THE GOOD, THE BAD AND THE OTHERS-4

THE GOOD, THE BAD AND THE OTHERS-4

"Lucky tho rawh..tho vat rawh" June thlabar aw chu ka hre ruai ruai. Min sawi nawk nawk pahin "Lucky tho thuai teh" a ti pah reng. Zan hmasa ka mu tlem a, ka muttui ngang ni tur a ni vawitam min koh hnuah ka harh thei chauh. 

"Eng nge? A la hma lo mi?" ti niah niah chungin ka ţhu chhuak a, mit ka nuai zui nuah nuah. 

"Hma eng ang mah se tho rawh. Josephine a thi" a tih chuan ka harh chiang kek kawk hle mai. 

"Josephine a? Ngati nge? Engtia thi nge?" ti nghal chel chulin khum aţangin ka chhuk a, zawhna min rawn zawt ngun ber tu te zing a mi a nia, ka mi hriatchian tak a ni. 

"A room piah chiah a miin thi in a hmu. Khumah fel thanin a mu a, a kaihthawh zawh loh vangin midang a pun a, a lo thi reng tawh an ti" mangang zet hian a ti leh a, a chiai nasa ve kher mai. 

"Ruang an la tawh mi? Engtia tih nge an tum?" June dar a vawn pah a ka tih chuan "Ka hre lo, ka en rei ngam thlawt lo. An rawn pungkhawm chak a, engtin nge an tih ka hre lo" mumal lo zetin a ti nawk nawk. 

"Aw ka hrethiam, lokal rawh va enchhin ila" ka tih chuan tim dai a min melhin chil a lem khawlh. 

"I hreh viau leh keimahin ka va en ang a, chanchin ka rawn hrilh ang che" ka ti leh ta zawk a, kan room ka chhuahsan zui zat. 

Josephine hi single room ah a awm a, mahni a awm nuam ti, chim buai duh lo chi a ni. Amahin tal hrang nasa viau mah se biak a nuamin huat nei vak lo chi a ni. 

"A mu hlum aniang an ti ringawt a, post mortem an tum lo em maw ni? An ngaih a sam e, hrisel ţha, ruihhlo ti bawk si lo a nia, ka chhungte chu ni se ka chhui chian tir ngei ngei ang" hmeichhe pakhatin a ti hlak hlak a, ruang an lo seng hawi fel tawh aniang room chhung a ruak hiang tawh.

"An chhungkua an mumal lo ve e, an hausa ringawt a, an in ngaihsak loh em hi. Ruang an hlawm tawp ang a, an ngaihven zui teuh lo mai" ka piah chiah a ding chuan a ti tan tan bawk. 

"Thih pangai a thi a ni lo deuhin in hria em ni?" ka tih chuan min rawn en rual ţhawt. 

"Ka ring lo..kan inbe reng alawm. Zan dang aiin kan inbe rei daih lehnghal a, a reh ta daih sia, ngaihţhat lohna ka neih miah loh laiin a thi an rawn ti leh ringawt a, mahse a chhungte berin hma an lak loh chuan tih theih kan nei ve lo" ti halhin dar a kan ak a, Josephine-i room chhung a thlir leh ta daih. Mu hlum satliah ah ngaiin tuman ngaihţhat lohna an nei lem lo niin ka hria. Bakah Josephine hian rual a pawl lo a, hostel a rawn awm thar zingah phei chuan hrechiang lo tu an awm nual. 

Tual zawlah motor a ding thluah a, pindan aţangin ruang an la chhuak tawh na a an la kalpui chiah lo anih hmel. 

"Min va kaitho har awm em em ve. Engmah ka hmu ve hman hleinem" kan room a ka lut leh chu ka ri hlut. 

"Kaihthawh che ka tum nasa, i harh thei lo anih kha. Ka beidawn hnuah ka kalsan che. Josephine-i chhungte rawn lan thleng ka awm a, ka rawn kaitho leh che. Enteh Lucky" ti hluaiin a vei tawn sek chu a ding dat a, ka bulah a rawn ţhu. 

"Police an hriattir ka rin tehreng nen police hmel ka hmu miah lo. A chhungte hi an ngaih a ţha thei zawk i ti em?" a ti ve chiah. 

"Aaa...ka hre lo. An ngaih a sam nge nia nga mi ngaihven nih an duh lo zawk ka hre lo. Thih pangai a thi anih loh chuan a la langchhuak tho ang" ka ti a, khumah ka mu leh hnawk. Thil thleng engkim hian min ti chau, ka chhungte anih loh leh Muankima, tunah lah Josephine a thi ringawt bawk si. A zirlai pui te ngei ngeiin chhui chian chi ni a an ngaih laiin a chhungte berin ngai an ti lo anih hmel a, thin ti ţhawng tu ka tawng hnem malh malh hle mai.

Class kal tur a ka chhuah chuan Muankima leh Vulmawii rawn inzui ka hmu leh pek a, keimah chauhin ka ni bawk si. Awmdan thiam a har takzet. 

"In kal dawn chiah ve tho mi?" ka tih chuan Muankima'n hriatthiam harsa zetin min lo melh leh tawh a, min en chik lutuk chu ka ngaihtuahna thleng a hriat vek tum a ang zawk. 

