THE GOOD THE BAD AND THE OTHERS-1

THE GOOD, THE BAD AND THE OTHERS-1

Lucky,

Ka hmangaih a, hmuhsitna bak dawn let ka nei lo. Ka ngaihsak a, huatna bak min pe let lo. Ka ei ai ka pe a, ka thil pek vêkin min vawm a, a hlimna turin engkim ti ţhin mah ila ka ti hlim zo lo. Nitin a lungngai hmel ka hmu a, a lungngaihna hi lak kian sak ka duh. Eng nge ka tih ang? A hrehawmna lak bo sak vek tur hian eng nge tih theih ka la neih? Ţhat ka chhuahin awmzia a nei lo a, tih theih ka la nei em? Engtikahmah kei aia hmangaih tu a nei tawh dawn lo a ni tih leh a tawng tawh dawn bawk lo a ni tih te hriat tel tir ka duh. Engtia tih chi nge?

J.

J tih ringawt hnen aţang hian mak deuh deuh ka dawng ve ziah. A changin mi pakhat a hmangaih zia a rawn sawi chiam a, a chang leh a huat zia leh a ten zia te. Hming bul a J awm hriat ka nei nual a, maksak deuh a an chet ka hre ngai lo thung. Ka thu dawn erawh a maksakin a nuihzatthlak viau zel. 

Hmangaihna lam hi ka in la hre viau a, mi tam takin min rawn ţhin. Zawhna mak leh nuihzatthlak deuh deuh ka dawng chamchi a, ngaihdan mawl mang zet zet ka neih ve te hmangin ka chhang let ţhin. J erawh a mumal loh em vangin ka chhinchhiah bik. 

"That mai rawh" tiin fiamthu in ka chhang let a, ka thutak loh zia a hriat theih nan emoji ka dah tel. Nui mai mai ni lo, mittui per sawk khawp a nasa a nui  ka thawn. 

Khum a bawk ar ar chung a laptop khawih ka nih vangin mi mumallo J ka chhan zawh chuan laptop ka khup thawk. Dim lem lo takin chhuatah ka dah thla a, ka kham tur a ka lukham chung a ban rawn inkhâm chu mut zangthal pahin ka kham nghal hmak. 

Ka bul a mu chuan a kut awl lamin ka awm zawnah min rawn kuah a, ka bek zawn a a thaw lum ham ham chuan min hnaih leh tawh zia min hriattir. 

"J" tiin ka beng zawnah awki hniam ruihin a rawn phun sup a, ka lo nui hak thung. 

"A hmangaih leh tawh. He nu hian hmangaihna leh huatna a ngah bik i ti em?" fiamthu a ka tih chuan "Nangmah ang chiah" ka beng zawnah bawk rawn ti leh supin a ţawng zawh rualin ka beng hmawr a pet pah zeuh. Em em ţhin hian a. 

"In anna lai kan neih ka hre lo ve..nitin deuhthaw ka rilru put hmang ka thlak ve ngai lo" ka tih lai chuan ka khabe ah rawn dawmin duhthawh zetin ka hmuiah a fawp nghal ngawng ngawng. Ka khabe a dawmna chu thlahin zei lutukin ka taksa a chul kual dan dan a, chu chuan ka thisen a ti lum nghal pap pap mai. 

Min fawhna chu uar zetin ka chhang let ve a, kan tih loh dan a ni lo a, vawi engzatna nge ka hre thei tawh lo zawk. Ka kawr chhunga a kut a zen luh rual chuan a hmuiin ka nghawng a chhui thla dan dan a, ka awm bawr khawih pah a ka nghawng vel a fawh kual chuan ka lungphu a rangin ka taksa a danglam tial tial. Ka mipa thlakhlelh berin zei tak a min khawih lai chuan thaw ham hamin amah chu ka lo fawp kual ve ruai a, eng lai mah a dik ka tih ngai loh thil ka ti leh ta. Ka hnar zo thlawt lo ţhin hi ka inhuatna ber a ni. 

Min ngainep ru dawn tih hrereng chungin min khawih apiangin nuam ti deuhin ka lo dawngsawng a, hman a ţhianţha pangai tak ni ţhin kha sex vang chauh a inzawm kan ni tawh niin ka hria. Kan pahnih chauh a kan awm chang hian hman ang khan ka ti ti a ngaithla liam mai mai tawh ngai lo, ka taksa bak duh a nei tawh lo ti ila a dik ber ang. 

Khumah chuan ţhu in thawk ka la halh a, ka taksa ruak vek avang chuan ka awm bawr khuh turin hmalam ah ka sam ka hui thla a, ka puan sin pan tak chuan ka kawng chin hnuai lam bak a khuh lo. Hetiang a ka khawsak chang hian ka tawt zui up up zel. Min khawihna ten phurna min siamin a tawp thlen pui ţhin mah ila, a nawmna leh phurna a reh hnu chuan hrehawm tihna in a zawm nghal zat ţhin. 

"Ka chhoh hunah law law ka inbual mai ang. Nangpawh hetah hian i riak dawn anih loh chuan ka rualin lo chho ve rawh" thupe aw tak hian ka ti a, ngati nge ka zam zui tlat zel le? Thlahlel viau ţhin mah ila ka bialpa ni lo va ka ţhianpa anih miau vangin ka lanchhuah tir ngam ngai lo. 

