THE GOOD, THE BAD AND THE OTHERS-6

THE GOOD, THE BAD AND THE OTHERS-6

Chawhnu lamah Muankima te in a kal tumin ka in buatsaih a, zanah sarzuk mai mai vangin min kaitho lui tlat a, ka ei atan a a lak anih miau vangin ka ei sak ta poh aniang chu. 

In ka tihfel sawk sawk hnuah Adika hruaiin ka kal a, min nghakhlel ni awm takin gate pawnah bang nghengin a lo ding vang tawh. 

"Pawn a nghah ngai khawpin ka pawimawh ve ta a ni maw?" ka ti fiamthu a, ka melh chho ha bawk. 

"I hmelţha tak hmuchak deuhin min siam thiam a" tiin min lo melh ve run a, min fiam ziah dan chu ni lo se ka lai viauin ka ring. 

Kei aiin a sang daih zawk a, a taksa ah hian thau mawi lo hmuh tur a awm miah lo va, ka mit bikah chuan a inphut mawi tawk lutuk ringawt. A sam dum hlap te hi a lang fai sar reng a, a nemin ka chul sak fo mai.

"A lung a leng ang a, Aizawl lamah tu emaw hmu turin a kal lehnghal vang vang mai ang chu ka lo ti rilru asin" nui sang a ka tih chuan a hmui a lo ti sawi zeuh. 

"Hmeichhia ka pan ngai lo" a lo ti bul hmuk a, intithei hmel a pu lo a, a fiamthu ni a a lan loh bakah sawisual nei angin a awm lo hrim hrim. 

"I va inringtawk deuh ve" ka tih chuan "Lut ang u..Adik i u nen lehkha kan zir dawn a, Tekeuhi bulah nang chu lo awm rawh aw" a ti then. Ţawng tum a ka ang zuau chu mitmeiin min khap vat. 

Adika chu amah zawkin a kai tawh a, an hnungah muangchangin ka kal. Inchhung kan luh rualin Nu Puitei'n "Lo leng ru Vanneih. Ehe..Adika pawh a lo tel ve anih hi" dam thluam a a tih hnuah "Lalmuankim, sarzuk i va han dahţha hnem em em ve, engatan nge i tih?" a ti vin zui hlar. 

"Ei atan" tih chiahin a nu chu a chhang a, ka ban bul rawn dawmin inchung pan na kailawn lamah min hnuk dawr dawr. Nu Puitei'n "Rawn dah thla ţhen rawh. Khati zat kha nangmahin i ei zo thei dawn lo. Kan mikhual te pawh an zahawm alawm mawle" a la ti lang lang a, Muankiman a bengkhawn duh miah lo thung. 

Pindan chhung kan luh rual a ka hmuh hmasak ber chu sarzuk a ni. A langsar em a, zanrei pawh sawi lova min rawn biak nachhan a ni bawk. Polythene lian tawk khat ţanin a lo dah a, a suih phui theih loh anih hmel; a insuih tho na a a kau lai a awm. A letling zawngin khai ila chu a kua aţang hian a tla chhuak ţeuh thei ang tih vel a ni. 

"Hei hi ka eitur chauh a i lo lak maw?" ka ti hluai reng a ni. Lu min buk khum nghutin "I eidawnah sil zel ang che. Ka la sil lo" a ti lehnghal. 

"In mikhual te an hek duai dawn anih chu..hetiang zat a tam engtin nge ka eizawh theih bik ang?" ka ti nang nang.

"Chi nen" a la ti zui a, "Chi nen pawh ni se i ti awm ang lo thei e" ka tih bai bai chuan khumah ţhu in min rawn en a, "Ka kachhung a pilh vek ang" ka ti tel hram. 

"Thla laklawh ah thei ka chak ziah i ti ţhin sia" tiin a insawifiah ve ngial. 

"A ţawih dawn tho a, dahţhat reng theih a ni hleinem" ka ti hap a, ka lungawi loh tehreng nen min lo la nuih suk zui a, ti ţha a inti leh viau ang. 

Pahnih la chhuakin tui bottle nen bathroom ah ka lut a, sarzuk chu ka sil ta ngei. Bathroom tui hi a bawlhhlawh chuang lo na a eitur sil nan em chuan ka hmang tim ţhin. 

Ka chhuah leh hnuah kut ka hru ro a, sarzuk pek ve ka tum chuan "Nangmahin ei vek rawh" a ti then mai. 

A thur lutuk ring lovin ka hmawm thawih a, ka seh chiah chu Muankiman ka hmel a hmuh loh nan tukverh lam ka hawi daih. A thur lutuk chu ka hmulthi a ding sung sung theiin ka hria. Men pawh ka meng thei lo. Ka khur ngawt ngawt lo chauh a ni. Ka hmai a sawi kual nasa viau ang. 

"A thlum em?" a la rawn ti zui. 

"A len vang maiin a thlum tihna a ni hleinem. Rawnkal hnai reng reng suh ang che" ka ti hlar a, thei tam tak zing a ka ngainat loh ber pawl a ni. A thlum lo phei chu ei harsa ka ti. 