"Aw, kal hma ka duh nen Muankima hian a phal tlat lo" ka ngei tur tawk lek a Vulmawiin a tih chuan za lo deuhin ka lo ţhen sak. 

"Kal ru..ka rawn zui ang che u" ka tih laiin tu emaw hian helmet min rawn khum tir a, a uap phui nghal churh. Muankima ngawt ka la en vangin a mitmeng danglam zawk chu chiang takin ka hmu thei. 

"Bike ka khalh peih lo..min phur rawh" Gabriel-an a rawn ti hem mai. Helmet pawh phawi ka tum lai chuan a chung a nam bet tlat chungin ka hmai zawnah a rawn kun hniam a, min la nuih suk zui. 

"Phur dawn che pawh ni ila ka helmet ka khum ve mai ang. Hetiang helmet lawk bur ka khum ve peih lo" ti hlak hlak mah ila "Ka helmet i khum hian ka hmu mawi tlat che" a ti fan ruih a, kan ţawng hre ve vek tu Muankima te ka melh leh hram. 

Vulmawii dar a kuahin a bike dahna lam an pan a, na viau mah ila tih theih ka nei lo. Ţhianţha inkarah hian inhip tawnna avanga hmangaihna lo piang chhuak ţhin hi awm ve thei miah lo se ţha tur. 

Muankima bullet bike ri thum dut dut chu a zawi tial tial a, a reh hmak hnuah Gabriel bawk chuan ka helmet khum lai chu min rawn phelh sak leh ang lawi a, hrethiam lo zet a ka melh takah chuan "Hmeichhe phurhah ka chuang dawn reng reng lo" a ti leh vel. 

"I va han over chiang e aw..bike ka khalh peih lo i ti zo chiah a ni lawm ni?" ka ti nghek. Ka melh pah khai khai bawk. 

"Ka veng che Lucky, hmuh tlang theih leh derdep. Darthlalang ang chiah" ti nghutin helmet a khum a, a bike, Kawasaki Z900 ah chuan awlsam leh hneh zetin a ţhu kai a, a hawl chhuak ţhang tih a hriat. 

"Ka rual a i kal duh chuan tlawmngaiin ka phur ang che" ngeiawm fahran a a ti ri leh bike ri a inpawlh nawk. 

A nutei te thil chah thawn kawi a ngaih vangin June a chhuak tawh a, kan class kalna a hla tham si, mahni a inkhalh thlak bap bap ai chuan a nuam zawk ang tiin "Tlawmngaiin ka lo chuang ang" bike lam a kal phei pahin a ngei tur tawk lekin ka ti ve salh. Helmet lawk bur a khum tawh na a a mit bul a vun chuar a awm phei raih danah a nui tih a hriat. 

A taksa vuan ţung chungin bike ah ka lawn a, ka ţhut rem fel hnu a "Kal rawh le" tih lauh pah a kut pahnih meuh a helmet ka ben thak chuan a lo nui chhuak hawk. 

 A tlanchhuah rual a "Min lo thik tur bik riau te an awm em?" awmze nei zet a ka tih chuan "Awm lo, ka duh hleinem che" a ti chhum hmuk. Ka ţhian ngamtlak tak chu ni lo se ka zak viau ang. 

"I boring emai..ka fiam che chuan min fiam let ve mai ta che. Nuih vak vak theihna tur thil sawi la" ka tih chuan "Sawi tur ka hre lo..min kuah rawh Lucky" a ti leh tawp. Motor tamna kan la thleng lo a, a ţawng ring tehchiam lo. 

A kawr a ţham betin tim daiin ka hnaih a, "Min kuah rawh min veh den den lo khan" a rawn tih leh chuan a aw a min nuihzatna lang chhuak chu ka hriat hmaih lo chiang kher mai.

"Ninawm" ti hlakin ka pawm bet a, ka chetdan naupangchhia zet vang chuan a lo nui che dat. 

"Min ngheng la i zia mai ang" pangai takin a ti tawh thung. A pangti lum chu nghengin mit ka chhing a, ka nundan hi hahthlak ka ti. Engkim tih tawp ka duh ut ut a, ka ngaihtuah chian hnuah ka phal leh lo a, chuti reng chu. 

Motor thawm ka hriat takah chuan Gabriel-a taksa chu sik loh hram hram dan ka ngaihtuah. Hetiang bike angah hi chuan kei ang a nulian vak lo tan chuan ţhut nalh a har bik. Kuah nasat ka tum luatah ka mawngin seat a si lo palh ang tih te a hlauhawm. 

In be lo vin kan tlan mawp mawp a, a reh deuh lai kan thlen hnuah ka kuah leh chauh. Ka mawng leh bike hnung seat a insi ran bawk. Mawng kang auh khawp a uarin ka kuah em lo ve. 

"Eng nge i an? Mimawlnu" a rawn tih kher chuan min run ngang mai. 

"Ka mawl lutuk bik lo aw" ka tih chuan "I la in ngaihtuah duh chuan ka tlan kual pui char char ang che" a ti ve ngial. Inhuam viau mah se zirlai a ngaih pawimawh zia hria in "Hmuh tlang ka awl anih pawn i rin ang a derdep ka ni lo maithei a nia, kal tlang rawh" ka ti ta zawk a, puih ngai angin min hmu na a ka hnial hnu chuan min ţanpui ţalh a tum bik lo. 

