THROUGH THICK AND THIN-21

THROUGH THICK AND THIN-21

KIMKIMI

"A ti mai mai a nih kha. Dinpuia bul a awm ve tawp chu ka duh teuh lo mai. Kimkimi hian min ngaihtuah lutuk a, an in a ka awm duh loh ro ro chuan Dinpuia hnen a awm ve mai turin min tia" Didiki chuan a lo ti nghal zat zat a, min mitmei pah zeuh zeuh. 

"Ka ngaihtuah reng che lawm. Kan in a awm i inthlahrung tlat a, i in hluiah kha chuan nangmahin ka awm tir tawh dawn lo hrim hrim che. Kan in leh Dinpuia in, i duh zawk zawk i thlang thei. In luah tur hi rin aiin a vang hrep zel a nia, man tlawm nuam ve tho si phei chu" ka ti ve duah bawk. 

"In inah ka awm rih mai ang. Dinpuia tihbuai ai chuan inthlahrung mah ila hetah ka awm mai ang" a ti ta nge nge a, ka duh dan chiah. Ka bul a a awm reng hian ka ngaih a ţha a, nuam ka ti bawk. 

"Dinpuia in tharah khan inchung leh hnuai a awm em?" Timothy-a chuan a lo ti ve bauh a, lu thin pahin "Awm lo. A zau huai a, mahse chung leh hnuai a awm lo. Pindan a tam a, chuvang tak chuan nia heta a awm duh loh chuan awm mai se ka tih na chhan. An inpawh ve tho sia, Dinpuia bulah chuan inthlahrunna tur a awm dawn miah lo a" ka ti a, Dinpuia bul a awm ai chuan kan bul a awm a la thlang zawk tho ang. 

"Eng harsatna pawh tawk ila, ka ţhian te pawh ni ula midang in a awm chu inthlahrun a na duh hrim hrim. An fel poh leh kan inthlahrung emaw tih mai tur" Didiki bawk chuan a lo ti leh. 

"Ka nu ka hauh tir ziah che nga ni mai lawm" ka ti uang a, a nui ţha duh lo kher mai. 

"Kar khat dang awm leh la, in kan hmuh mai loh leh duh leh Dinpuia chu kan dil ang a, mahse hmuh hman ka lo tum ang"Timothy pawh chuan a lo ti ve a, Didiki mizia kan hrechiang a, inthlahrung lo turin hrilh mah ila a inthlahrung dawn lutuk tih kan hre ve ve.

"Nia, hmeichhe tan hi chuan fimkhur a ngai em a, Dinpuia bulah pawh awm rei a ngai dawn chuang lo a, reilote chhung awm ve chu a sawisel dawn lo hrim hrim" hneh ngei tumin ka ti a, diktak chuan in thar pawh nise mahni a awm tur chuan ka la duh chuang lo. Hlauhthawnna ka la nei tlat a, rilru nuam a ka awm theih ka ring lo a ni. 

Kan ţhianten Didiki an hmu chiah chu zawhna an ngah kher mai. Kutthlak tu an awm ti a ka sawi kha sawi lang duh si lovin a ţhat leh ţhat loh an zawt sek a, thudik tak hre tu pahnih erawhin ngawih kan chuh tlat. Didiki chuan thiam takin a chhang ve zel a, hlauthawng a thinrim mai lova dam deuh a a hmachhawn thei chuan min ti lawm veng veng. 

Chhun thil kan eizawh hnuah pawh class kan neih leh hma chu ho te te sawiin kan ţhu khawm laih a, kan subject lak a inan loh nual vangin kan class neih hun pawh a in ang lo tlang. Midang an kal darh sang sang hnu chuan Didiki hnenah Dinpuia in a ka kal tur thu ka hrilh ru ser ser a, "Inu in a hriat chuan a thinrim khawp ang aw. Ka bulah pawh Dinpuia a duh loh thu a sawi fo a, tawn luih chi vak a ni rih lo ka ti. I tih luih zel chuan nangmah chiah a chhuah a phal lo ang a, class kal thlengin a khap mai tur a sin" tiin min lo sawi ţhaih a, ka nu zia a ni ve hrim hrim a, min vau pung pung a a ti tak tak ngai chuang lo. 

