THE GOOD THE BAD AND THE OTHERS-2

(Pic min pe tu Hriatvulchuki chungah ka lawm e...video mawi deuh pawh a siam kha aw🥰)

THE GOOD, THE BAD AND THE OTHERS-2

Lucky,

Ka bialpa hian min ngaihsak lo riau a, min pumpelh dan phet a zawng ti mai teh ang. Kei lahin ka duh ve ropui sia, min ngaihsak deuh theih nan eng nge ka tih ang?

Koko

A rawn biak loh che chuan a be peih lo che tihna. Biak kan chak zek zek te chu buai chung chung pawn biak dan kan zawng mai. Inhmuh pui a a sawm lo che anih chuan a hmu peih lo che tihna a ni mai. Chi thumin a ţhen theih ang. Pakhatna ka sawi zo tawh a, pahnihna chu i bialpa khan buaina eng emaw a lo nei ru reng thei. Chhungkua emaw thil dangah, i hriat ve rem si lo, amah a tawrh tlawk tlawk a nei thei. Inhawng deuhin sawipui tum rawh. A sawi duh ngang loh a, a ngaihsak loh zui zel che chuan tih tur i hriat kha. Pathumna chu, i nat hlauin a ţhen lo mai mai che a ni thei. A tui tawh hlawl lo ang a, a rilru i luah zo tawh lo ang a, chutih rualin a pawi i sawi miau loh vangin khawngaihna chin che a nei dawn. I nat vang a inthiam lohna a nei reng tur kha a zuam rih lo a ni thei. Chuvang chauh a i bialpa hming pu chu a ni maithei bawk. A ţha lo lehzual. Buaina hranpa nei lem a ngaihsak ţha duh lo tawp che anih chuan in inlaichinna kha a tawp tawhah ngai la, huaisen takin ţhen la, hmalam pan rawh. Ni e, a na dawn. A na dawn nasa a nia, engmahin, tumahin an hnem zo lo vang che. Mahse, ngaihsak miah lo tu che lak a beisei neih a, beisei ang hmuh theih chuan loh ai chuan a na nep zawk ang. Kumkhua a kan dawn loh tur beisei ai chuan reilote nat a thlanawm zawk. Nangmah hnem tu tur an rawn inlar thuai ang a, khuareiin a hnem bawk ang che. Duhsakna ka hlan che. 

"Eng nge maw phone i khawih reng le?" Muankima ţhianpa ve ber Mama'n a lo ti a, ka hmai zawn a phone keng ka ni bawk a ka hmel en tumin min rawn thlek.

"Hmangaihna la na ho hnem tu khawl a nia" Muankiman min lo fiam ve ngei. James nono a thinlung kick vang khan a thinrim lo hlauh.

"Nangni pahnih hi ţhian in inti tak na a ka awih hauh lo. Eng emaw a awm ang" Mama chuan a rawn ti hluk. Ka va melh a, a mitmeng fim kak chuan chik deuhin min lo melh ve ran. 

"A teuh lo emai aw. Ţhian nihna bak kan inkarah engmah a awm lo. Ţhian te lo ngaihzawn ka duh bau lo" ka ti tan tan. Muankima mitmei ka ven vang a sawi ka ni. Engahmah min ngaih loh hlauin ka phi chung reng a, ka mutpui fo phah. Chuti chung chuan ka rilru put hmang diktak a hriat hlauin ka inthup nasa. Ka danglam nasa ta lutuk hi ka duh lo. Ka zak tlat. 

"I ţan nasat danah eng emaw a awm ang" Mama chuan a ti ţalh. Chhan beiseiin Muankima ka melh a, kan thusawi hre lo ang hmakin a awm. Puih ka ngaih tehreng nen ani chu a ţhu ngawi ngul reng. 

"Dawtin min puh miau a, ka ţan nasat ve bawk lohin. Ninawm..ka kal daih dawn" tih leh thawh ka rual. Eitur kan la chah lo bawk a, Muankima ka melh zawk hnuah rilţam ru deuh chungin ka kal nal nal. 

Khum a bawk ar ar chungin June nen kan ti ti melh melh a, kan roommate Jessie in lehkhabu a bih thung. Zan a ni tawh a, Muankima hmu turin zantin ka chhuak ru ngai bik lo. 

"Ih maw..Lucky, keimah ang hi chu kan society hian engtikahmah a pawm thei ngai dawn lo va, a ruk te a ka duhzawng ngaihzawn hi ka tih theih awm chhun a ni mai" a ti chuai raih. A nihna kan sawi chhuah chang hian hnem ngaihna a awm lo ţhin. 

"I duhzawng i thlak thei mai lo mi?" amah thlek deuh ha chung a ka tih chuan lu a thing. Ni e, June hi mahni anpui kawp chi a ni. 

