THE GOOD, THE BAD AND THE OTHERS-5

THE GOOD, THE BAD AND THE OTHERS-5

"In va han nasa dun tak aw..." ring leng lawng a ka tih laiin kawngkhar a ri rawk a, hmeichhia ni ngei tur sam thur chhup a rawn lan chuan kan au vak. Reilote chhung lekin kan inkuah khawm vek hman. Ka phone phei chu ka thlauh daih. 

Kan mi hmuh lah chu ngawi rengin a rawn pen lut a, kawngkhar a inhawng huai na a khawlai engin a chhun pha lo nasa si, ka phone ka thlauh hnu phei chuan a thim lehzual. 

Tumah kan au tawh lo a, hlau thaw dep depin nghet tawkin kan inkuah. Zingah ruang a chhuak a, ngaihţhat lohna kan neih sa na hian min ti hlau lehzual. 

Vawi leh khatah pindan chhung a êng pup a, kan hmazawnah warden a ding. Min melh rum nasat zia chu pui tak a ni. 

"Mut dawnah ka kalh thlap. Engtin nge in luh theih?" a ti ram hmak a, min la kuah bet ran chungin June chuan "Kan uang mai mai Miss, youtube vel a kan hmuh ţhin ang khan kan ti ve chhin a, a inhawng tak tak a" a ti zat zat. 

"Hostel danah zan chhuah ruk phal a ni tih a inziak tel em?" ti a min zawh pah a kut a kuang kuah chuan "Aih" kan ti rual ţhap. 

"Ngati nge in chhuah ruk si?" ti a a au vak chuan Mateo awmah ka tawm chawi. A hmelţha vak lo a, a sam a pawr nasa bawk nen, a thinrim phei chuan a hlauhawm lutuk. 

"Miss, thawm an hria a, kan va enfiah. Hmeichhia an nia, ka kalpui anih hi" Mateo chuan a lo ti veleh a, June thusawi nen a inkalh daih. 

"Daw zep zuap suh..thlahrang i hlauh zia te chu tupawn kan hria" a tih hnuah Miss chuan hnar a len vut vut. 

"Mei in zu ru mi?" a ti ţeng leh chhuai. Tereuhte, hakuh ve deuh a ni na a a lu a zo a, a nasa ve thawkhat bawk. Mipa ho hian an fiam reng na a a thinrim chu an hlau ve tho. 

"Mei kan zu ngam lo..a sa dawn e" Mateo-an atih chuan Miss a meng rang nasa kher mai. Miss Ferfect kan ti mai zel a, a hming pangai hre lo an tam. A perfect lutuk vang nge a perfect chiah loh vang a ferfect ni ta tih chu tu hriat va ni suh. Mipa ho phuah a nia, a phuah tu te ho hostel aţangin an chhuak vek tawh. 

"Mei pangai in zu ka ti lo. Meizial ka tihna a ni tih in hre vek. In chak dawn lo khawp" ti hlak hlak chungin phone a phawrh. A hmeh mawlh mawlh hnuah "Josephine-i roomah rawn chho vat rawh" a ti vin hlar a, rum tawkin min melh pah bawk. 

"Private hostel a nia, hostel dang angin dan khirh em em kan nei hran lo. Mahse, mipa leh hmeichhia inhnaih leh lutuk te, chhuah ruk dawk dawk te phal a ni bik lo a, ka hrem dawn che u" a ti mauh mai sia, a mi koh chu tu nge a nih hre lovin kan lo nghak mawl tawp. Ka lo in tat lut ve kher kher chu a inchhir viau tawh. 

"Miss..ka zun a chhuak" June-in a tih lahin "Tikhan zung rawh" a la ti hmak a, min en liam dawn lo tawp mai. 

Hah thaw hluam hluamin mipa lam warden a rawn lut a, kan lo la inkuah ţhap bawk nen, ngaihţha lo deuhin "Thil danglam thleng a awm em ni? In va hlauh hmel ve" a rawn ti sur sur. 

"Veng ţha ta che. An zalen lutuk chuan an thiamna aiin an pum a puar lian mai tur a sin" Miss in a lo ti vak vak a, Sir a hawihai ngei mai. 

"Ngah nge maw mi vin vak vak le? Eng chiah nge thleng a? I aw lah hi i taksa aiin a lian zawk a" Sir in a tih nuah nuah chuan "Ngati nge he zawhte hi i rawn chhuah tir?" tih hlar pahin kan lam a rawn kawk va. Mateo a sawina a ni tih kan hre vek thung. 

"Ka chhuah tir aw zawng lo...ka mutthilh hlanin a chhuak ru anih dawn hi" Sir in a tih chuan a sawi zawh hma hmain Miss in "Lukham i sik rualin i muhil zel a, an chhuak ru reng thei ang. Hlep hlup che hian" a lo ti hrep. 

"Ka lo fimkhur tawh dawn nia. Zoremsang min rawn zui rawh" ti a Sir thusawi a hriat chuan min kuahna a thlah riai riai. 

