THROUGH THICK AND THIN- EPILOGUE

THROUGHT THICK AND THIN

.

EPILOGUE

"Min chei nasa mah mah i ti ve em? Min hnaih chhah lutuk a ka vual vekin ka hria" ti nang nang chungin Didiki lam ka hawi a, ani pawh an chei nasa ve tho mahse kei aiin a inhmeh ka ti daih zawk. 

"Nasat vak loh hi. Thlalak lai a lan nalh te a ngai ve lawm. Keichu a tawk chiah ka ti" a lo ti sam et. 

Ni e, vawiin hi ka pasal neih ni a ni der tawh. Ka rai thu khan a deng na hlawm hle a, veng chhungah ka lar hluai. "A rai har zawk ngawt alawm" min ti tawk te an awm a, min lawmpui tu an tam rualin sawisel tu ka ngah. Ka nu in min la ui viau na a nunna thei ţhang zel thei ka pai vung tawh vangin min ui lui ngam lo. 

Dinpuia ka hrilh tirh khan a lawm lutukin luhai vek khawpin min theh vir a, min neih chak reng reng a khawsa a ni bawk a palai hmel kan hmu har lo. Ka chhungte lam pawhin tum vuau chungin aw an pawh thei hram a, inneih ni a nalh ka duh ve miau vangin ka pum len hmain inneih ni tur an ruat nghal zung zung. 

Ka huphurh takzet a, ka mood a inthlak chhen mai bawk nen, ka tawrhhlelhawm rih viau ang. Vawiin phei chu ka huphurh lehzual, ţawng ring ngam dawn lo mah ila pastor hriat tham a ka ţawng chhuah hram theih nan ka inzir lawk nasa hle a, Rintei puihna ka ngen ngam miau loh vangin ka nuţa te pahnih pastor ah an inţan chhawk zak zak, ka chet sual a, ka mawi loh an hlau ve a ni. Min tihpui nasa ţhin hle a, ka phun chiar ber lai pawn an dawhthei viau zel. 

Kan kal hma a ka chhungte ka hmuh chuan ka nu in "Tinge heti tak mai a an chei che? I chhe per pur lutuk, hun lo deuh a pasal neih i tum a, inchei takngial pawh ila inhmeh ve tak tak si lo" a ti mawlh mawlh a, kan boruak a ţhat leh hnu kha chuan kan awm dun nasa lehzual bawk a min ngai khawp mai. 

"A ti mai mai a nih kha. I inhmeh a, i mawi takzet" Tetea'n a lo ti ve thuai. Ka dar lehlam lehlam ah a dawm a, reilote hnuah a kut dah thla in ka darah bawk min dawm leh a, chutiang chuan vawi tam tak a ti nawn. 

"Ka pasal neih hnu lawk a i awm bo ve daih dawn vangin min ngai zual a ni maw?" tiin ka lo fiam a, UPSC exam tur a inbuatsaih nan coaching kal ve a tum a, a kal tumna hmun Mizoram chhung a nih loh miau vangin ka nu pawhin a huphurh hle. Ani lahin a tum nghet bur tawh si a, dan buai kan tum lo law law. 

Ka fiam duh dan avang chuan lo nui sukin "I fa te ka man ka man loh nan i enkawl ţhat viau a ngai ang" inringtawk tak hian a ti a, ka sawi theihnghilh tak e. IAS nih a chak hle ţhin a, mahse IPS lam a áwn leh thut a, engtik aţang khan nge police nih a chak tuman kan hriatpui lo. Ani hi chu a rilru put hmang te sawichhuak lova up bet chi a ni ve hrim hrim a, kan thusawi a ngaithla tawp a, sawi tur vak a nei ve ngai lo thung. 

A duh dan ka pa a hrilh lai khan mak ka ti ţheuh a, a thil tum chhuan chhan a nei a nih ringin tuman kan sawi buai lo. Eng kawngah pawh kal se ţha deuh a hna a thawh a a hlawhtlin ngei kan ring vek a, a sawi apiang kan pawm pui mai. 

Midang an kal kiang tawh a, keini pawh kan kal a hun tawh. 

