NANG CHAUH-13

NANG CHAUH-13

REBECCA

Thu mak pui puiin min deng nasa bawk a chaw ei ka chak lo kher mai. Ka ril a ţam lo va, tui in vak vak mah ila ka hrawk ro nghulh reng hi a ti hnawng zo tak tak lo. Kimpuii tih lunghnur ka duh loh vang leh Msa'n a ei lo ve mai ang tih ka hlauh vang chauhin ka ei ve hram hram. 

"Tlaiah khan eng nge in sawi dun vel a? Tih buai cheu ka hlau sia bathroom ah ka inkhung tlawk tlawk tawp alawm" nui tet tet chung a tih pahin Kimpuiin chuan min melh tawn ralh ralh a, ka chaw ei a tawp chiang hle. Mangang leh zak ru deuh a ka awm laiin a rawn nui chhuak ta hak hak a, "Ka ti mai mai a nih kha. In inhmu lo rei a, sawi tur in ngah tawh viau ang. Chuvang chu nia U Msa pawh lo riak rawh ka tih. Mahse ka nu hriattir miah suh u, tlaivar ngawt ai chuan U Msa mikhual pindanah a mu mai ang a, naktukah mi hriat loh theih dan berin a haw ang a" a ti zat zat a, rem hria a intih hmel nasa phian lehnghal. 

Chaw ei khamah Kimpuii ka tihfel pui a, a ti ti siam siam reng. Ka inbual hlan a ka nu nen an inbiak thu te min hrilh a, chumi hnu lawkah inthlahrun ve hmel deuhin "Zanin chu Thangtei fapa piancham lawm naah ka kal ve lawk dawn sin. Cake zai chhung chiah ka awm ang. Ka lo intiam ve tawh laklawh sia, i rem ti mial em? U Msa nen chauh a awm i hreh em?" tiin min zawt a, min dil pah a ni ber ang chu. 

"I inthiam tawh te chuan kal la, mahse rei miah suh. Ka nu a awm si lo va, i rawn haw leh vat dawn nia" ka tih takah chuan a lawm khawp mai. Pasal neih ngaihsak mang si lo hian ţhiante fa te piancham lawmna a kal vel hi nuam a ti em em a, vengchhung a a ţhiante an nih phawt chuan a ţhulh ngai lo. 

Kan tihfel zawh hnuah Msa min lo nghahna lamah ka phei a, sofa ah a lo ţhu awn diai a, a ngaih a la ţha fahran lo a ni tih hriat takin min hmuh rualin a ţhu ţha sawk sawk a, "I zo tawh mi? Kan ti ti thei tawh em?" dawhthei lo zet hian a lo ti zui zat. 

A hmel ka en chiang a, a hmai a hliam te leh a mit hnuai val kalh te nen, min hrilh kher lo mahse a landan aţang ringawt pawhin a chau tih ka hria. Keipawh ka chauin awm hahdam ka chak ve takzet. 

"Pindan ah lokal rawh. Ka chau lutuk a, i duh ang min hrilh la, i chhuak lehnghal mai dawn nia" ka ti ta nge nge a, ani pawhin sawi buai lovin min zui ve nghal mai. 

Chhuatah pher ka phah a, lukham ka dah leh thlap hnuah amah enin pher ka kawk a "I duh leh tah khan awm ve rih rawh. Ka chelh lui lo che a, haw duh lo zawk chu nangmah i nia, ka chau a mut hahdam ka duh bawk. Pher a i awm rih duh lo anih chuan mu ve nghal mai la, naktukah kan sawi zawm mai dawn nia" ti a ro ka rel zat zat takah chuan ka pindan aţanga chhuah leh hlau takin pherah chuan ban phar duaiin a mu a, min melh pah a nui chung hian "A nawm em hi, hetah hian ka awm ve rih ang. Khum aiin a nuam mah zawk" a ti a, ngaihven zui duh lovin ka pher phahna bul khumah ka lawn a, ka mut rual chiah chuan ka taksa na leh kham ut ut te chu a zia huai huai ni maiin ka hria. 

Ngawi reng a kan mut reng hnuah Msa bawk chuan boruak reh ruih chu ngaithei lovin aw a thian kharh a, "Pindanah kan ti ti dawn nia ti ve sia" a tih bul bul lai chuan saisirin Msa hnungchhawn zawngin ka mu a, "I duh duh sawi rawh ka lo ngaithla ang" ti a ka hrilh hnuah "Min bumah ka ngai" a lo ti veleh nghut a,  ka ngaihven mai duh tak lohah chuan "Chunglamah i mu a, kei hnuai tawkah. Eng tin nge muk deuh a kan ti ti theih ang?" tiin lungawi loh hmel zetin min zawt leh a, ka la ngaihven chuang lo. 

