THE GOOD, THE BAD AND THE OTHERS-3

(Pic edit vel min lo thawn hi a nalh emaw nalh lo emaw ka lo hman sak zel ang che u. Hei hi a nalh lo ka tihna ni lo nia😂🥰)

THE GOOD, THE BAD AND THE OTHERS-3

Lucky,

Kawppui ten min bumna avanga ka thinlung na tur lakah engtiangin nge ka inven ang? Zahtheih loh chhuahin ka rawn zawt ve phawng mai che. 

--Zawhna ka zawhin ka hming ka sawi ngai lo. Tin, ka sawi dawn bawk hek lo. Zawhna ka zawt che a, ka thutak a, chu chu a ni mai. Ka hming ka sawina tur pakhatmah pawh a awm hek lo. Sawi tur a min ti anih pawn ka sawi dawn chuang lo. Ka sawi teuuhh lo vang. 

Tun ţum chu ka zawhna dawnin min ti nui ve tlat. A rawn tih dan vel aţang chuan thinlung na tih vel a hlat hmel hle. Mahse, mihring hian kan nihna diktak lanchhuah tir loh chang kan ngah a, chuvang chuan ka chhang ta tho. 

Hming sawi hreh em em nu emaw pa,

 Zak duh reng reng suh. Inringtawk hle ringawt rawh. Mi tupawh mai hian an thinlung kehchhe ve mai thei ngaingam lovin pumpelh dan an zawng ruai reng alawm. Ka ngaihdan leh zawhna min zawt tu te chhanna ka pek hi a dik vek kher ngai bik lo tih min hriatsak hmasa la..

Bumna avanga thinlung na leh kehsawm vek tur pumpelh dan pakhat chu pianpui finna leh hriatna hman thiam ve hi niin ka hria. Ngaihţhat lohna i neih leh i rilru kap tlat tu, i sawi nghin chiam pawh a tla thei miah lo ang kha. A awmzia tak chu, i kawppui i ngaihtuah apianga ngaihţhat lohna i nei tel zel emaw, in in karah thil ţha lo a thleng dawn tlatin i hria a, kha i hriatna kha i paih bo thei miah lo anih chuan a tak takah thil thleng a awm reng tawh a ni thei. Thil dang zawng zawng aiin nangmah inring ber la, a tlai chhiat hmain bawhzui thuai thuai rawh. A lo tlai tawh a, i na tho anih chuan ka tawrhpui takzet che tih hria la, na lo turin duh viau che mah ila thurawn pek theih che ka nei tam lo. Pawi ka ti takzet.

Thil min rawn zawt tu ka chhan zawh chuan laptop khupin ka inlet thak. Zangthal duai a mu in chunglam ka melh a, mahni buaina pawh chingfel thei lo hian midang buaina chinfel sak ka tum chu a nia, a harsa ţhin khawp mai. Ka mi puih ţhenkhat te hian lawmman min pe ve ţhin a, ka pa dil reng ngai lo a pawisa ka neih theihna anih vang a pui ka ni pakhat. 

"Nangmah hian i khawi ngam" ti vin tuar ri ka hriat rualin ka inperh tho at. Pindan kawngkhar ka khar phui loh mai bakah ka pindan bul lawk a thil thleng a nih hmel. Thawm ka hriat chian theih em em danah hian. 

Hmanhmawh lutuk a pindan ka chhuahsan rualin ka pa leh Boomer te indin chilh ran ka hmu zui nghal zat. 

"Zan a rei tawh, mu rawh u. Ţhenawmten kan thawm an hre pha ang e" ti a khap daih ka tum lai chuan Boomer bawkin ka pa melh ngur chungin "Zanreiah Hriatpuii khan eng nge a rawn tih ka tih chu?" a lo ti vin leh nghek. A au a ni ber zawk.

"Vanmalsawm, i zakthei lo emai. Mikhual ho sulhnu tihfel ngai a tam a, min rawn pui anih kha. Hriatpuii hi ngati nge i hmuh mawh em em?" ka pa'n a ti hluk hluk.

"Khanu kha rawn inlan tawh suh se. A rawn inlan leh anih chuan hmeichhia a nihna theihnghilhin kut ka thlak duh mai ang" Boomer lah chuan a la ti khur khur a.

"Pa ber ka nia, inchhung a hnathawk turin ka ruai a, inrawlh ve lo zawk rawh" ka pa'n a tih chuan Boomer chu thinrim tih hriat zetin a thaw chhuak hrawk. A bek ruh a pawng ţalh ţalh a, a meng sen rum mai. A kut a hum ruh nasat zia ka hmuh phei chuan kut an inthlak mai hlauin an inkarah ka inzep a, Boomer-a awmah ka nam. 

"Ngawi tawh rawh..naktukah kan sawi leh zawk dawn nia. Bengchheng i siam reng chuan i naute an harh ang a, hrehawm an ti lutuk ang" tih hmawk hmawk pahin ka pindan lamah ka thle zeuh. Ka bulah Adika a mu a, an tih harh ka hlau a ni. 

"Ramhuai anih hi, nupui fanaute aia hmeichhe dang thlang tu" Boomer chuan ti leh nghut nghut mah se ka pa'n a bengkhawn tawh lo. Inhnuai a mu ţhin anih vangin inhnuai lam panin a chhuk a, keichuan ka nau ka la dawm bet ţung. 

