THROUGH THICK AND THIN-22

THROUGH THICK AND THIN-22

DIDIKI

"I mawl em ni? An in a ka awm lai a thleng a nia, tlaiah a chhungte dawt ka hrilh lehnghal. Ka hruai haw loh chuan an hrilh a hai dawn lutuk a sin" thinrim zet hian ka ti a, pawnah kan ding dun a, kan ţawng hre pha tur an awm chuang lo tiin ka insum duh lem lo. 

"A felin thu a awih a, midang hriatthiamna a ngah bakah a rilru a ţha takzet. Mahse a duh loh thleng an nawrluih a, a tawpkhawk a thlen tawh chuan a rilru a thlak tir theih tawh loh. Zankhuain thlem mahla i hruai haw thei chuang lo ang" ti a min hrilh chuan ka awih lo lek lek. Rilru no leh nem tak angin ka ngai ţhin a, zanin a a awmdan kha hmu vek lo ila chuan tun a ka thu hriat hi ka awih kher lo ang. 

"Engtin nge kan tih ang? A nu leh pa thinrim hian kut an thlak leh mai ang tih te ka hlau alawm. An hruai haw theih nan chuan engpawh an ti duh ang. I thu a awih ber a, nang man thlem mai rawh" ngen ngawl zetin ka ti leh a, kut a tuar lai hmuh ka duh tawh lo va, buaina lian zawk tawk turin ka duh lo bur. 

"Awmzia a awm lo ang ka tih kha. An nawr lui nasa tawh a, a tawp a thleng tawhah ngai rawh. In phuar hlawm a in zawn haw anih loh chuan in hawn pui thei lo vang. Mahse chutiang chuan ka tih tir dawn lo che u. Bungrua a ni lo a, a haw leh haw loh chu a thu thu" a ti ve bur tawh a, ka rilru a hah takzet. Keichuan buaina a tawh ka hlau ber a, Dinpuia nen, an pahnih hian an tawrh ka hlau a ni. 

"Heta a awm reng chuan pasal nei ang a ni mai dawn a sin. College em pawh a la zo lo a, a la naupan em hi. Naupang rilru a la pu a, engkim a la ngai awlsam vek. A ngaihdan dik berah a ngai a, pasal neih nghal mai pawh pawi lutuk ah a ngai kher lo ang. Mahse nakin a a inchhir ka hlau a ni. Pasal a neih hma lutuk chuan a inchhir ang tih ka hlau. Dinpuia'n bul a ţan ve dawn chauh a, a inthlak danglam nasat zia hre mah ila Kimkimi hi ka ngaihtuah tho tho. Dinpuia'n a sumdawn na turah hian hma a sawn hret a nih loh chuan Kimkimi hi a rethei dawn lutuk a sin. An in aţangin colloge tal hi zo se i ti lo em ni?" ka ti mawlh mawlh a, an pahnih hnih hian ka ngaihtuah takzet. 

"An ngaihtuahawm loh ang. A duhthlanna a ni ka tih tawh kha. Dinpuia a danglam tawh phei chuan ngaihtuah duh suh" a lo ti liam satliah a, a ngai ho lutuk chuan min ti thinrim lek lek. 

"Ngati nge ngaituahawm loh tur a i dah ringawt? Customer pawh a la nei lo a, keichuan ka ngaihtuah. An pahnih hian ka ngaihtuah ve ve. Chhungte aţanga buaina an tawh leh lek phei chuan an rethei dawn lutuk. Kimkimi chhungte chiah an ni lo, Dinpuia chhungte ngaihtuah tel rawh" ka la ti hlak hlak. A nu leh pa te thinrim zia ka hriain ka hmu a, ka ngaih a ngam thei lo. 

