NANG CHAUH-LAST

NANG CHAUH-LAST

Msa min tih tir tum awih lo lutuk a "I mawl em ni?" ka tih ţhat chuan a lo nui hawk. 

"Hman a ka tih ang tih ve i chak miau hek. Fiona nen a min rinhlelh tlat ţhin lai khan keichu helai phul hmunah hian ka lum tual tual zel" a ti duah. 

"Ka ringhlel reng bik lo che aw. A aw ka hriat reng vangin ka thik zawk anih kha" ka ti ţang ţang. Ka thik nasat ţhin zia a hre sa vek a, ka zep peih lem lo. 

"Umm..i thik lo..sawi tawh lo teh ang. Ka rualin i lokal ve duh mial a, ka nghak chhuak che ah ka ngai" inringtawk tak a a tih chuan "Thingtlang boruak ka hip chak vang mai mai a ni thei tho a" tiin ka lo chhaih buai. 

"Ni lul suh se...buaina kan tawh leh hmain nupui ah ka nei vat dawn che" a ti leh thawr tawh. 

"Em em che hian...ka thutlukna ka la hrilh reng reng hleinem che" ka tih chuan insiamremin hnunglam aţangin min kuah a, zan boruak nuam tak leh kan inkar boruak muang lutuk chu a inrem ngawih ngawih. Ţawngkam thlum tak tak hmang hluak hluak lo mah ila boruak a muanawm ngawih ngawih. 

"I sawichhuah hun ka nghah che chuan tar lamah nupui ka nei ve thei chauh ang. Sawi lo mah la hre tawhah ka in ngai" a ti hmak. 

Thli a thawt heuh heuh lai chuan a pang lum nghengin thlamuang deuhin ka ţhu a, hetianga kan awm lohna chin hi ka hre tawh lo. Kan inhmuh leh hnuah lah thinrim na pai ran chung zelin kan inhmu a, tun ang a inhrethiam tawn tak a kan awm lohna rei tawh zia hi. 

"Tommy hi i hua em?" ka ti chhuak phawng a, Msa tan a a huatawm tur zia hre mah ila haw lo se ka la ti fan. 

"Hua e" a ti hmuk. Ka rindan chiah. 

"A thil tih zawng zawng kha, a huat vang ngawr ngawr che anih ka ring lo. Nih leh, kan chung a thil tisual tu te hian hun ţha dang neih leh an phu i ti em?" ka tih kual leh vel hnu chuan "Tommy-a i sawina anih chuan midang ngaidam thei lo khawp a fel famkim kan awm lo. Ka hua a, ka ţhian a nih angin ka la ngaidam thei mai ang" a lo ti a, a rilru a ţha ka tih ţhin kha. 

"Mi chuan kan first love te hi kan nei thei lo hrim hrim niin an sawi ţhin a" ka ti leh daih. A hmel en tum a ka thlek chhoh ha lai chuan ka hmui a lo fawp zeuh a, chu chuan min ti nui hak. 

"An thusawi dik loh zia kan lantir a ngai anih chu" nghet churh a a tih chuan lu ka bu zeuh. Ka first love a nia, inţhen mah ila engtin tin emaw inhmu in kan inbe leh zel. Ka neih theih ka rin tawh miah loh hnuah tunah pangai takin kan awm dun leh a, khuanu samsuih an tih ang hi kan nih ka ring ve hial. 

Tlang a rei ngial kan awm hnuah kut insuih rialin kan haw thla a, kan mi tawh te chuan min hre ngai lo a ni tih hriat takin min en ha ha hlawm mai. 

"Khua ah hian i awm rei ve tho sia, an hriat loh hmel hlawm che e" tih pahin tlang a leng ve dang min en leh ha ha ţhin te chu ka en kual a, "Naupang an nih kha" a lo ti hluk. Hriat loh nih chu a duh lo ve hle aniang "Puitling chin chuan min hre vek..khang ho kha chu kan tlum ber te rual lek lek an nih kha" a ti zui dut dut a, ka nuih a za angreng. 

"In va duh tawk hma ve" tiin inchhung kan luh rualin Nu Tei'n min lo chhawn vat. Tv an lo la en ţhap. 

"Nia..zanah chuan engmah a hmuh chian theih tak tak loh. In ah awm ila a nuam zawk ang" ti a chhang ve vatin Emily bulah ka ţhu a, mihring hi vawikhat hmuh na a ngainat nghal ka nei ngai meuh lo va, Emily erawh ka ngainat zawng tak a ni. A ţawng zawt zawt lo na a a khat tawkin min be ve reng a, nelawm takin a nui seih zel bawk. 