Hmuh phak loh a ka pa a awm rualin "Rawn lut teh" ka ti hriam hrak a, amah ka dawmna chu thlahin pindan ah ka lut nghal daih. 

Hlauh ang ngeiin Adika a lo harh reng tawh a, thil thleng kha a hlau nge a mittui a lo tla par mai. Adika kuah a ka ţhut rualin Boomer pawh a rawn lut ve a, khum bulah chair rawn hnuk hnaiin a ţhu kun ngul. 

"Hun lo deuh a i thin butut a chhuak ţhin hi chu a buaithlak ngawt mai. Nu Hriatpuii chu rawnkal pawh ni se zanreiah chuan insum ve ţhin tur che a nia" ka ti hlak hlak a, min chhang lo. 

Adika zawk chuan "Anu ka ngai" tih leh ţah a rual a, Boomer a rawn dak chhuak rang khawp mai. Khum lam a rawn kun deuhin a mal chungah a kiu a nghat a, ka pa nen an inhmachhawn lai a a thinrim hmel ang bawk kha a pu leh tawh.  

"Hey, mipa i nih kha" ti hlukin Boomer chuan Adika a la melh run a, "Zantin ţap mah ta che. Mipa i ni lo mi Lalruatdik?" chang khel khawl hian a ti leh a, mitmeiin khap tum viau mah ila min ngaihven duh der lo.

"Ţap reng mahla ka nu a lo let tawh dawn chuang lo" a tih hnuah "Ka sawi i hria em? A rawn let tawh dawn lo" ti vin leh tuarin a che phut a, khum bul a chhuar inhung ţha hle hle lai a tlawh zui bur mai. 

Adika'n thlaphang lutuk a min rawn kuah takah chuan "Duhtawk rawh Vanmalsawm" amah ang chiah a vin hian ka ti ve a, ka nu a ngaihna leh ka pa a huatna te, Nu Hriatpuii nen a rinhlelh vang a rilru na te a inpawlh nawk a, awm ngaihna a hre lo a ni ber. 

"Khawngaihin duhtawk tawh rawh. Hetianga i awm chuan engtin nge Aizawl ka chhoh ngam tawh ang? I nau te pahnih thlamuan tu tur zawk i nia sin..ti thlabar tu ni lo vin" awki pangai tak a ka tih leh chuan a sam tuai tawkin a thaw ham ham a, Puipuii leh Adika te aiin thil a hrethiam tawh zawk a, ka nu thihna hi a tuar na ber. 

Adika lah chuan "Anu ka ngai alawm" a la ti reng a, ka ban pawm chial chungin a insut hlawp hlawp reng mai. Boomer thung chu "Ka pi te inah ka riak dawn" tih leh chhuah a rual a, kan lo en tawp. 

Thawm a neih tak lohah chuan insum thei lovin tukverh ah ka dak a, bike ri ka hriat hnu reilote ah a tlanchhuak tur ka hmu a, "Lalpa, kan chungah hian eng nge lo thleng ta hi le?" tiin ka phun sep. Sakhaw mi vak lo pawh hian mangan tawpah chuan Pathian lo chu auh tur ka hre chuang lo. 

Boomer ngat phei chu rawlthar, mahni tawk a dik leh ţha intih hunlai a nia. A ngaihdan kha dik berah a ngai ang a, mit a hmuh a nei anih phei chuan ka pa insawifiahna mai mai chu a awih sak miah lo vang. Nu Hriatpuii leh ka pa inkarah engmah a awm lo a ni tih finfiahna a hmuh chian hma chu fiahna zawngin a um ngat ngat tho ang. Ka pa nen an la inhauh fo ka ring a, Boomer lah a lian ve uaih tawh bawk si, tharum ah ngat phei chuan ka pa'n a hneh tawh teuh lo. Adika leh Puipuii ka ngaihtuah khawp mai. 

Adika mutthilh leh hnu pawhin keichu ka la meng kar reng. Tui deuh a ka nau muhil lai chu tukverh bul aţang chuan ka thlir a, ka lainat ngawih ngawih. Class ţhulh reng chi anih loh vangin kei lah Aizawlah ka chho leh tawh dawn bawk si. Ka nu thih hnuah ka la ţap leh miah lo a, ka ipik ţun reng thung. Ţah vak vak a, ţah thawl hawk te ka chak ve ţhin mah se, amak lutuk, ka ţap thei ngai miah lo. 

Ka phone rawn vibrate cherh cherh ri ka hriat rualin ka hawi let leh a, khum a ka dah ngei mai chu a lo èng vât vât. Zanrei tawh a min rawn bia chu a pawimawh viau anih ringin ka pan vat a, Muankima a lo ni. 

"Hello" ka tih rual deuh thaw in "Rawn dak leh rawh" a rawn ti nghal thawr. Dak tur a min tihna lam chu ka pindan tukverh kha a ni tih hrilh chawp ka ngai lo. 

