THROUGH THICK AND THIN-25

THROUGH THICK AND THIN-25

DIDIKI

Hriat hleih theih lohin mumal lo zetin a phun sep sep a, a changin a rum a, a tal leh bat ţhin a, a mittui a luang bawk. 

"Hey..ka mang min chhuh sak daih a nia, harh thuai thuai teh" fiamthu a tih pahin ka sawi det det a, a harh thei mai lo lehnghal. 

"He nu hi a ţap vel nia" ti a biak bik pawh nei lo a ka ţawng chhuah leh hnuah ring deuh zawk hian "Lalrinkim tho vat rawh i nu a lokal" ka ti vak a, a harh theih loh ka hlauh vangin ka sawi na zual sauh. 

Chiang lutukin a rawn meng kawk a, ka phu zawk nghe nghe. 

"Eng mumang nge i neih a?" ti a ka lo zawh chuan min chhang lem lo vin a ţhu sawt sawt a, thawk harsa khawp a ka hmai a dap kual chiam hnuah min kuah thlawp. 

"A va mak bawrh bawrh ve, i mang a ţha vak na nge?" ka ti leh a, khawvar rualin ka harh a, mutthilh huphurh ngawih ngawih ţhin zawk ka muttui phian. 

"A tak a ang lutuk" thaw hlawp hlawp hian a ti a, a thlamuang deuh tawh emaw ka tih hnuah a ţap hliam hliam. 

"Eng nge i hmuh? Dinpuia'n a lo hau che em ni?" tiin ka zawt leh a, a zangkhai phah deuh takin tiin a hnung zangah ka chul pah. 

"Teuh lo mai" ţap aw ţuau a a tih hnuah tlem a tawlh hnung lehin a ţhu ţha a, min en reng lai te chuan a la men pur. 

"I dam ţha em?" a ti leh ringawt a, hrilhhai deuh chungin ka bu nghat nghat. Hriatchhuah thut nei ni awm takin khum aţangin a chhuk thla sawk sawk a, khum bul dawhkan a lehkhabu a hai buan buan. 

"Engin nge ti buai che?" tiin mangang zetin ka lo zawt vat. Phawk hra a ka lam rawn hawiin "Nimin chhun a i thil ziahna kha khaw nge? Khatah khan eng nge i ziah?" ti a min zawtin ka chhanna pawh nghak zo lovin a hai leh buan buan. 

"Ka bag ah khan a awm" ka tih veleh rang zetin ka bag a lehkhabu awm zawng zawng a phawrh chhuak a, "A pan ber kha" ka lo ti leh. Ka lehkhabu hrilh chu uluk zetin a tir aţanga a tawp thleng a keu a, a chet dan chu ngawi rengin ka lo thlir tawp. 

"Didik, intih hlum hi i hlau em?" ti a ka bul a ţhut pah a dam deuh zawk a min zawh chuan "Hlau e" ka lo ti vat. 

"Awii..a va lawmawm tak" ti hluaiin mit chhing tlat chungin a vanvadak a, a awm a dawm vawng vawng. 

Chek tlak tlak ri kan hriat hnuah "Over tak aw" tih ri kan hre zui zat. Chu aw lo chhuahna lam chu kan hawi nghal thuai a, kawngkhar bulah Dinpuia a lo ding run. 

"Engtik aţang khan nge i awm?" tiin nui ţha chungin ka lo zawt. 

"I thu hnuhnung a zawn aţang khan" ti a min lo zawh chuan hrethiam lo viau mah ila ka nui hak hak. Ka hriat chak deuh hnuah nui tawp hmakin "Eng nge ka hnutchhiah?" ka ti he haw a, chhanna beisei zetin Dinpuia chu ka melh reng. 

Beidawn hmel zet hian a lo thaw hawk a, "Intih hlum i hlau em a tih kha, nimin a i thil ziah a zawng bawk a, intihlum turah a ngai che niang chu. Kha a lawm vawng vawng tawh khawp kha, a hriat vek alawm" ti a min hrilhfiah hnuah a chhuak nghal daih lehnghal. 