"Hrem ngei ngei ang che..a sim vang vangna turin hrem ang che" Miss in a tih tan tan laiin Sir thung chuan a hmai a tuai puat. "I ţawngper nasa mai sia" a ti ban charh. An inchen tawk em a, Miss chil per chu Sir hmaiah a bet ţha duh khawp ang. 

"Ka lem seng bik lo anih hi..kalpui teh" Miss in a ti duh lek chauh. An chhuah pahin Sir lah chuan "Hmel en chuan zawng squad building a awm tur ni awm tak reng a ni" a ti bul bul a, Miss inpet ruh vel chu a hmuhnawm tham. An in ngam tlak a, an infiam na thei viau. 

"Miss Ferfect, engtin nge min hrem dawn? Ka mut a chhuak tawh nia aw" June chuan a ti bai bai. Chuveleh miss chu khum awlah a mu thar a, mu reng chungin muangchangin bawp a khawkherh. 

"A inchhawkin thlahrang in sawi tlaivar ang. Ti hian ka mu ang a, sawi char char rawh u" a ti hem mai. 

"Thlahrang thisuk nei ka sawi mai ang. Hrang dang hriat ka nei lo" June chuan a ti leh bai bai a, a nin hmel takzet tawh. 

"Lucky ve kha" Miss chuan ngeiawm zetin a rawn ti vel a, sawi tur ka hre der lo. 

Chu chu ka ţhiannu in man thiamin "Ka sawi kep mai ang. Thlahrang nuih duh pawh ka hre leh si. Mi an tih ţhaih chang a nui vak vak ţhin ho hi an nia. I phal em miss?" a ti zung zung. 

"Thlahrang hringei te ka hria a" a tih leh chuan miss a tho thut. 

"Ka enthla reng tawh dawn che u a nia, zan chhuah ruk in ching tur a ni lo. Tun hi a tawpna ni se la, in tih leh chuan ka hek cheu nga, hnawhchhuah hial in tawk maithei" a ti fak fak a, "Chhuak rawh u" a tih lehzel phei chuan hrilhhaithlak duh tak a ni. 

"Min hrem dawn maw ka tia" ka lo ti pek a, "Chhuak ringawt rawh u" a ti a, a ţeu hlar mai. June nen inkaiin hmanhmawh tawkin kan chhuak. 

Room kan luh chuan kan nui chhuak hak hak. Miss leh Sir awmdan vel te kha sawiin kan sawisak belh a, kan hlimpui phian. 

Thil danglam em em thleng lo in kar kan hmang ral leh lek lek tawh a, ka naute ka ngaihtuah lutuk chu zirtawpni anih chuan kolasib a haw tumin ka insiam. Tlai lam a ni tawh na a thim hma a thlen hman ka inring tho a, thawmhnaw hawn a ngaih loh vangin makeup tlem ka ak a, ka inpeih a ni mai. 

"Muankima i hrilh em?" June chu khumah saisirin a mu a, ka insiam lai min lo en ran. 

"Hrilh e..bialnu a nei tawh sia, a rawn haw ve peih lo ang" tiin ka nui lui. 

"Min hawpui rawh ti la chu a duh tho ang. Lucky, Muankima hian a duh che i ring em?" a rawn ti leh khauh. 

"Thu mak sak pui pui chhak chhuak ziah suh. Ka harsatna chu i hriat kha, Muankima pawh hi ka ţhian a ni na a min ngainep ru viau maithei" nui chungin ka ti na a hrehawm tih rukna awm reng hi paih bo a har khawp mai. 

Khum aţanga tho ţial ţialin ka ţhiannu chuan "Ngaihnep nachhan tur che a nei lo. I duh vang a thleng a ni hleinem. Ngainep che sela a pa silai ru chhuak meuh a umzui a tum lo vang. Ţhian ang chiahin a en che tih i chiang maw?" a rawn ti leh. 

"Chiang e..ţhian pel a ka en a hlau thei em alawm. Bialnu nghet ka nei peih lo te a ti mai zel a, hmeichhia hi engah vak a ngai lo in ka hria" ka tih chuan a sam a hui thuak a, "Hman a a rilru ang kha pu tawh lo ta se?" a ti hram. 

"Ka hre lo le" ti hapin dar ka kan ak a, pawngsual tawk tawh tan chuan insit a na a, ţhian ang chuan min la pawm thei a ni maithei, kawp ngheh tur chuan min duh ka ring chiah lo. Ka ngaihtuahna hria ni awm takin June chuan "Insit miah suh aw" a rawn ti a, "Khapa kha zak ngawih ngawih tur a ni. A unaunu ngei a khawih chhia a, nang chu zak duh miah suh. I hmuh leh anih pawn hawi vah la, a thil tihin a tih hnual loh zia che lan tir rawh" a ti zawm malh malh. 