A thur zia deuh hnuah a ţhutna lam hawiin ka inher a, tum burin ka kuangkuah a, tukverh a bar an dah chu ka ngheng ran bawk. 

"Hei zawng zawng hi ka ei vek tur a i lo lak ve ngei a ni sia" ti halhin sarzuk tam tham zet chu ka melh a, ţah te lam lam a chhuak alawm le. 

"A tui lo mi?" a tih veleh pawr tawkin "A thur lutuk, hetiang em em lo dah kher a ngai hleinem. Ka tan eizawh vek loh a nuam tawh dawn bawk si lo" ka ti bawrh bawrh a, za lo zetin a ţhen suk ringawt. 

"Min nuih vel lo mai teh Lalmuankim" ka ti hlar. "Vulmawii ta tur dah hran sak ve rawh. Hmeichhia anih chuan thei eichak deuh lai a nei ve dawn hrim hrim" ka ti zui zat bawk. 

"Vulmawii hian a tibuai ru che. A dik tiraw?" Muankima chuan a lo ti zawi sup a, ka mitah tak min en runin a rawn ding chhuak pah a, tukverh lam bawk ka hawi leh daih. 

"I bialnu a nia, ngaihsak turin ka hrilh mai che a ni" ka ti a, a bialnu nei ka pawmpui tak tak loh zia ka aw a a lanchhuah ka hlau hle mai. 

Ka dinna lamah a rawn kal tih ka hria a, min hnaih loh turin duh viau mah ila "Thup tum reng reng suh Pookie" tiin ka beng bulah a rawn phun sup. A rawn din hnaih em vang chuan a taksa lumna chuan ka hnungzang chhukthla a rawn ur pha hial. 

"Engmah ka thup lo..thup nei ranah min ngai miah suh. Bialnu i neih theih te chuan a lawmawm lutuk. Aww..ka lawmpui che ka tihna" mumal lo zet hian ka ti a, ka thusawi awih loh hmel zet a "Takzet?" a rawn tih leh kher chuan a lam hawiin ka inher a, amah en tumin ka melh chho kher bawk. 

"Ni e..bialnu nei ngai hlei lo in 'ka bialnu a nia' i tih ve takah chuan nangmahah a thawk na hle anih ka ring ngawt a" ka tih chuan chal chuar tap a min rawn en chhuk ve in "Elsen na a tel tiraw? Pookie" a ti hul hak a, thup buai lovin ka lo bu nghat. Inthup ka tum pawn min hmu tlang zel thei tho a, mahse, "Thikna pawh" a rawn tih leh chiah chuan "Teuh lo mai" ka lo ti vak. 

"Keini te chu kan awmdan i hriatchian kha..tumah thik thei ka ni lo. Zu kan ruih vang te, hman a ka thil lo tawn tawh te avanga thleng a nia, bialnu i nei thut kha ka elsen che a ni maithei, mahse, ka thik lo" ka tih hlawp hlawp lai chuan mit ti zim sunin min lo melh chhuk run a, ka ţhianpa ngei hmaah hian ka zam chhe ngun tawh hle. 

"Kha thil kha sawichhuak ziah lo turin ka hrilh tawh che" a ti hriam hruih a, ka thusawi khan a thinrimna a chawk tho leh a ni chek ang chu a hmel a ruh ţeuh a, a mitmeng a thim khup mai bawk. 

"Sawi chhuak lo mah ila ka taksa ah a langchhuak ziah tho alawm. Ka ţhianţha ber ka mutpui phah fo a, min hmusit hluah hluah mah la ka hrethiam lutuk" ka tih mawlh mawlh lai chuan a inla hrang hlek a, "Min ning ve viau ţhin ang tiraw? Ţhian buaipui ngai reng neih te chuan bialnu nghet neih tak daih a awl khawp ang" ka tih tel cheu lai chuan a mitko min lo san khum zeuh a, min chhang dawn lo ni a ka ngaih hnuah "A ni tiraw?" ka ti leh hram. 

"Tisa nawmna chen duh vang chauh a hnaih ţhin che ah min ngai a ni maw?" a ti zawi ruih. 

"Ni e..ţhian kan nihna hi hmuh tur a awm lohna a rei tawh. I lo chik ve ngai em? Kan in ngamtlak ţhin na zawng zawng te kha a bo tawh a, kan inhmuh chang hian min dang tu a awm tlat tawh. Kan inpawh thei tawh lo. Chuvang chuan Vulmawii hi kawp reng la, keichu ka awm thei mai ang. Kha mihring thil tih khan min la nghawng reng a, ka taksa ngei hi thunun harsa ka ti ţhin" ka ti mawlh mawlh. 

"Kha mihring thil tih kha engahmah i ngaih loh ţhak thlengin do let ta che. Pawi nasa tak a khawih a, thah hial ania ka duh" thinrim sehchilh zet a a tih chuan ka lo melh tlawk tlawk. Hetiang a a thimrim hmel hi ka hmuh lohna a rei ta. 

