THROUGH THICK AND THIN-24

THROUGH THICK AND THIN-24

KIMKIMI

"In lokal a ka hahdam sawng sawng mai. Ka awmdan vang hian min hauh sup sup ka ring zawk a mahse min puih in inhuam vek zawk a. Sawmtea sawi ang khan mi hian hming lar sa leh an hriat ţhan ho hi an zawng ve ţhin sia, dawr te a pek kual a ni deuh mai a. Chupawh zawn fe a ngai tho. Dawr zawng zawngah an la duh dawn chuang lo a, rilru buai lai takin in lo lang hlauh a, ka thlamuan phah vek. Ka lawm lutuk tih bak lawmthu sawi ngaihna ka hre lo" Afela la kuah hlun chungin ka ti mawlh mawlh. Thu ka awih loh vang leh chhungte runluih zawng a ka khawsak tlat vang hian min demin min zilh vak ka ring zawk tak tak a, mahse chutiang chu a thleng miah lo. 

"Ţhian kan nih vang a kan tih tur kan tih tawh kha. I hlim lai leh chan ţha i chan lai chauh a i ţhian nih tum kan ni hleinem. I chan chhiat lai te, neih i neih miah loh lai te, mangang tak a i awm lai te a i ţhiante kan ni tel a, ţhian chu inpui tawn tur kan nih angin puih che kan inhuam. I chan ţhat lai chauh a kawm theih, harsatna i tawh veleh a kalsan nghal zel che chu ni ila ţhian ka inti ngam tawp nang" thutak zet a Rina'n a tih laiin Siami'n "'Ka' ti zel lo in 'kan' ti char char ta che. Kan aiawhin nih kha i sawi" tiin a lo tihdik sak. 

"Nia kan vai hian i ţhian te kan nia, Dinpuia pawh kan ţhian ve tho a nia, puih in ngaih chuan sawi zel rawh u kan inhuam thui lutuk. Chhang zawrh te mai mai a zahthlak loh emai. A siam tui viau phei chuan zawrh a phurawm zawk ngawt ang chu. A ţul a nih leh bazar pui lun lai berah pawh kan au lauh lauh ang a ni mai lawm. Tih sak theih cheu nei tam lo mah ila kan awm chhung chuan lungngai reng reng suh u" Rina bawk chuan a ti leh duah. 

"Kan chhungte dawr nei an awm nual alawm. Min duat sual vang a nia ka thau hnur hnur. Ka lo hrilh vek ang kei berin ka sawi chuan an laksak hrim hrim ang. Chhang thar lam deuh chu a awm tawh chuan ka va teh ka lo ei chhin" tiin Afela chuan min dil leh tawh a, Muantei vang khan choka a luh leh chak tawh lo viau mah ila Afela rilţam hlauin ka lut leh hnu hnu. 

"I la ti mek chauh em ni?" ti a Dinpuia zawh pahin ka enkual vel a, oven pahnih chiah a awm a, lian viau mahse siam tam a har. Amah chauh a ni bawk nen indaih loh a na khawp mai. 

"Aw ei theih tur a la awm lo deuh. Ngati nge?" tiin min lo zawt let. Muantei a la awm ve reng a, haw mai a la tum loh hmel em em lehnghal. Mahse Dinpuia hi ka ring tawk a, hlauhthawnna ka nei lem lo.

"Afela'n a beisei deuh a, a la awm loh chuan a pawi chuang lo. Nakinah siam ţeuh a ngai maithei nia aw, ka ţhianten min zawrhpui dawn a" ti a hrilh ve nghalin ka phurna ka thup hleithei lo. 

"Khaw nge an zawrh ang?" 

"Rem chang lai laiah a ni mai. Tlem a zawng an lo hralh ve pawh a ţha a, an inhuam bawk a ti chhin reng reng rawh se" ka ti a, hralh zung zungna a awm nghal mai loh vang hian amah zawk hi a hnual zel ang tih ka hlau a, chhungte thu awih lo in sual chhuah ve fo mah ila ka zilh fo mai. 

