THROUGH THICK AND THIN-23

THROUGH THICK AND THIN-23

KIMKIMI

"I muhil thei na nge?" ti a Dinpuia ţawng ri ka hriat rualin ka inher vat. Choka luhna bulah a lo ding reng a, engtia rei nge min thlir tawh ka hre lo. 

"Muhil thei e..mut ţhan loh na a mu ka ni sia, nidang aiin ka harh hma anih hi. Lo ţhu rawh thingpui ka lo siam ang" tih pahin chaw ei dawhkan ka kawk a, ka thingpui lum lai a so ta bawk a ka nu te lokal hma a inzawh fel hman ka duh bawk nen, ka siam nghal thuai thuai. 

No pahnih chawiin dawhkanah chuan ka dah a, amah hnaih tak a ka ţhut ve hnu pawhin min be miah lo. Ka nu te awm tum dan Didiki hnen aţanga ka hriat te kha ka hrilh ve a, a rilru ka ti buai viauin ka ring. A sat deuh vangin ka in ngam lawk lo a, ka kutţangin no tlang ka chhui kual vel mai mai a, sawi tur a vang duh khawp mai. 

"I hlau em?" ti a min zawh chuan lu ka thing a, kei chuan hlau lo mah ila Dinpuia a kang kai ve zel tur hi pawi ka ti takzet. 

"I tan a hriat nuam lo an sawi palh a nih pawhin an thinrim vangah ngaih sak la, rilru nat nan hmang duh suh. An vaiin lokal vek mahse haw ka tum lo. An rilru an thlak hma loh chuan ka haw dawn lo hrim hrim" tiin luhlul ka la chhuah ve ţang ţang. 

"I duh lo chung chu an hruai lui lo ang che" a ti a, min haw luih tir a tum tawh dawn lo ah ngaiin ka lawm ru kher mai. 

"Awm rei a ngai lo ang, reilote chiah a niang. Ka nu te pawhin an ngaihdan an thlak ve vat maithei a, i awm hrang ve chiah a, phurrit siam sak nghal che duh lo viau mah ila tun ţum chu ka dawhtheihna in a tlin tawh thlawt lo. Mihring hian tawrh theih loh chin kan nei vek a, chutiang chu a thleng ve tawh a niang" ka tih hlak hlak lai chuan nui ruh ruh chungin min lo ngaihthlaksak. 

"I lungawi thei meuh lo a ni maw?" a ti veleh sup a, ka ngaihtuah chian poh leh ka thinrim zual a ni mah zawk. 

"Thei rih lo..chhungte ka sawi chhiat na lam a ni miah lo. An vaiin ka ngai a ka hmangaih vek tho mahse ka lungawi thei thlawt lo. Nasa deuh deuhin min ţawngkhum ngun tawh lutuk a, ka ti tau rih tlat dawn" tiin ka hrilh a, ka tan a mi pawimawh tak vek an ni a, ka hmangaih takzet. Kan hmangaih ten nasa tak tak a min ankhum bawih bawih hi chuan a na duh bik. Min ţawngkhum fek fek reng lovin min vaw hrep hrep se ka duh zawk hial ang. 

"An nat lutuk na tur chuan awm lo la, i thinrim reh hunah i haw leh ang a, engkim a pangai leh vek mai ang" a lo ti awlsam et a, mipa leh hmeichhia hi chu kan va'n in ang lo tak. 

"Lalrinkim, ţhiante in pawh awm reng a helai lai thleng a ngai em ni? Thinrim vang a tlan chhuah te kha a ţul lo hrim hrim. Min ti buai zo zai lutuk" U Rintein a rawn ti lut bawrh bawrh. Kawngkhar kan khar lo bawk a, kik buai lovin an rawn lut tlang. Ka nu leh U Rintei an rawn lut hmasa a, an hnungah Didiki leh Fredy ten an zui. Ka pa a tel ve lo chu lehlam zawng chuan a thlamuanthlak. Hmeichhia hi chu kan hlauh dan a nep deuh ţhin a, a rawnkal ve a midang hmuh lai a kut min thlak leh mai te a hlauhawm. 