"Keimah vang maiin pawi rapthlak lutuk khawih miah suh. Pangai deuhin bialnu nei la, i kawng dal tu atan min hmang suh. Nun pangai i hman theih loh ai chuan min hlat zawk mai la, keipawn tisa thil a inlaichinna neih ka duh tawh lo. A tawk tawh viau a ni" tiin ka tawlh sawn hret a, min khuap run tawh lo a, awlsam deuhin ka inla hrang thei. 

"Tisa thil a inlaichinna chauh duh ila chuan hman hmanah khan ka ti tawp tawh ang" lungawilo tih hriat zet hian a ti ngul ngul a, "Vawiin aţangin a tawp tak tak tawh dawn alawm" ti a kal mai ka tum chu ka banah min pawt let hrawkin bangah min nawr bet rawk rawk. 

"Muankim ka ti tak tak a nia" ka ti halh. A chetdan teh thut vang chuan ka thin a phu dawt dawt mai. Ngunthluk fahran a min thlek chung hian "Vulmawii hi hun remchang ka hmuh apianga riahpui ah min ngai a ni maw?" a ti chhuak phawng mai.

Chutiang chu ka ngaihtuah dan chiah a ni ţhin a, an inkawp tih ka hriat aţanga ka rindan sa a ni. Ka rilru hria ang mai a a awm vel chu ngaithei lovin "Teuh lo mai" ka ti vak. Min hriatchian hmel zet a a kiai suk te chu ka ngei thar that. 

"Mipa in an tawk lai che hmuh ka duh lo. Ka hmuh loh a an khawih kual vel tur che pawh ka duh lo" tiin a inla hrang hlek a, a mitin ka taksa a chhui thlak dun dun lai a chetsawn ka tum chuan rang lutukin min rawn hnaih leh. 

"Ka duh loh dan a ka chet ring bik suh" a ti chang fuk a, hrethiam lo zetin ka lo melh ha. 

"Eng nge awmzia?" ka tih chuan "Mipa reng rengin an khawih che ka duh lo. Keipawn nang lo chu tu hmeichhia mah ka khawih lo ang" tiin a phun sup sup a, a kut chuan ka kawrhma chhuk thla chu a zut thla zai zai a, ka thinphu danglam nasa lutuk chu a hriat ka hlau hle mai. 

"Zodini kha" ka ti chhuak hrawih. Ka awm bawr aţanga a mit la sawnin ka mitah tak min rawn en leh a, "Zu ah khan eng nge a pawlh ka hre lo. Ka mutpui kher ka ring miah lo. A phuahchawp anih kha. Hmeichhe dang ka kawp kha chu ngaimawh suh. Tumah ka khawih lo" nghet churh hian a ti a, a kut che vel chu ka awm bawrah a tawp a, a lum vung vung mai. 

"Hmeichhia ka pan ngai lo" ka awm bawr melh run chung hian a rawn ti leh sup. 

"Pan hmasa tu zawk nih ka tum miah loh laiin pan hmasak fo i ngai a" tiin a nui ro hak. 

"I kut kha la sawn rawh" ti hrak chung a inlak hran ka tum chu a taksa si chialin min kuah bet ta tlat. 

"Muankim, min thlah vat rawh" ka tih pawhin "Teuh lo" a ti nghut a, ka nghawng chu a hmuiin a rawn nawr nghal zat bawk.

"Lalmuankim, eng thil nge i tih hi?" sehchilh zet a tih pahin min kuahna ban lian leh chak zet chu ka nam ţawk ţawk a, awmzia a awm lo nasa. 

"Engthil nge ti a min hriat? Tawpsan i duh leh duh loh ka fiah mek anih hi. Engtin nge i awm Pookie?" a ti zawi sup a, ka kawng a man bet reng chung a a inlak hran hlek chuan ang phiau hian ka lo en chho ha a, ka kâ hmangin ka thaw chhuak halh halh. Ka thil lo tawn tawh vangin hetiang lamah hian ka chak lo a, a awmdan chuan min tih phur rualin ka taksa khur ru der der vang chuan ka hnar zawh loh ka hlau a ni. 

"Ka taksa danglam ţhin dan i hre vek a" ka ti chhuak hak. Ka taksa a khawih kual vel lai khan ruak a awm ni maiin ka inhria. 

"Mipa dangin an tawh hlek chein i danglam zel tho tihna maw?" inringtawk zet a tiin ka hnungzang a chul thla a, "Ţhian chauhah min ngai lo" a ti leh nghut. 

"Chutiang ngaihdan chu engtin nge i neih theih zawk? Ka chak loh em vang a ka nem zel vang hian mi?" tiin ka nui hul hak. 

"Ni lo e..Vulmawii ka kawp aţangin" a lo ti thuai. 

"Ka hrethiam lo reng reng..sawi chiang teh" ka lo ti he haw a, ka haider mai zawk a ni. 

"Vulmawii hi i thik alawm" a ti khawl mai. Ka mawng bawr a vuanin min pawt hnai sauh a, ka taksa ţang ţeuh chu pawisa lovin min kuah nghet sauh. 