Ka ţhiante hnenah let lehin Afela chu a la awm rih loh thu ka hrilh a, a tum nasa kher mai. 

"Haw leh i tum rih lo maw?" tiin Sawmtea chuan chanchin min zawt a, ka lo bu nghat. 

"A ninawm zo zai tawh emai. Duh leh ţhenawm khawveng te chuan min sawi vel mai mai rawh se. Dinpuia ka duh vang ngawr ngawr a hetia awm hi ka ni bik lo va, an sawi peih lutuk vang zawk a nia" ti a bulţanin thil thlen dan vel te chu ka hrilh ţha veleh a, an hriat hnu tho mah ni se an ngaithla uluk vek. 

"An rilru an thlak vat turah ngai phawt mai ila, i chhungte nen a in inkar pawh a ţha chho veleh zel mai ang" Lawmkima chuan a ti ban charh a, beisei an neih san loh hmel viau thung. 

"Kha lam kha chu sawi lo teh ang u Kimkimi rilru kan ti buai mai mai. Kan chinfel theih loh chin chu ngaihven vak lo ila a ţha zawk. Kan puih ve theihna chin, hma an sawn zel dan tur hi ngaihtuah pui ila a ţha ni mai" Siami'n a lo ti hlauh. 

Thil dang kan sawi leh hmain Timothy leh Didiki an rawn lut hlawl. An inkhai bawr ţun a, school form ha chungin Fredy a lo tel ve bawk. 

"Nang kha, school i tlan bo em ni?" ka lo ti vin nghal khar khar. Didiki a atchilh zia ka hriatchian tawh miau vangin Didiki vang a school tlan bo mai mai te chu a hreh dawn hauh lo tih ka hriat vang a ni. 

"Kan bang hma zawk a nih hi. Zingah khan ka nu te awm laiin U Didiki'n i thawmhnaw a keng chhuak hreh a, inthlak hmasa lovin ka rawn pe a nih hi" a ti a, keimah ang chiahin a vin ve.

"Nia, let leh ka tum laiin a ban tawh thu min rawn hrilh hlauh a, ka chah ta mai. Class kal i chak tawh takin ka tia, thawmhnaw rawn pek che ka duh sia" Didiki chuan a lo ti a, a duh berin a thlavang a hauh ta bawk a Fredy a intithei veh vawh khawp mai. 

Nilengin an rawn leng a, tlai a an haw hnu chuan a khawharthlak leh hle. Dinpuia chhang siamin a buai a, keiin ka lo pui bawk. Mahni tawk a kan buai dun em vangin khawharna hun kan nei vak lo zawk. 

Ni a liam ve zel a, thla hial a vei tawh. U Rintei sawi ang chiah khan ka chhungte chuan min rawn ngaihven tawh lo. Dinpuia nu chu a lokal ngei mahse ka class kal hlan berkher a nia, ka hmu hman lo hlauh. Ka awm loh laia a lokal kha ka lawm mah zawk. Ka ţhiante paw'n an insawi ang tak takin min pui nasa khawp mai. Kan eizawnna ve ber chu an hahpuiin kan tan ţhahnem an ngai thei hle a, dawr a pekna tur an zawn kual nasat bakah zingkarah anmahni ngeiin min zawrh sak ţhin bawk. Dinpuia inthlahrung lutukin an hlawh tur siam sak a tum a, tuman an duh lo. Hlawh nei miah lo leh phun nawi miah lovin min pui char char a, an hralh thei phian lehnghal. Rina phei chuan a hralh hnem thei lutuk. Didiki pawh ka nu in kan in chhuahsan a la phal rih lo. Ka chhungte tih buai hlauin inthlahrung viau mahse ka nu berin chhuah a phal tlat lo a, Didiki chuan ka awm loh vangah a ngai a, keichuan ka awm loh vang ringawt a nih ka ring lo. Ka nu hian a ngaina ve hrim hrim. 