"Lungngai reng reng suh, ka fa te station ah i hmu miah lo ang" uangthuang fe hian ka ti a, ka hmanhmawh tawh zia hriain ka dar a vawnna a thlah a "Kal tawh rawh le" a tih hnuah thuawih takin ka kal ve nghal mai. Didiki'n min zui lo tih hria in ka hawi let a, Tetea nen a an awmdan ka hmuh chuan ka phawk ve hra mai. 

Tetea chuan Didiki banrek a vuanin eng emaw a sawi a, a ţawng zawih em vang leh anmahni hnaih a ka awm tawh loh vangin eng nge a sawi ka hre thei lo. Tetea a ţawng zawh hnu chuan Didiki'n lu a thing a, ka en reng a ni tih an hre lo nge min rawn ngaihven lem lo. Tetea'n Didiki biang a dawm a a mittui hruk sak ni awm tak a a kut a chet chuan ka ţhiannu chu a ţap ni ah ka ngai a, ka hrethiam lo hle mai. Hun kan ngah tawh lo va, ka nu in min rawn ko ţep tawh maithei. Mahse chutiang a ni chung chuan ka unaupa leh ka ţhiannu chu hmanhmawh awm pawn an awm ve lo. Tetea zawk chuan hneh zetin kan chhuah takna pindanah khan a pawt lut a, midangin thawm an rawn neih hmain an pahnih tan a chhuanlam siam sak turin inhnuai ah ka chhuk thuai thuai. 

"An inpeih vek tawh. Khaw nge Didiki?" ka nu in a lo ti lang lang a, rin lawk ang chiah a ni. 

"Theihnghilh a nei a, a let leh lawk a nih kha. A rawn kal thuai ang" ka ti a, ka ţang ţeuh reng a, an rawn lan hun ka nghahhlehna chuan min awm hle hle tir thei lo. 

"Khaw nge Rinhlui hi?" tiin Fredy pawn a ţhiannu a rawn zawng ve a, ka hriat loh thu a ka chhan hnu a kal mai a tum chu lo man betin a mitah ka en a, a lo sen leh ram tawh. Amah ka hnaih lehzual a, ka hnim vut vut lai chuan "Eng nge maw i tih le?" ti vin hrawkin ka hnimna lai a beng fai a, min melh no lo angreng hle. 

"I rui chiang mai" lungawi lo zet a ka tih laiin "Khaw nge Rinhlui?" tiin min lo zawt leh daih. 

"Ka hre lo ka tih mawlh mawlh kha" ka ti vin hlar a, "Thinchhe zit zet si" ti hlukin pawnah a chhuak leh a, min uina a tihdan ve danah ka ngai mai a, ka lenna apianga ka hruai kual ţhin leh duh duh naa kan tirh kawi ţhin kha a ni tawh lo tih ka hre mai. Ka nau, kan duat ve em em ţhin pawh a danglam tawh lutuk, a chhe lamin a ni lehnghal. Pawi sak a nei tawh lo va, kan hauh ve lahin keini ai mahin a pawr zawk a, Didiki vang a ni lo tih ka hria, khawvel thil leh ruihhlo in a thlak danglam ni ah ka ngai. 

"Kim, an nghak reng tawh cheu nia, kan tlai lutuk dawn. In va rei em em ve" ti pah reng chungin U Rintei chhuak vek tawh pawh a rawn lut leh a, chhuanlam ka lo siam leh.

"Khawmaw i mit kha, a pherh deuh lo maw?" ti a amah leh amah inzawt chawpin hnai te ah min en a, ka mit bawr vel dim te in a tuai thuak thuak.

"Pasal min neih khalh daih dawn sia, inhau nasa thei viau mah ila i ngaihawm ve reuh ngawt ang" a ti ve luam a, ka lo kuah chawt. Ka laizawn neih chhun a nia, ngei ţhin mah ila ka hmangaihna a bo chuang lo. 