"Thikna chhan tur ka nei lo" ka tih ve ngial pawhin a lo nui hawk. 

"Inbum tawh lo teh ang" ti nghutin inla hrang hmasa zawkah a ţang leh a, min hnaih tawh dawn lo emaw ka tih laiin a rawn kun hniam a, a hmui lum huamin ka hmui a rawn tawk a, hneh leh dim lo zetin min fawp nghal rawk rawk. Ka hmui chu rawn nawr kau luiin ka kâ chhungah a lei a rawn rawlh lut nghal thuai bawk. Ka chhang let chak a, ka taksa danglam nasat zia lah hrechiang tu ber ka ni. A kut chu ka kawr chhungah zen lutin ka hnungzang a chul heuh heuh a, harsa ti tak a thaw halh in a kal thui lutuk loh nan thei leh thei lovin a ban ka lo vuan. 

Ka insum ţang ţang takah chuan a inla hrang a, ka hmui a la khur der der hialin ka hria. Muankima kuah leh rawp rawp lo tur a ka insum ţang ţang lai chuan "Min fawp let ve ta che..thil dang engmah ka ti lo ang" thum ruih a a tih te chuan ka zak thar tlat. 

Muankima en tumin ka dâk deuh a, min endan te chu. Tisa châkna a khat leh khum min thlenpui nghal rawk rawk duh hmel a pu ni ten ka hria. Aaa chutiang a ni lo, ka hmusual aniang tih ten tu hriatpui lohin ka inhnem leh vel a. Ka hmui lah chu dim lo zet a min fawhna vang khan a thip hlar a, ka taksa danglam nasa lutukin ka khup a ti zawi hnak mai bawk si, bang nghen tur awm lo se chu ka tlu hnawk thei hialin ka ring. 

"Midang nei rawh..keichu i ţhian ka nia, mipa dang vang a piangsual tawh lehnghal. Nakinah min iai leh si ang a, ka ti hrehawm mai mai ang che. Keichu i hriat kha, ka chanchin i hriat vek kha" ka ti nawk nawk. Ka insitna hi a nasa lutuk a, pasal ka neih ve ngam pawh ka ring ngai lo a ni. 

"Mawli leh" min ti nekin dim lo zetin ka kut a rawn la a, a awmzawnah a nghat nghal hmiah. A thin zawn a ka kut a nam beh chuan a thinphu nasa lutuk chu ka kutin a hre thei. Hamhaih zetin ka en a, ani pawn chik zetin min lo melh ve run. 

"Hei hi ka chung a i thil tih chu a nih hi" ti hlukin a ner zui suk a, "Hetiang zawng chiah hian min hrem ţhin. Min ti hrehawm khawp mai" a tih chuan vawi engzat nan nge ka hre thei tawh lo, ka inla hrang leh. 

"Bialnu i neih kha, bakah a va rang ve. Engmah ka hrethiam lo" ka ti bah nawk nawk. Hetiang a a danglam thut theih hi ka ring lo. Ka beisei lo a ni zawk mah. Muankima hian ka thil lo tawn tawh hrereng chung a min duh theih ka ring ngai lo hrim hrim. 

Min thlah veleh darthlalang hmaah dingin ka sam darh niaih chu ka tuai ţha a, ka mitmeng lah chu ramhuai hmu ang maiin a phawk hra. 

"Chiai suh..ka nghak thei che" hahdam zet a tiin ka dinna bul lawk bang chu nghengin a rawn ding ve a, min en reng te chuan nuam ka ti lo. Min duh anih te chuan ka beiseina a bo ţhak thleng a nghak lovin min hrilh vat mai se ţha tur. Tunah phei chuan hmeichhe dang an awm ve tawh lehnghal. 

"Ka rilru put hmang chu sawi ngaiin ka hre tawh lo" tih leh pindan aţanga chhuah ka rual a, a nui hawk ri chuan min pawt ding zo lo. A sawi ang khan ka hamhaihin ka chiai a, ka beisei loh tawp thil a thleng a ni. Kan mut dun changin rilru natna leh phurna a inpawlh ţhin a, tun ţum kha chuan kan mu dun hauh lo, chuti chung chuan min nghawng nasa daih zawk. Danglamna min thlen nasa in sawitur hre lo ţhakin min siam anih hi. 

Kan inchhung a Nu Hriatpuii ka hmu chu mak ka ti kher mai. A lokal ngam ka ring tawh miah lo asin. Adika kut chu nghet deuhin ka vuan a, Puipuiin chhuat a nawt.

"Khaw nge Boomer?" ka tih chuan "A inkhel" an lo ti mawl tawp a, Nu Hriatpuii chuan en pawh min en lo. Sofa ah, ka pa ep chiahah a ţhu. 

"Khawi Puipui keiman ka lo nawt ang" tih leh chhuat nawhna chhuh ka rual a, Nu Hriatpuii leh ka pa te chuan engmah an sawi lo a, keipawn ka be bik lo. 

Chhuat ka nawh mek laiin Muankima a la rawn lut zui a, thlai hnah a rawn pawm bawr luk. 

