THE GOOD, THE BAD AND THE OTHERS-10

THE GOOD, THE BAD, AND THE OTHERS-10

"June...engtin nge ka tih dawn?" ka ti khur dar dar. Ka hlauthawng takzet a ni. Ka kut phah chu na zet zetin ka hmer tawn chhen a, an rui deuh vek a, tu ber nge rawn kal ang?

"Hahdam rawh" ti hapin a rawn ding a, ka dar a dawmin a khumah min nam ţhu thung. Ka hmazawn a a ding chu ka melh chho ha a, ka mitmeng buai nasat tur zia ka ngaih ruat thiam. 

"Ka hahdam thei lo..tu nge khatiang kha ti? Tu nge ruak vek a min dah ang? Police hrilh dawn ila ka mualpho phah rup ka hlau bawk si" ka ti mawlh mawlh. 

June chu a kut ţang sehin ka hmaah a vei tawn chhen a, tih vak ngaihna a hriat bik loh hmel kher mai. Chutiang a rei tak a awm hnu chuan "Muankima hrilh mai rawh" a ti tawng. 

"Eng angin nge min ngaih ang? Ka muhil bawrh bawrh a, ka mutthilh hlanin tu tih hriat lohin min lo phelh rual vek ti ta ila a awih dawn em ni?" ka ti hliai a, ka mangang lutuk chu ka thin a chhe hlur. 

"Engtin nge kan zawn chhuah ang? Mateo bia in cctv footage ah en kan dil dawn mi? Resort hi an ta a ni tho a, pindan chhung hi a lang dawn hauh lo na a pindan a lut hi chu a lang ngei ang" a tih chuan beiseina ka nei veleh ta deuh. Mahse, Mateo hrilh ringawt pawh huphurhawm tak a ni. 

"Mateo chuan mak min ti viau angem le? Bakah keimah vang a an resort a buaina a awm phah chiam chuan min haw viau ang. Ka tello a in kalin hetiang buaina hi a awm ngai si lo" ka ti hmawk hmawk. Hlauhna leh manganna in ka khat a, chu chuan ka thazam thlengin a fan a, tha nei lo ang maiin ka awm zawi hnawk. 

"A haw miah lo ang che. Hria se chu a ti tu zawng chhuak tur a puih che a chak ngawt zawk ang" ti a min hnemin June chu ka bulah a rawn ţhu. 

"June, a theih hram chuan Muankiman hre lo se ka ti. Rei tak kan inkawm ve tawh a, mipa zawk a fihlim laiin keimah hlirin buaina ka nei a, a kang kai ve ziah bawk. Tun ţum a thil thleng hi chu hre lo se ka ti ngawih ngawih" ti sawk sawkin khumah ke ka hlang a, blanket la hnawk niaih chuan intuamin khum lu ah ka ţhu tawm kak. 

Min phelh ruak tu khan engtin chiah nge min sawng bawl ka hre lo. Ka hlauin ka inten hluah hluah. Ka ngaihtuahna chuan ka tha a ti khur thei hial!

"Pawi lutuk a thleng lo turah ngai la, midangin chaw ei an duh tawh ang. An tho vek tawhin ka ring" tih sap sap pahin a sana bunlai a bih zawk a, June ka kaihthawh hnu khan darkar engzat nge liam tawh ka hre lo. Engmah an hre ve lo na a mi hmai eng ka zah nghal a, tumah ka hmu chak lo. 

"I rilţam chuan nangmahin chhuak rawh. Keichu haw dawnah bak pindan ka chhuahsan tawh dawn lo. He hmunah hian thil ka ei ngam tawh lo va, tuisik takngial pawh ka in lovang" ka ti hmak hmak a, ka thin a rim miah lo chu a mak, thinrim ngaihna ka hre lo a ni ber. Ka chawmawlh a, ka la harh chhuak lo a tih theih ang. 

"Ka awmpui ang che..nizan ka lem hnem deuh a, chaw ei ka chak bik lo" tih leh khum a ke hlan ve a rual a, ngawi rengin kan ţhu dun tlawk tlawk. Ka ipik viau laiin June erawh chuan venthawn tur a nei ve lem lo. 

Kan pindan kawngkhar ri bur bur chuan min ti phu nasa. Thawm lo chhuahna lam chu kan melh dawrh a, June tho tur chu a banah ka vuan. 

"Tu te nge niang? June darkar engzat nge kan inkhung tawh? Muankima a ni angem?" ka ti hlawk hlawk. Ka kawchhung a hlauhna inmung tup tup vang chuan ka lum pup a, ka hit tel tho bawk si. Ka awmdan tak chu hrilhfiah harsa khawp a ni.

"Darkar hnih leh chanve vel niang. Ka va hawng ang midangin min ngaihven hmain" a ti a, kawngkhar ri a chawl miah lo. 