A landanah hmeichhe dang aia a danglam bikna hmuh tur a awm lo. A sam a sei hnalh a, a mitmeng mawi tak hian a chawi em a, a hmelţhatna a ti belhchhah. Pian a thiamin mizo hmeichhia ah chuan a sang pawl tak a ni ngei ang. Mipa ang maia incheiin a kal pa theng theng lo a, nu deuhin a inchei chuang lo na a a landan hrim hrimah chuan mipa an a tum hran lo. A inthup ve dan ber anih ka ring. Mahse a rilru a piangsual kan ti dawn nge a vanduai kan ti dawn hmeichhia a duh tlat a, midang hmuhah chuan pangai tak ang a awm siin a rukin hmeichhia a ngaizawng ţhin. Tu tan pawh pawm a harsa dawn, chu chu chiang takin a hria. A pawi emai June...a pawi takzet. 

"Mipa hi kawp luih ka tum nasa ţhin mah se ka ten thut zel. Ţhian ang chuan ka kawm thei vek, min ngaihzawn chiah hian engkim a danglam ţhin. Hmeichhia in ngaizawng che se la i ten ngawt ang. Chutiang vel chu ka ni" a ti leh mauh mai. 

Sakhaw mi lutuk ka nih loh vangin Pathian thu hmang a sawipui vak dan ka hre lo va, ngawi hmasa zawkah ka ţang leh nge nge ţhin. 

[Muankima hi lo hnaih tawh suh. A ţhiannu mah ni la ka ring hlawl lo che] ti a ka message dawn teh tlawng chu chhiarin kan nui dun hak hak. Zodini hnen aţanga ka dawn a nia, tunah tak chuan kan khuaah a awm daih ang. Muankima hi a inti ta tu viau, a awm lo hran lo. An inkawp nasa ve em a ni. 

"Khawmaw i phone kha?" tih pahin June chuan phone min chhuh sak a, [Duh lo ta ila?] tiin a chhang let. Kan thusawi mek thlak thleng tur a message nuihzatthlak zet mai ka dawng chu ka lawm ru viau. 

[I hmeichhiatpui ka nih angin i rilru put hmang ka hai lo. I melh ţhin danah hian ka hrethiam vek. I zui luih zel chuan i nu ka hrilh ngei ngei ang] Zodini chuan a la rawn ti. A thinrim hmel viau na a kan ţhian dun nuih a ti za telh telh. 

[Insum rawh Bawihte..thinrim lutuk vang a lungphu chawl a thih i hlau lo mi? Muankima hi ball ang ah ngai la, i lam a a goal hma chu kan lo pet kual ve rih ang] ti a June-in a reply leh chuan nui chungin a ban bulah ka lo beng. 

"A la na dawn a nia aw..a nasa tehmai nia" ka tih chuan "Mi nasa deuh hian anmahni aia nasa chu an hlau ve tho alawm. A nasat leh kan nasa ve mai aniang chu. Hetiang zawng a invau hi ka ngei tlat...a ţhing" a lo ti hlak. 

Zing ka thawh veleh inti faiin thil ei turin ka kal a, building bul lawkah hian cafe lian vak lo a awm. Zing kar rilţam ka neih ţhin vangin zing tin ka kal ziah. 

"Nu Hlim...sandwich leh coffee ka duh a nia" tlangnel tawkin ka au lut lang lang. Ti hian chaw ah ka ring leh mai dawn ni. Hostel ka luh chuan thil ka ei mumal lo ziah. Sawi tawh ang khan cafe hi a lian lo va, hostel campus a cafe awmchhun anih vangin kan kal ngun a, a neitu te nen pawh kan in nel tawh hle. 

"Aw le" sin ratin a rawn ti a, Nu Hlimi aw ni lo deuh a ka hriat vangin aw ka hriat rual chuan ka hawi let dawrh. Mateo Penglenglenga a lo nui huih a, luh tirh khan ka hmu miah lo. 

"Eng nge i tih?" ka ti deuh hluai. A tho hma vak ngai si lo. Tun ang hun a hmuh ka inbeisei lo hrim hrim. 

"Ka lo nghak che" counter a dawhkan ang deuh an dah nam chung hian a lo ti a, a zah ve hmel. 

"I zak lo nih chu" ti hlakin chair ka pawt tawlh a, pawn lam hawiin ka ţhu nghal daih. 

"Hey..Vanneihmawi" tiin ka hming pum ngatin min rawn ko. 

"Nang aiin ka upa zawk...khatin mi ko lawl lawl suh" ka tih chuan a hmui a liak zeuh a, a nuih a zat hmel viau. PUC ah Bcom a zir mek a, Aizawl mi kan hostel a awm ve tlem te zing a mi a ni. Nuam a ti rapthlak lehnghal. 

"James Nono-a interview tur ang mai ka ni" nui ruh ruh chung a a tih chuan "Engvangin?" ka lo ti vat. 

"Ka hmuh che chuan engamah hmain ka phur pherh erh zel" a rawn ti. A hmui hnuai seh zeuhin a nui suk a, hnuai lam a bih nghal daih. 

"I lerh ve sia aw..college ah hian hmeichhe ngaihzawn dan hlir i zir bik emaw tih mai tur a ni" ti bawrh bawrhin Nu Hlimin counter ah ka eitur chah a dah a, Mateo chu nghawk zeuhin "Va pe rawh...Lucky rawnkal hunah keiman ka pe dawn nia i tih lung lung reng kha" a tih zawm zat. 