"Dik chiah...vawiinah sumo in chuang rei bawk sia, i duh leh han mu hahdam daih rawh. Sawi ngam si lo hian i lo chau ru lutuk palh ang" Nu Tei chuan nui chung hian a ti leh a, mut hahdam ka chak viau na a an la meng vek sia, nuam ka ti chiah lo. 

Ka ţhu ve reng a, Msa lah chu a pa nen an ti ti tui leh nasa tawh. Emily zawk chuan "U Rebecca, lokal rawh mu daih ang. Ka pa leh ka u te ti ti hi a ngaihnawm loh thei sia, kan zawm ve theih chi an sawi ngai bawk si lo. In hne hnawk na tham khawp a rei in leng tawh tho a, mutsan ang" a ti fiamthu a, Msa chuan a hmuh phak a awm reng turin min duh tih hre tho mah ila a nu leh pa awmlai chuan mawi lo leh hmuh hrehawm khawpin min thlakhlelhna a lantir lo. 

Amah ka va en chuan "Han mu ru..i chau ang. Zingah ka kaitho hma dawn che" a lo ti then a, ngaih ngam deuhin Emily chu ka zui. 

Felfeli pindan piah chiahah a pindan a awm a, a kal tlang mai dawn emaw ka tih laiin Felfeli pindan zawkah a lut tharh. Ka mutna turah chuan ţhu in keipawh a bulah ka ţhu thla ve thuai. 

Ţawngchhuah hmasa zawk nih hreh ni awm tak a kan ţhut dun vang vang hnu chuan upa zawk ka ni bawk a, "Lehkha i zir ve tawh lo em ni?" tiin ka be hmasa. 

"Aw..lehkhazir ka peih lo a, ka tui hlawl lo. Puan ţhui ka zir a, ti hian inah puan ka ţhui ţhin" a ti a, khawl ka hmu nual tak alawm. 

"A ţha lawm..kut a them thiam chuan awl a awm mang lo va" ka ti a, chutiang a ka biak hmasak takah chuan "U Fiona a dam em?" a ti sep. Ka rin lawk ang chiah a ni. 

"Aw dam e..fapa a nei tawh a, a fapa kha i hmu tawh em?" zangkhai deuh a ka tih chuan min lo nuih seih a, a bu nghat bawk. 

"Thlalak ah ka hmu tawh a, an lo zin ngai lo a, ka zin ngai bik si lo. A takah ka la hmu lo. Rintea leh Felfeli te chuan an hmu tawh. A lawmawm lutuk an tia, an sawi reng zel" a ti siam siam. Msa nau in Fiona chanchin a sawi chu ka thik miah lo. Thik a hnekin ka khawngaih takzet tawh zawk. 

"Lawmawm lutuk..ka hmuh leh veleh Fiona chu ka lo biak ang che" ka tih chuan "A fa neihna pa kha ka ngei tlat. Nei leh duh mang si lo, U Fiona a ti khawngaihthlak" a ti hlak. Tommy a rawn lang zawk mai. Engtin nge a tih zui zel ka hre lo va, a la in ngaihtuah ve ngei ang. Mipa a nih angin thutlukna dik a siam ka beisei tlat bawk. 

"Nia, a ngeiawm alawm. Mahse, an fapa vang tal pawn an la inzawm leh thei em em ang" ka tih chuan min rawn en kiau in "Ih maw, i awih lo maithei. U Fiona ka khawngaih lutuk vang hian tun thlengin a fa neihna pa nen an inneih a, in hmangaih deuh a an awm dun theih nan ka la ţawngţai ziah" a ti chhuak hlawl mai. 

Nui sakin a hnungzang ka chul thuak a, "I ţawngţaina chu engtik ni ah emaw Pathianin a la chhan sak ngei ngei ang che Emily. Ring tlat la, dil sak zawm zel rawh" ka ti dap dap a, a fel reuh takzet a ni. Fiona a ngaihtuah em em danah hian an tan a pawimawh viau anih ka ring bawk. 

A sawi lawk ang ngeiin zing hma tawkah Msa'n min rawn kaitho. Ka peih chung chung min tung tho a ni ber. 

"I ninawm e...zingkarah hian mut a tui duh bik a sin" ti nang nang chungin hmai phih turin ka chhuak a, a lo nui hawk thawm te chu ka haider hmak. 