Zan dang ang lo takin ruah a sur reng a, khawpui a ri nasa in kawl a phe zuai zuai bawk. Hlau ru viau mah ila blanket a intuam hlun chungin ka mu lui zel a, chhunah a hah ve ţhin bawk nen Dinpuia tih buai ka hreh tlat. Kan awmna hmun fal zia ka sawi ţhin kha, zan dangah pawh hlauh ruk chang ka ngah viau a, ruah a sur a khawpui a rik vak vak phei chuan a hlauhawm zual hle. 

Bang tawh tur a ka duh tehreng nen a sur nasa zel a, khaw a phet apiangin pindan chhung a eng zuai ţhin bawk. Chung te chuan hlauh an ti zual ting. A eng zawk chhung khan tu emaw thla hi ka bulah a lo ding run ang a, duh lo deuh chung a hmuh ngei ngei a ngai ang tih te ka hlau. Chhun en lai a ngaihtuah chhuak ngai mang si lo zan anih veleh ka thlahrang chhiar leh ngaihthlak ţhin te kha ka hriatna ah a inlar zut zut reng a, dawih vak lo mah ila hetiang a rik rum rum a, a phet zuai zuai a, a sur buan buan tawh chuan hlauh chang ka ngah ve tho. A chang leh thlahrang aia u misual thlengin ka ngaihtuah a, hmun fal deuh phei chu an rawk hreh dawn hauh lo tih te nen lam. Hlauhawm ka hriat theih zawng zawng ka ngaihtuah kual zawh vek hnuah zet zawng ka inlukhup ta nge nge. Thawk a hrehawmin a lum takzet ka zun a chhuak em em mai bawk si. Bathroom hi pahnih a awm a, pakhat choka ah, pakhat pindan lian ber Dinpuia mut naah. Current a awm loh vangin choka thleng thleng ka kal ngam dawn lo chiang sa a, Dinpuia kaih thawh ka hreh tho bawk si, ka ip ţang ţang tawp mai. 

Phone ka khawih a, video ka enkual lahin engmah ka en tui thei lo. Ka zunchhuak lah chuan min tur et et reng a, mut thlengin a ti harsa. Ka insum theih loh tawpah ka tho ţhem ţhem a, flashlight hmangin Dinpuia pindan ka thleng hram. Chip chaih a dingin kawngkhar ka chum dawt dawt a, ka va inthlahrung tak. 

A rawn hawn rualin light in a hmaiah tak ka lo en a, a kutin a mit a hliah vat. 

"Ka zun a chhuak lutuk choka ah ka kal ngam lo" ti a ka hrilh hnu chuan kawng min kian a, bathroom lamah ka tlan hmanhmawh em a min zui leh zui loh pawh ka hre lo. Ka zung zo ka chhuah leh hnuah pawh pindan chhung chu light in ka enkual leh a, min zui lut nghal mai aniang khumah a lo ţhu reng tawh. 

"I la muhil lo nge i harh leh tawh?" tiin min lo zawt a, ruah sur nasat zia leh a unaute ţhahnemngaih zia a hre ve tawh bawk a min ngaihtuah ve deuh a ni maithei e. 

"Ka la muhil lo...video ka enkual mai mai a, ka mut a chhuah loh phah vek" ka lo ti a, ka hlauh ruk zia erawh ka sawi chhuak duh lo mai. 

"I hlau em?" ka ngaihtuahna hria ni awm tak hian a ti a, "Hlau lo e..ka thil en in mut a ti chhuak lo lak lawh a ka la muhil lo mai mai. Ka dawih ve vak lo a, hlauh ka nei lem lo" ti a hrilh mawlh mawlh chungin a bulah ka ţhu ve. 

"Lo mu ve tho mai rawh, nakinah i hlau palh ang" a ti leh a, ka hlauh a ring a nih ka ring. Mahse "Nia, a vawt deuh bawk sia, khua a var ţep tawh tho ang a, reilote chiah ka lo mu ve ang" ka tih hnu lawkah khumah lawn kaiin a kil lam ka chuh rawk rawk. Thlahrang leh thim hi Timothy-an a hlauh em vangin kan naupanlai khan a veng tu zawk ka ni ţhin a, khavang khan thil dang hlau nih hreh lo mah ila thlahrang hlau nih ka hreh tlat. 

