THE GOOD, THE BAD AND THE OTHERS-9

THE GOOD, THE BAD AND THE OTHERS-9

"Gabriel min chhang lova kal tum miah suh aw. Eng nge maw a awm a, chu chu hre lo turah min ngai miah suh" Vulmawii chuan ti hlak hlakin a ke pen ri kan hre zui zat. 

"Kan ngaithla rei lo ve e" ka ti chhuak sep. Ke pen thawm a reh fel veleh June chuan "Zan dangah ka zui ru leh ang" a lo ti bur. 

"Engti tih a zui ru ringawt thei nge i nih? Gabriel kha i ringhlel deuh tihna mi?" ka tih chuan "Kal phawt ang" a ti leh daih a, thawm dim tak bawkin parking lot chu kan chhuahsan. Gabriel leh Vulmawii te inhmuh ruk duhna hmun berkher lah hi a mak. Mi awm lohna ber a an rin a ni phawt ang a, June a kal ziah tih an hre lo a ni. Lirthei dahna tur an siam hian chung a nei ve a, sang lo deuhin a inhung kual na a kil khatah hian bang sang deuh bik a awm a, chumi phenah chuan June a tawm kâk zel. 

"Engtin nge i zui tawp theih?" room kan luh zualin ka zawt lehnghal pang. 

"Chhuah ruk tum a ka chhuk laiin Angel-a khan phone a hmang a, Vulmawii hming a lam ri ka hria. Tlai lam a an inbiak dan chu i hriat kha. Ka chhuak ru dawn tho tho sia, thu pawimawh an sawi takin ka tia. Eng em em kan hre leh chuang der si lo va" ngaihsam zet a a tih chuan "Ti nge min koh ve kher?" ka ti hrak. 

"Awww...thawm ka chhuah a min man palh takin keimah a tawrh ka peih lo. I chhuak ru tih ka hre tho bawk a" tiin ngeiawm deuhin a hmui a ti sawi a, ka lo ner nang nang te chu a lawm zawk emaw tih tur a ni. 

Mut ka tum vek tawh laiin kolasib aţang bawkin call ka dawng leh. Zan a rei tawh a, thu lawmawm hriat inbeisei miah lovin ka la a, June pawh ka khum mawngah a rawn ţhu fel than. 

"Hello" ka ti chiah chu "A u..Boomer leh U Daisy te an insual. An inhau vak vak a" Puipuiin a rawn ti chul. Adika nen an awmdun tih hriat zetin Adika zawk chuan "A hmuhnawm lutuk" a rawn ti lauh bawk. Kan mualpho dawn tehreng nen, Boomer pawh ţhenawm te tibuai zawng a thawm siam miah loh tur asin le. 

"An va mawl ve..kan dinhmun an hre vek a, tawm tlat tur an nih laiin ngati nge ţhenawm te bengverh zawng a thawm an siam" ka tih hlak hlak lai pawhin thinrim inhnial thawm ka hria. Daisy hi Nu Hriatpuii fanu a ni ka tih tawh kha. 

"Daisy...dai zau, ka tv en lai rawn off ngawt nachhan tur i nei lo. In in anih loh hi. I nu nen hian chhuak nghal rawh u" Boomer chuan a ti khur khur a, a aw a vinin a ring hle. Hrechak zet a June a awm ve reng vangin speaker ka on a, a lo nui hak hak chu ngaithei lovin ka tlawh chawrh a, nui reng chungin a kâ a hup. 

"Boomer..boomshakalaka, i tv en kha a ring ka mu thei lo. I naupanlai a i cute theih tehreng nen, tunah chuan ramhuai i nih hi. Kha i mit pawh a tung ut alawm, i sual lutuk hi setana takngial pawn a zahpui che" Daisy chuan a ti ve hlak hlak a, ka lo thaw halh. Ka pa leh Nu Hriatpuii te thawm hriattur awm ve lo tak chuan min ti thinur. Mi'n an hriat hmain khap dai vat se ţha tur. 

"Cute leh fel min tih ka ngai lo ve..Dai zau" Boomer chuan a ti bul hmuk. "Nih leh i cube a i sual bawk" Daisy chuan a ti veleh zat. Puipuii leh Adika te ka ko a, min chhang thei lo. Phone an ti tawp chuang si lo. Boomer te inhau min ngaihthlak tir tur a min rawn bia an ni ringawt. 

"Ţawng tawh suh ka hnek hrep ang che" Boomer chuan ti lehin Daisy in "Min hnek tawh kha" a ti vin hlar a, June lo nui chur chur chu ka tlawh leh a, inchhung ah ka awm ve miau loh vangin tih theih ka nei tlem hle. 

"A u..an inmelh rum a nia aw" Puipuiin a rawn tih leh chuan lo thaw hakin "Khawnge ka pa?" ka ti hap a, "A hnar burh burh" a rawn ti. A beidawnthlak ve ngawt mai. 