Rin loh deuhin an lo tho vek tawh a, ka lai lek lek hial zawk. Emily chu gas bulah dingin thil chhuan a vil a, a la ham bai bai. 

"I va tho hma peih zawk ve. I peih chen chen mut tur che lawm. Va inphih harh rawh hei Mami'n thingpui a lum mek" Nu Tei'n a lo ti sawk sawk. 

Lai ru deuh chungin bathroom ka pan a, kan in ve chu tunang hunah chuan a la reh ţhuap zel. Thingtlang hi fiamthu thawh nan kan han hmang ve ţhin bawk tak na a kei, khawpui ai chuan nuam ka ti daih zawk. Hman a ka pu te khua a kan zin pawn cham hlen ka dil chiam tawh anih kha. A mi cheng te an la inpawhin an taima bawk si, nula tlangval awm mai mai an tam lo khawp ang. 

Thingpui inzawhah Msa nen kan inzui chhuak a, rin ang ngeiin kawngkhar a inhawng fur tawh.

"An va han tho hma hlawm em em?" ka tih chuan "Mut rei hian sawtna a nei hleinem" a lo ti thuai. Hmuhnawm leh thil mak thlir tur awm em em lo mah se boruak a muangin a nuam hle.

"In khuaah hian college awm ve tawh se chu insawn ka dil rum rum duh ang" fiamthu a tih pah a amah ka en chuan za lo deuhin a lo ţhen suk. 

"Nang chu ka awmna apiangah i awm ve zel tawh ang" ti nghet churhin min kuah a, mi tawh tur an awm pheuh pheuh tawh vangin min thlah leh thuai. Ka upa ve tawh viau na a mi hmuh a inkuah a, inkaih vel te hi ka la zak tlat. Tin, mi mit ti kham zawng a ngaihzawng neih hi ka thil hlauh ber a ni. 

Chaw lah chu kan ei hma khawp a, chawhmeh ka suah ţhat ngam loh hlau a Nu Tei'n min suah sak chuan Msa'n "I fapa ka awm ve reng aw Nu Tei" a lo ti uang a, min thik der vel te chuan Pa Biaka leh Nu Tei te a ti nui ve huk huk. 

"Chaw ei khamah ram lamah an liam leh sup sup ang a, kan khua chu chhunah a reh tlawk tlawk zel. Nuam i ti lo maithei a ni" Nu Tei chuan a ti siam siam a, "Hmun reh ka ngaina zawk. Nuam ka ti lutuk ang" ka lo ti thuai. Ţawngkam ka thiam lo lutuk hi engmah ka sawi mawi thiam lo. 

"Anih chuan i lo zin leh vat thei tihna. Cham hlen turin lokal tawh la aw" awmze nei zet hian a ti a, zak viau mah ila "Nia, chawlh ka neih leh theih veleh ka lokal ang. Krismas ka rawn hmang lo ang tih pawh a sawi theih loh" ka ti a, nuih hak hak pah a sa ti suah ka tum chu Msa pa, Pa Biaka nen kan suah tum a lo in ang chiah. Kan fian a in nghawk a, sa ti chu a si ve ve bawk. 

A ngawih reng vangin "A bul chiah a mi hi suah ka tum a" ka ti ban charh. Ka va han zak tehreng. 

Pa Biaka tih ngaihna hre lo lutuk pawh chuan "Suak hmasa rawh..i duh ber suak ang che" a ti ngawt pek a, ka tan suah a nuam leh tawh bik si lo. Fian la lovin ka kut ka la let a, ka hawi chhuak ngam tawh lo. 

"I pa Biaka hi chu a ţawngkam thiam loh luatah mi a ti zak fo. Amah leh amah pawh a inti zak ngun" ti hlak hlakin Nu Tei chuan min rawn suah sak leh a, ka fian min pe let bawk. Kun tlat chungin hmarcha ro an kan leh chu ka ei a, chu chuan ka hnar a ti za. Ka hahchhiau mai ang tih hlauin hmui ka chip tlat a, thaw lo ten ka awm leh rih ţhin. Min ngaihtuah a ni chek ang chu, anni ho chu an reh ţhuap a, ti ti se, nui vak vak se ka tih zawk tehlul nen. A tawpah phei chuan ka chaw bar lohna lamin ka hnar ka hmet phui ta ringawt. Ka taksa, ka biang leh beng thlengin a sa chhuak vek a, ka zak lutuk chu ţah te lam lam a chhuak. 