"Ţap reng reng suh ang che. I ţah vaih chuan engkim ka sawi buai leh vek ang" ti a min fiam chung hian a inla hrang a, inchung lam thlek lehin "A mak e Didiki chu eng nge a tih chen chen a? Zorinsanga pawh hi ka la hmu leh lo reng reng" tiin Tetea thlengin a sawi kai tawh a, ka mangang takzet. 

"Inchungah a la awm ang, a insiam ve tho a niang" ti a ka lo chhan chuan phawk hra hian "An lo inhau leh a ni lo maw?" a lo ti a, ka hrilhhai ngei mai. 

"Tu nen maw?" ka lo ti he haw a, a awmzia engmah ka hre lo. 

"Nizanah Didiki nen a an inhau thawm ka hria vuai a lawm. Mi inhau mai mai tiin ka ngaithla lem lo a, eng nge maw an inhauh chhan ni dawn ni? An in ngaihsak theih tehreng nen, ka lo ngaithla ru lo a ni" a ti mual mual a, U Rintei ai mahin mak ka ti zawk. 

Inchung pan na kailawn a Didiki a rawn tlan thlak hlawk hlawk takah chuan ka lo thaw huai. 

"I va rei em em ve. An nghak ţhup tawh cheu a, hetiang hunah an innghah tir reng ngai lo. Biakin ah pawh mi an lo tam tawh dawn sin, lokal vat rawh u" tih pahin U Rintei chuan Didiki banah a dawm a, a chhuahpui nghal nal nal. 

Eng emaw hmuh in beiseiin inchung lam ka hawi chho leh hram a, inchung kai lawn tawp aţangin Tetea'n min lo thlir reng. Ka en tih a hriat veleh nui sukin ban a vai a, a bu nghat bawk. Keipawn lo nuih let ve in pawnah ka chhuak a, kan inchhung a ruak nghal huai ang. Tetea amah chauh a a awm chu ka ngaihtuah ru hle mai. Didiki nen a ka hmuh dun dan zawng zawng nen khan ka ngaihtuah let a, boruak ţha leh zangkhai helh hawlh an nei miah lo ang. 

Motor chhung a ka ţhut luh ve lai chuan Didiki'n a sam a lo siam ţha ve mawlh mawlh a, min chei tu te kha ka nu in thingpui a intir hnuah pawnah an lo awm daih chu niin, ka chhuah khan ka hmu ve chiah. 

"An la awm reng tho a, i siam ţhat tir duh em?" ti a ka zawh chuan "Aih a tlai tawh. Ka tuai rual mai mai a nih hi. I hmu vek tiraw?" tiin aw khur der derin min zawt. Motor a tlan chhuah rualin a kut ka vuan a, a kut thlengin a khur der der thei nia. 

"Tlem te chiah, eng thil nge thleng?" tiin dam thlapin ka zawt a, "Zorinsanga hian min ti buai ţhin" a ti chang khawl a, ka lam a lo hawi rualin a makeup ruallo lai ka lo tuai rual sak. 

"Tetea maw? Engtin nge a tih che?" ti a ka zawh chuan lu a thing a, "Engtin mah" tih ringawtin min chhang. Awm a awm ngei a, ka hai bik lo mahse min hrilh a inpeih hun ka nghak. 

Rin phak bakin lawmpui tu kan ngah a, Dinpuia phei chu a nui reng mai. Thlalak lai a ka dar a min kuahna la thla tur a an tih te khan ka lo zak asin aw. Ka ţhiante ho pawh theih tawp a nalhin an inchei a, Tetea leh Didiki ka mitmei ru reng a, an inhel zak zak. 

"In nalh dun hle mai. Nalh ka tih zawk chu inhre tho ang a" ti a Timothy-a Didiki a kuah lai chuan camera la keng kual reng tu Tetea ka melh vat a, ka awm dan apiang chhinchhiah duh ni awm a thla la reng si kha a hawi sawn daih. Thlalak hun a zo tawh a, chuti chung chuan a la la kual reng tho kha a nia, ka u, ka thisen a ni bawk a, thil thleng hre miah lo in ka khawngaih em em ringawt. 