Tuman kan lo chhang let hran lo a, ţhu tlar ţham chungin kan en tawp. 

Ka nu chuan "Ipa thawh hmain let leh hman tum ang u. Han insiam zung zung la, ţha deuh a kan sawi lai hian hnial buai lovin min zui haw mai rawh" a ti ve thung. 

"Lo haw ka tum lo..nizanah Didiki ka rawn chah thlap kha. Ka lo haw dawn rih lo" ka ti chang fak a, an thinrim hmel kher mai mahse an thinrim hmel ka hmuh vang maiin ka awmdan ka ti danglam duh lo. 

"Ka hruai haw dawn tho tho che. Nangmah vangin kan mualpho vek thei tih hre ta che. Miin i chanchin min zawt ta se engtin nge kan chhan a nga? Pasal a um kan ti dawn mi? Kum naupang te si pasal um than a than chu i zak miah lo em ni?" vin zet hian U Rintei chuan a ti a, a mitmeng a hriam hrak a, thinrimna lo chu hmuh tur a awm lo. 

"An zawt kher lo ang che. An zawt che a nih leh chhuanlam tur i dap ve tawh ang a ni mai lawm. Ka lo haw peih lo, lo haw mah ila nitin min hau leh dawn tho tho" ka ti ve tlat. Min vin vak vak mahse ka che sawn duh eih lo. 

"I zak lo anih paw'n keimahni kan zak. Nangmah vang a mualpho kan duh lo, chuvang chuan min zui haw ringawt rawh" a ti leh chhar chhar a, vin vak vak tawh lo mahse a thinrimzia a la hriat tho mai. 

"Ka lo haw dawn lo" ka ti nghet charh a, ka nu hi rilru hmanhmawh chi tih takah a dawhtheihna in a tlin lo thuai. 

"Kan hruai haw lui dawn che kan tih tawh kha. He ta i awm kan phal lo reng reng. Engpawh tih ngai se i lo haw tho tho ang" thutak zet hian a ti a, min hruai luih duh tak tak ka hlau hle. 

Kan ţhutna lam a U Rintei a rawnkal lai chuan ka lo ding hluai a, Dinpuia pawh chuti bawk. A hlauthawng ve nge ka din vang mai mai a ding ve a nih hre lo mah ila tlem chuan thla a ti muang ve. 

"Rawn kal rawh. Mi reh laiin haw vat ang" ti a ka ban a kaih mai a tum lai chuan ka hmaah Dinpuia a ding ve ta nge nge. Chhungten min hauh ţum a ka thlavang a hauh vawikhatna a ni ngei ang. 

"Ka duh lo a tih kha" ti nghutin min din hliah tlat a, keipawh ka huaisen ve leh deuh tawh. 

"Pasal nei rual a la ni lo va, chuvang a rawn hruai tum chu kan ni. A upat deuh hunah---" U Rintein a tih lai mekin Dinpuia chuan "Pasal nei tur a rawn kal a ni lo" a lo ti nghet charh a, U Rintei sawi duh zawng sawi zawhna hun pawh a pe lo. 

"Mi ngaihah chuan pasal um a ni dawn tho tho. A la naupan vang hian a mualpho nasa lehzual dawn a, nakin hun zel tur kan ngaihtuahpui vang chauhin hetiang thil hi kan ti" ka u chuan aw ki pangai tak hian a ti a, a inthlak danglam hnehsawk lutuk chu mak ka ti zawk. 

"Ţhiante in a riak angin min sawi mai rawh u. In duh phawt chuan chhuan lam tur te chu in hre dawn lutuk. Rilru inthlak hma loh chuan ka rawn haw lo vang. Kalh khum ka duh lo va, in ran khawi lai ang mai a awm ka duh lo" ka ti ve zat zat. Ka chhungte thil tih tum dan ang hian tunlaiah tuman an ti tawh ngai lo. 