"Sawi kher lo la..i ţawngthei reuh emai aw. Zei deuhin min pek tir ta che" thum dut dut a a tih chuan Mateo chu enin ka nui tawp. A lungawi lo hmel nur nang te chu ka hmuh hmaih lo a, min ngaizawng ang mai a min fiam reng mai te hi a ngaihna ka hre lo viau ţhin. A kum a ţhansan ka ti dawn nge a taksa lian ţha zet mai leh a mize naupangchhia lutuk te chu a inhmeh hlawl lo. 

Ka thil chah chu rawn chawi pheiin min melh leh zawk ţhin a, ka nui duh lo lui. Dawhkan a kiu pahnih nghat meuhin ka khabe ka dawm a, hriam hrakin ka lo melh. 

"Kha le..Miss tereuhte" a rawn ti deuh kher a, "Ka lawm e" aw dam deuh a ka lo tih chuan a phawk a chhuak ni tur a ni a awm dawmin silai a na tak a kah ni awm takin hnung lamah a eu dawrh. 

"I â mi?" ka ti vak a, a awmdan teh thut vang chuan ka ding hluai nghe nghe.

"Lucky" ti hulhin min rawn hnaih a, zawi lutuk a "Ka thinlung i kick" a rawn tih leh chuan rang tawkin ka nam sawn. 

"Mi rilţam lai laiin lo uang sek lo teh. Rilţam i ti reh vek" vin zet a ka tih chuan "Nih chuan min nei la" a la ti. 

"Ka nei nguar ang che" ka ti leh vak a, "Aww...pawisa a hek lo deuh ang chu. I rilţam apiangin ka uang ang a, eitur lei a ngai lo a ni mai a" a tih laiin midang an rawn lut a, zawng squad vek an ni. 

"Ehe...Penglenglenga chu i hna i thlak a ni maw? Kan duhzawng min rawn pe ve vat vat teh. Kan la sawi lo na a" ti a an rawn fiam chuan "La ve mai rawh u" a ti hmuk a, keimah bawk chu min en lehin "Kha" tih leh a ruk a lehkha them min pek a rual. 

Pencil in love a ziak a, a vai a rawng sen a chei lovin a kil ve ve a ti sen leh ang lawi a. A sir ve ve chhe te rawng senin a chei tihna a nih chu. A dang a chei tel lo hrim hrim. A ziak lian ropui bawk. A milem ziah chu hrethiam lo lutukin Mateo chu ka melh chho ha. 

"I chei zo hman na nge? Ngati nge i tih sen vek loh?" ka tih chuan "A biang a tai anih kha" a lo ti. 

"Love biang tai maw?" ka tih chuan lu min buk khum nghutin "A zak a" a la ti zui. Mihringin love an ziah chawp ţhin biang tai bawk si ka vawikhat hriatna. 

"Min hmuh hian i zak ţhin tihna maw?" tiin keimahah ka kai lut ta vel mai mai. 

"Ka biang a tai lo...ka thinlung thau lai a tai" a ti fiamthu a, zawhna zawh leh tum a ka an zuau lai chuan a ţhianten an rawn ko a, a kal daih. 

Class kal tur a ka insiam lai mekin pawn lam an thawm hak a, June nen kan tlanchhuak ve. Hostel naupang hawk dak lo an awm lo. Engpawh thleng se a hmuhnawm em em vek. 

"Hostel nuam a ti lutuk haw nachang a hre lo a, a chhungte ngaihţha lo in an rawn ngaihven tawp" an lo ti a, tual zawl a Mateo leh a nu ni awm tak lo in um mek chu nui ţha chungin an thlir ţhap. Mateo chu tlan hmasa zawkah ţangin a nu in a um det det a, a nu aia a tlanchak zawk zia lantir tum ni awm takin a khawngkhawbai vel. A va han chimawm mai mai tak. A chang leh a ding vang vang a, a nu in a man dawn veleh a tlan leh daih a, ka bul vel a mi te ho chu an nui leh hak hak ţhin. 

Chutia kan thlir reng lai chuan "Lucky i phone" tih pahin Jessie chuan phone min rawn pe a, Zodini a nih ka rin tehreng nen ka nutei zawk a lo ni. 

"Hello" ka ti chiah chu "Rawn haw rang rawh" thlabar zet hian a rawn ti nghal thawr a, chu chuan min ti chiai ti tih nghal der. A aw ringawt pawh khan ngaih a ti ţha lo. 

"Eng nge awmzia? Eng nge thleng a?" ka tih chuan "I nu a tlu sual a, a lu a sawh na viau anih hmel. Hospital ah kan awm. Rawn haw vat vat rawh" a rawn ti leh chul. 

"Engtin nge a awm?" ka ti leh a, ka mangang nghal der. Nu te chanchin a ţha lo zawng a hriat chuan rilru a buai nghal mup zel. 