"A dik em?" ka ti nghal tawng. Kimkimi chu a lo thaw huai a, a bu pah nghat nghat. 

"Ka mumangah choka bathroom ah sawn ilo inawk hlum a, thingpui ka siam kep vek hnuah ka zawng kual che a, bathroom a lo inkalh lo a, ka rawn hawn rualin i lo inkhai reng ka hmu a, au chhuah nachang ka hre lawk lo mahse a hnuah ţap vak vak chungin ka au tuarh tuarh a, thil dang pawh ka hmu nual mahse ka hre vek tawh lo" a ti melh melh a, thutak viau mahse ka nui chhuak leh hawk hawk. 

"Lo inawk hlum ta tehreng pawh ni ila chhan beisei ka nih loh te chuan kawngkhar tal chu ka kalh ve ang chu" la nui hawk hawk reng chung hian ka ti a, a nui ve thei der lo.

"Aih,a tak a ang lutuk. Sakeibaknei puk a ka luh ţum ai pawh khan a tak a ang zawk. Nizan ang reng reng a mumang thutak kha ka la nei ngai lo" a ti leh hliam hliam. 

"I bulah ka awm reng hi..hlauthawng duh suh. Khatiang khan zantin ka awm a, ka buai chhiat ngai miah loh hi. Engahmah ngai duh suh" ka tih chuan "Chuvang tak chuan lawm ka buai. Ka khawngaih lehzual che. Zan khat lek ka thil hlauh ber ka hmuh ringawt pawn ka buai a nia, zantin hmu phei ila chuan biak tlak ka awm lo ang. I tuar a chhel bik ngawt mai" a lo ti leh zung zung. 

"Nizan chu ka muttui phian a, keimah a ka mut loh vangin ka thlamuang ve deuh a niang" ti a ka hrilh hnuah ka kut pahnih a vuan bet a, "Ka mumang ang kha a tak takah a thleng miah lo ang tih tiam rawh" thutak zet hian a ti a, a la pangai loh em vangin ka nuihza ka insum hram hram.

"Awle i mumang ang kha a tak takah a thleng lo ang" tiin thutiam ka lo siam. Ka sawi tawh ang khan ka nunna tih tawp mai duh ngawih ngawih lai nei ţhin mah ila min haw tu te lawmna ka siamsak na mai mai tur anih vangin ka tum lo bur. Min that te a nih ngawt loh chuan ka nunna lak tumna ka nei lo hrim hrim. 

"Ka rilru a nuam huai huai mai. I rawn lang deuh thut bawk si hi ka lo mangphan a niang" a ti a, Kimkimi nu te chuan Siami te in a awm angah min ngai ngei ngei ang. 

Pindan aţangin kan inzui chhuak a, choka kan luh chuan coffee rim a lo nam chek chek. 

"I lo ti duh kher a, keimahni'n kan lo ti mai dawn lawm" inthlahrung tak a ti zung zungin no ka lak khalh a, dawhkanah ka thiar phei. 

"Mumang in nei tlang lian bawk a in harh deuh ang" tiin min lo fiam a, nui liam mai mai thei mah ila Kimkimi chuan a la vei zui zel a nih hmel "Laldinpui mi mah hlauhthawn nak laiin, tikhan fiamthu thawh nan min lo hmang ve sek suh" a ti a, a ţeu hlar mai. 

"Rapthlak ka tihna a nih kha amak bawrh bawrh ţhin" Dinpuia chuan inveng zetin a lo ti ve vat. 

"Min nuihzat a nih kha, i mumang a rapthlak ve ngai lo mi?" Kimkimi bawk chuan a ti leh a, Dinpuia'n "Pangpar hlir ka hmu ţhin" tiin a bialnu thinrimna hrelo derin a lo fiam leh zuk. 