Dinpuia in luah mekah ka lawi lut a, mi an la tam tho. An chhungkua an hung bawk a haw ţhen ţeuh tawh mahse an phai thei tak tak lo. Kan pindan inţawm tawh tur a ka luh rualin Dinpuia'n min zui lut a, "Nalh tak tak a an rawn inchei vek chung khan ka nupui chiah hi ka lo en tho a" a ti ve vel a, ka lo nur nang. 

"Keimah chiah min en chungin engtin nge an nalh tih i hriat tho si" tiin ka lo chhuah chhal zui zat. 

"Inneih na a kal dawn chuan nalh a ngai a, an nalh ka ring mai. Ka nupui i ni ta der a, a awihawm loh" a tih chuan ka lo nui hak. Biakin hawng ngeiin innei thei lo mah ila kan nghahhlelh em em ţhin a thleng tawh a, kan hrehawm tawrhna kha a thlawn mai mai a ni lo. 

"I hmaah ka awm reng a, engtin nge i awih loh theih zawk?" ti a ka lo zawh chuan min kuah thuaiin "Ka kuah reng chung che pawh hian awih a har tho. Ka intiam tawh angin ka hmangaih reng che ang a, ka duat che ang a, kan fa lo piang mai tur te leh piang zel tur te nen---" a tih lai mek chuan "I over mah mah" tiin lo pawt chat mah ila "In vaiin tawp chin nei lovin ka hmangaih ang che u. Ka dam chhung chuan rual in awt lo vang a, nuam sa deuh a siam thei tur cheu in ka thawkrim sauh ang" a tih zawm leh a, keipawhin lo kuah let ve in "Hmasawnna tam tak ka hmu tawh a, i sawi ang chuan i awm ngei dawn tih ka hria, awm lo mahla i nupui ka ni reng tawh tho ang. Tun aia i hlawhtlinna a in belhchhah leh a nih pawhin i kiangah ka awm ang a, i tla hniam ta a nih leh a hma ang tho khan ka hnaih lehzual che ang a, engmah a dang lam dawn lo" ka ti melh melh a, ka hmangaih em vang hian engkim tawrh dun ka huam. 

Tlem a inla hrang deuhin thlahlel tak hian min fawp a, mi an la tam deuh bawk nen ka nam kiang thuai. 

"Lut chhuak an awm reng a, bakah helai a tawm bo reng chu a mawi lo. Chhuak phawt teh ang" ti a hrilhin ka chhuahpui a, ka kalna apiangah min zui. Miin an chhaih fiam leh zeuh ţhin a, chung an chhaihna zawng zawng pawh chu engahmah a ngai duh lo. A nupui ni tawh mah ila min ngai em em ringawt a, char zawm ang mai kan ni. 

DIDIKI

Khang kum khat leh a chanve chhung lek khan thil tam tak a thleng a, rilru nghet tak ka nei emaw ka inti ve ţhin mahse a danglam zeuh zeuh. Inthiam lo tak chungin ka bialpa ni lo mipa dangin ka rilru a luah ta zeuh zeuh a, ngaihven loh ka tum tlat thung. 

Engtik aţanga inţan nge ka hre lo. Kimkimi te in a ka awm lai a midang an chhuah vek hlan a ka puanţhuina bula a awm ve tlat ţhin aţang te khan a ni maithei. An khawl hman loh min lak chhuah sakin ka puanţhuina bulaj lehkha a lo chhiar ve ţhin a, min melh ru zeuh zeuh a ni tih ka hai ngai bik lo mahse khang hunlai kha chuan Timothy bak ngaihven ka nei ngai lo va, ka chung a Tetea'n ţhat a chhuah ţhinna te kha ka hmuh hmaih ţhin. Hmalam ka pan theih nan min pui nasa viau ţhin mahse a thil tih kha ka ngaihven ve ngai lo a, amah ka ngaihsak deuh hnu hian ka hre chhuak chiah. A lak a ka rilru put hmang chu engpawh nise Timothy-a hian thil tam tak min tih sak ve tho a, ka tan a inpe zo in ka dinhmun chhiat ber lai pawn min thlah ngai lo. Chuvang tak chuan phatsan thei ka lo va, min kalsan anih loh chuan kalsan zawk thei ka ni lo. Ka tan a hluin a pawimawh a, Tetea ka ngaihven ve te hi ka inzahpui fo. 

