THE GOOD, THE BAD AND THE OTHERS-11

THE GOOD, THE BAD AND THE OTHERS-11

Khaw thim chhah mup hnuaiah Muankima nen kan room lam panin kan chho hlawk hlawk. Jessie a ţap pur tawh sia, chhoh loh theih a ni lo. Thawm dim a ngai a, hmanhmawh chuan a buaithlak khawp mai. 

Kawngkhar a rawn hawng a, min hmuh rualin min kuah thlawp. A tha khur nasa lutuk vang chuan ka lo kuah let thuai. 

"Khawi tukverh aţangin nge a rawn dah?" Muankiman a tih chuan thlang lam a kawk a, ngaihtheih loh hmel zetin a lo thaw hawk. 

"A sang lutuk Jessie, a lawn thei lo" zawi sup a tiin a nin hmel titih der. 

"Ka hmu ngei alawm. Eng lo, June hi..June hi mihring a ni lo aniang" a ti bah nawk nawk a, Muankima chuan tukverh hawngin a dak chhuak vel a, Jessie chu a ngaihnep hmel.

"Dawt i sawi" aw ki hniam zet a a tih chuan ka ngaithei lo ve thung. Hmuh nei lo se Jessie hi a khur hlawk hlawk lo ang. Muankima lah chuan Jessie chu en tlang a tum emaw tih mai tur a chiang hian a melh ngur a, tukverh bul a a ding khawng luah chu va chum pawp mai te ka duh rum rum. 

"Dawt ka sawi lo, duh leh warden te pawh kaitho ula, a hu ho chuan finfiah thlap ka ngam. June hmel a rawn lang ngei alawm. A nui a, muangchangin a lu a ti che bawk a, awii ka sawi zawng ringawt pawh hian ka rap, ka thauah min man" tiin Jessie chuan ţan a khawh a, ka ring thlap. Chutih rual chuan June rinhlelhna ka nei miah lo. Kum 3 kan awm dun tawh a, maksak tak a chet a nei ngai lo. Ka tan chuan ţhianţha tak a ni. 

"Josephine thla a nia nga, a hmel a siam danglam a ni maithei asin" ka tih ve chuan atthlak tih hmel lutukin Muankima a lo nui hawk. Mipa hi chu an in la huaisen a, hetiang lam hi an awih ngai lo reng a ni. 

"Mut ka duh, pawi in tih loh chuan" ti sup a min rawn enin mithmul a kan uk a, ka lo bu nghat. 

"Jessie hi ka riah pui ang" ka tih lai te chuan Muankima chuan Jessie ngawt a lo en. A rin loh hmel lutuk chu ngaithei lovin "Kal tawh rawh, ka rawn bia ang che" ka ti hlak a, engmah sawi zui lovin a chhuak. 

"Ka ti tak tak a nia Lucky. Nang chuan min ring tiraw? June ngei a ni, danglamna a awm lo. Sawi lai tukverh darthlalang phen aţang sawn min rawn bih alawm" a ti leh hmawk hmawk a, ka rin thu ka lo hrilh vat. Zahna chiahin min hmuak mah se ka ţhiannu mangang hi ka kalsan thei lo a ni. 

Jessie hriat lohin June ka call a, a la thei lo. Mutthilh loh a hun tawh loh vangin mak ka ti hran lo. Tukverh ah chuan Jessie in parda mai bakah puan a zar thuah ţun a, khum khatah kan mu. Nghet  deuhin min kuah bet tlat a, a ruk a June biak pawh tum chu har tak a ni. 

Jessie mutthilh hnuah pawh eng emaw hriat in beiseiin ka ngaichang ran a, tukverh a zar phui vek tawh pawh keu hawngin ka bih zeuh zeuh reng. Eng thil danglam mah ka tawng ve lo. 

Zingah an rawn let a, June in min hmuh rual chuan "Cabin ah i riak dawn maw tia" phawk hra hian a rawn ti a, cafe a kal tumin Jessie a chhuak deuh chiah bawk.

"Jessie i rawn tawk em?" ka lo ti thung. Lu thin mat mat pahin "Tawk miah nang, ngati nge? A mut an phuau laiin i ham ve mi?" a ti a, a nui zui hak hak. Ka chung a thil thleng kha hre lo ang hmakin min bia a, hrehawm ka tih a hlauh vang a ni.

"Nizanah thlang lam tukverh aţang sawn i bih em ni?" ka tih chuan a nui tawp hmak. Tukverh a puan la inzar phui mup lam chu a melh a, "Pawn lam aţangin maw?" a ti he haw. 

"Niang chu..lu ti chein i nui a, zanrei a min rawn koh vang anih hi hetah ka awm" ka tih chuan a nuih a za kher mai. 

"Mi â nu" min ti zek a, a kut ţangin ka chal a rawn kawk pah sawk. 