"Ka la hre lo..insiam la, rawn hmanhmawh rawh" tih leh phone dah a rual a, "Thil thleng a awm a mi?" tiin June chuan min lo zawt vat. Ka nutei thu rawn sawi ka sawi chhawn hnu chuan "Ding mai mai mah ta che...lokal rawh insiam rawh. A na viau anih phei chuan i haw ngei ngei a ngai anih chu" ti nghal zung zungin kan room ah min nawr lut rawk rawk. 

Kan khua a haw tur ka nih vangin thawmhnaw ka hawn lem lo va, ka chiai buai em vangin June zawkin Muankima a bia. 

"A haw pui thei dawn che..ti kha chuan scooty khalh miah suh. Muankima nen haw dun ula, chanchin min rawn hrilh dawn nia" ti dap dap chungin min kai chhuak a, warden hnen a a sawifel leh thlap hnuah parking bulah Muankima kan lo nghak. 

"Tih tur pawimawh deuh ka nei a, ni lo se chu ka rawn zui ve tur che nia. Chanchin min rawn hrilh la, tlai lamah chuan ka lo kal thei maithei" a ti a, ka bu zeuh ringawt. Ka mang vek rualin ka nu ringawt mitthla ah a awm a, kan inbiakna a la rei loh tehreng nen, thil thleng chu a rangin min ţhawng takzet. 

Kan lam pan a Muankima rawn pen pawk pawk chu kan thlir dun reng a, a hmanhmawh hmel khawp mai. Kan bul a rawn thlen rual a "I ţha em?" a tih chuan ka lo bu leh tawp ringawt a, ka awmdan chu ka sawi thiam chiah lo. Ka vai ruai a ni ber. Ka chiai na pawh a la reh fel lo. 

Muankima hnung a ka ţhut kai rualin a kawngah ka kuah a, "Hlauthawng suh..a dam leh mai ang. Chanchin ka lo ngaichang ang" tiin June chuan min thlah. 

Bike a tawlh riai riai takah chuan a hnungzangah ka bei a, ngaihtuahna mak pui pui ka neih chinah phei chuan Muankima ka be lo hrim hrim. Ka ngaihtuahna ka kawm melh melh. Nghet zetin mit ka chhing a, ţawngkai khat ve viau mah ila 'I awm tak tak anih chuan ka nu ti dam rawh' ka ti ve tawp. 

Muankima chuan a kawng a kut ka suih beh tlat chu a rawn hum leh zeuh ţhin a, "A thi lo ang..a dam leh mai ang" a ti ve sup sup. Min hnem nasa viau hlawm mah se ka thaw dep dep reng a, hlauhthawnna ka neih hi ka paih chhuak thei lo. 

Chawl mang lova kan tlan hnuah District hospital kolasib chu kan thleng a, ka ni in min lo hmuak. Muankima pawh nghak lovin ka ban a vuanin min kai dawr dawr a, a hnuhin min hnuk a ni ber. 

Mahse, "I tlai Bawihte...i tlai lutuk..i nu damlai hmel i hmu hman ta lo" ti a ka nutei ţap rawih rawih chu ka hriat chhun a ni. Ka mit sulh a, Muankima rawn thleng ve pawn thil awmzia a hrethiam ve nghal aniang chu min kuah vat. 

Ka hriat leh hmasakber chuan kan inah ka lo awm der tawh. Ka nu ruang bulah ka ţhu a, ka ţap thei der lo lehnghal. Nikhaw hre lovin ka awm miah lo na a hriat mumal ka nei lo thung. 'Nu ka nei ve tawh lo' tih chu a ri nawn tlut tlut a, heti mai a min kalsan hi pawm thiam a har ve thlawt. 

"Ţap bawrh bawrh rawh..ti kha chuan i â  thei mai ang, tumah hmaizah duh suh" kan khua a ka ţhiannu ve ber Pekin a rawn tih te chuan ka nu chiah ka la en. A thih thu ka hriat aţang khan ka â nghal vek a ni ber. 

Zanah June, Mateo leh Gabriel te an rawn lang ve hlawl a, Muankima hnen aţangin kan chanchin an hria anih hmel. Ka ţhiante rawnkal chu ngaihven lovin ka pindanah ka chho a, tuman min zui lo. 

Pindan chhung ka luh chuan khumah ka ţhu nghal hnawk. Kan chhungkaw thlalak ka tar ve reng ţhin ka en rual chuan thunun theih loh khawpin ka biangah mittui a luang ve ta nge nge a, ka nu ruang bul a ţap thei der si lo kha keimah a ka awm hran rualin ka ţap nghal hlawp hlawp. Ka muffler bah lai a hmai khuh a ka ţah lai chuan tu emaw hian min rawn kuah a, chesawn lovin ka ţap hlawp hlawp reng tho. Nu te meuh chan chu a na em a sin. 

"Hahdam rawh" rawn ti supin min kuah tu chuan dimte in ka hnungzang a chul pah a, Muankima a ni. 

"I ţhiante an rawn kal vang vang a, tawm bo daih mah ta che. I chau viau anih leh ţha deuhin hrilh la, an rawn thlen na a rei tawh. An lungawi lo mai dawn a sin" ka pa'n a rawn ti lut ve khur khur bawk. 

