THROUGH THICK AND THIN-LAST

THROUGH THICK AND THIN-LAST

KIMKIMI

"Vawiin chu mihring an van vang em em" tih hap pahin counter ah ka bawk a, ka dawr nghah lai mek awmna hian bazar lun lai a han thleng pha lo bawk nen, nidang ah pawh buai viau chang nei mah ila inhralh tlem chang pawh kan nei. Inhralh miah loh ţum erawh a awm ngai lo. 

Kum khat leh a chanve vel lai a liam leh meuh chuan thil tam tak a danglam tawh. A zawng zawngin danglam vek lo mah se la danglam tam tak a awm tawh. Ka patea leh ka nu in Dinpuia chungchang an sawi dun nasa ţhin viau a, an enthla reng bawk. Ka patea vang liau liauin Dinpuia paw'n dawr lian vak lo a hawng ve thei tawh a, an puihna dawn duh lo viau mahse a pawisa ringawt chuan dawr a hawn mai theih ka ring lo a, pawm mai turin ka nawr ţang ţang. Min hnial hneh loh hnuah a pawm ta nge nge a, dawr luah tur kha kan hmu mai lo lehnghal. Tun a kan luah lai hi a luah mek ten an chhuah san dawn khan kan lo hre ve hlauh a, kan hauh nghal hmak. An insawn chhuah hnu lawkah kan luah lut a, nitin inhralhna tur a awm ve reng hian min ti thlamuang. 'Kan' tiin ka sawi zel a, la innei lo mah ila ka ţangkai em vang a insawi tel ve char char ka ni. 

Fate na na na chu Dinpuia nu paw'n sual a chhuah reng thei bik lo a, ngaihsak vul chuk lo mahse a hma ai chuan zia tawh tak a ni. In luah man chawi tir tawh lovin chhang siam thei tur te a kawhhmuh tawh zawk a, Dinpuia pawh a hma ang em emin a rim tawh lo. Pui tur a nei ţha tawh a, awl duh bik miah lo mahse a hah lutuk ta bik lo e. Tluang deuhin kan inkawp chho ve zel a, kan inah a lo leng ngam ve tawh. Ka patea leh Dinpuia nu ngei paw'n engkim an tih sak leh vek tho sia, tih sak tur tho tho te chu a hma khan lo tihsak ţha ve mai mai se la a rethei lutuk lo tur a nia, mahse thil tam tak a zirchhuah phah a, ţhatna lai a nei ve tho. 

Didiki ve thung chu ka nu in awm hlat a phal ngang lo a, kan inhnuai kha lian vak lovin kan zawm a, insi rengin kan awm. Dawr hi Didiki nau, Rinhlui'n a nghak tlangpui a, lehkhazir a zir peih tawh loh miau vangin Aizawlah inhlawhna zawngin a rawn awm a, thla thum vel lai dawr kan hawn tawh hnu a rawn awm a ni bawk a, inhlawhna tur dang a hmuh mai loh vangin nghak rih mai turin kan hrilh a, rin aiin a che fel ta phian sia, a nghak zui ta reng. Kan inhnuaiah Didiki bulah a awm ve. Didiki pawhin thawmhnaw ho lam te te a ţhui ve ţhin a, veng chhung mi te chuan an ţhui tir ve fo a, veng pawn lam aţang erawh chuan pan tu a nei lem lo. 

Dawr hawng ve tawh mah ila a la len loh em vangin kan ţhianten min la pui awl lo va, dawr remchang apiangah min la zawh sakin an pekna ngaiah an pe ve reng bawk. Tun thlengin hlep tur siam sak an la duh chuang lo a, chaw kan eikhawm zeuh zeuh thung. 

"Haw hmain i rawn kal kawi hmasa dawn em?" ti a Dinpuia'n min zawh chuan Rinhlui ka melh zawk a, kan awm dun reng sia, hawsan ka hreh deuh a ni tih hriain "U Kimkim i duh chuan haw tawh rawh. Nidangah pawh keimahin ka awm ziah tho a, min ngaihtuah lutuk a nih kha" a lo ti var a, Aizawl a rawn awmna a la rei lutuk si lo a, ngaihtuah loh theih pawh a ni lo. 