"Pui turin kan awm alawm. A rilru kan thlaksak thei dawn chuang lo a, en tawp a nghah tawp a ni mai. A haw leh duh a nih tak leh kan hruai haw ang a, a haw duh lo a nih leh thil thleng tur zawng zawngah sual chhuak theiah a in ngai a niang kan ti tawh mai dawn nia. Dinpuia a khawngaih laklawh a, puih a inhuam laklawh tawh a, pui thei lo a an khung bet tur a ngai ngam lo a ni mai. Fredy hi haw pui la, hetah ka awm ve tih Kimkimi chhungte i hrilh dawn nia" dam thluam hian a ti a, kan boruak tawn mek hian a ti buai pha ve vak lo a ang. Inchhung a an inhauh nasat dan a rawn hmuh ve loh vangah ka ngai. Hmu se chuan a hlauthawng ve tho ang. Hlauhna ka ngah tawh sa bawk nen,a pa in kut a thlak lai te khan nasa takin ka phu a, ka chiai in ka buai chhe lo chauh. 

"Kimkimi tello a let leh ka hreh ngawih ngawih. A nu in hruai ngei turin min chah nasa ropui si. Tetea pawh Kimkimi hmu hman si a a hruai lut mai lo kha an hau hrep tho a, Fredy nen pawh min hau ve tho ang. Khatiang a a chhuah duh kha an ring lo hrim hrim a, nidang a a awmdan ang a ni miah lo bawk. Dinpuia hnen a a kal an ring nghal a, Fredy-a hnen a rei ngial Dinpuia awmna an zawh hnuah min rawn tir a, thlem deuh chuan kan hruai haw mai theih an ring a, tunah pawh min lo la nghak ţhap ang" ka ti zuai raih. Beiseina sang tak an nei ve a, tih beidawn ka hreh khawp mai. 

"In hruai haw thei lo tawp ang. Nem deuh ang a a lang chung hian a luhlul reuh zek a, haw san mai rawh u" tiin min hrilh nawn leh. Ka hmai ka tuai thuak a, tih ngaihna tak ka hre bik tawh tlat lo a ni. An in a ka awm lai ni kher lo se la ţha tur. Inthlahrun sa nak laiin ka inthlahrung lehzual vek dawn a nih hi.

"I ţha em?" ti a min zawh leh chuan ka ţhah thuin ka lo chhang. Ka awmdan mumallo lutuk chu a hmu thiam a ni ngei ang. Ka hlauthawng hmain tunah pawh ka hlau takzet. 

"Hahdam i mamawh nen rin lawk loh thil a thleng leh thut sia, a pawi khawp mai. Haw ula, chanchin hrilh thuak la mu hahdam daih rawh. Kimkimi chu ka lo sawipui veleh chhin ang" a ti ta nge nge a, sawipui ve chhin hrim hrim se, tlem a a danglam deuh ka ring tlat a ni. 

"Awle..lo sawipui rawh. Hma lam hun thui deuh ngaihtuah turin hrilh la, a pa pawh a thinrim rei lo ang. Dinpuia puih a duh anih pawhin college tal zo phawt turin lo hrilh ngei ngei rawh" ka ti a, ka lu thlengin a na ut ut tawh mai.

"Ka lo hrilh ang mahse a rilru a thlak dawn lo a nia, chu chu ka hrilh lawk bawk che" a ti leh a, beiseina chhe te ka neih thar leh te pawh kha reilote chhungin a bo lehnghal vek. 

"Ngati nge a rilru a thlak theih i rin loh tlat? I tum ve phawt ang chu, thlak tir lo tum tlat rawh aw" tiin ka ngen a, vanduaina ka tawh hnu kha chuan a hma aiin ka inkiltawih zawk a, ka inchhuang ngam tawh lo. Inrintawkna ka nei tawh lo va, Timothy-a thleng hian ka zah. A hma ang khan vin pung pungin ka hau vak vak ngam tawh lo a, ka duh apiang tih tir tumin ka nawr lui tet tet ngam tawh lo. A tan hian hlu tawh lo riau in ka inhria a, mize ţha lo ka lantir phei chuan min iai ang a, min kalsan mai ang tih ka hlau a ni. Tunah pawh ka thil hlauh bawk ka sawi leh tawh hi. 

"Ka sawi tawh ang kha a ni mai. A lungawi lawk lo ang a, a lungawi hma a rilru a thlak lo ang. Ka awm tih sawi la an ngaihtuah lo deuh ang" ti a min hrilh leh hnuah "Zanin chu ka venhimna hnuaiah i mu thei dawn lo a ni mai" a ti leh ta daih.

