THE GOOD, THE BAD AND THE OTHERS-8

THE GOOD, THE BAD AND THE OTHERS-8 

"Miss te kha an awm reng amaw ka tia, han ko teh u" ti a an zing a pakhat thlaphang au ri kan hriat takah phei chuan hlauthawng tawh tak kan ni. 

Pichiu-a ngeiin "Keichu a rik dan hi ka awih tawh lo. Thawhah ri ai chuan muhil hnar ri a ang zawk" a ti ve lung lung a, Mateo thaw ri ngaithla in beng kan chhi ţhap. 

A thaw ri kan hre dawn maw kan tih laiin "Ka tihder a" ti ri kan hre ta zawk a, hamhaih zet a midang an din ţhap laiin rang lutuk kan awmna lamah a rawn tlanphei. 

Engmah sawi lova min pawt ţhu hnawkin ka hma chiah, Muankima an ţhuttir naah khan a rawn ţhu ve nghal zat a, min la ngheng vel zui. 

"I â khawp mai aw Mateo..min ti hlauthawng alawm" tiin an hau sap sap hlawm. 

"Tu tu nge min sik nawk nawk kha? Ka hriatchhuah hun chu in chak lo khawp ang" hahdam zet a ţhu chungin a au lung lung. Amah buaipui tu te chu a la kawk kual dun dun zui. 

An inhnial nak nak laiin Josephine-i ţhiannu ber Jenny chuan "Nizanah thawm ka hria a, Josephine-i room bulah" a rawn ti chhuak phawng. 

Kan beng verh zawng tak a ni chek aniang chu Jenny kan en ţhap a, tumah an ţawng tawh lo. 

"In awih lo a ni maw? In duh leh zan reiah kal ve chhin rawh u. Nizan khan ka muhil thei lo a, a lum bawk si kha room aţangin ka chhuak. A thim vek a, a reh takzet bawk. Zalen inti deuhin ka kal kual a, mahse Josephine-i room zawn ka thlenin thawm a rawn awm" a tih malh malh chuan June leh Mateo te ka melh vat a, lu an thing ve ve. Nizanah an lut lo tihna a nia, keimahni ang bawkin mak ti hmel an pu. 

"Eng thawm nge lo awm? A zai nge a nui?" Pichiu-an a lo tih chuan "Zai leh nui ri hriat tur a awm lo. Phun sep sep ri ka hria a, midang an awm anih ringin flashlight in ka ên a, tukverhah parda a inzar daih sia, kawngkhar ka en leh. Chutah chuan tala a kawngkhar inkalh ka hmu a, thlang lam tukverh aţangin mi an lut ti dawn ila a sang ropui si, light a kawngkhar ka chhun lai ngei ngei pawn chhunglam nge pawnlam aţangin ka hre lo; kawngkhar a insawi det det a, ka hlauh zia chu rapthlak tak a ni. Ka khua a sik hluah hluah lo hi a mak zawk" a tih dar dar chuan kan Mateo bawkin "I la feel tawk lo anih chu" a lo ti hmuk. 

"Eng nge awmzia? Hlauhna a feel vak theih em ni?" Jenny-in a ti bak hlur a, Mateo a melh rawm rawm mai. 

"I thil hmuh leh thawm hriat kha feel tak tak la chuan i khua a sik hluah hluah ang. Sam pawh i nei tawh nang" a lo ti lehpek. Amah hrechiang tu te chuan a uang a ni tih kan hre vek. A nui duh bawk si lo, hrechiang vak lo tu tan chuan a ngeiawm khawp ang. 

"Awii..thlahrang berkher chu feel har deuh asin. Ka ţhiannu ve ţhin mah nise khatianga thawm ka hriat kha chuan ka hlau tawp. Ka hmuh lai ngei a kawngkhar insawi te kha" Jenny chuan a ti zat zat a, a lungawi loh hmel nang nang khawp mai. 

"Miss, Jenny hian Josephine-i thla a hmu. Kawngkhar te a insawi vel" Pichiu-an a ti lauh a, Miss awmna lam kan hawi ţhap. A sam a ti kir chuat a, a lu chu let hnih velin a len belh. 

"Piangthar lo apiangin inhmu ang. In ngai lo hlawm lutuk a a rawn tlawh cheu nih kha. Zantin a rawn tlawh kual dan dan ang che u" Miss chuan a lo ti mai a, a fiamthu nge a ti tak tak a hriat theih bawk si loh. Dawih zual deuh chuan tim daiin kan en a, a sam thar chiah a buaipui. 

"Angel, i bialnu hlui chuan Jenny chiah a tih ţhaih bik anih chu" zawhte squad zinga pakhatin a rawn ti a, Gabriel-a chu an nuih dar dar. 

"Naa..ka bulah a mu ziah. Ka sawi lo mai mai" ngaihsam hmel fe in a ti na a an chhaih duh dan chuan a lung a tih awi loh zia ka hmu thiam. 