Ka ngawih reng takah chuan lu thing nawkin "Ka tihpalh..ka rilru a luah hneh em a, ka sawichhuak palh a nih kha" tiin thupha a chawi thuai. 

"A ho lutuk..ka ţhian i nia, i tih tur alawm. I duhzawng danglam thei se chu kan mo ni daih la ţha tur" fiamthu a ka tih takah chuan a nui ve uar uar. 

"Ka neih rual unaupa i nei hleinem. Tak takin Lucky, chik rawh aw. Mi kan duh tak tak anih chuan nunhlui mai maiin min ti buai ngai lo. I duh zia ka hria a, Mateo hi chhaih fiam ziah che mah ila i duh tak hi nei thei la ka ti. Ţhian aia thuk zawkin i en a; i duh ru a ni tih lantir zeuh zeuh la, mipa na na na chuan chet a la vat mai ang" a ti a, ka awih lo lutuk chu ka lo ner nâng. 

Scooty la chhuak tur a ka kal chuan Muankima ka hmu hlawl. 

"Ehe.." ka ti hluai ringawt a, a inthuam dan en chuan hostel a awm mai mai tur a ang lo. Helmet a la kuah bet zui. 

A bike bul a a ding chu "Khaw nge i kal dawn?" tiin ka be hmasa leh ta nge nge. 

"Ka zui dawn che" a lo ti sup. A chet duh dan chu mak ka ti viau na a thil pangai lo ti ang pawn a awm ve lo. 

"I sawi lawk si lo a, bakah weekend chu Mateo te resort ah in hmang dawn ni lawm ni?" ka la ti hliai. Weekend hi kan hmang chhuak zeuh zeuh a, kal ve turah ka dah hmak. A bialnu Vulmawii a tel ve dawn miau a ni. 

"Hmang hlawm teh se" a ti leh tawp a, "Vulmawii a kal ve dawn sia" ka tih erawh chuan chhanna ka dawng lo. Min nuih liam vel mai mai. 

"Aw..thlen hunah kan inhmu dawn nia" ka ti a, ka kekawr ipte a ka scooty chahbi ah ka phawrh lai chuan min rawn dinchilhin ka phawrh chhuah rual rualin min chhuh hmak. 

"Ka rualin haw rawh" inher a kal nghal mai a tum chu "Ka inkhalh haw ve thei alawm" ka lo ti a, a rawn hawi let rang teh asin. 

"A ţul lo..ţap ka thlem peih lo" ngeiawm fahran a a tih lai a ka lo ner chu a hmu hman ni tur a ni a khi suk a, ka chahbi a ak daih. Ţum khat zanah kan inzui haw a, ka ti tau khanglang. 'Min kalsan rawh' ka ti kha ani lahin min kalsan mai sia, ka thinrim em vangin a tir chuan pawi ka ti lo. Eng eng emaw ka ngaihtuah kual hnuah hlauhna ka nei thut a, engkimin min ti hlau a ni ber. Muankima ka hmu phak tawh lo, a reh bawk si kha kawngsirah ka ding a, ţap chungin ka phone. Min ngaihtuah deuh vangin a tlan chak lo hlauh a, min lo nghah tur thu a sawi hnu ah tlanchhuak lehin reilote ah kan inhmu a, ngaihdam min dil em lo na a a min thlem nasa. 

"Kha thil kha sawi chhuak ve ziah suh" ti vin ve hlar mah ila ka zui tho. Chahbi chhuh let ka tum buai lo, ka theih dawn loh zia ka hria. 

"Muankim thlahrang ka phur..awi ka khuasik ser ser mai zun ka cheh dawn" tiin ka tihdan a zir a, ka aw rik chhuah dan zawng zawng nen a zir thiam lutuk chu ka nuih a za letling. 

"I sawi peih emai, keimahin haw mah ila tunah chuan hlauh ka nei tawh bawk lo aw" ka ti tan tan. 

"Haw lo e..huh phungin i rawn thleng palh ang" ti a min fiam leh zuk zuk chuan ka nui tawp. 

Bike a tih nun hnuah "Rawn chuang rawh le" tih pahin hnung lam a thlek zeuh a, "Vulmawii ţhutna hnuah ka ţhu dawn ni maw?" thik ru tho si a amah ka fiam chuan a lo nui hawk. 

"Anih hmel..i hrufai hmasa duh em?" a hmel a nuihzatna langchhuak chung hian a ti a, a bul chiah a ding ka nih vangin min cho zetin hnai takah min melh pah bawk. 

"Duh mai mai lo..i lo nat pui palh ang" ka tih hmak chuan lu thin nâng nâng pahin a nui ruh ruh mai. 

"Chuang rawh le Pookie" pangai deuh a a tih takah chuan a hnungah seat ah ka ţhu a, a kawng a kuah betin a darah ka khabe ka nghat hram. 

Kan khaw panin inbe mang lovin kan tlan a, ka zunchhuak lutuk chu ka ip ţang ţang. Ka cheh dawn takngial ni a ka hriat hnuah "Muankim ding teh" a hnung a nam chung meuh hian ka ti a, a ding ve mai. 