"I van over tak aw. Min veng tur a ka mutna bul a ding tlaivar ţhak te pawh i ang a lawm le. Mut dawn a inbiak pahin tukverh aţangin kan in en zuai ringawt zel a nih kha" ka ti nang nang. 

"Nih leh zanin chu tukverh a dahchhuah chhan tur i nei dawn lo ni maw?" nui ruh ruh chung hian a ti leh a, ka lo ner suk. 

"Zan dangah pawh ka dak tawh kher lo ang. I ţhiante chuan chanchin an rawn sawi leh tawh em?" tiin in luah tur chungchang bawk ka zawt leh. 

"An la hmu mai lo. In luah tur a vang a mahse an hmu vat mai ang. Kimkimi nu leh pa te an fel a, inthlahrung lutuk duh suh. A tlai mai dawn a nia, i naupang rawn hruai saw haw pui tawh rawh" a ti deuh kher. 

"I ho mai mai e..cake a pek ve duh loh vang mai che khan i la ngaithei lo reng em ni?" tiin nui hak hak chungin ka zawt a, Fredy-a lah hian a ngaithei lo em em tho bawk a, an naupangchhia dun tak tak a ni. 

"A â chhah ve em. Tlaiah khan Tetea'n ar in sak puiah min sawm a, Nu Mahruaii a tui thar deuh em ni?" ti a min zawh pawh chuan ka lo nui leh hak. Ar in sak a a sawm vang mai a ka nui ta vak mai chu a ngaihna a hriat loh hmel kher mai. 

"Fredy-a hi pawisa a heh deuh a niang. A pa lah hian a pe zel mai sia, Nu Mahruaii mangangin ar te hi vulh se pawisa pe tl deuh bawk ila, hrehawm hre ve hrim hrim rawh se a tia, a duh lo chung an vulh luih tir dawn" ka ti a, ka sawi zawh meuh chuan a nui ve ta hawk hawk. 

"Ing euh deuh a sak a ngai a nih chu. Ar chaw pek dawn apiangin sang deuh a lawn ngai se la" a tih chuan "Naupangchhia lutuk" ka lo ti hlak.

Inchhung a kan luh leh pawh chuan min kuah tlat a, choka a awm tawh lovin ţhutkhawmna pindanah zawk an awm a, an lo ţhu tlar dal. An piah chiah ţhutthleng awlah keini pawh kan ţhu veleh rih. 

"I lo haw ve nghal lo ang maw? I duh loh tlat chuan kan hruai lui ţalh thei bik si lo che a, i chhungte awmdan ka rawn hrilh dawn che nia. An thinrim viau anih phei chuan thu awih rih a ţha ber ang" ka ti a, a ngui bam mai ka hmuh phei chuan ka khawngaih lehzual. 

"A inbengdai vat mai ang. Ar pu hi haw pui tawh rawh naupang mut a hun tawh" Timothy-an a tih chuan Fredy a ţeu hlar a, keipaw'n ka bul chiah a ţhu naupangchhia lutuk ve tho chu ka melh zawk. Tunah tak phei chuan Fredy ang tho in a naupangchhia. 

"Ka mut a la chhuak lo e aw Pâ Cher" a lo ti ve hlar a, "Ar fing sa pawh i vulh mawl vek ang a, an mitmu a vur tup tup vek mai ngah" Timothy bawk chuan a ti leh zeuh. Boruak tih zangkhai a tum tih hre mah ila Fredy thin a rim lutuk tlat.

"Ar i vulh dawn maw?" tiin Dinpuia paw'n nui chung hian a lo zawt ve a, kan thlen tirh aţang a chhiarin a nui hmel ka hmuh vawikhatna. Timothy-a fiamthu thawh ve dan chu a lawm tawk an lo awm ve tho. 

"Vulh rawh an ti tlat a, an chaw te hi a uih sia, mahse ka vulh tho dawn niang. An sa pawh ka ei peih lo a nia, ka phur vak lo. Fiamthu thawhna chi pawh a ni lo" a ti bul bul a, a tum zui bur. 

