THROUGH THICK AND THIN-26

THROUGH THICK AND THIN-26

KIMKIMI

Ka nu leh Fredy te nen in hmatawn in kan ţhu ran. Thla thum lai mai a liam leh meuh chuan insum zo lovin ka nu a rawn lang ta nge nge. 

"Rawn haw tawh rawh. Kan ngai lutuk tawh che a, Didiki pawh a khua a harin i awm loh vangin a inthlahrung dek reng a, ipa leh Tetea an intawng reng mai bawk si. Mahse ipa chu hlau duh suh, a ngaihtuah takzet che a, ţha deuh a kan sawi lai a i rawn haw duh loh vang khan koh leh che hi tlawmah a la a, a ruk tak chuan a ngai che tih ka hria" dam thluam hian a ti a, a hmel ngui tak te chu tih luih leh lemchan mai mai a ni lo. 

"Ka lo haw ang a chhuah inphal lo leh si ang e, ka pa in min khung beh reng a tum kha" tiin ka sawi ţhin bawk ka sawi leh. 

"Chutiang a ti lo ang. Rami hnen aţangin in chanchin ka hre fo a, ipa hnenah ka hrilh chhawng leh ţhin. Dinpuia pawh puitlin a tum tak tak niin a lang a" a tih hnuah a chawl det. A hriat phak leh phak loh chian tumin a thlek dek dek a, mahse Dinpuia chuan ka nu nen hun min pe in inchhungah a awm ve lo. Kan inhmu lo rei tawh em a, a hriat ve loh chi sawi tur kan ngah a ring ve a ni. 

"Tetea'n a hmuh dan min hrilh veleh zuk ţhin bawk a, Timothy-a nu leh pa te takngial paw'n enthla turin min râwn a, ţan i khawh tlatna hian chhan ţha tak a neih an ring. Kei ai pawhin midangin an lo hrechiang zawk daih che a nih chu" a ti chuai raih a, a rilru a hrehawm hmel takzet. Zu in a tihbuai nasat vangin Tetea nen hian min kuah tam lo a, Rintei chu a fal deuh bik ka tih tawh kha. Tlemin a ngaihsak deuh a, Tetea phei chu a buaipui thei lo hrim hrim niin ka piin min hrilh ţhin. Hei vang tak hian Timothy-a te inah ka tal tam a, Fredy-a a vannei chiah chiah. Ka nu in a zu in a sim ta hlauh a. Zu in tawh lo mahse nau ka neih tawh miau vangin buaipui loh pawlah ka ţang leh a, Timothy-a leh Tetea ka zui det det ţhin. Mipa ka zui ţhang bawk a an zia ka kai ni maiin ka hria, hmeichhia in a thunawi an neih ţhin ang te leh mi chanchin sawi neuh neuh an chin ţhin ang te hi ka ti ve ngai lo. Thil ho te ka la lungrun ve vak ngai lo bawk. 

"Keiman midang aiin ka hrechiang thung che alawm. Reh vang vang mah ula i rawn lan leh thuai ka ring reng a, i rilru hi chu a chhe lo ve alawm" tiin a nguai zualpui a reh theih nan ka fiam a, Fredy-an ţhen sakin mit min rawn siai zeuh a, a awmzia ka hre chuang der lo. 

"Kan rualin lo haw ve tawh rawh. Ipa leh Rintei te pawn engtinmah an ti tawh lo ang che. Dinpuia nen a in inkarah an tla zep tawh lo ang. I patea leh Dinpuia nu ngei pawh a ţul chuan keiman ka lo sawipui dawn nia" a ti leh phei chuan a thusawi chu mak ka tiin ka ngaithla dik lo emaw ka ti zawk hial. 

"Min thlem chhuah theih nan chauh a sawi i ni em?" ka ti ta tawp. A thusawi zawng zawng hi hman aţanga ka lo hriat tawh ni tho mahse ka nu ká aţang ngei a hriat chu a lawmawm rualin a awihawm loh bik.