"I hmelchhe leu luau a nih chu a" a ti hluk a, no chawi kangin coffee a in pawp a, a sa ti lutuk chu a kang awk ni maiin ka hria. Lem lui hram hramin lei a chhuah a, a ner nasa. Nuihza ru viau mah ila mi chet chhiat lai lai a lo nui bik nih ka duh lo chu ka insum ţang ţang. Dinpuia chuan tui lo pe vat vat mah se la a nuih a za ve tho tih a hriat. Kimkimi hnungah dingin a nui ruh ruh reng a, "A sa viau em? Tui vawt hian chiah vang vang la a zia deuh ang" pangai takin ti ve bawk mahse a nui leh tet tet ţhin a, Kimkimi lah a si hlat hlat reng bawk si, ka nui chhuak lo chauh tawh. 

"Awii...a va han sa em em. Ka hmul thi a ding vek" a tih leh hnu phei chuan thutak viau mahse ka nui chhuak ta uar uar. 

"Sa ang i in pawp a, chhem hmasa ta che" Dinpuia chuan a lo ti ve hluk. 

"A awm vung reng tawh tho a, a sat vak ka ring tawh hleinem mawle. Ka chhak chhuak leh ţep a, in ten ka hlau sia ka lem tawp anih kha. Chaw rum uchuak hnehsawh ai paw'n lem a har zawk" uar fe hian a ti a, a nghawng a dawm vang vang. 

"I insiam chhe nasa lutuk a an rek bet che maw ka ti hman alawm le" Dinpuia'n fiamthu a a lo tih leh zuk chuan hnung lam hawi thuaiin rem leh rem lovin a dulah a beng a, in en ren rawnin an nui tet tet a, Dinpuia ber insum thei lo va a nuihchhuah tak hawk hnu chuan uar fe in Kimkimi nen kan nui ve. Tlem viau mah ila zingkar karah kan thawm a ţha ham ham khawp mai. Ka nun zawng zawng nghawng dawt thei thil ka tawn hnu a ka nuih nasat ber ţum a ni hial awm e. Mahse ţhiante zing a ka nuih ve bawk bawk chang te hian ka vanduaina tawh rapthlak tak kha ka theihnghilh ngai chuang lo. 

Chhunah Timothy a rawn lang hlawl a, min hrilh lawk miah lo lehnghal. Ka thawmhnaw hak a lian hlep hlupin ka patlin lai tak a ni bawk nen, Kimkimi ka melh ralh a, Dinpuia chhang siam puiin a lo ti ti siam siam a, ka nuam tih loh rukna chu hria ang pawn a lang lo. 

"Min hrilh lawk ve tur che lawm" lungawi lo tak chung a ka tih nang nang laiin a ni chuan ka kawngah kuahin amah hnaih deuh turin min pawt hnai a, Kimkimi te an awm ve miau vangin ka inla hrang sawk sawk. Ţhutkhawmna pindan a kan phei hnu, Kimkimi ten min hmuh phak loh chinah a hma ang bawk khan min kuah leh tho. Min fawh tum ni awm tak a a rawn kun hniam lai chuan midang hmuh hlauin hnunglamah awn ruai ruai mah ila ka hmuiah tak min fawp ta tho a, rei lo te chiah a ni thung. Min fawh hnu ah uangthuang takin kan hnar a in nawk tir a, zawi tein ka lo nui. A fiamthu ve dan hi a mak thei nia aw. 

"I chhungten rawn kal an phal em ni? Sunday a ni sia, lenchhuah an phal ka ring lo a" a dar a dawm pahin ka ti a, ani pawn ka kawngah ah ala kuah reng. 

"Umm..phal e ti ila ka dil lem lo" a ti a, a thusawi tawp lam chu a ban charh charh hle. 

"An hau che nge aw" hlauh pui tak a ka tih pawhin ngaipawimawh lo fahranin "An ţawng tlem a tumah an hau thiam lo" a ti liam satliah a, amah berin a hlauh loh te chuan pawi lo ah ka ngai mai. 

"Keimah tal min lo hrilh lâwk tur che nia" tiin ka la vui tho a, "In puahchah lawk lo mah la ka mitah chuan i ţha ber tho tho" ka ngaihtuahna hria ni awm tak a a tih chuan "Chutiang lam a ni lo" ka lo ti vat. Duh aiin ka ţawng ring lehnghal. 