"Ka zung dawn" tih pahin ka chhuk a, ka hawikual nghal ruai. Motor tlan velin min hmuh hlauin ka kal thuk deuh a, min hmu thei tlat a ka hriat tho vangin Muankima bawk ka au lang lang. 

"Kawngpui lam hawi khan ding teh" ka tih chuan "A lang thei lo" a ti mawl tawp.

"Lang lo mah se a lam hawiin ding hrim hrim rawh. Mi an rawnkal chuan min hrilh vat bawk la" ka ti a, ka kekawr phelhin ka ţhu hniam zui nghal. 

"Min en miah suh" ka ti leh te te a, a la phun hluk zui. Ka zun rik sur sur hlauin fimkhur tawkin ka zung a, nasa lo deuhin a ri tho. Zin veivah ka nin nachhan ber chu zunchhuak ve sek hi a nia, kalkawngah zun a chhuak a, insilna tur a awm ngai mang si lo. 

"Lokal an awm" a tih rualin ka ding zawt. Ka kekawr ka pawt chho sawk sawk bawk.

"Ka pi an zung lawk" ti a lokal ve ni awm tak a hrilh chuan ka inha fel der tawh. 

"Zung zo rawh" a rawn ti leh a, zung zo lo a ka din theih a ring reng reng em maw ni.

"Ka zo tawh...zung zo hman lo ila chu a baw char char ang chu" ka ti hlak hlak. 

Kan let chuan nutling pakhat hi min nghakin a lo ding reng a, "In awm tih ka hre lo a, ka zunchhuak lutukin zunna ka zawng mawle" a lo ti luam. 

Kan bike hnungah car a ding a, nutling kha an nghak anih hmel. Muankima lah chuan "Zunin pelh hnuah zunchhuak i sawi a" a ti bul bul reng. A hmun lo a zun hi a ngaithei der lo.

"Serkhan thleng a ip theih ka inring alawm mawle. Min hauh peih, i ninawm" ka ti hlar. 

Harrisons bag a ah lai chu la thla in a chhung a hai a, muffler ni awm tak rawn phawrhin "Khum rawh" a ti bul hmuk a, ka awmah a rawn nam bet rawk rawk. 

"Min dim ve deuh ta che mawle" ka tih chuan "A rem lai lai tuam rawh..i hritlang palh ang" tih leh helmet khum a rual a, ani pawn mask a vuah ran mai. 

Muffler a lu ka tuam hnuah bike ah ka lawn kai leh a, Muankima perfume hman ţhan ber rim a nam a, a ta a ni tih ka chian takah chuan a rukin ka nui. 

Serkhanah kan ding leh a, chawlhna hmun a lut nghal mai lovin kawng thlang lamah a ding a, a ipte aţanga meizial la chhuakin a ţan nghal zat bawk. 

"I rilţam em?" a tih chuan lu ka lo bu a, "I duh duh lo han ei rawh ka rawn pe ang" ti a min hrilh chu bengkhawn duh lovin a bulah ka ding tlat. 

"Nangchu min ngai thei e" fan ruih a tih pahin ka darah min kuah a, a taksa si turin min pawt hnai zui hmak bawk. 

"Ngaih vang hrim hrim a ni lo. Mahni a luh ka peih lo lawm. Bakah min kuah kher lo la, sumo a din ţeuh saw" ka tih chuan "A van duat an ti hrim hrim" a lo ti duh lek chauh. 

"Muankim, Josephine kha maw..zawhna min rawn zawh hnuhnun ber khan that rawh tiin ka lo chhang a, amah zawk a thi daih sia, mak i ti ve em?" dak deuh hlek chung hian ka ti a, kei aiin a sang miau a, a hmel ka hmuh duh chuan hawi san vah a ngai. 

"A mak lai ber ka va hre lo ve" a ti ban charh a, mipa ho hi chuan ngaihţhat lohna an neih ve hmel loh. 

"J tih kha midang an nih loh chuan" a tih leh chuan ka beng a verh khawp mai. 

"Josephine angin midangin min rawn bia tihna maw?" ka ti hluai a, mah se Josephine number ngei a ni sia, min rawn biak ngun vangin ka chhinchhiah thlap. 

"Ka hre lo, ngaihtuah duh suh" a ti leh hmuk tawh. Chhan tum a ka an zuau lai chuan "Kal ang" a ti daih a, inhnawh puar turin kan inzui lut.

"Nangni pahnih kha hetah rawh ţhu ve ru. Khaw nge in kal dawn?" rawn ti lang lang tu chu ka en vat a, Teresa-i te unau an lo ni. 

"Kan haw dawn engtin nge ka hmuh thut theih che? A van mak em em" ti chul chung a an lam pan a ka kal chuan a lo nui har har. 

"Kan awm loh veleh haw i tum a, a fair lo reng reng" zangkhai deuh hian a lo ti a, keini ţhiandun chu an hmaah kan ţhu. 