"Ni lo e, ka ngaihtuah nasa ţhin a, nupa ni si lo va hetianga chen dun reng hi ţha ka ti lo. Chhungkua a awm khawm loh reng hi ţha ka ti lo bawk a, pasal in neih hunah loh theih loh a in awm hran ngai dawn mahse pasal inneih hma zawng chu ka bul a awm reng turin ka duh che u. Lehkhazir a hmun dang a in awm pawh ka phal ngai lo va, I u Rintei kha loh theih lohna vangin a awm hrang a, Tetea awm hran a ngai veleh a, chuvang chuan nang tal chu lehkha i zir chhung na na na chuan ka bulah awm rawh" a ti leh dap dap. Nidang angin min vin pung pung tawh lo va, a thusawi leh ţawngkam te pawh ngaihthlak a nuam sawt kher mai. 

"Ka pa chuan engtinmah min ti dawn lo tih i chiang takzet maw? I sawi loh ang a in awm chuan ka chhuak ru leh tho ang a, min ko mahla ka lo haw tawh dawn miah lo a nia" tiin ka vau ve. 

"Dawn lo e, a be ţha lo che anih pawhin a dodal lo ang che. Ipa thu hmu lo chuan Rintein engmah a ti dawn lo bawk a, hlauhna nei miah lovin lo haw tawp rawh. Buaina i tawk tawh hauh lo ang" ti a min thlem leh hnu chuan ka ngaihtuah zui ve vang vang a, innei miah lo va awmdun reng chu ţha ka ti bik lo. Bakah min dodal tlat lai pawh khan tih tau in tlanchhuahsan mah ila an vaiin ka ngai ve tho ţhin. 

"Dinpuia a lo leng thei tawh ang tiraw?" ti a ka zawh leh chuan lo nui ve hakin a bu zui nghat nghat a, ka nu in min ţan tlat chuan ka pa pawh a lungawi chhawm maiin ka ring. 

"Nih chuan ka va insiam ang a, min hawsan phawt ula, Dinpuia ka hrilh ve hnuah ka lo haw ang" ka ti a, zak lo ka inti ve tho. Mahse an hmuh lai reng a sawidun pui kha nuam ka ti lo zawk. Dil hmasa miah lovin a inah ka awm ve tawp a, ka haw hma a hrilhfiah ka ba ve hrim hrim bawk. 

"Ka lo haw loh i hlauh chuan duh leh ka thawmhnaw in hawn tel dawn nia" ti a ka hrilh leh hnuah keimah a ka mutna ţhin pindan lam ka pan a, Didiki rawn riah hnu kha chuan keimahin ka riak leh ta lo. Fredy-a min zuiin khum a ţhu chung a thawmhnaw ka thleh ţhat mawlh mawlh lai pawhin ka bulah a awm ve reng. 

"Kha hei hi la la bag ah khan lo thun rawh" ti a hrilhin ka thawmhnaw thleh sa ka pe a, panga vel ka dah thuah bawk a kut pakhat a la lovin chung lam leh hnuai lamah a lo dawm a, a kut châng pem leh duk thluah ka hmu chiah. Thawmhnaw a dahţhat hma hmain a banrekah ka vuan vut a, ka chet ran em vangin a thawmhnaw ken sa pawh chhuatah a thlauh phah nghe nghe. 

"Eng nge i hriat a?" tih bui bui pahin a kut lak let a tum a, lo dawm nghet sauhin ka mal chungah ka dah a, ka enchiang chiah chu ka hmuh sual mai mai loh zia a lang nghal. A kut châng a duk phei riai a, a pem thluah a, tun hnai te a mi chu a ni lo ang. A ban a ka dawmna ka thlah rualin a sana bunlai hmai lo keh nasa lutuk pawh ka hmu chiah. 

"I insual em ni?" tiin dam duamin ka zawt a, ka vin nghal pung pung chuan a sawi duh dawn miah lo tih ka hria. 

"Aw" tih ringawt a min chhangin a sawi fiah zui duh miah lo lehnghal.