"Ka ti tak tak ania June, a taksa a khur nasa si. Ni lo se chu cabin ah ka awm a, ka boruak i hriat kha" thutak zet a ka tih takah chuan aw thian kharhin a insiamţha a, "Resort ka chhuahsan loh chu thuhran saw lai tukverh ah sawn ka dah phak i ring a mi? A san em saw, Jessie tih ţhaih tur mai maiin ka lawn peih teuh lo" a ti hlak hlak. 

"Jessie in hmuchiang a inti viau sia" ka tih chuan "A tho â anih dawn chu. Ka nghawng ka ti sei thei anih ngawt loh chuan saw tiang tiangah ka dak phak lo" a ti hlar a, lungawi lo lutukin a thawmhnaw a phawrh sawk sawk. 

"June fiamthu thawh nan i hmang miah lo tiraw? Jessie hlau hmel hmu turin i tih ţhaih a ni thei angem?" ka tih chuan "Naupang i nih lai a pawngsual tu che kha tun hnaiah i hmu leh tawh em? Engtiang chiahin nge a danglam? A la umzui ru reng che em? Chutiang ngaihtuah kual chung chuan rei deuh ka meng. Min rawn call hun kha dar2 vel a nia, ka meng thleng em lo aniang zingah ka hmu chiah. Police tel kher lo pawh a kan chhui ruk ve theih dan tur ka ngaihtuah laiin nang chuan min hlauin tukverh i lo zar phui a, min rin loh chuan in pahnihin insawn chhuak rawh u" a ti hlak hlak a, hrehawm ka ti let daih. 

A kal hran tawh hnu a "Ka ring che..kan awm dun rei tawh a, vawikhatmah ka la sawisel ngai lo che. Jessie in hmu che angin a insawi a, keichuan hmuh ka nei ve lo" ka tih chuan "I awih vek tho alawm. Power nei, duh duh hun a boruak a kang theiah min ngai anih kha. Ka thlawk duai duai thei anih loh chuan saw lai tukverhah sawn ka dak thei teuh lo" ti hlarin a thawmhnaw ken laiin ka hmai a rawn vawm pawp.

"Thil dang sawi tawh ang. Video darh chiam ah hian case file a ţullo i ti deuh a mi?" ka ti ta daih. 

"Police pawn eng nge hmu se i tih chuan? A landan tawp aţang khan tu nge anih kan hre thei lo a, an chhuichhuak chuang lo ang. Hman a pawngsual tu che bak kha rin tur ka hre lo. Chu chu chhui tir ngawt ta ila i pa'n a hriat chuan nangman i tuar ber dawn. Ka ngaihdan mai mai a, i duh ang zanin kalpui rawh" a tih chuan "Class kal zawm lo a chawlh rih ka duh" ka lo ti a, ka thusawi chu hriat a inbeisei loh hmel kher mai. 

"Kum tharah i ti ţha leh dawn tihna em ni?" a ti hluai a, mak a tihna a thup hleithei meuh lo.

"Aw..ka pa dawt ka hrilh ang a, hostel a awm reng chungin tih tur dang ka dap daih maithei bawk" ka tih laiin Jessie a rawn lut a, ka sawi zawm duh ta lo.

June a hmuh chuan a ding chawt a, hlauh hmel zetin min hnaih nghal ruak.

"Ang phuau, engtin chiah maw min hmuh a?" June chuan a ti chang fal a, a mitmeng pawh a rum hle. 

"Tukverh ah i lo dak a, ih...i nui vel" Jessie chuan a ti bah nawk. Ka hnungah dingin inphen nan min hmang a, a hlauh takzet zia a hriat. 

"Huh! I phuahchawp anih chu. Saw i khum bul tereuhte, paw phuk khawp a rang ruaiah sawn ka dak peih lo" June chuan a ti let erh a, a duhthaw khawp mai. 

"Ka phuahchawp lo aw..ka hmuchiang lutuk che" tiin Jessie pawh a la ţang ve tlat. 

"Anih nih ni vel mai mai teh se" ti halhin June chu a inla hrang a, a lungawi hlawl lo, a hmelah a lang vek.

Ka ţhiante pahnihin min tur nasa viau na a class kal ka tum lo. Thil ei turin ka la chhuak miah lo bawk. Khum a bawkin phone ka khal a, ka nauin Kolasib a haw mai turin thu min rawn râwn chhen a, "I ţhianten an kalsan vek che ang a, mahni chiah a hrehawm tawrh ai chuan rawn haw rawh" a ti ve ngial. 

A sawi dik lo miah lo. Hostel ah chuan ka hmuh duh ngei pawh duh duh hunah ka hmu thei lo a, mipa ho an inkhel leh anih pawhin en turin ka awm lang ngam tawh lo bawk ang. Kolasib a ka ţhiante, Teresa leh Peki te takngial pawn "Rawn haw la, nitin kan rawn leng ang" an rawn ti a, anni an hawizau deuh a, sawi lang chiah lo mah se ka chanchin an hriat tawh ka ring. 