Bike a tih din dat hnuah chuan chhuk pahin "Josephine-i thi kha mak i ti ve em? An ngaih a ţha zan lo hlawm lutuk a" ka ti chhuak phawng. 

"Ti vak lo" ngaihpawimawh loh hmel fe hian a lo ti daih. 

"Keichu mak ka ti ve deuh. Hmangaihna lamah a buai ve a, zawhna min rawn zawt fo bawk. Bakah keimahni ang rual lek thi chu a mak hrim hrim" hma lam a Nike bag a ah lai hrui vuan chungin ka ti mial mial. A bag hrui ka then veleh hnung lamah a ak daih. 

"Ngaihtuah lo la mak i ti lo a ni mai" a ti a, a vei loh hmel bik hle. 

"In inbe ve ţhin tak tiraw?" amah en ran chungin ka ti hluai a, lo chek tlakin a chal a tuai zeuh. 

"Tlan tlang turin min hrilh a, sawi tur i zawng leh ruai tho si" a ti deuh kher. Ka ngawih ran takah chuan ngun thluk fe a min enin "I ţhat loh chuan sawi rawh. I kal duhna hmun sawi la, ka kalpui ang che" a ti leh nghut nghut tawh a, lu ka thing mat mat thung. Hahthlak min tih hmel zet a a thaw chhuak hawlh chu "Kal ang" tih leh a ban a dawm ka rual a, kan kalna tur a in ang lo tih hrerengin ka hnuk dawr dawr. 

June nen kan haw dun ve thung a, kawng tluan a Josephine chungchang bawk kan sawi hnuah hostel thlen hma deuhah kan ţhu chawl. Lei a hnim ţo chungah ţhu in kan tui lei chu ka phawrh a, khua a lum deuh vang a ka taksa sa tih daih tumin ka in khawlh khawlh. 

"Hetiang a i awm reng ringawt chuan pasal nei ve thei lek lovin i buai reng ang a, nula senior an ti sup sup mai ang che" June chuan a ti hlak hlak a, a sawi tum ka hrechiang khawp mai. 

In ti thawveng luiin "An uar zawk" ka lo ti sam et. "Zam miah lo va mi zawng zawng mate ti a ko vek thei khawp a senior nih an uar" ka tih chuan a phun hlak. Ka hmui huh hlap chu liah zeuh pahin ka melh ralh a, min ngaihnep zual lutuk loh nan lem ka chang mai mai. 

"I rai mai tur asin. Mutpui tawh miah suh, mut dun satliah chu ni se ka hrethiam, in up down ţhin suh u. I rai ka hlauh vang ngawr ngawr a ni bik lo va, a lerh ropui si. Vulmawii a kawp leh tawh kha" June chuan ngaihnep hmel zet hian a ti a, he thil a sawi apiang hian hlauhna ka nei ţhin, thudik a ni miau a. Mi laktlak loh lutuk kawngkaah ka lut fuh a, a inkhar phui nghal vek vangin chhuahna tur ka hre tawh lo. Ka awmna hmunah hian hual tu tam tak ka nei a, chhuahna tur zawn hmuh a harsa rih a ni. Laktlak loh ka ti tak na a Muankima thiam lohna a tlem zawk daih ang.

Ka ipik lutuk a thawl deuh theih nan a ka thaw halh chu "Engtik aţanga inţan nge?" tiin min la zawt tak deuh deuh a. 

"I ninawm aw" nui lui chungin ti mah ila 'sawi rawh' ti ni awm takin a hmel a tak kher mai. 

"Tumah ka la hrilh ngai lo" ti sepin hnuai lam ka bih zui daih. Ka sawi ngai lo tak tak a, kan khaw mi te pawn ţhian satliah angah min ngai. Ka ţhiante ngei ngei ngaihdan pawh a ni. Zam ru tak chung a ka mal ka tuai tawk tawk lai chuan ka kut a rawn vuan a, "Sawi nuam i tih ka ring chiah lo na a ka puih theih tak mial che in han sawi ve hrim hrim teh. Ka thuruk ril ber thleng a hre tu thuruk hi ka sawichhuak ngai lo vang tih ring tawp la, zak leh mahni insit ngawih ngawih a nun hmang ţhin tu bulah hian sawi hreh leh zah nei suh" a ti deuh duah. 

Tlemin ka thlamuang ve ta deuh a, sawi chhuak ila keipawh ka thawl ve hawk ang. June hi a rintlak dawn tih ka hre bawk. 

"June, ka ring takzet che. Tunah hian ka thuruk tawp khawk ka hrilh dawn che a, khawiahmah a chhuah tawh loh ka beisei" thutak leh fiah zet a ka tih fak fak chuan mak a ti deuh niin a lang. 

Boruak uap lutuk chuan min hmet chau a, sa in ka taksa pum a ţham chhuak vek a ni ber. Tui ka in deuh reng a, ka dai thei der lo. Nipui lai hi hrehawm ka tih hunlai ber a nia, zan mut thlengin ka harsat ţhin. Ka ke te a sa a, puan huh a ke tuam tlaivar chang te ka nei ţhin. 