Ka bul a a rawn mut ve hnu a min kuah leh chiah phei chuan thlamuang tawh tak ka ni. Ka zun a chhuak tawh lo va, hlauh ka nei tawh miah lo bawk. 

"In luah man pe ta la i buai angem?" ti a zawh pahin a lam ka hawi a, lei neuh neuh ngai a tam ve ţhin em a a buai ruk ka hlau a ni. 

"Buai lo ang, rin aiin kan hralh hnem tawh a" mutchhuah hmel fe hian a ti a, thlamuang viau tawh mah ila ka mut a la chhuak lo nasa. 

"Ka awm ve vang hian in luah man a san leh mai ang tih a hlauhawm e" ka ti zuai raih. Min ngaina lo ve ropui sia, keimah vangin a fapa a hrem vak ka hlau a ni. 

"San lo turah ngai ang. A san anih leh luah tur dang kan zawng daih dawn nia" a ti awlsam et a, hnawk sak leh buaina thlen tu a min ngai duh miah lo te hi ka tan chuan a lawmawm. 

"A hmun hi chu nuam ka ti reng mahse misualin hre fuh ta se min rawk duh dawn lutuk. Pahnih chiah kan awm a, insual bur bur chi kan ni lo ve ve bawk si. Min hrechiang ngat se la chuan a ruk pawh a rawn lut lovin kawngkapui aţangin an rawn lut ang" ka ti siam siam a, a nui chhuak ta hawk. 

"Misual i hlau maw?" ti a min zawh chuan lu ka zeuh.  

"Hlau e, thlahrang ai chuan kan mihring pui ngei te hi an hlauhawm zawk. Thil dangah sawiselna ka nei lo a fal lutuk ber hi a ni mai" tiin nuam ka tih loh chhan ka sawi leh. 

"Insual thiam lo viauah min ngai mah la ka hmuh laiin tuman an ti na lo ang che. Hlau duh tawh suh" a ti a, min thlamuan ve ngei. Insual vang a a hliam ka hmuh hnu phei kha chuan ka ring lo lehzual. Mahse ka rin loh rukna te chu dah ţha in "Ka hriat vang alawm ka belh tlat che. I bul a ka awm phawt chuan ka him tih ka hria a" ka ti ta zawk a. 

Dim te a ka hmui a min fawh chuan ka nui sak a, ka lo chhang let ve thuai. Min fawhna chu a tirah nemin dam dap mahse a duhthaw tial tial a,  min mamawhna leh a ta chiah ka nih zia lantir a tum a ni ber. Ka kawr chhung a zen luh pah a a hmui in ka nghawng a chhui thlak lai te chuan a thaw lum ham ham a, a thaw lak rang tial tial chu chiang takin ka hre thei a, keipawh ka bang bik lo. Ka kawr phelh tum a a hlim chhoh lai te chuan thil thleng tur hre lawk vek mah ila ka dang lo. Hlauhna ka nei lo va, ka hriatna a fimin ka taksa nen hian an duh leh mamawh a inang chiah bawk. 

Zing a ka harh meuh chuan zan lamah ruah a sur miah lo emaw tih tur khawpin ni a sa ţha a, parda in a khuh loh chin aţanga ni zung rawn lut chuan min chhun fuh bawk nen, ka thlan deuh dap a, rang lutukin ka puan sin lai ka tlawh hlim. Ka bulah Dinpuia a lo mu ve tawh lo a, lukham hnuai a ka phone dah chu la chhuakin dar zat ka en vat. Dar10 a lo pel reng tawh lehnghal. Khum aţangin ka chhuk sawk sawk a, khum phah ka pawh mar hnuah blanket ka thlep leh thlap. Ka tih ţhan a nia ngaiah ka nei tawh. 

Choka a ka luh hma hauh aţangin chawhmeh rim ka hria a, nidang a a siam ţhin ang bawkin a rimtui leh hle. Mi ei siam a en peihin siam ve zel a tum a, bawlhhlo a hek ka tih vangin ka khap zawk ţhin. 