Kimkim te nupa pindanah awmin puan ka phah pui a, kan ţhian dangte leh Dinpuia ngei pawh a awm ve. Fiamthu ho lam te te thawh khawmin an nui leh dar dar ţhin a, an ngaihţhat nan nui ve mah ila an thusawi ka hre bar lo. 

"I va chau awm ve" tiin Kimkimi chuan ngaihţhat loh hmel zet hian min lo zawt a, ka nui liam satliah. 

"Kan hmangaih te hi an pawimawh rualin min hmangaih tu hi an pawimawh tel a, i rilru a insual nasa viau maithei a ni. Mahse Timothy-a hian a hmangaih lutuk che tih hria la, i inchhir lehna tur thutlukna siam lo hram hram rawh. Tetea nen a in inkarah khan awm a awm tih ka hria a, i sawi duh loh chuan ka zawt kher lo ang che. Pakhat ka nuţa a nih laiin pakhat ka ţhianpa a nia, ka tan a an pawimawh ang bawkin i tan pawh an pawimawh ve ve ang. Thutlukna ka siampui dawn lo che a, duhthlan theihna i nei a, i hlimna siam sak tu tur che i thlang dawn nia" midang hriat loh tur hian a ti ser ser a, ka chhan hma in "Keini te hi min en la, entawn tlak kan ni ka tihna a ni lo mahse Dinpuia retheih ber lai a kan awmdun ţhin lai te khan kan hlim reng a, a thiam dan dan a min ngaihsakin ka hrehawm a hlau a, sawi chhuak reng lo mahse a chet danah min hmangaih zia a lan tir reng a, ka hmangaih ber ka neih rualin min hmangaih tu ka nei tel a, hma hun hre rih lo mah ila ka hlim takzet" tih zawm lehin Dinpuia te ţhutna lam a hawi a, "Ka hlim takzet" tiin a phun zui sep. 

"Ka hria a lawm, ka thlan tur zawk chu ka thlang fel daih tawh. Min ţhen a nih loh chuan ka ţhen bik lo ang" ka lo ti vat a, ka hmuh phak lohah a awm dawn tho a, a rei ang a Tetea chu ka theihnghilh veleh mai ang. 

Mutna kan siam zawh chuan Dinpuia rawn pheiin an nu bulah a awm leh chat a, ka nuih a za angreng hle. A hlat thei tak tak lo a ni ber. 

"Haw tawh ru kan mu duh tawh" ti a Dinpuian min fiam chuan ka nui chuak ta hak hak a, a ţawng chu Rina ten lo hre pha in "Fimkhur hunlai tak a ni dawn sia, Dinpuia chu inneih zanah meuh pawh a awm hle hle dawn ni mai" tiin an lo fiam let. 

"Ka kuah thei tho a, a samin min zar ringawt pawn ka lungawi" Dinpuia'n a lo tih let ve chuan "I ti mah mah" an lo ti sap sap a, Kimkimi aiin kum5 laiin a upa a, mipa an upat zawk chuan an duat thiam nge nge ang. Mahse keipawh in rual chiah mah ila min duat lutuk tho. 

Tetea ka hmu veleh tawh lo va, inneih inkhawm zawh khan a haw tlang ni maiah ka ngai. Ţhiante nen a kan nuih ho dar dar lai pawn awm ve miah lo mahse min pawt peng leh ţhin. 

Dinpuia chuan Kimkimi hnunglam aţanga la kuah reng chungin a darah a khabe a nghat a, puitling an awm lem lo bawk a keini ho mitmei chu a veng em em hran lo. An hringnun tawpna ni lo mahse hrehawm an tawrh hrep hnua an innei thei ta mai hi ka lawmpui takzet. In ngaizawng mai mai ang ni lovin nupa angin bul an ţan ţha leh dawn a ni a, nghet tak a an lo invawn tlat tawhna kha an thlah dul loh ve ve ka beisei. 