"Chhang siam khawl sa a nei nual a, ka zawrh sak duh sia ka pack pui ve lawk duh a. Ka rei lo ang, i haw hun a a lo zawh che chuan Siami te inah lehkhabu a hawh kawi i lo ti mai dawn nia, a buai sia amah chiah a tih tir chu ka khawngaih alawm. Siami hnenah khan lo hrilh la, ka nu in a biak paw'n an in a kal kawi angin min sawi rawh se aw" ti a thlem pahin rem ka ruat zung zung. Hritlang viau mah ila kal turin ka intiam ve tawh laklawh sia, bakah a nu in in luahman chawi tur a tum tlat bawk si, ka intiam tawh ang ngei khan theih ang ang a puih ve ka duh. 

"Ti zung zung ula in tih zawh veleh rawn haw vang vang rawh aw. I rei vaih chuan a buai leh dawn nasa a nia" a tih pawh chuan "Rei dawn lo e. A rukin ka kal dawn a rei deuh ka awm ngam bik lo hrim hrim" ka lo ti leh zung zung. 

Ka kal dawn thlengin Didiki ngaih a ţha lo a, min thlah thlap a, kal lo mai turin min hrilh pah reng. Kei lah ka tum tawh chu tum bur chi ka ni bawk a ka kal lui ta tho. Ka hritlan em vangin kalkawngah damdawi ka lei kawi a, hmun dang a peng tawh lovin ka kal tlang vang vang. 

Kawngkhar a inhawng huau a, thawm dim deuhin ka lut. Choka aţanga thawm ka hriat vangin ka pan ding nghal a, amah chiah a lo awmin a buai khawp mai. Dawhkan lian takah chuan chhang siam sa a chhawp chhuak ruih a, kan ţhenawm a dawr te siam Nu Rami ka be lawk vek tawh. Ka hawn ang a, Nu Rami'n a lo zawrh sak ang a, keiin a ţhen ka zuar ve bawk ang. 

"Ka lo thleng tlai em?" ti a ka zawh chuan min hmu ve chiah. Thawm ka dim bawk a, a thil tih laiah rilru a pe ve bawk nen, ka lut thawm a hre lo hrim hrim a nih hmel. 

"Tlai hran lo e. I rilţam em?" tiin min lo zawt ve a, lu ka thing a, dawhkan ah bag dahin ka damdawi lei chu ka phawrh a, "Thil kan ei na a la rei lo lutuk. Ka hritlang deuh a, damdawi hi ka ei ang a ka pui ve ang che" ka tih hnuah hritlang damdawi chu ka ei a, ka bag inchhawp hnawk ve reng chu dahţha lehin dawhkan bul a chair pakhat ka la a, ka ţhu rem nghal sawt sawt. 

"An lei duh kher lo maithei" min melh ran chungin a ti ban charh. Hrilhhai tak a lo en ha in "Ngati nge? A tui lo em ni?" ka lo ti thuai. 

"Tui e..mahse chhun a hralh turin zing karah an dah tlangpui a, tlaiah i hawn ang a, zan a riah chuan a hlui hman awm sia" a ti a, a chhang siam tawh sa chu a melh leh ţhin. A huphurh ruk zia a lang reng. 

"Ka lo ngaihtuah lawk lo reng reng. Mahse kan hun neihin a zir lo em a, zingkarah ka rawn lam thei lo a, nang lahin i rawn dah hman bawk si lo va, a tui chuan an lei duh tho ang. Nidangah kan hre tawh mai dawn nia" phurna siam sak tumin ka lo ti veleh vat. Bakah zan a riah vang a tui lo leh chhe tur chi a awm lo hrim hrim. 

"Ni tawh mai. Nih leh nangin khawi ah nge i zawrh ang? A hun a thlen meuh chuan rin lawk aiin a huphurhawm" a ti a, chhungte vang a duh duh nei thei, tlakchham nei miah lo va awm ţhang a ni bawk a a hnual nghal mai a ang. 