"Nih leh nichin a i ei kha ka siam a nih kha, ka thiam iti em?" ti a Dinpuia'n a zawh chuan tlem a a hmel eng leh deuhin "Aw ka lokal leh hunah siam leh rawh aw" phur zetin a lo ti vat. A nui veleh thei ta bawk. Mahse Dinpuia'n "Arsa anih kha" a tih chuan a nui hmel a ral riai riai a, Dinpuia leh Timothy-a te nui leh tet tet ţhin chu mitmeiin ka khap. An huat tak tak vang a ni hauh lo tih kan sawi tel hram ang e. Timothy-a chuan chhaih thinrim vel hi nuam a ti thar a, boruak rit lutuk tih zangkhai deuh nan a fiam a ni bawk. Dinpuia erawh chuan thudik a hrilh mai chauh a ni. 

"Kan haw tawh mai dawn em ni?" ti a zawtin Fredy chu ka melh a, a ding rang hle. 

"Didik nangmah a i awm veleh min lo hrilh rawh aw" tih pahin Kimkimi pawh a ding chhuak ve a, min rawn hnaihin ka darah a kuah a, muangchangin pawn lam kan pan. 

"Ka nu te awmdan min rawn hrilh la, rawnkal an tum anih chuan min rawn hrilh lawk ngei ngei rawh aw ka biru daih duh a nia, chuan Dinpuia an puh leh anih chuan 'Haw tir a tum a mahse a duh lo' i ti dawn nia, dawt a ni miah lo. In rawnkal hma khan haw leh turin min nawr daih tawh a, min thlah te pawh a tum mahse ka hnial ţang ţang a, kan in a ka awm peih tawh rih hlawl loh vang a nih hi" tiin min hrilhfiah a, ka ngaithla tih hriattir nan a thusawi kar lakah ka lo bu leh zawk ţhin. 

"Dawt sawi ang a an puh che chuan ka tih tir che a ni tih sawi ngei ngei bawk la, nangpawn min dan i tum ţang ţang tho kha. Ka lo tum ruk daih tawh leh ka remruatna vek a ni tih sawi hreh miah suh. Ka awm loh paw'n lo inthlahrung miah suh aw. Ka pa chu ka hre lo a, mahse Dinpuia duh lo viau mahse ka nu hi a rilru a chhe miah lo a nia, chuan kan ţhiante inah an kal kual vek sia, an ngaih a ţha lo dawn hlawm a, message pawh ka dawng zeuh zeuh. Phone aţang ringawt chuan sawi vek a har ţhin sia, dik thlapin engkim lo hrilhfiah vek rawh aw" ti a min chah mawlh mawlh lai chuan Fredy a rawn chhuak ve nulh a, mahse thil pawimawh kan sawi a ni tih hrethiamin min rawn chim buai lo. 

"Ngati nge i hel tlat? Chhungkua chu kan inhau a kan inrem leh vat mai lawm. Tunah rawn haw ve nghal daih la, buaina tam tak i pumpelh a ni mai a" ti mah ila lu a la thing tlat tho. 

"An ti mah mah tawh. An thu ang zelin ka awm a, Dinpuia hi kawp lui mah ila an hmuh laiin ka kawm ngai lo. Ka sual phah lo a, ka nun a khaw loh phah lo bawk a, chuti chung chuan nitin deuh thaw an sawisel peih tho a, insiamţhat a tum hnu paw'n enchhin tumna an nei chuang lo. Rilru ka siam fel vek tawh, nawr luih ve deuh loh chuan min vau khur khur reng ang a, an duh ang te chiah a ka awm reng a ngai ang. Dinpuia enchhin duhna an neih hma chu haw ka tum lo. Lungawi lohna ka nei zeuh zeuh tawh a, zanin a ka thinrimna te leh khang ka lungawi loh ţhinna zawng zawngte kha a inbelh bawm vek tawh ni maiin ka hria. Ka thinrim a reh hleithei der lo. An ţawngkam na tak tak ho kha a ri nawn leh tluk tluk a, ka thin a tawt up up reng mai" a ti hmarh hmarh a, a la thinrim viau a ni ngei ang a awki thlengin a la pangai lo. 

"Miin an hriat chuan in mualpho vak dawn a, bakah mipa a luhkhung an ti mai dawn che a sin" ka la ti ve ngar ngar. 