June in kawngkhar a hawn rualin "Khaw nge?" tih ri ka hre nghal a, Muankima aw chuan ka ngaih a ti ţha lo zual sawt. A mangan hmel tlat a ni. 

"Ka thil hmuh hi eng nge awmzia?" a aw chhum hmuk chuan min ti hlau kher mai. Ka tawm chawih a, ka hawi chhuak ngam eih lo. 

"Eng thil nge i hmuh?" June chuan a ti zawi sap a, Muankima chuan a entir nge entir lo pawh ka hre lo. 

"Thil thleng palh a ni. Lucky hi nizan khan a muhil nghal, video hian a ti chiang lehzual" June bawkin a tih takah chuan a entir ngei tih ka hria a, zan a min khawih tu khan video in a cover vek bawk tih ka hriat tel rual chuan ka chhing sawk a, ka mittui a baw nghal zawih. 

Ka ţhutna bul a hniam sut a, Muankima ngei a ni tih hawi chhuak ngam lo mah ila ka hria. Reilote ah taksa lumin ka taksa a rawn si a, khatiang thil a thlen hnu leh video hial a hmuh hnuah pawh Muankima hian min kuah tho anih chu!

Min venhim tum tih hriat ngawih ngawihin a awm zawnah min pawm bet a, ka chhip a a khabe a nghah chuan ka ţap chhuak. Ka ţap ri a hriat te chuan tawp tur a min hrilh lovin min hnem nan ka hnungzang a chul heuh heuh a, ka zak leh hrehawm ti lutuk chu ka puak keh thei mai dawnin ka inhria. 

"Ka tihpalh" zawi te tak tak a a tih chuan a awm si reng chungin lu ka thing nawk nawk. Thiam lohna pakhatmah a nei lo, ka mimal buaina bawkin a kangkai veleh tawh zawk anih hi. 

"Muankim" thlabar zet a June in a tih hnu chuan khum lamah a rawn pen hnai a, a ke pen tawp rual a ka hriat awmchhun chu ţawngkam tuihnai lo zet chhakchhuak a Muankima phun hluk ri a ni. Hmu thei lo mah ila thil ţha tak zawng a ni lo tih ka chiang. June pawn video a hmu ve tawh a ni maithei asin, ka hriat a sawi lovin Muankima a hmuh ang a, Muankima insum zo lovin a ti tu chu anchhia a lawhah ka ngai. Ka ngaih ruat dan hi a dik ngei bawk ang. Chu chuan min ti na zual sauh, puitlin zirin insiamţhat ka tum mek asin mawle.

Midangin thawm an rawn neih chuan ka tawlh sawn a, Muankiman min kuahna a thlah chiah chu a vawt huai a, ka ruakin ka chak lo zual a ni ber. Ka aiawh a midang hmachhawn tum ni awm takin a ding chhuak a, "Eng nge rawn tih in tum?" a ti chang bul a, chu chuan min rawn ngaihven tum an awm tih min hriattir. 

"Video lar tawk a awm thut. Tunlaiin video leak out an sawi sup sup a, pakhat kan nei ve dawn ni maw?" Vulmawiin a rawn tih chuan blanket ţham khawmin nghet zetin ka hum a, nikhua ka hriat loh zia an hmu miah lo em maw ni!

"Chhuak rawh u" Muankima chuan a ti leh tawp a, a aw a zawi viau na a a thukin a vawt ruih a, chu chuan a ti hlauhawm. A thinrimna lanchhuahtir lo turin a inthunun nasa ve khawp ang le. Hei tak hi Muankima ka ngaihsanna a ni. A inthunun thei lutuk tlat. 

"Eng nge awmzia? Kha thil kha engtik a thleng nge? Nizan a ni em?" Vulmawiin a tih leh chuan Muankiman "Chhuak rawh ka tih chu" a ti vin ţhawt a, a au ri ah chuan ka phu leh dawt. Hlauhna in min ţham chhuak vek a, ho te te ah ka phu dawrh dawrh reng mai dawn anih hi. 

"Shhh...Lalmuankim inbengdai rawh. Chanchin ka rawn ngaihven ve hram hram anih hi. Khatianga i au vak vak chuan midangin thawm an hre mai ang. Ka kawm tawh lo mai tur che nia aw, ka rilţam nak laiin" Vulmawii chuan a ti tan tan. A chhuak ta ni ngei tur a ni a sawi duh a sawi zawh rualin na tak a ke pen riin a zui. 

Muankima hian min huat leh huat loh ka hre lo a, ka zawt ngam rih lo bawk. 

"A ban chiah a lang a, hriat a har viau ang. Tu phiangsen nge maw ni dawn ni?" Gabriela chuan a ti hluk hluk a, a awm ve reng tawh a ni tih ka hre chiah. Helai hmun a kal ve dang chu sawi loh, ka ţhiante hmel takngial pawh ka en ţha ngam lo a ni ber.