Ka khum phah a chet rualin a taksa lumin min tawk chawpchilh nghal a, in her let thuaiin ka ţhu chhuak rang hle.

"Ka khumah eng nge i rawn tih ve?" ka ti vin tuarh a, tihsual nei lo ang hmiah a awm a nui vur vur chung hian "Ti ti dun ka duh ka tih tawh kha" a lo ti sam et. 

"I duh duh sawi la ka lo ngaithla ang ka ti reng alawm" a hma ang chiah a vin a ka tih leh hnuah thinrim zetin a ban ka chum zui a, "Ti ti dun dawnin hnai te a in en run a ngai tel kher hleinem" ka tih zawm leh. 

Peih lo zet a rawn ţhu chhuak ve in "Eng tin mah ka ti lo vang che. Mu tur a ka kal hma chu i khumah ka mu ve thei rih mai lo mi? Vawikhatna a ni chuang lo a" a ti nang nang a, "Mawh" ti a min nawr a tum lai chuan a hmui ka lo hup vat. 

"Ngawi hle hle rawh. Ka duh loh thleng a min nawr vaih chuan ka haw tir tak tak dawn che a nia" tiin rum zet a melh chung hian ka vau a, a chhuk ve mai dawn maw ka tih laiin a hmui ka hupna kut chu a hum hnan a, a hmui a rawn nawrin ka kut phah a fawp a, remchangah a la leh hman tawh. 

"Malsawmkim" ti vin leh hlarin ka meng zau kawk a, "Eng thil nge i tih lehpek?" tiin ka zawt zui zat. Kan inhnaih lutuk hian keimahah danglam a la awm tlat ţhin a, a sawi duh ngaihthlak na hmun tur ka thlang sual tih ka hrechhuak thar leh. 

"A ţha e, i chhuk duh loh chuan keimah zawk ka chhuk mai ang" tih pah a khum a aţanga chhuk ka tum chu min pawt letin khumah bawk chuan min nam mu a, ka kawng a kuah chungin ka dulah a lu a nghat bawk a, chutiang a a tih hnu pawh chuan in beng kan ka la tum tho. Ka che ve sek chu ngaithei lovin "Che tawh suh" a ti hluk a, "Rei lo te chhung chauh a niang, engtin mah ka ti dawn lo che. Reilote chhung chauh hetiang hian awm rih ang" ti a thutak deuh a min ngen leh hnu chuan tlemin ka in thlah dul ve ta deuh.  

A awmdan hrechiang tawh viau mah ila hre lo ang maiin "Eng thil nge i tih?" tiin ka zawt leh tho a, ka aw a zawiin ka taksa a chet leh palh ka hlau hle. 

"Engtin nge i awm? Ka ngaihsak lo cheu ah i ngai ang a, ka duh lo cheu ah i ngai ang a, i bul a awm tur ka nih laiin ka hawisan che a, i hlau dawn tih ka hria, mahse hlimna tlem te tal i neih phah ve em?" tiin ka naupai chungchang min zawt a, min hmu thei lo mahse lu ka thing ne ne a, thu hlui inthup sawi hawn leh a nih takah chuan engkim a hre vek duh a ni maithei. A ruk tak chuan na a ti ve tho in ka ring. Muangchang a ka kut ti che in a samah ka chul a "Hlimna hun ka nei lo a ni ber ang chu. Ka hriat tirh aţangin boruak ţha lo hlirin min deng nghal dawt dawt a" ti a ka hrilh hnu chuan chawl detin ţap lo turin ka insum tlat. Mahni fa ngei ti tla te hi, a chhan chu engpawh lo nise ţah pui fo an tam ang. Kum tam tak a liam hnu ah pawh, ka ngaihtuah chhuah chang ringawt pawhin hrehawm tihna lian tak ka la nei ţhin. 