"Engtik aţangin nge i chin? I mit ko te kha a pem em ni?" ti a zawh pahin a biangah ka dawm a, ka kut awl lamin ka endik sawk sawk a, min hnial lo ve khiah. Mahse insual na vang a pilh a lo ni hlauh a, a lo verh ve zawk a nih hmel. Langsar tak a beh ngam si lovin a khamphei chi langsar vak loin a hawlh tlang a, beng a verh ţum ai khan ka thin a rim zawk. 

"Engvang i mit ko verh nge i nih a mawla? Nang lehzel chuan chhungte mit ti kham mah ta che. I kut te hi ka nu ten an hmu em?" ti a vin zet a zawh pahin a kut ka paih dawn a, ngawi rengin thawmhnaw tla chhar turin a kun. 

"I thil beh kha phawi la ti ping lehnghal ang che" ka ti chhum hmuk a, tawi te a hawlh tlang ringawt anih vangin a langsar lo va, midang hmuh a hlau tihna a ni mai. Keipawn a rawn thlen hlim khan ka lo hmu lo hrim hrim a, ka enchiang a ka hre ve chiah. 

"Hei hi khawiah maw ka dah dawn?" a tih chuan bag ka kawk a, a hmel pawh ka enţha peih lo ka thinrim ţun tawh. 

"Didiki vang em ni khatiang kha itih a? Hmeichhia vang a buai rual ila nih loh kha. I upa zel ang a, i rualpui deuh anih loh pawn nang aia naupang ila tawng mai dawn alawm. Nang aia upa i duh leh an awm veleh zel mai dawn a, bialpa a neih vangin i inverh thluah tihna mi?" ka ti leh zat zat. Ka ngawi liam mai mai thei thlawt lo. Ani lehzel pangai lo deuh a a awm ka phal lo. A rilru a la thianghlim a, a la naupang hle bawk. Hetiang a taksa ti danglam rual hi a la ni lo hrim hrim. 

"Nalh iti lo mi?" ti a nui ruh ruh chung a min zawh lai chuan ka kawr ken laiin ka vawm a, ka hmazawn a a din tawh vangin vawm fuh a har hle. Vawm natna tham ka keng lo hlauh thung. 

"A nalh hlawl lo, Didiki pawh khatiang thil khan a mit a la lo tawp ang" ka ti hmarh hmarh a, lo nui hawkin "Didiki vang a ni lo. Nalh ka tih vang a nih hi. Hmeichhia vang mai mai a ka danglam chiam ring kher lo la" a ti ve ngei. Min rawn hnaihin ka vawmna kawr kha min khumtir a, na lo te te a vawi thum vel ka chhip a ben leh det det hnuah bag khaiin a chhuak zui daih. Ka awm loh chhung lek khan a lo inti tlangval ve ţan tihna em maw ni dawn le? 

Kawtlai a ka nu leh Dinpuia hlim hmel tak a an lo ti ti chu hmuh a nuam ngei mai. Tibuai duh rih lo in Fredy pawh kawngkhar bulah a lo la tawi khawmuang a, "Lokal rawh thei tui ka siam sak ang che" ti hlakin choka ah ka phei nghal nul nul. Hau chiam mah ila min rawn zui veleh tho a, "Bag kha lo dahţha rawh aw, Dinpuia bag ka hmang hawh a, ka nu in a dahţhat chuan a dahna a hre lo leh palh ang" ti a thupek zat zat pahin fridge ka hawng. 

"Hruai leh Puia nen a nia" thei tui ka thlit chhuah lai a ring vak lo a a lo tih ve sup takah chuan ka leh hawi thuai.

"Ngati nge chu chu?" ka ti he haw a, kan veng a mi te an nia, Bawiha te nen hian an inrual khat. 

"I awm loh an hria a" a tih hnuah kun ngul chungin "An nuihzat che a" a ti leh sup. 

"Chuan i sawisa ta mai tihna maw?" ti a phawk hra a ka lo zawh leh chuan "Aw" tih chiah bawkin min chhang. 

Dawhkan a no ka dah hnuah chair pawt hnaiin a bulah ka ţhu ve a, dawhkan bawh meuh a ka enreng takah chuan muangchang a rawn hawiin min rawn en let ve ngam tawh. Lo nui nghal ver ver chung hian "An pahnih chuan i sual rawn tihna em ni?" ka ti leh a, a bu leh nghut. 