"Josephine a thih meuh chuan Muankima status ah pawh hmeichhia kan hmu ngam ve ta lawm" Pichiu-a pek chuan a rawn tichhuak hlawl. A ngaihna hre lo zetin Muankima chu ka melh nghal vat. Josephine kha a inla hrang nalh emaw ka tia, mipa engzat nge inzawmna a lo neihpui le? ka ti hman rum rum. 

"Ehh..sawifiah ngei a ngai ang" June-in a lo ti thuai a, sawi turin an nawr sek hlawm. Duh aiin kan inhrechiang mah mah hlawm a ni. Hostel ni miau hek le. 

"Ka ţhiannu" a ti bul hmuk a, thil dang sawi tum hmel a pu lo. 

"A thih hma zan khan cabin kawtah ka hmu dun che u" Nuntea'n a rawn tih phei chuan kan hawi kan hawi tawh. Josephine ka chhanna kha midangin an hmu daih maithei tiin Muankima hian min hrilh a, cabin bulah an hmu dun bawk. Ngaihţhat lohna tham a ni. 

"Nang hi i rui sualin i lo rek hlum daih te a ni lo maw? Hostel ah chuan i tlangin duh duh danin i che ngam ber a" an ti a, an ringhlel hlawm tih a hriat. 

"Ve lutuk cheu hian. A mu hlum an tih mawlh mawlh kha. Ngaihdan mawl mang te te ka nei e in tia, hrechiang hawt lovin Muankima puh ve ringawt suh u. A ruang kha post mortem eih lovin a chhungten an khuaah an haw pui a, damdawi vang a thi te pawh a ni maithei asin" Vulmawiin a rawn ti tan tan. "Diktak chuan Gabriel te nen an khua a in ang a, Muankima ai chuan an inhnaih daih zawk tih kan hre tlang vek" a ti tel hram. Muankima bulah a ding a, min melh hlum vek tum ni awm tak a rumin min melh kual hlawm. 

"Nih chuan Angel, in khaw lamah an sawi zui em? Ngaihţha lo deuh hlek te an awm ve em?" tiin Gabriel bawk an en bik leh tawh. Ani chuan dar lo san khum ukin a hriat loh thu a sawi mai a, awih loh hmel zetin an ner nang nang hlawm. 

"Mitthi tawh chu nge maw in buaipui chiam le? Police in ni lo va, a chhungte berin chhui chian ţul an tih loh te chuan ngawih san rawh u. A thla mai mai te chu duh leh hrang mai mai ang hmiang" tiin Gabriel-a thlavang ka hauh ve thung. 

"Min han dem ve vel teh u. Lucky in ka thlavang a hauh ri ka hre chak" Mateo chuan a lo ti pek a, boruak thlak danglam a tum chu a lawmawm khawp mai. Muankima leh Gabriel te demna an zawng ţha leh hlawm a, an rilru a hrehawm lutuk dawn tlat. 

"Josephine kha chu a hur ve a, mipa han mutpui mai a hreh hauh lo. Muankima leh Gabriel ten an hrechiang ang" ngeiawm rawngkai lek lek a ţawngchhuah pahin Numami'n Muankima leh Gabriel te a melh ralh. Mitthi tawh chanchin kan sawi chiam chu duh lo tu tam  viau mah ila kan khap dai thei chuang lo chu anih hi. 

"Kha chu ka hria..mipa a kawp tawh mutpui loh a nei lo. Chuvang chuan a chhe lo viau na a Josephine nen a sawi zawm ka duh lo. Miin mu dun turah min ngai zel" Ruatpuia'n a rawn ti ve nulh. Hepa hi chu hmeichhia ang chiah a ţawngthei kha a ni ve hrim hrim a, mi rel a hrat. 

"Duhtawk rawh u" Muankiman a rawn ti bul hmuk. A ngawi rei thei ka ti reng a ni. A vin hauh lo na a tuman Josephine leh a mipa kawp chungchang kan sawi zawm tawh lo. 

"Mateo, hnar ti za vek thei khawp a nangmah a bet tlat an awm ve em?" June chuan a ti ta ta daih a, Mateo a ţhut hnaih tawhin tuman min rawn ngaihsak tawh lo. "Hnar hial ti za thei khawp a min chawk phur tu, chutiang a duh chu i nei ve tawh em?" a ti leh sauh sauh. 

"Sam zai a ni mai lawm. Lu ah a bet tlat a, hnar hawlh zat nan a hman theih bawk a" Mateo chuan a lo ti dut dut a, ka hma a ţhu a nih vangin June lam hawi pahin ka khupah a ban a rawn dah vel. 

"Hmeichhia mawle...duh ngawih ngawih i nei em tihna?" June in a tih leh chuan "Lucky" ti supin min rawn melh a, ka lo en ve veleh "Henu hi ka duh. Pawnchhe hnawlin min hnawl daih a" nur nang hian a lo ti a, tihngaihna dang awm hek lo, hmalam hawi turin ka kuai lui ta ringawt. 