"Eng nge i sawi dawn hre lo mah ila i ţawngkam hman ang chiah i hre leh anih chuan i damchhungin min hlat dawn nia" a tih chuan ka ţhut dan ka siam rem a, ka kut phahin ka hmai sa hut hut chu ka zap leh zeuh ţhin. 

"Lum i van ti leh tawh em em. Keichu tlemin a zia deuh tawh asin. Peng ah khan vur an zuar ţeuh sia, kan tlan chhoh hma khan kan lo lei hram lo a ni" June chuan a ti leh rih ţhin. 

Kan ţhutna hnim leh lei te, motor kal theihna tur a kalkawng an siam te hi nilengin ni in a em a, kan ţhu hniam ropui si, lei sa in min rawn ur ve thung a ni ber a, a lum lo thei lo. 

"A ho lutuk" ka tih lai mekin bike ri kan hria a, kan inmelh ralh. 'Kal phawt rawh se' ti a kan ngawih rih lai chuan bike chu kan piahah a rawn ding a, a tih thih chuan loh vangin a la ri dut dut reng. 

Rin loh lutuk a Muankima ka hmu chu ka mitmeng a buai nasa viau ang ka ring. Vulmawii a rawn phur lehpek a, char belhbawm ang hmak an ni tawh. 

"Room ah awm dai ta che" a rawn ti hmuk a, hmui hnuai ka ti pawrh zeuh. 

"A lum nuam ham ham lutuk. Rawn ţhu ve zawk ula, ni lum ai ang u" ka ti vel a, khawlum ka tawrh theih loh zia hrechiang ber tu hmel tak ngul leh thim mup chu nui lui sang chungin ka en lui tlat. 

Bike a polythene lian vak lo inkhai chu pawt phawi vutin a rawn theh thla a, "Awm rei suh aw" ti supin a tlan nghal daih bawk. Ka mal chung tak a rawn tla anih vangin ka taksa a vawt raih raih a, hostel pan chhohna peng a an vur zawrh kha a lei tih ka hre mai. 

"Khawi ka duh ve...eitlak loh khawp a a tui hmain ei vat vat ang" lo ti thuaiin June chuan a hai rak rak a, "In khua a lum ropui sia, khawlum mai mai te chu ngai a nei tawh awm tak i nia" tiin a nui zui rah rah. 

"Kan khua a ka awm pawh a ka pawn chhuah tam loh chhan alawm. Inah ac hnuaiah ka tawm nileng ţhak zel" ka ti ve mai a, zawhna ngai bawk min lo zawt leh thung. 

"Sawi nuam a ni chiah lo, englo a nia" ka ti a, ka ngawi leh rih. 

"Sawi rawh...sawi rawh, eng thil chiah nge ni?" hriat chak hmel fe a a lo tih leh chuan "Kum11 mi ka nih laiin ka pa fa bikin min pawngsual a" zawi te hian ka ti a, "Engmaw?" a lo ti tuarh. A vur ken lai a thlauh lo chauh a ni. 

Keipawn ka hrehawm tawrh ţhinna vawi leh khatah a rawn let leh vek niin ka hria a, ka thinrimna zawng zawng nen. Boruak a reh ta tlawk tlawk a, ka ţhiannu ngei pawn sawi tur reng a hre lo. 

"Ih maw June, ţhanthi pawh ka la nei lo. Vawi hnih lai min sual lui a, min vau beh tlat vangin ka sawi mai ngam lo. A haw hnuah ka pa ka hrilh a, min ring lo a" ka ti sep sep. Ka aw ka control thei miah lo, ka aw ri chhuak khur der der chu kei ngei pawn ka hre thei. 

"Chu chu hre turin ka inbeisei miah lo. Thil dang daih anih ka ring a, Lucky, i va khawngaihthlak ve" min ti thlawt.

"Ka nu chuan min ring, FIR theh luh a tum hial. Ka u kha man tir daih a duh a, a haw lutuk. Mahse ka pa bawkin a dang char char a, ka pa hi rilru dawih chi a nia, a nupui fanaute chungah erawh a thuneihna lantirin a in luling viau ţhin. Keimah vangin ka nu kha kut a thlak ngun asin aw. A vau a, a chang leh a thlem a, a fapa kha a hum tlat. A fapa a mualpho rual a min tih mualpho ve zel a tum takah chuan ka nu khan a bawhzui ngam ta lo va, a chhan pawh ka pa zia a hriatchian vang a ni. Kha mihring kha danin hrem lo mah se ka nu khan a thiam dan dan a min fuihin ka vanduaina in rah beh tir lo turin min hrilh ţhin a, ka nu vang liau liauin buaina nasa lutuk tawh lo in ka awm chho" ka tih lai te chuan min lo en tlawk tlawk. A mitmeng fiah tak a min lainatna langchhuak chu ka hmuh hmaih lo. 