"I rilţam hunah i inhralhna sa khan thil lo ei mai rawh aw. Anih loh paw'n ila hne loh chuan heng ho pawh hi i ei thei tho a" chhang kawh kual pah a ka tih chuan pawisawi loh hmel zet a min enin "Pawisa ka hmang ngai lo" a lo ti leh a, mak ti lutukin Dinpuia ka en ha ringawt. 

"Engmah i ei ngai lo em ni?" ka ti hluai a, a lo inhrek char char chuan ka hau hrep ang ka ti rilru a ni. 

"Ei ngai e...khilai lawk a vai thingpui dawr nei te nen khian kan inhre ţha lawm" a lo ti sam et. 

"Chu dawr a awm reng chungin hmelhriat i ngah viau tawh ni maw?" ti a ka zawh leh hnu chuan "Helai bawr vel a mi chu ka hre vek tawh" a lo ti leh thuai. Didiki nen an inang lo ka ti kher mai. 

"A ţhat nasat chu. Tikhan ţha deuhin lo nghak rawh aw, hmelma i lo insiam nghal ringawt ang e" fiamthu mai mai a ka tih hnuah "Saw ka ep chiah a pitar lukir saw a sual reuh lutuk a, mahse kan inhau nasa lo a nia" inthlahrung tih hriat zet hian a lo ti veleh vat. 

"In inhau a maw? I pi rual vel daih a niang chu" ka ti hriam hrak. 

"Min tai ran reng a, thli thawt veleh ka dawr lam a rawn phei turin sarang dah chhuah kher te a hrat a, helam a a lo phei leh ka hriat phak tur kherin min sawi sel a, a tih ang chiah a tih ve ka chin hnuah ka duh danin ka runluih ve a, a haw leh si a nih kha. Kei ai upa daih, ka zah tur rual pawh ni se zah turin a awm tlat lo a" a ti hlak hlak a, inthiam lo leh siin "Mahse ka zah tho" a ti zui sep.

"Ngawih san mai mai rawh. Keini aia dawr nei rei tawh an nia, hmelhriat an ngah phei chuan min dawr miah lo turin an hrilh daih thei a sin" tiin ka sawi ţhaih a, inhralh loh a hlau ve thei em a, a en liam mai mai theih nan a ka tih a ni pah bawk. 

"Tuman a thusawi an awih teuh lo mai. Vai ho thlengin an ngei vek. Mizo ţawng thiam nal deuh nen phei chuan sam sava bu-i kan tia, a rukin kan nuih ziah a lawm. U Kimkim engahmah ngai duh suh tumah ka hlau hleinem" tiin min la hnem zawk zamah lehnghal. 

"Aw a ţhat chu. Lo inhralh ţeuh rawh aw" ka ti ta ringawt. Vei vak leh mi dawr kawt a ţhu peih deuh an awm ve reng vangin buaina a neih leh mai ka hlau hle a, Dinpuia erawh chuan a lawm phian. 

"I hralh theih loh phah lo ang. An zuam loh nan ti let ve zel rawh" ti a a lo fuih chuan Rinhlui hmuh loh turin ka nghawk a, min ngaipawimawh lo duh lovin awmze nei deuhin an in nuih lehnghal. 

"Ti daih ila Rinhlu, zingah khan hma tawkah Fredy a chhuak daih a, dawr hawng tu ini sia, a lokal mial em?" ka ti ta daih a, college a kal ve hnu hian a buaithlak lehzual. Mawitea nen la inkawp nghet tlatin an rui ve reng a, a thu te a awm a tum a, a inti tlangval ve tawh bawk nen kan thunun hleithei lo. Ka pa lah hian hauh a phal ţhak lo lehnghal. 