"Ka in ngaihtuah buai ve nasa ti a ka hrilh tawh che kha, ultrasound hmang a doctor in naute min endik sak lai te khan chiang takin a lungphu ka hre thei a, ka hlim rualin hlauhna ka nei lian zawk a, thil thleng miah lo tur thlengin ka ngaihtuah kual pha vek. Min rawn ngaihsakin min ţawiawm tlat la chuan ka hlim ve maithei. Mahse kha tih hunlai khan natna leh hlauhna bak ka nei lo" ti a ka hrilhfiah hnu chuan min en tumin a hawi chhuak a, tlem a rawn tawlh chho hlekin ka bulah a mu ve a, lo hnar tawh lovin "In thiam lohna chu ka nei ve. Inthiam chawp reng mah ila ka inthiam lohna kha a bo tak tak thei chuang lo. A ţul vang chauh a ni tiin ka inhrilh nawn mawlh mawlh zel a, ka dinhmunin a zir loh zia te  ka inhrilh a, mahni leh mahni inhnem nasa viau ţhin mah ila ka dam phah lo. Rilru nuam deuhin ka awm phah lo, engahmah ngai lo angin awm tum tlat mah ila chhungril ah hian nuam tih lohna nasa tak a inphum tel tho tho tawh" tiin ka sawi zawm leh a, ka thlamuan deuh theih nan a min lo kuahin "I la naupang ve tho sia, nangmahin engtin nge i tawrh vek theih?" ti a min zawh chuan hreh deuh chungin "Tommy-a min puihna vang chauh a ni" tiin ka sawi chhuak ta nge nge. Tommy-a hming ka lam lai chuan min kuah nghet sauh a, a tan hriat nuam a ni dawn miah lo tih hre mah ila "Thinrim a ka biak duh loh hnu che khan nangmah zawkin min rawn biak leh mai ka beisei tlat a, a tirah khan ka chhang duh lo ngei che tih ka pawm thlap mahse kan inang chiah. I rilru chiai in i mangang ang a, ka biak duh hma che chu min biak theih dan i zawn ngat ngat ka lo beisei ve tho. I hnen a ka let leh vat i rin ang chiah khan. Nau hial ka tih tlak hnu phei kha chuan biak hmasak che tumna ka nei tawh lo hrim hrim a, theihnghilh hmak che ka tum. Mahse inzawmna thuk tak kan nei tawh a, ka tum angin ka awm theih loh phah. Chuti chung chuan luhlul ka chhuah lui zel a, a tirah kha chuan a harsa a, zan ka mu ngai mang lo. Ka tawt up up reng a, darkar tlem te mu ve mah ila ka muhil ka harh chiah hi hnathawh nasat vang ni miah lovin ka hah nghal ngawih ngawih zel. Lehkha ka zir lui ngat ngat a, ka chhiar lai ka rilru a a luh theih loh pawn vawi tam tak a ngai hlir ka ziak chhuak ngat ngat ţhin. Tlaivar ţhak a ziah chang te ka nei a, hah ka hre ngai lo. Ka mutchhuah ţhak thleng a ka chhiar chang pawn mutthilh tumin khum ka pan a, ka mu ta cheng a, mutchhuak a reh leh vek a, chauh lutuk vang a tluk tawp chang te ka nei ţhin" ka tih hnuah ka awm tawt lutuk a zia deuh nan tiin thaw chhuak halh a, sawi zawm lehin "Tommy chu awm lo se tun dinhmun hi ka thleng zo miah lo ang. Min pui nasa a, min fuih reng ţhin. Ka mamawh chang apianga ka biak theihin a awm a, hnawh kian ka tum nasat ţhin lai khan a rawn let leh zel chhan tur awm ang ka ngaihtuah nasa ţhin a, mahse tunah chuan ka hrethiam tawh. Engkim a lo hriat tawh vang a min umzui reng a ni maithei, chutiang pawh chu lo ni se pui tu ka mamawh ber lai a min pui tu awmchhun a ni tho tho" ka ti a, khatih hunlai a ka natna ţhin zawng zawng khan a hlawmin min rawn deng leh a, min zawh lawm lawm lai pawh a ka sawichhuah duh ngai miah lohna chhan a ni. Tin, a hre vek turah ka lo ngai hmiah mai bawk si, tunah te hian la inhel tawn zak zak reng ila chu inhaw deuhin kan la awm reng maithei. 

Ka tawrhna zawng zawng ka hrilh ve hnu chuan a chal a ka chal rawn nawr siin "Ka tihpalh takzet" tiin thupha a chawi nawn leh a, "Thudik kan hriat loh vang a kan inhriatthiam loh tawn vang zawk, nang pawn i hre bik tlat lo a, i thiam loh a ni lo" ka lo ti thung. 