Tlan phei leh thuaiin ka dak chhuak a, Muankima pindan la êng reng leh amah ngei chu chiang lo ruaiin ka hmu a, "Nichin aţang khan ka rawn en tawh che" a tih chuan mak ka in ti. Ka dak chhuak reng a, ka ngaihtuahna in kan chhungkua chiah a thlur bing vangin a pindan aţanga êng lo chhuak ka lo hmu miah lo. Kan inţhenawm a, kan pindan a inzawn chiah bawk. Ka hmu miah lo thei chu a mak khawp mai. 

"Nia..Boomer a chhuak daih a, ka pi te inah a riak dawn aniang. A kal tur ka thlir liam a" pangai takin ti mah ila "Adika a mutthilh tawh chuan inchungah chho rawh. Ka rawnkal dawn" tiin thu min rawn pe leh tawp. 

Hnial buai lovin phone ka dah ve mai a, tukverh ka khar zui zat bawk. Ka nu damlai pawh a a lokal fo vangin a rawnkal tur thu min rawn hrilh tawh chuan kawngkapui inhawng sa turah a ngai a, Boomer-a chhuah hnu a ka la kalh loh vangin inchung zawlah ka chho tlang. Kawngkhar bul a pher intung chu la in zawlah ka phah diai a, chutah chuan ţhu in Muankima ka lo nghak. 

Thle êng thlirin ka ngaihtuahna bawk ka kawm leh a, ka pa awmdan hi ka hrethiam lo. A fapa nen a inhuat huamin Nu Hriatpuii thlavang a hauh a, in tifai tur a a rawih satliah chu ni se khati khawp a nasa khan a thlavang a hauh ka ring miah lo. 

"Boruak a nuam hle mai" Muankima ţawng ri ka hriat chuan a rawn thleng tawh tih ka hre chiah. Tlangnel zetin pher ah chuan zangthalin a mu nghal sawt sawt a, a kut lehlam a lukham bawk. 

"Lu mu rawh" ti supin a kut awl lamin min pawt a, muangchang a chein ka mu thla ve. A tih ziah danin a kut min lukham tir a, van thiang tak chu thlirin ka thaw chhuak ham ham. 

"Muankim, ka nu thihna a la rei loh tehlul nen kan buai nghal nuai nuai a, thil thleng zawng zawng hi a awihawm loh zawk. Ka ni te lahin min ngaihsak zui bawk si lo, kan chhungkaw buai dan hi miin an hriat ka hlau, a zahthlak" tiin ka phun sep sep. 

"Eng nge thleng?" a lo ti thuai a, min en chian tum ni awm takin ka lam hawiin a rawn saisir. Pher chiah kan phah sia, a kut ka lukham daih bawk si "I awmdan kha a hrehawm em?" ka tih chuan min chhang lo vin "Eng nge thleng? I pa'n a hau che mi?" a lo ti hmuk. 

"Hau lo, aaa...a tam mai" tiin thil thleng ang ang ka hrilh ve a, ka inbunruahna ber a nia, 'i thawl phah hawkna tur anih phawt chuan ka ngaithla char char ang che' min ti ţhin. 

Ka sawi zawh meuh chuan a thaw hawk a, min hnem ngaihna a hre lo chuan "Eizawnna ngial nghet ka neih hunah in unauin ka bulah in awm dawn nia" a ti ta ringawt. 

"MA i zawh hunah eng nge i tih ang?" ka tih chuan "Ka hre lo" a ti thung. Keipawn ka hre miah lo, mizo te hi chuan sawrkar hnathawh kan tum ber ţhin a, hna a vangin kan inchuh sup sup a, kan tan chuan a beiseiawm ve vak lo. 

"Nupui ka la duh ve ang a, nu leh pa chawm tur a nupui neih ka tum miah lo bawk. Ka zir zawm zel peih loh a, hna a van viau leh ka sumdawng mai ang" a ti deuh duah. Nupui neih a sawi ringawt pawhin hrehawm ka lo ti. Ka ţhianpa ngei lak a ka rilru put hmang dik ta lo lutuk hi ka inhaw ve fo. 

"Hotel ka siam ang a, manager ah ka dah ang che" a la ti zui. Hriam hrak a "Lalmuankim i over lutuk aw" ka tih chuan lo nui hawkin ka dul zawnah min kuah a, a ban lukham tawh lovin pher hlangah lu a nghat a, a hrehawm viau tawh tak tak ang. 

"Tih tur i hre bik dawn lo. Ka chhawr dawn che" a tih hnuah "Nang chu ka hmuh phak lohah i awm dawn lo" a rawn ti zawi leh ruih a, min ven him tum tlat ţhin tu kha a ni miau a ni. A lam hawi a inher ve in zawldawh deuh a min lo melhna mitmeng chu ka en ran a, "Ih maw, keichu ka zir zawh theih pawh ka ring lo. Ka naute hian min mamawh bawk sia, ka chawlh tho tho a la ngaih rinna ka nei" a awm tihrawl khauh ţha zet thai neuh neuh chungin ka ti malh malh. 

"I zo ngei ang chu le, i naute chu an lo awm thei mai ang" a ti na a a rilru a buai ve hmel khawp mai. 

Hrehawm a tih ka hlau lutuk chu ka ţhu chhuak a, rei vak lo hnuah rawn tho ve in "Pookie, i eng nge ka nih?" a rawn ti ta daih. 