"I va tho hma awm ve, min kaihthawh ve tur che a nia" inthiam lo deuh a tih pahin a bulah ka ding ve a, tho phang zawi lai a ni bawk a duat deuh a min lo kuah lai te chuan ka ngheng ar ar. 

"I muttui em a ka kaitho phal lo che a nih kha" tiin min lo chhang ve thuai. A kut lehlam a min kuahin lehlamin a thil siam lai a chawk a, a buai khawp mai. A la hmin loh hmel danah a tho hma bik vak lo a ni khawp ang. 

Bathroom aţanga thawm ka hriat rual chuan "Tu nge awm?" hawi phei vut pahin ka ti hluai a, Dinpuia ka zawt a ni ber. 

"Didiki, min rawn kaitho a" tiin kei aia a thawh hma bik chhan a puang ta nge nge. Ka harh miah lo thei chu mak ka ti zawk. 

"Ngati nge? Inrinni a ni sia a va rawn kal hma ve?" ti a mak ti angreng tak chunga ka zawh chuan dawhkan awmna lam a thlek zeuh a, bag leh thawmhnaw a lo awm. Ka chik loh em vangin min hrilh hma khan ka hmu lo mai mai. 

"A ngai tawh che niang" tih ringawtin min chhang a, ka duh ang chhanna min pe lo khawp mai. Nitin kan inhmu a, min ngaihna hun a la awm lo hrim hrim. 

Bathroom aţangin towel a a lu tuam luk chungin a rawn chhuak. 

"Min hrilh lawk lo in i rawn kal thut sia, ka ngaih i ti ţha lo" nui chungin be mah ila ka ngaih a ţha lo tak tak. Harsatna a tawk ngun ve bawk nen rilru a nuam lo nghal ringawt zel. 

"Ngaihţhat lohna tur a awm lo. Siami te in a chawlhni hmang tur angin ka insawi a, hetah ka rawnkal daih a nih hi" ti a awlsam fe a min chhan hnuah a bag zek rak rakin pawisa a rawn phawrh a, kan dinna ah chuan rawn ding hnai ve in "Hei Nu Rami hnen aţanga ka lak leh Timothy-an a ţhiante hnen aţanga a lak a nia. Lo ken hman loh ka hlah lutuk a nimin tlaiah kan la nghal vek" ti a hrilhfiah pahin Dinpuia a pe a, in luahman pek a ngaih tawh vang a rilru buai lai tak a ni bawk a, a lawmawm duh bik kher mai. 

"I riah dawn ro ro chuan lokal rawh ka pindanah thawmhnaw kha ka dah pui ang che" tih pahin Dinpuia min kuahna aţang chuan ka in la hrang a, engmah thleng lo angin sawi mahse sawi tur a nei tho niin ka hria. 

Ka pindan bikah kan inzui lut a, blanket a lo la inthlep lo. Didiki chuan min melh ralh a, hetah ka riak lo a ni tih a hriat hlauin "Ka harh khan a tlai tawh lutuk a, hmanhmawh tawkin ka tho sia ka thleh theihnghilh daih" ka ti vat a, ka thlep nghal thuai thuai bawk. Ka tih ţhan a ni ka tih tawh kha, inah pawh ka thlep vat vat ţhin a, Didiki ngei hian chimlim tiin min fiam fo nghe nghe. 

"Mang ţha lo ka nei nasa lutuk a" tih sep pahin khumah a ţhu ngui bur a, a bulah ţhu ve thuaiin a darah ka vuan a, mang ţha lo a neih tirh aţang khan reilote chhung chauh a nih ka ring lo sa hrim hrim. 

"A ngai bawk em ni?" tiin hre sa mah ila zawhna ka siam tho. 