"Pawi lo an duh duhin min sawi rawh se. Mualpho hlau zawk an ni tho tho dawn a, mualpho ai chuan Dinpuia hi hun ţha an siam sak duh zawk maithei a sin. Ţan tlak lohin la awm reng se la chuan ka chhungte zawng zawng hmaah khan a thlavang ka hauh lo ang mahse tunah chuan ţan tlat a phu ve tawh. A ţha lam a hmalam a pan tak tak zia lantir turin hun a duh rei miah lo ang. Chuvang chuan chanchin min lo hrilh zel rawh aw. Tun ţum chu ka dinna ngaiah ka ding ve tlat dawn a nia" ti a min hrilh hnu chuan Timothy-a thusawi dik zia ka hre ve chiah. 

"I awm reng chuan pasal nei ang i ni mai dawn a sin. Pasal neih hi rin ang a nuam a ni miah lo a nia, kan duh ber te bul a kan awmreng theih tawh dawn vangin nuam turah kan ngai a, mahse chutiang chu a ni miah lo a nia aw" a hlauh deuh theih nan ti leh mah ila "Ka hre vek. Mahse pasal neih tum a chhuak ka ni hleinem. Ka chhungten an ngaihdan an thlak theih nan a ka nawr luihna a nih hi, ka thinrim vang a ni tel bawk. Kal tawh rawh u, Bawiha saw ka nu in a hauh vak vak loh nan engvakmah sawi ve lo turin iti dawn nia" ti a min chah leh thlap hnuah kan kal tur min thliar liam a, in ngaizawng inţhen hran ang maiin ka ngai nghal. A dinhmun hriatthiampui chiah lo mah ila ka lainat takzet a ni. Naupang te chauh a la ni ve tho a, Dinpuia hi a pasal tur a ni ngei em tih pawh a la hriat loh. A chang chuan nu leh pa te hi an inrawlh lutuk ţhin deuh a ni. 

"Kimkimi chu tih thinrim vak chi a ni lo a, hmanah pawh a inkhung bo char char tawh" Fredy-an a tih chuan "Engtikah? Ngati nge a?" ti a lo zawt vatin a thusawi hriat a awlsam nan tlemin ka awm hnaih hret. 

"Class-9 a nih lai daih tawh. Uite a nei ţhin a, ka pa in a ngaithei lo a, a thawhpui pa fanu a pe daih a, la let turin a ti char char a, ka pa in a la let duh si lo a, pindanah a inkhung char char. School pawh a kal duh lo. U Timothy-a hi Kimkimi ui kawl tute inah a kal a, an infiam pui nasa ţhin sia uite khan a lo la hria a, a kawl tu te hriat lohin a rawn haw pui a, ka pa in an pahnihin a hau hrep a, mahse a uite chu an dah let sak tawh lo. Ui a neih let hnuah chiah pindan aţangin a rawn chhuak a, chaw a ei ngai si lo a, a inkhung lai a a thil ei ka zawt hmasa ber"  a tih lai chuan zawite in ka lo nui. 

"U Timothy-a hian kan awm loh hlanin eitur a lo pe ru ţhin a, inhnuai tukverh aţangin an inpe ţhin. Chu chu a rukin min hrilh a, ka sawichhuah loh nan a la bang zawng min pe vek. Uite pawh chu a thih hma zawng kan kawl a, a thih khan a ţap nasa viau na a tih tauh phah nan a hmang tawh lo" a ti leh a, tunah pawh chhungte lakah lungawi lo in a ti tau a, a bulah Timothy a awm leh chiah bawk. Naupangte anih laia mi in aţanga uite ru chhuak duh khawp chuan tunah pawh a pui leh em em ang. Thil pawi lutuk a thlen loh ka beisei. 

Inchhung kan luh dawnah "Engvakmah sawi ve suh aw. I insawi buai ang a an hauh phah ang che. Keiman ka sawi vek ang" tiin ka hrilh hmasa a, "Awle..ka tawrh ai tawrh a ngai chuang miah lo a nia" a lo ti ve ham ham. Kimkimi min chah ka hrilh a ni reng sia. 

Rin ang ngeiin an lo la meng vek a, Kimkimi tello a kan haw chu a nuam lo duh ngei mai. Tim daiin an zingah kan ţhu ve a "A rawn haw duh na nge?" ti a a nu in min lo zawh chuan ka bu zeuh a, ka ţhu kun nghal daih. 