Ka hamhaih viau na a "Ka tan a mi pawimawh tak, ka ţhianţhaber i ni. Englai pawh a min ngaithla ţhin tu" tiin buai map lo vin ka lo chhang. 

"Chu chauh chu?" ti a min zawt lehin mithmul a kan uk a, ka bu nghat. 

"Ka ţhianţha ber i nih hi Muankim" ka lo ti leh sap a, "I hlim em?" zawi lutuk hian a ti a, "Ţhian kan ni hi maw?" ka ti he haw, lu min buk khum nghut hnu chuan "Hlim lutuk" ka ti a, ka mit a min melh ngur chung hian ti lui tih hriat zetin a nui suk a, ka chhanna chu a duh ang a nih leh nih loh ka hre thei lo. 

"Zodini kha i hua em?" chiang zet a min la melh run chung hian a ti leh a, kan chhungkaw buaina vangin Zodini pawh ka la ngaihtuah hleithei lo. Chuti chung chuan "Dawt a sawi anih chuan ka haw ngawt ang" ka ti vak tho. 

Min chhan leh hmain ka phone bawk a nghawr leh det det a, Boomer anih ringin ka kekawr ipte aţangin ka la chhuak vat. Mahse, Mateo Penglenglenga zawk a lo ni. Muankima'n phone screen a hmuh ve rual chuan "Chhang ta che Mateo meow-a kha" ti nekin ngaina lo tih hriat zetin a ner zui sawk. 

"A tlai tawh emai naktukah ka be mai ang" ka ti a, phone ka ak zui nghal. Muankima chuan min la melh tur nasa ngang mai. 

"Eng nge?" ka tih chuan "Nang aiin a naupang" a lo ti bul hmuk. 

"Kei aiin a naupang tih te chu ka hre ve tho lawm" uar fahran a ka tih chuan "Ram dangah phei chuan awm ula nangmah hi an man ang che" min ti leh nek. Eng nge maw a hriat ni?

"Lalmuankim" ka tih vak chuan "Sawi rawh" ti nghutin a thaw chhuak hawk. A ke tawmin a khupah a kiu a nghat a, kun deuh chial a ţhu in min rawn melh rawm rawm. 

"Ka bialpa a ni bawk lo aw..ni pawh nise kum18 a tling tawh a, eng ram dan mahnin thiam loh min chan tir thei lo" inringtawk chiah lo chung a ka tih tan tan chuan "Huh..ţang na reuh zit zet si" a lo ti hluk a, za lo lutukin a nui ro hawk. 

"Ka bialpa a ni lo ve chiang e, naupang ka ti ve tho. Ţhian ah bak ka ngai lo" ka ti niah niah reng. Mateo a nghal em vang hian Muankima nen an in bakkaih reng. An in ngaina hlawl lo ti ila ka sawi sual lo ber ang. 

Muankima ka thlah hnu a pindan a ka luh chuan Boomer ka hmu thut a, ka phu nasa lutuk chu ka au chhuak teuh hle. Ka thin zawn dawm vang vang chung hian "I va mawl ve" ka ti vin ţhat. 

"Ka riah chhuahsan lo ang che u" lo ti mawl tawpin 'ţhu rawh' ti ni awm fahranin khum awl lai a tawk zeuh a, ani chu khum bul a a chair dahah bawk khan a ţhu. 

"I inbengdai thei tawh em ni?" ka tih chuan nui sukin lu a bu nghut a, ka thawveng siai siai mai. 

Khum a ka ţhut rual chuan "Ţha deuhin lehkha zir la, ka pa hian Nu Hriatpuii a neih chuan min indan pui daih rawh aw" a lo ti anih chu. Chutiang lam chu ka la ngaihtuah ngai lo hrim hrim. A mitmeng uk kharhah chuan keimah a beiseina sang tak a neih zia a lang chhuak a, chu ringawt te chu min ti na tu a ni.

"I â lutuk..chutiang an sawi ngai lo. An in ngaizawng ngei em tih pawh kan hre lo va, ka pa sawi ang khan hnathawk tur a a chhawr chauh a ni maithei asin" ka tih chuan "A ni lo, min ring rawh. An la innei dawn khawp" a ti nghet charh. A hmel ka en a, a thutak run mai bawk si. Tih ngaihna ka hre lo lutuk chuan "Min ngaihtuah vang a i lo let leh hi a lawmawm. Va mu phawt la, naktukah kan sawi leh dawn nia" ka ti tawp. 

Thuawih deuhin a tho ve mai a, a chhuah hmain Adika muhil lai lu ah a tuai zeuh.

"I lukham hnuaiah pawisa ka dah" tih leh chhuah a rual a, "Boomer" ka ti zet na a rang zetin lukham ka la kiang ta zawk. 

A sawi ang ngeiin pawisa chu a lo dah a, nawi te te pawh a awm. 

"Ani hi a pawisa khawl sa min pe em maw ni?" ti nuah nuah chungin pawisa chu ka chhiar a, sanghnih zahnih sawmriat chiah chiah. Pawisa chu kengin ka melh ngawt ngawt a, ka hmu fiah lo tual tual. Aizawlah ka kal tawh dawn tih a hria. Ka pa pawisa ka dil hreh zia a hre bawk. Ka kut a khur der der a, ţah loh tumin inpet ruh nasa teh mah ila ka mittui lum pap chu ka biangah a luang zung zung tho. Ka insut hraih laiin Adikan ka kawngah min rawn kuah a, ka mittui chu tuai fai sawk sawkin nui lui chungin ka hawi let. A muttui ţhin tehlul nen zanin zet zawng keimahni vangin a harh ngun hle mai. 