Pa Biaka leh Nu Tei an kham takah chuan ka hawi chhuak ve hram a, min lo nghak reng tu Msa chuan "I ţap em ni?" a lo ti sup. Ngaihţhat loh hmel zet a min melh lai chuan lu ka thing a, ka insum nasa lutuk khan ka mittui a kai chhuak aniang, a baw chhuak lo na a, a tling pam tih chu keipawn ka hria. 

"Zak duh suh...keipawh khaw ţhenawm a ka mikhual naah sa ti fei deuh ka ei a, an pa ber thlengah a per lut daih tawh alawm. Sa in inchuh pawh a ni lo a, in suah tum a in ang ringawt. A zahthlak loh reng reng" tiin Emily-in min lo hnem ve melh melh. Kan suah tum a in an ai mah chuan Pa Biaka ţawngdan khan min ti zak zawk. Pa ti ti thiam lo tak zawng a ni ve khawp ang. 

Chhunah chuan chhuak lovin inah kan tawm. An ţhenawmte lo a feh ve turin Nu Tei a chhuak a, Pa Biaka erawh an pindan ah lehkha a chhiar. Emily chuan puan a ţhui a, an ţhenawm ten an fate school uniform an rawn ţhui tir. Felfeli pindan tukverh aţanga pawn lam ka thlir lai chuan ka bulah Msa a rawn ding a, mitmei ven tur a awm tawh lo bawk a, a ban tha ngah zet a ka kawng a rawn kuah rual chuan a awm ka lo ngheng ve sat sat a, ka hnungah a ding a ni mah tawh zawk.

"Min van ngai tawh" a tih chuan a fiamthu tih hre tho mah ila "Hetiang hmun reh a awmdun reng hi i chak ve em?" thutak zet a ka lo tih chuan ka chhipah a khabe nghatin a thaw chhuak ham ham tih ka hre thei. 

"Chak ve e..eizawnna vangin duhna hmunah a awm theih si loh a, engtikah nge kan inneih ang?" a lo ti leh daih. 

"A mak tut tut e..inneih lam lo chu sawi tur i hre miah a ni maw?" ka tih chuan "Ka uang lo" a ti bul hmuk. 

"Ka uang bik hleinem. Ka in ngaihtuah nasa tawh a, keipawn inhrem reng ţulin ka hre lo. Zalen ka duh tawh a, ka hmangaih ber kiangah, inveng run lo a thlamuang deuh a awm ka chak tawh. Ka hrechiang thawkhat tawh che a, hriatchian belh tur ka neih awm ka hre tawh lo. Mahse, ka nu a la dam a, Lucy-in lehkha a la zir bawk. Lucy talin zir puitling se, rilru dam deuhin pasal ka nei ve thei ang" ka ti dap dap a, ka awm loh chuan an buai lutuk ka hlau a ni. Ka nu lah fate pawisa dil hreh chi a ni bawk si. 

"Kan in nghak rei tawk tawh. Innei mah ila Lucy chu kan zirtir thei tho alawm. Hman aţanga ka nau ve tho a nia" a ti ţang ţang. 

"A dik alawm...kan innghak tawn rei a, mahse, a thlawn hleinem. Thil ţha a hrin chhuah tho hi. In nghak ru reng lovin kawppui dang lo nei thawt thawt hman ila chu thudik kan hriat hnuah inchhir deuhin kan awm tlawk tlawk mai dawn sin. Dawhtheihna hian rah ţha a chhuah ţhin an tih kha, min nghak rei tawh miah lo ang. Min ring rawh" a rilru hneh ngei tumin ka ti malh malh. 

"I nu ka dil lawk hrim hrim dawn. Rem a tih hunah ka ngaih a ţha thei chauh ang" a tih chuan ka hnial duh ta bik lo. 

Ka kawnga a kut insuih chu ka vuan a, "Ka ring lehzual tawh che a, thil atthlak ka ti tawh hauh lo ang. Engtik ni ah chuan ka pasal i la ni ngei ngei ang" vin hauh lo hian ka ti fak fak a, "Mipa dang belh ngaiin ka siam tawh lo ang che" a ti zawi ruih a, ka chhip a fawp zeuh bawk. 

Msa te khua aţanga kan haw zan chuan Tommy-an min rawn be mial a, "Msa inah ka kal dawn" a rawn ti chu ka mu hle hle lai ka ţhu chhuak hlawl.

Rin lawk nei sa ranin "Eng nge i tih dawn? Buaina in lo nei leh ang e" ka ti chul. 