"Lokal e. Dawr thleng min thlah a, min hawnpui vek hnuah dawr chhung leh kawt vel te min phiah fai pui leh thlap" ti a min hrilh chuan ka awih lo lutuk chu ka lo nui hul hak. 

"A rui phurin a pui che a ni maw?" tiin dawp ka tum a, lu a thing mat mat. 

"Iti ang lo thei e, tunge zing kar karah rui duh bik ang a? Bakah a ruih ţhin awm pawh ka hre lo" a ti a, a thlavang a hauh leh tlat rawh. Hmanni lawkah pawh dawr a an lo awm dun laiin ka lut thut a, weed rim a nam ram ram chung pawn an zep tlat. Rinhlui lah a ţang na ropui mai bawk si, rui ve ngai lo mahse a zep pui nasa ţhin hle. 

"A ruih loh chuan a ţha nih chu. Mawitea nen an lokal phei chuan lo be ţha lutuk suh aw, nui uar berah ţang tawh lo la, an sim theih nan i lo hau ţhin zawk dawn nia" ka tih mawlh mawlh laiin Dinpuia chuan "Chutiang mai mai sawina hun i la ngah lutuk" tih leh min kuah a rual a, min hruai chhuak nghal dawr dawr. 

Bike a tih nun tawh hnu te chuan lawn mai lovin "A rawn awm tirh aţangin an inkawp chawt a, a thil sual tih a zep pui tlat zel a, a fiam deuh hlek leh a nui uar uar a, hetiang a nih chuan Fredy tan a nuam lutuk ang. An inmil phian lehnghal a" tiin ka la ang zui bawrh bawrh. 

"Lawn vat mai teh. Rinhlui chuan a hrilh sim lul lo vang" nin tawh hmel zetin a lo ti hluk a, tum vuau chungin ka lawn sawt sawt. 

"Rilru a ti hah tak tak alawm. School a kal lai kha chuan han tih ve zawk chang a nei a, a ti lo leh mai a. College a kal hnu hian a buai tlat. School nen a inang tawh lo va, a zalen tawh bawk si. Awmdan a thiam tawh lo a nih ber hi. Ar sual huai lah hi a khawn khawm peih ropui mai si. Broiler zawk hi a buaipui ţha peih tawh mang lo va, a chang leh insual tir turin a pawm chhuak thul, inah a awm hman mang lo" ka ti hlak hlak. Entawn tlak ka ni lo va, ka nau takngial pawh ka hau ţha ngam lo. Naute hau ngam tur chuan kan nunin a zir ve a ngai a ni tih te ka hriat chhuah phah. 

"Note a neih hunah min leitir ve rawh ka tia" Dinpuia'n a lo tih chuan "Nang lah hi a, ilo tuipui ve thei zel a" ka ti nang nang a, awmzia a awm dawn chuang lo bawk a ka sawi zui duh ta lo. 

An lo buai leh laih laih tawh a, kan innel tawh hlawm bawk a min lo fiam nghal bawrh bawrh. Tam lo mahse an thawm a ţha thei ham ham hle. Dinpuia nen chuan pindanah kan inzui lut a, khum a bag ka thleh thlak rualin ka ţhu zawi ve hnawk. 

"Ka nu in dawr luah tur dang zawng turin min tia" Dinpuia'n a tih chuan phur zet hian "I zawng dawn em? A vang sia ngaihven nghal zung zung la" ka lo ti thuai. 

"Ka hre lo le" tih pah a rawn ţhu ve in khum lu lam bang a ngheng a, buaipui tur a ngah ve ţhin bawk a a chauh hmel hle. 

"I tan kawng a inhawn belh ve zel a ni mai lawm. Ngaihtuah la, pawisa nei mang lovin bul i ţan a, harsatna i tawk zui mawlh mawlh a, tlawm duh lovin iti lui zel a, lian lem lo mahse dawr i nei ve thei tawh a" ka ti a, lungawi hmel chiah lo hian "Puihna ka dawn nasat vang chauh a nih hi" a lo ti hluk. 