Kawngkhar rawn intheh hawng ţhuai ri ah chuan phu dawrhin ka hawi tang hra a, a thawhna a la rei lo tih hriat tak a Mateo rawn lut pawh chuan rilru a ti zangkhai pha chuang lo. 

"Engtik a thleng nge? Chinfel vat a ngai anih kha. Ka pa ka bia ang a rawnkal rawh se. Resort a thil thleng anih chuan kan mawhphurhna a ni" a rawn ti nghut nghut a, thawhphan nei lek lo in ka siam anih hi. Beisei nei deuh a ka en lai chuan "A darh chak viau ang" ti hapin lainat hmel zetin min lo melh ve thung. 

"Mi lawm zawng tak ania lawm" June chuan a ti ve sep a, ral riai riai thei ila, khawvel aţang hian bo daih ila ka duh ber. 

"Ka hriatchhuah hun chu a chak lo viau ang" Mateo bawk chuan a ti bul hmuk a, tih theih an neih tlem em vangin Muankima pawh khum tlangah a rawn ţhu leh a, ka lam rawn hawi tawh lovin a ţhu kun ngul a, a rilru a buai hmel takzet.

"Nizanah khaw nge in awm hrim hrim? Muankima chu Mama te ho nen zu an in tih ka hria. Mateo, zu i in ve em?" June in a tih chuan "Nope..zu ka in ngai lo" a ti liam puat a, na zetin June bawk chuan Gabriel a melh hrak. 

"Room ah ka awm reng. Thil te te ka en a" zawi te tak tak a tiin nuam lo tih hmel deuhin hnuai lam a bih a, ka awm a ti nuam lo nasa. Midang pawn ngaihţhat loh hmel zetin an melh ta ţhap. 

"Saruak a in râwt nawk nawk ţhin ho a mi i en?" Mateo chuan a ti pek a, Gabriel-a a rawn dak chhuak rang nasa mai. Mateo thusawi chu a haw hle tih hriat zetin a nur nang. 

"Eng nge i en sawi la" ti a June lehzelin a zawh takah chuan "Tinkerbell leh Encanto ka en zo a ka muhil" a ti sup a, inthiam loh hmel tawkin a nui tel bawk. Min enkual ruh ruh chungin a tukhum a tuai a, mipa in chutiang a en chu mak kan tih a hlau ni awm takin "Ka u fanu in min rawn bia a, en turin min hrilh" a ti leh tawp a, a sawi dik ang. Gabriel ang mipa felfai lutukin khatiang thil kha a tih ka ring hauh lo. 

"Inkhawm an bang tawh ang. Ka pa chu ka'n bia ang e. Lucky chhungte kolasib ah an awm daih a, tawrh tlawk tlawk aiin puitling rawn inrawn ve se a ţha zawk" a tih rualin Mateo chuan phone a phawrh a, ka dang duh lo. Ka mualpho tawh sa sa a ti tu hriat ngei ka duh. Min phelh ruah pawh duhtawk lovin video a record in a theh darh zui a, case file a ngaih leh ka ti mai ang. Engmah tih hreh ka nei tawh lo. Hrechhuak ila chuan ka dik zia lan tir nan ka khing rap rap duh ang. 

"Pa..i haw tawh em?" a tih hnu lawkah "Haw lo maw? Haw vat ta che..biakin kawt a awm khawmuan reng tur a ni hleinem" Mateo chuan a ti zui lung lung. An resort a thleng a nia, police in an chhui phei chuan hrilh lo mah ila an buai a ngai dawn tho tho. Rei rial lovin buaipui vat vat ila, manchhuak thuai se ka duh ber. 

"Resort ah infiam mai mai turin kan kal a, waiwai leh frooti vel kan eikhawm laiin eng emaw a thleng" a tih bul bul hnuah "Teuh lo mai. Zu vang hian Z thumal ringawt ka hmuh pawn luak a chhuak" duhthaw zet hian a ti leh a, "Mi pakhat nun ti chhe vek thei a nia, kan fimkhur loh vang a nihna chen a awm a, chhuichhuah chu kan tih tur a ni" thutak zawkin a ti leh. 

Mateo penglenglenga pa a rawn thlen chhan cctv footage ah room a lut leh chhuak chu kan en ngei a, a mi rawn hruai te nen uluk deuhin kan en hlawm. Ka zahna leh hrehawm tihna a reh thei lo a, ka inthlahrung takzet bawk. 

Mateo room lut tur lam auh auh pawh chiang takin a lang. Guitar a keng a, kawr ha lo in boxer a ha a, mawza a bun na a chapal a bun lo thung. Cctv camera chu a fiah ţha khawp mai. Kan room a lut pawh chiang deuh a kan hmuh theih ka ring. A taksa a chet apiangin a pa chuan "E..e...e.." a lo ti zel. A mi hruai te nen chuan an nuih a zat hmel viau a, keini ţhian ho erawh engmahin min ti nui zo lo. Mateo ngei pawh a tel. 