"Ka rawn chhuk ang" ka ţah nasat vang a aw la khur der der chung hian ka lo ti a, ka pa nen hian kan inpawh lohna a rei tawh. Engtik aţanga inţan nge ka hre tawh lo zawk. 

"I nu pawh zanin chiah kan hnenah a awm dawn a, chau mahla pindan a mipa nen a awm bo lovin i nu awmpui reng zawk rawh. Mi pawn mak an ti mai ang che" a ti leh kher. Lungawi lo viau mah ila ka nu ruang awm zan a inhnialna chawh chhuah duh lovin ka ngawih san. 

Ka pa chhuah hnuah Muankima thung chuan "I duh chuan chawl rawh..muhil la, ka kaitho leh vat ang che" min ngaihtuah hmel zet hian a ti a, min lainat tih hriat lutuk a min melh na te chuan min ti no zualin ka hria. 

"Ka pa'n a phal lo" ka ti leh ţiau a, lungawi loh hmel zetin a lo rum chhuak hawk thung. 

"Chhuk ang" tih leh thawh ka rual a, a ban ka la vuan chial a, a ni pawn nghet deuhin min vuan ve. 

Khum a ţhu reng chungin min rawn melh chho a, min en chik lehpek khawp mai. 

"I dâng vek" zawi lutuk a a tih chuan tawi te in ka lo nui lui. 

"Ka nu a thi thut a, thi tak tak lo mah ila ka thi dang tal lo kha a mak zawk. Mahse, ka ţha. Ka ţha lutuk" ka ti mawlh mawlh. 

"I ţha lo" ti leh supin min vawnna a thlah a, ka mittui luanna hnu ka biang chu min tuai fai sak ta zawk a. 

Min hnem tum a "I nu angah min ngai tawh mai rawh" a tih chuan ka nui chhuak hak. He pa ţawngkam thiam lo lutuk hi chuan min ti nui leh nge nge ţhin. 

"Muankima angah ka ngai ang che. Nang chu Muankima ni reng zawk la, ka bulah awm char char zawk rawh. Ka nu chuan hostel thleng thlengin min zui ve ngai si lo a" ka tih chuan ka thusawi chu atthlak tih hmel lutuk in a lo nui ve huk huk. A sawi awmzia man reng siin ka man lo der ve tlat. Hmeichhia angin vawikhat tal min en ve se ka tih vang a ni. 

Ka nu an vui zawhah ka ţhian ten min haw san a, kan inchhung chu a ruak huaiin ka hre mai. Ka naute an la naupang a, upa ber lah ka puitling lo ropui si. Ka pa hi officer a ni ve na a nu tello a kan awm zel dan tur chu ka ngaihtuah thui ngam chuang lo. 

Ka nu thih aţanga kar khat lai a liam leh hnu pawhin Muankima nen chuan kan khua Kolasib ah kan la awm a, Aizawl a chhoh kan tum hnai tawh. 

Kan naupangber kum 7 mi lek Ruatdika, Adika kan tih mai ţhin chu ka bulah lo ţhu in "U kal tawh suh...ka ngai dawn che e" a ti reuh a, min ngheng pah bawk. Min ngai lo ber ţhin tu a ni sia, a mak duh viau. 

"Lehkhazir ka ngai sia lawm..ka lo haw reng dawn tho a, min ngai hman miah lo in ka siam ang che" ka tih chuan "Ih maw..Nu Hriatpuii a lo leng ţhin a" a ti chhuak phawng mai. 

"Nu Hriatpuii maw? Ngati nge?" phawk hra hian ka lo ti a, "I ţawngthei emai aw Lalruatdik" Adika u chiah, Vanrempuiin a lo ti hlak. Kum10 a ni ve tawh a, tlemin a zia a dang deuh. 

"Apa nen an inkawm ţhin" Adika chuan a ti leh hram. Nu Hriatpuii hi kan veng a mi tho niin nuthlawi fa pakhat nei tawh a ni. A fanu nen chuan kan inrual vel ang. 

"Apa in anu hah a hlau a, inchhung a tihfel tir ţhin anih kha. An inkawm ngai lo reng reng" Vanrempuii, Puipuii chuan a ti leh zat zat a, Adika thusawi ka ring zawk thung. 

"Rawn inlan tawh lo tur a ka tih hnuah a rawn la kal lui cheu maw?" ka chhang chiah, koh fiam nan a Boomer kan tih ţhin chuan a rawn ti chang bul. In min tihfel pui a, kan thusawi a hrepha a nih hmel. Amah tak hi chuan a hming lem hi a duh lo viau na a a naupanlai aţanga kan koh dan a nia, vengchhung mi te paw'n Boomer tih vekin an hria. 

Kan unau hi 4 niin hmeichhe pahnih leh mipa pahnih kan ni. Boomer hian St. John's ah pawl12 a zir ve mek a, Puipuii leh Adika te hi St. Maria ah an lut thung. 

"Chu..in lan tawh lo tur a tih ngai khawpin a awm a ni maw?" ka tih hliai chuan Boomer-an dar a kan uk a, a thil hrukna pawnchhia vawm hlawm tawpin insil fai turin a kal zui daih. 