"Hey Tuaipui" rawn hawi let leh pah a a tih chuan June a lo nui hak. 

"Ninawm e...i duh duhin min ko suh" ka lo ti hlar a, "Ka mitah chuan i tuai puak a, Tuaipuii i ni mai lawm..ka Tuaipuii" a ti thum bul bul a, tum bar mah ila June nuih ka ti za ting a ni mai. 

"Nge maw i nuih reng le? Zuzu awt nu" Mateo chuan a ti chhuak bawl mai. June a sawina a ni lehnghal. Hlauthawng zetin June ka melh a, a nihna diktak midangin an hriat a hlauh viau laiin Mateo chuan a hre leh tlat. A thinrim ka ring viau na a a nui uar sauh a, midang an kal darh tawh bawk nen ka nui ve ta ringawt. 

"Hman zan a Josephine-i room a in luh khan thawm in hre ve em?" ka lo ti ve thung. 

"Hria ang chu..hmui vawt thlerin min fawp thuak thuak alawm" Mateo chuan a ti mai a, June erawh chuan engmah an hriat loh thu a sawi. 

"A ho emai..lo hrang ta tehreng pawh nise a hrang ve a ni mai a, hostel awm a la kham lo aniang chu. Ka hlau lo nasa" June bawk a ni. Zuzu a awh ve aia nasa in a huaisenna chu ka awt. An sawi zawng ringawt pawn keichu ka hlau. Muankima nen a an hmu dun leh inzawmna nei ang mai a an sawi kha mak la ti viau bawk. 

"Weekend ah haw tawh bik suh u aw. I naute ngaihtuah tho mah la Mateo te resort ah hian chawlh hmang ve tawh ang u. Kan kal khat emai" June chuan a rawn ti hlauh a, ngaihtuahna kal ding lutuk tur pawh pen daih hi a thiam zawng a ni ve. 

"Nia..haw lo ang. Ka naute lung ka ti leng mai mai" awlsam deuhin ka lo ti ve mai. Diktak chuan in a haw ka chak hlawl lo a ni. 

"Muankima nen in ni daih a nuam pawh ka ti tawh lo" tiin Mateo a tum bur a, "Bialnu ţha tawk i la nei mai ang" ka ti a, zahzelah a sam ka khawihsak pah niap niap. 

"Nakinah Kolasib ka la rawnkal ve ang" a ti ta hem mai. Kan inchhung boruak a hriat ka hlau ropui sia, rawnkal lo turin ka duh. 

"Hmelhriat i nei em ni?" ka tih chuan "Ka pu te an awm. Ka nute in pasal a la nei lo bawk a, ka putea chu pastor niin thingtlangah a awm" a tih hnuah min rawn melhin "Tlangval virgin senior" a ti deuh kher. 

"Ka hre hrim hrim ang. Tu te nge a?" ka tih chuan "Ka nutei chu college ah khan a thawk a, i hre lo ang. Ka pi leh pu te chu an tar tawh" naupangchhia zet hian a ti a, "A pension hnu khan kolasib a awm a thlang. Ka pi te khua a nia, a ngai ve tlat anih hmel. Ka pu chu ka pi thu thu aniang" a ti leh mual mual. 

"Chhungte in neih ţhat chu. I nu'n eng nge a thawh ve?" ka lo ti thuai. 

"Engmah a thawk lo" uar zet a a tih hnuah "Fapa, pa leh chhe lo lutuk min nei a a duh tawk" a ti hmuk a, kan nui lej rih ţhin. Mateo bul a awm chu a hahdamthlak a ni. Chhungkaw buaina nei ve miah lo ka ţhiante hi ka awt bawk. 

"Nangmah chiah fa an neih che chuan an ngai dawn che anih chu" ka ti dek dek a "Keimah chiah min nei lo nasa" a ti lung lung. 

"Unau pali lawm an nih..nau pathum a nei ve ngei, hmeichhia vek an la ni zui" nui har har chungin June chuan a lo ti a, an inhrechiang ka tih tawh kha. 

"I nupui chuan hrawn tur hmeichhia a ngah ve dawn nih chu" tiin ka lo fiam ve zeuh. Hmeichhe tamna a luh chu hmeichhia vek hian kan peih lo tlangpui ţhin. Neuh neuh a tam duh bik tlat. 

"Ka kid te vek..min hlau lutuk. An lam hawi a ka men rum tawh chuan zun an cheh ţhawt zel" ti pung pungin Mateo chu intithei zetin a nui a, June lahin a lo lawm nasa. Inhmeh dun tak an ni. 

"Renthlei mipa chuan nupui an ngam lo an ti. Mateo pawn nupui a ngam dawn lo tihna" Jessie in a rawn ti ve zeuh. Kan bulah a awm ve reng tih kan lo hre miah lo. A thusawi vang chuan Mateo a lo ner suk. 