"Nei lo ang...unau kan nih hi ka hrilh dawn. In unau zui viau dawn lo mah ila hriat ve a phu. Mahni hma ka sial zia ka hria, ka bum nasa tawh a, kei mai ni lo, tuman an bum tawh loh nan ka hrilh ang" a rawn ti a, dang mah ila awmzia a awm dawn lo tih hriain aw ka lo pawh ve mai. Msa chuan a tuar thiam em ang chu. 

Kar khat a liam leh hnu pawhin Msa a la rawn lang lo. Kan inbe reng a, Tommy-a chungchang kan sawi ngai lo. Aman a sawichhuah hma chu sawi ka tum bik lo va, min rawn hmuh hun ka nghak tawp. 

"Rebecca ka rawn haw a" Fiona a ni. Phaiah khan a kal hmanah ka ngai a, a awm rei hman lo viau anih hmel. 

"Ngati teh thut nge? Tommy vang em ni?" ka lo tih chuan "Ni nang...Tommy nen kan inbe ngai lo hrim hrim. Ka nu in tihtakzetin min rawn ngen a, Bawihtea a awm thei thlawt lo niin a sawi. Nitin min ngen tlut tlut takah chuan ka awm tui thei ngang bik lo a, ka rawn haw leh tawp" a rawn ti a, min hmu tur a a rawnkal hnu a kan inbiak leh hmasak na ber a ni. 

"Anih chu..a awm theih ka ring lo reng a ni. Helamah thawh tur a awm mai ang. Reilote tuar rih la, in nufa eikhawp hlawh theihna chu a awm em em ang" ka ti a, Fiona a la biak duh chuan loh vangin Tommy ka dem ru hle. Mahse, hmangaihna hi nawr luih chi a ni si lo va, kan hmangaih tur kan thlang thei bawk si lo. A chang chuan ka haw ngawih ngawih zel. 

Ka hna bangin kan inchhung a Tommy a lo ţhu ka hmuh chuah hauh nghal buan buan ka chak. Min lo nuih ve tak na a a chauh hmel khawp mai. 

"Lo inkawm teh u..ka nu phun hmain a rawngbawl ka va pui ang e" Kimpuiin a lo ti thuai a, inthlak hmasa lovin Tommy a hma zawnah ka ţhu. 

"Msa nen chuan in sawifel thei em? Chanchin in rawn sawi lo ve ve a" tiin bul ka ţan. 

"Aw..ka hrilh a, a awih mai lo. Ka bum leh turah a ngai a" tiin a nui hawk. Sawi zawm zelin "A pa a zawt nghal rum rum a, kan pahnihin kan kal. Dawt ka sawi a ngaiin Msa'n ka tel ve a duh tlat. Thudik a langchhuak ta reng a, putara chuan a fa ngei ka nih ve thu a sawi. Khami ni kha Msa nen kan inhmuh hnuhnun ber. Putara chu engmah ka dil tawh lo a, ka duh zawng chu Msa'n thudik hria se tih a ni mai" ti a min hrilhfiah takah chuan "A thinrim em?" ka lo ti thuai. 

"Thinrim hran lo...mak chu a ti khawp mai. A nu tak hriattir a duh lo a, unau kan nihna a hria a, tikhan a tawp a ni mai. Sawizui vak ngai awmin ka hre lo" a ti a, a ngaih awlsam teh lul nen, a chauh hmel takzet tho bawk si. 

"Fiona a lo haw a" ka tih chuan "Ka rawnkal chhan ber a ni" a lo ti sup. 

"I be ta em? Eng nge in chanchin?" tiin hre lo awm deuhin ka zawt. 

"Be lo...Bawihtea chu ka ngaihven. Ka khawngaih a, pastor nupui hnenah midang hriat lohin Bawihtea enkawlna tur ka pe ţhin. Fiona takngial pawn a hre lo. Anu erawh chuan ka fa anih thu a hre tawh. Fiona hi ka duh hauh lo, hmangaih na phei chu a hla lutuk. Mahse, ka nei dawn" a tih chuan ka ţhu ngil awt. 

"Engmaw?" ka ti hluai a, ka ngaithla sual anih ka ring lek lek. 

"Ka nei dawn..kar khat chhung lek khan thil tam tak a thleng. A nu duh lo viau mah ila fate na na na chu a hmangaih loh theih loh. Ka thli thlai reng a, an mo ten an enhran zia ka hmu a, Fiona vahten an nuihzat ţhin dan te pawh ţhenawmte hnen aţangin ka hria. Ţawng duh fe fe kan tam a, ţhenawmte chhiatna chang ran tawk lah bo lo. An ţhenawmnu in an chanchin a sawi duh par par khawp mai. Mahse, ka nu" ti zuai raihin a hmai a tuai puat a, thawpik hmel zetin a thaw chhuak hawk. 