"Khai a! Hnawhchhuah vang vangna thamin alawm i lam le" Mateo pa chuan a ti hluai a, pa hmelţha tak anih bakah a la upat vak loh hmel. 

"Frooti leh waiwai hnathawh ringawt a va ang lo ve. I hmel teh sawng lah kha, khawvel hi na i tih hmel bik ngawih ngawih a" Mateo pa rawn zui tu pakhat chuan a ti veleh a, Mateo thung chuan nghet zet a ka dar hmer pahin "En zel rawh u" a lo ti hmuk. 

Kan room ah chuan mi pakhat chu a lut ngei a, sa pan lam a ni tih chu a hriat. Mahse a hmel a lang lo a, a thawmhnaw a dum vek bawk. Room aţanga a rawn chhuah leh pawn a lukhum hmain a hmai a hliah a, a langchiang viau na a a intuam phui em vangin a hmel a lang thei lo hrim hrim. A pian hmang kan en ngial pawhin tu nge a nih kan hre thei lo. A beidawnthlak khawp mai. Beiseina ka neih ve zawk kha vawilehkhatah a bo leh duak. 

"In hre thei em? In manchhuah hlauh chuan a Anaconda kha tan sak ngei ngei ang che u. Hetiang ho hi chu an Anaconda hi chi thlah thei miah lo a siamsak zel tur. Hmeichhe chak lo zawk te hman ţangkai ching an tam lutuk" hmeichhe pakhatin a rawn ti lut bawrh bawrh a, a hmel ka hmuh chuan hriatchhuah ka nei. Zan a room a ka lut tur min lo fiam tu, nu hmelţha tak ka tih ngei kha a ni. 

"I awm ve reng sia, rinhlelhawm deuh hlek hmuh i nei lo maw Hirha?" tiin Mateo pa chuan a lo zawt a, Hirha-i a tih chuan a lu lo thingin "Nei lo, midang pawh ka zawt tawh. An buai buaiin an buai vek a, khatiang thil ti duh kha an awm an ring lo bawk nen, tuman rinhlelh tur an hre lo. Zirlai ho kha an vei kual peih ve tho bawk si" a ti a, chhui zui vak ngai lovin mi tlem te hian hrechhuak thei ila ţha mai tur. 

Beidawng deuh a let ka tum lai chuan pa pakhat hi ka hmaah a rawn ding thim khup ka ti mai, a taksa hrawl tak chuan min hliah hneh lutuk. Ngawi rengin ka melh chho ha a, "Rinhlelh i nei em?" a rawn ti nghut a, a ţawng bungin Mateo pa te ai chuan a tawh a khirh hmel deuh. A rawn thlen hnuah tun a min biak bak hi a ţawng awm ka la hre lo.

"Aih nei lo" hlauh hmel zet a ka tih sep lai chuan ka bulah Muankima a rawn ding a, ka ţhian dangten min rawn fin ve nghal zat bawk. 

"Papui, ţawng hmuk hmuk zel suh ka tih kha, i khua a sik ang" Mateo chuan a ti hluk a, a papuia chu a lo nui mai. Kan hmuh ang a hmu ve vek a, a beidawnthlakzia a hre ve tho ang. 

"U Tete, engtia tih chi nge niang? Loisy hian case file se la, a chhui zui theih a ni mai lawm ni?" Hirha-i an tih khan a rawn ti a, ka hma a ding Papuia pawh lo bu nghutin "Ni mai e" a lo ti sup a, a ngaih awlsam hmel viau.

"Ni-te, Loisy a ni lo Lucky anih hi. In ninawm, mangangin ka ko cheu a, in â vek. In hre thei bawk si lo" Mateo chuan dawhthei lo zetin a ti hluk hluk a, a lawm loh hmel viau. 

"Kawhtebel a tuichawi tum hian â min ti a nia" tiin a nitei chu a nui hak a, "Naupanlai anih kha" ti bul hmukin Mateo a tum bur a, chaw eina lam pan turin kan inzui chhuak hlawm. Engmah ka la ei lo na a ka ril a ţam der lo. Puitling ho in "Eng emaw tal ei rawh u" an ti tlat a, chaw ei lo mah ila an rilru nawm nan a inhnawhpuar luih a ngai. 

Eitur nghak a midang kan ţhut far laiin Papuia chu a kal chhuak a, a kal hmain "Ka'n fang kual hrim hrim ang e" a ti a, an ngaihven zui lem lo. Keipawn resort fangkual turah ka ngai. Kha mi tenawm, a hmel hmuh theih miah si loh kha chu chhuizui dan a awm lo hmakah ka ngai tawh. 

"Ka nu'n min rawn call..pawisa ka dil che kha i hrilh hman a ni maw?" rum ul a tih pahin Mateo chuan a pa a melh a, ka hmazawn a ţhu anih vangin ka hmuchiang thei viau. 