Hostel bikin whatsapp group kan neih ve ah lah fiamthu thawh nan a min hmang duh tawk an awm a, facebook group a an thil post screenshot a rawn dah tawk lah bo lo. Miin min deusawhna ţawngkam te chu an tan a ngaihthlak leh chhiar nuam a chang a, hming phuah lah an hneh sawh. Sleeping beauty min ti anih chu! 

Ţhenkhatin ka harh miah loh thu sawiin ka thlavang an hauh a, ka dikzia hre tu ngei ngei ten ka duh vang reng a thlengah puh thluin thiam loh min chantir a, min sel bawih bawih reng hlawm mai. 

Ka nun a chep sawtin khawhawi a tawi a, midang hmel hmuh ka ngam ngang lo. Class kal tur a June leh Jessie te chhuak zet tawh chu rawn let lehin eitur an rawn chawi lut a, "Muankiman min tir anih hi. I chhungte i mamawh a ring tlat a, class ban hun nghak se la, ka haw pui ang a ti" June chuan a ti zat zat. Inkhak reng si Muankima nen hian an inkawmngeih zek a, in ngeih lo viau e ti lo chuan puih an ngaihin an inpui awl lo. 

"Group ka en a, ka hre ve chiah. Ih, pawi ka tihpui che sia, vawiin chu ka awmpui ang che" Jessie inthlahrung dêk hian a ti a, "Nia, ang phuau-i nen hian lo awm rawh u" June pawh chuan a ti ve mai. A chhuah leh dawnah "Vawikhatmah min hmusual tawh suh ang che. Min ti mualpho lutuk" tih pahin Jessie lu ah na lo te in a beng a, "Hrang tur a min ngaih tlat chuan ka hran khum tak tak dawn che nia" ti lehin nui tet tet chungin min chhuahsan. 

"Lucky, hnual miah suh aw. Ka tlu ang a, chak zawkin ka tho leh ang an tih ţhin kha. Video chungchang an sawi chu ka hria, mahse ka en lo. Chuti chung chuan ka ring che. Mihring kan nia, chetsual rap rap chang te chu kan nei tur alawm. Vanduaina kan tawh ve loh a, tluang purh a hringnun kan hman bik chuan kan chapo lutuk dawn asin. In Pathian hi ka hre ve hauh lo a, engtia chiah a thiltithei nge anih ka hre lo. Ţawngţai ka thiam ve tirh aţang tawhin Pathian hmaah hian ka la ţawngţai chhin ngai lo. Mahse, Kristian ten in thlamuanpuizia chu ka hria a, i hah lutuk na te chhawk tur che in dil tawp rawh" a ti malh malh. Ka thil eina bulah ţhuin min eipui leh zeuh ţhin a, insiam diam tawh mah se a la inthlak leh lo. 

"Kristian nih ve i duh lo mi?" ka tih chuan a dar ti kum deuhin a khabe kual nen a ti si a, a nui sen sen. A duh lo tihna a ni mai. Jessie te chi chakma an nia, anu hi Kristian niin a pa pawn a nu sakhua a zawm ve. Vanduaithlak deuhin Jessie nausen a nih laiin a nu leh pa te chu an boral hlauh a, a nu chhungte an belh tlak si lo, a pa nu leh paten Jessie hi la in tun thlengin a pi leh pu te bulah a la awm. Kristian annih miau loh avangin Jessie pawn api leh pute sakhua chu a pawm ve hmiah. Hlauh a neih ţum a ţawngţai tur a ka tih te kha ngaihtuah let hian a nuihzatthlak, kan Pathian sawi a inang dawn lo lutuk hian ka hre leh hnuhnawh a, ka ngaihtuahna hria ni awm takin Jessie chuan "Kan sakhua ah hian ka ruh lem lo. Sakhua zawng zawng ka zah vek a, rin fal bik ka nei lo" a rawn ti a, ka nauin min rawn video call deuh thut a, chu chuan kan ti ti a pawtchat chiang hle. 

"School i kal ta nge?" a hmel ka hmuh rualin ka ti nghal thawr a, Jessie in nui chungin a rawn en ve vat. 

"Kal lo mai. Rawn haw i tum em?" Boomer chuan a rawn ti ve nghut a, a ţawng hi a nem lo ve hrim hrim. 

"Aw...ka rawn haw ang. Ka pa kha eng emaw zawh ka duh hrim hrim a" ka tih chuan a hriat ve chak hmel hle. 

"Engvakmah a ni lo...kan chhungkaw awmzel dan tur sawi pui ka duh" ka ti daih a, a awih khawp mai. 

"Tu nge i bul a mi kha?" ka nauin a rawn tih takah chuan "Hi Boomer" tiin Jessie chuan a kut a lek chhuak a, a kutţang a chet zak zak. 

"Jessie anih hi" ka ti leh hnuhnawh a, Boomer-a lai hmel ka hmuh chuan ka lo zak. Ve lutuk hian a. 

"Jessie, ka u kha lo duat rawh aw. Chuan football i ngaina em?" lai zet hian a rawn ti a, "Tehreng mai, a hmuhnawm ka ti" Jessie chuan ti letin a nui pah hak hak. 