"Kha..Boomer pawn engmah a sawi miah loh kha" Puipuii bawkin a tih leh lai chuan Muankima nau Tekeuhi a rawn lang hlawl. A mangan hmel em em mai lehnghal. 

"Au Vanneih...anu in lokal lawk teh a ti" tih chiah a sawi. A kut a min hui lehin kan in chu a chhuahsan nghal a, pawimawh deuh a awm aniang chu tiin ka zui chhuak ve. Thil thleng tur hre lawk ngat ila chu ka zui lo chiang viau ang. 

Muankima chu a nu leh pa leh Zodini ten an lo din chilh ran a, a hmel thim khup leh a mitmeng rum ul te chuan thil ţha a thlen loh zia min hriattir. Muankima chungchang a buaina an neih apiangin a nu hian min rawn ko ţhin. 

"Vanneih, i ţhianpa hi han hrilh ve teh. A bialnu a rai mek chung pawhin neih tumna a nei miah lo. Mipa sual leh dawihzep ber ang a a awm hi" Muankima nu, Nu Puitei chuan a lo ti nghal hlak hlak. 

"A duh a a rai a ni mai lawm. Ka neih nachhan tur ka hre lo ve" Muankiman a ti ve tlat thung. 

"Zodini hian zak chung chungin a rawn pan che. A mangan zia i hmu thei lo em ni?" Nu Puitei'n a tih pawhin "Ka fa a ni lo ka tih tawh kha. Min nawr lui miah suh" a ti vawt raih tawh. A vin hauh lo na a a thinrimzia kan hai lo tlang khawp mai. 

"Lalmuankim, i bialnu a rai chuan mawhphurhna i la ngei ngei tur a ni" a pa hi a lo ti ram ve hmak. Mahse, a pa thinrim pawh chu pawi sa duh lovin "Bialnu ka nei lo" ti bung nghutin a inher vut a, inchung lamah a chho ta daih. Danin awmzia a nei lo tih kan hre tlang a nia nge, tuman dan buai kan tum lo. 

"A zia lo hle mai Zodin" Nu Puitei chuan a ti zuai raih a, inthlahrung hmel a pu. Zodini kun ngar ngar chu mittui tling pamin a rawn dak chhuak a, "Dawt ka sawi miah lo" ti sepin Nu Puitei chu a kuah ti tih...lem a chang nge a ti tak tak hriat a har khawp mai. 

"Vanneih, i ţhianpa kha a rilru thlak sak tum hram teh. Keini sawi ringawt chu engahmah a ngai lo ang. Kei chu sawi loh, a pa pawh a hlau lo a nia" Nu Puitei beidawn hmel lutuk chu a khawngaihthlak zawk. An pa aiin a thu zawk miau a, an pa hian a hlau. Muankima tan chuan hlauh vak ngaihna a awm lo ve bawk a ni. 

Muankima pindan a ka luh rual chuan khum a a ţhu tum bur chu ka hmu nghal a, aw thian kharh kharh mah ila min rawn en duh miah lo. 

"Naupang ang mai..ţhu tau bur ringawt a" ka tih chuan min rawn melhin za lo deuhin a ţhen suk. 

"Aizawl a rawnkal ngun tih chu ka hria, in inhmu ţhin tih ka hre miah lo. In lo va inhmu ru ngun awm em em ve" ka ti bawrh bawrh a, Zodini ka sawina a ni. Min chhan mai ka rin laiin ani chu a la ţhu ngawi ngul. A bul a ţhu lawk duh lo in a hmazawnah ka ding hmasa te te. 

"Sawn pai nih hi a zahthlak a, an hmangaih deuh ten an nawr tet tet a, mutpui a an sawm tlut tlut chuan hmeichhia chu an nem mai ţhin. An hmangaih te chan an hlau tlat zel. An han rai a, hlauhna nasa lutuk an nei leh a, thil ţullo tak tak ngaihtuah kualin an taksa pawn a chhiat phah hial ţhin. An huaisenna zawng zawng sawm khawmin naute pa ngei chu an han hrilh a, an lo pawm duh loh vang a a nat dan tur zia leh a zahthlak tur zia te i hrethiam kher lo vang" ka ti malh malh. A ngawi ngul a, min en duh tawh lo vin hnuai lam a bih tlat bawk. Zodini naupai thu ka hriat vang leh Muankima a puh tlat vang hian na lo ka ni lo. Nat ngaihna ka hre lo zawk a ni. 

Nu Puitei thusawi ka hriat khan ka nghing dawt a, vuak chawrh ang mai ka ni. Muankima hi ka duh ru takzet a, ka ţhian chauh ni lo vin ka ta ni se ka ti. Ka nu thi thut ang mai khan a lo thleng thut a, min la ţhawng. Ka na tial tial dawn tih erawh chiang takin ka hria. Chuti chung chuan ka ţhianpa hi mipa dawihzep, mawhphurhna pawh la ngam lo ti a miin an hriat ka duh lo. Ka buai nuai nuai rih a ni ber. 