"Eng nge ni ta Muankim?" ka pa chuan a lo ti dam thluam a, a rukin ka ner nawk. 

"Ka nu thilpek anih hmel. Lo ei sak ve ru" ti a ka pa a chhan lai chuan keimah chiah min en. 

Ka lai ve deuh a, biak dan ka hre mai lo chuan "Min rawn pui ve rawh" ka lo ti ringawt a, ka rilru tur hrethiamin a nuih a za viau a ni. 

"I ti awm lo emai..chhuat nawh te chu a harsa hleinem. Muankim, choka ah va dah la, ţhu chawl rawh. Thingpui te i in ang chu" ka pa bawkin a lo ti leh. Ka nu damchhungin lem a chang tawh a, a hne ve em em lo em maw ni. 

Muankima choka a a luh hnu lawkah keipawn choka ka nawt thleng a, dawhkan bul chair a ţhuin ka che vel chu min en reng ni maiin ka hria. Sawi tur hre lo chi anih vangin min be lem lo va, kei takngial pawn sawi tur ka haihchham a ni ber. 

Ngawih dun reng nuam ka ti lo chuan "I anţam rawn ken kha lo thian rawh" ka ti vin hlar. 

"A chang chuan ka hau che maw ka ti ţhin" a ti sup a, lungawi lo hmel a pu lem hlei lova.

"Engmah ti lovin min enreng a, a nuam hleinem" ka ti leh vel. 

Nui hawk chung a "I hmuhnawm em a" a tih chuan rum zetin ka melh nghek a, anţam ţawnna a phelh daih. 

Chhuat nawh zawh a a anţam then ka enpui chuan ka chek tlak tlak. Pawisawi loh hmel en hian min rawn la melh zui. 

Ka hauh hma hmain "Rawng ka bawl ngai lo aw" tiin a lo intlawhkhalh hmasa a, anţam tel lianpui si kha a then meuh chuan a chhuak tlem lutuk. 

"I va han tlaw ve chiang tak" ka tih halh chuan "Tihpalh..tihpalh" ti sawk sawkin ka hnung zang a beng det det a,  thinrim hleihtheih a ni lo ţhin. 

A bulah ţhu thla ve thuaiin anţam chu ka en a, Muankima ka melh leh hrak. Hnai tak a en chuan a mitmu hi a uk kharh a, a lan thim khup ang a ni ngai lo. Nichin lawk a thil thleng vang khan ka la zak deuh tlat a, a rilru diktak a phawrh ve vang a ni mahna. 

"Aizawl ai chuan Kolasib a nuam zawk" a rawn ti chhuak hluai a, a anţam paih tawh lak let malh malh a "Ti nge?" ka tih chuan "Meow-a leh Angel-a te an awm lo a" a ti hulh a, ka lo nui chhuak hak. Mateo leh Gabriel a sawina a ni. Gabriel te hi Roman catholic an nia, vantirhkoh hming ang a put vang hian fiamthu in Angel an ti mai zel. Sap ho lam rik dan a an lam vangin a hmeichhe hming deuh hlek a, Gabriel pawn a haw viau zel. 

"Chuti si ngati nge vawikhat an chhuah ruk ţum khan warden ten an man hlau a i buai chung? Awm lo tur a i duh te chuan man tir daih ta che" ka lo ti a, min chhang duh tawh miah lo. Mipa zing a a ngamtlak zual pahnih an ni ve tlat. 

Boomer-a rawn haw chu ni sa hnuaia awm tih hriat zetin a biang a sen deuh hlar a, thlanin a bual vek bawk. Jersey kawr a hak chu a darah a bat liam a, chau tih hriat zetin a rawn lut. 

"Tlai daiah inkhel ta che. Mi aia uar a tih kher a ngai hleinem" ka lo ti nghal pang.

"U Muankim, kan chak a nia aw" a ti daih a, min ngaihven duh eih lo. 

Boomer-a ţhianţha ber Tintin chu a ui kaiin a rawn lut a, ka la hmuh ngai loh anih vangin "A kawlh em?" ka lo ti chung. 

"Kawlh nang...a lian na a a fel lutuk. Phoebe anih hi" tih pahin nui ruh ruh chungin Boomer a melh zeuh a, Tintin-a ţawng chu hrelo awm deuhin a awm a, fridge hawng rawkin bottle a la chhuak a, a in nghal khawlh khawlh. 

"Phoebe, bawlhhlawh bawm kha hai suh aw. I hmelţhat reuh nen i ţawp riau" Tintin chuan a ti kher a, Boomer leh Phoebe te chanchin hre ve tu ka nih vangin ka nuih a za ru hle. 

Boomer chu fridge bul a ţhu hniamin a ban a phar chhuak a, "Phoebe lokal teh ka duat" a ti ve vel a, Tintin-a a lo nui huk huk. Phoebe lah chu Boomer-a ţhutna lam a kalin a nul nghal thuak thuak a, a liak lo chauh a ni ber. 

"Aww..ka duatte duhtawk teh..min ngai lutuk ţhin suh" a lo ti fiamthu leh a, Phoebe chu a kuah thuak thuak bawk. Tintin-a chuan a lawm ngang mai a, hre lo der tlat chungin keipawh ka lo nui ve vak vak tho. 