"Zawrhna tur a tam alawm. Kan vengah ringawt pawh in a tam e. Timothy-a pawh ka sawipui tawh a, min lo zawh kual sak ve dawn a, ka ţhian dang te pawh ka lo sawipui ang a, an phui hreh lo ang che. Ti hian tui deuh deuhin siam zel phawt rawh" ka ti mawlh mawlh a, phur tak ang a lang chungin ka pack zui a, zawrhna tur áwm ang ka ngaihtuah pah neuh neuh. 

"In luah man chawi a ngai dawn lo emaw ka tih hnuah chawi a ngai leh thut sia, ţan ka lak viau loh chuan ka che buai ang" a ti zuai raih a, ka ngaihtuah thui chang chuan hahthlak ka ti ve tho. Mahse a kalsan tawh lamah ka let tir tawh dawn lo hrim hrim.

"A mak e. Eng emaw hmain huphurh ţung ringawt suh. Kan tum chhin ve phawt ang chu, bul ţan tirh phat aţanga hlawk nghal vak i tum chuan i hnual mai mai. Ţan kan lak chuan tlem tlemin kan hlawk chho ve tial tial ang a, miin an hre ve zel ang a, kan zawrh kher ngai lo a rawn zawng chawp te pawh an awm mai ang" tiin ka zilh a, tum hmuk chungin min pack pui ve mual mual tho.

Kan pack zawh meuh chuan a tlai ruih tawh a, ka hritlang chuan awm a ti nuam lo ve hle. 

"Lo va chawl rih rawh. Tihfel pahin eitur ka lo siam ang che" a tih chuan ka hnial duh bik lo. Ka zawiin ka awm muai muai a, ka damdawi ei hnathawh te pawh kha a niang, a zuar tu pawh khan min hrilh lawk hrim hrim. Tlai deuh deuh a inbual ka chin vang vek. 

Ţhutthleng sei a hahdam deuh a mut der der pahin a in tihfel fai zawh hun ka lo nghak. Mutchhuakin min zem chiai chiai a, men luih tum ve ţang ţang mah ila thawm thlengin a zawi tial tial. 

Chiang deuhin ka harh a, inchhung a lo thim khup. Rang lutuk a ţhu chhuakin phone ka phawrh a, dar8 a lo ri vang tawh. Ka chhungte zawng zawng leh Didiki thlengin min rawn biak an tum nasa viau ni tur a ni an hming a intlar thla dul mai. Class ka neih dawn vangin ka silent a, ka lo la thlak danglam lo a lo ni. Hmanhmawh zet a che sawk sawkin light ka on thuai thuai a, ţhutthleng sei dang a Dinpuia lo muhil ve ka hmu ta chiah bawk. 

"Tho teh" tih pahin ka sawi nawk nawk a, ka ko pah mawlh mawlh reng. A harh rualin "Ngati nge min kaihthawh loh? Min hau ngei ngei ang. Dar8 a ri tawh a nia aw" hlauthawng takin ka ti a, a ni pawh a ţhu chhuak ve thuai. 

"I muttui em a, reilote muttir che a kaihthawh che ka tum a, ka lo muhil ve daih a niang" a ti a, a inthiam loh hmel takzet. A chau ve tho dawn tih hriain ka thinrim duh lo va, choka ah pheiin ka chhang hawn tur chu ka la sawk sawk a, haw nghal mai ka tum tih a hriat chuan "Eitur ka siam a, i ei phawt dawn lo mi" tiin min lo zawt a, scooty ka dahna lam a kal hmawk hmawk chungin lu ka thing pah nawk nawk. Ka pa takngial pawhin min rawn biak a tum a, ka hlau lutuk chu ka ril pawh a ţam lo. 

"I hlau em? Zui i ngai em?" chhang ka dah ţhat mawlh mawlh lai chuan zawhna bawk a lo siam leh. 