"Khaw nge in kal dawn?" ka tih chuan "Naktukah kan cousin in nupui a nei dawn a, min phut tlat vangin ka nu ten Phoebe nen min thehchhuak anih hi. Chhehchhawl pahnih" a ti bawrh bawrh. 

Eitur kan lam zet hnuah Phoebe chu ka melh a, a lo nuih seih. A zak leh ap ap tawh ang chu. Kan kawmchhakah an awm a, duh duh hun a eitur ka lam ngamna te an ni ve tlat. Teresa-i nen hian kan inrual chiah a, Phoebe erawh an tlum ber a ni thung. A hmelţha in a vun a no nalh reuh hle. Miin fiamthu a 'kolasib nula ngo tak an awm ngai lo' an tih pawn kan veng ho chuan 'Phoebe in la hmu lo anih kha' tiin fiamthu bawkin an chhang let ţhin a, a naupan zual lai chuan Vari an ti ţhin. Amah hian a duh lo em a, an ko zui ta lo a ni. 

"Cham hlen daih lo la aw kan ngai ang che" ti a Phoebe ka hrilh chuan nui rah rah chungin hnuai lam a bih a, Teresa-i a nui uar uar thung. A zahzum tawh sa nak laiin kei hi min zah zual a, kalkawng a min hmuh pawn min nuih ringawt a, biak hmasak loh chuan min be lo vin min kalpel mai zel. Ka nau Boomer nen an nih ve deuh tawh vang a la ni zui. An kum a la naupan ang bawkin an daih rei lo. Thla6 vel lek an nih hnuah an inţhen. Phoebe hian Teresa bulah 'Kei aiin ball a duh zawk' a lo ti ve mial a, Boomer-a tuina ka la hriat hma anih vangin bialnu aia ball thlan tawp mai chu tiin mak ka ti viau anih kha. Boomer phei chuan ka hre lo ang hmakah a ngai a, ka hriat loh der reng phah. 

"Enteh, Zodini a rai a, naute pa ber puh tur a hre lo an ti" Teresa-i chuan a ti leh a, mak tihna aiin thawvenna a nasa zawk. Mualphona lakah Muankima a fihlim tihna a ni mai. A fa ni ngei se chu tlem te tal a ngaihven ve deuh ka ring a, a hawi lo em em danah hian a chiang thawkhatah ka ngai. 

"A khawngaihthlak anih chu..mihring hi chu ho te te ah kan mualpho mai zel a, insiamţhat phah nan a hmang turah ngai ang" tih zawngin thu ka la a, Teresa pawn a sawi zui bik lo. 

Kan ţhiante eitur an rawn dah hnu lawkah kan ta tur an rawn dah veleh a, an thlen na a la rei bik lo anih hmel. 

"Tunlai chu Nu Hriatpuii te nufa in inah an lut chhuak peih khawp mai" a tih chuan Muankima ka en daih a, Teresa thusawi chu a ngaihven ve tih hriat zetin a lo dak chhuak ve tho. 

"I hmu ţhin nge miin an sawi?" ka tih chuan "Ka hmu ţhin a, an sawi bawk. An inah langin ka kal ţhin a ti a ni awm e. An nufa a inchhawr chu ka ring chiah lo" a ti a, a nui rah rah bawk. 

"Daisy chuan a nu a pui ve a ni mahna" ka ti a, Daisy ka tih hi Nu Hriatpuii fanu a ni. Ka inhnem chawp a ni mah zawk a, ka rilru a nuam lo ru takzet. Mualpho chiah kan hmabak ni ah ka ngai. 

"Nu Tei phei chuan a sawi peih rapthlak. Tui deuh a zai a ang ber. Chhing duar duarin in chhungkaw chanchin a sawi a, mitmu bo ţhak khawp a mi a rel tawh chuan vengchhungin an hria angah ngai tawp rawh. A sawi lai ka nan fuh chuan ka khap ziah a, ka khap reng seng si lo va" a ti hlak hlak a, thil sawi neuh neuh peih viau mah se kan chhungkaw mualpho a hlau ve takzet. Kan inkawm nasa ve ţhin em a, min duhsak lutuk. 

"Mitmu bo ţhak khawpin maw min sawi tawh?" ka ti hluai a, Nu Tei ei loh lutuk vang a ner nang chungin a lo bu nghat nghat. Chhing duar duar a mi a rel chuan a la zia, a rel tak tak chuan a mitmu dum lai a pil bo hmak zel. A pawi viau tawh tihna a ni bawk. 

"A van zia lo tak aw..a belh nasa leh dawn si" ka tih chuan "Belh nasa e..a chang leh i nu luahlan ru reng, awmdan a thiam vang a mualpho lo mai mai angin a sawi a, in tinin kan hriat dan a in ang lo ang tih vel a ni" a ti tan tan. 