A mitmeng pawisawi lo zet a min lo melh kiau chungin "Au, anu i ngai ve tho mi?" a ti ta reuh a, ka ţawng chhuak mai thei lo chu ka bu nghat nghat.

"Keipawh anu ka ngaih chuan ka ţap ziah lawm" a ti a, ha lang ţha in a nui. A ha hmai bal lai phei chu a lang chiang lutuk ringawt.

"Ka ti harh che mi?" ka ti a, ka aw a la dik thei lo. 

"Ka mit hi ka chhing ang a, ka muhil leh daih mai ang" tih leh mit chhin a rual a, chu chuan tih luihna tel lova min ti nui ve in puan ka sin ţhat tir thuai. Ka pa awmdan leh ka naute kum zat ka'n khaikhin vel ţhin a, kan hma hun thim lutuk chuan min ti hah ngawih ngawih. 

Khawvar a hnai tawh viau na a ka muhil thei lo chuan phone ka khawih mai mai a, Mateo message a tam ngei mai. 

[Ka mumangah zun i lo cheh a, ka harh hlawl. Ka ngaih a ţha lo..i ţha em?] tih te, [Ka ngaihtuah che a, ka emoji a nui thei tawh lo] tih te a lo ni a, emoji ţap lai lem a dah tuarh.

Chhang lem lovin status ka en kual a, Mateo bawkin [Hmangaih ber te lenna Kolasib ngaih a zual] tih status a a hman te chu ka hmu fuh lutuk ringawt. Chuti tak a min ngaihtuah chu tiin [Ka ţha a nia aw..ka lo chho dawn] ka ti ve ta nge nge. 

Muankima awmdan bawk kha ka ngaihtuah let leh a, thikthu vang ti dawn ila ţhian pel a min en a tum loh thu a sawi zeuh zeuh ţhin bawk si, tun hnuah sawi ngai tawh lo mah se kan intiamna mawl mang tak te kha ka la hre reng. Kan pahnih chuan a theih loh a ni tawp mai. 

Muhil lo vin ka meng tlang ţhak a, ka mit a na ngei mai. Aizawl ka chhoh tum ni anih vangin ka nauten school an kal duh lo vek a, rawngbawl tur a Nu Hriatpuii a lokal chuan buaina siam lo turin Boomer ka hrilh vat. A huatzia leh a insum nasat zia erawh a hmel thim khup leh taksa ţan ţeuh danah a hriat theih. 

Ka pa office kal tur chuan "Nakinah i ac ah pawisa ka rawn thun ang" a ti ve mial. Nu Hriatpuii nen a an inthlah vel te chu a fate tan chuan hmuhnawm loh tak a ni. Ka nu taksa pawh a la ţawih kim lo vang tih theih a nih lai a langsar zet a an in ngainat zia an lanchhuah tir ngam te chu rapthlak ka ti takzet. 

"U..kal lo mai la" pangchang tak a Adika'n a tih chuan Nu Hriatpuiin "Ka awm hi Adik..nitin kan inkawm ţhin dawn nia. I u kha chu lehkhazir a ngai a, a kal ngei ngei a ngai alawm" tiin a lo thlem. 

"Naa..keichu nuam pawh ka ti lo" Adika bawk chuan ti lehin a ţhu ngui nghiai a, an bul a ka awm reng chuan ka kal hreh telh telh ang. Muankima lah a rei hrep lehnghal. 

Ka pa te pindan a a luh hnu a Nu Hriatpuiin "I nu thawmhnaw saw" a rawn tih chuan a sawi zawh hma hmain Boomer chuan "Khawih hlek suh" a lo ti hluk. A thinrim rukna a lanchhuah leh mai hlauin ka inrawlh vat. Ka hawn leh theih hun a ka dahţhat mai tur thu sawiin khawih che rih lo turin ka hrilh a, Adika leh Puipuii lahin ţap purin kal lo turin min ngen ve sek bawk si, thaw a va'n pik tak em. 

Ka naute min ngen na chu haiderin "Boomer..min thlah rawh. Muankima a rei emai an inah sawm phei mai ang" ka ti a, kal dawn tho chuan kal vat vat ka duh a ni. 

"Insum theihna a pawimawh aw. I thinrim viau pawn i naute ngaihtuah la, insum hram hram rawh. Ka pa pawn hrehawm deuh a kan awm a phal bik nang. Nangpawn lehkha zir ţha ve tho la" ti a Boomer ka zilh lai chuan Adika'n "A zir ngai lo..tlai tin a inkhel ziah" a lo ti khauh. 

Boomer chu ka en vat a, sawi tur hre lo tih hriat zet a aw then kharh pahin a tukhum a tuai a, a nui ruh ruh mai. 

"Dikchiah...anu bulah pawh khan 'ka inkhel ang a, hlawh tam deuh ka nei dawn' a ti ţhin alawm" Puipuiin a lo ti ve vat bawk.