"Dinpuia hnenah chuan em ni a lo awm?" tiin min zawt leh a, zawite in "Aw" ka lo ti sep. 

"A zakthei lo e mai. In chhuahsanin a bialpa a pan a, Dinpuia a kawp lui zel anih chuan hetiang hi a thlen ka ring sa hrim hrim. Tlai tawkah a rawn haw tir a, amah pan turin a siam leh a" a tih buan buan lai chuan ka dak chhuak a, hlau chung chungin "Dinpuia chuan haw turin a tia, kan kal ve hma aţang tawh khan in thleng a rawn thlah a tum tawh a, mahse Kimkimi zawkin a duh lo a" ka lo ti a, min huat phah ka hlau takzet. 

"Duh duhin awm rawh se. Ngaihven reng reng suh u. A duh chen chen bo rawh se" a pa chuan a nghet charh a, pindanah a lut nghal daih. Kan inmelh relh relh a, kan hawi hai hlawm hle. 

"Naktuk zingkarah Bawiha nen hian kal leh ula, Tetea nen kan lokal ve ang. In tel loh chuan a awmna kan hre ve si lo va, kan hruai haw vat loh chuan a pa hian a ngaihven duh lo tak tak mai ang. Mi hriat te pawh a hlauhawm a, a hlimchhawn a chet vat vat a ngai" ti a a nu in min hrilh chuan "Timothy a awm ve" ka lo ti veleh a, min en ţhap.

"A riak ve dawn..naupang min tia, ar pu min ti bawk a, ar ka vulh dawn tih mi in hrilh vek a" Fredy chuan lo ti ve bui bui mahse an ngaihsak lem lo. 

"A ţhat hlauh chu. Timothy a awm chuan a him ang. A lo haw duh nan a nawr turin i hrilh em?" a nu bawk chuan a ti leh a, a thlamuang huai niin a lang.

"Hrilh e..ka lo sawipui ang a tia, Kimkimi kan thlem chhuak zo si lo va, ka riah pui mai ang a tia" tiin ka hrilhfiah a, a nu vek chuan "A ţha khawp alawm. Mahse a nawr lui lehpek dawn miah lo a, thuawih tur a nawr luih tumna aiin Kimkimi a khawngaihna a nasa zawk ziah a, a riah pui hrim hrim chu ţha ka ti mahse Kimkimi a insawi thiam ang a, Timothy-a chuan a thlavang a hauh leh daih mai ang. Naktuk zingah keimahni ngei kalin hruai ila a ţha ber. Mi hi a ti buai hneh a nia aw" a ti vang vang. 

"A zahthlak hrim hrim. Ţhiante pawh pan lo va a bialpa a pan hi ka lo zak zawk. Lalrinkimi rilru lian lutuk hi chu a. A lo haw duh lo anih pawhin Tetea hian rawn hnuk haw lui rawh se" Rintei paw'n a lo ti ve hmak hmak a, a unau dangte aiin a thinrim niin ka hria. 

"Hnuh haw luih a ngai dawn a nih chuan nangmah kal zawk rawh. A awmdan hi dik lo viau mahse naute meuh tharum a hnuh luih ţawng ţawng ka duh lo" Tetea'n a lo tih takah chuan an melh rum nasa kher mai. 

"Mipa ve si hi in nep leh lutuk. Ka rawn kal ve ang. Tih luihna lo chuan engtikahmah a rawn haw lo vang" Rintei chuan a ti leh a, "I kal dawn tho chuan ka kal ve kher lo ang. In tih tihin va ti rawh u" Tetea'n a ti ve thung. 

"Nang pawh hi eng nge i hriat a? Thu ţha kan hrilh pawm duh lovin a chhuak a, hnuk haw lui mah ila kan thiam loh a ni hleinem. A u i nia, mipa i ni bawk a, a hma khan a hlauh na turin eng emaw ti la chuan hetiang hian a awm lo vang. Mipa ber in ngawi tlat zel a, ka nu nen a kan zilh chang lahin ngawi turin min lo hrilh thul. Hlauh turin in awm lo em a nih hi" Rintei chuan a la ti pang pang. 