"Fiona te ţhenawm nu in Bawihtea hi fahrah awm naah dah se a nuam sa zawk ang a tih khan eng emaw zawng takin min khawih a, min chhun a ni zawk mah. Naupangte, mi pangai ang pha lo lehnghalin hrehawm a tawrh nasat dan tur ngaihtuah thlengin ka khawngaih ve hial. Pawisa ka nei a, ka fapa nawmsak leh nawmsak loh chu ka kutah a in nghat tih chiang deuhin ka hria. A hma kha chuan nang chauh ngaihtuahin nangmah chiah ka hmu ţhin a, ka nu hrehawm tawrhna nen. Ka thlah che a, ka fapa ka ngaihven a, a hrehawm tawrhna ka hmu fiah nghal em em a" tiin za lo zetin a nui ro hak. A inhuat hmel ngawih ngawih. 

"Rei ngial ka ngaihtuah hnuah thutlukna ka siam. Pastor nupui bulah Fiona ko haw turin ka hrilh a, duh lo sa teh mah ila Bawihtea vangin ka nei dawn" a ti nghet churh. A tumruh hmelin a duhna chu kaltlangpui a tum a ang hle. 

"Ka nu hnenah engkim ka sawi a, kan inhau nasa. Amah ka hmangaih ve lo ang hialah ngaiin thih daih a duh thu thlengin a sawi. Mahse hnungtawlh thei ka ni tawh lo. Bawihtea lahin min rawn be tluk tluk a, reilote chiah ka duat chung pawhin min hmuh loh hlek chuan min ngai zel. Pa leh fa inzawmna ngheh zia ka hriat phah a, Msa pa in min thlauhthla hmak thei hi mak ka ti lehzual. Mihring kan inang lo a, i sawi ang khan ka pa ang a awm ka tum lo. In ka zawng ang a, nupui ka nei ang. Ka nu chuan duh leh min zui se, ka pahrawn a hmangaih viau a, a kalsan thei lo anih leh ka pahrawn kiangah awm se. In hrang aţangin ka ngaihtuah tawh mai ang" a tih chuan ngaihţhat lohna lian tak ka nei tho. Ka kalsan vang a nupui neih tum anih ka hlau a ni. Rilru nat lai hian atthlak zet a chet a awl a, ka paltlang vek tawh. 

"Ka dang lo ang che...ka thurawn lak tum a rawnkal i nih phei chuan sawipui dan che ka hre miah lo. Fiona hi nei la ka tih rualin a hrehawmna a kiam phah loh ka hlau tho bawk si. Mahse, nupa ni a, in khat a in chendun na na na chuan i la hmangaih thei mai ang" ka ti mawl tawp. Nun hi a hahthlak a ni. Kan mihring pui te rilru lah inlet butin a inthlakthleng zung zung a, Tommy-a thutlukna siam hma lutuk te hi mak ka ti zawk. Amah ka duh vang ni lovin nupui neih a tum hma lutuk chuan ngaih a ti ţha lo.

Kar hnih a liam leh meuh chuan Msa pawh a rawn lang ve ta. A buai thu a sawi chu ka hriatpui thlap bawk a, titau bur bur rual ka nih tawh loh vangin ka lo thinrim lem lo. Ka nu nen inpawh takin an ti ti a, naupanlai aţanga a mi hriat na na na chu ka nu pawn a ngaina khawp mai. Kan retheih lai khan a theih ang angin Msa hian a pui ve ţhin bawk. 

Ka nu hnen a min neih a dil chuan ka lo ip chawih a, ka nu pawh a hamhaih khawp mai. A beisei loh lutuk thu a dawng tih hriat zetin a phawk hra a, a mitmeng a buai nak bawk.

"Kan zin haw khan rawnkal ka tum tawh. Boruak dangin min tlak buak leh a, school ah ka buai a, ka pa a damlo bawk. Hman veleh ka rawnkal nghal" a ti nawn leh a, ka nu chu ngenngawl zetin a en ka ti mai, ka nu tan pawh han phal loh a nuam lo ngawt ang.

"Tun a neih nghal ka tum lo. A inpeih hun ka nghak ang. I phalna la tur chauhin ka lokal" thutak zet hian a ti leh a, inneih a sawi khan a lo ti mai mai lo khawp anih hi. 