"Khatiang kha a thleng dawn tih ka hre vek alawm. Miin min sawi zui nasa ang a, min nuihzat dawn tih ka hre sa vek. Nuihzat theihin ka awm miau a, min sawichhia a fiamthu thawh nan a min hmang anih pawn haw thei kan ni hleinem. I kut lo kha hliam dang i nei em?" tiin nem deuh zawkin ka zawt leh. Tshirt nghawng zau ve tak a ha bawk a, phelh buai lovin a dar lang thei turin a tshirt nghawng chu a darah a pawt liam a, hnunglam deuhah hian duk a lo awm leh. Chik zet a ka en laiin "Puia ka sawisak laiin Hruaia'n min vua a, hliam dang ka nei lo, ka hnar a thi a, ka hmui a pilh deuh bawk a mahse a dam tawh" ti a min hrilh hnuah hmui a pet zeuh a, a dam tawh tak tak a nih hmel. 

"Ka nuten an hria em?" ti a ka zawh leh chuan lu thin pahin "Hre lo zan reiah a nia, kan len haw lamah" a ti a, game pakhat a atchilh bur kha a bei leh chiam tawh ang a, tu te inah emaw ni ber an khel ho leh tawh a nih ka ring. 

"An lo mu vek tawh mi?" tiin chik zetin ka zawt. Keimah vang a insual a ni bawk a ka dilchhut hle. 

"Tetea'n min lo nghak. Ka insual chhan min zawt a, min hau lo. Ka nu te a hrilh lo a niang engmah an la sawi si lo a" a ti a, a insual ve duh ka lo ring ngai lo hrim hrim a, keimah vang a a tih ngai miah lo a ti ve ta chu ka inthiam lo kher mai. 

"Nih leh i mit kha? Engvangin nge khalai daih daih kha i verh?" tih pahin a banah ka beng chawrh a, "A nalh ka tih vang ka tih kha. I mit a nih loh hi ngawi mai mai rawh" tiin min lo khap. A nin hmel em em mai lehnghal a, khanglang hian. 

"Min zui ţhin laiin nalh iti ngai reng reng hleinem. Kum khat em pawh ka bo lo va, khatiang te nalh lo tih hman" ka ti zui nang nang.

"Mahni chiah in inngaihtuah vek a, dik leh ţha tawk in inti vek bawk a, in tihdan ka zir ve a nih hi" ti a min chhan hnuah ka thei tui chhawp sak a in zo nghal vek a, "Kan dik lo vek i tihna mi?" ka lo ti ve thuai. 

"In dikna zawngin in buai tlang lutuk a ka piancham in hre lo vek bawk a, result a chhuak a, ti ţha zual zingah ka tel ve. Ka pa a lawm zo tawh lo, board hmachhawn tur i nia, ţang lehzual rawh a tia, a thutiam a theihnghilh vek tawh. Nangpawh kar hmasa khan whatsapp ah ka rawn hrilh che kha" tiin a lawm lohna a phun pui ve sup sup. Message ka hmu lo va, result a chhuak tih ka hre lo hrim hrim. Didiki takngial pawhin engmah min hrilh lo. A tih ţhat duh chuan a rilru a chakin a thiam zung zung a, ti ţha pawl a ni ve ziah. A piancham ka theihnghilh sak erawh inthiam chawp ngaihna ka hre lo. 

"Ka tihpalh liau liau a nih chu. Ka lo haw veleh thil ţha deuh ka lei sak ang che. I result chu message ka hmu lo hrim hrim, ka---" ka tih lai mekin "I hmu reng nang i en hleinem" a lo ti a, sawi zawhna hun takngial pawh min siam lo. Ka ngaipawimawh lo ah a ngai ang tih ka hlau khawp mai. 