Zan tlai tawh takah Timothy-a nen kan haw dun a, Kimkimi te inkawt a a din rualin ka chhuk a, ka kal nghal mai tur min pawt letin min thlah nan ka hmuiah a fawp a, min thlah veleh ka lo chek tlak.

"In i thlen meuh chuan min be peih tawh awm si lo va, muttui aw" a tih chuan "Muttui le" tiin ka lo chhang a, an in lam a a tlan phei rualin keipawn dimte a gate hawngin ka lut zal zal. Kimkimi te inhnuai a kan awm miau vangin gate a lut hmasa lo chuan inhnuai a chhuk theih si loh a, haw tlai chang phei chuan thawm dim a ngai lehzual. 

"I lo haw der a?" ti a min lo zawt tu aw ka hriat chuan ka phu nasa kher mai. Awm ka dawm vang vang laiin nui hawk ri ka hre zui zat. 

Kan in chhuk thlakna bulah bang nghengin a lo ding reng a, thawm dim deuh a kal ka nih vang leh eng a dul ruih tawh vangin ka lo hmu lo mai mai zawk a ni. A thawmhnaw hak a dum vek vang te pawh a ni tel tho ang. 

Awm la dawm reng chung hian "Hetah eng nge i la tih?" ka ti hluai na a ka ţawng ring lem lo. 

"Ka lo nghak che" ti supin ka kut pakhat zawk chu vuanin min dah thlak sak a, a vawn loh lam zawk chuan ka la indawm reng tho. 

"Min ti phu nasa lutuk alawm. Lang lo lai a min lo nghah kher a ngai hleinem" ka la ti pang pang. 

Ka thinrimna te chu ngaipawimawh lo zetin min pawt hnai a, kan insi lo chauh tawh. 

"Tukin a i ţah ngawt chhan kha ka la hre duh cheu" ka banrek a hum run chung hian a ti a, "Ka hre bik lo" tih chiahin ka lo chhang leh. 

Hneh zetin min kuai her lawp a, bangah min nam bet zui rawk rawkin a taksa in min khuap nghal run a, "Min en rawh" tih hluk pahin ka khabe ah dawmin min kuai dak a, rum zetin min melh chhuk ve run. 

"I tih luih tiraw?" ti a min zawh chuan a ngaihna hre lo fe hian "Eng maw?" tiin ka lo zawt let a, "Ka rilru i tihbuai zia hrereng chungin i bialpa i rawn inthlah tir a, ual uar tak a i infawh tir vel te kha i tih luih vek ti raw?" a ti leh khur khur tawh. Min tih buai ve zia lantir khang lang lo ila chu hetiang hian a awm miah lo ang. 

"Min lo nghak tih ka hre lo hrim hrim. Runluih tumna che leh i hmuh lai a khatiang a awm tumna kha ka nei ngai lo hrim hrim" dam thlap hian ka ti a, ka dam lutuk mah mah te chu ka inhaw letling zawk. 

Ka khabe la dawm reng chung chuan a kutzuipuiin ka hmui a tuai a, "Ka hriat ngai miah lo min hriattir hnuah min paih bo leh i tum a, min fiam kual mai mai a ni" a aw thum leh thuk raih chuan a ti a, engmah ni lo mah ila hmeichhe ngaihsak ngai miah lo keimah vangin a buai a, inthup tum viau mah ila ka haw bik lo a ni tih ka awmdan aţangin a hmu thiam vek. Kei lahin ka bialpa ka ţhen thei tak tak si lo. A changin ka khawngaih a, a chang leh ka haw thul. Chung chuan min tihnat ve phah ţhin. 

"Hmun dang a i awm hunah min theihnghilh ve mai ang. Ka bialpa nen a hmalam pan zel ka tum a, nangpawn ka tello in hmalam pan rawh. Min ngaihtuah tawh lo la, min ngaihven tawh lo la, min paih bo hmak zawk rawh" ti a ka hrilh chuan na a tih hmel kher mai. 