"Puih i ngaih lai a i kianga a awm tlat chu Tommy-a thil tih ţhat awm chhun a ni. A tih chhan chu eng pawh lo ni se a chhanchhuak tho che a, awm lo se chuan thil chhe ber a thleng maithei, kan ngaihtuah duh ngai miah loh khawp a chhia" Msa pawh chuan a ti ve ta nge nge a, "Ni chiah e, min ţanpui turin awm hlauh lo se la chuan ka hmu leh tawh kher lo maithei che" tiin keipawn Tommy-a awm ve chuan ţhatna lai a nei ve tih ka pawm thlap. 

"Ka hre vek tawh bawk a, min puh dan ang chiah khan ramsa hlauhawm ang chiah ka ni. I duh chuan a hma ang khan ka hlatah i awm leh dawn nia" ti ve bawk mahse min la kuah bet reng. 

"I lak aţanga inlak hran leh hnawh kian che ka tum nasa tawh viauin ka hria. Mahse hnawh kian che ka tum apiangin eng emaw thil thleng a awm a, inhmuh ngei ngei ngai a awmin kan intawng leh zel a, kum a liam ve zel ang a, ka theihnghilh thei mai ang ka ti ţhin a, mahse thuruk zawng zawng a lan chhuah vek tawh hnu phei hi chuan ka nun aţanga hnawh chhuah che a har lehzual viau ang" ka tih hnuah ka chek zui tlak tlak.  

"I hlat a ka awm i duh tak tak em? Ka hua che ang a, ka ngaidam leh thei tawh miah lo che ang a, chutiang a awm tur chuan min duh em?" ti a ka zawh chuan ka tih tak tak hlau ni awm takin min hnaih lehzual a, "Duh lo, ka lak aţanga inla hrang nawn leh turin ka duh tawh lo che. Harsa dawn mahse min ngaidam turin ka duh che a, hun ţha min siam sak leh thei la ka ti bawk. Mahse i ti thei kher angem ka hre lo. Dikna lai ka nei ve mang lo va, i rilru tur ngaihtuah lovin hmeichhe dang ka inhnaih tir a, beiseina ka siam sak che a, thu ka tiam duah a, a tawpah natna siamsak chein ka kalsan leh tho che a, naute i hloh laiin i bulah ka awm lo va, Aizawlah midang buaipuiin ka awm veng veng a, hun hi her let leh thei ila chuan i ţhian bak nih ka tum tawh lo vang" a tih chuan ka ţah mai loh nan ka inpet ruh fan fan a, a sawi zawng zawng hi a dik vek. Ka thil tawrh tawh zawng zawng te kha a vaiin natna hlir a ni teh meuh mai, mahse ţhian bak nih a tum loh thu a sawi chuan ka thaw hi ka hrawkah a in bât tang tlat a, thawk chhuah harsat thut ang mai ka ni. Keichuan amah vangin buaina tam tak tawkin harsatna nasa tak paltlang mah ila, duh thlang leh thei a ka awm anih phawt chuan amah tho hi ka thlang dawn a ni tih ka inhre thar leh. Ka tan chuan ngaihzawng satliah a ni ve lo a, pawimawhna a ngah lutuk. 

Ka huaisenna zawng zawng sawmkhawmin "Min hmangaih em?" tiin ka zawt a, Msa lak a ka rilru put hmang hi mi ten hmangaihna an ti a nih chuan kei aia hmangaihna awmzia hrechiang an awm tawh kher lovang. 

"I pianchamah khan tun a i zawhna chhanna hi ka pe tawh che. Tommy i thlan zawk vang leh i duhthusam mipa a nih thu min hrilh vang chauh a kal tir che ka ni. I hlimna a thlen sak theih phawr che chuan kal tir che ka rem ti a, mahse chu chu a pawimawh tawh em ni? Thil thleng zawng zawng a lanchhuah hnu phei hi chuan hmangaihna tih vel sawi ve thei kan ni tawh pawn ka hre lo" a ti a, a sual vang leh tih mawh hrim hrim vang a ni bik lo. Msa tan hian ka pawimawh ve ţhin takzet a, a ţhanlenpui leh min venhim tum tlat ţhin a nihna angin ka tawrhna ka sawichhuah meuh chuan a inthiam lohna a kiam hleithei lo a ni ber. 

A awmah ka lu nghatin a lungphu ka ngaithla a, a kawngah kuah ve in kan inhnaih hle. Hetiang a inhnaih hian kan awm lohna a rei tawh a, ka awm leh ang tih pawh ka ngaihtuah pha ngai lo. Inpawm duh lovin hnial kalh tum nasa viau ţhin mah ila ka hmangaih takzet a ni. 