Ka nu in a rawn koh lauh lauh takah chuan "Lo haw vat rawh aw kan ngai tawh che" ţha deuhin a ti leh ang lawi a, lo theihnghilh pawh ni ila midang tal chuan hriat sak se ţha tur. Naupang ber a nihna hi kawng tam takah a lang ve ţhin a, ka pa pawh khan kum tawp la ni lo mahse a pass phawt chuan eng emaw leisak a tiam a, eng ber nge leisak a tum kha ka hre ve tawh lo. 

"Engtikah nge i haw ang?" ti a min kuah pah a min zawh chuan "Chawhnu lamah a ni mai" ka lo ti thuai. Amah chiah a awmtir leh rek rek chu ka khawngaih angreng. 

"Awle hman veleh ka lo leng ang. Thawmhnaw i hawn kim tir vek em?" a ti leh a, ka haw tur chu huphurh ang pawn a awm lo. 

"Aih tlem ka la dah. A vaia an hawn vek chuan Didiki'n min pe ru ţhin tih an hriat ka hlau sia, ka rawn kal reng dawn tho a, a dang ho khi chu nidangah a ni tawh mai" ka lo ti awlsam at. 

"I tih dan dan, ipa lungawi phawt se la lokal leh chauh rawh. Inu ber a lungawi tawh chuan tih lungawi ve a har lo ang" a tih chuan inla hrangin khumah ka ţhu hnawk a, "Ka pa te zawng a luhlul emai. Ka awmdan kha a haw dawn ropui sia, engtinmah min ti tawh lo mahse a lungawi mai mai chuang lo ang. Ka hawsan che a nih pawhin pui tur che in ka awm reng dawn tho a nia aw" melh chho ha chung hian ka ti a, ka hnem na avang chuan nui sukin ka bulah a rawn ţhu ve. 

"Awmpui ka nei dawn a min ngaihtuah vak duh suh" ti a min lo chhan chuan mak ti zet hian ka lo en a, ka hriatthiam loh zia a hmuhin "Kan in a awm ţhin a nia, a la upa vak lo. Mipa a ni bawk a, kei ai mahin a thiam zawk" tiin min hrilhfiah a, muangchangin ka lo bu nghat nghat. 

"Min hrilh ve vat ţhin tur che a nia, ka lo ngaihtuah hman lutuk che lawm. Hlawh neiin mi i awmpui dawn? Pawisa lut a la tam loh em hi" ti a ka zawh chuan "Ka ba dawn" a lo ti liam puat a, mak ti zet hian "Awmpui hlawh i ba dawn maw?" ka ti leh hluai. 

"Ka uang a nih kha, lo awih vek zel suh" nui hawk chung hian a ti a, "Anih chuan engtin nge?" ka lo ti leh thuai.

"Ka nu in a rawn tir dawn a ni awm e. A â thut a ni maithei" fiamthu hian a ti leh a, "In luah man ila chawi dawn tho em?" tiin ka lo zawt ve thung. 

"Aw, a tih tawp hma chu chawi char char ang" 

"Awmpui tur pawh a pek phal che chuan ngati nge in luah man a la chawi tir tho che?" ti a ka zawh chuan "A â thut a ni maithei ka tih kha. Min la hrem duh te pawh aniang" a ti nawi ta vel mai mai. 

"Engpawh chu ni se awmpui tur i neih dawn chuan a lawmawm tawh hrim hrim a nih chu. Kei ai chuan a ţangkai zawk dawn hrim hrim a" ka ti veleh mai a, hawsan dawn mah ila rilru a nuam deuh tawh ang chu. 

"I ţangkai ber i awm loh chuan a reh ruai ang" a tih veleh "Min ngai dawn ni maw?" ka lo ti vat. Fiamthu a min chhan ka rin laiin "Aw ngai ang. Ka ngai viau ang che" thutak zet hian a ti ta zawk a, kan awmdun tamin zanah pawh a bulah hlir ka mu tawh a, kei tak hian ka ngai dawn. 

"Ka rawn kal ziah dawn nia, min ngai hman lo lekin ka siam ang che. Min ning zawk viau maithei ni" ka ti a, ka chhuah theih leh lek phei chuan duh ang takin ka pui thei tawh ang. 