"I sawi ang a awlsam chu ni se ka paih bo na che a rei tawh ang" a ti nghet charh a, a dik chiah. Mi rilru ţha leh thuawih tak a ni ţhin a, dik ni a a ngaih a ţan tlat ţhin. Tun a a awmdan hi a dik loh zia kan hre ve ve a, mahse dikna a ţan hleithei lo. A inthunun thei lo a ni ber. Lo hnaih lo tawp ila ţha tur, hel char char ţhin ila chu tun ang hian a na awm tawp si lo va. 

"Tum char char rawh. I tum chuan i thei em em ang. Bialpa nghet ka nei a, min ring lutuk. Hetiang a ka awm hi a ring pha dawn lo hrim hrim a, min rinna a hloh loh nan ka hlat che a ţul. Mi ţha tak i la tawng mai ang" hneh tumin ka ti a, Fredy nen a in ang lo. Fredy chu naupangchhe star nei mai mai ang a nih laiin Tetea erawh a dang daih. Midang hmuh laiin a lan tir ve lo va, tu hnenah mah a sawichhuak lo. Chuti chung chuan min hauh bur ang a awm chang a nei a, mipa dang nen min hmu thei lo hle bawk. A ţhianten hmelţha min tih vang mai a Fredy-an min star ringawt ang kha a ni ve lo va, Tetea min duhna hi chu zawi zawi a lo piang a ţhang lian chho a ni. 

"Ka thei lo ti ta ila?" ti a min zawtin min melhna mitmeng thim khup leh dul ruihah chuan beidawnna a lang chhuak ve hial. 

"I thei ang, ka hria alawm. Nang chuan tih theih loh i nei ve lo" zam lutuk a ka tih chuan a lo khi suk. 

"Ka nei thei lo che a nih hi" a ti hap a, chhan mai ngaihna ka hre tawh lo leh mangang ru tawh si chuan chil ka lem khawlh a, "Hmeichhe dang--" ka tih leh lai chuan ka hmui a rawn fawpin a lei chuan inti nei tu tak maiin ka kâ chhung a rawn hawl a, duhthaw leh koham zetin min fawp zui ngawng ngawng a, a inlak hran hnu thleng a meng ngam lovin mit ka chhing tlat a, "Hmeichhe dang sawi tawh suh" zawi sup a ti nghutin dim te a ka biang a tuai lai chuan zawi zawiin ka meng ngam ve chauh. 

Ka huaisenna zawng zawng sawmkhawmin "Kha kha a tawpna ni rawh se. Tun aţang chuan mihrang angin awm tawh ila, ţul tawpah lo chuan inhmu in inbe tawh lo vang. Keichuan duh ka thlang fel tawh" ka tih leh hnuah pawh pawm lo tih hriat takin "Kan en ang chu" a ti bung hmuk a, inla hrang nghalin rawn hawi let miah lovin a kal sawn a, ka taksa a vawt nghal riai a, ruak huaiin inhre mah ila Timothy chiah ngaihtuah ka tum lui tlat. 

Zing karah Timothy-a nen exer la in kan chhuak a, Tetea kan la tawk zui. Timothy nen an inbiak lai pawh chuan a mit chu keimahah a fu leh ngur tawh a, ka haider hmak. 

Kan inpelh hnuah Timothy-a lah chuan "A va en duh che ve" thik ve ni awm tak hian a la ti tak deuh deuh a. 

"Ka lo en miah lo va, ka hre lo reng reng" lo ti liam puatin thil dang ka sawi pui zui daih a, ani pawhin a vei zui lem lo. 

Kan haw veleh ka inbual sawk sawk a, Kimkimi nu kawr ka ţhui zawh tak pe tur a ka kal te chu ka zam kher mai. Ka tawk thut ang tih ka hlau a, a lo awm ve ka hlau tel bawk. 

Kimkimi nu, Nu Mahruaii chuan min lo fak chamchi a, ţhui thiam min tih thu sawiin a ţawng duah hlarh hlarh hle. Thingpui min chhawp sak hnuah ka hmazawnah ţhuin ka kawr ţhui chu a khai kang a, uluk tak a enkual in a fak mawlh mawlh a ni ber. 