"I rawn haw loh chuan ipa thinrim a rawnkal ang a a pawi zawk ang. Tunah pawh a thawh hma in a rukin kan rawn kal a, ipa thinrim hlauhawm zia i hriat chian kha. Ti thuai thuai la haw vat teh ang" ka thusawi hre lo ang hmiahin ka nu chu ţawng bawrh bawrh mahse Dinpuia'n min din hliah tlat vangin ka u chuan min pawt lui thei bik lo. 

"Timothy rawn hruai rawh. Boruak i hriat vek kha, miin an hriat chuan a mualphothlak lutuk dawn. An hriat tak tak hma hian i ţhiannu kha hruai haw vat ang u" ka nu chuan ngen ngawt takin a ti leh a, khawngaih viau mah ila a ngaihdan a thlak duh chuan loh vangin an rual a haw ka hreh telh telh. 

"Amah berin a duh si lo va, ti lui lo ila a ţha zawk ang" tiin Timothy pawhin ka thlavang a hauh a, awmdun mah ila khum khat a kan mut loh te chuan nupa kan ni tihna a ni chuang lo. 

"Lalrinkim i van lo luhlul em em. Ka nu pawh zah lovin i thu angin i kal ngat a nia, mi hnenah chuan engmah kan sawi lo vang. Kan rawn ngaihsak tawh lo bawk ang che. Nangmahin intawng harh la, kan thusawi dik zia i hriat hunah ila inchhir khawp ang" thinrim zet a a tih hnuah U Rintei chu ka nu dinna lamah a let leh a, "Kal ang Nu, kan rin ai hmain a inchhir tho ang. Ka pa pawh ka rawnkal tir lo ang. Tikhan in awm awmin awm rawh u" a ti leh a, ka nu duh lo chung a kuah chhuak lui. Ka nu mangang hmel ka hmuh loh nan Dinpuia hnungah ka ding pil a, thinrim ve viau mah ila ka nu chiai leh mangang hmel chu ka hmu duh chuang lo. 

"Vawiin lam te hi? Class kal i tum em?" ti a min zawh rualin Timothy chuan ka darah a dawm a, ka biruk na aţang chuan min pawt chhuak. 

"Thawmhnaw ka nei hleinem. Ka kal thei rih lo ang" ka ti nang nang. Ka hak lai chiah ka nei a, kal thei chi pawh ka ni lo. Bakah ka nu kha rilru ah a awm ve reng dawn a, engtih mah ka phur lo. 

Ka nute awm loh veleh Didiki te pawh chuan ţhutna awl lai an chuh ve vat a, chau hmel zet a a ţhut hnawk hnuah a shawl sinlai lianpui chu a hlip a, rilru hah viau e ti lo chuan a bag lo ah ruk reng kan hmuh rualin kan nui hak. 

"Class kalna tur ka rawn keng tel lo. A ruk a ken vek a ngai bawk sia, i shawl neih lian ber ka bat tlat a, i hak lai kha i nin tawh takin ka tia inthlakna tur ka lo keng a, vawiin chu duh leh chawl phawt la, class kal na a hak tur chu pek leh dan che ka lo ngaihtuah ang" tih zung zung pahin a bag ah lai chu ka awmna lamah a rawn theh phei a, a rih nulh danah a thun tam thawkhat a niang. 

"I va sual e" tiin Timothy-an a lo fiam hman zuk lehnghal. 

"Boruak tihchhiat ka duh lo viau na a inu kha ka khawngaih lutuk a, nizanah Tetea'n thinrimin a tawng tawh bawk sia, U Rintei chuan engahmah ngai lo mahse in awmdan hi nu tan chuan a na dawn lutuk a. Chuvang chuan i nu kha i hmuh leh hunah pawh a rilru natna tur chuan ţawng tawh reng reng suh. Midangin hnungchhawn vek che mahse i nu chuan a ngaihsak tlat tho ang che. A thiam lo tih ka hre tho a, a inrawlh lohna turah a inrawlh hnem bawk mahse nu te hian kan rin phak bakin min hmangaih a, nu hmangaihna hi kan hrethiam phak tak tak lo. Hrehawm a tihna tur thil tih belh tawh miah suh" a ti leh melh melh. 