"Renthlei mipa chuan nupui ngam deuh siin an duat thiam an tia lawm. Kan ţhatna hmu thei miah lo tu chu kolasib nula an ni duh" a ti deuh kher. Ka sawichhan che ti ni awm fahran a min rawn melhin a kiai suk a, lei ka lo chhuah zeuh a hmuh chuan a nui chhuak hawk. 

Muankima pawh a bo vang vang hnuah a rawn chhuak veleh a, a inbual diam tawh bik ni tur a ni a sam hnawng chap chu a la langsar hle. Josephine chungchang a kan inhnial laih laih lai khan a in la hrang daih a, tunah a rawn lang leh chiah. 

Ka bul a a rawn ţhu chu "Hriatchian chak ka ngah a nia" tiin a beng bulah ka phun ser ser. Min rawn melhin nuihzat hmel zet hian lu min buk khum nghut a, thikthuchhia min ti leh tawh aniang chu. 

"June, Mateo nen hian in inhriatchian hmel bik. Hostel a inhria in ni ve awm tho sia" ka sam huh zualpui hruk ro pahin ka zawt a, darthlalang aţangin a hmel ka en pah bawk. 

"Kan unau a Aizawl a in kan luah ţhin lai khan ka nau nen St. Paul's ah an lut dun ţhin alawm. A rawn leng ngun ve a, a pianchamah ka nau nen an inah chaw kan ei ve tawh bawk. Nang ai chuan ka hre thui hret maithei" a tih laiin Jessie in kawr pakhat a rawn khai lang va va.

"Hei in kawr a ni em? Bathroom ah ka hmu a, a ro tho sia ka rawn entir cheu" a tih chuan "June aniang" ka ti liam satliah. 

"Ve che hian...kawr pink, par nasa lutuk lehnghal ka hak i ring a mi?" a ti hluai. Jessie kawr kenlai chu ka en nawn leh hnuah pawh ka ta a nih loh thu bawk ka hrilh leh. 

"Nidangah ka hmu ngai miah si lo a, ka ta a ni lo in ti ve ve bawk si. In va han chiang lo dun tak" a ti a, rinhlelh hmel deuhin min la melh ran. 

"Ka ta a ni lo tak tak" ka tih laiin khum aţangin June a chhuk a, kawr melh ran reng chungin Jessie a kal hnaih zel. 

"Hei chu Josephine-i kawr a ni lo mi? I la hria em Lucky? Nu Hlimin cotton par hak nuam deuh chi a rawn ken ţeuh ţum kha, i hre lo anih pawn Nu Hlimi chuan a la hria ang" a ti fak fak a, a hriatchian hmel phian. 

"Nu Hlimin a rawn keng ţhin tih chu ka hria, keipawn ka lei nual. Mahse Josephine-in a lei ve em tih te chu ka hriatpui ve miah lo" ka tih laiin Jessie chuan "A kawr a lo nih tak tak chuan engtin nge bathroom ah a awm theih? A thawmhnaw chu a chhungten an la vek tawh a ni lawm ni? Hostel ah hian a awm tur a ni tawh hleinem" a ti chel chul a, a meng phar nasa in a hlau nghal hle tih a hriat. Keichuan ngaihţhat lohna ka nei miah lo thung. 

"An theihnghilh palh aniang" ngaihsam fe a ka tih liam puat lai chuan Jessie bawkin "Nidangah a awm ngai lo ka tih chu. A thih aţangin ni a liam leh duai tawh a, bathroom chu kan luh ngun na ber a ni. Theihnghilh chu nise kan hmu daih tawh ang" a ti vin hlar. 

"A thla a hran ve i ring tihna mi?" nuihzat hmel zet a tih pahin June chu hahdam deuhin khumah a mu leh. 

"Mak in ti ve lo mi? A thi daih tawh a, nidang a awm ngai hlei lo a thawmhnaw bathroom ah a lo awm ringawt a, in hlau miah lo mi?" tiin Jessie chu a thinrim hmel takzet. 

"Thil thleng palh anih kha..a thawmhnaw ringawt chuan min ti hlau lem lo" ka ti a, ngaihţhat lohna pawh ka nei chuang lo. Jenny-in thawm a hriat vangin an ringhlel vel vek tawh ni maiin ka hria. 

"Thih pangai a thi a ni lo chiang alawm. Mu hlum hrim hrim chu ni se eng thawm mah kan hre lo ang a, a kawr pawh kan chhar lo ang" Jessie chuan a ti hlak hlak a, a vei kual chhen. 

"A ding hlum tihna mi?" fiamthu bawkin June in a lo chhang leh. Jessie a rum hak a, keipawn ka nuih liam vel mai mai. 

[Cabin ah] tih zawng hi Muankima hnen aţangin ka dawng a, ka nui sak tho. Zan chhuah ruk a khat tawh a, ka bialpa hmu tur chuan ka chhuak ru leh poh aniang chu. 

Mahse zirlai ka bih kual laiin Boomer hnen aţangin call ka dawng. 

"Aw..Boomer" ka ti na a "Keimah zawk alawm U" Puipuiin a rawn ti lang lang. 