"Theih chu nise rawn awm loh hram ka duh. Kan mo te an sual a, awm na tur dang kan nei lo anih hi. I naupanlai a min star ţhin vang hrim hrim pawn min enliam ang che" Daisy chuan a ti hmak hmak a, Boomer-a nui hawk riin a zawm.

"Huh...tehchai che hian! Thuhretu i nei em? Ka star che chuan ka lu ka hmuam ang" Boomer chuan a ti hluk a, Daisy lah zam lo, "Veng chhungin min hriat pui. I lu i hmuam thei, tunah khan hmuam nghal rawh..i huphurh deuh leh ka lu hi hmuam la, kha hmuam nghal rawh" a ti zawt zawt a, a ri bur bur a, "A u...an insual leh tawh" tih riin a zui. 

"U Daisy in Boomer a head a nia" Puipuii bawkin a tih leh lai te chuan "Kha hmuam rawh..ka lu hi hmuam rawh" Daisy ngei chuan a lo ti ve sek a, ka nin tawpah "Boomer kha phone pe ru" ka ti vin hlar. 

"Eng nge?" a rawn ti vin hluk a, "Mu nghal rawh" ka lo ti hmak. 

"I u a ni em? Vanneihi a ni em? Khawi phone kha rawn la rawh u" tiin Daisy bawk a lo inrawlh a, nin hmel zet a Boomer-a thaw hrawk ka hriat rualin "Vanneih" tih ri ka hre zui zat. 

"Enteh..ka zak ve tho a nia. In in a rawn awm hi ka duh ngai lo hrim hrim. Chhunah vawi tam tak ka nu ko haw turin ka kal ziah a, ka hriat lohin in in hi a thleng phei leh ţhin a, ka pi leh putea te, kan mo te hialin an zilh lahin a pawr pawrah a ţang a, hei min hnawhchhuah lel hi" a rawn ti zat zat. 

"Ka hria ka hria" ka ti hap a, ka mu zet tawh chu ka ţhu leh hlawl. 

"A zahthlak a, mi pangai tan chuan ţhenawm khawvengte hmuh ngamna chi pawh a ni tawh lo. In ah ka awm thei rih si lo a, ka pa leh i nu awmdan kha in duh loh takzet chuan Boomer nen tal inrem ru" ka ti a, ka hah takzet a ni. 

"A zahthlak viau na a kan ţhenawm te hi ka hmuh ngam lohna chhan tur ka hre lo. Ruat thle lup lup-a damdawi man tur duh pawn an kawmthlang lam a artui plate a chawi thla ru lai ka hmu a, Pa Zaia zurui pawh step ah a lum, a chatthla tlang a, zingah a lumna aţangin pangai deuhin a haw. Nu Puitei takngial pawh mi inhau a ngaihthlak rukna lamah gate ah a lu a ti tang a, tlangval ho puihna in a phawi thei hram. Sawi dawn chuan sawi tur a tam. Tumah kan ţha famkim lo va, ka hmuh ngam loh nachhan tur ka hre lo. Boomer hi chu a sual ve hrim hrim, mutthilh ka tum laiin U Chhams-an ring tawk, hnar ping aw tawkin 'kan ram hi kan ram a ni' a rawn ti leh auh auh ţhin a, ka hne alawm" a rawn ti buan buan. Ngawih tawp mai loh tur tih theih a tlem hle. 

"Mu tawh rawh u...nang aia naupang vek an nia, lo dawh hram hram la. Boomer pawn zan reiah ring deuhin zai ngaithla tawh suh se" tiin thubuai rem ka tum a, hmeichhia mah ni ila fa u ber hi chu kan lo pawimawh a ni. 

"Adika leh Puipuii in ti mu thei lo ve zel a, Boomer i ngaithla em?" ka tih chuan "Kha a be duh che anih hi Boomshakalaka, mitmeng aia thinlung thip beng parh pa" Daisy chuan a ti duah.

"Takzet che hian...i bialpa beng kha naupangin nihliap ah an hmang ţhin. Museum a dah an tum nghe nghe a ni lawm ni?" Boomer chuan a ti nghut nghut a, Daisy chhan lehna ngaithla lovin "Vanneih, hmeichhia a nihna haider a sawisak hrep ka duh" a rawn ti a, za lo deuhin ka lo nui lui. 

"I naute i hrem ka tih kha. Tunah pawh nangmahni vang a an la men reng kha. I khawngaih tak tak anih chuan insum la, inthunun zir rawh. I thinchhe lutuk kha thunun hram hram rawh" ka ti malh malh. 

"U Chhams a zaitir loh leh hmeichhia in 'Can a tiktok, can a tiktok' a ti reng a, ka kham. Can a tiktok tih hla pawh ka hre ngai lo" Daisy in a la rawn ti ţawk ţawk.