"Ka khawngaih ve tho a mahse min nawr tawt lutuk a ka tan pawh a hrehawm a lawm. Vawihnih khat an sawi khan duhtawk mai tur a nia, nih loh pawn ka thiam loh naah min hau mai se, min sawiselna tur an hre leh ngai tak tak chuang lo a, ti hian awm tawp ila, duh leh min ngaihsak lo se nuam an tih phawt chuan awm lo angah min ngai hmak rawh se. U Rintei chuan hlawh a nei tawh a, inchhungah a thu tawh em alawm. Ka nu chu U Rintei thu thu a ni mai" lungawi chiah lo hian ka ti a, ka nu hi a duatin a ti lawm thiam a, a thusawi reng reng ka nu in a zawm zel. Min ngaihven duh viau mahse U Rintei berin a phal loh chuan min ngaihven lui ngam teuh lo mai. 

"Sawi tawh suh u. Hmeichhia hi chu in insawi thinrim chawp zel" tiin Timothy-an min lo khap a, Dinpuia erawh in sawi a la nei ve leh lo. 

"School ka tlai ang e U Didik" Fredy-an a tih takah chuan Didiki a ding nghal hluai.

"Ni dawn tak e..ka lo ţawng leh duah zel a, vei kan ngah ţhin sia a buaithlak. Sawmtea emaw Lawmkima ka rawn inthlah tir ang a, class ah ka awm ve phawt ang a chawhnu lamah rawn kal leh ka lo tum ang. Tunah chuan Fredy hi kan kal pui phawt ang e" a ti leh zung zung a, an lo rinhlelh loh nan shawl bawk chu a bat leh. 

"Ar pu hi amahin haw se ka phur haw ang che. In rualin ka rawn haw dawn tho a, kan inzui dawn nia" Timothy-an a tih chuan Fredy a nur nang. Mi hian chhaih berah an nei ţhin a, an chhaih nasat viau chang hi chuan ka lo khawngaih ru ve ţhin. 

"Ar pu min ti ve ziah suh aw. Ka nghak peih lo che u" a tih hmuk hmuk hnuah a chhuak nul nul. Reilote ah bike ri kan hria a, Didiki inthlahrung lahin Timothy a tur sek bawk a, Fredy haw hnu lawkah an haw veleh. 

An liam duak takah chuan a reh khawp mai. Ţhenawm kan nei lo va, ran vulh kan nei bawk si lo. Dinpuia nen chiah kan awm leh tawp a, sawi tur a vang hrep lehnghal. Chhang a buaipui leh mawp mawp a, keiin rawng ka bawl thung. A pack zawh veleh dawhkan a chhang nawi tla ang ang chu ka hru fai nghal mawlh mawlh. 

"Ka chhuak lawk dawn a, nangmahin i lo awm hreh em?" ti a min zawh chuan ka lo en ha. A inchei lem lo va, a chhuak hla lo turah ka ngai ngawt.

"Chaw kan la ei si lo va" ka lo ti boh a, "Duh chuan a ei mai theih" ka tih zawm leh. 

"Ka rei lo ang. Timothy-a khan chhang pekna tur min hrilh a, a tlai hma a pek ka tum. I ril a ţam tawh em?" tiin min ngaihtuah hmel takin min zawt leh a, lu thin ne ne pahin a ţam loh thu in ka chhang. 

"A la ţam loh chuan min lo nghak mai rawh ka rei lo ang. Ei chak i nei em?" ti a min zawh leh pawh chuan duh ka neih loh thu bawkin ka chhang leh.

"Lo nghak lawk" ka tih sep hnuah ka mutna pindan lamah ka tlan phei a, Nu Rami pawisa min pek ka dahţhat ran kha phawrh chhuakin ka let leh vat. 

"Kan buai lutuk a ka lo theihnghilh daih a, hei hi Nu Rami min pek a nia, chhang man kha ba ţhen lo in min pe nghal vek a, a lawmawm tehreng nen keimah vangin boruak ţha lo kan nei leh ta sia" tiin pawisa pek pahin pehhel deuhin thupha ka chawi.