"Ngai lo mai. Chak deuhin ka tlan mai ang, nangmah kha i ril a ţam tawh ang. Thil lo ei la, thlen veleh chanchin ka lo hrilh ang che" ka ti a, min ngaihtuah lutuk loh nan hlau deuh angin ka awm duh lo. Kan awmdan hi a duh reng vang a nih bik loh zia ka hria a ni. 

Haw nghal vang vang mah ila in a tlang lovin Nu Rami ka pe kawi leh te te a, vawikhat lakna chauh a ni bawk a pawisa min lo pe nghal. Bat ţhen engmah a nei lo chuan min ti lawm takzet. Pawisa chu khung ţhain ka haw a, inchhung luh ka hreh kher mai. Tun ang reng reng a mahni in a haw hreh lai ka la nei lo. Ka la lut ngam rih dawn chuang lo bawk a ka chhang hawn pawh scooty ah ka hnutchhiah vek. 

Tim dai a inchhung ka lut chu min lo en ţhap a, an hmel hmuh a nuam lo hlawm kher mai. 

"Rawn ţhu teh" ka pa in a lo ti hmuk a, hma lam a kut suihin ka pa kawhna lam chu ka pan hna hna. Choka luhna bulah Didiki leh Fredy te an lo ding dun a, an hlauhthawnzia ka hmu thei. Midang chuan thinrim hmel an pu vek. 

 "Ngati nge phone i lak theih miah loh? Kan mangang a kan vaiin biak che kan tum a, ngati nge biak theih miah loh a i awm?" ka nu chuan a ti vin hlak hlak.

"Phone ka silent a" ka ti sep a, awm dan tur ka hre lo lutuk chuan ka kutţang ka khal niap niap. 

"Khawiah nge i kal bo?" ka pa chuan chhum hmuk hian a ti leh a, hlau chung chung a melh zawkin "Siami te inah" ka ti leh tawp. 

"Dar7 rik hmain i ţhiante in kan en kual hman vek. Dinpuia bulah i awm tiraw?" ka nu in a ti veleh a, dawt sawi rengin awmzia a neih tawh loh zia hriain "Aw" tiin ka chhang. Vawikhatmah kut min la thlak ngai lo tu ka pa chuan a thinrimna thunun zo lovin min beng a, ka rilru a na kher mai. Ka thin a rim takzet bawk. 

"Vawi engzat nge thlah tur a kan hrilh tawh che? I nu in nitin a hrilh che a, kei leh i unaute paw'n kan sawi ziah. I patea hial rawnkalin thil awmzia a hrilh vek che a, luhlul chhuahin i la kawp lui zel, kan dim mah mah che a i awm thiam lo anih hi. Naktuk aţang chuan class kal a ngai tawh lo. In lamah a ţul ţul thawk la a tawk. Naupang te si thunun hleih theih miah loh mai" a ti khur khur a, ka pa hi pa ţawng tlem tak a ni a, a thinrim hle a ni ngei ang. Mahse an ngaihdan zawng zawng a dik vek kher lo. A bulah ka awm tam a, a zia ka hrechiang ber. Ral aţanga a chanchin an lo hriat ţhin ang ringawt hi a ni bik lo. 

"Kan hrilh kan hrilh che a, i tawn lui zel a, mipa dang hmu miah lo ang maiin i awm a. Nu leh pate'n a ţha lo kan tih chu thlah hmak mai tur. Hauh reng che a kutthlak che hi kan duh dan a ni bik lo va, ipa pawh iti thinrim zo tawh a" tiin ka nu chuan ka pa thlavang a lo hauh a, nidang ang chu ni se ka pa'n kut min thlak vang khan ka ţap zawih zawih maithei mahse tunah chuan ka ţah a chhuak lo hrim hrim. 

"A englai tak nge in duh loh a? Miin a chhe zawng a a chanchin an sawi vang ringawt in in haw hlur a, mi thusawi zawng zawng hi a dik vek kher ngai lo. Kan chhungkua pawh chhe deuh deuh a min sawi tawk an awm tho ang. Belchiang duh miah lovin in haw hlur ringawt a" ka ti ve hmak hmak a, a ri a nui lui hawk hawk chungin Fredy a rawnkal a, rawn kun hniamin ka darah a dawm a, na lo te in min sawi bawk. 