"Umm..nia a hmuhnawm reuh, a cute a" Boomer-an a tih chuan "Football a cute maw?" ti hluaiin Jessie a nui kar kar mai. 

"Aw..an cute aniang, inkhel ţhin ho hi an hrawl dan hi a cute" Boomer chuan a ti nawi niaih. A va han lai chhe em em..eng chu hria ni maw?

"Tlaiah ka rawn chhuak ang, min lo beisei dawn nia" ka tih hnuah ka hmet tawp a, phone ka dah chiah chu Jessie a nui nasa zual sauh. 

"I nau ang kha nau nei ve ila chu ka kalna apiangah ka hruai ve ang" ti a a fak laiin "Hmelţha a ti che nih kha" ka lo ti hmak. Rilru la peng thei thil a awm hlauh chu ka lawm kher mai. Ka chung a thil rapthlak lutuk thleng kha an hre lo der hmiah bawk. 

"Naupang hian min ngaina thei lutuk" a beng a sam seh pah hian a ti a, henu hi a lai nia!

"Bialpa i nei tawh ngai em?" ka tih chuan lu a thing. 

"Duh deuh ka nei a, min duh let ve thei si lovin min hmang ţangkai reng a, ka kalsan thei hram. Champhai khua a nia, kan khuaah a nutei te hnenah a rawn awm ţhin a, a thlalak ka neih veleh ka rawn thawn ang che. Dil tur ka lo zawng ang" a ti zung zung. 

"Hetah awm lo mah ila min rawn thawn tho ang che. I hmelţhat nen, hmang ţangkai mai mai duhtu che chu ka hmu chak" ka tih chuan "Ok..ka ţhiannu ka lo dil dawn nia, hman a kan thlalak dahţhat te a lo la nei maithei asin. Thil hlui a lawm a, a hlui apiang a roh a, a nei turah ngai ang" a ti zat zat a, a inthlak chhungin eitur awmna bawm ruak ho ka lo khawm. 

"Lucky"

"Umm" ka tih chuan Jessie chuan lehkhabu remţhat malh malh pahin "Kolasib ah chuan mawi lo deuhin i la thang ve lo mi?" a ti a, min en duh miah lo. 

"Hre tawk an awm tho ang. Hetiang video hi chu a darhzau chak tih nangpawn i hre tho ang a, mi nuihzat ber ka ni tih te nen" ka tih chuan a rawn hawi vat.

"Chutiangin ngai suh. I rilru a hrehawm dawn a, i zak bawk ang. Ka hriatthiampui lutuk che. Hmeichhia ka nihna angin i awmdan tur ka hrethiam lehzual. Mahse khatiang rilru kha pu suh. Min nuihzat rei lo ang ti tlat zawk la, i nihna hloh miah lo a, tunah an nuihzat che anih pawn nakin a an hmuhsit zui loh nan che zahawm deuhin awm rawh" a ti dap dap a, harsatna leh mualphona kan tawh hian ţhianţha an lo lang ţhin. Tunah hian ka ţhian emaw ka tih ţhin ten min phatsanin min nuihzat tu zawkah an ţang a, min kawm serh hial tawh ang. Jessie leh June erawh chuan min fuihin ka ban phak maiah an awm reng a, ţhiante hian thla an lo ti muang thei khawp mai. Ţhianţha hlutna ka hriat lehzual phah bawk. 

"Ka hrereng ang mah se keichu ka rawn let tawh rih kher lo ang. Duh leh ka ti ţha leh mai ang a, tun a ka dinhmunah chuan class kal zawm tumna ka nei rih lo" ka tih chuan "Keipawh ka ni ve tho ang. Mi'n min en bik tlat ang a inhriat te a awl a, rilru i pek theih tak tak dawn loh chuan ti ţha leh zawk rawh. Rilru pe deuhin, ţha tawkin i la zo zawk dawn nia, lehkhazir turin tlai tak tak a awm hleinem" min hrethiam takin a ti a. 

Nilengin kan ti ti, awmdan tur vak ka hre lo. Jessie nen kan mu nileng a ni ber. Ka tawn ang tawng ve te hian engtin nge an hmachhawn ţhin ka hre lo. Inkhung mawl tawp a, zah tlawk tlawk bak tih theih a vang khawp mai. Ka kawchhung a ritin a pik mup a, awmdan tur hriat a har. 

Muankiman min rawn biak hnuah Jessie nen parking lamah kan inzui thla a, min hmu apiangin vawikhat min hmuhna ni awm takin min en hlawm. A ţhenin min melh hrek hrek a, tuman min biak lumlam an tum lo. 

"A pawi chai lo...engahmah ngai duh suh. Chawlh anih veleh kan khua a haw lo in ka rawn zin daih ang" Jessie chuan a ti hlak hlak a, ka dar a min kuah chuan kan insanhleih zia a hriat. Ft 5'8 lai a sang a nia, ti hian June a thinrim kha chuan inphen nan min hmang. 