"I hre lo reng ang chu, chutiang hla a awm hleinem. Got a secret, can you keep it? a ti anih kha" Boomer chuan a ti hlur a, hman a kan buaipui ţhin pretty little liars kha a en ţha leh ni awm tak a ni. June a nui hak a, keipawh ka nui ve ta nge nge. A hre ţhelh ve em a ni. 

"Engpawh nise inhau tawh suh u. Phone i dah mai mai a, Adika leh Puipuiin min rawn phone nghal zel a, ka hre ve vek zel a nia. Ka pa zah turin awm la, i puitlin em kha" tiin ka zilh a, kan inbe ta reng. A zah thu a rawn sawi tam ber a, inkhelh thleng a hreh vek tawh thu nen. Ka hrethiam khawp mai. Ka nu thihna a la rei lo a, ka pa leh Nu Hriatpuii te awmzui duh dan hi mi pangai tak chuan zah lohna chi a ni lo. 

Phone ka dah veleh June chuan "I nau chu Mateo nen an inkawmngeih phian dawn nih kha" a lo ti a, a la nui vur vur reng. 

"Mateo aiin a nau na a a puitling daih zawk ang. Naupang te a hetiang a tawrh a ngai hi ka khawngaih ţhin a, a chang chuan kei aiin a puitling zawk ang tih chang ka ngah. Zanin chu a mize diktak a chhuak ve niin ka hria" ka tih chuan "Chu a inthup chi a ni maw?" a lo ti a, a hriatthiam loh hmel viau. 

"A ţul a ti niang..a ţhiante nen ho lam deuh deuhin an khawsa ve fo alawm. A la naupang a, inchhung khur ngaihven chiam rual a la ni lo. Ţhiante nen a intihlim rual lek a la nia, mahse ka nu thih hnu kha chuan a mize hlui kha a bo vek. A tak ngul reng a, min hnem tu zawk anih chang a tam. Zanin ang khan a ţawng duah ngai lo va, thu ho mai mai a sawi ngai lo. I ngaihthlak zawh tak kha chu ka nu awm loh hma a mizia ang chiah anih kha. A puitlin tho rualin a inti puitling chawp nasa" ka ti duah. 

"A khawngaihthlak anih chu. Thil a nih tur ang ang a ni vek tawh a, intihlim rawh se. Lo indawm kun tlawk tlawk tawh suh se" ti dap dap chung a a tho chu a nui chhuak hak. 

"Eng nge?" ka lo tih chuan Jessie khum lam a kawk a, "A muttui poh leh a ang zau. A ân lai sawn ka va ham vak dawn mawnle" a ti a, ka lo nuih liam mai. Ka rilru chu kolasib a kan inah daih a awm. 

Zing ka thawh rualin Jessie ang hlak hlak ka hria a, a chhan ka zawh chuan "June hian ka kâ a rawn ham" a lo ti vin hlar. A meng nur hle a, a thinrim viau anih hmel. A ham ta nge nge anih dawn chu. 

"A harh chiang asin aw..ban vai vak vak chungin a rawn ţhu chhuak" nui hak hak chungin June chuan a lo ti a, a sam a huh hlap a, a lo inbual leh thlap tawh tihna. 

"Ka harh ve bawk lohin..vawikhatmah min ham tawh suh ang che" a ti hlak hlak a, a che ri bur bur mai.

"Ngatinge i mutthilh apiangin i ân phuau zel? Chip ve mai la, kan ham miah lo ang che" June in a tih chuan "Ka hnar kua a tet em hi..thaw sek sek lo a thawk huau huau ka duh tihna a ni mai lawm. I kezungpui pawh rul lu a an em kha, kan rek chawt chawt bik a mi? I ke kan hmuh apiangin kan tlanchhe chawn chawn chuang hleinem" Jessie in a ti a, "Min ham nasa ropui si, a force kha a na lutuk, ka biang a ţeh vek" a ti niah niah a, a thin a rim khawp mai. 

Inhau zo chiah e ti lo chuan cafe ah kan kal a, Mateo a lo awm vang tawh. Gabriel Angel-a ka zawng deuh na a hmuh tur a la awm lo. Ka ţhutfel rual a ka bul a June rawn ţhut tum chu Mateo pek chuan a lo nam sawn a, amah zawk a rawn ţhu thla hnawk. 

"Lucky hair ka nei a" phur zet a tih pahin a nghawng a lucky hair awm chu min kawhhmuh a, "Hming ka phuah fel der tawh" a tih zawm zat. 

"Peng hair a mi?" ka lo tih fiamthu chuan nui ruh ruh chungin lu a thing a, "I hming chawiin Vanneii ka ti (h) silent aw" a rawn ti deuh kher. June leh Jessie te lo nui put put chu ka melh ralh phawt a, "Khawi ka lo pawt thla ang" tih pahin Mateo ka kuai dak zui zat. 