"Ka inbual phawt ang" a tih chuan ka hawi let a, a kut pahnih a tukhum a suihin hahdam deuhin a lo la mu. 

"Keimah chiahin ka chho dawn tihna maw?" ka ti hrak a, "Penglenglenga zawhte bak hlauh tur a awm lo" nuihzat hmel tak hian a lo ti a, ka ngaihdan a ni lo kher mai. Mateo Penglenglenga zawhte ka hlauh loh zia a hre vek. 

"Min ngaihtuahna i nei miah lo" lungawi lo zet a ka tih chuan nui ri hawkin a mutdan a siam rem a, "A ti leh ţan dawn" tiin ka ban a rawn hmer a, a hmel a min nuihzatna langchhuak chu ka hmuh hmaih lo chiang kher mai. 

A lamah min pawt hnaiin a taksa chungah ka bawk a, kawr a la hak bik loh vangin a kawng chin chunglam chuan khuh tu a la nei bik lo. Tum barin amah chu ka melh a, mumallo zet a a sam thur siang te, a awm hlai leh a taksa tihrawl ţha zet chuan a ti lang sexy zual. Eng nge maw ka ngaihtuah leh tawh ni? Amah ka en apianga a ţhatna lai chiah ka hmuh ţhin vang hian alawm 'i ţhianpa anih kha, nawmchenpui atan bak a duh ve lo che' ti a ka inhrilh mawlh mawlh ţhin ni.

"Muhil rawh" rawn ti supin ka hnung zang ruak hiai chu a chul a, "Ka duh lo. Ka mut a chhuak lo bawk. Hetah i riak duh anih pawn keichu min thlah rawh" ka ti tlat. 

"Ka la ngai che" ti lehin a taksa chungah chuan min la kuah bet reng a, hahdam hmel zet a thawk la vang vangin ka hnungzang a chul pah reng a, tun a kan awmna cabin a kan pahnih chiah a kan awm hian ani chu thlamuang deuhin a awm thei mai zel a, keichu ka ni ve lo. Man chhuah ka hlau a, ka ţhiante nen a kan room inluah ţawm ngei a ka riah loh chuan thlamuang deuhin ka awm thei ngai lo. 

"Lalmuankim, i muhil ang e" ti hrak pahin a biang ka dawm a, muhil ang mai a mit a chhin tlat vang in ka sawi zui det det. 

"A mak e..kan hostel fal zia i hre ve reng a, kan awmna phei chu ramhnuai ang mai a nia, building thleng a keimah a ka chhoh pawi i ti miah lo tihna a nia" ka ti nui nui. A hma aia na deuh a ka sawi leh chuan rawn nuichhuakin min kuahna a ti nghet salh a, a muhil lo chiang lutuk tihna. 

"Ka inbual ang a kan chho dawn nia" a ti ve ta nge nge. Bathroom a luh hmain ka lut hmasa a, ka intihfai thuak hnuah darthlalang hma a dingin ka in thlek vang vang. 

Lalmuankima nen hian naupang te kan nih lai aţanga inkawm tawh kan ni. Kolasib khua ve ve kan nia, kan inţhenawm chiah bawk. Kei aiin kum khatin a upa a, a pawl sang hret bawk. Chuti chung chuan school khatah lutin nitin kan inzui. Inkawmngeih viau e ti lo chuan kan zia a hrang hlak. 

Sawi tur hria leh ţawng duh ve tak ka nih laiin Mk-a erawh sawi tur hre hlawl lo chi a nia, 'A ţhiannu thusawi ngaithla in a nui ve suk suk zel a' tiin kan khaw mi te pawn an fiam fo ţhin. Kan naupanlai aţang tawhin ka thlavang a hauh hlur a, mipa dangin min tihbuai chang te hian min lo chhan vat a, keimah vangin a insual fo reng a ni. 

Ruih ve zeuh zeuh a ching a, ngawichawi viau chung hian a lerh zek lehnghal. Hmeichhia a kawp lawr nasa an tia, bialnu a neih awm sawi tur ka hre miah lo thung. Bialnu nghet neih chu boring a ti. 

"I zo dawn tawh em? Bathroom chhung kha a hrang a nia" kawngkhar ben pahin a rawn ti thum dut dut a, ka la sawi hmaih. Mi nghah a thei hlawl lo. A dawhthei lo ve lutuk ka tihna anih chu. 

"Thlahrang te chu an cute e" ti fiamthu chung a ka inher chuan hmai kawr rapawm lutuk ka hmu thut a, ka khek nghal tuar.

Kawngkhar a rawn intheh hawng rawp a, hlauhthawn hmel lutukin Mka a rawn lut. Hmaikawr inkhaina lam ka kawk mawl tawp a, a hmuh ve hnuah "I thlahrang hmuh a cute vak na nge?" ngeiawm zet hian a ti a, min runluih fiam na mai mai tih hre mah ila ka thin a rim tho. 

"Tu nge bathroom ah hmaikawr khai ngai? Ngatan nge i tih? I rap ve miah lo mi?" ka ti zat zat. Ka hlauh a la reh chiah loh vangin ka awki a sang angreng hle. 