"Kan puih ţhin lai che pawh khan puitu nei miah loin nangmah chauhin i siam char char ţhin tho alawm. Bakah dawr pawh hi ka patean bul a ţan sak ringawt che a, pawisa tlem pe lawkin chhuar vel siam man a tum leh ringawt a, tunah te chuan dawr luah man pawh nangman i pe vek tho a, i thawh rim rah liau liau a lawm a nih" tih phur tum hian ka ti leh a, sawi chhuak lo mahse ka ţhiante lakah te hian a inthlahrung ve ţhin. 

"Ka nei thei tawh ang che" a ti teh daih a, hriam hrak hian ka melh a, danglamna nei miah lovin min lo en run thung. 

"Dawr lian deuh i neih hma chu i la inpeih loh thu i sawi mawlh mawlh kha" ka tih duai hnu chuan a khi suk a, "Dawr lian deuh chu kan pahnihin nei dun ang" thutak deuh a a tih hnuah khumah a ţhu kai a, na lo te a ka ban a pawh rualin ka tho tharh a, a bawp pahnih inkarah ka ţhu. A awm ka ngheng al al a, anin min lo kuah thung. 

"Ngati nge i rilru i thlak leh thut? Bakah chhungten naupang min la ti ang" tiin ţawngchhuak hmasa zawkah ka ţang a, hausa thur thur lo mahse khawsak a ziaawm deuh tawh. 

"Tunah tut tut ka ti chuang lo. Ka retheih lai zawngin ka bulah i awm char char a, tunah pawh i duhzawng apiang lei thei vek dinhmunah ka la ding miah lo, mahse ka nei thei tawh ang che. I awh zawng apiang lei thei lo mah ila i rethei tawh lo ang" a ti a, a pahrawn leh unauten la hre ţha duh vak lo mahse a nu talin a ngaihven leh tawh a, a inringtawk veleh tawh a ni maithei. 

"Hmasawn zel ka la tum a, mi hriat tham nih ve ka tum. I hming lang ve zel turin ka duh a, nangmah nen a hlawhtlin dun ka duh. Tun a mi hi chu a la te tham lutuk" a tih zawm leh a, ka la inpeih loh em vangin chhan ngaihna mai ka hre lo. 

"Hmasawn zel duhna ila neih chuan a ţha lutuk alawm. Tunah pawh hian la duh khawp lo viau mahla hmasawnna tam tak i nei reng tawh a nia" ka ti ta ringawt a, a bul ţan dan ngaihtuah chuan hmasawn nasa tak a ni. 

"Bakah engmah duh ka nei lo. Thil man to deuh deuh te hian ka mit an la ve vak lo a, a hma pawh khan i retheih vang a haw san leh che ka ni lo hrim hrim a, ka la inpeih loh em vang zawk a nia. Tunah hian innei mah ila kan ngaihtuahawm tawh dawn miah lo tih ka hre reng. Mahse chhungkaw din turin kan puitling tawh em tih te chhut ve a ngai a" tiin ka rilru put hmang ka sawi chhuak ve a, rilru put hmang a la naupanchhiat lutuk chuan inţhen leh vat mai te a hlauhawm ţhin. 

"Puitlin tak tak chu a har khawp ang. Mahse i uire a nih loh chuan ka ţhen lo ang che" nghet charh hian a ti a, a ţhan chhoh dan ka hmu chiangin a bula tal tam ber ka ni bawk. Puitling sawt viau mahse keimah zawk hi ka la inringtawk lo. 

"Inu sawi ang chuan ti phawt la, hmasawn zel ila tum a, ka lo tel ve thei ţep tawh ang. Tunah chuan hrehawm zawng zawng kan tuar chhuak vek tawh a, kan tuar dun zel bawk a, hlawhtlinna lai kan nei tawh hrim hrim" tiin ka fuih phur leh a, min sawmna hnar ang tho ka nih vangin a hnual lutuk ka hlau a ni.