"Ning lo e i chhungten an phal phawt chuan i lokal ziah dawn nia, an phal lo chung chu ti lui lo la" tiin min chah ve thlap. 

"Ka nu in a sawi vek tawh kha, an phal em em ang. Harsa dawn mahse ka pa pawh tih lungawi ka lo tum ve ang a, hun ţha a awm ve zel mai ang" ka lo ti veleh a. 

Ka haw tur pawh kawt lai thlengin min thlah a, min zui a duh viau na a min zui lo mai turin ka hrilh. A rawn lut ngam rih dawn chuang lo a hrehawm ka ti mai mai. Ka nu ka be lawk vek tawh a, kawt laia min lo hmuak turin ka hrilh a, chawlh a ni bawk a in a an awm ţhap ka ring. 

Ka nu in min lo hmuakin inchhungah min luh pui a, ka pa chu awm reng mahse min be lo. U Rintei ka hmu lo thung. Didikin min lo nuih ver ver a, hmuh a nuam khawp mai. 

"Ipa te ţhian ho inrawt phur chawpin chaw an eikhawm ve ngei dawn a, a kal hmain thingpui han lum lawk teh" ka nu chuan a ti a, sawi buai miah lovin choka ah ka kal nghal nal nal. 

"Khai aw..fanu tlanbo a lo haw a nih hi" Tetea aw ka hriat veleh nui hak chungin ka inher a, ka dinna bul a rawn thlen veleh uangthuang zetin ka lo kuah thuak a, ka thlah leh vat. 

"Min rawn tlawh ve ţhin tur che alawm. Ngaihţhatthlak loh khawpin i reh tel ve vang vang a" ti a ka lo vui nghal zat te chuan a nuih a ti za khawp mai. 

"Ka buai deuh a, i awmna lam te? Eng nge a an?" ti a min zawtin ka bulah a rawn ding ve a, ka thingpui chhuan ri ser ser tawh ngaipawimawh lo fe in report ka pe zung zung. A zawng zawng erawh chuan ka sawi duh lem lo a, a ngaihthla uluk khawp mai. 

"Thingpui ka siam lawk ang a kan sawi zawm leh dawn nia" phur tak a tiin hmanhmawh deuhin ka siam nghal zung zung a, Tetea pawh ka siam kep. Midang ka pek hmain kitchen island ah ka dahsak hmasa phawt a, ka nu leh pa te pe ve turin ka kal zui nghal a. Ka pa chuan min lo la be miah lo mahse min hua angin a awm tawh lo va, thinrim hmel a pu tawh lo. 

Choka ka luh leh chuan Tetea pawh thingpui no dawmin a lo ţhu vang tawh a, sawi tur ka ngah bawk a a ep chiahah ka ţhu ve sawt sawt. 

"A zia ve tawh lutuk a, a tirah khan beidawng hman viau mah ila ţhiante puihna zarah hralhna tur a awm ve zel. Pathian leh ţhiante vang liau liau" ka ti a, naupanlaiin inhau ve nasa viau ţhin mah ila kan upat hnu hi chuan hetianga inhawng tak a ti ti dun chang hi kan nei veleh zeuh ţhin.

Eng eng emaw ho te te sawiin ka ţawng zat zat reng a, zawhna min zawt lem lo mahse uluk deuhin a ngaithla zel. No ruak chawiin ka nu a rawn lut ve a, ka pa a kal tawh thu a sawi rualin rawngbawl turin min hrilh zui zat. 

"Taka Fredy-a piancham in theihnghilh pek em ni? A vui nasa teh a nia" tiin ka nu leh Tetea ka zawt a, ka nu chuan "Aw a zia lo tak tak a ni. Ni hnih vel a ral hnuah kan hrechhuak a, a lungawi lo khawp mai" a lo ti ve a, Tetea paw'n a inthiam loh thu bak sawi tur a nei bik lo. 

"Keimah vang em ni?" ti a ka zawh leh chuan a nih loh thu sawi leh vat mahse keimah vangah ka ngai tho tho. Didiki hmun phiah nen a a rawn luh tak vangin ka sawi zawm duh ta lo. Boruak rit deuh ka siam leh chuan nuam lo a lo tih ve ka hlau a ni. 