"A dik em?" ka tih chuan "Aw..ka ti ţauh ţauh ang a, hming lang thei tur khawp a ţan ka lak phei chuan club lian deuh zawm dan te a awm ve zel. Football hi eizawnna tlak alawm. Hlawh a ţha lutuk" phur tak hian a ti a, Muankima te in kan thlen chawpchilh nghal mai vangin kan sawizui lo. Tin, football lam hi chu a mual bo in ka bo. 

Muankima lo chhuak chu "Muang lutuk mai" ti hlakin ka lo melh rawm rawm. Ka nauten ka kut pahnih an chelh tlat a, chu chu Muankima pawh chuan hmu ve thuaiin sawi lo mah se a lainat ve niin ka hria. 

"U Muankim, ka u hi lo duat rawh aw. In inkawm nasa sia, kan rinna che ti chhe suh" awmze nei deuh, khauh tak si hian Boomer chuan a ti a, Muankima pawn a lo nuih ve suk. 

"Thinchhe hlik hlek si..i u hi awm phaw nen a duat a ngai" helmet khum pah a Muankiman a tih chuan "I zak lo aw..vawikhatmah ka vin ngai lo che" tiin dawtin ţan ka lo khawh. Muankima pawn a awih lo ngang aniang, a hmui hnuai petin a nui leh suk a, ka hmu lo der tlat. 

Ka ţhiante rawn haw in min hmu thut chu an khek chel chul mai. Chanchin min zawh chuan ţha deuhin ka hrilh a, ka naute kalsan harsat zia erawh ka sawi tel lo. Sawi chu sawi loh, ngaihtuah ringawt pawh ka duh tawh lo. 

"Mateo a lawm ngawt ang. I awm lo chu biak ngam pawh a ni lo. A tum bur reng a, a thin a chhe bawk si" June chuan a ti hlak hlak. 

"Chhaih buai tur a nei lo a hrehawm a ti anih chu" ka lo ti mai a, June thung chuan "A ngaizawng che. Ngaizawng lo che se la chu biak hrehawmin a awm phah lo ang. Nu Hlimi takngial pawh chhuar chungah a hlang daih alawm" a la ti tan tan. 

"Eng nge awmzia? Khawilai chhuarah nge a hlan a?" ka lo ti thuai. 

"An eisiamna hmun a chhuar lian berah khan. A rintlak zia a hria a, Nu Hlimin a thinchhiat zia sawi a a khak reng kha a ning a, a thin thawk phutin a pawm nawlh a, chhuar chungah a ţhuttir daih" a ti a, ka lo nui hak hak. June leh Jessie te pawh an insum thei chuang lo.

"A lian sia, a chak bawk sia. Nu Hlimi te ang nu te, thau bawk si lo chu a zo khawp mai" Jessie pawn lo ti ve in a nui vur vur reng. 

"A chhuk thei awm si lo a" ka tih chuan "Teuh lo..a au ri hria in kan tlan khawm alawm. A chesual amaw kan ti zawk a, chhuar chungah a lo ţhu vâng sia, a zuang thla ngam chiah bawk si lo, Gabriel-an a pawm thla" Jessie tho chuan a ti leh. 

"Mateo Penglenglenga pawh chhuar chung a han hlan kher. Rintlak loh phei se chu Nu Hlimi a chesual duai dawn nih chu" ka ti a, ka nuih a zat loh phah chuang lo. 

"Vulmawii nen pawh an insual. An insual ti ila Vulmawii thusawi a lo hnial kalh kha a ni Vulmawii kawlhrawng ve bawk si khan a samah a kek a, hmeichhe kutthlak a hreh ve bawk si vangin Mateo khan a dek tawp a, dek a lo haw miah lo lehnghal. A mawngtam a ţham sak ta ringawt a, Vulmawii a au nasa, a thlah chiang asin aw. Sawi tur a tam mai" June chuan a lo ti veleh vat vat a, ka awm loh laiin thil thleng a tam hman viau anih hmel.

"Engpawh nise ka ngai che" tih pah a min kuah tu chu June tho a ni. Kuah let ve in ka ngaih ţhin zia ka hrilh malh malh a, Jessie hriat loh turin "Ka hmuh phat che aţang khan dik lo a awm tih ka hria. Nidang i ang lo, i nguai tlat. I inpeih hunah kan la sawi dun dawn nia" ka beng bulah a phun sep sep. 

June nen a cafe a kan kal tur chu kan thlen hmain Mateo ngei mai chuan min lo hmu in min pawm kang a, min theh vir nasa mai. Ka khek chul a, "Ka lu hai a nia, min dahthla rawh" tiin rak teng tung mah ila "Ka lu a la hai ve lo" a ti tlat. 

"Min thlah loh chuan ka be tawh dawn lo che" ka tih rualin leiah min nghat a, ka tluk loh nan hneh zetin min vuan ding leh ang lawi a. 

"Danglam a awm em? Khawmaw ka lo en chhin" tih pahin ka ban vuan reng chungin a rawn kun hniam a, mit ti zim deuh sun a hnai set sawt a min en hnuah "Umm..a ţhat ngaiin a la ţha" lungawi hmel tawkin a ti leh sup. 

