a tih lai mekin apa chuan nui vur vur chungin a darah a rawn kuah thut a, hmu reng tawh mah ila ka phu zawk tho. Fredy phei chu phu nasa tak a ni. 

"Chutiang vel chu an sawi a, en ve ngei ngei rawh. A movie hming kha ka hre tawh chiah lo a, mahse ka sawi ang vel khi chu an sawi ngei. Ka hriat chin chin ka hrilh che" a ti leh zung zung a, apa chu en in lai deuh chungin a nui lui hak hak.

"A hmuhnawm dawn chu. A hming chu hriat han tum char char teh" apa chuan dam thluam hian a ti a, kalsawn daih ka duh tawh bawk si chu tlem tlemin ka tawlh hret hret.

"Hre mah ila ka hrilh dawn lo che. Puitling en chi a ni lo" a ti a, apa in Fredy a endan ka hmuh chuan ka lo lum ve vek thei hial. Mihringin kan duh leh kan tan a thil hlu ber kan en ang mai hian a en a, a tan a Fredy-a hlut tur zia ka hre chiang lehzual. 

"Inu in pawisa tuak theihna chi hriat chhuah a nei a, i tan a ţha dawn em a ka rawn ko che anih hi. U Didiki chu a la awm reng dawn tho a, inu thil hriat chu rawn ngaihthlaksak hmasa la" tiin a fiam a, Fredy a buk nghat hnuah apa chuan a kuah chhuak a, hmuh an nuam khawp mai. 

"Ehe...ilo inbual zo diam tawh a ni maw?" ka ti hluai a, khumah ţhuin towel in a taksa a tuam a, a lu a tuam bur bawk.

"Aw, i va rei em em. Kan mimawla khan a ti khawlai lehpek che em ni?" nui vur vur chung hian a lo ti a, ka lo ngaihven vak ngai loh kha min ti hlim ber ţhin tu a ni tawh. 

"Ni tho a mahse Nu Mahruaii te thingpui ka lum sak leh a, an inzawh hun ka nghak leh te te bawk a, ka rawn chho lawk thei lo a" tih pahin khumah ka lawn a, an inah hian ka awm rei tawh a, ka inthlahrung ve tawh hle. 

"An bulah ka awm rei duh lo anih kha. Ka awm ve chuan min hau leh a a, ka nu hi chu a thinchhe ve hlak hlak sia, ka kalna a hriat ruk kar hmel bawk sia a bulah ka awm tam duh rih lo" ti a min hrilh melh melh lai chuan Tetea a rawn dak lut a, "Didik ka kawr chu" a tih veleh tho tharhin Tetea kawr ka ţhui ţhatsak chu ka pe a, kai pharhin a endik vel a, a lawm hmel vur vur khawp mai. 

"I va thiam ve a, ka nu te ka zuk hmuh tir ve teh ang. Nakinah min tihsak leh rawh aw thil ţha deuh ka la leisak dawn che nia" a ti a, Tetea hian inngaihtuah ngawt ngawt lo turin min hrilh ve fo. Ka hnual loh nan min fuih nasa ţhin a, vawikhat kan ti ti ţum a puanţhui nuam ka tih thu ka sawi khan an khawl hman ngai loh a la chhuak a, chhun a an chhuah vek hlan chuan rilru lak pen nan eng eng emaw ţhui turin min hrilh a, ka thawmhnaw pawh ka ţhui ţha nual. Ka thil ţhui ka hmuh tir hnuah min tih tir ve a, thil pakhat chauh a rilru kal ding ngawr ngawr tur a veng ve thei lutuk.

"Ka lawm tak tak aw" a tih leh hnuah min chhuahsan a, Kimkimi chuan mak tih hmel zetin min lo en phawk hra reng.

"Eng nge a?" ka tih chuan "Puan ţhui i thiam maw?" a ti ha a, a awmdan avang te chuan ka lo nui hak. 