"Class ţhulh phah nan a hman kher a ngai em ni? Thiam lo zawkah an ngai vek dawn che asin. Class kal la, zak lo an tih che leh dik naah zah a ngai lo i ti mai dawn lawm. Muankima i ti buai tel kher zel lehnghal" Vulmawiin a lo ti hmawk hmawk. A summer jacket hak ipte a zen lutin min melh ram ram a, henu hian min ngaina hlawl lo. 

"A thu thu, i lo buai ve chiam a ngai lo. Muankima hi haw puiah a sawm miah hleinem. Muankima tello a awm i hreh viau leh zui ve la ti nia" June chuan ngaihnep hmel fe hian a lo ti ve a, Jessie a inrawlh ve lo. 

"A ho em alawm. Misual vang a mahni hma hun tih chhiat vek kher a ngai hleinem" Vulmawii chuan a la ti hram. 

"Lucky, case file i tum lo mi?" Gabriel-an a rawn ti ve khauh. 

"Aih..awmzia a awm chuang lo ang. Mahni a chinfel dan a awm mai ang. Min pui tur in awm bawk a" ka tih chuan "Awm e le" ti zangkhai vahin a kiai suk a, thla an ti muang takzet a ni. 

"Kan in hnuai pakhat a ruak a, tah chuan awm mai la. Kolasib ti reng mai, a lum lum nen. Boruak a phui vek, i thi mai ang" Mateo chuan a ti hluk hluk. A tum bur a, haw ka tum chuan heti ziah hi. 

"In ninawm bei bui. Kal ang Lucky" Muankima dawhtheih chin a tawp ni ngei tur a ni a rawn inrawlh ve tlat. Kolasib a an rawnkal ngei tur thu sawiin min thlah hlawm a, resort a kal ve ho an chin ran tur thu an sawi tel. 

Kan khaw lam ka pan leh ta poh chu a nia, pangai deuh a class kal a, theihtawp a lehkhazir ve ka tum laiin buaina in min nang ching leh ta si. Mihring hian kan hma hun kan va hre lo em. Ka naute min lo dawn sawn dan tur ka ngaihtuah a, a bikin Boomer, hman a ka chung a thil thleng kha ka hrilh vek tawh mai dawn em mawni ka ti rum rum. A unaunu ngei it a pawngsualtu Duhsanga chanchin kha ka pa zawh chhuah ngei ka tum ruh hle bawk. 

"Hahdam rawh" Muankima chuan a kawng a ka kut suih beh chu a rawn hum a, "I ţang ţung a, ka pua che a ni ringawt" nuihza aw deuh hian a ti leh a, ka thaw hak. Kan chhuah hlim aţang khan ka la inthlahdul lo reng reng a ni. 

"Ngati nge mi hian Lucky min tih vek le? Ka vanduai ropui sia, min ko tawh lo se ka duh, ka pu zo lo lutuk" ka tih chuan "Min neih vang aniang" a lo ti a, a nui tih hriat zetin a taksa a che dawt bawk. 

"Lutuk che hian" ti hlakin ka tal laih a, chumi rual chuan ka kut a vawnna thlahin a tlan kawi zawk. Ka hlau lutuk chuan ka kuah nghet zual sauh. Ka khek ţhat nghe nghe. 

"Khai a! I va che nasa zawk zawk ve" a la ti zui!

"Ka chet det vang ringawtin khati khan a kawi vak thei lo. I ti lui anih kha" ka ti ve thung. A nui hawk thawmah chuan ka sawi dik zia a hriat vek. Ka rilru lakpen a tum dan te lah hi min ti hlau zawng hlir. 

"Saw lai ramngaw ah sawn awm ila a nuam phian ang" a ti leh daih. Muangchangin a tlan a, ral lehlam a ramngaw chu ka thlir reng a, ani pawn a melh ve zeuh zeuh. En ringawt pawhin boruak a dam hmel bik ngawih ngawih a, awm thei ngat ila chu hawi ngaihna awm lo lek a boruak ipik ka hmachhawn mek te hi a zia huai maithei. 

"Duhsanga kha Aizawl a a awm i ring em?" ral lehlam thlir reng chung hian ka ti chhuak phawng a, a taksa ţang nghal ţeuhah chuan a hming ringawt pawhin a la nghawng nasat zia a hriat.

"Kha mihring kha hmu ila chu ka that duh hial ang" bul zet a a tih chuan ka ngawi leh ta rih. Ka ti thinrim mai mai dawn a hriain ka sawi zawm duh lo. 

Kalkawngah chawl mang lo mah ila Kolasib kan luh chuan khua a thim tawh. Ka naute ta tur nepnawi ka lei kawi leh a, anmahni ang bawk a naupangchhia Daisy ka hawn kep. 

Muankima te in kawt a Tekeuhi leh Nu Puitei an lo din avang chuan tlan tlang loin a nu leh a nau hma zawnah bike a ti ding a, kan pahnih a min hmuh an inbeisei loh hmel kher mai. Muankiman "Eng nge in tih?" a tih te chuan "Lalmuankim, rawn haw thlazen suh ka ti a ni lawm ni ngati nge i rawn haw leh tak? Class kal ţha turin kan chah mawlh mawlh che kha" Nu Puitein a lo ti vin hlak hlak a, a nuam lo angreng. 