"Ni e, kha zan a thil thleng ang chiah chiah khan ka hmu ţhin a, a chang leh him a ka in ngaih tawh hnuah min lo khawih nawn leh a, min rekin min thah a tum thul. Nizan thleng khan mangchhia chuan min la umzui zel a, dar2 velah ka harh a ka muhil tawh lo hrim hrim. A tak tak ang a thleng ang vek hian a awm ţhin bawk si, hlau thlabar deuhin ka harh a, a tak a ni lo tih ka hriat hnuah pawh ka hlauhna a reh tawh ngai lo. Tukinah pawh ka mut tlem vangin ka rit luk reng a, tumah ka hrilh ngam bawk si lo. Chaw ei kham veleh inu hnenah Siami te in a riah ka dil a, zirlai vang a nih thu ka hrilh. A lo phal ve mial a, ka insiam sawk sawk a ka rawnkal nal nal. In lo thawh tawh ka ring zawk a, mahse kawngkhar in lo la kalh a, door bell ka hmet char char a, nangmah zawkin i rawn hawn ka rin laiin Dinpuia zawkin a rawn hawng a,  chauh hmel min ti ve deuh nge coffee min siam sak a, ka in zawh hnuah ka harh deuh takin tiin ka inbual nghal daih a nih kha" tiin min hrilhfiah a, ka khawngaih ve ţhin. 

"Ţawngţai ţhin rawh. I ring lo tih ka hria, Pathian hnen aţanga chhanna dawn i beisei tawh lo tih ka hria alawm, a reh vung vungah i ngai tlat a, mahse a chhang em em ang che. Thinlung tak a kan ţawngţai chuan min chhang ngei ngei ţhin" tiin ka lo hrilh ve thung. Pathian thu sawi thei ka ni bik lo tih ka hria. Kei ngei pawhin a thu ka zawm bik lo a, ka bawhchhe mawlh mawlh zawk. Pathian thu lo leh a duh loh dan zawng hlirin awm mah ila mi sawi ka hriat ang te ka hrilh ve ţhin. Ka sualna hre lo der hmak chung a hrilh ka ni lo va, ka sualna hre ran chungin a mamawh vang zawkin ka hrilh a ni. 

"Lawmkima te vengah chawlhni a pek ţhan in nei a ni lawm ni? Dinpuia khan rawng a bawl bawk a, naktuk a mi tur pawh a buaipui duh ka ring. Va pui ve phawt la nakinah kan sawi leh dawn nia" ti a min hnar hnuah thil dang min tihsan a, Pathian hming kan lam chang hian ngaihthlak duh miah loh ţum a nei ţhin. Min ngaihven miau loh vangin pindan ka chhuah san ta nge nge a, a bo thuk lutuk ka hlau takzet. 

Chaw eikham veleh dan ngaiin a hna ngai bawkah a bur leh char char a, ning hmel a pu ngai lo. A eizawnna ber a nia, hmasawn zel a duh chuan ning thei a ni lo reng a ni. A dinna bulah ţhuin keipawn ka lo pui veleh a, kan buai ve thei khawp mai. Chak takin hma sawn thei lo mah ila hralh chhuah a awm ve reng chuan a zia hrim hrim. 

"Inu hmu tur chuan vawiinah em ni i kal ang?" ti a zawh pahin ka melh chho ha a, a nu in a tihdan vang hian a rilru a na tih ka hria a, hei vang hian ka sawi pui vak ngai lo. 

"Aw tlai lamah" a ti nghut a, a nu chungchang ka sawi reng rengin chhanna ka dawng mumal ngai lo. 

"Didiki chu thawhţan zing thleng a awm ve dawn a, a pawi lo ang chu tiraw?" inthlahrung deuh hian ka ti leh a, ka sawi fo ţhin angin khawsak a harsa a, keimah mai bakah ka ţhiannu in min rawn belh leh meuh chuan mitmei a ven loh theih loh. 

"Pawi lo e, i khawhar a hnem a ni mai" a tih chuan "Ka khuahar reng reng lo" inven tum takin ka lo ti thuai. A awih lo lutuk chuan nui suk chungin min melh a, zam lo áwm takin ka awm. 

"A hrehawm em?" ti a min zawh pahin ka bulah lawk chair ah a rawn ţhu ve a, a ngaihna hre lo lutuk a lo thlek ha chungin "He ta ka awm hi maw?" tiin ka lo zawt let a, min chhan nan lu a bu nghat. 

"Eng ber nge hrehawm ka tih ang a? Hrehawm ka ti lo reng reng" ka ti a, inthiam loh rukna ka neih hi a hrehawm na lai awm chhun a ni mai.