"Han inthlak tawh rawh nakinah thinrim lovin in sawi leh zawk dawn nia. Lokal rawh" tih pah a min thawh tir a tum pawhin ka ţhu lui tlat. Ka ning ve zo zai tawh a ni. Engkim sawi chhuak vek law law se la, nitin an sawi reng tawh lo ang a a ţha daih zawk. 

"Naktuk aţangin inah inkhung hmak la a ni mai. Engpawh sawi la kan ngaihdan a ngai reng" ka pa chuan a lo ti leh hmuk a, "Ngati nge in lo buai ve em em? Eng nge ka inkhung ngawt nachhan tur chu?" vin zet a tih pahin thawh ka tum uai a, Fredy-an min dawm nghet sauh. 

"Kimkim a tawk tawh" tiin Tetea'n min lo khap bawk. 

"Ka ning alawm. Kawp lui zel mah ila nangmahni zah lo deuhin ka awm ngai lo. Kan inchhungah ka rawn hruai lut ngai lo va, class kal tur min thlah anih loh chuan mi hmuh laiin mawi lo deuhin kan awm ngai lo. Tih lungawi loh cheu hlauin kan inthup ve hram hram a, in mit ti kham zawng a awm kan hlau ve ngawih ngawih. Tunah phei chuan insiamţha in eizawnna tur te a ngaihtuah ve hram hram a, miin a sual an ti tih vang mai maiin in duh lo ve em em ringawt" ka ti tuar tuar a, ka thinrim lutuk chu ka thaw thlengin a rang vek. 

"Lalrinkim i zakthei lo pang pang lutuk. Mi ţha tak ni se an sawisel tawp nang. Thu i awih loh chuan i la inchhir viau ang. Thinrim zawk zawkah i ţang lehnghal" U Rintei pawh chuan a lo ti ve hlak hlak. 

"In a len luh pawh in phal loh, in belh chian duh miah loh chu engtin nge misual ti a in sawi tawp theih zawk? Lo inrawlh ve lo mai teh. A sual in ti reng a, a sualna sawi tur in hre chuang lo" ka la ti pang pang a, ka thinrim a kal laklawh a ni. 

"Ve khanglang che chuan. Chawm hlawm mai mai lehnghal, ngawi hmak rawh" ka pa chuan a ti bung hmuk a, chawm hlawm ni mah ila an fanu ka ni chung a chutianga min ti kher kher chu ka haw hle. 

"Chutianga in thil tih in hriat viau te chuan min chawm tawh lo tawp ula a ni mai lawm" ka ti ve nghat. 

"Tunah pawh amah vangin chhungkua kan buai nuai nuai a, mifel tak ni se hetiang hian kan buai lo tawp ang" ka nu in a tih chuan "A dik lohna sawi reng lo ula kan buai lo a ni mai. In fel famkim bik lo bakah tupawh hian insiamţhatna hun ţha kan nei mek a, insiamţhat tumna a neih chhung chu ka ţhen dawn chuang lo" ka la ti pang pang. 

"A dik lohna sawi tur a awm reng a kan sawi reng a ni mai. I mit a ti del zo tawh a i hmu thei lo a nih kha. I khawngaih hlawh a duh vang chauhin lem a chang mai mai a nih hi" ka nu bawk a ni. A vin hauh lo na a a ţawngkam chu a ngeiawm hle. 

"Hrechiang lovin ngaihdan siam ringawt suh. Mi in siamţhat tum na na na lo rin duh loh tlat kha a rilru chhiatthlak lutuk. Nangni pawh tun hmain in fel bik lo, Fredy-a pian hnuah chiah anih kha zu i nghei" tiin ka nu tunhma nun ka sawi ve  miah loh tur ka sawichhuak palh a, ka pa thin a sa leh phat. Kut min thlak tumin min tin leh uai a, mahse Fredy-an a lo dang hman. Didiki awm lai kher a chutiang ka sawi chhuak chu pawi ka ti hle. Min nawr lui nasa ve bawk a ni. 