"Aw ka nu hian a thiam a, min zirtir ve ţhin. Aizawl ah ka rawn awm ta daih sia, ka tih chhunzawm thei dawn chuang si lo va ka sawi duh lo a nih kha" tiin ka hrilhfiah a, ţhui chak viau ţhin mah ila khawl ber a awm miau loh chuan ka nuam tihna ka sawi ri duh lo hrim hrim. Ţhui chak deuhin ţhui thei si lo in ka awk ang a a hrehawm mai mai zawk.

"Khawl in la chhuak tihna em ni? Kan nei ve ngei a tuma'n kan ţhui thiam lo a, kan tuina a ni lo tlang bawk sia" a ti leh hluai a, ka lo bu nghat nghat.

"Tetea'n min lakchhuah sak a, chhun a keimaha ka awm changin ka lo ţhui mai mai zel. Ka kawr lian lutuk ho ka siam ţha a, a nghawng awm sa a ka lei ka duh leh si loh kha a nghawng te ka paih a" ka ti leh chiah chu a phur hmel kher mai.

"Nihchuan puan than ngaihtuah ila nalh deuhin min la ţhui sak rawh aw" thatho zet a a tih chuan ka lo thaw halh a, ka hmel a dik lohna langchhuak chu hmu thiamin "Ngati nge?" tiin min lo zawt vat.

"In inah hian ka awm rei tawh mah mah a, nang chuan min ning lo mah la i chhungte'n min ning ru thei a, ka inthlahrung a ka awm a nuam thei tawh lo" ka ti sep sep a, inthlahrung viau mah ila ka in a let leh ka hreh takzet. Mahse engtik ah emaw ka let leh a ngai dawn tho tho. 

"Inthlahrunna tur engmah a awm lo. Min rawn ti hek lo emai, nangmah chiah a awm chu ka nute pawhin an phal lo hrim hrim ang. Bakah a la rei lo a, nangmah a i awm chuan thlamuang lo deuhin i awm reng dawn a sin" a ti chiah reng a, inveng ranin ka awm reng tawh ang. Tumah lokal dawn lo mahse ka inthlahdul theih chuan ka ring lo. 

"A ni khawp mai mahse engtin ni ah emaw chuan ka let leh a ngai dawn tho tho a, ka hlauhna hi a reh tawh dawn lo va, hetah rei deuh awm mah ila ka hlauhna a kiam chuang lo vang. Hmachhawn vat ka duh zawk a, ka hmachhawn ang a, ka theih ngang loh leh ka lo let leh zawk ang. Bakah in luah tur dang zawn mai te ka duh a, Lalawma tan chin tur a hriat si loh a, a rawn chhuah hunah nasa zawk a a rawn chet ka hlau" ka ti melh melh a, keimah a awm leh chu ka hreh takzet mahse ţhiante in a awm reng ringawt hi thil dik ber anih loh bakah min nin hlau reng rengin ka awm a, ka bet hleithei lo. 

"Dinpuia bulah insawn lut mai rawh" a tih chuan mak ti zawkah ka ţang ve thung. 

"Pindan pathum a awm a, ka lo bia ang. I in luah a hrehawm deuh thu kan sawi mai ang a,  a rem ti em em ang. Kan in aţanga chhuah i duh tlat chuan Dinpuia hnenah awm la a ţha ber. Nangmah a i awm leh chuan keimah zawk hi ka awm a nuam thei dawn lo hrim hrim. Ka lokal reng thei dawn si lo va, engkim a puih che inhuam reng chungin ka pui thei lo leh palh ang che" thawmhnaw hak sawt sawt pahin a ti mawlh mawlh a, a kawr hak lai mek a pawh rem hnuah phone a ban zui zat. 

"Ngawi lawk rawh" tih pahin a banrekah ka lo vuan a, a ngaihna hre lo deuhin min en ha a, phone erawh a la lui bik lo. 

"Ka duh lo" ka ti mawl tawp. Ka bialpa, ka tan a engkim huam a nihna angin Timothy-a zai ka ngaih ve a ngai a, Dinpuia hnen a awm chu a rem ti kher lo ang. 