A rawn kun hniam lai chu chuhin "Min theh vir tawh hlek suh" tih hlak pahin a lu ah ka beng pawp. 

"Hmangaih tu tan chuan a na lo" fiamthu in a la ti zui a, ka ben mai mai chu a haw lo khawp mai. 

Cafe ah kan inzui lut a, chaw ei a la hun chiah lo bawk a tiin coffee in kan tum. Chin dan te te hi a awm ve a, pindan a inkhung tlawk tlawk ai chuan cafe a kal hi nuam kan ti zawk hrim hrim. 

June nen kan ţhu dun a, kan hmaah Mateo a ţhu. Gabriel-an min rawn fin ve vat bawk.

"In tluang maw?" a awki ngai bawk hniam ruih a tih pahin ka chhip a rawn tawk zeuh. 

"Tluang e...kan rawn thleng hma phian lehnghal. Hostel reh lutuk ah keimahin ka lo awm char char" uar fe a ka tih chuan June leh Gabriel te nuih a za viau. Mateo a nur nang thung. 

"Kolasib chu a hnai em a, in rawn chhuah hma chuan thlen hma loh ngaihna a awm lo" June-in a tih laiin Mateo chuan "Min rawn hrilh ta che. In khua a i awm chhung zawng ka be thei lo che. Muankima chiah i ngaihtuah" a ti hluk hluk. 

"Chutiang a ni lo, ka buai ve em alawm" ti mah ila "I mu hman em?" a ti hram a, ka buk zeuh takah chuan "Chu..message thawnna hun i nei tihna anih chu. Type zo peih lo in 'ka' tih ringawt pawh rawn thawn la ka lampui zawr zawr tho ang" a ti zuah zuah. 

"In college ah bialnu i neih kha" a kiu a nghawk zeuh pahin Gabriel chuan a lo ti a, Mateo kan en nghal ţhap. 

"Ka neih loh zia chu Nu Hlimi hming chhalin ka sawi ngam..min ngaizawng tu chu an tam, ka duh ve leuh" Gabriel a lam hawi a elhsen fe a a tih chuan Nu Hlimin "Dawt i sawi apiangin ka hming chhal ve ziah suh. Eitur ka pe ve lo mai tur che a nia" a rawn ti a, kan piah lawkah a lo ding reng chu niin. 

"Nu Hlimte, keichu hmeichhe sam kir leh ha kuh deuh hlek hi ka duhzawng a nia" nui ruh ruh chung a Mateo bawkin a tih chuan hmui ka hup chawih. Ka sam chu a kir ngei a, mahse, ka ha a kuh awm ka hre miah lo. 

Chik zet a min en in Gabriel chuan "Nui teh" min rawn ti a, lu ka thing mât mât. Hahdam deuhin a ţhutna nghenchhan tlangah a ban a nghat a, hmui ka hup loh hun chang ang hrimin a mit chu keimahah a fu ngur reng mai.

Hmui hup tlat chungin "Ka ha hmai a lian deuh na a ka ha a kuh lo aw" ka ti pang pang. Rum fe in Mateo leh Gabriel te chu ka melh tawn chhen a, Nu Hlimin coffee a rawn dah tawh bawk a, ka thusawi chu hre lo ang hmiahin an in rual vel. 

"Eh..kan in rual vel. Inchhûn na kan nei hrim hrim" an ti fiamthu hlut a, anni pahnih hi a chang chuan an inmil phian. 

Kan hostel neitupa a rawn lut ve hlawl a, mipa kan ţhutpui vang a June nen kan tim dun viau laiin Mateo chuan "Pate" a lo ti hlut. Keini chuan Sir kan ti mai zel. Sir Nicky. Muankima nu nen unau an la ni zui. Hostel siam tur hian sang deuh thleng a han zir vak a ngai hran lo aniang Sir Nicky pawh hi zir sang uchuak a ni lo. Kan hostel hmun hi a pu te awmna ţhin a nia, a fal na a Sir tan chuan a ţha phian. An thih hnuah a pawisa khawl hmangin ti hian hostel a din ve rup a, building pakhat chiah a awm ţhin. A ti lian ve zel a, Nu Hlimi te nupa in cafe an rawn hawn hnu phei chuan nuam kan tiin hostel dang a insawn tum pawh kan awm lo. Sawi tawh angin awm man erawh a to thung. 

"Weekend ah haw nachang hre rawh aw. Hostel hi nuam ti viau mah la nu leh pa manganna turin awm suh. Anih loh chuan i awm ve ka phal tawh lo vang" ti chungin kan ţhutna lamah a rawn phei. A inchei simple viau zel. Tshirt var leh cotton jeans dum a ha a, sneaker var a bun leh tawp. A rawn lang hlawl chu nuam ka tih loh vangin a rawn thlen rualin dawhkan ka bih.

Mateo lah chuan "I ho e ah" a ti liam puat a, "Ehe..pute" rawn ti ve hlut tu chu Muankima a ni. A aw ka hriat rualin ka dak chhuak a, a putea a hmuh a inbeisei loh hmel takzet. Vulmawii nen kher an ni lehnghal. 

"Ngati nge khatiang hmel kha i put? Hmelchhia min va ti awm em em ve" tiin Sir chuan Muankima hmel tim deuh chu a en run a, a dar a ben sak pah thuk bawk. 