"I chhuak tawh miah lovang hre rawh. Chhuah luih tum mah la ka kalh khum tho ang che. Nu leh pa zahna pawh i nei tawh lo" ka pa in a ti khur khur a, a bulah Fredy a la ding tlat. Kut min thlak leh a hlau a ni. Keichuan min sawisa hrep mahse pawi tihna ka nei lo. 

Ka tho tharh a, "Ka duh lo ti ve sek thei in ni lo reng alawm. Tum phawt chuan a insiamţhat theih. In sual zawk daih a nih kha" ka tih hnuah ka tlanchhuak a, min umzui tu an awm. Ka scooty dah rem vek tawh chu gate pawnah nawr chhuak lehin ka ti nung zui a, "Khaw nge i kal dawn?" tiin Fredy chuan min lo zawt sek.

"Duh duh naah ka kal ang. Mi fel ber ang zia zang hian an awm a, tumah saw ka hmu peih rih lo. Min rawn zawng reng reng suh u" ka tih khar khar laiin Tetea a rawn tlanchhuak ve a, min hnuh luh luih mai ka hlau hle. 

Scooty ah ka ţhu vang tawh a, min khawih an tum tak hlauhin tiin tlanchhuak mai turin ka inring ran. 

"Kimkim rawn lut rawh. Naktukah ţha deuhin i hrilh dawn nia, thinrim lai a thutlukna siam hi a inchhirawm duh a, zanin ah in ngaihtuah ţha la tun a i tih tum kha i ti chauh dawn nia" ngen ngawt zet hian a ti a, thutlukna atthlak tak ka siam a ring a ni ngei ang. Min hnuh thlak mai hlauin min rawn hnaih rualin ka tlanchhuak a, ka pa in min umzui lo hlauh chu ka lawm kher mai. 

A hming a ko mawlh mawlh chungin kawngkhar ka chum dawt dawt a, a rawn hawn rual a min hmuh chuan a hrilhhai hmel takzet.

"Ngati nge i lo let leh?" tiin min zawt thuai a, kawngkhar a a ding reng chu kalpelin helmet phelh pahin "Ka awm peih tawh rih lo. Ka lungawi hunah ka haw leh mai ang. An ţawng tam lutuk hi ka hne tlat. Keimah a ka chhuahin vawikhatmah ka haw tlai ngai lo, vawi khat ka ti sual ve a, an vaiin min hauh rawn a" ka ti bawrh bawrh a, ka kalna apiangah min zui a, choka ah lutin eitur ka zawng. 

"Khaw nge ka haw hmaa i thil siam kha?" tiin amah en ran chungin ka zawt a, ka banah kaiin dawhkan bul a chair ah min nam ţhu a, ka hmel hmu chiang thei turin ka bul chiahah a ţhu ve. 

"Eng nge thleng a?" ti a min ngaihtuah hmel zet chung a min zawh chuan ka thaw halh a, thaw vak vak mah ila thinrim vang a ka awm tawt lutuk hi a reh mai chuang lo vang.

"Ka sawi tawh kha..min hau a ka awm peih lo a ka rawn chhuak anih hi" ka la ti pawr char char. 

"A dai deuh tawh maithei, ka'n ti lum ang. Tikhan lo nghak rawh" tih leh thawh a rual a, a tih lum chhung chuan ngawi rengin ka lo ţhu. In aţanga ka tlanchhuah chhan hi mi tam tak tan chuan a ho viau maithei mahse ka tan chuan a ni ve lo. Nitin an sawi chhuak a, chaw ei hleithei lo in min siam fo. An rawngbawl ka puih chang lahin Dinpuia sual an tih zia bawk an sawi leh a, an hnaih a ka awm apiangin an sawi chhuak. Ka nu leh pate ka chhang pawng pawng te kha tam takin min dem ang. Keipawhin mawi ka ti chiah bik lo. Ka nu chungchang thleng a ka sawichhuak phei kha chu ka inchhir hle mahse ka thinrim tawpkhawk a thleng ve tawh a ni. Ngawih liam chang ngah viau mah ila zanin kher kha chuan ka ngawi thei tlat lo. Ka nu ngei pawhin hun ţha bawh pelh lovin a insiamţha a, Dinpuia hi a insiamţhat theih an ring lo tlat lawi a, chupawh mi ka aţanga an thu hriat vang mai mai. A nih loh zia ka sawi lahin ka ţan lutuk vangah an ngai leh hmak hmawk. Dik ka inti lo va, ka awmdan leh ţawngkam te engmah dik ka ti lo mahse ka nu leh pate pawh an dik bik chuang lo. Insiamţhat tumna nei miah lo se chu keipaw'n ţhen dan ka ngaihtuah em em ang. Mahse duhna a neih lai hian theih ang ang a puih ka duh a ni. 