"Nih chuan kan inah awm reng rawh. I la hlau tih ka hre vek. Kei takngial paw'n ka la hlau a nia, Lalawma kher lo a ţhiante paw'n rilru ţha lo deuh an pu thei tho a sin. Engkim, thil thleng tawh te leh thleng thei zawng zawng ka ngaihtuah kual vek a, nangmah chiah chuan ka awm tir tawh dawn lo che" a ti fak fak a, a tumruh takzet. 

"Dinpuia paw'n min lo ngaithei lo maithei a sin. Thim hmain ka haw ziah ang a, kawngka ka kalh tlat zel ang a, eng em a thleng tawh lo ang. Ka ti buai lutuk cheu a, nuam ka ti lo alawm" ka ti a, ka in a let phawt a in luah tur dang zawn ka rilruk a ni. Vanduaina tuar tu ka ni a, ka hlau takzet. Ka ngaihtuah zawng ringawt pawhin ka la ţim uai uai a, ka tha thlengin a la khur thei hial mahse midang ka tih buai a, ka hnuh luh ve zel hian nuam ka ti chuang lo. 

"Min ti buai lo reng reng. Ka sawi tawh kha, Lalawma pawh khatiang anih chuan a ţhiante zingah amah ang chiah pakhat tal a awm ang. I chhuah dawn chuan Dinpuia hnenah chauh awm rawh. Duh leh Dinpuia hnen aţangin luah tur dang i zawng zawk dawn nia, nangmah chiah a i awm loh chiahin ka ngaih a ţha ang. Nangmah a i awm chuan mumang ţha lo i neihin tu nge kai tho ang che? I mutthilh leh hma tu nge veng ang che?" a ti mawlh mawlh a, luhlul chhuahin min hnial lui ţang ţang. 

"Nih leh mu phawt teh ang. Nakinah kan sawi ţha leh dawn nia" ka ti ta ringawt a, zan mut te hi ka huphurh ngawih ngawih zel. Kha zan kha chiang deuhin ka hmu ţhin a, ka hriat miah lohin ka mumang ang chiahin ka lo tal vak vak ţhin a, Kimkimi hian min veng chawt a ni ber. Hei vang tak te hian ka inthlahrun phah a, mutchhuak deuh chung a men luih hram hram chang te a nei a, sawisel lo mahse keimah zawk hian nuam ka ti ţhin lo. 

Chawlhni zing a ni a, Fredy pawh a thawh veleh aţangin a thin a rim. A pawisa hman chawp tur tuak nan ar vulh tir an tum a, a lungawi lo khawp mai. Chhung inkawm kan neih naah Kimkimi nu chuan hun hmangin nidang a an tih ziah danin ka tan an ţawngţai leh pek a, ka lo ip chawih ţhin. Pathian a awm ka rin rualin min hmangaih ve ka la ring lo tluang zel a, min ţanpui a duh ve lo niin ka hria. Vanduaina ka tawk mawlh mawlh a, thil ţha lo kan chunga thleng tur a kan duh loh ber ber te hi ka chungah a thleng bik chat ţhin. Ka ţhiante, kei aia dinhmun sang vek leh ţawiawm tu chhungte ţha tak tak nei ho hian eng buaina mah an tawk ngai lo. Ka thikin ka itsik lo na a ka chunga chhiatna lam hlir a thlen mawlh mawlh vang hian Pathian ka dem leh ţhin. Pathian thu an chhiar te leh ţawngţainaa an thu chham te hian min khawih danglam zo tawh lo a ni ber. Tihtak zetin ka lo ring ve tawh a, a chhe lam hlir ka dil ţhin letling thawk vek ka chungah a thleng. 

"Ar chu i vulh dawn ta em ni? I va'n fel sawt em em" Tetea chuan nui ruh ruh chungin a ti a, chaw eiin kan ţhu kual ţhap a, Fredy a ţeu hlar mai.

"Ka vulh peih lo an chaw a uih si" a ti vin hlur a, anu in "Pawisa kan pe tam tawh dawn lo che. Thawhchhuah harsat zia hre ve reng reng rawh. I vulh dawn khawp mai" a lo ti thung.