"A hrehawm deuh tawh a ni maw?" ring leng lawngin U Rintein a rawn ti lut a, a la inchei emai a rawn thleng ve chiah a nih ka ring. 

"Hrehawm nang aw..ka nu in min lo hruai a" ka lo ti ve ngat. Tui intur filter a a dawh zawh hnuah chaw ei dawhkan rinchhanin min hmachhawn zawngin a ding a, "Fak tu neuh neuh a lo nei ve ta sia, tak takah ngaiin a rawn kal a nih dawn chu" a ti deuh kher. Nu leh pa zah lo tiin min hau fo a, kei aiin a zah lo daih zawk. 

"Tak tak a ni miau sia lawm. I ţhiannu nau in hmeichhia nen a an thlalak a hmuh tir nual vang mai che khan a lerh tihna a ni lo. Eng nge i lo duh loh ve em em a?" pawr zet hian ka ti a, ka pa a awm lo bawk a ka ţawng huai leh ta khawp mai. 

"A nu in pasal a neih lai rengin a pai a, a pasal fa pawh ni lo pai chung a mo ang a a la awm reng ngam te kha a zak lo hrim hrim. Hetiang hi chuan an nu emaw an pa te an chhun duh a, a nu leh pa te nupui pasal nei reng chung a rinawm lo, uire duh ve ve an nia, chhun tur a nei ţha e. I pasal ni reng chungin sawn a thlak deuh reng mai ang" ngeiawm zet a nui chung a a tih chuan "Khavang kha a nia bialpa tur takngial pawh i hmuh zawh loh" ka lo ti ve thuai. 

"Nu leh pa berin an pawm tawh a hnu, eng nge i lo la buai ve chiam?" Tetea'n ka thlavang hauh nan a lo ti ve bawk. 

"Lo inrawlh ve ziah suh Zorinsang, kan in hi duh duh hun a chhuahsan a duh duh hun a luh lehna tur a ni lo. Inchhirna leh zah derna a nei miah lo lehnghal. Hmeichhe lepchiah kan sawi ţhin ang chiahin a lawm a awm. Ka nau a nia, a ţhatna tur duhin ka hau a ni mai" Rintei chuan a ti leh salh salh a, chhan let duh viau mah ila Tetea'n mitmeiin min lo khap. 

"Insum ve ţhin teh ka nu a awm ve reng hi" Tetea bawk chuan ti leh mahse "Ka insum nachhan tur ka hre lo. Khapa hmaah khan zah lo lutukin min ţawngkhum lehnghal. Fel ber awm ang zia zang hian min lo khap ve ziah suh. Hauh ngai lo se tuman kan hau tawp nang. Mi fel ber ang hian i awm a, nau te thil sual ti an ţan hlur ngai lo. Thil sual ţan tlat hi felna lantirna a ni lo. Lalrinkimi awmdan vang a ka thinrimna hi a reh thei thlawt lo, lo ţan ve tawh hlek suh" Rintei chuan a ti hlak hlak a, inthiarfihlim tumin Tetea a tho ta nge nge a, "I va han ţawngthei zit zet tak. Hmeichhia chu ni lo la kut ka thlak na che a rei tawh ang" vin miah lova a tih hnuah a kal nghal mai a, mahse Rintein "I duh leh kut min thlak la, i ngam phawt chuan kut min thlak rawh. Ka lungawi lohna anchhuahpui ve chu a pawi viau em ni? Eng ber nge i lo ngaihtheih loh ve viau a? Kut min thlak chakna a rei tawh anih te chuan tunah ti ta che" vin zet a a tih tuar tuar chu a hre pha ni ngei tur a ni Tetea chu rawn letin U Rintei dinna lamah chuan a pen phei hmawk hmawk a, a kawr awmah ţhamin hnek mai tumin a tin uai hman. Ka nu lo rak ţhat lo se la chuan kut a thlak hman ngei ngei ang. 