Driver hruai a mahni motor a kal an nih vangin Teresa-i nen chuan kan ti ti reng a, Muankima thung chu a eizawh veleh pawnah a chhuak. Hmeichhe ti ti chu ho a ti a ni maithei, Nu Hriatpuii te chungchang a sawi chhuah hlim ang khan thil dang a bengkhawn zui lo. 

Khaw thim vek hnuah khawchhung kan lut thei chauh. Ka naute ka hrilh lawk duh lo a, min hmu thut se ka ti. Kawngsir dawr ka hmuh veleh Muankima chu ding turin ka hrilh a, "Ka naute thil ka hawn dawn" ka tih chuan "Pawisa i nei em?" a lo ti a, ka pa nen kan inkar a hria a, min kep hram hram a tum ţhin. 

"Nepnawi leina tur chu nei ve e, ka han kal lawk ang e" tih leh dawr lam a kal ka rual a, "I ta tur la tel rawh ka lei sak ang che" dawr ka thlen fel vek hnuah min la rawn au hram. 

Ka naute ka hawn tur ka thlan kual lai chuan dawr chhungah a rawn lut ve hlawl a, dawr a te angreng sia, amah a palian si, a inthlahrunawm duh angreng.

"Khaw nge i ta ve tur?" a rawn ti lut thawr lehnghal.

"Ka thlang mek..ka naute ta tur hi chu keiman ka lei dawn nia aw" ka ti ve tlat a, nin hmel zet a "Ka hria ka hria" a tih hluk hluk chuan ka nuih tlawn ta vel mai mai. 

Inchhung ka luh chuan boruak a uap churh ni maiin ka hria, Adika leh Puipuii ten min lo lawm hle rualin Boomer thung chuan "Rawn haw suh ka tih kha" bul zet hian a lo ti a, "Ka ngai cheu lawm" tih leh a bul a ţhut ka rual. 

"Inchhung boruak i rawn tem ve zel chuan lehkha i zir ţha thei lo ang" a ti a, an hlim tehchiam lo tih a hriat. 

"Eng nge thleng? Nu Hriatpuii bawk em ni?" ka tih chuan a bu nghut. 

"A fanu nen" ngaihnep hmel zet hian a ti leh a, Teresa thusawi dik zia ka finfiah leh chiah. 

"Ka pi te in hrilh em?" a lam a inher pah a ka tih chuan "Awmzia awm lo" a ti hulh a, a ban a phar chhuak pah hluai bawk. 

"Ka pa ka lo be dawn nia, in hlim loh phah te chuan lang a kal tur dang zawn mai tur alawm. Ka nu thihna a la rei lo a, buai nghal nuai nuai hi a zahthlak" ka ti chiam ringawt a, beisei ka nei sang hran lo thung. 

"Chaw i ei tawh em?" ti a Puipuiin min zawh chuan ka ei loh thu ka hrilh a, choka ah min hruai. Kan choka te chu a hlui vek ni maiin ka hria. 

"Ka lo siam ang che" fel fai angreng tak a a tih chuan mak ka ti reuh khawp mai. Adika ang chiah a naupangchhia a ni ţhin a, an inkhing tawk viau zel. 

"Nu Hriatpuii i la bawh huam huam zel em? Boomer leh Adika te aia i ngaihsak zawk khan Boomer a lawm miah lo a nia" ka tih chuan min rawn en ha a, "A thik alawm..amah aia Nu Hriatpuii i ngaih zawk khan Boomer-an a thik. A ngai ţhin che sia" ka ti kual leh vel. 

"Ka ngai tawh lo..U Daisy chiah a ngaihtuah a, ih maw..u, U Daisy chu a sual rapthlak. Kan eitur pawh a siam duh lo" a ti siam siam. 

"Nu Hriatpuiin a siam lo mi?" ka tih chuan "Aih...Boomer leh Adika te nen school banah kan siam ţhin" a ti ta mai. Ka sa ve phat. Ka pa nen an in ngaizawng a ni tih hrilh chawp ka ngai tawh lo. 

Chaw pawh ei lovin ka chhuak a, "Min rawn hrilh vek ta che. Khaw nge ka pa a awm? In chhung tifai a rawngbawl tur a a rawihin engmah a ti tak tak ngai lo tih te chu min rawn hrilh mai tur che lawm. Nitin kan inbia a, ngati nge engmah i sawi loh? I ngawih reng khan eng nge sawtna a neih? Ka pa a inthlak danglam phah em?" tiin Boomer ka ankhum tawn tawn. A ngawi ngul a, tv a melh ngur. A thil en lai chu hmu ang pawn a awm chuang lo. 

"Ka biak che chu Vanmalsawm" ka ti leh tuar. A mitmeng thip khai a min rawn melhin "I hriat tur chin ka hrilh che" a ti bung nghut a, min ngaihtuah vang a ni tih hre tho mah ila ka thinrim lutuk chu ka sa pup pup thei hial. 