"Ka upa ve zel a, ka taksa a dang lam chho ţan. Mipa ka mamawh ţhin..ka chak lo lutuk" ka tih chuan keimah zawk ka ip chawih. Hrehawm ka tih lutuk vang a ka tha khur ru der der chu a hriat hlauin kut ka hum ruh vak a, ka kut pakhat zawk a ka vur ken lah a tui ral lek lek tawh. 

"A tirah phei chuan ka hrethiam lo. Kum upatna in a ken tel ni ah ka ngai a, tu emaw thurawn mamawh viau mah ila tu hnenah mah ka sawichhuak ngam lo. Ka nu takngial pawh ka hrilh ngam lo" ka ti a, ka mittui rawn hnam ţiam ţiam chu ka duh lo kher mai. Kha mihring tenawm lutuk thil tih avang khan ka ţap duh tawh lo asin le. 

"Ka thu chhiar aţangin zawi zawiin ka hre chho a, pawngsual ka lo nih tawh vang tih ka hriat phei kha chuan awm ngaihna reng ka hre lo. Tawrh harsa khawp a ka danglam phei chuan thlasik khawvawh lai pawn a zia deuh beiseiin tuivawt ka inphuh tir char char ţhin a, ka khua a sik phah fo. Mahni leh mahni ka inkhawih ngam lo va, ka inten ngawih ngawih. Aaa...June, ka sawi duh tawh rih lo" ka ti ţiau. Ka taksa peng pakhat ang hial a ka ngaih Muankima leh ka chhungte chu hre tur chiang sa an nia. Tun hi vawikhat ka sawi chhuah lehna chauh a ni. Ka nu ţhianţhaber Muankima nu takngial pawn engmah a hre lo. 

"A pawi lo...nidangah kan sawi leh dawn nia" ti dam raihin ka kut a rawn vuan a, a mit a min lainatna langchhuak chu a nasa lutuk a, thla a ti muang siai siai thei hial. 

In be lovin kan let chho a, ka ţap dawn takngial ni a inhria in ka tawp san rih. Kha mihring vang khan ka ţap tawh lo ang tiin ka intiam a, Muankima ka hrilh hlim mawlh kha...a rilru na leh thinrim hmel kha tun thlengin ka la theihnghilh lo. Ka pa ka haw lutuk leh nun ka uluk lo chho kha a chhan min zawt sek a, kum tam tak ka zep tlat hnuah ka hrilh. Kum17 lek a la ni chungin a pa silai ru chhuakin mi pangai lo a min siam tu kha zawn a tum. Ţap chung a ka dan char char hnuah ka ţhulh tir thei hram a, tawp san hlen a tum loh thu a sawi thung. Ka chung a thil rapthlak lutuk thleng tawh vang khan min ngaihtuah lehzual ka ti lo thei lo. Kan tih miah loh tur kan tih dun fo nachhan leh a bul ţanna erawh ka inpeih hunah ka sawichhuak chauh ang. 

Hostel pawh nidang angin a bengchheng lo. Mipa ho an inkhel tak na a an tha a tho loh hmel hlawm kher mai. Josephine vang anih ka ring. 

"Cafe ah kal tlang ang. Nu Hlimin ice cream a kawl ve tawh ka ring. Ka leisak ang che" tiin June chuan nui sangin mit a siai zeuh a, ka lo nui ve mai. Kan room a lut tlang lovin cafe kan pan a, kan thlen rualin cafe kawtah R6 bike dum a rawn ding ve chiah. 

"Hmelţha kuhtei chu" ngeiawm fahran a tih pahin helmet a phelh a, helmet a khum vang a awmze nei lo zet a a sam thur siang chu ngaipawimawh lo fe hian a mit chu keimahah a fu leh vung tawh. 

"I ninawm aw Mateo, ka ha a kuh lo ka tih mawlh mawlh kha" ti vin hlar mah ila "In lut dawn em?" a ti leh daih.

 "Khawiah maw?" ka tih chuan hmui ti sawi hmukin cafe lamah a thle buk a, "Lut dawn..min zui miah suh" ka ti vat. Ka chhanna avang chuan a nuih a za viau. 

"Eng nge i ei dawn?" ti a min zawt lehin min ngaichang tih hriat deuhin min melh a, a kut pakhat a helmet kuah bet chung a bike a a ţhu chu enin ka thaw hak. 

"Ice cream" ka tih veleh "Nu Hlim, Hmelţha kuhte-in ice cream a duh anih chu" a ti lung lung. 

"Ka hne aw Zoremsang" uar zet a ka tih chuan "Ei tun tun rawh se" ngeiawm deuh hian a rawn ti nek. June a lo nui hak hak a, rilru kal ding lutuk tur pawt chat tur a a lo lang chu a ţha letling phian. 

Luh tum a ke kan pen rualin bike aţangin a chhuk ve vut a, "Nghak mai teh ang" June-in a tih takah chuan kan han ding leh rih. Nghah rei a ngai lo khawp mai. 

Min chhaih thinrim tum reng reng a hmanhlel a ni bawk a, kan hnung a a kal chu kan hriat phak tur tawk lek a "Nilengin ka ngai che, zankhuain ka vei che" tih lai bik a sak hnuah "Nu Hlim, engtin nge ni dawn?" ring leng lawng hian a ti leh a, Nu Hlimin "Eng chu maw?" a rawn tih phei chuan June a nui bâk bâk tawh. 