Eitur an rawn dah lai anih vangin Mateo chuan speaker ah a dah a, a nu au ri kan hriat chuan kan phu zawk hlawmin ka ring. "Zoremsang engatan nge pawisa i tih leh tawh? I va heh ve, pawisa hi a eiin i ei ţhin em ni?" a rawn ti lawng lawng a, kan Mateo takngial pawn rang lutukin phone a hmet tawp. A pa leh a mi hruai pa nuih a zat viau laiin keini ho chu kan inmelh hrek hrek a, kan nu anih kan hlau vek ang, a thinchhiat hmel emai. 

"Lucky, case file la, an chhuizui ang a, theih ang angin kan pui ang che. Kan tih theih tawk chu khatia en kha a ni mai a, a hmel a lang thei si lo. Chhuizui vak ngaihna kan hre ve der si lo a, kan lakah beiseina i neih san dawn nen, pawi kan ti khawp mai. Min mamawh hun a awm chuan kan ţawiawm zel ang che" puitling ho chuan an ti liam liam a, a pawi loh thu hrilh mawi ve mah ila pawi ka ti. Tih theih an neih bik loh zia hre lawk ila chu ka koh buai tir lo ang. 

"Facebook tih vel kha paih daih rih rawh. Hmu tu an tam a an khel zui chuan a ti hnual mai mai ang che. I thiam loh a ni lo tih hrereng la, insit phah duh miah suh. Khaw loh vang hrim hrim a lar hat te pawh an zak hleinem. Hmasawn tumin ţang sauh zawk rawh" tiin Mateo nitei chuan min fuih a, "Tunlai mipa ţhenkhat hi chu ka rap zawk. Hmeichhia aiin an ţawngthei emaw tih mai tur. Mizo hmeichhia han che chhe zeuh se an nuihsawh a, ţawngkam chhe tak tak hmangin an ţawngkhum a, chhiar hrehawm khawp comment hnutchhiah chang an ngah. Video leak out lah thawn darh chak zek zek an tam a, hmu ve lo tu nih an hlau. Mizo hmeichhia an sawichhe bawih bawih a, hnamdang an neih lahin hnam phatsan tu an tia, an rilru a na leh em em a. Diktak chuan mualphona tawpkhawk kan tawh chang leh, thlamuantu kan mamawh ber lai a min tuam hlawm a min kuah lum tur a kan ngaih mizo mipa ngei ten kan hliam an belhchhah ţhin hi chu a pawi ngawt mai. Mipa zawng zawng an ni vek ka tihna a ni miah lo bawk" a tih zawm leh a, a thusawi chuan ka ipikna a la kiang miah lo na a dik ka ti khawp mai. 

"Kan mawhphurhna a nia, kan tel ve a, eng emaw a awmin sawi hreh suh. Kan inhuam vek" tiin min thlah a, hmasawnna nei miah lovin room ah kan let. 

Ka nu a awm tawh bawk si lo, hmanah kha chuan ka lamah ka nu a ţang a, min fuihin min thlamuan reng a, ka tuarchhuak thei. Tun ţum a thil thleng hi a darh nasat viau chuan ka tuarchhuak thei angem ka hre lo. Ka pa ka hrilh ngam dawn lo a, hrilh mah ila awmzia a awm lo ang. Ka pa ai chuan Mateo chhungte khan min ngaihsak daih zawk ang. Ka nauten lo hmu ve ta se engtin nge an awm ang tih thlengin ka ngaihtuah. Ka awmah hian thil chi hrang hrang a in mung tup tup a, thawk ngaihna pawh ka hre lo. 

Tlaiah Muankiman min hruai haw a, cabin ah min luh tlang pui. Ka inbual hnuah khumah ka mu leh hnawk a, ka awm zawn a chahbi a rawn theh thla chu a ngaihna hre lo deuhin amah ka en a, "Ka putea ka dil a, i awm rih a phal. I duh chen chen i awm thei ang" a ti a, min demna thu a la chhakchhuak lo a, a hmel landanah engmah ka chhiar thei lo.

"Eitur ka han lak ang che" tih leh chhuah a rual a, rei vak lo hnuah rawn let lehin "Pawn lamah ka kalh dawn. Tumah an rawn lut lo ang" ti supin min thlamuanna ni awm takin ka chal a rawn fawp a, min haw miah lo ni a ngaiin ka thaw huai mai.

Ka phone a rik rual a Boomer tih inziak kalh ka hmuh chuan ka thaw a rangin hlauhna leh zahna in min ţham leh nghal er er a, be hreh viau mah ila ngaihţhat lohna a neih duh lo in ka chhang hram.

"I ţha em?" a rawn ti mawl tawp a, pawi ka ti lutuk chu mit ka chhing sawk. Ka pa che khaw lo lai a hmuh pawn khati khawp khan a na a, a mittui tling ram kha tun thlengin ka la mitthla thei. Ka nau aw ah chuan video khan a hnen a thleng ve tawh tih ka hre thei.