"Min chhang duh mang si lo, ka haw dawn" ka ti ta hmak. Lung biak ang mai, chhanna engmah ka dawng ve lo. 

"Khanu kha ka la thlem chhin ngai lo" ti supin muangchangin a rawn dak chhuak a, ka mitah tak min en run bawk. 

"Han sawi chiang teh" ka ti ţha leh. Insawifiah phawt se, Nu Puitei te biaksak theih dan pawh a awm mahna.

"Vawikhat chiah a bulah ka awm. Zu kan in dun...mahse, ka awmdan kha, zu hnathawh ringawt a ni thei lo" buai nuai hian a ti a, "I nu thih hma lawk kha" ti leh tawpin a nui ro halh. Ka nu thih hma lawk anih chuan a lang chhuak hma ve bawk em anih chu ka ti rilru ve a, ka ngaihtuahna erawh ka sawichhuak duh lo thung. 

"Chu pawh nise ţha deuhin sawi ve mai la, Zodini hian nang leh i chhungte bum a tum a ni thei. A fa paina pa diktak a sawi ngam lo ang a, a hlauthawngin a puh tawp che aniang" ka tih chuan "An awih lo ang. Zodini hi an pathian anih hi" a ti deuh nek. 

"Dawt a a puh tak tak che anih chuan ţha deuhin hrilh rawh. Zodini hi ngaina viau mah se an fapa i nia, an ring zawk hrim hrim ang che" ti a hrilh pahin a bulah ka ţhu thla a, ka kut a lo hum nghal. Chu chuan min ti hrilhhai lek lek. Ka taksa ţang nghal ţeuh chu a hriat hlauin ka insiamţha thuai thuai a, "Thudik chu a la langchhuak em em ang" ka ti leh tawp.

"Pookie, i na em?" a ti sup. Min rawn thlekin ka mitah tak chiang zetin min melh ngur a, a zawhna teh thut vang a ka chiai zia a langchhuak nge min nuih suk lehnghal. 

"Aih...natna chhan tur ka nei mi?" tiin ka lo zawt let ve thung. Ka mitmeng buai nasat tur zia chu inhmu lo mah ila ka hre thei. 

"Nei lo" a ti hmuk na a ka kut a la hmer reng tho. 

Kan boruak ţang ru lutuk vang chuan "Ka haw tawh dawn..ka naute chiah an awm sia, min lo ngai ang" ka ti nawi niai. 

"Hmangaih i nei em?" a ti leh sup. Awm ngaihna ka hre tawh lo a ni ber. A chetdan leh engkim hian min ţhawng lutuk tlat. 

"Nei--nei lo" ka ti bah nawk. Amah chiah ka ngaihtuah ţhin thu te, mipa ang a ka en thu te sawi vek ta ila min hlat daih ka hlau bawk si. Ka dinhmun a laklawh vel vek. 

"Keipawh maw?" a rawn tih leh chuan "Hmangaih e..ţhian kan nia" rang lutukin ka lo ti a, "Ţhian kan nia" ti fan ruihin ka thusawi a lo sawi chhawng ve nghal zat. 

Ka haw dawn pawn Zodini a lo la awm a, min melh no lo kher mai. Tekeuhin chhuat a nawt a, Zodini erawh hahdam deuhin a ţhu thung. Kan khaw mi hausa fanu a nia, a chapo ve ar zel. 

"Ka fanu chhuat nawh fai zia hi aw..pawnfen pawh kan feng ngam dawn hleinem, kan kar lang phek phek ang tih a hlauhawm" Nu Puitei chuan a lo ti hlut a, a phawk a chhuak leh tawh a ni ngei ang. An boruak zangkhai ţan chu ka tan tak pawh a lawmawm viau mai. 

Min hmuh veleh "Khaw nge Lalmuankima kha? Muan luhlul-a, ti tau bur bur zel mai" a ti nghal hlak hlak. 

"Bur bur ti tel kher zel suh a lu a len hmel lutuk" tiin Tekeuhin a u thlavang a lo hauh. 

"Fapa pakhat chiah kan nei a" a tih leh veleh Tekeuhi bawk chuan "Fanu pakhat nen" a lo ti leh zeuh. 

"Hnawh luh leh theih chu nise damchhung a rai puar pawng reng huamin Muankima hi ka hnawh lut leh ngei ngei ang" a ti tan tan. A la thinur ţeuh reng anih hmel. 

"Muankim...bawiha rawn chhuk ve la, i ţhiannu chiah i rawn chhuk thlak tir a" ti a Muankima pa, Pa Duhsaka au ţial ruai chu "Bawiha a ti leh ta duam e..hrilh rawh, kan buaina a fel hma chu Aizawl chhoh ka phal dawn miah lo a nia" tiin Nu Puitei zawkin a lo chhang. 

Awm rengna chi ah ka ngai ta lo va, Muankima berin luhlul chhuahin a chhungte a hmu duh si lo. 