"Ice cream i kawl a mi?" pangai deuhin a ti ve ta mial. 

"Hralh theih ber tur a nia, ka kawl lo phal nang..lo en ru" zangkhai vah a tih lahin deep freezer a kawk a, Mateo pawn a hawng nghal vat. June nen a kan duhzawng kan kawh hnuah "Rawn keng phei rawh" kan tia, kal mai ka tum chu "Kha hei tal hi" lo tiin helmet min ken tir. A rit nulh a, hetiang te engtin nge maw a khum peih zawk ni. 

June nen a kan ţhut fel hnuah pawh deep freezer chhung chu a la bih ngur.

"Kan duh kan sawi chiang viau sia" ka ti nang nang a, June thung chuan "Lak belh a tum a niang" a ti mai. 

"Mateo hi duh daih mai la" a ti leh tawh a, awm lo ti zet a melh pahin "I ninawm ve sek...kei aiin a naupang lehnghal. A nu leh pa ten min haw viau ang" ka ti hlar. 

"An hausa sin..engpawh tawk la a pui zel thei ang che" thutak deuh a tih pahin chhak lam a hawi a, cafe bang chanve chunglam hi darthlalang a nia, pawn a Mateo bike dah chu a hmuh chian theih hle. Mi hausa pawn hausak belh zel an duh tih ang deuhin mi hausa fa ţhah awm khawm ho pawh hian an ni aia hausa an hre theiin an awh hmel thei khawp mai. 

"Bike te saw, zirlai mai mai khalh atan chuan a u viau a nia" a ti leh a, ka pawm thlap. Hostel a awm ho hian scooty leh bike kan kawl thluah a, kawl lo pawh an awm. Chung zingah chuan Mateo bike hi a to ber ang ka ring. Nalh chu a nalh a, ka nauin ngen ta se lei ka phal teuh lo. Mi hausa an nia, an lei phak a an lei anih chuan ka sawisel hran lo bawk. 

"Ka pu min lei a tia, a pu, apa pa zawk hian a atchilh ve hle anih hmel Nu Hlimi sawi hmangin" lo ti lehin min rawn en a, "Nang chu ni ila ka duh hrim hrim. Kum mai mai chu a ho e, i pasal a la ni ngei dawn tihna pawh ni hlei lo" a tih chuan "A fel bakah a rilru a la thianghlim a, kei aia ţha zawk a phu. Amah ang a thianghlim ve tho" ka ti daih. Ice cream keng a Mateo a rawn tel ve tak vangin engmah a sawi zui ta lo. 

"Ka lo han chho teh ang..thil vawt ka ei nasa lutuk a ka ha a na vek tawhin ka hria. Tikhan lo ei rawh u" June chuan a ti lehzel a, mitmeiin khap sa teh mah ila min chhuahsan lui tho. 

"Mateo, peng bul a chawhmeh ka zuk en lawk dawn a nia. I patea (an pa a sawina) a muang bawk si. Vawiin chu heta chaw ei leh ka tum a, a tlai chhiat hmain ka kal zuai dawn. I awm remchan lai a ni bawk a min lo nghah sak rawh aw. Tumah an rawnkal tawh lo ang. Eichak tawk ka nei teh tlat a, ka zawng hmu dawn hrim hrim" Nu Hlimin a tih phei chuan thawh ve nghal mai ka duh a, ka la ei zo chiah bawk si lo. Ka rilru a hah ru et et a ni ber. A chhuak tur lah chuan "Tikhan lo awm ru, warden te hriat lohin hun remchang in nei tihna a ni mai. Tumah ka chhuak tih ka hriattir lo ang" nui har har chungin a la ti zui. 

Mateo lah chuan "I rawn let hunah rawn khuh lui rawh aw" a lo fiamthu ve nghal zat a, ka nui thei der lo. 

Ka bul a rawn insawn pah a "I nguai riau" ti thum bul tu chu ka lo nuih sak. 

"Teuh lo mai...khawlumin min hmet chau anih hi" ka tih chuan "Deep freezer ah sawn va ţhu lut zuai rawh" a ti hem mai. 

"Zoremsang..sawi loh loh tur sawi ziah suh" ka ti vin vak ringawt a, ka thinrim mai mai te chu a ngaimawh lo nasa. 

"Cabin ah i kal ngai em?" awmze nei fe a a tih chuan "Kal ngai lo..kal pawh ni ila ka mimal nun alawm. Ka chho dawn" ka tih rual a din ka tum chu na zetin ka dar a ţham sawk. 

"Min hmer na alawm" Mateo melh rawm rawm chung a ka tih chuan "Ka phal hma chu i kal lo ang" ti hlukin ka ţhutna nghenchhan ngheng chât khawpin min nawr bet a, kei aiin a naupang na a ani ang palian ve tak mai chu tha ah ka hneh lo nasa. 

"Ka duh che..Lucky" a ti chhuak bawl mai. A thusawi chu hrechiang viau mah ila ka hamhaih lutuk chuan "Maw?" ka ti he haw a, a thaw hawk a, dam deuh zawkin "Ka duh che" a ti nawn leh. 