"I hmaikawr kha ka la chhuak a" ti supin Muankima chuan hnuai lam a bih ngur thung a, "Chuan?" Sir in a tih veleh "Pengluaian a khal chhe vek" hriat tham mang lo hian a ti leh. Midang thil tih chhiat a hlauh ţhin zia hre tu tan chuan a inthlahrung deuh duk chu a mak lem lo.

"Ka zawhte puh chhiat a tum mai mai nih kha aw pate. Mi tih ţhaih nan a hmang nasa a, i hmaikawr khan a tlin ta ngang lo a ni" Mateo pawn a lo ti ve thuai. 

"Kha mi te pahnih kha hau nasa rawh Nicky, hostel ah hian lehkhazir tur a awm an nih inhre lek lo in buaina an siam ziah. Mateo phei chuan chhuar chungah min dah daih a, Muankima pawh i cabin a kal ruk a hrat. Lehkha an zir dawn loh chuan haw tir ve ve rawh" Nu Hlimin a lo ti ve zat zat. An va han daihzai hlawm tak. 

"Mateo i zawhte kha i nute hawn tir turin ka hrilh tawh che. Nangpawh Muankim, i damlo anih loh chuan cabin ah kal tawh suh" Sir chuan khauh zet a a tih hnuah "Hlimi pawh, naupang pawm zawh loh turin in ei thau rawh" a tih zawm a, Nu Hlimi chungchangah chuan a uang niin ka hria. 

"Ka u te an ţha maw?" tiin pangai takin Muankima chu a zawt zui leh zat bawk. 

"Dam e" a tih rualin Muankima chuan min rawn melh a, Sir in min kalsan veleh "Pookie, hei ka bialnu" ti supin Vulmawii a kuah a, mak ka ti lutuk chu ka ang pham mai. A hriat ţhan vek kan awm khawm a, tu mitmei mah a veng hran lo.

"Eng--engtik aţang khan" ka ti bah nawk. Ka ţawng chhuak ve thei hram a, a la mumal lo em em zui.

"Nichin lawk aţang khan" a ti a, intithei zetin min la nuih suk zui. Midang hmuh ve phak lohah June chuan ka kut a vuan a, ka lungphu rang leh lutuk chuan min ti chau nghal vek. 

"Wow" harsa zetin ka ti chhuak hap. Vulmawii nen chuan insi rialin an ding a, Muankima lah chuan min melh chhuk run reng. A mitmengah chuan engmah ka chhiar thei lo va, min en chik takzet tih bak sawi tur ka hre lo. Keimah chiah min hrilh se chuan hrehawm ka ti nep deuh ang. Kan chanchin hre ve tu te hriat lai kherin min hrilh a, ka nat bakah ka zak takzet. Chu chuan ka biang a ti sa hat hat mai. 

Ţhutthleng lak belhin an pahnih chuan an la rawn ţhu ve zui. 

"In in ngaizawng nge hrem duh neiin lem in chang zawk?" June chuan a lo ti khawl a, chumi rual a Nu Hlimi coffee lo dah chu ka bul chiah a ţhu Vulmawiin a lak rualin "A sa lutuk" tih leh sang deuh aţanga dawhkan a thlak a rual a, coffee baw nuaih chu ka mal chungah luang thla in ka ding hluai. A sa kher mai. 

Ka kekawr a coffee kai kut lawng a ka tihfai mawlh mawlh laiin Vulmawii a au ţhat. Ka hawi chhuah meuh chuan a hmai chu coffee a leih tih hriat zetin a huh hluam a, coffee no kengin June a ding khawng lah bawk.

"Coffee ka in ngun tawh..khawih ngam loh khawpin an no hman hi a sa tlang ngai lo. Ka coffee kha a dai tawh hlauh a, sa ţha ver vawr a ka theh lo che kha lawm hle rawh" ti bawrh bawrhin ka ţhiannu chuan ka thlavang a hauh na ngang mai. 

Muankima chuan a tih ziah dan a ka thlavang a hauh ka rin tehreng nen "Ti tawh suh" tiin Vulmawii chu a hrilh ringawt. Duh khawp lo viau mah ila eng thu mah ka chhak chhuak tawh lo. 

"Coffee sa ver vawr i duh chuan chah leh la June. Ka awmna aţang hian i theh fuh lehzual ang" ngeiawm fahran a lo tiin Gabriel chuan coffee a Vulmawii theh dan tur a zir chhin vel a, June pawn "Hrethiam rih ang..a bialpa thar hian fawh tur mumal a nei lo palh ang e" elhsen fe in a chhang let. 

"Kal ang le..ka bialnu" ti hluaiin Mateo chuan a kut min rawn pe a, ka hmazawn a a rawn din lai a hamhaih zet a ka lo en chuan Muankima te pahnih a melh ralh a, a mitmei chu hrethiamin a kut ka vawn sak. 

Mateo vuan ţung chungin ka chhuak zui hnak hnak a, Muankima hian eng nge a hriat thut le? A thin ka tih rim ber lai pawn heti hian a awm ngai miah lo. Amah chiahin a chhan theih zawhna chu a chhanna hriat chakin ka buai em em a, ka zawt ngam der si lo.

CONT...