"Kha mi ni, ka pianchamah kha chuan i damloh vang leh ka kalsan che i hlauh vang chauh a khatiang thu kha sawi ni ah ka ngai che a, chumai bakah Fiona chungchang ka la hrechiang lo hrim hrim bawk a" inveng ran chung hian ka ti a, "Ka en dan che nen a in ang lo ka ti ziah a, ka hrilh che kha i hrethiam turah ka ngai mai zel. Ka ngaihsak takzet zia i hria a, ka pha hauh lo. Mahse ka thinlung ti fawn a ti danglam tu tak tak zawk chu Fiona a ni lo" tiin a sawi ziah ţhin min hrilh nawn leh a, thudik ka hriat miau loh vangin rin ngaihna ka hre lo ţhin zawk a ni.

"Tommy-an a bum khan i rilru a na em?" tiin zawhna atthlak tak ka zawt leh a, min chhan duh pawh ka rin loh laiin "Ka thin a rim mah zawk. Ka ţhianţha berah ka ngai a, khatiang thil ti tur khan ka beisei ngai lo. A endan che ka hmuh khan a danglam tawh ah ka ngai a, mahse Tommy-a pangai bawk" a ti zuai raih a, kan tan a mi pawimawh deuh te vang hian kan na hma bik ka tih tawh kha. 

Amah ang tho hian keipawh ka na ve a, thawi dam deuh theihna a nih ringin mit ka chhing ta ringawt. Chau viau mah ila ka mut a chhuak thei miah lo lehnghal. Chutianga rei tak kan awm hnu chuan Msa zawk chuan min awm hlat a, mit ka men leh rual a min lo en dan ka hmuh chuan kan inlaichinna thlak danglam thei thil a thleng dawn tih ka hria. Thil tam tak kan sawi dun a, engkim ka sawi chhuak vek tawh a, a sawi ve hun a ni. Kan inlaichinna hi a tharin bul kan ţan pui leh maithei a, a tawp hlen maithei bawk. Bul ţan ţhat nge tih tawp hlen? Duhthlanna ka siam nawn leh theih nan a pahnih chuan ka hmaah a inchhawp leh ran tawh. 

"Ka hmangaih che" a ti nghet charh a, "Engtik lai a inţan nge ka hre chiah lo na a thudik ka hriat tak vang ni miah lovin hman aţang khan ka thinlung i nei daih tawh. Min hnehna a rei tawh" a tih hnu chuan muangchanga min awm hnaihin dim tein ka hmuiah a fawp a, min tihnat leh hlau ni awm takin min fawhna chu a nem thep a, lo chhang let ve mah ila a inla hrang leh thuai. Hman ang khan a duh dan chiah a kalpuiin min nawr lui tawh lo. 

"Hriat duh ka nei a, zawt tur che in dikna ka nei rih lo tih hre mah ila, i chhanna hriat ka duh takzet" a tih chuan "Eng nge chu chu?" tiin ka lo zawt thuai. 

"Hun ţha dang min pe leh thei angem?" ti a min zawh lai chuan a mitah ka lo en ran a, tih tak takna lo chu thil dang hmuh ka nei lo. 

"Ka tih sual ka siam ţhat leh theih nan leh dik tak a ka hmangaih ve theih tawh nan che hun ţha dang min pe leh rawh. Kan pahnih tan hian bul ţan ţhat lehna hun siam leh la" tiin ka biang a chul pahin hun ţha min dil leh a, "Hun min pe hmasa phawt rawh" ka lo ti thung. 

A ngaih a ţha zan lo ni a ka hriat hnu chuan "Engkim hi a thleng thut vek a, ka hriatna te a la pawt ruai rualin thil hrang hrang a in chawh pawlh nuai a, tumah an nat leh ka duh tawh loh vangin tunah chuan eng thutlukna mah ka la siam thei rih lo. Tommy, Fiona, nang leh kei, tumah hi na leh tawh lo ila ka ti. Chuvang chuan chik zawk a ngaihtuah phawt ka duh" tiin ka hrilhfiah a, "Ka hrethiam" ti mahse ka chhanna chuan a ti hmin zan lo niin ka hre thung.

"Keipawn ka hmangaih che" tiin ka inpuang leh a, "Kan nun hluiah te, kan nun hman mek leh hman zel turah te pawh engpawh lo thleng se la, engtin pawn awm la i chunga ka rilru put hmang hi a inthlak thleng thei dawn chuang lo. Mahse hun min pe phawt rawh, hman a ka lo tawrh tawhna kha chu thuhran ni se, Tommy vang ringawt pawh hian ka na ve takzet a, dawt ka hrilh lo ang che, ka hmangaih ang che hian hmangaih ve lo mah ila min ti na lutuk tho. Chuvang chuan nakin a kan inchhir lehna tur thutlukna kan siam loh nan kan vai hian hun thawl kan mamawh vek" ti a chiang zawk a ka hrilhfiah leh hnuah tawi ta nui chung hian "Min nghak thei angem?" tiin ka zawt zui zat. 