"Chel chul mai..kal teh" ti hlukin min nam chhuak a, kawngkhar a khar zui hmak. Kawngkhar a rawn hawn rual a a mangang hmel ka hmuh kha chuan min ngaihtuah emaw ka ti hman. Ka tluk sual ring a rawn lut anih te ka ring rum rum a, mahse min nam chhuak leh daih sia, min ngaihsak lo nge min ngaihsakna tihlan a hreh pawh ka hre lo. Mipa zia hi hriatthiam a har takzet. Tun thlengin ka ţhianţhaber pawh hi ka la hrechiang thei lo. 

Diktak chuan he cabin hi kan hostel neitupa ta tho a nia, Mka putea anih lehzel vangin kan inhmuh fal duh chang chuan kan kal mai zel. Kan pahnih tih loh duh duh hun a kal ngam awmchhun chu Mateo chiah a ni. 

"Pengluai...pengluai" ti lung lung ri ka hriat chuan tukverh bulah beng ka dawh hnai a, cabin hi a fal a, zanah chuan mahni a kal ngam an awm ngai mang lo. Thing a ding thluah a, an sawi hrang tel bawk. 

"Pengluai...thawm rawn nei rawh ka hlau ve tho a nia" a ti leh nung nung a, chu aw nei tu chu tu nge anih ka hre chiah. Mateo penglengleng-an a zawhte Pengluaia a zawng anih pek chu. An inzawng zantin mai ni. A au lauh lauh reng a, rei deuh a hming a a koh hnu phei chuan Pengluai ti duh tawh lovin sin râtin "Meow..meow" a ti tawh a, ka khawngaih angreng. 

"Muankim...ka lo han chho ang. Pengluaia te pu tu an inzawng leh tawh a, an rualin ka chho mai ang" ti a Mka ka hrilh hnuah laptop ka la a, cabin aţang chuan ka chhuak a, a thim nghal mup vangin phone flashlight ka ti êng vat. 

Mateo aw ka hriatna lamah ka chhuk ve a, a rual a chhoh tum hrim hrim pawh ka ni lo. Kan awmna building a hran a, kan inpensan a ngai dawn tho tho. Mahse, amah chiah a zawhte a zawng kha ka khawngaih a, a zawhte zawnpui tum a chhuak ka ni zawk mah. 

An thawm ngaichang ranin ka chhuk thla zel a, cabin thlang daihah zai ri ka hria. Hmeichhe aw ni se chu ka hlau viau ang a, mipa aw thum ve deuh anih vangin Mateo a ni tih ka hre nghal. Thawm dim thei ang ber a chhukin a zai chu ka ngaithla pah reng a, Pathian hla a sa. A hla sak karah Pengluaia a au leh ţhin a, a hlauh zia ka hriat vang a nia ka khawngaih em em ni. 

Lak lawh deuh a a zai a tawp chuan ka thawm a hre ve anih ka ring. Kei lahin thawm dim tum viau mah ila hnah ro ka rap ri leh ţhin a, na tawkin hmui pet mah ila ka thil rah ri a zawih phah chuang lo. 

"Tu nge?" pawr zetin a ti na a a rawn hawi let ngam miah lo. 

Aw ti danglamin "Mateo" ka ti zawi sap a, amah a palian angreng sia, ka aw a hriat chuan a ding khawng luah a ni ber tawh.

"Mateo Zoremsang" awki ngai bawk a ka tih leh hnuah a hriat phak ngei turin zawi tein ka nui ker ker a, "Mateo" ka ti leh zeuh ţhin bawk. Kei aia a naupan vang hian ka zuam ve riau. 

"A ninawm hle mai. I ngam chuan ka hmaah rawn inlan rawh" a ti nghet churh a, a aw ah zamna a lantir duh miah lo. A hma a inlan turin min duh a, ka aw a hriatna lam a rawn hawi ngam lo thung. 

"Mateo" ka tih leh chuan "Eng nge?" a ti vin nghek a, amah vek chuan "Min sual ngam anih chuan ramhuai power hmang bik lo la, insual ang" a ti hem mai. A zawhte hmu lo thinrim sa nen, a dawhtheih loh tawp a thleng a ni chek ang chu a rawn inher vut a, a hmel hmu chiang lo mah ila min rawn pan ngam dawn tih ka hria. Light ka ti eng ngam tawh mang si lo va, a rawn hnai ang a min vai thlu tawp dawn anih hi ka ti hman rum rum tawh. Hlau ru deuh chung a ka ngaihchan tawp laiin ka aw a hriat rual a a thlauh a emergency light ken ngei mai kha a chhar a, ka dinna lam a rawn en chiah chu ka lo chhing sawk. Ka hmai zawnah tak a ên a, a êng ţha lutuk chuan mit a ti vai nghal vek thei. 

 "Hmeli mai mai chu..ka hnek tho dawn che mawnle" ti nung nung chungin min rawn pan a, light eng tawk chuan ka dinna bul vel a chhun kual sek tho. 

"Khaw nge i kal?" a ti bul hmuk a, cabin ah ka awm tih a hriat hlauin tim daiin ka melh chho a, chik zet a min lo melh chhuk ve run ka hmuh rualin hnuai lam ka melh thla leh riai riai. 