"Engkim ka duh vek" ti zawi ruihin ka biang a rawn dawm a, min rawn awm hnaih tawh em vangin kan in en hnai hle bawk. 

"Hei te hi ka duh" ti sup a a kut zungpui a ka hmui a nul lai te chuan thil thleng chu hrethiam lo lutukin ka ang deuh pham mai. 

"I lo hrethiam ve tawh tiraw?" ti a ka hmui zawn a phun leh sup chuan lu ka thing a, lu ka thin rualin kan hmui a insi thuak. 

"Kalsawn rawh..midangin min rawn hmu ang" ka ti chhuak thei hram a, "Ka fawp phawt dawn che" a tih rual a "Mateo" ka tih chuan nuihzat hmel zet hian a inla hrang hlek a, min hlat dawrh duh chuang lo. 

"Min duh suh, nang aiin ka upa zawk a, thil dang pawh a tam. Min duh loh nan bialnu nei vat rawh" mumal lo deuhin ka ti nawk nawk. A chetdanin min ţhawn lutuk vang a ka lungphu rang zet mai chu a hriat loh nan rem lo deuhin awm ka dawm a, Mateo berkher chuan min hnaih lo se ka duh a ni. 

"Ka hmangaihna che hi a luhlul a, nang lo chu a duh lo ve tlat" uang zet a a tih chuan ka nui chhuak thut. 

"I ninawm aw" ti hlakin a ban bulah ka chum a, min nuih ve suk takah chuan ka thaw huai thei. Min nawr lui tlat dawn maw ka tih laiin "Ice cream kha a tui dawn" a ti ta zawk a. 

Ka ei lai te pawh chuan ka ţhutna nghenchhan ah ban a rawn kham a, min khuap run ka ti mai. Kan pahnih chiah a kan awm meuh chuan kei aiin naupang mah se mipa zawk na na na chuan min ti zam hneh khawp mai. 

"I hmui sir a kha i ti kai a nia ka u" a rawn ti deuh kher pek a, hmui hnuai pet zeuh a amah ka thlek ha lai chuan rawn hnai vutin ice cream kaina lai ni awm tak chu a rawn fawp anih chu. Khawvel hi a reh nghal ruih a, thil che vel leh engkim a chawl ţhuap ni maiin ka hria. 

"Fai tawh e" ti hluaiin intihtheih hmel zet hian a kiai suk a, ngai ka awh leh veleh "I â em ni?" tih leh chum leh tum a tin ka rual a, kum hum ran a ka tin chuan hnung lamah a awn deuh a, a la nui reng. 

"Chum rual a ţap bui bui rual lek ka la nih hi ka u" uang deuh, ngeiawm tho si a ti lehin ka ban rekah a rawn man a, "Hmelţha kuhte" a tih leh lek phei chuan ka che phat. Ka kut laksawn tum a ka tal chu "Ka sawi sual...hmelţha fuhte ka tihna" thawveng zet hian a la ti tho a, tihngaihna dang awm hek lo, ka nui tawp. 

Zanah Boomer nen kan inbia a, "Hriatpuii a tlangnel sawt. Adika leh Puipuii vang chauhin ka la insum hram hram" a rawn tih chuan "I van fel em em. Lo insum tlat la, zirtawp tlai a rawn haw ka tum ang" ka lo ti thuai. 

"A ngai lo, kan inchhung a ipik a, rawn haw duh suh. I ţhiante bulah khan i hlim rih zawk ang" a rawn ti ve mauh mai. 

"Ka ngaihtuah reng tho cheu a, buaina i siam chuan a hlau ber tur chu i naute kha an nia, chutiang te chu a thlen hlauin ka mangang chiam zel" ka tih lai chuan a nui hawk thawm ka hria. 

"Rilru nuam deuhin awm rawh. Inkhelh ka bansan rih a, hna i neih hunah ka inkhel leh tak tak ang. Tunah chuan nau ka lo awm rih ang" a rawn ti fiamthu ve ngei. 

"Nia..i naute kha lo duat viau rawh. Duh leh inkhelh naah hruai la, i inkhelh chhung chu field sirah an lo ţhu ve mai dawn lawm. Chawlh reng chuan ţhiante phak loh te a hlauhawm a" ka tih veleh "Tiang chuan a ţha leh si ang" tha tho zet hian a rawn ti a, inkhelh bansan tawp a hreh lutuk chu ka nuih a za kher mai.

"Mahse Vanneih, inkhelh na a naute hruai bik chu a nuam awm lo e" a rawn ti leh ta tho a, "Nuam lo ti duh suh. Nu Hriatpuii kutah i dah ngam chuang si lo a, an len ve tawh kha. Inkhelh chhung reilote chu i tello in an awm thei dawn lutuk" tiin ka sawi mawi pui a, "Bialnu i nei em?" ka ti zui zat bawk. 

"Teh daih che chuan" rawn tiin a nui huk huk a, Puipuii leh Adika chuan thil awmdan dik tak an la hrethiam ve tak tak lo a, an hlim ka duh rualin Boomer-a nui ve hawk hawk chuan min ti lawm takzet. 