"I thinchhe lutuk hi chu i nunna hian a la tlin lo ang" a ti nek a, kan in lam panin a tlan nghal daih. 

Kawng a thui tawh loh avangin kan thleng thuai a, bike ri hria a ka naute an lo tlanchhuah lai chuan "Tikhan ti kher mah ta che. I thinrim khum chuan ka tan a nuam miah lo" ka ti ve ngial. 

"Angry bird lianpui anih kha, pawngvini" a ti hluk a, bike aţanga ka chhuk hnuah ani pawh a chhuk ve. Adika leh Puipuii ten ka kut pahnih an chelh leh ran tawh a, beisei nei deuh a Muankima an melh te chuan ka lo zak. 

"Naktukah ka lei ang che u" Muankima chuan a ti ve mai a, thutiam a nei chiang mai. 

"Awiii...i lo haw law? Nizan chu Boom boom-a zawhte naute ka buaipui tlaivar a, mut ka lo tum tawh sin" Daisy-in a rawn ti lawng lawng a, kawngka biang a uaiin a ţhen sang. 

"Kungawrhi sual a chhuak, a fate hnute a pe duh lo a" tiin Boomer pawn a zawhte chanchin min lo hrilh thuai. 

Muankima chu chaw eiah kan sawm na a inchhung pawh rawn lut loin min haw san a, Nu Puitein a lo ankhum leh nasa ang chu. 

"Khaw nge ka pa te?" ka tih chuan "An rui leh tawh ngawt ang. Ka nu nen zantin zu an in alawm. Zu an hleuh bawrh bawrh reng mai" Daisy-in a ti hlak hlak. Ka naute chuan ngaiah an nei tawh aniang ngaimawh hmel an pu lo. Chu chu thil pawi tak a ni. 

Ka thil hawn ka phawrh chuan rin ang ngeiin Daisy chu a chuh chak chakah a ţang a, Boomer nen an inmelh rum dun nasa ngang mai. 

"Nizan chu Boomer hi a thaw a hah deuh a, hah deuhin ah...ha ah...ha a tia" tiin Daisy chu thaw hah angin a thaw hlawp hlawp a, min hrilh chipchiar khawp mai.

"I tlin bak chu inkhel suh ka tih che kha" ram hmak a ka tih chuan "Ţawngthei nu, i dang tal awk se ţha tur" ner nawng a tih pahin a mitmeng thip zet chuan Daisy a melh nghek a, "Min hrilh hian a ţha zawk. Khaw lum lai pawn indim tho a ngai asin" tiin ka lo inrawlh leh thuai. Boomer hi lung na nei a nia, naupanlai aţanga hrisello, hospital a luh reng ngai a ni. A upat deuh hnu hian a zia viau a, ka nu kha chu a fimkhurin a control nasa a, thawhah vang a buai miah loh chang a ngah. Inkhelh lah hi a tui phian a, a natna avang hian midang angin a ti nasa ve thei lo thung. 

"In ho..lokal teh, Kungawrhi fate ka entir ang che" tih leh ka banrek a hmer a rual a, a din hnuah min pawt tho ve nghal zat. 

Kan zawhte chuan no pathum lai a lo nei a, an mawi reuh em em lehnghal.

"A nu nge a pa an nih?" ka tih chuan "Ka hre lo...an hmm..hmm a la hmuh tham loh a, ka la hrilh thei lo che" tiin Boomer chuan nui ruh ruh chungin min melh a, an te si, hnute an zawng ve te chu an hmuhnawm. 

"An mutna kha ka mawnglem anih kha" Daisy in a rawn ti ve sek bawk. 

Chaw eikhamah ka pa biak tumin an pindanah ka lut a, zu rim nam huam chuan pum a ti let but thei. Nu Hriatpuii chu thatchhe zetin sofa ah a lo mu duai a, min hmuh veleh peih lo tawkin a tho. Kan thawm an hre awm reng sia, min ngaihven turin ka pa hi a rawn chhuak miah lo. 

"Ka pa, thil ka zawt duh che a" ka tih chuan "Sawi rawh" a ti hmuk. Khumah a ţhu tum bur a, a mitmengah chuan a ruih zia a lang vek. 

"Nu Hriatpui ka pa ka be lawk duh a" fiah zet a ka tih leh chuan "Ngaithla mah ila khawiahmah ka sawi dawn tawp si lo. Inbe ru..in pahnih khan phun sur sur rawh u" ti a phun chungin a chhuak. A thinrim ngam te chu zak lo hi ka'n ti khawp a.

"I awmdan hi a dik lo. Nu Hriatpuii hi i nupui a ni lova, i pindan a lut chhuak reng ngamin siam mah ta che. Zu in indun ziah lehnghal" ka ti nghal tawng. 