"Neih ka nei mang tawh si lo a, bul ka ţan dawn ek ek chauh a, ka thil tih mek ah hian hlawhtlin tum mah ila ka hlawhtlin hun tur ka sawi thei lo. Retheih hi hrehawm i ti em?" ti a min zawt lehin a mitmeng a tak ran a, tibuai tu zawk min vengthawng lutuk chu a khawngaihthlak. 

"Teuh lo mai, ka nuam sa lutuk a rethei ang paw'n ka inhre lo. Retheihna leh hausakna hi pawisa a teh tur a ni hleinem. Min vengthawng duh miah suh, hrehawm tihna ka nei lo tak tak a nia" tiin ka ţawng thlamuan mawlh mawlh. Kan inthlamuan tawn a, kan infuih tawn loh chuan kan beidawn mai a hlauhawm.

"Nuam sa deuh a awm tir theih che ka duh. Hmeichhe dangin an awh tur khawp a duat che a, duh duh nei thei a siam che ka duh. Mahse thil tih zung zung a harsa a, ka duh angin ka la tihsak thei lo che" a ti a, thiam lo tak chung a a rilru a thu awm leh a vei zawng a sawichhuak ve chu ka lawm takzet. 

"Min hmangaih chuan a tawk mai. Duh duh nei thei mah ila min hmangaih loh chuan ka hlim dawn chuang lo a, tun a kan dinhmun ngai reng hian damchhungin awm dawn mah ila min hmangaih phawt chuan ka hlim a, nuam ka ti em em reng tho ang" tiin ka phun ve sep sep. 

Nilengin kan buai a, Didiki erawh pindanah a inkhung chawt. Hun thawl a mamawh a nih ringin Dinpuia pawhin tihbuai a phal lo a, thingpui pe tur a pindan chhung ka luh lai chuan a thil ziah lai chawlin lehkhabu a khup thawk a, nui sangin min lo chhawn. 

"I zir peih bik lutuk. Exam hun a la hla tho a, keipawh zir miah lovin chhang ka siam char char hi. Chawl rei deuh mah la in nawr nasa lutuk duh suh" fiamthu titak deuh tak a ka tih hnuah ka chhuahsan veleh mai. 

Zan dang aiin kan mu hma a, keipawh Didiki bulah thlamuang deuhin ka mu. 

"Tui deuhin muhil rawh, zanin chu kan riak dun leh ta bawk a ka veng char char ang che. Engmah hlau miah suh" ti a ţawng thlamuan mawlh mawlh chungin ka kuah a, ani pawhin ka ban a lo vuan ve vat. 

"A ngai lo nangpawh muhil rawh. Ka inleng vel na lamah i harh leh dawn tho tho a, keimah vangin i chau thei lutuk a, vawikhat tal chu min ngaihtuah lo ve deuh rawh" ti a min hrilhin hah hmel takin a thaw chhuak halh. 

"Fel lo viau mah ila zantin ka ţawngţaipui ţhin che a, thlamuanna i neih theih nan te leh vanduaina ten an hlat ve theih nan che ka dil ziah. Engtik niah emaw chuan ka ţawngţaina hi Pathianin a la chhang em em ang. Chak takin awm zel la, khawvel hi a mum tih i hrereng dawn nia. Khawvel hi a mum a, a inher kual hret hret rual hian mihring leh kan nunphung te a danglam ve zel a, Pathianin i tan a hun ţha a ruat ve hunah chuan khawvel hian i tan vanneihna a rawn her chhuahpui ve mai ang. Mahse chu vanneihna chu Pathian vang chauh a awm thei a ni tih i hre tel dawn nia" tiin ka hrilh leh dap dap. 

"Nia, min ţawngţaipui char char rawh. Zan mut ţhat ka nei ngai lo a, ka taksa a chauin ka khawhawi a tawi a, ka bing luk luk reng. Mahse ka ban phakah i awm reng a, min puih i inpeih at reng bawk a, ka tan a i inhuam em vang hian ka hlim ru veng veng zel. Rul let thei lo che mah ila Pathian ka hnaih ve theih hunah vanneihna leh hlimna zawng zawng i neih reng theih nan ka dil sak ve char char ang che" a tih chuan ka lo nui hak a, luhlul chhuahin in kheng khawng lui tlat mahse Pathian awm zia hi chu chiang takin a hre ngei a ni. 