"I lo nei ve reng tawh lo maw?" ka tih tak sekah chuan "Nei e" a rawn ti ve mial. Phur deuh a "Khawi veng? Diakkawn nge venglai lam zawk. Hmar veng daihah te a ni lo maw?" ti a a len ţhanna deuh ka sawichhuah chuan "Ţumpui leh New Diakkawn" a ti hem mai. 

"Awi leh..pahnih lai i nei tihna maw?" ka ti hluai a, "Umm..ka inkhelh tamna hmun pahnihah" ngaihsam hmel fahran hian a la ti zui. 

"Tu te nge ni a? Ka hriat zawng an ni em?" ka tih chuan "Hria e" a ti leh mai a, "Tu nge?" ka tih rual a "Football" a ti chu "Naaa" ka ti nang nang. 

"Nih leh kal hla lutuk ţhin suh aw" ka ti ta ringawt.

"Ok..ţumpui ah ka kal ngun. New Diakkawn chu ka kal vak tawh ngai lo" a rawn ti a, eng eng emaw sawiin rei deuh kan inbia. 

Kan inbiak zawh rualin "June" tiin ka inlet thawk a, a khum a lo ruak hiang. Jessie erawh a mutui leh tawh khawp mai.

Bathroom ah a awm aniang tiin puan ka sin ţha a, mutthilh tum a ka chhin rualin tlai a Mateo awmdan kha a rawn inlar zawk ka ti mai, ka meng leh kawk. 

"Ninawm" ka ti sap a, amah leh amah a intih hrehawmna tur mai mai. A chetdan khan min ti zam chhia in ka taksa ţang ţeuhin a siam a, ka lungphu ran zia lah ka hai lo mah se ka rilru a ti danglam miah lo. Ka thinlung a hmun luah tu hi pakhat chauh a awm a, amah chauh a ni reng bawk ang. A ţangtam lo a, ka rilru damna tham khawp sawi tur a hre ngai lo. Ka lungawi loh chang lahin min thlem thiam lo thei si. Mahse, min ngaihsak takzet ţhin thung. A ngawi ngul reng ţhin na a min ngaihsak zia a lantir ve ţhin tho. 

June reh rei ta lutuk chu ka ngaih a ţha thei hlawl lo. Room aţangin thawm dim deuhin ka chhuak a, pawn boruak a nuam kher mai. Inchung zawlah a chho anih ringin inchung chhohna kailawn lam panin ka kal a, Josephine-i room kal tlang ngei ngei a ngaih vangin nuam ka ti chiah lo thung. 

Chhuah hma a ka call lahin a khumah phone a dah daih bawk sia, ka hriat miah lohin harsatna a lo tawk ve anih ka ring hmiah. Josephine-i pindan zawn ka thlen chuan thawm ka hria a, pawh din chawt ang maiin ka ke pen a tawp chiang hle. 

Hlauhna ka neih ve deuh vangin chil ka lem ri khalh a, muangchang a inherin kawngkhar inkhar phui lo chu ka melh. Room tin a thim tawh na a pawn a êng in chhi in a ên pha vek. 

"Pindan hi kalh awm tak a ni sia, ngati nge a inhawn tlat le?" ka ti a, ka ţawng chhuak nge ka rilru in ka sawi tih pawh ka hre lo. 

Phun ser ser ri ka hriat hnu phei chuan hlau chung chungin beng ka dawh hnai. A thih danah an ngaih a ţha lo vek a, hriatchian ka chak tlat a ni. 

"Ka ei mai dawn?" ti thum chhak ri ka hriat rual a June ngei maiin "Ei vat rawh..hnuhma hnutchhiah lo ang aw. Tuman an hrechhuak tur a ni lo" a tih chuan ka ip chawi. 

"An awm mai mai ka hmu thei lo. Chilh hlum vek ang" aw thum deuhin a tih leh chuan June a lo nui hak. Pindan chhung aţangin êng a lo chhuak lo hrim hrim a, mipa zawk pawh chu ka hrechiang lutuk. 

"Pakhat te te in ti hlum zawk rawh. A thau thau thlang hmasa la" June-in a tih leh rual chuan kawngkhar ka pawt hawng rawp. 

"Eng thil nge in tih?" ti zui zatin phone ka phawrh a, flashlight in Mateo leh June te chu an hmai ah tak ka ên ve ve. Meizial rim a nam chum chum laiin "Engmaw in talh? Eng nge in tih hlum? Mihring nge eng thil nge?" ka ti buan buan. Zing lam a thil thlengin a zir lo bawk a, hlauhna in min ti â vek a ni ber. 

"Hei hi" ti mawl tawpin Mateo chuan a thil ken lai a rawn dah kang a, ka lo ên vat. 

Burma siam, pathaua kan tih mai ţhin, cheese ball ang a mum, hâng deuh ang kha paper ah an lo bun ruih. Mut reh hun changin an chhuak ru a, meizuk ruk pahin thil an lo ei chu niin. 

CONT....(Naktuk zanah ka zawm thei maithei a, thei lo maithei bawk. Whatsapp group lamah kan inhrilh dawn nia. Net a chhiat ţhin em vangin comment ka chhang let hleithei lo ţhin a, zanin aţang chuan ka chhang par par thei tawh ang che u🤍)