"In leh a vel a ti rimchhia a, ţhenawm te tan a hnawksak mai mai a ni thei. Thosi a tam duh bawk si" a ti a, thiam deuhin a sawi nawi ve ngei. 

"A rimchhiat loh nan i sil ngun ang a ni mai lawm. Huan kan nei ţha a, ar leh vawk vulh nan a rem lutuk" Nu Mahruaii bawk chuan a ti leh a, Fredy chu kham tau nghawng nghawng mahse an rilru an thlak hmel loh hlawm khawp mai. 

Chhunah Timothy lo lengin inchung zawlah kan ţhu dun a, ni a sa mang lo va, khua a duai deuh ruih zawk vangin inchung zawl a awm a nuam lehzual. Nu Mahruaii'n pangpar chi hrang hrang a khawn khawm peih bawk a, min hual khup a, chu erawh ka ngaina tel ve vak lem lo. 

"Kimkimi te chhungkua hi fel viau mahse ka inthlahrung a, let leh mai ka duh tawh a" ka ti a, ka thil tum chu Timothy ka hrilh veleh. 

"In luah tur dang ka zawng mek a, chumi hma chu awm rih rawh. I in hluiah kha chuan nangmahin let tawh lo ang" a ti nghet charh a, Kimkimi ang tho a ni. An inkawmngeih bawk a, a chang chuan an rilru put hmang leh ngaihdan thleng hian a inang ni te'n ka hre ţhin.  

"Mahse tlawm deuh ka duh leh ngei dawn a, ka patea hian min rawn zai anih loh chuan ka pawh hmasa ngam kher lo maithei. Ka patea puihna tello phei chuan chawhmeh leh bill zawng zawng nen, in luah man a to phei chuan ka tlin dawn lo hrim hrim. Mualpho deuhin min chhuah tir dawn tho tho a, ka duh ang tak hmuh nan chuan hun a duh rei viau ang" ka ti zuai raih a, ka ngaihtuah thui lutuk chang chuan ka hah ngawih ngawih ţhin.

"Ka pui ang che ka tih tawh kha. Lo ngaihtuah hah ve vak vak suh. Naktuk aţangin class kal tawh la, hma lam pan nan a la hma tih ka hria, mahse inkhung chawrh chawrh hian hlawkna a nei tam lo" a ti a, min nawr nasa ngai lo a, duh lo tlat ila chu min ti lui bik miah lo ang. Mahse Lalawma vang mai a ka hma lam hun zel tur leh ka zirna thlengin a chhiat phah a hlau a, mipa laktlak loh leh nunrawng zet vang a thil engkimin min rahbeh vek a phal lo a ni ber.

"Ka tum ang ka tih tawh kha. Mahse pawn chhuah ka hreh hluah hluah. Miin lo hre darh vak ta se min en hrek hrek ang a, min chhaih duh pawl leh min ngaihtuah lutuk vang a min zawt sek duh an awm a, thil awmdan hriatchian chak a kimchang tak a min zawt duh an awm bawk ang a, mi tam takin min hmuh hniam phah ang a, chutiang zawng zawng chu thleng ta se engtin nge ka awm ang?" ka ti mawlh mawlh. 

"Ka veng ang che" a lo ti sup a, tumruh viau mahse min hnem zo tak tak ţhin lo. Hlauhna nasa tak ka nei ka tih tawh kha. Lalawma leh a ţhiante chauh ni lo, thil dang tam tak hlauh ka nei. Mahse ka nunna lak ka la tum chhin ngai lo thung. Ka thih rualin hrehawm tak a min siam tu kha a zalen huai ang. Min khawngaih tu ten min theihnghilh leh thuai ang a, ka hming a reh rualin thil sual ti tu leh a thil tih sual pawh a dal ve zel ang. Min that tawp anih loh chuan ka nunna lak ka tum miah lo. Ama'n min zah lo anih pawhin a chhungte tal chuan min hmuh rualin an fapa leh an unaupa thil tih sual hrechhuak ve ziah rawh se. 