"Nia Rebecca-i pawh tleirawl a ni tawh lo va, han ui beh tlat rual a ni tawh lo. Misual lutuk an nih lem loh chuan fate duhzawng duhpui loh ngawt thu a awm lo. Kan neih tur an ni lo a, a nei tur tur berin a duh chuan ka hnial ţalh lo ang" ka nu'n a tih takah chuan Msa chu a thaw huai niin a lang. 

A haw tur thlah tum a ka chhuak chu kan inkawt thim laiah min pawt dingin min han kuah hram a, a lungphu zawnah min kuah beiin "I nu phalna ka nei tawh bawk a, la innei em lo mah ila ka ta chauh i ni tawh" a ti sup a, nui ver verin a awm tihrawl khauh ţha zetah chuan kut ka dah a, a lungphu dup dup ri chu ka ngaithla pah bawk. 

"Keipawh hian tum viau ţhin mah ila nang chauh lo chu mipa dang hmangaih ka nei thei bik lo. Ka hmangaih ber ka neih theih nan ka rinawm ang a, rintlakin ka awm bawk ang a, khawngaihin reilote chhung chauh hun min pe leh dawn nia" tiin ka phun sep sep. Hmeichhe tan hian pasal neih mai a har ţhin. Chhungkaw chawm tu nih ngat phei chuan chhungte kalsan tur a thutlukna siam mai a harsa takzet. 

"Ka nghak ang che...ka ta chauh i ni tawh a, Pathian hma a thu kan tiam hun ka lo nghak ang e" a tih chuan thla a muang huai mai. 

Msa nen kan inkar a ţhat viau laiin Tommy te erawh an buai reng mai. Fiona lahin a nei duh bik si lo, a fapa nawmna tur a ni tiin a nu leh paten an nawr sek tho si. A rilru hah zia min rawn hrilh ve reng ţhin a, Bawihtea leh Tommy erawh a hma ai zawngin an inpawh a, chu chuan a nun a tihlimin ka lawmpui takzet a ni. 

Msa in a chhun ei tur ka siam mawlh mawlh laiin Fiona a rawn lang hlawl. Inbe reng mah ila ka la hmu leh miah lo a, a cher khawp mai. 

"Teh hlawl che chuan..eng nge i lo tih?" ka ti hluai a, a taksa landan danglam erawh a hriat turin ka sawichhuak lem lo. 

"Ka rilru a buai" ti hapin kitchen island bulah ţhuin a zawl laiah kiu a nghat a, a indawm ngawih mai. 

"Ngati nge? Msa hmu turin mi i lokal? A inbual a, a zo ţep ang" ka ti zung zung. A inah ka leng ngai meuh lo na a vawiin chu min sawm nasat em vangin hreh deuh chungin ka kal. 

"Ni chuang lo...ka hmuh che hian Msa hmu ang tho ka ni. Tommy hian inneih a sawi reng a, min ngaihsakna leh duhna a lantir chuang bawk si lo. Bawihtea chiah a ngaihsak hlur a, a maksak ve ngawt mai. Hmeichhia a rilru a pek theih rih loh thu a sawi laiin inneih puiah min sawm tho bawk si" a ti bawrh bawrh a, a kut a vai pah bawk. A buai ru takzet anih hmel. Tommy-a chanchin sawi fo hi ka tan tak pawh a nuam lo. 

"A buaithlak hle mai..pui thei lo che mah ila i duh hun apiangah rawn inbunruak rawh. I thawl hawk phah ringawt pawn a lawmawm lutuk" ka lo ti a, thu han rawn tur ka hre miah lo thung. 

Msa inbual zo pawh sam hnawng chapin a rawn lang ve hlawl a, Fiona chu a beisei lawk bik lo tih a hmel awmdanah a hriat. A buaina a sawi malh malh hnuah Msa pawn "I inhuam leh huam loh a ni mai. Ţha i tih dan berin thutlukna siam rawh" tih bak sawi tur a hre bik lo. 

Keichu min rawn kuahin Fiona hmuh loh hlanin a hmuiin ka biang a rawn nul thuak a, ka lo thle sawn vat. Hnung lam aţanga min rawn kuah leh chuan Fiona a lo ţhen sak.

"Innei vat vat rawh u..hrehawm in tuar rei tawh bawk a, hlim in phu. In inneih hun ka nghakhlel tawh teh mai a nia" a lo ti a, min han fiam vel te chu buaina nei lo ang mai a ni. A lainatawm. 