"Pathian hnen a min ngen sak hun tur chu ka nghakhlel khawp mai. I thinlung zawng zawngin dil la, i duh zawng te chu a pe hrim hrim ang che. Innghahna tlak a nih zia chiang takin ka hria, ka phatsan fo chung hian min thlahthlam ngai chuang lo. Bible hi hnawl mai mai tawh lovin uluk takin chhiar ve tawh la, Pathian nen inzawmna nghet deuh in la nei mai ang" tiin ka thiam dan danin ka hrilh ve. Ka ţhiannu a nih mai bakah unaunu ang chiah a ka en a nia, ka nu leh pa leh unauten an ngaina in ka nau tan phei chuan a hlu hle. A bo thuk lutuk ka hlau a, Pathian rinna tlem te a la neih hi chhem alh sak zel ka duh, anih loh chuan a mit vat mai ang. Pathian a hriat loh hlen ka hlau takzet. 

"Ka tum alawm. Inzawmna nghet kan neih theih ka beisei. Ka ţhatna chauh duh tu ţhian ka nei hi vannei ka inti takzet. Ka thlavang i hauh reng ţhin a, awm lo mah ila midangin i hriat laiin min sawichhe thei chuang lo a. Ţhian khawsa thei deuh deuh i nei chungin min kalsan mai lovin min hnaih zel zawk a, mize lem deuh i nei ve lo a, Dinpuia i hmangaih takzet bawk. Hetiang hian awl zel la, danglam miah suh" a ti ve luam a, ţawngkam thiam lo viau mahse min fak ve hlut vang chuan ka nui leh ver ver. 

"I ţhian ka nia, i hlim laiin i bulah ka awm a, harsatna i tawh pawhin i bulah awm zelin ka ngaihven zual sauh zawk bawk ang che" ka ti a, ka ţhiante min hrilh ang chiahin Didiki pawh ka hrilh ve. Kan tan a a hlut zia leh puih kan inhuam reng zia ka hriattir ve a ni. 

Ka harh veleh meng mang lovin ka mutna bul vel ka dap kual a, Didiki a lo awm tawh lo. Kan in a a awm lai pawhin a tho hma ţhin hrim hrim a, a tho tawhah ngaiin ka ţhuchhuak ve a, awm zawi rei lovin khum aţangin ka chhuk vat. Mutna ka tihfel hnuah pindan ka chhuahsan a, a la reh vung vung danah Dinpuia a la tho lo a nih ka ring. A la hma deuh hlek a, zanah keini aiin a meng rei bawk nen, ka kaitho ve nghal duh ta lo. 

Inchhungah Didiki ka hmu mai lo a, kawngkapui a la inkalh tho bawk si. Bathroom ah a la awm anih ring nghal maiin thingpui ka lum a, a so hun nghakin gas bulah ka ding ran. Ka la phak chuap a, zan hmasa lamah ka mu tlem bawk si, Didiki a mangin a ti harh lo nge ka muttui em vangin a thawmah ka harh zo lo zawk pawh ka hre lo. 

Thingpui no hnih ka siam zawh hnu chuan bathroom kawngkhar ka kik karh karh a, Didiki ka ko pah zel bawk. A reh vung vung takah chuan 'ani hi min tih harh hlauin pindan awlah khan mu daih em maw ni?' tiin keimah leh keimah ka inzawt a, bathroom ah a awm lo a ni tih chian tumin kawngkhar ka hawng a, chhunglamah a lo inkalh lo ngei bawk. Mahse ka thil hmuh chuan min ţhawngin chet mai nachang hre lo leh au chhuah nachang pawh hre miah lovin ka melh tlawk tlawk. Didiki chu a awm ngei mahse a nghawngah puan a in vet a, kan bathroom ah ngei a inkhai reng. 

CONT...