"In kawmchhak Phoebe chu awm se a zak sen leh ap ap tawh ang chu" Tintin chuan a ti zeuh a, "Chu chiah..ngati nge Phoebe i tih kher?" ka lo ti thuai. 

"A nalh em a, ka ui, Boomer nen a kan duatlai hi Phoebe ni se ka tia" a lo ti a, awmze nei deuh a Boomer a melh te chu ka hre lo der. 

Kan ţhiante nen a kan nuih chhung a rei lo hle mai. Ka pa rawn lut chuan "Hriatpuii hi an monu nen an inhau deuh a, zanin chu kan inah a fanu nen an rawn riak ang. Mikhual pindan a awl a, buaina in siam loh ka beisei" a rawn ti anih chu! Kan unau chauh ni lo; Muankima leh Tintina te pawn mak an tih hmel takzet. 

"Riahna tur dang zawng rawh se. Riahna nei lo zawng zawng kan mikhual seng lo. Anni nufa ngat phei chu" Boomer-an a ti chang fak. A ding uaih tawh a, ka pa a dinchilh a ni mah zawk. 

"Vanmalsawm, buaina lo siam teivet suh. Zan tam riak turin ka ti lo. An inchhung boruak a dai ang a an haw leh mai ang. I hmuh peih hlawl loh leh ipi te inah riak rawh" ka pa'n a ti anih chu! Boomer pawh chuan ka pa thusawi chu awih loh hmel zetin a nui hawk a, a kâ in a thaw chhuak hawlh bawk. 

"Ka nei dawn ti law law mai ta che ka pa. U Muankima leh Tintin-a awm lai hian inpuang law law la, awmpui ang a lak luh kher a ngai hleinem. Takzet che hian, tenawm lutuk" a ti vin hluk hluk a, kan inleng te chuan nuam an ti lo khawp ang. 

"Chutiang a ni lo Boomer. Kan monu hi a sual reuh a, in luah tur kan hmuh hma chu lang a kal lovin riak mai ila ka tia, zahtheih loh ka rawn chhuah  tawp mai anih hi" Nu Hriatpuiin a tih chuan Boomer-an "I zak ve ngai a mi?" elsen zet hian a lo ti a, a mitmeng hriam lutuk chu a thinrim phei chuan puitling tan pawh a hlauhawm ve tho in ka ring. 

"Vanmalsawm i inrawlh na tur a awm lo. Hriatpuii hi ka nupui a ni lova, nupui angin ka cheibawl dawn lo. Hman aţanga kan in a hnathawk tawh a nia, harsatna a tawh a lo tuam hlawm chu kan tih tur a ni" ka pa'n a ti hmak hmak a, keichu ka ngawi reng. Ka rilru na lutuk hian sawi tur ber pawh min ti hre lo. 

"Tum chhin ula" Boomer chuan a ti vawt raih a, "Engtia rei nge in awm theih kan en ang chu. In duh chuan tum chhin rawh u" a tih zawm leh a, a in humruh nasa tawh hle a, ka pa leh Nu Hriatpuii chu kut a thlak mai ang tih a hlauhawm zawk. 

"Awmpui lak luh leh ban chungchang chu ka kutah awm rawh se. Hriatpui, i fanu bia la, in bungrua va la rawh u. Boomer pawh rei a thinrim lovang" ka pa chuan a ti charh charh a, Boomer-a awm ve reng lai a chutiang a sawi thei chu mak ka ti ngawih ngawih. 

"Ngai lo mai rawh se...hrehawm deuhin awm lui ila, in kan hmuh veleh kan chhuak ang a ni mai. I fapa berin a phal loh chuan kan rawn fin lo mai ang che u" Nu Hriatpuii chuan in ngaihtlawm hmel zet hian a lo ti a, Boomer chu za lo deuhin a lo nui ro hak. 

Nu Hriatpuii chu a chhuak nghal dawr dawr a, ka pa'n a umzui. An va zak lo dun chiang tak. Kan unau chiah chuan awm ila thuhran, kan ţhiante awm lai lehzel a an chetdan hi rapthlak ka ti lutuk. 

"Tintin, tual ka thah vangin police in min la man maithei a nia, lo inring rawh aw" Boomer chuan a ti fiamthu a, nui vur vur chung a tui a in leh te chu rum deuhin ka melh. 

"Fiamthu pawn sawi tawh suh. Huat zawng kan neih chuan tualthah mai hi a har dawn lo, ka hre ve vek. Mahse, chutiang chu i ti a nih vaih chuan i chak lo khawp ang. I thinrim ber lai pawn ka nu thlarau zah nachang hria ang che" ka ti hlak hlak. 

Ka nau chu chhuat a ţhu sawp hnawkin fridge a ngheng a, a bul a Phoebe a va kal chuan a lu ah a lo chul sak. 

"Boomer inbual la, chhuak harh teh ang" Muankiman a lo ti hlauh. 