"Miin an hre darh tak tak anih chuan min veng zo lo maithei a sin. Awlsam deuhin mipui an dai thei ngai lo" ka ti a, min khawngaih tu te leh min dem tu te an inpawlh nawk ang a, ka chungchangah an inhnial luih luih bawk ang. Chutiang a thlen chu ka hlau hle. 

"Ka tih theih ang apiang ka ti vek ang. Ngaihtuah vak vak lo tur a ka tih che kha. Miin engmah an hre lo, sawi chhuak tur kan awm lo a, tuma'n an hre lo vang" a ti a, amah tak hi chuan police ho hriatah takngial pawh a sawi chhuak lo. Mahse mihring kan inan lohna tak hi buaina inţanna a ni ţhin. 

"Ngaihtuah loh ka tum paw'n ka lo ngaihtuah leh veng veng zel" tih huai pahin a darah lu ka nghat a, ka ngaihtuahna hian min ti nguai zual ţhin. 

"I ngaihtuahna kha block rih a ngai a nih chu" a ti fiamthu a, a hnuah thutak deuh zawkin "Thil thleng khan a nghawng nasat viau che a min hlat phah ka hlau a, mipa ka ni ve tho sia min hlau tel mai ang ka ti hman a, chutiang chu a thleng lo hlauh a, i huaisen takzet" a ti leh a, tawi te in ka lo nui sak. Ka hlau ngei a, hlauh tam tak ka nei ngei mahse Timothy berkher chu ka hlau thei lo. Kha thil a thlen hnu kha chuan min dim dawiin ka pawi a sawi a hlau lehzual a, Lalawma'n min khawih laia ka hlauhna ang kha ka neih hlauin ka rilru na hnem nan a min kuah bak thil dang a ti ngai lo. 

"Hmelma leh hmangaih tu ka thliar thiam alawm" ka ti ve khauh a, a hriat tirh phat aţangin ka tan a a hlauhawm loh zia leh min veng tur a a inpeih reng zawk zia a lantir nghal a, mak tak maiin Timothy berkher chu hlauhna ka nei lo. 

"Kimkimi te inah hian la awm rih rawh" a ti nawn leh a, ka kut vuanin a hmer zui vang vang. 

"Ka sawi tawh kha an chhungkua hian tumah sawiselna ka nei lo mahse mi pangai nih chuan inthlahrunna chin a awm lo thei lo a, ka ti buai lutuk ang tih ka hlau a ni ber" ka ti a, a rukin min lo ning viau ang tih te a hlauhawm a, mihrang an awm chuan chhungkua a ti ti te leh chhungkaw tan a pawimawh midang hriat chi si loh sawi khawm te a har a, eng eng emaw dan beh ka lo neih palh ka hlau. 

"Ka ţhiante ho in min zawn pui a, an hmu vat mai ang. Dinpuia tih loh ngaihtheih loh an nei ve hleinem" a ti a, a nui zui hawk. 

"A chang chuan ka khawngaih ve ţhin. Nang chu i nu leh pate'n min pawm thlap a, hetah pawh rawn lengin inu phei chuan min ţahpui lek lek a, nangpawh ka chhungte paw'n an sawisel bik dawn miah lo che a, chuti chung chuan chhungte an hel tlat vang a a hrehawm dan tur ka hrethiam pha, tawng lo mah ila ka hriatthiampui. An pahnih hian ka khawngaih ve ve" ka ti a, a unaunu min tih dan kha tun thlengin a la hre lo. Marie chuan min la lawm chuang miah lo a, anu leh pa leh a u Remremi erawh chuan  hrehawm ka tih lutuk hlauin min rawn thlamuan ve fo. Marie chu ka hmu ngai lo va, a thawm pawh ka hre ngai lo. 

"An la pawm ve mai ang. Ka sawi ang khan hetah awm tawp rih phawt rawh. Nangmah chiah a let ka phal tawh lo. I let luih chuan ka luh khung ang che" fiamthu titak deuh hian a ti a, ka lo nui ve hak. 

"Kan la innei bawk si lo va, in ngaizawng satliah ringawtin ka inluah man lehzel min tum pui chuan ka zak lutuk ang" ka ti a, ka ngaihdan diktak a ni. 