"A vaiin min hrilh vek rawh. Lehkha ka zir theih loh phah lo ang. School banah rawng i bawl ţhin maw? I inkhelh theih loh chhan kha i naute vang nge rawngbawl a ngaih vang zawk? Nu Hriatpuii chuan eng chiah nge a rawn tih ţhin?" ka ti chiam chiam a, zawhna hlirin ka khat a ni ber. 

"Chutiang thleng thlengin engtin nge hria se min tih? School kan kal hlan a an nufa thil tih lehzel hre turin min beisei a mi? Tharum hmang a hnawt chhuak lo turin min hrilh a, ka naute vang a in bengdai tur a min tih angin ka palzam lui. A harsat tur zia i hrethiam miah na nge?" tiin vin zetin min chhang let. A ding a, kan inhmachhawn ran. 

"Chupawh nise ka pa hrilh mai ta che. Nu Hriatpuii laktlak loh zia sawiin hnawtchhuak turin kar la, i sawi ang chuan a ti mai ang chu. A fapa i nih hi" ka tih laiin rui deuhin ka pa a rawn lut. Kan unau a kan inhauh chhan Nu Hriatpuii ngei maiin a rawn kuah lut. Thawh lawk a keh nghal buan buan a nia ka duh ni. Ka pa pawh min hmuh chuan a hamhaih ve deuhin ka hria. 

"I rawn haw a ni maw? Chaw te i ei tawh em?" fiah lo zet hian a ti a, ţhutthleng nghenchhan vuanin a ding hram hram a ni ber. 

"In va zak lo ve" Nu Hriatpuii hmel pha dai en chung hian ka ti a, ka tum aia hma in ka ţawngchhuak. 

"Engmaw i sawi a? Tu nge i zak lo i tih kha?" ka pa chuan a ti chher chher.

"In pahnih hian in zak lo ve ve..hmanni lawkah ka nu kan vui a, ka nu mitmu em pawh a keh hmain hetiang hian in khawsa ngam a maw? Mi mitmei i veng lo anih pawn i fate mitmei tal veng ta che. Ka nu an ngaih ngawih ngawih laiin i ruih san a, hmeichhia i khawi lehnghal" ka ti hlak hlak. Engtin pawn min ti dawn se hlauhna ka nei lo. Kut pawh min thlak se tunah tak chuan ka sual let ngam ka ring. 

"Eng maw i sawi kha Vanneihmawi? In mamawh engkim ka tihsak chung cheu hian enkawl ţha lo cheu ah min ngai maw?" a ti daih. 

"Sum leh pai a min vur vang mai hian min enkawl ţha ah ngai suh. In chhung enkawl tur a i rawih hian eng nge a tih ţhin? Ka naute, Adika thlengin nitin rawng an bawl a ngai. Heti chung hian i fate enkawl ţha ah i in ngai zawk maw? Nu Hriatpui nangpawh, naktuk aţang chuan rawnkal tawh suh. Awmpui tur chu keimahin kan zawng ve mai ang" ka ti salh salh. 

"Inchhung a rorel tur chu keimah ka ni. Hnathawk tur a ka chhawr i ban ngawt thei lo ang. Ka rorelna hnuaiah hian lungawi deuhin awm ringawt rawh u" a la ti ngam nia!

"I lo mak hle mai ka pa, henu hian engti fakau in nge a thlem che? A thlavang i hauh tlat theih nan eng nge a tih bik? Nu Hriatpuii hi a rawnkal ka remti tawh lo. Vawikhatmah rawn inlan tawh suh se" ka tih chuan "I va han zakthei lo tak. He inchhungah hian thu ber emaw i inti em ni?" ka pa chuan a ti a, a aw chu a ringin a pawr kher mai. 

Pai khut khut chung a min rawn hnaih chuan ka hmaah Boomer a rawn ding.

"Kalsawn teh Vanmalsawm..thunei ber ang zia zangin i u hian ro rawn rel a tum ringawt mai. Ka'n zilh hlak ang e" a ti khur khur. A awmdan chu ka nu damlai nen a letling thawk. A hna chelh lai nen phei chuan a inrem lo zual. 

"Va mu rawh..nangpawh haw rawh" fiah zet a ka nau in a tih hnuah pawh ka pa chuan "I u thlavang i hauh vel a maw? Kha mihring lepchiah leh laktlak loh, mipa ngaih hmang khan ka zilh e min tia" a sawi zo hman lo. Boomer a che phut a, Nu Hriatpuii mangang au ri nen. Chhuat a ka pa let reng chu ka melh tlawk tlawk a, lainatna chhe te mah ka nei lo. 

"Haw tur a ka hrilh chian tawh che kha" Boomer chuan Nu Hriatpuii melh run chung hian a ti leh a, sehchilh zet a a ţawng danah a thinrim zia a hriat. Kei ve thung chu chet nachang ka hre lawk lo. Ka nau piah ah amah si chetin ka ding tawh tih ka hria a, an vaiin ka entawn zak zak hlawm a ni ber. Ka pa min tih dan kha na ka ti takzet. Amah leh a fa bik vang a hetiang a awm hi ka ni, mahse a ngaih ang leh a mi sawi ang a tenawmin ka awm ngai lo. 