"Ţha itih dan berin i awm dawn nia. Ka lo haw leh vat ang" a tih hnuah beisei loh deuhin ka hmuiah a fawp zeuh a, reilo viau mahse rilru a nawm phah veng veng thung. Ka awmdan vang te leh chhungkaw buai na a ka hnuh luh ve zel vang khan min hua emaw ka ti hman a, a rilru a buai hmel bawk nen inthlahrung dekin ka awm reng. Ţhian te ngah viau mah ila an in a ka kal chuan an chhungte thleng a ka tih buai ve zel a ngai dawn a, chumai bakah puitling zawk na na na chuan min haw tir leh an tum vek ang. Dinpuia hnenah hian him berah ka in ngai a, mitmei ven tur a awm ve lo. Ka tihbuai em vangin tim ve deuh mah ila, amah ngei pawhin buaina dang duh belh lovin lungngai ve viau mahse a hunah chuan ka thlavang a hauh tho a, ka hmuh lai chuan pangai deuh ang a awm a tum. Mahse vei a ngah viau ka ring. Kei aiin a rilru a buai daih zawk ang. 

A lo haw nghah pahin hun tih tawi nan hmun te phiatin chhuat ka nawt leh thlap a, ka thil tih pahin sana ka melh leh zeuh ţhin. Ka ţhiante chu an inhmukhawm leh ţham ţham tawh ang ka ti rilru a ka ngai takzet. College kal ka chak a, ţhiante nen a kan inhmuh khawm a kan rik bawrh bawrh te hian nuam ka ti ţhin a, harsatna ka tawh chang phei chuan ka ngai zual hle ţhin. Min hnem chiam lo mahse an bul a ka awm hrim hrim chuan ka thla a muang a, thaw an ti veng hawk zel. 

Kawt lai ka phiah mek laiin Dinpuia a rawn haw a, ka lam pan a a rawn kal lai chuan ka lo nui sang. 

"An lo la zo vek em ni?" tiin ka lo zawt vat a, pek tur dang a hmu leh chu ka lawmpui takzet. 

"La zo vek..Timothy khan min sawipui nasa niang a ţhiannu a be chawp leh a, a rawn kal hun kan nghak leh sia tum aiin ka rei. A rawn la zo vek a, a tihzia tak tak" ti a phur zet a min hrilh lai chuan ka lo hlim ve kher mai. Pe chhuak tam lo mahse pekna tur a nei hrim hrim chu a lawmawm. 

"A va lawmawm ve..lak zui zel te an tum em?" ka lo ti ve vat a, hralh ve reng se ka ti takzet a ni. 

"Ka hre lo le, min rawn hrilh turah ngai ila" a ti ban charh. 

"An hralh theih phawt te chuan an lak chhunzawm em em ang. Timothy-a ţhiannu a nih phei chuan a duh sak ve ang che chu. Ka phiat zo ang a chaw kan ei dawn nia" ti sawk sawkin ka phiah zawm leh a, ni a sa tawh bawk a tlemin a khu ve deuh. Chuti chung chuan amah a lut daih lovin ka hmun phiahna bulah chuan min lo nghak reng. 

Hmun phiah ka dah ţhat hnuah min lo kuah vatin kan inzui lut a, a hmel hmuh pawh a nuam ta deuh. 

"A dai leh deuh vek tawh, i inbual chhung velin ka lo chhuang lum leh mai ang" ka ti zung zung a, ţangkai thei ang ber a awm ve ka duh. 

A kalsawn dawnah dawhkan a ka phone dah a nghawr det det a, gas bul ka thlen hman vangin en hmasa zawkah a ţang. 

"Muankima a nih hi" a ti nghut a, a phone number min paihsak a a lo block daih hnu khan ka siam ţha leh. Ţhian chauh kan nia, khatiang a tih kha ţul ka ti lo a ni. 

"Ka note a hawh a, chu vel chu a niang" ti liam satliahin dawhkan bulah chuan let leh vat mah ila a tawp hman tho. 

"Nitin a kal ve tho a note a nei ve lo em ni?" a ti a, min melh no lem lo khawp mai. 