"Nizan i muttui em?" tiin min zawt leh ta daih a, a fiamthu tawh lo va, min ngaihtuah tak tak hmel leh tawh zawk. 

"Muttui tehreng mai. Mutpui ka nei tih ka inhriat lutuk vang anih ka ring. Mahse Kimkimi mumangah ka lo intihlum a" ti a ka hrilh hnuah ka nui zui ver ver. 

"Ka lo ţap em?" zawite a ti supin a lo fiamthu leh. 

"A sawi miah lo. I ţap lo a ni hrim hrim ang. Lo intihlum tak tak pawh ni ila i ţap dawn lo ni maw?" ka ti fiam ve vel a, ka uang a ni tih hrereng mahse "Ţahna hun ka nei lo ang" tiin pangai deuhin min lo chhang. 

"Ti maw?" ka lo ti he haw a, hriat ka chak leh zek zek tawh. 

"Kha mihring vang kha a nih lek phei chuan jail thlengin ka umzui ang mawle" a tih khur khur lai chuan ka kutin a hmui ka lo hup.

"Sawi tawh suh i insawi thinrim mai mai. Bakah hriat nawn fo loh ka duh zawk" ti a ka khap hnu chuan a hmui ka hupna kut chu humin "Tihpalh" a ti leh sup a, dam deuh a ka kut a fawh lai chuan ka lo ţhen sak. Tun thlengin keimah ang chiahin a thin a la rim a, kan sawichhuah chang a ka mittui tla a hmuh phei chuan min hnem chungin a in hrosa khur khur ţhin. 

"A ho lutuk, Kimkimi nu lahin hmalam ka pan theih nan min fuihin thu ţha tinreng min hrilh a, ka zia ve tawh lutuk a nia, in tan a hmuh hrehawmin ka awm tawh miah lo ang" tiin a rilru nawm theih nan ka intiam a, min sit phah miah lo mak ka ti viau ţhin zawk. 

"I mang chhia kha hnawt kiang thei lo mah ila a tak ramah hi chuan ka veng him tlat tawh ang che" ti a min thlamuan hnu a "I tang leh mai ang" ka lo tih chuan a nui hawk. 

"Tun chinah hmeichhia chu kutthlak tawh reng reng suh" ka ti leh hnuah, "A ţawngthei em anih kha" a ti bung nghut. Ka patea te in a buaina a va siam chiam ţum khan Lalawma zing tho hlim kut a thlak chiam a, thisen hial a chhuahsak a ni awm e. Ka nutei lahin fate tiin a thlavang a lo hauh nasa mai a, Lalawma kut a thlak nasa lutuk tur thinrim ang tun tun chunga lo dan a tum kha a nam thlu a ni awm e. Sawisa nasa ve lo mahse ka nutei bang tauh dawt khawp a a nam thlu tel kha ka patea pawh a lawm lo a, mahse a fapa in pawi rapthlak tak a khawih miau vangin thupha chawi zawkah an ţang leh tho. 

"Ţawngthei viau mahse thil pawi a thleng palh thei a, tun chinah chuan i thinrim viau anih pawhin in thunun hram hram zir rawh" ka ti leh melh melh.

"Nu berin i tih te chuan" uangthuang zet a alo tih vang chuan nui hak chungin a ban puam laiah ka beng a, ka beng na lem lo aniang hria ang paw'n a awm duh lo. 

"Kimkimi te chu i zawh sak leh em? Party na vel a i hmel hriat te pawh?" ka ti ta daih a, fiamthu miah lo mah ila "Party na a chhang ei te chu a" nui hawk chungin a lo ti daih. 

"Chutiang ka sawi lo. Party na aţanga i ţhian chhar te dawr nei te an awm lo mi ka tihna anih chu" tiin chiang zawkin ka sawifiah leh. 

"Ka hre lo le, biak pawh theihna ka nei vek lo a, theih ang angin kan pui zel ang chu" a ti a, pui nasa ber pawl a ni hial ang. 