"Kolasib ah lenna a vang e..kan kal tluk tluk tawhna a ni zel a" lo ti thuaiin Boomer chu a chek zui tlak a, a hmel ka en ţhin a, a thinrimna a la reh loh zia a hriat. 

"A awm mai ang, inbual rawh ka lo nghak ang che" Muankima chuan a ti bur mai bawk a, Tintin-a erawh chuan sawi tur hre lovin a ţhianpa chu lainat hmel takin a melh ngawt ngawt ringawt. 

"Ni rawh se, nang berin i tih te chuan" a ti ve ta nge nge a, zangkhai deuh a ţawng a tum na a a lungngaih rukna ka hriat hmaih lo. 

"Tintin lokal ve la. Ka bike i khalh ang a" Boomer chuan a ti na a "Nidangah a ni mai..Phoebe hian min ngen leh dawn a" tiin chhuanlam a lo siam a, Boomer pawh a bu nghut a, inbual turin inchung lamah a chho nghal bawk. 

"Tintin thingpui in rawh aw" ka tih chuan  "Aih..thei tui vawt in neih chuan ka duh zawk" a lo ti a, ka en sak vat. Ka nau nen an inkawmna a rei tawh a, ka nu damlai pawn kan inah hi chuan a rilţam apiangin eitur a lam ngam. 

"U Muankim, U Vanneihi nen hian in in ngaizawng a mi?" Tintin chuan a ti bawl mai. Muankima nen kan inmelh zawk a, ka hawi sawn rang teh e. Boruak kan neihna a la rei mang si lo va, Tintin-a lah chuan kan pahnihin min en tawn chhen. 

"Tintin-a hi chu a..Muankima nen chuan kan inkawmngeih em hi. Nang leh Boomer ang chiahin, kan in ngaizawng lo" ka tih rualin Muankima chuan "Rih lo" a lo ti vut. Ka melh vat a, a hmel a tak run a, fiamthu thawh hmel a pu miah lo. Hei pa pui hi, Tintin-a mitmei ven nachang a hre tawh miah lo. 

"Nih chuan in la inngaizawng dawn ni maw? Mipa leh hmeichhia ţhian an nih chuan an inngaizawng ţhin an tih kha. Eehh..mo hruaina tur a hnai awm..in inneih ni chu a boring dawn mange" a ti a, a nui pah huk huk bawk. Kan rilru hrehawm hlauin sawi tur a dap ruai niin ka hre ber. 

Muankima leh Boomer te an chhuah hnu chuan ka pa ka hmu a, biak a nuam lem lo. 

"Veng chhung mi te pawn mak an ti ang che. Ka nu thihna a la rei lo a, Nu Hriatpuii a lo luh nghal mai chuan engtin nge min ngaih ang? A zahthlak lutuk alawm ka pa, la lut lo hram teh" ngenngawl zet a ka tih pawn "Harsatna an tawk a, kan tuam hlawm ang. Mi te tan a malsawmna nih tum tur. An awm rei dawn pawh ni hlei lo" a ti hmuk a, a rilru a sawh sawn loh hmel hle. 

"Heti em em a i ngaipawimawh mai hian ngaih a ti ţha lo. Nu Hriatpuii nen hian in in ngaizawng ru reng a ni lo maw?" ka tih chuan a ter at. 

"Engmaw i sawi kha? I pa hi ngaihzawng nei ah min puh maw? Min hmuh dan a va mak em em ve" a ti chhur chhur a, a hmel dur nasa lutuk chu a hlauhawm takzet. 

"Chu chu mi ngaihdan tur a ni. Tunah pawh 'an nufa in an lut chhuak peih lutuk' an tia, Kolasib ka rawn luh hma hma aţangin chutiang a min hrilh tu chu an awm. Ţhenawm khawveng te hian engthil mah an hmuh hmaih lo a, an thil hmuh an ngawih bo pui ngai lo bawk. Pa, i fate nge Nu Hriatpuii te nufa hi pawimawh zawk?" ka ti chhuak thawr. 

Rum deuhin min melh run run a, a tum hmuk bawk. Min chhang tawh dawn lo emaw ka tih hnuah "In pawimawh ve ve. Hriatpuii hi rei tak kan hnathawk a awm tawh a nia, Boomer ten school an kal vek hlan te, Aizawl i awm hlan ten a ţul ţul khawihin i nu a pui ţhin. Nang chuan i hre ve vak lo ang a, i nu damlai zawng a enliam thei si Boomer hian a ngaithei ta tlat lo a, a chhan ka hre lo. I nu thihna in a la nghawng anih ber hi. I ţhianpa awm lai a inhauh a ngai kha pawi ka ti khawp mai. Hriatpuii hi kan hna min thawhsak ţhin tu anih angin puih ka duh a, rei a awm a ngai lo vang. In luah tur an hmuh hma chu dawh hram hram rawh" a ti dam thluam a, vin vak vak a har tawh khawp mai. 