"Ka phal awkawng lo..Vanneii tello chuan engmah ka ni lo, ka dam zo lo ang" a ti vel a, a nghawng a lucky hair awmna chu a tuai pah vel. A va han over tak. 

"Aw ti rawh..tikhan dah mai mai rawh se. Lucky hair a neih chuan dam te pawh a dam rei deuh ang" tiin June in a lo thlawp leh thlap. 

"Kan veng pitar pawn a nei a dam rei tak a ni. A lucky hair vang liau liau a dam rei a nia, a tu te ro a khawm leh vek" Mateo chuan a lo ti veleh nghal zat a, ka kut a rawn vawn chuan ka lo thlek ha. 

"Nizan chu thli thaw vuk vuk khan i hming an lam reng a, ka ngaih lehzual phah che" a ti mauh mai. A nui duh der si lo va, nuih luih tum mah ila nuih chiam a nuam miah lo.

"I daw thei emai..thli thawt dan leh ka hming thluk a in ang lo hrim hrim" ka tih laiin hnai tawkah min rawn bih. A mitmeng fim kak chuan chiang zetin min en a, midang chu awm lo ang hmiahah a ngai. 

"Ka ngai tak tak che" a tih laiin a chal a ri thlawp a, a dak zui awrh. Kan inhnaih em vangin Mateo rawn beng tu chuan ka hmai pawh a rawn tawk tel. 

"Nu Hlimi te hian tho an ngah. Zingkar karah" Muankima chuan a rawn ti sup a, Mateo pawn tum burin a chal a tuai. 

"Awm rem deuh phei ila chu min beng na dawn anih kha Lalmuankim. Cafe ah hian eng tho mah a awm lo. Min thik a nih kha" a ti hluk hluk a, Muankima ka melh hrak. 

"Ka awm hnaih lutuk kha i rawn hmu mawh viau a ni maw?" ring leng lung a Mateo bawkin a tih lai chuan Muankiman dar a kan uk a, min kalpelin hmun dangah a ţhu daih. 

"I dah deuh awrh lai a i meng phar vel kha a nuihzatthlak" tiin June leh Jessie te an lo nui hak hak a, kan Mateo pui chu a nui ve duh der lo. 

"Thikthu chhe ber bur. Ka duh nu a nihpui daih hi ka thik ve tho" a ti a, keimah zawk chu thip zet a min melhin "Min duh zawk ve mai ta che" a ti nghek. 

"I chhaw emai" ti sepin Nu Hlimi coffee rawn dah chu ka in a, a sa lutuk chu ka kawchhung thlengin a kang thla vekin ka hria. 

Coffee in zawh a Muankima chhuak nulh chu ka umzui a, "Kal rual ang aw..ka hman hunah ka rawn hrilh che nga i rualin ka kal duh a nia" ti mawlh mawlh chungin a hnungah ka kal zel. 

An building kawt a a din hnuah "Scooty ka keng chhuak khat lutuk a ka khalh peih lo vek tawh. Kalpui tur i nei chuang lo i rualin ka kal dawn" ka ti leh a, a rawn hawi lo va, ka pawh mai ngam bik lo. 

"Ka sawi i hre lo mi?" ring leh vin deuh zawkin ka ti leh a, min la chhang chuang lo. 

Ka ning deuh hlek chuan "Ka sawi i hre lo mi Lalmuankim?" ka ti vin ta hlar.

"Hre ve e...hostel a awm zawng zawng, muhil lai mek te pawn an hre pha vek ang chu i au rin nasat kha" a ti hluk hluk a, min en tum a a rawn leh hawi pawn a hmel a la dur khup. 

"I hriat chuan min chhang mai ta che" ka tih chuan "Kha tho lianpui bulah khan i la nui har har ang chu ka ti" ngeiawm fahran hian a ti a, ka nui hak. 

"I thik a ni maw?" ka tih lahin "Naupang thik rual ka ni lo" a ti bul hmuk bawk sia, a thik zia a thup vek seng der si lo. 

"Thik lo mai teh..Boomer ka en ang chiahin ka en" ka tih chuan "Daw hlek suh..Boomer hmaah no deuhin i chhing siar siar ngai lo" a ti hluk hluk a, Gabriel-a nui hawk thawm ka hriat chuan a awm ve tih ka hre chiah. 

Kekawrbul ha in kawr a ha lo va, towel a bat a, toothbrush a hmuam tut bawk. Hepa hi ka ring dik lo zo vek tawh. 

"Nichin a i sawi kha keipawn ka hre pha. Muankim ka hre pha aw, hostel a awm zawng zawngin kan hre pha vek" a rawn ti ve duah. 

"Lo inrawlh ve lo mai teh" ka tih te chuan "Nangmah vang liau liauin a tho hma a, Mateo penglengleng-an a lo thawh khalh leh hman pek a ni maw? Kha tho lianpui kha" a ti lehzel a, kei chauh ni lo, Muankima thleng a chhaih buai a tum. Miin buaina kan neih lai a min nuihsawh vel hi a nuam tih ber alawm. 