"Ka lo ti ang, inneih kha tunah tut tut ti lo mah ila rei deuh hnuah pawh ka ti chuang miah lo a nia" a ti leh daih. A phakar ve reuh rap. 

"Min neih chak tawh viau mah la min lo la nghak hle hle rawh" ka ti fiamthu a, "Hmangaih inti chung hian engtin nge an nghah reng theih le? Keichu ka hmangaih lutuk che a ka nei daih chak tawh che" a ti bul bul a, ka nuih a za kher mai. 

"Hmangaihna in a dawhthei an tih kha, nghak hram hram rawh" ka ti veleh zeuh. 

"Zawm thlap thlap dawn chuan zawm vek a har ve a, zawm bik nei mai ang" a tih hluk lai chuan ka lo nui hak hak. 

Tlaiah in thlengin min thlah a, "Ka lo lut lo mai ang. Naktuk chu aw" a tih chuan phur fe in ka lo bu nghat nghat. Chaw ei a hun hnai tawh a, min tih khawtlai a hlau a ni maithei a haw lehnghal nal nal. Ka chhungten sawisel tawh lem lo mahse a la inthlahrung lutuk tlat. 

"Ka phal tlawm a nia aw duh ngei ngei rawh, a vaw na teh mai nia" ti a Fredy-a ţawng lung lung chu gate ka luh rualin ka hria a, ka pan hnai zel a, huan chhukna peng bulah ar pawmin a ding a, a bulah Rinhlui leh ka la hmuh ngai loh tlangval pakhat an ding ve bawk. 

"I ar i hralh dawn em ni?" ti a ka zawh pah a an lam pan a ka kal hmawk hmawk lai chuan min rawn melh zawk a, a nur nang. 

"Hei Rinhlui hian a nghak che. U Rem, lokal rawh huanah chhuk ang" a ti zung zung a, an dinna hmun ka thlen rual rualin huanah a lut thla nul nul. 

En zui ka tum laiin Rinhlui chuan min lo pawt a, "Ka pawisa hawn ka pe duh che sia, ka la haw lo. In ka lo thleng ve chiah a, min zawt mahla sawi tur ka hre vak miah lo a nia" tiin min lo hrilhfiah nghal zat zat. 

Pawisa ka lak lai te chuan huan ka melh zeuh zeuh a, ţawng pawh a ţawng ring duh tawh lo. Rinhlui hian in a rawn thlen chiah ka ring lo takzet bawk. 

"Ar kha hralh a tum em ni?" ti a ka zawh chuan bu nghatin "Hri in a man a, a thih hmain a hralh dawn nih kha. Insual chi a ni tawh si lo va, tihral vat a ţha zawk alawm. Mahse khapa hriat lai khan sawi miah suh" a ti ser ser a, ka awih leh chuang lo. A pawisa hmuhna ve ber a nia, dan tum hran lo mah ila ka hrechiang chak ve hrim hrim. 

"Lalrinhlu rawn chhuk nghal rawh. I lo haw hian tawi khawmuang reng zel suh ka tih kha" vin zet hian Didiki a rawn au a, ka hmuh turin a nui sang thung. 

"Lalrindiki thinchhiat zia hi chu. Hrawk phiar ţawng ţawng hian min vin a, U Timo Pâ cher-a bulah ve no deuh deuhin a nui hek hek a, a hmui pawh a ti kau ţha hleithei ngai lo" a ti hlak hlak a, "Chhuk mai mai rawh i inbualna tur a so nasa lutuk tawh" a tih chuan Rinhlui ka melh vat. A haw chiah lo ang ka tih reng kha. 

"Ka chhuk bawk lo ang i thu lo emai" uar fe a ti chungin hauh hlauin a chhuk zawt zawt. 

"A rawn haw na a rei tawh em?" ti a Didiki ka zawh chuan a la rei lutuk loh thu a min chhangin "Fredy nen an rawn inzui haw ve mial a" a ti a, thinrim lamah pawh a kal thei tawh lo. 