"Chuvang tak chuan i kutah ka dah. Nuam itih phawt chuan i rawn hnuk haw dawr dawr dawn nia. Dinpuia insawi reng rengin ţawngkam pangai in hmang ngai lo. Chhe thei tawpin in sawi a, in vin a, Kimi in hauh phah vak vak a, tlaiah pawh khan thinrim a hau lo turin ka hrilh lawk vek che u. A dam zawngin la ula ţha deuhin sawipui ru ka tia, in vin leh vak vak a, kut in thlak bawk a, zanin a rawn haw tlai bak kha eng thil sual nge a tih?" tiin Tetea chuan cho zetin a zawt let. 

"Kan duh loh zia i hria, nangpawn ţha i tih pui chuang lo. In hau phallo a keinin a chhiat phah hlauin kan hau a ni mai. I farnu pawh nise duat a hunah duat la, hauh a ţul chuan hau bawrh bawrh rawh. Mi fel lo an kawp na na na chuan an entawn a, an fel loh phah ve vek zel. Tunah pawh a hriat mai hi, in a chhuahsan vang vang hi, zanah lehnghal" Rintei chuan thinrim takin a ti a, a nu erawh a ngawi rih. 

"Ka farnu a nia, ka chik ve nasa. Dinpuia a kawp hnu leh a kawp hma ka khaikhin ngial pawhin danglam ka hre lo. A chhiat phah lo va, a sual phah lo. Luhlul leh thuduh hunlai a nia, Kimkimi hi pawng paw nawr chi a ni lo. A luhlul tial tial mai ang. En liam mai mai ula, tihsual a neih chuan hau zawk mai rawh u. A ning tawh cheu nih hi, pasal nei turin in nawr lui a ni ringawt a lawm. Insiamţhat a tum a tih kha, tawng pawng duh lo ringawt lovin enthla rawh u. Rilru hmanlai deuh put a hun tawh lo. Bakah Dinpuia hi in ngaih ang a sual ni se chuan Kimkimi hi a inthlak danglam nasa tawh ang. Sawn a pawm hial maithei, ngaihtuah chiang rawh u. Sual in tihna chiah kha hmu lian suh u. Rinawmi kha a kal dawn tho chuan ka lokal ve lo mai ang, min kaitho hma ve suh u" a ti ve duah. An hnenah kar khat ai tam mah ka awm ve tawh a, Tetea hi a ţawng tlemin a ţul chin lo chu a sawi ngai mang lo. A thinrim lai phei chu ka la hmu lo hrim hrim a, mood fuh vak loh ni pawh a nei ve ngai lo. A chhungte rawngbawl sa a sawisel ngai lo a, a thawmhnaw su tur takngial pawhin a unaute a tir ngai lo. A zaidamin a zawi awi hle a, lehkhabu chhiar a atchilh. IAS nih a duh thu min hrilh ve tawh a, lehkhabu a chhiar tlut tlut zel. An tirhna ah a kal dawr dawr a, an sawi apiang hnial lovin a ti zel. Zanin chu a thinrim ve ngang ania nge, a u ngei a khak letin a ngaihdan ni lo lai te a sawi ve duah a, a nu takngial pawhin vawikhatmah a chhang let lo. 

"Rintei hian motor a khalh thei tho a, naktukah chuan Tetea tello in kan kal mai dawn nia" Tetea kalsawn veleh a nu chu a ţawng ser ser a, a hriat phak a hlau a ni. 

"Awle ka lo tho hma dawn nia" ka ti a, keimah min hrilh bik vangin chhan loh chi a ni lo va, Tetea'n a hnial ang a lo hnial ve vak vak chi a ni lo. 

Kimkimi hnenah thil thlen dan ka hrilh vek a, Dinpuia leh Timothy-a ten bihruk an phal loh thu min rawn hrilh ve. Kimkimi nen kan inbiak zawh veleh Timothy-an min rawn call nghal chat a, ka nuih a za angreng. 

"Mutthilh ka tum chiah a sin" thutak hmel zet hian ka ti a, ri miah lovin ka nui thung. 

"Ka ngai che, tukverh aţanga nula thlir tur a awm ve si lo va" a rawn ti a, a khua a har ka ring hrim hrim. 