"Nangni pahnih kha, in hmui tauh chawrh chawrh reng lo khan thingpui lo in rawh u" nui sang chungin Kimkimi'n min rawn ko a, a thusawi chuan min ti lai lek lek. Min fawh zeuh lai kha an hmu ru em maw ni ka ti hial. 

Kan dinna lam a a rawn kal phei laiin "Hmui i tauh ve chak a nih kha" tiin Timothy chuan a lo fiam a, "Tauh mai a ni nang, tauh chawrh hnua insual tir a lam tir ziai ziai ka chak" ti a fiamthu bawk a Kimkimi'n a lo chhan ve hnu chuan nui hawk hawk chungin Timothy-an a kuah nawk nawk. 

"Tiang ţawngkam kha khawi aţangin nge i hriat ve?" tiin a zawt a, an inkawmna a rei tawhin an in ngamtlak bawk a, an infiam zui bawrh bawrh. 

Tlai lam a kan ţhian dangte rawn kal chuan sa leh alu leh thlai tam vak lo an rawn khai a, "Chaw kan lo ei nghal dawn" tlangnel fe a tiin eitur an zawng nghal. Kan zing a thil ti thlip thlep ber Sawmtea chuan a in hralhna leh dawr aţanga a pawisa khawn khawm te, midang hralhna leh an khawn ve tho, a vaia a lo dah khawm thlap chu Kimkimi te hnenah a pe a, a tam ve sawt hle. 

"In ţangkai e, lawmthu sawi chiam duh mah ila lawmthu sawi dan kan thiam lo ve ropui si" nui ver ver chung hian Kimkimi chuan lawmthu lo hrilhin thupha a chawi pah ni berin ka hria. 

"Kan ţangkai ve theihna ber kan tih tawh kha. Puih in mamawh laiin kan pui cheu nga, in hlawhtlinna pawh kan lawm ho zel ang chu. Puih in ngaih chhung chuan kan tlanchhe miah lo ang" Sawmtea'n thutak zet a a tih laiin Lawmkima ve thung chuan ţah aw ţuau hian "Ni e" a lo ti ve thung a, a ţap der. 

"Lawmthu i sawi reng chuan kan pui tawh lo zawk mai ang che aw. 'In va hralh tlem ve' lo ti ziah zawk rawh" Siami'n a ti hlak hlak a, thei tui siam sa a kan dah ve ngei kha a in zui khawlh khawlh. 

"Dinpui engtia tih zel nge i tum? Hetiang tawp hian i kalpui reng dawn nge?" tiin Sawmtea chuan a lo zawt ve thung a, an ţawng duh hlawm bawk a, kan ţhiante an awm kim vek chang hi chuan sawi tur a hre ve vak ngai lo. 

"Ti hian inkhawl ve zel phawt ila, dawr ka hawng ang ka ti deuh a" inthlahrun hmel zetin a lo ti ban charh. 

"A ţha lutuk alawm. Dawr i hawn theih chuan nitin i hralh ve reng ang a, i inkhawl ngah hunah dawr iti lian leh ang a, Pathian zarah hma i sawn ve zel mai ang" Sawmtea bawk chuan a lo ti dam leh duam. 

"Beisei ve phawt i la, hmasawnna a awm ve zel turah ngai ang" Dinpuia'n a tih lai mekin "A thur zia chu kezungpui thlengin a tho awt vek mai lawm" ti a ring leng lawng a Rina ţawng ri kan hriat chuan a dinna lam kan hawi phei ţhap. A kut lehlamin limbu a keng a, lehlam a chemte kengin biang thep vek hmui kawh luau siin a dingdihlip ut ut. Lu thing nawkin a tep chuap a, "A thur rum rut" uar zet hian a ti leh a, sawi belh tur a hriat hnem leh dawn em vangin ngawih kan chuh tlat. Chuti chung chuan "Ei ve chhin ru, in mithmul thleng khan an phar darh vek mai ang" a la ti hram a, Siami pek ve a tum a a lo duh lo nasa. 