"Naktuk chaw eikhawm kha aw. Siami leh Afela an phur fal a, ka insiam vek tawh an ti" ti a hrilhin kan nui dun hak hak a, ka nau bawkin thawm a rawn nei leh tawh. 

"Naa..henu hi a lo la awm mawle" a ti bai bai a, chhuhsak hlau ni awm takin a ar hralh tur chu a kuah hneh hle. 

"Ka nu te i hrilh em? Engzatin nge hralh i tum a?" tiin pangai takin ka lo zawt. 

Ka ţawng hre lo der hmakin "U Didik, chocolate kha a tui em?" a ti daih a, en pawh min en duh lo. 

"Tui lutuk e. Ka ei chak lai takin min lo hawn fuh thei lutuk a, nang nge nge i fel ţhin" Didiki pawhin a lo ti ve luam. Ka sawi hmaih tak e, Fredy hian Didiki a la atchilh bur. A duh tial tial emaw tih mai tur a ni. Chhungkua in kan hre vek tawh a, fiam nan ber kan hmang ţhin. 

"Fel min ti ve ziah a, ţhenawmpa cher deuh saw i duh daih tho sia" zam lo zet hian a ti a, ar lei tum pa pawh a lo nui ve tet tet. 

"Hmeichhe dang ka kian ka tih tawh kha. Nang chu i fel sia, ţha deuh i la nei dawn nia" Didiki'n a tih leh hnu chuan beidawng zet hian a thaw hawlh a, "Nih leh ka kal tawh mai ang kei mifel hi" a tih hnuah ar lei tum pa chu hui zeuhin "U Rem kal ang" a ti leh tawp a, min kal pelh vek tawh hnuah "Rawn haw har suh aw, chaw ei a hun dawn nia" tiin ka au zui. 

Ar pawm reng chung chuan a rawn inher a, "Ka hria ka hria, chhungte rual lo in chaw ka ei ngai lo, kei mifel hian" a ti leh hram a, "Nghal lutuk" ti a phun sepin Didiki a nui zui ver ver. 

"An bet hnem thei sia, ar a nei ţha bawk sia, pawisa ah chuan a ti buai vak tawh lo ang cheu tiraw?" tiin Didiki chuan min zawt a, "Tibuai tehreng mai. A awt zel a, ka pa in a lei zel a, bakah a chak reng bik lo a, a chak loh changin a chan duai zel tho lawm. A thil tih ţhin hian pawisa a heh bawk sia" ka lo ti thuai. Mahse a tih fuh ţum chuan a pawisa a rawn hawn hnem ve thei phian a, hman lam a chak leh em em thung. 

"A pawi ngawt mai hetiang a lo ti ve kher kher hi chu. Mahse ka hriat danin damdawi hi sim a har an tia, damdawi a khawih lem loh chuan Pathian zarah a sim ve vat turah ngai ang" tiin min ţawng thlamuan ve melh melh. 

"Tak a i period thei ta em? I thin a chhe lutuk tawh lo deuh ang chu tiraw?" ti a min zawh chuan ka la period loh thu bawkin ka chhang leh.

"Ka ning tak tak a ni. Ka tai a na ve ţhin tho sia, ka period ngai chuang der si lo. In entir mai te ka duh tawh" ka ti hlak hlak a, ka tum zui bar. 

"Thla engzat nge i period tawh loh a?" ti a min zawh pah chuan chik deuhin min en pah kher. 

"Tun hi thla hnihna chauh a nia, mahse a nuam chuang lo. Ţhat lohna ka lo nei ru reng te a ni thei a, hmeichhia ni hi chuan ngaihţhat lohna tur a tam e ka ning" ka ti leh bawrh bawrh. 

"Nang hi nau i pai a ni zawk lo maw?" a ti ban charh a, a thutak lutuk te chuan nuih a ti za. 

"Nge ka pai ngawt ang a? Pasal neih ka la tum lo hrim hrim aw" ka ti pang pang. 