"Aw ţha e..hei ka mu mai mai a" ka tih chuan "Hruai i duh em? I duh chuan ka rawn hruai ang che" a rawn ti a, a aw a min ngaihtuahzia langchhuak avang chuan mittui a hnai kuarh thei. 

"A ngai lo..Muankima a awm a, ka rawn haw duh pawn a rualin ka haw thei lawm. Min ngaihtuah miah suh" ka ti dap dap a, ţawng dam ka tum nasa lutuk chu keimah hi ka hrehawm. 

"Thil i ei em?" a rawn tih leh pawn ka ei thu in ka lo chhang. "Tlai lam eitur la turin Muankima a kal chiah bawk a" ka tih chuan hahdam huai ni awm takin a thaw ham ham a, ka nau berin min ring a, ka huaisen sawtin ka hria. 

"I hmu tiraw? Engtin nge i hmuh theih? A lar viau tawh em ni?" ka ti mawlh mawlh.

"Hmu chiah lo ka en duh lo a, lar viau hran lo ang. Facebook group ţhenkhatah 'a thar a awm leh tawh mi?' tih vel a post an siam chu ka hmu. An inpe darh chak ţhin a, reilote chhungin a darh huk zel. Mahse nang chu chutiang a ni lo ang" ti a min rawn hnem a tum ve ngial. A darh chak zia a sawi zo chiah sia. Ka ngaihven zawng a ni hauh lo na a keipawn ka hre ve zel. A awm tih ka hriat hmain ka hmelhriat te chuan an lo nei hman vek tawh ţhin a, an sawi zarah ka hre ve ţhin. An nuihzat ţhin zia ka hriat telna chuan ka zahna a belhchhah.

"Boom Boom...Boomer" ti lang lang thawm a awm rualin "Henu lah hi a" tiin Boomer a phun hluk a, za lo deuhin ka lo nui ro hak. Ka nui ri te hi hria se a hahdam deuh ang. 

"Boom Boom" tih ri chu a ring sauh a, "Hmun leh hmunah mi ko vak vak zel suh ka beng a ngawng lo" ti a ka nauin a vin letna phei chu ring tak a ni. 

"Pawisa min pe rawh..ka nu'n a nei lo a, i pa hi damchhung a pawisa dil ka tum lo bawk. Nangmah hian min pe rawh..i ba" Daisy ngei chuan a ti zat zat a, ka chanchin a la hre ve lo a ni maithei, hria se chu a sawichhuah tawh ka ring.

"Ka pe nguar ang che. I eng pawisa mah ka ba lo" Boomer chuan a ti hmuk hmuk a, Daisy in "Ka mawnglem ah i zawhte in nau a nei. Khawi a thar leina min pe rawh" a ti let salh bawk. 

"Ka mawhphurhna a ni lo. Chhuatah mawng lem i hung hnur aniang chu. I pawisa in lei rawh" tiin ngaihsam fe in ka nau in a lo chhang let a, za lo deuhin ka ţhen ka ţhen ringawt.

"Chhuak rawh..ka u nen thu pawimawh kan sawi" inla puitling fahranin ka nau chuan a ti leh a, Daisy in ka chanchin a la zawt chuang lo chuan tlemin rilru a ti hahdam. Mi zawng zawngin an hriat ka rin laiin hre lo an la awm tihna. 

"I zawhte naute saw zawhte pa vakvai ho ka pe dawn" Daisy in a tih rualin a ri zui bawrh bawrh. Ţawng si lovin thawm an siam khut khut reng a, an insual leh em maw ni ti a ka ngaihtuah lai mekin Daisy in "Ka tlawm..ka tlawm...I surrender all...1,2,3,4,5 ka ke i lock kha thlah rawh" a ti chul. 

An naupangchhia lutuk chu ka meng kual ralh a, keimah zawkin phone ka off. Hun remchang a neih hunah ka nau chuan min lo call leh mai ang. 

Muankima eitur rawn hawn ang ang chu a rilru nawm nan ka ei a, a rualin Jessie a rawnkal ve mial. Kan haw hma chhan min zawt a, ani pawn ka chanchin a la hre bik lo. Kawm tur a neih loh vang chauh a lokal a ni. 

"Enteh u...thawm ka hre nasa lutuk a, keimahin ka riak ngam tawh lo. I lo haw hlauh chu ka lawm eee.." tih pahin min ţhut hnaih sauh. Khum a kan ţhut laiin Muankima chu khum ep a tukverh bul chair ah a ţhu thung. Thil dang daih ngaihtuah angin a lang a, kan thusawi chu a hriat ve loh hmel. 

"Cabin ah hian ka riak dawn. Room ah ka rawn riak lawk rih lo ang. Kan khua a haw angin ka awm ang a, ka tawm char char rih dawn" ka ti malh malh. 