"Chaw ei khamah insiam nghal ang che" khauh zet hian Muankima chuan a lo ti a, "Aw le..nau ang chiahin ka en tak tak ania, a lawmawm sia, nautelem angin a ni zawk mah" ka tih chuan "Nautelem hrang anih chu" ti hlukin a inher vut a, a kal nghal nul nul. Gabriel-a a lo la nui huk huk thung. 

"Mateo nautelem hrang, awii a rapthlak..ka rap vel reuh zia chu" a ti nem lui duai a, hlau ang tak a tawm chawi chawi chungin an room bul bathroom a pan a, eng nge maw a hriat ni? Khatiang zia kha a ni miah si lo a, ze hran hran a nei niin ka hre ber. 

"June, nizan a Vulmawiin thih a phuin i hria em ni tih ang reng vel a Gabriel-a bul a a sawi kha Josephine a ni em?" thawmhnaw hak tur thlan kual pah hian ka ti a, Jessie a awm lo a, midang kan enthlak thu a sawi rin ngam. 

"Josephine lo tu dang nge ni se i tih? Vulmawii hian eng emaw hriat a nei aniang. Nimin tlai aţang tawhin Muankima leh Gabriel te chu an tih fek fek tawh kha" a lo ti a, Josephine thihna ah a inhnamhnawih ka ring hlawl lo.

"A ruang hi phawrh leh se endik se ka ti. Heti ringawt chuan rilru nuam lo deuhin kan awm reng a, kan inhmu sakhi vek mai dawn lawm" ka tih chuan "A chhungte berin an remti lo a, tih theih kan nei lo. I hriat reng tur chu maw..mihring hi kan landan ang ngawt kan ni ngai lo. Gabriel pawn a that maithei a, a that lo maithei bawk a, pawisawi lo ber a kan ngaih Mateo pawh a ni daih thei. A mu hlum tak tak a ni thei bawk. Tumah ring suh" a lo ti a, Mateo hming a sawi lan ve chuan ka lo nui hak. 

"Mateo berkher chuan engtikahmah a that lovang. Thlahrang a hlauh em hi, a thla in a tih ţhaih hlauin a that ngam teuh lo" ka lo ti tan tan. 

"Tumah ring lo turin ka duh che. Ka sawi ang chuan awm la a ni mai" a tih chuan "Josephine-i kawr kha a ni tak tak em? Jessie in a chhar kha amahin a rawn awm tawp tihna mi?" ka lo ti leh.

"A ni ngei alawm. A inhmeh leh hmeh loh min zawt chiam tawh a, a ni ngei tih ka chiang. Nu Hlimi secondhand zawrh lai ngei a ni bawk. A lo awm daih theih dan erawh ka hre bik lo" a ti a, a hmel enin a hre bik lo tak tak anih hmel. 

Muankima rualin ka kal ngei a, a tih ziah danin Mama pawn min lo chhaih leh. Muankima status a hmuh thu te a sawi a, "Ka rin dan vel a ni. Ţhian inti reng chung khan mitmei in inhmuh reng a, in inmelh ţhin danah khan ka hrethiam. In nih aiah min treat rawh u" a ti a, a phur khawp mai. 

June leh a ţhiannu pawh ka hmu a, an in ngeihin an hlim hmel reuh. An nui dun hak hak reng a, midang an mamawh lo khawp mai.

"June te hi an inkawmngeih phian a, Lucky ai pawn Nutei saw a pawh hmel zawk" tiin Mama pawh a phun sup sup. Muankima nen a kan inmelh dan hrechiang inti viau siin June te chu rinhlelh ngaihna a hre lo. 

"Kei aiin a hre hmasa zawk aniang chu bakah mihring inpawh deuh chi hi an awm ve hrim hrim a, mize in man deuh" tiin ka lo phat sak. An hriatchhuah ka hlau em asin. 

"Umm..chutiang chu anih hmel" tiin Mama chu a bu nghut a, a hre lo lutuk chuan nuih a ti za. 

"Weekend chu Mateo te resort a kal an tia, hostel a awm ve kher lo rawnkal tum an awm nual bawk an tia, mikhual an awm loh lai tak anih hmel" Muankima hnenah ka ti zat zat a, haw kan tum tawh. 

"Kolasib a haw i duh zawk em? I duh chuan ka haw pui ang che" a ti liam satliah na a a landanah min ngaihtuah zia a hmuh theih. 

"Nu Hriatpuii te nufa hi engtia hmachhawn tur nge ka hre lo. Nizan phei chu Boomer leh Daisy te an insual chiam a" ka tih chuan a lo nuichhuak hawk. 