"Thil sual ti tu a meng khup leh ta zul zul e" a ti kher lehnghal a, hepa chimawm dan hi chu ka sawifiah thiam lo zawk. 

"Lokal teh..sual tlenfai nan Pengluaia zawng teh ang" tiin min kai lawp a, min kalpui nghal dawr dawr. Tlu lek lekin inpal nawk nawk mah ila ka awmna min zawt zui lo chu ka lawm tho tho. 

"Nichin khan thlahrang emaw min ti ni maw? Ramhuai power hmang lo tur ten min hrilh a" nui hak hak chung a ka tih chuan "In mal beihah chuan ka cho ve e. Thlahrang hi chu hlau ang a awm hmasak tur a nia, bum tur. Changtupa chu a tawpah a ţang tak tak chauh ţhin an tih ang khan a tawpah, kan hlau emaw an tih tawh hnuah changtupa deuh a beih tur. Nichin a ka tih ang khan" a ti leh vel a, hnar hnuaiah phatna a bo lo an tih kha. Naktukah chhaih leh mah ila khaw en lai ngat phei chuan tun ai hian a hlau lo zawk ang. Huai an ti leh hlawm ang chu aw.  

Pengluaia pawh kan hmu ve hram a, a pu in a pawm bet nghal hmiah. Tal bat bat mah se a pawm tu a lian em a, a tal chhuak zo lo. Mateo nen a thlahrang awm tak tak loh zia kan sawi lai mekin kan hmaah tu emaw a rawn ding a, chupa vek chuan a hmai zawn light a a chhun chiah chu Mateo nen kan ţe chhuak dun vak. Bathroom a ka hmuh hmaikawr bawk kha a ni. Tunah chuan tu emaw hmaiah a bet thlawr tawh. Laptop ka thlauh lo hlauh a, a vanneihthlak. 

"Lalmuankim" ka ti vin nghek a, ka lungphu nasa lutuk chu a zia deuh theih nan awm ka dawm vang vang. A nui ri ka hre dawn maw ka tih laiin a inher vut a, min chhohsan nul nul. Bathroom a ka hmuh hmaikawr hmang khan min tih ţhaih mai mai emaw ka tia, thinrim angin a awm leh tho bawk sia, Mateo nen kan pahnihin min be lo ve ve. 

"Thinrim lo mah se min be chuang lo ang" tiin ka phun chhuak sep a, beidawng deuh a ka thaw zui halh chu ka bul a ding pa chuan lo ngaithei lovin "Thlahrang hlauh laiin rilru a na thei lo. Tih nat luih tum miah suh" a rawn ti nghut a, a hmel hmu chiang thei lo mah ila zawhte a la pawm ţung tih ka hria. 

"I hlau veleh pek tawh em ni?" ka tih chuan aw a thian kharh a, "Ka tlu ţep a" a ti zawi sup. Ka nuih loh nan hmui ka pet a, keimah zawkin hma ka hruai. 

Zirlaite awmna bik hi building pahnih a awm a, kan hostel an tih dan hi a mak khawp mai. Building pahnih ah chuan mipa leh hmeichhia kan awm ve ve. A chungah hmeichhia, a hnuaiah mipa. Hostel a changtlun ang bawk hian awm man a sang a, mi hausa ve pangai tak tan lo chuan awm ve a harsa ti ila ţawng mawi lo a ni em lo ang chu.

An strict vak lo na a mipa leh hmeichhia kan inriah pawlh ngai lo. Keipawh mifel deuh a min ngai vek a, keini ang a a ruk a tenawm deuh a khawsa ţhin hi an awm ve maithei a, awm lo maithei bawk. Building hran hlak a kan awm ang bawkin an inthliar hrang ve khanglang bawk a, Mateo te building lamah chuan amah Mateo ngei mai hi a inti thu khawp mai. Zawhte squad an inti nghe nghe. Hunawlah intihhlim nan inelna te kan nei ve ţhin a, tual zawl zau pui maiah mipa ho an inkhel ziah bawk. Kan building a awm ho ve thung hi chuan Zawng squad an in tia, a mawi lo kan ti khawp mai. Inkhelh na a che ţha thei ber Muankima'n zawng (monkey) a duh ber vang a ni. Kan khua a kan awm lai pawm zawng a khawi ţhin. 

🐱🐒🐱🐒🐱🐒🐱🐒🐱🐒🐱🐒🐱🐒

"Number ka chhiar ang a, 3 ka chhiar thlen hmain kut an inthlak ang" tiin Gabriel chu hnuai lam bih ngur chungin a phun sup a, hostel building chung zawl aţangin Muankima leh Mateo te inkhel, inti thiam lo zui ta ni awm tak chu kan thlir dun. 

"1..2..." a ti fan ruih a, chak deuh a in pan hlawk hlawk an ni bawk a 3 a chhiar thlen hmain Mateo Penglengleng-an Muankima chu a dul ah tak a tlawh a, Muankima tluk tawp danah a tlawh na thawhkhat tih a hriat. Tho leh vatin Mateo chu a hnek ve thung a, an insual zui buan buan a ni ber.

Gabriel lah chuan an insual hnu daihah "3" lo ti leh hramin intithei zetin min rawn melh a, ka lo ner sawk. Midangin ţhelh vat lo se chu an inkhawih na hman  ngei ngei ang. Inkhelh naah an tel ve ziah a, an intibuai ve deuh ziah bawk.