"Ngati nge? Muankima nen in inru ve deuh tihna mi?" tiin thu atthlak lutuk a chhakchhuak ve mial. Ani hi chu a zia ber asin mawle. 

"Teuh lo mai..chutiang a ni lo. Engtin nge thawm chu i hriat a?" ka ti a, thudang ka sawipui loh chuan min zawt chhuak takngial dawn. 

"Thawm mai bakah a che tel. Nizan khan rei deuh lehkha ka zir a, ka zir chhung zawngin thawm a awm. Kan room kawtah pen ri a awm reng a, kawngkhar ka hawnin tumah ka hmu leh mang si lo. Ka khar rualin pen ri bawk a awm leh ţhin a, a mak lutuk ringawt. Ka muhil pawh ka blanket sin lai tawlh riai riai rengin min ti harh a, ka awm thleng ka pawt chho a, a tawlh thla leh ţhin a, blanket kan inchuh anih ber chu. Muankima ka hmuh khan i rawn haw tel ve dawn tih ka hre sa a, ka lawm hman tehreng nen cabin a riah i tum daih sia" a ti niah niah a, a thil tawn a sawi lai a a hlau mitmeng kha ka hmuh hmaih bik miah lo. 

"Josephine anih i ring tihna mi?" ka ti ţalh. 

"Ni lo se tu dang nge niang? A thih hmain eng thawm mah kan hre ngai hleinem" a ti vin hlar a, "Ka hlau lutuk ringawt. Ka chhip aţang hian a pilril ber ka mawngkua thlengin a za chhuak uai uai vek. Mahni chauh a mu ka nia, blanket a rawn pawh phei kha chuan thidang law law ila ka ti asin aw" a tih zawm leh a, na deuh deuhin ka ban a tuai pah sek bawk.

"Hrim hrimin i hmel hmuh a nuam lo. June nen in inhau a mi? Tun ţum i rawn haw chu i dik lo riau mai" Jessie chuan ti lehin chik deuhin min thlek a, ka lo nui lui.

"Kan inhau lo..ka awm peih tawh lo a ka rawn haw daih anih hi. Thawm i hriat leh chuan ţawngţai tawp la, a reh daih mai ang" ka tih chuan "Ka ţawngţai nasa lutuk. Rilru in ka ţawngţai char char a, thla in min kalsan chuang lo. Tu emaw in a that ang a, amah thattu ber kha hre lo in min tih ţhaih kual tihna a ni thei angem le?" a ti nuah nuah a, a mitmeng buai nak mai te chu ka khawngaih angreng. Mahse, kei ang a nasa in a mualpho ve kher hleinem. Jessie hi ţawng phawng phawng chi a nia, hria se chu ka chanchin leh social media a ka than dan a sawichhuak daih tawh ang. 

Ka muhil ka harh chuan a lo thim vek tawh a, Jessie pawh a awm tawh lo. Muankima ţhutna, cabin bang thlang lam a tukverh awm tlar dal a parda chu zar phui loh vek a nia, tukverh aţanga thla eng tak rawn lut chuan inchhung a chhun eng deuh ruih bawk. 

Muankima ţhutna bul tukverh bik chu inhawngin thli in parda a chhem leng leh delh delh ţhin a, in ngaihtuah muk hmel zet a Muankima ţhu chu a rukin ka en reng. A mitmu chu thla eng hnuaiah chuan a lang tle sar a, a meizial khu in a hliah leh zeuh ţhin. Lukham dum ţha zetah chuan ka lu ka phum kak a, ka hmai zawn thleng a ka kut phar chho in Muankima chu ka melh leh ţhin. A hmel dur khup te chuan a lungawi lohzia lantirin keimah vang a ni tih ka hria a, ka lo piang ve kher kher hi pawi ka ti rum rum. 

Ka lam a rawn hawi rualin mit ka chhing a, muhil ang hmakin ka awm. Rei tawk fang ka chhin tlat hnu chuan min en ve ring tawh lovin ka meng leh a, ka ti sual. Min lo la melh reng. Ka muhil der vel kha hria ni awm fahranin ngun thluk deuhin min lo thlek vung vung a, ka chhing leh tawp. Min en reng ni a ka hriat tawh miau vangin ka meng leh thuai a, min lo la en tho. 

Ka chet rual chuan na zetin thawk a la a, min melh reng chung a a ţhutna aţanga a thawh hnuah khum a rawn pan. Ka bulah zangthalin a rawn mu a, "Room ah i let dawn em?" ka tih chuan a lu a ti che zauh.

"Ka awmpui ang che" ti supin chunglam melh reng chungin ka kut a rawn vuan a, keipawh zangthal a mu in ka insiamrem. Mu chungin kan inkai anih ber chu. Kan chhungril a ipik ve ve a, manganna, hlauhna, huatna leh thinrimna inpawlh nuk chuan a thisenzam a fan chhuak hneh hlein ka awm. Ka awm ang a a awm ve chuan chutiang chu a awm dan tur a ni. Tih theih kan nei tlem dun lutuk hi a beidawnthlak lai ber a ni. Boruak daih hun leh miin an sawi peih tawh loh hun nghak a tawrh ngawt ngawt bak tih theih a awm lo. 