Muangchang a rawn hawiin min melh khui a, mualphona nei lo ila chu ka hau hrep ang. Mahse, ka chung a thil thleng mek hian min ti tim tlat. 

"Kutthlak lo tur che a ka insum nasat zia hre rawh. Aizawlah ţha te tein lehkha i zir emaw tih laiin video bawlhhlawh i siam a" a tih chuan ka ding khawng awt. Hre ve miah lo turah ka ngai asin. 

"Kha thil kha ka duh vang a thleng a ni miah lo. Ka duh vang a ti phei chu ni ila thinrim lo a inthiam lo zawk tur i ni. Nangmah leh i fapa vang vek anih hi. I fapa chuam, keini aia i hmangaih bik khan min pawngsual lo se chu hmeichhe pangai angin mahni inchhuang deuhin ka nung ve thei ang" vin zet a ka tih chuan a ding uaih. 

"Ngawi hmak rawh mihurnu" a ti chang fak a, ka nuichhuak hak. 

"Duhsanga kha khaw nge a awm? Khawiah nge i thuhruk? Mi pangai lo a min siam tu kha nuamsa deuhin i la siam reng em?" ka ti fak fak a, a mitah tak ka en kal bawk. 

"Chhuak rawh ka hmu peih lo che" a ti leh hmuk a, ka chanchin ţha lo in a den ve tawh vang anih dawn hi min lawm tur a a rawn chhuah duh miah loh. Duhsanga ker kawr kha hum tlat lo se chu ka pa hi ka khawngaih ang a, ka inthiam lo viau ang. 

"Khaw nge a awm ka tih chu?" ka ti leh vak. Ka au ri chu ka nauten hre mah se pawi ka ti lo. Duhsanga hian inrawlhna a nei dawn chiang lutuk. Kha mihring itsikna a khat khan kan nufa hlim lai a hmu thei ngai hleinem. 

"A thi tawh..ka thinrimna i cho chhuah hma hian chhuak vat rawh" a ti a, a awki a san ve ta deuh. 

"A thi tawh maw?" ka ti sep. Chu thu chuan min ţhawng takzet. Ka pa hi rinna tlem te tal la nei ila chu min ţhawng lehzual ang.

"Dawt i sawi, hmuh ka tum ţalh loh nan thi angin i sawi. Ka mualpho ta sa sa pawisak ka nei tawh miah hleinem. Hmeichhe kehchhe laklawh hian hlauh an nei ngai lo. A awmna min hrilh loh chuan mipui hriatah ka puangchhuak ang. Min kawm duh apiang ka inkawm tir ang a, zawhna ka dawn apiang zep ţhen awm lovin ka chhang ang. Tun a i nundan thleng hian ka sawi vek ang" ka tih bawrh bawrh lai chuan "Mi tih hmingchhiat bak thiam nei lo. I duh chuan puang vek rawh. I ţhianpa ngei ngei i mutpui ţhin dan zawng zawng nen sawi la, kan chhungkaw nep zia puang dum dum rawh" ngeiawm zet hian a ti a, a pawi a ni. Nun fimkhur loh chuan keini aia sual ni a kan hriat te kan hau thei bik tlat lo. Hlauh turin ka awm ngai bik lo a ni. 

"Ka bialpa a ni tawh" ti salhin ka dak deuh a, ka inti paukhauh lui nasa. Min enchiang se chu nghet zet a kut ka hum chu a khur der der tih a hmu ang. 

"Tun a i awm duh dan aţang hian ka nu damlai pawh khan i uire fo tih a hriat. Duhsanga chu ka zawng chhuak tho tho ang, ka hmuh rual rualin police ka man tir bawk ang. A thi anih leh a thlan a chil chhak tur talin an phumna hmun ka pan vang vang ang" ka biang a thip zawk. 

"Chaltlai lutuk" ti hluk riin a zui a, ka pa min benna lai dawm a nui lui chungin ka hawi chhuak leh ngat. 

"A thlavang i la hauh na hle mai. Duhsanga bak fa dang nei miah lo angin lawm i awm. Min rawn pawngsual nawn leh mah se i hum leh tho ang. Ka nu pawh kha Duhsanga hian a rawn that a ni hial lo maw?" elsen zet a ka tih chuan ka sam a ţhamin chhuatah min paih lawp a, center table kil zum lai ka chalin a tauh fuh chuan ka ţe ţhat. A na lutuk ringawt. 

Ka thinrim lutuk chu ka taksa a khur hlak hlak a, "Zu kha in ţeuh ţeuh la thi vat rawh" tiin a auin ka au. Na zet a ka awm a rawn tlawh chuan ka thaw thei lo mai dawnin ka hria. 

"Mi zawng zawng hmuh tur a saruak ngal ngat a inpholang ngam hian ka ngaithei lo e te min tia, i zak miah nange? I pa ka nih hi i hria em? I mualpho rual a ka rawn sawisa nghal lo che kha lawm hle rawh" a ti khur khur a, ka awm dawmin ka melh chho hrak a, ka ţawng thei tawh lo. Ka sawi duh ang ka sawichhuah leh chuan kut min thlak na lehzual ang. 