"Tum lo chung pawn a rai theih tho lawm. I rai a ni chiang mai, rai lo la i period daih tawh ang. A hma in insawiselna i nei ngai reng reng hleinem. Dinpuia nen hian in lo ti ru ve fo aniang" a tih chuan a hmui ka hup vat vat. Garage thleng hnung zawngin ka nawr phei a, a him chin ni a ka hriat veleh ka thlah ve chauh. 

"Ka rai lo ka tih tawh kha mawle. Rai turah min ngai tlat suh" tiin zawi tein ka phun sep sep. 

"I rai ka ring tho tho. Naktukah hospital canteen ah test na ka lei kawi ang a, midangin min ngaihsak loh lai takin kan pahnihin kan test ru dawn nia, Dinpuia'n a lo hruai awm che sia, nang chuan lei lo mai rawh chhuanlam i siam thiam dawn si lo" tiin rem a ruat leh zung zung. 

"Timothy-a hnenah eng nge i chhuanlam bik chuan ang a?" ti a ka zawh let ve chuan "Aww...in kan pelh veleh lu ka ti na der mai dawn lawm. Ngaihţhat nan test hrim hrim ang" a ti sam et a, min ringhlel tlat bawk sia ngaih a ti ţha lo zo vek. 

"Nih leh ti chhin ila ni mai lawm. Keichuan ka rai ka ring chiah lo" ka la ti ve tlat. 

"I rai loh leh a ţha ni mai. Test chhung a rei lo a, kan hre mai dawn lawm. I rai vaih chuan pasal neih i ngai tihna a ni mai" a ti a, a thusawi chuan min thlamuan lo rapthlak sia. 

Chaw eikhawm tumin Dinpuia inah kan inhmukhawm leh ţham tawh a, ka nghahleh ber Didiki te an lo la thleng ve thei lo. 

"Nge maw ring i fan iak iak reng le?" tiin Dinpuia'n min lo zawt ve bawk mahse ngawih ka chuh tlat. A chian hma loh chu engmah ka sawi dawn lo. 

Khua a duai reih ruih emai tiin coffee an in chak tlat a, keimah bawk ka buai leh phah. Choka ka luh rualin Dinpuia'n min zui lut ve a, keimah chiah a ka tih a phal ngai lo reng reng. 

"Min pui ve zel kher lo la, ka siam sa te pawh i in ve reng reng ang chu" ti mah ila "Ka puih loh che chuan i bulah ka awm tam thei dawn si lo a" a lo ti vel duah. 

"Nih leh nangman siam la, ka lo sem thung ang" ka ti a, gas ka on hnu a ka inher chiah chu min lo kuah a, tunlai tak hi min ngai thar riau lehnghal. 

Didiki nen a kan thil tum te kha hrereng mah ila ka inrinhlelh loh em vangin ngaihţhat lohna pawh ka nei leh tawh lo. 

"Min ngai lutuk a ka hlauthawng lek lek alawm le" kuah let ve pah a ka tih hnuah "Ngai lo che ila engtin nge i awm ang? I hlauthawng zawk dawn lo mi?" tiin min lo zawt let thua. 

"Dawn e ka hlauhthawn bakah ka thinrim ngawt ang" uar zet hian ka ti a, "Nih chuan i ngaih ti ţha hliah hliah rawh. Ka ngai reng che ang a, ka nupui inih hma zawng ka bialnu chiah ini reng bawk ang. Ka chhuah dawn hlek lo che nia" a ti a, ka hmangaih zia hrereng chung hian ka kalsan mai a hlau reng tho. Dingdihlip ar arin a hmuiah ka fawp zeuh a, inlak hran lehnghal mai tum mah ila a lo remti lo nasa, am zetin min fawp let a, kan ţhiante an awm ve miau vangin ka nam kiang lui ta tho tho. 

Coffee kan in lai mekin Didiki te an rawn lut a, awmze nei deuhin ka lo melh ralh. Midang hriatthiam ve loh turin a bu zeuh a, ka nui chhuak lek lek. 