Boomer khan a khawih na miah lo, a rui em a, mahni pawh a ding hleithei lo chu khawih nat vak a ngai hran lo. Boomer hian ka chanchin a la hre lo a, khatih hunlai khan a la naupang lehzual. Hre ta se ka pa hi engtin tak ngai ang maw?

Nu Hriatpuii pawh hmanhmawh deuh a a tlanchhuah kha. Mi pangai anih chuan a rawnkal ngam ka ring tawh lo. 

Ka pa thawh tum chu Puipuii leh Adika ten an lo pui a, nghet lo deuh a a din leh hnuah "Vanmalsawm i pa kut min thlak ngam elaw? I pa ka nih hi..i hria em? I pa ka nih hi" a ti chhur chhur. 

Boomer chuan "Ka tihpalh" a ti sup a, mak ka ti lutuk chuan "Boomer" ka ti chhuak ţhat. 

"Puipui, Adika nen khan ka pa hi va muttir rawh u" pangai deuhin a ti lehzel a, ka pa pawh Boomer-a awmdan chuan ti hrilhhaiin engmah a sawi tawh lo. 

"I â em ni? Khatiang a ngaihdam i dil leh vel te chuan a in luling zual sauh dawn asin" ka pa an hruai hran hnuah Boomer nen bawk kan in hmachhawn leh tawh.

"Ţhu phawt teh" ti hapin min nam ţhu a, ani pawh ka bulah a rawn ţhu thla ve hnawk. 

"Ka thinrim insum zo lovin ka hnek anih kha. A ţawngkhum dan che kha ka ngaithla liam thei lo a, a thawh danin ka che. Mahse Vanneih, ka pa kutthlak tur ka ni lo. Inhau bur bur mah ila ka pa a nia, a awmdan engkim ka hua. Ka haw vek. Ka ten a ni mah zawk" dam deuh zawk a a tih chuan "Chuti si..." ka ti hman a, ka zawh tum ka zawh hmain "Kut ka thlak rual khan inthiam lohna ka nei chawpchilh nghal. Ka pa hi ka zah lo, ka ngaisang lo bawk. Chu chu i hriat duh a ni em?" a ti a, ka la nur nang chu min rawn hnaihin "Theihnghilh tawh ang. A ruih loh hunah i sawipui dawn nia, ka sawi zing tawh. Bengngawng ang mai a ni. Upa ber i nia, nakinah ţha deuhin sawipui zawk rawh. Mahse, Pathian hian pate kutthlak nan mai mai chakna min pek ka ring lo. Chu chu hre tel reng la" a ti nghut nghut. A puitling ka tih tawh kha, a kum ang rualah chuan rilru puitling pawl tak a ni ngei ang. 

"Eng nge min lo hawn?" ka hmazawn a a kut rawn dawhin a nui vur vur a, ka rilru put hmang hriat tum ni awm takin a mitmeng fing zet chuan min melh leh zeuh ţhin. 

"Engmah ka hawn ve lo che..thil hawn rual i nih tawh loh kha" ka ti hlar a, a nuih a za ting. A nui lui nge pawh ka hre lo.

A tih ziah danin ka bulah Adika a mu a, a muhil hma khawp mai. Muankiman min rawn call a, mu chungin ka chhang. 

"I va mu har ve" ka tih chuan "Mikhual an rawn thleng thut a" a ti mai a, a ngawi leh  daih. 

"Min rawn call ve ziah a, sawi tur i hre lo thei si" ka ti hlak. Ka thinrim a la reh lo bawk nen, biak nuam tak zawng ka ni lo ang. 

"Tukverh ah rawn dak teh" thupe aw zet a a rawn ti te chu ka haw hlur. 

"Ka peih lo" ka ti hmak.

"Thil thleng a awm em?" a rawn ti a, a aw thuk tak a min ngaihtuahna inphum ru chu ka hriat hmaih lo. Ka hre zing lutuk tlat. 

"Awm nang" zangkhai deuh a ţawng lui chung hian ka ti a, ka ţhianpa mah nise in thlen rual a buaina nasat zia hrilh nghal chu a zahthlak. 

"Nihchuan i lo dak thei" a la ti ţalh. 

"I va han ninawm tak" ti hlak chungin ka tho a, min ngaichang ran a niang thawm a reh leh daih. 

Tukverh a dah chhuah pah a "Eng nge?" vin zet a ka tih chuan "Sarzuk i duh em?" a rawn ti anih chu!

"Sarzuk mai mai vangin zanreiah min kaitho maw?" ka ti hluai a, hepa pawh hi a rilru a awm ang ang hian a che a. 

"Aw mikhual te rawn ken..i eiturin a lian lian ka ţham ru" a la rawn ti tak deuh deuh a, Lalmuankim leh!

CONT...