"E..Puipui eng nge ni ta? Lehkha in zir em?" zangkhai thei ang ber a ka lo tih chuan "Zir lo..Nu Hriatpuii te an rawn insawn lut a, ka lo hrilh che a" a tih laiin "Engmah sawi suh ka ti a ni lawm ni?" mipa aw in a rawn ti hrawk a, Boomer ngei a ni. 

"Khawi teh phone min laksak suh i huh vek kha..U, Boomer hi tlai aţang khan inchung a kan bathroom ah khan tui vawt a inphuh tir char char a nia aw. Shower hnuaiah a ţhu tlat. Adika nen a â daih amaw kan ti alawm" Puipuii chuan a ti leh zat zat a, "Vanneih" ti a Boomer-a min ko ri ka hre zui zat. 

"I damlo mai ang a sin. Rilru nat viau pawn khatiang a tih kha sim rawh ka tih kha" ka ti tan tan. A tihziah dan a ni. Thinrim na leh rilru natna a neih chang chuan shower a pan vat a, tuiin bual huh vek mah se mi â ang maiin en ngai a en tlawk tlawk zel. 

"Ka hnathawhna bal ka tleuh fai. Chuzawng chu" a ti bung nghut a, ka awih chhe te lo. 

"Nu Hriatpuii te kha i lo dang bet thei lo anih pawn inhrem kher suh. Engtik ni ah emaw chuan hman ang khan hlim deuhin kan la awm leh mai ang. Chutah chuan innghat tawp rawh" ka ti malh malh. 

"A u kha ka be leh duh" Puipuiin a lo ti chung a, ning tih hriat zet a a thawk hawk hnuah Boomer chuan "Eng buaina mah hrilh tawh suh ang che" ti vin hlukin a ri zui rawk rawk. Phone an inpe chhawng anih hmel. 

"U..ihmaw...Boomer-a lukham hnuaiah inchiuna kan chhar. I duh leh Adika pawh zawt rawh" Puipuiin a rawn ti su su a, naupang thusawi mah ni se ka thu hriat chuan min chhun zawkin ka bing mum mum. 

"Engmaw?" ka ti khur der der a, ka aw chu a ri chhuak chang chang a ni ber. 

"Adika nen a khumah kan infiam a, lukham hnuaiah kan hmu alawm" a rawn ti leh a, Puipuii hi a fing a, syringe hre lo rual a ni lo. Adika takngial pawn a hria ang a, Boomer-an engatan nge a hman an hre lo thung ang. 

"Ngatan nge a tih in zawt em?" dam thei ang ber hian ka ti a, tih chiai palh ka hlau hle. 

"Uite chiuna anih kha..ka ţhiante uite pawh khatiang khan an chiu" ti a Adika ţawng ri ka hria a, Boomer-a thawm erawh hriat tur a awm leh tawh lo. 

"Nia uite damlo chiuna a nia, Phoebe a damlo aniang" Puipuii thusawi chu a nawi leh tawh khawp mai. Phoebe an tih hi Tintin-a ui an sawina a ni. 

"Puipui inchiuna chu eng ang nge?" ka tih chuan "Tereuhte..Adika ţhianpa te uite damlo an chiuna ang kha" a rawn ti a, chutiang bak chuan sawifiah ngaihna an hre lo. 

"Boomer ka lo bia ang" ka ti leh ta zawk. Damdawi a lo khawih ve aniang tih ringawt rilru ah a awm a, ka hlauthawng lutuk chuan ka thin a ti phu rangin ka awm hi a deng ri dawt dawt ni maiin ka hria. 

Ka nghah vang vang hnu a "Keimah" a rawn tih chuan "Khaw nge i kal leh hman?" ka ti vin hlar. 

"Ka intleuh leh thuak" a rawn tih chuan "Rilru hah chhawk nan ruihhlo i lo zawng kuah ve ang e aw" ka ti chhuak thawr a, a nui hawk ri te chuan thla a ti muang pha lo nasa. 

"Ruihhlo ka zawng kual hman lo" a ti bul hmuk a, ka ngaihţha zan lo chuan "Syringe te pawh i kawl a ni lawm ni?" ka ti ta nge nge. 

"Kawl e" a ti leh mai a, "Engatan?" ka tih chuan "Hmanna a awm ve..bur chhung a thil kah luh nan te. Puipuii leh Adika te mi?" tiin atthlak tih hmel zetin a chek zui hluk. 

"Ni e...min ti hlauthawng alawm. Khatianga ui an chiu lai kha an hmu tawh sia, Tintin-a ui a damlo maw an tia" ka tih chuan a nui ve huk huk a, ka hlauhna a la reh hleithei der lo. 

"Ruihhlo hrim hrim khawih miah suh ang che. Tih ve chhin pawh a ngai lo a nia, rilru thawven deuh beiseiin i thisenah eng thil mah thun suh. A zual kai daih zawk dawn nia" ka ti mawlh mawlh.