Ni tam a liam hmain Fiona leh Tommy te chu innei miah lovin an cheng dun a, hetiang hi awm tho mah se mizoramah tak chuan chhiar tham lek an la ni maithei. Pastor fanu lehnghal, miin hre tam phei se chu an sawiduh viau ta ve ang. A nu leh paten an nawr nasa bawk nen, a fapa hrehawm a hlauhna zawng zawng nen, Fiona tan a ipik thlak viau ang. Inneih a duh lo bur a, anmahni ve ve in enchhin nan an awm dun ve rawih. Fiona tak pawn 'Tommy hi ka hmangaih tawh awm pawh ka hre lo' a ti ve tho. An kawng a bumboh lehzual ngawt mai. Awm hran duh si, awm hran rem chiah si lo ang kha an ni ber. 

Hunawl a neih chang apiangin Msa a rawn leng a, kan inpawh lehzual. Hna ve ve ah kan buai viau na a hman chang apiangin kan inbia a, a chang chuan tleirawl in ngaizawng kan ang tiin ka nuih a za ţhin. Mapuii lahin min fiam awl lo a, ka thawhpui dangte pawn ka hmel hmuh a nawm zia min hrilh ve chamchi. Hmangaihna hian natna leh hlimna a lo keng tel tlat anih hi. 

College aţanga ka chhuah veleh ban a lo vai zeuh a, "I hlimna lalpa a lo lang e" ti a Mapuiin min lo fiam chuan "Ka ţahpui ve fo tawh a nia aw" ka ti vat. Ni e, ka ţahpui nasa, khang hunlai khan beidawngin ka nunna hial lo ti tawp ta chu tun a ka hlimna ang hi nei thei lovin chatuanin hremna rapthlak ka tuar tlawk tlawk mai dawn nia, thil atthlak leh rapthlak lutuk ka ti ve hman a, ka nunna hial la lo mah ila tun thlengin ka la inchhir. Beidawnna leh lungngaihna phenah hian hlimna a lo inphum ru reng ţhin a, a nghak peih te apiang an vannei a ni mai. 

Nui var varin Msa chu ka pan a, kan college chhak a restaurant lian ve tak panin kan kal. Inkai lo mah ila kan taksa a insi chial a, innei mai tur kan nih zia hre hlawm lo mah se min hmu apiangin kan hmel aţang ringawt pawhin kan hlim zia an hria ang. 

Beisei loh lutukin restaurant ah chuan ţhian hlui ka tih ve theih, school kal lai a ka hmelhriat ve tlem te an lo awm a, midang awm an awm lo. A bang leh dawhkan vel te chu mawi takin an lo chei diam a, hamhaih zetin Msa ka melh reng ringawt. 

"Ka ţangkai a nia" Puipuiin a rawn ti zeuh a, kan hnungah Mapuii a rawn inzep lut ve tawlh tawlh bawk. 

Eitur tui hnai tak tak an rawn chhawp ai chuan restaurant chhung an cheina chuan ka mit a la zawk. Ka enkual ruai lai chuan Msa'n "Lalthanmawi" a rawn ti sup. Ka bulah a rawn kun hniam reng tawh chu niin. Amah ka ngaihven takah chuan a ding ngil a, midangin min rawn hnaih tuau tuau. 

Eng nge tih a tum ngaichang ran a ka melh chhoh ha lai chuan ka hmaah a rawn ţhingţhi anih chu. A ipte aţangin bawm tereuhte, mawi deuh a rawn phawrh a, "Min nei duh em?" tiin ka mit a min en ran chungin bawm chu a hawng a, zungbun ka hmuh chuan sawi tur hre lovin ka ka hup chawih. 

Kan ţhiante lah chu tlem te mah ni se an han bengchheng em em khawp a. Hup hup reng chungin ka bu nghat nghat a, zungbun min buntir chuan ka famkim lehzual tih ka hria. Msa chu a hmui hnuai petin a nui suk a, thawh pahin ka chal a fawp. 

Ka naupan lai aţanga ka ngainat, ka ţhian anih hnu a ka bialpa ni ta, englai pawh a ka thlan mipa chu ka pasal ni mai tur a ni tawh. Msa hi 'Nang chauh' tiin ka thinlungah hian dah lui tlat lo ila chu ka hnaihah a awm tawh kher lo ang. Tunah chuan pasal nei mai tur ka ni ta. Ka first love lehnghal. 

A TAWP TA...(Ka innghah rei tir cheu kha ka inthiam lo khawp mai. Story dang, a bikin short phei chu kan zo zung zung tawh ang😂)