"Chhuak vang vang rawh..ka hmuhah inlan tawh suh" mar pat a tih pahin ka samah a rawn ţham leh a, min pawh thawh a tum laiin kawngkhar a rawn intheh hawng rawp. 

"Thlah nghal rawh" ti vin tuarin Boomer a rawn tlan lut a, rang lutukin ka pa kut a phih thla zui zat bawk. 

"Kut i thlak leh chuan hre rawh, ka pa pawh ni la ka khawih hreh tawh miah lo ang che. Pathian pawn min hrethiam em em ang" a ti fak fak a, ka pa chu dinchilh runin hnai zetah a melh a, a fapa Duhsanga thil tih kha a lanchhuah ve dawn miau vangin Boomer hriat laiin engmah a sawi ngam lo. Ţawngthei lo ang hmak a ni. 

"I duh zat i in tawh chuan mu rawh. Hriatpuii saw ko lut tawh hlek suh ang che" thupe aw zet a a tih leh hnuah ka lam hawiin a rawn ţhu hniam a, a mit a min lainatna langchhuak chu thlamuanpui tham a ni. 

"I tho thei angem?" a ti dam thlup a, dimtein ka darah a rawn dawm. 

"Muangchangin min kaitho rawh" ka ti a, ka ţawng zawng te chuan ka awm a na ut ut. Min tihnat belh hlau takin min thawh pui a, ka pa te pindan kan chhuahsan rual a Muankima ka hmuh chuan hrehawm ka ti lehzual. Buaina ka tawh lai berkherin a rawn lang ve ziah. 

Ani pawh min hmuh rual chuan a mitmeng danglam nghalin a hmelah a thinrimzia a lang a, midangin an hriat ve loh nan lu ka thing mawl tawp. Min rawn pan thuaiin ka taksa chu a awm si chetin a kuah bet a, midang awm ve te mitmei a veng lo. Rawn kun hniamin "A na em? I chal hi a thi siar siar a" tiin zawi tein a rawn phun sup a, lu thing mawl leh tawp mah ila a na dawn tih a hre ve tho ang. 

"I pa ni lo se chu ka hnek hrep ang" chang zet a a tih chuan ka nui lui.

"Naupangchhia lutuk" ka tih sep lai chuan sofa ah min ţhuttir a, ka bul a a rawn ţhut ve rualin a lamah min kuai her. 

"Kha U Muankim hetah hian pem a hnawih chi a awm em? Lapua pawh a awm ka ring" tiin Boomer chuan first aid box a rawn pe a, Muankima chuan a hai ve rak rak. 

Lapua a phawrh rualin Daisy in "Khawi ka va ti hnawng ang. Zu bual at pahnih vang hian kan buai reng mai. An pahnih chiahin awm se, hmai ţawk hlur khawpin zu in se an inhmeh tawk chiah" a ti hlak hlak a, lapua chu lain choka ah a luhpui a, "A thi vak lo a i vannei. Thisen tlem hi kan hrufai ang a damdawi kan hnawih dawn nia" Muankima chuan a ti dam thlup. A hmel landan pawh a dam ve ta deuh. 

"Kut an thlak reng ai che chuan thawhchhuah la nei lo mah ila retheih huamin ka nei ang che" a ti a, a uang emaw ka ti. A thutak run bawk sia, chhan ngaihna pawh ka hre lo. 

Lapuain ka chal min hruk sak a, damdawi a hnawih leh lai te chuan na ka tih hlauin a chhem pah reng. Chutiang a kan inbuaipui lai chuan kawngkhar kik lem lovin Nu Puitei a rawn lut. Kawngkhar lam hawi a ţhu ka nih miau avangin a lungawi chiah lo hmel chu ka hmu thiam.

"Nu Puite lo leng rawh" ti a ka nauin a lo sawm laiin "Muankim rawn haw rawh" a ti hmak. Mihring hi kan inthlak danglam chak takzet a ni. 

"Min rawn hmuh ang hian ka la haw hman lo" ngaihsam fe a Muankiman a lo chhan chuan a thinrim zual sauh niin a lang. 

"Inah i awm khat a, i rawn haw ve chhunah chuan leng chhuak suh" a ti leh a, Muankiman a la hnial zel. An nufa inhnial lai chuan zahzelah phone ka bih a, Jessie message a lo awm nual. 

[Hei hi ania ka bialpa hlui chu] chu thil ka hmu chiah chu a thlalak rawn thawn ka download rang lutuk. 

Karei! Muankima te nufa hrechang lo lekin thlalak chu ka melh ngawt ngawt. Mak ka ti lutuk chuan ka hmui ka hup a, min thawn sual emaw tih mai a awl rum rum. Khawvel hi a lo zim takzet anih dawn hi.

CONT (Dar 12 hma a dah hram ka duh sia ka edit hman lo. Mistake a awm nual maithei)