"I zah loh nan ka nei mai dawn che mi?" a lo ti veleh. 

"Kan la naupang lutuk kan chhungten an la phal teuh lo mai" khauh deuhin ka ti ve nghal vat.

"Tak tak a tuma'n an hre lo ang. A rukin ka pui ang che. Ka puihna dawng turin ka nupui inih kher a ngai lo" a ti nghet charh a, keimah vangin a lo inhrek lutuk ang tih te ka hlau ve ţhin. 

"U Didik kha ei rawh" tih pahin Fredy chuan a cake lo hawn zai lep pakhat min pe a, coffee min pe tel bawk. Timothy-a sana bun lai ka en a, thil ei hun a lo ni reng tawh. A hun a ei nachang ka hriat loh chuan min pe vat ţhin a, ka ei loh te, ka ei tui loh te a hlau ţhin hle. 

"Ka lawm lutuk aw Fredy mahse hei chiah hi em ni i lo ken?" ti a ka zawh chuan tum bur chungin min melh a, min chhang lem lovin a bu zeuh ringawt. 

"He naupang--" a ti hman chauh tihin Timothy-a kutah ka lo vuan vat. Sawi zawm ka remti lo tih hria in a ngawi ve mai a, a sawisel lo a, ţha deuhin a be chhunzawm lo bawk. A ngawi hmak a, Fredy chu lawmthu ka hrilh nawn leh.

"Eitui le" ti hmakin a kal leh nul nul. 

Fredy kal liam veleh Timothy chu nghawkin "Naupang an khing ngai lo. Keini aia nau daih a nia" ka ti hlak a, a ngaipawimawh lo nasa.

"Naupangah pawh a mawl chi a ni ve hrim hrim. Duat sual a ni lo duat sual mawl anih kha" a ti ve bawrh bawrh a, chutianga a awm ve ngei chu hmuhnawm ka tiin ka nui hak hak. 

"I ei zawk duh em? Dinpuia siam anih ka ring. Nimin a insawn naah a lo va kal ve a, hei hi a rawn hawn a" ti a hrilh pahin pek ka tum a, a la duh lo.

"Kan chhuk hunah ka ei mai ang. Fredy tih thinrim nan hrim hrim ka hawn ru vek dawn em maw ni?" a ti leh sup a, ka nuih a za ve kher mai. 

 "Tui iti ngawt ang rin aiin a siam thiam daih. Chhang dang pawh tui deuh a a siam thiam chuan miin an hria ang a, a hralh ve char char mai ang" tiin ka fak luam. Kimkimi'n a zir thu min hrilh pawh khan a tih ţhat peih ka ring vak lo a, a tum ve tak tak a ni ngei ang a peih ta phian. 

"Siam an tam tawh khawp a, puih nasat a ngai khawp ang" a tih lai mekin thingpui leh cake nen tho Kimkimi a rawnkal veleh thung. Timothy-a phun hluk ri chu Kimkimi nen kan hre pha ve ve a, Kimkimi pawh a nui ve ringawt.

"Ka duhsak vang che anih hi aw. Kha ei ve hrim hrim rawh, ka nau mawl lutuk hi chu in hriatthiam fo a ngai maithei a nia, mawi leh mawi lo a thliar thiam ve bawk si lo a, rintur u a ngah em a, lo dawh hram hram rawh u" a rawn ti zung zung a, a thil kenlai chu Timothy a pe pah bawk. 

"No chu nakinah ka rawn seng leh mai ang" a ti a, kal nghal mai a tum emaw ka tih laiin "E...tak a" ti hluaiin a ding leh rih. 

"Timothy, Didiki hi a in hlui a let leh a duh tlat a, amah chiah a a awm chuan kan rilru a nuam lo vek dawn a, a insawn chhuak leh duh a nih ro ro chuan in luah tur kan zawn chhung Dinpuia bulah awm rih mai se, a in a lian a, pindan pathum lai a awm tho a, eng nge i ngaihdan?" a ti leh bawrh bawrh a, min ngaihtuah luatah ka sawichhuah duh miah loh a sawi chhuak ţalh. 

CONT...