"Ka naute ka bia ang a, an ngaihtuahawm loh chuan haw loh pawi ka ti lo. Boruak a uap leh churh ang a, ka ipik leh up up ang a, ka inpeih hunah chauh ka haw ang" ka tih zawm malh malh. 

"Muankim, naktuk ka birthday a nia, lawm ka tum ve deuh. Lokal ve la" inthlahrun hmel dek hian Rinpuiin a rawn ti a, zah hmel zetin a che sek mai bawk. A ţhiante pahnih pawn Muankima chu nelawm deuhin an lo nuih sang a, sawmchhuah an tum ran niin a lang. 

"Russia leh Ukraine buaina kal zelah hian eng nge i ngaihdan Rinpui?" Muankiman a tih chuan kan hawi hai tlang a ni. 

"Inrawlh ang ten min lo sawi a, hetiangah ka inrawlh ve duh tlat lo" helmet khum pah a a tih sup sup hnuah bike a dah rem a, a ţhut kai veleh lawn ve nghal turin min mitmei zui zat.

"Chutiang te ngati nge i sawi daih?" Rinpuii pawn a lo ti ha a, kei ngei pawn ka hrethiam lo. Bike a ka lawn te chu ka hawi ha ha ang ka ring. 

"Enthlak mek ka nia, ka lokal lo mai ang" a ti leh sup a, a hmel hmu lo mah ila a thutak zia ka hria, a aw ah nuihzatna a langchhuak lo hrim hrim. 

"Muankim, ngati nge min biak bo vek a?" Rinpuiin a tih leh chuan chhang lem lovin a tlan chhuak a, a kawng a vuan ţung chungin ka hawi let hram. Kan tlanchak lo a, Rinpuii te ţhianho in hrilhhai deuh a min la thlir ţhap lai chu ka hmu hman a, Muankima che maksak lutuk chuan keipawh min ti hrilhhai. Ka bang bik miah lo.

"Ngati nge khatiang khan i tih? Russia leh Ukraine i sawi chhuak daih te kha eng nge awmzia?" ka ti hmawk hmawk. 

"Sawi zui lo teh..hnar dan ka hriat chhun anih kha" a lo ti hmuk.

"Aww...ka lokal lo mai ang ti ţha ve mai la, i hnar dan kha mak i ti ve tho lo mi?" ka tih chuan "Min sawm lui tlat dawn. Tikhan sawi buai ngaihna a hre lo a, a ţha phian lo mi?" a lo ti a, a hmel la hmu thei chuang lo mah ila a nui tih ka hre thei tawh. Tih ngaihna ka hre lo lutuk chu ka nui ve tawp. 

Weekend anih chuan Boomer ka bia a, ka haw kher a ngaih loh thu a rawn sawi.

"An ninawm viau na a ka dawh thei mai ang" inla puitling fahran hian a rawn ti a, "Dai zau..i chawhmeh kan va chawk rawh" a ti zui lung lung. Daisy hi a hma khan Puipuii ten an fak vak lo va, tunah chuan ka nauin a thunun ve thei deuh ta a ni maithei. 

"Sual a chhuah loh chuan tir kual reng bik suh aw..nang aiin a upa a, i zahna lantir ve tho la. A nu i huat vangin a fanu i haw ve ringawt tur tihna a ni lo. An hnawtchhuak a, awmna tur a nei bik rih lo anih kha. I theihna ang angah chuan pui ve tho la" tiin ka zilh malh malh. Nu te tihsual hi faten kan tawrh ve chang a awm ţhin a, Daisy ber a sual loh chuan lo hmuh mawh viau ţulin ka hre lo. 

"Miin an hre tam tawh em?" ka tih chuan "Hre lo..ka ngaihven loh zawng" a rawn ti a, a ngaihven ngam lo anih ka ring mah zawk. 

"Adik ngatinge ka charcoal mask i lo bun ruah vek. Pheikhawk charna a ni lo ka tih mawlh mawlh kha" Daisy chuan a ti nang nang a, lu ruh ring ta ngang a nia, phone aţangin a ţawng ka hre pha vek. 

An inhau ri ka hre leh dawn a hria in kan inbiakna ka ti tawp vat a, resort a ka kal ve dawn thu June ka hrilh chuan a hlim khawp mai. Jessie erawh lehkhazir a duh thu sawiin kal lo tur zingah a tel. 

"Amah chiahin lo mu ang phuau rawh se" June chuan a ti kher a, ngei hmel zet a Jessie lo meng kual vel chu hmu fuhin ka nui hak hak. 

Muankima rual tho in ka kal a, chhuak tlai pawl kan nih vangin kan thlen ve meuh chuan room an lo la fel vek tawh. June nen tho kan inţawm dawn a, manager a felin mikhual an awm mang lo a, a hmun pawh a thawl nuam. 