Chawhmeh an rawn keng ve tawh ting tang bawk nen, rawngbawl chawp chuk chukin chaw kan eikhawm a, kan hlim tlang dar dar hle. Mahni tawk a buaina nei vek ţhin ni mah ila kan inpui tawn zel a, Kimkimi leh Dinpuia thlengin an thil siam kan zawrh sak lawp lawp bawk a, inpui tawn thei a kan la awm hi a lawmawm mah zawk. Chan chhiat lai nei ţhin mah ila min ţawiawm tlat tu kan neih reng chuan huai takin kan hmachhawn a, kan kut an chelh tlat a, kan paltlang thei ţhin. 

Thawhţan tlaiah keipawh Dinpuia in a kal kawi tawh lovin ka awm na Kimkimi te inah ka haw tlang a, kawt lai a Fredy lo vei tawn sek chuan min hmuh rualin min rawn pan vat. Chiang zet a min melh khur chungin "Ka man che" a ti hmuk a, nidang a ang lo riau. 

"Eng ber maw?" hrethiam lo zetin ka lo ti ha. 

"U Siami te inah i riak lo, Kimkimi te inah i riak" ti a min chhuah chhal takah chuan ţawng zawi deuh turin ka lo ti vat. 

"Sunday zan a U Timothy-a leng haw ka hmuh khan a sawi alawm" a tih hnuah "Chhang thuhruk tur i lo hawn em?" a ti zawi sup. 

"Aw hawn e. Nu Rami pek tur a nia, tukin zing a pek tawh tur zawk a nia, mahse midang duh ve an awm vangin an siam daih lo a" ka ti zung zung. Chhang zawrh tur ka hawn chang hian a nu te hriat hlauin min thuhruk pui ţhin. In ngeih lo viau mahse unau na na na chu a pui ve turh turh zel. 

"Khawi rawn la rawh" a tih chuan tlan let lehin garage a lehkha khawng bawm ka dah chu ka pawm chhuak a, Tetea ka tawk chat lehnghal. Ani pawhin min lo en uluk khawp mai. 

"Eng nge kha kha?" ti a min zawh chuan ka zam em vangin chil ka lem khawlh a, dawt sawi mai dan tur ka hre lo hle. 

"Ka ar chaw chah a nih hi. Hetah lo chawi phei rawh U Didik" tiin Fredy chuan min rawn pui vat a, khawi a min thuhruk sak nge a tum ka hre lo. Garage ah reilo te ka dah ang a, ka haw thu midang ka hrilh hnuah pe turin ka chhuak leh ang ka ti kha a nia. 

Fredy min hruai na a lam a kal dawt dawt chungin ka hawi let zeuh zeuh a, Tetea chuan min lo thlir reng mahse engmah a sawi lo. Ka thil ken chu hria pawh ni se a sawi buai ka ring vak lo. Lan tir lo mahse Kimkimi hi a ngaihtuah takzet niin ka hria. 

"Khaw nge kan dah dawn?" ti a ka zawh chuan "Khawiahmah" a lo ti leh hmuk a, ka lungawi lo kher mai. 

"Nih leh ngati nge huan ah min luhpui? Chhang ka keng reng bawk si, a insawh na lamah a sawm vek ang a sin" ka ti vin ve hlak hlak. 

"Tetea khan min la en em?" ti a min zawh chuan ka hawi let lehin in lam ka thlir chho a, min en tawh loh thu ka hrilh hnuah a ding ve chauh. 

"Huan hian kawng a pawh a, Nu Rami te in kal awlsam na a nia. Dawrah ka kal zo chiah a, Nu Rami a awm lo. An inah kan pe mai dawn nia" tiin a hma a sawi theih reng min hrilhfiah ve chiah. 

"Ka haw thu i nu hrilh phawt ka duh a sin" ti bai bai mah ila min kal pui leh hmawk hmawk tho. 