Ka chal a min fawh leh hnuah "Hun ţha vawikhat ka hloh tawh a, ka hun ţha neih chhun hi ka bawh pelh tawh lo vang. Ka lo nghak ang che" a ti nghet charh a, tunah chuan tlemin kan kum a upa ve deuh tawh a, hun ţha kan nei leh thei a nih chuan kan siamţhat theih ngai miah loh kha kan siamţhat ve theih tawh ka beisei. 

💛💜🤍💙💛💜🤍💙💛💜🤍💙💛💜🤍💙

Fiona in hunawl insiam lawk tur leh ka thawhna college bul mai a a awm thu min rawn hrilh chuan ka awl remchan lai tak anih vangin ka chhuak thuai a, college thlen hma deuh a ţhutna remchang a a lo ţhu ran tawh chu min hmuh rualin a ding hluai. 

"Ka tibuai lutuk che em? I lo chhuak duh a ka lawm tho bawk sia, diktak chuan khang thil thleng te avang khan min hmuh duh ka ring chiah lo va" a zawn ka thlen chuan inthlahrung dek hian a lo ti a, a kut vawnsakin ka ţhut rualin ka pawt ţhu ve. 

A lam hawi a nui chung hian "Ngati nge ka hmuh duh loh che i rin ringawt? I duh reng vang a i thlen tir a ni bik hleinem. Inthlahrung duh miah suh. Ka awmdan ţhin vang khan keipawn hrehawh ka ti ve tho a, hmuh che ka duh sa hrim hrim a" ti mah ila a la ţi dek tho. Ka bialpa ni lai mek nen a an thuruk a phawrh chhuah tak vang te pawh a ni mahna. 

"Ka nundan dik loh vang a i lo tawrh tawhna ah zawng zawng khan min ngaidam dawn nia, Msa nen hian tihnat cheu ka duh lo takzet a, mahse i rilru tur ngaihtuah miah lovin ka hnaih lui tlat a, ka pa in ka nutei te hnen a min dah lai khan tlan chhuak lovin lo awm ţha hle hle ila chu Msa nen khan in inţhen kher lo maithei. Mahse ka la naupang em a, hrehawm ka tuar thei lo va, ka nawmsak na tur ni a ka rin ka pan chawt a, lo inthiar fihlim hmak ni ila chu hlim deuhin in awm reng thei tur a nia, tihsual a siam ţhat theih tawh si lo va, pawi ka lutuk" tiin a phun sep sep a, a tawrhna te langchhuak ve mahse chhel ka la ti tho tho. Kei aiin kawng tam takah a chhel zawk daih. 

"Engkimah hian in mawhpuh vek duh suh. I thiam loh pakhatmah a awm hleinem. Msa nen a inlaichinna nei tur khan keiman thutlukna ka siam a, Tommy pawh a ni tho. Inlaichinna neih pui tur a duhthlanna siam tu chu keimah bawk ka ni. Ka awm loh hnu khan in pathum inkarah eng nge thleng zel la hre lo va, Msa'n a ngaihsak ang bawk che hian nangpawn i ngaihsak ve tak tak tih ka hria, Tommy pawh i haw viau a ni maithei a, mahse fa hial in lo neih dun tawh vangin i hmangaih lo thei chuang lo ang" tiin ka ngaihdan leh ka rilru diktak ka hrilh a. 