"Insual hlimpui rual i ni tawh lo" ka tih hlak chuan a lo nui suk a, kan inrual chiah a, MZU ah kan kal ve ve. Private hostel ah kan awmdun a, hostel a ka awm hnu chauh a ka ţhian mah ni se kan inpawh khawp mai.

"An inkhawih na lo khu lawm hle zawk rawh" ka ti leh a, kawt zawl a infiam mek te chanchin ka sawi leh takah chuan hnuai lam bawk bih lehin "Thinchhe ve ve..mi mawl pahnih" a ti ban charh. 

"An thin a chhia tih chu ka pawm thlap. An mawl vang erawh a ni lo. An thu an duh a, ţha ber nih an tum ve ve bawk. Chuvang zawk chu" inringtawk tak a ka tih chuan vanvadak meuhin a thaw chhuak hawlh a, "Lucky" a ti fan ruih. Muankima ka ţan vangah a ngai leh hmiah tawhin ka hria. A beidawn hmel em em danah hian. 

Vanneihmawii ka nia, hostel a ka awm hnu hian mi zawng zawngin Lucky tiin min ko vek. MZU ah ka kal ţan ve mek a, kan pawnlam chauh hmu a hre tu te chuan mifel leh thianghlimah min ngai vek. Chhungril lam erawh mi tlemte chauhin an hria. Gabriel tiamin. 

"I sawi tum ka hria, ka ngaithla peih lo tih ka hrilh nghal bawk che. Ţhian ka nihna angin ka chelh zo tawh lo. Ka chelh theih dan tur chuan engpawh ka ti vek ang ka tih tawh kha" ka ti fak fak a, ka hma a dingin a kekawr ipte a zen a, ka luhlulna chuan a sawi tur a ti bo zo aniang, min melh run run ringawt. 

"A har tur zia i hriat ve tho kha. Naupan lai aţanga ka hnaih a awm reng ţhin a nia, puitling tawh mah ila, ani chu min hlatah awm thei mah se la, keichuan ka hlat ve thei lo. Ka hmuh loh hlek chuan ka ngai zel" ka ti a, ka awki a hniam ve ta deuh. 

"Nizanah i kal leh tiraw?" tiin ani pawn awki pangai takin min zawt a, lu ka lo bu zeuh. Kan thil tih ka hrilh ngai lo a, nawhchizuar ang mai a ka awm ţhin chu insawitheih nan a hman chi a ni lo. Sawi chhuah a zahthlak lutuk zawk. Mahse rin dan a nei tho ang. 

"Zahawmna bo ţhak khawpin tumah hmangaih suh. I ţhian emaw, i bialpa pawh ni se" a ti a, dik ti viau mah ila ka ngaihdan takngial pawh ka sawi chhuak ngam ve lo. 

"Ka chhuk dawn aw my dear" uangthuang deuh a a tih chuan ka lo chek tlak. Phalna ka pek hmain a chhuk a, vei a nei lo lutuk leh hmangaih a nei ve miah lo hi ka awt ru fo mai. 

Inţhianţhatna hian hmangaihna a keng tel a, hmeichhe pahnih inkarah chuan chu tluk a hlu chu a awm lo. Mipa leh hmeichhe inţhianţhatnain inhip tawnna a keng tel bik tlat hi pawi ka ti vawng vawng ţhin. 

Keimahin Muankima te inkhel chu ka thlir a, Mateo penglenglenga nen chuan ball umin an tlan dun lo thei si lo, an insu na thei sawk sawk khawp mai. Ball chan loh aiin insut nat loh an hlau zawk ti ila a dik ber ang. Tlangval ve uaih tawh naupangchhia lutuk a an che chuan nuih a ti za. Keipawh rilru tawt ţun chungin ka lo nui hak hak. 

Per tawk a "Meow" ri lo chhuahna lam chu ka hawi vat a, Pengluaia a lo awm ve reng chu niin. Zawhte dum a nia, a hnar a perin a hmelchhe angreng hle. A rawl a makin a dangdai em em bawk a, ka mitah ţhatna reng reng aneih loh laiin zawhte squad ho duat rawn a ni ve tlat. Anni chuan zawhte var thianghlim sar angin an hmu ang. 

An inkhelh zawh hnuah Pengluaia pawmin ka chhuk thla a, kawtzawl a chhuk thla chiah lovin step ah ka ţhu. Ka malchungah Pengluaia a bawk ve ran a, a pangchangin a hmul ka chul vel te chuan a awm a lo ti ri ve nasa. 

Zawng squad ho inkhel zo rawn kal chuan "Mateo..i zawhte hi rawn la rawh" an tih loh leh "Zawng squad buildingah zawhte a awm tur a ni lo" an ti lung lung a, engmah sawi ve lem lovin Mka chu ka hmaah a rawn ţhu a, ka ke a rawn ngheng. 

"Nichin khan ngati nge in buai?" ka lo tih chuan a rawn leh hawi a, a sam chu a inkhelhna thlanin a ti hnawng chap. 

"Min dêk zel a" a tih chuan ka lo nui vak a, ner nawkin hmalam a hawi leh daih. Dek a huat zia ka hriat miau vangin a thinrim vak kha awm lo ka ti hran lo. 