A sawi ang ngeiin Nu Rami chu inah a lo awm a, Kimkimi chanchin min zawt luam. A ngaih zia te a sawi a, a fel thu te nen. Sawitur ngah viau mahse ka hmanhmawh deuh vangin haw ka rawt thuai a, a mawiah kawngkapui thleng min thlah ve. 

Huan aţang bawkin kan chho leh a, ar in kan kal pelh dawn lai a thawm an lo neih ţak ţak te chuan thinrim zetin a phun hluk hluk reng. In kan thlen chhoh veleh a luh nghal mai ka tum chu min lo ti ding leh a, a kekawr ipte aţangin pawisa a phawrh. A nawi ţha rapthlak lehnghal. 

"U Rintein tlawh a phal si lo a, naktuk ah hei hi Kimkimi lo pe rawh" tih pahin ka banrekah a vuan a, pawisa nawi ţha zet mai chu min hmeh bel nawk nawk. 

"A nei alawm. Chhang an hralh ve zel a, hman khawp a nei ve. I duhzawng lei nan hmang zawk rawh" tiin lo hnar tum mah ila lu a thing tlat. 

"Pawisa min pe ziah a, kha kha ka pawisa pai ţhin aţanga ka hman ban ho ka khawl a nia, pe ngei ngei rawh aw" ngen ngawl zet hian a ti a, ka khawngaih letling zawk. 

"Awle, i tih tlat chuan ka lo pe dawn nia, buaina a tawk lo a nia aw. Pawisa a rawn pai ziah a, thawmhnaw pawh tlem tlem nitin ka ken sak a, an ngaihsak duh loh vang hian hnual deuh mahse a hlim lutuk tho a nia" tiin a rilru nawm nan ka hrilh a, "I pawisa thawn hi a hmuh chuan a lawm ngawt ang" ka ti tel bawk. 

"U Dinpuia nen an inhau ngai em?" tiin min lo zawt leh khauh.

"Teuh lo mai, an inmil lutuk. I ngaihtuah lutuk anih kha an ngaihtuahawm miah lo a nia" ka ti a, rei min tih ka hlau tawh bawk a, din rei pui lovin inchhungah ka luh pui thuai. 

"I lo haw tawh ni maw Didik? I chau em?" tiin min hmuh rualin Kimkimi nu chuan min lo zawt a, ka chauh lo thu sawiin min hrilh angin inthlak turin inchung lamah ka chho nghal daih. 

Zanah Kimkimi pa a leng chhuak a, midang chu tv hmaah kan ţhu ţhap. Zan dang a a tih ziah danin a nu chuan "Kimkimi chu hrehawm a la ti lo a niang chu maw?" zawh bik pawh nei lo hian a ti leh a, a ngaihtuah ve hmel tho mai. 

"Thla khat leh tlem chauh an la awm dun a, hrehawm a ti ţep tawh ang. Koh ngai lovin amahin a rawn haw ve mai ang" tiin Rintein a lo chhang a, ani hi chuan eng vakah a ngaih hmel loh. 

"Ipa a awm lo bawk a sawi ta mai mai i la, nau a pai mai ang tih te ka hlau ţhin a, a la naupang si a, nau a ken palh vaih chuan a pawi lutuk ang. Kan ngaihven lo rei mah mah tawh deuh a ni" rilru hah hmel zetin a ti vang vang. 

"Chu te chu an thu thu lawm. Thu awih loh rah a ni tawh mai ang chu. Koh haw tumin keimahni ngei kan kal a, a lo haw duh tlat lo a, thiam lohna kan nei tawh lo. Tih theih zawng zawng kan ti vek tawh. Ka pa pawh a ngawih hmak tawh hi" Rintei chuan ram hmak hian a lo ti hmarh hmarh a, a unaunu a nia, a ruk tak chuan a ngaihtuahin a ngai ve tho ang. 

"Ipa hi a rilru a hah lutuk. Kohhran a hriattir mai a duh tawh rum rum a sin" a nu bawk chuan a lo ti leh. 