"Ka thiam loh a nihna chin tam tak a awm tho a, in inţhen chhan kan hriat loh miau vangin rin zawn dan thlengin kan thiam lo a, Tommy-a thil tih a nih rinna phei chu kan nei lo hrim hrim. Ka naupai lai ngei ti tla tur a min tih hnu pawh khan khatiang thil ti duh turah khan ka dah chuang lo. Hre lo in kan awm mawl tawp a, hrilh hriat dan tur che lo ngaihven reng ila, engkim hrilh vek che ila chuan a fel fai deuh maithei. Msa tak phei hi chu a nu bula awm tur a a rawn kal lai khan khami khuaah khan pastor in ka pa a awm a, a rawn kal hma aţang tawhin an inah ka leng fo. Ţhian kawm lawr chi ka nih loh vangin Msa naute ho kha ka kawm mai zel a, Msa nen khan kan inrual chiah a, kan school a rawn lut ve nghalin class khatah kan awm dun a, a awm ţha duh vak lo bawk nen a nu khan zui zel turin min hrilh ţhin a, kan infiam dun a, thil sual ti em em lo mah ila zan a chhuah ruk te kan hrat a, lehkha kan zir dun ţhin bawk a, ka sawi tawh ang khan kan inkarah mipa leh hmeichhe inkar a hmangaihna ang hi a awm ve lo. Chumi ti chiang tur a lokal chu ka ni pakhat a, Tommy-a chungchang ka hrilh ni che kha thupha chawina hun ka nei lo a, chu chu ka lokal chhan dang leh a ni. In inkar a buaina a awm chhan ka ni zel a, ka rilru a nawm theih ngang loh vangin i buai leh buai loh pawh ngaihtuah lovin ka lokal tawp mai" a ti melh melh a, ka hriat hnu tam tak awm mahse huat rukna nei tawh lovin uluk deuhin ka lo ngaithlaksak ve tawh a, a hma ai daihin ka hrethiam thei zawk. 

"Thupha chawina chhan tur i nei lo ka tih tawh kha. Keimah ang bawkin engmah i hre bik lo va, i kut ngei a i tih chu nise thuhran, i thiam loh ni miah lo ah thupha chawi duh tawh suh" tiin ka lo khap vat. 

"Keimah vang a nih loh zia min hrilh reng mahla in inţhen chhan leh hmelma ang mai a in awm chhan ka hriat hnu kha chuan keimah vang a ni tel tlat a ngaihna ka nei a, Msa nen hian in hlimna tur um ve tawh ula, keimah vangin in hlimna tur a thil tih bansan miah suh u. Duhthlanna siam ngai a i awm a nih pawhin ka thil hrilh ho che kha in nghawng tir suh. I thil tih tur hrilh ngam tur che ni miah lo mah ila i thinlung kha duhthlan tir rawh. A tawp khawkah chuan kan hmangaih tak tak te hnen aţang chauhin hlimna kan hmu thei ţhin. Keipawh hnathawkin ram dangah ka awm tawh dawn a, kan inhmu khat tawh viau maithei" a ti a, a nuih zui sen sen laiin mak tiin ka phawk hra thung. 

"I fapa hi engtin nge niang?" tiin ka zawt hmasaber. 

"Ka nu leh pa ka be fel vek tawh. Ka awm loh chhung chu lo awmpui rih an hnial lo a, ka nu te hnenah ka dah ang a, mahse reilote chhung chiah a ni thung ang. Min ngaih loh phah ka hlau a, ka awm loh san rei lo ang" a tih hnuah kan hmasawn a thlir vang vang a, a thil tih tum chu a hreh ve viau a ni tih ka hre thei nghal mai. 

"Engtin nge awm i tum? In luah man a to thei si a, engtia tih nge i tum?" ka lo ti leh a, "College ka kal lai khan ţhian pakhat kawmngeih deuh ka nei a, kan inbe ţha leh a, a awmna hmun ka hriat veleh ka chanchin tlem a zawng ka hrilh a, amah fin rih turin min râwn a, hnathawh tur min zawnpui a intiam bawk a" tiin dam dapin min hrilh a, a tum nghet tawh a nih hmel a, dan buai ka tum lo. 

"Nia thawh tur chu i hmu mai ang. I fapa pawh i nu leh pate bulah a awm thei dawn a, a ngaihtuahawm loh turah ngai ang" ka ti ta zawk a. 

"Ngaihtuahawm loh ang, ka tel ve dawn lo a, naupang chiah chu an ngaithei em em ang. Ka sawi kha aw, engahmah min vengthawng duh miah suh. Thutlukna engpawh siam la ka pawmpui vek che. Hahdam deuhin awm la, tu mitmei mah veng suh. Mi pahnihin hmangaih an inţawm chuan pakhat zawk zawk an nat a ngai tih hria la, anni lam ngaihtuah lovin i hlimna tur lam i pan dawn nia" ti a min chah hnu chuan "Tehreng mai, nangpawh ram dangah daih pawh awm la in enkawl ţha la, i awmna apiangah hlimna i zawng ve tho dawn nia" ka lo ti ve thuai. A melh ngai melh reng chung hian a bu nghat nghat a, "Kan pahnih hian hlim kan phu ve tawh a, hlimna tak tak nei turin hmalam kan pan tawh dawn nia" tiin a phun sep a. 