"Khawi ka Pengluaia kha" ti hlukin Mateo chuan pengluaia bawk hle hle lai chu a rawn la lawp a, a awm a pawm bet thlawpin duat deuhin a chul zui zat bawk. 

"Phakar awih tawh loh aw Penglengleng. I phakar leh chuan tel ve kan phal tawh lo ang" ti a Siamtean ţha deuh a a hrilh chuan "Ka thu thu. Khatiang kha min hrilh duh suh u. In thu lo best. Ka tel leh tel loh chu ka thu thu" Mateo chuan a lo ti zek a, kan hostel neitupa hi a pa ţhianpa a nia, a inti thu ve tlat. 

"Lucky i ţhianpa kha hau rawh...vawiinah hmeichhe pakhat a thlah haw a, hmeichhe dang an thinrim a nia" zawhte squad zing a miin a rawn tih chuan ka hmel a danglam nghal vek maithei. Muankima huat tur a sawi anih laiin hrehawm ti zawk ka ni thung. 

"I va lerh ve" ti hlakin midang hmuh lai chuan a tukhumah ka nam pawp a, ka nui lui zui vak vak. 

"Hmeichhe ngam lo" tiin an nuihsawh a, ka rilru put hmang diktak hria se chu tumah an nui ngam lo ang. 

"A ţah nuih anih kha" tih ri ka hriat rualin Vulmawii a rawn ding lang a, ngeiawm tawkin a la nui sawng zui. 

"Muankima nen kan haw rual. Ka scooty a chhia a, min phur haw anih kha. A na tur tur chu lo na vel mai mai rawh se" a ti leh zat zat a, building hran a mi a nia, zawhte squad a ni ve tihna anih chu. Ka hmeichhe hriat ve tawh zingah a la sual thiam ber. 

"Kal ang" ti supin Muankima chu a tho a, ka vawn turin a kut min rawn pe. Vulmawii hmuh tur ngei a Muankima kut vuan chungin ka tho a, ka en pah reng. Muankiman min kuah rual a a nui hmel ral riai riai te thleng chuan ka hmu kim vek. Ka nuih let ve sak. Ka bulah tal hrut hrut reng tawh lo mah se midang zawng ai a a ngaihsak ka la ni tlat. 

Midang kan hlat ta maw tihah "Min thlah tawh rawh" tih leh a ban paih thlak sak ka rual a, ka thu hriat vang a ka thinrim viau laiin Muankima lah chuan min lo nuih vur vur. 

"Fiamthu ka thawh lo a nia" ka ti chang fak a, a nuih ka ti za tulh tulh emaw tih tur a ni. 

"Ice cream i duh em?" a la ti zui. 

"Ice cream mai mai a thlem lungawi rual ka ni tawh lo" ka ti vin vak a, mit hmul ti kang uk a min melh chuan sawi sual ka nei tih ka hre chawpchilh nghal. 

"I lungawi lo maw?" min ngaihsak hmel zet hian a ti leh ang lawi a, "A vawt sia ka ei peih lo mai" ti sepin hnuai lam ka bih a, "Tu nge hau che?" a la ti tak deuh deuh a, amah vang a ka nat ngun tawh zia hi hria se chuan hrehawm tih lutuk vangin a intihlum daih tawh ang. 

"Nizanah thinrimin min kalsan a, vawiin nileng a min biak loh chu thuhran, vawikhatmah ka hmu lo che" melh khai khai chung a ka tih chuan "Min hmuh tawh hi" ngaihsam fe hian a ti a, a nui tel suk lehnghal. 

"Chu chuan min ti lungawi zo chuang hleinem" pangchang zet hian ka ti a, hman aţang tawhin Muankima bulah hi chuan ka pangchang ţhin hrim hrim. 

"Thinrim suh Pookie" tih sup pah a ka ban rek a rawn man chuan rang lutuk a thing thla in "Min khawih suh" ka ti hlar. College ka kal ve ţan tirh aţang khan Pookie tih hlirin min ko a, nalh ti lo viau mah ila Muankima min koh duh dan anih miau vangin lungawi deuhin ka pawm zel. Mahse tun ţum chu ka thin a rim ve takzet. Vulmawii berkher a phur haw chu ka hua. 

"A mak ţhin" ti hapin ka banrekah bawk chuan a rawn man leh a, kut ka laksawn leh mai hlauin a hmer nghet hle. 

"Room ah ka chho tawh dawn" ti a ka inher chu ka ban vuan reng chung a min pen khalhin step bulah a ding ta tlat. 'I lungawi hma chu ka kaltir dawn lo che' ti ni awm tak hian min melh khui a, sawi tur hre lovin a ngawi leh ngul tawh thung. 

"Warden a lokal ang e..bakah ka chho duh tawh a nia" ka tih nang nang hnu chuan "Sorry" a rawn ti sup. 

"Eng maw?" ka la ti he haw zui a, a thusawi kha ka hrechiang lutuk tho. Muankiman ngaihdam min dil ve chu thil mak leh awihawm loh tak a ni. A luhlul a, a thiam lohna ngei ngeiah pawh tumah ngaihdam a dil duh ngai lo. 