"A awm awm kha thlir tawp la, tukverh a tam em kha" ka tih chuan "A reh emai. A awmna hi a fal a" a lo ti vat. Thim leh thla a hlauh zia Kimkimi hnen aţangin hre tawh mah ila a zah hlauin ka chhaih zui duh lo. 

"Naupang ang mai min ngai hma leh lutuk. Naktuk zingkarah kan lokal dawn chu aw" tiin ka hrilh veleh. 

"Awle lokal rawh u. Darkar5 vel ka la nghah a ngai dawn ni maw?" a rawn tih chuan hrethiam lo takin "Engti turin?" tiin ka lo zawt.

"Aw..hmu tur che in" a tih takah chuan ka nui hak a, "Muhil la a rei lo a ni mai. Min ngai leh lutuk suh" tiin ka fiam a, diktak chuan keipawn ka ngai ve reng. 

"Nangmahin i muhil thei ang maw? Kimkimi a awm si lo a, tikhan mutthilh tum la, i muhil ni a ka hriat hunah ka dah mai ang" thutak deuh zawk hian a ti a, min van ngaihtuah thei tak. 

"Engtin nge i hriat theih ang?"

"Rawn hnar mai rawh" a ti awlsam et a, a uang ni paw'n a lang lo. 

"A theih ringawt hleinem. Ka muhil thei mai ang min ngaihtuah suh. Zing thawh hma a ngai sia, ka dah phawt ang a, ka mutthilh theih loh tak leh ka rawn be leh ang che" ka ti a, phal deuhin min muttir a, min ngaihchan tur thu a sawi bawk. 

Mang ţha lo bawkin min ti harh leh. Hlau a thaw hlawp hlawp chungin ka ţhu chhuak a, pindan kawngkhar a rik dat dat phei chuan ka phu nasa kher mai. Ka thlan nasa in ka chal leh bek vel te chu ka kutin ka tuai thuak thuak a, khua a la var chiang lo bawk nen, kawngkhar ka hawng mai ngam lo. 

"U Didik" ti a ka hming a min koh rual zelin kawngkhar a ri ve a, Fredy a ni tih ka hriat chuan ka thla muang huai. Khawvar tak tak hma chu ka bulah awm ve rih se ka duh mah zawk. Min veng turin Kimkimi awm lo mahse Fredy tal a awm a lawm. 

Kawngkhar ka hawn rualin mangan hmel tak a a lo ding ka hmu a, ka sawm hun nghak lovin a rawn lut tlang nghal. Kawngkhar ka khar ţhat leh hnuah khumah bawk ka ţhu leh a, Fredy erawh ka khum bulah a ţhu ve thung. Inbual zo tih hriat takin a sam a la hnawng chap a, a rimtui tawh hle bawk. 

"Iva inpeih hma ve" ti a ka zawh chuan zah hmel zetin a sam a tuai hmasa te te phawt a, aw a then kharh hnuah "Thil ţha lo hriatchhuah tir reng che kan tumna lam a ni miah lo a, mahse Kimkimi khan i muhil lai veng tur che in min tia, ka tlai var miah lo a nia, alarm ka set a, ka muhil hmasa phawt a. Ka thawh veleh pawn aţang sawn ka veng che a mahse i reh vang vang a, tihtur a awm lo sia ka inbual hmasa a, ka inthlak zawh leh vek hnuah i thawm ka ngaichang leh a, harh lo in i muhil tlang ve thei dawn emaw ka ti hman tawh mahse i au ri ka hria a, ka rawn ko che a nih kha. Ka lerh vang a ni miah lo a nia aw" tiin a insawifiah nghal par par. A rilru nawm nan a lo nuiin "I lerh vangah ka ngai lo hrim hrim. I lo awm hlauh a ka lawm lutuk. Mang ţha lo mai mai a nia, a reh ve ţep tawh ang" ti a ka thlamuan hnu chuan a thaw ve huai mai. 

Dar6 velah Kimkimi hruai turin kan chhuak a, Fredy nen kan tlan hmasa a, kan hnungah Rintei leh a nu in min zui. Thil thleng tur ka hre lawk ruai a, ka huphurh takzet. 

CONT...