Fiona nen kan inhmuh aţang khan kar thum vel lai a liam leh tawh a, a chanchin ka la hre leh lo. Msa hnen aţangin an in luah lai mek an chhuahsan tawh thu ka hria a, a tumna lamah khan a kal ta nge ka hre lo. 

Ban veleh Mapuii nen kan haw rual a, gate kan pel awrh tihin "Khipa khi eng nge a rawn tih ve ziah a? Hman deuh a i thil min hrilh nen khan ka khaikhin a, Msa i sawina a ang ta riau mai" Mapuii chuan nui vur vur chung a tih pahin chhak lam a melh a, car bulah nghah nei ni awm takin a lo vei kual leh chhen tawh. 

"Min lo nghak lawk rawh" ti a Mapuii ka hrilh hnuah Msa awmna lam panin ka kal chho hlawk hlawk a, min hmuh veleh ka sawi tur hre lawk ni awm takin a lo nui nghal ngawt lehnghal. 

"Eng nge i rawn tih leh tak? Ni khat danah zel i rawn kal a, nimin piah lawkah i rawn kal tawh kha, tunah i rawn lang leh a" ka ti nang nang a, "Kan bang hma a, haw tlang dawnin a la hma deuh sia, ka rawn lang leh. Vawiin chu thil kan ei dun tawh dawn mi?" a lo ti liam satliah. 

"Nimin piah lawkah pawh itih tawh kha" ka tih lai mekin ka phone a ri a, min rawn biak tum tu hming ka en mek lai chuan hre lawk ni awm takin "Amah bawk em ni?" tiin min lo zawt thuai. Phone ah ţhat leh pahin Tommy bawk a nih thu ka hrilh a, "Nitin min rawn biak a tum ziah a" ka ti a, "I chhang em?" ti a min zawh chuan ka lo bu nghat. 

"Eng nge a sawi?" a ti leh nghut a, "Min biak a duh thu a sawi" tih ringawtin ka chhang. 

Tommy-a chungchang min zawt zui tawh lovin intithei zetin ka hmai zawnah ticket pahnih a lek va a, "Eng nge ni?" ti a ka zawh chuan "Inrinni ah ka nu te khuaah ka kal dawn a, i lokal ve duh angem ka ti deuh a" a ti a, min rawn hmain ticket a la lawk vek tawh tho sia. 

"A mak thei" ka ti dek dek a, "Ka nawr lui lo ang che. Mahse ka nu min chah angin inrinni hian kal ka tum a, i lokal ve chak ţhin em a, ka hruai ang che tiin hmanah khan ka tiam tawh a, sumo in kan kal dawn nia kan ti bawk a" a lo ti zung zung. Keipawn ka la theihnghilh lo, a peih lo chung chung sumo a kal ka ti lui tlat a, a remti ta nge nge a nih kha. Khami ţum a a thutiam kha tunah tih hlawhtlin a tum chiah. 

Ticket ka lak veleh "Cham rei a ngai lo. Tun  tut tut a chhanna min pek a ngai rih lo a, lo ngaihtuah la, ka rawn lam dawn lo che mahse i rawnkal hma ka lo nghak ang che" a lo ti leh a. 

Chhanna pe rih lovin ka haw a, Tommy-a pawh ka be leh chuang lo. Mut dawn a phone ka en chuan a message a lo awm vang a, "I la thinrim tih leh in bengdaih nan hun i mamawh tih ka hria a, ka thutiam hlenin ka ti buai lo reng che. Mahse kar thum ai tam mah ka hmu tawh lo che a, ka nghak thei tawh lo. Min pumpelh tawh lovin in sawifiahna hun min siam sak rawh. Inrinni i awl dawn bawk a, i hman chuan dawrah lokal rawh. Engkim ka hrilhfiah vek tawh ang che, kan ti ti dunna ţhinah khan ka lo awm reng ang" tih hi a rawn thawn a, dawhkan a ka ticket dah ka la a, pahnihin ka entawn zak zak. Fiona sawi ang khan pakhat zawk zawk an nat a ngai a, a nih loh chuan kan vaiin kan na vek ang. 

Inrinni zingah chuan hma takah ka tho a, ka tih tur diktak ni a ka ngaih tih tumin in ka chhuahsan. Nidang aiin mipui an tam lehzual a, chuti chung chuan min lo nghak reng tu lam ka pan ding ngat ngat tho. Vei kual sek chungin a sana bun lai a bih sek a, ka awm tawh a ni tih hriattir tumin aw ka thian kharh a, "Tommy" tiin a hming kan lam zui a. 

CONT...