Ka huphurh ruk ang ngeiin Tetea chu inchung aţangin a rawn chhuk a, a nu hnungah dingin min melh run a, a nui sawng lehnghal. Inbual zo hlim tih hriat takin keimah ang bawkin a sam a la hnawng chap a, "Khawmaw nu han ha chhin teh. Didiki hian i inhmeh tur a hre dawn riau" ti a a nu nen a min fakin hnunglam aţangin a nu darah a dawm pah a, Nu Mahruaii lah a phur. Ha chhin turin pindan a pan sawk sawk a, kan pahnih chiah a kan awm chuan ka ţhu ngil at reng ringawt. 

"Naktukah ka kal ang" ti a min hrilh chuan phawk hrain ka lo en a, min rawn pan hnaih mai ka rin laiin ţhuttthleng hnung a a awmna ngai rengah awmin ţhutthleng nghen chhan vuanin a kun thung. 

"Kar leh daih maw ka tia, i va hmanhmawh leh si ve. Naktukah i kal tak tak dawn maw?" ti a ka zawh chuan a nuih a za ve hle. 

"Dawn e. Ti nge? Min ngai em ni?" zawi sup a a ti thum dut dut ri te chu midangin an hriat phak ka hlau hle. 

"Chutiang a ni lo. I tum dan i thlak thut sia, ngaih lam a ni lo" ka tih bah nak nak chuan a mitko lo san akin "Ngai dawn miah lo maw?" lu thin pah hian a ti a, ka zam lutuk hmui pet fan chung a ka hawi ka hawi lai chuan a nui chhuak ta hawk. 

"Ka fiam che a nih kha. Ka zin khaw thawng hmasa dawn a" tiin pangai takin min hrilh leh ang lawi a, sawi ţhat ve nghal mai tur a nia, hetianga min tih mangan vak vak pawh hi a thil chin thar a ni. 

"A ţhat chu, boruak dang hip te hi a nuam ve a" ka kekawr chhan a ka mal tuai sek chung hian ka ti a, "Ka rawn let leh hunah kawppui i la nei lo a nih chuan min tlanchhiatsan leh thei tawh lo vang" a ti nghet charh a, a mitmeng thuk raihah chuan tih tak takna bak hmuh ka nei lo. 

A sawi angin a kal ta ngei a, ngai ve ţhin mah ila ka hriatna aţanga hnawh bo ka tum tlat. Timothy-a ka be rim zualin a bulah ka awm tam a, Kimkimi te inah kan leng zeuh zeuh bawk. 

Kimkimi pawh a pum a lian ve zel a, chet vel a harsat hnu phei chuan pui turin ka kal ngun hle. Timothy-a nen kan kal tlangpui a, a hman loh chang chuan Fredy-a leng tur ka pawt kawi a, ka indah tir zawk mai ţhin. 

Pangai thei ang ber a nun ka tum tlat a, Timothy nen kan inpawh lehzual sawt viau. Lehkha zir zawm tawh lovin designing lam zir tumin rilru ka siam a, englai pawh a min thlawp reng ţhin tu ka bialpa pawn min phur pui khawp mai. Ţhui tur ka nei ve reng tho a, ka zirna man chu ka intum ve theih ka ring mai. 

Engkim a ngai rengin a kal a, Tetea hriat chhuah chang nei ţhin mah ila Timothy chiah ka ngaihven a, mipa dang ngaihtuah lovin amah ah ka bur ngar ngar a, englai pawhin lawm takin min lo pawm thlap ţhin. 

END

(A tawp dan laklawh deuh a  tih ka laiin in lungawi lo deuh sia, epilogue ka dah leh ringawt. Tetea lang tam deuh tur a min ti tu in awm ţhin bawk sia, hei a lan tam theih dan tur berin ka pawt kual a, hmeichhe dang nen a tih chuan a lang tam thei dawn si lo va, a lan tam theihna ber tur Didiki nen ka kai zawm kual leh ringawt a, in lungawi tawh em ang chu. In lo chhiar avangin ka lawm e)