"Khalam kha chu in thu thu. Keichu a awm naah sawn ka kal tawh dawn lo reng reng. Zak deuhin kan haw a, a tlawm thlak lutuk" Rintein a tih laiin Tetea leh Fredy an lo nui chhuak hawk. Rintei chuan a melh ram ram a, min telh ve ang tih ka hlau kher mai. 

"Eng berin nge in nuih lo ti za bik a?" tiin cho zet hian a zawt a, ka bul a ţhu a ni bawk a, a nu thaw halh ri ka hre thei. 

Mipa pahnih chuan an chhang duh lem lo a, Fredy paw'n a nu a khawngaih thu a sawi ve ţhin. A inchhir ţan tawh niin a lang a, Rintei hian Dinpuia a duh loh em vangin a nu a fuih char char thung. A awm hran hnu phei hi chuan a chan chhiat zia hriain a iai lehzual a ni awm e. 

Mu tur a ka insiam vel mek laiin pindan kawngkhar a ri det det a, Fredy a nih ringin ka hawng thuai. Mahse pindan pawn lamah Tetea zawk a lo ding. 

"A damţha em?" ti a min zawh chuan a ngaihna ka hre lo viau. Ka awmdan a hmuh thiam takah chuan "Kimkimi" midang hriat hlauin zawi supin a lo ti leh. 

"E..aw dam ţha e. Vawiinah pawh kan inhmu a, a damţha lutuk" buk zeuh zeuh pah hian ka ti a, a ngaihtuah takzet ka tih tawh kha. 

"A ţhat chu..lo damţha zel rawh se, muttui aw" a tih liam puat hnuah a pindan lamah a kal a, Rintei rorel zat zat reng leh a pa ţawngchhuak duh miah lo hi a buaithlak ta ber a nih hi. 

Ka phone a rik rualin tukverhah ka dak a, Timothy-an a kut a lo vai lauh lauh. Ka hmu thei tih hrereng chung hian ka hmuh loh a hlau thei a nia aw. 

"I mut a chhuak tawh em?" ti a min rawn zawh chuan lu ka thing mat mat a, a chhuah loh thuin ka chhang.

"Kimkimi a awm leh tawh si lo a i mu thei ang maw?" tiin min ngaihtuah vang liau liauin min zawt leh. 

"Thei mai ang, ka mut theih loh tak leh ka rawn kai tho mai ang che" ka ti a, min ngaihtuah vang a zawhna tam tak min zawh te hian ka ning viau ţhin a,mahse tunah chuan ka ni tawh lo. Ngaihsak tu neih hlut zia ka hrechiang ve tial tial tawh. 

"Ka lo ngaichang ang che" a ti a, mu hma tur a min duh vangin kan inbe rei lo. 

Kimkimi lehkhabu inrem na chung ber a Bible chu ka en vang vang a, ka chhiar lohna chin ka hre tawh lo va, ka ţawngţai lohna a rei tawh bawk. Mahse zanin chu chhiar ka chak tlat a, Kimkimi'n ţhahnem ngai deuhin min hrilh ţhin a, eng emaw tal hmuh chhuah tumin ka chhiar ve ang ka ti a ni. 

Khum a bawk rem hmasa te te in Bible chu ka keu a, a lei kum a inziak vang a, a rei tawh ngaihtuahin a la thar khawp mai. Ka riah chang apiangin a chhiar ka hmu ţhin tho sia, a enkawl uluk viau aniang. Mihring chuan bawh chhiat chang kan nei ţhin a, Kimkimi hi engtin pawn awm se ka dem lo. Piangthar inti tam tak ai chuan a rilru a ţha ka tiin fel ka ti zawk tho tho. A hun tawnin a zir lo em a tin ni. 

Ka mut a chhuah rak thlengin ka chhiar a, ţawngţai ve ka tum a, ţhuchhuak kher lovin mit ka chhing tawp. Chham tur bik pawh hre lovin mangchhia ka neih tawh loh nan ka dil a, kum tam tak hnuah ka thlamuan theih nan ka lu zawn, ka delh chhiat phak loh si a Bible dahin ka mu ve. Ka dilna te kha min chhang ve tawh em ang chu. 

CONT...