Ka hmaah eitur rawn chhawpin a ţhutna ngai chiahah a ţhu leh a, ka thinrim lai a ni bawk nen ka ei nghal bawrh bawrh. Ka ei chiah khan ka rilţam zia ka hria. 

"Ei zo la ka thlah ang che" a tih chuan ka thil ei ka tawp chawt. 

"Ka haw dawn lo. Min thlah mahla hmun dangah ka kal leh tho ang. Ka haw leh anih chuan ka pa'n min chhuah tir leh tawh lo vang. Ka awm ang ang hian min en rih tawp rawh. Ka lungawi hunah keimahin ka haw leh mai ang" ti a ka hrilh hnu ah engmah thleng lo ang mai a awmin ka eizawm leh mawlh mawlh.

"Hetah awm mah la an rawn hruai tho ang che. I ti thinrim zual mai mai. I puitlin em kha in eipuar la ka thlah dawn che nia" awki pangai deuhin ti mahse "Nang pawh chu eng nge i hriat a?" ka lo ti vin hlar. 

"Tih luihnaa an hruai che chuan hmuh i hrehawm dawn a, an rawn hruai hma chein keiman ka thlah zawk ang che ka tihna a nih kha. Ipa a thinrim phei chuan a rawn hruai lui tho tho ang che" a ti hnu chuan "A rawnkal teuh lo" uar fe a ka tih hnuah "Tlawmah a la ang a a rawn kal teuh lo mai. Rawn kal mahse ka haw dawn chuang lo. Hrehawm ti ve tho mah ila ka haw dawn rih lo" ka tih zawm leh a, ka ei hmanhmawh bawk a ka ei zo rang kher mai. 

Door bell a rik chuan in en vat a, "Hawng suh" ti mah ila hawng turin a kal lui tho. Choka lamah an rawn kal thawm ka hria a, Tetea te hmuh ka inrin nen Fredy leh Didiki an lo ni hlauh. 

"I mawl em ni? Ngati nge khati vak a i awm? Nu leh pa te chuan min hau vak a an thinrim a reh leh mai lawm. Naupangchhia ang maiin i khawsa a, chhuah kher loh tur che a nia" Didiki chuan a rawn ti lut bawrh bawrh. In bengvar chawpin ka bulah an rawn ţhu ve ve a, Dinpuia erawh ka ţhutna piah a bang nghengin a ding thung. 

"Engmah ka sawi peih tawh lo. Nangni paw'n rawn sawi suh u min ti thinrim zual mai mai. Ka duh dan takin a nih hi ka awm" ka lo la ti bawrh bawrh. 

"Ka pa kan dil ţha ang a, ka dil pui ang che. Class i kal zawm leh thei em em ang. Ka nu in rawn hruai haw rawh u a ti nia aw. Chaw ei lo in kan lo nghak char char che a, in in hau sup sup a chaw ka ei hman lo leh a, U Dinpui eitur i nei em?" ti a a zawh chuan ka eitur a a siam sa, a la suah bang ho a dahna lam chu a kawk a, inthlahrung lo tawkin a ei veleh. 

"Thinrim te mai mai a reh leh vat zel. Kan rualin lo haw rawh a nih loh chuan in chhungkaw tan a mualphothlak lutuk palh ang. Ipa khan a ti tak tak lo ang, thinrim lutuk vang hian tum loh pui pui kan sawi ţhin a, nang pawh inih tho kha. Rawn haw phawt la i tan a ţha ber ang. Eng nge i ngaihdan Dinpui?" tiin Didiki pawh chuan a zawt veleh. 