"Ka hria..zirlai chiah ngaihtuah rawh" a rawn ti leh tawh a, Nu Hriatpuii te inthiar lut chuan rilru an uai rit nulh bawk. 

"Boomer..hrehawm in tih viau chuan ka chawl rih ang a, Aizawlah kan unauin in kan luah ve rawih mai dawn mi?" ka tih chuan "Ngaihtuah hlek suh" a rawn ti vin hlur. 

"Ka nu lunghahna leh a sulhnu te hi ka kalsan dawn lo. Kan in a nia, kan inchhung a duh ang thal a nuam an chen theih nan khawiahmah ka kal lovang. Mitmei veng ranin awm reng zawk rawh se" a ti nghut nghut a, insawn chhuah chu sawipui chi niin ka hre ta lo. 

Kan inbiak zawh chuan ka hmai ka hup vang vang a, nu te lo sun tawh tam tak an awm, keini ang a boruak chhia in a bawh zui mawlh mawlh an tam lo ang. A hahthlak leh ipik thlak lutuk hi a chang chuan mahni chauh a awm a ţah vak vak ka chak ţhin. Ka naute ka mitthla ah an lo lang a, ka khawngaih lutuk na in ka mittui a kaichhuak lo thei lo a, ka ţhiante mitmei ka veng seng tawh lo. 

Ka lehkhabu chung a meizial ni awm tak rawn tla hlawm tawp chu phe ruaiin ka hmu a, ka ţhutna bul chiah a ding June ka melh chho ha. 

"Eng nge? Meizial ka zu ngai hleinem?" ka ti ţuak a, ka hnung a ben tharh pah a "Weed a nih kha..i zuk duh chuan kan chhuak ru dawn nia, i zangkhai hawk ngei ang tih ka sawi ngam sak" a tih chuan lu ka thing nawk. 

"Ruihhlo khawih miah lo turin ka unaupa ka lo hrilh zo chiah" ti a mittui tuai faiin ka nui ro hak. 

"Ţhat chu..tih loh theih kha a ţha. Ka pe lui miah lo ang che" a ti a, a la let leh mai a, "In buaina ka hre kilh kelh lo na a a la reh ve mai ang" a ti zui zat bawk. 

"June, min lo zunpui teh. Ka ip rei tawh lutuk. Keimahin bathroom ah ka lut ngam tawh lo" inhup chawih chawih chungin Jessie a rawn tho a, a khawngaihthlak angreng. 

"I dawih ve sia..a insiamchhiat leh amah aia nasa in insiamchhia la, tih ţhaih reng chi ah a ngai lo mai dawn che lawm" ti hlak hlak chungin an kal pui. June hi chu a bialnu hostel ah a awm ve lo a, MZU ah a kal ve thung. Vawihnih ka hmu tawh a, a tam zawk chuan an ui ngawt ang. June ka ui ang chiah hian.  

Mi mutreh hnu ah ka chhuak ru ta ngei a, cabin lam ka pan vang vang. Ka thlen hma aţangin cabin chhung êng va ka hmu thei a, Muankima a awm tawh tih a hriat. Ngawi reng a ka chhuk lai chuan ka piah deuh ah hian hnah thel ro rap ri ka hria a, ka hawi phei rang nasa. Thawm a reh a, tumah hmuh tur an awm lo. Room chhung a ţhiante bul a awm ka ni tawh lo bawk a ka hlau kher mai. 

Hmanhmawh deuh a chhukin cabin ka thlen rual rualin kawngkhar ka chum bur bur. Chhung lamah a lo kalh khanglang anih hmel. Muankiman a rawn hawn rual chuan lo kuah nghalin "Josephine kha a hrang tak tak aniang, ka rawn chhuk lamah pawh hnah ro rap ri rawk ri ka hria. Vawikhat chiah ka hre na a ka hlau lutuk ringawt" ka ti hliam hliam.

"Pengluaia anih dawn chu" a la ti then zui a, "Thawm zawng zawng pengluaia thawm a ni bik hleinem" ti hlarin ka inla hrang. Khum si chet a dawhkan inhung chu pawt kau deuhin khumah ka ţhu a, dawhkanah lehkhabu pahnih vel inkeu sa in a awm. 

Ka ţhut tum bur reng takah chuan "Dik lo a awm em?" a rawn ti sup. Kawngkhar bulah a la ding run a, chik zetin min lo melh ngur bawk. 

"Awm e..thawm ka hria a, Josephine an sawi hrang si, ka hlau anih hi" ka tih chuan kawngkhar a kalh a, keimah bawk min melh leh ngur chungin ka ţhutna lamah a rawn pen phei pawk pawk. Lungawi lohna a nei emaw ka ti rum rum. 

Ka hma a dawhkan chu rawn nam runin "An hau che mi?" a ti rum ul a, cabin a ka chhuk hma khan ka naute vangin ka ţap tak e. Ka mit a bui lehpek aniang chu. 