"A nei ţha lutuk lo a niang. Thil dangah min lo be ngai chuang hleinem, han inti fai vat rawh a sat laiin ei tawh ang" ka tih pawhin "Nei ţha ve mai rawh se. Class ah a hawi vual vual ringawt a niang chu" a ti leh hluk hluk a, ka nuih a za angreng. 

"I thik a nih kha, a hma zawng a thikthu ti chhe duh ngai mang si lo, i bul a ka awm veleh ngati nge a chhiat thar thut?" tiin hrethiam lo luiin ka zawt ve ngat. An in a ka len ţum a helmet min khum tir te kha ka hre lo der hmak. 

"Ka thik lo e a, i hawrawp chhiat chhiat nen chhiar pawh a chhiar thei em ni?" ti a min zawh lung lung phei chuan ka lo nui hak. 

"Ka ziak hleinem, i thik loh chuan ka sawi ang chuan ti mai rawh" tih pahin a hnungah ka nam a, "I thil chhuan va ngaihven rawh Pi Muankim" a tih te pawh chuan haw duh lovin ka lo nui hak hak. 

"I naupangchhia ve sia aw" ka ti vang vang a, nuihza tak chungin ka chek zui tlak tlak. A pindan bul thleng ka zui ve ta tho a, a luh hmain "Kha hei i ta tur" tiin chocolate min pe ngei bawk. 

"Ka chah miah si lo che a min hawn nachang i hre tho a ni maw? Pawisa ren a ngaih tehreng nen mahse ka lawm lutuk" chocolate lek va chungin ka ti a, chocolate hi chu tui viau mahse tereuhte pawh a to zek zel.

"Hmeichhia in min pe a, ka ei ai ei rawh" thutak zet a ti nghutin kawngkhar a khar zui daih. Tu hmeichhia mahin an pe lo tih ka hre bawk a zai rat rat chungin choka ah ka lut leh a, ka thil chhuan a lo so bawrh bawrh. 

Engmah a ti ngai miah lo emaw ka tih laiin eitur siam lamah ka tluk lo hle. A thiam chak ve hrim hrim bawk a, chhang siam pawh rilru pe deuh a a zir chuan a thiam zung zung a, midang siam a en na lamah ngaihdan thar a nei zung zung thei bawk. A rilru a chak a, lehkha thlengin zir ţha peih se chuan a thiam viau maithei. 

"Tui lo i ti em? Uluk ve viau mah ila i siam a tluk lo viau ang" ka ti a, mipa hian an duh phawt chuan ei siam an thiam.

"Tui e i awm chhung chu siam ziah la a ţha ang" tiin min lo fak thung. Ka insit ruk tehreng nen. 

Chaw ei kham veleh a ţul ţul ka ti leh mawp mawp a, Didiki lokal hun tur ka nghakhlel hle. Thleng ka sil zawh veleh "Nu Rami khan a hralh thei em han zawt chhin teh" min lo ti a, sawi buai lovin ka be ve mai. A hralh tawh thu leh a duh leh hun a min hriattir mai tur thu a lo sawi a, Dinpuia hrilh velehin kan phur dun ve khawp. 

Siam lawk chiam chi a ni mang si lo a, tih tur kan nei dawn lo emaw tih hnuah Timothy-an min rawn bia in "Hei college chhak lawk a dawr nei Notei hian in chhang siam a zuar ve duh a nih chu" a rawn tih chuan hriatchian chakin "Tu Notei nge?" tiin ka lo zawt vat. 

"I hre lo maw? A hmelţhat set set nen" ti a min rawn hrilh leh lai chuan hmeichhe nui hak hak ri ka hre tel. 

"I van ţangkai tak aw. Tukinah pawh Dinpuia ken chhuah ho an lo laksak vek a, i ţhiante tho an nia. I sawi nu chu hre kher lo mah ila kan lawm lutuk a nia aw" ka ti a, min puih a tum thu a sawi khan a lo ti mai mai hauh lo a nih dawn kha. 