"Eng angin nge min ngaih? Min hua nge min ten zawk? Min sit phah viau em? Video a darh hluai a, en ngam miah lo mah ila a rapthlak zia ka hria" ka tih chuan ka sawi zawh hma hma a lo nui hawkin min kaihna a thlah a, ka awm zawn a min kuah nghal zat rualin a kut lehlamin a inbengkang tel bawk.

"Nichin khan thla eng ut khi ka thlir a, in anna kan ngah hmel" zawi ruih a tih pahin a khabe ruh kual chuan dim te in ka chal a rawn nawr si a, "Eng kawngah nge thla nen chuan in in an a?" tiin ka lo zawt vat. 

"Kan tan ţhian leh kawppui rinawm a nia, i tan a ţhian leh kawppui rinawm ka ni ang chiah hian" a sawi zawh rual a a nui ri suk chuan min ti nui ve, a daih rei lo viau thung. Ka awm a a ban innghat chu la in a kutţang sei thlurh chu ka kheuh neuh neuh a, zan ni reng se, thla hian min ènin min awmpui reng se ka duh ta ber. 

"Han sawi zel teh" ti sep a a mit a ka en kiau lai chuan min rawn melhin a nui leh suk. 

"Thla chu ngaithla tu a nia, vanduaina leh thil lawmawm lo kan chung a a thlenin min kaihruai ţhin. A chang chuan a chak lo in a nguai a, a êng a fiah lo a, a chang chuan chak leh fiah deuhin a êng a, keimah ang chiah hian. Ka nun ang chiahin a inthlakthleng kual reng na a mihringte kawng kawhhmuh turin a êng reng tho. Ka chak loh chang leh ka tih theih piah lam thil a thlen pawhin hmuh phak loh a i bo daih loh nan thla angin ka ên ţawk ţawk tho ang che" ti a zawi te a a phun sup sup chuan a kut thlahin mu reng chungin a nghawngah ka kuah ta zawk. 

"Min rinhlelhna chhe te mah i nei miah lo mi?" a nghawng a hmai phum kak chung a ka tih chuan "Nei lo. Khatiang kha ti duh la chu hmanah a thleng tawh ang. Kei aia ngaihven i nei hleinem" inringtawk fahran a a tih chuan ka nui ve hak hak. 

"Beidawng suh, ka awm chhung chu kawng i bo lo vang. Nangmah a tawrh tir che ka tum lo. I hmaah ka ding zel ang a, tuman an chhaih nawmnah lo vang che" a aw zawi leh khauh ru zetah chuan a tih mai mai loh zia a hriat. 

Dak deuh ha a ka inlak hran hlek chuan rawn kun hniamin a khabe ruh kual chuan ka bek a rawn nawr leh zeuh a, min haw miah lo hi mak ka ti. Min lo ring takzet anih dawn hi tih thlengin ka ngaihtuah. 

"Video i hmuh hlimin engtin nge i awm?" ka tih chuan "Mak ka ti" tih chiahin min chhang. 

"I thinrim miah lo maw?" ka ti leh a, "Rim e..tun thlengin. Nangmah ka haw lo che, i chung a kha thil ti tu kha ka hua" a aw chang zet chu haiderin "Engtin nge min huat loh theih?" ka lo ti hliai. 

"Ka hrechiang che. I mizia ka ngaihtuah hmasa a, khatiang thil kha i duh vangin i ti dawn lo tih ka hriatna hian min huat tir thei lo che" nghet zet a a tih churh hnu chuan sawi tur ka hre ve tawh lo. Ka dinhmunah khan dingin ka chung a thleng ang kha a chungah thleng ve ta se keichuan engamah hmain ka haw nghal hlur awm sia. Ngaihtuahna fim ka hmang hmasa thei miah lo ang. Muankima angin ka inthunun thei ve tlat lo. 

Ka phone a rik chuan ka chhungte an nih ka ring nghal hmiah. Zan reiah anni lo in min rawn be ngai lo. Mahse, rin loh deuhin screen ah chuan Jessie hming a rawn lang a, ka beng a phone ka chuktuah rualin "June ka hmu Lucky, tunah khan June ka hmu chiang lutuk. Resort ah a awm miah lo. Tukverh aţang hian nui chungin min lo bih alawm..awii ka hlau lutuk" a rawn ti chel chul. A thlabar lutuk chuan kan boruak a rawn thlak danglam hlawk a, ka thu hriat chuan hlauhna min siam miah lo ti tlat ila chu dawt ka sawi ngei ang.

CONT...(Min nghak ţang ţang ţhin ho hi in mawng a no hlawm ngawt ang)