A ngawih leh tak daih avang chuan "Ka kal dawn" ka ti leh a, nek luih tum ve viau mah ila min dang hneh lutuk tlat. 

"Sorry ka tih chu" rawn ti lehin a kut awl lamin a beng hmawr a pawt zeuh a, naupang pawisawi lo ang maiin min en bawk. A awmdan avang chuan insum zo lo lekin ka nui chhuak a, "Min sawi nawn tir tawh suh ang che" a lo ti nghut. 

"Naktukah i rualin ka kal duh" pangchang tak a ka tih chuan a nui chhuak leh ta hawk. 

"Umm..chuan min kuah thei tawh em?" a ti a, ka ban a hmerna chu thlahin a ban a phar chhuak nghal hluai. Warden a awm leh awm loh hriat tumin ka hawi kual thuak a, tumah ka hmuh tak lohah chuan a taksa lian zet chu ka kuah a, a awmah ka bei hlu hlu. Ka ţhian chauh ni lo turin ka duh a, inzawmna thuk lehzual neihpui ka duh. A bialnu angin min en ve se ka tih vang alawm ka ţhian chauh a ni chung pawh a a mutpui theih a ka awm ţhin ni. 

"Pookie hi thinrim tawh miah suh se" a ti ve ngial. Min kuah nghet sauhin ka chhipah a khabe a nghat a, warden in min hmu se chu a sa ve khawp ang. 

"Min tih thinrim leh chuan i chak lo viau ang" ka tih chuan "Ka ring" a lo ti sup a, ka luhlul ve zia a hria. Ka luhlul em vang alawm ka hlat duh miah loh. A lungphu dut dut zawnah chuan beng ka dawh hnai a, hetianga ka kuah hian a lungphu a rang ve em tih chian ka duh. A awm a tawm kakin ngawi rengin ka ngaithla a, a lungphu chu a dam dup a, a danglam ve pawn ka hre lo. 

Lunghnur ru tak chung a "Warden lokal hmain ka chho duh tak tak tawh" ka tih chuan min kuahna a thlah dul riai riai a, ka lungawi loh rukna ka lantir ta bik lo. Hlim deuhin awm se tih hi ka duh dan a ni. 

"Ih...ka huat chang che hian engtin nge i awm ţhin? Ka kal hlen daih i hlau ţhin em?" ka ti chhuak phawng. Ka melh chho ha a, ka zawhna chu a hrethiam chiah lo a ni tih a mitmeng dum thim khup ţhin a buai tak nak danah chuan a hriat. 

"A hrehawm ve a" a ti fan ruih a, sawi tur a hre lo ţhin lutuk hi Muankima ti Muankima tu a ni ber tawh. 

Midang thawm kan hriat takah chuan rang lutukin min kuahna aţang chuan ka in la hrang a, ka thutak em vang a a inthlahrung chuan "Aaa..a ngai chuang hleinem" a la ti zui. 

"Ka zawt ve mai mai che nih kha. Khawiah mah ka kal dawn lo. Ka chho aw..kan inhmu leh thuai dawn nia" ka ti a, a hmuh lai chuan ka nui sang. Muang changin ka chho a, "Pookie" ti a min rawn auh leh pawhin nui lui chungin ka hawi thla leh. 

"Vawiin khan ka zawng nasa che. Hmuh tur i awm lo a, i tawm bo anih ka ring. Chuan..phone ka ken theihnghilh" tiin a insawifiah ve mial a, lo bu nghauhin "A pawi lo" hmui phun a ka tih hnuah ka inher a, a hmuh theih loh tur a ka hmai ka thuhruk rualin ka nui hmel a bo ve nghal. 

Hmeichhe thlem leh insawifiah chiam te, ţawngkam a midang tih lungawi te a thiam ve lo a, rilru nawm veng veng na tur sawi tur a hre khat. Ţawngkam nem a nei ve vak lo ka tihna anih chu. A rilru a awm apiang a sawi a, a duhzawngah chuan venthawn a nei lem lo thung. Kei lah hian a nihna ang ang a pawmin ka hmangaih a, ngaihzawng nghet neih ai a rei lo te te chhung atan chiah a hmeichhe kawp duh, ngaihzawng nghet neih chu a boring ti zawk tlat ţhin ka hmangaih hi a pawi ber. 

Room chhung ka luh rualin ka ţhiannu June chuan min lo pawm nawlh a, ka inrin loh lutuk vangin ka khek ţhat nghe nghe.

"A duh berin 'ka duh ber che' a ti ve a, a hlim lutuk anih kha" nui hak hakin chungin Jessie-in a lo ti a, "Wow..nuam awm bik ve" ti a ka chhaih rualin chhuatah min nghat a, "A nuam lutuk hi ka hnar thlengin a za vek" a ti chul mai. 

"Ti daih ila mipa ho hi building lehlamah an insawn dawn ta em?" Jessie-in a rawn ti thut. Ka hriat loh zawng anih vangin June ka melh vat. 

"Anih hmel...lehlamah chuan kan hostel hi chu khualbuk ang mai a nia, hostel dang angin an strict ve tehchiam si lo a, hemi building a kan len loh vang hian building pakhat saw an sa thar a, kan hnuai a mipa an awm rei tawh vangin hostel a rawn lut thar duh tawh si te kha a tharah sawn an beng lut mawp mawp aniang. Mahse, building pahnih a awm takah chuan a neitupa ber hian mipa leh hmeichhia hi building hranah awm se a tia tih velin an sawi" June chuan a ti malh malh. 