"A ţhat chu kan Notei ta tur hi lo siam sak ve rawh u. Chi hrang hrang khan ti ula tam lutuk lo se tiraw? Hmelţhanu" a ti leh vel a, tih lawm phet a tum danah dawr neitu nen chuan an la in awm hnaih viau a ni phawt ang. 

"I nasa e Timothy" nui hak hak chung hian ka lo ti ve a, a lerh loh zia hrechiang viau lo ila chu Didiki vang hrim hrimin ka hau hrep ang. 

"Chi khat tam tluk lovin chi hrang hrang a nih chu. Hlui hma lo tur zan a riah hnu pawh a hralh tlak. A chhe lo bawk a a duh tui khawp mai" a ti a, ka dah tawh emaw a tih hnuah pawh dawr neitu chu a la chhaih fiam a, phone hmeh tawp nachang a hre lo bawk nen, Dinpuia nen kan lo ngaithla ve reng. 

"A zakzum viau emaw ka tia kha a va harh vang si ve" Dinpuia chuan lo ti ve in kan nui dun leh rih ţhin. Chhang siam tur a buaipui lai te chuan ka lo pui ve zel a, ka tih theih ang apiang ka ti ve bawrh bawrh. Inleng duhawm vak lo kan neih hma chu kan hlim dun khawp mai. 

Door bell a ri ral ral a, ka ţhiante turah ngaiin zangkhai takin kawngkapui lam ka pan a, mahse Muantei zawk a lo ni. Ka sawm hun pawh nghak lova rawn lut tlangin Dinpuia awmna min zawt miah lovin choka ah a lut leh tawp. A hnungah ka zui ve zel a, a rimtui khawp mai. Ka ngaina lem lo bawk a ţhat chhuah derin ka be lum lam vel peih lo. 

"I hralh chhuak ve tawh em?" ti a Dinpuia zawtin tlangnel takin dawhkan bulah a ţhu a, Dinpuia takngial pawn a lo uksak ţha duh vak lo. 

"Hralh ve tawh" tih ringawtin a chhang. 

"Naktukah inu rawn kal a tum. I bialnu nen a in awmdan a lo hria a, thli thlai tur cheu in min rawn tir a" ti a Dinpuia a hrilh pah chuan min rawn melh ralh a, Dinpuia bulah ding reng mah ila a duh ang a sawi tho. 

"In luah man pek a la hun si lo a, eng nge rawn tih a tum?" tiin Dinpuia chuan a lo zawt a, fel bik lo mah ila a nu hi ka dem khawp mai. 

"In chungchang a ni lo. I bialnu nen in awmdun vang zawk. Hmeichhe chhungte lamin an hriattir a ni awm e" tih pah a min rawn melh leh lai chuan lei ka lo chhuah ţep a ni. Awm ve lo ang maiah min ngai a ni ber. 

"Chumi zawng sawi tur chuan chhiahhlawh rinawm a rawn tir che a ni maw? Ipi nen chuan rawnkal duh tawh suh u. In tel ve lohin a nuam zawk" ti a a chhan chuan ka lo khi ve suk. A nu a haw em em hi ka dem hran lo e. Henu lah hi a zakthei lo, a bialnu hlui ve mai a nia, thuneihna engmah a nei tawh lo. 

"Chhungte inrawlh ngaiin i awm miau sia lawm. I upat ve tawh nen naupangchhia deuh a awm lo turin ka hrilh tawh che kha" a ti a, nin hmel zetin min melh leh ţhin a, kalsawn turin min duh a nih ka ring. Ka kal awm bik lo ka ti rilru ve tlat. 

Dinpuia chuan a rul tawk lek lekin a chhang zel a, rawn kal a ngaih loh thu a sawi tam ber. Dar2 velah ka ţhiante pawh an rawn thleng a, an rawn ri hlut. Kawngkhar ka khar tawh lem lo bawk a an rawn lut tlang mai. 

"Choka hi in awm tamna tur zawk anih chuan tlem a tih zau deuh a ngai dawn a nih hi" Rina chuan rem inti hre zet hian a ti lang lang a, a hawi kual pah nasa hle bawk. 