Kan inthlak fel hnu chuan "Tui inhleuh chak siak ang u" tiin mipa ho an phur khawp mai. Kekawrbul an ha vek na a kawr an ha lo fur. Pool hi lian uchuak tak a ni lo na a intihhlimna tham a ni. 

Ka vawikhat kalna a ni lo na a ka kal apiangin a hmun nawm zia ka sawi chhuak ngei ngei. Tunah pawh "A nawm zia hi aw..hetiang hmun chu nei ila ka intithei viau ang" ka ti leh tawh a, ka bul a ţhu Muankima chuan "Kolasib ah kan siam ve dawn nia" a lo ti then. 

Ngun thluk zet a min rawn melhin "Kan inneih hunah" a ti leh sup a, ka lo nui liam mai. A awm ruak kung leh a dul thep zaih chu thlanin a bual huh dap a, a lum bawk em a ni. 

"Ka fiamthu lo..kan ramah khan. Ka pa ka dil ang a" a lo ti leh. A hmel a thutak run a, Kolasib a awm ngheh a tum bur niin a lang. 

"Aizawl angin a lun ve vak lo ang. Tlawh tu an tam loh chuan a hlawk dawn lo em asin" ka lo tih chuan "I sawibuai peih. Diakkawnah vur zuar la a ni mai lawm" min ti nek. 

Mipa ho chuan tui an inhleuh siak tak tak a, Muankima pawh a tel ve. Nuam ti ber berah a ţang a ni mah zawk. Gabriel chu keini ang bawkin kotlang ah a ţhu a, a zawn a hleuh an awm apiangin nasa tawkin ke a lo per a, a sual thiam ve ngawt mai. 

Rei tak an hleuh tawn zak zak hnuah "Aaa..tui ka lem tel zel a, ka puar tawh lutuk" Pichiu-an a rawn ti hluai a, Gabriel-a bulah a ţhu ve ta daih. 

Muankima ve thung chu ka hmaah a tawp chawt a, ka ţhutna sir tawn tawn a in nem khalhin min rawn melh chho a, "I duhtawk der a mi?" ka lo tih chuan "Lo kun teh" zawi sup hian a lo ti a, ngaihţhat lohna em em nei lova ka kun chu ka hmuiah a lo fawp. Kan chheh vel a ţhu ve fur an nih vangin an lo au dur dur a, nui thawm lah a ring. Muankima chu intithei zet hian a kiai suk a, a duh ber hmu ta ang maiin phur zetin tuiah a lut leh. 

"Hey, pool bulah hian infawh khap tih tar ang che u" ti ram hmakin Mateo chuan kan tui cheng vel min thlithlai reng tu resort a hnathawk pakhat chu a melh khui a, nui var var chung a ka va en chuan phun hlukin tui a beng per chhawk chhawk. 

Hmeichhe ţhenkhat pawh pool chhungah an lut ve tawh a, "Rawn lut ve ta che. Pool sir a inti nalh fahran a ţhu mai mai tur ringawt in mi i kal ve?" Vulmawiin a rawn ti kher. 

A ţhiannu nen ka ke an rawn pawt zeuh zeuh a, tui ka chen thiam loh vangin kotlang a ţhut hi ka duh tawk mai zel. 

"Lokal rawh" Vulmawii bawk a ni. Ka bulah a awm reng a, ka luh ve hun a nghak ran.

"Ka duh lo..tui a ka awm chuan khup chen lekah pawh ka thaw a hah dawn zel..ka ngam lo" tiin lo hnar mah ila "A hlauhawm loh. Veng tur che kan tam em hi, i boring emai" a tih pawn "Ka duh lo..ti hian ka lo en ang che u" ka ti tlat. 

"A mak e..lokal rawh ka veng ang che" a tih leh hlak chuan "Ka duh lo atih chuan tawp san mai rawh" Muankiman a rawn ti rum ul a, a mitmeng thim khup chuan Vulmawii a melh run a, a sam aţangin tui a la far tluk tluk bawk. Min ven tum ni awm takin min rawn hnaih nghal zat. 

"Ka zirtir dawn reng alawm" Vulmawiin a tih leh pawn "Inrawlh suh" a ti hmuk a, "In va han over tak. Tikhan duat no hluak la a ni mai lawm. In inneih hunah nau i paw pur pur dawn nih kha Muan thaibawih" ti hlak hlak chungin Vulmawii a inla hrang a, a koh dan vang chu nge a ţhiante lam pan a Vulmawii inhleuh phei chu Muankiman a nuih zui ruh ruh. 

Zanah chuan thawk tu ten chhuah thui an phal lo a, pool bulah bawk awmkhawmin a ţhen chuan zu an in. A thim chhah tawh a, eng lutuk an duh loh vangin eng an chhi tlem. Zu ka duh ve leh duh ve loh min rawn zawh chuan "Thei tui a tawk" ka lo ti a, intur an dah khawm ţhapna lamah chuan kalin June chuan a bul a awm te hnenah thei tui ni awm tak a zawt. Inthli sa diam a tam ve bawk em a ni. A bulah mi an awm nauh nauh reng a, tumah kan in ngaihsak lo a ni ber. Keipawn June che vel chu thlir reng lovin hmun dang ka sawi a, resort leh a chheh vel bawk ka enkual leh. 