"Zawhte squad leh zâwng squad hi a ngai ang tho in a la kal angem le?" Jessie bawk chuan a ti leh. 

"Kal ang, zawhte squad mipa ho saw an hmeichhia te awmna ţhin chhawng hnuai zawkah an insawn thla ang a, kan mipa te a chungah an awm thung ang. A ngai reng ang ka ring" June bawk chuan lo ti lehin phone enin a nui zui vur vur. 

"A ţha ka ti zawk..hmeichhe hlang awm khawm ila, lehlamah mipa hlang awm bawk se la, a dik vek tawh" tiin Jessie chu amahin a la ţawng melh melh. Engtin pawn awm ila keichu ka awm thei vek. 

Kan sawi lawk ang ngeiin Muankima rualin ka kal a, a bike a min phurh chhuah chuan ka phur viau zel. Chuti chung chuan naupanlai a cycle a min phurh ţhin lai a ka phurna ang kha a pha ngai chuang lo. 

Bike aţanga ka chhuk rual deuh thawin "Ka lo nghak che" tih ri kan hria a, hmeichhia ngei a ni. Kan awmna lam panin Vulmawii a rawn phei zan zan a, a bialnu ka nih miau loh vangin langsar deuh a thikthu ka neih a rem lo. 

"Scooty vang teh hrep sawn hma lutuk a ka kal a ngaih phah a" Vulmawiin a tih hlak hlak lai a Muankimi nui hawk thawm te chu hriat a nuam hlawl lo. 

Ani ţawngkam thiam lo lah chuan "A pawi teh hrep anih chu" a lo ti ve a, fiamthu ah a in ngai ve ngei ang chu. 

"Kan class neih tur a inang sia, kal nghal mai ang. Nang Lucky, June i la nghak dawn mi?" tiin Vulmawii chuan Muankima ban a kuah chungin min rawn thlek a, pawisawi lo awm tak a a awm vel te chu ka haw lutuk. Muankima chu awm lo se a sam a keh nawk nawk a nia ka chak ni. 

"Kal hmasa rawh..Pookie hi a ţhiannu ka nghahpui phawt ang" Muankima chuan a ti ve mauh mai. Vulmawiin a thlem ngial pawh a a duh tak tlat lohah chuan lungawi lo deuhin a kalsawn a, min kalpelh dawnah min su sawk kher anih chu!

Vulmawii kalna lam ka hawi tauh nghawng lai chuan min sutna lai ka dar chu Muankiman rawn hmerin "Dam dam" a rawn ti a, rum lutuk a ka melh hrak chuan pa deuhin a lo kiai suk. Engtin pawn awm se pa ka ti tho tho. Ka inkhak buai vel peih lo.

"Ka umzui i hlau a ni maw? Henu hi chu ka palzam lui thei thlawt lo ţhin. Insualpui pawp pawp mai ka duh" ka tih chuan a nuih a za viau. 

"Chhan i ngai leh awm tho sia" nuihzat hmel fahran hian a lo ti a, a hnar hmawr a tuai pah zeuh bawk. 

"Min chhan ang a ni mai lawm" ka tih laiin June a rawnkal a, "Lalmuankim min rawn nawr teh" a rawn ti vel. Muankima lah chuan ngaihven ţha duh lovin "I ţawng theih ţek ţek chhung chu ka pui lo vang che" a ti nek a, a ner zui nawk. Chu chu June huat tawk a tling leh em em. 

Muankima kal zet tawh hnuah a hriat phak tawk turin "Hepa ka huat zia hi chu aw...puih i ngaih ve hunah i hre khawp ang" a ti vak vak ringawt a, rawn hawi let lem lovin Muankima chuan kan hmuh turin ban a vai a, engthawl hmel zetin a kal zui nul nul. 

Thil ei tur a ka kal chuan Muankima leh a ţhianpa ka hmu fuh a, an rual a ei tumin "Muankim" ka ti vak a, midangin min rawn en ţhup, hming nei tu ber lah chu hre lo ang hmiahin a awm. 

"Lalmuankim" a awmna lam a pen hlawk hlawk pahin ka au zui zel a, earphone a vuah lehpek tawh. 

"A hre duh lo anih saw" tiin midangin min lo fiam zuk zuk hlawm a, ka ngaihdan ni lo lutuk chuan a bul ka thlen rualin phone ka chhuksak. 

"Pookie" a ti hman chiah tihin a phone a earphone invuah chu ka pawt phawi a, a thil ngaihthlak chu eng nge anih pawh hre lovin tum loh deuhin ka play zawm palh. Chutah ring lutukin James Nono ngei maiin "Ka thinlung a kick" a rawn ti anih chu. 

A zai zawm zel a, hre pha ho chu an nui dar dar a, tih tawp dan ka zawng chung. A zak dawn lutuk a ka hriat vangin "Awii..ka tihpalh lutuk Muankim" tiin ngaihdam ka dil ta ringawt. 

Ka phone kenlai chu rawn phih thla lawpin awlsam deuhin a ti tawp a, kan nuih a za lo dun kher mai. 

CONT...