"Ngaihdan ka nei lo. In tih dan dan a ni mai" a lo ti liam satliah a, inrawlh zui a tum loh hmel. 

Didiki chuan min thlem char char a, ka nau pawh a bang chuang lo. Mahse min thlem nasat vang mai a haw ka tum bik lo. 

"Ka duh duh hunah ka haw ang" tiin ţan ka khawh tlat. Rei fe min thlem hnuah Didiki phone a ri a, hmanhmawh zetin pawn lamah a tlan chhuak. 

"In awmdun chuan innei ang in ni mai lo mi? Kim, pasal neih i duh tawh mi? Thawmhnaw pawh engmah i ken loh kha, thawmhnaw la turin rawn haw zawk la" Fredy chuan a ti ve ngang ngang. 

"Ngaihdan mawl te te hi i nei a, ka nu bulah chuan 'ka lungawi hunah chiah ka lo haw ang a ti' ti rawh" ka ti hlak hlak a, tihngaihna a hre lo lutuk chuan a sam a tuai leh thuak ţhin.

"Ar min vulh tir an tum sia i awm loh te chuan ar chaw pek pui tur ka nei nang. Min khawngaih na nge? Bakah ka ngai che lawm" a tih vel te chuan ka lo ner nang nang. 

Didiki leh Timothy an rawn inzui lut a, Didiki a thutak ran laiin Timothy-a chu a rawn nui lut vur vur. 

"Che pui awm ţhak ţhak ve" ti a min fiamin min rawn pan hnai a, dawhkan bawh a min melh runin thutak deuh zawk hian "Ngati nge i haw tlai? I haw tlai chhan an ngaihthlak sak che em?" tiin min zawt. 

"Teuh lo mai, min zawt na a sawina hun min siam lo hrim hrim. Thinrimin min ankhum nghal buan buan anih kha. Hritlang damdawi ka ei a, damdawi kha a chak sia, kei damdawi lo ei khat ve bawk si chu ka mut a ti chhuak a, Dinpuia a lo chau ve bawk nen, ţhutthleng ah a hrang ve ve in kan lo muhil alawm. Kan harh veleh ka haw nghal. Duh reng vang a tlai ka ni lo" tiin ka lo vui nuah nuah. 

"Nih chu mawle..chuan hetah i riak mai dawn tihna em ni?" ti a min zawh chuan ka lo bu nghat.

"Timothy, Nu Mahruaii'n hruai haw turin min tia, kan hruai haw loh chuan an thinrim belh ka hlau a nia, an mualpho rum rum zawk mai tur a sin" Didiki'n a rawn ti ve nghal vat. 

"Pindan hran a awm a, tah chuan ka mu mai ang. Min pawt ţawng ţawng mah ula ka haw dawn chuang lo" tumruh zetin ka la ti ţalh ţalh tho.

"Dinpui blanket i nei nual em?" tiin Timothy-a chuan Dinpuia a zawt veleh a, chhang lem lovin a lo bu nghat.

"Ka riak ve mai ang" a tih leh phei chuan kan phawk hra hlawm. 

"Nang pawh chu i mawl em ni? Kimkimi pa kha a thinrim takzet a, nawr luih chi a ni miah lo vang" Didiki chuan a lo ti vin tuar. 

"Engtin nge i haw ang? I pawh ţawng ţawng paw'n a haw duh dawn si lo a" tiin cho deuhin Timothy chuan a zawt let a, chhanna a dawn tak lohah chuan "Zanin ah in ngaihtuah se la, naktukah chuan a zia tawh mai ang. Ka awm ve tih sawi ula zanin ah chuan rawnkal tawh lo mai rawh se" a tih zawm leh a, ka thawveng huai. Timothy a awm chuan tuman min rawn ti buai lo vang. Ka ţhian a nih mai bakah min hum tlat tu a ni tel leh ţhin.

CONT...