"Teuh lo mai. Hostel ah na na na chuan tuman min hau lo ang" ka ti a, ka nui lui pah vel. 

"I ţap tiraw?" la rum deuh tak hian a ti leh sup a, "Ka lung a leng thut a, min en reng lo teh" ti hlakin a awmah ka nam dawt a, ka thusawi chu a awih lo hmel nasa. 

Khum chu kal hualin lehlam aţangin a rawn lawn a, keipawn khumah chuan ke hlangin ka insiam rem ve vat. Khum lu ngheng a kan ţhut dun rauh rauh hnuah "Nu Hriatpuii te an insawn lut a, thawmhnaw nen an lut rup a ni awm e. Ka naute enkawl thei tur a hna ţha deuh neih ka chak ngawt mai" ka ti sep sep a, ka rilru hahna chuan taksa thlengin a hmet chau. 

"I naute chu an chhuak duh em?" a rawn tih chuan "A te pahnih chuan an duh ang. Mahse Boomer ber hi a nia, a chhuak duh miah lo ang" ka ti a, ka ipik lutuk chuan am takin boruak ka hip a, ka thaw chhuak leh ham ham. 

"Kan inah" a ti hman chauh tih chuan lo pawt chatin "A ngai lo..min pui nasa ţhin a, tunah chuan a ngai rih lo. Bakah Boomer hi a nauten kal chhuahsan suh se. A buaithlak vel vek rih a, kan awmzel dan tur chu hunin a la hril mai ang" ka lo ti hmawk hmawk. 

"Umm" a lo ti ringawt a, thutlukna ka siam tawh chuan amah ngei pawn a tih danglam theih loh zia a hria. 

"Josephine chu engtin maw?" ti a zawh pahin a lam ka hawi a, a hmui a lo ti sawi ringawt. 

"A thi tawh tho na a han sawi ve hrim hrim teh" ka ti tlat. Tlai aţang tawh khan Josephine nen an hmeh bel apiangin a hmel a tak ngulin a thim mup zel a, eng emaw a awm ka ring tlat a ni. 

"Hmelhriat satliah" a ti sup ringawt a, sawi zawm a tum loh hmel lutuk chu "A thih hma khan in inhmu tak tak a mi?" tiin ka kar. 

"Aw..a thawm ka hria a, cabin aţangin ka chhuak. Kan inbe zuai. Thil dang a awm lo" a ti hmuk hmuk a, "Thudik i sawi em?" ka tih leh hram chuan "Dawt sawi hmel ka pu em?" a lo ti ve vat. 

"Ngati nge an hmehbel tlat cheu le? Hrechiang an inti hlawm sia" ka ti nuah nuah a, "Sawi mai mai rawh se" ti bul hmukin a mitmeng a thim zual sauh a, ka zawt lui duh ta lo. 

"A hrang tak tak em lo ang chu" ka tih chuan "I la hlau a mi?" a rawn ti a, min nuihzat hmel em em lehnghal. 

"Hlau deuh e" ka lo ti mai a, ka hmazawn a a rawn kun phei chuan ka ţhu ngil sawk sawk. 

"Hlauhna nuai bo dan ka hria" a hmel a nuihzatna langchhuak chung hian a ti zawi sup a, "Engtin?" ka tih rual a ka ban rek a rawn man chuan lu ka thing nawk. 

A nui hmel chu ral riai riaiin ka hmui a en ding ngur a, "I hre mai ang" ti hapin a thaw huai a, ka manrek a vawnna chu a thlah a, ka hrawk aţanga chul chho in ka khabe kualah a dawm a, dimte a min namin khum lu a nghen tur a kan dah lukham chu min nghen tir lehin a rawn kun hnai zual sauh. 

Amah ngawt en ve reng chung chuan a sam nep thep chu ka chul a, ka kut awl lamin a nghawngah ka lo kuah ve tlat bawk. 

A hmui a ka hmui a rawn nawr sik rual chuan ţek den ang maiin ka hit chuai chuaiin ka hria. Ka chak lohna hrechiang ber tu chuan ka khur ru dar dar pawh chu a hrethiam ngei ang. Kan taksa a insik theih nan a insiamrem pah a ka fawh let ve chuan rum chhuak hawkin a hma aia uar leh duhthaw in min fawp a, a taksa si chial khawp a nghetin min kuah bet tlat bawk. A lei chuan inti thunei zetin ka ka chhung a hawl kual nawk nawk a, insum zo lo va ka rum hak hak te chuan zei fahranin min fawp zel a, a khabe a dawmna kut zawk chu ti chein ka nghawng a chul thla a, ka hmui seh nar nar chungin a kut chuan ka awm bawr thlengin a nul kual a, Muankima min tawhna avang chuan ka taksa chu danglamin a darah nghet zetin ka ţham a, ka thiam loh a ni miah lo chungin ka danglam hma lutuk hi ka inhaw viau ţhin. 