"Che pa rem rem deuh kan awm a ni maw?" tiin Sawmtea leh Lawmkima te chuan min fiam nghak sek a, ka lo nui liam mai zel. Dinpuia kan tihbuai hlauin ţhutkhawmna pindan lamah ka phei pui a, "Khawnge Didiki leh Timothy hi?" ti a zawh pahin an zingah ka ţhu ve. Rawn kal tur ber a insawi si an rawn tel ve tlat lo a, a hrilhhaithlak. 

"Tunlai chu an inkawm hrang. An inmelh danah te hian eng emaw a awm chiang alawm. Min en ang mai maiin Timothy hian Didiki a en ve lo. Tunah pawh kal kawina tur kan nei an tih kha" tiin Rina chuan report a pe nghal mawlh mawlh. 

"No viau mah la mipa i nia, hmeichhia ang a a melh che i ring reng reng em ni?" Siami'n a lo ti leh hmanhmawh. 

"Mipa tam tak aiin sek mahla hmeichhia i ni ve tho a, Didiki a melh chang a mitmeng de set ang kha a melh che in a awm ve ngai lo" tlawm zawk nih hlauin Rina pawhin a chhang let veleh a, anni pahnih ve hi chu ho te te ah an inhnial reng mai. 

"An ni ve deuh a niang. A lawmawm zawk daih, inhrechiang sa an nia Didiki pawh a hlim ve deuh ang chu" tiin Afela pawh chuan a ngaihdan a sawichhuak ve a, hnar a len vut vut bawk. 

"Awii...Afela hnar len leu luau sia hi, a ti phu dut dut lehnghal, min hip lut daih ang e aw" Rina bawk chuan lo ti lehin hlau âwm takin a awm vel a, Afela lahin hnar tum vut vut chungin a hnaih zual sauh a, kan nuihpui nasa hle. An bula ka awm chuan ka zangkhai hawk zel ka tih tawh kha. 

"Timothy-a hnen aţangin puih in mamawh tih kan hria a, pekna tur kan lo zawn pui ve ang che u" Sawmtea'n pangai deuh a a tih chuan ka lo ngaihven vat. 

"Nia ka ti tau laklawh sia, ka awm chin tur ka sawi thei lo a, bul a ţan ve chauh bawk si ka ti hautak ve viau maithei a, in theih ang angin min lo zawn pui ve rawh u" tiin ka hrilh hlawm a, an vaia min puih theih chuan a zia hawk maithei. 

"Kan lo zawng ang mahse bakery lian pui pui min an hriat lar sa a tam tawh a, dawr te ho lahin lak ţhanna an nei ve vek a, a awlsam vak lo maithei" Sawmtea bawkin a tih leh hnuah Lawmkima zawk chuan "Tihdan ka hria" a lo ti ve hluai. A ngaihdan ngaichangin kan en ţhap a, a ding chhuak hmasa te te phawt. 

"Dinpuia a awm lo bawk a, kan ţhianho tih atana ţha leh kan puih theihna tur ber cheu ni a ka ngaih chu" a ti a, a ngawi leh vang vang.

"Sawi vat mai teh Lallawmkim. Result puang tur ang mai a inlak zei kual vel a ngai lo" Rina'n a tih hlak hlak hnu chuan kan lo bu ve ngauh ngauh. 

"Bazar ni zingah kan zuar chhuak dawn nia. Zanah Kimkimi leh Dinpuia ten siam lawk ţeuh se bazar ni ah kan tho hma ang a, kan veng lun laiah ţheuh kan zawrh sak ang a, mahni a zawrh kan zah deuh leh kan inzawrhpui tawn veleh ang a, ka hriat tirh khan tun a ka sawi zawh chiah hi ka rilru ah a awm hmasa ber" a ti a, a ţhut leh hnu chuan kan inmelh ţhap. An phur vak lo tlang tih ka hria, mahse "Kan ti dawn nia, tun ang hun hi alawm ţhianţha an pawimawh hun chu" an ti ta sap sap a, ka lawm lutuk chuan min hnaih ber tu Afela ka kuah thlawp. Min kuah let ve hlu hlu in chhang siam thar hlim ei ah min la dil zui. 

CONT...