"In inngaizawng lo tiraw?" ka ti nawn leh ngat. Ka rilru a nawm theih nan tal hriatchian ka duh. Ka pa hi ka hua a, pawngsual ka nih aţang khan tun thlengin ka la hua. Ka huatna lantir chiam a rem lo thung. Boomer nen chuan kan awm thei ang a, Adika leh Puipuii te an hrehawm lutuk ang.

"Ngaihzawng lo. In rindan kha a tak takah ngai suh u. Hriatpuii thlavang ka hauh hian ka ngaizawng tihna a ni lo" a ti hmuk. 

Ngaihţha zan lo in ka awmzui reng a, an in ngaihzawn ka ring tlat a ni. Pathianni ah chuan ka naute pahnih inkhawm turin ka siam malh malh a, zingkar aţangin ka buai. Inkhawm ka tum lo va, Boomer erawh amahin a insiam mual mual. 

"In inkhawm hlanin ka pi te inah ka leng dawn a, min lo sawm haw mai ru aw. Ka pi te inah ka lo nghak dawn cheu nia" ka tih chuan an bu nghauh nghauh a, Adika leh Puipuii te ka hmuh hian ţah a chhuak tlat zel. 

Ka pi te in a kal turin insiam sa in ka chhuak a, Muankima an inkawtah a lo awm. Bike ah a ţhu a, a lo inthuam thlap tawh. Salvation army an nia, inkawmngeih viau siin kan kohhran a inang lo. 

"I va nalh ve" ti liam puatin a hnungah ka beng thlawrh a, na tih hmel zetin a thaw ri hrawk. Ka kut phah a thip nghal veng veng. 

Ka ban rekah lo manin nuihzat hmel fahran hian min en a, "Lai viau mah la kut min thlak kher lo la" a lo ti a, ka nui lui vak. 

"Ka lai lo bawk aw. Inkhawm banah i rawn leng dawn em?" ka tih chuan "I phal chuan" a ti sup a, "Deuh vel che hian, nidangah pawh ka phalna i la ngai hleinem, over lutuk lo teh" ka tih hlak hlak chuan za lo zetin a lo ţhen sak. A kawr hak chu a var sar a, ka hmu ţha zual hle. 

"Kal tawh rawh..keipawh ka pi te inah ka kal dawn" tih pahin a sam nem thepah chuan ka tuai a, uluk deuh a a siam diam tawh anih vangin chutianga ka tuai chu duh lo in a nur nang mai. Ka ban pahnih a lo man bet tlat lo kha a inchhir viau ang.

Ka pi leh pu te an lo inkhawm daih a, ka nutei a lo awm. Ka pa leh Nu Hriatpuii chanchin tlang kam aţangin a lo hre ve a, ka pa a huat zia min lo fah mawlh mawlh. 

"In unauin lo awm phei daih rawh u. Pasal nei lovin ka enkawl mai ang che u" a ti tan tan a, an chhung an rualin mitmei ven ngai a tam si. A harsat dan tur kan hre ve ve tho. 

"A la insiamţha ve mai ang" ka ti ban charh a, ka thusawi chu kei ngei pawn ka awih lo. 

Inkhawm an rawn bang a, kan ri nghal nak nak. Puipuii leh Adika ten zanriah ei nghal an tum tlat sia, Boomer nen kan haw phei. Ka pa hetiang anih hnu hian Boomer hian in a ngaihtuah tlat a, rei a chhuahsan ngai lo. 

Ke in kan kal na a kan ti ti nasat ve em vangin in kan thleng hma hle. 

"Vanneih, lokal lawk teh" ti a Muankima nu, Nu Puitein min koh vangin ka peng a, Boomer a haw tlang ve thung. 

"Hei cake ka siam a, ka rawn en zeuh zeuh cheu a, in in a inkhar ţhiap sia, lo ei ve rawh u. Ka bei nasa a nia" a ti dap dap a, "Min pe ve duh kher a, a tui hmel si. In lo kham lo vel ang e" ka ti mawi ve. 

"Teuh lo mai..ka fate hi an â tak tak a ni. Cake an ngaina tlat lo. Kan pa nen kan ei a, Adika leh Puipuii ten an duh ka ring bawk a" a ti siam siam a, lawmthu ka hrilh hnuah phur takin kan in lam ka pan. 

"Boomer cake ka lo hawn" ti lauh chungin kawngkhar ka hawn a, Boomer erawh ţhutkhawmna pindan thlang lam a ka pa te pindan kawngkhar kalhna vuanin a lo ding khawng reng.

"Eng nge? Thil dik lo a thleng em ni?" ti chul chungin ka pan hnai a, kawngkhar hawn mai ka tum chu min nam dawrh. A hmel a dik si lo, ka ngaih a ţha lo takzet a ni. Kuttin var pap khawp a nghetin ka pa te pindan kalhna a hum ngawt ngawt bawk. 

"Eng nge? Ngati nge hetah i din reng?" ka la ti chul a, Boomer chu ka en a, harsa tih hmel zetin a kâ in a thaw kawk kawk. A mit a sen deuh rum a, chu chu ka la hrethiam thei, mipa a ni a, a mit a mittui tling râm ka hmuh chuan nasa takin min ti hlau a ni. 

CONT...