"Nu Puite ka haw phawt mai ang. Zanah ka rawnkal leh zawk dawn nia" tih leh kawngka lam a inher ka rual a, "Aw le..rawn leng leh ngei ngei rawh" tiin ţha deuhin min thlah ve mial. Nu phawk zet mai a nia, a bul a awm a nuam viau. Tun ţum erawh a dan a dang khawp mai. 

Haw pahin Muankima awmdan kha ka ngaihtuah let rauh rauh a, min duh angin a awm ngai miah lo va, ţhian chiah kan nih tur thu a sawi ţhin. In ngaihzawn chuan ţhian nihna a ti chhe thei ah kan ngai ţhin a, tun thleng a ka ngaihdan a la ni. Nichin kha chuan a rilru a buai ve rih a nih ka ring a, amah ka hmangaih ruk zia sawi ngat ila chu min hlat vang vang duh maithei. Ka awmdan hi ka hrethiam lo, a hrehawm zawk. 

Kan inah chuan beisei loh deuhin Nu Hriatpuii a lo awm a, a malchungah Puipuii a lo bawk al al. 

"I lo leng alaw?" ka ti satliah a, choka a ka lut chu Adika leh Boomer ten min zui lut. 

"Saw ti reng saw. Vanrempuii lah hian a bawh huam huam reng a, hmeichhia chu ni lo se ka theh chhuak lawp duh ang" Boomer chuan a ti hluk hluk a, a huat takzet danah hian eng emaw a awm ka ring ta tlat. 

"Ka pa nen an inhnim hnai deuh em ni?" ka ti khawl mai. 

"Ka hre lo" ti hapin Nu Hriatpuii te awmna lam chu a thlek zeuh a, "Nitin a rawn leng" a ti mauh mai. Chu zawng, ngaihţha deuh a awm veng veng na chi anih loh tawp chu. 

"Boomer, Aizawl ah ka chho leh thuai dawn a, ka awm loh chhung chu upa ber chan i chan a ngai dawn. Kei aiin i puitling daih zawk a, i naute hi lo ngaihven la, ka pa pawh atthlak deuh a chet a tum chuan i lo dang char char dawn nia. Ka nu thihna a la rei lo a, Nu Hriatpuii a rawn lan zut chuan kan mualpho vat mai ang. Ka pa zah ruk turin awm la, keipawn chanchin ka rawn ngaihven ţhin ang" ka ti malh malh. Mipa na na na chu kei aiin a sang zawk a, tak deuhin ka melh chho a, Boomer pawh a thutak ve run mai. A thinrim hmel erawh a bo thei meuh lo. 

"Vanneih, ka nu kha amah a tlu sual anih ka ring lo. A hrisel ţha a, a fimkhur theih zia chu nang pawn i hria ang" a rawn ti chhuak phawng a, mak ka ti khawp mai.

"Eng nge awmzia?" ka lo ti he haw. 

"Kan la mu vek. Tuman a chetsual lai kan hmu lo. Ka pa'n min rawn kai tho a, nidang a tho hma ngai hlei lo a tho hma ve te kha mak tak a ni" a tih chuan "Min rawn hrilh chuan zingkar anih tawh loh kha" ka lo ti vat. 

"Ni e, zingkar a ni lo. Hospital a kan hruai hnuah chiah an rawn hrilh che. Ka nu kha thah anih i ring ve em?" a ti fiah fak a, chhan ngaihna ka hre lo. Ka pa nen hian kan inmil lo viau na a tumah a thah duh ka ring lo. A nupui pawm lai ngat phei chu. 

"Boomer, ka pa hi a fel lo a ni thei mah se tualthat duh chi a ni lo. A rilru a dawih lutuk" ka tih chuan "Saw Hriat hmel-i saw a dawih ve hleinem" ha sehchilh zet hian a ti a, a ngaihdan a sawh sawn loh hmel khawp mai. Nu Hriatpuii nui ri kan hriat phei chuan "Thudik ka hriat hun chu nui tawh lo turin ka siam ang" a ti nghut a, ten hmel zetin a ner zui sawk. 

"Nu Hriatpuii hi i ngaih ang a pawisak nei lo anih chuan i nau te hi lo veng ţha lehzual ang che. Adika phei chu thil a sawi phawng phawng zel a, an pawi a lo sawi palh hlauh ang e. Keimah hi ka kal tawh lo zawk mai dawn mi?" ka ti hial. 

"Aih, kal ngei ngei rawh. Ţha deuhin lehkha zir la, helam chu ka kutah dah rawh" inringtawk tak hian a ti a, a hma aiin a lo puitling leh tawh zawk. 

"U..Nu Hriatpuiin thingpui a duh" Puipuiin a rawn tih chuan "Kal rawh..ka pen thlawk nel nel mai tur che nia" Boomer-an a lo ti hluk. Puipuii awmdan a haw si, vau nat lutuk a hlau bawk si chuan min ti nui leh rih. 

Boomer hian Nu Hriatpuii a ngaihtheih loh em vang leh ka nu a thih thut vang hian ngaihdan atthlak zet a neih phah a ni maithei a, a ngaihdan hi thudik ah a chang maithei bawk. Hunin a la hril ang chu. 

CONT..(Naktuk zanah ka zawm nghal hman lo ang aw)