"In va tlai ve, kawng fal laiah in ding zeuh zeuh a ni maw?" ti a Siami'n a lo fiam chuan thutak zet hian Timothy-a zawkin "Didiki lu a na thut a, damdawi kan lei kawi a" a lo ti thuai a, a sawi ang chiahin Didiki chuan thil a ti thlap. 

No ka seng rualin choka ah min zui lut ve a, a thil lei min pek meuh chuan ka hlau thar leh. 

"Eng pawh ni se a nei tho tho ang che. Va ti pawp rawh, hlauh tur a awm miah lo a nia, kawngkhar bulah hian ka lo awm ang a, min koh veleh ka rawn lut ang. Chhunglamah kal miah suh" ti mawlh mawlh chungin bathroom ah min nam lut rawk rawk. 

Ti dan tur hre nghal mai mah ila ka ti lawk ngam lo thung. Mahse min hmangaih ve tak tak tih ka hria a, lo rai palh ta ila a lawm zawk viau maithei. Keipawh ka bang bik lo, pasal neih la inpeih chiah lo mah ila ka hmangaih takzet. Rilru nghet chi ka ni kher kher bawk nen mipa dang hi ka rilruah an awm chhin ngai lo hrim hrim. A dinhmun ţhat lai, chhungte thlazar hnuai a nuam sa tak leh duh duh nei thei a a awm lai aţang khan ka hmangaih daih tawh a, intodelh ve tumin a chhungte a chhuah san a, buaina neuh neuh a awm reng a, rethei deuhin bul a ţan ve bek ber a, a retheih ber lai pawn ka iai ngai chuang lo. A bulah awmin ka pui char char a, hrehawm tam tak kan tuar dun reng a ni. Tunah a nuam sa veleh deuh hlek tawh a, min pawh ţhen tum tlat ţhin tu kan chhungte ve ve pawhin min ngaihsak sawt viau. Engkim kan tuarchhuak tawh a, retheih awmzia thlengin kan hre vek tawh. Heng vang tak te hian nau lo pai pawh ni ila Dinpuia chuan min pawm thlap dawn tho tih ka hria. Min nei nghal rum rum duh hial maithei a ni. 

Bathroom kawngkhar inhawng riai riaiin Didiki lu a rawn lawr a, "Eng nge chanchin?" awmze nei zet a a rawn tih chuan lu lo thing mawl tawpin "Ka la in ngaihtuah lawk" tiin ka lo chhang a, rang lutukin a rawn lut ve nghal. 

"Ti thuai thuai ta che. Kan awm loh rei chuan an ngaih a ţha miah lo ang aw. Ka chhuak tawh dawn bik lo mahse ka en lo ang che. Lehlam ka hawi hlan hian ti lawk rawh" tiin min nawr cheng cheng tawh mai. 

Hmanhmawh lo deuhin ka che a, ka tih zawh veleh Didiki ka hrilh a, ka thil ken lai chu lu ti si chetin kan melh dun ta ran. 

"I hlathawng em?" ti a min zawh chuan ka hlauh em em loh thuin ka chhang. Ven thawn ngah viau mah ila hlauh chiam ngaihna ka hre lo. Ka rai emaw rai lo emaw Dinpuia nen kan inţhen phahna tur a ni lo ve ve a, chuvang te pawh chu a niang. 

Kan enreng hnuah kan duh ang kan hmu ta chiah a, Didiki nen chuan kan inhawi tawn a, nui tet tet chungin min melh ran mai. 

"A va mak ve...a sual lo anih chuan ka rai tihna a ni sia" ka tih laiin Didiki chuan "I period loh khan Dinpuia nen a in awmdun tam zia ka ngaihtuah a, ka rinhlelh nachhan tak che pawh a nia" ban charh a a tih hnuah "Pasal i nei vat dawn nih kha" min ti leh a, a nui zui ver ver. 

END....(Story dang ka lo ti chhuak leh thuai ang a, min lo ngaichang reng dawn nia. Through thick and thin lo chhiar a,comment hnutchhiah ţhin tu te chungah ka lawm takzet bawk)