Muankima chuan zu a in ve a, weekend anih vangin pawi ka ti lo. Mateo erawh chu a zai lung lung reng a, Zaii Hauchhum hla a sak phei chuan "I van thiam em em..Zaii Hauchhum cousin Zaia Ţiauchhum i ni ringawt" an lo ti a, a hawi larh reng mai. 

Thei tui ka in chu ka lu a hai riau a, thei tui chiah in ka nih miau vangin chhun lam a nisa ka tawrhin min hmet chau anih ka ring. Muankima lah ka hmu zo tawh bawk si lo. Hostel a awm chauh ni lo pawh kan kal nual ka tih tawh kha. Tam lutuk kan ni lo na a zu rui ho an daihzai em vangin kan lang tam hle. Thawk tu ten min rawn khap ţep tawhin ka ring. 

Ka hnaih ber a awm leh ka pindan ţawmpui June chu "Ka lo han mu ang. Ka chau riau a, Muankima i hmuh hunah i lo hrilh mai dawn nia" ka ti a, a rui ve tawh a, ngaihsam deuhin a lo aw liam puat. 

Inchhung ka luh chuan nu pakhatin "I va nawm loh hmel ve. Intihlim tur a kal hlim tak tak hman lovin i ruih bosan dawn ni maw?" tiin min lo fiam a, ka luhai chu ka chiang lo ruai a, a hmelţha takzet tih bak a landan sawifiah theih ka nei lo.

"Ka luhai deuh a" ka ti bah nawk a, chahbi ka lak hnuah inti harh lui hram hramin kan pindan ka zawng. Kan room ah chuan ka indap lut rawk rawk a ni ber tawh a, kawngkhar ka kalh ţhat leh ţhat loh ngaihtuah lek lovin khumah ka bawk thlawp. Ka vai ruai a, thil dang hriat zui em em ka nei tawh lo. 

Zing ka thawh chuan kawr ka ha lo va, kawrhnuai chu ka ha. Ka indap rawk rawk a, kekawr pawh ka ha diam. Ka lu a la nuam chiah lo na a zan lam ai chuan ka zia, ka luhai thut leh ka mutchhuak lutuk kha ka thluak a fim hnu hian ka ngaih a ţha lo ţan bawk.

"June" ti chul chungin khum aţangin ka zuang thla a ni ber. A mu lai chu ka sawi nawk nawk a, rum ţuah ţuah chungin a rawn meng. 

"Engtin nge ka awm? Ka kawr te a inphelh daih" ka tih chuan mit chhing leh in a nui var var a, "Ka hak tir che anih kha. Zu ka in duh lo i ti vel a, Muankima nen in in leh tho a mi? Ruak vekin alawm a kalsan che" mutchhuak aw zet a a ti phei chu "Maw? Muankima a lokal maw? Engmah ka hre lo tak tak ania June. Ka muhil nghal daih alawm" ka ti chul a, ka mangang lutuk chu ka ţap nghal pur.

"Muankima lo in tu nge phelh ruak ang che?" ti a min zawh pahin a rawn ţhu chhuak a, ka hawi ka hawi a, ka thaw halh halh bawk. 

"Va hau hrep rawh. Ka rawn luh chuan nangmahin ruakin i mu. Puan takngial pawh i sin lo. Ngati nge ruak a min kalsan va ti rawh. Pindan a kalh miah lo lehnghal. Keimah lo in rawn hmu che se la chu i mualpho dawn lutuk" a ti zat zat a, harhchhuak thut ni awm takin phone zawngin ka indap rawk rawk. 

"I lukham hnuaiah ka dah. Chhuatah in ti tla daih alawm" June bawkin a lo ti leh a, Muankima biak tum a phone ka en chu a missed call a awm nual a, message pawh a tam. 

[Ka rawn hmu kawi lo mai ang che] tih te, [Min mangţha ve la] tih te, [I thinrim chuan sorry. Lei chhuah a beng ka pawt lai nen] tih te, [Naktukah ice cream lei tur kan zawng dawn nia. Thupha chawi nan] tih te, a tam mai.

"June, Muankima a lokal miah hleinem. Ka thinrim ah a ngai alawm" ti hluaiin phone chu June mutna khumah ka theh thla a, a chhiar zawh meuh chuan a phawk ve ta hra. 

"Nih chuan tu nge lo phelh ruak vek che?" a ti hriam hrak a, ka hlauthawng lutuk chu ka lungphu in ka awm a deng ri dawt dawt thei hial. Ka chiai takzet bawk. 

CONT..