Vawi leh khatah a thil tih lai chu tawp thutin "Hetiang chuan ka khawih thei lo ang che" a ti hrawk a, ka la kuah bet tlat. Min khawih a tum tak lohah chuan a nghawngah hmai ka phum kak a, thaw ham ham chungin a awm ka chul a, ka chhungril aţanga min tur tu hi nasa takin a rawn thawk ţhin a, ngial ngan deuh a sawichhuah ngam chi a ni lo. Kei ngei pawh ka zak a, mihring thar hlak ni tur a pian nawn leh ka chak ţhin. 

"I tawrh theih zia i hre mai ang" ti zawi supin ka hnungzang a chul hauh hauh a, a inthunun nasat zia ka hria, ka fak khawp mai. 

"In thunun i zir mek anih hi. I hneh theih zia hriattir che ka duh" a ti zawi leh ruih a, ka awmdan hi ka tawn ang tawng ve te chauh lo chuan an hrethiam lo vang. Hmeichhia ve si, mipat hmeichhiatna lam a chak lo lutuk nih hi a zahthlak takzet. Mahse, ka nihna a ni tho. Rei tak ka tuar tawh a, tun thlengin ţhan thi ka neih hma a pawngsual ka lo nih tawhna khan min la nghawng chu anih hi. 

"Reilote ka mu ang a ka chho ang" tih leh mut ka rual a, Muankima chuan puan pan te min rawn sintir in ka bulah a rawn mu ve. Saisir a ka mut rualin hnunglam aţangin min rawn kuah a, insi chial a mu kan nih vangin a thinphu dat dat chuan ka hnungzang chu a nghawr thei hialin ka hria. Keimah ang bawkin a thinphu a mumal bik tlat lo. 

Ka inlet thawk a, zangthal a ka mut takah chuan inbeng kangin min melh chhuk run. "Ka lawm e aw" ka tih chuan hriatthiam loh hmel zetin a mithmul a lo kan uk a, "Aww..keimah tawp min duh hi" ka ti chhuak sep. 

"Ka duh che maw?" a tih chuan ka tum bar a, "Min duh lo mi? I sawi vek kha..hre lo der vel lo mai teh Lalmuankim" ka ti vin hlar a, nuihza insum zet a min melh ruh ruhin ka dul zawnah a kuah a, a ban ah ka lo dawm ve thuai. 

"Mahse ka hlau...in hau vak ta ila, kan inţhianţhatna thlengin a chhe vek ang a, chu chu nia hman aţanga ka hlauh ber" ka ti malh malh.

"Ka hau lo ang che" a ti mawl tawp ringawt a, sawi tur a hre lo ve thei nia. 

[Parking ah rawnkal vat teh. Muankima hrilh suh] June hnen aţanga ka message dawn teh tlawng chu! 

Phone ka hmet thim thuai a, Muankima nghak lovin "Ka lo han chho ang. Pahnih kan inzui chuan min man palh ang" ka ti sawk sawk. 

Min chhan hun pawh nghak lovin ka chhuak a, hlauhna ka la neih vangin ka tlan chho dawr dawr. Kawt zawl ka thlen veleh "Lucky" ti a min au ri ka hria. 

June zawkin min rawn pan hnai a, "Mei zuk tumin ka chhuak ru a, Vulmawii leh Gabriel te parking lot lam a an inzui ka hmu" a ti hlawk hlawk. 

"A va ho tak...an chhuak ru ve a ni mai lawm. Hah tawkin ka rawn tlan chho ve a" ka ti nang nang chu "Gabriel a chhuak ru ngai hleinem. Mateo nen kan chhuak ru ngun ber a, chhuah ruk hrat ho chu kan hre lutuk" a ti hlak hlak a, ka ban a pawt lawp a, garage lamah min hnuk dawr dawr. 

A thim viau na a mi pahnih ding an awm tih chu a hriat theih a, an hmel a hmuh theih miah loh thung. June ka zui zel a, hmanni a a tawm bo na bang lian leh hlai hlup phenah khan fimkhur deuhin min luhpui.

"Eng nge kan tih?" ka tih rualin ka hmui a rawn hup chawt. 

Min thlah rualin "Min sawm ve kher a" ka ti leh hram. Vulmawii nui hak ri kan hre zui zat bawk. 

"Min manchhuah chuan mahniin ka tuar dawn. Chu chu ka duh hleinem" a ti su su a, bang nghengin ka ţhu tum bar. Zan a rei tawhin a reh tlawk tlawk a ni ber.

"A ţhing e" ka ti chhuak leh a, ka ţawng ring ngam hauh lo. 

"I ninawm...nakinah ka hrilhfiah ang che" zawi si sehchilh zet si hian a lo ti a, hriat a nei a ni maithei. 

"A danglam tak thut vang mai chuan thih a phu i ti deuh em ni?" Vulmawii chuan a ti chang fak a, inhmu chiang hleithei si lovin June nen kan inmelh ralh. Hriat chu a lo nei ngei a ni. 

CONT...(Ka edit hman lo..mistake a tam maithei. Hunawl ka nei hlawl lo va)