"Ţawng tawh lo turin ka hrilh che kha" a ti vawt raih a, ka nu bawk lo inrawlh leh vatin ka ute pahnih chu a va hnaih thuai. 

"Duhtawk tawh rawh u, Rinte nang paw'n sawi chhuak reng tawh lo la, i thinrimna kha zawi zawiin a reh mai ang. Tete i u kha thlah vat rawh, a zathlak emai miin in thawm an lo hre reu reu ang e" ka nu chuan mangang takin a ti mawlh mawlh a, Tetea zawk a pawt pah reng bawk. 

"Ţawngkam duh tui ve tawh ang che.Nu leh pa an la awm chhung chu Kimkimi chungchangah lo buai ve tawh suh. Upa ber mahla ka nin tawpah chuan kut ka thlak hreh lo che. Tun hi a tawpna ni rawh se" ti a a vau khur khur hnuah nam nawk pahin a thlah a, U Rintei tlu tur chu hnung lamah dawhkanah a in nem khalh rawk rawk a, ka nu in a lo vuan vat bawk. 

"Nau mipa pahnih i nei sia, an dawhtheihna enchhin lo turin ka hrilh fo che kha. An thinrim tawp a thlen chuan mipa phei chu tharum ah kan hneh lo nasa si, awm lo ila chu kut a thlak ngei dawn che a nih kha. A thiam loh naah a ti let ngai miah lo che a, a thiam naah chuan nawr luiin cho ar ar tawh reng reng suh" ka nu chuan a ti dam thluam a, Tetea zawk phei chu U Rintei a thlah hnu khan a chhuak nghal daih. 

"Buaina i thlen nasat zia hi inhre rawh" ti ram hmakin U Rintei chu thinrim zetin a chhuak a, a la hlauthawng lutuk chu ka khawngaih letling zawk. 

Didiki nen rawng kan bawl dun a, tukverh kan hawng lo bawk nen Fredy a rawn lut lah chu ka hmaah a rawn ţhu tharh a, a rim a danglam ngei mai. Min ngaihven lem lo in phone a khawih mawlh mawlh a, "Thingpui i duh em?" ti a ka zawh chuan min rawn melh zawkin lu a thing a, phone a khawih lehnghal. Min melh rei lo viau mahse a mit sen ram leh mit vun chhan tap te kha ka hmu hman vek, ka hmaa a rawn ţhut aţang khan weed rim ka hre tawh a, Timothy-an a zuk ve ţhin vang khan a rim ka hre thei lutuk. 

"Vawiinah tu nge i kawm?" ti a ka zawh chuan "Mawitea a rawn leng a, tunah khan a haw chiah. Inchungah kan awm a" tiin ţha deuhin min lo chhang a, "I rui em ni?" Didiki hriat hlau zet a ka tih chuan en pawh min en lovin muangchangin lu a thing. Mawitea nen hian an inkawm nasa hle a, anni hi mi tih ang ti ve chakin an lo zu ru ve a ni ngei ngei ang. Zu an in ve chhin ţum pawn a buai vak tawh kha. Mi tih ang tih ve chhin chak hunlai a ni a, a buai zel ka hlau khawp mai. Ruihhlo hi chu tihchhin loh a lo him ber a nih hi. A harh fim hunah ka hau hrep ang ti rilru rauh rauhin engmah ka zawt zui ta lo. 

Zanah Dinpuia nen mut hmain kan inbia a, min ngaih thu a sawi ve nasa mai. Inchhung a thil thleng te kha hrilh duh lovin a a ţha vek tiin ka sawi a, rawn hmu ve hek lo le, ka sawi zawng zawng a vaiin a awih em em vek. U Rintei chu tih dan dan a la awm a, ka nu leh paten an sawi nawi tawh lo chu ka hlim hle. Min hau nasa ber ţhin tu ka nu ngeiin ka thlavang a hauh ve tawh a, a sawi ang khan ka awm hlat a phal rih lo a ni ngei ang. Kan tuar chhuak ve tawh dawn niin a lang. 

CONT...(Naktuk zanah hei hi a tawp ang aw)